LEXNAVARRA
23/2018 FORU LEGEA, azaroaren 19koa, Nafarroako Poliziei buruzkoa 
BON N.º 224 - 20/11/2018
- 1. artikulua. Xedea eta definizioak
- 2. artikulua. Nafarroako polizien helburua.
- 3. artikulua. Jarduteprintzipioak.
- 4. artikulua. Antolaketaprintzipioak.
- 5. artikulua. Egitura organikoa.
- 6. artikulua. Herritarrekiko harremanak.
- 7. artikulua. Nafarroako Polizien Jardunbide Onen eta Gardentasunaren Batzordea.
- 8. artikulua. Administrazio publikoen arteko hitzarmenak.
- 9. artikulua. Nafarroako Foruzaingoak Tokiko Poliziaren eginkizunak bere gain hartzeko hitzarmenak.
- 10. artikulua. Nafarroako Tokiko Polizietako langileak Nafarroako Foruzaingoan integratzea.
- 11. artikulua. Toki entitateak elkartzea Tokiko Poliziaren eskumenak batera betetzeko.
- 12. artikulua. Zerbitzuak emateko hitzarmenak.
- 13. artikulua. Izaera eta eginkizunak.
- 14. artikulua. Kideak eta funtzionamendua.
- 15. artikulua. Izaera eta menpekotasun organikoa.
- 16. artikulua. Eginkizunak.
- 17. artikulua. Uniformea, bereizgarriak, egiaztagutunak, agurrak, ohoreak eta sariak.
- 18. artikulua. Arauzko armak.
- 19. artikulua. Polizia judiziala.
- 20. artikulua. Tokiko Polizien definizioa eta eraketa.
- 21. artikulua. Biztanle bakoitzeko ratioak.
- 22. artikulua. Nafarroako Tokiko Polizien egitura.
- 23. artikulua. Eginkizunak.
- 24. artikulua. Tokiko Poliziako laguntzaileak .
- 25. artikulua. Tokiko Poliziako Zerbitzuak.
- 26. artikulua. Antolaketaerregelamenduak.
- 27. artikulua. Uniformeak, bereizgarriak, armak eta egiaztagutunak.
- 28. artikulua. Plantilla organikoak eta lanpostuen zerrendak.
- 29. artikulua. Poliziako burua.
- 30. artikulua. Araubide orokorra.
- 31. artikulua. Mailak.
- 32. artikulua. Praktiketako funtzionarioak.
- 33. artikulua. Deialdiak.
- 34. artikulua. Hautaprobak.
- 35. artikulua. Baldintzak.
- 36. artikulua. Ikasketatituluak.
- 37. artikulua. Agente enpleguan sartzea.
- 38. artikulua. Agente lehenaren enpleguan sartzea.
- 39. artikulua. Inspektoreorde enpleguan sartzea.
- 40. artikulua. Inspektore enpleguan sartzea.
- 41. artikulua. Komisario enpleguan sartzea.
- 42. artikulua. Komisario nagusi enpleguan sartzea.
- 43. artikulua. Lanpostu hutsak esleitzea.
- 44. artikulua. Enpleguak eskuratzeko prozedura.
- 45. artikulua. Prestakuntzairizpideak.
- 46. artikulua. Prestakuntzaren izaera.
- 47. artikulua. Betetzesistemak.
- 48. artikulua. Berariazko lehiaketa.
- 49. artikulua. Hautapen askea.
- 50. artikulua. Langileen lanpostuigoera.
- 51. artikulua. Enplegu trukea.
- 52. artikulua. Unitateen arteko mugikortasuna.
- 53. artikulua. Araubide orokorra eta espezialitateak.
- 54. artikulua. Lanaldiak eta ordutegiak.
- 55. artikulua. Egoitza.
- 56. artikulua. Agintaritzaren agenteak.
- 57. artikulua. Ordainsarien kontzeptuak .
- 58. artikulua. Berariazko osagarria.
- 59. artikulua. Lanpostuko osagarria.
- 60. artikulua. Prestasun bereziko osagarria.
- 61. artikulua. Burutzako osagarria.
- 62. artikulua. Behinbehineko izendapenak.
- 63. artikulua. Ordainsarieskalak.
- 64. artikulua. Bigarren jarduerako egoera administratiboagatiko osagarri pertsonal iragankorra.
- 65. artikulua. Erregelamendu bidezko garapena.
- 66. artikulua. Aplikatzekoa den araubidea.
- 67. artikulua. Eskubide pasiboak.
- 68. artikulua. Egoera administratiboak.
- 69. artikulua. Bigarren jarduerako egoera administratiboa.
- 70. artikulua. Esker onak, ohoreak eta sariak.
- 71. artikulua. Legezkotasuna eta erantzukizuna.
- 72. artikulua. Erantzukizunaren amaiera.
- 73. artikulua. Sailkapena eta preskripzioa.
- 74. artikulua. Falta oso astunak.
- 75. artikulua. Falta astunak.
- 76. artikulua. Falta arinak.
- 77. artikulua. Zehapen motak.
- 78. artikulua. Zehapenak betetzea.
- 79. artikulua. Zehapenen mailaketa.
- 80. artikulua. Berrerortzea eta aurrekarien deuseztatzea.
- 81. artikulua. Eskumena.
- 82. artikulua. Falta astun edo oso astunengatiko zehapenak ezartzeko prozedura.
- 83. artikulua. Falta arinengatik zehapenak ezartzeko prozedura.
- 84. artikulua. Jakinarazpena eta idazpena.
- Xedapen Gehigarria
- Lehen.–Langile teknikoak eta fakultatiboak.
- Bigarren.–Lanaldien eta lan ordutegien araubidea aplikatzea Nafarroako Tokiko Polizietan.
- Hirugarren.–Kidegoetan sartzeko eta igotzeko prozedura.
- Laugarren.–Erretiro aurreratua.
- Bosgarren.–Lanaldia hamabiren bat laburtzea Nafarroako Foruzaingoko langileei.
- Seigarren.–Foruzaingoko langileen soldatabaldintzak mantentzea eta berreskuratzea.
- Zazpigarren.–Nafarroako toki entitateetako polizietako funtzionarioak Nafarroako Foruzaingoan sartzea.
- Zortzigarren.–Lanegutegiak aldatzea.
- Bederatzigarren.–Estatuko funtzionarioak Nafarroako Foruzaingoan integratzea.
- Hamargarren xedapen gehigarria
- Xedapen Iragankorra
- Lehen.–Indarreko arauak aplikatzea.
- Bigarren.–Enpleguetan sartzeko deialdiak.
- Hirugarren.–Proba fisikoak.
- Laugarren.–Proba fisikoak egiteagatiko konpentsazioari buruzko aukera jakinarazteko epea.
- Bosgarren.–Nafarroako toki entitateetako populazio ratioen aplikazioa.
- Seigarren.–Lanpostuen balorazioa egiteko azterlanak.
- Zazpigarren.–Poliziako laguntzaileak.
- Zortzigarren.–Eskumenak eskualdatzea.
- Xedapen Indargabetzaile
- Bakarra.–Indargabetzen diren arauak.
- Azken Xedapenetako
- Lehenengoa.–Erregelamendu bidezko garapena.
- Bigarrena.–Titulazioak egokitzea.
- Hirugarrena.–Indarra hartzea.
I. TITULUA. Nafarroako Poliziak eta haien arteko harremanak
I. KAPITULUA. Printzipio orokorrak eta jarduteprintzipioak
II. KAPITULUA. Nafarroako Polizien antolaketa
III. KAPITULUA. Nafarroako polizien arteko harremanak
IV. KAPITULUA. Nafarroako Polizien Kontseilua
II. TITULUA. Nafarroako Foruzaingoa
III. TITULUA. Nafarroako tokiko poliziak
IV. TITULUA. Nafarroako Polizietako Langileen Estatutua
I. KAPITULUA. Sarrera, hautaketa eta lanpostuak betetzea
1. ATALA. Xedapen orokorrak
2. ATALA. Nafarroako Polizietako langile izaera eskuratzea eta galtzea
3. ATALA. Langileen hautaketa
4. ATALA. Prestakuntza
5. ATALA. Lanpostuak betetzea
6. ATALA. Lanpostuigoera
7. ATALA. Funtzionarioen mugikortasuna
II. KAPITULUA. Eskubideak eta betebeharrak
III. KAPITULUA. Ordainsariak
IV. KAPITULUA. Ordezkaritza, negoziazio kolektiboa eta lanbaldintzen ezarpenean parte hartzea
V. KAPITULUA. Eskubide pasiboak
VI. KAPITULUA. Egoera administratiboak
VII. KAPITULUA. Esker onak, ohoreak eta sariak
VIII. KAPITULUA. Diziplinaaraubidea
1. ATALA. Printzipio nagusiak
2. ATALA. Diziplinako faltak
3. ATALA. Diziplinazehapenak
4. ATALA. Diziplinaprozedura
I. TITULUA. Nafarroako Poliziak eta haien arteko harremanak
I. KAPITULUA. Printzipio orokorrak eta jardute-printzipioak
1. artikulua. Xedea eta definizioak
1. Nafarroako Foru Eraentza Berrezarri eta Hobetzeari buruzko Lege Organikoaren 46., 49.1.b) eta 51. artikuluen garapen modura, eta Konstituzioaren lehen xedapen gehigarriaren babesean, foru lege honen xedea hau da:
a) Nafarroako Foruzaingoaren araubidea ezartzea.
b) Nafarroako Tokiko Polizien araubidea ezartzea.
c) Nafarroako Foru Komunitatean dauden polizia desberdinak koordinatzea, Nafarroako Segurtasun Publikoaren Foru Legean araututa ez dauden alderdietan .
d) Tokiko Poliziako zerbitzuen araubide berariazkoa ezartzea.
e) Tokiko Poliziako laguntzaileen araubide berariazkoa ezartzea.
f) Nafarroako polizietako langileen Estatutua ezartzea.
2. Foru lege honen ondorioetarako, honela ulertuko dira:
a) Nafarroako poliziak: Nafarroako Foruzaingoa, Nafarroako tokiko poliziak eta tokiko poliziako zerbitzuak.
b) Polizia: segurtasun publikoa zaintzearen ardura duen funtzionario-izaeradun langilea, Nafarroako polizietako bateko kide dena eta legeek horretarako ematen dioten agintea duena.
c) Nafarroako Foruzaingoa: Nafarroako Foru Komunitateko polizia berekia.
d) Nafarroako toki entitateetako poliziak: Nafarroako toki entitate baten menpekoak diren poliziak, tokiko poliziek eta udal agenteek osatuak.
e) Tokiko Polizia: izaera zibileko segurtasun zerbitzua, egitura eta antolamendu hierarkizatua duena, Nafarroako toki entitate bakar baten menpekoa.
f) Udal agenteak: toki entitateetako langile funtzionarioak, modu ez esklusiboan polizia-zerbitzu bat ematen dutenak, edozein dela ere egun daukaten deitura.
g) Tokiko Poliziako laguntzailea: Tokiko Polizia duten Nafarroako toki entitateek administrazio araubidean aldi baterako kontratatzen dituzten langileak, polizia horretako langileei laguntzeko, absentismo arrazoiak tarteko, kasuko plantilla organikoan hutsik dauden lanpostuak aldi baterako betetzeko, edo segurtasun publikoarekin zerikusia duten beharrei kasu egiteko, langile finkoak aski ez direnean haiei erantzuteko .
h) Tokiko Poliziako Zerbitzua: tokiko poliziarik ez duten Nafarroako toki entitateek emandako polizia-zerbitzua, “udal agenteak” deitura hartuko duten langileek osatua.
2. artikulua. Nafarroako polizien helburua.
Nafarroako poliziek helburu hauek dituzte:
a) Ordenamendu juridikoak pertsonei aitorturiko askatasun eta eskubideak babestu eta zaintzea.
b) Lasaitasun eta segurtasun publikoak, legearekiko errespetua eta gizarteko ordena mantentzen direla bermatzea.
c) Delinkuentziaren prebentzioa eta haren aurkako borroka.
d) Herritarrei laguntza eta zerbitzuak ematea.
3. artikulua. Jarduteprintzipioak.
1. Nafarroako Polizietako langileek ondoko jardute-printzipio hauei jarraikiz beteko dituzte beren eginkizunak:
a) Une oro bete eta betearaziko dituzte Konstituzioa, Nafarroako Foru Eraentza Berrezarri eta Hobetzeari buruzko Lege Organikoa eta gainerako ordenamendu juridiko indarduna.
b) Erabateko neutraltasun politikoz eta inpartzialtasunez jokatuko dute eta, horrenbestez, inolako diskriminaziorik egin gabe arraza, erlijioa, iritzia, sexua, sexu-orientazioa, hizkuntza, bizitokia, jaioterria edo beste edozein egoera edo inguruabar pertsonal edo sozial dela kausa.
Aurrekoari dagokionez, kontrol edo esku-hartze batean identifikazio pertsonala egin behar denean, Nafarroako polizietako langileek kasuko identifikazio-inprimakiak bete beharko dituzte, ezarritako baldintzetan.
c) Zuzentasunez eta duintasunez jokatuko dute, eta ustelkeriazko egintza orori irmoki aurre eginen diote.
d) Laneko jardunean hierarkia eta menpekotasun printzipioei men eginen diete. Zor den obedientziak ez du babestuko egintza nabarmenki ilegalen gauzatzea dakarren agindurik.
e) Beren nagusiei jakinaraziko dizkiete zerbitzua dela-eta egiten dituzten jarduketak, bai eta horien arrazoi eta helburuak ere.
f) Justizia Administrazioarekin lankidetzan arituko dira, eta laguntza emanen diote indarreko arauetan ezarrita dagoen moduan.
g) Indarkeria fisiko edo morala dakarten eta abusuan, arbitrariotasunean edo diskriminazioan oinarritzen diren jokabide oro galaraziko dituzte.
h) Herritarrekiko harremanetan egoki eta adeitasunez jokatuko dute beti eta beharrezkoa denean edo eskatzen zaienetan haiei laguntza eta babesa emanen dizkiete, eta egiten dituzten esku-hartze guztien arrazoi eta helburuei buruz behar den informazioa emanen diete.
i) Behar bezalako erabakitasunez eta berandutzarik gabe jokatuko dute, jokabide horren baitan dagoenean kalte larri, berehalako eta konponezin bat ekiditea. Horrelakoetan, koherentzia, egokitasun eta proportzionaltasun printzipioen arabera erabiliko dituzte eskueran dituzten baliabideak.
j) Arauzko armak beren edo beste pertsona batzuen bizia eta integritate fisikoa arrisku arrazionalki larrian daudenean baino ez dituzte erabiliko, eta herritarren segurtasunerako arrisku larria ekar dezaketen egoeretan.
k) Zein poliziatako kide diren, halakotzat identifikatuko dira atxiloketa bat egiten dutenean, bai eta beren jokabideak herritarrek legez dituzten eskubide eta askatasunen egikaritzea mugatzen duen beste egoeretan ere.
l) Atxiloturik dauden edo zaintzapean dituzten pertsonen bizia eta integritate fisikoa zainduko dituzte, eta haien ohorea eta duintasuna errespetatuko. Horretarako, polizia-etxeek, ziegek eta galdeketa-gelek bideo-kamerak izan behar dituzte. Kasuko epaileek eskatzen ahalko dituzte haien grabaketak, atxilotuek salaketarik aurkeztuz gero.
m) Beren lan jardunean Europako Kontseiluak Poliziaren Etikarako Europako Kodeari dagokionez emandako gomendioak beteko dituzte.
n) Ordenamendu juridikoak pertsona bat atxilotzen den kasuetarako ezartzen dituen izapide, epe eta betebeharrak behar bezala bete eta begiratuko dituzte, epaileen aurrera lehenbailehen eramateko.
ñ) Lan dedikazioari dagokionez, erabateko dedikazioz arituko dira, eta betiere esku hartu beharko dute, nonahi eta noiznahi, bai lanorduetan bai haietatik kanpo, defendatze aldera pertsonen bizia eta integritatea, legea eta herritarren segurtasuna, bai eta edozein delitu-egite galarazteko ere.
o) Lanbideko sekretuari dagokionez, lan-jardunagatik edo -jardunean eskuratzen duten informazio guztia zorrozki gordeko dute isilpean, informazio-iturrien berri ematera behartuta egon gabe, salbu eta dagozkien eginkizunengatik edo lege-xedapenengatik hori aginduzkoa dutenean.
p) Uneoro beteko eta betearaziko dituzte Nazio Batuen giza eskubideei buruzko itun nagusiak, bai eta legea betearazteaz arduratzen diren funtzionarioentzat Nazio Batuek egindako adierazpen eta printzipio-multzo ugariak ere.
q) Beren jokabidean, Poliziari zuzendutako Giza Eskubideei buruzko Araudia eta Jardunbidea beteko dituzte, Nazio Batuen Giza Eskubideen aldeko Goi-komisarioaren Bulegoak emandakoak.
r) Ezin izanen dute aurpegia estali herritarren segurtasuneko kontuetan inplikatutako pertsonei errekerimenduak edo ohartarazpenak egiten dizkietenean, salbu eta erregelamendu bidez ezarritako kasuetan.
Halaber, une oro erakutsi beharko dute beren polizia-identifikazioko zenbakia.
2. Nafarroako Polizietako langileek zuzeneko erantzukizuna izanen dute legezko edo erregelamenduzko arauak hautsiz edo aurreko apartatuan jasotako printzipioak urratuz beren lan jardunean aurrera eramaten dituzten egintzen gainean, deusetan galarazi gabe kasuko Administrazio Publikoari egokitzen ahal zaion ondare-erantzukizuna.
II. KAPITULUA. Nafarroako Polizien antolaketa
4. artikulua. Antolaketaprintzipioak.
Nafarroako Poliziak honako printzipio hauen arabera antolatuko dira:
a) Haien eginkizunak segurtasunaren arloko eskumena duten agintari publikoen agindupean beteko dituzte, beren erregelamendu organikoek adierazitako autonomia operatiboko graduarekin.
b) Oro har, Nafarroako Foruzaingoa izanen da informazioa eta polizia-laguntza zentralizatu eta Nafarroako tokiko poliziei bideratzeaz arduratuko dena, deusetan galarazi gabe Estatuko segurtasun indar eta kidegoei dagozkien eskumenak.
c) Argiro zehaztutako aginte-katea izanen dute. Nafarroako Polizietako langileek, hierarkia-maila guztietan, zuzeneko erantzukizuna izanen dute beren egintzen, ez-egiteen edo menpekoei ematen dizkieten aginduen gainean.
d) Beren langileen eta herritarren arteko harremanak onak izan daitezen sustatuko dute, segurtasun publikoaren arloko zerbitzuak ematen dituzten profesionalak diren aldetik, eta herritarrengandik ahalik eta hurbilen egoten saiatuko dira, herritarren eta poliziaren arteko komunikazioa eta elkar-ulertzea bultzatzeko.
e) Beren langileen hautapena, berdin delarik zer mailarekin sartzen diren lanbidean, zerbitzuaren helburuak betetzeko dituzten gaitasun pertsonaletan oinarrituz eginen dute, irizpide objektibo eta ez-baztertzaileetan oinarritutako prozedurei jarraikiz, Poliziako langileak beraiek zerbitzatzen duten gizartearen isla izan daitezen. Langile horiek lanean jarduteko behar den oinarrizko prestakuntza jaso beharko dute, eta horren ondotik etengabeko prestakuntza eta prestakuntza espezializatua, bai eta, behar izanez gero, aginte- eta kudeaketa-eginkizunetarako prestakuntza ere.
f) Langileei dagozkien eskubideak aitortuko dizkiete, eta foru lege honetan eta aplikagarri diren gainerako arauetan ezartzen diren betebeharrak betetzeko exigituko diete.
g) Langileen zintzotasuna eta beren eginkizunetako jokabide egokia bermatzeko moduko diziplina neurriak hartuko dituzte.
5. artikulua. Egitura organikoa.
Nafarroako Poliziak honela antolatuko dira:
a) Kasuan kasuko Poliziako buruaren kargua.
b) Enplegu hauek, guztiak edo batzuk, ordena honetan hierarkikoki egituratuta: Komisario Nagusia, Komisarioa, Inspektorea, Inspektoreordea, Agente Lehena eta Agentea.
6. artikulua. Herritarrekiko harremanak.
1. Oro har, Nafarroako Poliziek Arreta Polizialerako Bulego bat izan dezakete, eta bertan, salaketak jasotzeaz gain, herritarren kexak, eskaerak eta iradokizunak ere jasoko dira.
Era berean, herritarrek Nafarroako Foruzaingoaren edozein polizia-etxetan aurkez ditzakete salaketak, kexak, eskaerak eta iradokizunak, polizia zerbitzua hobetzeko.
Nafarroako Polizien jarduketek eragindako kexak polizia-izaerarik gabeko langile tekniko edo juridikoek aztertu eta ikertuko dituzte.
2. Jasotako kexa, eskaera eta iradokizun guztien erregistroa eginen da, baita erantzunena eta haien jarraipenarena ere, Nafarroako Polizietan ezarri beharreko ekintzak edo neurriak eskatu badira.
Kexa, eskaera eta iradokizun guztien berri, baita erantzunena eta jarraipenarena ere, emanen zaio hurrengo artikuluan aipatzen den Jardunbide Onen eta Gardentasunaren Batzordeari.
3. Herritarrekiko harreman- eta tratabide-arauak biltzen dituen eskuliburu edo prozedura bat taxutuko da, eta Nafarroako Poliziak horri loturik egonen dira.
7. artikulua. Nafarroako Polizien Jardunbide Onen eta Gardentasunaren Batzordea.
1. Foru lege honek indarra hartu eta urtebeteko epean, Nafarroako Foru Komunitateko Administrazioak Nafarroako Polizien Jardunbide Onen eta Gardentasunaren Batzordea eratuko du, Etika eta Deontologia Polizialen arloko kontrol eta gainbegiratze lanak eginen dituen kanpo baliabidea izateko.
Jardunbide Onen eta Gardentasunaren Batzordea Nafarroako Foru Komunitateko Administrazioaren egitura organikoan sartuko da, baina autonomia organiko eta funtzionala izanen ditu, Nafarroako Poliziengandik eta Nafarroako Gobernuan Barne gaietako eskumena duen departamentuarengandik.
2. Honako eginkizun hauek ditu Nafarroako Polizien Jardunbide Onen eta Gardentasunaren Batzordeak:
a) Litekeena denean polizia-jarduketa batek zuzenean edo zeharka eragin izana pertsona baten heriotza edo lesio larria, gertaera horiek aztertzea.
b) Herritarrek egindako kexei buruzko txostena egitea, kexa horiek jarduketa bereziki larriek eragindakoak direnean edo Nafarroako Polizien barreneko jokabide-ereduen edo ohiko jardunbideen ondorio izan daitezkeenean, eta herritarren konfiantzan eragin negatiboa izan dezaketenean.
c) Aurreko paragrafoan aipatzen diren jokabide-eredu edo ohiko jardunbideak zuzentzeko egokitzat jotzen diren neurriak proposatzea.
d) Kasu bakoitzean eskudun den agintariari gomendatzea diziplina espedienteak irekitzeko, egindako ikerketen ondorioz.
e) Orokorrean, etika polizialaren arloan haien esku utzitako beste edozein eginkizun, neurriak hartzekoa honako helburu hauekin: poliziaren jokabidea hobetzea, bai eta polizia-jarduna lotzea ere foru lege honen 3. artikuluan adierazitako oinarrizko printzipioei eta poliziaren zerbitzu-ematearen eta herritarrekiko harremanen kalitateari.
3. Jardunbide Onen eta Gardentasunaren Batzordeak, bere eginkizunak betetzeko, behar dituen dokumentazioa eta informazioa eskatzen ahalko dizkie Nafarroako Poliziei, haien nagusi diren agintarien bitartez, indarreko lege polizial eta prozesalek ezarritako mugekin bat betiere. Nafarroako Polizietako kideak beharturik daude Jardunbide Onen eta Gardentasunaren Batzordeari laguntzera eta harekin elkarlanean aritzera, haren eginkizunetan.
4. Jardunbide Onen eta Gardentasunaren Batzordeak ez ditu baloratuko epaileen mandatu edo aginduak betetzetik eratorritako jarduketa polizialak.
5. Jardunbide Onen eta Gardentasunaren Batzordea bost pertsonak osatuko dute, Nafarroako Lehendakaritzaren foru dekretu baten bidez hiru urterako hautatuak, Nafarroako Administrazio Publikoen edo haien menpeko erakunde publikoen zerbitzuko langileen -jardunekoen zein erretiratutakoen- artetik. Pertsona horiek ezagutza zabalak edukiko dituzte segurtasun publikoaren, zuzenbidearen, soziologiaren, psikologiaren edo etikaren arloetan. Pertsona horietako batek Nafarroako polizia izan beharko du. Nafarroako Gobernuak eta Nafarroako Parlamentuak proposatuko dituzte organo horretako kideak, zehazten den proportzioan.
Batzordearen osaeran eta geroago Batzordeko kideak berritzerakoan genero parekidetasunaren printzipioa errespetatzeko ahalegina eginen da.
6. Jardunbide Onen eta Gardentasunaren Batzordeak bere kideen artetik hautatuko ditu batzordeko burua eta idazkaria izanen direnak, kide anitzeko organoen arloan legeria orokorrak ematen dizkien eskumenekin.
Jardunbide Onen eta Gardentasunaren Batzordeak bere funtzionamendu-arau propioak onetsiko ditu.
7. Jardunbide Onen eta Gardentasunaren Batzordeko kideetatik Nafarroako Administrazio Publikoetako funtzionariotzat jotzen ez direnek dagozkien ordainsariak jasoko dituzte beren zerbitzua emateagatik. Batzordeko kideak funtzionario direnean ez dute inolako ordainsaririk jasoko horren truke.
Jardunbide Onen eta Gardentasunaren Batzordea osatzeko hautatzen diren pertsonen kargua ez da ordainsariduna izanen, deusetan galarazi gabe Nafarroako Administrazio Publikoen zerbitzuko langile izateagatik eskubidez jaso ahal dituzten dietak.
8. Jardunbide Onen eta Gardentasunaren Batzordeak jardueren urteroko oroitidazkia prestatuko du, eta horren berri emanen dio Nafarroako Parlamentuari.
III. KAPITULUA. Nafarroako polizien arteko harremanak
8. artikulua. Administrazio publikoen arteko hitzarmenak.
1. Polizia duten Nafarroako administrazio publikoek, eta Polizia izan ez, baina foru lege honen 25. artikuluan aipatzen den Tokiko Polizia Zerbitzua dutenek ere, hitzarmenak izenpetzen ahalko dituzte ardurapean dituzten eskumen ezberdinak baliatzeko.
2. Hitzarmen horiek bat etorriko dira kapitulu honetan eta sektore publikoaren araubide juridikoari buruzko oinarrizko legerian xedatutakoarekin.
9. artikulua. Nafarroako Foruzaingoak Tokiko Poliziaren eginkizunak bere gain hartzeko hitzarmenak.
1. Nafarroako Toki Entitateek Nafarroako Gobernuarekin hitzartzen ahalko dute Nafarroako Foruzaingoak bere gain har ditzan beren Tokiko Polizien edo beren Tokiko Polizia Zerbitzuen eginkizunak.
Horretarako sinatzen den hitzarmenak honakoak jasoko ditu, besteak beste: indarraldia, atxikitako baliabide pertsonalen eta materialen identifikazioa, zerbitzuaren arauak, baldintzak eta antolamendua, finantzaketa eta likidazioa.
2. Zerbitzu hori ematera atxikita dauden Nafarroako Foruzaingoko langileek beren mendekotasun organiko eta funtzionala mantenduko dute, bai eta beren jatorrizko betebehar eta eskubideak ere.
Betiere, toki entitate interesduna izanen da zerbitzua finantzatuko duena.
10. artikulua. Nafarroako Tokiko Polizietako langileak Nafarroako Foruzaingoan integratzea.
1. Tokiko polizia edo tokiko poliziako zerbitzuak dauzkaten toki entitateek zilegi izanen dute, foru lege honetan jasotako baldintzetan, beren tokiko poliziako edo tokiko poliziako zerbitzuetako langileak Foruzaingoan integra daitezen hitzartzea, halako moduz non tokiko poliziak edo agenteak, ondorio guztietarako, foruzain bihurtuko baitira, zerbitzua emanen dutenak beren jatorriko toki entitatetik hurbilen dagoen Foruzaingoaren polizia-etxean. Hori, halere, ez da eragozpena izanen geroago, bide arruntetatik, beste destino batzuetarako sarbidea izateko daukaten eskubiderako.
Horretarako, tokiko poliziatik heldu diren langileak toki entitateari atxikiko zaizkio, zerbitzua bertan emateko; hori, halere, ez da eragozpena izanen geroago, bide arruntetatik, beste destino batzuetarako sarbidea izateko daukaten eskubiderako.
2. Integrazioa toki entitate interesdunak eskatuta eginen da beti, eta eskubide eta betebehar guztiekin. Aldez aurretik, beharrezkoak diren gaikuntzarako probak eta ikastaroak ezarriko dira Nafarroako Segurtasun eta Larrialdi Eskolan.
11. artikulua. Toki entitateak elkartzea Tokiko Poliziaren eskumenak batera betetzeko.
1. Tokiko Polizia duten edo Tokiko Poliziako zerbitzuak dituzten Nafarroako toki entitateek elkartzeko akordioak izenpetzen ahalko dituzte Tokiko Poliziaren eskumenak batera betetzeko, betiere baldintza hauek betetzen badituzte:
a) Toki entitate mugakideak izatea.
b) Tokiko Poliziaren eskumenak betetzeko bakoitzak bere aldetik behar adina baliabiderik ez izatea.
c) Elkartutako toki entitateetako biztanle kopurua guztira ez izatea 40.000 biztanle baino gehiagokoa.
2. Horretan interesa duten toki entitateek izenpetzen duten elkartze akordioak toki entitate sinatzaileak identifikatu beharko ditu, hura justifikatzen duten arrazoiak, bereziki aipatuz eskumenak bakoitzak bere aldetik betetzeko aski baliabiderik ez izatea, zerbitzu-ematea koordinatuko duen organoa zein den, akordioaren indarraldia eta, kasua bada, sortutako elkartearen nortasun juridikoa.
Toki entitateek gehienez ere elkartze-akordio bat izenpetzen ahalko dute beren zerbitzuak batera emateko.
Elkarteak indarraldi mugagabea izaten ahalko du, edo aldi edo sasoi baterakoa soilik.
3. Artikulu honetan aurreikusitakoaren babesean izenpetzen diren elkartzeko akordioek Nafarroako Gobernuaren aurretiazko baimena beharko dute, Tokiko Polizien Koordinazioaren gaineko eskumena duen departamentuaren bitartezkoa.
Baimen eskaerari erantsiko zaizkio oroitidazki bat, elkartze-proiektua esplikatu eta horren arrazoien berri ematen duena; toki entitateetako biztanle kopuruari buruzko ziurtagiriak; eta udal bakoitzaren organo eskudunak emandako ziurtagiria, zeinetan onesten baita etorkizuneko akordioaren izenpetzea, Tokiko Polizia osatuko duten langileen kopurua eta haren egoitzaren kokalekua.
4. Zerbitzu hori modu bateratuan emanen duten langileek izanen dituzte ordenamendu juridikoak Nafarroako Tokiko Polizientzat ezarritako oinarrizko jarduketa printzipio, estatutu-araubide eta eginkizun berberak.
5. Elkartzeko akordioaren aldaketa orok akordioa izenpetzeko eskatzen diren baldintza berberak bete beharko ditu.
6. Elkartu diren Nafarroako toki entitateek elkartearen desegitea jakinarazi beharko diote Tokiko Polizien koordinaziorako eskumena duen Nafarroako Gobernuko departamentuari, desegite hori aldeek hala erabaki izanaren ondoriozkoa nahiz akordioan aurreikusitako indarraldia iragateagatik gertatua dela ere.
7. Tokiko poliziako eskumenak batera betetzeko, ez dira bete beharko artikulu honen aurreko paragrafoetan aurreikusitako baldintzak, foru lege bidez sortutako udalez gaindiko toki entitate bati eskuordetuz egiten demean .
12. artikulua. Zerbitzuak emateko hitzarmenak.
1. Inguruabar bereziengatik urteko garai batzuetan polizia zerbitzuen gainkarga duten toki entitateek, baina langile-gehikuntza iraunkorrik behar izan gabe, beren plantillak indartzen ahalko dituzte beste toki entitate batzuekin izenpetutako akordioen bidez, helburu dutenak entitate horietako Tokiko Poliziako edo Tokiko Poliziako Zerbitzuetako langileek denbora epe jakin batez zerbitzuak eman ahal izatea toki entitate eskatzaileari, zerbitzu-eginkizunen figuraren bitartez.
2. Kasuan kasuko hitzarmenean ezarriko da zerbitzu-eginkizunak zer baldintzatan egin behar diren. Neurri honek ukitutako langileek eskubidea izanen dute hitzarmenean ezartzen diren zerbitzuagatiko kalte-ordainak jasotzeko, eta beren toki entitatean onartuta dituzten eskubideak ezin izanen dira urratu.
3. Hitzarmenak Nafarroako Gobernuko Barne Zuzendaritza Nagusiari jakinarazi beharko zaizkio.
IV. KAPITULUA. Nafarroako Polizien Kontseilua
13. artikulua. Izaera eta eginkizunak.
1. Nafarroako Polizien Kontseilua kide anitzeko organo bat da, kontsultarako eta aholku emateko.
2. Hauek dira Nafarroako Polizien Kontseiluaren eginkizunak:
a) Nafarroako Polizien entitate titularrei aholku ematea arlo tekniko-polizialean, baita polizia-zerbitzua emateko modua hobetzeari dagokionez ere.
b) Aholku ematea polizia-zerbitzua kudeatzeko formula berriei buruz eta polizia-zerbitzuaren baldintza teknikoak eta antolamendukoak ezartzeari buruz.
c) Aholku ematea Nafarroako segurtasun publikoaren sistema polizia-arloan garatzeari buruz.
d) Aholku ematea polizia-prestakuntzaren arloan.
e) Nafarroako Administrazio Publikoei lankidetza polizialerako formulak proposatzea.
f) Helarazten zaizkion arau-proiektuei buruzko txostena egitea.
g) Lanbidearen estatutuari buruzko kontsultei erantzutea.
h) Legeek eta erregelamenduzko xedapenek esleitzen dizkioten gainerako eginkizunak.
3. Nafarroako Polizien Kontseiluak nahitaez parte hartuko du aurreko apartatuko f) letran aipatzen diren arau-proiektuak egiteko prozeduretan, baina parte-hartze hori ez da loteslea izanen, eta alderdi tekniko eta profesionalei buruzkoa izanen da.
4. Nafarroako Polizien Kontseiluak aholku emanen du halakoa behar duen entitateak eskatuta nahiz Kontseiluak berak proposatuta -kasu honetan, ukitutako entitateak onartu egin beharko du hark aholku ematea-.
14. artikulua. Kideak eta funtzionamendua.
1. Nafarroako Polizien Kontseiluak Nafarroako Administrazio Publikoen sei ordezkari izanen ditu, Nafarroako Gobernuan Barne arloko eskumena duen departamentuko titularrak hautatuak –horien artean kontseilaria bera edo hark eskuordetzen duen agintaria–, eta Nafarroako Polizien sei ordezkari.
Nafarroako Administrazio Publikoen ordezkari horietarik hiru Nafarroako Foru Komunitateko Administrazioarenak izanen dira, eta gainontzeko hirurak toki entitateenak. Azken hiru horietatik, bat Iruñeko Udalarena izanen da, eta beste biak Tokiko Polizia duten gainerako Nafarroako toki entitateenak, Nafarroako Udal eta Kontzejuen Federazioak proposatuak.
Nafarroako Polizien ordezkari horietatik hiru Foruzaingoarenak izanen dira, foruzainburuak proposatuak. Gainontzeko hirurak, Tokiko Polizienak: bat Iruñeko Udaltzaingoarena eta gainontzeko biak beste Tokiko Polizienak, Tokiko Poliziak Koordinatzeko Batzordeak proposatuak, azken bi horiek.
Batzordearen osaeran eta geroago Batzordeko kideak berritzean, genero parekidetasunaren printzipioa errespetatzeko ahalegina eginen da.
2. Nafarroako Polizien Kontseiluko burua Nafarroako Gobernuan Barne arloko eskumena duen departamentuko titularra izanen da.
3. Nafarroako Polizien Kontseiluko idazkaria Nafarroako Foru Komunitateko Administrazioko funtzionario bat izanen da, bere lanpostua eskuratzeko zuzenbideko lizentziatu titulua izatea eskatu zaiona.
Idazkariak Kontseiluaren bileretan hizpidearekin baina botorik gabe parte hartuko du.
4. Nafarroako Polizien Kontseilua gutxienez urtean behin bilduko da, eta kideen herenak, gutxienez, eskatzen duen guztietan.
Nafarroako Polizien Kontseiluak bere jardunerako arau propioak onetsiko ditu.
II. TITULUA. Nafarroako Foruzaingoa
15. artikulua. Izaera eta menpekotasun organikoa.
1. Nafarroako Foruzaingoa Nafarroako Foru Komunitateko Administrazioaren menpeko segurtasun zerbitzu zibila da, eta egitura eta antolaketa hierarkizatuak ditu.
2. Nafarroako Foruzaingoa polizia integrala eta erreferentziakoa da, eta Nafarroako Foru Komunitateko lurralde osoan betetzen ditu bere eginkizunak, horrek galarazi gabe ordenamendu juridikoak Tokiko Poliziei eta Estatuko segurtasun indar eta kidegoei esleitzen dizkien eskumenak.
3. Nafarroako Gobernuari dagokio, bere lehendakariaren bidez, Nafarroako Foruzaingoaren goreneko agintea.
Barne gaietako eskumena duen departamentuko titularra den kontseilariak beteko du Nafarroako Foruzaingoaren goi zuzendaritza.
Nafarroako Foruzaingoak Foruzaingoko buruaren aginte operatibopean jardunen du.
4. Nafarroako Foruzaingoak kasuko plan zuzendarian zehazten den ratioa izanen du: gutxienez ere 2,2 polizia izanen dira mila biztanle bakoitzeko, eta ratioa ez da izanen Nafarroako toki poliziena baino txikiagoa. Hori, halere, ez da eragozpena izanen langile-gastuei buruzko oinarrizko arauek xedatzen dutenerako.
Nafarroako Foruzaingoak eginkizun hauek izanen ditu:
a) Bermatzea herritarren segurtasuna, eskubide eta askatasun publikoen erabilera baketsua eta pertsonen eta ondasunen babesa.
b) Ikuskapen, salaketa eta nahitaezko betearazpeneko jardueren bitartez zaintzea legeak eta Nafarroako Foru Komunitatearen eskumeneko arloei aplikatu beharreko gainerako xedapen orokorrak betetzen direla, bai eta Nafarroako Foru Komunitateko organo instituzionalen egintzak ere.
c) Nafarroako Foru Komunitateko agintarien babesaz eta segurtasunaz arduratzea.
d) Nafarroako Foru Komunitateko erakundeen eta haien erakunde autonomoen menpe dauden pertsona, eraikin eta instalazioen babesaz eta segurtasunaz arduratzea.
e) Nafarroako Foru Komunitatearen eskumenekoak diren oinarrizko zerbitzu publikoen funtzionamendu normala bermatzea.
f) Nafarroako Foru Komunitatearen lurraldean zirkulazioa antolatzea, eskumenak banatzeko Estatuarekin izenpetzen diren eta unean-unean indarra duten hitzarmenekin bat, salbu eta eskumena legez Tokiko Poliziei badagokie.
g) Garraioen arloan jardun eta ikuskapenak egitea, indarra duten legeetan xedatutakoarekin bat.
h) Herritarren segurtasuna eta ordena mantentzea eta, kasua bada, berrezartzea, behar diren esku-hartzeen bitartez, eta bereziki, espazio publikoak zaintzea, manifestazioak babestu eta antolatzea eta jende-elkarretaratze handietan ordena mantentzea.
i) Pertsonak eta ondasunak babestea eta sorostea, batez ere istripu-kasuetan eta larrialdietan, babes zibileko xedapenen eta, kasua bada, planen arabera.
j) Zirkulazio-istripuetan atestatuak instruitzea, apartatu honen f) letran ezarritako eginkizunen esparruan.
k) Delituak prebenitzea eta delitugintza ekiditeko behar diren eginbideak egitea.
l) Polizia judiziala.
m) Nafarroako toki entitateekin elkarlanean eta elkarlaguntzan aritzea, baldin eta haiek eskatzen badute, aplikatzekoak diren xedapenetan ezartzen den moduan.
n) Beste segurtasun indar eta kidego batzuekin elkarlanean eta elkarlaguntzan aritzea, legeetan ezarritako kasuetan.
ñ) Segurtasun indar eta kidego guztiekin lankidetzan aritzea polizia-intereseko informazioa biltzen, tratatzen eta elkarri helarazten.
o) Nafarroako Foru Komunitatearen lurraldean aritzen diren segurtasun pribatuko enpresak ikuskatzea eta haien zerbitzu, jarduketa, baliabide eta langileak kontrolatzea, indarreko legeetan ezartzen den moduan.
p) Gatazka pribatuak adiskidetasunez konpontzen laguntzea, horretarako eskaera egiten zaionean.
q) Legeek esleitzen dizkioten gainerako eginkizunak; eta, zehazki, legeek autonomia erkidegoetako segurtasun kidegoei esleitzen dizkietenak.
17. artikulua. Uniformea, bereizgarriak, egiaztagutunak, agurrak, ohoreak eta sariak.
1. Nafarroako Foruzaingoko langileek, lanean dihardutela, uniformea jantziko dute beti.
Foruzainburuari dagokio erabaki arrazoitu bitartez ezartzea Foruzaingoko zer unitatek edo kidek beteko dituzten beren eginkizunak arauzko uniformea jantzi gabe, zerbitzuak hala eskatzen duenean. Herritarrek eskatuz gero, polizia-eginkizunetan ari direnean beren identitate profesionala erakutsiko dute.
2. Foru agindu bidez, kontseilari eskudunak uniformeari, bereizgarriei, egiaztagutunei, agurrei, ohoreei eta sariei buruzko arauak emanen ditu.
Halaber, Nafarroako Foruzaingoaren egoitzetan, ibilgailuetan eta baliabide mugikorretan erabili beharreko ikur bereizgarriak arautuko ditu.
3. Poliziaren uniforme, ibilgailu eta instalazioetako errotulazioak une oro bete beharko du Nafarroako Foru Komunitateko Administrazioan euskara erabiltzeari buruzko legeriak ezartzen duena.
Kontseilari eskudunaren foru agindu bidez arautuko dira Nafarroako Foruzaingoaren arauzko armak, aplikatzekoa den Estatuko legeria errespetatuz.
Foru agindu horrek ezarriko du, halaber, Administrazioak zer kasu eta baldintzatan kentzen ahalko dien arauzko arma Nafarroako Foruzaingoko langileei, arrisku psikologikoa egon daitekeela atzemateagatik. Erabaki hori, betiere, behar bezala arrazoituta egonen da, eta beharrezkoa izanen du prozedura bat tramitatzea, behar diren bermeekin eta ukitutako langileari entzunaldia emanez.
Foruzaingoko buruak arauzko arma eramateko betebeharretik salbuesten ahalko du, kasuko inguruabar berezien arabera.
19. artikulua. Polizia judiziala.
1. Nafarroako Foruzaingoak ordenamendu juridikoak esleitzen dizkion polizia judizialeko eginkizun orokorrak beteko ditu eta, egoki diren bideak erabiliz, agintari judizialek edo Ministerio Fiskalak eskatzen duten lankidetza emanen du delituak ikertu eta jazartzera bideratutako jarduketetan, ustezko errudunak aurkitu eta atxilotzeko, delituko tresna, efektu eta frogak segurtatzeko, haiek epaile edo auzitegi eskudunaren esku utziz, eta bidezko diren txosten teknikoak eta peritu-txostenak egiteko.
2. Aurreko apartatuan xedatutakoaren ondorioetarako, Nafarroako Foruzaingoaren egitura organikoaren barruan, polizia judizialaren arloko eginkizunak izanen dituzten unitateak ezarriko dira erregelamenduz, eta epaitegiei edo auzitegiei edo Ministerio Fiskalari atxikitzen ahalko zaizkie. Horrelakoak sortzeko, delitu-espezializazioko irizpideak aintzat hartzen ahalko dira.
3. Polizia Judizialeko unitateak eginkizun espezializatuetan aritzeko, dagokion diploma beharko da, Nafarroako Segurtasun eta Larrialdi Eskolak edo baliokide batek emana, espezializazio ikastaroa edo azterketa gainditu ondoren.
4. Polizia Judizialeko unitateei atxikitako langileak beren ikergai den aferaz arduratzen ari diren epaile eta auzitegien edo Ministerio Fiskalaren menpe egonen dira funtzionalki.
5. Polizia Judizialeko unitateetako langileak ezin izanen dira aginduta duten ikerketa lanetik baztertuak edo bereiziak izan, ez bada Botere Judizialari buruzko Lege Organikoan eta aplikatzekoak diren gainerako arauetan ezarritako moduan.
6. Polizia Judizialeko unitateetako langileen araubidea foru lege honetan ezarritakoa izanen da eta, oro har, Nafarroako Foruzaingoko gainerako langileei aplikatzen zaiena.
III. TITULUA. Nafarroako tokiko poliziak
20. artikulua. Tokiko Polizien definizioa eta eraketa.
1. Nafarroako Tokiko Poliziak Nafarroako toki entitateen menpeko segurtasun zerbitzu zibilak dira, eta egitura eta antolaketa hierarkizatuak dituzte.
2. Zazpi mila biztanle eskubidedun edo gehiago dituzten Nafarroako toki entitateek Tokiko Poliziak sortzen ahalko dituzte, horrek ezertan galarazi gabe foru lege honen 9. artikuluan aurreikusitako aukera.
3. Nafarroako Gobernuak baimena eman dezake aurreko apartatuan adierazitakoak ez diren toki entitateetan tokiko polizia eratu edo mantentzeko, herritarren segurtasuna dela-eta beharrezkoa edo komeni denean.
4. Toki entitate bakoitzeko Tokiko Polizia bakarra izanen da, eta Tokiko Polizia deituko da, usadioz Udaltzaingoa deitu den kasuetan izan ezik, halakoetan izen hori mantentzen ahalko baita.
21. artikulua. Biztanle bakoitzeko ratioak.
Aurreko artikuluan xedatutakoaren arabera Tokiko Poliziak eratzeko, ratio hauek errespetatu beharko dira:
a) 7.000 eta 10.000 biztanle arteko toki entitateak: gutxienez 1etik 1,3 polizia arte 1.000 biztanleko.
b) 10.000 eta 40.000 biztanle arteko toki entitateak: gutxienez 1,3tik 1,8 polizia arte 1.000 biztanleko.
c) 40.000 biztanle baino gehiagoko toki entitateak: gutxienez 1,8tik 2,2 polizia arte 1.000 biztanleko.
d) 40.000 biztanle arteko Tokiko Polizien edo Tokiko Polizietako Zerbitzuen elkarteetan, foru lege honen 11. artikuluan aipatzen diren horietan: gutxienez 1,3tik 1,8 polizia arte 1.000 biztanleko.
Artikulu honetan aipatutako ratioak kuantifikatzeko, kontuan hartuko dira, ondore guztietarako, zerbitzua ematen duten tokiko polizien laguntzaileak.
22. artikulua. Nafarroako Tokiko Polizien egitura.
Aurreko artikuluan ezarritako ratioekin bat, Nafarroako Tokiko Poliziek enplegu hauek izanen dituzte gutxienez:
a) 7.000tik 10.000 biztanle arteko toki entitateak: gutxienez 6 agente eta lehen agente 1.
b) 10.000 biztanle baino gehiagoko toki entitateak: gutxienez 12 agente eta 3 lehen agente.
1. Nafarroako Tokiko Poliziek beteko dituzten eginkizunak honakoek esleitzen dizkietenak izanen dira: Segurtasun Indar eta Kidegoei buruzko martxoaren 13ko 2/1986 Lege Organikoa, Nafarroako Segurtasun Publikoari buruzko ekainaren 20ko 8/2006 Foru Legea, eta gainerako ordenamendu juridiko indarduna. Eginkizunak hauek izanen dira, bereziki:
a) Toki entitateetako agintariak babestea, eta haien eraikinak eta instalazioak zaindu edo gordetzea.
b) Herrigunean zirkulazioa antolatu, seinalizatu eta zuzentzea, zirkulazio arauetan ezarritakoarekin bat.
c) Hiri barruan gertatutako trafiko istripuen gaineko atestatuak egitea.
d) Polizia administratiboa, ordenantzei, bandoei eta gainerako udal xedapenei dagokienez, haien eskumenen barruan.
e) Polizia judiziala, indarreko legeriak adierazten dituen kasu eta moduetan.
f) Generoko indarkeriaren prebentzioa, arreta soziala ematea eta neurri judizialak kontrolatzea arlo horretan.
g) Laguntza ematea istripu, hondamendi edo zoritxar publikoaren kasuetan, eta parte hartzea Babes Zibileko planak betetzeko lanetan, legeek aurreikusitako moduan.
h) Delitugintza-prebentzioko eginbideak eta delitugintza ekiditeko joera duten jarduketa guztiak egitea, Segurtasun Batzordeetan ezarritako lankidetza-esparruaren barrenean.
i) Espazio publikoak zaintzea eta Estatuko Segurtasun Indar eta Kidegoekin eta Nafarroako Foruzaingoarekin elkarlanean aritzea manifestazioak babesten eta bilkura jendetsuetan ordena zaintzen, hala eskatzen zaienean.
j) Gatazka pribatuak konpontzen laguntzea, hala eskatzen zaienean.
2. Nafarroako Tokiko Poliziek aurreko apartatuko c) eta h) letretan aurreikusitako eginkizunen jardunean egindako jarduketak Nafarroako Foruzaingoari eta Estatuko Segurtasun Indar eta Kidegoei jakinarazi beharko zaizkie.
3. Tokiko Poliziaren jardunaren lurralde-esparrua kasuko udal mugartea izanen da, deusetan galarazi gabe foru lege honen 11. artikuluko 7. paragrafoan xedatutakoa.
Aurrekoa gorabehera, premiazko egoera berezietan, Tokiko Poliziak zilegi izanen du bere lurralde-esparrutik kanpo jardutea, kasuko toki entitateek horretarako sinatutako lankidetza hitzarmenetan edo koordinazio planetan ezarritako baldintzetan. Segurtasun publikoaren arloko eskumenaren titular den departamentuak onespena eman beharko du aurretik. Alabaina, larrialdietan nahikoa izanen da jarduketa behar duen lurraldeko agintari eskudunak aurretiaz eskaera egitea .
24. artikulua. Tokiko Poliziako laguntzaileak .
1. Tokiko Polizia duten Nafarroako toki entitateek, Tokiko Polizia izan gabe hura eratzea aurreikusia dutenek eta foru lege honen 11. artikuluan aurreikusitako elkarteek zilegi izanen dute langileak aldi baterako kontratatzea, administrazio araubidean. Langile horiei “Tokiko Poliziako laguntzaile” deituko zaie, eta haien kontratazioak helburu izanen du eginkizunak eraginkortasunez betetzea, eginkizun horiek ukiturik gertatu badira absentismoaren edo aldi baterako absentziarako beste arrazoi batzuen ondorioz, lanpostu hutsak betetzearen ondorioz edo segurtasun publikoarekin lotutako salbuespeneko edo behin-behineko beharren ondorioz.
Horrekin batera, Tokiko Poliziarik ez duten toki entitateek edo elkarteek salbuespen gisa kontratatzen ahalko dituzte Tokiko Poliziako laguntzaileak, hurrengo artikuluan aipatzen diren Tokiko Poliziako Zerbitzuei laguntzeko eta haietako lanpostu hutsak betetzeko. Kontratazio hori egin aurretik, Nafarroako Gobernuaren baimena beharko da, Barne gaietako eskumena duen departamentuaren bitartezkoa. Kontratazio hori ez da inola ere egiten ahalko baldin eta kasuko toki entitatean Tokiko Poliziako Zerbitzurik ez badago.
2. Tokiko Poliziako Laguntzaileek kasuko Tokiko Poliziako langileei laguntzeko lanak eginen dituzte, eta haien zuzendaritzapean arituko dira.
Langile horiek beteko dituzten eginkizunak soilik izanen dira ondasunak, zerbitzuak, instalazioak eta egoitza ofizialak zaindu eta gordetzea, zirkulazio-arauei jarraituz bide-trafikoa antolatzea, Tokiko Poliziei edo Tokiko Poliziako Zerbitzuei elkarlana eta laguntza ematea herritarren segurtasunaren, babes zibilaren eta herritarrentzako laguntzaren arloko eginkizunetan, eta lankidetzan aritu eta laguntzea administrazio izaera duten arauak betearazten. Ondorio horietarako, agintaritzaren agentetzat hartuko dira.
3. Tokiko Poliziako Laguntzaileek beren burua behar bezala identifikatzeko moduko bereizgarriak eramanen dituzte, eta behar den dokumentazioaren bidez frogatuko dute beren izaera.
Ezein kasutan ez dute su-armarik eramanen.
4. Ezin izanen da Tokiko Poliziako Laguntzaile izateko kontratatu Nafarroako Segurtasun eta Larrialdi Eskolak berariaz emandako Tokiko Poliziako Laguntzailearen gaikuntzarik kontratazioaren aurretik lortu ez duen inor.
Gaikuntza hori ezartzen diren probak gainditu dituztenei soilik emanen die Segurtasun eta Larrialdi Eskolak. Gaikuntza lortu ahalko da Barne Zuzendaritza Nagusiak aldian behin egiten dituen deialdi publiko berariazkoetan edo toki entitateak sustatzen duen hautapen prozesuan zehar.
Toki entitateak sustatutako hautapen prozeduretan, izangaiek gaitasun fisikoa eta jakintza tekniko eta juridiko orokorra neurtzeko azterketa bat gainditu beharko dute, bai eta, halakoak aurreikusten direnean, bidezko diren proba psikoteknikoak ere.
5. Tokiko Poliziaren Laguntzaile baten kontratazioa plantilla organikoan tokiko poliziako lanpostu bat hutsik dagoelako egiten denean, toki entitateak lanpostu hori behin betikoz betetzeko deialdia egin beharko du kontratazioa egin eta gehienez bi urteko epean.
6. Artikulu honetan aipatzen diren langileei aplikatu beharreko araubidea Nafarroako Administrazio Publikoen zerbitzuko Langileen Estatutuak administrazio araubidean kontratatzen diren langileentzat ezarritakoa izanen da, foru lege honetan ezarritako salbuespenekin.
Ondorio horietarako, Tokiko Poliziako Laguntzaileak estatutu horretako D mailari atxikiko zaizkio.
25. artikulua. Tokiko Poliziako Zerbitzuak.
1. 7.000 biztanle baino gutxiagoko Nafarroako toki entitateetan Tokiko Poliziako Zerbitzua egon daiteke, oro har egitura hau izanen duena, gehienez ere: 6 udal agente, zeinetatik bat koordinazio buru hautatu ahalko baita, hautapen askez.
2. Tokiko polizia zerbitzuetako langileei foru lege honen IV. tituluan aurreikusita dagoen Nafarroako Polizietako langileen Estatutuan ezarritakoa aplikatuko zaie.
Tokiko Poliziako Zerbitzuetako langileak, armak dituztela edo ez, beren eginkizunetan dihardutenean, agintaritzaren agentetzat joko dira, eta izaera hori behar diren agirien eta bereizgarrien bidez frogatu beharko dute. Udal agente lanpostuetan sartzeko hautaprobetan onartua izateko, foru lege honen 35. artikuluan poliziako agentearen enplegurako eskatzen diren betebehar eta baldintza berak bete beharko dira. Hautapen prozeduran, izendatuak izateko ezinbesteko betebehar gisa, berariazko prestakuntzako ikastaro bat gainditu beharko dute Nafarroako Segurtasun eta Larrialdi Eskolan.
3. Tokiko Poliziako Zerbitzuek eginkizun hauek beteko dituzte:
a) Tokiko ondasun, zerbitzu, instalazio eta egoitzak zaindu eta begiratzea.
b) Herrigunean zirkulazioa antolatzea, zirkulazio arauekin bat.
c) Herritarrak sorosteko eta babes zibileko lanetan parte hartzea, legeetan xedatutakoarekin bat.
d) Toki entitatearen erregelamendu, ordenantza, bando, ebazpen eta gainerako xedapenak betetzen direla zaintzea.
e) Espazio publikoak zaintzea eta Nafarroako Poliziekin elkarlanean aritzea elkarretaratze handietan, jai edo kultur ekitaldietan eta antzeko egoeretan.
f) Gatazka pribatuak modu adiskidetsuan ebazten esku hartzea, hala eskatzen zaienean.
g) Segurtasun Indar eta Kidegoei une oro laguntzea eta haiekin elkarlanean aritzea.
h) Ordenamendu juridikoan xedatutakoarekin bat eta lanpostuaren baldintzen esparruan kasuko toki entitateak esleitzen edo ardurapean ipintzen dizkien eginkizun ez-polizialak.
26. artikulua. Antolaketaerregelamenduak.
Tokiko Polizia duten toki entitateek antolaketa-erregelamendu bat prestatuko dute. Bertan jasoko dira Tokiko Polizia horretan dauden enpleguak edo graduazioak, eta, kasua bada, zer unitate desberdinetan antolatzen den, unitate bakoitzaren berariazko eginkizunak eta horietan sartzeko bete beharreko baldintzak.
27. artikulua. Uniformeak, bereizgarriak, armak eta egiaztagutunak.
1. Nafarroako Tokiko Polizietako langileek, zerbitzuan dihardutela, uniformea jantziko dute beti. Toki entitate bakoitzeko organo eskudunak, zerbitzuak hala eskatzen duenean, arrazoituta ezarriko du Tokiko Poliziako zer unitatek edo kidek bete ahalko dituzten beren eginkizunak uniformea jantzi gabe .
2. Toki entitate bakoitzak garapen-arau berariazkoak eman ditzake uniformeez, egiaztagutunez, bereizgarriez eta, kasua bada, agurraz. Horrek ez du galarazten Nafarroako Gobernuak, Tokiko Polizien Koordinazioaren arloan eskumena duen departamentuaren bidez, neurriak sustatzea gai horien erregulazio homogeneoa erdiesteko Nafarroako Tokiko Polizia guztietan.
3. Nafarroako Tokiko Polizietako langileek, beren eginkizunetan dihardutela, soinean eramanen dituzte toki entitateko organo eskudunak zehazten dituen armak; hain zuzen ere, zehaztuak foru lege honen 18. artikuluan aipatzen den foru aginduaren bidez eta armei buruzko Estatuko legerian ezarritakoari jarraikiz Nafarroako Gobernuak Nafarroako Foruzaingoaren arauzko arma gisa seinalatzen dituenen artetik.
Organo horrek ezarriko du, halaber, toki entitateak zer kasu eta baldintzatan kentzen ahalko dien arauzko arma Tokiko Poliziako langileei, arrisku psikologikoa egon daitekeela atzemateagatik. Erabaki hori behar bezala arrazoituta egonen da betiere, eta erabaki hori hartzeko beharrezkoa izanen da prozedura bat tramitatzea, behar diren bermeekin eta ukitutako langileari entzunaldia emanez.
Toki entitate bakoitzeko organo eskudunak, zerbitzuak hala eskatzen duenean, arrazoituta ezarriko du Tokiko Poliziako zer unitatek edo kidek beteko dituzten beren eginkizunak arauzko arma eraman gabe.
Armak erabiliko dira aplikatzekoa den legeria orokorrean xedatutakoari jarraituz.
4. Poliziaren uniforme, ibilgailu eta instalazioetako errotulazioak une oro bete beharko du toki entitatean euskara erabiltzeari buruzko araudian ezarritakoa.
IV. TITULUA. Nafarroako Polizietako Langileen Estatutua
I. KAPITULUA. Sarrera, hautaketa eta lanpostuak betetzea
1. ATALA. Xedapen orokorrak
28. artikulua. Plantilla organikoak eta lanpostuen zerrendak.
1. Nafarroako Administrazio Publikoek beren plantilla organikoetan eta lanpostuen zerrendetan sartuko dituzte beren Poliziako langileei dagozkien lanpostuak.
2. Plantilla organikoetan eta lanpostuen zerrendetan Polizia bakoitzeko lanpostuak jasoko dira, behar bezala sailkatuta, eta gutxienez alderdi hauek adierazita:
a) Lanpostu bakoitza zein mailari atxikita dagoen.
b) Lanpostuaren zenbakia eta izena.
c) Zein unitate organikoren menpe dauden.
d) Zein egoitzatan edo herritan dagoen kokatuta.
e) Zein enplegu edo kategoriarentzat dagoen erreserbatuta.
f) Lanpostuak betetzeko sistema.
g) Lansari osagarriak.
h) Bigarren jarduerako lanpostuak, erregelamendu bidez ezartzen direnak.
i) Sartzeko moduak.
j) Sartzeko eta jarraitzeko bete beharreko baldintzak.
3. Nafarroako Gobernuari dagokio Nafarroako Foruzaingoaren plantilla organikoa onetsi eta aldatzea, bai eta hura osatzen duten lanpostuak zehaztea ere. Plantilla organiko hori Nafarroako Aldizkari Ofizialean argitaratuko da.
Nafarroako Foruzaingoko langileak beren lanbide-zenbakiarekin identifikatuta ageriko dira plantilla organikoan.
4. Toki entitateetako poliziak osatzen dituzten lanpostuak zehaztea eta haien plantilla organikoak eta lanpostuen zerrendak onestea toki entitateari dagokio, toki administrazioaren gaineko legerian ezartzen den organoaren bitartez.
Toki entitateetako polizietako langileen zerrenda plantilla organikoan agertuko da identifikaturik, lanbide-zenbakiarekin.
29. artikulua. Poliziako burua.
1. Poliziako buruaren kargua bateraezina da Administrazio Publikoko beste edozeinekin, bai eta beste edozein lan, merkataritzako jarduera edo lanbiderekin ere.
2. Nafarroako Foruzaingoko burua hautapen askeko behin-behineko langilea da, Nafarroako Foru Komunitatearen Administrazioko goi kargutzat hartuko da, zuzendari nagusien araubide juridikoa aplikatuko zaio, eta Barneko zuzendari nagusiaren menpe egonen da, organikoki eta funtzionalki.
3. Nafarroako Foruzaingoko burua izendatzea eta kargutik kentzea Nafarroako Gobernuari dagokio, Barne gaietako eskumena duen departamentuko titular den kontseilariak proposaturik. Bai izendapena bai kargu-uztea Nafarroako Aldizkari Ofizialean argitaratu beharko dira.
4. Tokiko Polizia bakoitzeko buruaren izendapena Nafarroako Polizietako kideen artetik eginen da, eta hala izendapen hori nola kargutik kentzea toki entitateari dagozkio, Toki Administrazioari buruzko legerian xedatutakoaren arabera eskuduna den organoaren bidez.
2. ATALA. Nafarroako Polizietako langile izaera eskuratzea eta galtzea
30. artikulua. Araubide orokorra.
Nafarroako Polizietako langile izaera eskuratu eta galtzea Nafarroako Administrazio Publikoen zerbitzuko Langileen Estatutuan funtzionario izaera eskuratu eta galtzeaz ezarritakoak eraenduko du, foru lege honetan praktiketako langileentzat xedatutakoa galarazi gabe.
Nafarroako Polizietako langileak Nafarroako Administrazio Publikoen zerbitzuko Langileen Estatutuak ezartzen dituen mailetatik honako hauetan sartuko dira:
a) Komisario nagusia eta komisarioa, A mailan.
b) Inspektorea eta inspektoreordea, B mailan.
c) Agente lehena eta agentea, C mailan.
32. artikulua. Praktiketako funtzionarioak.
1. Nafarroako Polizietako agente eta inspektore enpleguetan sartzeko izangaiak, baldin Nafarroako Segurtasun eta Larrialdi Eskolak ematen duen prestakuntza ikastaroa egiteko onartuta badaude lehendik funtzionario izan gabe, ikastaroa egin bitartean eta, gaindituz gero, dagokion administrazioak behin betiko lanpostuaren jabetza hartzeko finkatzen duen egunera arte, prestakuntza ikastaroaren hasieran hautatu duten Administrazioko praktiketako funtzionariotzat joko dira.
2. Praktiketako funtzionarioek oinarrizko ordainsariak eta familia laguntza jasoko dituzte. Erregelamenduz ezarriko dira praktiketako langileen egoerari dagozkion baldintzak, eskubideak eta betebeharrak.
3. Ikastaroa egiteko onartutako izangaiak, lehendik funtzionario direnak, jarduneko egoera administratiboan egonen dira ikastaroak irauten duen bitartean, erregelamenduz ezartzen diren baldintzen arabera. Langile horiek eskubidea izanen dute graduari eta antzinatasunari dagozkien lansariak jasotzeko.
3. ATALA. Langileen hautaketa
1. Deialdi publiko bidez eginen da Nafarroako Polizietan langile gisa sartzeko hautaketa, oposizio bidez edo oposizio-lehiaketa bidez, publikotasun, merezimendu, gaitasun eta berdintasun printzipioetan oinarrituta.
2. Hautaketa-prozedura kasuko deialdiko oinarriei jarraikiz eginen da, eta horien edukia erregelamenduz zehaztuko da. Oinarriak Nafarroako Aldizkari Ofizialean argitaratuko dira eta lotesleak izanen dira Administrazioarentzat, hautaprobak balioetsi behar dituzten epaimahaientzat eta parte-hartzaile guztientzat.
1. Hautaprobak objektiboak izanen dira, izangaiek ebaluazio-parametroak aurretiaz ezagututa, eta izaera teoriko eta praktikoa izanen dute. Hautaprobetan sartuko dira, gutxienez ere, egoera fisikoari buruzko probak, eskatutako maila akademikoaren araberako ezagutza-probak, plantilla organikoan lanpostuak duen hizkuntza eskakizunari buruzko titulaziorik aurkezten ez denerako dagokion euskara-mailari buruzko probak, eta proba psikoteknikoak.
Proba psikoteknikoak talde berak eginen dizkie izangai guztiei, halako moduan non diskrezioa bermatuta egonen baita.
2. Hautaproben artean, betiere, prestakuntza ikastaro bat egonen da, Nafarroako Segurtasun eta Larrialdi Eskolak emana. Ikastarorako deialdi bakarra egin ahalko da; hala bada, izangaiek behin bakarrik hautatuko dute, ikastaroa hasi aurretik.
Nafarroako Polizietako langilea izateko, nahitaezko betebeharra izanen da ikastaro hori gainditzea.
3. Aurreko apartatuan aurreikusitakoaren ondorioetarako, izangaiak jadanik gaindituta baldin badauka deialdiak eskatzen duen eta Nafarroako Segurtasun eta Larrialdi Eskolak antolatua den ikastaroaren baliokide den beste bat, aski izanen da Eskola horrek ikastaroa baliozkotzea. Ikastaroa baliokidea dela frogatzeko, interesdunak eskatuta Eskolak emanen duen agiri ofiziala aurkeztuko da, ikastaroen edukiak berdinak edo baliokideak direla egiaztatzen duena eta baliozkotutako ikastaroan edo ikastaroetan lortutako notak agertuko dituena.
Behin ikastaroaren edukia berdina edo baliokidea dela egiaztatuta, proportzio bat kalkulatuko da, bai haren puntuazio orokorrarena, bai hura osatzen duten ataletako bakoitzarena.
4. Kasuko Administrazio Publikoek behar diren neurriak hartuko dituzte emakumeak funtzio polizialean sar daitezen sustatzeko.
Nafarroako poliziak beren menpean dituzten administrazioek bermatuko dute Emakumeen eta Gizonen Berdintasun Eragingarrirako martxoaren 22ko 3/2007 Lege Organikoan bildutako xedapenak aplikatzen direla kidego horietan sartzeko hautapen prozesuetan eta kidego horietako lanpostuak betetzean eta lanpostu-igoeretan, eta bultzatuko dute emakumeen eta gizonen presentzia orekatua izan dadin segurtasun zerbitzu publikoan.
Polizia-kidegoetan emakumeak sustatzeko planak eginen dira, emakumeen eta gizonen aukera-berdintasuna bermatzeko haietara sartzean, lanpostu-igoeretan eta administrazio-egoeretan.
Plan horiek, kasuan kasuko plangintza-aldirako, ezarriko dute zenbatekoa izanen den polizia-plantillan lortu nahi den emakumeen portzentajea emakumeen azpiordezkapena zuzentzeko, bai eta poliziaren eraginkortasuna areagotzeko ere; eta emakumeen aldeko berariazko neurriak hartu ahalko dituzte de factozko desberdintasun-egoerak zuzentzeko, halako egoerek dirauten bitartean.
Neurri horiek arrazoizkoak eta bilatzen duten helburuarekiko proportzionatuak izanen dira.
Edonola ere, eta geroagoko erregelamendu bidezko garapenari loturik, emakumeen eta gizonen berdintasunerako aplikagarri den araudian ezarritako irizpideak aintzat hartuko dira hautapen prozeduretako sailkapenaren ordenan gertatzen diren puntuazio-berdinketei dagokienez.
Bereziki, langileen sarrera eta hautaketa prozeduretan, sexuaren arabera ponderatuko da proba fisikoetan eskatu beharreko maila, horrela genero-aferen ondoriozko edozein kalte ekiditearren ildo honetan.
Ondorio horietarako, Berdintasun Plan bat eginen da, edo Administrazio bakoitzean lehendik dauden berdintasun planak eguneratuko dira, emakumeak Nafarroako Polizietan duen egoera aztertzeko eta, kasua bada, egoki diren hobekuntza neurriak proposatzeko.
1. Nafarroako Polizietako lanpostuetan sartzeko hautaprobetan onartua izateko, baldintza hauek bete beharko dira:
a) Espainiako nazionalitatea izatea.
b) Gutxienez hemezortzi urteko adina izatea eta kasuan kasuko deialdian, indarreko legeriarekin bat, ezartzen den adina beteta ez izatea.
c) Su-armak eraman eta, kasua bada, erabiltzeko konpromisoa hartzea idatziz.
d) Lanposturako eskatzen den ikasketa titulua edo enplegua izatea.
e) Eginkizunak betetzeko gaitasun fisiko eta psikiko egokiak izatea, eta ez egotea kasuko deialdian ezartzen diren baztertze-arrazoi medikoen taulan.
f) Dolozko delitu batengatik kondenatua ez izatea, ez eta administrazio publiko baten zerbitzutik bereizia ere, eta eginkizun publikoetan aritzeko desgaitua edo gabetua ez izatea, deusetan galarazi gabe errehabilitazioaren onura aplikatzea, zigor eta administrazio arloetako arauei jarraikiz.
g) Kasuko deialdian ezartzen den ibilgailu mota gidatzeko baimena edukitzea.
2. Betebehar hauek eskabideak aurkezteko epea bukatu baino lehen bete behar dira, g) letrakoa izan ezik, prestakuntza ikastaroan onarturiko izangaien behin-behineko zerrenda argitaratzen den egunean bete beharko baita.
3. Nafarroako Administrazio Publikoek, beren plantilla organikoen bidez, behar diren neurriak hartuko dituzte, sustatzekoak euskaraz jakitea betebeharra edo merezimendua izan dadila lanpostu jakin batzuetan, euskararen erabilera arautzen duen legerian ezarritakoarekin bat.
36. artikulua. Ikasketatituluak.
Nafarroako Polizietako enpleguak eskuratzeko eskatuko den ikasketa titulua foru lege honen 31. artikuluan ezarritako mailei dagokiena izanen da.
37. artikulua. Agente enpleguan sartzea.
Agente enpleguan sartzeko, Nafarroako Polizietan sartzeko hautaprobak egin beharko dira.
Tokiko Polizia duten toki entitateek beren lanpostu hutsen % 30 erreserbatzen ahalko dituzte Nafarroako beste Tokiko Polizia edo Nafarroako Tokiko Poliziako beste Zerbitzu batzuetako langileen arteko oposizio-lehiaketa bidez betetzeko. Horrelako izangaiei azkeneko Tokiko Polizian bost urte baino gehiago egiazki lanean eman izana eskatuko zaie. Langile horiei Nafarroako Segurtasun eta Larrialdi Eskolako prestakuntza ikastaroa baliozkotzeari dagokionez 34.3. artikuluan ezarritakoa aplikatuko zaie. Txanda horretan betetzen ez diren lanpostuak txanda irekiko lanpostuei gehituko zaizkie.
38. artikulua. Agente lehenaren enpleguan sartzea.
1. Agente lehenaren enpleguak beteko dira, deitutako lanpostu hutsen artean, agente enplegua dutenen barne igoera bidez, kategoria-igoerarako lehiaketaren prozedura erabiliz.
Kategoria-igoerarako lehiaketa-prozedurek gutxienez proba teoriko-praktiko baztertzaile bat izan beharko dute, lortu nahi den enpleguaren edukiari eta eginkizunei buruzkoa. Era berean, proba psikotekniko ez-baztertzaileak ere izan ditzakete, izangaiak lanpostuaren profil profesiografikoari zenbateraino egokitzen zaizkion neurtzekoak.
Lehiaketa horretan parte hartzeko, agentearen enpleguan gutxienez ere hiru urteko antzinatasuna izatea eskatuko da.
2. Aurreko apartatuan aipatzen diren deialdietan, polizia bereko kideentzako barne igoerarako txanda bat ezarriko da, eta beste txanda bat gainerako lanpostu hutsekin, Nafarroako Polizia guztietako kideentzat irekia, ezarritako betebeharrak betetzen badituzte.
Apartatu honen aplikazioaren ondorioetarako, hiru lanpostu huts bakoitzetik lehendabizikoa eta hirugarrena barne igoera txandarako erreserbatuko dira, eta bigarrena, txanda irekirako.
Txanda ireki horretan betetzen ez diren lanpostuak barne igoerako txandari gehituko zaizkio.
39. artikulua. Inspektoreorde enpleguan sartzea.
1. Deitutako lanpostu hutsen artean, inspektoreordearen enpleguak agente lehenaren enplegua dutenen barne-igoeraren bidez beteko dira, oposizio-lehiaketa eginez.
Oposizio-lehiaketa horretan parte hartzeko, agente lehenaren enpleguan gutxienez hiru urteko antzinatasuna izatea eskatuko da, bai eta B mailan sartzeko eskatzen den titulazioa ere.
2. Aurreko apartatuan aipatzen diren deialdietan, kasuko poliziako kideentzako barne igoerarako txanda bat ezarriko da, eta beste txanda bat gainerako lanpostu hutsekin, Nafarroako Polizia guztietako kideentzat irekia, ezarritako betebeharrak betetzen badituzte.
Apartatu honen aplikazioaren ondorioetarako, hiru lanpostu huts bakoitzetik lehendabizikoa eta hirugarrena barne igoera txandarako erreserbatuko dira, eta bigarrena, txanda irekirako.
Txanda ireki horretan betetzen ez diren lanpostuak barne igoerako txandari gehituko zaizkio.
40. artikulua. Inspektore enpleguan sartzea.
Inspektore enpleguan sartzeko, prozedura eta modu hauek erabiliko dira:
a) Lanpostuen bi heren barne igoeraren bidez, kategoria-igoerarako lehiaketaren prozedura erabiliz, Nafarroako Polizietako inspektoreordeen artean, baldin eta hiru urte baino gehiagoko antzinatasuna badute enplegu horretan, bai eta B mailan sartzeko eskatzen den titulazioa ere, Nafarroako Administrazio Publikoen zerbitzuko Langileen Estatutuan xedatutakoarekin bat.
Aurreko apartatuan aipatzen diren deialdietan, kasuko poliziako kideentzako barne igoerarako txanda bat ezarriko da, eta beste txanda bat gainerako lanpostu hutsekin, Nafarroako Polizia guztietako kideentzat irekia, ezarritako betebeharrak betetzen badituzte.
Apartatu honen aplikazioaren ondorioetarako, hiru lanpostu huts bakoitzetik lehendabizikoa eta hirugarrena barne igoerako txandarako erreserbatuko dira, eta bigarrena, txanda irekirako.
Txanda ireki horretan betetzen ez diren lanpostuak barne igoerako txandari gehituko zaizkio.
Kategoria-igoerarako lehiaketa-prozedurek gutxienez proba teoriko-praktiko baztertzaile bat izan beharko dute, lortu nahi den enpleguaren edukiari eta eginkizunei buruzkoa. Era berean, proba psikotekniko ez-baztertzaileak ere izan ditzakete, izangaiak lanpostuaren profil profesiografikoari zenbateraino egokitzen zaizkion neurtzekoak.
b) Lanpostuen heren bat beteko da Nafarroako Polizietan sartzeko hautaprobak, foru lege honen 34. artikuluan aipatzen direnak, eginez, B mailan sartzeko eskatzen den titulazioa izan eta deialdian ezartzen diren gainerako baldintzak betetzen dituztenen artean. Txanda horretan betetzen ez diren lanpostuak barne igoera bidez beteko dira.
41. artikulua. Komisario enpleguan sartzea.
1. Deitutako lanpostu hutsen artean, komisarioaren enpleguak inspektorearen enplegua dutenen barne igoera bidez beteko dira, oposizio-lehiaketaren prozedura erabiliz.
Oposizio-lehiaketa horretan parte hartzeko, gutxienez hiru urteko antzinatasuna eskatuko da inspektorearen enpleguan, bai eta A mailan sartzeko eskatutako titulazioa ere.
2. Aurreko apartatuan aipatzen diren deialdietan, kasuko poliziako kideentzako barne igoerarako txanda bat ezarriko da, eta beste txanda bat gainerako lanpostu hutsekin, Nafarroako Polizia guztietako kideentzat irekia, ezarritako betebeharrak betetzen badituzte.
Apartatu honen aplikazioaren ondorioetarako, hiru lanpostu huts bakoitzetik lehendabizikoa eta hirugarrena barne igoerako txandarako erreserbatuko dira, eta bigarrena, txanda irekirako.
Txanda ireki horretan betetzen ez diren lanpostuak barne igoerako txandari gehituko zaizkio.
42. artikulua. Komisario nagusi enpleguan sartzea.
1. Deitutako lanpostu hutsen artean, komisario nagusiaren enplegua beteko da komisarioaren enplegua dutenen barne igoera bidez, kategoria-igoerarako lehiaketaren prozedura erabiliz.
Kategoria-igoerarako lehiaketa-prozedurek gutxienez proba teoriko-praktiko baztertzaile bat izan beharko dute, lortu nahi den enpleguaren edukiari eta eginkizunei buruzkoa. Era berean, proba psikotekniko ez-baztertzaileak ere izan ditzakete, izangaiak lanpostuaren profil profesiografikoari zenbateraino egokitzen zaizkion neurtzekoak.
Lehiaketa horretan parte hartzeko, eskatuko da gutxienez hiru urteko antzinatasuna izatea komisarioaren enpleguan, bai eta A mailan sartzeko eskatutako titulazioa ere.
2. Aurreko apartatuan aipatzen diren deialdietan, kasuko poliziako kideentzako barne igoerarako txanda bat ezarriko da, eta beste txanda bat gainerako lanpostu hutsekin, Nafarroako Polizia guztietako kideentzat irekia, ezarritako betebeharrak betetzen badituzte.
Apartatu honen aplikazioaren ondorioetarako, hiru lanpostu huts bakoitzetik lehendabizikoa eta hirugarrena barne igoerako txandarako erreserbatuko dira, eta bigarrena, txanda irekirako.
Txanda ireki horretan betetzen ez diren lanpostuak barne igoerako txandari gehituko zaizkio.
43. artikulua. Lanpostu hutsak esleitzea.
1. Deialdi batean parte hartzen dutenei dagozkien lanpostu hutsak esleituko zaizkie interesdunen eskaeren arabera, hautaprobetan lortutako puntuazioaren ordenari jarraikiz eta plantilla organikoan lanpostu horiek betetzeko ezarritako baldintzak errespetatuz.
2. 40. artikuluaren kasuan, barne igoerako txandakoek lehentasuna izanen dute artikulu horren b) apartatuan adierazitako txandakoen gainetik, eta, azken horien artean, Segurtasun Indar eta Kidegoetako kide direnek lehentasuna izanen dute gainerako izangaien gainetik.
44. artikulua. Enpleguak eskuratzeko prozedura.
1. Enpleguetan sartzeari buruz foru lege honetan aurreikusitako prozeduren lehiaketa fasean honakoak baloratuko dira gutxienez ere: Administrazio Publikoetan emaniko zerbitzuak, polizia-eginkizunarekin zerikusia duten prestakuntza-, irakaskuntza- eta ikerkuntza-jarduerak, hizkuntzak jakitea, eta, balorazio objektiboko prozedura bat erregelamenduz ezarri bada, betetako lanpostuetako eginkizun-betetzeari buruzko ebaluazioa.
2. Oposizio-lehiaketetako prozeduren oposizio fasean honakoak sartuko dira, gutxienez ere: baztertzaileak diren proba praktiko eta ezagutzei buruzkoak egitea, eskatutako maila akademikoaren eta lortu nahi den enpleguaren araberakoak, eta plantilla organikoan lanpostuak duen hizkuntza eskakizuneko euskara mailari buruzko probak, horren frogatze-titulaziorik aurkezten ez denean. Era berean, proba psikotekniko ez baztertzaileak ere izanen dira, izangaiak lanpostuaren profil profesiografikoari zenbateraino egokitzen zaizkion neurtzekoak.
3. Foru lege honetan aurreikusitako enpleguak eskuratzeko prozedura guztietan izanen da enplegurako gaikuntzako ikastaro bat gainditu beharra, Nafarroako Segurtasun eta Larrialdi Eskolak emana.
4. Enplegu desberdinetarako sarrera-probak objektiboak eta teoriko-praktikoak izanen dira, eta izangaiek aurretik ezagutuko dituzte ebaluaziorako parametroak; halaber, aurretik onetsitako eta kasuko deialdian argitara emandako gai-zerrenda bati buruzkoak izan beharko dira.
5. Aurreko apartatuetan jasotako xedapenak erregelamenduz garatuko dira Nafarroako Polizietan dagoen enplegu bakoitzerako.
4. ATALA. Prestakuntza
45. artikulua. Prestakuntzairizpideak.
1. Nafarroako Polizietako langileen prestakuntzak eta hobekuntzak Nafarroako Polizien prestakuntza planean ezarritako aurreikuspena beteko dute, eta foru lege honen 3. artikuluan adierazitako printzipioei egokituko zaizkie. Halaber, honako irizpideak bete beharko dituzte:
a) Profesionalak eta etengabeak izanen dira.
b) Administrazio publikoen menpeko ikastetxeetan egiten diren ikasketak Hezkuntza eta Zientzia Ministerioak baliozkotzen ahalko ditu. Ministerioak, horretarako, kontuan hartuko ditu ikasketa horietako bakoitzean sartzeko eskatutako titulazioak eta ikasketa horien izaera eta iraupena.
c) Aipatutako irakaskuntzak eta ikastaroak emateko, erakundeen arteko lankidetza sustatuko da unibertsitatearekin, botere judizialarekin, Ministerio Fiskalarekin eta pareko diren beste erakunde, zentro edo establezimendu batzuekin.
2. Nagusiki, Nafarroako Segurtasun eta Larrialdi Eskolak eta aurreko apartatuko c) letran aipatzen direnetako edozein zentrok edo establezimenduk eginen ditu langileen prestakuntza eta parte-hartzea Nafarroako poliziak eta tokiko poliziako laguntzaileak hartzeko hautapen prozesuetan.
3. Nafarroako Segurtasun eta Larrialdi Eskolaren eginkizunetako bat eginkizun berberak edo antzekoak dituzten erakunde publikoek emandako ikastaro eta diplomak osorik edo partez baliozkotzea izanen da, baita eskolak berak lehenago emandakoak ere, betiere eduki-baliokidetasuna badago. Horrelakoetan, behar den puntuazioa esleituko du. Halaber, artikulu honetako 1. apartatuko b) letran aipatzen diren baliozkotze-eskabideak bideratzeaz arduratuko da.
Era berean, Segurtasun eta Larrialdi Eskolak informazioa ematen ahal du, hautapen- eta kontratazio-organo publikoek hala eskatuta, Nafarroako Polizietan sartzeko edo haietako lanpostuetan igotzeko prozeduretan izangaiek aurkeztutako prestakuntza-ekintzen balorazioari eta baliokidetasunari buruz; horretarako, kontuan hartuko ditu prestakuntza-ekintzen eduki-baliokidetasuna, horietan lortutako puntuazioa, prestakuntza-ekintza horien iraupena eta modalitatea, bai eta irakatsitako gaien gaurkotasuna ere.
46. artikulua. Prestakuntzaren izaera.
1. Polizia-eginkizunaren berezitasuna kontuan hartuta, Nafarroako Polizietako langileen prestakuntzan sartzen ahalko da nahitaez egin behar izatea espezializazio- eta hobekuntza-ikastaroak, baliozkotze-proba fisikoak eta aldizkako birziklatze ikastaroak.
2. Ikastaro eta proba modalitateak, haien eraginak eta Nafarroako Polizietako zenbait unitaterekin duten lotura erregelamenduz ezarriko dira.
Ildo horretan, espezializazio eta hobekuntza ikastaroak, baliozkotze-proba fisikoak eta aldizkako birziklatze-ikastaroak nahitaez eskatzeak ekar dezake sarrera- edo iraupen-baldintza gisa jotzea zenbait ikastaro edo proba, horien xede diren unitateetan.
Inguruabar horiek kasuan kasuko plantilla organikoan adierazi beharko dira.
3. Nafarroako Administrazio Publikoek behar diren neurriak hartuko dituzte honakoa sustatzeko: destinoa eremu euskaldunean edo eremu mistoan daukaten edo edukiko duten Nafarroako Polizietako langileek euskarazko hizkuntza-prestakuntza izan dezaten, euskararen erabilera Administrazio Publikoan arautzen duen legerian ezarritakoarekin bat.
4. Nafarroako polizien prestakuntza-ekintza eta -plan guztietan genero ikuspegia kontuan hartuko da.
5. ATALA. Lanpostuak betetzea
47. artikulua. Betetzesistemak.
Nafarroako Polizietako lanpostu-betetzea eginen da merezimendu, gaitasun, antzinatasun eta berdintasun printzipioei jarraikiz.
Honakoak izanen dira sartzeko modalitateak: lehiaketa, zeina sistema arrunta baita, berariazko lehiaketa eta hautapen askea.
48. artikulua. Berariazko lehiaketa.
Berariazko lehiaketa erabiltzen ahalko da berezitasunen bat edo profil jakinen bat eskatzen duten lanpostuak betetzeko.
Berariazko lehiaketa bidez bete beharreko lanpostuak zein diren erregelamenduz ezarriko da, eta inguruabar horrek kasuko plantilla organikoan jasota egon beharko du.
Sistema horren bitartez sartzeko ezartzen diren hautaprobek objektiboak izan beharko dute, eta izangaiek aurretik ezagutu beharko dituzte ebaluaziorako parametroak.
49. artikulua. Hautapen askea.
1. Hautapen askea erabili ahalko da unitate organiko baten burutza dakarten lanpostuak betetzeko. Sistema hori salbuespen kasuan erabiliko da bete beharreko eginkizunengatik konfiantza berezia eskatzen duten lanpostuak betetzeko, zeinek ez baitute plantillaren 100eko 2 gaindituko.
Hautapen askez bete beharreko lanpostuak zein diren erregelamenduz ezarriko da, eta inguruabar horrek kasuko plantilla organikoan jasota egon beharko du.
2. Lanpostua hautapen askearen sistemaren bitartez betetzen ari den langilea izendatu zuen organoak libreki kentzen ahalko du lanpostu horretatik. Hala gertatuz gero, utzi eginen dio lanpostu horri dagozkion osagarriak jasotzeari, eta berehala itzuli beharko du jatorrian esleituta zuen destinora. Horretarako, funtzionario guztiei jatorrizko lanpostu bat esleitu beharko zaie.
6. ATALA. Lanpostu-igoera
50. artikulua. Langileen lanpostuigoera.
1. Nafarroako Polizietako langileen lanpostu-igoera izanen da goragoko enplegu batera igotzea, foru lege honetan ezartzen diren prozeduren bitartez, eta gradu-igoera, Nafarroako Administrazio Publikoen zerbitzuko Langileen Estatutuan izaera orokorrez ezarritakoa.
2. Nafarroako Polizietako langileek Nafarroako Administrazio Publikoetako funtzionarioentzako sarrera-prozeduretan lanpostu-igoerako txandetan parte hartzen ahalko dute, baldin eta Nafarroako Polizietako langile gisa egiazki zortzi urte eman badituzte zerbitzuan.
3. Nafarroako Polizietako langileek kide diren administrazioko merezimendu- eta lekualdatze-lehiaketetan parte hartzen ahalko dute, betiere Nafarroako Polizietan zerbitzuan zortzi urte eman badituzte.
4. Nafarroako polizia kidegoetako kideen lanpostu-igoerarako prestakuntza-ikastaroak egiten ari diren bitartean zerbitzu berezietako egoeran deklaratuta dauden izangaiek beren jatorrizko lanpostuan aitortuta dauzkaten ordainsari osoak jasoko dituzte deialdia egiten duen administrazio publikoarengandik, egoera horrek dirauen bitartean.
7. ATALA. Funtzionarioen mugikortasuna
51. artikulua. Enplegu trukea.
1. Nafarroako Tokiko Polizietako langileek erabakitzen ahalko dute beren enpleguak trukatzea, betiere baldintza hauek betetzen badira:
a) Interesa dutenak jardunean egotea eta maila eta enplegu berekoak izatea.
b) Gutxienez bost urte jarraian jardun izana zerbitzu aktiboan, trukea zein lanpostutatik eskatzen duten, lanpostu horretan.
c) Eskatzaile guztiak berrogeita hamar urtetik beherako adinekoak izatea.
d) Eskatzaileetako inor ez egotea diziplina espediente baten tramitazioan sartuta.
Trukea ukitutako toki entitateetako organo eskudunek baimendu beharko dute, kasuan kasuko burutzek txostena eman ondoren. Eskatzaileek ezin izanen dute truke berririk eskatu aurreko truketik gutxienez bost urte iragan arte. Destinoa trukatzen duten langileek egiaz betetzen duten lanpostuko lansariak jasoko dituzte.
Orobat erabaki ahalko da Nafarroako tokiko polizietako langileen eta Estatuko gainerako tokiko polizietako langileen arteko trukea egitea, Estatuko oinarrizko legeriak ezarritako baldintzetan.
2. Tokiko Polizia Zerbitzuetako langileek, foru lege honen 25. artikuluan aipatzen direnek, erabaki dezakete, halaber, beraien enpleguak trukatzea, artikulu honen aurreko apartatuan adierazitako baldintza beretan eta eskakizun berekin.
3. Administrazio publikoek hitzarmenak egin ahalko dituzte Nafarroako polizietako funtzionarioen, Foruzaingoa barne, eta beste administrazio autonomiko eta toki administrazio batzuetako polizia-funtzionarioen arteko trukeak baimentzeko.
52. artikulua. Unitateen arteko mugikortasuna.
Antolaketaren beharrek justifikatzen dutelarik, Nafarroako Polizietako langileak unitate desberdinetara atxikitzen ahalko dira, espezialitate beraren barruan.
Atxikipen aldaketa hori borondatezkoa izanen da, behin betiko izaera izanen du eta ez du desberdintasunik ekarriko soldata osagarriei dagokienez destino berriaren eta aurrekoaren artean, ez eta herria aldatzea edo eskalafoi galerarik ere.
II. KAPITULUA. Eskubideak eta betebeharrak
53. artikulua. Araubide orokorra eta espezialitateak.
Nafarroako Polizietako langileen eskubideak eta betebeharrak hauek dira:
a) Zin egitea edo hitz ematea Konstituzioari, Nafarroako Foru Eraentza Berrezarri eta Hobetzeari buruzko Lege Organikoari eta legeei men eginen diela.
b) Foru lege honen 3. artikuluan ezarritako jarduketa printzipioen ondoriozko betebeharrak betetzea.
c) Segurtasun Indar eta Kidegoei buruzko martxoaren 13ko 2/1986 Lege Organikoaren 6. artikuluan aitortutako eskubideak izanen dituzte.
d) Beren interesak defendatze aldera, sindikatuetan afiliatzeko eskubidea eta, orobat, sindikatuetatik atera eta beste erakunde batzuk sortzeko eskubidea izanen dute, betiere askatasun sindikalari buruzko legerian ezarritako baldintzak betez gero.
e) Grebarako eskubidea eraenduko dute segurtasun indar eta kidegoetako kideentzat eskubide horren gainean Estatuan ezarrita dauden xedapenek.
f) Ordainsari ekitatiboa jasotzeko eskubidea; hartan, honakoak hartuko dira kontuan: prestakuntza-maila, bateraezintasunen araubidea, zerbitzu-arrazoiengatiko mugikortasuna, zereginek dakartzaten dedikazioa eta arriskua, lan-ordutegi berariazkoak eta egitura berezia. Ordainsarien kontzeptuak eta zenbatekoak titulu honen III. kapituluan xedatutakoarekin bat etorriko dira.
g) Beren eginkizunetan aritzean egindakoengatik erantzukizuna eskatzen zaien ekintza judizial guztietan, eskubidea izanen dute burutzat duten administrazio publikoko profesionalen laguntza, ordezkapena eta defentsa izateko, administrazio horren kontura, baldin eta, hasiera batean, foru lege honetako 3. artikuluan jasotzen diren jarduketa-printzipioen araberakoak direla uste bada.
Eskubide hori langileen edo haien ahaideen interes legitimoen defentsa juridikora hedatuko da, delituren batean langilearen heriotza gertatzen bada, baldin eta polizia izatearen ondorioz izan bada biktima.
Salbuespeneko kasuetan, kasuko administrazio publikoak ezin baldin badu zerbitzu hori bere bitartekoekin eman, baimena ematen ahalko da administrazio horretaz kanpoko bitartekoez baliatzeko, betiere haren kargura.
h) Polizia izatearekin lotutako kalte pertsonal edo materialak jasanez gero, erregelamenduz ezarriko den kalte-ordainen sistemaren onuradun izateko eskubidea izanen dute, kalte horiek polizia izatearekin lotuta badaude.
Era berean, ukigabetasunaren printzipioa dela eta, kasuko Administrazio Publikoak ebazpen judizial batean ezartzen diren kalte-ordainak ordaindu beharko dizkie bere ardurapean dituen Nafarroako Polizietako langileei, ebazpen horrek zigortutakoa kaudimengabe deklaratua izan baldin bada.
i) Bi urtean behin eginiko osasun azterketa baterako eskubidea izanen dute, bai eta aipatzen zaizkien osasun azterketa guztiak egitera joateko betebeharra ere, inguruabarrak direla-eta komeni denean.
j) Eskubidea izanen dute haiek hautatutako legelari batek lagun diezaien, haien kargura betiere, agerraldia egin behar duteneko diziplina-espediente edo aurretiazko informazio guztien garapenean.
k) Eskubidea izanen dute urtean prestakuntza-ekintza bat jasotzeko gutxienez ere, 12 orduko gutxieneko iraupenekoa, eta prestakuntza-ekintza praktiko bat jasotzeko ere, destinoz aldatzen diren bakoitzean.
54. artikulua. Lanaldiak eta ordutegiak.
1. Nafarroako Polizietako langileen urteko lanaldiak egiazko jarduneko 1.592 lanordu izanen ditu.
2. Aurreko apartatuan finkatutako urteko lanordu-kopuruaren gainean behar den konpentsazioa aplikatu ondoren, ondoren aipatzen diren txanda-araubideetakoren batean lan egiten duten Nafarroako Polizietako langileek presentzia errealeko lanaldi hau izanen dute:
a) Goizeko, arratsaldeko eta gaueko txanda: 1.457 ordu urtean.
b) Gauetako txanda finkoa: 1.535 ordu urtean.
c) Goiz eta arratsaldeetako txanda, igande eta jaiegunetan lan eginda: 1.554 ordu urtean.
d) Lanaldi zatitua, igande eta jaiegunetan lan eginda: 1.569 ordu urtean.
3. Erregelamendu bidez ezarriko dira ordu araubide berariazkoak unitate operatiboetan, haien lana dela-eta beharrezkoa denean, malgutasun- eta prestasun-beharrak kontuan hartuta.
4. Salbuespen gisa, eta betiere behar bezala arrazoitua badago, lan egutegiak eta zerbitzu-taulak aldatu ahalko dira, Foruzaingoaren mahai sektorialeko hitzarmenetan jasotako larrialdiko beharrizanei, prestakuntzakoei edo bestelakoei jarraituz. Aldaketa horrek ezin izanen du arbitrarioa izan, kasuko alorreko burutzak hartarako arrazoiak eman beharko ditu eta idatziz jakinaraziko die hori interesdunei.
Edonola ere, foru lege honen garapenean lortzen diren Foruzaingoaren mahai sektorialeko hitzarmenak izanen dira zehaztuko dutenak lan-egutegia aldatu ahalko den urteko lanaldi planifikatuen gehieneko muga.
5. Nafarroako Polizietako langileen opor, lizentzia eta baimen araubidea Nafarroako Administrazio Publikoen zerbitzuko gainerako langileena izanen da.
Nafarroako Polizietako langilea destinoko herria ez den beste batean bizitzeak ez du langilea salbuesten lan lekura garaiz iristetik eta lanaldia nahiz karguari dagozkion eginkizunak zorrotz betetzetik, eta ez du ekarriko inolako ordainik ematea lan lekurako joan-etorriengatik.
56. artikulua. Agintaritzaren agenteak.
1. Beren eginkizunetan dihardutela, Nafarroako polizietako langileak, legezko ondorio guztietarako, agintaritzaren agentetzat joko dira.
2. Atentatu delitu bat egiten denean su-armak, lehergailuak edo arrisku bereko beste eraso-baliabide batzuk erabiliz, horrek Nafarroako Polizietako langileen integritate fisikoa arrisku larrian jar dezakeenean, langile horiek, zuzenbide penaleko beren babesaren ondorioetarako, agintaritzat joko dira.
III. KAPITULUA. Ordainsariak
57. artikulua. Ordainsarien kontzeptuak .
1. Nafarroako Polizietako langileek ondoko kontzeptu hauei dagozkien ordainsariak jasoko dituzte, ez besterik:
A.–Norberaren oinarrizko ordainsariak:
a) Mailari dagokion hasierako soldata.
b) Graduari dagokion ordainsaria.
c) Antzinatasun saria.
Norberaren oinarrizko ordainsariak eskuratutako eskubidea dira, funtzionario izaerari datxekiona.
B.–Ordainsari osagarriak:
a) Berariazko osagarria.
b) Lanpostuaren osagarria.
c) Prestasun bereziaren osagarria.
d) Burutzaren osagarria.
Ordainsari osagarri horiek esleituak dituen lanpostuan jarduteari dagozkio eta, beraz, lanpostua uztearekin bat haiek jasotzeari ere uzten zaio.
C.–Bestelako ordainsariak:
a) Zerbitzuagatik egiten diren gastuen kalte-ordaina.
b) Egindako bidaien kalte-ordaina.
c) Zerbitzurako jantziak erosteagatik ematen den kalte-ordaina, erregelamenduz ezartzen diren kopuruetan.
d) Bizilekua aldatzea dakarren nahitaezko lekualdatzeagatik ematen den kalte-ordaina.
e) Familia laguntza.
f) Aldi baterako osagarri pertsonala bigarren jarduerako egoera administratiboagatik.
g) Konpentsazioa aparteko orduengatik, gauez nahiz jaiegunez, lanpostuan egin beharreko guardiengatik eta guardia lokalizatuengatik, hautapen epaimahaietan parte hartzeagatik, prestakuntza ikastaroak irakasteagatik eta herrietako festak direla eta ekintza berezietan parte hartzeagatik.
h) Konpentsazioa ordutegirako eskuragarritasunagatik-
2. Norberaren oinarrizko ordainsariak Nafarroako Administrazio Publikoen gainerako funtzionarioei oro har aplikatzekoak zaizkien arauek eraenduko dituzte, foru lege honetan ezartzen diren berezitasunak kontuan hartuta.
Gainerako ordainsariak foru lege honen hurrengo artikuluetan jasotako xedapenek eraenduko dituzte, eta berariaz aurreikusirik ez dagoen guztian, Nafarroako Administrazio Publikoen gainerako funtzionarioei oro har aplikatzekoak zaizkien arauek.
3. Nafarroako Polizietako langileek egiaz lan egindako orduengatik dagozkien ordainsariak baizik ez dituzte jasoko.
Gaueko, jaiegunetako eta aparteko lan ordu bakoitzari dagozkion ordainsariak erregelamenduz ezarriko dira.
4. Langileen kontrol eta kudeaketarako neurri egokiak ezarriko dira, horrela bermatzeko ezen Nafarroako Polizietako langileek betetzen dituzten aparteko orduen kopurua ez dela izanen erregelamenduz ezarritako gehienekotik gorakoa.
Ildo horretan, lan egutegiek zuzenketa neurri egokiak aurreikusi beharko dituzte, antolaketa unitate desberdinetan saiheste aldera lanaldien pilaketak eta langile falta.
Antolaketa unitate desberdinetako arduradunei dagokie neurri horiek gainbegiratzea eta mantentzea.
58. artikulua. Berariazko osagarria.
Berariazko osagarria Nafarroako Polizietako langile guztiei ordainduko zaie, eta haren zenbatekoa mailari dagokion hasierako soldataren % 45ekoa izanen da.
Osagarri horrek ordaintzen ditu polizia-eginkizunak berezko dituen polizia-bateraezintasuna eta arriskua.
Ondorio horietarako, polizia-bateraezintasuntzat ulertuko da irabazi asmoko jarduera oro sektore publikoan zein pribatuan egiteko debekua, baldin eta kasuko jarduera horrek eragozten edo kaltetzen badu esleitutako betebeharrak betetzea, edo inpartzialtasun edo independentzia konpromisoan jartzen baditu, betetzen den lanpostuaren mailarengatik bateraezina bada, edo oinarrizko jarduketa-printzipioen aurkakoa bada. Nolanahi ere, Barne zuzendari nagusiaren edo kasuan kasuko organo eskudunaren aurretiazko baimena beharko da.
59. artikulua. Lanpostuko osagarria.
Nafarroako Polizietako langileek lanpostuko osagarria jaso dezakete lanpostu bakoitzari dagozkion ezaugarriak saritzeko, hala nola eskatutako prestakuntza tekniko eta fisiko berezia, zailtasun maila, lanpostuari dagozkion ordutegien araubidea, nekagarritasuna, txandakako lana, arrisku berezia, dedikazio berezia, malgutasuna eta erantzukizun berezia.
Osagarri horren zenbatekoa ez da izanen mailari dagokion hasierako soldataren % 75 baino handiagoa, eta erregelamenduz ezarriko da, lanpostu desberdinen balorazioa eta azterketa egin ondoren.
60. artikulua. Prestasun bereziko osagarria.
Prestasun bereziko osagarria jaso ahalko duten enplegu edo lanpostuak dira haien eginkizunengatik prestasun eta lokalizazio etengabea edo lanarekin bitarteko telematikoen bidez etengabe harremanetan egotea eskatzen dutenak.
Osagarri horren zenbatekoa ez da mailaren hasierako soldataren % 30 baino gehiagokoa izanen, eta erregelamenduz ezarriko da.
Osagarri hori jasotzen dutenek erabateko prestasunez eta dedikazio erabateko eta osoz emanen dituzte beren zerbitzuak, eta ezin izanen dira irabazi-asmoko beste inolako jardueratan aritu, ez sektore publikoan ez pribatuan, salbu eta unibertsitateko irakaskuntzan, irakaskuntza zentroetako irakaskuntza esporadikoan eta norberaren edo familiaren ondarearen administrazioan.
Prestasun bereziko osagarria jasotzea eta aparteko orduak sortzea bateraezinak dira.
61. artikulua. Burutzako osagarria.
Burutzako osagarria jasoko duten lanpostuak enplegu barruan aginte egoera berezia dutenak izanen dira, halaxe jasota baldin badago dagokion plantilla organikoan.
Osagarri horren zenbatekoa ez da mailaren hasierako soldataren 100eko 10 baino gutxiagokoa izanen, ez eta 100eko 20 baino gehiagokoa ere, eta erregelamenduz zehaztuko da.
62. artikulua. Behinbehineko izendapenak.
Enplegu edo kategoria batean behar adina funtzionario ez dagoenean eta zerbitzuaren beharrak direla-eta halakoak behar direnean, organo eskudunak aldez aurretik hautatuta eta lanpostua erreserbatuta, Nafarroako Foruzaingoko langileek behin-behinekoz goragoko hurrengo mailako enplegu bat bete ahal izanen dute, baldin eta lanpostua hutsik badago eta langile horiek kasuko igoera-prozeduran onartuak izateko ezarritako baldintzak betetzen badituzte.
Salbuespen kasuetan, eta baldintza horiek betetzen dituen inongo funtzionariorik ez dagoenean, antzinatasunari dagozkion baldintzak salbuetsi ahalko dira, edo titulazioari dagozkionak, edo biak, aurreko paragrafoan aipatzen den hautapenaren ondorioetarako.
63. artikulua. Ordainsarieskalak.
1. Nafarroako Polizietako langileen ordainsariak oro har ezartzeko, proportzionaltasun eta hierarkia printzipioak izanen dira abiapuntua, eta enplegu eta espezialitate desberdinak kontuan hartuko dira.
2. Erregelamenduz ezarriko dira behar diren zuzenketa neurriak, eta proportzionaltasun-adierazleak finkatuko dira, Nafarroako Polizietako langileek jasotzen dituzten ordainsarien guztizkoak (barne harturik oinarrizko ordainsariak -gradua eta antzinatasuna kenduta-, ordainsari osagarriak eta ordainsari aldakorrak, foru lege honen 57.1 artikuluko C apartatuko g) letran jasotakoak) behar bezalako proportzioa manten dezan artikulu honen aurreko apartatuan adierazitako eskala desberdinen artean.
3. Artikulu honetan xedatutakoa ulertuko da deusetan kaltetu gabe foru lege honen 31. artikuluan aipatzen diren funtzionario mailetako bakoitzari dagokion oinarrizko soldata.
64. artikulua. Bigarren jarduerako egoera administratiboagatiko osagarri pertsonal iragankorra.
Bigarren jarduerako egoera administratiboagatiko osagarri pertsonal iragankorra foru lege honen 69.5 artikuluan aurreikusitako kasuan aplikatuko da, erregelamenduz ezartzen diren baldintzetan eta prozedura erabiliz, zeinak betiere ponderazio egokia aurreikusi beharko baitu, ukitutako langileek jatorrizko unitatean egin duten denbora kontuan hartuta.
65. artikulua. Erregelamendu bidezko garapena.
Aurreko artikuluetan aipatzen diren ordainsari osagarrien garapena eta horiek Nafarroako Foruzaingoa osatzen duten enplegu eta unitate desberdinei atxikitzea erregelamendu bidez eginen dira.
Tokiko polizien kasuan, polizia horien titulartasuna duten toki entitateak izanen dira erregelamenduzko garapen hori eginen dutenak.
IV. KAPITULUA. Ordezkaritza, negoziazio kolektiboa eta lan-baldintzen ezarpenean parte hartzea
66. artikulua. Aplikatzekoa den araubidea.
1. Nafarroako Polizietako langileen lan baldintzak ezartzeko ordezkaritzari, negoziazio kolektiboari eta parte-hartzeari dagokienez, Nafarroako Administrazio Publikoen zerbitzuko Langileen Estatutuan ezarrita dagoenari segituko zaio.
2. Nafarroako Foruzaingoan negoziaziorako mahai sektorial bat eratuko da, zeinak jardunen baitu Nafarroako Administrazio Publikoen zerbitzuko Langileen Estatutuan negoziazio mahaietarako ezarritakoaren arabera.
V. KAPITULUA. Eskubide pasiboak
67. artikulua. Eskubide pasiboak.
Nafarroako Polizietako langileen eskubide pasiboak Nafarroako Administrazio Publikoen zerbitzuko gainerako funtzionarioentzat oro har ezarritako arauei lotuko zaizkie.
VI. KAPITULUA. Egoera administratiboak
68. artikulua. Egoera administratiboak.
Nafarroako Polizietako langileen egoera administratiboak eta egoera horien ondorioak Nafarroako Administrazio Publikoen zerbitzuko Langileen Estatutuan ezarritakoari jarraituz arautuko dira, foru lege honetan ezartzen dena galarazi gabe.
69. artikulua. Bigarren jarduerako egoera administratiboa.
1. Bigarren jarduerako egoera administratiboaren helburua hau da: Nafarroako Polizietako jarduneko langileen zerbitzua eraginkorra dela bermatzea, eta modua ematea lanbide-karrera egokitu ahal izan dadin denboraren iragateagatik edo langile horien gaitasun fisiko edo psikikoak bat-batean gutxitzeagatik gerta daitezkeen aldaketetara.
2. Erregelamenduz ezarriko den adinera iristeagatik -inolaz ere ez 55 urte baino gutxiagoko adinera-, edo, lan istripuaren edo lanbide eritasunaren ondorioz baldintza fisikoak edo psikikoak gutxitzeagatik, Nafarroako Polizietako langileak bigarren jarduerako egoera administratibora pasa daitezke erretiro-adinera iritsi aurretik, eta destino hau jaso dezakete:
a) Beren poliziaren barruan.
b) Nafarroako beste polizia batzuetan, betiere kasuko administrazio publikoek bidezko lankidetza-hitzarmenak sinatuak badituzte.
3. Bigarren jarduerako egoera administratiborako iragatea gertatuko da interesdunak berak aurretiazko eskaera eginda, adinagatik denean, edo ofizioz, lan istripuaren edo lanbide eritasunaren ondorioz gaitasun fisikoak edo psikikoak gutxitzeagatik denean.
Zerbitzua ohi bezala egitea galarazten duen baldintza fisiko edo psikikoen gutxitzea Nafarroako Ezintasunak Baloratzeko Epaimahai Medikoak erabakiko du, ofizioz edo alderdi batek eskatuta, kasuko irizpen medikoa emanez eta organo eskudunari igorriz.
4. Nafarroako Polizietako plantilla organikoetan adierazi beharko da zein diren bigarren jarduerako egoera administratiboan betetzeko moduko lanpostuak, eskatzen duten ahalegin fisikoa, haien arriskua edo zailtasuna txikiagoak izateagatik.
5. Bigarren jarduerako egoera administratiboan dauden Nafarroako Polizietako langileek beren kategoriari dagozkion oinarrizko ordainsariak eta aitorturik dituzten ordainsari pertsonalak jasoko dituzte, bai eta egiazki betetzen duten lanpostuak dituen osagarriak ere.
Bigarren jarduerako egoerarako iragatea ofizioz egiten bada, edozein arrazoiren ondorioz, Administrazioak langilearen baldintza fisiko edo psikikoen gutxitze nabarmen bat izan dela irizteagatik, eta lanpostu berriaren oinarrizko ordainsariak eta ordainsari osagarriak langilearen jatorrizko lanpostuarenak baino gutxiagokoak badira, kalteturiko langileek eskubidea izanen dute osagarri pertsonal iragankor bat jasotzeko, zeinaren zenbatekoa izanen baita aipatu bi ordainsarien arteko aldea bezainbestekoa.
6. Bigarren jarduerako egoera administratiboan emandako denbora konputagarria izanen da egoera horretara joan aurretik edukitako lanpostuko antzinatasunaren eta eskubide pasiboen ondorioetarako.
7. Bigarren jarduerako egoera administratiboan dauden Nafarroako Polizietako langileek ezin izanen dute parte hartu lanpostu-igoerarako edo lanpostu-betetzeko prozeduretan, non eta eskuratu nahi den lanpostu berria ere ez den bigarren jarduerako egoera administratiboan betetzeko modukoa.
8. Erregelamenduz finkatuko dira bigarren jarduerako egoera administratiboko zerbitzu-ematearen inguruabarrak eta baldintzak, bai eta egoera administratibo horretarako iragapena ekar dezaketen ezgaitasun medikoen gradua ere.
VII. KAPITULUA. Esker onak, ohoreak eta sariak
70. artikulua. Esker onak, ohoreak eta sariak.
Nafarroako Polizietako langileentzako esker onak, ohoreak eta sariak erregelamenduz ezarriko dira. Edozein kasutan ere, kasu desberdinak aurreikusiko dituzte; eta, gutxienez, lau multzo hauek:
a) Jarduera eredugarri edo arrisku handikoekin eginikoak diren edo ezgaitasuna dakarten lesioak edo heriotza eragin dituzten jarduerekin eginikoak diren zerbitzu-egintzak.
b) Pairamena eragiten duten jarduerak, apartekoak eta adore handikoak; ebaketak edo zauri larriak, erabateko ezgaitasuna ekartzen ez dutenak.
c) Garrantzi bereziko zerbitzuak, dedikazio berezikoak edo premia duten pertsonei onura egitekoak; lanbidearen ezagutzarako lagungarri diren lan zientifikoak edo argitalpen teknikoak.
d) Antzinatasuna eta ibilbide profesionala.
VIII. KAPITULUA. Diziplina-araubidea
1. ATALA. Printzipio nagusiak
71. artikulua. Legezkotasuna eta erantzukizuna.
1. Foru lege honetan ezarritako diziplina-araubidea Nafarroako Polizietako langileei aplikatuko zaie.
2. Falta egitera bultzatzen dutenek, hura estaltzen dutenek eta falta onartzen duten nagusi hierarkikoek falta-egileen erantzukizun berbera izanen dute.
Estalketatzat joko da falta astuna edo oso astuna dakarren egintza baten berri izanda, hierarkian gora dagoen nagusi eskudunari hori lehenbailehen ez jakinaraztea.
3. Diziplina-erantzukizunak ez du galarazten langileek izan dezaketen erantzukizun zibil edo penala.
Egitate berengatik zigor zehapena eta zehapen administratiboa ezartzen ahalko dira soilik funtsatze juridikoa eta babestutako ondasun juridikoa ez direnean berberak.
72. artikulua. Erantzukizunaren amaiera.
Diziplina erantzukizuna iraungitzen da zehapena betetzeagatik, heriotzagatik eta falta edo zehapenaren preskribatzeagatik.
2. ATALA. Diziplinako faltak
73. artikulua. Sailkapena eta preskripzioa.
Diziplina faltak astunak, oso astunak edo arinak izan daitezke. Falta oso astunek hiru urteren buruan preskribatzen dute; astunek, urtebeteren buruan; eta arinek, hiru hilabeteren buruan.
Falten preskripzio epea falta egin den unetik hasiko da kontatzen. Diziplina prozeduraren hasierak eten egiten du preskripzio epea.
74. artikulua. Falta oso astunak.
Falta oso astunak dira:
1. Gehienez ere bost aldiz hilabeteko epean, lanera ez joatea edo lanaldia ez betetzea, justifikatutako arrazoirik gabe.
2. Dolozko delitu astun batengatik espetxeratze-zigorrera zigortuta egotea epai irmoaren bidez.
3. Kargua dela-eta ezagutzen dituen aferetan, sekretu profesionala eta behar bezalako isilpea urratzea, poliziaren eginkizunei edo edonori kalte larria eragiten zaienean.
4. Entitateen edo partikularren eskupekoak eskatu edo onartzea, emaniko zerbitzuengatik edo horiek saritzeko.
5. Agintarien edo langilearen nagusi diren agintedunen kontrako ageriko ez-obeditzea, banakakoa nahiz kolektiboa, haiek emandako lege jarraibideak desobeditzearen ondorioz.
6. Eginkizunetan ari dela, Nafarroako Foru Eraentzari begirunea izateko eta Konstituzioari eta legeei men egiteko betebeharrak ez betetzea.
7. Grebetan, haien ordezko ekintzetan edo adosturiko ekintzetan parte hartzea, zerbitzuen funtzionamendu normala galarazteko helburuarekin.
8. Neutraltasun edo independentzia politikoa urratzea, esleituriko ahalmenak edonolako edo edonongo hauteskundeetan eragiteko asmoz erabiliz.
9. Herritarrei, menpekoei edo Administrazioari kalte larria eragiten dien agintekeria, bai eta zaintzapean dituen pertsonak gizalegez ez tratatzea, mespretxatuz, diskriminatuz edo laidotuz.
10. Arauzko armak zerbitzutik kanpo edo haiek erabiltzeari buruzko arauak hautsiz erakutsi edo erabiltzea, gauzei edo pertsonei kalte egiten bazaie edo alarma publikoa gertatu bada.
11. Sekretu ofizialak argitaratzea edo modu desegokian erabiltzea, sekretutzat jo badira alor horretako berariazko legeriari jarraikiz.
12. Arraza edo jatorri etnikoa, erlijioa edo sinesmenak, ezgaitasuna, adina edo sexu-joera, sexua, hizkuntza, iritzia, jaioterria, bizilekua edo beste edozein egoera edo inguruabar pertsonal edo sozial dela-eta diskriminazioa egitea ekarri ahal duten jarduketa guztiak.
13. Sexu-jazarpena eta lan-jazarpena. Azken hau da behin eta berriro jazarpen psikologikoko edo etsaigoko ekintzak egitea zerbitzu-harreman baten esparruan.
14. Askatasun publikoak eta eskubide sindikalak erabiltzeko oztopo larriak jartzea.
15. Segurtasun indar eta kidegoek toki publikoetan bideokamerak erabiltzeari buruzko legerian arau-hauste oso astuntzat jotzen diren urraketak.
16. Edozein eginbehar profesionalen urraketa, zerbitzu publikoen funtzionamendu egokia nabarmen eragozten duena edo Administrazioari edo herritarrei kalte larriak ekartzen dizkiena, edo arrisku nabarmena sortzen duena pertsona edo ondasunentzat edo segurtasun publikoarentzat.
17. Falta oso astun bat egitean estaltzea.
18. Hiru falta astunetan berrerortzea.
19. Nafarroako Administrazio Publikoen zerbitzuko Langileen Estatutuan oso astuntzat tipifikatzen den beste edozein jokabide.
Falta astunak dira:
1. Gehienez ere bost aldiz, hilabeteko epean, lanera ez joatea edo lanaldia ez betetzea, justifikatutako arrazoirik gabe.
2. Hilabete berean hamabi aldiz berandu iristea lanera, justifikatutako arrazoirik gabe.
3. Herritar, agintari, nagusi, lankide edo menpekoekiko begirune falta larria, eginkizunak betetzean.
4. Lokalen, materialaren edo zerbitzuarekin lotutako gainerako elementuen kontserbazioan kalte larriak eragitea, aitzakiarik gabeko zabarkeriaren ondorioz, edo haiek desagertzeko, galtzeko edo lapurtzeko bidea ematea.
5. Polizia eginkizunek berezkoak dituzten baliabideak zerbitzuarekin zerikusirik ez duten erabileretarako baliatzea edota baliatzeko baimena ematea, horretarako justifikatutako arrazoirik gabe.
6. Langileen eskura lanpostuan jarritako baliabide informatikoak modu desegokian erabiltzea, Administrazioari edo zerbitzuari kalte nabarmena eginez.
7. Zerbitzuaren berezko arloetan nagusi hierarkikoek idatziz edo ahoz emandako aginduak ez betetzea, ordenamendu juridikoaren urraketa nabarmena direnean izan ezik.
8. Lanerako aldi baterako ezgaitasun egoeren itxurak egitea, gerta daitezkeen gainerako erantzukizun penal edo administratiboak ukatu gabe.
9. Nahitaezkoak diren osasun azterketak ez egitea, jokabide horretarako arrazoi justifikaturik gabe.
10. Legeek ezarritako abstentzio-arrazoiren bat gertatzen denean, prozedura administratiboren batean esku hartzea.
11. Lanean dihardutela iskanbilak sortu edo horrelakoetan parte hartzea.
12. Beren kargua dela-eta ezagutzen dituzten gaietan lanbideko sekretuaren betebeharra ez betetzea edo informazioa isilpean ez edukitzea, beren polizia lanari edo hirugarrenei kalterik egiten ez zaienean.
13. Beren eskudantziez gehiegikeriaz baliatzea, herritarren kaltetan, falta astunagotzat hartzen ez bada.
14. Zerbitzuari buruz txosten edo erabaki gezurrezko edo alderdikoiak egin edo hartzea, falta astunagotzat hartzen ez bada.
15. Nagusiei ez jakinaraztea beren eginkizunekin lotuta dagoen eta haiek jakin beharko luketen edo lehenbailehen erabaki beharko luketen edozein kontu.
16. Arauzko armak erakutsi edo erabiltzea haiek zerbitzuko jardunean edo zerbitzutik kanpo erabiltzeari buruzko arauak hautsiz, gauzei edo pertsonei kalte egin ez zaienean.
17. Dolozko delitu batengatik epai irmo bidez zigorra jaso izana, falta oso astuna ez denean.
18. Obedientzia-ukatze indibidual edo kolektiboa prestatzeko egintzak.
19. Mozkortzea edota droga toxikoak, estupefazienteak edo substantzia psikotropikoak kontsumitzea zerbitzuan ari dela, edo zerbitzua betetzea mozkortuta edo aipatu substantzien eraginpe nabarmenean; halaber, anormaltasun fisikoko edo psikikoko egoeran egonik, ezezkoa ematea bidezkoak diren egiaztapen teknikoak egiteari.
20. Esleitutako zerbitzuan ez egotea edo bertatik joatea, horretarako arrazoi justifikaturik gabe, nagusiari absentzia hori jakinaraztea eragozten duen ezinbesteko arrazoi bat dagoenean izan ezik.
21. Bateraezintasunen gaineko araubidearen ez-betetzea.
22. Arauzko arma desagertzea, galtzea edo lapurtua izatea, aitzakiarik gabeko zabarkeriaren ondorioz.
23. Menpekoei galaraztea, mugatzea edo oztopatzea aitortuta dituzten eskubideez baliatzea, falta oso astuntzat ez bada jotzen.
24. Gertaera edo inguruabar larrietan urgentziaz sorospenik ez ematea, horretara beharturik egonez gero, delitua denean izan ezik.
25. Polizia eginkizunetik heldu diren betebehar eta eginbeharrak ez betetzea zabarkeria larriaren ondorioz, halakoak modu larri eta agerikoan gertatzen direnean eta zerbitzuen funtzionamendu eraginkorra nahasten dutenean edo Administrazioari nahiz herritarrei kalteak egiten dizkietenean.
26. Segurtasun kidego eta indarretako beste kide batzuekiko lankidetza falta agerikoa.
27. Zerbitzuko eginkizunetan eta erabiltzea aginduzkoa denean arauzko uniformea, kategoria edo karguaren bereizgarriak, arauzko arma edo zehazten diren babes- edo ekintza-baliabideak ez eramatea, horretarako baimenik ez bada eman edo justifikatutako arrazoirik gabe.
28. Uniformez jantzita joatea edozein manifestazio edo bilkura publikotara, non eta ez den zerbitzuko eginkizuna edo uniformez joatea egokitzat jotzen den edo baimenduta dagoen ekitaldi ofiziala.
29. Segurtasun indar eta kidegoek toki publikoetan bideokamerak erabiltzeari buruzko legerian ezarritakoaren urraketak, falta oso astuntzat jotzen ez badira.
30. Lan arriskuen prebentziorako arauen urraketa, baldin eta norberaren, lankideen edo menpekoen bizitza, osasuna edo integritate fisikoa, arrisku larrian jartzen bada.
31. Zerbitzuarekin zerikusia duen edozein eskabide, erreklamazio edo kexa izapidetzeari ezetza ematea behin eta berriro, falta arintzat ez bada jotzen.
32. Falta astun bat estaltzea.
33. Hiru falta arinetan berrerortzea.
Falta arinak hauek dira:
1. Lanera ez joatea edo lanaldia ez betetzea, hilabeteko epean behin bakarrik, justifikatutako arrazoirik gabe.
2. Hilabete berean, gehienez ere hamabi aldiz lanera berandu iristea, justifikatutako arrazoirik gabe.
3. Herritarrekiko, agintariekiko, nagusiekiko, lankideekiko edo menpekoekiko tratu desegokiz jokatzea.
4. Zerbitzuetako lokalak, instalazioak, ibilgailuak, materialak, dokumentazioa eta gainerako elementuak gaizki erabiltzea edo axolagabekeriaz zaintzea, betiere falta astunagoa ez denean.
5. Nagusiei ez jakinaraztea, ezarritako bidetik, zerbitzuarekin lotutako edozein eskari, erreklamazio edo kexa, urgentzia kasuetan izan ezik, bai eta halakoak ez izapidetzea ere.
6. Lanean dihardutela edari alkoholdunak edatea.
7. Uniformeari eta agurrari buruzko arauak urratzea.
8. Lanbide kredentzialak arrazoi justifikaturik gabe erakustea.
9. Lanbide egiaztagutunen edo polizia-eginkizunetarako erabiltzen diren beste bitarteko edo baliabide batzuen desagerpena, galera edo lapurreta gertatu izana, aitzakiarik gabeko zabarkeriaren ondorioz horretarako modua emateagatik.
10. Delitu arin batengatik epai irmo bidez zigorra jaso izana, salbu eta zabarkeriagatik denean eta arau-hauste penalak zerbitzuarekin zerikusirik ez duenean.
11. Foru lege honen 3. artikuluan ezarritako printzipioen ondoriozko eginbeharrak ez betetzea, betiere falta astuna edo oso astuna ez bada, eta, orobat, polizia lanari dagozkion eginbehar eta betebeharretan berandutzea edo zabarkeriaz edo utzikeriaz jokatzea, falta astunagotzat jotzen ez bada.
3. ATALA. Diziplina-zehapenak
1. Falta oso astunak egiteagatik honako zehapenak jartzen ahalko dira:
a) Eginkizunen etenaldia, hiru hilabetetik hiru urtera bitartekoa.
b) Zerbitzutik kentzea.
Eginkizunen etenaldiak langile zehatuari ekarriko dio, horretarako ezarriko den denbora-eperako, bere izaerak berezko dituen eskubide guztien galera.
Zerbitzutik kentzeak funtzionario izaera galtzea ekarriko du berekin.
2. Falta astunak egiteagatik honako zehapenak jartzen ahalko dira:
a) Beste lanpostu batera aldatzera behartzea, herri berean, kalte-ordainik jaso gabe eta bi urteko epean lanpostu hori berriz eskuratzeko aukerarik gabe.
b) Enplegu-soldaten etenaldia, bost egunetik hogeita hamarrera bitartekoa, antzinatasuna galdu gabe.
c) Eginkizunen etenaldia, hiru hilabetez gehienez.
3. Falta arinak egiteagatik honako zehapen hauek jartzen ahalko dira:
a) Ohartarazpena.
b) Enpleguaren eta soldataren etenaldia, egun batetik lau egunera bitartekoa, antzinatasuna galdu gabe.
78. artikulua. Zehapenak betetzea.
1. Zehapena jaso duen langilea gutxien kaltetzen duen moduan beteko dira zehapenak. Ondorio horietarako, enplegu eta soldataren etenaldia honako proportzioaren arabera eginen da: egiazko laneko lau egun eta zerbitzurik gabeko egun bat.
Ez dira zehapen gisa joko puntualtasunean atzeratzeagatik edo lanera arrazoirik gabe ez etortzeagatik lansariei proportzioan eginiko murrizketak. Murrizketak zuzenean eginen dira eta beti.
2. Diziplina zehapenak espediente pertsonaletan jasoko dira, zer faltak eragin dituzten adierazirik.
3. Falta arinengatik ezarritako zehapenak hiru hilabetera preskribatuko dira; falta astunengatik ezarritakoak, urtebetera; eta falta oso astunengatik ezarritakoak, hiru urtera. Diziplina zehapenen preskripzio epea kontatzen hasten da zehapena ezartzen duen ebazpena irmo bilakatu eta biharamunean.
79. artikulua. Zehapenen mailaketa.
Zehapenak mailakatzeko kontuan hartuko dira, egite eta ez-egiteez gain, honakoak ere, proportzionaltasunaren printzipioarekin bat:
a) Erantzuleen asmoa eta faltaren izaera.
b) Zerbitzuen funtzionamendu egokian sortutako nahasmendua.
c) Administrazioari edo herritarrei eragindako kalte eta galerak.
d) Faltetan berrerortzea.
e) Kasuko egitean edo ez-egitean izandako parte-hartzearen maila.
f) Segurtasun publikoari begira izandako garrantzia.
g) Lanbide-historiala, inguruabar aringarri gisa.
80. artikulua. Berrerortzea eta aurrekarien deuseztatzea.
1. Hauxe da berrerortzea: faltaren unean erantzuleak beste zehapen bat duenean, ebazpen irmoaren bidez ezarria falta astunago batengatik edo astuntasun bereko edo txikiagoko bi faltarengatik, betiere deuseztatu ez badira.
2. Deuseztapena ofizioz eginen da zehapena bete eta bi edo lau urte iraganik, falta astunen edo oso astunen kasuan, hurrenez hurren, betiere zerbitzutik bereizteko zehapena jaso ez badute.
3. Falta arinengatik ezarritako ohartarazpenak ofizioz deuseztatuko dira bete eta sei hilabetera.
4. Deuseztatzearen ondorioz, ohartarazpena baliogabetu eginen da, eta ez da haren ziurtagiririk egiterik izanen.
4. ATALA. Diziplina-prozedura
1. Honako hauena da falta astun edo oso astunengatik diziplina espedienteak irekitzeko eskumena:
a) Nafarroako Foruzaingoan, Barneko zuzendari nagusiarena.
b) Nafarroako toki entitateetako polizietan, Toki Administrazioaren gaineko legeriaren arabera eskumena duen organoarena.
2. Falta astunak edo oso astunak egiteagatiko zehapenak ezartzeko eskumena arau hauen menpe egonen da:
a) Nafarroako Foruzaingoan, Nafarroako Gobernuak izanen du zerbitzutik bereizteko zehapena ezartzeko eskumena; Barne gaietako eskumena duen departamentuko kontseilari titularrak, falta oso astunengatik zehapenak ezartzekoa; eta Barneko zuzendari nagusiak, falta astunengatik zehapena ezartzekoa.
b) Nafarroako toki entitateetako polizietan, Toki Administrazioaren gaineko legeriaren arabera eskumena duen organoari dagokio.
82. artikulua. Falta astun edo oso astunengatiko zehapenak ezartzeko prozedura.
1. Falta astun edo oso astunengatiko diziplina espedientea irekitzeko eskumena duen organoak behin-behineko etenaldia edo behin-behinekoz beste lanpostu batera atxikitzea erabaki dezake berariaz, kautelazko neurri gisa eta prebentzio izaeraz.
Behin-behineko neurriak hartzeko ebazpena eman baino lehen, ukitutako langileari entzunaldia emanen zaio, hiru egun baliodunez.
Aurrekoa gorabehera, behar bezala arrazoitutako ohiz kanpoko presa edo arriskuko kasuetan, kasuko Poliziako buruak edo komisario nagusiak arma eta egiaztagutuna kentzen ahalko dizkiote langileari, eta espedientea irekitzeko eskumena duen organoak hiru egun balioduneko epean, gehienez ere, berretsi beharko du erabaki hori.
2. Behin-behineko etenaldiak edo beste lanpostu bati behin-behinekoz atxikitzeak espedientaturik dagoen langileak arma, egiaztagutuna eta uniformea behin-behinekoz galtzea ekar dezake, bai eta kasuko egoitza polizialetara baimenik gabe sartzeko debekua ere.
Beste lanpostu batera behin-behinekoz atxikitzeak ez du berarekin ekarriko ez destinoko herria aldatzea, ez inongo lansari-galerarik.
Kautelazko neurriei eutsi edo horiek bertan behera uzteari buruzko ebazpena ematerakoan, ustez egindakoen larritasuna baloratuko da, bai eta kasu bakoitzaren inguruabar zehatzak eta espedientaturiko langilearen espediente pertsonala ere. Kautelazko neurriak ezarri edo luzatzea erabakitzen duen ebazpenak arrazoitua izan beharko du.
3. Kautelazko neurriak hilabeterako erabakitzen ahalko dira, eta epe hori beste hilabetez luzatzen ahalko da, sei hilabete egin arte gehienez.
4. Behin-behineko etenaldian dauden langileek eskubidea izanen dute, soilik, beren mailako hasierako soldatari, graduari, antzinatasuneko sariari eta familia laguntzari dagozkien lansariak jasotzeko. Behin-behineko etenaldiaren denbora kontuan hartuko da eginkizunen etenaldiaren zehapena betetzearen ondorioetarako, zehapen hori ezartzen bada. Behin-behineko etenaldia irmo bilakatuko ez balitz, ukitutako langileari kendu zaizkion eskubide guztiak aitortuko litzaizkioke.
5. Falta astun edo oso astunengatiko diziplina-espedientea hasi baino lehen, diziplina espedientea irekitzeko eskumena duen organoak, gertaerak argitze aldera, aldez aurreko informazio aldi bat irekitzeko agintzen ahalko du, kasu zehatzaren zer-nolakoak ikertu eta prozedura abiaraztea komeni den ala ez den erabakitzeko.
Zilegi izanen da aldez aurreko informazio aldi hori erreserbatua izatea, eta ez du hilabete batetik gora iraunen, non eta berariaz erabakitzen ez den beste epe jakin baterako edo batzuetarako luzatzea. Ez da ulertuko diziplina prozedura hasita dagoenik apartatu honetan aipatzen diren aldez aurreko jarduketak direla medio.
6. Diziplina-espedientea irekitzeko eskumena duen organoaren ebazpen bidez hasiko da prozedura, dela organoaren beraren ekimenez dela menpekoen mozio arrazoituaren ondorioz edo salaketaren ondorioz. Salaketa anonimo hutsa ez da aintzat hartuko, ezta aurreko apartatuan aipatutako aukerako informazio erreserbatua gauzatzeko ere.
Diziplina-espedientea hasten duen ebazpenak egintzetarako instrukzio-egilea izendatuko du, eta ustezko arau-hausleari jakinaraziko zaio eta, salatzailerik izan bada, hari ere bai. Funtzionario edo kontratudun bat izendatuko da instrukzio-egile, hautapen prozeduran zuzenbideko lizentziatuaren titulua eskatu zaienetako bat hain zuzen. Ustez astunak diren falten kasuan, kasuko Poliziako kide bat izendatzen ahalko da horretarako; pertsona horrek onartu egin beharko du, abstentziorako arrazoirik ez badago.
Bai aldez aurreko informazioetan, bai diziplina prozeduran, langileak legelari baten laguntza edukitzen ahalko du, eta errekusatzea sustatzen ahalko du prozeduraren izapidetzearen edozein unetan. Errekusatzearen gaineko ebazpenen aurka ezin izanen da inolako errekurtsorik aurkeztu; hala ere, prozedura amaitzen duen egintzaren aurkako errekurtsoa aurkeztean, alega daiteke errekusatzea.
Nolanahi ere, eta lehenengo jarduketa gisa, instrukzio-egileak deklarazioa hartuko dio ustezko erantzuleari, hura nor den finkatuta badago, eta menpekoen mozio arrazoitutik edo espedientea irekitzea eragin duen salaketatik eta deklarazioan alegatutakotik ondorioztatzen diren diligentziak eginen ditu.
7. Instrukzio-egileak karguen plegu bat idatziko du, zehapen proposamena eta guzti, eta ustezko arau-hausleari jakinaraziko zaio. Hark hamar egun balioduneko epea izanen du bere eskubideen alde bidezko iruditzen zaizkion alegazioak egiteko eta datuak, informazioak edo dokumentuak aurkezteko, bai eta kasurako egoki iruditzen zaion froga proposatzeko.
Karguen pleguan beti honako jakingaiak ezarriko dira derrigorrez:
a) Ustezko erantzuleen identifikazioa.
b) Egotzitako egitateak, arau-hausteak tipifikatzeko eta zehapenak mailakatzeko garrantzia dutenak nabarmendurik.
c) Ustezko arau-haustea, zehazturik zein den edo zein diren hautsitako araua edo arauak.
d) Zehapenik zilegi bada, zein den.
e) Zein organok duen prozedura ebazteko eskumena eta zein arauk ematen dion eskumen hori.
8. Espedientatuak bere borondatez aitortzen badu erantzulea dela, instrukzio-egileak organo eskudunari igorriko dio espedientea, ebazpena eman dezan, ezertan galarazi gabe izapidetzen segitzea, iruzur egitearen edo beste pertsona edo entitate batzuk estaltzearen susmo arrazoizkorik badago, edo prozedura hasteak sortu duen kontua ororen interesekoa bada.
9. Karguen pleguari erantzunda edo erantzun hori emateko epea iraganda, ofizioz edo ustezko arau-hausleak eskatuta, behar adina froga egin edo onartuko dira, gertatutakoak eta ustezko erantzukizunak finkatzeko. Gertaerekin duten loturagatik azken ebazpena ustezko arau-hauslearen alde aldatu ezin duten frogak soilik ukatzen ahalko dira. Froga-aldiaren epea ez da hogeita hamar egunekoa baino luzeagoa eta hamabost egunekoa baino laburragoa izanen. Hala eta guztiz ere, instrukzio-egileak beharrezkotzat jotzen badu, epe hori luzatzen ahalko du, salbuespenez eta arrazoiak emanda. Prozedura zein langileren kontra ari den izapidetzen, hari jakinaraziko zaio froga-aldiaren irekitzea.
10. Alegazioak aurkezteko aurreikusitako epea iraganik, frogarik egin behar bada frogak eginik, eta beharrezkotzat jotzen diren eginbideak egin ondoren ere, instrukzio-egileak ebazpen proposamena eginen du. Bertan egintzak zehaztasunez finkatuko dira -karguen pleguan jasotakoekin eta eginiko frogekin bat etorriko dira-, frogen balorazio juridikoa eginen da, eginiko falta zehazte aldera, eta langile arduraduna nor den adieraziko da. Halaber, bidezkotzat jotzen den zehapena adieraziko da, edota espedientea artxibatzea proposatuko da.
Proposamena interesdunari jakinaraziko zaio, hamar eguneko epean bere defentsan egokitzat jotzen duena alegatu dezan.
11. Interesdunari entzunda edo epea inongo alegaziorik gabe iragan ondoren, instrukzio-egileak langile batzordeari helaraziko dio espedientea, edo kasuko langileen ordezkariari, hamar eguneko epean eman dezaten Nafarroako Administrazio Publikoen zerbitzuko Langileen Estatutuan aipatzen den txostena.
Behin txostena jasota, edo epea txostenik eman gabe iragaten bada, instrukzio-egileak espedientea igorriko dio prozeduraren hasiera erabaki duen organoari, azken horrek, espedientea aztertuta eta, kasua bada, egokitzat jotzen dituen jarduketa osagarriak eginda, dagokion ebazpena eman dezan, horretarako eskumenik baldin badu. Hala ez bada, organo horrek espedientea igorriko dio ebazteko eskuduna denari.
12. Diziplina-prozedura amaituko da organo eskudunak kasuko zehapena ezartzeko ebazpena ematen duenean. Ebazpen horrek, non espedientean planteatutako gai guztiak erabaki beharko diren, arrazoitua izan behar du, eta hartan ezin izanen da onartu ez egitaterik, ez funtsik, karguen plegurako eta ebazpen-proposamenerako oinarri gisa baliatu direnez bestelakorik, haien balorazio juridikoa desberdina izanda ere.
Halaber, diziplina-prozedurari amaiera emanen dion ebazpenak erabateko zehaztasunez finkatu beharko du zein falta hartzen den egintzat, adierazita zein xedapenetan jasota ageri den, falta mota, langile arduraduna eta ezartzen den zehapena. Halaber, berariazko adierazpena eginen da prozedura izapidetu bitartean hartzen ahal izan diren behin-behineko neurriei buruz.
Ebazpenean erabakitzen bada ez dagoela diziplina-faltarik edo erantzukizunik, egokia den adierazpena eginen du behin-behineko neurriei dagokienez.
13. Diziplina-prozedura ebazteko epea sei hilabetekoa izanen da, espedientea irekitzeko ebazpena eman zen egunetik hasita. Epe hori beste sei hilabetez luzatzen ahalko da, gehienez ere.
Epe horiek igarotzen badira prozedura amaituko duen ebazpenik eman gabe, prozedura iraungi eginen da.
Prozedura ez da iraungiko baldin eta espedientea interesdunari egotz dakiokeen arrazoi batengatik badago geldiarazita.
83. artikulua. Falta arinengatik zehapenak ezartzeko prozedura.
1. Diziplina-espedienteak ireki eta falta arinak egiteagatik zehapenak ezartzeko eskumena honako hauena izanen da:
a) Nafarroako Foruzaingoan, Foruzaingoko buruarena.
b) Nafarroako toki entitateetako polizietan, kasuko tokiko poliziako buruarena.
2. Falta arinengatik zehapenak ezartzeko, honako prozedura laburtuari jarraituko zaio:
a) Organo eskudunak langile baten ekintza bat falta izan litekeela iritziz gero, organo horrek espediente sumario bat irekiko du izan litezkeen diziplina-erantzukizunak zehazte aldera.
Ekintzaren berri salaketa bidez izan balitz, ustezko erantzuleak hierarkian gora duen nagusiak, espedientea ireki aurretik, datu osagarriak bilduko ditu hiru eguneko epean, eta beharrezkotzat jotzen dituen egiaztapenak eginen ditu salaketa argitzeko eta, kasua bada, espedientea irekitzeko.
b) Espedientea ireki duen organo eskudunak berehala prestatuko du karguen plegua, zeinean jaso beharko baitira egotzitako gertaerak, ustez egin den falta, interesdunaren erantzukizuna eta foru lege honetan kasuko faltarako aurreikusten den zehapena.
Karguen plegua interesdunari igorriko zaio, bost eguneko epean bere defentsarako bidezkotzat jotzen dituen alegazioak aurkez ditzan eta baliatu nahi dituen frogak proposa ditzan.
c) Espedientea ireki duen organo eskudunak egokitzat jotzen dituen froga-diligentziak bost eguneko epean eginen dira. Hala ere, organo horrek beharrezkotzat jotzen badu, luzatzen ahalko du epe hori.
d) Frogarik proposatu ez bada, edo proposatutakoa egin ondoren, organo eskudunak, zehapena ezartzeko eskumena izanez gero, ebazpena emanen du hiru eguneko epean, eta, bestela, hurrengo egun baliodunean espedientea igorriko dio horretarako eskumena duen organoari, zeinak dagokion ebazpena eman beharko baitu adierazitako epean.
e) Artikulu honetan berariaz aurreikusten ez den orotan, falta astun edo oso astunengatik zehapenak ezartzeko prozedura arautzen duten xedapenak aplikatuko dira modu osagarrian.
84. artikulua. Jakinarazpena eta idazpena.
Diziplina-espedienteari amaiera ematen dion ebazpena interesdunari jakinaraziko zaio, eta zehapena ezartzen badu, haren espediente pertsonalean idatziko da.
Era berean, ebazpena behar diren organo administratiboei ere igorriko zaie.
Lehen .–Langile teknikoak eta fakultatiboak.
Nafarroako Poliziek langile tekniko eta fakultatiboak edukitzen ahalko dituzte, poliziako langileek, edukia dela-eta, bete behar ez dituzten edo betetzerik ez dituzten eginkizunak betetzeko. Langile tekniko eta fakultatiboak lanpostu zehatzerako eskatutako titulazioaren arabera dagokien mailan sartuko dira, kasuko poliziako burutzaren menpe egonen dira eta Nafarroako Administrazio Publikoen zerbitzuko Langileen Estatutuan xedatutakoa aplikatuko zaie.
Bigarren .–Lanaldien eta lan ordutegien araubidea aplikatzea Nafarroako Tokiko Polizietan.
Foru lege honen IV. tituluan Nafarroako Polizietako langileen lanaldiei eta lan ordutegiei dagokienez xedatutakoa ez da joanen Nafarroako Toki Entitateekin foru lege honek indarra hartzen duenean lortuak dituen lan hitzarmen eta akordio kolektiboen kaltetan.
Hirugarren .–Kidegoetan sartzeko eta igotzeko prozedura.
Nafarroako Polizia desberdinetara sartzeko prozeduretan, prestakuntza ikastaroren baterako onartua izateko legezko baldintzetan dagoen izangairen bati ikastaro hori baliozkotutzat ematen baldin bazaio lanpostu bera Nafarroako beste administrazio publikoren batean betetzeagatik, azken administrazio horrek eskatzen ahalko du ezen, behin Polizia edo Administrazioa hautatu ondoren, hutsik suertatzen den lanpostua eskain dakiola zerrendako hurrengo izangaiari; azken hori, izan ere, ikastaroa baliozkotu zaion izangaiak hasiera batean hautatu duen administrazioko praktiketako funtzionario gisa onartuko da prestakuntza ikastaroan.
Behin prestakuntza ikastaroa bukatu ondoren, eta ikastaroa baliozkotu zaion izangaiak hautaturiko polizian sartu ondoren, jabetza hartzeak berekin ekarriko du une horretara arte edukitako lanpostuari berariaz uko egitea, eta lanpostua gorde gabeko borondatezko eszedentziaren egoeran geratzea. Kasu horretan, betetzen zuen lanpostua, hutsik geratu dena, zein administraziotakoa zen, administrazio horrek prestakuntza ikastaroan bestearen ordez sarturiko izangaia izendatuko du lanpostu hori betetzeko.
Nafarroako Polizien arteko igoera prozeduren kasuan, deialdia egiten duen administrazioan sartzeak berekin ekarriko du ordura arte betetako lanpostuari uko egitea.
Laugarren .–Erretiro aurreratua.
Gobernu zentralak 2018. urterako Aurrekontu Orokorrei buruzko uztailaren 3ko 6/2018 Legearen “Nafarroako Foruzaingoari erretiro-adinaren koefiziente murriztaileak aitortzea” izenburuko ehun eta berrogeita bederatzigarren xedapen gehigarrian aurreikusitako errege dekretua onesten duenetik 6 hilabeteko epean, Nafarroako Gobernuak bidezkoak diren erabakiak hartuko ditu koefiziente murriztaile horien onuradun gerta litezkeen foruzainen erretiro-adina aurreratzearen eraginkortasuna aurrekontu bidez gaitzeko.
Bosgarren .–Lanaldia hamabiren bat laburtzea Nafarroako Foruzaingoko langileei.
Nafarroako Foruzaingoko langileen lanaldia hamabiren bat laburtzeko modalitate bat ezartzen da. Laburtze horretarako baimena emateko baldintzak, bai eta laburtze horrek lanaldian eta hartaz baliatzen diren langileen ordainsarietan izanen dituzten eraginak ere, Nafarroako Administrazio Publikoetako langile funtzionarioen lanaldi-murrizketak arautzen dituen Erregelamenduan gainerako funtzionarioentzat ezarritakoak izanen dira.
Seigarren .–Foruzaingoko langileen soldatabaldintzak mantentzea eta berreskuratzea.
Baldin eta foru lege honen aplikazioaren ondorioz foruzainen baten ordainsariak txikiagoak izatearen kasu hipotetikorako, bermatuta egonen da gutxienez ere egungo ordainsariak mantenduko direla. Alde negatiboa zuzenduko da dagokion portzentajea gehituz lanpostuko osagarrian. Egungo ordainsariak ez gutxitzeko berme horretatik kanpo ez da ez Foruzaingoko langilerik ez brigadarik uzten.
Halaber, apirilaren 10eko 15/2015 Foru Legearen aplikazioaren ondorioz ordainsarietan galerak izan dituzten Foruzaingoko unitateek gutxienez ere ordainsari horiek berreskuratuko dituzte honako neurri hauen bidez: soldata-masaren gehikuntza lanpostuko osagarrian, prestasun bereziko osagarriaren igoera eta burutzako osagarria, foru lege honen 59., 60. eta 61. artikuluetan, hurrenez hurren, arautuak. Ordainsariak berreskuratzeari buruzko apartatu honetatik kanpo uzten dira Agintariak Babesteko Brigadari atxikitako langileak.
Bi kasu horietan, kalkulu horretarako ez da kontuan hartuko oinarrizko soldataren 100eko 17aren konpentsazioagatiko ordainsari-gehikuntza, proba fisikoak gainditzeari dagokiona.
Nolanahi ere, bermatzen da foru lege honen aplikazioaren ondorioz gerta daitezkeen igoeren inongo xurgatzerik ez dela gertatuko, etorkizunean Foru Administrazioko langile guztientzat, oro har, oinarrizko soldatan orokortasunez ezar litezkeen igoeren eraginez.
Zazpigarren .–Nafarroako toki entitateetako polizietako funtzionarioak Nafarroako Foruzaingoan sartzea.
Nafarroako tokiko polizietako funtzionarioek Nafarroako Foruzaingoan sartzeko aukera izanen dute, jatorriko polizian duten kategoria edo enplegu berarekin, edo pareko kategoria edo enpleguan, foru lege honek indarra hartu eta gehienez ere urtebeteko epean Nafarroako Gobernuak Foru Parlamentura igorriko duen erregelamendu batean zehazten diren baldintzetan, baldin eta sartzeko hautaprobetan parte hartu ahal izateko eskatzen diren betekizunak betetzen badituzte.
Aipatu erregelamenduan honako alderdi hauek bilduko dira: Pertsona horiek Foruzaingoan sartzea, edonola ere, boluntarioa izanen da beti, baina jatorri duen udal entitatearen baimena eduki beharko da. Gainera, sartzeko aukera horrek bakarrik ukituko ditu udal agente edo polizietatik foru lege hau Nafarroako Aldizkari Ofizialean argitaratzen den egunean izaera hori dutenak. Sartze hori eskubide eta betebehar guztiekin eginen da; aldez aurretik gainditu beharko dira beharrezkoak diren gaikuntzarako probak eta ikastaroak Nafarroako Segurtasun eta Larrialdi Eskolan. Halaber, prozedura horretan parte hartuko dute ordezkaritza duten erakunde sindikalek.
Gainera, erregelamenduak gehieneko adina ere ezarriko du udal poliziek Foruzaingoan sartzeko eskatu ahal izateko.
Zortzigarren .–Lanegutegiak aldatzea.
54. 4. artikuluan aipatzen diren Foruzaingoaren mahai sektorialeko hitzarmenek soilik hartuko dituzte aintzat larrialdikoak edo prestakuntzakoak ez diren beharrizanak.
Foru lege honen 54.4. artikuluan aurreikusitako lan-egutegiaren balizko aldaketa unitate batean gauzatu ahal izateko, ezinbesteko baldintza izanen da haren kide diren polizia-funtzionarioek aipatutako unitatean agortu izana ezarritako lan jardunaldi gehigarriak, sindikatu-erakundeekin izenpetutako akordioetatik abiatuta ezar eta arautu daitezkeenak.
Bederatzigarren .–Estatuko funtzionarioak Nafarroako Foruzaingoan integratzea.
Nafarroako Foru Eraentza Berrezarri eta Hobetzeari buruzko Lege Organikoan Nafarroako Foru Komunitateak polizia arloko eskumen berriak bere gain hartzeari buruz ezarritakoa betetzen bada, gaur egun zerbitzu hori ematen duten Estatuko funtzionarioak integratu ahal izateko beharrezkoak diren mekanismoak gaitu ahalko dira, bitariko organo eskudunaren esparruan eta administrazio eskudunak xedatutakoari jarraikiz.
Hamargarren xedapen gehigarria
Nafarroako Poliziei buruzko azaroaren 19ko 23/2018 Foru Legean aurreikusten ez den guztian, Nafarroako Administrazio Publikoen zerbitzuko langileen estatutuaren arau orokorretan ezarritakoa aplikatuko zaie Nafarroako polizietako langileei, baldin eta aplikazio hori ez bada haien aurreikuspenen edo printzipio orokorren aurkakoa."
Azken xedapen honetan aurreikusitakoa aplikatuko zaie langileak hautatzeko prozesuei, bai sarrerakoei, bai barne igoerakoei, baldin eta haien tramitazioa ez bada amaitu foru lege honek indarra hartzen duenean.
Lehen .–Indarreko arauak aplikatzea.
Foru lege honetan aipatzen diren garapen erregelamenduak onetsi bitartean, egun indarra duten erregelamenduen aplikazioari eutsiko zaio. Zehazki, lanaldien, ordutegien eta ordainsarien araubide berria, foru lege honetan jasotako erregulaziotik heldu dena, 2019ko urtarrilaren 1etik aurrera izanen da aplikatzekoa, eta bitartean indarrean jarraituko du Foruzaingoaren lanaldi eta ordainsarien Erregelamendua onesten duen irailaren 28ko 79/2016 Foru Dekretuak.
Bigarren .–Enpleguetan sartzeko deialdiak.
Foru lege honek indarra hartzen duenetik hasita enplegu bakoitzean sartzeko egiten diren hurrengo bi deialdietan, lanposturik hutsik gelditzen bada, lanpostu horiek eskaintzen ahalko zaizkie oposizio-lehiaketaren sistemaren bidez, deitutako enplegutik beherako enpleguko langileei ez ezik bi enplegu beherakoei ere, betiere kasuko mailan sartzeko eskatzen den ikasketa titulua eta erreferentziako beheragoko enpleguetan zazpi urte emanik badute egiazko zerbitzuan.
Proba fisikoak egiteagatiko konpentsazioa ekonomikoa edo urteko 126 orduko denborazkoa izateari buruzko aukeraren borondatezkotasunari eutsiko zaio, eta foruzain bakoitzak lau urtean behin zilegi izanen du aukera horretan atzera egitea, libreki. Foruzain bakoitzak urte bakoitzeko irailaren 1a baino lehenago jakinarazi ahalko du ordu bidezko konpentsaziotik ekonomikora pasatzearen aukera, eta lau urteko aukera amaitzen den urtekoan, baldin eta konpentsazio ekonomikotik ordu bidezkora pasatu nahi bada.
Proba fisikoen konpentsazio ekonomikoa aukeratzen duten langile funtzionarioei ordainsari ekonomikoa emanen zaie, mailari dagokion hasierako soldataren % 17ko portzentajearen bidez, lanpostuko osagarriari gehituko zaiona.
Nolanahi ere, bi baldintza ezartzen dira gai hau erregulatzeko:
–Foruzain izaera foru lege honek indarra hartu ondoren eskuratzen dutenei automatikoki aplikatuko zaie aurreko paragrafoan aurreikusitako konpentsazio ekonomikoa, eta inolaz ere ez dute ordu bidezko konpentsazioaz gozatzeko aukerarik izanen. Salbuespenez, foru lege hau indarrean sartzen denean Segurtasun Eskolan dauden eta foru legea indarrean sartu ondoren foruzain izendapena lortzen dutenei ez zaie baldintza hori aplikatuko.
–Ordu bidezko konpentsazioa aukeratzen dutenak ezin izanen dira bosgarren xedapen gehigarriak jasotako lanaldia hamabiren bat murrizteko aukeraz baliatu.
Eginen diren proba fisikoak orain arte finkatutako berak izanen dira; baldintza eta eduki berei eutsiko zaie, eta erregelamenduz arautuko dira. Arestiko hori gorabehera, konpentsazio ekonomikoaren aldeko hautua egiten dutenek proba fisikoak ez egitea erabakitzen ahalko dute; horrek esan nahi du behin betikoz eginen diotela uko ordu bidezko konpentsaziora ezarritako 4 urteko epearen barruan itzultzeari. Konpentsazio ekonomikoaren aldeko hautua egin arren proba fisikoak egiten jarraitzea erabaki dutenek, aldiz, ordu bidezko konpentsaziora itzultzeko eskubidea gordeko dute.
Urte bakoitzeko azken hiruhilekoan eginen da aipatu diren probetarako deialdia. Halaber, deialdi nagusia egiten den urtearen hurrengoaren martxoan “gertakari proba” bat eginen da, salbuespenezko eta justifikatutako arrazoiak direla-eta hasiera batean ezarritako egunetan probak egiterik izan ez zuten pertsonentzat. Nafarroako Foruzaingoko kideek proba fisikoak egiten ematen duten denbora benetan lan egindakotzat hartuko da.
Laneko istripua, gaixotasun profesionala, haurdunaldia edo amatasuna dela-eta proba fisikoak egiterik izan ez dutenek dagozkien orduak baliatzeko eskubidea sortuko dute, baldin eta proba fisikoak gainditu egin bazituzten lan istripua izan baino lehen edo lan gaixotasunagatiko, haurdunaldiagatiko edo amatasunagatiko baja hasi baino lehen parte hartu ahal izan zuten azken deialdian.
Zerbitzu berezietako egoeran dauden pertsonek, salbu eta Nafarroako Segurtasun eta Larrialdi Eskolan igoerarako ikastaro bat egiten ari direnek, ez dituzte proba fisikoak egin beharko egoera horretan dirauten bitartean. Zerbitzu aktibora bueltatzen badira, kasuko konpentsazioa izanen dute, zerbitzu berezietako egoerara pasatu aurreko baldintza beretan.
Proba fisikoekin zerikusia duten gainerako alderdiak erregelamendu bidez arautu beharko dira.
Proba fisikoak gainditzeagatiko konpentsazioa daukaten toki entitateen menpekoak diren poliziek haiek mantenduko dituzte foru lege honen indarraldia hasi bitartean eduki dituzten baldintza beretan. Horrek ez du deusetan galaraziko haiek aldatu ahal izatea, horretarako negoziazio kolektiboaren ondoren.
Laugarren .–Proba fisikoak egiteagatiko konpentsazioari buruzko aukera jakinarazteko epea.
Salbuespen gisa, 2018. urteari dagokionez, Foruzaingoko langileek, urte horretako abenduaren 1a baino lehenago, burutzari jakinarazi beharko diote zer aukera egiten duten, hirugarren xedapen iragankorrean jasotakoa, proba fisikoak direla-eta; barne harturik, kasua bada, haiek egiteari behin betiko ukoa egitea. Geroagoko ekitaldiei dagokienez, gaiari buruzko erregelamenduzko garapenak xedatutakoari helduko zaio.
Bosgarren .–Nafarroako toki entitateetako populazio ratioen aplikazioa.
Tokiko Poliziak sortzeaz eta Nafarroako Toki Entitateek horiei eman beharreko egitura zehazteaz foru lege honek ezarritako populazio ratioek ez dute eraginik izanen entitate horiek, populazioari dagokionez, foru lege honek indarra hartzen duenean duten egoeran. Nafarroako toki entitateetan gerta daitezkeen aldaketa demografikoek ez dute ekarriko berekin foru lege honetan aurreikusitako ratioak aplikatu beharra, aldaketa demografiko horiek bi legealditan gutxienez mantentzen ez badira.
Era berean, foru lege honek indarra hartzen duenean udal agenteak edo aguazilak dituzten Nafarroako toki entitateek langile horiek mantentzen ahalko dituzte, Tokiko Poliziako Zerbitzuak izenarekin, foru lege honetan aurreikusitako populazio ratioak zein diren ere.
Edozein kasutan ere, foru lege honetan aurreikusten diren populazio ratioak betetzea langile-gastuei buruzko oinarrizko arauek xedaturikoaren mendean egonen da.
Seigarren .–Lanpostuen balorazioa egiteko azterlanak.
Tokiko poliziak dauzkaten toki entitateek lanpostu osagarriari zer ehuneko dagokion ezartze eta zehazte aldera lanpostuen balorazioa egiteko kasuko azterlanak egiten ez dituzten bitartean, edo langileen ordezkariekin osagarri horretan sartzea adosten ez den bitartean, tokiko poliziek txandakako laneko gaur egungo osagarriari dagokion 100eko 6ko ordainsaria jasotzeko eskubidea gordeko dute.
Zazpigarren .–Poliziako laguntzaileak.
Foru lege hau indarrean sartu eta bi urtetik aitzina, laguntzaileek ez dute polizia-plantilla osoaren 100eko 15 baino gehiago eginen ezein toki entitatetan.
Zortzigarren .–Eskumenak eskualdatzea.
Estatuko Administrazioak eta Foru Komunitateak adosturiko eskumenak Foruzaingoari egiazki eskualdatzeko prozesuak irauten duen bitartean, Estatuaren segurtasun kidego eta indarren unitate edo kideek ere egikaritu ahalko dituzte, Segurtasun Batzordean onesten diren koordinaziorako erabakiei jarraikiz.
Bakarra .–Indargabetzen diren arauak.
Indarrik gabe gelditzen dira foru lege honetan xedatutakoaren kontrako maila bereko edo apalagoko arau guztiak, eta bereziki Nafarroako Poliziei buruzko martxoaren 23ko 8/2007 Foru Legea eta apirilaren 10eko 15/2015 Foru Legea, Nafarroako Poliziei buruzko martxoaren 23ko 8/2007 Foru Legea aldatzen duena.
Lehenengoa .–Erregelamendu bidezko garapena.
Foru lege hau indarrean sartzen denetik urtebeteko epean, Nafarroako Gobernuak legea erregelamendu bidez garatzeko beharrezkoak diren xedapenak emanen ditu; batez ere, Nafarroako Foruzaingoko langileen prestakuntzari, lanpostu-betetzeari, bigarren jarduerari, lanaldiei, ordutegiei eta ordainsariei buruzkoak.
Bigarrena .–Titulazioak egokitzea.
Foru lege hau indarrean sartu eta hiru hilabeteko epean eginen da enpleguetarako exigitzen diren titulazioen egokitzapena, bai Estatuko gainontzeko lurraldeetan jada indarrean diren eta Bolonia Planeko ikasketetara egokitutako kategorietan sartzeko, bai horietara igotzeko.
Hirugarrena .–Indarra hartzea.
Foru lege honek Nafarroako Aldizkari Ofizialean argitaratu eta biharamunean hartuko du indarra.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta “Estatuko Aldizkari Ofizialera” igor dadila agintzen dut eta herritar eta agintariei bete eta betearaz dezatela manatzen diet.
Iruñean, 2018ko azaroaren 19an.–Nafarroako Foru Komunitateko Lehendakaria, Uxue Barkos Berruezo.
Iragarkiaren kodea: F1814165
