LEXNAVARRA
55/2018 FORU AGINDUA, AZAROAREN 8KOA, HERRITARREKIKO ETA ERAKUNDEEKIKO HARREMANETAKO KONTSEILARIAK EMANA, ZEINAREN BIDEZ ONESTEN BAITA EMAKUMEEK NAFARROAKO FORU KOMUNITATEKO ADMINISTRAZIOAREN POLITIKA PUBLIKOETAN PARTE-HARTZE SOZIAL ETA POLITIKOA IZATEKO 2018-2020 ALDIRAKO ESTRATEGIA
BON N.º 6 - 10/01/2019
Irailaren 30eko 240/2015 Foru Dekretuak, Herritarrekiko eta Erakundeekiko Harremanetako Departamentuari atxikitako Nafarroako Berdintasunerako Institutua erakunde autonomoaren estatutuak onesten dituenak, emakumeen eta gizonen arteko berdintasun politikak koordinatzeko eta kudeatzeko eskumenak esleitzen dizkio erakunde autonomo horri Nafarroako Foru Komunitatearen eremuan.
Hona hemen helburuak: emakumeen eta gizonen arteko berdintasuna dakarten egoerak sustatzea; emakumeen izatezko eta zuzenbidezko betetasuna eragozten duten oztopoak iraultzea; emakumeen ahalduntzea eta parte-hartze sozial eta politikoa, parte-hartze hori benetako berdintasuna lortzeko zein garrantzitsua den hedatuz eta Nafarroako gizartea horrekiko sentikor bihurtuz; emakumeen presentzia eta parte-hartzea sustatzea Nafarroako Foru Komunitateko erakunde politiko eta sindikaletan; eta emakumeen presentzia eta parte-hartzea sustatzea Nafarroako elkartegintzan.
Nafarroako Berdintasunerako Institutuaren eginkizunak izanen dira, besteak beste, emakumeen elkartegintza eta parte-hartze soziala bultzatu eta sostengatzea, planak eta estrategiak proposatzea emakumeen ahalduntzea bultzatzeko, eta elkarteetan emakumeen presentzia eta parte-hartzea sustatzea.
Halaber, Nafarroako Gobernuaren akordio programatikoak ezartzen duenez, beharrezkoa da egiturazko aldaketa bat gertatzea gizartean, emakumeak ahalduntzen laguntzeko eta esparru publikoan eta erabakiak hartzen diren guneetan parte har dezaten bultzatzeko. Emakume-elkarteek eta talde feministek parte hartu behar dute plan eta politikak diseinatzen eta ebaluatzen, eta horiek gauzatzeko beharrezko baliabideak jarriko dira.
Horretarako, Nafarroako Berdintasunerako Institutuak Emakumeek Nafarroako Foru Komunitateko Administrazioaren politika publikoetan parte-hartze sozial eta politikoa izateko 2018-2020 aldirako Estrategia prestatu du, eta bertan helburu horiek lortzeko berariazko helburuak, ekintzak eta neurriak bildu eta sistematizatzen dira.
Estrategiaren xedea da Nafarroako Foru Komunitatean emakumeen parte-hartze sozial eta politikoa sustatzea eta emakumeek parte-hartze horri lotuta pairatzen dituzten desberdintasunak eta bazterkeriak desagerraraztea. Estrategiak eta horretatik datozen neurriek Administrazioari eta herritarrei oro har zuzenean eragiteko gaitasuna dute. Hori dela eta, genero estereotipoak hausten laguntzeko gaitasuna du estrategiak. Laburbilduta, lehendik dauden desberdintasunak murriztu, eta emakumeen erabateko herritar izaera lor dezake.
Aurretik azaldutakoa oinarri hartuta eta espedientean dauden txostenak ikusita, Nafarroako Berdintasunerako Institutuko Sustapenaren eta Kudeaketaren Zuzendariordetzak proposatzen du Emakumeek Nafarroako Foru Komunitateko Administrazioaren politika publikoetan parte-hartze sozial eta politikoa izateko 2018-2020 aldirako Estrategia onestea.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legeak eta Herritarrekiko eta Erakundeekiko Harremanetako Departamentuaren egitura organikoa ezartzen duen abuztuaren 28ko 129/2015 Foru Dekretuak emandako ahalmenak erabiliz,
AGINDU DUT:
1. Onestea Emakumeek Nafarroako Foru Komunitateko politika publikoetan parte-hartze sozial eta politikoa izateko 2018-2020 aldirako Estrategia. Foru agindu honen eranskinean dago.
2. Foru agindu hau eta eranskina Nafarroako Aldizkari Ofizialean argitaratzea.
Iruñean, 2018ko azaroaren 8an.-Herritarrekiko eta Erakundeekiko Harremanetako kontseilaria, Ana Ollo Hualde.
Iragarkiaren kodea: F1813682
