(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

NAFARROAKO PARLAMENTUKO ERREGELAMENDUA

BON 14/04/2023; corr. err., BON 19/05/2023

  I. TITULUA. NAFARROAKO PARLAMENTUAREN OSAKETA

  II. TITULUA. FORU PARLAMENTARIAK

  I. KAPITULUA. Foru parlamentarien eskubideak

  II. KAPITULUA. Foru parlamentarien abantailak

  III. KAPITULUA. Foru parlamentarien eginbeharrak

  IV. KAPITULUA. Foru parlamentari izaera eskuratu, eten eta galtzea

  III. TITULUA. TALDE PARLAMENTARIOAK

  IV. TITULUA. NAFARROAKO PARLAMENTUAREN ANTOLAMENDUA

  I. KAPITULUA. Mahaia

  1. ATALA. Mahaiaren eskumenak eta jarduera

  2. ATALA. Mahaikideak

  II. KAPITULUA. Eledunen Batzarra

  III. KAPITULUA. Batzordeak eta ponentziak

  1. ATALA. Arau orokorrak

  2. ATALA. Legegintzako batzordeak

  3. ATALA. Batzorde bereziak

  4. ATALA. Europako Gaietarako Ponentzia

  IV. KAPITULUA. Osoko Bilkura

  V. KAPITULUA. Batzorde Iraunkorra

  VI. KAPITULUA. Giza baliabideak eta baliabide materialak

  V. TITULUA. FUNTZIONAMENDUARI BURUZKO ARAU OROKORRAK

  I. KAPITULUA. Bilkurak eta haietarako deialdiak

  II. KAPITULUA. Gaizerrenda

  III. KAPITULUA. Quoruma

  IV. KAPITULUA. Eztabaidak

  V. KAPITULUA. Bozketak

  VI. KAPITULUA. Bilkuren aktak

  VII. KAPITULUA. Epeak zenbatzea eta agiriak aurkeztea

  VIII. KAPITULUA. Presako prozedura

  IX. KAPITULUA. Nafarroako Parlamentuko argitalpenak eta bere lanen publizitatea

  X. KAPITULUA. Parlamentuko diziplina

  1. ATALA. Eginbehar parlamentarioak ez betetzeagatiko arauhauste eta zehapenak

  2. ATALA. Gaiari lotzeko eta ordena gordetzeko deiak

  3. ATALA. Parlamentu barruko ordena

  VI. TITULUA. LEGEGINTZAKO PROZEDURA

  I. KAPITULUA. Legegintzarako ekimena

  II. KAPITULUA. Legegintzako prozedura arrunta

  1. ATALA. Forulege proiektuak

  I.Zuzenketa motak. Zuzenketak aurkeztea.

  II.Osoko Bilkurako osoko eztabaidak.

  III.Batzordeko eztabaida.

  IV.Osoko Bilkurako eztabaida.

  2. ATALA. Forulege proposamenak

  3. ATALA. Forulege proiektu eta proposamenak erretiratzea

  III. KAPITULUA. Legegintzako prozeduraren berezitasunak

  1. ATALA. Onetsiak izateko gehiengo osoa behar duten forulege proiektu eta proposamenak

  2. ATALA. Aurrekontuei buruzko forulege proiektua

  3. ATALA. Kontu orokorrei buruzko forulege proiektua

  4. ATALA. Forulege proiektu edo proposamena irakurketa bakarrean izapidetzea

  5. ATALA. Legegintzarako eskumena batzordeei eskuordetzea

  IV. KAPITULUA. Foru legearen indarra duten gobernuaren xedapenak

  VII. TITULUA. NAFARROAKO FORU ERAENTZA BERREZARRI ETA HOBETZEARI BURUZKO LEGE ORGANIKOA ALDATZEA

  VIII. TITULUA. FORU DIPUTAZIOARI BAIMENAK EMATEA

  I. KAPITULUA. Foru Diputazioari zor publikoa jaulki, abalak eta bermeak eratu eta maileguak hartzeko baimena ematea

  II. KAPITULUA. Nafarroako Gobernuari Estatuarekin eta autonomia erkidegoekin hitzarmenak eta itunak egiteko baimena ematea

  1. ATALA. Foru Diputazioari Estatuarekin hitzarmenak egiteko baimena ematea

  2. ATALA. Foru Diputazioari autonomia erkidegoekin lankidetza hitzarmenak eta itunak egiteko baimena ematea

  3. ATALA. Arau amankomunak

  III. KAPITULUA. Nafarroako Foru Eraentza Berrezarri eta Hobetzeari buruzko Lege Organikoaren 39.2 artikuluak aipatzen duen ekimena erabili ahal izateko Foru Diputazioak behar duen baimena

  IX. TITULUA. NAFARROAREN ETA ESTATUAREN ARTEKO HITZARMEN EKONOMIKOEN IZAPIDEAK

  X. TITULUA. KONFIANTZA EMATEA ETA KENTZEA

  I. KAPITULUA. Inbestidura

  II. KAPITULUA. Erantzukizun politikoa

  III. KAPITULUA. Konfiantzaarazoa

  IV. KAPITULUA. Zentsuramozioa

  XI. TITULUA. INTERPELAZIOAK ETA GALDERAK

  I. KAPITULUA. Interpelazioak

  II. KAPITULUA. Galderak

  1. ATALA. Foru parlamentarien galderak

  2. ATALA. Herriekimeneko galderak

  III. KAPITULUA. Arau komunak

  XII. TITULUA. MOZIOAK

  XIII. TITULUA. FORU DIPUTAZIOAREN KOMUNIKAZIO, PROGRAMA EDO PLANEN ETA BESTE INFORMAZIO BATZUEN AZTERKETA ETA EZTABAIDA

  I. KAPITULUA. Gobernuaren komunikazioak

  II. KAPITULUA. Foru Diputazioak igorritako programa eta planen azterketa

  III. KAPITULUA. Nafarroako Gobernuaren agerraldiak

  XIV. TITULUA. PARLAMENTUAREN HARREMANAK KONTUEN GANBERAREKIN, NAFARROAKO FORU KOMUNITATEKO ARARTEKOAREKIN ETA NAFARROAKO FORU KOMUNITATEKO BESTE KARGU BATZUEKIN

  I. KAPITULUA. Kontuen Ganberari aholkua eskatzea eta horren Lehendakariaren agerraldiak

  II. KAPITULUA. Nafarroako Foru Komunitateko Arartekoaren txostenak

  III. KAPITULUA. Jardunbide Egokien Aldeko eta Ustelkeriaren Kontrako Bulegoaren txostenak eta Gardentasunaren Kontseiluaren oroitidazkia

  XV. TITULUA. NAFARROAKO PARLAMENTUAREN ETA EUROPAKO PARLAMENTUAREN ARTEKO HARREMANAK

  XVI. TITULUA. SENATARIEN HAUTAKETA ETA KONTUEN GANBERAKO LEHENDAKARIAREN, NAFARROAKO FORU KOMUNITATEKO ARARTEKOAREN ETA NAFARROAKO FORU KOMUNITATEKO BESTE KARGU BATZUEN IZENDAPENAK

  I. KAPITULUA. Nafarroako Foru Komunitateko senatariak hautatzea

  II. KAPITULUA. Kontuen Ganberako lehendakaria izendatzea

  III. KAPITULUA. Nafarroako Foru Komunitateko Arartekoa izendatzea

  IV. KAPITULUA. Nafarroako Foru Komunitateko Jardunbide Egokien Aldeko eta Ustelkeriaren Kontrako Bulegoko zuzendaria hautatzea

  XVII. TITULUA. DIPUTATUEN KONGRESURAKO LEGE PROPOSAMENAK, KONSTITUZIOKONTRAKOTASUNEKO ERREKURTSOAK, ESKUMEN GATAZKAK ETA BABESERREKURTSOAK

  I. KAPITULUA. Diputatuen Kongresurako lege proposamenak

  II. KAPITULUA. Konstituziokontrakotasuneko errekurtsoak eta babeserrekurtsoak

  XVIII. TITULUA. NAFARROAKO PARLAMENTUAREN EDO GORTE NAGUSIEN AGINTALDIAREN AMAIERAN IZAPIDETZEN ARI DIREN AFERAK

  XIX. TITULUA. HERRITARREN PARTEHARTZEA

  XX. TITULUA. GARDENTASUNA ETA JARDUERA PARLAMENTARIOARI BURUZKO INFORMAZIO PUBLIKOA ESKURAGARRI IZATEA

  I. KAPITULUA. Gardentasuna

  II. KAPITULUA. Informazio publikoa eskuratzea

Texto

Nafarroako Parlamentuko Osoko Bilkurak, 2023ko martxoaren 16an egindako bileran, Nafarroako Parlamentuko Erregelamendua onetsi zuen.

Legebiltzarreko Erregelamenduko 146. artikuluan ezarritakoa betez, argitara dadin agintzen da.

Iruńean, 2023ko martxoaren 17an.-Lehendakaria: Unai Hualde Iglesias.

I. TITULUA. NAFARROAKO PARLAMENTUAREN OSAKETA

1. artikulua. Egiaztatzea eta aitorpenak betetzea.

1. Foru parlamentari hautetsiek beren izaera frogatuko dute hauteskunde-organo eskudunak egindako frogagiria Parlamentuko Idazkaritza Nagusian utziz. Egintza berean, erregelamendu honetako 27. artikuluan aipatzen diren jarduera- eta ondasun-adierazpenen agiriak beteko dituzte, bai eta datu pertsonalak, jaioteguna, ohiko helbidea eta jakinarazpen ofizialetarako ematen duten helbidea jasotzen dituen agiria ere.

2. Foru parlamentariek egintza horretan nortasun txartel bat jasoko dute, Parlamentuko idazkari nagusiak izenpetua.

2. artikulua. Eratzebilkura.

Foru parlamentari hautetsiak Parlamentuko Osoko Bilkuren aretoan bilduko dira Legebiltzarraren eratze-bilkura egiteko, hauteskundeetarako deialdiak aipatzen dituen egun eta orduan edo, halakorik ezean, hauteskunde-organo eskudunak foru parlamentariak aldarrikatu ondorengo hirugarren larunbateko hamaiketan.

3. artikulua. Adineko Mahaia.

Eratze-bilkurak, hasieran, bertaratutako parlamentari hautetsietatik adinez zaharrena izanen du lehendakari. Idazkari gisa, emakumezko parlamentari gazteenak eta gizonezko parlamentari gazteenak lagunduko diote. Horiek denek Adineko Mahaia osatuko dute, zeinak jardunen baitu Parlamentuko Mahaia hautatzen den arte.

4. artikulua. Eratzebilkura irekitzea.

Lehendakariak bilkurari hasiera eman zaiola adieraziko du, eta xedatuko du legelari nagusiak edo hori ordezten duenak irakur ditzala deialdiari buruzko foru dekretua, foru parlamentari hautetsien zerrenda, hauteskunde-auzietako errekurtso ebatzigabeak, bai eta horien ebazpenak uki ditzakeen foru parlamentarien izenak ere.

5. artikulua. Zinegitea edo hitzematea.

Adineko Mahaiko lehendakariak zin egin edo hitzemanen du Nafarroako foru araubidea beti errespetatuko duela, Konstituzioari eta legeei men eginen diela eta bere karguari dagozkion betebeharrak zintzo beteko dituela, eta zin-egite edo hitzemate hori bera eskatuko die idazkariei eta, gero, gainerako parlamentari hautetsiei. Horretarako, alfabetoaren hurrenkeran dei eginen zaie.

6. artikulua. Nafarroako Parlamentuko Mahaia hautatzea.

1. Horren ondotik, Parlamentuko Mahaia osatuko duten kideak hautatuko dira: lehendakaria, bi lehendakariorde eta bi idazkari.

2. Baldin eta mahaikideak hautatzen badira foru parlamentariren baten hautapen edo aldarrikapenaren kontra aurkaratzeren bat irmoki ebazteke dagoelarik, Mahaia behin-behinekoa izanen da.

Aurkaratzerik ez badago edo izan direnak ebatzi eta ezetsi badira, Mahaia behin betikoa izanen da.

3. Baldin eta aurkaratzearen ondorioz, ordea, parlamentari kargura iristen bada hasieran aldarrikatu direnetakoa ez den pertsona bat, pertsona horrek zilegi izanen du mahaikideak berriz hauta daitezela eskatzea, Nafarroako Parlamentuko kide hautetsia dela aitortzen dion ebazpena irmo bilakatu ondorengo hamar eguneko epean.

Eskabide hori behar den epean eta forman aurkeztuz gero, lehendakariak behar diren neurriak hartuko ditu Mahaia Osoko Bilkura batean berriz hautatzeko, eskabidea aurkeztu ondoko hamar egun balioduneko epean.

4. Aurreko apartatuan aipatzen den epea igarotakoan ez bada aurkeztu beste mahaikide-hautaketa bat egiteko eskabiderik, Mahaia behin betikoa bilakatuko da.

7. artikulua. Mahaiko kide karguaren bateraezintasuna.

Bateraezinak dira Parlamentuko Mahaiko kide kargua eta Nafarroako Gobernu edo Foru Diputazioko lehendakari edo kontseilari kargua.

8. artikulua. Lehendakaria hautatzea.

1. Lehenbizi, lehendakaria hautatuko da.

2. Lehendakaria hautatu baino lehen bilkura eten eginen da. Etenaldian, foru parlamentariek hautagaiak aurkeztu ahalko dituzte, Adineko Mahaiari zuzendutako idazki bidez.

3. Bilkurari berriz ekinda, Adineko Mahaiko lehendakariak hautagaiak aldarrikatuko ditu, eta adieraziko du zer foru parlamentarik aurkeztu dituzten.

4. Lehendakaria paper bidezko bozketa sekretuz hautatuko da. Foru parlamentari bakoitzak hautagai aldarrikatuetako bakar baten izena idatzi ahalko du boto-paperean. Boto zuriek ere balioko dute. Gainerakoak baliogabeak izanen dira.

5. Foru parlamentariak izenez deituak izanen dira mahaira, alfabetoaren hurrenkeran, eta boto-txartela lehendakariari emanen diote, hark hautestontzian sar dezan. Azkenik, Adineko Mahaiko kideek bozkatuko dute eta, horien ondotik, lehendakariak, eta orduantxe amaituko da bozketa. Jarraian botoak zenbatuko dira. Horretarako, lehendakariak txartelak hautestontzitik aterako ditu eta idazkarietako batek ozenki irakurriko ditu.

6. Botoak zenbatzen amaituta, lehendakariak emaitzaren berri emanen die foru parlamentariei.

7. Foru parlamentari hautetsien gehiengo osoaren botoak jasotzen dituen hautagaia izanen da Parlamentuko lehendakari.

8. Lehenengo bozketan gehiengo hori lortzen ez bada, beste bat eginen da. Bigarren bozketan, lehenengoan boto gehien lortu duten biak soilik izan ahalko dira hautagai. Bozketa horretan boto gehien lortzen dituen hautagaia izanen da Parlamentuko lehendakari.

9. Bigarren bozketan berdinketarik gertatuz gero, hirugarrena eginen da berdindurik dauden hautagaien artean. Bozketa horretan, boto gehien lortzen duen hautagaia izanen da lehendakari.

10. Hirugarren bozketan berdinketak bere horretan badirau, hautagairik zaharrenaren alde eginen da, eta hura aldarrikatuko da lehendakari.

9. artikulua. Lehendakariordeak hautatzea.

1. Lehendakari hautetsia aldarrikaturik, bi lehendakariordeak batera hautatuko dira.

2. Bi lehendakariordeak hautatzeko, foru parlamentariek hautagaitza itxiak aurkezten ahalko dizkiote Mahaiari. Hautagaitzak sexu desberdineko bi pertsonak osatuko dituzte nahitaez. Parlamentari bakoitzak aurkeztutako hautagaitzetako baten alde emanen ahalko du botoa. Botoak zenbatu ondoren, jasotako boto-kopuruaren arabera ordenatuko dira hautagaitzak. Lehenengo lehendakariorde izanen da boto gehien jaso dituen hautagaitzatik Mahaiko lehendakariaren sexu berekoa ez den pertsona. Bigarren lehendakariorde izanen da boto gehien jaso dituen bigarren hautagaitzatik lehen lehendakariordearen sexu berekoa ez den pertsona.

3. Berdinketarik gertatuz gero, hautagairik zaharrenaren alde eginen da.

10. artikulua. Idazkariak hautatzea.

1. Bi idazkariak lehendakariordeak hautatu diren bezala hautatuko dira, aurreko artikuluan ezarritakoari jarraikiz.

2. Berdinketarik gertatuz gero, hautagairik gazteenaren alde eginen da.

11. artikulua. Eratzebilkuraren amaiera.

Idazkariak hautatzen amaituta, Adineko Mahaiko lehendakariak batera aldarrikatuko ditu mahaikide hautetsi guztiak, nork bere eserlekua hartuko du eta, hori egitean, karguaren jabetza hartuko dute. Ondoren, lehendakariak Nafarroako Parlamentua eraturik dagoela aldarrikatuko du eta bukatutzat emanen du bilkura.

12. artikulua. Parlamentua eratzearen inguruko jakinarazpena.

Parlamentuko lehendakariak Erregeari, Nazioko Gobernuko lehendakariari, Foru Diputazioko lehendakariari eta Diputatuen Kongresuko eta Senatuko lehendakariei jakinaraziko die Parlamentua eratu dela.

II. TITULUA. FORU PARLAMENTARIAK

I. KAPITULUA. Foru parlamentarien eskubideak

13. artikulua. Foru parlamentarien eskubideak.

1. Foru parlamentariek eskubidea dute Osoko Bilkuraren saioetara eta hautatuak izan diren batzordeen bilkuretara joateko, eta haietan eskubidea izanen dute hitz egiteko eta botoa emateko. Nafarroako Parlamentuko gainerako legegintzako batzordeen bilkuretara ere joan daitezke, baina ez dute haietan hitz egiteko eta botoa emateko eskubiderik izanen.

2. Foru parlamentariek eskubidea dute gutxienez ere legegintzako batzorde bateko kide izateko eta beren karguari dagozkion eskumen, abantaila eta eginkizunetan jarduteko, erregelamendu honetan ezarritakoarekin bat.

14. artikulua. Informazioa eskuratzeko eskubidea. Behar den laguntzarako eskubidea.

1. Informazioa eskuratzeko eskubidea foru parlamentariei dagokien ordezkaritza-eginkizunaren eta eginkizun parlamentarioaren funtsezko edukiaren baitakoa da. Ondorioz, beren eginkizunak hobeto betetze aldera, foru parlamentariek zilegi izanen dute Nafarroako Gobernuari, Nafarroako Foru Komunitateko Administrazioari eta haren menpeko erakunde publiko, sozietate publiko eta fundazio publikoei eskatzea administrazio horiek eginiko jarduketen ondorio diren edo beste administrazio edo entitate publiko batzuek egin arren haien esku dauden datu, txosten edo administrazio-dokumentuak, baldin eta horiek igortzearekin ez badira urratzen legez ezarritako murrizketak.

2. Foru parlamentariek informazioa eskuratzeko duten eskubideak lehentasunezko izaera du betiere eta egingarria izan behar du badin eta babesturiko eskubide edo ondasun juridikoak zaindu badaitezke informazioa neurri batean bakarrik eskuratuta, datu sentikorrak anonimizatuta edota hori ahalbidetzeko bestelako neurriak hartuta.

3. Foru parlamentariek eskatu ahalko dute, halaber, Legebiltzarreko lehendakariaren bitartez, Estatuko Administrazioko agintari, organismo eta erakundeetako eta autonomia erkidegoetako gobernu-organoetako informazioa, bai eta Europar Batasuneko erakundeetakoa ere, haien ustez nolabait Nafarroari eragiten dion informazioa bada, legerian aurreikusitako moduan. Nafarroako toki entitateetako informazioa ere eskatu ahalko du.

4. Nafarroako Foru Komunitateko Administrazioak bere aurrekontu-kudeaketako sistemarako sarbide informatikoa emanen die foru parlamentariei, zehaztuko diren baldintzetan eta sistemaren segurtasunerako beharrezkoak diren bermeekin betiere.

5. Foru parlamentariek eskubidea dute Nafarroako Gobernuko kideen eta Foru Komunitateko Administrazioko goi karguen jarduera eta interesen erregistroan sartu eta hura kontsultatzeko, jarduera-aitorpenen zatiari dagokionez betiere. Horretarako eskaera Parlamentuko lehendakariaren bitartez helaraziko zaio Foru Komunitateko Administrazioko organo eskudunari, eta gehienez ere bost eguneko epean onartu beharko da.

6. Foru parlamentariek eskubidea dute lanean jarduteko behar duten laguntza zuzenean edo beren talde parlamentarioaren bidez jasotzeko. Legebiltzarreko zerbitzuek emanen diete, bereziki, argibideei eta dokumentazioari buruzko laguntza.

15. artikulua. Informazioa eskuratzeko eskubidea izapidetzea.

1. Aurreko artikuluan aipatzen den eskaera Parlamentuko lehendakariaren bidez eginen da betiere. Eskatutako informazioa hamar eguneko epean emanen da, eskaera jakinarazi eta biharamunetik hasita. Epe hori beste bost egunez luzatu ahalko da, gehienez ere, aldez aurretik eskatuz gero.

2. Kontrako kasuan, kasuko administrazioak Parlamentuko lehendakariari jakinarazi beharko dizkio, hark eskatzaileari helaraz diezazkion, eskaera betetzea eragozten duten arrazoiak, zeinek zuzenbidean oinarrituta egon beharko baitute. Baldin eta publikoaren eskueran dauden iturri ofizialetan dauden datu, txosten edo dokumentuak eskatzen badira, Administrazioak zilegi izanen du haiek zer toki zehatzetan eskueran dauden adieraztera mugatzea, betiere eskatutakoak kopiatu ahal badira.

Dokumentazioaren kantitatea dela-eta zaila bada dokumentazio horren kopia bidaltzea, administrazio-organo eskudunak foru parlamentariaren eskueran ipiniko du eskatu den dokumentazioa, egoki deritzen oharrak idatz ditzan edota zati baten kopia lortzeko.

Informazio-eskaera bat espresuki ukatzen bada, ezezko horrek arrazoitua izan beharko du eta adierazi beharko dira erabakia justifikatzen duten arrazoi faktiko eta juridikoak, bai eta artikulu honetan eta aurrekoan ezarritakoari jarraikiz informazioaren zati bat eskuratzeko neurriak aplikatzeko ezintasuna ere.

3. Eskatutako informazioa parlamentari eskatzaileari helarazi eta hogeita hamar egun naturaleko epea igarota, informazio hori beste edozein parlamentariren esku jartzen ahal da, honek lehendakariari hala eskatuz gero.

4. Parlamentariak Administrazioren bulegoetara joan nahi badu 14. artikuluan araututako eskubidea baliatuz eskatutako informazioa eta dokumentazioa modu presentzialean kontsultatzera, gehienez ere berak aukeratutako bi pertsonaz lagunduta joan daiteke, aholkua eman diezaioten.

16. artikulua. Sartzeko eskubidearen bermea.

1. Informazioa eskuratzeko eskubidea ukatzen bada edo informazioa ez bada helarazten aurreko artikuluan ezarritakoari jarraikiz, parlamentariak Parlamentuko Mahaiari eskatu ahal dio, ezezkoaren jakinarazpena jaso edo informazioa emateko epea bukatu eta hurrengo hiru egunetan, agintari arduradunari galdegin diezaion informazioa emateko betebeharra betetzeko berehala, eta betiere eskaera jasotzen denetik hiru eguneko epe luzaezinean.

2. Parlamentariek informazioa eskuratzeko eskubidea baliatu ahal dute gardentasunaren, informazio publikoa eskuratzearen eta gobernu onaren arloko legeriak oro har ezarritako berme-mekanismoen bidez. Bide horren erabilera bateragarria da erregelamendu honetan ezarritako gainerako neurrien aplikazioarekin eta ez du horiek aplikatzea baztertzen.

3. Informazioa eskuratzea ahalbidetzeko ardura duten agintariek edo funtzionarioek aurreko apartatuetan ezarritakoa ez betetzeak ekarriko du, bidezkoa bada, gardentasunari, informazio publikoa eskuratzeari eta gobernu onari buruzko legerian jasotako zehapen-araubidea aplikatzea.

4. Informazioa ukatu edo informazio-eskaerari ez erantzutearen ondoriozko Mahaiaren errekerimendua, artikulu honen 1. apartatuan ezarritakoaren araberakoa, ez betetzeak ekar dezake, neurri gehigarri gisa eta ukitutako parlamentariak eskatzen badu, deitzen den lehen osoko bilkuran galdera ezohiko bat sartzea, ez betetzearen arrazoiei buruzkoa. Foru parlamentariaren edo bere talde parlamentarioaren irizpidearen arabera erantzuna ez bada behar bezain oinarrituta, mozio bat aurkez daiteke erabaki proposamen batekin dagokion batzordean. Mozio hori deitzen den lehenengo bilkuraren gai-zerrendan sartu beharko da.

Ez-betetzea egotzi ahal bazaio foru lege bidez independentzia funtzionala edo autonomia berezia duen erakunde bati, eskatu ahalko da haren arduradunak agerraldia egin dezan kasuko batzordean ezezkoaren arrazoiak azaltzeko, eta, bidezkoa bada, mozio bat aurkeztu ahalko da batzorde horretan aurreko paragrafoan ezarritakoari jarraikiz.

17. artikulua. Ordainsaria, laguntzak eta gastuengatiko ordainak jasotzeko eskubidea.

1. Foru parlamentariek diru kopuru bat jasoko dute, bai eta laguntzak eta gastuen ordainak ere, beren eginkizuna eraginkortasunez eta duintasunez bete ahal izateko.

Diru kopuru hori jasotzeko hiru aukera daude, eta foru parlamentari bakoitzak ordainsari-mota horietako baten alde egin beharko du, parlamentari-agiria eskuratu eta ondoko hogei eguneko epean. Eginiko aukera aldatu ahalko du hiruhileko bakoitzeko azken hamabost egun naturaletan, salbu eta Parlamenturako hauteskundeak egiten diren urtean. Nolanahi ere, ezin izanen da bi aldiz baino gehiago aldatu legegintzaldi batean zehar.

Salbuespen gisa, eta interesdunak arrazoiak azalduz eskaera egin ondoren, Mahaiak zilegi izanen du aldaketa onartzea gorago adierazitako mugei lotu gabe.

Honakoak dira modalitate horiek:

a) Aldizkako ordainsari finkoa, lanaldi osoko araubidearekin. Ordainsari-mota hori aukeratuz gero, Nafarroako Foru Komunitateko Administrazioko goi karguentzat ezarritako bateraezintasun ekonomikoen araubidea aplikatuko zaie foru parlamentariei.

b) Aldizkako ordainsari finkoa, lanaldi osoko araubiderik gabe. Ordainsari-mota hori aukeratuz gero, funtzionario publikoentzat ezarritako ordainsari-bateraezintasunen araubidea aplikatuko zaie foru parlamentariei.

c) Bertaratzearen araberako ordainsaria; alegia, deitzen zaien parlamentu-ekitaldietara bertaratzearen truke dieta bat jasotzea.

Aurreko a) eta b) letretan aipatutako ordainsariak bateraezinak dira edozein erretiro-pentsio publiko jasotzearekin.

Foru parlamentariek ordainsaria jasotzeko eskubidea izanen dute hurrengo Legebiltzarra eratu arte.

2. Nafarroako Parlamentuko Mahaiak, Eledunen Batzarrari entzun ondoren, ordainsari-mota bakoitzaren eta gastuei aurre egiteko bidezko diren laguntzen eta ordainen zenbatekoak zehaztu eta kasuan kasuko aurrekontuen barrenean sartuko ditu, eta aipaturiko organoetako kide direnenak bereiziko ditu. Halaber, ordainsari horien araubide juridikoa zehaztuko du. Ordainsariak jasotzeko baldintzen artean ezarri beharko da erregelamendu honetako 23. artikuluan aipaturiko bertaratze-betebeharra.

3. Foru parlamentariek jasotzen dituzten ordainsari guztiak tributu arloko araudi indardunari lotuta egonen dira.

4. Urtero, urtarrilean, Nafarroako Parlamentuko Aldizkari Ofizialean argitaratuko dira foru parlamentari guztiek aurreko urtean jasotako ordainsariak, edozein dela ere aukeratu duten ordainsari-mota.

18. artikulua. Tratamendu instituzionalerako eskubidea.

Parlamentariek, Legebiltzarreko kide eta, horrenbestez, Nafarroako herritarren ordezkari diren aldetik, eskubidea dute lehentasunezko tratamendu instituzional eta protokolozkoa jasotzeko, bereziki Nafarroako erakunde eta administrazioek antolaturiko ekitaldi eta jardueretan.

19. artikulua. Gizarte Segurantzan afiliatzea.

1. Aldizkako ordainsari finkoak jasotzen dituzten foru parlamentariei dagozkien Gizarte Segurantzarako kotizazioak ordainduko dira Parlamentuaren aurrekontuaren kargu.

2. Nafarroako Parlamentuak zilegi izanen du Gizarte Segurantzako erakunde kudeatzaileekin itunak izenpetzea, beharrezkoak direnak aurreko apartatuan ezarritakoa betetzeko eta Gizarte Segurantzan lehendik sarturik ez zeuden foru parlamentariak egoki den araubidean afiliatzeko.

3. Lanaldi osoko araubidean sartzen diren eta, beren lanbidearengatik, Gizarte Segurantzaz bestelako aurreikuspen sozialeko sistema batekoak diren foru parlamentariek zilegi izanen dute sistema horretan segitzeko erabakia hartzea; kasu horretan, Parlamentuak kasuan kasuko mutualitate-kotizazioak ordainduko dizkie.

II. KAPITULUA. Foru parlamentarien abantailak

20. artikulua. Bortxaezintasuna.

Foru parlamentariak, baita agintaldia bukatu eta gero ere, bortxaezinak izanen dira Parlamentuko egintzetan adierazitako iritziei eta beren karguan jardutean emandako botoei dagokienez.

21. artikulua. Immunitatea.

Foru parlamentariek immunitatea izanen dute, Nafarroako Foru Eraentza Berrezarri eta Hobetzeari buruzko Lege Organikoko 14. artikuluan ezarritako moduan.

22. artikulua. Parlamentariak atxikitzea edo atxilotzea.

Parlamentuko lehendakariak berehala hartuko ditu Legebiltzarraren eta haren kideen eskubide eta abantailak zaintzeko egokitzat jotzen dituen neurri guztiak baldin eta foru parlamentari bat atxiki edo atxilotu izanaren berri badu edo eginkizun parlamentarioa betetzea eragozten dioten beste edozein epaile- edo gobernu-jarduketaren berri badu.

III. KAPITULUA. Foru parlamentarien eginbeharrak

23. artikulua. Bilkuretara joatea.

Foru parlamentariek Osoko Bilkuretara eta kide diren batzordeen bilkuretara joateko eta beren karguari dagozkion eginbeharrak zintzoki betetzeko beharra dute, betiere erregelamendu honetan ezarritakoari lotuz.

24. artikulua. Ordena, adeitasun eta diziplina parlamentarioko arauak errespetatzea. Sekretueginbeharra.

Foru parlamentariak behartuta daude Parlamentuko ordena, adeitasuna eta diziplina errespetatzera eta jarduketa nahiz ebazpen guztien gaineko sekretua gordetzera, baldin eta horien sekretutasuna espresuki ezarrita badago erregelamendu honetan ezarritakoaren arabera.

25. artikulua. Foru parlamentarien printzipio gidariak.

1. Foru parlamentariek beren kargua bete behar dute printzipio hauei jarraikiz: zintzotasuna, onestasuna, gardentasuna, arreta, austeritatea, jardun desinteresatua, erantzukizuna eta herritarrekiko eta erakundea parlamentarioarekiko errespetua.

2. Foru parlamentariek interes publikoaren alde jardun behar dute beti, eta saihestu behar dute interes-gatazka orotan sartzea. Haien jarduna ez da egonen inoiz berarentzat edo hirugarrenentzat edonolako onura, orokorra ez dena, zuzenean edo zeharka, ez eta edonolako ordaina ere, bilatu edo lortzeko xedearen eraginpean edo horrek konprometituta. Halaber, ezin aipatu edo erabili dute beren parlamentari izaera, merkataritza, industria edo ogibide jardueretan aritzeko.

3. Foru parlamentariek, artikulu honetan xedatutakoaren arabera eta indarrean dagoen legedia betez, ezin dute onura ekonomikorik edota bestelako mesederik onartu, eskatu edo jaso izapide parlamentarioetan eragin edo jakineko alderako botoa ematearen truke.

4. Foru parlamentariek, beren eginkizunetan, uko egin behar diote opariak edo ezein mesede edo zerbitzu jasotzeari, kortesia hutsezko opariak edota Parlamentua ordezten dutenean ematen zaizkienak izan ezik. Azken horiek Parlamentuari eman beharko dizkiote.

26. artikulua. Jokabidearaudia.

1. Foru parlamentariei aplikatzekoak izanen zaizkie, oro har, Nafarroako Gobernuko kideen eta Nafarroako Foru Komunitateko Administrazioko goi-kargudunen ezarritako printzipio etiko eta jokabide-arauak.

2. Erregelamendu Batzordearen eginkizuna izanen da jokabide-kode bat onestea. Jokabide-kode horrek arautu beharko ditu, gutxienez, interesak, bateraezintasun araubidetik eta jarduera eta ondasun aitorpen-agirietatik eratorritako eginbeharrak betetzea eta urraketa kasuetarako prozedura eta ondorioak.

27. artikulua. Jarduera eta ondasun aitorpenagiriak.

1. Foru parlamentariak behartuak daude aitorpen-agiri hauek betetzera foru parlamentari izaera osoa eskuratzeko:

a) Jarduerei buruzko aitorpen-agiria.

b) Ondare-ondasunei buruzko aitorpen-agiria.

2. Jarduerei buruzko aitorpenak bilduko ditu aitortzaileak diharduen edozein lanbide-, lan- edo enpresa-jarduera -baldin eta, legeria indardunarekin bat, bateraezintasun zioa izan badaiteke- eta, orokorrean, diru-sarrerak ekartzen dituzten edo ekar ditzaketen jarduerak.

3. Ondare-ondasunei buruzko aitorpenak bilduko du aitortzailearen edozein motatako ondasun higigarri eta higiezin, eta zehatz-mehatz adieraziko ditu edozein sozietatetan duen partaidetzaren araubidea eta norainokoa eta dauzkan gordailu nahiz ordezkatze-baloreak.

4. Foru parlamentari izaera osoki eskuratzeko, hasieran aurkeztu beharko dira aitorpen-agiri horiek, eta Legebiltzarreko Mahaiak onesten duen ereduaren arabera beteko dira, zein bere aldetik bete ere.

5. Jarduerei eta ondare-ondasunei buruzko aitorpenak Interes Erregistroan jasoko dira. Erregistro hori lehendakaria zuzenean buru duela eta legelari nagusiak zaindurik osatuko da Legebiltzarrean. Erregistroa publikoa izanen da. Jarduera eta ondasunei buruzko informazioa publikoa da eta Nafarroako Parlamentuaren webgunean argitaratu behar da bi hilabeteko epean, Legebiltzarreko Mahaiak ezarritako moduan eta baldintzetan. Edonola ere, ondasunen aitorpenari buruzko informazioa argitaratzerakoan ez dira emanen kokapen datuak, ez eta titularren edo hirugarrenen pribatutasuna eta segurtasuna arriskuan jar dezaketenak ere.

6. Halaber, urte natural bakoitzean, lehen seihilekoan, foru parlamentariek jarduerei eta ondasunei buruzko beste aitorpen bat egin beharko dute. Aitortutako datuetan aldaketarik egon ez bada, aitorpen horren ordez aurreko aitorpenak berresten dituen aitorpen soila aurkez daiteke.

7. Orobat, foru parlamentari izaera galdu eta bi hilabeteko epean aurkeztu beharko dituzte aitorpen horiek foru parlamentariek.

8. Foru parlamentariek ikerketa-batzordeen esku utzi beharko dituzte pertsona fisikoen errentaren gaineko zergarako eta ondarearen gaineko zergarako egin dituzten aitorpenen kopia kautotuak, baldin eta ikerketa-batzordeek aitorpen horiek behar badituzte.

9. Legebiltzarkide izaera galdu eta bi urte igarotzen direnean, aitorpen agiriak suntsitu egin beharko dira.

28. artikulua. Bateraezintasunak.

Nafarroako Foru Eraentza Berrezarri eta Hobetzeari buruzko Lege Organikoko 15. artikuluan aipatzen den foru legeak bateraezintasunei buruz ezartzen dituen arauak bete behar dituzte foru parlamentariek. Mahaiak Osoko Bilkurara eramanen ditu foru parlamentari bakoitzaren bateragarritasun edo bateraezintasun egoerari buruzko kasuan kasuko proposamenak, foru parlamentariari entzun ondoren. Bateraezintasuna aldarrikatu eta interesdunari jakinarazi ondotik, foru parlamentariak sei egun balioduneko epea izanen du gehienez ere, Legebiltzarreko eserlekuaren eta horrekin bateraezina den karguaren artean aukeratzeko. Zein aukeratu duen Mahaiari jakinarazten ez badio, ulertuko da foru parlamentariak uko egin diola Nafarroako Parlamentuko eserlekuari.

IV. KAPITULUA. Foru parlamentari izaera eskuratu, eten eta galtzea

29. artikulua. Foru parlamentariaren osoko izaera eskuratzea.

1. Foru parlamentariaren izaera parlamentaria hautatua dela aldarrikatzen den unetik beretik eskuratzen da.

2. Foru parlamentari hautetsiek betebehar hauek guztiak betetzen dituztenean lortuko dituzte beren eskubide eta abantaila osoak:

a) Legebiltzarreko Idazkaritza Nagusian aurkeztea hauteskunde organo eskudunak emandako frogagiria.

b) 27. artikuluan aipatzen diren jarduerei eta ondasunei buruzko aitorpen-agiriak betetzea.

c) 5. artikuluan aipaturiko hitzemate edo zin-egitea gauzatzea.

3. Legebiltzarraren eratze-bilkuran hitzematen edo zin egiten ez duten foru parlamentari hautetsiek Legebiltzarreko Mahaiaren aurrean egin beharko dute geroago, hark ezartzen duen egun eta orduan.

30. artikulua. Foru parlamentarien eskubide eta betebeharrak etetea.

Foru parlamentariaren eskubide eta egin behar parlamentarioak etenik geldituko dira ondoko kasuetan:

1. Lehendakariak, Mahaiak edo Osoko Bilkurak, erregelamendu honetan ezarritako ordena eta diziplina parlamentarioko arauekin bat, etetea erabakitzen dutenean.

2. Kondena-epai irmo batek etetea dakarrenean edo hura betetzeak eginkizun parlamentarioetan jardutea ezinezkoa egiten duenean.

3. Irmo delarik auzipetze-autoa edo prozedura legeen arabera horren baliokidea den egintza, behin-behineko presoaldian dagoenean, eta horrek dirauen bitartean.

31. artikulua. Foru parlamentarien izaera galtzea.

1. Foru parlamentariak bere izaera galduko du ondoko kasuetan:

Lehena.-Epailearen erabaki irmo baten bidez hautaketa edo aldarrikapena baliogabetuz gero.

Bigarrena.-Epailearen erabaki irmo baten bidez kargu publikorako desgaitze osoko edo bereziko zigorrera kondenatuz gero.

Hirugarrena.-Hiltzen bada edo epailearen erabaki irmo baten bidez haren ezintasuna deklaratzen bada.

Laugarrena.-Agintaldia bukatuz gero, epea bete delako; hori ez da eragozpen izanen legebiltzar berria osatu arte Batzorde Iraunkorreko kide titular zein ordezkoen eginkizunak luzatzeko.

Bosgarrena.-Nafarroako Parlamentuko Mahaiaren aurrean uko eginez gero.

2. Parlamentuko Mahaiak hala deklaratuko du eta kasuko erabakia helaraziko dio Nafarroako Hauteskunde-batzordeari, honek egiaztagiria eman diezaion parlamentaria karguan ordezkatuko duenari.

III. TITULUA. TALDE PARLAMENTARIOAK

32. artikulua. Talde parlamentario bat eratzeko baldintzak.

1. Talde parlamentario bat eratzeko, beharrezkoa da gutxienez hiru foru parlamentari biltzea.

2. Foru parlamentariak ezin izanen dira inola ere talde parlamentario bat baino gehiagotako kide izan.

3. Alderdi politiko, hautesle-elkarte edo hauteskunde-koalizio batek ezin izanen du eratu talde parlamentario bat baino gehiago.

Hautagai-zerrenda berean hautaturiko foru parlamentariek ezin dute ezein kasutan talde parlamentario bereizirik eratu edo eratzen lagundu. Era berean, ezin izanen dute talde parlamentario bereizirik eratu hauteskundeetan parte hartu ez duten alderdi politikoetako kideak diren foru parlamentariek.

4. Talde parlamentarioek eskubidea eta betebeharra dute Legebiltzarrak egiten dituen bilkuretan beren kideren baten bidez ordezkatuta egoteko, erregelamendu honetan ezarritakoarekin bat.

33. artikulua. Parlamentutaldeak eratzea.

Talde parlamentario bat eratzea erabaki duten foru parlamentariek taldearen eraketaren akta igorriko diote Mahaiari, Legebiltzarraren eratze-bilkuraren egunetik zenbatzen hasita gehienez ere bost egun balioduneko epean. Taldekide guztiek izenpetu beharko dute akta hori, eta bertan jasoko dira haien guztien izen-deiturak, taldearen izena, eledunaren izen-deiturak eta eledunaren ordez arituko direnenak.

34. artikulua. Atxiki gabeko parlamentariotzat hartzea.

1. Honakoak hartuko dira atxiki gabeko parlamentaritzat:

a) Aurreko artikuluetan ezarritakoaren arabera, hauteskundeetara aurkeztu ziren hauteskunde-zerrendako alderdi politiko, hautesle-elkarte edo hauteskunde-koalizioari dagokion talde parlamentarioan sartzen ez diren foru parlamentariak.

b) Kide diren talde parlamentariotik joaten diren edo hartatik kanporatuak diren foru parlamentariak. Bi inguruabar horiek Parlamentuko Mahaiari jakinarazi beharko zaizkio, ezagut ditzan eta behar diren eraginak izan ditzaten.

2. Talde parlamentario bateko foru parlamentari gehienek, hauteskundeetara talde politiko horrek aurkeztutako hautagai-zerrendan joan arren, talde politiko hori uztea erabakitzen badute nahiz bertatik iraizten badituzte, aipatutako talde politikoan gelditzen diren foru parlamentariak izango dira talde parlamentario hori zilegitasunez osatuko dutenak ondorio guztietarako.

3. Atxiki gabeko parlamentariek legegintzaldi osoan eutsiko diote izaera horri, salbu eta hauteskundeetara aurkeztu ziren hautagai-zerrendako alderdi politikoari dagokion talde parlamentariora berriz sartzen badira, betiere haren eledunak berariaz horretarako baimena eman ondoren.

4. Atxiki gabeko parlamentariaren izaera hartzeak berarekin ekarriko du organo parlamentarioetan jatorrizko talde parlamentarioak proposatuta betetzen diren karguak eta postuak galtzea.

5. Atxiki gabeko parlamentariek izanen dituzte foru parlamentariei banaka erregelamendu bidez aitortutako eskubide berak. Mahaiari egokituko zaio, Eledunen Batzarrari entzun ondoren, eskubide horietaz baliatzearekin zerikusia duten gai guztiak ebaztea.

6. Atxiki gabeko parlamentari bakoitzak eskubidea izanen du batzorde bateko kide izateko. Batzorde hori zein den Parlamentuko Mahaiak zehaztuko du, Eledunen Batzarrak erabakia hartu ondoren, parlamentariak adierazitako lehentasunak errespetatzen ahaleginduz.

7. Legebiltzarreko Mahaiak egokitzat jotzen dituen bitarteko materialak emanen dizkie atxiki gabeko parlamentariei, beren eginkizunak bete ditzaten, eta soilik 17. artikuluan aurreikusitako sari ekonomikoak egokituko zaizkie.

35. artikulua. Talde parlamentarioan geroago sartzea.

1. Foru parlamentari izaera Nafarroako Parlamentuaren eratze-bilkuraren ondoren lortzen duten foru parlamentariek hauteskundeetara aurkeztu ziren hauteskunde-zerrendako alderdi politiko, hautesle-elkarte edo hauteskunde-koalizioari dagokion talde parlamentarioan sartu beharko dute parlamentari izaera lortu eta bost eguneko epean, Legebiltzarreko Mahaiari egindako idazki baten bidez. Idazki horretan jasota geratu beharko da taldearen eledunaren oniritzia. Hauteskunde-zerrenda horretako kideek ezin izan badute talde berekirik sortu, talde mistoan sartuko dira.

2. Dagokien taldean sartzen ez diren parlamentariak atxiki gabeko parlamentaritzat hartuko dira.

36. artikulua. Talde parlamentario bat automatikoki desegitea.

1. Baldin eta, mistoa ez beste talde parlamentario bat eratu eta gero, talde hori bi kide baino gutxiagorekin gelditzen bada, taldea automatikoki deseginen da, eta haren kideak automatikoki pasatuko dira talde mistoko kide izatera.

2. Baldin eta talde parlamentario bat eratu eta gero, kide bat aldi batez galtzeagatik talde horretan bi kide baino gutxiago geratzen badira, talde parlamentario gisa iraunen du foru parlamentari berriak bere karguaren jabetza hartu eta bost egun pasatu arte.

Bost eguneko epea iraganik, foru parlamentaria ez bada sartu talde parlamentario gisa iraun duen taldean, talde hori desegin eginen da eta haren kideak automatikoki pasatuko dira talde mistokoak izatera.

37. artikulua. Talde mistoa.

1. Aurreko artikuluan aipatzen diren parlamentariez gain, talde mistoko kide izanen dira 32.1 artikuluak talde parlamentario berekia eratu ahal izateko ezartzen duen gutxieneko parlamentari kopurura iristen ez diren alderdi politiko, hautesle-elkarte edo hauteskunde-koalizioetako foru parlamentariak.

2. Eztabaidetan, talde mistoko kideen mintzaldien multzo osoak talde parlamentario baten mintzaldiaren iraupen bera izanen du. Denbora kideen artean banatuko da, foru parlamentarien elkarteetakoak barne, taldea osatzen duten alderdi politikoen zenbakizko garrantziaren proportzioan, eta zilegi izanen dute elkarri lagatzea hitz egiteko denbora.

3. Irizpide bera erabiliko da talde mistoko parlamentariei batzordeetan dagozkien eserleku guztiak banatzeko. Horretarako, taldeak proposamen bat aurkeztu ahalko dio Mahaiari, taldeko kide guztiek sinaturik, adostasunaren erakusgarri.

Proposamenik ezean, Legebiltzarreko Mahaiak erabakiko du eserlekuen banaketa, taldeko kideei entzun ondoren.

Edonola ere, talde mistoa osatzen duten alderdi politikoetako bakoitzak 64. artikuluan aurreikusitako ponentzietan parte hartzeko eskubidea izanen du.

4. Batzordeen bilkuretan, talde mistoko parlamentariek elkar ordeztu dezakete, batzordeko Mahaiari igorritako idazki baten bidez, titularrak eta ordezkoak izenpeturik, adostasunaren frogagarri.

5. Ulertuko da edozein ekimen parlamentario talde mistoko kide guztiak ados jarrita egin dela, kontrakorik ez bada adierazten espresuki.

6. Aurreko apartatuan ezarritakoa ez da eragozpen izanen talde mistoko kideek, nork bere sinadura soilarekin eta bere izenean, edozein ekimen parlamentario abiatzeko.

7. Kideek besterik ez badute espresuki erabakitzen, alderdi politiko desberdinetako parlamentariz, foru parlamentarioen elkarteak barne, osaturiko talde parlamentario mistoaren eledun-kargua txandaka beteko da, boto kopuru handiena lortu duen hautagaitzatik hasita. Eledun-kargua aldi baterako beteko da, alderdi politiko bakoitzak lortutako boto kopuruaren proportzioan.

8. Talde parlamentario mistoa foru parlamentarien elkartez bakarrik osatuta dagoenean, taldeak ez du eledunik izanen.

38. artikulua. Foru parlamentarien elkarteak.

1. Talde politiko bat bere horretan hauteskundeetara aurkeztu eta atera dituen foru parlamentariak talde parlamentario mistoan badaude, eta bi baino gutxiago ez badira, foru parlamentarien elkarte gisa eratu ahalko dira.

2. Talde mistoko foru parlamentariak ezin izanen dira inola ere foru parlamentarien elkarte bat baino gehiagotako kide izan.

3. 1. apartatuan ezarritako baldintzak betetzen dituzten talde mistoko foru parlamentariek foru parlamentarien elkarte gisa eratu ahalko dira, Parlamentuko Mahaiari zuzendutako idazki baten bidez, Legebiltzarraren eratze-bilkuraren egunetik edota 36. artikuluan xedatutakoaren arabera talde parlamentario bat automatikoki desegiten denetik hasi eta hurrengo bost egunetan. Idazki hori elkartea osatu nahi duten guztiek sinatuta egon beharko du eta bertan agertuko dira elkartearen izena eta, era berean, kide guztien izenak, elkartearen ordezkariaren izena eta hura ordezka dezakeenaren izena ere agertuko dira. Elkartearen izenak ezin izanen du jadanik eratutako talde parlamentarioen izenekiko nahasbiderik sortu. Alderdi edo hauteskunde-koalizio bereko foru parlamentariek ezin izanen dute inola ere elkarte bereizirik eratu.

Era berean, ezin izanen dute elkarte bereizirik eratu hauteskundeen garaian hauteskunde horietan parte hartu ez duten alderdi politikoetako kide ziren foru parlamentariek.

4. Eledunen batzarretara, talde parlamentario mistoaren baitan eratutako elkarteetako ordezkariak joan ahalko dira, hitz egiteko eskubidearekin eta boto haztatuarekin, artikulu honetan ezarritakoarekin bat.

5. Foru parlamentarien elkarteetako parlamentariak batzordeetara joatea eta bilkura bakoitzeko mintzaldien iraupena aurreko artikuluaren bigarren apartatuan xedatutakoaren arabera zehaztuko dira.

6. Foru parlamentarien elkarteetako kideek edozein ekimen parlamentario aurkeztu ahalko dute, nork bere sinadura soilarekin eta bere izenean. Hala ere, kide guztiek sinaturiko ekimenek ez dituzte izanen talde parlamentarioei aitorturiko ondorio berak.

39. artikulua. Talde parlamentarioen eta foru parlamentarien elkarteen baliabideak. Dirulaguntzen kontrola.

1. Parlamentuak, talde parlamentarioek eta foru parlamentarien elkarteek beren eginkizunak bete ahal ditzaten, toki eta baliabide aski jarriko ditu haien esku. Hartara, dirulaguntza finko bat emanen die Parlamentuaren aurrekontuaren kargura, berdina guztientzat, eta beste bat, aldakorra, talde bakoitzak duen parlamentari kopuruaren araberakoa.

Parlamentuko Mahaiak banatuko ditu talde mistoaren baliabide materialak eta giza baliabideak, kasua bada, hura osatzen duten foru parlamentarien elkarteen artean, talde bakoitzaren kide kopuruaren arabera.

2. Legebiltzarreko Mahaiak ezarriko ditu, Eledunen Batzarrari entzun ondoren, diru kopuru horren zenbatekoa, mota eta hori jasotzeko betebeharrak. Erregelamendu honetako 32.4 artikuluan ezartzen den bilkuretara joan beharra izanen da betebehar horietako bat.

3. Talde parlamentarioek eta foru parlamentarien elkarteek Nafarroako Parlamentuaren aurrekontuaren kargura jasotzen dituzten dirulaguntzen berariazko kontabilitatea eramanen dute, eta Mahaiaren esku utziko dute urtero edo eskatzen zaien edozein unetan.

4. Talde parlamentarioek eta foru parlamentarien elkarteek autonomia izanen dute beren antolamendua eta barne jarduketa ezartzeko.

40. artikulua. Taldeartekoak.

1. Mahaiak, bi talde parlamentarioren edo Parlamentuko kideen bosten baten ekimenez eta Eledunen Batzarrarekin bat, taldearteko parlamentarioak eratzea erabaki ahalko du.

2. Taldearteko parlamentarioek honako eginkizunak izanen dituzte:

a) Ikerketarako eta berrikuntza ideologiko eta sozialerako azterlanak eta mugimenduak sustatzea.

b) Babes berezia behar duten pertsona edo taldeek bizi dituzten egoerei buruzko gizarte sentsibilizazioa sustatzea.

c) Beste herri, herrialde eta kultura batzuekiko elkartasun eta adiskidetasun harremanak sustatzea.

3. Taldearteko parlamentarioak talde parlamentario bakoitzeko kide batez osatuta daude, eta koordinatzaile bat dute, kideek boto haztatuaren bidez hautatua, taldeartekoaren ordezkari izateaz gain, haren bilkurak deitu eta haietan buru izanen dena.

4. Era berean, taldeartekoak boto haztatuaren bidez hartuko ditu erabakiak.

5. Taldearteko parlamentarioen lanetan parte hartu ahalko dute espezialistek, teknikariek edota herritarren entitateetako kideek. Parlamentuan egiten diren bilkuretara joan ahalko dira, baina haien kopurua ez da izanen parlamentarien kopurua baino handiagoa.

6. Parlamentuak taldeartekoen eskura jarri behar ditu esleituta dituen eginkizunak bete ahal izateko behar dituen giza baliabide nahiz baliabide materialak.

7. Taldearteko parlamentarioen lan bilerak publikoak izan ahalko dira, kideen gehiengoak hala erabakitzen badu.

8. Taldearteko parlamentarioek ezin izanen dute ekimen edo izapidetze parlamentariorik sustatu, ez eta Parlamentuaren edo bere organoen jarduera ofizialekiko nahasbidea sor dezakeen jarduerarik gauzatu ere.

IV. TITULUA. NAFARROAKO PARLAMENTUAREN ANTOLAMENDUA

I. KAPITULUA. Mahaia

1. ATALA. Mahaiaren eskumenak eta jarduera

41. artikulua. Mahaiaren definizioa.

Mahaia Legebiltzarraren zuzendaritza-organoa da, Parlamentuko lehendakariaren agintaritzaren eta zuzendaritzaren menpe dihardu eta Parlamentuaren ordezkaritza kolegiatua dauka, parte hartzen duen ekitaldietan.

42. artikulua. Mahaiaren eginkizunak. Mahaiaren erabakiek aurkako errekurtsoak.

1. Mahaiari eginkizun hauek dagozkio:

Lehena.-Legebiltzarreko lanaren antolamenduak eta barne araubide eta gobernuak behar dituzten erabaki eta neurriak hartzea.

Bigarrena.-Legebiltzarrak hartutako erabakiak betetzen direla zaintzea.

Hirugarrena.-Legebiltzarreko aurrekontuaren aurreproiektua onestea.

Laugarrena.-Legebiltzarreko aurrekontuaren betetzearen zuzendaritza eta kontrola.

Bosgarrena.-Legebiltzarraren gastuak antolatzea; hori ez da eragozpen izanen eskuordetzeak egiteko.

Seigarrena.-Izaera parlamentarioko idazki eta agiriak erregelamendu honen arabera eta Eledunen Batzarrari entzun ondoren kalifikatzea eta horiek onartzekoak diren ala ez deklaratzea.

Zazpigarrena.-Erabakitzea, Eledunen Batzarrari entzun ondoren, izaera parlamentarioko idazki eta agiri guztiak erregelamendu honetan ezarritako arauei jarraituz izapidetzea, eta ezartzea, kasua bada, zer batzorde den eskudun afera bakoitzaz arduratzeko.

Zortzigarrena.-Eledunen Batzarrari entzun ondoren, bilkuraldi bakoitzerako batzordeen eta Osoko Bilkuraren jardueren egutegia ezartzea.

Bederatzigarrena.-Eledunen Batzarraren boto loteslearekin bat, arau bereziak ematea, erregelamendu honetan jaso gabekoak, beren izaeragatik halako arauak behar dituzten aferak eztabaidatzeko.

Hamargarrena.-Eledunen Batzarrari entzun ondoren, Legebiltzarraren jardunaren gardentasuna eta Nafarroako Parlamentuaren informazio publikoa eskuratzeko eskubidea bermatzeko beharrezkoak diren arauak onestea eta neurriak hartzea.

Hamaikagarrena.-Erregelamendu honek ematen dion beste edozein eginkizun eta, era berean, organo berezi bati esleiturik ez daudenak.

2. Talde parlamentario, foru parlamentarien elkarte edo foru parlamentariren bat ados ez badago Mahaiak aurreko apartatuan adierazitako seigarren eta zazpigarren eginkizunetan jardutean hartutako erabakiarekin, erabakia berraztertzeko eskatu ahalko dio Parlamentuko Mahaiari berari, erabakia jakinarazi edo argitaratu ondorengo bi eguneko epean. Berraztertzeko eskaera aurkezteak eten eginen du erabakiaren izapidetzea lau eguneko gehienezko epean ebazpen arrazoitu bat eman arte, Eledunen Batzarrari entzun ondoren.

Ebazpen horren aurka talde parlamentarioak, foru parlamentarien elkarteak edo foru parlamentariren batek errekurtsoa aurkeztu ahalko du Eledunen Batzarraren aurrean, ebazpena jakinarazi eta hurrengo bost egunetan. Eledunen Batzarrak hartuko du behin betiko erabakia ebazpen arrazoitu baten bidez.

Horrek ez du galaraziko Mahaiak aurreko apartatuan adierazitako seigarren eta zazpigarren eginkizunetan jardutean hartutako erabakiari buruzko errekurtsoa zuzenean aurkeztea Eledunen Batzarrari, erabakia jakinarazi edo argitaratu ondorengo bost eguneko epean. Hark behin betikoz erabakiko du, ebazpen arrazoitu baten bidez.

3. Mahaiak 1. apartatuko lehenengo eta bosgarren eginkizunak erregelamendu bidez esleitu ahalko dizkie Nafarroako Parlamentuko Administrazioko beste organo batzuei.

43. artikulua. Mahaiaren deialdia. Aholkularitza. Partehartzea.

1. Lehendakariak deituko ditu Mahaiaren bilkurak, berak hala erabakita edo gutxienez ere bi mahaikidek hala eskatuta. Eskabide horrek, betiere, gai-zerrenda eduki beharko du. Eskabideak betebehar hori betetzen badu, lehendakariak bilkurara dei eginen du, proposatutako gai-zerrendarekin bat. Gehienez ere hamar egun balioduneko epean eginen da.

2. Mahaiari Parlamentuko legelari nagusiak edo horren ordezko legelariak emanen dizkio aholkuak. Legelari hark eginen du bilkuren akta eta zainduko du, lehendakariaren zuzendaritzapean, erabakiak betetzen direla.

3. Mahaiaren bilkuretan parte hartu ahalko du Mahaian ordezkaritzarik ez duten talde parlamentarioetako edo foru parlamentarien elkarteetako parlamentari batek, hala eskatzen badu, hitzarekin baina botorik gabe.

2. ATALA. Mahaikideak

44. artikulua. Hautaketa. Postu hutsak betetzea. Karguuztea.

1. Osoko Bilkurak hautatuko ditu mahaikideak, Parlamentuaren eratze-bilkuran, erregelamendu honetako I. tituluan ezarritakoarekin bat.

2. Osoko Bilkurak hautatuta beteko dira Mahaian legegintzaldian zehar hutsik gelditzen diren postuak, lehendakariari haiek jakinarazi eta hamabost eguneko epean eta erregelamendu honetako I. tituluan ezarritako moduan, zeina bete beharreko postu hutsen errealitatera egokituko baita.

3. Legebiltzarreko lehendakariak eta gainerako mahaikideek izaera hori galduko dute:

a) Foru parlamentari izaera galduz gero.

b) Karguari uko eginez gero.

c) Kargu-utzarazpenagatik edo kargutik kentzeagatik, Legebiltzarraren Osoko Bilkurak legebiltzarkideen hiru bosteneko gehiengoaren bidez hala erabakita.

d) Bere talde parlamentarioko kide izateari utziz gero.

4. Aurreko apartatuko c) letran ezarritakoaren ondorioetarako, ondoko prozedurari jarraituko zaio:

a) Gutxienez ere Parlamentuko kideen hiru bostenek edo kopuru hori biltzen duten talde parlamentarioek proposatu beharko dute kargu-uztea.

b) Proposamen hori aurkeztu eta zazpi eguneko epean, Parlamentuko lehendakariak, Legebiltzarreko Mahaiarekin bat eta Eledunen Batzarrari entzun ondoren, kargu-uzteari buruz erabakitzeko Osoko Bilkurara dei eginen du. Bilkura hamar eguneko epean egin beharko da gehienez ere.

c) Kargu-uzteko proposamena onesten ez bada, proposamena sinatu dutenek ezin izanen dute beste bat aurkeztu bilkuraldi berean.

d) Kargu-uzteko proposamena onesten bada, bete gabeko kargua edo karguak hautatuko da edo dira bilkura berean, erregelamendu honetako I. tituluan ezarritakoarekin bat.

45. artikulua. Parlamentuko lehendakaria.

1. Parlamentuko lehendakariak Legebiltzarraren ordezkaritza dauka, lanak koordinatzen ditu, ongi doazela segurtatzen, eztabaidak inpartzialtasunez eta Parlamentuari zor zaion errespetua zainduz zuzentzen ditu eta horietan ordena mantentzen du.

2. Lehendakariari dagokio Erregelamendua bete eta betearaztea eta zalantza kasuetan hura interpretatzea. Hutsune juridikorik egoteagatik ebazpen osagarririk eman behar baldin badu, Eledunen Batzarraren erabaki loteslea beharko du aldez aurretik.

Mahaikideetako edozeinek proposatuta, Legebiltzarreko Mahaiak parlamentu-eztabaidetan sortutako zalantzazko gaiei buruzko aginduzko irizpideak finkatu ahalko ditu ondoren.

3. Halaber, legeek eta erregelamendu honek ematen dizkioten eginkizun guztiak betetzen ditu lehendakariak.

46. artikulua. Parlamentuko lehendakariordeak.

Lehendakariordeek, hurrenez hurren, lehendakaria ordezten dute eta haren eginkizunak betetzen dituzte, baldin eta haren postua bete gabe badago, bete ezin badu edo ez badago, Idazkaritza Nagusiari behar bezala jakinarazita. Lehendakariak edo Mahaiak esleitzen dieten beste edozein eginkizun ere betetzen dute.

47. artikulua. Parlamentuko idazkariak.

Idazkariek, lehendakariak oniritzirik, Osoko Bilkuretako, Mahaiko nahiz Eledunen Batzarreko aktak eta eman beharreko ziurtagiriak ikuskatu eta ontzat ematen dituzte; laguntza ematen diote lehendakariari bilkuretan eztabaidetako ordena eta bozketen zuzentasuna segurtatzeko; Legebiltzarraren lanak normaltasunez egin daitezen laguntzen dute, lehendakariak xedatutakoaren arabera; eta lehendakariak edo Mahaiak esleitzen dieten beste edozein eginkizun betetzen dute.

II. KAPITULUA. Eledunen Batzarra

48. artikulua. Eledunen Batzarraren definizioa. Osaera. Bileren deialdia.

1. Talde parlamentarioetako eledunek Eledunen Batzarra osatzen dute, beti Legebiltzarreko lehendakaria buru duela bilduko dena. Lehendakariak dei eginen du Eledunen Batzarraren bilkuretara, berak erabakita, gutxienez ere bi talde parlamentariok edo Legebiltzarreko kideen bostenak eskatuta. Eskabide horrek, betiere, gai-zerrenda eduki beharko du. Eskabideak betebehar hori betetzen badu, lehendakariak bilkurara dei eginen du, proposatutako gai-zerrendarekin bat. Gehienez ere hamar egun balioduneko epean eginen da.

2. Nafarroako Gobernuari Eledunen Batzarraren bilkuren deialdien berri emanen zaio, hark, egoki baderitzo, ordezkari bat, laguntzaile batekin joan ahalko dena, igor dezan.

3. Eledunen Batzarrera orobat joanen dira Mahaiko kideak -eztabaidetan hitz egiteko eskubidea izanen dute- eta legelari nagusia edo hura ordezten duen legelaria -Mahaiari dagokionez erregelamendu honek esleitzen dizkion eginkizunak beteko ditu-.

4. Eledun bakoitzak, bere taldea edo elkartea zenbat foru parlamentarik osatzen duten, horrenbeste boto edukiko ditu batzordean.

Talde mistoaren eledunak, taldeko zenbat kidek eman dioten ordezkaritza, horrenbeste boto edukiko ditu. Idatziz frogatu beharko du ordezkaritza.

49. artikulua. Eledunen Batzarraren eginkizunak.

Eledunen Batzarrari eginkizun hauek dagozkio:

Lehena.-Aldez aurretik entzuna izatea:

a) Parlamentuko Osoko Bilkuraren saioetako eta batzordeen bilkuretako gai-zerrenda erabakitzeko.

b) Erregelamendu honetako agindu batek hala ezartzen duenean eta, bereziki, 42. artikuluan ezarritako kasuetan.

Bigarrena.-Nafarroako Parlamentuko aurrekontuaren proiektua onestea.

Hirugarrena.-Nafarroako Parlamentuko kontu orokorrak onestea.

Laugarrena.-Mahaiak hartutako erabakien berri izatea, astero.

Bosgarrena.-Mahaiak hiru hilabetetik behin Parlamentuko kontuen egoerari buruz argibideak eman diezazkion.

Seigarrena.-Adierazpen instituzionalak aho batez onestea.

Zazpigarrena.-Agintarien, funtzionarioen eta pertsonen agerraldia eskatzea, 65. artikuluan ezarritakoarekin bat.

Zortzigarrena.-Erregelamenduko 42.2 eta 149.2 artikuluetan aurreikusitako errekurtsoak ebaztea.

Bederatzigarrena.-Erregelamendu honetako beste agindu batzuetan esleitzen zaizkion gainerako eginkizunak betetzea.

III. KAPITULUA. Batzordeak eta ponentziak

1. ATALA. Arau orokorrak

50. artikulua. Batzordeak.

1. Parlamentuak eratzen dituen batzordeak legegintzakoak edo bereziak izan daitezke.

2. Legegintzako batzordeak dira, erregelamendu honetan ezarritakoez gain, Parlamentuko Osoko Bilkurak izaera horrekin sortzen dituenak.

3. Legegintzako batzordeek ekimen parlamentario oro izapidetu ahal dute, beren eskumen materialaren arabera, eta Osoko Bilkurak onetsi beharreko foru-lege proiektu edo proposamenen gaineko irizpena eman ahal duten eta erregelamendu honen 180. artikuluan ezarritakoaren arabera legegintza-eskumen osoarekin jardun ahal duten bakarrak dira.

4. Batzorde bereziak dira, erregelamendu honetan ezarritakoez gain, Parlamentuko Osoko Bilkurak izaera horrekin sortzen dituenak.

5. Batzorde bereziak lan zehatz baterako sor daitezke, bai eta erakunde edo entitate publiko jakin batzuekin harremanak izateko eginkizunarekin ere.

51. artikulua. Batzordeen osaera eta kideen izendapena eta ordezpena.

1. Batzordeak, non eta kontrakoa ezartzen ez den, talde parlamentarioek hautatzen dituzten kideek osatuko dituzte, Parlamentuko Mahaiak, Eledunen Batzarraren erabaki loteslearen ondoren, talde bakoitzari buruz ezartzen duen kopuruan eta zenbakizko garrantziaren proportzioan. Talde parlamentario bakoitzak gutxienez ordezkari bat izateko eskubidea izanen du betiere.

2. Talde parlamentarioek batzorde bati atxikiriko kideak ordeztu ditzakete, haren edo haien ordez talde bereko beste bat edo batzuk jarriz, aldez aurretik Legebiltzarreko Mahaiari idatziz jakinarazita.

Ordezpena gai, eztabaida edo bilkura bakarrerako baldin bada, batzordeko mahaiari jakinarazi beharko zaio.

3. Batzorde-aretoetan, parlamentariek atxikita dauden talde parlamentarioaren arabera hartuko dute eserlekua. Talde bakoitzarentzako gordetako tokia Mahaiak zehaztuko du, Eledunen Batzarrak erabakia hartu ondoren, talde bakoitzak adierazitako nahiaren arabera eta hauteskundeetan lortutako boto-kopuruaren hurrenkeran.

52. artikulua. Hautapena eta eratzebilkuraren deialdia.

1. Legebiltzarreko lehendakariak talde parlamentario bakoitzari eskatuko dio batzorde bakoitzerako bere ordezkariak hauta ditzala.

2. Batzordeen kide izanen diren foru parlamentariak hautatuta daudelarik, Legebiltzarreko lehendakariak batzordeen eratze-bilkuretara dei eginen du.

53. artikulua. Eratzebilkura.

Eratze-bilkuran, Legebiltzarreko lehendakaria buru eta Mahaiko idazkari bat idazkari lanetan duela, batzordeek beren kideen artetik mahai bat hautatuko dute, osatua egonen dena lehendakari batez, lehendakariorde batez eta idazkari batez.

54. artikulua. Batzordeko Mahaia hautatzea.

1. Batzordeko Mahaiko kideak aldi berean hautatuko dira, paper bidezko bozketa sekretuz. Batzordekide bakoitzak izen bakarra idatzi ahalko du paperean.

Nafarroako Gobernuko kide ez diren batzordeko kideak soilik izan ahalko dira hautagai.

2. Botoak zenbatuta, boto gehien lortzen duena izanen da lehendakari; boto kopuruan hari darraiona, lehendakariorde, eta horiei boto kopuruetan darraiena, idazkari.

3. Berdinketa gertatuz gero bai lehendakari izateko bai lehendakariorde izateko, zaharrenaren alde joko da. Berdinketa idazkari izateko gertatzen bada, berriz, gazteena hautatuko da.

4. Bozketa egin eta Mahaiko karguren bat bete gabe gelditzen bada, bi zaharrenak aldarrikatuko dira, hurrenez hurren, lehendakari eta lehendakariorde, baldin eta horiek badira bete gabeko karguak, eta idazkari, aldiz, gazteena.

55. artikulua. Batzordeetako mahaikideen karguuztea.

Erregelamendu honetako 44. artikuluko 3. eta 4. apartatuetan xedatutakoa batzordeetako mahaietako kideei aplikatuko zaie, berezitasun hauekin:

a) Kargua uztea edo kargutik kentzea batzordeak erabakiko du, hura osatzen duten kideen hiru bosteneko gehiengoaren bidez.

b) Kargua uztea bi talde parlamentariok edo batzordeko kideen bostenak proposatu beharko du.

c) Kargua utzi edo kargutik kentzeko proposamena aurkeztu eta hamabost eguneko epean, batzordeko lehendakariak, haren bilkurara dei eginen du, erregelamendu honetako 59. artikuluan ezarritakoarekin bat.

56. artikulua. Batzordeetako mahaikideen eginkizunak.

1. Kasuan kasuko batzordearen esparruan, bai mahaiak, bai mahaiko kide guztiek, analogiaz, erregelamendu honetan Legebiltzarreko Mahaiari eta haren kideei ematen zaizkien eginkizunak beteko dituzte.

2. Parlamentuko lehendakaria edozein batzordetako buru izan daiteke, baina kide den batzordeetan bakarrik eman ahalko du botoa.

57. artikulua. Batzordeetako mahaikideen ordezpena.

1. Batzordeetako mahaietan, lehendakariaren postua bete gabe badago, bete ezin badu edo lehendakaria ez badago, lehendakariordeak ordeztuko du lehendakaria. Lehendakariordea ere kasu horietako batean badago, lehendakaria ordeztuko du haren talde parlamentarioaren ordezkari batek, zeinak kasuan kasuko batzordeko kide izan beharko baitu.

2. Batzordeko lehendakariordearen edo idazkariaren ordez arituko da, kasu horietan, talde parlamentario beraren ordezkari bat, kasuko batzordeko kide dena.

3. Aurreko apartatuan aipatzen diren ez-egoteak ezin badira esan bezala ordeztu, arau hauetan ezarritakoari jarraituko zaio:

a) Batzordeko lehendakariordea ez badago, batzorde horretako kideetatik adinez zaharrenak ordeztuko du.

b) Batzordeko idazkaria ez badago, batzorde horretako kideetatik adinez gazteenak ordeztuko du.

58. artikulua. Batzordeen eskumenak.

Batzordeek hartuko dute Legebiltzarreko Mahaiak Eledunen Batzarrari entzun ondoren esleitzen dizkien gaien ardura, eta, kasua bada, izapidetzen dituzten gai guztien irizpen bana prestatuko dute, hartzen diren erabakiak jasota. Erabaki horiek, Parlamentuko Mahaiaren bidez eta lehendakariaren eta idazkariaren izenpeekin, Legebiltzarraren Osoko Bilkurara eramanen dira.

59. artikulua. Bilkuren deialdiak.

1. Parlamentuko lehendakariak dei eginen du batzordeen bilkuretara, Legebiltzarreko Mahaiarekin bat eta Eledunen Batzarrari entzun ondoren, berak hala erabakita edo gutxienez ere bi talde parlamentariok edo batzorde horretako kideen bostenak eskatuta.

2. Aurreko apartatuan aipatzen den eskabideak kasuko gai-zerrenda eduki beharko du betiere. Gai-zerrenda horretan, erregelamendu honek ezarritakoarekin bat kasuan kasuko batzordean eztabaidatu eta bozkatzeko moduan dauden gaiak bakarrik agertu ahalko dira.

3. Baldin eta, legebiltzarreko Mahaiaren iritziz, Eledunen Batzarrari entzun ondoren, eskabidea aurreko apartatuan ezarritakoarekin bat badator, lehendakariak bilkurara dei eginen du, proposatutako gai-zerrendarekin bat.

60. artikulua. Batzordeen bilkuretara bertaratzea.

1. Erregelamendu honetako beste arau batzuetan ezarritakoa gorabehera, legegintzako batzordeen bilkuretara joan daitezke:

a) Hitz egiteko eta botoa emateko eskubidearekin, batzordeko kide diren foru parlamentariak edo haien ordezkoak, ordezkapena erregelamendu honetan ezarritakoarekin bat frogatuta.

b) Hitz egiteko eskubidearekin baina botoa emateko eskubiderik gabe:

- Nafarroako Gobernuko kideak.

- Batzordeko kide ez diren foru parlamentariak, batzordeak izapidetu beharreko zuzenketarik edo beste edozein ekimen parlamentario aurkeztu badute. Aipatu parlamentariek hitz egiteko eskubidea izanen dute erregelamendu honek kasuan kasuko eztabaidarako ezarritakoaren arabera.

c) Hitz egiteko eta botoa emateko eskubiderik gabe:

- Gainerako foru parlamentariak eta hedabideen ordezkari behar bezala kreditatuak, salbu eta erregelamendu honetako 88. artikuluan ezarritakoarekin bat sekretu deklaratzen diren bilkuren kasuan.

2. Ondokoak joaten ahalko dira batzorde berezien bilkuretara:

a) Hitz egiteko eta botoa emateko eskubidearekin, batzordeko kide diren foru parlamentariak edo haien ordezkoak, ordezkapena erregelamendu honetan ezarritakoarekin bat frogatuta.

b) Hizpiderik eta botorik gabe:

- Gainerako foru parlamentariak eta hedabideen ordezkari behar bezala kreditatuak, salbu eta erregelamendu honetako 88. eta 89. artikuluetan ezarritakoarekin bat sekretu deklaratzen diren bilkuren kasuan.

Batzorde berezien aurreko agerraldiak legegintzako batzordeetarako eta lan-bilkuretarako araututakoari jarraituz eginen dira.

61. artikulua. Lanbilkurak.

1. Talde parlamentarioek, foru parlamentarien elkarteek eta foru parlamentariek Mahaiari eskatu ahalko diote lan-bilkurak egin daitezen, interes publikoko edozein gairi buruz informazioa jasotzeko haien ustez beharrezkoak diren pertsona, kargu, elkarte nahiz entitateekin. Mahaiak, Eledunen Batzarrari entzun ondoren, eskatutako lan-bilkurak egin daitezen erabaki ahalko du. Bilkura horietara hedabideak joan ahalko dira, baldin eta eskatzaileak edo agerraldia egin behar duenak eskatuta Mahaiak hori erabakitzen badu.

2. Eskarian jasota ageriko dira agerraldiaren xedea nahiz deitu beharreko pertsona edo entitateak, eta, deitutakoa entitate bat baldin bada, ondokoak zehaztuko dira: haren legezko ordezkaria, helbidea, telefonoa eta agerraldira etorriko direnekin harremanetan jarri ahal izateko beste edozein datu. Batzordera bost ordezkari etorri ahalko dira gehienez ere. Pertsona edo entitate pribatuen kasuan, eskatzaileek galdetu beharko diete ea onartzen duten agerraldia egitea.

3. Batzordeko eztabaidetako arau komunei eta agerraldietarako ezarritakoei jarraikiz eginen dira lan-bilkurak, eta haietan Parlamentuko ordena eta gizalegea errespetatuko dira.

62. artikulua. Bisitak.

1. Talde parlamentarioek, foru parlamentarien elkarteek eta foru parlamentariek Mahaiari eskatu ahalko diote bisitak egin daitezen, interes publikoko edozein gairi buruz informazioa jasotzeko haien ustez beharrezkoak diren leku, zentro nahiz instalazio publiko edo pribatuetara.

2. Eskarian ondokoak ageriko dira jasota: bisitaren xedea; bisitatu beharreko leku, zentro edo entitatea; horien ardura duten pertsona edo karguak baldin eta posible bada, eta bisitatu beharreko lekua nahiz bisitaren gorabeherak zehazteko mintzakide diren pertsonak identifikatzeko beste edozein datu. Leku eta zentro pribatuen kasuan, eskatzaileek haien arduradunei galdetu beharko diete ea bisita onartzen duten.

3. Baldin eta bisitatu beharreko zentro edo lekua administrazio publiko baten menpekoa bada edo zentro itundu edo diruz lagundua bada, aldez aurretik jakinaraziko zaio bisita egiteko asmoa, eta haren lankidetza bilatuko da bisita taxuz egin dadin, eta hartara bisitaren deialdia igorriko zaio behin bisitaren eguna eta ordua zehaztuta.

4. Baldin eta bisitan zehar informazioa jasotzeko bilerarik egiten bada leku, zentro edo entitatearen ordezkariekin, batzordeko buruak kasuko arduradunarekin hitzartuko du nola eginen den bilera, lan-bilkura baten gisakoa izan ahalko baita. Baldin eta bisitatutako lekuaren arduradunengandik ez ezik bisitaren xede denarekin lotutako beste pertsona batzuengandik ere jaso nahi bada informazioa, hala ageriko da jasota bisita egiteko eskarian, eta bisitaren xede den lekuan egiten baldin bada horiekiko bilera, beharrezkoa izanen da bisitatutako lekuaren ardura duen pertsona edo agintariak horretarako baimena ematea.

63. artikulua. Aferak izapidetzeko epeak.

Batzordeek gehienez ere bi hilabeteko epean bukatu beharko dute edozein aferaren izapidetzea, salbu eta erregelamendu honek beste epe bat ezartzen duenean edo Legebiltzarreko Mahaiak, izan litezkeen gorabehera bereziak kontuan hartuta, epe hori luzatzea edo laburtzea erabakitzen duenean.

64. artikulua. Aztertzeko ponentziak.

1. Batzordeek ponentzia bat osatzea erabaki dezakete, talde parlamentario guztien ordezkariak izanen dituena, eztabaidagaiari buruzko txosten bat prestatzeko. txostenean ponentziako kideen gehiengoaren jarrera jasoko da. Horretarako, talde parlamentarioen ordezkariek norbere talde parlamentarioaren kide kopurua bezainbat boto edukiko dituzte. Talde mistoaren eledunak edo, kasua bada, parlamentarien elkarteenak, taldeko edo parlamentarien elkarteetako zenbat kidek eman dieten ordezkaritza, horrenbeste boto edukiko dituzte. Idatziz frogatu beharko dute ordezkaritza.

Ponentzia bat eratzen denean, zehaztuko da batzordeko kideei zer epetan emanen zaien ezagutzera haren txostena, eta zein egunetan helduko dion batzordeak berriro gaiaren eztabaidari.

2. Ponentzia eratuta, haren kideek haren barne-funtzionamenduko arauak ezarriko dituzte, eta egiten dituen lanen berri emanen diote Legebiltzarreko Mahaiari. Ponentziak boto haztatuaren sistemaren bidez hartuko ditu erabaki guztiak.

3. Ponentzia Legebiltzarraren egoitzatik atera ahalko da bere lanak hobeto garatzeko interesgarriak diren gaiak ezagutzera eta hurrengo artikuluan azaltzen diren eskumenak izanen ditu.

4. Txostenarekin ados ez dauden talde parlamentarioek beren desadostasunak adierazi ahalko dituzte zuzenketen bidez. Zuzenketak idatziz aurkeztu beharko zaizkio Batzordeko Mahaiari, txostena argitaratu eta zazpi eguneko epean gehienez ere. Epe hori igarota, Batzordeko Mahaiak -aldez aurretik batzorde horren lehendakariak deituta- izapidera onartuko ditu zuzenketak, aurkezpen hurrenkeraren arabera ordenatuko ditu eta Legebiltzarreko lehendakariari bidaliko dizkio, hark, besterik gabe, Parlamentuko Aldizkari Ofizialean berehala argitara daitezela agindu eta deialdia egin dezan, Batzordeak txostena eta aurkeztutako zuzenketak eztabaidatu eta bozkatu ditzan.

5. Eztabaidan parte hartuko dute, gehienez ere hamar minutuz, zuzenketak aurkeztu dituzten taldeek eta jarraian zuzenketarik aurkeztu ez dutenek. Batzordeburuak hiru minutuko bigarren txanda bat ireki dezake, jarrera desberdinak finkatzeko.

6. Eztabaida amaitu ostean txostena eta hari aurkeztutako zuzenketak bozkatuko dira, eta onesten diren zuzenketak behin betiko testuari erantsiko zaizkio.

7. Onetsitako txostena Parlamentuko Mahaiari jakinaraziko zaio, Legebiltzarreko Aldizkari Ofizialean argitaratu eta behar denari helarazteko.

8. Parlamentuko Mahaiak, Eledunen Batzarrari entzun ondoren, erabakiko txostenak Osoko Bilkuran eztabaidatzea, aintzat hartuta Osoko Bilkurak aztertu beharreko dokumentuaren izaera eta ezaugarriak tarteko beharrezkoak diren prozedurazko berezitasunak.

65. artikulua. Batzorde eta ponentzien beste eskumen batzuk.

1. Batzordeek eta ponentziek, Parlamentuko lehendakariaren bidez, honakoak egin ahalko dituzte:

a) Beren eginkizunak betetzeko behar dituzten informazioa eta dokumentazioa eskatu Nafarroako Gobernuari eta administrazio publikoei, erregelamendu honen 14. eta 15. artikuluetan ezarritako prozedurari jarraikiz.

b) Foru Diputazioko kideak, Nafarroako Gobernuko goi karguak, foru-sektore publiko instituzionaleko kudeatzaile eta izendapen askeko karguak, Estatuko Administrazio Orokorrak Nafarroan dituen agintariak nahiz eztabaidagaiaren arabera eskudun diren bestelako agintari eta funtzionario publikoak batzordera ager daitezela eskatu, galdetzen zaizkien aferei buruz informa dezaten.

c) Beste edozein pertsona ager dadila eskatu, helburu berarekin.

2. Nafarroako Gobernuko kideak, eta Nafarroako Gobernuko eta foru-sektore publiko instituzionaleko goi kargu eta kudeatzaileak behartuta egonen dira batzordean agertzera hala eskatzen zaienean, betiere bertan aztertuko den gaia beren eskumenekoa bada.

3. Baldin eta lehenengo apartatuan aipatzen diren kargu publiko eta funtzionarioek ez badiote kasurik egiten batzordeak aurkeztutako informazio- edo agerraldi-eskabideari, edo ez badute behar bezala justifikatzen eskabide horri kasurik egiteko ezintasuna, Legebiltzarreko lehendakariak horren berri emanen dio kasuan kasuko nagusi hierarkikoari, hark bidezko erantzukizunak eskatu ahal izan ditzan.

66. artikulua. Batzordeei aholku ematea.

Legelariek aholkularitza-lana eginen dute batzordeetako mahai eta ponentzientzat, haiek beren eginkizunak betetzeko beharrezkoa dutena, eta kasuko aktak, txostenak eta irizpenak idatziko dituzte, hartutako erabakiak jasorik.

2. ATALA. Legegintzako batzordeak

67. artikulua. Legegintzako batzorde motak.

1. Legegintzako batzorde dira Foru Araubidekoa, Bizikidetasunaren eta Nazioarteko Elkartasunaren Batzordea eta Eledunen Batzarrari entzun ondoren Mahaiak legegintzaldi bakoitzaren hasieran zehazten dituenak; betiere, foru erkidegoko Administrazioaren departamentuen araberakoak izanen dira.

2. Erregelamendukoa ere legegintzako batzordea izanen da. Erregelamenduko Batzordea osatuko dute Legebiltzarreko lehendakariak -batzordeko lehendakaria izanen da-, Mahaiko gainerako kideek -batzordeko mahaia osatuko dute- eta, erregelamendu honetan ezarritakoarekin bat, talde parlamentarioek eta, kasua bada, foru parlamentarien elkarteek hautatzen dituzten parlamentariek. Botoa talde parlamentarioek edo parlamentarien elkarteek hautatutako foru parlamentariek bakarrik izanen dute. Ondorio hauetarako, Legebiltzarreko gainerako legegintzako batzordeen arauak aplikatuko zaizkio batzorde honi.

3. Legegintzako batzordeak Parlamentuaren eratze-bilkura egin eta hogeita hamar eguneko epean eratu beharko dira.

68. artikulua. Legegintzaldian beste legegintzako batzorde batzuk sortzea.

1. Parlamentuko Osoko Bilkurak, Mahaiak proposatuta eta Eledunen Batzarrarekin bat, erabakia hartzen den legegintzaldian legegintzako batzorde izanen diren beste batzorde batzuk sortzea erabaki dezake.

2. Batzordea sortzeko erabakiak ezarriko du eskumenak zer irizpideren arabera banatuko diren batzorde horren eta ukituak gerta daitezkeenen artean.

3. Lehenengo apartatuan ezarritako prozeduraren bidez erabaki daiteke artikulu honetako batzordeak desegin daitezela.

3. ATALA. Batzorde bereziak

69. artikulua. Batzorde berezi motak.

Batzorde bereziak dira ikerketa-batzordeak, Eskarietako Batzordea eta Osoko Bilkurak hurrengo artikuluan ezarritakoari jarraikiz erabakitzen dituen gainerakoak.

70. artikulua. Batzorde bereziak sortzea.

1. 71. artikuluan aurreikusitako kasuan izan ezik, Parlamentuko Osoko Bilkurak, Mahaiak proposaturik edo bi talde parlamentarioren edo Parlamentuko kideen bosten baten ekimenez, batzorde bereziak sortzea erabaki dezake. Batzorde bereziak sortzeko proposamena mozioetarako ezarritako prozedurari jarraikiz izapidetuko da.

2. Gutxienez hauek zehaztu beharko dira bai batzorde bereziak sortzeko proposamenean bai erabakian:

a) Zer batzorde mota sortzen den eta haren osaera.

b) Batzordeari ematen zaion eginkizunaren edo lanaren xede zehatza eta haren helburua, bai eta batzordeak lan egiteko baliatu beharreko jarraibideak ere.

c) Funtzionamendurako berariazko arauak eta, bidezkoa bada, Mahaiaren osaerari buruzko salbuespenak eta erabakiak hartzeko araubide orokorra, bai eta Parlamentuko Mahaiari, batzordeko Mahaiak proposatuta, arau horiek garatzeko bidea emateko aukera ere. Arauek, betiere, errespetatu beharko dituzte erregelamendu honetan ezarritako funtzionamendurako printzipio orokorrak.

d) Bere lanerako espezialistak edo teknikariak hartzeko aukera. Pertsona horiek bilkuretara joanen dira eta hitza bai baina botorik ez dute izango.

e) Batzordearen lanak amaitzeko epea eta bilkuraldi bakoitzaren bukaeran behin-behineko txostenak emateko aukera.

f) Batzordearen lanak txosten batean, irizpen batean edo parlamentu-ekimenen baterako proposamenean islatzeko aukera.

71. artikulua. Ikerketabatzordeak.

1. Foru Diputazioak, Mahaiak, bi talde parlamentariok edo Legebiltzarreko kideen bostenak proposatuta, interes publikoko eta Nafarroako Foru Komunitatearen eskumenen esparruko edozein gairi buruzko ikerketa-batzorde bat sortzea erabaki dezake Parlamentuko Osoko Bilkurak.

2. Ikerketa-batzorde bat sortzeko proposamena Mahaiari zuzendutako idazki baten bidez egin beharko da. Idazkian zehatz-mehatz azalduko dira ikertu beharreko gertaerak, eta batzordearen beharra justifikatuko da.

3. Ikerketa-batzorde bat sortzea erabakita, Legebiltzarreko Mahaiak, Eledunen Batzarraren erabaki loteslearen ondoren, haren osaera, antolamendua eta funtzionamendua eraentzen dituzten arauak emanen ditu eta eratze-data zehaztuko du.

4. Eratze-bilkuran Parlamentuko lehendakaria izanen da buru. Eratze-bilkuran hautatuko dira ikerketa-batzordeko mahaiko kideak.

5. Ikerketa-batzordeek lan plan bat prestatuko dute, eta zilegi izanen dute beren baitako ponentziak izendatzea eta, Parlamentuko lehendakariaren bidez, eskatzea edozein pertsonak agerraldia egin dezan, hari entzute aldera. Deitzen den pertsonari gutxienez ere hiru egun lehenago jakinaraziko zaio zeri buruz eman behar dituen argibideak.

6. Ikerketa-batzordeek, beren helburuak betetze aldera, Nafarroako Gobernuko kideen eta Foru Komunitateko Administrazioko goi karguen jarduera eta interesen erregistroko informazio babestu guztia eskuratu ahalko dute.

7. Batzorde horien konklusioak, auzitegientzat lotesle izanen ez direnak eta epaile-ebazpenei eraginen ez dietenak, irizpen batean bildu beharko dira, eta irizpen hori Legebiltzarreko Osoko Bilkuran eztabaidatuko da.

8. Osoko Bilkurak onetsitako konklusioak Parlamentuko Aldizkari Ofizialean argitaratuko dira eta Nafarroako Gobernuari jakinaraziko zaizkio. Parlamentuko Mahaiak, beharrezkotzat jotzen badu, fiskaltzari ere igorri ahalko dizkio ondorioak, hark, bidezko denean, abiarazi beharreko ekintzak abiaraz ditzan.

9. Talde parlamentario proposatzaileak eskatzen baldin badu, Parlamentuko Aldizkari Ofizialean ezetsitako boto partikularrak ere argitaratuko dira.

72. artikulua. Ikerketabatzordeetako agerraldien araubidea.

1. Batzordera agertzeko eskariak zitazio fede-emaile bidez eginen ditu Parlamentuko lehendakariak. Zitazio horretan hauxe jaso beharko da:

a) Batzordeak zein egunetan erabaki duen agerraldia eskatzea. Agerraldia soilik eskatu ahal da batzordearen xedearekin zerikusia duten gaietarako.

b) Agerraldia eskatzen zaion pertsonaren izen-abizenak eta helbidea.

c) Zein toki, egun eta ordutan agertu behar duen.

d) Ohartarazpena, adieraztekoa ezen, agertzen ez bada, Zigor Kodearen 502.1 artikuluan jasotako desobeditze-delitua eginen duela.

e) Agerraldian hizpide izanen dituen gaiak.

f) Espresuki aipatuko da Konstituzioak aitortzen dituen eskubideak errespetatuko direla; bereziki, pertsonen intimitate eta ohorerako eskubidea, sekretu profesionalerako eskubidea eta kontzientzia-klausularakoa.

g) Agerraldia hedabideei irekia izanen delako ohartarazpena. Halere, agerraldira deitutakoak batzordeari eskatzen ahalko dio bilkura isilpekoa izan dadila, horretarako arrazoiak azalduz.

h) Agertu behar duenak berarekin joateko pertsona bat izendatzeko aukeraren jakinarazpena.

2. Agertzeko eskaria funtzionario publiko bati egiten zaionean, hierarkian haren gainean dagoenari igorriko zaio zitazioaren kopia, jakinarazpen-ondorio hutsetarako.

3. Eskaera agerraldiaren eguna baino hamabost egun lehenago jakinarazi beharko da, salbu eta batzordeak erabakitzen badu premiazkoa dela; kasu horretan, epea bost eguneko izanen da. Bilkura ez bada egiten agerraldia eskatu zaion pertsona ez delako bertarako, berriz eginen zaio zitazioa handik hiru egunera agertzeko, edo handik egun batera, premiazkoa bazen.

4. Agerraldia batzordeko mahaiak aldez aurretik ezarritako prozeduraren arabera eginen da. Aipatu prozeduraren berri emanen zaio agerraldia egin behar duenari bere mintzaldia hasi baino lehen.

Batzordeko Mahaiak, haren lanen irauten duten bitartean, zaindu beharko du errespetatzen direla pertsonen intimitaterako eta ohorerako, lanbide-sekreturako eta kontzientzia-klausularako eskubideak, bai eta gainontzeko konstituzio-eskubideak ere.

5. Deituriko pertsonak, bere borondatez, ez badu aintzat hartzen ikerketa-batzorde batean agerraldia egiteko eskaria, Parlamentuko Mahaiak horren berri eman beharko dio Fiskaltzari, egokitzen ahal zaion erantzukizun penala bideratze aldera.

6. Ikerketa-batzordeak erabaki dezake pertsona adituen agerraldia eskatzea, batzordeak xede duen gaiari buruzko iritzia eman dezaten. Inguruabar hori esplizituki jaso behar da batzordearen erabakian. Agerraldi hori eginen da erregelamendu honen 228. artikuluan ezarritako prozedurari jarraikiz.

73. artikulua. Eskarietako Batzordea.

1. Eskarietako Batzordea ere batzorde berezia izanen da. Eskarietako Batzordea da herritarrek eskea egiteko eskubidea egikarituz Nafarroako Parlamentuari zuzentzen dizkioten eskariak izapidetzeko organo eskuduna. Batzordearen osaera eta funtzionamendua lotuko zaizkio 51. artikuluak eta horrekin bat datozenek ezarritakoari.

2. Eskarietako Batzordeak banaka aztertuko ditu Parlamentuak jasotzen dituen eskari guztiak, haien onargarritasunari buruz erabakitzeko, eskea egiteko eskubidea arautzen duen lege organikoak ezarritakoari jarraituz.

3. Eskaria aztertu ondoren, Eskarietako Batzordeak xedatu ahalko du Parlamentuko lehendakaritzaren bitartez honakoei bidal dakiela:

a) Eskariaren xede del gaian eskuduna den batzorde parlamentarioari.

b) Talde parlamentarioei, Parlamentuan ekimenen bat bultzatu ahal izan dezaten, hala nahi baldin badute.

c) Nafarroako Gobernuari edo gaiaren arabera eskudun diren departamentuei, eta harekin batera, bidezkoa bada, eskaeraren edukiari buruzko azalpen-eskea.

d) Gaiaren arabera eskudun gisa hartzen duen administrazio publikoetako beste edozein organori, agintariri edo erakunderi.

e) Nafarroako Foru Komunitateko Arartekoari, bere foru lege arautzaileak ezarritako ondorioetarako.

4. Eskarietako Batzordeak, eskari bat aztertu ondoren, beste izapiderik gabe artxiba dadila ere erabaki ahalko du, betiere aurreko apartatuan adierazitako bidalketa ez bada bidezkoa.

5. Eskarietarako Batzordeak, talde parlamentario batek proposatuta, eskaria aurkeztu duten pertsonei dei egin ahal die, eskariarekin loturikoak izanik egoki irizten dieten alderdiei buruz informa dezaten.

6. Eskarietako Batzordeak egoki diren erabakiak hartuko ditu izapidera onarturiko eskariei dagokienez, eta horiei buruzko gomendioak egin ahalko dizkie botere publikoei eta erakundeei.

7. Kasu guztietan, Parlamentuko Mahaiak eskaria jaso izanaren adierazpena emanen du, eta adierazpen hori Eskarietako Batzordeari igorriko dio, zeinak, aurkezten denetik hiru hilabeteko epean, harturiko erabakien berri emanen baitie eskatzaileei.

4. ATALA. Europako Gaietarako Ponentzia

74. artikulua. Europako Gaietarako Ponentzia.

1. Europako Gaietarako Ponentzia organo eskuduna da Gorte Nagusiek igortzen dituzten Europar Batasuneko legegintzako egintza proiektuek subsidiariotasun-printzipioa urratzen ote duten irizteko. Ponentzia horrek, zenbat talde parlamentario egon, hainbeste kide izanen ditu. Talde parlamentarioek beren ordezkaria hautatuko dute batzordeetako kideak hautatzen dituzten aldi berean. Eratze-bilkuran Parlamentuko lehendakaria izanen da buru. Ponentziaren eratze-bilkuran ponentziako burua hautatuko da. Batzordeburua ez dagoenetan, ponentziako kide den beste foru parlamentari bat arituko da haren ordez. Ponentziari laguntzen dion legelaria izanen da ponentziako idazkari.

2. Europar Batasuneko legegintza-proposamen bat jaso ondoren, Parlamentuko lehendakariak aipatu ponentziako kideei igorriko die, posta elektronikoz. Bide bera erabilita, Nafarroako Gobernuari ere igorriko zaio, egokia iruditzen bazaio proposamenari buruzko txosten bat eman dezan bi asteko epean, eta, zehazki, legegintzako ekimena subsidiariotasun-printzipioaren araberakoa izateari buruz duen iritzia eman dezan. txosten hori, jaso ondoren, ponentziako kideei igorriko zaie.

3. Talde parlamentarioek, Parlamentuko Mahaiari zuzenduriko idazki baten bidez, irizpen arrazoitu baterako proposamenak aurkeztu ahalko dituzte, bertan azalduz zergatik bere ustez subsidiaritatearen printzipioa ez den betetzen, Europar Batasuneko legegintza-proposamena jaso eta hamar eguneko epean.

4. Ezarritako epean inongo talde parlamentariok irizpen arrazoitu baterako proposamenik aurkezten ez badu, Europar Batasuneko legegintza-proposamena jasotzat hartuko da eta prozedura amaituko da.

5. Irizpen arrazoitu baterako proposamenen bat aurkezten bada, Parlamentuko Mahaiak edo lehendakariak, hark eskuordetuta, onartu eginen du eta berehala eginen da deialdia, Europako Gaietarako Ponentziak eztabaidatu eta bozkatu dezan.

6. Irizpen arrazoitu baterako proposamenari zuzenketak aurkeztu ahalko zaizkio eztabaidagai izanen den bilkura hasteko ezarritako ordua baino hogeita lau ordu lehenagora arte.

7. Irizpen arrazoitu baterako proposamenen eztabaida eta bozketa eginen da mozioetarako xedatutakoari jarraikiz.

8. Nafarroako Parlamentuko lehendakariak Gorte Nagusiei bidaliko dizkie onesten diren irizpenak.

9. Irizpen arrazoitua Gorteei igortzeko epea lau astekoa izanen da gehienez, legegintza-egintzako proiektua Nafarroako Parlamentuan jasotzen denetik hasita.

10. Ezarritako epearen barruan, ponentziak eskatu ahalko du arau-proiektuari dagokion alorrean adituak diren funtzionarioen eta pertsonen agerraldia.

11. Ponentziaren lanak bilkuraldi arruntetatik kanpo egin behar direnean, Legebiltzarreko lehendakariaren esku geratuko da lan horiek egiteko beharrezkoak diren egunak gaitzeko ahalmena.

IV. KAPITULUA. Osoko Bilkura

75. artikulua. Osoko Bilkuraren deialdia.

1. Osoko Bilkura da Parlamentuaren organo gorena, eta hautatuak aldarrikatutako eta Parlamentuko kide izaera osoki erabiltzen hasi diren foru parlamentariek osatzen dute.

2. Legebiltzarreko lehendakariak eginen ditu Parlamentuko Osoko Bilkuretarako deialdiak, Mahaiarekin adosturik eta Eledunen Batzarrari entzun ondoren, bere ekimenez edo, bestela, gutxienez bi talde parlamentariok edo foru parlamentarien bostenak eskatuta.

3. Aurreko apartatuan aipatzen den eskabideak betiere barne hartu beharko du kasuko gai-zerrenda. Gai-zerrenda horretan jaso ahalko dira, bakarrik, erregelamendu honek ezarritakoaren arabera Legebiltzarreko Osoko Bilkuran eztabaidatu eta bozkatzeko moduan dauden gaiak.

4. Baldin eta Mahaiaren iritziz, eta Eledunen Batzarrari entzun ondoren, eskabidea aurreko apartatuan ezarritakoaren araberakoa bada, lehendakariak bilkurara dei eginen du, proposatutako gai-zerrendarekin bat.

5. Lehendakariak, bere ekimenez edo bi talde parlamentariok edo foru parlamentarien bosten batek eskatuta, Osoko Bilkuraren deialdia bertan behera utzi ahalko du, Mahaiarekin bat eta Eledunen Batzarraren adostasun loteslearekin.

76. artikulua. Osoko bilkuren aretoan sartzea eta bertan kokatzea.

1. Foru parlamentariek bilkura-aretoan eserlekua hartuko dute zer talde parlamentariori dauden atxikirik eta horren arabera, eta betiere eserleku berean eseriko dira.

Talde bakoitzarentzako gordetako eserlekuak Mahaiak zehaztuko ditu, Eledunen Batzarrak erabakia hartu ondoren, talde bakoitzak adierazitako nahiaren arabera eta hauteskundeetan lortutako boto-kopuruaren hurrenkeran.

2. Bilkura-aretoan toki berezi bat gordeko da Foru Diputazioko kideak bertan esertzeko.

3. Aipatutako pertsonez gain, bilkura-aretoan sartu ahalko dira beren eginkizunak betetzen ari diren Parlamentuko funtzionarioak eta lehendakariaren baimen espresua duten pertsonak soilik.

V. KAPITULUA. Batzorde Iraunkorra

77. artikulua. Bilkuren deialdia eta araudia.

1. Batzorde Iraunkorrak Parlamentuko lehendakaria izanen du buru, eta Legebiltzarreko Mahaiak eta Eledunen Batzarreko kideek osatuko dute. Bere erabakiak hartuko ditu Eledunen Batzarreko kideek adierazitako boto haztatuaren bitartezko sistemaren bidez. Halaber, Gobernuko kideek bileretara joateko aukera izango dute, hitzarekin baina botorik gabe.

Talde parlamentario bakoitzak, gainera, hiru foru parlamentari ordezko hautatuko ditu gehienez ere, Legebiltzarra desegiten denetik aurrera iraunkorrak izanen direnak.

Gobernuko kide diren parlamentariek ezingo dute Batzorde Iraunkorreko kide izan.

2. Batzorde Iraunkorreko Mahaia Nafarroako Parlamentuko Mahaia izanen da.

3. Lehendakariak dei eginen du Batzorde Iraunkorraren bilkuretara, berak hala erabakita edo gutxienez ere bi talde parlamentariok edo Legebiltzarreko kideen bostenaren ordezkariek hala eskatuta. Eskabide horrek, betiere, gai-zerrenda eduki beharko du. Gai-zerrendan, erregelamendu honetan ezarritakoarekin bat Batzorde Iraunkorraren eskumenekoak diren gaiak soilik agertu ahalko dira. Eskabideak betebehar hori betetzen badu, lehendakariak bilkurara dei eginen du, proposatutako gai-zerrendarekin bat.

4. Parlamentuaren agintaldia amaitzen den kasuetan, Legebiltzarraren eginkizunak aparteko eta presako arrazoiengatik betetzen direnean, Batzorde Iraunkorraren bilkurak publikoak izanen dira, bi hereneko gehiengoz erabakitzen ez bada bilkura isilpekoa izatea.

78. artikulua. Eginkizunak.

Batzorde Iraunkorrak eginkizun hauek izanen ditu:

Lehenengoa.-Parlamentuaren agintaldia bukatzen den kasuetan zilegi izanen du, aparteko eta presako arrazoiak egonez gero, Legebiltzarraren eginkizun guztiak betetzea.

Bigarrena.-Bi bilkuraldiren artean, bilkura berezietara dei egiteko ekimena erabil dezake, Nafarroako foru eraentza berrezarri eta hobetzeari buruzko Lege Organikoko 17. artikuluan eta erregelamendu honetako 82.2 artikuluan aipatzen denari jarraituz.

79. artikulua. Osoko Bilkurari informatzea.

Parlamenturako hauteskundeak egin ondoren Legebiltzarra eratu eta lehenengo bilkuran, Batzorde Iraunkorrak Legebiltzarraren Osoko Bilkurari jakinaraziko dizkio aztertu dituen aferak eta hartutako erabakiak.

VI. KAPITULUA. Giza baliabideak eta baliabide materialak

80. artikulua. Giza baliabideak eta baliabide materialak.

Parlamentuak bere eginkizunak betetzeko behar dituen giza baliabideak eta baliabide materialak edukiko ditu; bereziki, zerbitzu teknikoak, dokumentaziokoak eta aholkularitzakoak.

81. artikulua. Barnearaubide eta gobernuari buruzko arauak. Parlamentuko legelari nagusia.

1. Legebiltzarreko Mahaiak onetsiko ditu Nafarroako Parlamentuaren barne-araubide eta -gobernuari buruzko arauak, ezertan eragotzi gabe lehendakariak bere kabinetea eratu eta haren kideak hautatzeko duen ahalmena.

2. Parlamentuko legelari nagusiak, Legebiltzarreko Idazkaritza Nagusiaren titulartasuna izanen baitu, Parlamentuko langile guztien eta haren menpeko zerbitzuen buruzagitza dauka, lehendakariaren zuzendaritzapean.

3. Legelari nagusiaren izendapena eta kargutik kentzea Parlamentuko Mahaiak eginen du diskrezionalki, lehendakariak proposatuta, Parlamentuko legelarien, Kontuen Ganberako legelarien edo Nafarroako Gobernuko Aholkularitza Juridikoaren Zerbitzuko langileen artetik. Azken bi kasuetan, betiere gutxienez bost urte badaramatzate zerbitzu aktiboan, kategoria eta espezialitate horretan, eta ez badute kargu publikorik bete azken lau urteetan.

V. TITULUA. FUNTZIONAMENDUARI BURUZKO ARAU OROKORRAK

I. KAPITULUA. Bilkurak eta haietarako deialdiak

82. artikulua. Bilera motak. Saio berezietarako deialdia eta gaizerrenda.

1. Parlamentua urtean bi bilkuraldi arruntetan bilduko da: lehenengoa irailetik abendura bitartekoa da, eta bigarrena, urtarriletik ekainera bitartekoa.

2. Bi bilkuraldi horietatik kanpo, Legebiltzarrak bilkura bereziak egin ahalko ditu soilik Nafarroako Gobernuak, Batzorde Iraunkorrak, parlamentarien bostenak edo bi talde parlamentariok eskatzen badute. Eskaeran adierazi beharko da eskatzen den bilkura berezirako proposatzen den gai-zerrenda.

3. Aurreko apartatuan ezartzen denaren araberakoa baldin bada eskaera, lehendakariak bilkura berezirako deialdia eginen du, proposaturiko gai-zerrendarekin bat. Edonola ere, Legebiltzarra bildurik egonen da deialdiaren xede den gai-zerrenda agortu arte.

4. Parlamentuko Mahaiak, Eledunen Batzarrarekin bat, erabaki ahalko du bilkura berezi bat egitea ahalbidetzeko izapideak betetzeko beharrezkoak diren egunak gaitzea.

83. artikulua. Bilkura ezpresentzialak edo mistoak.

1. Parlamentuko organoek, bi talde parlamentariok edo foru parlamentarien bostenak hala eskatzen badute, bilkura ez-presentzialak edo mistoak (presentzialak eta telematikoak) egin ahal dituzte parlamentarien joan-etortzeko gaitasuna larriki kaltetuta gertatzen bada ezinbesteko kasu, natur-hondamendi edo krisi sanitario baten ondorioz.

Salbuespen gisa, erakunde gizarte-talde eta adituen lan-bilkura, ponentzia edo entzunaldietan ere eskatu ahalko da, modu arrazoituan, saioa era ez-presentzialean edo mistoan egitea, deituriko pertsona edo entitateek hala behar dutenean.

2. Parlamentuko Mahaiari dagokio, Eledunen Batzarrak erabakia hartu ondoren, Osoko Bilkuraren eta batzordeen saioak modu ez-presentzialean edo mistoan egin daitezen erabakitzea. Kasu hauetan, Mahaiak eta Eledunen Batzarrak bilkura ez-presentzialak edo mistoak egin ahalko dituzte, aldez aurretik erabaki beharrik gabe.

3. Baliabide telematiko baliagarritzat hartuko dira bideokonferentziak edo bestelako sistema teknologiko edo ikus-entzunezkoak, betiere bilkuran zehar denbora errealeko komunikazio egokia ziurtatzen badute bilkurara fisikoki bertaratzen ez den pertsonaren eta osoko bilkuren aretoan edo batzorde gelan dauden gainerako parlamentarien artean. Halaber, gaitzen diren sistemek segurtasuna eta emankizunen bortxaezintasuna bermatu beharko dituzte.

Bat-bateko matxura tekniko bat gertatuz gero, parlamentari bati eragotzi egiten diona parte hartzea, dela bideokonferentziaz dela segimendua, eztabaida eta bozketa bermatzeko egokiak diren bestelako sistema teknikoen bidez, eten eginen da bilkura, non eta kasuko parlamentariak ez duen modu fede-emailean adierazten baimendu egiten duela bilkurak jarrai dezan.

84. artikulua. Bilkuren deialdia.

1. Legegintzako batzordeen eta batzorde berezien bilkuretako deiak eta Batzorde Iraunkorraren bilkuretakoak 59. eta 77.3 artikuluek, hurrenez hurren, ezartzen dutenari jarraituz egingo dira. Osoko Bilkuraren batzarretarako deialdiak 75. artikuluak ezartzen duenaren arabera eginen dira, edo, kasua bada, 82. artikuluko bigarren apartatuak ezartzen duenaren arabera.

2. Parlamentuko Mahaiaren bilkuretarako deiak 43. artikuluak ezarritakoari jarraituz eginen dira, eta Eledunen Batzarrarenak, berriz, 48. artikuluak ezarritakoari jarraituz. Batzordeetako mahaien bilkuretakoak 149. artikuluak ezartzen duenaren arabera eginen dira.

3. Kasuko batzordearen bilkurara joateko deia halaber eginen zaie batzorde horretako kide ez diren parlamentariei, defenda ditzaten aurkeztu dituzten zuzenketak, mozioak, galderak, interpelazioak edo izaera parlamentarioko beste edozein idazki.

4. Deialdian jasoko dira bilkura eginen den eguna, ordua, tokia eta erregelamendu honetako 91. artikuluak ezarritakoaren arabera finkatuko den gai-zerrenda. Deialdiari erantsi beharko zaizkio bilkuran eztabaidatuko diren txosten, irizpen edo testuak, salbu eta aurretik Legebiltzarreko Aldizkari Ofizialean argitaratu direnak, zeren eta, kasu horretan, deialdiak adieraziko baitu zein den horien argitaratze-eguna.

5. Parlamentuko Mahaiak familia bizitza eta bizitza pertsonala lanarekin uztartzea aintzat hartu beharko du bilkuren hasiera- eta amaiera-ordutegiak zehazteko, gai-zerrenda eta bilkuren deialdiak prestatzerakoan eta eztabaidak antolatzerakoan. Apartatu honetan ezarritakoa batzordeetako mahaiei aplikatuko zaie, bere eskumenekoak diren gaietan.

6. Deialdiak bilkura eginen den eguna baino hiru egun baliodun lehenago bidaliko zaizkie foru parlamentariei. Epe hori hogeita lau ordukoa izateraino laburtu ahalko da, Legebiltzarreko lehendakariak hala erabakitzen badu, bilkurara deitutakoei telefonoz edo telematikoki jakinarazi ondoren. Lehendakariak ahalmen hori erabiltzen duenean, erabakiaren zergatia azaldu beharko du bilkuraren hasieran.

7. Parlamentuko lehendakariak are hogeita lau ordu baino aurrerapen txikiagoz deitu ahalko ditu Parlamentuko Mahaia nahiz batzordeetakoa, Eledunen Batzarra eta, hala behar denean, Batzorde Iraunkorra. Bilkura hasi beharko da bertan jorratuko diren aferetako bakoitzari buruz erabakirik hartzearen bidezkotasunaz eztabaidatuz, eta horri buruzko deliberoa bi hereneko gehiengoz hartu beharko da.

85. artikulua. Deialdirik gabeko bilerak. Deialdiak bertan behera uztea.

1. Aurreko artikuluan ezarritakoaren araberako deialdirik gabe egiten diren foru parlamentarien bilerak ez dira Parlamentuarentzat lotesle izanen.

2. Deialdia egina duen bilkura bat hasi baino lehen deialdi hori bertan behera uztea, ohiz kanpoko arrazoiengatik betiere, Parlamentuko lehendakariari dagokio, Mahaiarekin adosturik eta Eledunen Batzarrak erabaki loteslea hartu ondoren, eta ekimena hartu duenari edo dutenei entzun eta gero. Deialdia bertan behera uzteko erabakiaren jakinarazpena arrazoitu egin beharko da, eta prozedurarik presakoena erabiliz helaraziko zaie bai foru parlamentari ukituei bai talde parlamentarioen eledunei.

3. Urgentzia-kasuetan, baldin eta batzordeen bilkura arruntetan nahiz lan-bilkuretan kargu publikoek edo beste pertsona batzuek agerraldia egitea eragozten duten ustekabeko inguruabarrak gertatzen badira, edo bilkura ezinbestez atzeratzera behartzen dutenak, Parlamentuko lehendakariak agerraldia bertan behera utzi ahal izanen du, bai eta kasuko bilkura ere.

Halaber, antzeko arrazoiengatik, bertan behera utzi ahal izanen ditu jada programatutako bisita informatiboak.

4. Halaber, lehendakariak, ekimena aurkeztu duenaren adostasunarekin, urgentziazko arrazoiengatik bertan behera uzten ahalko du batzorde baten bilkurarako deialdia, baldin eta eztabaidagaiak eztabaidatzeko arrazoiak ustekabean desagertu badira.

5. Baldin eta lehendakariak arestiko ataletan ematen zaion ahalmena baliatzen badu, Mahaiari eta Eledunen Batzarrari horren berri emanen die egiten duten lehen bilkuran, horri buruz hartu beharreko erabakia har dadin.

86. artikulua. Bilkurak.

1. Bilkuratzat jotzen da Nafarroako Parlamentuko organoetako edozeinek deialdi bateko gai-zerrenda eztabaidatzeko lan parlamentarioan gai-zerrenda hori bukatu arte ematen duen denbora. Bilera deitzen zaio egun bateko goiz edo arratsaldean egiten den bilkura-zatiari.

2. Batzordeek ezin izanen dute Osoko Bilkuraren aldi berean bilerarik egin.

3. Organo bakoitzeko lehendakariak irekiko ditu bilkurak, deialdian ezarritakoaren arabera; lehendakaria ez badago, lehendakariordeak irekiko ditu, deialdiak adierazten duen orduan.

4. Lehendakariak bilkurari hasiera emanen dio esaldi hau erabilita: "Hasi da bilkura". Etenda gelditzen bada, esaldi honekin emango dio jarraipena: "Jarrai dezala bilkurak". Bilkura eteteko esaldi hau erabiliko du: "Bilkura eten egin da" eta amaiera emateko, hauxe esango du: "Bukatu da bilkura". Aipatutako esaldi horiek esan aurretik edo esan ondoren, hurrenez hurren, eginiko ezein egintzak ez du baliorik edukiko.

5. Bilera bat eten behar denean deialdiak jasotzen duen gai-zerrendaren eztabaida bukatu gabe, lehendakariak, bilkura eten duela esan baino lehen, zehaztu beharko du zer egun eta ordutan emanen zaion jarraipena. Edonola ere, bilkura jarraitzeko ez da beharrezkoa izanen idatzizko beste deialdi formal bat egitea.

87. artikulua. Nafarroako Gobernuko kideak bertaratzea.

Nafarroako Gobernuko kideek zilegi izanen dute Osoko Bilkuretara zein Parlamentuko batzordeen bilkuretara joatea, erregelamendu honetan ezartzen denaren arabera.

88. artikulua. Bilkuren jendaurrekotasuna.

1. Osoko bilkurak jendaurrekoak izanen dira, salbu eta:

Lehenengoa.-Mahaiaren aburuz eta Eledunen Batzarrari entzun ondoren bilkura batean jorratzekoak diren aferak Legebiltzarraren edo haren kideen ohoragarritasunari edo foru parlamentari baten izaera eteteari buruzkoak direnean.

Bigarrena.-Osoko Bilkurak bere kideen gehiengo osoz hala erabakitzen duenean, Nafarroako Parlamentuko Mahaiak, Foru Diputazioak, bi talde parlamentariok edo Legebiltzarraren kideen bostenak hala eskaturik. Bilkura sekretua egiteko eskaera egin eta gero, horri buruzko eztabaida eginen da, zeina orobat sekretua izanen baita, automatikoki eta kasu guztietan. Eztabaida bukatu ondoren, erabaki bat hartuko da, eta bilkurari jarraipena emanen zaio erabakitako izaerarekin.

Bilkura sekretua egiteko eskaera gai-zerrendako puntu jakin baterako bada, aurreko kasuan bezala izapidetuko da eta gai hori modu sekretuan eztabaidatuko da, eta gai horren eztabaida behin amaituta, bilkurak ohiko moduan jarraituko du.

2. Batzordeen bilkurak jendaurrekoak izanen dira, hurrengo apartatuan jasotako salbuespenekin.

Hedabideen ordezkariak, nortasuna behar bezala frogatuta, joaten ahalko dira legegintzako batzordeen bilkuretara, bilkura horiek isilpekoak direnean izan ezik.

Batzorde berezietara ere joaten ahalko dira, erregelamendu honetako 60. artikuluak xedaturikoari jarraituz.

Hedabideak joan daitezkeen bilkurak ikus-entzunezko bitartekoak erabiliz erretransmititu ahalko dira.

3. Batzordeen bilkurak isilpekoak izanen dira batzordekideen gehiengo osoak hala erabakitzen duenean, hori eskatu ondoren kasuko Mahaiak, Nafarroako Gobernuak, gutxienez bi talde parlamentariok edo batzordekideen bostenak. Bilkura isilpekoa egiteko eskaera egin eta gero, 1. apartatuko bigarren puntuan ezarritakoari jarraituko zaio.

Isilpeko izaerako bilkura bat bukatu ondoren, Parlamentuko lehendakariak edo batzordeburuak hartu diren erabakien berri eman ahalko die hedabideei.

89. artikulua. Ikerketabatzordeen bilkurak.

1. Ikerketa-batzordeetan agerraldietarako diren bilkurak, bai eta eratze bilkura ere, irekiak izanen dira komunikabideentzat. Ikerketa-batzordeak berak erabaki dezake bilkura horiek isilpekoak izan daitezela, agertu behar duten pertsonek hala eskatu dutelako edo batzordekideek beraiek hala proposatu dutelako, baldin eta beharrezkoa bada batzordearen helburuak betetzea bermatzeko edo pertsonen ohorerako eskubidea nahiz beste ondasun juridiko batzuk babesteko.

2. Ikerketa-batzordeen gainontzeko lan eta bilkurak isilpekoak izanen dira. Bereziki, beti izanen dira isilpekoak batzordearen lanerako plana prestatzeko bilkura, barneko eztabaidarakoak eta bere baitan sortzen diren ponentzien bilerak. Halaber, isilpekoak izanen dira batzorde horiek beren eginkizunak bete ahal izateko emandako datu, txosten edo agiriak, lege batek hala xedatzen duenean edo batzordeak berak hala erabakitzen badu.

3. Parlamentuko Mahaiak, bere ekimenez nahiz ikerketa batzordeak proposatuta, erabaki dezake isilpekoa izanen dela ikerketa-batzorde horrek eginiko proposamen, irizpen, txosten edo konklusioak eztabaidatuko diren Osoko Bilkuraren batzarra.

90. artikulua. Publikoa bilkuretara joatea.

1. Edonor joan daiteke Osoko Bilkuraren batzarretara eta batzordeen bilkuretara, isilpekoak ez badira betiere. Jendea bilkura-aretora joan ahal izateko, gonbidatu-txartela aurkeztea ezinbesteko baldintza izanen da, baita lehendakariak une bakoitzean ezartzen dituen baldintzak behar bezala betetzea ere.

2. Gonbidapenak talde parlamentarioen eledunei emanen zaizkie, talde bakoitzak duen kide-kopuruaren eta jendearentzat gorderik dagoen tokiaren arabera, Legebiltzarreko lehendakariak xedatzen duenari jarraituz.

Halaber, Parlamentuak prozedura bat ezarriko du bilkuretara publiko gisa joateko eskaerak kudeatzeko. Gonbidapenak emateko, kontuan hartuko da bilkura eginen den aretoaren edukiera eta baldintzak.

3. Hedabideetako profesionalen kopurua bilkura-aretoan erabilgarri den tokiaren araberakoa izanen da.

4. Edonola ere, Parlamentuko organoen bilkuretara joanen dira legelari nagusiak horretarako hautatzen dituen Legebiltzarraren zerbitzuko langile eta funtzionarioak.

II. KAPITULUA. Gai-zerrenda

91. artikulua. Gaizerrenda finkatzea. Gaizerrenda aldatzea.

1. Legebiltzarreko lehendakariak finkatuko du Osoko Bilkuren eta legegintzako batzorde nahiz batzorde berezien bilkuren gai-zerrenda, Mahaiarekin bat etorriz eta Eledunen Batzarrari entzun ondoren. Parlamentuko Mahaiaren, Eledunen Batzarraren eta Batzorde Iraunkorraren bilkuretako gai-zerrenda Legebiltzarreko lehendakariak finkatuko du, bestelako izapiderik gabe.

Hori guztia ez da eragozpen izanen, hala ere, Parlamentuko lehendakariaren ekimenik gabe deitzen diren bilkurei buruz erregelamendu honek ezarritakoari jarraituz egiteko gai-zerrenda.

2. Parlamentuko edozein organoren gai-zerrenda alda daiteke organo horretako kideen gehiengo osoaren erabakiaren bidez, lehendakariak berak, bi talde parlamentariok edo organo horretako kideen bostenak hala eskaturik. Proposamena denean gai-zerrendan beste gai bat sartzea, izapidera onartu ahal izateko aurrebaldintza izanen da organo hartan eztabaidatu ahal izateko Erregelamenduak ezartzen dituen izapide guztiak betetzea. Gai-zerrendan beste gai bat sartzea eskatzen duten proposamenak idatziz arrazoitu beharko dira, eta proposatzen den enuntziatu zehatza, bilkuraren hasieran irakurriko baita, eman beharko da.

3. Foru Diputazioak eskatu ahalko du gai bat bilkura zehatz batean lehentasunez sartua izan dadila, baldin eta gai horrek beteak badauzka sartua izateko moduan egoteko beharrezkoak diren erregelamendu-izapideak.

III. KAPITULUA. Quoruma

92. artikulua. Quoruma.

Legebiltzarreko organoek beren bilkurak irekiko dituzte bertan diren parlamentarien zenbatekoa edozein izanik ere.

IV. KAPITULUA. Eztabaidak

93. artikulua. Eztabaiden hasiera.

1. Lehendakariak bilkura hasita dagoela adieraziko du eta, jarraian, eztabaidatuko den gai-zerrendako puntu zehatza irakurriko du.

2. Irakurketa horren hurrena, gai-zerrendan jasotako gai bakoitzaren eztabaida irekiko du.

3. Edozein dela ere gai-zerrendatik eztabaidagai dagoen puntua, eztabaidak ondorengo artikuluek ezartzen dutenaren araberakoak izanen dira.

94. artikulua. Eztabaiden antolaketa.

1. Lehendakariak dauka eztabaiden zuzendaritza, eta haietako jarduna antolatzen du, Mahaiko gainerako kideen laguntzarekin.

2. Lehendakaritzak errespetua, ordena eta adeitasun parlamentarioa gordetzen direla zainduko du uneoro.

95. artikulua. Mintzaldiei buruzko arau orokorrak. Ikusentzunezko baliabideak eskatzea.

1. Foru parlamentariek ezin izanen dute hitz egin baldin eta, aldez aurretik, lehendakariari hitza eskatu eta hark eman ez badie. Eztabaida-txandetan mintzatu ahal izateko, hizlariak txanden hasiera baino lehen eskatu beharko du hitza. txanda iristen zaionean lehendakariak deitu eta hizlaria aretoan ez badago, bere txandari uko egin diola ulertuko da.

Osoko Bilkura edo batzordeetako bilkuraren batean hizlariren batek ikus-entzunezko baliabide edo baliabide telematikoren bat erabili behar badu bere mintzaldia azaltzeko, bere asmoaren berri emanen dio kasuko batzordeburuari edo Parlamentuko lehendakariari, dagokionaren arabera, ahal bezain lasterren eta betiere bilkura hasi baino hogeita lau ordu baino lehenago. Lehendakariak bidezkoa dena erabakiko du eta, eskaera onartuz gero, Legebiltzarreko zerbitzuek baliabide horiek erabiltzeko beharrezkoak diren bitartekoak gaituko dituzte.

2. Parlamentu-talde batek edo foru parlamentari batek aurkeztutako zuzenketak, boto partikularrak, foru-lege proposamenak nahiz bestelako proposamen eta ekimenak bertan behera geldituko dira baldin eta lehendakariak talde parlamentario edo foru parlamentari horri defentsarako hitza ematen badio eta taldea edo parlamentaria une horretan bilkuran ez badago.

3. Foru parlamentariek mintzatokitik hitz egin beharko dute, baina lehendakariak horrela ez egiteko baimen zehatza eman ahalko die. Dena den, batzordeetako mintzaldiak eta ahozko galderei dagozkienak eserlekutik eginen dira.

4. Inor mintzatzen ari den bitartean, lehendakariak ez beste inork moztu ahalko du hizlaria, eta hark kasu hauetan baizik ez: denbora bukatu zaiola ohartarazteko, gaiari lotzeko edo ordena gordetzeko eskatzeko, hitza kentzeko edo Legebiltzarrari, Legebiltzarreko kideei zein publikoari ordena gordetzeko eskatzeko.

5. Ezarritako denbora amaitu bada, lehendakariak hitza kenduko dio hizlariari, bukatzeko bi aldiz eskatu ondoren.

6. Hitza txanda berean eskatu duten foru parlamentariek txandaren hurrenkera eta denbora elkarri trukatu ahalko dizkiote, lehendakariak hitza eman eta gero. Mintzatzeko eskubidea duen edozein foru parlamentari talde bereko beste batek ordeztu ahal izanen du eztabaida jakin batean, aldez aurretik talde parlamentarioaren eledunak lehendakariari horren berri emanez gero.

7. Nafarroako Gobernuko kideak hala eskatzen duten guztietan mintzatu ahalko dira, salbu eta bere parte-hartzea erregelamendu bidez aurreikusita badago, Legebiltzarreko lehendakariak, mintzaldien oreka bilatuz betiere, eztabaidak antolatzeko duen ahalmena gorabehera.

Mintzaldi horrek zuzenean aipaturiko talde parlamentarioen ihardespen-txanda ekar dezake, Gobernuko kideak erabilitako denboraren proportzioan. Lehendakariak uste badu Gobernuko kideak bere mintzaldiaren ondorioz eztabaidagairekin zerikusirik ez duten gaiak sartu dituela, ohartarazi egin behar du.

96. artikulua. Aipamenagatiko denbora.

1. Lehendakariak uste baldin badu eztabaida batean foru parlamentari bati edo haren jokabideari buruzko aipamena egin dela, balio-iritzia edo zehaztugabetasunak dakartzana, aipatuari hitza emanen dio, gehienez hiru minutuko txandan, hark, eztabaidatzen ari den gaiaren harira sartu gabe, adierazitakoari erantzun diezaion. Foru parlamentariak muga hori gainditzen badu, lehendakariak berehala kenduko dio hitza.

2. Aipamenak bilkura berean erantzun beharko dira. Aipatua bertan ez badago, talde parlamentario bereko beste kide batek erantzun ahalko du haren izenean.

3. Aipamenak parlamentu-talde baten izen onari edo duintasunari eragiten badie, lehendakariak hitza eman ahalko dio taldearen ordezkariari, artikulu honetako 1. eta 2. apartatuetan ezartzen diren denbora eta baldintzetan.

4. Lehendakariak aipamenei erantzuteko eskubidea ematen ez badu, legebiltzarkideak edo talde parlamentarioak kexa aurkeztu ahalko dio Parlamentuko Mahaiari bilkura amaitu ondoren, eta Mahaiak hurrengo bilkura baino lehenago eman beharko du horri buruzko ebazpena.

97. artikulua. Hitz egiteko beste tarte batzuk.

Erregelamendu honetako 95.1 artikuluan ezarritakoa ez da eragozpen izanen edozein foru parlamentarik ondokoa eskatu ahal izateko:

1. Erregelamendua betetzea, eztabaida zertan ere den. Horretarako, zer artikuluren aplikazioa eskatzen ari den aipatu beharko du. Horren inguruan ezin izanen da eztabaidarik egin, eta egindako alegazioa ikusirik lehendakariak hartzen duen erabakiari men egin beharko zaio.

2. Eztabaidatzen ari den gaia argitzeko haren ustez baliagarriak diren arau nahiz dokumentuak irakurtzea, eztabaida bitartean edo bozketa egin baino lehen. Lehendakariak ukatu ahalko du gaiaz kanpokotzat edo alferrekotzat jotzen dituen irakurketak egiteko eskubidea, bai eta eztabaidatzen ari den gaiari buruzko erabakia hartzea luzatu nahi dutenena ere.

98. artikulua. Bilkurak etetea.

Lehendakariak, berak hala nahita edo talde parlamentario batek eskatuta, bilkura aldi baterako eten ahalko du, atsedenaldia emateko, kontsultak egiteko edo erabakiak errazteko. Bilkura eteten badu, zenbat denborarako eten den zehaztuko du.

99. artikulua. Bilkurak amaitzea.

Lehendakariak bakarrik eman ahalko du bilkura bat bukatutzat, behin gai-zerrenda amaitu ondoren, 143. artikuluan ezarritakoaren salbuespenarekin.

100. artikulua. Bilkurak eteteko bestelako kasuak.

Erregelamendu honetako 98. artikuluak aurreikusten ez dituen kasuetan, lehendakariak bilkura eten ahalko du, Mahaiarekin kontsulta egin ondoren, baldin eta inguruabarren arabera bilkura etetea komeni bada.

101. artikulua. Eztabaidetarako arau orokorrak. Eskuhartzeen hurrenkera.

1. Erregelamendu honetan berariaz arautu ez diren eztabaidak hasiko dira proposamen, zuzenketa, boto partikular edo kasuan kasuko ekimenaren defentsarekin, dena delako ekimena nork bere izenean aurkeztu duen talde parlamentarioak edo foru parlamentariak egindako defentsarekin hasi ere.

2. Ondoren, aldeko txanda irekiko da, eta, gero, aurkako txanda. txanda horietako bakoitzean mintzatu ahalko dira, zein bere ordezkariaren bidez, talde parlamentario guztiak, salbu eta aurreko apartatuan aipatzen den defentsa-txandan halakotzat mintzatu dena edo direnak. Talde parlamentarioen mintzaldien hurrenkera talde bakoitzak dituen parlamentarien kopuruari begira ezarriko da, gehien dituenetik hasi eta gutxien dituenarekin bukatzeko. Talde mistoaren ordezkariak azkenak izanen dira mintzatzen.

3. Aurreko apartatuetan aipatzen diren txanden iraupena, non eta kontrakoa ezartzen ez den, ez da hamar minutu baino gehiagokoa izanen talde parlamentario bakoitzarentzat, osoko eztabaidetan izan ezik, non iraupena ez baita hamabost minutu baino gehiagokoa izanen.

4. Edozein eztabaidatan, proposamena, zuzenketa, boto partikularra edo bestelako ekimena aurkeztu duen talde parlamentarioak edo foru parlamentariak ihardespen-txanda edukiko du -bost minutukoa gehienez ere-, aldeko eta kontrako txanden ondoren.

5. Zenbait talde parlamentariok edo talde ezberdinetakoak diren foru parlamentariek izenpeturiko proposamenak eztabaidatzen direnean, izenpetu dutenetako batentzat izanen da defentsarako txanda, eta gainerakoak aldeko txandan mintzatu ahalko dira. Kasu horietan, ihardespen-txanda proposamenaren defendatzailearentzat izanen da.

Aurrekoa gorabehera, proposamen-egileek lehendakariari adierazi ahalko diote defentsa eta ihardespen-txandak erabili nahi dituztela, haien denborak elkarren artean banatuz.

6. Aurreko apartatuetan ezarritakoa ez da eragozpen izanen lehendakariak eztabaida antolatzeko eta, eztabaidaren garrantziari erreparatuta, talde parlamentarioen eta legebiltzarkideen mintzaldien kopurua eta iraupena luzatu edo laburtzeko.

102. artikulua. Talde parlamentario mistoaren eskuhartzeak.

1. Talde mistoaren mintzaldiak foru parlamentari bakar baten bidez gauzatu ahalko dira, gainerako talde parlamentarioek duten denbora bera erabiliz, edota bat baino gehiagoren bidez, denbora osoa haien artean banatuta, baldin eta haren taldekide bertaratu guztiek hori erabakitzen badute eta erabakia Legebiltzarreko lehendakariari helarazten badiote, eledunen bidez. Hiru parlamentarik baino gehiagok hitz egin nahi badute, talde mistoaren denbora gainerako talde parlamentarioentzat ezarritako denboraren erdia luzatuko da.

2. Adostasunik ez badago, lehendakariak talde mistoko eledunari eta, kasua bada, foru parlamentarien elkarteetako eledunei eskatuko dizkie hitz egin nahi duten kideen izenak eta, horiek ikusirik, talde parlamentario bati dagokion denbora mintzatu nahi duten guztien artean banatzearen emaitza adinako denbora emanen die, talde mistoa osatzen duten talde politikoen zenbakizko garrantziaren proportzioan.

103. artikulua. Mahaikideek eztabaidan parte hartzea.

Lehendakariak, lehendakariordeek edo batzorde zein biltzarreko idazkariek eztabaidan parte hartu nahi badute, Mahaiari jakinaraziko diote eta Mahaian daukaten tokia utzi behar dute, berriro beteko ez dutena, dagokion gaiaren eztabaida eta bozketa bukatzen ez den arte.

V. KAPITULUA. Bozketak

104. artikulua. Erabakiak hartzeko quoruma.

1. Erabakiak hartu ahal izateko, Legebiltzarrak eta bere organoek Erregelamenduak ezarritakoaren arabera bilduta egon beharko dute, eta kideen gehiengoak bertan egon beharko du. 83. artikuluan aipatzen diren bilkura ez-presentzialetan, bertaratu gisa hartuko dira bilkura bakoitzean egiazki parte hartzen duten legebiltzarkideak. Bilkura mistoetan, bertaratu gisa hartuko dira Mahaiak espresuki baimena eman dielako telematikoki parte hartu edo bozkatzen duten legebiltzarkideak.

2. Aurreko apartatuan aipatzen den quorumik ote dagoen egiaztatzea edozein bozketa hasi aurretik bakarrik eskatu ahalko da. Behin bozketa hasiz gero, hartutako erabakia baliagarria izanen da, bertan dagoen parlamentari kopurua zein ere den. Bozketa hasi baino lehen arestian aipatutako quorumik ez dagoela egiaztatzen bada, bozketa bi ordu geroratuko da gehienez ere. Epe hori iraganik bozketa arauak eskatutakoaren arabera egiterik ez badago, gaia kasuan kasuko organoaren hurrengo bilkuran bozkatuko da.

105. artikulua. Erabakiak hartzeko beharrezko gehiengoa. Botoeskuordetza.

1. Erabakiak, baliodunak izateko, gehiengo soilaz onetsi beharko dira, salbu eta Nafarroako Foru Eraentza Berrezarri eta Hobetzeari buruzko Lege Organikoak, legeek eta erregelamendu honek berak ezartzen dituzten gehiengo bereziak eskatzen dituztenak.

2. Foru parlamentarien botoa pertsonala eta eskuordeezina da, honako kasuetan izan ezik: aldi baterako ezintasuna, amatasun edo aitatasun baimenak izateagatik, haurdunaldi bitarteko arrisku-egoeran egoteagatik edo aurreko bi egunetan gertaturiko lehen graduko ahaide baten heriotzagatik edo ospitaleratzea dakarren gaixotasun larriagatik.

3. Botoa eskuordetzeko eskaria Parlamentuko Mahaiari zuzendutako idazki batez eginen da. Idazki horretan, botoa eskuordetzen duen pertsonaren izena eta boto-eskuordetza jasotzen duen pertsonaren izena agertuko dira, bai eta eskuordetza hori zein bilkuratan erabili beharko den edo, kasua bada, eskuordetzak zenbat iraunen duen. Idazki horretan espresuki jasoko da boto-eskuordetza jasotzen duen foru parlamentaria konprometitzen dela parlamentari eskuordetza-emaileak aldez aurretik adierazi dion edukiko botoa ematera eta, halaber, azken hori konprometitzen dela eskuordetza-hartzaileari bozketa-unea baino lehenago ematera botoaren edukiaren berri. Mahaiak, eskaerari buruz ebazterakoan, boto eskuordetua emateko prozedura ezarriko du.

4. Gehiengo soila lortzeko beharrezkoa da aldeko botoak aurkakoak baino gehiago izatea, abstentzioak, boto zuriak edo baliogabeak kontuan hartu gabe.

5. Gehiengo osoa lortzeko beharrezkoa da bozketa egiten duen organoko kideen erdiak baino gehiagok boto bera ematea.

6. Foru parlamentariek ezin izanen dute parte hartu beren parlamentari-estatutuari eragiten dioten ebazpenei buruzko bozketetan.

106. artikulua. Eteteko ezintasuna.

Bozketak ezin izanen dira ezergatik ere eten. Bozketak egiten diren bitartean, lehendakariak ez dio inori hitz egiteko baimena emanen, eta ezein foru parlamentarik ezin izanen du aretoa utzi edo aretoan sartu.

107. artikulua. Bozketaren ordua finkatzea.

Erregelamendu honek ezartzen dituen kasuetan eta lehendakariak, garrantzia edo izaera bakana dela-eta hala erabakitzen duenetan, bozketa ordu jakin batean eginen da. Lehendakariak aldez aurretik iragarri behar duen ordu hori iristean eztabaida bukatu gabe badago, lehendakariak bozketa egiteko beste ordu bat ezarriko du.

108. artikulua. Bozketamoduak.

Bozketa honelakoa izan ahalko da:

Bat.-Lehendakariak egindako proposamenaren baiespenez.

Bi.-Arrunta.

Hiru.-Publikoa, banan-banan deituta.

Lau.-Sekretua.

109. artikulua. Lehendakariak egindako proposamenaren baiespenez.

Lehendakariak egiten dituen proposamenek, behin iragarri eta gero, inongo eragozpenik edo oposiziorik eragiten ez badute, baiespenez onetsita daudela ulertuko da. Bestela, bozketa arrunta eginen da.

110. artikulua. Bozketa arrunta.

Bozketa arrunta, lehendakariak zer erabakitzen duen, ondoren esaten den hauetako modu batez egin ahalko da:

Bat.-Eskua altxatuta, aurrena onesten dutenek, hurrena onesten ez dutenek eta, azkenik, abstenitzen direnek. Lehendakariak zenbaketa egin dezaten aginduko die idazkariei baldin eta emaitzari buruz zalantzarik badu; edo, are emaitza aldarrikatu ondoren, talde parlamentarioren batek erreklamazioa egiten badu. Hurrengo eztabaida hasiz gero ez da inongo erreklamaziorik onartuko.

Bi.-Foru parlamentari bakoitzak zer boto eman duen eta bozketaren guztizko emaitzak zein diren frogatzen duen prozedura elektroniko baten bidez.

111. artikulua. Dei bidezko bozketa publikoaren edo bozketa sekretuaren bidezkotasuna.

1. Bozketa izanen da parlamentariei banan-banan deituta eginiko bozketa publikoa; edo, erregelamendu honek hala eskatzen duenean edo bi talde parlamentariok nahiz parlamentarien edo kasuan kasuko organoko kideen bosten batek hala eskatzen duenean, bozketa sekretua izanen da. Bestela egiteko eskaerarik baldin badago, bozketa sekretua izan dadila eskatzen duena nagusituko da. Legegintzako prozeduretan bozketa ezin izanen da inoiz ere sekretua izan.

2. Zentsura-mozioaren eta konfiantza-eskaeraren bozketak beti izanen dira publikoak, parlamentariei banan-banan deituta.

112. artikulua. Dei bidezko izenezko bozketa.

Parlamentariei banan-banan deituta egindako bozketa publikoan idazkariak foru parlamentarien izenak esanen ditu, eta haiek "bai", "ez" edo "abstentzioa" erantzunen dute. Deia lehen deituren alfabetoko hurrenkeraren arabera eginen da. Foru parlamentari diren Nafarroako Gobernuko edo Diputazioko kideak eta Mahaia azkenak izanen dira botoa ematen.

113. artikulua. Bozketa sekretua.

1. Bozketa sekretua boto-paperen bidez egin beharko da, eta Erregelamenduak ezartzen duenean, pertsonak hautatu behar direnean edo 111.1 artikuluak ezartzen duenari jarraituz eskatu denean izanen da aplikatzekoa, ponentzien burutzak hautatzeko izan ezik.

2. Aurreko apartatuak aipatzen duen bozketa egiteko, foru parlamentariak izenez deituak izanen dira mahaira, alfabetoko hurrenkeran, eta lehendakariari boto-txartelak emanen dizkiote, hark hautestontzian sar ditzan.

114. artikulua. Botozenbaketa.

Bozketa bukatu eta gero, idazkariek botoak zenbatuko dituzte, eta horietako batek emaitza iragarriko du. Ondoren, lehendakariak hartu den erabakia aldarrikatuko du.

115. artikulua. Berdinketa.

1. Bozketaren batean berdinketa badago, bigarren bozketa eginen da, eta oraindik ere berdinketa badago, bozketa eten eginen da, lehendakariak arrazoizkotzat jotzen duen epe batez. Epea bukatuta, bozketa errepikatuko da, eta, oraindik ere berdinketa badago, bozkatzen ari den irizpena, artikulua, zuzenketa, boto partikularra edo dena delako ekimena bazter utziko da.

2. Batzordeetako bozketetan, berdinketarik ez dagoela ulertuko da baldin eta, talde parlamentario bereko batzordekide guztiek zentzu berean bozkaturik, boto-berdintasuna desegin ahal bada talde bakoitzak Osoko Bilkuran dituen botoen kopurua haztatuz. Talde mistoko parlamentari diren batzordekideen boto kopuruari dagokionez, taldeko zenbat kidek eman duten beren ordezkaritza -idatziz frogatu beharko da-, horrenbeste boto zenbatuko dira.

3. Alabaina, batzordeak eskumen osoaz jarduten duen legegintzako prozeduretan, 1. apartatuan aurreikusitako bozketak egin eta gero berdinketa badago, Osoko Bilkurak erabakiko du berdinketa nola ebatzi.

4. Aurreko apartatuetan xedaturikoa salbu, lehendakariak bozketa bat errepikatzea agindu ahalko du, Mahaiko gainerako kideei entzun ondoren, soil-soilik bozketa-mekanismoan akats bat izan denean edo bozketaren emaitza ez denean bertaraturiko parlamentarien egiazko borondatearen araberakoa, boto-emaileetakoren baten ageriko hutsegitearen ondorioz, eta berak berehalakoan eskatuta.

116. artikulua. Botoazalpena.

1. Aurretiazko eztabaidarik gabeko gai bati buruzko bozketa egin ondoren, lehendakariak bost minutuko txanda eman ahalko dio talde parlamentario bakoitzari, zeinek bere botoa esplika dezan. Halaber, txanda hori eman ahalko dio aurretiazko eztabaidan iragarritako botoa aldatzen duen talde parlamentarioari ere.

2. Taldeen mintzaldien hurrenkera talde bakoitzak daukan kide kopuruaren arabera ezarriko da, betiere talde mistotik hasi eta txikienetik handienerako hurrenkeran.

3. Bozketa sekretua denean ez dago botoa azaltzerik.

4. Ez da onartuko nork bere botoa azaltzea, bere talde parlamentarioaren botoaren bestelakoa ematen duen foru parlamentariaren kasuan izan ezik, lehendakariak aldez aurretik baimena emanda.

Halaber, botoa azaldu ahalko dute eztabaidan parte hartu ez duten atxiki gabeko parlamentariek, lehendakariak aldez aurretik baimena emanda.

VI. KAPITULUA. Bilkuren aktak

117. artikulua. Parlamentuaren organoen aktak.

1. Ondokoen bilkuretan, akta jasoko da: Osoko Bilkura, batzordeak, Eledunen Batzarra, Legebiltzarreko Mahaia, batzordeetako mahaiak eta ponentziak. Aktan labur emanen da eztabaidatutako gaien, mintzatu diren pertsonen, gertatutako gorabeheren eta hartutako erabakien berri.

2. Idazkari batek izenpetuko ditu bilkura aktak, lehendakariak ontzat eman ondoren, eta gero Parlamentuko Zerbitzu Orokorretan geldituko dira, foru parlamentarien eskura. Bilkura bukatu eta ondorengo hamar egunetan akten edukiari buruzko erreklamaziorik ez badago, onetsita daudela ulertuko da; bestela, kasuan kasuko organoaren hurrengo bilkuran hartuko da erabakia.

VII. KAPITULUA. Epeak zenbatzea eta agiriak aurkeztea

118. artikulua. Epeen zenbaketa eta egun baliodunak.

1. Non eta kontrakoa ezartzen ez den, erregelamendu honetan egunka adierazten diren epeak egun baliodunetan zenbatuko dira, eta hilabeteka adierazten direnak, berriz, datatik datara. Mugaegunaren hilabetean ez baldin badago zenbaketaren hasierako egunari dagokion egunik, ulertuko da epea amaitzen dela hilabeteko azken egunean.

Zenbaketari dagokionez, egun baliogabeak dira larunbat eta igandea, Nafarroa eta Iruńeko lan-egutegian jai-egun gisa agertzen direnak eta Legebiltzarreko Mahaiak baliogabe izendaturiko egunak.

2. Zenbaketa honetatik salbuetsiko dira uztaila eta abuztua, salbu eta gaia bilkura berezi baten gai-zerrendan sartuta badago, galdera idatzi bada, edo Erregelamendu honetako 15.1 artikuluan aurreikusitako epea baldin bada. Legebiltzarreko Mahaiak ezarriko du zer egun bihurtu baliodun, betiere aipatu bilkura berezia egin ahal izateko izapideak betetzeko, ez beste ezertarako.

119. artikulua. Epeak luzatzea edo laburtzea.

1. Legebiltzarreko Mahaiak erregelamendu honetan ezartzen diren epeak laburtzea edo luzatzea erabaki dezake, salbu eta Nafarroako Foru Eraentza Berrezarri eta Hobetzeari buruzko Lege Organikoan ezarririk daudenak.

2. Oro har, luzapenak ez dira epea bera baino luzeagoak izanen, eta laburtzapenak ez dira epearen beraren erdia baino handiagoak izanen.

120. artikulua. Agiriak aurkeztea.

1. Parlamentuko organo bati igortzen zaion agiri oro Legebiltzarreko Erregistro Orokorrean ofizialki erregistratu beharko da, modu elektronikoan nahiz presentzialki, Nafarroako Parlamentuko Administrazio Elektronikoaren Funtzionamenduari buruzko Erregelamenduan ezarritakoari jarraikiz. Azken kasu horretan, soilik egin ahal da egun baliodunetan eta Nafarroako Parlamentuaren Mahaiak ezarritako ordutegiaren barruan.

2. Erregistroko ordutegia hogeita lau ordukoa ez bada, agiriak aurkezteko erregelamendu honek ezartzen dituen epeak hurrengo egun balioduneko eguerdiko hamabiak arte luzatuko dira.

3. Parlamentuko Erregistro Orokorrean aurkeztu diren agiriak Mahaiak kalifikatu behar baditu, aurkeztu ondotik deitzen den lehen bilkurako gai-zerrendan sartuko dira.

4. Agiriak baliabide informatikoen bidez aurkeztu ahalko dira Nafarroako Parlamentuaren Erregistro Orokorrean, Legebiltzarreko Mahaiak ezartzen dituen arauek xedatutakoaren arabera.

VIII. KAPITULUA. Presako prozedura

121. artikulua. Presaz izapidetzea.

1. Legebiltzarreko Mahaiak gai bat presako prozeduraz izapidetzea erabaki ahalko du, baldin eta Nafarroako Gobernuak, bi talde parlamentariok edo foru parlamentarien bostenak hala eskatzen badute.

2. Izapidetzen ari den gai bat presako prozeduraz izapidetzea erabakiz gero, presako prozedura ondorengo izapideei aplikatuko zaie.

122. artikulua. Epeak presazko prozeduran.

Erregelamendu honetako 119. artikuluak ezarritakoa gorabehera, presako prozeduran epeek prozedura arruntean irauten dutenaren erdia iraunen dute.

IX. KAPITULUA. Nafarroako Parlamentuko argitalpenak eta bere lanen publizitatea

123. artikulua. Argitalpen ofizial motak.

Ondorengo hauek izanen dira Nafarroako Parlamentuko argitalpen ofizialak:

1. Nafarroako Parlamentuko Aldizkari Ofiziala.

2. Nafarroako Parlamentuko Bilkuren Egunkaria.

124. artikulua. Nafarroako Parlamentuko Bilkuren Egunkaria.

1. Parlamentuko Bilkuren Egunkarian jasoko dira Legebiltzarreko Osoko Bilkuraren, Batzorde Iraunkorraren eta batzordeen jendaurreko bilkuretako eta Mahaiak erabakitzen dituen lan-bilkuretako mintzaldi eta erabaki guztiak nahiz gertatu diren gorabeherak, bilkura horiek egin eta hilabeteko epean. Egunkari horretan jasoko dira, halaber, ikerketa-batzordeetan egiten diren agerraldi publikoak.

2. Bilkura sekretuetan gorabeheren, mintzaldien nahiz erabakien hitzez hitzeko akta jasoko da, eta haren ale bakarra lehendakariak gordeko du. Foru parlamentariek kontsultatu ahalko dute, Mahaiak erabaki hori hartuz gero.

Hartzen diren erabakiak Bilkura Egunkarian eta Aldizkari Ofizialean argitaratuko dira, salbu eta Mahaiak isilpean gorde beharrekoak direla erabakitzen badu. Hori guztia ez da eragozpen izanen erregelamendu honetako 71. artikuluaren 8. eta 9. apartatuek ezarritakoa betetzeko.

125. artikulua. Nafarroako Parlamentuko Aldizkari Ofiziala

1. Legebiltzarreko Aldizkari Ofizialean argitaratuko dira foru-lege proiektuak eta foru-lege proposamenak, boto partikularrak eta zuzenketak, ponentzien txostenak, batzordeen irizpenak, Osoko Bilkuraren erabakiak, interpelazioak, mozioak, idatzizko galderak eta haien erantzunak, Gobernuaren komunikazioak eta erregelamendu honetako arauetakoren batek agintzen dituen agiriak eta testuak, Parlamentuko izapidetze egokirako eta behar bezala ezagutzeko argitaratu beharrekoak eta lehendakariak zein Mahaiak agintzen dituztenak.

2. Lehendakariak edo Mahaiak, presa dela-eta agindu ahalko du lehen apartatuan aipatzen diren testuak eta agiriak beste bitartekoren baten bidez erreproduzi daitezela eta eztabaidatu behar dituen organoetako kideei bana dakizkiela, ondoren Legebiltzarreko Aldizkari Ofizialean argitaratu beharko badira ere.

126. artikulua. Lan parlamentarioaren publizitatea.

Parlamentuak legebiltzarreko izapide eta agiriak herritarren, Taldeen eta gizarte erakundeen eskueran jarriko ditu informazioaren eta komunikazioaren teknologien bidez eta bereziki Interneten eta berariazko beste baliabide batzuen bidez.

127. artikulua. Hedabide sozialak.

1. Legebiltzarreko Mahaiak kasuan-kasuan hartu beharreko neurriak hartuko ditu hedabideei Parlamentuko organoen jarduerei, proposamenei eta ebazpenei buruzko informazioa emateko.

2. Mahaiak berak arautuko du hedabideen ordezkari grafiko eta literarioei kredentzialak ematea, Parlamentuan haientzat egokitzen diren tokietara eta joan ahal diren bilkuretara sar daitezen.

3. Inork ere ezin izanen du Parlamentuko organoen bilkuren grabazio irudizko edo soinuzkorik egin, Legebiltzarreko lehendakariak horretarako baimena eman ez badio.

X. KAPITULUA. Parlamentuko diziplina

1. ATALA. Eginbehar parlamentarioak ez betetzeagatiko arau-hauste eta zehapenak

128. artikulua. Arauhausteen sailkapena.

Diziplina-zehapena ekar dezaketen arau-hausteak oso larriak, larriak edo arinak izan daitezke.

129. artikulua. Arauhauste oso larriak.

Arau-hauste oso larriak hauek izanen dira:

Lehena.-Zehapena ezarri eta bete ondoren, foru parlamentariak bere jarrerari eusten dionean.

Bigarrena.-Foru parlamentariak armarik eramaten badu Parlamentu barrenean.

Hirugarrena.-Foru parlamentariak erregelamendu honetako 25. artikuluak ezartzen duenaren aurka egiten duenean.

Laugarrena.-Jarduera- eta ondasun-adierazpenetan garrantzia ekonomikoagatik edo sozialagatik esanguratsuak diren datuak ezkutatzea edo faltsutzea.

130. artikulua. Arauhauste larriak.

Arau-hauste larriak hauek izanen dira:

Lehena.-Foru parlamentariak ere borondatez Osoko Bilkuraren saioetara edo batzordeetako bilkuretara era nabarmenean edo behin eta berriro joateari uzten dionean.

Bigarrena.-Erregelamendu honetako 24. artikuluak ezartzen duen sekretua gorde beharra hausten duenean.

Hirugarrena.-Jarduera- eta ondasun-adierazpena ez aurkeztea, pertsona interesatuari hura bete dezan eskatu ondoren.

Laugarrena.-Aurkezturiko adierazpenaren akatsak edo hutsuneak ez zuzentzea, pertsona interesatuari hori egin dezan eskatu ondoren.

Bosgarrena.-Adierazpenean jaso beharreko datuak ezkutatu edo faltsutzea.

Seigarrena.-Parlamentu barrenean, bilkuran edo bilkuratik kanpo, foru parlamentariak bere jokabidearekin egitez edo hitzez ordena larriki urratzen badu.

131. artikulua. Arauhauste arinak.

Honako hauek dira arau-hauste arinak:

Lehena.-Foru parlamentaria, hiru aldiz ordena gordetzera deitu eta gero, bilkura-aretotik kanporatua izan eta aretoa utzi nahi ez duenean.

Bigarrena.-Jarduera- eta ondasun-adierazpena ez aurkeztea horretarako ezarritako epean.

Hirugarrena.-Legebiltzarraren nahiz bere kideen, Estatuko nahiz Nafarroako erakundeen edo beste edozein pertsonaren nahiz erakunderen izen onaren aurkako hitzak esaten edo irudiak edo grafismoak erakusten baditu.

Laugarrena.-Aurreko artikuluan aipaturiko egintzak, larritzat hartzeko behar adinako pisurik ez dutenean.

132. artikulua. Zehapenen tipifikazioa.

1. Arau-hauste oso larriengatik erregelamendu honetako 13. artikulutik 19.era arauturiko eskubide parlamentarioak aldi baterako etetea ezarri ahalko da, hiru hilabetetik sei hilabetera bitarteko eperako. 129. artikuluko 4. apartatuan tipifikaturiko arau-hausteek ekarriko dute bidegabeki jasotako zenbatekoak itzuli behar izatea.

2. Arau-hauste larriengatik erregelamendu honetako 13. artikulutik 19.era arauturiko eskubide parlamentarioak aldi baterako etetea ezarri ahalko da, gehienez ere hiru hilabetez. 130. artikuluko 4. eta 5. apartatuan tipifikaturiko arau-hausteek ekarriko dute bidegabeki jasotako zenbatekoak itzuli behar izatea.

3. Arau-hauste arinengatik honako zehapenak ezarriko dira:

a) Modu pribatuan kargu hartzea edo idatziz ohartaraztea eginbeharra betetzeko aginduz.

b) Bilkuratik kanporatzea, bilkura berean ordena gordetzeko lehendakariaren hiru dei jasotzeagatik.

133. artikulua. Delitutzat joko diren egintzak.

1. Zehapenaren arrazoia, Mahaiaren iritziaren arabera, delitua ere izan ahal bada, lehendakariak kasuan kasuko erakunde judizial eskudunari jakinaraziko dio.

2. Nolanahi ere, ezarritako zehapenak Nafarroako Parlamentuko Aldizkari ofizialean eta Nafarroako Foru Komunitateko Aldizkari Ofizialean argitaratuko dira.

134. artikulua. Zehapenprozedura.

1. Zehapen-prozedura erregelamendu honetan xedatutakoari egokituko zaio eta, bertan aurreikusi gabeko alderdietan, Administrazio Publikoen Administrazio Prozedura Erkideari buruzko urriaren 1eko 39/2015 Legean eta Sektore Publikoaren Araubide Juridikoari buruzko urriaren 1eko 40/2015 Legean ezarritakoari. Edonola ere, lege horien printzipioak nahitaez bete beharrekoak izanen dira.

2. Zehapen-prozedurak, gaiari lotzeko eta ordena gordetzeko deien kasuan izan ezik, kasu horietan eskumena Parlamentuko lehendakariari edo kasuko batzordeburuari baitagokio, salaketa-idazki batekin hasiko dira, edozein foru parlamentari edo talde parlamentarioren ekimenez. Idazki horrek honakoak jaso beharko ditu behinik-behin:

a) Ustezko ardura duen foru parlamentariaren identifikazioa.

b) Prozedurari hasiera emateko abiapuntu izan diren egintzak, labur azaldurik, haiei dagozkiekeen kalifikazioa eta zehapenak, ezertan ukatu gabe instrukziotik hel daitekeena.

135. artikulua. Organo eskudunak.

1. Mahaia izanen da diziplinazko espedienteak ebazteko organo eskuduna.

2. Mahaiak Erregelamendu Batzordeko kideen artetik izendatuko du espedientearen instrukzio-egilea, zeina ezin izanen baita espedientea ireki zaionaren talde parlamentario berekoa izan.

3. Instrukzio-egileak egintzak zehaztu eta egiaztatzeko beharrezkoak diren eginbideak aginduko ditu, bai eta gertaera argitzeko eta zehapena ekar dezaketen erantzukizunak zehazteko bidea emanen duten frogak ere.

136. artikulua. Karguorria.

1. Instrukzio-egileak dagokion kargu-orria egin eta jakinaraziko du.

2. Kargu-orria argitasunez eta zehaztasunez idatziko da, egotzitako gertaerak jasoko ditu eta ustez eginiko arau-haustea eta ezar litekeen zehapenak adieraziko ditu aplikatzekoak diren Erregelamenduko xedapenen aipamenarekin. Halaber, instrukzio-egilea eta zehapena ezartzeko organo eskuduna nortzuk diren adieraziko du.

3. Kargu-orriak salatutako pertsona identifikatuko du eta hamar eguneko epe luzaezina emanen dio egokitzat jotzen dituen alegazioak aurkez ditzan.

4. Salatutako pertsonak, kargu-orriari ematen dion erantzunean, egokitzat jotzen duen eta zuzenbidean onartzekoa den edozein froga egitea proposatu ahalko du eta beharrezkotzat jotzen dituen agiriak aurkeztu ahalko ditu.

5. Instrukzio-egileak gehienez ere hamabost eguneko epea izanen du, gertaerak eta balizko erantzuleak zehazteko egokiak direla iritzita, beharrezkotzat jotzen dituen frogak egiteko.

6. Frogaldia amaituta, instrukzio-egileak ebazpen-proposamena emanen du. Bertan gertakari zehatzak finkatuko ditu, kalifikazio juridikoa eginen du, eginiko arau-haustea zehazte aldera, eta salatutako pertsonaren balizko erantzukizuna adierazi eta ezarri beharrezko zehapena proposatuko du.

137. artikulua. Ebazpenproposamena.

1. Espedientea amaiturik, instrukzio-egileak bere ebazpen-proposamena aurkeztuko dio Mahaiari, eta honek gehiengo soilaz erabakiko du.

2. Diziplina-prozedurari amaiera emanen dion ebazpena juridikoki arrazoitua izanen da, espedientean planteatzen diren alderdi guztiei erantzun beharko die, zehapenen norainokoa eta iraupena jasoko du eta ezin izanen du kargu-orriaren eta ebazpen-proposamenaren oinarri izan zirenak beste gertaerarik onartu, nahiz eta beste balorazio juridiko bat ematen zaien.

3. Diziplinazko espedienteari buruzko ebazpenak, ezarri beharreko zehapena oso larria denean, Eledunen Batzarraren berrespena beharko du, eta erabaki horren aurka ezin izanen da errekurtsorik jarri.

4. Mahaiak ezartzen dituen zehapenen aurka, aurreko aparatuan aurreikusitakoa salbuetsita, errekurtsoa paratu ahalko da Eledunen Batzarraren aurrean, zehapena jakinarazi eta hamabost eguneko epean. Eledunen Batzarrak errekurtsoa ebatziko du, aurkeztu eta hamabost eguneko epean.

2. ATALA. Gaiari lotzeko eta ordena gordetzeko deiak

138. artikulua. Gaiari lotzeko deiak.

1. Lehendakariak gaiari lotzeko deia eginen die hizlariei, haiek beren mintzaldiak eztabaidagaiarekin zerikusirik gabekoak diren aferetan edo aurrez eztabaidatu edo onetsi diren aferetan oinarritzen dituzten diren bakoitzean.

2. Mintzaldi berean gaiari lotzeko hiru dei jasotzen dituen hizlariari hitza kenduko zaio.

139. artikulua. Ordenarako deia.

1. Mintzatzen ari diren foru parlamentariek eta gainerako pertsonek ordenarako deia jasoko dute baldin eta:

a) Legebiltzarraren nahiz bere kideen, Estatuko nahiz Nafarroako erakundeen edo beste edozein pertsonaren nahiz erakunderen izen onaren aurkako hitzak esaten edo irudiak edo grafismoak erakusten badituzte.

b) Eztabaidak behar bezala gauzatzeko ezarritakoaren aurka aritzen badira bere mintzaldietan.

c) Bilkuren ordena hausten badute, besteren hitza etenez edo beste modu batez.

d) Hizlari bati behin hitza kendu ondoren, hizketan segitu nahi badute.

e) Erregelamendu honetan aurreikusten diren gainerako kasuetan.

2. Aurreko apartatuko a) letrako kasua gertatzen bada, lehendakariak aginduko du esandako irainak ez daitezela Bilkura Egunkarian jaso, eta hizlariari eskatuko dio hitzak erretiratzeko. Hizlariak uko egiten badio eskaera horri, ordena gordetzeko deiak egin ahalko dira, hurrengo artikuluan zehazten diren ondorioekin.

140. artikulua. Behin eta berriro ordenarako deitzea.

1. Bilkura berean ordena gordetzeko hiru dei jasotzen dituen hizlariari hitza kenduko zaio, eta lehendakariak, eztabaidarik gabe, bilkura egiten ari den aretotik kanpora bidaltzearekin zehatu ahalko du, eta debekatu eginen dio bilkura horretan egotea.

2. Kanporatuak aretoa uzteari uko egiten badio, lehendakariak eten eginen du bilkura, gero, hura bertan ez dela, berriro hasiera emateko, eta kanporaketa eraginkor egiteko behar diren neurri guztiak hartuko ditu. Kasu horietan, lehendakariak, 132. artikuluan ezartzen dena gorabehera, deitua izan den hurrengo bilkurara joateko debekua ezarri ahalko dio.

3. ATALA. Parlamentu barruko ordena

141. artikulua. Lehendakariaren ahalmenak.

Parlamentuko lehendakariak Legebiltzarreko gela guztietan ordena gorde dadin begiratuko du, eta, ordena urratzen bada, egoera lehengoratzeko egoki irizten dituen neurri guztiak hartuko ditu.

142. artikulua. Istilu larriagatik kanporatzea.

Parlamentu barrenean, bilkuran edo bilkuratik kanpo, inork bere jokabidearekin egitez edo hitzez ordena larriki urratzen badu, berehala kanporatua izanen da.

143. artikulua. Istiluak bilkuretan.

Lehendakariak bilkurak eten edo bukatutzat eman ahalko ditu, baldin eta bilkurak behar bezala egitea galarazten duten istiluak sortzen badira.

144. artikulua. Publikoaren tribunan ordena mantentzea.

1. Jendaurreko bilkuretan, jendea uneoro isilik egotera beharturik dago, inongo onespen edo gaitzespen adierazpenik azaldu gabe.

2. Lehendakariak aretotik kanporatuz zehatuko ditu ordena, aldez edo moldez, urratzen duten jendearen arteko pertsonak. Zalaparta sortzen bada edo ordena-urratzaileak identifikatu ezin baditu, lehendakariak jende guztia aretotik kanpora ateratzeko agindu dezake.

3. Mahaiak hurrengo bilkuretara joatea debekatu ahalko die kanporatuak izan diren pertsonei, eta talde parlamentario bati dagozkion gonbidapenen esleipena eten ahalko du, talde parlamentario horrek gonbidatutako pertsonak bilkura-aretotik kanporatuak izanez gero.

VI. TITULUA. LEGEGINTZAKO PROZEDURA

I. KAPITULUA. Legegintzarako ekimena

145. artikulua. Legegintzako ekimena.

1. Nafarroako Parlamentuan gauzatu beharreko legegintzako ekimena hauei dagokie:

a) Foru Diputazioari.

b) Foru parlamentariei, erregelamendu honek ezartzen duen moduan.

c) Udalei, Nafarroako Foru Eraentza Berrezarri eta Hobetzeari buruzko Lege Organikoaren 19.1.c) artikuluaren garapenez Nafarroako udalen legegintzako ekimena arautzen duen Foru Legeak ezartzen duenarekin bat.

d) Herritarrei, Nafarroako Foru Eraentza Berrezarri eta Hobetzeari buruzko Lege Organikoaren 19.2 artikuluaren garapenez Herritarren legegintzako ekimena arautzen duen Foru Legeak ezartzen duenarekin bat.

2. Nafarroako kontu orokorrei eta aurrekontuei dagokienez, baita kreditu bereziei zein kreditu osagarriei nola Nafarroako Foru Eraentza Berrezarri eta Hobetzeari buruzko Lege Organikoaren 26. artikuluaren a) letrak aipatzen dituenei dagokienez ere, legegintzako ekimena Nafarroako Gobernuari dagokio bakar-bakarrik.

3. Nafarroako Foru Eraentza Berrezarri eta Hobetzeari buruzko Lege Organikoaren 20.2 artikuluan aipatzen diren foru legeen xede izan behar duten gaietan, legegintzako ekimena Nafarroako Gobernuari eta foru parlamentariei dagokie bakar-bakarrik.

II. KAPITULUA. Legegintzako prozedura arrunta

I.-Zuzenketa motak. Zuzenketak aurkeztea.

146. artikulua. Forulege proiektuak.

1. Nafarroako Gobernuak igortzen dituen foru-lege proiektuek zioen azalpena eta legez nahitaezkoak diren txostenak edukiko dituzte, baita haiei buruz iritzia eman ahal izateko beharrezkoak diren aurrekariak ere.

2. Parlamentuko Mahaiak, Eledunen Batzarrari entzun ondoren, foru-lege proiektua izapidera onartzen den edo ez erabakiko du, kasuan kasuko batzordeari emanen dio proiektuari buruz irizpena emateko eskumena eta Legebiltzarreko Aldizkari Ofizialean argitara dadila aginduko du.

147. artikulua. Zuzenketa motak.

1. Behin Parlamentuko Aldizkari Ofizialean foru-lege proiektu bat argitaratu eta gero, gutxienez hamar egun balioduneko epea irekiko da, eta epe horrek iraun bitartean talde parlamentarioek eta foru parlamentariek, nork bere izenean, zuzenketak aurkeztu ahalko dizkiote proiektuari, kasuan kasuko batzordeko mahaiari igorritako idazki baten bitartez.

2. Talde parlamentarioek aurkeztutako zuzenketak kasuan kasuko eledunak izenpetuko ditu, eta foru parlamentariek nork bere izenean aurkezten dituztenak parlamentaria kide den taldearen eledunak izenpetuko ditu, haien berri izatearen ondorio hutsetarako. Eledunaren sinadura eza ez da eragozpen izanen zuzenketa izapidetzeko, kasuan kasuko taldeak zuzenketari buruz daukan jarrera nolakoa den adieraziko ez duen arren.

3. Zuzenketak osotasunari aurkeztu ahal zaizkio, edo artikuluei.

4. Osoko zuzenketak dira foru-lege proiektuaren egokitasunari, printzipioei edo oinarriei buruzkoak eta proiektua Gobernuari itzul dakion eskatzen dutenak, edo proiektuaren testuaren aurrean ordezko testu oso bat, legegintzako ekimenaren objektu materialarekin kongruentzia gordetzen duena, proposatzen dutenak.

5. Artikuluei aurkezten zaizkien zuzenketak kentzekoak, aldatzekoak edo gehitzekoak izan daitezke. Azken bi kasuetan, zuzenketak aldaketa edo gehikuntza gisa proposatzen den testua jaso beharko du. Halaber, ekimena formalki hobetzeko zuzenketak proposatu daitezke, legegintza-teknikaren arauekin bat.

6. Xede horrekin, eta, oro har, prozedura normatiboaren ondorio guztietarako, xedapen gehigarri, iragankor nahiz indargabetzaileak eta azken xedapenak artikulutzat joko dira, eta beste horrenbeste legearen titulua, legearen sistematizazioaren zati bakoitzaren idazpuruak, antolamendu sistematikoa bera eta zioen azalpena.

7. Zioen azalpenari buruzko zuzenketak dagokion izapidearen amaieran eztabaidatzen dira.

8. Artikuluei aurkeztutako zuzenketetatik ez dira onartuko aipagai duten testuarekin behar bezalako zerikusirik ez dutenak, ez eta, osotasunean aintzat hartuta, osoko zuzenketa batean jasotako ordezko testuarekin identifikatzen direnak ere.

148. artikulua. Aurrekontuetan eragina duten zuzenketak.

1. Foru-lege proiektu bati eginiko zuzenketek abian den ekitaldiko kredituak gehitzea edo aurrekontu-sarrerak gutxitzea dakartenean, haiek izapidetzeko beharrezkoa izanen da Foru Diputazioaren adostasuna.

2. Horretarako, kasuan kasuko batzordeko mahaiak edo, bestela, txostena idatzi behar duen ponentziak, Foru Diputazioari igorriko dizkio, Parlamentuko lehendakariaren bidez, gehitzea edo gutxitzea dakarten zuzenketa horiek.

3. Foru Diputazioak erantzun arrazoitua eman beharko du zortzi eguneko epean. Epe hori bukatuta, ulertuko da Foru Diputazioaren isiltasunak adostasuna adierazten duela. Mahaiak epe hori luzatzea erabaki ahalko du, Foru Diputazioak hala eskatuta.

4. Foru Diputazioak, aurreko apartatuetan adierazten den eran kontsultarik egin ez bazaio, izapidetzearen edozein unetan adierazi ahalko du ez dagoela ados aurrekontuko sarrerak gutxitzea edo kredituak gehitzea dakarten zuzenketak izapidetzearekin.

Eledunen Batzarrak ebatziko ditu zuzenketek aurrekontuan duten eraginari buruz batzordeko mahaiaren eta Foru Diputazioaren artean egon litezkeen desadostasunak.

149. artikulua. Zuzenketak onartu eta ordenatzea.

1. Zuzenketak aurkezteko epea amaituta, batzordeko mahaiak -aldez aurretik batzorde horren lehendakariak deituta- izapidera onartuko ditu zuzenketak baldin eta 147. artikuluak ezartzen duenarekin bat etorriz aurkeztu badira, aurkeztu izan diren ordenaren arabera antolatuko ditu eta Legebiltzarreko lehendakariari bidaliko dizkio, hark, besterik gabe, Parlamentuko Aldizkari Ofizialean berehala argitara daitezela agindu dezan.

2. Batzordeko mahaiak zuzenketak izapidera ez onartzea erabakiz gero, erabaki horren aurka errekurtsoa jarri ahalko da Eledunen Batzarrean, erabakia jakinarazi ondoko hiru eguneko epean, eta Eledunen Batzarrak behin betiko erabaki arrazoitua emanen du.

150. artikulua. Zuzenketarik gabeko forulege proiektua.

Zuzenketarik aurkeztu ez bada, batzordeko mahaiak Legebiltzarreko lehendakariari emanen dio horren berri, delako foru-lege proiektua Legebiltzarreko Osoko Bilkuran zuzenean izapidetu ahal izan dadin.

II.-Osoko Bilkurako osoko eztabaidak.

151. artikulua. Osoko eztabaida.

1. Erregelamenduak ezarririko epean osoko zuzenketak aurkeztu direnean, foru-lege proiektuen osoko eztabaida eginen da Osoko Bilkuran. Batzordeko lehendakariak, kasu horretan, aurkeztu diren osoko zuzenketak igorriko dizkio Parlamentuko lehendakariari, eztabaidatu behar diren osoko bilkuraren gai-zerrendan sar daitezen osoko zuzenketak.

2. Zuzenketa horien eztabaida 101. artikuluak osoko eztabaidetarako ezartzen duenari jarraituz eginen da Osoko Bilkuran. Eztabaida hasteko, Gobernuko kide batek proiektua aurkeztuko du; hamabost minutu izanen ditu horretarako.

3. Talde parlamentario batek edo foru parlamentari batek osoko zuzenketa bat baino gehiago aurkezten badio foru-lege proiektu bati, Foru Diputazioari itzul dakion eskatuz, lehendakariak zilegi izanen du erabakitzea zuzenketak defentsarako eta eztabaidarako txanda bakar batean meta daitezen.

4. Eztabaida bukatu eta gero, lehendakariak bozketan jarriko ditu defendatu diren zuzenketak, proiektua Foru Diputazioari itzul dakion proposatzen dutenetatik hasita, eta, ondoren, halakorik balitz, ordezko testua proposatzen dutenak, aurkezpenaren hurrenkeraren arabera.

5. Osoko Bilkurak proiektua Gobernuari itzultzea erabakitzen badu, proiektua bazter utzia geldituko da, eta Parlamentuko lehendakariak horren berri emanen dio Foru Diputazioko lehendakariari.

6. Ordezko testua proposatzen duen osoko zuzenketa onartzen bada, Legebiltzarreko Mahaiak, Eledunen Batzarrari entzun ondoren, aintzat hartu den foru-lege proposamen gisa izapidetuko du ordezko testua eta kasuko batzordeari helaraziko dio. Testu hori Nafarroako Parlamentuko Aldizkari Ofizialean argitaratuko da eta zuzenketak aurkezteko epe berri bat irekiko da. Zuzenketak artikuluei buruzkoak baino ez dira izanen.

III.-Batzordeko eztabaida.

152. artikulua. Legegintzako ponentzia.

1. Osoko eztabaida -baldin eta egin bada- bukatu ondoren eta, edozein kasutan ere, zuzenketak aurkezteko epea bukatu ondoren, batzordeak ponentzia bat eratzea erabaki dezake, 64. artikuluak ezarritakoaren arabera arautuko dena, gehienez ere hilabeteko epean txosten bat egin dezan, testua eta artikuluei aurkeztutako zuzenketak ikusirik.

2. Alabaina, batzordeko mahaiak, foru-lege proiektuaren garrantzia edo konplexutasuna direla kausa, txostena egiteko epea luzatu ahalko du, 64. artikuluan ezarritakoa aintzat hartuz.

153. artikulua. Batzordeko eztabaida.

1. Ponentziaren txostena -baldin eta txostenik badago- bukaturik, batzordeko kide guztiei bidaliko zaie, proiektua batzordean eztabaidatzeko zitazioarekin batera. Eztabaida artikuluz artikulu eginen da, eta Gobernuko kide batek proiektuaren aurkezpena egin ahalko du hamabost minutuz, baldin eta osoko eztabaidan proiektuaren aurkezpenik egin ez bada.

2. Proiektuaren testua ken dadin eskatzen duten zuzenketak eztabaidatuko dira lehenbizi. Ondoren -baldin eta halakorik badago- jatorrizko testutik gehien aldentzen diren aldatzeko zuzenketak eztabaidatuko dira, eta bukatzeko, jatorrizko testuari gero eta gehiago hurbiltzen zaizkionak eztabaidatuko dira.

3. Kentzeko eta aldatzeko zuzenketak eztabaidatu ondoren -baldin eta halakorik badago-, proiektuaren testuarekin modu berean jokatuko da.

4. Ukitzen duten artikuluaren testuari buruzko eztabaidak bukatu eta gero eztabaidatuko dira gehitzeko zuzenketak.

5. Zuzenketa aurkeztu duen talde parlamentarioak edo indibidualki aurkeztu duen foru parlamentariak hura defendatu eta gero, aldeko eta kontrako txanda bana irekiko da, hurrenez hurren.

6. txanda bakoitzean mintzatu ahalko da, hamar minutuz gehienez ere, talde parlamentario bakoitzaren ordezkaria, 95.7 artikuluak ezartzen duena eragotzi gabe.

154. artikulua. Zioen azalpena.

Proiektuaren zioen azalpena, eta zioen azalpen horri aurkeztu zaizkion zuzenketak, artikulu guztien eztabaida eta bozketa amaitu ondoren eztabaidatu eta bozkatuko dira, baldin eta batzordeak erabakitzen badu zioen azalpena foru legearen aitzinsolas gisa sartzea.

155. artikulua. In voce zuzenketak.

1. Eztabaida egiten ari den bitartean in voce zuzenketak aurkeztu ahalko dira, zeinen testua orduantxe bertan eman beharko baita idatziz. Zuzenketa horiek eztabaidagaiari buruzkoak izan beharko dute. Batzordeko mahaiak izapidera onartu ahal izateko, gutxienez bi talde parlamentarioren edo batzordeko kideen bostenaren sinadura beharko da. Baldin eta in voce zuzenketa talde mistoko kide den foru parlamentari batek proposatua bada, gutxienez talde parlamentario baten sinadura ere izan beharko du.

2. Mahaiak aztertuko du aurkeztu diren zuzenketek aurreko apartatuan ezarritakoa betetzen duten, eta izapidera onartzen dituen ala ez erabakiko du.

3. In voce zuzenketa bat izapidera onartzen bada, zuzenketa sinatu dutenek gai berari buruz aurkeztu dituzten gainerako zuzenketa guztiak nahitaez erretiratu beharko dituzte.

4. Talde parlamentario bat ez badago ados Mahaiak hartutako erabakiarekin, eskatu ahalko du berriz azter dezala. Mahaiak behin betikoz erabakiko du, ebazpen arrazoitu baten bitartez.

5. Aurkezten diren in voce zuzenketak kasuan kasuko bilkuraren aktan gehituko dira eranskin gisa, eta haien kopia bat artxibatuko da espedientean.

156. artikulua. Batzordeko bozketa.

1. Zuzenketen eta proiektuaren testuaren eztabaida bukatu ondoren, bozketak eginen dira.

2. Kentzeko eta aldatzeko zuzenketak eztabaidatu diren hurrenkera berean bozkatuko dira. Ondoren artikuluaren testua bozkatuko da, eta azkenik gehitzeko zuzenketak bozkatuko dira.

157. artikulua. Irizpena.

1. Proiektuaren eztabaida bukatu ondoren, Batzordeko Mahaiak kasuko irizpena, batzordeak espresuki onetsia, Legebiltzarreko Mahaiari igorriko dio, eta irizpenaren kopia bat emanen die talde parlamentario bakoitzari eta talde mistoko foru parlamentariei. Irizpena ez bada onesten izapidetzeari amaiera emanen zaio.

2. Irizpenak batzordeak hartu dituen erabakiak bilduko ditu, nahiz eta Mahaiak sor litezkeen errakuntza eta akats teknikoak zein terminologiakoak edo gramatikakoak zuzentzeko ahalmena izanen duen.

3. Legebiltzarreko lehendakariak aginduko du batzordearen irizpena argitara dadila. Kasua bada, 159. artikuluak aipatzen dituen zuzenketa eta boto partikularrak ere argitaratuko dira.

158. artikulua. Irizpen negatiboak.

1. Nafarroako Parlamentuko Erregelamenduko 160. artikuluan aipatutako foru lege arrunten proiektuen kasuan, baztertutzat joko da kasuko legegintza-ekimena, eta hala adieraziko da espresuki, baldin eta batzorde eskuduna arau-testu jakin bat onestearen aurka azaltzen bada.

Halakoetan, batzordeko mahaiak foru-lege proiektua ez dela onetsi jakinaraziko dio Parlamentuko Mahaiari, eta Mahaiak, horren berri izan ondoren, kasuko erabakia Nafarroako Parlamentuko Aldizkari Ofizialean argitaratzeko aginduko du.

2. Aurreko apartatuetan azaldutako izapidetze bera izanen dute gehiengo osoa eskatzen duten foru-lege proiektuek, hurrengo artikuluan aipatutakoek, batzordeak arau-testua baztertzen duenean eta, gainera, horretarako emandako epean inongo zuzenketari edo boto partikularri eutsi ez zaionean.

159. artikulua. Zuzenketei eustea eta boto partikularrak egitea.

1. Aurrekontuei buruzko Foru-lege proiektuan eta Nafarroako Foru Eraentza Berrezarri eta Hobetzeari buruzko Lege Organikoko 20.2 artikuluan aipatzen diren foru-lege proiektu eta proposamenei dagokienez, zuzenketa-egileek zilegi izanen dute batzordeak errefusatu dituen beren zuzenketei eustea, irizpena batzordean onetsi ondoko bi eguneko epean Legebiltzarreko Mahaiari igorritako idazki baten bidez, haiek Osoko Bilkuran defendatze aldera, baldin eta gutxienez ere lortu badute batzordeko kideen bosten batek emandako aldeko botoa edo talde parlamentario batek batzordean duen ordezkaritza osoak emandako aldeko botoa.

2. Aurreko apartatuak aipatzen duen idazkiak banan-banan adierazi behar du zein diren beharrezko baldintzak betetzen dituzten eta eutsi nahi zaien zuzenketak.

3. Batzordeko eztabaidan proiektuaren edo proposamenaren testua aldatu egiten bada, talde parlamentarioek, foru parlamentarien elkarteek eta talde mistoko foru parlamentariek zilegi izanen dute, nork bere izenean, baztertua izan den testuaren aldeko boto partikularrak aurkeztea, 1. apartatuan aipatzen den denboran, haiek Legebiltzarreko Osoko Bilkuraren aurrean defendatze aldera.

Boto partikular horiek eskatu ahalko dute, hala bada, ken daitezela gehitzeko zuzenketak onartzearen ondorioz irizpenean sartu diren zatiak.

4. Aurreko apartatuetan jasotako prozeduratik salbuetsita egonen dira proiektu edo proposamen jakin batzuen irizpenak; hain zuzen ere, Mahaiak, Eledunen Batzarrak aho batez erabakia hartu ondoren, 160. artikuluari jarraikiz izapidetzea erabaki duen proiektu eta proposamenetako irizpenak.

IV.-Osoko Bilkurako eztabaida.

160. artikulua. Irizpenak Osoko Bilkuran eztabaidatzea.

Erregelamendu honetako 159. artikuluan jasotako kasuetan izan ezik, foru-lege proiektu edo proposamen bati buruzko irizpena batzordean egin ondoren, irizpen horren osotasunari buruzko eztabaida eginen da eta, jarraian, behar den bozketa eginen da.

Aurrekoa gorabehera, lehendakaritzak izapidera onartuko ditu Legebiltzarreko kideen gehiengoa, gutxienez, ordezkatzen duten talde parlamentarioek eztabaidaren hasiera baino lehen aurkezten dituzten in voce zuzenketak. Zuzenketa horiek sinatzaileek defendatuko dituzte irizpenaren osotasunari buruzko jarrera hartzen dutenean, eta hasieran bozkatuko dira, bakoitza dagokion ordenan; onetsiak izanez gero, irizpenaren testuari txertatuko zaizkio, eta testuaren osotasunari buruzko bozketa bakarra eginen da.

161. artikulua. Aurrekontuen irizpena eta gehiengo osoa behar duten irizpenak Osoko Bilkuran eztabaidatzea.

1. Erregelamendu honetako 159. artikuluan jasotako kasuetan, zuzenketarik mantendu bada edo boto partikularrik egin bada, irizpenaren artikuluak eztabaidatu eta bozkatzeari ekinen zaio. Ondoko arauei jarraituz jokatuko da artikulu bakoitzari dagokionez:

Lehenengoa.-Irizpenaren testua ken dadin eskatzen duten zuzenketak eta boto partikularrak eztabaidatuko dira lehenbizi. Ondoren -baldin eta halakorik badago- lehendakariaren iritziz jatorrizko testutik gehien aldentzen direnak eztabaidatuko dira, eta bukatzeko, jatorrizko testuari gero eta gehiago hurbiltzen zaizkionak eztabaidatuko dira.

Bigarrena.-Zuzenketak eta boto partikularrak erregelamendu honetako 101. artikuluak ezartzen duenaren arabera eztabaidatuko dira, baina mintzaldiak ez dira inolaz ere bost minutukoak baino luzeagoak izanen.

Hirugarrena.-Zuzenketak eta boto partikularrak eztabaidatu ondoren, artikuluaren testuarekin modu berean jokatuko da.

Laugarrena.-Ukitzen duten artikuluaren testuari buruzko eztabaidak bukatu eta gero eztabaidatuko dira gehitzeko zuzenketak.

Bosgarrena.-Artikulu bakoitzaren eztabaida bukatu eta gero, artikulu hori bozkatuko da. Kentzeko eta aldatzeko zuzenketak eta boto partikularrak bozkatuko dira eztabaidatu diren hurrenkera berean. Ondoren artikuluaren testua bozkatuko da, eta azkenik gehitzeko zuzenketak bozkatuko dira.

Seigarrena.-Artikuluen eztabaida bukatu ondoren, aurreko arauek ezartzen dutenarekin bat etorriz, irizpenaren aitzinsolasa eta hari aurkeztutako zuzenketak eta boto partikularrak eztabaidatu eta bozkatuko dira.

2. Zuzenketarik mantendu ez bada, ez eta boto partikularrik aurkeztu ere, eztabaida bat eginen da irizpenaren osotasunari buruz eta, jarraian, behar den bozketa eginen da.

162. artikulua. Aurrekontuen irizpenari eta gehiengo osoa behar duten irizpenei aurkeztutako in voce zuzenketak onartzea.

Aurreko artikuluan aipaturiko eztabaidan zehar, lehendakariak in voce zuzenketak izapidetzea onartu ahalko du, baldin eta haien xedea errakuntza edo akats teknikoak zein terminologiakoak edo gramatikakoak zuzentzea baldin bada. Gainerakoan, soilik inongo talde parlamentariorik aurka azaltzen ez bada onartu ahalko dira zuzenketak izapidera.

163. artikulua. Zuzenketarik edo boto partikularrik gabeko artikuluak.

Zuzenketarik edo boto partikularrik aurkeztu ez zaien artikuluak eztabaidarik gabe bozkatu ahalko dira.

164. artikulua. Lehendakariaren antolamenduahalmena.

Aurreko artikuluetan ezarritakoa gorabehera, lehendakariak:

a) Eztabaidak eta bozketak artikuluka, gaika edo eta artikulu-multzoka zein zuzenketa-multzoka antolatu ahalko ditu, testuaren zailtasunak edo proposamenen arteko harremanak nahiz homogeneotasunak halakorik eskatzen badute.

b) Legebiltzarreko Mahaiarekin ados jarriz, proiektu baten eztabaidaren gehieneko iraupena finka dezake; hartara, aurreikusitako hizlarien artean banatuko du denbora hori eta, denbora amaituz gero, eginkizun gelditzen diren bozketak eginen dira.

165. artikulua. Onetsitako testuaren harmonizazioa.

Proiektu baten eztabaida bukatu ondoren, boto partikular nahiz zuzenketa bat onetsi izanaren ondorioz edo artikuluen bozketaren ondorioz ateratzen den testua zentzugabea edo ulergaitza baldin bada bere punturen batean, Legebiltzarreko Mahaiak, bere ekimenez edo eta kasuan kasuko batzordearen mahaiak hala eskatuta, berriro igorri ahalko dio batzordeari Osoko Bilkurak onetsi duen testua, batzordeak, hamabost eguneko epean, idazketa harmonikoa egiteko helburu bakarrarekin, Osoko Bilkuraren erabakiak zainduz betiere. Irizpen horri buruzko azken erabakia Osoko Bilkurarena izanen da, zeinak, bozketa bakar batean, oso-osorik onetsi edo bazter utzi beharko baitu.

166. artikulua. Argitaratzea eta Gobernuari igortzea.

Kasuan kasuko foru legearen behin betiko testua onetsi ondoren, lehendakariak Nafarroako Parlamentuko Aldizkari Ofizialean argitara dadila eta Foru Komunitateko Gobernuko lehendakariari bidal dakiola aginduko du, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan aurreikusitako ondorioetarako.

2. ATALA. Foru-lege proposamenak

167. artikulua. Forulege proposamenak aurkeztea.

Foru-lege proposamenak zioen azalpen eta guzti aurkeztuko dira, baita proposamena egin duenak hari buruzko iritzia eman ahal izateko beharrezkotzat jotzen dituen aurrekariekin ere.

168. artikulua. Ekimena. Gobernuaren txostena eta aintzat hartzea.

1. Foru-lege proposamenak ondorengo hauek aurkeztu ahalko dituzte:

a) Foru parlamentari batek edo batzuek.

b) Talde parlamentario batek edo batzuek, eledunaren sinadura soilarekin.

2. Ekimena erabili ondoren, Parlamentuko Mahaiak erabakiko du, Eledunen Batzarrari entzun ondoren, foru-lege proposamena izapidera onartzen duen ala ez, eta argitara dadila eta Foru Diputazioari bidal dakiola aginduko du, horrek iritzia eman dezan, Legebiltzarreko Aldizkari Ofizialean argitara eman ondoko hamabost eguneko epean, proposamena aintzat hartzeari buruz.

3. Foru Diputazioak, aurreko apartatuan aipatzen den epe berean, orobat jakinarazi beharko du, erantzun arrazoituaren bidez jakinarazi ere, izapidetzearekin ados dagoen ala ez, baldin eta proposamenak ekitaldi horretako kredituak gehitzea edo aurrekontu-sarrerak gutxitzea badakar. Epea bukatuta, Foru Diputazioak ezer esaten ez badu, ados dagoela ulertuko da. Ados ez badago, Foru Diputazioaren jakinarazpena Eledunen Batzarrari igorriko zaio, eta hark hartuko du foru-lege proposamenaren izapidetzearekin buruzko erabakia.

4. Epe hori bukatzen bada Foru Diputazioak izapidetzearekin ados dagoela berariaz ukatu gabe, eta Mahaiak izapidetzea erabaki baldin badu, foru-lege proposamena Osoko Bilkuraren gai-zerrendan sartzeko moduan izanen da, hark aintzat har dezan. Eztabaida osoko eztabaidetarako ezarritakoaren arabera eginen da.

5. Jarraian, Legebiltzarrak delako foru-lege proposamena aintzat hartzen ote duen jakiteko bozketa egiteko aginduko du lehendakariak. Aintzat hartzen bada, Legebiltzarreko Mahaiak, Eledunen Batzarrari entzun ondoren, batzorde eskudunari bidaltzea erabakiko du, eta zuzenketak aurkezteko epea irekiko da. Proposamenak foru lege proiektuentzat ezarririko izapideak segituko ditu, baina ez da osoko zuzenketarik onartuko.

169. artikulua. Udalen eta herritarren ekimeneko forulege proposamenak.

1. Legebiltzarreko Mahaiak udalen eta herritarren ekimenez aurkezten diren foru-lege proposamenak aztertuko ditu, Nafarroako Foru Eraentza Berrezarri eta Hobetzeari buruzko Lege Organikoaren 19. artikuluak eta hura garatzeko foru legeek ezarririko baldintzak betetzen ote diren egiaztatzeko.

2. Foru-lege proposamenak legez ezarritako baldintzak betetzen baditu, Mahaiak aurreko artikuluan ezartzen den prozedurari jarraituz izapidetu dadin xedatuko du, Nafarroako Gobernuak proposamena izapidetzeko onartzearekin bat datorren edo ez adierazteko duen hamar eguneko epeari dagokionez izan ezik. Halako ekimenak aintzat hartzea Osoko Bilkuraren gai-zerrendan sartuko da baldintzak betetzen dituela egiaztatu eta bi hilabeteko epean gehienez ere.

3. Udalen eta herritarren ekimeneko foru-lege proposamenen kasuan, legegintza-ekimenaren sustapen batzordeak izendatutako ordezkari kide batek defendatuko du proposamena Nafarroako Parlamentuaren Osoko Bilkurak aintzat hartzeko eztabaidan.

4. Eztabaida osoko eztabaidetarako ezarritakoaren arabera eginen da. Eztabaida foru-lege proposamenaren defentsarekin hasiko da, zeina herritarren legegintzarako ekimena sustatzeko batzordeko kide batek edota udalbatza sustatzaileen ordezkariak -horietako bateko kide izan beharko du- eginen baitu.

3. ATALA. Foru-lege proiektu eta proposamenak erretiratzea

170. artikulua. Proiektuak erretiratzea.

Foru Diputazioak izapidetzearen edozein unetan erretira dezake foru-lege proiektu bat, salbu eta Legebiltzarrak hari buruz behin betiko erabakia eman badu.

171. artikulua. Proposamenak erretiratzea.

Proposatzaileak foru-lege proposamena erretiratzen badu, erretiratzeak besterik gabe sortuko ditu ondorioak, baldin eta erretiratzea aintzat hartzeari buruzko erabakia baino lehen egiten bada. Erabakia hartu ondoren, erretiratzea Osoko Bilkurak onartzen badu soilik izanen da eraginkorra.

III. KAPITULUA. Legegintzako prozeduraren berezitasunak

1. ATALA. Onetsiak izateko gehiengo osoa behar duten foru-lege proiektu eta proposamenak

172. artikulua. Onetsiak izateko gehiengo osoa behar duten gaiak.

1. Onetsiak izateko gehiengo osoa beharko dute, proiektu osoari buruzko azken bozketan, Nafarroako Foru Eraentza Berrezarri eta Hobetzeari buruzko abuztuaren 10eko Lege Organikoaren hurrengo artikuluetan aipatzen diren foru legeek: 9.2, 15.2, 18.bis.2, 18.ter, 19.1.c), 19.2, 25, 28.ter, 30.2, 45.6, 46.2 eta 48.2.

2. Halaber, proiektu osoari buruzko azken bozketa batean, onespenerako gehiengo osoa beharko dute Nafarroako Parlamentuko Mahaiak administrazio- eta lurralde-antolamenduaren alorrean zehazten dituen beste foru legeek, zeinak zehaztuko baititu Eledunen Batzarrak erabaki loteslea hartu eta gero, eta irizpide arrazoitua entzun ondoren Nafarroako Gobernuari, proposatzaileari edo kasuko ponentziari, txosten-izapidean.

3. Foru-lege proiektu edo proposamen batean jasota dauden xedapenetako batzuk gehiengo osoko foru legeei dagozkienean, eta beste batzuek bestelako gaiak arautzen dituztenean, Mahaiak, Eledunen Batzarrari entzun ondoren, erabaki ahalko du proiektu edo proposamen hori bi foru-lege proiektu edo proposamenetan zatitzea, zeinak bereizirik izapidetuko baitira; bata, hurrengo artikuluan ezarritakoari jarraikiz, eta bestea, prozedura arruntari jarraikiz.

Baldin eta aipaturiko erabakia baino lehenago ordenatuta baleude hasierako foru-lege proiektu edo proposamenari aurkezturiko zuzenketak, batzorde eskuduneko Mahaiak berriro ordenatuko ditu, bakoitza dagokion proiektu edo proposamenari lotzeko.

4. Gehiengo osorik behar ez duen foru-lege proiektu bati aurkezturiko zuzenketa batean jasota dauden xedapenetako batzuk gehiengo osoko foru legeei badagozkie, soilik onartuko dira izapidetzeko Mahaiaren erabaki bidez, Eledunen Batzarrari entzun ondoren, eta, kasua bada, aurreko apartatuan ezarritakoari jarraituko zaio.

173. artikulua. Aplikatzekoa den legegintzaprozedura.

1. Gehiengo osoa behar duten foru-lege proiektu eta proposamenak legegintzako prozedura arruntari jarraituz izapidetuko dira, atal honetan ezarritako berezitasunekin. Salbuespen gisa, irakurketa bakarreko prozeduraz izapidetu ahalko dira 179. artikuluan aurreikusitako kasuetan, salbu eta talde parlamentarioren bat aurka badago Mahaiak eta Eledunen Batzarrak onartzeko izapidean.

2. Legebiltzarkideen gehiengo osoaren aldeko botoa beharko da horiek onesteko, proiektu osoari buruzko azken bozketan.

3. Legebiltzarreko lehendakariak aldez aurretik iragarriko du bozketa hasteko ordua.

2. ATALA. Aurrekontuei buruzko foru-lege proiektua

174. artikulua. Aurrekontuei buruzko forulege proiektua izapidetzea.

1. Nafarroako aurrekontu orokorrak aztertu eta onesteko legegintzako prozedura arrunta erabiliko da, atal honetan ezartzen dena salbu.

2. Nafarroako aurrekontu orokorrei buruzko foru-lege proiektuak Legebiltzarraren gainontzeko lanen aldean lehentasuna izanen du izapidetzerakoan.

175. artikulua. Osoko zuzenketak.

1. Osoko zuzenketatzat hartuko dira proiektua Gobernuari itzultzearen alde egiten duten zuzenketak, bai eta departamentu baten edo Programa eta Ekonomia Korrelazioa izenekoan ageri diren entitateetako baten programa-multzo osoa ukitzen dutenak ere.

2. Osoko eztabaidari hasiera emateko, Gobernuko kide batek proiektuaren aurkezpena eginen du, eta lehenik eta behin eztabaidatu dira proiektuaren balorazio orokorra eta Gobernuari itzultzearen alde egiten duten zuzenketak.

3. Ondoren, departamenturen baten aurrekontu-atalei aurkeztutako osoko zuzenketak eztabaidatuko dira. Edonola ere, lehendakariak zilegi izanen du erabakitzea zuzenketak defentsarako eta eztabaidarako txanda bakar batean meta daitezen.

4. Osoko Bilkurak proiektua Gobernuari itzultzea erabakitzen badu, proiektua bazter utzia geldituko da, eta aurkeztutako gainerako zuzenketak bertan behera geratuko dira.

5. Departamentu baten edo Programa eta Ekonomia Korrelazioa izenekoan ageri diren entitateetako baten programa-multzo osoa ukitzen duen zuzenketa bat onesten bada, amaitutzat emanen da proiektuaren izapidetzea, Gobernuari itzultzea erabaki dela ulertuko baita.

176. artikulua. Foru Diputazioa zuzenketekin bat etortzea. Zuzenketa eraikitzaileak.

1. Kontzepturen baten gastuak gehitu edo diru-sarrerak gutxitzea dakarten zuzenketek Foru Diputazioa aldez aurretik ados egotea beharko dute izapidera onartuak izateko.

2. Ados egote hori, hala ere, ez da derrigorrezkoa izanen baldin eta aurkeztu den zuzenketak gastu gehikuntza edo diru-sarreren gutxitzea finantzatzeko baliabideak, proiektuan izendaturik behar dutenak, zehazten baditu.

3. Eledunen Batzarrak ebatziko ditu zuzenketek aurrekontuan duten eraginari buruz batzordeko mahaiaren eta Foru Diputazioaren artean egon litezkeen desadostasunak.

177. artikulua. Arau osagarriak onestea.

Legebiltzarreko Mahaiak, Eledunen Batzarrak aldez aurretik erabakita, beharrezko arau osagarriak eman ahalko ditu antolatzeko proiektuaren azterketa, zuzenketa, eztabaida eta bozketa, bai eta epeak ere, aurrekontuen egiturari ondoen dagokion moduan.

3. ATALA. Kontu orokorrei buruzko foru-lege proiektua

178. artikulua. Forulege proiektua jasotzea.

1. Kontu orokorrei buruzko foru-lege proiektua jaso ondoren, Kontuen Ganberari igorriko dio Mahaiak bere lehendakariaren bitartez, horiek ikertu eta azter ditzan.

2. Kontuen Ganberak irizpena eman ondoren, bere lehendakariaren bitartez irizpen hori Legebiltzarreko Mahaiari helaraziko dio, zeinak Parlamentuko Aldizkari Ofizialean argitara dadin agindu eta Ekonomia eta Ogasun Batzordeari bilera egiteko deialdia eginen baitio Kontuen Ganberako lehendakaria bertara ager dadin, erregelamendu honetako 229. artikuluan ezarritako zertzeladak beterik.

3. Kontuen Ganberaren irizpena Parlamentuko Aldizkari Ofizialean argitaratzen den egunetik hamabost egun igaro ondoren, Mahaiak, Eledunen Batzarrari entzun ondoren, erabaki ahal izanen du Nafarroako kontu orokorrei buruzko foru-lege proiektuaren izapidetzea izan dadila Legebiltzarreko Osoko Bilkuraren aurreko irakurketa bakarraren nahiz legegintza-prozedura arruntaren bitartezkoa.

4. Kontuen Auzitegiak Nafarroako Foru Eraentza Berrezarri eta Hobetzeari buruzko Lege Organikoaren 18.bis artikuluko 3. apartatuak aipatzen duen irizpena Parlamentuari bidaliz gero, Mahaiak, Eledunen Batzarrarekin adostu ondoren, behar diren neurriak hartuko ditu, kasua bada.

4. ATALA. Foru-lege proiektu edo proposamena irakurketa bakarrean izapidetzea

179. artikulua. Irakurketa bakarraren bidez izapidetzea.

1. Foru-lege proiektuaren edo proposamenaren izaerak komenigarri egiten badu edo idazkeraren soilak horretarako bide ematen badu, Legebiltzarreko Mahaiak, Eledunen Batzarrarekin bat, erabaki ahalko du aipatu proiektu edo proposamena Legebiltzarreko Osoko Bilkuran zuzenean eta irakurketa bakarrean izapidetzea.

2. Erabaki hori hartuta, zuzenketak aurkezteko epea irekitzea aginduko du Mahaiak. Zuzenketa horiek ezin izanen dira osotasunari buruzkoak izan. Mahaiari aurkeztuko zaizkio, eta Mahaiak zuzenketa horiek kalifikatuko ditu. Epe hori, Mahaiak bestelakorik ezartzen ez badu, eztabaida eginen den osoko bilkuraren aurreko eguneko hamabietan bukatuko da.

Halaber, gutxienez ere Legebiltzarreko kideen gehiengoa ordezkatzen duten talde parlamentarioek Osoko Bilkurako eztabaida hasi aurretik aurkezten dituzten in voce zuzenketak izapidetzera onartuko dira.

3. Foru-lege proiektua irakurketa bakarrean izapidetzen den ala ez bozkatuz hasiko da osoko bilkura. Irakurketa bakarreko izapidetzea ez onesteak berarekin ekarriko du foru-lege proiektua prozedura arruntari jarraikiz izapidetzea. Osoko Bilkurak halako izapidetzea onartuz gero, foru-lege proiektuaren eztabaidari ekinen zaio, osokoetarako jarritako arauei atxikiz. talde parlamentario bakoitzari txanda bana egokituko zaio bere zuzenketa guztiak defendatzeko. Eztabaidan, ekimena aurkeztu duena izanen da mintzatzen lehena, eta gainerakoen mintzaldien ondoren ihardespen-txanda izanen du, hamar minutukoa gehienez ere.

Eztabaida bukatu ondoren, non eta talde parlamentarioren batek zuzenketaka edo zuzenketa-multzoka bereizitako bozketa eskatzen ez duen, Lehendakaritzak bozketa bakarrera jarriko ditu talde parlamentario bakoitzak artikuluei egindako zuzenketa guztiak, aurkezpen-hurrenkeraren arabera. Azkenik, testu osoa, onartutako zuzenketak gehituz, bozketa bakarrera jarriko da. Bozketaren ondorioa aldekoa bada, onarturik geratuko da testua. Bazter utziko da, bestela.

4. Foru-lege proposamenen kasuan, Osoko Bilkurak haren eztabaidari ekinen dio, osokoetarako jarritako arauei atxikiz. talde parlamentario bakoitzari txanda bana egokituko zaio bere zuzenketa guztiak defendatzeko. Eztabaidan, ekimena aurkeztu duena izanen da mintzatzen lehena, eta gainerakoen mintzaldien ondoren ihardespen-txanda izanen du, hamar minutukoa gehienez ere. Jarraian, proposamena irakurketa bakarrean izapidetu ala ez bozkatuko da. Irakurketa bakarreko izapidetzea ez onesteak berarekin ekarriko du foru-lege proposamena ezestea. Irakurketa bakarreko izapidetzea onesten bada, aurreko apartatuaren bigarren paragrafoan ezarritakoari jarraituko zaio.

5. ATALA. Legegintzarako eskumena batzordeei eskuordetzea

180. artikulua. Legegintzaeskuordetza batzordeei.

1. Mahaiak, gutxienez ere parlamentuko kideen bi heren ordezkatzen dituzten eledunek Eledunen Batzarrean aurretiazko erabakia harturik, batzordeen esku utzi ahal izanen du foru-lege proiektu eta proposamenak onestea, salbu eta aurrekontuei buruzko foru-lege proiektua eta Nafarroako Foru Eraentza Berrezarri eta Hobetzeari buruzko Lege Organikoaren 20.2 artikuluak aipatzen dituen foru-lege proiektu eta proposamenak, zeren eta, kasu horretan, batzordeak legegintzarako eskumen osoz jardunen baitu.

2. Eskuordetzeak ez ditu 151. artikuluak aipatzen dituen osoko eztabaida eta bozketak bere baitan hartuko, ez eta 168. artikuluan aurreikusitako aintzat hartzea ere, Osoko Bilkuran eginen baitira, betiere.

3. Osoko Bilkurak edozein unetan bereganatu ahal izanen du eskuordetutako edozein foru-lege proiektu edo proposamenen eztabaida eta bozketa. Ekimena hartu ahalko dute Legebiltzarreko Mahaiak, bi talde parlamentariok edo Legebiltzarra osatzen duten foru parlamentarien bosten batek.

181. artikulua. Prozedura.

Eskuordetzea erabaki ondoren, foru-lege proiektu eta proposamenok izapidetzeko prozedura arrunta izanen da, Osoko Bilkurako eztabaidaren izapidea kenduta. Beraz, batzordeko eztabaida bukatu ondoren, batzordeko mahaiak onetsitako testua bidaliko dio Legebiltzarreko lehendakariari, erregelamendu honetako 166. artikuluak aurreikusitako ondorioetarako.

IV. KAPITULUA. Foru legearen indarra duten gobernuaren xedapenak

182. artikulua. Foru legedekretuak izapidetzea.

1. Foru lege-dekretu bat baliozkotzeari edo indargabetzeari buruzko eztabaida eta bozketa Legebiltzarreko Osoko Bilkuran eginen dira edo, kasua bada, Batzorde Iraunkorrean, hura aldarrikatu eta 30 eguneko epearen barruan, Nafarroako Foru Eraentza Berrezarri eta Hobetzeari buruzko Lege Organikoko 21.bis artikuluan ezarritakoari jarraituz. Nolanahi ere, foru lege-dekretu bat Nafarroako Aldizkari Ofizialean argitara eman bezain laster sartu ahalko da gai-zerrendan, eztabaidatua eta bozkatua izateko.

2. Gobernuko kide batek Legebiltzarrean azalduko ditu hura aldarrikatzeko izan dituen arrazoiak, eta ondorengo eztabaida osoko eztabaidetarako ezarritakoaren arabera eginen da. Amaitzeko, Gobernuak ihardespen-txanda izanen du, hamar minutuz gehienez ere.

3. Eztabaida amaituta, bozketa eginen da, eta hartan ulertuko da baiezko botoak baliozkotzearen aldekoak direla, eta ezezko botoak, berriz, indargabetzearen aldekoak.

4. Foru lege-dekretu bat baliozkotu ondoren, lehendakariak galdetuko du ea talde parlamentarioren batek nahi ote duen foru-lege proiektu baten gisara izapidetu dadila. Baiezkoan, Legebiltzarrak eskaera horri buruz erabakiko du. Alde bozkatzen baldin badu, foru-lege proiektu baten gisara izapidetuko da presako prozeduraz, eta ez dira onartuko proiektua itzultzea eskatzen duten osoko zuzenketak.

5. Batzorde Iraunkorrak zilegi izanen du, kasua bada, presako prozedura aplikatzen zaien foru-lege proiektuen gisara izapidetzea Gobernuak legegintzaldien arteko denboraldietan ematen dituen foru lege-dekretuak.

6. Foru lege-dekretu bat baliozkotzeko edo indargabetzeko erabakia Nafarroako Aldizkari Ofizialean argitaratuko da.

183. artikulua. Legegintzarako eskuordetza.

1. Nafarroako Foru Eraentza Berrezarri eta Hobetzeari buruzko Lege Organikoaren 21. artikuluak ezarritako moduan eta baldintzetan, Parlamentuak Foru Diputazioari eskuordetu ahalko dio legegintza-ahalaren egikaritzea.

2. Oinarrien foru-lege baten bitartez eman beharko da eskuordetzea, baldin eta helburua testu artikuludunak egitea bada, eta foru lege arruntaren bidez, berriz, helburua testuak bat egitea bada.

3. Legegintzarako eskuordetzea berariaz egin beharko da, gai jakinetarako eta eskuordetzea aurrera eramateko epea jarriz. Nafarroako Gobernuak eskuordetzea erabili ondoren iraungiko da, kasuan kasuko araua argitaratzearekin bat alegia. Ezin izanen da inplizituki edo epe gabe emandakotzat jo. Ezinezkoa izanen da Nafarroako Gobernuaz besteko agintariei berriz ere eskuordetzea.

4. Nafarroako Gobernuak legegintzarako eskuordetzea baliatuz emandako xedapenei legegintzako foru-dekretu deritze.

5. Auzitegiek bere duten eskumena gorabehera, eskuordetzeko foru-legeek kontrol modu osagarriak ezarri ahal izanen dituzte kasuan-kasuan.

6. Foru Diputazioak, aipatu lege organikoaren 21. artikuluan aurreikusitako eskuordetzea baliatu bezain laster, bidali beharreko komunikazioa bidaliko dio Parlamentuari. Komunikazio horretan eskuordetzearen gai den testu artikuluduna edo bategina sartuko da eta Legebiltzarreko Aldizkari Ofizialean argitaratuko da.

7. Eskuordetzeko foru-legeek Parlamentuak eskuordetutako legegintzaren kontrola egiteko modu osagarririk ezartzekotan, Mahaiak, Eledunen Batzarrari entzun ondoren, hori burutzeko arauak eman ahal izanen ditu.

VII. TITULUA. NAFARROAKO FORU ERAENTZA BERREZARRI ETA HOBETZEARI BURUZKO LEGE ORGANIKOA ALDATZEA

184. artikulua. Prozedura.

1. Foru Diputazioaren edo nazioko Gobernuaren ekimenez aldatu ahalko da Nafarroako Foru Eraentza Berrezarri eta Hobetzeari buruzko Lege Organikoa.

2. Kasuan kasuko negoziazioak izan ondoren, Nafarroako Gobernuak eta nazioko Gobernuak, bat etorrita, aldaketa proposamena eginen dute, Nafarroako Kontseiluaren derrigorrezko irizpenarekin batera, Nafarroako Parlamentuak onetsi beharko baitu. Osoko eztabaida eginen da horretarako Legebiltzarreko Osoko Bilkuran eta, ondoren, bozkatu eginen da aldaketa proposamena, bere osotasunean, bozketa bakarrean.

3. Aldaketa proposamena onetsiz gero, Legebiltzarreko lehendakariak horren berri emanen dio Diputazioko lehendakariari, ondorengo izapidetzearen ondorioetarako. Aldaketa proposamena bazter utziz gero, Legebiltzarreko lehendakariak horren berri emanen dio Foru Diputazioko lehendakariari, aipatu lege organikoaren 71.3 artikuluan aurreikusitako ondorioetarako.

VIII. TITULUA. FORU DIPUTAZIOARI BAIMENAK EMATEA

I. KAPITULUA. Foru Diputazioari zor publikoa jaulki, abalak eta bermeak eratu eta maileguak hartzeko baimena ematea

185. artikulua. Prozedura.

1. Parlamentuak aurretiaz emandako baimena beharko du Foru Diputazioak zor publikoa jaulki, abalak eratu eta maileguak hartzeko, foru-legeek ezarritakoarekin bat.

2. Foru-lege proiektu baten bidez eskatu beharko du Nafarroako Gobernuak aurreko apartatuan aipatzen den baimena. Foru-lege proiektu horretan baimenaren nondik norakoak jasoko dira, foru-lege proiektuaren xede bakarra baimena lortzea ez den kasuetan ere.

II. KAPITULUA. Nafarroako Gobernuari Estatuarekin eta autonomia erkidegoekin hitzarmenak eta itunak egiteko baimena ematea

1. ATALA. Foru Diputazioari Estatuarekin hitzarmenak egiteko baimena ematea

186. artikulua. Estatuarekin hitzarmenak egiteko baimena eskatzea.

1. Foru Diputazioak, foru-lege bat aldatzea edo indargabetzea ekartzen duten edo betearazpenerako legegintzako neurriak eskatzen dituzten hitzarmenak Estatuarekin formalizatzeko, aurretik Parlamentuaren baimena lortu beharko du.

2. Baimena eskatzeko, hitzarmenaren testuarekin batera Foru Gobernuaren erabakia bidali beharko dio Foru Diputazioak Parlamentuari, baimena justifikatzeko oroitidazkiarekin batera.

187. artikulua. Prozedura.

1. Mahaiak, Eledunen Batzarrari entzun ondoren, hitzarmena Legebiltzarreko Aldizkari Ofizialean argitara dadin aginduko du eta Osoko Bilkuran edo batzordean izapidetzea erabakiko, salbu eta Gobernuak Osoko Bilkuran eztabaidatzea proposatzen badu.

2. Baimena emateari buruzko eztabaida Erregelamenduak osoko eztabaidetarako ezarritakoari jarraituz eginen da.

3. Eztabaida bukatu ondoren, bozketa eginen da, eskatu den baimena eman ala ez erabakitzeko.

4. Eskatutako baimena emateari buruz hartu den erabakiaren berri emanen dio Parlamentuko lehendakariak Nafarroako Gobernuko lehendakariari.

2. ATALA. Foru Diputazioari autonomia erkidegoekin lankidetza hitzarmenak eta itunak egiteko baimena ematea

188. artikulua. Autonomiaerkidegoekin hitzarmenak egiteko baimena eskatzea.

1. Foru Diputazioak baimena eskatu beharko dio Parlamentuari, autonomia-erkidegoekin bere eskumeneko gaien gaineko zerbitzuak kudeatu eta emateari buruzko hitzarmenetan onespena eman ahal izateko, baldin eta horrek foru-legeren bat aldatu edo indargabetzea edota betearazpenerako legegintzako neurriak hartu behar izatea badakar.

2. Hitzarmena prest dagoenean aurkeztu beharko da baimen eskaria eta, betiere, Konstituzioaren 145.2 artikuluak eta Nafarroako Foru Eraentza Berrezarri eta Hobetzeari buruzko Lege Organikoaren 70. artikuluak ezarritakoari jarraituz Gorteei jakinarazi aurretik.

3. Foru Gobernuaren erabakia, hitzarmenaren testua eta eskaria azaltzeko eta justifikatzeko oroitidazkia erantsi beharko dizkio Foru Diputazioak baimen eskariari.

189. artikulua. Prozedura.

Estatuarekiko hitzarmenei buruz 1. atalean ezarritakoari jarraituz izapidetuko da Parlamentuan autonomia-erkidegoekin hitzarmenak egiteko baimena.

190. artikulua. Lankidetzaakordioak.

Foru Diputazioak lankidetza-akordioak egiteko eskatzen dituen baimenen erregimena aurreko artikuluetan hitzarmenetarako ezarri dena izango da. Edonola ere, talde parlamentarioek zazpi eguneko epea izanen dute Mahaiak idazkiak aurkezteko, beren ustez akordioa ez berresteko dauden arrazoiak azalduz.

3. ATALA. Arau amankomunak

191. artikulua. Formalizazioa.

1. Nafarroako Parlamentuaren baimena jaso ondoren, hitzarmena egin ahalko du Foru Komunitateko Gobernuak, Nafarroako Foru Eraentza Berrezarri eta Hobetzeari buruzko Lege Organikoaren 70. artikuluaren 1. eta 2. apartatuetan ezarritakoa gorabehera.

2. Autonomia-erkidegoekin lankidetza itunak egin ahal izateko, Gorte Nagusien baimena eskuratu beharko du Nafarroako Gobernuak, kapitulu honetan aipatzen denaz gain.

III. KAPITULUA. Nafarroako Foru Eraentza Berrezarri eta Hobetzeari buruzko Lege Organikoaren 39.2 artikuluak aipatzen duen ekimena erabili ahal izateko Foru Diputazioak behar duen baimena

192. artikulua. Baimeneskaera.

1. Foru Diputazioak Legebiltzarraren baimena beharko du Nafarroako Foru Eraentza Berrezarri eta Hobetzeari buruzko Lege Organikoaren 39.2 artikuluak aipatzen duen ekimena erabili ahal izateko.

2. Legebiltzarraren baimenak esku emanen dio Foru Diputazioari, nazioko Gobernuaren aurrean, Konstituzioaren 150. artikuluaren 1. eta 2. apartatuetan ezarritakoarekin bat, ekimena erabili ahal izateko, Estatuak edo, hala egokituz gero, Gorte Nagusiek, Nafarroari transferitu, eskuordetu edo esleitu diezazkioten aipatu lege organikoaren 39.2 artikuluak dakartzan ahalmen eta eskumenak.

3. Foru Gobernuaren erabakia, proposamenaren testua, azalpenezko oroitidazkia eta aurreko apartatuak aipatzen duen ekimena arrazoitzeko Foru Diputazioaren iritziz baliagarri izan daitekeen beste edozein dokumentu erantsi beharko dizkio Foru Diputazioak baimen eskariari.

4. Legebiltzarreko Osoko Bilkuran izapidetuko da baimen eskaera, osoko eztabaidetarako ezarritakoari jarraituz, Legebiltzarreko Mahaiak hala erabakitzen duenean, Eledunen Batzarrari entzun ondoren eta aurreko apartatuak aipatzen dituen betebeharrak betetzen direla egiaztatu ondoren.

IX. TITULUA. NAFARROAREN ETA ESTATUAREN ARTEKO HITZARMEN EKONOMIKOEN IZAPIDEAK

193. artikulua. Hitzarmen ekonomikoen izaera itundua.

1. Hitzarmen ekonomikoen izaera hitzartua edo itundua dela-eta, Nafarroako Gobernuak eta nazioko Gobernuak izenpetu ondoren, Nafarroako Parlamentuak eta Gorte Nagusiek onetsi beharko dituzte hitzarmen ekonomikoak.

2. Hitzarmen ekonomikoaren izapidetzean ondoko arauak beteko dira:

Lehenengoa.-Foru Diputazioak nazioko Gobernuarekiko akordioaren testua hitzarmenaren testuarekin batera bidali ondoren, Mahaiak, Eledunen Batzarrari entzun ondoren, bilkura informatiboa egitea erabaki dezake, Foru Diputazioak horren edukiari buruzko informazioa eman dezan.

Bilkura hori egiten baldin bada, Erregelamendu honen 228. artikuluak ezarritakoaren arabera eginen da.

Bigarrena.-Nafarroako Parlamentuko Osoko Bilkuran eginen da hitzarmen ekonomikoari buruzko osoko eztabaida eta, osoko bozketa egin ondoren, aldeko botoen gehiengo osoa beharko da onesteko.

Hirugarrena.-Hitzarmen ekonomikoa onetsiz gero, Legebiltzarreko lehendakariak horren berri emanen dio Diputazioko lehendakariari, ondorengo izapidetzearen ondorioetarako, Nafarroako Foru Eraentza Berrezarri eta Hobetzeari buruzko Lege Organikoaren 45.4 artikuluan ezarritakoarekin bat.

X. TITULUA. KONFIANTZA EMATEA ETA KENTZEA

I. KAPITULUA. Inbestidura

194. artikulua. Nafarroako Foru Komunitateko lehendakaria hautatzea.

Nafarroako Foru Komunitateko lehendakaria, Nafarroako Foru Eraentza Berrezarri eta Hobetzeari buruzko Lege Organikoaren 29. artikuluan ezarritakoarekin bat, Parlamentuak hautatu eta Erregeak izendatzen du.

195. artikulua. Hautagaia proposatzea.

Parlamentua eratu eta hamar eguneko epean, Parlamentuko lehendakariak, Parlamentuan ordezkaturik dauden alderdi edo talde politikoek hautatutako eledunei kontsulta egin ondoren, Nafarroako Foru Komunitateko lehendakaritzarako hautagai bat proposatuko du.

196. artikulua. Inbestidurabilkura. Prozedura.

Proposatutako hautagaiaren inbestidura-bilkurarako deia hiru egun lehenagotik egin beharko da, gutxienez; bilkura hurrengo arauen arabera eginen da:

Lehenengoa.-Parlamentuko lehendakariak Legebiltzarrari jakinaraziko dio Gobernuko lehendakaritzarako hautagai-proposamena. Horrela hasiko da bilkura.

Bigarrena.-Ondoren, proposatuko hautagaiak osatu nahi duen gobernuaren programa politikoa azalduko du, denbora mugarik gabe, eta Legebiltzarraren konfiantza eskatuko du.

Hirugarrena.-Lehendakariak erabakitako etenaldiaren ondoren, hala eskatzen duen talde parlamentario bakoitzaren ordezkari bat mintzatuko da hogeita hamar minutuz. Talde parlamentario mistoa osatzen duten kideei dagokien hitz egiteko denbora berdintasunez banatuko da haien artean, eta zilegi izanen dute elkarri lagatzea hitz egiteko denbora. Talde parlamentarioek mintzatzeko izanen duten hurrenkera izanen da haietako bakoitzaren taldekide kopuruaren araberakoa, handienetik hasi eta txikieneraino, eta talde mistoarekin bukatuz.

Inbestidura-eztabaidan, foru parlamentarien elkarteek talde parlamentarioek adina denbora izanen dute.

Laugarrena.-Eskatzen duen guztietan erabili ahalko du hitza proposatutako hautagaiak. Mintzatu den bati bakarka erantzuten badio, ihardesteko eskubidea izanen du horrek. Halaber, hautagaiak batera erantzuten badie talde parlamentarioen ordezkariei eta talde parlamentario mistoa osatzen duten kideei, horiek eskubidea izanen dute ihardesteko. Lehendakariak erabakiko du ihardespen-txanden iraupena, eta gutxienez hamar minutukoak izanen dira.

Bosgarrena.-Lehendakariak erabakitako orduan eginen da bozketa. Bozketa sekretua izanen da eta boto-paperen bidez eginen da, Legebiltzarreko Erregelamenduaren 113. artikuluan ezarritakoaren arabera. Proposatutako hautagaiak Parlamentuko kideen gehiengo osoaren botoa bereganatzen badu bozketan, konfiantza eman zaiola ulertuko da. Halako gehiengorik lortzen ez badu, hogeita lau orduren buruan beste bozketa bat eginen da, eta hautagaiari konfiantza eman zaiola ulertuko da bigarren bozketa horretan gehiengo soila lortzen badu.

Seigarrena.-Gehiengo soila lortua dela ulertuko da aldeko botoen kopurua aurkakoena baino handiagoa denean; abstentzioak, boto zuriak edo baliogabeak ez dira zenbatuko ondorio horretarako. Gehiengo hori ere lortzen ez bada, hautagaia arbuiatutzat hartu eta hurrenez hurreneko proposamenak izapidetuko dira arestian aurreikusitako era berean.

Zazpigarrena.-Nafarroako Parlamenturako hauteskundeak egin eta gero hiru hilabete iragan eta hautagairik aurkezten ez bada edo aurkeztu direnetarik inor hautatu ez bada, Parlamentua deseginen da eta beste hauteskunde batzuk deituko dira. Hauteskunde dei horretatik sortzen den Parlamentu berriak lau urteko legealdi osoa iraunen du.

Zortzigarrena.-Aurreko apartatuetan ezarritakoaren arabera, hautagaiari konfiantza ematen bazaio, Parlamentuko lehendakariak erregeari jakinaraziko dio hori, hautagaia Nafarroako Foru Komunitateko lehendakari izendatua izan dadin.

II. KAPITULUA. Erantzukizun politikoa

197. artikulua. Erantzukizun politikoak eskatzea.

Parlamentuak Nafarroako Gobernuaren eta Nafarroako Gobernuaren lehendakariaren erantzukizun politikoa exijitu ahal du konfiantza-arazoa eta zentsura-mozioaren bitartez.

III. KAPITULUA. Konfiantza-arazoa

198. artikulua. Konfiantzaarazoa aurkeztea.

Foru Diputazioko lehendakariak, Gobernuan eztabaidatu ondoren, Parlamentuaren aurrean aurkeztu ahalko du bere jarduketa-programari buruzko konfiantza-arazoa.

199. artikulua. Aurkeztea eta izapidetzea.

1. Idazki arrazoituan aurkeztuko zaio konfiantza-arazoa Parlamentuko Mahaiari, Foru Diputazioaren dagokion ziurtagiriarekin batera.

2. Legebiltzarreko Mahaiak, konfiantza-arazoak aurreko apartatuan jasotako betebeharrak betetzen dituela egiaztatu ondoren, izapidera onartuko du eta Eledunen Batzarrari haren berri emanen dio, Parlamentuko Aldizkari Ofizialean argitara dadin agindu eta Osoko Bilkuraren batzarrerako deia eginen du.

3. Inbestidura eztabaidarako ezarri diren arau berei jarraituko zaie eztabaida honetan, eta Foru Diputazioko lehendakariari eta, hala bada, Gobernuko kideei egokituko zaizkie Erregelamendu honetako 196. artikuluak hautagaiarentzako aurreikusitako mintzaldiak.

4. Eztabaida bukatu ondoren, konfiantza-arazoari buruzko bozketa eginen da, lehendakariak aurrez iragarritako orduan. Ezin izanen da konfiantza-arazoari buruzko bozketarik egin eztabaida bukatu eta, gutxienez, hogeita lau ordu iragan arte. Erregelamendu honetako 111.2 artikuluaren arabera eginen da bozketa.

5. Foru parlamentarien gehiengo soilak horren aldeko botoa ematen duenean ulertuko da konfiantza eman dela.

6. Parlamentuak Diputazioko lehendakariari konfiantza ukatuz gero, Nafarroako Foru Eraentza Berrezarri eta Hobetzeari buruzko Lege Organikoaren 34.2 artikuluan ezarritakoari jarraituko zaio.

7. Bozketaren emaitza edozein dela ere, Legebiltzarreko lehendakariak Gobernuko lehendakariari jakinaraziko dio.

IV. KAPITULUA. Zentsura-mozioa

200. artikulua. Zentsuramozioa aurkeztea.

Nafarroako Foru Eraentza Berrezarri eta Hobetzeari buruzko Lege Organikoaren 35. artikuluan ezarritako moduan, Parlamentuak erantzukizun politikoa eskatu ahalko dio Diputazioari, horretarako zentsura-mozioa gehiengo osoz onetsiz.

201. artikulua. Aurkeztea eta izapidetzea.

Zentsura-mozioek nahitaez Diputazioko lehendakaria izateko hautagai bat proposatu beharko dute. Honela aurkeztu eta izapidetuko dira:

1. Parlamentuko kideen bostenak, gutxienez, proposatu beharko du mozioa, Parlamentuko Mahaiari igorritako idazki arrazoituan, eta hautagai izatea onartu duen Foru Diputazioko lehendakaria izateko hautagai bat aurkeztu beharko du nahitaez.

2. Legebiltzarreko Mahaiak, zentsura-mozioak aurreko apartatuan aipatutako baldintzak betetzen dituela egiaztatu ondoren, izapidera onartuko du eta Diputazioko lehendakariari eta Eledunen Batzarrari jakinaraziko dio hori; halaber, Parlamentuko Aldizkari Ofizialean argitara dadin agindu eta mozioa aurkeztu eta hurrengo hamar eguneko epean eginen den Osoko Bilkuraren batzarrerako deia eginen du.

202. artikulua. Eztabaida eta bozketa.

1. Zentsura-mozioaren eztabaida, mozioa izenpetu duten foru parlamentarietako batek haren defentsa eginez hasiko da, denbora mugarik gabe. Ondoren, eta denbora mugarik gabe ere, mozioan Foru Diputazioaren lehendakari izateko hautagai gisa aurkeztutakoa mintzatu ahalko da, osatu nahi duen gobernuaren programa politikoa agertzeko.

2. Lehendakariak erabakitako etenaldiaren ondoren, berriz hasiko da eztabaida, 196. artikuluaren 3. eta 4. apartatuetan ezarritakoaren arabera.

3. Lehendakariak aurretik iragarritako orduan bozkatuko da zentsura-mozioa. Ezin izanen da, inolaz ere, mozioa bozkatu Legebiltzarreko Erregistro Orokorrean aurkeztu eta bost egun igaro baino lehenago.

4. Zentsura-mozio bat onesteko, nolanahi ere, Parlamentuko kideen gehiengo osoaren aldeko botoa behar da.

203. artikulua. Zentsuramozioa onestea.

Nafarroako Parlamentuak zentsura-mozioa onesten badu, Nafarroako Gobernuko lehendakariari eta Erregeari jakinaraziko die Parlamentuko lehendakariak, Nafarroako Foru Eraentza Berrezarri eta Hobetzeari buruzko Lege Organikoaren 35.3 artikuluan aurreikusitako ondorioetarako.

204. artikulua. Zentsuramozioa ezestea.

Zentsura-mozioa onesten ez bada, hura izenpetu dutenek ezin izanen dute bilkuraldi berean besterik aurkeztu. Ondorio horietarako, bilkuraldi arruntetik kanpo aurkeztutakoa hurrengo bilkuraldiari eratxikiko zaio.

XI. TITULUA. INTERPELAZIOAK ETA GALDERAK

I. KAPITULUA. Interpelazioak

205. artikulua. Interpelazioak egitea.

1. Foru parlamentariek eta talde parlamentarioek interpelazioak aurkeztu ahalko dizkiete Nafarroako Gobernu edo Foru Diputazioari eta haren kideetako bakoitzari.

2. Interpelazioak Parlamentuko Osoko Bilkuran izapidetuko dira.

206. artikulua. Aurkezpena eta kalifikazioa.

1. Interpelazioak Parlamentuko Mahaiari igorritako idazki baten bidez aurkeztu beharko dira, eta haien gaiak izan beharko dira politika orokorreko aferetan Gobernuak edo Gobernuko departamenturen batek daukan jarrera, asmoa edo eginiko urrats edo proiektuak. Idazkian interpelazioaren xedea eta irismen materiala zehaztu beharko dira. Interpelazioak zioen azalpen labur bat eta guzti aurkeztuko dira, ekimenaren xedea zehazteko balioko duena.

2. Mahaiak idazkia kalifikatu eta, aurreko apartatuan xedatutakoaren arabera haren edukia interpelazio batenari ez badagokio, egileari jakinaraziko dio hori, hark ahozko edo idatzizko erantzunerako galdera bihur dezan.

3. Interpelazioak Nafarroako Parlamentuko Aldizkari Ofizialean argitaratuko dira.

207. artikulua. Aurkezpena eta gaizerrendan sartzea.

1. Interpelazioak aurkeztu beharko dira haiek eztabaidatu nahi direneko osoko bilkuraren gai-zerrenda onesten duen Mahaiaren bilkuraren aurreko osteguneko Parlamentuko Erregistro Orokorra ixteko ordu ofiziala baino lehenago.

2. Talde parlamentario bakoitzak bere ordezkagarritasunaren arabera sartu ahalko ditu interpelazioak Osoko Bilkuraren gai-zerrendan. Legegintzaldi bakoitzaren hasieran, Mahaiak, Eledunen Batzarrarekin bat, zehaztuko du zenbat interpelazio dagozkion talde parlamentario bakoitzari, bai eta horiek izapidetzeko egutegia ere. Talde mistoari dagokionez, interpelazio kopurua aipatu taldeari esleituko zaio eta taldeak kideen artean banatuko ditu, barne-funtzionamenduko arauetan xedatutakoari jarraikiz. Desadostasunik balego, Mahaiak, Eledunen Batzarrarekin bat, ezarriko du kopurua, talde mistoko alderdi edo elkarte bakoitzaren ordezkagarritasunaren arabera.

3. Gai-zerrendan eduki bereko interpelazio bat baino gehiago sartzea egokitzen bada, aurkezpenaren lehentasunari buruzko irizpidea aplikatuko da eztabaidaren ordenari begira, eta lehendakariak mintzaldiak metatzea erabaki ahalko du.

4. Bigarren bilkuraldia bukatzen denean erabakitzeke dauden interpelazioak idatziz erantzuteko galdera gisa izapidetuko dira, eta haiei hurrengo bilkuraldia hasi baino lehenago erantzun beharko zaie, non eta interpelazioa aurkeztu duen foru parlamentariak edo talde parlamentarioak ez duen adierazten interpelazioari hurrengo bilkuraldi horretarako eutsi nahi diola, amaitu den bilkuraldiaren amaieraren ondoko bost egunetan.

208. artikulua. Izapidetzea.

1. Interpelazioak Osoko Bilkuran aztertuko dira. Interpelazioaren egileari azalpena emateko txanda bat, Nafarroako Gobernu edo Foru Diputazioari erantzuteko beste bat, eta biei ihardespen-txanda bana emanen zaie. Lehenengo mintzaldiak ezin izanen dira hamar minututik gorakoak izan, ez eta ihardespen-txandak bost minutu baino luzeagoak ere.

2. Interpelaziogilea eta Gobernua mintzatu ondoren, talde parlamentario edo foru parlamentarien elkarte bakoitzaren ordezkariak eserlekutik hitza hartu ahalko du hiru minutuz bere jarrera finkatzeko, interpelaziogilearen taldekoak izan ezik. Gobernuak baterako erantzuna eman ahalko die aurreko mintzaldiei, bost minutuz.

3. Foru Diputazioak arrazoiturik eskatu ahalko du, edozein unetan eta behin bakarrik interpelazio bakoitzeko, interpelazioa hurrengo osoko bilkuraren gai-zerrendarako atzeratzeko. Eskaria bidali ondoren, Mahaiak, Eledunen Batzarrak erabakia hartu ondoren, horri buruzko erabakia hartuko du.

II. KAPITULUA. Galderak

1. ATALA. Foru parlamentarien galderak

209. artikulua. Galderak egitea.

Foru parlamentariek galderak egin ahalko dizkiete Foru Diputazioari eta Diputazioko kideei.

210. artikulua. Galderak egiteko baldintzak.

1. Parlamentuko Mahaiari igorritako idazki baten bidez eginen dira galderak.

2. Honako galdera hauek ez dira izapidera onartuko: galdegilearen edo beste edozein pertsona edo erakunde jakin baten interes pertsonal hutsagatik egindakoak, izaera hertsiki juridikoko kontsulta besterik ez direnak edo bilkuraldi berean izapidetu diren beste galdera batzuk errepikatzen dituztenak. Pertsona fisiko edo juridiko bati buruzko galdera soilik onartuko dira izapidetzeko pertsona horren jarduerak oihartzun publikoa baldin badu Nafarroako Gobernuaren esparruan. Ezin dira izapidetzeko onartu pertsonen duintasunerako iraingarriak diren edo haien eskubideak gutxiesten dituzten adierazpenak jasotzen dituzten galderak.

3. Mahaiak idazkia kalifikatu eta galdera izapidera onartuko du baldin eta kapitulu honetan ezarritakoarekin bat badator.

4. Onetsitako galderak Legebiltzarreko Aldizkari Ofizialean argitara daitezen aginduko du lehendakariak eta Foru Diputazioari igorriko dizkio.

211. artikulua. Zein motatakoak diren zehazten ez duten galderen kalifikazioa.

Berariaz adierazi ezean, galdegileak galdera idatziz erantzun diezaiotela eskatu duela ulertuko da; eta ahozko erantzuna eskatzen badu, Osoko Bilkuraren aurrean erantzun diezaioten nahi duela adierazi ezean, erantzuna kasuan kasuko batzordearen aurrean eman behar dela ulertuko da.

212. artikulua. Osoko Bilkuran ahoz erantzun beharreko galderak.

Ahozko erantzuna Osoko Bilkuraren aurrean izatea nahi denean, galdera egiteko idazkiak zehatz eta labur adierazitako itaun bakarra baino ez du jasoko, hurrengoez galdeginez: gertaera, egoera edo informazio batez, Gobernuak gai baten inguruan eginbiderik hartu duen edo hartuko duen jakiteko, edo Gobernuak Parlamentuari dokumenturen bat bidaliko dion edo gairen bati buruzko informazioa emanen dion.

213. artikulua. Aurkezteko epea. Gaurkotasun handiko galderak.

1. Osoko Bilkuraren aurrean erantzuteko ahozko galderak aurkeztu beharko dira haiek eztabaidatu nahi direneko osoko bilkuraren gai-zerrenda onesten duen Mahaiaren bilkuraren aurreko osteguneko Parlamentuko Erregistro Orokorra ixteko ordu ofiziala baino lehenago.

Halaber, talde parlamentarioek gaurkotasun handiko galdera bana aurkeztu ahalko dute hura egin nahi duteneko Osoko Bilkura egitekoa den asteko asteleheneko bederatzi eta erdiak baino lehenago.

2. Erregelamendu honetako 51.1 artikuluari jarraikiz, talde parlamentario bakoitzak batzordean zenbat kide dituen esleiturik, hainbeste galdera arrunt aurkeztu ahalko ditu osoko bilkura bakoitzerako.

Halaber, zenbat talde parlamentario, gaurkotasun handiko hainbeste galdera aurkeztu ahalko dira, talde parlamentario bakoitzeko kide batek eginak.

Talde mistoan, galderen banaketa taldearen barne-funtzionamenduko arauetan xedatutakoari jarraikiz eginen da. Desadostasunik balego, Mahaiak, Eledunen Batzarraren erabakiaren ondoren, ebatziko du alderdi edo elkarte bakoitzak talde mistoaren barruan duen zenbakizko garrantziaren arabera.

3. Osoko bilkura baterako gai-zerrendan sartzeke dauden talde parlamentario baten galdera arruntak 2. apartatuaren arabera dagozkionak baino gehiago badira, haien lehentasuna erabakiko da haien aurkezpenaren hurrenkeraren arabera.

4. Eztabaidan, foru parlamentariak galdera laburki egin eta gero, kasuan kasuko gobernukideak emanen du erantzuna. Parlamentaria berriz mintzatu ahalko da ihardetsi edo berriz galdetzeko eta, Gobernua bigarrenez mintzatu ondoren, eztabaida bukatuko da. Galdera bakoitza izapidetzeko denbora ezin izanen da hamar minutu baino gehiagokoa izan, berdinki banatua galdera egiten duen foru parlamentariaren eta erantzuna ematen duen gobernukidearen artean.

Galdera erretiratzea mugatuko da horretarako arrazoiak azaltzera. Hala ez bada, galdera egintzat hartuko da eta Gobernuak mintzatzeko txanda izanen du.

5. Nafarroako Gobernuak edozein unetan eskatu ahalko du, arrazoiak adieraziz eta galdera bakoitzarekin behin baino ez, hurrengo osoko bilkurarako atzera dadila; hori horrela, osoko bilkura horretako gai-zerrendan sartuko da, 2. apartatuan aurreikusitako galdera-kopurua murriztu gabe.

6. Bigarren bilkuraldiaren amaieran erantzuteke dauden galderak idatziz erantzunen dira hurrengo bilkuraldia hasi baino lehenago, non eta galdera aurkeztu duen foru parlamentariak ez duen adierazten galderari hurrengo bilkuraldi horretarako eutsi nahi diola, amaitu den bilkuraldiaren amaieraren ondoko bost egunetan.

214. artikulua. Batzordean ahoz erantzun beharreko galderak.

1. Batzordean ahoz erantzutea nahi diren galderak, gai-zerrendan sartzeko moduan izanen dira haiek argitaratu eta bost egun igarotakoan. Aurrekoa gorabehera, ordea, ondokoa eskatu ahalko da presa dela-eta, hots, aipatu epea gorde gabe galderak sartu ahal izatea, baina betiere aurkeztu zirenetik gutxienez hiru egun igaro ondoren.

2. Aurreko artikuluko 4. apartatuan ezarritakoaren arabera izapidetuko dira.

3. Foru Diputazioak zio eta guztiko eskaria egin ahalko du, edozein unetan eta behin bakarrik galdera bakoitzeko, galdera hurrengo bilkuraren gai-zerrendarako atzeratzeko. Eskaria bidali ondoren, Legebiltzarreko Mahaiak, Eledunen Batzarrari entzun ondoren, horri buruzko erabakia hartuko du.

4. Bigarren bilkuraldiaren amaieran erantzuteke dauden galderak idatziz erantzunen dira hurrengo bilkuraldia hasi baino lehenago, non eta galdera aurkeztu duen foru parlamentariak ez duen adierazten galderari hurrengo bilkuraldi horretarako eutsi nahi diola, amaitu den bilkuraldiaren amaieraren ondoko bost egunetan.

215. artikulua. Idatziz erantzun beharreko galderak.

1. Idatzizko erantzuna galdera Gobernuari igorri eta hurrengo hamabost egunen barruan eman beharko da. Epe hori ezin izanen da eten ezta hura igaro bitartean bilkuraldia amaitzen denean ere.

2. Aipatu epean Gobernuak erantzunik bidali ez badu, Legebiltzarreko lehendakariak, galdegilearen eskariz, epe berri bat finka dezake galderari idatziz erantzuteko, edo agindu dezake gai horretan eskudun den batzordearen hurrengo bilkuraren gai-zerrendan sartzea, eta erabaki horren berri emanen dio Gobernuari. Kasuko batzordeak bilkura egin beharko du lehendakariak jakinarazpena egin eta hilabeteko epean gehienez ere, eta bertan ahoz erantzuteko galderen tratamendua emanen zaio galderari.

3. Gobernuaren erantzunak argia eta zehatza izan beharko du, galderaren xedeari loturikoa. Argitaratutako informazioetara bidaltzea, bidezkoa bada, erantzunaren osagarri izanen da beti, eta ez ordezko.

4. Erantzunak banakakoak izanen dira, erantzun multzokatua ematea justifikatzen duen arrazoi objektiborik izan ezean. Halakorik balego, hori justifikatzen duten arrazoiak azaldu beharko dira.

5. Foru parlamentari batek uste badu Gobernuak ez diola galdera bati modu egokian erantzun, idazki bat aurkeztu ahalko dio Mahaiari, honek erabaki dezan erantzuna eginiko galderarekiko koherentea ote den, eta, kasua bada, erantzun multzokatua bidezkoa ote den. Idazkia Gobernuaren erantzuna foru parlamentariari jakinarazi eta hurrengo hiru egunetan aurkeztu beharko du, eta Mahaiak zazpi eguneko epean eman beharko du ebazpena. Mahaiak erreklamazioa onartzen badu, Gobernuari jakinaraziko dio zazpi eguneko epean beste erantzun bat igor dezan.

2. ATALA. Herri-ekimeneko galderak

216. artikulua. Herriekimeneko galderak.

1. Nafarroan bizilekua duten herritarrek edo Foru Komunitatean egoitza duen pertsona juridikoa ordezkatzen duen pertsonak galderak aurkeztu ahalko dituzte Nafarroako Gobernuak edo haren kideek ahoz erantzuteko.

2. Galderak idatziz aurkeztuko dira Parlamentuko Erregistro Orokorrean, eta Administrazio Prozedura Erkideari buruzko Legean ezarritako baldintzak bete beharko dituzte.

3. Galderak aztertu ondoren, erregelamendu honetan mota bereko ekimenetarako xedaturiko onargarritasun-baldintzak betetzen badituzte, Parlamentuko Mahaiak aginduko du talde parlamentarioei helarazteko.

4. Galdera horiek Osoko Bilkuran nahiz batzordean izapidetu ahal izateko, legebiltzarkideren batek bere gain hartu beharko ditu. Horretarako, Legebiltzarreko Mahaiari jakinaraziko dio eta deitzen den hurrengo bilkuraren gai-zerrendan sartuko dira. Foru parlamentari bat baino gehiago badira galdera bera egin nahi dutenak, horretarako asmoa agertzen duen lehenengo foru parlamentariari esleituko zaio.

5. Galdera esleitzen zaion foru parlamentariari dagokio hura Osoko Bilkuran edo batzordean egiteko erabakia. Edonola ere, bere mintzaldiaren hasieran adieraziko du nor den ekimenaren egilea, eta galdera egiterakoan ezin izanen du testuaren jatorrizko edukia aldatu.

6. Osoko bilkura bakoitzean gehienez ere halako lau galdera egin ahalko dira, eta horiek kasuko gai-zerrendan sartzeak agortu eginen du talde parlamentario bakoitzak 213.2. artikuluan xedatutakoari jarraikiz daukan kupoa.

7. Herri-ekimeneko galderaren egileari helaraziko zaio galdera sartu den deialdia.

8. Bilkuraldia bukatzen denean, foru parlamentariren batek bere gain hartu gabe dauden herri-ekimeneko galderak bertan behera geldituko dira.

III. KAPITULUA. Arau komunak

217. artikulua. Interpelazioen eta galderen arau komunak.

1. Legebiltzarreko lehendakariak bere esku du eztabaidarako metatzea eta antolatzea gai-zerrendaren barruan diren interpelazio edo galderak, gai berari buruzkoak edo elkarrekin zerikusia duten gaiei buruzkoak badira.

2. Galderen edo jabelduren testuan erregelamendu honetako 139.1 artikuluaren a) letran aurreikusitakoren bat agertzen bada, Mahaiak haiek izapidera ezin direla onartu deklaratu ahal izanen du.

218. artikulua. Ordezkapena interpelazioa edo galdera egiterakoan.

Talde parlamentario bereko beste kide batek, lehendakariari aldez aurretik jakinarazita, ordezkatu ahalko du Osoko Bilkuran edo batzordean interpelazio edo galdera baten sinatzailea.

XII. TITULUA. MOZIOAK

219. artikulua. Subjektuak eta xedea.

1. Foru parlamentariek eta talde parlamentarioek mozioak aurkeztu ahalko dituzte, haien bitartez Legebiltzarrari ebazpen-proposamenak egiteko.

2. Talde parlamentarioek eskubidea izanen dute gutxienez ere beren mozioetako bat osoko bilkuretako gai-zerrendan sar dadin. Mozioen kopurua ezarriko da talde parlamentarioen ordezkagarritasunaren arabera ezarriko da. Talde mistoan, mozioen banaketa taldearen barne-funtzionamenduko arauetan xedatutakoari jarraikiz eginen da. Desadostasunik balego, Mahaiak, Eledunen Batzarrarekin bat, ebatziko du, talde mistoko alderdi edo elkarte bakoitzaren zenbakizko garrantziaren arabera.

Edonola ere, mozioak talde parlamentario edo parlamentarien elkarte batek sinatuta egon beharko dute. Halaber, talde parlamentario edo parlamentarien elkarte batek baino gehiagok sinatu ahalko dituzte, eta haien artean erabaki beharko dute nork aldeztuko duen Osoko Bilkuran edo dagokion batzordean.

220. artikulua. Izapidetzea.

1. Mozioak Legebiltzarreko Mahaiari zuzendutako idazki baten bidez aurkeztu beharko dira. Mahaiak erabakiko du horiek izapidera onartzen dituen ala ez; eta, onartzen baditu, argitara daitezen agindu eta Osoko Bilkuraren edo kasuan kasuko batzordearen aurrean izapidetu daitezen erabakiko du, proposamena egin duen talde parlamentarioak edo foru parlamentariak azaldutako nahiaren arabera.

2. Ez dira izapidera onartuko bilkuraldi berean izapidetutako mozioak errepikatzen dituzten mozioak.

3. Mozioa argitaratuta, talde parlamentarioek eta foru parlamentariek, nork bere izenean, zuzenketak aurkeztu ahalko dizkiote bertan jasotako ebazpen-proposamenari, mozioaren egileak izan ezik, hark in voce zuzenketa gisa aurkeztu beharko baititu. Zuzenketa horiek Legebiltzarreko Mahaiari edo mozioa izapidetzeko eskudun den batzordeko mahaiari igorritako idazki baten bidez aurkeztuko dira, eztabaidatu behar diren bilkuraren aurreko eguneko hamabiak baino lehen.

4. Eztabaidan zehar, lehendakariak izapidera onartzen ahalko ditu in voce zuzenketak, baldin eta haien xedea errakuntza edo oker teknikoak, terminologikoak edo gramatikalak zuzentzea bada. Gainerakoan, soilik inongo talde parlamentariorik aurka azaltzen ez bada onartu ahalko dira zuzenketak izapidera.

5. Legebiltzarreko edo batzordeko lehendakariak gai berari buruzko mozioak edo elkarrekin zerikusia dutenak batu ahalko ditu, eztabaidarako.

221. artikulua. Eztabaidaren garapena.

1. Mozio baten eztabaida hasiko da hura aurkeztu duen talde parlamentarioak edo foru parlamentariak egindako defentsarekin. Hamabost minutu izanen ditu horretarako, gehienez.

2. Ondoren, zuzenketak aurkeztu dituen talde parlamentario bakoitzaren ordezkari bat edo zuzenketak aurkeztu dituen foru parlamentaria mintzatuko dira, hamar minutuz. Ondoren, mozioaren aldeko txanda bat eta aurkako beste bat egonen dira; txanda horietan mintzatu ahalko dira zuzenketarik aurkeztu ez duten talde parlamentarioak edo talde mistoko foru parlamentariak, hamar minutuz gehienez.

3. Aurreko apartatuan aipatutako mintzaldiak bukatuta, mozioa proposatu duen talde parlamentario edo foru parlamentariak ihardespen-txanda bat erabili ahalko du, hamar minutuz gehienez.

4. Mintzaldi horiek bukaturik, mozioa, hura proposatu duenak onartutako zuzenketekin batera, bozkatu eginen da. Talde parlamentario batek eztabaidaturiko mozioaren apartatu bat edo gehiago bereizirik bozka daitezela eskatu ahalko du.

Lehendakariak berezitako bozketa onartuko du, betiere ekimenaren egileak onartzen badu.

222. artikulua. Mozioen betetzekontrola.

1. Gaia dela-eta dagokion batzordeak kontrolatu behar du mozioak betetzen direla. Onetsitako mozioaren testuak zehazten ez baldin badu, Parlamentuko Mahaiak zehaztuko du, Eledunen Batzarrari entzun ondoren, zer batzorderi dagokion haren kontrola.

2. Parlamentuko lehendakariak jakinarazi behar dio Nafarroako Gobernuari zer batzordetan eman beharko dituen mozioa betetzeari buruzko idatzizko azalpenak.

3. Gobernuak, mozioa betetzeko ezarritako epea bukatuta, hamabost eguneko epea dauka kasuko batzorde parlamentarioan azalpenak emateko. Mozioak ez baldin badu epe zehatzik zehazten, Gobernuak lau hilabeteko epean eman beharko ditu mozioaren betetzeari buruzko azalpenak, Nafarroako Parlamentuko Aldizkari Ofizialean onetsitako mozioa argitaratu eta biharamunetik aitzina zenbatuta. Epea hilabetetan ezarri baldin bada, datatik datara zenbatu behar da.

4. Mozioaren alde bozkatu duen talde parlamentarioren batek hala eskatzen badu, Nafarroako Gobernuari mozioa betetzeko emandako epea bukatuta, mozio hori betetzen dela kontrolatzea dagokion organoak adierazi behar du zein den bere iritzia mozioa betetzeari edo Gobernuak azalpenak emateari dagokienez.

5. Mozioaren betetzeari buruzko iritzia emateko -mozioa gaiari buruzko eskumena duen batzordearen bilkuraren gai-zerrendan sartuta egon beharko du-, talde parlamentarioek hamarna minutuko txanda izanen dute Nafarroako Gobernuak bidalitako idazkiari edo mozioa bete ez izanari buruzko jarrera ezartzeko. Nafarroako Gobernuak informazio-bilkura bat egitea eskatzen badu, 228. artikuluan agerraldietarako xedatutakoari jarraituko zaio. Kasuko izapidea amaiturik, mozioaren alde bozkatu duen talde parlamentarioren batek hala eskatzen badu, batzordeburuak galdetu beharko dio ea bere ustez Nafarroako Gobernuak mozioa bete duen.

223. artikulua. Herriekimeneko mozioak.

1. Nafarroan bizilekua duten herritarrek edo Foru Komunitatean egoitza duen pertsona juridikoa ordezkatzen duen pertsonak mozioak aurkeztu ahalko dituzte, horien bidez Legebiltzarrari ebazpen-proposamenak helarazteko.

2. Mozioak idatziz aurkeztuko dira Parlamentuko Erregistro Orokorrean, eta Administrazio Prozedura Erkideari buruzko Legean ezarritako baldintzak bete beharko dituzte.

3. Mozioak aztertu ondoren, erregelamendu honetan mota bereko ekimenetarako xedaturiko onargarritasun-baldintzak betetzen badituzte, Parlamentuko Mahaiak aginduko du talde parlamentarioei helarazteko.

4. Mozio horiek Osoko Bilkuran nahiz batzordean izapidetu ahal izateko, legebiltzarkideren batek bere gain hartu beharko ditu. Horretarako, Legebiltzarreko Mahaiari jakinaraziko dio eta deitzen den hurrengo bilkuraren gai-zerrendan sartuko dira. Foru parlamentari bat baino gehiago badira mozio bera aurkeztu nahi dutenak, horretarako asmoa agertzen duen lehenengo foru parlamentariari esleituko zaio.

5. Mozioa esleitzen zaion foru parlamentariari dagokio hura osoko bilkuran edo batzordean izapidetzeko erabakia. Edonola ere, bere mintzaldiaren hasieran adieraziko du nor den ekimenaren egilea, eta mozioa azaltzerakoan ezin izanen du testuaren jatorrizko edukia aldatu.

6. Osoko bilkura bakoitzean gehienez ere halako lau mozio egin ahalko dira, eta horiek kasuko gai-zerrendan sartzeak agortu eginen du talde parlamentario bakoitzak 219.2. artikuluan xedatutakoari jarraikiz daukan kupoa.

7. Herri-ekimeneko galderaren egileari helaraziko zaio mozioa sartu den deialdia.

8. Bilkuraldia bukatzen denean foru parlamentariren batek bere gain hartu gabe dauden herri-ekimeneko mozioak bertan behera geldituko dira.

XIII. TITULUA. FORU DIPUTAZIOAREN KOMUNIKAZIO, PROGRAMA EDO PLANEN ETA BESTE INFORMAZIO BATZUEN AZTERKETA ETA EZTABAIDA

I. KAPITULUA. Gobernuaren komunikazioak

224. artikulua. Komunikazioaren aurkezpena eta eztabaida.

1. Foru Diputazioak komunikazioak bidali ahalko dizkio Parlamentuari, Legebiltzarrak eztabaida ditzan.

2. Komunikazioa bidali ondoren, Mahaiak, Eledunen Batzarrari entzun ondoren, argitara dadin agindu eta komunikazioaren ondoriozko eztabaida Osoko Bilkuran edo batzordean egin dadila xedatuko du, salbu eta Diputazioak berariaz Osoko Bilkuran eztabaidatzea proposatzen badu.

3. Foru Diputazioaren komunikazioak interes politikoa duen edozein gairi buruzkoak izan daitezke. Komunikazio baten eztabaida Gobernuko kide baten mintzaldiarekin hasiko da, eta horren ondoren talde parlamentario bakoitzaren ordezkari bat eta talde mistoko parlamentariak mintzatu ahalko dira, gehienez hamabost minutuz.

4. Foru Diputazioko kideek galderei banaka, batera zein gaika bilduta erantzun ahalko diete. Mintzatu diren guztiek ihardesteko txanda izanen dute, gehienez ere hamarna minutuz.

225. artikulua. Ebazpenproposamena.

1. Eztabaida bukatu ondoren, epe bat irekiko da, zeinaren iraupena Legebiltzarreko edo batzordeko lehendakariak erabakiko baitu, eta epe horretan talde parlamentarioek eta talde mistoko foru parlamentariek ebazpen-proposamenak aurkeztu ahalko dizkiote Mahaiari. Mahaiak eztabaidaren helburuarekin bat datozen proposamenak onartuko ditu.

2. Mahaiak finkatuko du izapidera onartutako proposamenak eztabaidatzeko hurrenkera, kontuan harturik elkarrekin duten antza edo lotura eta, baita ere, komunikazioa erabat zein zatika onartzen edo errefusatzen duten. Proposamen bakoitzaren eztabaida 161,1. artikuluaren 2. arauan zuzenketa edo boto partikularrentzako ezarritakoari lotuko zaio.

3. Ebazpen-proposamenak eztabaidatu diren hurrenkera berean bozkatuko dira.

226. artikulua. Foru Komunitatearen egoerari buruzko politika orokorreko eztabaida.

1. Legegintza-urtearen lehendabiziko bilkuraldiaren hasieran, Gobernuko lehendakariaren inbestidura eztabaida egiten denean edo bilkuraldi horretan hauteskundeak egin behar direnean izan ezik, osoko bilkura berezia eginen da Erkidegoaren egoerari buruzko politika orokorreko eztabaida bat egiteko. Eztabaidarako deialdia egin aurretik, irailaren lehenbiziko hamabost egun baliodunen barrenean, Nafarroako Gobernuak Parlamentuari igorri ahalko dio Gobernuaren politika orokorrari eta erkidegoaren egoerari buruzko komunikazio bat, osoko bilkura berezi horretan eztabaida dadin.

2. Oro har, Erregelamendu honetako V. tituluko IV. kapituluan ezarritako arauak aplikatuko dira eztabaidan. Betiere ondoko apartatuetan ezarritakoari begiratuko zaio:

a) Eztabaida Nafarroako Gobernuko lehendakariaren mintzaldiarekin hasiko da, denbora mugarik gabe. Azalpen hori amaiturik, lehendakariak bilkura aldi baterako etenen du, talde parlamentarioek mintzaldia aztertu ahal izan dezaten.

b) Bilkuraldia berriz hasten denean, mintzaldi-txanda bat irekiko da, zeinean talde parlamentario guztiak mintzatu ahalko baitira, zein bere ordezkariaren bitartez. Talde parlamentarioen mintzaldien hurrenkera ezarriko da talde bakoitzak duen kide kopuruaren arabera; kopuru handiena duen taldearekin hasi eta txikiena duenarekin amaituko da.

c) Aurreko apartatuan aipaturiko mintzaldiek ez dute hogeita hamar minutu baino gehiago iraunen.

d) Eskatu duten talde parlamentarioen eledun guztiak mintzatu ondoren, Gobernuko lehendakaria berriz mintzatu ahalko da.

e) Lehendakaria mintzatu ondoren, ihardespen-txanda bat, gehienez ere hamar minutukoa, ezarri ahalko da, talde parlamentario ezberdinek hala eskatuta, hain zuzen ere artikulu honetako b) apartatuan ezarritako hurrenkera duena. Eztabaida bukatuko da Gobernuko lehendakariaren mintzaldiarekin.

f) Eztabaida bukatzen denean, epe bat irekiko da, zeinaren iraupena Legebiltzarreko lehendakariak erabakiko baitu, eta epe horretan talde parlamentarioek eta talde mistoko foru parlamentariek gehienez bost ebazpen-proposamen aurkeztu ahalko dizkiote Mahaiari. Mahaiak eztabaidaren helburuarekin bat datozen proposamenak onartuko ditu. Haien eztabaida eta bozketa Erregelamenduko 221. artikuluak xedatutakoari jarraituz eginen dira.

II. KAPITULUA. Foru Diputazioak igorritako programa eta planen azterketa

227. artikulua. Planak eta programak.

1. Lege mailako arau batek hala eskatzen duenean edo bi talde parlamentariok edo Foru Diputazioak berak eskatzen badute, Gobernuak Parlamentuari helaraziko dizkio onesten dituen plan edo programak. Kasu horretan, Mahaiak, Eledunen Batzarrari entzun ondoren, argitara dadin agindu eta komunikazioaren ondoriozko eztabaida Osoko Bilkuran edo batzordean egin dadila xedatuko du, salbu eta Diputazioak berariaz Osoko Bilkuran eztabaidatzea proposatzen badu.

2. Gobernuko kide baten mintzaldiarekin hasiko da eztabaida, eta horren ondoren talde parlamentario bakoitzaren ordezkari batak mintzatu ahalko dira, gehienez hamabost minutuz. Talde mistoari dagokionez, haren kideek edo foru parlamentarien elkarteek denbora osoa haien artean banatu ahalko dute, kideetako edozeinek hala eskatzen badu.

3. Foru Diputazioko kideek galderei banaka, batera zein gaika bilduta erantzun ahalko diete. Mintzatu diren guztiek ihardesteko txanda izanen dute, gehienez ere hamarna minutuz. Talde mistoaren kasuan, aurreko apartatuan xedatutakoari jarraituko zaio.

4. Eztabaida bukatu ondoren, epe bat irekiko da, zeinaren iraupena Legebiltzarreko edo batzordeko lehendakariak erabakiko baitu, eta epe horretan talde parlamentarioek eta talde mistoko foru parlamentariek ebazpen-proposamenak aurkeztu ahalko dizkiote Mahaiari. Mahaiak eztabaidaren helburuarekin bat datozen proposamenak onartuko ditu.

5. Mahaiak izapidera onartutako proposamenak eztabaidatzeko hurrenkera finkatuko du, kontuan harturik elkarrekin duten antza edo lotura eta, baita ere, plana edo programa erabat zein zatika onartzen edo errefusatzen duten. Proposamen bakoitzaren eztabaida 161,1. artikuluaren 2. arauan zuzenketa edo boto partikularrentzako ezarritakoari lotuko zaio.

6. Eztabaida egiten ari den bitartean in voce proposamenak aurkeztu ahalko dira, zeinen testua orduantxe bertan eman beharko baita idatziz. Zuzenketa horiek eztabaidagaiari buruzkoak izan beharko dute. Batzordeko mahaiak izapidera onartu ahal izateko, gutxienez bi talde parlamentarioren edo batzordeko kideen bostenaren sinadura beharko da. Baldin eta in voce zuzenketa talde mistoko kide den foru parlamentari batek proposatua bada, gutxienez talde parlamentario baten sinadura ere izan beharko du.

Mahaiak aztertuko du aurkeztu diren zuzenketek aurreko apartatuan ezarritakoa betetzen duten, eta izapidera onartzen dituen ala ez erabakiko du.

7. Eztabaida bukatuta, bozketak honako hurrenkeratan eginen dira:

a) Lehenengo, plana edo programa itzultzeko proposamena egiten duten erabaki proposamenak bozkatuko dira, halakorik bada.

b) Itzultzeko proposamenak bazter utzirik, halakorik bada, ebazpen-proposamenak eztabaidatu diren hurrenkera berean bozkatuko dira.

c) Azkenik plan edo programaren testu osoa, onetsitako ebazpen-proposamenak barne direla, osoko bozketa bakarrean bozkatuko da. Emaitza aldekoa baldin bada, Parlamentua igorri zaion planarekin edo programarekin ados dagoela ulertuko da. Ezezkoa baldin bada, ados ez dagoela ulertuko da.

III. KAPITULUA. Nafarroako Gobernuaren agerraldiak

228. artikulua. Nafarroako Gobernuko kideen agerraldiak.

1. Nafarroako Gobernuko kideak, haiek hala eskatuta edo Eledunen Batzarraren ekimenez, Legebiltzarreko Mahaiak erabakitzen duen batzordearen aurrean agertuko dira, haien eskumeneko jarduerei buruzko informazio bilkura egiteko xedez.

2. Agerraldia gutxienez ere Parlamentuko kideen bostenak edo gutxienez ere ordezkaritza hori daukaten talde parlamentarioek eskatzen dutenean, Eledunen Batzarrak informazio bilkurarako dei egitea erabakiko du.

3. Behar bezala arrazoitutako salbuespenetan izan ezik, agerraldia onartzen denetik agerraldia egiten denera ez dira hamabost egun baino gehiago igaroko.

4. Kontseilariak, aholkulari, goi kargu zein funtzionarioek lagunduta bertara daitezke aipatu informazio bilkuretara.

5. Nafarroako Gobernuak eskatuta deitzen diren informazio-bilkurak kontseilariaren azalpenarekin hasiko dira; azalpen horren gehieneko iraupena hogeita hamar minutukoa izanen da. Azalpena bukatu ondoren, lehendakariak aldi baterako eten ahalko du bilkura, batzordeko kideek informazioa aztertzeko beta izan dezaten. Bilkura berriro hasten denean, talde parlamentario bakoitzaren ordezkariak eta talde mistoko parlamentariak hamar minutuz mintzatu ahalko dira, beren jarrerak argitzeko, zerbait galdetzeko edo oharren bat egiteko. Kontseilariak edo laguntzen dioten aholkulari edo funtzionarioek horiei erantzunen diete.

Parte-hartzaileren batek hala eskaturik, lehendakariak galdera edo oharretarako beste txanda bat irekiko du; bost minutu izanen dira horiek egiteko.

6. Eledunen Batzarrak eskatuta deitzen diren informazio-bilkurak deialdi-proposamena egin duen talde parlamentarioaren ordezkariaren azalpenarekin hasiko dira, gehienez ere bost minutuz. Azalpena bukatu ondoren, lehendakariak aldi baterako eten ahalko du bilkura, batzordeko kideek eta kontseilariak informazioa aztertzeko beta izan dezaten. Bilkura berriz hasten denean, kontseilaria mintzatuko da, eskatutako gaiari buruzko azalpenak emateko, gehienez ere hogeita hamar minutuz. Azalpena bukatu ondoren, lehendakariak aldi baterako eten ahalko du bilkura, batzordeko kideek azalpena aztertzeko beta izan dezaten.

Ondoren, talde parlamentario bakoitzaren ordezkariak eta talde mistoko parlamentariak, agerraldia eskatu duenetik hasita, hamar minutuz mintzatu ahalko dira, beren jarrerak argitzeko, zerbait galdetzeko edo oharren bat egiteko. Kontseilariak edo laguntzen dioten aholkulari edo funtzionarioek horiei erantzunen diete.

Parte-hartzaileren batek hala eskaturik, lehendakariak galdera edo oharretarako beste txanda bat irekiko du; bost minutu izanen dira horiek egiteko.

7. Agerraldi-eskaera talde parlamentario batek baino gehiagok edo talde desberdinetako foru parlamentariek sinatuta badago, defentsa-txanda sinatzaileetako bati egokituko zaio. Kontseilaria mintzatu ondoren, gainerako taldeen txanda izanen da, sinatzaileetatik hasita. Kasu horietan, ihardespen-txanda proposamenaren defendatzailearentzat izanen da.

Aurrekoa gorabehera, proposamen-egileek lehendakariari adierazi ahalko diote defentsa eta ihardespen-txandak erabili nahi dituztela, haien denborak elkarren artean banatuz.

8. 5. eta 6. apartatuetan Gobernuko kideentzat ezarritako denbora-mugak ez zaizkio aplikatuko Nafarroako Gobernuko lehendakariari.

XIV. TITULUA. PARLAMENTUAREN HARREMANAK KONTUEN GANBERAREKIN, NAFARROAKO FORU KOMUNITATEKO ARARTEKOAREKIN ETA NAFARROAKO FORU KOMUNITATEKO BESTE KARGU BATZUEKIN

I. KAPITULUA. Kontuen Ganberari aholkua eskatzea eta horren Lehendakariaren agerraldiak

229. artikulua. Kontuen Ganberaren aholkuematea eta agerraldia

1. Nafarroako Parlamentuak, Osoko Bilkuraren, batzordeen nahiz Mahaiaren eta Eledunen Batzarraren bitartez, zilegi izanen du bere jarduketak oinarritzeko beharrezko diren aholkularitza eta txosten teknikoak Kontuen Ganberari eskatzea, eta egoki irizten dionetan, Kontuen Ganberako lehendakaria ager dadila eskatzea, ondorio beretarako.

2. Kontuen Ganberako lehendakariak bere ekimenez eskatu ahalko du agerraldia egitea aurreko apartatuan aipaturiko organoen aurrean, Kontuen Ganberaren eskumeneko gairen bat Parlamentuaren jakinaren gainean jartzeari egoki irizten dionean. Parlamentuko Mahaiari zuzendutako idazkiz eginen da eskaria eta Mahaiak, Eledunen Batzarrari entzun ondoren, kasua bada agerraldi hori ahalbidetzeko prozedura ezarriko du.

3. Erregelamenduaren 178. 2 artikuluan jasotako kasuari dagokion Kontuen Ganberako lehendakariaren agerraldia hasiko da emandako irizpenari buruzko azalpen batekin. Erregelamenduaren 228. artikuluan azaltzen denaren arabera eginen da aipatu agerraldia.

4. Kontuen Ganberako lehendakariak Parlamentuan egiten dituen agerraldietan zilegi izanen du egoki deritzen teknikariekin bertaratzea.

230. artikulua. Eginiko txostenak helaraztea.

Kontuen Ganberak bere eginkizunen jardunean egiten dituen txostenak Parlamentuko lehendakariari bidaliko dizkio, horrek kasuko txostena helaraz diezaion horretarako aztertze-eskumena duen organo parlamentarioari.

II. KAPITULUA. Nafarroako Foru Komunitateko Arartekoaren txostenak

231. artikulua. Arartekoaren txostenak eta agerraldia

1. Parlamentuko Mahaiak, Arartekoaren urteko txostena jaso ondoren, Nafarroako Parlamentuko Aldizkari Ofizialean argitara dadila agindu eta Foru Araubideko Batzordeari dei eginen dio Arartekoak haren aurrean agerraldia egin dezan. Agerraldi hori eginen da 228.5. artikuluan ezarritako prozedurari jarraikiz.

2. Arartekoaren urteko txostena honako prozedura honi jarraikiz eztabaidatuko da Foru Araubideko Batzordean:

Arartekoak txostenaren laburpen bat agertzea, gehienez ere hogeita hamar minutuz.

Azalpena amaiturik, alde parlamentarioen ordezkari bana mintzatu ahalko da, gehienez ere hamabost minutuz eta txikienetik handienerako hurrenkeran, nork bere jarrera adierazteko.

Eztabaida horri dagokionez, ezin izanen da ebazpen-proposamenik aurkeztu.

3. Arartekoak aurkeztutako txosten monografiko edo bereziak Foru Araubideko Batzordean izapidetuko dira, 1. apartatuan xedatuari jarraikiz eta aurreko apartatuan ezarritako prozeduraren arabera.

III. KAPITULUA. Jardunbide Egokien Aldeko eta Ustelkeriaren Kontrako Bulegoaren txostenak eta Gardentasunaren Kontseiluaren oroitidazkia

232. artikulua. Jardunbide egokien aldeko eta ustelkeriaren kontrako Bulegoaren txostenak.

1. Parlamentuko Mahaiak, Jardunbide Egokien Aldeko eta Ustelkeriaren Kontrako Bulegoaren urteko txostena jaso ondoren, Nafarroako Parlamentuko Aldizkari Ofizialean argitara dadila agindu eta batzorde eskudunari dei eginen dio Bulegoko zuzendariak haren aurrean agerraldia egin dezan. Agerraldi hori eginen da 228.5. artikuluan ezarritako prozedurari jarraikiz.

2. Jardunbide Egokien Aldeko eta Ustelkeriaren Kontrako Bulegoko zuzendariak bere ekimenez edo Eledunen Batzarrak, bi talde parlamentariok edo foru parlamentarien bosten batek eskaturik Parlamentuari bidalitako txosten bereziak izapidetuko dira aurreko apartatuan ezarritako moduan.

233. artikulua. Nafarroako Gardentasunaren Kontseiluaren oroitidazkia.

Parlamentuko Mahaiak, Nafarroako Gardentasunaren Kontseiluaren urteko oroitidazkia jaso ondoren, Nafarroako Parlamentuko Aldizkari Ofizialean argitara dadila agindu eta batzorde eskudunari dei eginen dio kontseiluko lehendakariak haren aurrean agerraldia egin dezan. Agerraldi hori eginen da 228.5. artikuluan ezarritako prozedurari jarraikiz.

XV. TITULUA. NAFARROAKO PARLAMENTUAREN ETA EUROPAKO PARLAMENTUAREN ARTEKO HARREMANAK

234. artikulua. Europako Parlamentuari eskaera egiteko eskubidea.

1. Europar Batasuneko eskumen-esparruko gai bati buruzko ekimen bat sustatzeko xedez, Nafarroako Parlamentuak Europako Parlamentuari eskaera egiteko eskubidea baliatu ahalko du, erakunde horren erregelamenduak ezarritakoari jarraikiz.

2. Eskaera egiteko proposamena Nafarroako Gobernuak, bi talde parlamentariok edo Parlamentuko kideen bostenak egin ahalko dute.

3. Eskaera egiteko proposamena izapidetuko da Erregelamendu honetan mozioetarako xedaturiko prozeduraren bidez, eta Parlamentuko kideen gehiengo osoz onetsi beharko da.

4. Europako Parlamentuak dei egiten badio Nafarroako Parlamentuari entzunaldi batera ager dadin, Osoko Bilkurak hiru foru parlamentari izendatu ahalko ditu eskaeraren xede den gaian eskumena duen Europako Parlamentuko batzordean agerraldia egin dezaten.

XVI. TITULUA. SENATARIEN HAUTAKETA ETA KONTUEN GANBERAKO LEHENDAKARIAREN, NAFARROAKO FORU KOMUNITATEKO ARARTEKOAREN ETA NAFARROAKO FORU KOMUNITATEKO BESTE KARGU BATZUEN IZENDAPENAK

I. KAPITULUA. Nafarroako Foru Komunitateko senatariak hautatzea

235. artikulua. Hautaketasistema.

1. Parlamentuko Osoko Bilkurak, berariaz eginiko deialdian, Nafarroako Foru Komunitatea Senatuan ordezkatu behar duten senatariak hautatuko ditu, Nafarroako Foru Eraentza Berrezarri eta Hobetzeari buruzko Lege Organikoaren 12. artikuluan ezarritakoarekin bat eta gizonen eta emakumeen ordezkaritza orekatuaren printzipioa betetzen dela zainduz.

2. Mahaiak, Eledunen Batzarrarekin bat, Konstituzioaren xedapenen arabera, Nafarroari Foru Komunitatea den aldetik dagokion senatari kopurua finkatuko du.

3. Honako hauek hautatu ahalko dira Nafarroako Foru Komunitateko senatari: Espainiako herritarrak, legeek senatari izateko eskatutako baldintza orokorrez gain, nafar izaera politikoa dutenak, Nafarroako Foru Eraentza Berrezarri eta Hobetzeari buruzko Lege Organikoaren 5. artikuluan ezarritakoaren arabera.

4. Parlamentuko Mahaiak erabakiko du talde parlamentarioen ordezkariek edo talde mistoko parlamentariek hautagaiak proposatzeko epea. Epea bukatu ondoren, aurkeztu diren senatari-hautagaiak aldarrikatuko ditu eta senatariak hautatzeko Osoko Bilkuraren batzarrerako deia eginen du.

5. Senataria edo senatariak, paper bidezko bozketa sekretu bakarrean hautatuko dira. Foru parlamentari bakoitzak hautagai aldarrikatuetako bakar baten izena idatzi ahalko du boto-paperean. Boto zuriek ere balioko dute. Gainerakoak baliogabeak izanen dira.

6. Hautatuak izanen dira, hurrenez hurren, hautatu beharreko senatari kopurua bete arte, botorik gehien eskuratzen duten hautagai aldarrikatuak. Berdinketak ebatziko dira kiderik gehien duen talde parlamentarioak proposaturiko hautagaiaren alde, eta berdinketa gertatuz gero, adin handieneko hautagaiaren alde.

7. Nafarroako Parlamentuak hautatutako senatarien agintaldia, hautatu dituen Nafarroako Parlamentuaren ondorengoa eratzen den egun berean bukatuko da.

Haatik, Konstituzioak ezarritako edozein arrazoirengatik Senatuko legegintzaldia bukatzen denean ere bukatuko da senatarien agintaldia. Senaturako hauteskundeak egin ondoren eta Senatua eratu aurretik, Legebiltzarreko Mahaiak Nafarroako Parlamentuko legegintzaldiaren hasieran hautatuak izan diren pertsona berei emanen die agintea.

8. Beharrezkoa balitz hautaturiko senatarietakoren bat ordeztea, bete nahi den postu hutsa dagokion talde parlamentarioak proposatuko du ordezko senataria.

236. artikulua. Nafarroako Foru Komunitatea Senatuan ordezkatzen duten senatariekiko harremanak.

1. Nafarroako Foru Komunitatea Senatuan ordezkatzen duten senatariek, parlamentarien bostenak edo bi talde parlamentariok eskatzen badute, Eledunen Batzarrarekin bat, agerraldia egin beharko dute informazio-bilkura batean, Nafarroako Foru Komunitatearekin edo autonomia-erkidegoekin zerikusia duen edozein izapidetzearekiko eginiko jarduketen berri emateko.

2. Senatariek informazioa jaso beharko dute Senatuaren jardunarekin eta eskumenekin lotuta Nafarroako Parlamentuak hartutako erabakiei eta eginiko eztabaidei buruzko informazioa jaso beharko dute senatariek.

3. Mahaiak beharrezkoak diren neurriak hartuko ditu senatariek Nafarroako Parlamentuan aztertutako gaiei buruzko jakinarazpena jaso dezaten, haien interesekoak izan badaitezke, beren mandatua hobeto betetze aldera.

II. KAPITULUA. Kontuen Ganberako lehendakaria izendatzea

237. artikulua. Hautaketa.

Parlamentuak hautatuko du Kontuen Ganberako lehendakaria, Kontuen Ganberaren eratze-legeak edo lege hori aldatzen edo garatzen dutenek ezarritakoari jarraituz.

238. artikulua. Kontuen Ganberako lehendakaria hautatzeko prozedura.

Hona Kontuen Ganberako lehendakaria hautatzeko arauak:

Lehenengoa.-Legebiltzarreko Osoko Bilkurak hautatuko du Kontuen Ganberako lehendakaria.

Bigarrena.-Legebiltzarreko Mahaiak finkatuko du, Eledunen Batzarrari entzun ondoren, Kontuen Ganberako lehendakaritzarako hautagaiak aurkezteko epea.

Hirugarrena.-Hautagai-aurkezpena eginen da Legebiltzarreko Mahaiari talde parlamentarioek edo talde mistoko parlamentariek bidalitako idazki baten bidez, zeinetan jasota agertuko baita lehendakari izateko proposatzen den hautagaiaren onarpena.

Laugarrena.-Hautagaiak aurkezteko epea bukatu ondoren, Mahaiak hautagaiak aldarrikatu eta Legebiltzarreko Osoko Bilkuraren batzarrerako deia eginen du.

Bosgarrena.-Lehendakaria hautatzeko, erregelamendu honetako 113 artikuluak kargu-hautaketarako ezarritako bozketa-sistema erabiliko da.

Seigarrena.-Gehiengo osoa ezinbestekoa izanen da lehenengo bozketan. Hautagaietako batek ere ez badu gehiengo hori lortzen, bigarren bozketa eginen da, baina parte hartuko dute soilik lehen bozketan boto gehien eskuratu dituzten bi hautagaiek. Boto kopuru handiena eskuratzen duen hautagaia hautatuko da. Hautagai bakarra dagoen kasuan, bigarren bozketa gehiengo soilaren bidez ebatziko da.

Zazpigarrena.-Bozketaren batean berdinketa badago, bigarren bozketa eginen da, eta oraindik ere berdinketa badago, bozketa eten eginen da, lehendakariak arrazoizkotzat jotzen duen epe batez. Denbora hori iragandakoan, hirugarren bozketa bat eginen da; eta, azken bozketa horretan berriro ere berdinketarik egonez gero, hautagairik zaharrenaren alde eginen da, eta hura aldarrikatuko da lehendakari.

III. KAPITULUA. Nafarroako Foru Komunitateko Arartekoa izendatzea

239. artikulua. Arartekoa izendatzeko prozedura.

Nafarroako Foru Komunitateko Arartekoa Parlamentuaren Osoko Bilkurak hautatuko du, Arartekoari buruzko Foru Legeak eta honako arauek ezarritakoari jarraikiz:

Lehenengoa.-Legebiltzarreko Mahaiak, Eledunen Batzarrari entzun ondoren, Ararteko izateko hautagaiak aurkezteko epea ezarriko du.

Bigarrena.-Hautagai-aurkezpena eginen da talde parlamentarioek edo foru parlamentarien elkarteak Mahaiari bidalitako idazki baten bitartez, eta hari gehituko zaizkio hautagaitza onartzeari buruzko adierazpena eta foru lege hartan ezarritako baldintzak betetzearen froga. Talde parlamentario edo foru parlamentarien elkarte bakoitzak hautagai bakarra aurkezten ahalko du.

Hirugarrena.-Hautagaiak aurkezteko epea amaiturik, Mahaiak erabakiko du proposatutako hautagaiek baldintzak betetzen ote dituzten, eta, hala bada, hautagaitzak onartu eta Foru Araubideko Batzordera igorriko ditu.

Laugarrena.-Foru Araubideko Batzordeak, berak hala nahita edo talde parlamentario batek eskatuta, erabakitzen ahalko du proposaturiko hautagaiak agerraldi publikoa egitea batzorde horretan, Nafarroako Foru Komunitateko Arartekoaren karguan aritzeko haren egokitasuna aztertzeko.

Bosgarrena.-Foru Araubideko Batzordeak, bere kideen hiru bostenen aldeko botoarekin, Nafarroako Foru Komunitateko ararteko izateko hautagaia proposatuko dio Legebiltzarraren Osoko Bilkurari. Foru Araubideko Batzordean hautatuko da, isilpeko bozketan, boto-txartelen bidez. Haietan batzordeko kide bakoitzak hautagai proposatuetako bakar baten izena idatzi ahalko du.

Bozketa amaituta, kargurako proposatutako pertsonaren batek lortzen badu batzordeko kideen hiru bostenen aldeko botoa, aldarrikatuko da Ararteko izateko hautagai. Kasu horretan, batzordeburuak Legebiltzarreko Mahaiari igorriko dio hautagaia aldarrikatzen duen erabakia. Mahaiak Arartekoa hautatzeko Osoko Bilkuraren batzarrerako deia eginen du; osoko bilkura hori ezin izanen da egin hautagai-aldarrikapenetik hamabost egun baliodun igaro baino lehen.

Seigarrena.-Hautagai bakar batek ere lortzen ez badu aurreko paragrafoan adierazi den gehiengoa, beste bozketa bati ekinen zaio lehenbiziko bozketa egin eta bi egunen buruan. Eskaturiko gehiengoa berriz ere lortzen ez bada, bukatutzat emanen da hautatze-prozesua, eta Parlamentuko Mahaiak hautagai-proposamenen aurkezpeneko beste epe bat irekiko du.

Zazpigarrena. Behin Foru Araubideko Batzordeak Arartekoa izateko hautagaia proposatuta, Osoko Bilkurak, aldez aurretik batzarra egiteko deituta, hautatuko du paper bidezko bozketa sekretu bidez parlamentarien botoen hiru bostenen gehiengoa lortzen badu. Hautagaiak gehiengo hori lortzen badu, Nafarroako Foru Komunitateko Ararteko hautatuko da.

Adierazitako gehiengoa lortzen ez bada, Legebiltzarreko Mahaiak, Osoko Bilkurak baztertu duen hautagaitza baino proposamen gehiago baldin badaude, Foru Araubideko Batzordea deituko du Ararteko izateko beste hautagai bat hauta dezan, Osoko Bilkuraren batzarra egin eta gehienez ere hilabeteko epean, bosgarren arauan ezarritako eran eta ondorioekin. Hautagai-proposamen bakarra badago eta Osoko Bilkurak baztertzen badu, hautatze-prozesua amaituko da eta prozesu berri bati ekinen zaio, seigarren arauko bigarren paragrafoan aurreikusitako eran.

Zortzigarrena.-Nafarroako Foru Komunitateko Arartekoaren hautaketa Nafarroako Parlamentuko Aldizkari Ofizialean eta Nafarroako Aldizkari Ofizialean argitaratuko da. Izendatutakoak bere karguaren jabetza hartuko du hautaketa Nafarroako Aldizkari Ofizialean argitaratu eta biharamunetik hasita hamabost egun naturaleko epean.

IV. KAPITULUA. Nafarroako Foru Komunitateko Jardunbide Egokien Aldeko eta Ustelkeriaren Kontrako Bulegoko zuzendaria hautatzea

240. artikulua. Jardunbide Egokien Aldeko eta Ustelkeriaren Kontrako Bulegoko zuzendaria izendatzeko prozedura.

Nafarroako Foru Komunitateko Jardunbide Egokien Aldeko eta Ustelkeriaren Kontrako Bulegoko zuzendaria Parlamentuaren Osoko Bilkurak hautatuko du, erakunde hori eratzeko foru legeak eta honako arauek ezarritakoari jarraikiz:

Lehena.-Legebiltzarreko Mahaiak finkatuko du, Eledunen Batzarrari entzun ondoren, Jardunbide Egokien Aldeko eta Ustelkeriaren Kontrako Bulegoko zuzendaritzarako hautagaiak aurkezteko epea.

Bigarrena.-Hautagai-aurkezpena eginen da talde parlamentarioek edo talde mistoko foru parlamentariek Mahaiari bidalitako idazki baten bitartez, eta hari gehituko zaizkio hautagaitza onartzeari buruzko adierazpena eta foru lege hartan ezarritako baldintzak betetzearen froga.

Hirugarrena.-Hautagaiak aurkezteko epea bukatu ondoren, Mahaiak hautagaiak aldarrikatu eta Legebiltzarreko Osoko Bilkuraren batzarrerako deia eginen du.

Laugarrena.-Jardunbide Egokien Aldeko eta Ustelkeriaren Kontrako Bulegoko zuzendaria hautatuko da erregelamendu honen 113. artikuluan ezarritako prozedurari jarraikiz, isilpeko bozketan, boto-txartelen bidez, eta foru parlamentari bakoitzak hautagai bakarraren izena bakarrik jarri ahalko du txartelean.

Bosgarrena.-Mahaiak boto-kontaketa egin eta botoen gehiengo osoa lortzen duen hautagaia hautatu dela aldarrikatuko du.

Seigarrena.-Bozketan berdinketa badago, bigarren bozketa eginen da, eta oraindik ere berdinketa badago, bozketa eten eginen da, lehendakariak arrazoizkotzat jotzen duen epe batez. Denbora hori iragandakoan, hirugarren bozketa bat eginen da; eta, azken bozketa horretan berriro ere berdinketarik egonez gero, hautagairik zaharrenaren alde eginen da, eta hura aldarrikatuko da Jardunbide Egokien Aldeko eta Ustelkeriaren Kontrako Bulegoko zuzendari.

XVII. TITULUA. DIPUTATUEN KONGRESURAKO LEGE PROPOSAMENAK, KONSTITUZIO-KONTRAKOTASUNEKO ERREKURTSOAK, ESKUMEN GATAZKAK ETA BABES-ERREKURTSOAK

I. KAPITULUA. Diputatuen Kongresurako lege proposamenak

241. artikulua. Parlamentuan izapidetzea eta proposamenaren defentsarako foru parlamentariak hautatzea.

1. Konstituzioaren 87.2 artikuluak aipatzen dituen lege proposamen eta proiektuak Nafarroako Parlamentuan lantzeko, erregelamendu honen VI. tituluko II. kapituluak ezarritakoari jarraituko zaio.

2. Nafarroako Parlamentuak onetsitako lege proposamenak Konstituzioaren 87.2 artikuluak ezarritakoaren arabera Diputatuen Kongresuaren aurrean defendatu behar dituzten foru parlamentarien hautaketa eginen da arau hauei jarraituz:

Lehena.-Nafarroako Parlamentuak onetsitako lege proposamenak Legebiltzarreko Osoko Bilkuran lege proposamena onestearen aurkako botoa eman ez duten hiru foru parlamentarik defendituko dituzte Diputatuen Kongresuan.

Bigarrena.-Mahaiak foru parlamentarietako bat izendatuko du, lege proposamena bultzatu duen parlamentu-taldeak edo, kasua bada, aurkeztu duen parlamentariak proposatuta.

Hirugarrena.-Beste bi parlamentariak aldi berean hautatuko ditu Eledunen Batzarrak, boto ponderatuaren bidez, parlamentu-taldeen eledunek proposatutakoen artetik. Hautatuak boto gehien lortzen dituztenak izanen dira, eta Legebiltzarreko Mahaiak izendatuko ditu.

Laugarrena.-Kasuan kasuko lege proposamena defendituko duten hiru foru parlamentariak hautatzeko Mahaiaren erabakia Nafarroako Parlamentuko Aldizkari Ofizialean argitaratuko da eta Diputatuen Kongresuko Mahaiari jakinaraziko zaio, lehendakariaren bidez, Konstituzioaren 87.2. artikuluan xedatutakoaren ondorioetarako.

Bosgarrena.-Nafarroako Parlamentuko lehendakariak beharrezkoak diren kredentzialak emanen dizkie izendatutako foru parlamentariei.

Seigarrena.-Diputatuen Kongresuak lege proposamena aintzat hartzeko tramitea egin ondoren, izendatutako foru parlamentariek agerraldia eginen dute Mahaiaren eta Eledunen Batzarraren aurrean, horiek aipatu tramitearen ondotik egiten duten lehenengo bilkuran, egindako urratsen berri emateko.

II. KAPITULUA. Konstituzio-kontrakotasuneko errekurtsoak eta babes-errekurtsoak

242. artikulua. Konstituziokontrakotasuneko prozesuak izapidetzea Konstituzio Auzitegian.

1. Mahaiaren edo Eledunen Batzarraren proposamen arrazoitua egin ondoren, zeina 101. artikuluan ezarritakoaren arabera eztabaidatuko den, Legebiltzarreko Osoko Bilkurak erabaki dezake Konstituzioaren 161.1.a) artikuluak eta Konstituzio Auzitegiari buruzko urriaren 3ko 2/1979 Lege Organikoaren 32.2 artikuluak aipatzen duten konstituzio-kontrakotasuneko errekurtsoa aurkeztea.

Parlamentuaren Osoko Bilkurak erabaki ahalko du Parlamentuak jarritako konstituzio-kontrakotasuneko errekurtso bat dela-eta atzera-egitea. Atzera egiteko proposamena bi talde parlamentariok edo Parlamentuko kideen bostenak aurkeztu beharko du, Konstituzio Auzitegiak epaia emateko data jarri baino lehen. Atzera egiteko proposamena aurkeztu, eztabaidatu eta bozkatuko da errekurtsoa aurkezteko ezarritako prozedura berari jarraikiz.

2. Legebiltzarreko Mahaiak, Eledunen Batzarraren erabakiaren ondoren, erabaki dezake Parlamentua gainontzeko konstituzio-auzietan agertu eta aurkeztea, aipatu lege organikoan ezarritakoarekin bat, salbu eta hurrengo artikuluan aipatzen direnetan.

3. Bilkuraldien arteko garaietan, lehendakariak erabakiko du aurreko apartatuan aipaturiko agertze hori, eta erabakiaren berri emanen dio Mahaiari horrek egiten duen lehenbiziko bileran, hark ebatz dezan, Eledunen Batzarrak erabakia hartu ondoren, agerraldiari eustea edo hari uko egitea.

243. artikulua. Babesprozesuak izapidetzea Konstituzio Auzitegian.

1. Legebiltzarreko Mahaiak, horretarako erabakia hartu ondoren, bere burua Konstituzio Auzitegiaren aurrean aurkeztu ahalko du babes-errekurtsoetan, baldin eta Legebiltzarreko Mahaitik sorturikoak diren erabaki edo egintza lege-indar gabekoen aurka urriaren 3ko 2/1979 Lege Organikoaren 42. artikuluaren arabera jarritakoak badira.

2. Mahaiaren egintzak irmoak izanen dira horien aurka Legebiltzarreko Erregelamenduaren arabera parlamentu-bidean inongo errekurtsorik aurkezterik ez dagoenean edo errekurtsoak agortu direnean.

XVIII. TITULUA. NAFARROAKO PARLAMENTUAREN EDO GORTE NAGUSIEN AGINTALDIAREN AMAIERAN IZAPIDETZEN ARI DIREN AFERAK

244. artikulua. Kargualdia bukatzeagatiko iraungitzea.

1. Parlamentuaren agintaldia bukatu ondoren, iraungirik geldituko dira Legebiltzarrak azterkizun eta erabakitzeke dituen afera guztiak, salbu eta legezko arauen arabera Legebiltzarreko Batzorde Iraunkorraren zereginetan sar daitezkeenak.

2. Parlamentuaren agintaldia amaitu ondoren, hartarako hauteskundeetarako deialdia egin eta gero, iraungirik geldituko dira Diputatuen Kongresuko Mahaiari aurkeztuak bai baina aintzat hartuak izateke dauden lege-proposamenak.

3. Baldin eta Gorte Nagusietan iraungi egiten bada Nafarroako Parlamentuak Diputatuen Kongresuko Mahaiari aurkezturiko lege proposamen baten izapidetzea, Parlamentuko Osoko Bilkurak zilegi izanen du, Eledunen Batzarrak proposaturik, erabakitzea aurkezpena errepika dadin eta berrestea proposamenaren defentsarako hautaturiko foru parlamentariak.

XIX. TITULUA. HERRITARREN PARTE-HARTZEA

245. artikulua. Legitimatutako subjektuak.

Nafarroan bizilekua duten herritarrek edo Foru Komunitatean egoitza duen pertsona juridikoa ordezkatzen duten pertsonek Navarra Parlamentuaren jardueran parte hartu ahalko dute, titulu honetan ezarritako moduan.

246. artikulua. Parte hartzeko tresnak.

Nafarroako Parlamentuak herritarren parte-hartzea ahalbidetuko du tresna hauen bidez:

1. Legegintzako herri-ekimena, 145. artikuluan ezarritako moduan.

2. Herri-ekimeneko galderak, 216. artikuluan ezarritako moduan.

3. Herri-ekimeneko mozioak, 223. artikuluan ezarritako moduan.

4. Adierazpen instituzionala egiteko proposamenen aurkezpena Eledunen Batzarrari.

XX. TITULUA. GARDENTASUNA ETA JARDUERA PARLAMENTARIOARI BURUZKO INFORMAZIO PUBLIKOA ESKURAGARRI IZATEA

I. KAPITULUA. Gardentasuna

247. artikulua. Gardentasunpolitika.

1. Parlamentuak argitaratu behar du bere antolamenduari, funtzionamenduari, jarduerei eta araubide ekonomikoari buruzko informazioa era objektibo, ulergarri eta erraz eskuratzekoan.

2. Gardentasun-politikaren helburua da pertsonek ezagutu eta eskuragarri izan dezaten 1. apartatuan aipatzen diren alderdiei buruzko informazioa.

248. artikulua. Gardentasun Ataria.

1. Parlamentuak bere informazioaren eta dokumentazioaren gardentasuna bermatu behar du, bere egoitza elektronikoan gaituko den Gardentasun Atariaren bidez.

2. Gardentasun Ataria informazio- eta ezagutza-sistema integral bat da, euskarri elektronikoan, pertsonei ahalbidetu behar diena informazio eta dokumentazio parlamentarioa eskuratzea, erabilera azkar, erraz eta ulergarria bermatzen duen bilatzaile baten bitartez.

3. Gardentasun Atariak honakoa bermatu behar ditu:

a) Informazioa era etengabean eta eguneratuan zabaltzea.

b) Informazioaren antolaketa sistematikoa, erraz eskuratu ahal izateko eta azkar, arin eta era intuitiboan kontsultatu ahal izateko.

c) Kontsultatzeko erraztasuna, erraz ulertzeko moduko euskarriak, elkarreragingarritasuna eta berrerabiltzea ahalbidetzen dutenak, erabilita.

d) Parlamentuaren informazioa eskuragarri izatea gardentasunari, informazio publikoa eskuratzeari eta gobernu onari buruzko legerian ezarritakoari jarraikiz.

249. artikulua. Informazio publikoaren berrerabilera.

1. Gardentasun Atariak euskarri berrerabilgarrian eskaini behar du informazioa.

2. Informazioa zilegi den edozein xederekin berrerabili daiteke, haren zentzua eraldatu edo desnaturalizatu gabe, eta datuen iturria eta azken eguneratzearen data aipatzeko betebeharrarekin.

250. artikulua. Publizitate aktiboa.

1. Gardentasun printzipioa aplikatuta, Parlamentuak honako informazioa argitaratu behar du:

a) Legebiltzarraren antolaketa eta funtzionamenduari buruzkoa.

b) Foru parlamentarien jarduera eta kide diren taldeena.

c) Administrazio parlamentarioa.

d) Garrantzi juridikoa duen informazioa.

e) Informazio ekonomikoa eta aurrekontuei eta kontratuei buruzkoa.

f) Herritarrekiko harremanei buruzkoa.

g) Gardentasunari buruzko jarduketen gainekoa.

h) Datu irekiak.

2. 1. apartatuan aipatzen den informazioak kasuan kasuko datuak eta dokumentuak hartuko ditu, Parlamentuko Mahaiak erabakitako irismen eta zehaztasunarekin, gardentasunari, informazio publikoa eskuratzeari eta gobernu onari buruzko legerian ezarritakoari jarraikiz.

3. Nafarroako Parlamentuko Mahaiaren aldeko erabakiaren bidez bestelako informazioa ere sar daiteke, haren hedapena garrantzitsua dela irizten bada.

251. artikulua. Gardentasun betebeharren mugak.

1. Gardentasunari buruzko betebeharren mugak izanen dira, oro har, gardentasunari, informazio publikoa eskuratzeari eta gobernu onari buruzko legerian ezarritakoak.

2. Gardentasunaren printzipioa modu mesedegarrian interpretatuko da da beti eta lehentasunez aplikatuko da. Hala, printzipio horren aplikazioaren murrizketa orok legez espresuki ezarritako muga edo salbuespen bat izanen du oinarri.

II. KAPITULUA. Informazio publikoa eskuratzea

252. artikulua. Nafarroako Parlamentuaren informazio publikoa eskuratzeko eskubidea.

Pertsona guztiek dute eginkizun parlamentarioak eta zuzenbide administratiboaren menpeko jarduera betetzean Nafarroako Parlamentuaren esku dagoen informazio publikoa, edozein dela ere edukien edo dokumentuen forma eta euskarri materiala, eskuratzeko eskubidea, erregelamendu honetan xedatutakoari jarraikiz.

253. artikulua. Informazio publikoa eskuratzeko eskubidearen mugak.

1. Informazio publikoa eskuratzeko eskubidea soilik mugatu ahalko da gardentasunaren arloko legedia indardunean ezarritako kasuetan. Kasu horiek era murriztailean eta arrazoituan interpretatu beharko dira.

2. Zehazki, ez da eskubiderik izanen Nafarroako Parlamentuak duen informazio sekretua eskuratzeko, izaera hori badu Legebiltzarraren Erregelamenduan xedaturiko aplikatzearen ondorioz.

3. Eskatutako informazioan datu pertsonalak agertzen badira, aintzat hartuko da gardentasunari buruzko legeria indardunean ezarritakoa, bai eta datu pertsonalen babesari buruzkoan ezarritakoa ere. Hirugarrenen datu pertsonalak dituen informazioaren kasuan, informazioa emanen da informazioaren anonimotasuna bermatzen denean modu eraginkor batean, deusetan galarazi gabe legedia orokorra gidatzen duen gardentasun-printzipioa.

4. Eskatutako informazioa legez aurreikusitako mugen pean baldin badago, ahal denean informazio partziala emanen da, mugatutako informazioa kenduta, salbu eta horren ondorioz informazioa eraldatua, nahasgarria edo zentzugabea gelditzen bada. Kasu horretan, eskatzaileari adierazi beharko zaio zein den aipatu ez den informazioaren zatia.

Informazioa modu partzialean eskuratzea onartzen denean, bermatu beharko da mugatutako informazioaren erreserba, eta erreserba horren ohartarazpena egiten dela eta jasota gelditzen dela.

254. artikulua. Prozedura.

1. Informazio publikoa eskuratzeko eskaerak egiteko edozein bide balia daiteke, ziurtatua gelditzen bada eskatzailearen nortasuna, bai eta harremanetarako helbide bat ere, ahal dela elektronikoa, eskatzailearen eta Parlamentuaren arteko komunikazioetarako.

2. Parlamentuaren Gardentasun Atariak eskuratzeko eskubidea baliatzea ahalbidetu behar du, formulario elektroniko erraz eta guztiz eskuragarri baten bidez.

3. Parlamentuko Mahaiak arautuko ditu eskuratzeko eskubidea baliatzeko baldintzak eta eskaerak ebazteko erabiliko den prozedura. Arauketa horretarako kontuan hartuko dira a gardentasunari, informazio publikoa eskuratzeari eta gobernu onari buruzko legerian ezarritako printzipio eta arauak.

255. artikulua. Ebazpena.

1. Parlamentuak hilabeteko epean emanen du eskatutako informazioa, hura eskatzeko erabili den formatuan. Eskatutako informazioaren bolumenak edo konplexutasunak hala behartzen dutenean, eta aldez aurretik eskatzaileari jakinarazita, epe hori beste hilabete batez luzatu ahalko da.

2. Ebazpen arrazoituak izan beharko dira eskuratzea ukatzekoak, eskuratze partziala edo eskatutakoaz gaineko beste modu baten bidezkoa egitekoa ematen dutenak eta eskuratzea ematen dutenak hirugarren bat aurka egon denean.

3. Ebazpena emateko gehieneko epea iraganik berariaz ebazpena eman eta jakinarazi gabe, eskaera onetsi egin dela ulertuko da, non eta ez duen lege mailako arau batek espresuki ezartzen osorik edo partzialki ezetsi behar dela, informazio jakin bati dagokionez.

4. Eskuratzeko eskubidea ezin da inola ere isiltasunaren bidez lortu erregelamendu honetan edo beste lege batzuetan informazio publikoa eskuratzeko ezartzen diren mugetako bat gertatzen denean.

5. Informazio publikoa eskuratzea ebazteko epea luzatu edo eten daiteke gardentasunari, informazio publikoa eskuratzeko bideari eta gobernu onari buruzko legerian ezarritako kasuetan.

Lehen Xedapen Gehigarria .Nafarroako Parlamentuaren aurrekontuzuzkidurak.

Nafarroako Parlamentuaren aurrekontu-zuzkidurak aldian-aldian ordainduko dira Legebiltzarreko Mahaiaren eskariz, eta haien igorpena irmoa izanen da.

Bigarren Xedapen Gehigarria .Nafarroako Parlamentuaren gaitasun juridikoa eta ordezkariak.

1. Nafarroako Parlamentuak gaitasun juridiko osoa izanen du, Konstituzioari eta ordenamendu juridikoaren gainerakoari loturik.

2. Aurreko apartatuan aurreikusitako ondorioetarako, Parlamentuko lehendakariak dauka Legebiltzarraren ordezkaritza.

Hirugarren Xedapen Gehigarria .Nafarroako Parlamentuko Langileen Estatutua.

1. Parlamentuaren zerbitzuko langileen eskubideak, betebeharrak, egoerak, eginkizunak eta eskumenak Nafarroako Parlamentuko langileen estatutuan ezarritakoak izanen dira. Estatutu hori foru lege baten indarra duen xedapen baten bitartez onetsiko da.

2. Erregelamenduko Batzordeari dagokio aipatu langileen estatutua onartzea, erabateko legegintza-eskumenez.

Laugarren Xedapen Gehigarria .Foru parlamentarien kopurua zenbatzea.

Erregelamendu honetako artikuluek aipatzen dituzten foru parlamentari kopuruak zenbatzeari dagokionez, 0,5 edo hori baino gehiagoko zatiak goitik biribilduko dira, eta gainontzekoak behetik.

Bosgarren Xedapen Gehigarria .Hizkera inklusiboa erabiltzea.

Nafarroako Parlamentuaren komunikazio, adierazpen eta lanetan hizkera inklusiboaren erabilera zainduko da.

Seigarren Xedapen Gehigarria .Erregelamenduaren erreformak.

1. Erregelamendu hau aldatzeko ekimena egikaritzeko, proposamen bat aurkeztuko da, VI. tituluko II. kapituluaren 2. atalean ezarritakoaren arabera formulatu eta izapidetuko dena, baina Nafarroako Gobernuak parte hartu gabe.

2. Aipatu proposamenei buruzko irizpena emateko eskumena Erregelamenduko Batzordeak izanen du.

3. Hori onesteko, Parlamentuko kideen gehiengo osoak emandako aldeko botoa beharko da, Osoko Bilkurak onetsitako testu osoari buruzko azken bozketa batean.

Xedapen Indargabetzaile Bakarra

Indarrik gabe geldituko dira Nafarroako Parlamentuko Erregelamenduaren testu bategin honetan xedatutakoaren kontra dauden xedapen guztiak; eta, berariaz, honako hauek:

a) Nafarroako Parlamentuko Erregelamenduaren testu bategina, Mahaiak 2011ko irailaren 12an hartutako Erabakiaren bidez onetsia.

b) Nafarroako Parlamentuak onetsitako lege proposamenak Diputatuen Kongresuan defenditu behar dituzten foru parlamentariak hautatzeko arauak, Konstituzioaren 87.2 artikuluan aurreikusia.

c) Lehendakaritzaren ebazpena, 2007ko ekainaren 22koa, talde parlamentario mistoaren funtzionamendua eta antolamendua arautzen dituena.

d) Lehendakariaren ebazpena, 2008ko maiatzaren 12koa, foru-lege proiektu edo proposamenetan batzordeek egiten dituzten irizpen negatiboei buruzkoa.

e) Lehendakariaren ebazpena, 2009ko azaroaren 9koa, Europar Batasunaren arau-proiektuetan subsidiaritatearen printzipioa kontrolatzeko prozedura arautzen duena.

f) Nafarroako Parlamentuko Mahaiak, Eledunen Batzarrarekin bat, 2010eko otsailaren 15teko bilkuran onetsitako araua, Kontuen Ganberako lehendakaria hautatzeko prozeduran egon daitezkeen berdinketak ebaztekoa.

g) Lehendakaritzaren 14/2016 ebazpena, apirilaren 11koa, zeinaren bitartez aldatzen baita Lehendakaritzaren 2014ko martxoaren 24ko Ebazpena, Parlamentuko batzordeetako bilkura arruntetako eta lan-bilkuretako agerraldiak bertan behera urgentziaz uzteari buruzkoa.

Azken Xedapen Bakarra .Indarra hartzea.

Erregelamendu hau Nafarroako Parlamentuko Aldizkari Ofizialean eta Nafarroako Aldizkari Ofizialean ere argitaratuko da, eta onetsi ondoko legegintzaldiko Nafarroako Parlamenturako hauteskundeak izan eta hurrengo egunean hartuko du indarra.

Iragarkiaren kodea: F2304930

Gobierno de Navarra

Contacte con nosotros | Accesibilidad | Aviso legal | Mapa web