(ir al contenido)

navarra.es

Castellano | Euskara | Français | English

LEXNAVARRA


Versión para imprimir

Versión en castellano

259/2019 FORU DEKRETUA, URRIAREN 30EKOA, LEHENDAKARITZAKO, BERDINTASUNEKO, FUNTZIO PUBLIKOKO ETA BARNEKO DEPARTAMENTUAREN EGITURA ORGANIKOA EZARTZEN DUENA Nota de Vigencia-Nota de Vigencia

BON N.º 220 - 07/11/2019



  I. KAPITULUA. XEDAPEN OROKORRAK


  II. KAPITULUA. LEHENDAKARITZAKO ETA GOBERNU IREKIKO ZUZENDARITZA NAGUSIA

  1. ATALA. ESKUMENEN ESPARRU MATERIALA ETA EGITURA

  2. ATALA. AHOLKULARITZA JURIDIKOAREN ZERBITZUA

  3. ATALA. GOBERNUAREN IDAZKARITZAKO ETA ARAUGINTZAKO ZERBITZUA

  4. ATALA. GOBERNU IREKIAREN ETA HERRITARRENTZAKO ARRETAREN ZERBITZUA

  5. ATALA. NAFARROAKO ALDIZKARI OFIZIALAREN ATALA

  6. ATALA. NAFARROAKO GOBERNUKO DATUAK BABESTEKO ORDEZKARITZA

  7. ATALA. ADMINISTRAZIOA BERRITZEKO ETA MODERNIZATZEKO ATALA


  III. KAPITULUA. FUNTZIO PUBLIKOKO ZUZENDARITZA NAGUSIA

  1. ATALA. ESKUMENEN ESPARRU MATERIALA ETA EGITURA

  2. ATALA. LANGILERIAREN GASTUAREN KONTROLAREN ETA NOMINEN ZERBITZUA

  3. ATALA. LANGILERIAREN KUDEAKETAKO ZERBITZUA

  4. ATALA. FUNTZIO PUBLIKOAREN ANTOLAMENDUKO ZERBITZUA

  5. ATALA. LAN HARREMANEN ETA PRESTAZIO SOZIALEN ZERBITZUA

  6. ATALA. EGITURAREN, LANPOSTUEN ANTOLAKETAREN ETA LANGILEEN PLANTILLAREN ZERBITZUA


  IV. KAPITULUA. BARNE ZUZENDARITZA NAGUSIA

  1. ATALA. ESKUMENEN ESPARRU MATERIALA ETA EGITURA

  2. ATALA. SEGURTASUN POLITIKAK GARATZEKO ZERBITZUA

  3. ATALA. BARNEKO ARAUBIDE JURIDIKOAREN ZERBITZUA

  4. ATALA. NAFARROAKO SUHILTZAILEEN ZERBITZUA

  5. ATALA. BABES ZIBILEKO ETA LARRIALDIETAKO ZERBITZUA


  V. KAPITULUA. KOMUNIKAZIOKO ETA ERAKUNDEEKIKO HARREMANETAKO ZUZENDARITZA NAGUSIA

  1. ATALA. ESKUMENEN ESPARRU MATERIALA ETA EGITURA

  2. ATALA. KOMUNIKAZIO ZERBITZUA GOBERNUAREN ELEDUNAREN BULEGOA

  3. ATALA. PROIEKZIO INSTITUZIONALAREN ZERBITZUA


  VI. KAPITULUA. LEHENDAKARITZAKO, BERDINTASUNEKO, FUNTZIO PUBLIKOKO ETA BARNEKO DEPARTAMENTUKO IDAZKARITZA TEKNIKO NAGUSIA.


  VII. KAPITULUA. NAFARROAKO ADMINISTRAZIO AUZITEGIA


Atarikoa

Nafarroako Foru Komunitateko Lehendakariaren abuztuaren 6ko 22/2019 Foru Dekretuaren bidez, Nafarroako Foru Komunitateko Administrazioaren departamentuen egitura eta departamentu bakoitzaren eskumenen esparrua ezarri ziren.

Halaber, abuztuaren 14ko 85/2019 Foru Dekretuaren bidez, Lehendakaritzako, Berdintasuneko, Funtzio Publikoko eta Barneko Departamentuaren oinarrizko egitura ezarri zen, galarazi gabe gero garatu ahal izatea.

Lehendakaritzako, Berdintasuneko, Funtzio Publikoko eta Barneko Departamentuaren egitura organiko berria finkatu eta garatzea du xede foru dekretu honek.

Horrenbestez, Lehendakaritzako, Berdintasuneko, Funtzio Publikoko eta Barneko kontseilariak proposaturik, eta Nafarroako Gobernuak bi mila eta hemeretziko urriaren hogeita hamarrean egindako bilkuran harturiko erabakiarekin bat,

DEKRETATZEN DUT:

I. KAPITULUA. XEDAPEN OROKORRAK

1. artikulua . Lehendakaritzako, Berdintasuneko, Funtzio Publikoko eta Barneko Departamentuaren eskumenen esparrua.

1. Lehendakaritzako, Berdintasuneko, Funtzio Publikoko eta Barneko Departamentuari dagozkio Nafarroako Foru Komunitateko Administrazioak ondotik zehazten diren arloetan esleituak dituen eskumenak:

-Gobernuko lehendakariari eta Idazkaritzari laguntzea.

-Erregistro Orokorra.

-Departamentuen arteko politiken koordinazioa eta departamentuen arteko koordinazio juridiko eta administratiboa.

-Nafarroako Aldizkari Ofiziala.

-Aholkularitza juridikoa eta Foru Komunitatearen ordezkaritza eta defentsa epaiketetan.

-Foru Zuzenbide Zibila.

-Gobernu Irekia eta gardentasuna koordinatzea eta sustatzea.

-Hauteskunde prozesuak.

-Nafarroako Gobernuaren politika proposatzea eta gauzatzea funtzio publikoari dagokionez, barnean dela Nafarroako Administrazio Publikoen zerbitzuko langileen prestakuntza.

-Segurtasun publikoa: herritarren segurtasuna, trafiko eta zirkulazioko polizia, bide segurtasuna, babes zibila eta larrialdietarako laguntza, su-itzaltzea eta salbamendua; jokoa eta ikuskizunak.

-Gizonen eta emakumeen arteko berdintasun politikak.

-LGTBI+ pertsonen berdintasun sozialeko politikak.

-Azterketa estrategikoak.

-Herritarren parte-hartzerako politikak.

-Parlamentuarekiko eta Foru Komunitateko, autonomia erkidegoetako eta estatuko beste erakunde batzuekiko harremanak.

-Nafarroako Gobernuaren irudi instituzionala babestea, garatzea eta sustatzea.

-Informazio-politikaren koordinazioa.

-Herritarrentzako arreta.

-Hedabide sozialak; Nafarroako Gobernuaren presentzia Interneten eta sare sozialetan.

-Gazteek gizartean aktiboki parte hartzea ahalbidetuko duten zeharkako politikak garatzea, eta gazteen topaketa, sormena eta ekintzailetza erraztuko duten politikak sustatzea.

- Boluntariotzako politika koordinatzea Nota de Vigencia

2. Indarra duten xedapenek ematen dizkioten gainerako eskudantziak.

2. artikulua . Lehendakaritzako, Berdintasuneko, Funtzio Publikoko eta Barneko Departamentuko kontseilaria.

1. Lehendakaritzako, Berdintasuneko, Funtzio Publikoko eta Barneko Departamentuko kontseilariari, departamentuaren titularra den aldetik, foru dekretu honen 1. artikuluan zehazten den eskumenen esparruari dagokionez, Nafarroako Gobernuari eta Lehendakariari buruzko abenduaren 3ko 14/2004 Foru Legeko 41. artikuluan ezartzen diren eskudantziak dagozkio.

2. Bereziki, eskudantzia hauek erabiltzea dagokio:

–Nafarroako Gobernuko idazkariari dagozkionak, Gobernuak hartutako erabakien ziurtapena barne, Nafarroako Gobernuari eta Lehendakariari buruzko abenduaren 3ko 14/2004 Foru Legearen 13. artikuluan ezarritakoarekin bat.

–Nafarroako Foru Komunitateko Administrazioaren eta haren erakunde autonomoen organoetako langileen arloko eskudantziak zehazten dituen foru dekretuak esleitzen dizkionak Nota de Vigencia.

3. Orobat, Lehendakaritzako, Berdintasuneko, Funtzio Publikoko eta Barneko kontseilariaren zeregina da, departamentuaren titularra den aldetik, kide anitzeko organo hauetako buru izatea:

-Nafarroako Gobernuko Koordinazio Batzordea.

-Laneko Segurtasuna eta Osasuna Koordinatzeko Batzordea.

-Nafarroako Babes Zibilerako Batzordea.

-Nafarroako Udaltzaingoak Koordinatzeko Batzordea.

-Bide Segurtasunaren Batzordea.

-Nafarroako Polizien Kontseilua.

-Ebaluazioko Foru Batzordea.

-Nafarroako Foru Zuzenbide Zibilaren Aholku Kontseilua.

-Nafarroako Herritarren Segurtasunerako Kontseilua.

-Nafarroako Jokoaren Kontseilua.

-Gardentasunerako eta Gobernu Irekirako Departamentuarteko Batzordea.

-Irisgarritasun Unibertsalaren eta Aukera-berdintasunaren Sustapenerako Kontseilua.

-Nafarroako Berdintasunerako Kontseilua.

-Nafarroako LGTBI+ Kontseilua.

-Herritarren Parte-hartzerako Nafarroako Kontseilua.

4. Lehendakaritzako, Berdintasuneko, Funtzio Publikoko eta Barneko kontseilariari sostengu politiko eta teknikoa emateko unitate gisa, departamentuan kontseilariaren Kabinetea dago, Nafarroako Gobernuari eta Lehendakariari buruzko abenduaren 3ko 14/2004 Foru Legearen 19. artikuluari lotua dagoena, zuzenean haren mende.

3. artikulua . Lehendakaritzako, Berdintasuneko, Funtzio Publikoko eta Barneko Departamentuaren antolaketa orokorra.

1. Lehendakaritzako, Berdintasuneko, Funtzio Publikoko eta Barneko Departamentuak, bere titularraren goi zuzendaritzapean, honako organo hauek ditu bere egituran:

a) Lehendakaritzako eta Gobernu Irekiko Zuzendaritza Nagusia

b) Funtzio Publikoko Zuzendaritza Nagusia.

c) Barne Zuzendaritza Nagusia.

d) Komunikazioko eta Erakundeekiko Harremanetako Zuzendaritza Nagusia.

e) Nafarroako Berdintasunerako Institutua.

f) Nafarroako Gazteriaren Institutua.

g) Departamentuko Idazkaritza Tekniko Nagusia.

h) Nafarroako Administrazio Auzitegia.

2. Nafarroako Administrazio Publikoaren Institutua erakunde autonomoa Funtzio Publikoko Zuzendaritza Nagusiari atxikita egonen da eta bere estatutuen arabera arautuko da.

3. Nafarroako Segurtasun eta Larrialdi Eskola Nafarroako Administrazio Publikoaren Institutuari atxikirik egonen da eta bere funtzionamendurako erregelamenduaren arabera gobernatuko da, irailaren 12ko 113/2005 Foru Dekretuaren bidez onetsi baitzen.

4. Unibertsitateko, Berrikuntzako eta Eraldaketa Digitaleko Departamentuko Eraldaketa Digitaleko Zuzendaritza Nagusiko Antolaketa, Ebaluazio eta Kalitate Atala Egituraren, Lanpostuen Antolaketaren eta Langile Plantillaren Zerbitzuari atxikita egonen da, Langileen Antolaketaren eta Presentziaren Kudeaketaren Atal gisa, foru dekretu honetan zehazten diren eskumenekin.

5. Nafarroako Foruzaingoa Lehendakaritzako, Berdintasuneko, Funtzio Publikoko eta Barneko Departamentuan kokaturik dago, Barne Zuzendaritza Nagusiari atxikirik. Nafarroako Segurtasun Publikoari buruzko ekainaren 20ko 8/2006 Foru Legeak eta Nafarroako Poliziei buruzko azaroaren 19ko 23/2018 Foru Legeak ematen dizkioten eginkizunak burutuko ditu eta haren berariazko arautegian ezartzen den egitura izanen du.

4. artikulua . Zuzendaritza nagusien eskudantziak.

Foru dekretu honen 2.2. artikuluan ezarritakoa galarazi gabe, Lehendakaritzako, Berdintasuneko, Funtzio Publikoko eta Barneko Departamentuko zuzendaritza nagusiei dagokie, departamentuko titularraren goi zuzendaritzapean eta foru dekretu honetan bakoitzari esleitutako esparruan, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluan eta azken xedapenetako lehenbizikoan ezarritako eskudantziak erabiltzea eta, horietaz gainera, indarrean dauden xedapenek esleitzen dieten edo departamentuko titularrak agintzen dien beste edozein.

5. artikulua . Idazkaritza Tekniko Nagusiaren eskudantziak.

Lehendakaritzako, Berdintasuneko, Funtzio Publikoko eta Barneko Departamentuko Idazkaritza Tekniko Nagusiak, foru dekretu honen 1. artikuluan zehaztu diren eskumenen esparruan, eta Lehendakaritzako, Berdintasuneko, Funtzio Publikoko eta Barneko kontseilariaren goi zuzendaritzapean -berari atxikita baitago zuzenean-, Nafarroako Foru Komunitateko Administrazioari buruzko martxoaren 11ko 11/2019 Foru Legearen 33. artikuluan aurreikusitako eskudantziak eta Idazkaritza Tekniko Nagusiak arautzen dituen Erregelamenduan ezarritakoak erabiliko ditu, baita indarra duten xedapenek emandakoak edota Lehendakaritzako, Berdintasuneko, Funtzio Publikoko eta Barneko kontseilariak agintzen dizkion guztiak ere, eta horretarako behar diren ebazpenak emanen ditu.

Idazkaritza Tekniko Nagusiaren ardura izanen da genero ikuspegiaren zeharkakotasuna aplikatzea Departamentuko politikak planifikatu, kudeatu eta ebaluatzean, bat etorrita Emakumeen eta Gizonen arteko Berdintasunari buruzko apirilaren 4ko 17/2019 Foru Legearekin.

6. artikulua . Zerbitzuen eskudantziak.

Zerbitzuek, departamentuko goragoko organoen zuzendaritzapean eta foru dekretu honetan bakoitzari esleitutako esparru material eta funtzionalean, eginkizun hauek izanen dituzte: beren menpeko atalak edo unitate organikoak planifikatu, koordinatu, zuzendu eta kontrolatzea; prozedurak arindu, arrazionalizatu eta errazteko printzipioak bultzatu eta sustatzea; indarra duten xedapenek berariaz esleitzen dizkietenak eta departamentuko organo eskudunek banatzen edo eskuordetzen dizkietenak.

7. artikulua . Atalen eskudantziak.

Atalei dagozkie, departamentuko goragoko organoek zuzendurik, kasuan kasuko esparru materialean, mendeko dituzten bulego edo unitateen jarduerak bete, haiei buruz txostenak eman eta proposatzeko eginkizunak, koordinatu, zuzendu eta kontrolatzekoak, eta departamentuko organo eskudunek esleitzen dizkietenak.

II. KAPITULUA. LEHENDAKARITZAKO ETA GOBERNU IREKIKO ZUZENDARITZA NAGUSIA

1. ATALA. ESKUMENEN ESPARRU MATERIALA ETA EGITURA

8. artikulua . Lehendakaritzako eta Gobernu Irekiko Zuzendaritza Nagusiaren eskumenen esparru materiala.

Lehendakaritzako eta Gobernu Irekiko Zuzendaritza Nagusiak foru dekretu honetan aipatzen diren eskudantziak izanen ditu arlo hauetan:

a) Lehendakaritzari laguntzea.

b) Gobernuari eta Koordinazio Batzordeari laguntzea.

c) Gobernuaren Idazkaritza, Nafarroako Gobernuari eta Lehendakariari buruzko abenduaren 3ko 14/2004 Foru Legearen 17. artikuluan aurreikusitako eskumenak erabiliz.

d) Departamentuen arteko koordinazio juridikoa eta administratiboa.

e) Araugintza teknikaren gidalerroak prestatzea eta araugintza ebaluazioa sustatzea.

f) Dokumentuak Estatuko Aldizkari Ofizialera igortzea.

g) Foru zuzenbide zibila eta Nafarroako zuzenbidea oro har sustatzea.

h) Koordinazio Batzordearen eremuan kudeaketa prozedurak eta jarduera materialak arrazionalizatzea, sinplifikatzea eta arintzea.

i) Nafarroako elkarteak, fundazioak, lanbide elkargoak eta lanbide elkargoetako kontseiluak erregistratzea eta haien araubideaz arduratzea.

j) Nafarroako Parlamentuaren eta Arartekoaren jardueraren ondoriozko dokumentazioa eta prozedurak kudeatu eta tramitatzea.

k) Nafarroako Foru Komunitateko Administrazioaren Hitzarmen eta Akordioen Erregistroa.

l) Lankidetza Batzordeari eta Transferentzia Batzordeari sostengua ematea.

m) Nafarroako Foru Komunitateko Administrazioari eta haren mendeko erakunde publikoei aholku juridikoak ematea, eta haiek ordezkatu eta defendatzea epaiketetan.

n) Ondorioak atzerrian sortu behar dituzten dokumentuetan Nafarroako Foru Komunitateko Administrazioko agintari eta funtzionarioen sinadurak legeztatzea.

ñ) Nafarroako Gobernuko Datuak Babesteko ordezkariaren eginkizunak.

o) Gobernu Irekia bultzatzea eta koordinatzea.

p) Nafarroako Gobernuaren datu publikoak irekitzeko prozesua zuzendu eta bultzatzea, eta berrerabilera erraztea.

q) Nafarroako toki entitateekin elkarlanean aritzea gobernu irekiko politikak ezartzen eta hedatzen.

r) Erregistro Orokorra.

s) Nafarroako Gobernuaren eta Nafarroako Foru Komunitateko Administrazioaren presentzia Interneten Nota de Vigencia.

t) Herritarrentzako arreta koordinatzea.

u) Nafarroako Foru Komunitateko Administrazioaren prozeduren katalogoa edo inbentarioa Nota de Vigencia.

v) Nafarroako Aldizkari Ofiziala.

w) Nafarroako Foru Komunitatearen menpeko hauteskundeak.

x) Nafarroako Foru Komunitateko Administrazioaren eta foru-sektore publiko instituzionalaren webguneen eta gailu mugikorren aplikazioen irisgarritasuneko unitate arduradunak bete beharreko eginkizunak.

y) Indarra duten xedapenek Lehendakaritzako, Berdintasuneko, Funtzio Publikoko eta Barneko Departamentuari esleitzen dizkiotenak, zuzendaritza nagusiak bere duen esparruan Nota de Vigencia.

z) Indarra duten xedapenek Lehendakaritzako, Berdintasuneko, Funtzio Publikoko eta Barneko Departamentuari esleitzen dizkioten gainerakoak, zuzendaritza nagusiak bere duen esparruan Nota de Vigencia.

9. artikulua . Lehendakaritzako eta Gobernu Irekiko Zuzendaritza Nagusiaren egitura.

1. Lehendakaritzako eta Gobernu Irekiko Zuzendaritza Nagusiak zerbitzu hauek ditu bere egituran:

a) Aholkularitza Juridikoaren Zerbitzua.

b) Gobernuaren Idazkaritzako eta Araugintzako Zerbitzua.

c) Gobernu Irekiaren eta Herritarrentzako Arretaren Zerbitzua.

d) Nafarroako Aldizkari Ofizialaren Atala.

e) Administrazioa Berritzeko eta Modernizatzeko Atala.

2. Lehendakaritzako eta Gobernu Irekiko Zuzendaritza Nagusiak Nafarroako Gobernuko Datuak Babesteko Ordezkaritza izanen du, zerbitzuaren maila izanen duena. Horren titularra Nafarroako Gobernuko Datuak Babesteko ordezkari izendatuko da eta Europako Parlamentuaren eta Kontseiluaren 2016ko apirilaren 27ko 2016/679 (EE) Erregelamenduak datuak babesteko ordezkariarentzat ezarritako eginkizunak beteko ditu (95/46/EE Zuzentaraua, Datuak babesteko Erregelamendu Orokorra, indargabetzen duena), bai eta ere Datu Pertsonalak Babesteari eta Eskubide digitalak Bermatzeari buruzko 3/2018 Lege Organikoan, abenduaren 5ekoan, eta lege horiek garatzen dituen araudian ezarritakoak.

2. ATALA. AHOLKULARITZA JURIDIKOAREN ZERBITZUA

10. artikulua . Aholkularitza Juridikoaren Zerbitzuaren esparru material eta funtzionala.

1. Aholkularitza Juridikoaren Zerbitzuak foru dekretu honetan arlo hauen gainean adierazten diren eginkizunak izanen ditu:

a) Foru Komunitateko Administrazioari eta haren mendeko erakunde publikoei aholku juridikoak ematea, eta haiek ordezkatu eta defendatzea epaiketetan haren ordena jurisdikzional guztietan.

b) Nafarroako Ondareko ondasun eta eskubideen ordezkaritza eta defentsa epaiketetan.

c) Lehendakaritzako, Berdintasuneko, Funtzio Publikoko eta Barneko Departamentuko kontseilariak aldez aurretik baimenduta, Nafarroako Foru Komunitateko Administrazioko agintari, funtzionario eta langileen ordezkaritza eta defentsa epaiketetan, edozein delarik haien egoera prozesuan, prozedurak karguari loturiko egite edo ez-egiteengatik burutzen direnean.

d) Nafarroako Foru Komunitateko Administrazioak zaindu eta tutelatzen dituen adingabeen ordezkaritza eta defentsa epaiketetan, ordena zibilean zein penalean, Haurrentzako eta Nerabeentzako Sustapenari, Laguntzari eta Babesari buruzko abenduaren 5eko 15/2005 Foru Legearen 60.10 eta 65.4 artikuluekin bat.

e) Bidezko diren errekurtsoak paratzea ordena jurisdikzionalen ebazpenen kontra, Foru Komunitatearen interesen kontra jotzen dutenean.

f) Interes orokorrerako komenigarria izan daitekeelarik eta indarra duten legeekin bat, amore ematea, transakzioak egitea edo bertan behera uztea.

g) Departamentuei eta erakunde autonomoei aholkularitza juridikoa ematea, epaileen ebazpenak betetzeari dagokionez, kasuan kasuko ordena jurisdikzionalean.

h) Nafarroako Foru Komunitateko Administrazioa Lankidetza Batzordean ordezkatzen dutenei aholkularitza juridiko eta administratiboa ematea eta aholkularitza juridikoa bestelako bitariko organo edo batzordeetan ere bai, hala agintzen zaionean.

i) Revista Jurídica de Navarra aldizkaria kudeatzea.

j) Urtarrilaren 5eko 4/1984 Foru Dekretuak ematen dizkion besteak eta indarra duten legezko xedapenek ematen dizkiotenak.

2. Aholkularitza Juridikoaren Zerbitzua Nafarroako Foru Komunitateko Administrazioaren eta haren erakunde autonomoen zentro aholku-emaile gorena da, departamentuetako idazkaritza tekniko nagusiei esleituriko eginkizunak eta Nafarroako Kontseiluari esleituriko eginkizun bereziak deusetan galarazi gabe. Aholkularitza Juridikoak aholkuak emanen ditu Nafarroako Gobernuak, lehendakariak edo Lehendakaritzako, Berdintasuneko, Funtzio Publikoko eta Barneko kontseilariak hala eskatzen dutenean.

3. Halaber, Aholkularitza Juridikoaren Zerbitzuari dagokio Nafarroako Foru Komunitateko edozein organo exekutibo Konstituzio Auzitegian ordezkatu eta defendatzea.

11. artikulua . Aholkularitza Juridikoaren Zerbitzuaren egitura.

Aholkularitza Juridikoaren Zerbitzuak atal hauek ditu bere egituran:

a) Administrazioarekiko Auzien Atala.

b) Zerga Aferen Atala.

c) Afera Zibilen Atala.

d) Afera Penalen Atala.

e) Lan arloko Aferen Atala.

f) Kudeaketa Administratiboaren Atala.

12. artikulua . Administrazioarekiko Auzien Atalaren esparru material eta funtzionala.

Administrazioarekiko Auzien Atalak, administrazioarekiko auzien arloari dagokionez, Aholkularitza Juridikoaren Zerbitzuaren aholkularitza eta auziei dagozkien eginkizunak beteko ditu, eta zerbitzuko zuzendariari lagunduko dio bere eginkizunetan eta aholkulari juridikoen lanak eta esparru horretan zerbitzuaren kudeaketa administratiboarekin koordinatzen, salbu eta tributu arloan eta bere berezitasunagatik zerbitzuko zuzendariak beste atal bati esleitzen dizkion arloetan.

13. artikulua . Zerga Aferen Atalaren esparru material eta funtzionala.

Zerga Aferen Atalak Aholkularitza Juridikoaren Zerbitzuaren aholkularitza eta auziei dagozkien eginkizunak beteko ditu tributuen arloari dagokionez; orobat, zerbitzuko zuzendariari laguntza emanen dio bere eginkizunetan eta aholkulari juridikoen lanak zerbitzuaren kudeaketa administratiboarekin koordinatzen, arlo horretan nahiz zerbitzuko zuzendariak esleitzen dizkion beste arloetan.

14. artikulua . Afera Zibilen Atalaren esparru material eta funtzionala.

Afera Zibilen Atalak, ordena jurisdikzional zibilari dagokionez, Aholkularitza Juridikoaren Zerbitzuaren aholkularitza eta auziei dagozkien eginkizunak beteko ditu eta zerbitzuko zuzendariari lagunduko dio bere eginkizunetan eta aholkulari juridikoen lanak eta esparru horretan zerbitzuaren kudeaketa administratiboarekin koordinatzen, edo zerbitzuko zuzendariak esleitzen dizkion arloetan.

15. artikulua . Afera Penalen Atalaren esparru material eta funtzionala.

Afera Penalen Atalak, ordena jurisdikzional penalari dagokionez, Aholkularitza Juridikoaren Zerbitzuaren aholkularitza eta auziei dagozkien eginkizunak beteko ditu eta zerbitzuko zuzendariari lagunduko dio bere eginkizunetan eta aholkulari juridikoen lanak eta esparru horretan zerbitzuaren kudeaketa administratiboarekin koordinatzen, edo zuzendariak esleitzen dizkion arloetan.

16. artikulua . Lan arloko Aferen Atalaren esparru material eta funtzionala.

Lan arloko Aferen Atalak, laneko ordena jurisdikzionalari dagokionez, Aholkularitza Juridikoaren Zerbitzuaren aholkularitza eta auziei dagozkien eginkizunak beteko ditu eta zerbitzuko zuzendariari lagunduko dio bere eginkizunetan eta aholkulari juridikoen lanak eta esparru horietan zerbitzuaren kudeaketa administratiboarekin koordinatzen, edo zuzendariak esleitzen dizkion arloetan.

17. artikulua . Kudeaketa Administratiboaren Atalaren esparru material eta funtzionala.

Kudeaketa Administratiboaren Atalak foru dekretu honetan esleitzen zaizkion eginkizunak beteko ditu kudeaketa tekniko-administratiboaren arloan, zerbitzuari emandako eginbeharrei dagokienez. Halaber, gaikuntza ematen zaio atalburutzako titularrari Nafarroako Gobernuko Aholkularitza Juridikoaren izenean idatziak bidali, jakinarazpenak jaso eta gainerako eginbideak betetzeko, edozein epaitegi edo auzitegitan.

3. ATALA. GOBERNUAREN IDAZKARITZAKO ETA ARAUGINTZAKO ZERBITZUA

18. artikulua . Gobernuaren Idazkaritzako eta Araugintzako Zerbitzuaren esparru material eta funtzionala.

Gobernuaren Idazkaritzako eta Araugintzako Zerbitzuak Nafarroako Gobernuari eta Lehendakariari buruzko abenduaren 3ko 14/2004 Foru Legearen 17. artikuluan Gobernuaren Idazkaritzarako aurreikusitako eginkizunak beteko ditu eta, horrez gain, foru dekretu honetan aurreikusitakoak, ondoko gaiei dagokienez:

a) Lehendakaritzari laguntzea.

b) Nafarroako Kontseiluaren espedienteen tramitazioan laguntzea.

c) Gobernuaren bilkuretako gai zerrenda prestatzea eta bilkura horien ondorioz egin beharreko jarduketa guztiak kudeatzea.

d) Koordinazio Batzordearen aferei jarraipena egitea eta eguneko gai zerrenda prestatzea.

e) Dokumentuak Estatuko Aldizkari Ofizialera igortzea.

f) Mezularitzako zerbitzu zentralizatuak.

g) Talde administratiboa eta mandatari zerbitzua koordinatzea.

h) Elkarteen, Fundazioen eta Lanbide Elkargoen Erregistroa eta araubidea.

i) Nafarroako Foru Komunitateko Administrazioaren Hitzarmen eta Akordioen Erregistroa.

j) Koordinazio Batzordeari sostengua ematea.

k) Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean aurreikusitako prozedura administratiboen inbentarioa eta Nafarroako Foru Komunitateko Administrazioko kide anitzeko organoen inbentarioaren jarraipena eta koordinazioa.

l) Departamentuen arteko koordinazio juridikoa eta administratiboa.

m) Koordinazio Batzordearen eremuan kudeaketa prozedurak eta jarduera materialak arrazionalizatzea, sinplifikatzea eta arintzea.

n) Arauen prestaketa koordinatzea, planifikatzea eta kudeaketa prozedurak bultzatzea.

ñ) Nafarroako Foru Komunitatea Transferentzia Batzordean ordezkatzen dutenei laguntza administratiboa ematea.

o) Parlamentuaren eta Arartekoaren jardueraren ondoriozko dokumentazioa eta prozedurak kudeatu eta tramitatzea.

p) Herritarrentzat interesgarriak diren estatistikak prestatzea, Nafarroako Parlamentuari, Foru Komunitateko Arartekoari eta beste foru erakunde batzuei buruz.

q) Nafarroako Parlamentuaren eta Foru Komunitateko Administrazioko departamentuen arteko harremanen ondoriozko espedienteak eta dokumentazioa artxibatzea eta kontrolatzea.

r) Araugintzako teknikaren jarraibideak prestatzea eta, bereziki, xedapen orokorren aurreproiektuen eta proiektuen arau-kalitatearen gaineko jarraipena egitea, Administrazioko departamentuekin koordinatuta, behar denean.

s) Foru Komunitateko Administrazioarentzat interes komuna duten xedapen orokorren aurreproiektuak eta proiektuak prestatzea, Administrazioko departamentuekin koordinatuta, behar denean.

t) Foru Zuzenbide Zibila eta Nafarroako zuzenbidea oro har sustatzea.

u) Lehendakaritzako eta Gobernu Irekiko Zuzendaritza Nagusiaren eskumenen esparru materialarekin lotutako beste edozein eginkizun, agintzen zaiona.

19. artikulua . Gobernuaren Idazkaritzako eta Araugintzako Zerbitzuaren egitura.

Gobernuaren Idazkaritzako eta Araugintzako Zerbitzuak atal hauek ditu bere egituran:

a) Gobernuaren Idazkaritza Atala.

b) Koordinazio Atala.

c) Foru Erakundeekiko Prozeduren Kudeaketarako Atala.

20. artikulua . Gobernuaren Idazkaritza Atalaren esparru material eta funtzionala.

Gobernuko Idazkaritzaren Atalak Nafarroako Gobernuari eta Lehendakariari buruzko abenduaren 3ko 14/2004 Foru Legearen 17. artikuluan eta foru dekretu honetan aurreikusitako eginkizunak beteko ditu, foru dekretu honen 18. artikuluaren a), b), c), d), e), f) eta g) letretan zerrendatutako gaiei dagokienez, eta zerbitzuko zuzendariari lagunduko dio bere eginkizunak betetzen.

21. artikulua . Koordinazio Atalaren esparru material eta funtzionala.

Koordinazio Atalak foru dekretu honen 18. artikuluko h), i), j), k), l), m), n), ñ), r), s) eta t) letretan aipatzen diren arloei dagokienez ezartzen diren eginkizunak beteko ditu eta zerbitzuko zuzendariari lagunduko dio bere eginkizunetan.

22. artikulua . Foru Erakundeekiko Prozeduren Kudeaketarako Atalaren esparrua material eta funtzionala.

Foru Erakundeekiko Prozeduren Kudeaketarako Atalak foru dekretu honen 18. artikuluko o), p) eta q) letretan aipatzen diren arloei dagokienez ezartzen diren eginkizunak beteko ditu eta zerbitzuko zuzendariari laguntza emanen dio bere eginkizunetan.

4. ATALA. GOBERNU IREKIAREN ETA HERRITARRENTZAKO ARRETAREN ZERBITZUA

23. artikulua . Gobernu Irekiaren eta Herritarrentzako Arretaren Zerbitzuaren esparru material eta funtzionala.

Gobernu Irekiaren eta Herritarrendako Arretaren Zerbitzuak foru dekretu honetan arlo hauen gainean adierazten diren eginkizunak izanen ditu:

a) Gobernu irekia bultzatzea eta herritarrek gardentasunaren, parte-hartzearen eta gobernu irekiaren arloetan dituzten eskubideen eraginkortasunerako behar diren eginkizunak eta jarduketak koordinatzea.

b) Gobernu Irekiaren Espazio Digitalaren funtzionaltasuna eta edukiak garatzea eta mantentzea eta kudeatzea, herritar guztien irisgarritasuna, elkarreragingarritasuna eta informazioaren berrerabilpena erraztuz.

c) Informazioa edo ezagutza kudeatzeko sistema osoaren ezarpena sustatzea, informazio publikoa emateko bide desberdinak bere baitan elkartuko dituena.

d) Departamentu guztien eta, zehazki, informazio publikoaren ardura duten unitateen jarduna koordinatzea, gardentasunaren eta informazio publikoa eskuratzearen arloko betebeharrak betetzeko.

e) Informazio Publikoko Eskabideen Erregistroa kudeatzea.

f) Gardentasunerako eta Gobernu Irekirako Departamentuarteko Batzordeari laguntza ematea.

g) Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen erregelamendu bidezko garapena bultzatzea.

h) Nafarroako Parte-hartze Demokratikoari buruzko martxoaren 22ko 12/2019 Foru Legearen erregelamendu bidezko garapena bultzatzea.

i) Gardentasunari eta gobernu irekiari buruzko legeriaren berrikuspen eta garapenaren azterketa.

j) Nafarroako Foru Komunitateko Administrazioaren datu publikoak irekitzeko prozesua bultzatu eta zuzentzea, eta sektore publikoko informazioa berrerabiltzea erraztea.

k) Nafarroako Partaidetza Demokratikoari buruzko martxoaren 22ko 12/2019 Foru Legeak partaidetzaren arloan espezializatutako unitateari esleitutako eginkizunak betetzea.

l) Foru Komunitateko Administrazioko eta haren mendeko organismo eta entitateetako erregistro, informazio eta herritarren arretarako zerbitzuen zuzendaritza.

m) Nafarroako Gobernuaren Erregistro Orokorra.

n) Toki entitateei eta gobernu irekiaren esparruan gardentasun legeria bete behar duten gainerako subjektuei laguntza eta aholkularitza eskaintzea.

ñ) Administrazioaren eta herritarren arteko lan bateratua sustatzea.

o) Gobernu Irekiaren berezko gaiei buruzko prestakuntza plan espezifikoak proposatzea eta horietan laguntzea.

p) Nafarroako Gardentasun Kontseiluari funtzionamendurako laguntza ematea, Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 67.2 artikuluan aurreikusitako moduan.

q) Boluntariotzako lana egiten duten entitateen erroldaren kudeaketa, eta boluntariotza bultzatu eta koordinatzeko laguntza Nota de Vigencia.

r) Agintzen zaion beste edozein eginkizun, aipatutakoen antzekoa edo osagarria bada Nota de Vigencia.

24. artikulua . Gobernu Irekiaren eta Herritarrentzako Arretaren Zerbitzuaren egitura Nota de Vigencia.

Gobernu Irekiaren eta Herritarrentzako Arretaren Zerbitzuak atal hauek izanen ditu:

a) Herritarren Arretarako Atala.

b) Herritarren Partaidetzarako eta Boluntariotzarako Atala.

c) Gardentasunaren Atala.

25. artikulua . Herritarren Arretarako Atalaren esparru material eta funtzionala.

Herritarren Arretarako Atalak foru dekretu honetan aurreikusitako eginkizunak beteko ditu 23. artikuluko l) eta m) letretan ageri diren gaiei dagokienez, bai eta deskribatutako eginkizunen antzeko edo osagarri den beste edozein eginkizun ere, eta zerbitzuko zuzendariari lagunduko dio bere eginkizunak betetzen.

26. artikulua . Herritarren Partaidetzarako Atalaren esparru material eta funtzionala Nota de Vigencia.

Herritarren Partaidetzarako eta Boluntariotzarako Atalak foru dekretu honetan aurreikusitako eginkizunak beteko ditu 23. artikuluko a), h), i), k), ñ), p) eta q) letretan ageri diren eta herritarren parte-hartzearekin lotuta dauden gaiei dagokienez, bai eta deskribatutako eginkizunen antzeko edo osagarri den beste edozein eginkizun ere, eta zerbitzuko zuzendariari lagunduko dio bere eginkizunak betetzen.

27. artikulua . Gardentasunaren Atalaren esparru material eta funtzionala.

Gardentasunaren Atalak foru dekretu honetan aurreikusitako eginkizunak beteko ditu 23. artikuluko a), b), c), d), e), f), g), i), j), n) o) eta p) letretan ageri diren eta gardentasunarekin eta informazio publikorako irismenarekin lotuta dauden gaiei dagokienez, bai eta deskribatutako eginkizunen antzeko edo osagarri den beste edozein eginkizun ere, eta zerbitzuko zuzendariari lagunduko dio bere eginkizunak betetzen.

5. ATALA. NAFARROAKO ALDIZKARI OFIZIALAREN ATALA

28. artikulua . Nafarroako Aldizkari Ofizialaren Atalaren esparru material eta funtzionala.

Nafarroako Aldizkari Ofizialaren Atalak eginkizun hauek izanen ditu:

a) Nafarroako Foru Komunitateko xedapen orokorrak eta administrazio egintzak kudeatzea, editatzea eta zabaltzea, modu esklusiboan, bai eta Nafarroako Aldizkari Ofizialean argitaratu beharrekoa den edozein xedapen ere, berariazko araudiaren arabera.

b) Nafarroako Gobernuaren iritziz Nafarroako Aldizkari Ofizialean argitaratzeko interesgarriak diren txosten, dokumentu edo komunikazioak kudeatzea, editatzea eta zabaltzea.

c) Interes orokorreko lege edo xedapenei buruzko separatak editatzea eta zabaltzea.

d) Nafarroako Aldizkari Ofizialeko edukien sarbide unibertsal, libre eta doakoa bermatzea, informazioa aurkitzeko behar diren tresnak eskainiz.

e) Argitaratzeko bidalitakoen adostasun formala eta teknologikoa baliozkotzea, eta, hala badagokio, zuzenketa edo deuseztapena proposatzea, baldin eta bat ez badatoz edo akatsak badituzte edo argitaratzea nahitaezkoa ez bada.

f) Nafarroako Aldizkari Ofizialean argitaratutakoaren benetakotasuna eta osotasuna bermatzea, Nafarroako Foru Komunitateko Administrazioak aitortutako sistemetako baten bidez.

g) Informazio sistemak egokitzea eta eboluzionatzea, behar den hedapen, artxibo eta segurtasun zerbitzuaren jarraitutasunari dagokionez funtzionamendu egokia bermatzeko.

h) Datuak babesteko ardura duen unitatearekin lankidetzan aritzea, berariazko araudia betetzeko.

6. ATALA. NAFARROAKO GOBERNUKO DATUAK BABESTEKO ORDEZKARITZA

29. artikulua . Nafarroako Gobernuko Datuak Babesteko Ordezkaritzaren eremu material eta funtzionala.

Nafarroako Gobernuko Datuak Babesteko Ordezkaritzak foru dekretu honen 8. artikuluko ñ) letran aipatzen den arloari dagokionez ezartzen diren eginkizunak beteko ditu, bereziki honako hauek:

a) Informazioa eta aholkuak ematea, Europako Parlamentuaren eta Kontseiluaren 2016ko apirilaren 27ko 2016/679 (EE) Erregelamenduari jarraikiz eta Europar Batasunak edo Espainiak datuen babesari buruz emandako bestelako xedapenei jarraikiz, egokitu zaizkien betebeharren tratamenduaren arduradunei eta hartaz arduratzen diren langileei.

b) Aipatu erregelamenduan, Europar Batasunak edo Espainiak datuen babesari buruz emandako bestelako xedapenetan eta datu pertsonalak babesteko arloko arduradunaren politiketan xedatutakoa betetzen dela gainbegiratzea, barnean sartuta erantzukizunen esleipena, kontzientziazioa eta tratamendu eragiketetan parte hartzen duten langileen prestakuntza eta kasuan kasuko auditoriak.

c) Datuak babesteari buruzko eraginaren ebaluazioari buruz eskatzen zaion aholkularitza ematea, eta ebaluazio horren aplikazioa gainbegiratzea, Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamenduaren 35. artikuluarekin bat.

d) Europako Parlamentuaren eta Kontseiluaren 2016ko apirilaren 27ko 2016/679 (EE) Erregelamenduan aurreikusitako kontrol-agintaritzarekin elkarlanean aritzea.

e) Kontrol-agintaritzarentzat harreman gunea izatea datuen tratamenduari buruzko gaietan, barnean sartuta aldez aurreko kontsulta (Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamenduaren 36. artikuluan aipatutakoa) eta kontsultak egitea, kasua bada, beste edozein gairi buruz.

7. ATALA. ADMINISTRAZIOA BERRITZEKO ETA MODERNIZATZEKO ATALA

30. artikulua . Administrazioa Berritzeko eta Modernizatzeko Atalaren esparru material eta funtzionala.

Administrazioa Berritzeko eta Modernizatzeko Atalak, zuzendaritza nagusiaren esparruan, honako eginkizun hauek izanen ditu:

a) Administrazio elektronikoko informazio sistema korporatiboen ezarpena bultzatzea, koordinatzea eta gainbegiratzea.

b) Informazio sistemen bilakaera beharrak koordinatzea, integratzea eta lehenestea.

c) Informazio sistemen ezarpenaren jarraipen txostenak egitea.

d) Administrazio elektronikoaren arloan laguntza ematea.

e) Administrazio elektronikoko hainbat tresnatan prestakuntza kudeatzea eta bultzatzea.

f) Nafarroako Foru Komunitateko Administrazioaren eta foru-sektore publiko instituzionalaren webguneen eta gailu mugikorren aplikazioen irisgarritasuneko unitate arduradunak bete beharreko eginkizunak.

g) Nafarroako Jauregiko eta haren inguruneko zerbitzu osagarriak.

h) Balio artistiko, historiko, arkitektoniko, arkeologiko, etnologiko, dokumental, bibliografiko, industrial, zientifiko eta teknikoa duten eta Jauregian kokatuta dauden ondasun higigarrien inbentarioa egitea eta eguneratzeari eustea.

i) Nafarroako Foru Komunitateko Administrazioaren Datuak Babesteko eta Informazioaren Segurtasunerako Politikan definitutako informazioaren segurtasunaren arduradunaren eginkizunak betetzea, informazioaren segurtasunari buruz indarrean dagoen araudia, datu pertsonalen babesa barne, betetzen dela ziurtatzeko eta zaintzeko, hori guztia Lehendakaritzako eta Gobernu Irekiko Zuzendaritza Nagusiaren esparruan.

III. KAPITULUA. FUNTZIO PUBLIKOKO ZUZENDARITZA NAGUSIA

1. ATALA. ESKUMENEN ESPARRU MATERIALA ETA EGITURA

31. artikulua . Funtzio Publikoko Zuzendaritza Nagusiaren eskumenen esparru materiala.

1. Funtzio Publikoko Zuzendaritza Nagusiak foru dekretu honetan eta Nafarroako Foru Komunitateko Administrazioaren eta haren erakunde autonomoen organoetako langileen arloko eskudantziak zehazten dituen foru dekretuan aipatzen diren eskudantziak izanen ditu, arlo hauei dagokienez:

a) Langileekiko politikaren goi mailako zuzendaritza eta betearazpena.

b) Funtzio Publikoari buruzko arauak ematea.

c) Nafarroako Aurrekontu Orokorren I. kapitulurako aurreproiektua eta langileria gastuaren kontrola eta jarraipena.

d) Langileen nominak eta gizarte babeseko sistemak.

e) Langileen Erregistro Nagusia, plantilla organikoa eta lan publikoaren eskaintza.

f) Nafarroako Foru Komunitateko Administrazioaren eta haren erakunde autonomoen zerbitzuko langileen lanpostuen sorrerarekin, konfigurazioarekin eta definizioarekin lotutako txostenak, azterlanak, proiektuak eta proposamenak.

g) Langileen espedienteak eta arlo horretako ziurtagiriak egitea.

h) Nafarroako Foru Komunitateko Gobernuko eta Administrazioko goi mailako kargudunen jarduera eta interesen erregistroaren kudeaketa.

i) Langileen izendapenak eta egoera administratiboak.

j) Langile finkoen aldi baterako barne igoera eta langileen aldi baterako kontratazioa.

k) Funtzio publikorako sarrera, mailaz igotzea eta lanpostuak betetzea.

l) Funtzio publikoaren arloko eskaerak, erreklamazioak eta administrazio errekurtsoak tramitatzea eta langileria arloko ebazpen judizialak betearaztea.

m) Bateraezintasunen araubidea.

n) Langileen presentziak kudeatzeko sistema.

ñ) Nafarroako Foru Komunitateko Administrazioaren eta haren erakunde autonomoen zerbitzuko langileen hauteskunde sindikalak koordinatzea.

o) Nafarroako Foru Komunitateko montepioko eta udal funtzionarioen montepioko funtzionarioen klase pasiboen sistema.

p) Onura sozialak.

q) Laneko arriskuen prebentzioa.

r) Nafarroako Administrazio Publikoetako enplegatuen prestakuntza, birziklatzea eta trebakuntza.

s) Lanbide gaitasuna eta trebakuntza, eraginkortasun administratiboa, gardentasuna eta herritarrarentzako zerbitzua bultzatzea, baita funtzionarioen eta enplegatuen partaidetza ere jarduketa administratiboan.

t) Funtzio publikora iristeko sistemen definizioan parte hartzea, eta elkarlanean aritzea haien betearazpenean eta zuzendaritza postuetarako hautagaien egokitasunaren ebaluazioan.

u) Nafarroako sektore publikoarekin lotutako jardunaldiak, sariak, argitalpenak eta beste edozein jarduera egitea.

v) Langileen lan-baldintzak negoziatu eta zehaztea.

w) Langileen ordezkari sindikalekiko harremanak.

x) Negoziazio Mahai Orokorretan, Hitzarmen Kolektiboaren Negoziazio Batzordean eta Mahai Sektorialetan negoziatzen den langileen arloko araudia egitea eta izapidetzea, zuzendaritza nagusi honen proposamen direlako bidezko denean.

y) Langileen arloko irizpideak finkatzea Nafarroako Foru Komunitateko Administrazio osorako eta haren erakunde autonomoetarako.

z) Indarra duten xedapenek Lehendakaritzako, Berdintasuneko, Funtzio Publikoko eta Barneko Departamentuari esleitzen dizkiotenak, zuzendaritza nagusiak bere duen esparruan.

2. Funtzio Publikoko Zuzendaritza Nagusiak nahitaezko txostena eginen du Foru Komunitateko Administrazioaren eta haren erakunde autonomoen esparruan egitura organiko eta funtzionalari buruz planteatzen diren proposamenez, langileen gastuetan izanen duen eraginari buruz eta Nafarroako Gobernuari langileen arloan onetsiak izateko aurkezten zaizkion proposamen guztiei buruz.

32. artikulua . Funtzio Publikoko Zuzendaritza Nagusiaren egitura.

1. Funtzio Publikoko Zuzendaritza Nagusiak zerbitzu hauek ditu bere egituran:

a) Langileriaren Gastuaren Kontrolaren eta Nominen Zerbitzua.

b) Langileriaren Kudeaketako Zerbitzua.

c) Funtzio Publikoaren Antolamenduko Zerbitzua.

d) Lan Harremanen eta Prestazio Sozialen Zerbitzua.

e) Egituraren, Lanpostuen Antolaketaren eta Langileen Plantillaren Zerbitzua.

2. ATALA. LANGILERIAREN GASTUAREN KONTROLAREN ETA NOMINEN ZERBITZUA

33. artikulua . Langileriaren Gastuaren Kontrolaren eta Nominen Zerbitzuaren esparru material eta funtzionala.

Langileriaren Gastuaren Kontrolaren eta Nominen Zerbitzuak foru dekretu honetan aipatzen diren eskudantziak beteko ditu foru dekretu honen 31. artikuluaren 1. ataleko c), d) eta h) letretan aipatutako arloetan.

34. artikulua . Langileriaren Gastuaren Kontrolaren eta Nominen Zerbitzuko egitura

Langileriaren Gastuaren Kontrolaren eta Nominen Zerbitzuak atal hauek ditu bere egituran:

a) Aurrekontuen Kudeaketaren eta Goi Mailako Kargudunen Erregistroaren Atala.

b) Nominen eta Gizarte Segurantzaren Atala.

35. artikulua . Aurrekontuen Kudeaketaren eta Goi Mailako Kargudunen Erregistroaren Atalaren esparru material eta funtzionala.

Aurrekontuen Kudeaketaren eta Goi Mailako Kargudunen Erregistroaren Atalak foru dekretu honetan aipatzen diren eginkizunak beteko ditu arlo hauetan: Aurrekontuaren I. kapituluaren aurreproiektua eta hura betearaztea; Foru Komunitatearen Administrazioko eta haren erakunde autonomoetako langileriaren gastuen kontrola eta jarraipena, eta Gobernuko eta Nafarroako Foru Komunitateko Administrazioko goi mailako kargudunen jardueren eta interesen Erregistroa.

36. artikulua . Nominen eta Gizarte Segurantzaren Atalaren esparru materiala eta funtzionala.

Nominen eta Gizarte Segurantzaren Atalak foru dekretu honetan aipatzen diren eginkizunak beteko ditu arlo hauetan: Funtzio Publikoko Zuzendaritza Nagusiaren eskumenekoak diren langileen nomina, Gizarte Segurantza eta gizarte babeseko gainerako araubideak, Nafarroako Administrazio Publikoetako montepioetako funtzionarioei dagokiena izan ezik; eta Nafarroako Foru Komunitateko Administrazioaren eta haren erakunde autonomoen esparruetan kudeaturiko nominaren koadratzea, Funtzio Publikoko Zuzendaritza Nagusiak pagatzeko agindua eman aurretik egin behar dena.

3. ATALA. LANGILERIAREN KUDEAKETAKO ZERBITZUA

37. artikulua . Langileriaren Kudeaketako Zerbitzuaren esparru material eta funtzionala.

Langileriaren Kudeaketako Zerbitzuak foru dekretu honetan aipatzen diren eginkizunak beteko ditu foru dekretu honen 31. artikuluaren 1. apartatuko i), j) eta k) letretan aipatutako arloetan.

38. artikulua . Langileriaren Kudeaketako Zerbitzuaren egitura.

Langileriaren Kudeaketako Zerbitzuak atal hauek ditu bere egituran:

a) Barne Igoeraren eta Aldi Baterako Kontratuen Atala.

b) Hautapenaren, Hornikuntzaren eta Administrazio Egoeren Atala.

39. artikulua . Barne Igoeraren eta Aldi Baterako Kontratuen Atalaren esparru materiala eta funtzionala.

Barne Igoeraren eta Aldi Baterako Kontratuen Atalak foru dekretu honetan aipatzen diren eginkizunak beteko ditu, honako hauekin loturik: administrazio eta lan araubideetako langileen kontratazioa eta Nafarroako Foru Komunitateko Administrazioko eta haren erakunde autonomoetako langileen aldi baterako barne igoera, beste organo batzuei gai horien gain ematen zaizkien eskumenak deusetan eragotzi gabe.

40. artikulua . Hautapenaren, Hornikuntzaren eta Administrazio Egoeren Atalaren esparru materiala eta funtzionala.

Hautapenaren, Hornikuntzaren eta Administrazio Egoeren Atalak foru dekretu honetan aurreikusitako eginkizunak beteko ditu, honako hauei dagokienez: Nafarroako Foru Komunitateko Administrazioan eta haren erakunde autonomoetan sartzeko, mailaz igotzeko eta lanpostuen hornikuntzarako deialdiak, beste organo batzuei gai horien gainean ematen zaizkien eskumenak deusetan eragotzi gabe. Orobat, langileriaren izendapenak, egoerak eta gainontzeko gorabehera administratiboak kudeatuko ditu.

4. ATALA. FUNTZIO PUBLIKOAREN ANTOLAMENDUKO ZERBITZUA

41. artikulua . Funtzio Publikoaren Antolamenduko Zerbitzuaren esparru material eta funtzionala.

Funtzio Publikoaren Antolamenduko Zerbitzuak foru dekretu honetan ezartzen diren eginkizunak beteko ditu, 31. artikuluaren 1. apartatuko l), m), x) eta y) letretan aipatzen diren arloei dagokienez.

42. artikulua . Funtzio Publikoaren Antolamenduko Zerbitzuaren egitura.

Funtzio Publikoaren Antolamenduko Zerbitzuak atal hauek ditu bere egituran:

a) Araubide Juridikoaren Atala.

b) Bateraezintasunen Araubidearen eta Langileria Irizpideen Atala.

c) Arauen Garapenerako Atala.

43. artikulua . Araubide Juridikoaren Atalaren esparru material eta funtzionala.

Araubide Juridikoaren Atalak foru dekretu honetan aipatzen diren eginkizunak beteko ditu arlo hauetan: langileriaren arloko eskaerak, erreklamazioak eta errekurtso administratiboak, organo judizialei espediente eta agiri administratiboak igortzea, eta funtzio publikoaren arloko epaiak betearaztea.

44. artikulua . Bateraezintasunen Araubidearen eta Langileria Irizpideen Atalaren esparru material eta funtzionala.

Bateraezintasunen Araubidearen eta Langileria Irizpideen Atalak foru dekretu honetan Nafarroako Foru Komunitateko Administrazioaren eta haren erakunde autonomoen zerbitzuko langileen bateraezintasunen araubideari dagokionez aurreikusitako eginkizunak beteko ditu, arlo horietan beste organo batzuei esleitutako eskumenei kalterik egin gabe.

Era berean, Foru Komunitateko Administrazioan eta haren erakunde autonomoetan langileen arloan eskumena duten organoak koordinatzeaz eta langileen arloan irizpideak ezartzeaz arduratuko da.

45. artikulua . Arauen Garapenerako Atalaren esparru material eta funtzionala.

Arauen Garapeneko Atalak landuko den negoziazio kolektiboaren ondorioz Funtzio Publikoko Zuzendaritza Nagusian egiten diren xedapenen prestaketa eta izapidetze administratiboa eginen ditu.

5. ATALA. LAN HARREMANEN ETA PRESTAZIO SOZIALEN ZERBITZUA

46. artikulua . Lan Harremanen eta Prestazio Sozialen Zerbitzuaren esparru material eta funtzionala.

Lan Harremanen eta Prestazio Sozialen Zerbitzuak foru dekretu honetan aurreikusitako eskudantziak beteko ditu, 31. artikuluaren 1. apartatuko o), p), q), v) eta w) letretan aipatzen diren arloei dagokienez.

47. artikulua . Lan Harremanen eta Prestazio Sozialen Zerbitzuaren egitura.

Lan Harremanen eta Prestazio Sozialen Zerbitzuak atal hauek ditu bere egituran:

a) Lan Harremanen Atala.

b) Montepioak eta Onura Sozialak Kudeatzeko Atala.

c) Laneko Arriskuen Prebentziorako Atala.

48. artikulua . Lan Harremanen Atalaren esparru material eta funtzionala.

Lan Harremanen Atalak foru dekretu honetan aurreikusitako eginkizunak beteko ditu, honako hauei dagokienez: Funtzio Publikoko Zuzendaritza Nagusiari beharrezkoa den laguntza teknikoa ematea langileen lan baldintzak negoziatu eta zehazteko, eta Nafarroako Foru Komunitateko Administrazioaren zerbitzuko langileen ordezkari sindikalekiko harremanak edukitzea, kudeatzea eta zentralizatzea.

49. artikulua . Montepioak eta Onura Sozialak Kudeatzeko Atalaren esparru material eta funtzionala.

Montepioak eta Onura Sozialak Kudeatzeko Atalak foru dekretu honetan Nafarroako Foru Komunitateko montepioko eta udal funtzionarioen montepioko funtzionarioen eskubide pasiboen sistemari dagokienez ezartzen diren eginkizunak beteko ditu, eta Nafarroako Foru Komunitateko Administrazioko eta erakunde autonomoetako langileentzako eskuarki ezarri diren prestazio eta onura sozialak ere bai.

50. artikulua . Laneko Arriskuen Prebentziorako Atalaren esparru material eta funtzionala.

Laneko Arriskuen Prebentziorako Atalak foru dekretu honetan aipatzen diren eginkizunak beteko ditu Foru Komunitatearen Administrazioko eta haren erakunde autonomoetako langileen laneko arriskuei aurrea hartzeari dagokionez.

6. ATALA. EGITURAREN, LANPOSTUEN ANTOLAKETAREN ETA LANGILEEN PLANTILLAREN ZERBITZUA

51. artikulua . Egituraren, Lanpostuen Antolaketaren eta Langileen Plantillaren Zerbitzuaren esparru material eta funtzionala.

Egituraren, Lanpostuen Antolaketaren eta Langileen Plantillaren Zerbitzuak foru dekretu honetan aipatzen diren eginkizunak beteko ditu foru dekretu honen 31. artikuluaren 1. apartatuko e), f), g) eta n) letretan aipatutako arloetan.

Zehazki, Langileen Erregistroa eramatea eta Langileen Datu base Nagusia kudeatzea dagozkio. Era berean, langileen plantillak eta lanpostuen zerrendak egiteko eta berrikusteko oinarriak, irizpideak eta arau-proposamenak ezarriko ditu, bai eta arlo horretan egindako proposamenak ere.

Era berean, zerbitzu honek eskumena izanen du Funtzio Publikoko Zuzendaritza Nagusiak bertaratzeak kudeatzeko bultzatutako sistema ezartzeko prozesuek eskatzen dituzten analisiak egiteko eta sistema hori mantentzeko.

52. artikulua . Egituraren, Lanpostuen Antolaketaren eta Langileen Plantillaren Zerbitzuaren egitura.

Egituraren, Lanpostuen Antolaketaren eta Langileen Plantillaren Zerbitzuak atal hauek ditu bere egituran:

a) Langileriaren Erregistro Nagusiaren Atala.

b) Lanpostuak Antolatzeko Atala.

c) Langileen Antolaketaren eta Presentziaren Kudeaketaren Atala.

53. artikulua . Langileriaren Erregistro Nagusiaren Atalaren esparru material eta funtzionala.

Langileriaren Erregistro Nagusiaren Atalak foru dekretu honetan aipatzen diren eginkizunak beteko ditu arlo hauetan: Langileriaren Erregistro Nagusia eta bertan dauden datuen ziurtagiriak, Funtzio Publikoko Zuzendaritza Nagusiaren mendeko langileen espedienteak, lan eskaintza publikoa eta plantilla organikoa.

Era berean, eskumena izanen du ondokoetarako:

a) Administrazio unitateak sortu, aldatu edo ezabatzeko espedienteen berri ematea, hala dagokionean, eta espediente horien izapidetzea eta edukia indarreko araudian ezarritako eskakizun eta eskakizunekin bat datozela egiaztatzea.

b) Plantilla organikoari buruzko foru dekretuak izapidetzea.

c) Langileen Erregistro Orokorra kudeatzea eta Estatuko Administrazio Orokorreko eta gainerako Administrazio Publikoetako Langileen Erregistro Nagusiarekin koordinatzea.

54. artikulua . Lanpostuak Antolatzeko Atalaren esparru material eta funtzionala.

Lanpostuak Antolatzeko Atalak foru dekretu honetan aurreikusitako eginkizunak beteko ditu lanpostuen analisi, definizio, balorazio eta ordainsari osagarriei dagokienez, bai eta Nafarroako Foru Komunitateko Administrazioaren zerbitzuko langileen lanpostuen zerrendak onartzeko irizpideak, txostenak eta proposamenak ezarri eta horiek mantendu, eguneratu eta aldatzeari dagokionez ere.

Gainera, atal hori arduratuko da ordainsarien eta lanpostuen arloko azterlanak, proiektuak eta gidalerroak lantzeaz.

55. artikulua . Langileen Antolaketaren eta Presentziaren Kudeaketaren Atalaren esparru material eta funtzionala.

Langileen Antolaketaren eta Presentziaren Kudeaketaren Atalak foru dekretu honetan lanpostuen antolaketari buruzko azterketa egiteko aurreikusitako eginkizunak beteko ditu, horrek galarazi gabe beste organo batzuek arlo horietan izan ditzaketen eskumenak.

Txostenak prestatzea, egitura organikoari buruzko proposamenen eta antolaketa alderdien gainean.

Departamentuen jarduketen analisia eta bilakaera, barne egiturari eta langileen antolaketari dagokienez.

Gainera, atal hau arduratuko da presentziak eta absentziak kudeatzeko sistema korporatiboa (GPA) zaintzeaz, eguneratzeaz eta hedatzeaz.

IV. KAPITULUA. BARNE ZUZENDARITZA NAGUSIA

1. ATALA. ESKUMENEN ESPARRU MATERIALA ETA EGITURA

56. artikulua . Barne Zuzendaritza Nagusiaren eskumenen esparru materiala eta egitura.

Barne Zuzendaritza Nagusiak foru dekretu honetan aipatzen diren eginkizunak burutuko ditu, honako hauekin loturik:

a) Segurtasun politikak.

b) Segurtasun publikoa.

c) Udaltzaingoen koordinazioa.

d) Segurtasun, trafiko eta zirkulazioko polizia.

e) Bide segurtasuna.

f) Babes zibila, larrialdiak, suteen prebentzioa, su-itzaltzea eta salbamendua.

g) Jokoa eta ikuskizunak.

h) Indarra duten xedapenek Lehendakaritzako, Berdintasuneko, Funtzio Publikoko eta Barneko Departamentuari esleitzen dizkiotenak, zuzendaritza nagusiak bere duen esparruan.

57. artikulua . Barne Zuzendaritza Nagusiaren egitura.

Barne Zuzendaritza Nagusiak zerbitzu hauek ditu bere egituran:

a) Segurtasun Politikak Garatzeko Zerbitzua.

b) Barneko Araubide Juridikoaren Zerbitzua.

c) Nafarroako Suhiltzaileen Zerbitzua.

d) Babes Zibileko eta Larrialdietako Zerbitzua.

2. ATALA. SEGURTASUN POLITIKAK GARATZEKO ZERBITZUA

58. artikulua . Segurtasun Politikak Garatzeko Zerbitzuaren esparru material eta funtzionala.

Foru dekretu honetan ezarritako eginkizunak izanen ditu, honako arlo hauetan, Segurtasun Politikak Garatzeko Zerbitzuak:

a) Barneko zuzendari nagusiari eta segurtasun arloko gainerako agintariei laguntzea segurtasun publikorako politikak kudeatzen eta segurtasun publikoari buruzko politika publiko, plan eta programak bultzatzen eta orokorrean koordinatzen.

b) Joko eta ikuskizun publikoetarako politikak bultzatu, koordinatu eta kudeatzea.

c) Trafikorako eta bide segurtasunerako politikak bultzatu, koordinatu eta kudeatzea.

d) Nafarroako Gobernuaren ibilgailuen parkeko zerbitzu teknikoak, langileak eta baliabideak antolatu eta kudeatzea.

e) Barneko zuzendari nagusiari eta segurtasun arloko gainerako agintariei Nafarroako segurtasun publikoko sistemako plan eta programak proposatzen eta taxutzen laguntzea.

f) Laguntza teknikoa Nafarroako Herritarren Segurtasunerako Kontseiluari eta Nafarroako Udaltzaingoak Koordinatzeko Batzordeari.

g) Udaltzaingoen koordinazioa, ezertan galarazi gabe 77. artikuluan babes zibilaren arloan xedatutakoa.

h) Delituen bilakaera ikusirik, segurtasunerako politikei buruzko azterlan, txosten tekniko eta plan proposamenak prestatzea eta, oro har, Nafarroako segurtasun publikoaren sistemari buruzkoak; delituen jarraipena egiteko eta Nafarroako Segurtasun Publikoko Sistemak behar dituen adierazle eta estatistikak zehaztu eta mantentzeko azterlan, ikerlan eta txostenak egin eta proposamenak aurkeztea.

i) Segurtasun elementuetako hornidura, zerbitzu eta instalazioak kontratatzeko eta haien mantentze-lanetarako espedienteen tramitazio zentralizatua, larrialdietan baliabide bereziak kontratatzeko espedienteak modu zentralizatuan tramitatzea, eta Nafarroako Gobernuaren bulegoetako segurtasun zerbitzu pribatuak eta segurtasun instalazioak modu zentralizatuan kudeatzea.

j) Zuzendaritza nagusiko zerbitzuen kalitatea hobetzeko sistemak proposatu eta ezartzea.

k) Zuzendaritza nagusiak agintzen dion beste edozein edo indarra duten xedapenek esleitzen dizkiotenak.

59. artikulua . Segurtasun Politikak Garatzeko Zerbitzuaren egitura.

Segurtasun Politikak Garatzeko Zerbitzuak atal hauek ditu bere egituran:

a) Jokoaren eta Ikuskizun Publikoen Atala.

b) Trafikoaren eta Bide Segurtasunaren Atala.

c) Ibilgailu Parkearen Atala.

d) Segurtasunaren Koordinazio Atala.

60. artikulua . Jokoaren eta Ikuskizun Publikoen Atalaren esparru materiala eta funtzionala.

Jokoaren eta Ikuskizun Publikoen Atalak foru dekretu honetan aurreikusitako eginkizunak beteko ditu, honako hauekin loturik: zerbitzuaren eskumenen esparruko administrazio baimenak ematea, baita haiek kontrolatu eta ikuskatzea ere, joko, ikuskizun publiko eta josteta jardueren arloko segurtasun publikoko politiken arau-garapena eta betearazpena, eta Segurtasun Politikak Garatzeko Zerbitzuaren eskumenen esparru materialarekin loturik agintzen zaion beste edozein eginkizun.

61. artikulua . Trafikoaren eta Bide Segurtasunaren Atalaren esparru material eta funtzionala.

Trafikoaren eta Bide Segurtasunaren Atalak foru dekretu honetan aurreikusitako eginkizunak beteko ditu, honako honi dagokionez: zerbitzuaren eskumenen esparruaren barneko administrazio baimenak ematea, kontrolatzea eta ikuskatzea.

Halaber, Nafarroako bide segurtasunerako estrategian aurreikusitako jardueren koordinazioa eta ebaluazioa bultzatzea, estrategia horren ondoriozko urteko ekintza planak prestatu, bultzatu, garatu eta ebaluatzea, bide hezkuntza eta prebentzioko planak abian jarri, garatu eta ebaluatzea, departamentuaren titularrak zehazten duen maiztasunarekin, eta Segurtasun Politikak Garatzeko Zerbitzuaren eskumenen esparru materialarekin loturik agintzen zaion beste edozein eginkizun.

62. artikulua . Ibilgailu Parkearen Atalaren esparru material eta funtzionala.

Ibilgailu Parkearen Atalak foru dekretu honetan aurreikusitako eginkizunak beteko ditu, arlo hauekin lotuta: Nafarroako Gobernuaren ibilgailuak eta makineria osoki kudeatzea, kudeatzen diren baliabideen eraginkortasuna eta eragimena aldian behin kontrolatzea, Nafarroako Gobernuaren ibilgailuak eta makineria osatzen dituzten elementuen egoera eta beharrak etengabe ebaluatzea, ataleko esparru materialari lotutako azterlan eta proposamenak prestatzea, baliabideak ahalik eta hobekien erabiltzeko, eta Segurtasun Politikak Garatzeko Zerbitzuaren eskumenen eremu materialarekin loturik agintzen zaion beste edozein eginkizun.

63. artikulua . Segurtasunaren Koordinazio Atalaren esparru material eta funtzionala Nota de Vigencia.

Udaltzaingoak koordinatzeari buruz Nafarroako Foru Komunitatearen Administrazioari dagozkion eskudantziak kudeatuko ditu Segurtasunaren Koordinazio Atalak, eta foru dekretu honetan aurreikusitako eginkizunak beteko ditu honako hauei dagokienez: instalazio, zerbitzu eta horniduren kudeaketa administratiboa, Nafarroako Segurtasun Sistema Publikoari lotutako informazio sistemen mantentze-lana eta erosketen kudeaketa, eta zuzendaritza nagusi honen eskumeneko segurtasunari lotutako kudeaketako jarduera materialak eta administrazio prozedurak arrazionalizatu eta arintzea.

Segurtasun zerbitzuen kudeaketari dagokionez, azterlanak eta proiektuak prestatuko ditu, eta segurtasun zerbitzua duten eraikinen segurtasun neurrien katalogoa prestatu eta eguneratuko du. Segurtasun pribatuaren zerbitzuak eta sistemak kontratatzeko kudeaketa zentralizatua ebaluatu eta kontrolatuko du administrazioaren aldetik, baita zaintza eta segurtasun zerbitzuen kontratazioa eta segimendua ere. Gainera, segurtasun pribatuaren kontratuak gainbegiratu, koordinatu eta kontrolatuko ditu eta koordinatu, aholkatu, kontratatu eta segimendua eginen du segurtasun sistemak jartzeko.

Halaber, Segurtasunaren Koordinazio Atalak foru dekretu honetan aurreikusitako eginkizunak beteko ditu, herrietan Nafarroako Segurtasun Publikoko Sistema osatzen duten partaidetza eta koordinazio organoak abian jarri eta haien funtzionamendua burutzeari dagokionez.

3. ATALA. BARNEKO ARAUBIDE JURIDIKOAREN ZERBITZUA

64. artikulua . Barneko Araubide Juridikoaren Zerbitzuaren esparru materiala eta funtzionala.

1. Barneko Araubide Juridikoaren Zerbitzuak foru dekretu honetan ezarritako eginkizunak izanen ditu, honako arlo hauetan:

a) Barne Zuzendaritza Nagusiko unitateei sostengu juridikoa ematea, bai eta Foruzaingoari ere.

b) Araudia nola prestatu planifikatu eta koordinatzea.

c) Kontu-hartzailetza eta Aurrekontu arloekin eta Departamentuko Idazkaritza Tekniko Nagusiarekin lan egitea, Barne Zuzendaritza Nagusiari lotutako jarduerak bideratzeko.

d) Kontratazio espedienteen unitate kudeatzaileekin koordinatzea.

e) Barneko Zuzendaritza Nagusiaren kudeaketa ekonomikoan eta aurrekontukoan lan egitea.

f) Honako hauek bultzatzea: ezagutza kudeatzeko sistemak eta tresnak, lan egiteko metodoak, administrazio prozesuak, unitateen arteko koordinazioa eta zuzendaritza nagusiaren jardueraren segimendua eta ebaluazioa.

g) Bere eskumeneko esparruarekin lotuta dauden espedienteak koordinatu eta kudeatzea administrazioaren, dokumentazioaren eta artxiboaren aldetik.

h) Zehapen espedienteak tramitatzea.

i) Zehapen espedienteen tramitazioan laguntzea.

2. Barneko Araubide Juridikoaren Zerbitzuak, Nafarroako Foruzaingoari atxikiriko langileei dagokienez, eta Nafarroako Foru Komunitateko Administrazioko eta haren erakunde autonomoetako organoetako langileria arloko eskudantziak zehazten dituen foru dekretuarekin bat, foru dekretu honetan aipatzen diren eginkizunak beteko ditu arlo hauetan:

a) Langile bihurtu, mailaz igo eta lanpostuak betetzeko deialdiak prestatu eta tramitatzea.

b) Proposamenak prestatzea gai hauetan: plantilla organikoa, enplegu eskaintza, lanaldia murrizteko eskaerak, lanpostuekiko atxikipenen aldaketak langileen lekualdaketak, zerbitzuaren beharrek eragindakoak.

c) Plantillako egoera administratibo desberdinak kudeatu eta erregistratzea.

d) Sindikatuekiko eta ordezkaritza organoekiko harremanak kudeatzea, Funtzio Publikoko Zuzendaritza Nagusiaren jarraibideei loturik.

65. artikulua . Barneko Araubide Juridikoaren Zerbitzuaren egitura.

Barneko Araubide Juridikoaren Zerbitzuak atal hauek ditu bere egituran:

a) Araubide Juridikoaren Atala.

b) Giza Baliabideen Atala.

c) Zehapen Prozeduraren Atala.

66. artikulua . Araubide Juridikoaren Atalaren esparru material eta funtzionala.

1. Araubide Juridikoaren Atalak foru dekretu honen 64.1. artikuluko a), b), c), d), e), f) eta g) letretan aipatzen diren arloei dagokienez ezartzen diren eginkizunak beteko ditu eta zerbitzuko zuzendariari laguntza emanen dio bere eginkizunetan.

2. Halaber, atal hori zer zerbitzu zuzendaritzari dagoen atxikita, horren bidez Barne Zuzendaritza Nagusiak esleitu edo agintzen dizkion guztiak eginen ditu.

67. artikulua . Giza Baliabideen Atalaren esparru materiala eta funtzionala.

1. Giza Baliabideen Atalak foru dekretu honetan aurreikusitako eginkizunak beteko ditu foru dekretu honen 64.2 artikuluan langileriari buruz zehaztutako arloak kudeatzeari dagokionez.

2. Orobat, 64.1.i) artikuluan zehaztutako eginkizuna beteko du, bai eta Barne Zuzendaritza Nagusiak, atala zer zerbitzuri dagoen atxikita, horko zuzendaritzaren bidez, esleitzen dizkion eginkizun guztiak ere, bereziki erakunde sindikalekin eta ordezkaritza organoekin harremanetan egoteko eginkizunak, Funtzio Publikoko Zuzendaritza Nagusiaren jarraibideei loturik.

68. artikulua . Zehapen Prozeduraren Atalaren esparru material eta funtzionala.

1. Zehapen Prozeduraren Atalak foru dekretu honen 64.1. artikuluko h) letran aipatzen diren arloei dagokienez ezartzen diren eginkizunak beteko ditu eta zerbitzuko zuzendariari laguntza emanen dio bere eginkizunetan.

2. Halaber, atal hori zer zerbitzu zuzendaritzari dagoen atxikita, horren bidez Barne Zuzendaritza Nagusiak esleitu edo agintzen dizkion guztiak eginen ditu.

4. ATALA. NAFARROAKO SUHILTZAILEEN ZERBITZUA

69. artikulua . Nafarroako Suhiltzaileen Zerbitzuaren esparru material eta funtzionala.

Nafarroako Suhiltzaileen Zerbitzuak foru dekretu honetan ezarritako eginkizunak izanen ditu, honako arlo hauetan:

a) Suhiltzaileen unitateen eta Nafarroako suhiltzaile etxeen funtzionamendurako ildo nagusiak zuzentzea. Horretarako, jardueraren helburuak ezarri eta burutza bakoitzari bere eginkizunak betetzeko eskatuko zaio.

b) Nafarroako Suhiltzaile profesionalen eta boluntarioen etxeen sare guztia zuzentzea eta beren ekintzak gainbegiratzea.

c) Nafarroako suhiltzaile etxeen kudeaketa operatiboa gainbegiratzea, txanden barne funtzionamendua, prestakuntza eta prebentzio operatiboak barne.

d) Operatiboko zaintza zerbitzuak planifikatzea.

e) Langile operatiboen jarduerak planifikatu eta programatzea.

f) Nafarroako Suhiltzaileen Zerbitzuko langile operatiboen txandak eta lan egutegiak kudeatzea.

g) Burutzetako arduradunen segimendua eta koordinazioa eta, halaber, haiei aholku ematea.

h) Nafarroako Suhiltzaile profesionalen eta boluntarioen etxeen sareko langile operatiboen prestakuntza eta birziklatzea planifikatu eta gainbegiratzea.

i) Zerbitzuen eta zerbitzu honekin loturiko bestelako aferen kontrola eta ebaluazioa.

j) Nafarroako Suhiltzaile profesionalen eta boluntarioen etxeen sareko langile operatiboen eta bigarren jarduerakoen uniformeak eta ekipamendua zehaztea.

k) Zerbitzuen funtzionamendua gainbegiratu eta kontrolatzea.

l) Langile operatiboen lan araubidea, egutegiak, ordutegiak eta ordainsariak kontrolatzea.

m) Nafarroako Suhiltzaileen zerbitzu operatiboetan funtzionalki esku hartzen duten Nafarroako Suhiltzaile boluntarioen taldeekin sinatu beharreko hitzarmenak eta itunak prestatu eta kudeatzea.

n) Manatzen zaizkion obra, instalazio eta ekipamendu programatuetarako inbertsioak kudeatzea.

ñ) Zuzendaritza nagusiak agintzen dion beste edozein edo indarra duten xedapenek esleitzen dizkiotenak.

70. artikulua . Nafarroako Suhiltzaileen Zerbitzuaren egitura Nota de Vigencia.

1. Nafarroako Suhiltzaileen Zerbitzuak atal hauek ditu bere egituran:

a) Prebentzio, Ikuskapen eta Zabalkunde Atala.

b) Gai Teknikoen, Logistikaren eta Ekipoen Atala.

c) Esku-hartze Operatiboaren, Suhiltzaile Etxeen, Kanpainen eta Taldeen Atala.

d) Prestakuntza Atala.

e) Gai Administratiboak eta Langileria Kudeatzeko Atala.

2. Atalek talde operatiboak izaten ahalko dituzte, bai eta erreskate taldeak eta talde bereziak ere, su-itzaltzearen eta salbamenduaren arloan eskumenak dituen departamentuko titularraren foru aginduaren bidez sortuko direnak. Agindu horietan taldeen tamainari eta berezitasunei buruzko irizpideak agertuko dira.

Talde bakoitzean suhiltzaile agintari bat izanen da buru. Haren maila ezaugarrien arabera ezarriko da, eta aipatutako foru aginduan agertuko da.

3. Nafarroako Suhiltzaileen Zerbitzuak eskualdeak eta suhiltzaile etxeak ditu bere lurralde egituran.

4. Eskualdeak banaketa geografikoak dira, beren baitan suhiltzaile etxe bat edo batzuk hartzen dituztenak. Lehendakaritzako, Berdintasuneko, Funtzio Publikoko eta Barneko Departamentuko kontseilariaren foru agindu bidez ezarriko dira.

Eskualde bakoitzean suhiltzaile agintari bat izanen da buru. Haren maila ezaugarrien arabera ezarriko da eta aipatutako foru aginduan agertuko da.

5. Nafarroako Suhiltzaileen Zerbitzuko suhiltzaile etxeak Lehendakaritzako, Berdintasuneko, Funtzio Publikoko eta Barneko Departamentuko kontseilariaren foru agindu bidez sortu eta deseginen dira. Bertan zehaztuko dira haien tipologia, langileen eta esku-hartzearen kopurua, xede dituzten herriak eta arriskuen mapa.

Suhiltzaile etxe bakoitzean suhiltzaile agintari bat izanen da buru. Haren maila suhiltzaile etxearen motaren araberakoa izanen da eta aipatutako foru aginduan agertuko da.

6. Erregelamendu bidez, bigarren jarduerako taldeak ezar daitezke, Nafarroako Suhiltzaileen Zerbitzuaren menpe eginkizunei eta antolaketari dagokienez. Haien ezaugarriak, lan baldintzak eta lehentasunak Lehendakaritzako, Berdintasuneko, Funtzio Publikoko eta Barneko Departamentuaren titularraren foru aginduaren bidez alda daitezke.

71. artikulua . Prebentzio, Ikuskapen eta Zabalkunde Atalaren esparru material eta funtzionala.

Prebentzio, Ikuskapen eta Zabalkunde Atalak eginkizun hauek izanen ditu:

a) Suteen eta ezbeharren prebentzioaren arloko araudia betetzen den ikuskatzeko planifikatzen diren jarduerak egitea, Babes Zibilerako Zerbitzuko unitateekin koordinaturik, protokoloak agintzen duen moduan.

b) Hondamendiei eta istripu handi eta txikiei aurrea hartzeko autobabeseko edo babes zibileko neurriak, oro har gizarteari eta, bereziki, ikasleei eta langileei, zabaltzeko planifikatzen diren informazio eta prestakuntza jarduerak egiten laguntzea, Babes Zibileko eta Larrialdietako Zerbitzuko unitateekin koordinaturik, protokoloak agintzen duen moduan.

c) Entitateei eta erakunde publiko zein pribatuei sostengu eta aholkua ematea, ebakuazio eta autobabeserako beren planak egin ditzaten.

d) Bere eskura jarritako zentro, instalazio eta jardueren autobabeserako eta ebakuaziorako planen prestaketa, mantentze-lanak eta berrikuspenak gainbegiratzea, Babes Zibileko Zerbitzuko unitateekin koordinaturik, halako planak beharrezkoak diren kasuetan.

e) Gertatzen diren ezbeharren ikerketa egitea, sortzeko eta garatzeko arrazoiak zehaztearren, babes zibileko eta larrialdietako eta Nafarroako Suhiltzaileen gainerako unitateekin eta, kasua bada, segurtasun indar eta kidegoetako behar diren unitateekin lankidetzan.

f) Administrazio eta kudeaketa lanak, bigarren jardueraren egoerarekin bateragarriak direnak, Prestakuntza Atalarekin zuzenean koordinaturik.

g) Prebentzio eta su-itzaltze zerbitzuen zabalkunde eta transmisio lanak hedabide eta herritarrekin, Nafarroako Foru Komunitateko Administrazioaren esparruan horretarako eskumena duten bide eta organoen bitartez.

h) Zuzendaritza nagusiak agintzen dion beste edozein edo indarra duten xedapenek esleitzen dizkiotenak.

72. artikulua . Gai Teknikoen, Logistikaren eta Ekipoen Atalaren esparru materiala eta funtzionala.

Gai Teknikoen, Logistikaren eta Ekipoen Atalak eginkizun hauek izanen ditu:

a) Nafarroako suhiltzaile profesionalen eta boluntarioen etxeen sareko material teknikoaren, ibilgailuen, jantzien, ekipoen eta azpiegituren egoeraren jarraipena egitea eta arlo horietan plangintzarik eta programaziorik baden begiratzea.

b) Nafarroako Suhiltzaileen eta Babes Zibileko eta Larrialdietako zerbitzuen logistika kudeatzea, funtzionamendu egokia izan dezaten.

c) Material, ibilgailu, ekipo eta azpiegituren beharrak atzeman direla, aztertzen ari direla eta, bidezko bada, konponbidean egon daitezen programaturik daudela koordinatzea.

d) Baldintza teknikoen agiriak prestatzea, ibilgailuen, material teknikoaren, ekipoen, ekipamenduaren eta azpiegituren arloetarako.

e) Zehaztapen teknikoak prestatu eta eguneratzea.

f) Langile operatiboen uniformeak eta ekipamendua proposatzea.

g) Eraikinen, instalazioen eta azpiegituren mantentze-lanez arduratzea.

h) Ibilgailu, ekipo, makineria, material, jantzi, ekipamendu eta azpiegituren beharrei buruzko txostenak hartu, prestatu eta aztertzea.

i) Inbentarioak, materialak, ekipoak, ibilgailuak eta ekipamendua kontrolatzea eta haien egoeraren berri izatea.

j) Zehaztapen teknikoak, biltegia, ibilgailuak, materialak, ekipoak eta ekipamendua mantentzea.

k) Bere eskumenen esparruko araudia eta legezko xedapenak bildu eta eguneratzea.

l) Atalari atxikitako unitateen eta langileen jarduera koordinatzea, gainbegiratzea eta sostengua ematea, helburuak ezarriz, haiek betetzen direla kontrolatuz eta haien jarduera koordinatuz, Nafarroako Suhiltzaileen Zerbitzuak ematen dituen jarraibideekin bat.

m) Azterlanak, txostenak eta proiektuak prestatzea zerbitzuarentzat.

n) Laguntza teknikoa Nafarroako Suhiltzaileen Zerbitzuko eta Babes Zibileko eta Larrialdietako Zerbitzuko gainerako atalentzat.

ñ) Zuzendaritza nagusiak agintzen dion beste edozein edo indarra duten xedapenek esleitzen dizkiotenak.

73. artikulua . Eskuhartze Operatiboaren, Suhiltzaile Etxeen, Kanpainen eta Taldeen Atalaren esparru material eta funtzionala.

Esku-hartze Operatiboaren, Suhiltzaile Etxeen, Kanpainen eta Taldeen Atalak eginkizun hauek izanen ditu:

a) Nafarroako Suhiltzaile profesionalen suhiltzaile etxeen sarearen kudeaketa operatiboa, hau da, deitzen zaienean esku hartzeko edo eman behar dituzten prebentzio zerbitzuak gauzatze aldera.

b) Nafarroako Suhiltzaile profesionalen suhiltzaile etxeen sareko giza baliabideen eta baliabide materialen eraginkortasun osoa bermatzea, zerbitzuei kalitate estandarren eta isokronen irizpideetatik ematen zaien erantzuna berdintsua izan dadin Nafarroa osoan.

c) Jarduerak, zentroak, establezimenduak eta instalazioak ikuskatzeko planetan agintzen zaizkion lanak egitea.

d) Zentro, instalazio eta jardueren autobabeserako eta ebakuaziorako planen prestaketa, mantentze-lanak eta berrikuspenak gainbegiratzea, Babes Zibileko eta Larrialdietako Zuzendaritzako unitateekin koordinaturik.

e) Babes Zibileko eta Larrialdietako Zerbitzuarekin koordinaturik, larrialdietarako autobabeseko eta babes zibileko neurriak zabaltzeari begira agintzen zaizkion planifikatutako informazio eta prestakuntza jarduerak egitea.

f) Esku hartzeko gutxieneko zerbitzuen eta langile operatiboen lan egutegien kontrola eta segimendua egitea.

g) Suhiltzaile etxeetako zuzkidurak aztertu eta kontrolatzea, esku hartzeko gaitasunaren eraginkortasuna hobetzearren.

h) Langile operatiboen segimendu berariazkoa egitea laneko arriskuen prebentzioko eta lan osasuneko neurriei dagokienez.

i) Zuzendaritzak prestatutako instalazioen, ibilgailuen, materialen eta ekipoen mantentze-planen kontrolean eta segimenduan laguntzea.

j) Lurraldeetako suhiltzaile etxeetako biltegietako inbentarioak eta ekipamendua kontrolatu eta haien jarraipena egitea.

k) Nafarroako suhiltzaileen zerbitzu bereziak diseinatu, martxan jarri eta kudeatzea, istripu handi eta txikietan eta babes zibileko larrialdietarako planetan ezarritako egoeretan aurrea hartu edo esku hartzeko lanetan sortzen diren beharretarako.

l) Nafarroako eskualdeetako baso-suteen kontrako kanpainak diseinatu, martxan jarri eta kudeatzea.

m) Nafarroako Suhiltzaileen Zerbitzuko osasun unitateek larrialdietarako osasun garraioko sarean duten parte-hartzea koordinatzea.

n) Honako hauek diseinatu, martxan jarri, kudeatu eta etengabe ebaluatzea: uretako eta mendiko erreskate taldeak, bai eta aldi baterako edo modu iraunkorrean eratzen ahal diren esku-hartze talde bereziak ere, eta bereziki, tartean gai arriskutsuak eta NEBK gaiak dauden istripuetarako direnak.

ñ) Langile operatiboen esku-hartze eta mobilizaziorako protokoloak prestatzea.

o) Zerbitzuaren erantzun operatiboa aztertzea, ondokoei dagokienez: gutxieneko zerbitzuak, isokronen analisia, eskualdeen araberako suhiltzaile etxeen banaketa eta erantzun-denborak.

p) Babes zibileko planen aplikazio operatiboa, zerbitzuaren erantzun operatibotik abiatuta, batez ere ondoko gaiei buruzkoak: salgai arriskutsuak, tunelak, lurrikarak, uholdeak, baso-suteak.

q) Babes zibilerako plan berezien esparruan, simulakroen antolakuntzan parte hartzea.

r) Nafarroako Foru Komunitateko Nafarroako Suhiltzaile boluntarioen taldeekin koordinatzea.

s) Zuzendaritza nagusiak agintzen dion beste edozein edo indarra duten xedapenek esleitzen dizkiotenak.

74. artikulua . Prestakuntza Atalaren esparru material eta funtzionala.

Prestakuntza Atalak eginkizun hauek beteko ditu:

a) Nafarroako Segurtasun eta Larrialdi Eskolarekin elkarlanean, Nafarroako Suhiltzaileen Zerbitzuaren etengabeko prestakuntza plana diseinatu, martxan jarri, kudeatu eta ebaluatzea.

b) Nafarroako Segurtasun eta Larrialdi Eskolari laguntzea ondokoen gaineko ekintzen kudeaketan eta tutoretzetan: Nafarroako Suhiltzaileen Zerbitzuaren oinarrizko prestakuntza, espezializaziorako prestakuntza eta etengabeko prestakuntza.

c) Nafarroako Suhiltzaileen Zerbitzuaren etengabeko prestakuntza fisikorako programa diseinatu, martxan jarri, kudeatu eta ebaluatzea.

d) Nafarroako Suhiltzaileen Zerbitzuaren menpeko lanpostuetan txertatzeko, sartzeko eta mailaz igotzeko curriculumak diseinatzea, Segurtasun eta Larrialdi Eskolarekin elkarlanean.

e) Langile operatiboen prestakuntza fisikoa kontrolatu eta haren jarraipena egitea.

f) Laguntza ematea Nafarroako Suhiltzaileen Zerbitzuko eta Babes Zibileko eta Larrialdietako Zerbitzuko beste edozein atali.

g) Zuzendaritza nagusiak agintzen dion beste edozein edo indarra duten xedapenek esleitzen dizkiotenak.

75. artikulua . Gai Administratiboak eta Langileria Kudeatzeko Atalaren esparru material eta funtzionala.

1. Gai Administratiboak eta Langileria Kudeatzeko Atalak eginkizun hauek izanen ditu:

a) Ekipamenduen eta instalazioen berrikuntza eta mantentze-lanak planifikatzea eta sustatzea.

b) Informazio lana, antolaketa lana eta agiriak kudeatu eta koordinatzea.

c) Datu estatistikoak kudeatzea.

d) Administrazio prozesuak koordinatzea, Nafarroako Suhiltzaileen Zerbitzurako jarduketa irizpide bateratuak ezarriz.

e) Administrazioaren ekoizpena hobetzeko neurri teknikoak proposatu eta haien ezarpenaren jarraipena egitea.

f) Kontratuak kudeatzea, hau da, obretakoak, zerbitzuetakoak, laguntza teknikokoak eta hornidurakoak.

g) Zentro berekietako ondasun eta zerbitzuen hornidura koordinatu eta kontrolatzea.

h) Berekiak ez diren entitateekiko lankidetza akordioak kudeatzea.

i) Aseguruak kudeatu eta kontrolatzea.

j) Nafarroako Suhiltzaileen zentroak eta zerbitzuak koordinatzea lan eskubide eta eginbeharrak begiratu eta betetzeari dagokionez.

k) Kudeaketa administratiboaren eta langileriaren kudeaketaren arloetarako garatu beharreko aplikazio informatikoen beharrak jakinarazi eta kontrolatzea.

l) Jendearentzako arreta zerbitzua gainbegiratu eta kontrolatzea.

m) Zerbitzuko zuzendaritzak edo Barne Zuzendaritza Nagusiak agintzen dion beste edozein edo indarra duten xedapenek esleitzen dizkiotenak.

2. Halaber, ofizial, ofizialorde, sarjentu, kabo eta suhiltzaile lanpostuetan ari diren langileei eta Nafarroako Suhiltzaileen Zerbitzuari atxikitako kanpainetako gainerako langile operatiboei dagokienez, Gai Administratiboak eta Langileria Kudeatzeko Atalak eginkizun hauek izanen ditu:

a) Langileriaren kudeaketari jarraipena egin, eta hura koordinatu eta kontrolatzea.

b) Langileriaren arloko espedienteak tramitatzea, Barneko zuzendari nagusiari edo zerbitzuko zuzendariari baldin badagokio haien gainean ebaztea.

c) Funtzio Publikoko Zuzendaritza Nagusian tramitatzea langileen gai guztiak, betiere gai horiei buruzko ebazpena ematea haren eskumena bada.

d) Langileen erregistroa ireki, mantendu eta eguneratzea.

e) Ezarririk dagoen erregelamenduzko prozedurari jarraituz aldi baterako langileak kontratatzeko beharrak gainbegiratzea.

f) Absentismoa kontrolatu, baja-agiriak tramitatu eta langileen egutegirako, absentismorako, oporretarako eta lizentzietarako programa ezarri eta kudeatzea.

g) Lanaldiz kanpoko lanei buruzko araudi orokorra betetzen ote den begiratu eta kontrolatzea.

h) Sindikatuekiko eta Nafarroako Suhiltzaileen ordezkaritza organoekiko harremanak, Funtzio Publikoko Zuzendaritza Nagusiaren jarraibideei loturik.

5. ATALA. BABES ZIBILEKO ETA LARRIALDIETAKO ZERBITZUA

76. artikulua . Babes Zibileko eta Larrialdietako Zerbitzuaren esparru material eta funtzionala.

Babes Zibileko eta Larrialdietako Zerbitzuak foru dekretu honetan adierazten diren eginkizunak izanen ditu, arlo hauetan:

a) Babes zibilaren arloan, arriskuei aurrea hartzeko planak eta programak diseinatu eta martxan jartzea.

b) Babes zibilaren gaineko azterketa teknikoak egitea.

c) Nafarroako Foru Komunitatearen lurralde eremuan aplikagarriak diren babes zibileko planak prestatu, ezarri eta haien eraginkortasuna mantentzea.

d) Larrialdietarako tokian tokiko planak homologatzeko prozesua kudeatzea.

e) Nafarroako Foru Komunitateko baliabideen katalogoak, arriskuen katalogoa eta mapa eta jarduera arriskutsuen katalogoak prestatu eta etengabe eguneratzea.

f) Babes zibileko planetarako baliabideak planifikatu eta kudeatzea, bereziki irrati-komunikazioetakoak eta telekomunikazioetakoak.

g) Larrialdiak kudeatzeko zentroa zuzentzea.

h) Larrialdien gaineko informazio sistemak diseinatu, abian jarri eta kudeatzea.

i) Administrazio eta teknika arloetan, Babes Zibileko koordinazio organoen euskarria izatea.

j) Jarduera sailkatuei eta, oro har, arriskuen prebentzioari eta babes zibilari buruzko espedienteak direla-eta, ikuskatze jarduketak eta egin beharreko txosten teknikoak kudeatzea, Barne Zuzendaritza Nagusiko organo teknikoa baita.

k) Berekiak ez diren entitateekin larrialdien arretarako eta babes zibilerako sinatutako itun eta hitzarmenak prestatu eta kudeatzea.

l) Udaltzaingoak koordinatzea babes zibilaren eta larrialdien arloan.

m) Zuzendaritza nagusiak agintzen dion beste edozein edo indarra duten xedapenek esleitzen dizkiotenak.

77. artikulua . Babes Zibileko eta Larrialdietako Zerbitzuaren egitura.

Babes Zibileko Zerbitzuak atal hauek ditu bere egituran:

a) SOS Nafarroa Atala.

b) Larrialdien eta Komunikazio Sistemen Plangintza eta Koordinazio Atala.

c) Larrialdietako Prebentzio, Informazio eta Prestakuntza Atala.

78. artikulua . SOS Nafarroa Atalaren esparru material eta funtzionala.

SOS Nafarroa Atalak eginkizun hauek izanen ditu:

a) 112 SOS Nafarroa larrialdiak kudeatzeko zentroaren kudeaketa material eta operatiboa, haren funtzionamendurako erregelamenduan agindutakoari jarraikiz.

b) Baliabideak larrialdietan mobilizatzeko protokoloak, baliabideen katalogoak eta, oro har, informazioa eta datu baseak prestatu eta mantentzea.

c) Operadoreen eta aretoko buruen jarduera gainbegiratzea.

d) Eguneko jarduerari buruzko parteak, oharrak eta jakinarazpenak egitea.

e) Lan araubidea, txandak, egutegia eta ordutegiak kontrolatzea.

f) 112 SOS Nafarroa zentroan aritzen diren mediku koordinatzaileen goi koordinazio funtzionala egitea.

g) Larrialdiak kudeatzeko zentroari atxikitako langileen etengabeko prestakuntza gainbegiratzea.

h) Egindako prestazioen azterketa eta ebaluazioa.

i) Larrialdietarako baliabideak kudeatzeko beste zentro batzuekin koordinatzea.

j) Boluntarioen erakundeekin koordinatzea, hala nola Gurutze Gorria, DYA, Salbamendu Txakurren Taldeak, Hondamendietako Esku-hartze Psikologikoaren Taldea, Kirol Federazioak, Babes Zibileko Udal Batasunak eta babes zibileko eta larrialdietako lanetan boluntario gisa aritzen ahal den beste edozein erakunde, Nafarroako Suhiltzaile Boluntarioen Elkarteak izan ezik, Nafarroako Suhiltzaileen Zerbitzuaren esparruan sartuta baitaude.

k) Zuzendaritza nagusiak agintzen dion beste edozein edo indarra duten xedapenek esleitzen dizkiotenak.

79. artikulua . Larrialdien eta Komunikazio Sistemen Plangintza eta Koordinazio Atalaren esparru material eta funtzionala.

1. Larrialdien eta Komunikazio Sistemen Plangintza eta Koordinazio Atalak eginkizun hauek izanen ditu:

a) Larrialdietan esku hartzeko eta zerbitzu operatiboen jarduketa bateratuetarako protokoloak prestatu eta mantentzea.

b) Zehaztuko diren ikuskatze eta kontrol prozeduren bidez, zerbitzu operatiboen jarduketa eta ezarritako protokoloak betetzen direla gainbegiratzea.

c) Protokoloen aplikazioak sortzen ahal dituen ohiz kanpoko egoerak ebaztea, bai eta larrialdiak kudeatzeko sistemaren funtzionamenduan gerta daitezkeen akatsak berehala zuzentzea ere.

d) Larrialdietako planetan, kasuan kasuko aktibatze mailan, kudeaketarako laguntza teknikoa ematea eta, zuzendaritza teknikoa edo aholku batzordea oraindik eratu gabe dagoenean, zuzendaritza eta koordinazio eginkizunak bere gain hartzea.

e) Babes zibileko informazio eta alarma sistemen eta sareen definizioa eta jarraipen teknikoa.

f) Larrialdien arretaren eta babes zibilaren arloko erabaki, itun edo hitzarmen proposamenak prestatzea eta haien jarraipena egitea.

g) Osasun zerbitzuekin batera aritzea larrialdiak planifikatzean eta kudeatzean, osasun kontuei dagokienez, bai eta hil edo biziko larrialdiez arduratzeko berariazko protokoloak prestatzean ere.

h) Larrialdietarako osasun garraioko sarea kudeatzea, osasun zerbitzuekin koordinatuta.

i) Babes zibileko plan bereziak direla-eta, simulakroak koordinatu eta antolatzea.

j) Nafarroako Gobernuak onetsi beharreko babes zibileko planak proposatu eta prestatzea, bai eta haiek ezarri eta haien eraginkortasunari eustea ere.

k) Planen prestaketa eta ezarpena bultzatu eta koordinatzea, haien esparrua herria edo eskualdea denean edo haien prestaketa toki entitateen esku dagoenean.

l) Babes zibileko eskualde, udal eta udalez gaindiko planak homologatzeko proposamena eta azterketa teknikoa egitea.

m) Hondamendi arriskuen eta arrisku berezi eta berariazkoen gaineko ebaluazioak egitea.

n) Istripu larri eta txikiei buruzko eta, oro har, gertatzen diren larrialdi eta hondamendiei buruzko azterketak eta estatistikak egitea.

ñ) Larrialdiak kudeatzeko zentroko ekipoen eta instalazioen eta, bereziki, larrialdiak kudeatzeko sistemaren mantentze-lanak.

o) Nafarroako Foru Komunitatean izaten diren larrialdiei erantzuteko irrati-komunikazioen sareaz arduratzea eta jarraipen teknikoa egitea, eta sare hori eta dauden sare sektorialak elkarrekin koordinatzea.

p) Zerbitzu berekietan instalatutako komunikazio sistemen eta baliabideen inbentarioa egitea eta kontrolatzea, are haien erabilera babes zibilarekin nahiz herritarren segurtasunarekin loturiko beste zerbitzu, erakunde edo instituzio batzuei laga bazaizkie ere.

q) Nafarroako Suhiltzaileen eta Babes Zibileko eta Larrialdietako zerbitzuen informazio sistema berekia, aginte koadroak eta telekomunikazio sistemak diseinatu eta martxan jartzea.

r) Zuzendaritza nagusiak agintzen dion beste edozein edo indarra duten xedapenek esleitzen dizkiotenak.

2. Larrialdietan, oro har, eta babes zibileko planen aktibazio fase guztietan, arestian aipatutako eginkizunak betetzeko, segurtasunaren eta babes zibilaren arloetako goi mailako teknikariak, Nafarroako suhiltzaileen ofizialak eta, kasua izanez gero, larrialdien kudeaketarekin loturiko bestelako teknikariak aritzen ahalko dira. Langile horiek, eginkizunei dagokienez, Larrialdien eta Komunikazio Sistemen Plangintza eta Koordinazio Atalari atxikiko zaizkio. Txanden eta zaintza orduen sistema bat ezarriko da, eta halaber, lana antolatuko da, aipatutako taldeetako ordezkari bana egon dadin gutxienez une oro, eta hortaz, etengabeko arreta berma dadin.

Langile horiek izendatzea eta txanden eta zaintza orduen araubidea antolatu eta ezartzea Barneko zuzendari nagusiaren ebazpen baten bidez eginen da. Ondorio horietarako, langile izendatuek dagozkien ordainsariak jasoko dituzte.

80. artikulua . Larrialdietako Prebentzio, Informazio eta Prestakuntza Atalaren esparru material eta funtzionala.

Larrialdietako Prebentzio, Informazio eta Prestakuntza Atalak eginkizun hauek izanen ditu:

a) Arriskuen prebentziora bideratutako ekintza mota oro programatzea.

b) Beste entitate eta erakunde batzuei aholkularitza teknikoa ematea arriskuen prebentzioari buruz.

c) Hondamendien eta istripu larri zen txikien kontrako segurtasunaren gaineko ikerketa teknikoak egitea.

d) Suteen eta bestelako arriskuen kontrako segurtasun neurriei eta, bereziki, jarduera sailkatuei eta autobabeserako planei buruzko txostena egitea behar diren espediente administratiboetan.

e) Gertatutako ezbeharren ikerketa teknikoa egitea, haiek sortzeko arrazoiak eta garatzeko faktoreak zehaztearren, Nafarroako Suhiltzaileen Zerbitzuko Zuzendaritzako unitateekin koordinatuta, protokoloak agindutako moduan.

f) Suteen eta bestelako arriskuen kontrako segurtasun neurriei buruzko jardueren Ikuskapen Plana prestatu eta haren segimendua egitea, Nafarroako Suhiltzaileen Zerbitzuko Zuzendaritzako unitateekin lankidetzan, protokoloak agindutako moduan.

g) Autobabesari eta babes zibilari buruzko neurriak zabaltzeko informazio eta prestakuntza jarduerak diseinatu, abian jarri, kudeatu eta ebaluatzea, Nafarroako Suhiltzaileen Zerbitzuko Zuzendaritzako unitateekin lankidetzan, protokoloak agindutako moduan.

h) Zuzendaritza nagusiak agintzen dion beste edozein edo indarra duten xedapenek esleitzen dizkiotenak.

V. KAPITULUA. KOMUNIKAZIOKO ETA ERAKUNDEEKIKO HARREMANETAKO ZUZENDARITZA NAGUSIA

1. ATALA. ESKUMENEN ESPARRU MATERIALA ETA EGITURA

81. artikulua . Komunikazioko eta Erakundeekiko Harremanetako Zuzendaritza Nagusiaren eskumenen esparru materiala.

Komunikazioko eta Erakundeekiko Harremanetako Zuzendaritza Nagusiak foru dekretu honetan aipatzen diren eskudantziak izanen ditu arlo hauetan:

a) Nafarroako Foru Komunitateko Administrazioko departamentuetako eta beren kabineteetako politika informatiboak koordinatzea.

b) Komunikabideekiko harremanez arduratzea.

c) Publizitate instituzionala.

d) Nafarroako Gobernuaren eta Nafarroako Foru Komunitateko Administrazioaren agerpena sare sozialetan.

e) Ikus-entzunezko komunikazio zerbitzuak.

f) Nafarroako Gobernuaren eta Nafarroako Foru Komunitateko Administrazioaren agerpena Interneten.

g) Nafarroako Foru Komunitateko Administrazioaren tramite eta zerbitzuen katalogoa.

h) Nafarroako Foru Komunitatea ordezkatzea Espainiako foro, batzorde, biltzar eta erakundeetan, deusetan galarazi gabe Estatuko Administrazio Orokorraren eta Nafarroako Gobernuko gainerako departamentuen eskumenak.

i) Nafarroako Gobernuaren protokoloa eta zeremoniala.

j) Nafarroako nortasuna hedatzea.

k) Nafarroako Gobernuaren argitalpenak eta paperezko materialak.

l) Nafarroako Gobernuaren eta haren departamentuen identitate korporatiboa.

m) Komunikazio politika koordinatzea Nafarroako Enpresa Korporazio Publikoarekin eta Nafarroako Foru Komunitateko Administrazioaren mendeko sektore publiko osoarekin.

n) Indarra duten xedapenek Lehendakaritzako, Berdintasuneko, Funtzio Publikoko eta Barneko Departamentuari esleitzen dizkiotenak, zuzendaritza nagusiak bere duen esparruan.

82. artikulua . Komunikazioko eta Erakundeekiko Harremanetako Zuzendaritza Nagusiaren egitura.

Komunikazioko eta Erakundeekiko Harremanetako Zuzendaritza Nagusiak zerbitzu hauek ditu bere egituran:

a) Komunikazio Zerbitzua - Gobernuaren Eledunaren Bulegoa

b) Proiekzio Instituzionalaren Zerbitzua.

2. ATALA. KOMUNIKAZIO ZERBITZUA - GOBERNUAREN ELEDUNAREN BULEGOA

83. artikulua . Komunikazio Zerbitzua Gobernuaren Eledunaren Bulegoaren esparru material eta funtzionala.

Komunikazio Zerbitzua - Gobernuaren Eledunaren Bulegoak foru dekretu honetan ezarritako eskudantziak izanen ditu, honako arlo hauetan:

a) Nafarroako Gobernuak komunikabideekin dituen harremanen arloan finkatzen den politika sustatu eta betearaztea.

b) Nafarroako Gobernuak hartutako erabakiei eta Gobernuko kideen jardunari buruzko informazioa koordinatzea eta komunikabideek egiten dituzten informazio eskaerei erantzutea.

c) Departamentuei Nafarroari buruz argitaratutako informazioa ematea.

d) Foru Komunitateko Administrazioak eta haren menpeko erakundeek nahiz entitateek sustaturiko publizitatearen arloan, aholkularitza eta koordinazio lanak egitea.

e) Nafarroako Gobernuaren sare sozialetako agerpena zuzentzea.

f) Ikus-entzunezko sektorea sustatzeko laguntzak.

g) Nafarroako Foru Komunitatean ikus-entzunezko komunikazio zerbitzuak ematearekin lotutakoak.

h) Nafarroako Foru Komunitateko Administrazioaren zerbitzu eta tramiteen katalogoa zuzentzea.

i) Zuzentzea Nafarroako Gobernuak eta Nafarroako Foru Komunitateko Administrazioak Interneten duten agerpena, herritarrei zuzendua.

j) Informazioaren arloko lanbide-elkarteekiko harremanez arduratzea.

k) Aurrekoen antzekoa edo osagarria izanik, Komunikazioko eta Erakundeekiko Harremanetako Zuzendaritza Nagusiak agintzen dion beste edozein eginkizun.

84. artikulua . Komunikazio Zerbitzua Gobernuaren Eledunaren Bulegoaren egitura.

Komunikazio Zerbitzua - Gobernuaren Eledunaren Bulegoak atal hauek ditu bere egituran:

a) Prentsa Bulegoaren Atala.

b) Publizitate Instituzionalaren, Sare Sozialen eta Ikus-entzunezko Baliabideen Atala.

c) navarra.es Atariaren Atala.

85. artikulua . Prentsa Bulegoaren Atalaren eremu materiala eta eginkizunak.

Prentsa Bulegoaren Atalak foru dekretu honetan ezarritako eskudantziak ditu ondoko arlo hauetan:

a) Nafarroako Gobernuaren eledunari laguntzea komunikabideei Nafarroako Gobernuaren eta Nafarroako Foru Komunitatearen Administrazioaren jarduerei buruz ematen zaien informazioaren arloan.

b) Nafarroako Gobernuari eta departamentuei aholku teknikoak ematea komunikabideen arloan.

c) Nafarroari buruz edo Nafarroako Gobernuaren jardunari buruz idatzizko, ikus-entzunezko edo Interneten bidezko komunikabideetan argitaratzen edo agertzen diren informazioak jaso eta antolatzea.

d) Nafarroako Gobernuaren jardunari buruzko politika informatiboaren eraginkortasuna ebaluatzea.

e) Nafarroako Gobernuari buruzko berriak zabaltzea “navarra.es” Interneteko Atariaren eta sare sozialen bidez.

f) Nafarroako Jauregiko Prentsa Aretoa kudeatzea.

g) Nafarroako Gobernuaren Irudien Funtsa kudeatu eta zabaltzea.

h) Aurrekoen antzekoa edo osagarria izanik, Komunikazio Zerbitzua - Gobernuaren Eledunaren Bulegoak agintzen dion beste edozein eginkizun.

86. artikulua . Publizitate Instituzionalaren, Sare Sozialen eta Ikusentzunezko Baliabideen Atalaren esparru material eta funtzionala.

Publizitate Instituzionalaren, Sare Sozialen eta Ikus-entzunezko Baliabideen Atalak foru dekretu honetan ezarritako eskudantziak izanen ditu, honako arlo hauetan:

a) Nafarroako Gobernuaren publizitate-kanpainen plangintza eta diseinua.

b) Arloko edo departamentuetako publizitate-kanpainen edo -iragarkien kudeaketa, diseinua eta jarraipena.

c) Nafarroako Gobernuaren sare sozialen kudeaketa eta arloko eta departamentuetako sare sozialekiko koordinazioa.

d) Nafarroako ikus-entzunezkoen sektorearen sustapena.

e) Foru Komunitatean ikus-entzunezko komunikazio zerbitzuen arloko lizentzia lehiaketak, baimenak eta bestelako prozedurak tramitatzea.

f) Nafarroako ikus-entzunezko komunikazio zerbitzuen emaileen Erregistroa kudeatzea eta mantentzea.

g) Ikus-entzunezko komunikazio zerbitzuen arloan Estatuko Administrazio Orokorrarekin harremana izatea.

h) Aurrekoen antzekoa edo osagarria izanik, Komunikazio Zerbitzua - Gobernuaren Eledunaren Bulegoak agintzen dion beste edozein eginkizun.

87. artikulua . navarra.es Atariaren Atalaren esparru material eta funtzionala.

navarra.es Atariaren Atalak foru dekretu honetan ezarritako eskudantziak ditu ondoko arlo hauetan:

a) navarra.es web atariaren estilo liburua eta ataria antolatzeko eta funtzionatzeko eredua prestatzea.

b) navarra.es web atarian dauden edukiak sustatu, homogeneizatu eta gainbegiratzea, eta eduki berriak gehitzeko aukera aztertzea.

c) navarra.es web atarian eleaniztasuna sustatzea.

d) Nafarroako Foru Komunitateko Administrazioaren zerbitzu eta tramiteen katalogoa kudeatzea.

e) navarra.es web atarian edukia sortzeko prozesurako laguntza, eta zuzendaritzaren laguntza teknikoa.

f) navarra.es web atariaren erabilera-datuak aztertzea.

g) navarra.es web atariko zuzendaritzak atarirako onesten dituen ekintza planak gauzatzea.

h) Aurrekoen antzekoa edo osagarria izanik, atxikia duen zerbitzuak agintzen dion beste edozein eginkizun.

3. ATALA. PROIEKZIO INSTITUZIONALAREN ZERBITZUA

88. artikulua . Proiekzio Instituzionalaren Zerbitzuaren esparru material eta funtzionala.

Proiekzio Instituzionalaren Zerbitzuak foru dekretu honetan ezarritako eskudantziak izanen ditu, honako arlo hauetan:

a) Nafarroako Gobernuaren protokoloa eta zeremoniala.

b) Gobernuak erakundeekin, entitateekin eta pertsonekin dituen harreman sozialak.

c) Nafarroaren errealitatea ezagutarazteko ekimenak antolatzea eta ohiz kanpoko ekitaldietan parte hartzea.

d) Nafarroako Foru Komunitateko Administrazioko departamentuek euskarri inprimatuan, ikus-entzunezkoan eta digitalean egiten dituzten argitalpenen plangintza eta edizioa koordinatzea, sustatzea eta banatzea.

e) Nafarroako Gobernuaren Argitalpenen Katalogoko salmenta prezioak baimen ditzala proposatzea Nafarroako Gobernuari.

f) Edizio prozesuarekin lotutako edozein alderdiri buruzko aholkuak ematea Nafarroako Foru Komunitateko Administrazioko departamentuei.

g) Nafarroako Foru Komunitatea ordezkatzen duten adierazpen grafikoen identitateari buruzko arauak proposatu, garatu, aplikatu eta kontrolatzea.

h) Garrantzi berezia duten Nafarroako Gobernuaren argitalpenak sustatzeko jarduerak antolatzea, inprimatuak izan, ikus-entzunezkoak, digitalak zein euskarri berezietan eginak.

i) Nafarroako Foru Komunitatearen iragana, oraina eta etorkizuna ezagutzeko garrantzi berezia duten lanak argitaratzeko proposamenak egitea Nafarroako Gobernuari, euskarri inprimatuan, ikus-entzunezkoan zein digitalean.

j) Aurrekoen antzekoa edo osagarria izanik, Komunikazioko eta Erakundeekiko Harremanetako Zuzendaritza Nagusiak agintzen dion beste edozein eginkizun.

89. artikulua . Proiekzio Instituzionalaren Zerbitzuaren egitura Nota de Vigencia.

Proiekzio Instituzionalaren Zerbitzuak atal hauek ditu bere egituran:

a) Protokolo Atala.

b) Argitalpen Atala.

c) Koordinazio eta Kudeaketa Administratiboko Atala.

90. artikulua . Protokolo Atalaren esparru material eta funtzionala.

Protokolo Atalak foru dekretu honetan ezarritako eskudantziak ditu ondoko arlo hauetan:

a) Nafarroako Gobernuak, lehendakariak edo departamentuetako titularrek, edo Foru Komunitateko Administrazioko departamentuek sustatzen dituzten ekitaldi ofizialak antolatzea.

b) Gobernu taldeari laguntzea egin behar dituen bisitetan eta bestelako jarduera ofizialetan.

c) Gobernuari, Administrazioko beste organo batzuei eta toki entitateei protokoloaren, zeremonialaren eta ekitaldi ofizialak antolatzearen gaineko aholkuak ematea.

d) Nafarroako Jauregian, hots, Gobernuaren egoitzan, egiten diren jarduerak eta bertako bisitak koordinatzea.

e) Proiekzio Instituzionalaren Zerbitzuak agintzen dion beste edozein eginkizun.

91. artikulua . Argitalpen Atalaren esparru material eta funtzionala.

Argitalpen Atalak foru dekretu honetan ezarritako eskudantziak ditu ondoko arlo hauetan:

a) Nafarroako Gobernuaren eta haren departamentuen argitalpen inprimatu, ikus-entzunezko eta digital guztien plangintza eta edizioa koordinatzea.

b) Nafarroako Gobernuaren Argitalpenen Katalogoko salmenta prezioak baimen ditzala proposatzea Nafarroako Gobernuari.

c) Nafarroako Gobernuko departamentuei edizio prozesuari buruzko aholku teknikoak ematea.

d) Nafarroako Foru Komunitatea ordezkatzen duten adierazpen grafikoen identitateari buruzko arauak proposatu, garatu, aplikatu eta kontrolatzea.

e) Nafarroako Gobernuaren Argitalpen Funtsaren obren edizio prozesuaren tramitazio administratiboa eta segimendu teknikoa.

f) Nafarroako Gobernuaren Argitalpen Funtsa gordailutzea, sustatzea, argitalpenak erakundeetan eta saltokietan banatzea eta saltzea.

g) Nafarroako Gobernua ordezkatzen duten adierazpen grafikoak erakusten dituzten ohiko paper-inprimakiak argitaratzea.

h) Proiekzio Instituzionalaren Zerbitzuak agintzen dion beste edozein eginkizun.

91 bis artikulua. Koordinazio eta Kudeaketa Administratiboko Atalaren esparru material eta funtzionala Nota de Vigencia.

Koordinazio eta Kudeaketa Administratiboko Atalak foru dekretu honetan ezarritako eskudantziak izanen ditu, honako arlo hauetan:

a) Proiekzio Instituzionalaren Zerbitzuak esleituta dituen eginkizunak behar bezala betetzeko beharrezkoak diren eginkizun administratiboak koordinatzea.

b) Proiekzio Instituzionalaren Zerbitzuko langileen giza baliabideen kudeaketa administratiboa.

c) Proiekzio Instituzionalaren Zerbitzuan sortzen diren espediente administratiboen kudeaketa, tramitazioa eta artxiboa koordinatzea.

d) Proiekzio Instituzionalaren Zerbitzuko kontabilitatearen kudeaketa koordinatzea.

e) Zerbitzuaren jarduerarako erabiltzen diren datu-baseak eguneratzeko eta mantentzeko lanak koordinatzea.

f) Aplikazio informatikoak eta neurri teknikoak koordinatzea eta kontrolatzea, ekoizpen administratiboa hobetzeko, eta horien ezarpenaren jarraipena egitea.

g) Erosketen kudeaketa eta kontrola eta hornitzaileekiko harremanak (opari instituzionalak, banderak, ostalaritzako hornitzaileak, langileen jantziak...).

h) Ekitaldiak kudeatzeko aplikazioaren (Stela) laguntza teknikoa, mantentze-lanak eta kudeaketa egitea.

i) Atalaren jardueren urteko memoria prestatzea.

j) Agintzen zaion beste edozein eginkizun, zerikusia baldin badu Proiekzio Instituzionalaren Zerbitzuaren eskumenen esparru materialarekin.

VI. KAPITULUA. LEHENDAKARITZAKO, BERDINTASUNEKO, FUNTZIO PUBLIKOKO ETA BARNEKO DEPARTAMENTUKO IDAZKARITZA TEKNIKO NAGUSIA.

92. artikulua . Idazkaritza Tekniko Nagusiaren egitura.

Idazkaritza Tekniko Nagusiak atal hauek ditu egituran:

a) Araubide Juridikoaren Atala.

b) Gai Administratiboak eta Langileria Kudeatzeko Atala.

c) Ekonomia Atala.

d) Estatistiken eta Informazio Kudeaketaren Atala.

93. artikulua . Araubide Juridikoaren Atalaren esparrua eta eginkizunak.

Araubide Juridikoaren Atalak foru dekretu honetan aipatzen diren eskumenak erabiliko ditu, honako hauekin loturik: idazkaritza tekniko nagusiak arautzen dituen Erregelamenduaren 5. artikuluan eta 6. artikuluko a), b) eta c) letretan aipatzen diren eskudantzia juridiko, tekniko eta administratiboak, 9. artikuluko a) letran aipatzen den eginkizuna, departamentuaren jarduketa esparruan ondareko erantzukizunagatik sortzen diren espedienteen tramitazioa eta indarreko xedapenek esleitzen dioten beste edozein, edo agintzen zaizkionak.

Halaber, genero ikuspegiaren zeharkakotasuna aplikatzeari lotutako eginkizunak beteko ditu Lehendakaritzako, Berdintasuneko, Funtzio Publikoko eta Barneko Departamentuaren politikak planifikatu, kudeatu eta ebaluatzean, bat eginik Emakumeen eta Gizonen arteko Berdintasunari buruzko apirilaren 4ko 17/2019 Foru Legearekin.

94. artikulua . Gai Administratiboak eta Langileria Kudeatzeko Atalaren esparru material eta funtzionala.

Gai Administratiboak eta Langileria Kudeatzeko Atalak foru dekretu honetan aipatzen diren eginkizunak beteko ditu arlo hauetan: Nafarroako Foru Komunitateko Administrazioaren eta haren erakunde autonomoen organoetako langileria arloko eskudantziak zehazten dituen foru dekretuan idazkaritza tekniko nagusiei langileriaren arloan esleitzen zaizkienak.

Orobat, Nafarroako Foru Komunitateko Administrazioko idazkaritza tekniko nagusiak arautzen dituen Erregelamenduaren 6. artikuluko e), g) eta h) letretan aipatzen diren eginkizun tekniko-administratiboak izanen ditu, eta indarreko xedapenek esleitzen dioten beste edozein, edo agintzen zaizkionak.

95. artikulua . Ekonomia Atalaren esparru material eta funtzionala.

Ekonomia Atalak foru dekretu honetan aipatzen diren eginkizunak gauzatuko ditu, honako hauekin loturik: Nafarroako Foru Komunitateko Administrazioko idazkaritza tekniko nagusiak arautzen dituen Erregelamenduaren 8. artikuluan aurrekontuari buruz aipatzen diren eskumenak eta, aurrekoei lotuak, kudeatzen duen esparruari dagozkionak. Horretaz gain, indarreko xedapenek esleitzen dioten beste edozein, edo agintzen zaizkionak.

96. artikulua . Estatistiken eta Informazio Kudeaketaren Atalaren esparru material eta funtzionala.

Estatistiken eta Informazio Kudeaketaren Atalak foru dekretu honetan aipatzen diren eginkizunak izanen ditu, honako arlo hauetan:

a) 6. artikuluko j) letran ezarritako eskumen tekniko-administratiboak garatzea; bereziki, departamentuaren web-orria mantendu eta eguneratzea, baita departamentuaren informazio sistemako hobekuntzak sustatu, aholkatu eta koordinatzea ere, eta Nafarroako Foru Komunitatearen Administrazioko idazkaritza tekniko nagusiak arautzen dituen Erregelamenduaren 9. artikuluko b) letran aurreikusitako eginkizuna.

b) Zehazki, Nafarroako Foru Komunitateko Administrazioaren Datu-babesari eta Informazioaren Segurtasunari buruzko Politikan zehaztutako informazioaren segurtasun arduradunaren eginkizunak betetzea, informazioaren segurtasunari buruzko indarreko araudia betetzen dela segurtatzeko eta zaintzeko, barnean dela datu pertsonalen babesa, betiere Funtzio Publikoko Zuzendaritza Nagusiaren eta Idazkaritza Tekniko Nagusiaren eremuaren barnean, eta, zehazki, honako eginkizun hauek:

1. Informazioaren segurtasunaren arloko politikak eta jarraibide zehatzak proposatzea, lantzea, eguneratzea eta horien jarraipena egitea.

2. Honako arlo hauetan informazioaren segurtasun neurriak bultzatzea eta horien hobekuntzen jarraipena egitea: informazioa tratatzeko prozesuak, bere zerbitzuko langileei prestakuntza ematea eta gaitzea, eta erabiltzen diren informazio sistemak. Azken kasu horretan, Eraldaketa Digitaleko Zuzendaritza Nagusiarekin elkarlanean ariko da.

3. Eraldaketa Digitaleko Zuzendaritza Nagusiari laguntzea informazio sistemen segurtasunean sortzen diren gorabeherak kudeatzen, bai euskarri elektronikoan bai beste euskarri batzuetan, segurtasun gorabeherei erantzun erreaktiboak emanez.

4. Barneko auditoretzak egitea eta kanpoko auditoretzak egiten parte hartzea, informazioaren segurtasunari buruzko araudia betetzen dela egiaztatzeko.

c) Ordezkari eginkizunak betetzea departamentuan, Administrazio Elektronikoaren Atalak bultzatutako lantaldeetan. Administrazio elektronikorako tresna berriak erabiltzearen arloan izandako aurrerapenen berri eta jarduteko jarraibideak eta prozedurak emanen dizkie departamentuko unitateetako arduradun eta erabiltzaileei, eta, era berean, lantalde horiei igorriko dizkie unitate horiek identifikatutako behar berriak, iradokizunak edo zalantzak.

d) Indarra duten xedapenek esleitzen dioten beste edozein, edo agintzen zaizkionak.

VII. KAPITULUA. NAFARROAKO ADMINISTRAZIO AUZITEGIA

97. artikulua . Atxikipena, eginkizunak eta egitura.

1. Nafarroako Administrazio Auzitegia Lehendakaritzako eta Gobernu Irekiko Zuzendaritza Nagusiari atxiki zaio eta bere erregelamendu organikoaren arabera arautuko da.

2. Nafarroako Administrazio Auzitegiak zerbitzuen maila organikoa du. Hiru atal eta idazkaritza bat ditu bere egituran, erregelamendu organikoak ematen dizkion eginkizunak burutuko dituztenak.

Lehen xedapen gehigarria.- Eskumenak deskontzentratzeko baldintza orokorrak.

1. Indarrean dauden arauek organo bati ematen dizkioten eskumenak hierarkian menpeko diren beste organo batzuen esku uzten ahal dira, Nafarroako Aldizkari Ofizialean argitaratuko den xedapen orokor baten bitartez, eskumenak esleitzeko arauetan beraietan zehaztutako baldintzak bete beharra galarazi gabe.

2. Lehendakaritzako, Berdintasuneko, Funtzio Publikoko eta Barneko Departamentuko titularrak indarrik gabe uzten ahalko du xedapen gehigarri honetan aipatzen den eskumenen deskontzentrazioa, Nafarroako Aldizkari Ofizialean argitaratu beharko den foru agindu baten bidez.

Bigarren xedapen gehigarria .Deskontzentrazioa.

1. Departamentuko zuzendari nagusiei dagokie, kasuan kasuko eskumenen esparruan, kontratazio arloan indarra duen legeriak Lehendakaritzako, Berdintasuneko, Funtzio Publikoko eta Barneko Departamentuko kontseilariari ematen dizkion eskudantzia administratiboen titulartasuna eta erabilera.

2. Barneko zuzendari nagusiari dagokio, kasuan kasuko eskumenen esparruan, arau-hauste arin eta astunengatik zehapen espedienteen gainean ebazteko indarra duen legeriak Lehendakaritzako, Berdintasuneko, Funtzio Publikoko eta Barneko kontseilariari ematen dizkion eskudantzia administratiboen titulartasuna eta erabilera.

3. Funtzio Publikoko zuzendari nagusiari dagokio Nafarroako Ogasun Publikoari buruzko apirilaren 4ko 13/2007 Foru Legeak, langileen gastuaren kapituluaren barrenean aurrekontuko mugimendu eta transferentzien arloan, Lehendakaritzako, Berdintasuneko, Funtzio Publikoko eta Barneko kontseilariaren esku uzten dituen eskudantzia administratiboen titulartasuna eta erabilera.

Hirugarren xedapen gehigarria .Aholkularitza Juridikoaren jarduketari buruzko arau prozesalak.

1. Aholkularitza Juridikoaren Zerbitzuak, jardun ahal izateko (kereilak aurkeztea barne), Nafarroako Gobernuak aldez aurretik hartutako erabakia beharko du; bestela, lege edo erregelamendu mailako xedapen bati jarraikiz eskumen zehatz hori berariaz esleitua duten organoen edo erakunde autonomoko organo eskudunaren baimena. Dena dela, akzioen eskaintza egonez gero, Aholkularitza Juridikoak zuzenean egiten ahalko ditu, departamentu edo erakunde autonomo eskudunak eskaera egin ondoren.

Kasuan kasuko departamentuak edo erakunde autonomoak proposaturik aurkeztuko ditu salaketak Aholkularitza Juridikoak.

2. Eginkizunei loturiko egite edo ez-egiteengatik epaiketetan Foru Komunitateko Administrazioko eta/edo haren erakunde autonomoetako agintari, funtzionario eta enplegatuen ordezkaritza eta defentsa egiteko, hauek beharko dira: haien departamentuaren edo erakunde autonomoaren proposamena, Aholkularitza Juridikoaren Zerbitzuaren txostena eta Lehendakaritzako, Berdintasuneko, Funtzio Publikoko eta Barneko kontseilariaren baimena.

Premia badago, kontseilari horrek edozein baliabideren bidez emandako aldeko irizpidea aurreratzen ahalko da; bestela, Lehendakaritzako eta Gobernu Irekiko zuzendari nagusiak ematen ahalko du, eta, hori ez badago, Aholkularitza Juridikoaren Zerbitzuko zuzendariak. Hala ere, kontseilariaren baimena lortu beharko da ahalik eta azkarren.

Aholkularitza Juridikoaren Zerbitzuak laguntza hori eskatzen badu, ulertuko da interesdunak eskaera horri uko egiten diola interesduna bera jurisdikzio organoan agertzen bada edo horretara zuzentzen bada beste edozein ordezkaritza edo defentsaren bidez. Kasu horietan, interesduna ordezkatzeko eta defendatzeko eman den baimena eraginik gabe geldituko da automatikoki.

Ezin izanen da baimendu laguntza juridikoa baldin eta interes gatazka badago Foru Komunitateko Administrazioarekin edo horren mendeko erakunde publikoekin, ezta, gai berean, hainbat agintari, funtzionario edo langilearen defentsa gauzatu badaiteke eta horien artean aurkako interesak daudela antzematen bada. Kasu horietan, interesduna absolbitzen bada edo gaia ezetsi, artxibatu edo largesten bada edo haren auzi guztiak irmotasunez baiesten badira, interesdunak eskatzen ahalko du gertaeraren unean langile zuen departamentuak edo erakunde autonomoak ordain ditzala defentsa eta ordezkaritza gastuak, baldin eta zerbitzu horiek prozesuan derrigorrezkoak baziren eta aurkako alderdiak ordainduko ez baditu (kostuak ordaintzera kondenatuta egonez gero, berari dagozkio).

Gastu horiek ordaintzeko, aintzat hartuko dira ordainsari irizpide batzuk, prozedura judiziala bideratu den probintziako abokatuen elkarteak onetsi dituenak, jurisdikzio organoek eskatuta, kostu tasazioa eta kontuen zina aurkaratzeko espedienteetan egiten diren txostenak eta irizpideak egiteko ondorioetarako. Halaber, epaitegietako prokuradoreen eskubideen tarifan ezarritako irizpideekin bat jokatuko da.

3. Ordena jurisdikzionalen kontrako ebazpenik emanez gero, Aholkularitza Juridikoak aurkeztuko ditu errekurtso arruntak, kasuan kasuko departamentu edo erakundeak kontrako jakinarazpenik adierazten ez duen bitartean. Errekurtso berezien kasuan, arloan eskuduna den departamentuak edo erakundeak proposatu beharko ditu, prestatu edo aurkeztu ahal izateko. Proposamen hori behar bezalako aurrerapenaz eginen da. Aholkularitza Juridikoak iragarri edo aurkeztuko du erregutze-errekurtsoa laneko ordena jurisdikzionalean, kontingentzia zehazteko prozesuetan izan ezik, horietan Administrazioa epaiak adierazten duen kontingentzia ontzat hartzera baino ez bada zigortzen. Mota horretako prozesuetan, kasuan kasuko departamentuaren edo erakundearen jakinarazpena behar da, epaiaren kontrako errekurtsoa jarri nahi bada.

Aholkularitza Juridikoak errekurtsoak bertan behera utzi ahal izateko, Lehendakaritzako, Berdintasuneko, Funtzio Publikoko eta Barneko kontseilariaren baimena beharko du, dagokion departamentuak edo erakunde autonomoak txostena eman ondoren.

4. Aholkularitza Juridikoak prozesuak bertan behera uzteko, haiei ekiteko eskumena duen organoak baimena eman beharko du aldez aurretik. Transakzioa egiteko eta amore emateko, Nafarroako Gobernuak aldez aurreko baimena eman beharko du.

Zigor arloko prozesuetan ondorioak aldatzen ahalko dira epaiketaren emaitzak hori ezartzen badu eta ezinezkoa bada kasuan kasuko departamentuaren edo erakunde autonomoaren baimena lortzea. Era berean, ez da horien baimenik beharko hori lortzea egingarria ez bada eta aldez aurreko adostasunak egon badira.

Aldatzeko espedienteetan, ez da baimenik beharko legez ezarritako erantzukizuna onartzeari buruzko adostasuna badago.

5. Aholkularitza Juridikoak konstituzio-kontrakotasuneko errekurtsoak aurkeztu ahal izateko eta konstituzio-kontrakotasuneko errekurtsoetan eta konstituzionaltasuneko bestelako auzietan agertu eta jardun ahal izateko, Nafarroako Gobernuak aldez aurretik halaxe erabaki beharko du.

Babes errekurtsoak departamentu edo erakunde eskudunak proposatuta aurkeztuko dira. Hirugarrenek aurkezten badute eta horietan agertzen edo bertaratzen badira, departamentu edo erakunde eskudunari horren berri emanen zaio berehala.

6. Kasuan kasuko departamentu edo erakunde autonomoak bete edo betearaziko ditu epaileen ebazpenak, administrazioak pagatu beharreko kostuak barne, Aholkularitza Juridikoaren jarduketa prozesalak eta aholkuak deusetan galarazi gabe.

7. Estatuari eta Erakunde Publikoei Laguntza Juridikoa emateko azaroaren 27ko 52/1997 Legea aplikatuko da, bidezko denean.

Laugarren xedapen gehigarria .Aholkulari juridikoen eginkizun berekiak.

1. Foru dekretu honen 11. artikuluan ezartzen den Aholkularitza Juridikoaren Zerbitzuaren egitura organikoak ez dio eragotziko aholkulari juridikoak eginkizun berekietan aritzea, Aholkularitza Juridikoaren Zerbitzuaren eskumeneko edozein esparrutan, Aholkularitza Juridikoaren Zerbitzuko zuzendariak hala agintzen dionean.

2. Administrazioarekiko Auzien, Zerga Aferen, Afera Zibilen, Afera Penalen eta Lan arloko Aferen ataletako burutzak Nafarroako Gobernuko aholkulari juridikoek bakar-bakarrik beteko dituzte.

Bosgarren xedapen gehigarria .Hainbat zerbitzu zuzendaritza eta atal burutzatarako izendapenak.

Honako izendapen hauek berresten dira, egin ziren baldintza berberetan:

a) Lehendakaritzako eta Gobernu Irekiko Zuzendaritza Nagusia:

-Gobernu Irekiaren Zerbitzuko zuzendaria Gobernu Irekiaren eta Herritarrendako Arretaren Zerbitzuko zuzendaria izanen da.

b) Funtzio Publikoko Zuzendaritza Nagusia:

-Gizarte Prestazioen Zerbitzuko zuzendaria Lan Harremanen eta Prestazio Sozialen Zerbitzuko zuzendaria izanen da.

c) Barne Zuzendaritza Nagusia:

-Babes Zibilerako Zerbitzuko zuzendaria Babes Zibileko eta Larrialdietako Zerbitzuko zuzendaria izanen da.

Seigarren xedapen gehigarria .Unitate organikoak kentzea.

1. Lehendakaritzako eta Gobernu Irekiko Zuzendaritza Nagusiko unitate organiko hauek kendu dira:

-Gobernu Irekiaren Zerbitzua.

-Legeen Garapenerako eta Koordinaziorako Atala.

2. Funtzio Publikoko Zuzendaritza Nagusiko unitate organiko hauek kendu dira:

-Gizarte Prestazioen Zerbitzua.

-Nafarroako Administrazio Publikoaren Institutuaren Zerbitzua.

-Bateraezintasunen Araubidearen eta Lanorduen Kudeaketaren Atala.

3. Barne Zuzendaritza Nagusiko unitate organiko hauek kendu dira:

-Babes Zibilerako Zerbitzua.

-Araubide Juridikoaren eta Kudeaketa Administratiboaren Atala.

4. Komunikazioko eta Erakundeekiko Harremanetako Zuzendaritza Nagusiko unitate organiko hauek kentzen dira:

-Komunikazio Zerbitzua.

-Herritarren Arretarako eta Partaidetzarako Zerbitzua.

5. Idazkaritza Tekniko Nagusiko unitate organiko hauek kentzen dira:

-Barne Araubideko Atala.

Zazpigarren xedapen gehigarria .Lege aipamenak.

1. Foru dekretu honetan esleitutako eginkizunetan eragina duten egungo araudiko aipamen organiko eta funtzionalak foru dekretu horretan arautzen diren organo eta unitateentzat direla ulertuko da.

2. Nafarroako Foru Komunitateko Administrazioan herritarrei informazioa eta arreta emateko zerbitzuak arautzen dituen irailaren 6ko 54/2010 Foru Dekretuan Lehendakaritza, Justizia eta Barne Departamentuari, Modernizazioaren eta Administrazio Elektronikoaren Zuzendaritza Nagusiari eta Antolaketa eta Modernizaziorako eta Herritarren Parte-hartze eta Arretarako Zerbitzuari aipamenak egiten zaizkien lekuan Herritarrekiko Harremanetako Departamentuari, Komunikazioko eta Erakundeekiko Harremanetako Zuzendaritza Nagusiari eta Herritarren Arretarako eta Partaidetzarako Zerbitzuari, hurrenez hurren, eginak ulertu behar dira, egiturako organikoari buruzko foru dekretuan esleitzen zaien eskumenen esparruan.

Zortzigarren xedapen gehigarria .Zenbait unitate betetzeko baldintzak.

1. Lehendakaritzako eta Gobernu Irekiko Zuzendaritza Nagusiko Nafarroako Aldizkari Ofizialaren Ataleko burutza eta Herritarren Arretarako Ataleko burutza betetzen dituztenek prestasun osoz eta erabateko dedikazioz beteko dituzte beren eginkizunak, eta horregatik dagokion osagarria jasoko du.

2. Bateraezintasunen Araubidearen eta Langileria Irizpideen Atalak, Arauen Garapeneko Atalak eta Lanpostuak Antolatzeko Atalak eta Langileen Antolaketaren eta Presentziaren Kudeaketaren Atalak ez dute berariazko baldintzarik izanen betetzeko, eta Funtzio Publikoko Zuzendaritza Nagusiko gainerako atalen moduan garatuko dira.

3. Barne Zuzendaritza Nagusiko Ibilgailu Parkearen Ataleko, Segurtasunaren Koordinazio Ataleko, SOS Nafarroa Ataleko eta Larrialdien eta Komunikazio Sistemen Plangintza eta Koordinazio Ataleko burutzak betetzen dituztenek prestasun osoz eta erabateko dedikazioz beteko dituzte beren eginkizunak, eta horregatik dagokien osagarria jasoko dute.

Bederatzigarren xedapen gehigarria .Bide Segurtasunaren Batzordea.

2. artikuluko 3. apartatuan aipatzen den Bide Segurtasunaren Batzordeak Bide Segurtasunaren Garapen eta Koordinaziorako Batzordea ordeztu, eta hari esleitu zitzaizkion eginkizunak gauzatuko ditu. Batzorde hura Nafarroako Gobernuaren 2000ko otsailaren 21eko Erabakiaren bidez sortu zen, zeina Nafarroako Gobernuaren 2001eko abenduaren 26ko Erabakiaren bidez aldatu baitzen.

Xedapen iragankor bakarra.- Unitateak bere horretan uztea.

Foru dekretu hau garatzeko neurriak hartu bitartean, atalarena baino maila txikiagokoak diren unitate organikoek berdin segituko dute eta oraingo izenari eta eginkizunei eutsiko diete. Behin-behinekoz egitura berriko organoei atxikiko zaizkie, orain arte betetzen zituzten eginkizunen arabera.

Xedapen indargabetzaile bakarra .Arauak indargabetzea.

Indarrik gabe gelditzen dira Lehendakaritzako, Funtzio Publikoko, Barneko eta Justiziako Departamentuaren egitura organikoa ezartzen duen irailaren 9ko 198/2015 Foru Dekretua eta foru dekretu honetan xedaturikoari aurka egiten dioten maila bereko edo beheragoko xedapen guztiak.

Azken xedapenetan lehena .Aurrekontuko aldaketak.

Ahalmena ematen zaio Ekonomia eta Ogasun Departamentuko titularrari foru dekretu honetan ezarritakoa betetzeko beharrezkoak diren aurrekontu aldaketak egin ditzan.

Azken xedapenetako bigarrena .Garatzeko ahalmenak.

Ahalmena ematen zaio Lehendakaritzako, Berdintasuneko, Funtzio Publikoko eta Barneko Departamentuko titularrari foru dekretu honetan ezarritakoa garatzeko beharrezkoak diren xedapenak eman ditzan.

Azken xedapenetako hirugarrena .Indarra hartzea.

Foru dekretu honek Nafarroako Aldizkari Ofizialean argitaratu eta biharamunean sortuko du indarra.

Iruñean, 2019ko urriaren 30ean.-Nafarroako Gobernuko lehendakaria, María Chivite Navascués.-Lehendakaritzako, Berdintasuneko, Funtzio Publikoko eta Barneko kontseilaria, Javier Remírez Apesteguía.

Iragarkiaren kodea: F1913749

Gobierno de Navarra

Contacte con nosotros | Accesibilidad | Aviso legal | Mapa web