(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

7/2018 FORU LEGEA, maiatzaren 17koa, Nafarroako Foru Komunitateko jardunbide egokien aldeko eta ustelkeriaren kontrako Bulegoa sortzekoa Nota de Vigencia

BON N.º 98 - 23/05/2018

  I. TITULUA. Xedapen orokorrak

  I. KAPITULUA. Xedea, printzipio orokorrak, araubide juridikoa eta jarduketaesparrua

  II. KAPITULUA. Helburu eta eginkizunak

  III. KAPITULUA. Mugak eta laguntza emateko betebeharra

  II. TITULUA. Ikerketaprozedura

  I. KAPITULUA. Prozedura abiaraztea

  II. KAPITULUA. Izapidetzeprozedura

  III. KAPITULUA. Salaketaegilearen babesa eta dokumentu erreserbatuak

  III. TITULUA. Beste erakunde eta entitate batzuekiko lankidetza

  IV. TITULUA. Jardueratik heldutakoa

  I. KAPITULUA. Kontuak ematea

  II. KAPITULUA. Gomendioak eta irizpenak

  V. TITULUA. Giza baliabideak eta baliabide materialak

  I. KAPITULUA. Bulegoaren zuzendaritza

  II. KAPITULUA. Bulegoaren zerbitzuko langileak

  III. KAPITULUA. Baliabide materialak eta finantzaketa

  IV. KAPITULUA. Funtzionamendua

  VI. TITULUA. Zehatzeko ahalmena

ZIOEN AZALPENA

I

Gizarteak bere jarduketa- eta kudeaketa-moduak aldatzen eta baldintzatzen dituzten erronkei aurre egin behar die. Gizartean, enpresan, lanean, politikan, administrazioan, teknologian eta abarretan izan diren aldaketek paradigma politiko eta administratibo berri baten aitzinean paratu gaituzte. Halatan, gaur egungo kontrol-tresnak ez dira aski jarduera politikoa eta administratiboa aurreikusteko, begiratzeko eta monitorizatzeko, ustelkeria-egintzak edo jardunbide desegokiak prebenitze aldera. Gauzak horrela, beharrezkoa da erakunde bat sortzea berariaz, Administrazioaren baitan eta esparru parlamentarioan diren kontrol eta fiskalizazio erakundeekin koordinatuta egonen dena, politika publikoen emaitzak hobetzearren eta gardentasuna eta lan ona mailarik gorenera eramatearren.

Foru lege honen bidez sortzen da Nafarroako Foru Komunitateko jardunbide egokien aldeko eta ustelkeriaren kontrako bulegoa. Xedea da balizko ustelkeria kasuak prebenitzea eta ikertzea, jardunbide egokiak sustatzea eta Nafarroako administrazioen eta sektore publikoaren zuzentasuna zaintzea.

Azaldutakoaren ildotik, Bulegoak beteko ditu kontratuei buruzko legediak Kontratazioa Arautu eta Gainbegiratzeko Bulegoari esleitzen dizkion eginkizunak.

Foru lege honen arabera, nazioarteko tresna juridikoekin bat, ustelkeria da norberarentzat nahiz hirugarrenentzat etekin pribatuak lortze aldera egindako botere-abusu oro.

II

Ustelkeriari aurre egiteko eta jardunbide egokiak sendotzeko, ezinbestekoa da gizarteak Administrazio Publikoaren kontrolean esku hartzea. Parte-hartzea ziurtatzeko, herritarrek beren erakundeen kontrol eraginkorrean egiaz parte hartzeko tresnak sortu beharra dago, eta arduradun politikoek herritarren nahiz beren ordezkaritza-organoen aitzinean kontu emateko sistemak ezarri behar dira.

III

Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 49.1 artikuluaren babesean sortzen da Nafarroako Foru Komunitateko jardunbide egokien aldeko eta ustelkeriaren kontrako bulegoa. Hartara, Ustelkeriaren aurkako Nazio Batuen Konbentzioa onesten duen Nazio Batuen Biltzar Orokorraren 2003ko urriaren 31ko 58/4 Ebazpena betetzen da; izan ere, konbentzio horren 6. artikuluan ezartzen da Nazio Batuetako kide diren estatuetan ustelkeria prebenitzeko erakundeak sortu beharra dagoela. Halaber, Bulegoa sortzean, sakondu egiten da iruzurrari aurre egite aldera Europar Batasunak ezarritako parametroetan, zeinak Europar Batasunaren Funtzionamenduari buruzko Tratatuaren eta Europar Batasunaren Tratatuaren 325. artikuluan jasotzen baitira.

Nafarroako Foru Komunitateko jardunbide egokien aldeko eta ustelkeriaren kontrako bulegoa abian jartzeak indartu egiten du orobat Nafarroako Foru Komunitateak betetzea Espainiako Estatuak hartutako konpromisoak, Ustelkeriari buruzko Hitzarmen Zibila (Europako Kontseiluaren 174. zenbakikoa) eta Ustelkeriari buruzko Zigor Hitzarmena (Europako Kontseiluaren 173. zenbakikoa) sinatu eta berrestetik heldu direnak, bai eta Ustelkeriari aurre egiteko hogei printzipio gidariei buruzko Europako Kontseiluaren 24. Ebazpenetik (97) heldu direnak ere.

IV

Foru lege honek sei titulu, hiru xedapen gehigarri, lau xedapen iragankor, xedapen indargabetzaile bat eta azken xedapen bat ditu.

I. tituluak dihardu Jardunbide egokien aldeko eta ustelkeriaren kontrako bulegoaren sorrerari, izaera juridikoari eta xedeari buruz. Titulu horretan jorratzen dira Bulegoaren araubide juridikoa, jardun-eremua eta eginkizunak.

Jardunbide egokien aldeko eta ustelkeriaren kontrako bulegoak neurriak sustatu eta ezarri behar ditu ustelkeria prebenitu, ikertu eta haren aurka borrokatzeko, jardunbide egokiak sustatu eta hobetzeko, eta salatzailea babesteko. Haren helburu nagusia da Nafarroako Foru Komunitateko erakunde publikoen jarduna indartzea, ekidite aldera horietan galera morala gertatzea eta Ogasun Publikoak txirotze ekonomikoa pairatzea, hori guztia herritarren kaltetan eta zerbitzu publikoen kalitatearen kaltetan izanen bailitzateke.

Haren jarduketa-eremuak barnean hartzen ditu Foru Komunitatea osatzen duten erakunde guztiak. Jardunbide egokien aldeko eta ustelkeriaren kontrako bulegoak halaber jo ahalko du, foru lege honek aurreikusten dituen baldintzetan, enpresa eta entitate pribatuen nahiz pertsona fisikoen aurka, administrazioekin daukaten harremanaren arabera.

Jardunbide egokien aldeko eta ustelkeriaren kontrako bulegoa lau printzipio nagusiri jarraituz taxutzen da, eta horiek dira haren jardunaren ardatzak. Lehendabizikoa prebentzioa da. Bulegoak zainduko du gardentasunez egiten direla publikoa denaren kudeaketa eta gizarte zibilaren parte-hartzea; publikoa denaren kudeaketan kontu-ematearen eginbeharra betetzen dela gainbegiratuko du; eta jardunbide egokien kode bat egin eta betetzea sustatuko du hautetsien, izendapen askeko kargudunen eta sektore publikoko langileen kasuan; halaber, publikoa denaren kudeaketan interes-gatazka zaindu eta kontrolatuko du.

Bere prebentzio-eginkizuna betetzean, Bulegoak, administrazio publikoekin lankidetzan, ustelkeria eta jardunbide okerrak gertatzeko arriskuak identifikatuko ditu, eta horiek desagerrarazteko proposamenak eginen ditu. Orobat azterlana eginen du langileen eta kargu publikoen zintzotasun gutxiko jokabideei, jokabide horien zergatiei eta jokabide horiek desagerrarazteko moduei buruz. Publikoa denaren kudeaketan jokabide etikoak barneratzeko eta ezartzeko lan eginen du.

Horretarako, Bulegoak gomendioak emanen ditu, jardunbide egokien kultura sustatzeko eta ustelkeria isolatzeko xedez. Halaber, aholkularitza instituzional espezializatua emanen du eta sektore publikoko langileentzako, kargu politikoentzako eta zuzendaritza-karguentzako prestakuntza-jarduerak eginen ditu.

Jarduketa egokien aldeko eta ustelkeriaren kontrako bulegoak orobat lan eginen du gure gizartean susta eta asimila daitezen publikoa dena errespetatzearen eta zaintzearen herritar-balioak eta iruzurra eta ustelkeria gizartearen esparru guztietan arbuiatzearenak.

Ikerkuntza da bigarren jarduera-ardatza, eta helburu izanen du arduradunak identifikatzea honako kasu hauetan: funts publikoen desbideratzeak, interes-gatazkak –errealak edo potentzialak–, abusuak eta botere-desbideratzea, sarbide erreserbatuko informazioen erabilera baimendugabea, ondasun eta baliabide publikoak norberaren edo hirugarrenen onurarako aprobetxatzea, bai eta agintarien, goi kargudunen eta sektore publikoko langileen, pertsona fisikoen edo juridikoen bestelako jokabide irregular batzuk, Administrazio Publikoei kalte moral edo ekonomikoa egin ahalko lieketenak. Ikerketa bukatu ostean, baldin eta ikerketak iraun duen bitartean administrazio-irregulartasuneko zantzurik detektatu bada, zeinarentzat administrazio-zehapena aurreikusten baita, Bulegoak berehala igorriko dizkie ikerketak administrazio-organo eskudunei, horren arabera jardun dezaten eta irregulartasun horiek berriz gertatzea eragotz dezaten. Ikerketa bat abian den bitartean delitu-zantzurik aurkitzen baldin bada, jurisdikzio-organoei horren berri emanen zaie berehala. Ikerkuntza-prozedura orobat bukatzen ahalko da kasuko erakundeari gomendioak eginez, erakundearen eta erakundea osatzen duten pertsonen zintzotasunari eragiten dioten disfuntzioak zuzendu edo ekiditekoak.

Bulego honen jardueraren hirugarren ardatza da iruzurraren eta ustelkeriaren aurka borrokatzeko neurrien kontrola eta ebaluazioa. Horretarako, beste erakunde batzuekiko koordinazio eta lankidetza egonkorrerako bideak ezarriko ditu, bere helburuak lortzeko. Bere jardunarekin zintzotasun, onestasun eta gardentasun mailarik handienak sustatuko ditu politika publikoak taxutu eta garatzeari, zerbitzu publikoak emateari eta baliabide publikoak kudeatzeari dagokienez. Halaber, ustelkeria kontrolatze eta borrokatze aldera administrazio publikoetan ezarritako tresna juridikoak eta neurri administratiboak ebaluatzeko balioko du.

Foru lege honen laugarren ardatza da gure erakundeei kalte moral edo ekonomikoa eragiten dieten jokabide susmagarriak edo jarduketa irregularrak salatzen dituzten pertsonak -foru lege honen jarduketa-esparrukoak- babestea. Horren xedea da ekiditea gure gizartearen herritar-balioak defendatzeagatik lan baldintzak edo baldintza profesionalak okertu daitezen. Horrenbestez, Jardunbide egokien aldeko eta ustelkeriaren kontrako bulegoak lagundu beharko du babesten ustez ustelkeriakoak edo jardunbide irregularrak diren jokabideak foru lege honetan xedatutakoarekin bat salatzen dituzten pertsonak.

II. tituluan, ikerketa-prozedura, salatzailearen edo informatzailearen babestea eta erreserbatutzat kalifikatzen den dokumentazioaren tratamendua aztertzen dira.

Jardunbide egokien aldeko eta ustelkeriaren kontrako bulegoaren ikerketa-lana ofizioz abiarazten da, partikularrek, funtzionarioek edo erakundeek eta pertsona juridiko publikoek zein pribatuek salatutako gertakariak aztertu ondoren.

III. tituluak Bulegoaren eta zuzenbide publikoko beste erakunde eta entitate batzuen arteko lankidetza jorratzen du. Bere eginkizunak betetzen dituenean eraginkorrago izatearren, Jardunbide egokien aldeko eta ustelkeriaren kontrako bulegoa beste erakunde, administrazio publiko eta entitate publiko batzuekin koordinatuko da, foru lege honetan ezarritako moduan eta bakoitzaren eskumenekiko erabateko errespetuz.

IV. tituluak arautzen ditu Bulegoak egindako jardueraren emaitzak; honako hauek, alegia: Nafarroako Foru Komunitateko herritarrei eta Parlamentuari kontu-ematea, urteko oroitidazkia egitea eta oroitidazki hori legebiltzarrera igortzea. Halere, Jardunbide egokien aldeko eta ustelkeriaren kontrako bulegoaren zuzendaritzak urteko txosten bat igorriko du, azaltze aldera Bulegoak zer jarduera egin dituen prebentzio eta ikerketa, kontrol eta ebaluazio eginkizunak betetzeko. Hori guztia ez da eragozpen izanen aparteko txostenak edo txosten bereziak egiteko. Titulu horrek bermatzen du txosten horiei guztiei zor zaien publizitatea emanen zaiela.

V. titulua da Bulegoaren giza baliabideen eta baliabide materialen zuzkidurari buruzkoa. Bulegoak zuzendari bat izanen du. Nafarroako Parlamentuak hautatuko du, eta pertsona independentea eta frogatutako balioa duena izan beharko du.

Bestalde, Jardunbide Egokien Aldeko eta Ustelkeriaren Kontrako Bulegoko langileei Nafarroako Administrazio Publikoen Langileen Estatutua aplikatuko zaie, errespetatuz betiere, lanpostuak betetzeari dagokionez, publizitate, merezimendu eta gaitasun printzipioak. Foru Komunitateari lotutako langileei aplikatzekoak zaizkien bateraezintasunei buruzko araubide berezia ere jasotzen da bertan.

VI. tituluan zehapen-araubidea jorratzen da, arau-hausteak definitzen dira, horien astuntasuna kalifikatzen da eta kasuko zehapenak ezartzen dira. Esperientziak diosku besterik gabeko gomendioak eta gaitzespen publikoa ez direla aski. Hori dela-eta, lege honek zehapenak ezartzen ditu, eta eskumen hori Jardunbide egokien aldeko eta ustelkeriaren kontrako bulegoaren zuzendaritzari esleitzen dio, edo diziplina arloko eskumena duten agintariei dei egiten die eskumen hori balia dezaten.

Azkenik, foru lege honek xedapen gehigarri eta iragankor eta azken xedapen batzuk badauzka; horien artean, nabarmendu behar dira bigarren xedapen gehigarria, zeinak Bulegoari kontratazioaren arloko arautze- eta gainbegiratze-eginkizunak esleitzen baitizkio, kontratuei buruzko legediak ezarritakoaren araberakoak, eta hirugarren xedapen gehigarria, zeinak bulegoaren barruan atal bat sortzen baitu, azaroaren 8ko 9/2017 Legearen 333. artikuluak Ebaluazio Bulego Nazionalari esleitzen dizkion eginkizunak betetzeko.

Azken xedapenak hiru hilabeteko vacatio legis bat ezartzen du indarra hartzeari dagokionez.

I. TITULUA. Xedapen orokorrak

I. KAPITULUA. Xedea, printzipio orokorrak, araubide juridikoa eta jarduketa-esparrua

1. artikulua. Xedea eta izaera juridikoa.

1. Foru lege honen xedea da Nafarroako Foru Komunitateko jardunbide egokien aldeko eta ustelkeriaren kontrako bulegoa sortzea zuzenbide publikoko entitate gisa. Nortasun juridiko berekia izanen du eta, bere eskumenak betetzean, objektibotasunez eta profesionaltasunez jardunen du, antolamendu juridikoari men eginez eta administrazio publikoengandiko erabateko independentzia organiko eta funtzionalarekin.

2. Jardunbide egokien aldeko eta ustelkeriaren kontrako bulegoa sortzen da Nafarroako administrazio publikoetako eta horiek parte hartzen duten sozietate eta entitateetako ustelkeria eta iruzurrezko jardunbideak detektatu, prebenitu, ikertu eta desagerrarazteko, foru lege honek ezarritako baldintzetan.

3. Bulegoa sortzen da jardunbide egokien, herritar-balioen eta gobernu onaren kultura bultzatu eta erraztearren herritarren artean, eta ustelkeria baztertzearren politika publikoen edo jarduketa administratiboen taxutze, betetze eta ebaluatzean.

2. artikulua. Printzipio orokorrak.

Nafarroako Foru Komunitateko jardunbide egokien aldeko eta ustelkeriaren kontrako bulegoak objektibotasunez erantzuten die interes orokorrei, zintzotasunaren, neutraltasunaren, erantzukizunaren, inpartzialtasunaren, proportzionaltasunaren, konfidentzialtasunaren, zerbitzu publikorako dedikazioaren eta errugabetasun-presuntzioaren printzipioekin bat.

Halaber, bere jardunean errespetatu egin beharko ditu helburu eta asmo publikoen betetzean legezkotasunez, eraginkortasunez, efizientziaz eta ekonomiaz jardutearen printzipioak.

Jardunbide egokien aldeko eta ustelkeriaren kontrako bulegoak gardentasunaren, parte-hartzearen eta kontu-ematearen printzipioekin bat jarduten du herritarrekiko harremanetan.

3. artikulua. Araubide juridikoa.

Nafarroako Foru Komunitateko jardunbide egokien aldeko eta ustelkeriaren kontrako bulegoa foru lege honetan eta Administrazio Zuzenbideko arauetan xedatutakoari lotuko zaio.

VI. tituluan ezartzen diren zehapenak ezartzeko, foru lege honetan eta zehapen-prozedura administratiboari buruzko araudi indardunean jasotako xedapenei eta printzipioei jarraituko zaie.

4. artikulua. Bulegoaren jarduketaeremua.

Honako hau da Nafarroako Foru Komunitateko jardunbide egokien aldeko eta ustelkeriaren kontrako bulegoaren jarduketa-eremua:

1. Nafarroako Foru Komunitateko Administrazioa eta haren menpeko erakundeak, enteak, entitateak, fundazioak, partzuergoak eta enpresa publikoak, baldin eta partaidetza handiena edo jabari eraginkorra hari badagokio, alde batera utzita zuzenbide publikokoak edo pribatukoak diren. Partaidetza hori % 50ekoa baino txikiagoa baldin bada, Bulegoaren jarduketa-eremuak honako hauek hartuko ditu: zerbitzu publikoak kudeatzeko jarduerak, herri lanak egiteko jarduera eta laguntza edo hornidura jarduerak, Nafarroako sektore publikoaren konturakoak.

2. Nafarroako toki entitateak eta haien menpeko erakundeak, enteak, entitateak, fundazioak eta enpresa publikoak, baldin eta partaidetza handiena edo jabari eraginkorra hari badagokio, alde batera utzita zuzenbide publikokoak edo pribatukoak diren. Partaidetza hori % 50ekoa baino txikiagoa baldin bada, Bulegoaren jarduketa-eremuak honako hauek soilik hartuko ditu: zerbitzu publikoak kudeatzeko jarduerak, herri lanak egiteko jarduera eta laguntza edo hornidura jarduerak, Nafarroako sektore publikoaren konturakoak.

3. Nafarroako Unibertsitate Publikoa eta haren menpeko ente, entitate, fundazio eta erakundeak.

4. Alderdi politikoak, erakunde sindikalak eta enpresa erakundeak, eta haiei loturik dauden fundazio eta elkarteak, Kontratu Publikoei buruzko apirilaren 13ko 2/2018 Foru Legeko 4.1.e) artikuluan jasotako baldintzetan.

II. KAPITULUA. Helburu eta eginkizunak

5. artikulua. Eginkizunak.

1. Honako hauek dira Nafarroako Foru Komunitateko jardunbide egokien aldeko eta ustelkeriaren kontrako bulegoaren eginkizunak:

a) Prebentzio-eginkizuna.

b) Ikerketa-eginkizuna.

c) Ebaluazio-eginkizuna.

d) Babes-eginkizuna.

e) Kontratazio publikoa arautu eta gainbegiratzearen eginkizuna.

6. artikulua. Prebentzioeginkizuna.

Nafarroako Foru Komunitateko jardunbide egokien aldeko eta ustelkeriaren kontrako bulegoaren prebentzio-eginkizunak honako jarduketa hauek hartuko ditu:

a) Ustelkeria-arriskuak identifikatzea, jokabide desegokiak edo zintzotasunaren eta etika publikoaren aurkakoak detektatzea. Horretarako, datuak bilduko ditu eta azterlanak eginen ditu sektore publikoko iruzur-tipologiak, iruzurrak zer esparrutan gertatzen diren eta iruzurrak gertatzea errazten duten egoerak identifikatu ahal izateko.

b) Jokabide Kode Etiko berri bat taxutzea, zeinaren bidez ezarriko baita zer arau etiko eta zer jokabide-arau bete beharko dituzten Nafarroako Gobernuko kideek, goi-kargudunek, behin-behineko langileek, sektore publikoa osatzen duten entitateetako zuzendaritza-kideek eta hautetsiek, zeinen jarduketek honako printzipio hauek zaindu beharko baitituzte: objektibotasuna, zintzotasuna, neutraltasuna, erantzukizuna, inpartzialtasuna, konfidentzialtasuna, gardentasuna, eredugarritasuna, zerbitzu publikoaren alde lan egitea, eraginkortasuna, onestasuna, austeritatea, genero-berdintasunarekiko errespetua eta kultura- nahiz hizkuntza-ingurunearen eta ingurumenaren errespetua, sustapena eta babesa. Nafarroako Parlamentuak foru lege baten mailarekin onetsiko du Kodea.

c) Administrazio Publikoan Jokabide Kode Etikoa eta jardunbide egokien gida aplika daitezen sustatu, bultzatu eta bermatzea, zerbitzu publikoen ematearen kalitatea hobetzen laguntzeko xedez.

d) Jarduera eta Interesen Erregistroa kudeatzea eta jardueren eta interesen aitorpenetan emandako informazioa egiaztatzea, gatazka-kasuak ebaztea eta kargu publikoen ondasunaren gehikuntza moduan gertaturiko aldaketen justifikazioa egiaztatzea. Horretarako, Bulegoak bere ekimenez jardunen du, eta ekimena abiarazteko arrazoien txosten bat eginen du.

Halaber, zilegi izanen du aitortutako informazioa egiaztatzea eta gatazka-kasuak ebaztea Nafarroako Toki Administrazioko goi-kargudunen eta kargu hautetsi publikoen bateraezintasunen araubideari dagokionez, baldin eta Toki Administrazioko organo eskudunak horretarako erabakia hartu badu, eta kasuko hitzarmena formalizatu ondoren.

e) Aholku ematea, txostenak egitea, proposamenak aurkeztea, arau-aldaketei buruzko proposamenak barne, sektore publikoaren jarduketak hobetzeko xedez eta disfuntzioak edo jarduketa diskrezionalak ekidin eta jardun administratiboa hobetu ditzaketen irizpideak jasotzeko xedez.

f) Prestakuntza- eta sentsibilizazio-ekintzak taxutu eta programatzea prebentzioaren arloan eta iruzurraren eta ustelkeriaren aurkako borrokaren arloan.

g) Foru lege honetan aipatzen den guztiari dagokionez langileei prestakuntza ematen laguntzea, organo edo erakunde eskudunak hala eskatuta -alde batera utzita publikoa ala pribatua den-.

h) Beste edozein jarduketa, baldin eta horren edukia eta xedea iruzurraren eta ustelkeriaren aurkako ekintza prebentibotzat har badaitezke.

7. artikulua. Ikerketaeginkizuna.

1. Nafarroako Foru Komunitateko jardunbide egokien aldeko eta ustelkeriaren kontrako bulegoaren ikerketa-eginkizunak honako jarduketa hauek hartuko ditu, besteak beste:

a) Jokabide irregularrei buruzko ikerketak egitea, jokabide horiek interes-gatazkak sor baditzakete agintariengan, goi-kargudunengan eta administrazio publikoen zerbitzuko nahiz haien gehiengoaren partaidetza edo jabari eraginkorra duten fundazio eta enpresa publikoen -zuzenbide publikoz nahiz pribatuz eraenduak direla- zerbitzuko langileengan, Kode Etikoaren kalterako badira edo Nafarroako sektore publikoari zuzenean nahiz zeharka kalte ekonomikoa edo ospe-galera ekar badiezaiokete.

b) Ikertzea sektore publikoaren zerbitzuko langileen berariazko eginkizunetatik heldu diren informazioak onura pribaturako erabili izana eta ondasun eta baliabide publikoak norberaren nahiz hirugarrenen onurarako baliatu izana.

c) Ikertzea berdintasun, merezimendu, publizitate eta gaitasun printzipioak urratu izana sektore publikoko lanpostuak betetzean nahiz gehiengodun partaidetzako edo jabari eraginkorreko -zuzenbide publikoz nahiz pribatuz eraenduak direla- fundazio eta enpresa publikoetako lanpostuak betetzean.

d) Jarraipena eta egiaztapena egitea ente instrumentalei agindutako mandatuen exekuzioaz eta foru lege honetako 4. artikuluko 1., 2. eta 3. zenbakietan adierazitako subjektuetakoren batek lizitatu eta esleitutako kontratu administratiboen exekuzioaz.

2. Jardunbide egokien aldeko eta ustelkeriaren kontrako bulegoak lankidetzan jardunen du Parlamentuarekin, baldin eta parlamentariek eta talde parlamentarioek hori eskatzen badute, Parlamentuko Erregelamenduan ezarritakoaren arabera.

3. Ikerketa-prozesu batean beste kontrol- edo/eta fiskalizazio-erakunde batzuei dagozkien eskumenen gaineko egintzak edo egoerak detektatzen badira, egindako jarduketen berri emanen zaio kasuko organo edo erakunde eskudunari, izan beharreko ondorioak izan ditzan.

8. artikulua. Ebaluazioeginkizuna.

1. Nafarroako Foru Komunitateko jardunbide egokien aldeko eta ustelkeriaren kontrako bulegoak ustelkeria prebenitzeko eta jardunbide egokiak sustatzeko neurrien eraginkortasunaren kontrol-, jarraipen- eta ebaluazio-lanak eginen ditu. Lan horiek egitean, beste kontrol-organo batzuekin lankidetzan arituko da, bakoitzaren eskumenak eta berariazko eginkizunak errespetatuz betiere.

2. Jarduketek lagundu beharko dute errugabetasun-presuntzioa bermatzen, bai eta zintzotasun, onestasun eta gardentasun mailarik handienak ere, kontratazio publikoko prozesuetan eta ente instrumentalei egindako mandatuetan, diru-laguntza prozesuetan, erabakiak hartzeko prozesuetan, zerbitzu publikoen emate egokian eta ondasunen, eskumenen eta baliabide publikoen plangintza eta kudeaketa efizientean, hartara lagunduko baitute Administrazio Publikoetan ustelkeriaren kontra borrokatze eta kontrolatze aldera jada ezarritako neurri administratiboak eta baliabide juridikoak ebaluatzen.

3. Honako hauek jasoko dira jarduketa bakoitzaren ebaluazio-txostenetan:

a) Bulegoak eskatuta edo gomendatuta egindako arau-aldaketak.

b) Errutinazko jardunbideetan edo ezarritako erabileretan Bulegoak proposatu eta onartu diren aldaketak.

c) Aurrekari administratiboei buruz proposatu eta onartutako aldaketak, kudeaketa eraginkor, garden eta ekitatibo bati eragiten ahal diotenak.

d) Emaitzen analisia.

e) Administrazio publikoekin harremana duten enpresa pribatuetan jardunbide egokiak ezartzea.

f) Jarduketa bakoitzean zehazten diren beste ebaluazio-adierazle batzuk.

9. artikulua. Babeseginkizuna

1. Nafarroako Foru Komunitateko jardunbide egokien aldeko eta ustelkeriaren kontrako bulegoak zainduko du foru lege honen 4. artikuluko 1, 2 eta 3. zenbakietan jasotako erakundeen zerbitzuko langileek beren eginkizunak legez ezarritako moduan bete ahal izan ditzatela.

2. Nafarroako Foru Komunitateko jardunbide egokien aldeko eta ustelkeriaren kontrako bulegoak zainduko du balizko ustelkeria-kasuak salatzen dituzten pertsonek ez dezaten jasan beren lan-inguruneko baldintzen okertzerik edo ezein kalte edo diskriminaziorik, halako moduan non ez baita interferentziarik eginen zigor arloko prozeduretan edo ikerketetan, eta betiere foru lege honetako 10. artikuluan ezarritako mugak kontuan hartuz. Bulegoaren zuzendariak agintari eskudunen aitzinean sustatuko ditu ekintza zuzentzaileak edo berrezarpenekoak, eta jasota utziko ditu urteko oroitidazkian.

3. Jardunbide egokien aldeko eta ustelkeriaren kontrako Bulegoak egiaztatu beharrekoak diren gertakari edo jokabideak salatu edo jakinarazten dituen pertsona orok lortzen ahal du, hala eskatuz gero, bere nortasunaren berri hirugarrenei ez ematearen konpromiso idatzia. Hartara, delako salatzaile edo informatzailearen datuak, bai eta hura identifikatzea ekar lezaketen xehetasunak ere, sekretupean gordeko dituzte Bulegoaren zerbitzuko langileek.

III. KAPITULUA. Mugak eta laguntza emateko betebeharra

10. artikulua. Mugak.

1. Edonola ere, Jardunbide egokien aldeko eta ustelkeriaren kontrako Bulegoaren eginkizunak beteko dira ezertan galarazi gabe Nafarroako Kontuen Ganberari, Nafarroako Arartekoari edo bestelako kontrol- eta fiskalizazio-erakunde batzuei dagozkienak.

2. Modu berean, Jardunbide egokien aldeko eta ustelkeriaren kontrako Bulegoak bere eginkizunak beteko ditu ezertan ere galarazi gabe agintaritza judizialari edo Fiskaltzari dagozkionak.

11. artikulua. Laguntza eman beharra.

Beren eginkizunak garatu ahal izateko, administrazio publikoek eta foru lege honetako 4. artikuluan adierazitako entitateek laguntza eman beharko diote Nafarroako Jardunbide egokien aldeko eta ustelkeriaren kontrako Bulegoari, honek behar duen orotan eta ikertzen ari den gertakariekin zerikusia duen orotan. Ildo horretan, eta kontuan hartuta jarduketen proportzionaltasunaren printzipioa, Bulegoak administrazio publiko edo/eta entitate horien bulegoetarako sarbidea eta haiek daukaten informazioa eskuratzeko bidea izanen du.

Jardunbide egokien aldeko eta ustelkeriaren kontrako Bulegoari laguntza emateko betebeharra daukaten pertsona fisiko edo juridikoek, publiko edo pribatuek, Bulegoaren eginkizunak betetzea eragozten badute edo hark eskatu dizkien txostenak, dokumentuak edo espedienteak hari emateko borondaterik eza agertzen badute, legeak ezarritako erantzukizuna izanen dute.

Jardunbide egokien aldeko eta ustelkeriaren kontrako Bulegoak laguntza emanen die eta lankidetzan arituko dira gardentasunaren, iruzurraren eta ustelkeriari aurre egitearen alorrean eskudun diren edo harenak bezalako eginkizunak dituzten autonomia erkidegoetako, estatuko, Europako edo/eta nazioarteko erakundeekin.

II. TITULUA. Ikerketa-prozedura

12. artikulua. Postontzia.

1. Bulegoak postontzi bat jarriko du, herritarrek kexak, salaketak edo iradokizunak aurkez ditzaten, agintariek, langileek eta goi-kargudunek foru lege honen 4.1 artikuluaren arabera izan ditzaketen jarduketa edo jokabideekin lotutakoak, betiere foru lege honen aplikazio-esparrukoak diren gaiei buruzkoak direnean.

2. Nafarroako Foru Komunitateko jardunbide egokien aldeko eta ustelkeriaren kontrako bulegoak kexa eta salaketa horiek aztertuko ditu, eta erabakiko du ea informazio-espedienterik abiarazten duen ofizioz, balizko erantzukizunak ezartzeko xedez. Ikerketa-espedienterik ez abiaraztea erabakiz gero, erabaki hori hartzeko oinarriei buruzko erantzun arrazoitua emanen zaio kexa edo salaketa aurkeztu duen partikularrari. Edonola ere, Bulegoak, urteko oroitidazkian, modu arrazoituan adieraziko du zenbat salaketa jaso dituen eta zeintzuk hartu diren aintzat eta zeintzuk ez.

3. Jardunbide egokien aldeko eta ustelkeriaren kontrako Bulegoak orobat baloratuko ditu iradokizunak, eta urteko oroitidazkian jasoko ditu, arrazoituta, horiek onartu diren ala ez.

4. Urteko txostena argitaratu eginen da, izaera pertsonaleko datuen babesari buruzko araudian jasotako printzipioak betez betiere.

13. artikulua. Abstentzioa eta errekusazioa.

1. Jardunbide egokien aldeko eta ustelkeriaren kontrako Bulegoko langileek administrazio prozedura erkidean ezarritako abstentzio- eta errekusazio-arrazoi berberak dituzte.

2. Abstentzioa nahiz errekusazioa idatziz planteatuko dira, haiek oinarritzen direneko arrazoia edo arrazoiak adierazita, eta zuzendariak ebatziko ditu, erabakiaren aurkako errekurtsoa paratzeko aukerarik gabe. Abstentzioa edo errekusazioa Bulegoaren zuzendariak edo hari aurkeztutakoa bada, zuzendariaren ondokoak ebatziko du.

I. KAPITULUA. Prozedura abiaraztea

14. artikulua. Abiaraztea.

1. Nafarroako Foru Komunitateko jardunbide egokien aldeko eta ustelkeriaren kontrako Bulegoaren jarduketak beti abiaraziko dira ofizioz, bulegoaren zuzendaritzak erabakita, bai haren ekimenez bai pertsona fisiko edo juridiko batek, publikoa nahiz pribatua, jarritako salaketa batengatik, edo beste organo edo erakunde publiko batek aurkeztutako eskari arrazoitu batengatik. Jarduketa horiek lotuko zaizkie objektibotasunaren, seriotasunaren, diskrezioaren, konfidentzialtasunaren, azkartasunaren eta errugabetasun-presuntzioaren printzipioei, besteak beste.

2. Agintariek, zuzendaritza-karguek, bulego publikoetako eta erakunde publikoetako arduradunek eta, oro har, eginkizun publikoak betetzen dituzten edo beren lana entitate eta erakunde publikoetan egiten dutenek iruzurrezko jardunbideak edo interes orokorraren aurkako jardunbide irregularrak izan daitezkeen gertakariak jakinarazi beharko dituzte, horien berri duten unetik bertatik, zigor arloko legedi prozesaleko berariazko jakinarazpen-betebeharrak gorabehera. Horretarako, bide egokiak ezarriko dira.

15. artikulua. Aurretiazko jarduketak.

1. Nafarroako Foru Komunitateko jardunbide egokien aldeko eta ustelkeriaren kontrako Bulegoak jarduketak abiarazi eta salaketak, jakinarazpenak edo eskabide arrazoituak artxibatu aitzin, egiazkotasun-azterketa eginen da salatu edo jakinarazi diren edo eskabidearen oinarrian dauden gertakariei edo jokabideei buruz. Egiazkotasunaren azterketa hori oinarritzeko, Jardunbide egokien aldeko eta ustelkeriaren kontrako Bulegoak informazio edo dokumentazio gehigarria eskatzen ahalko dio salaketa-egileari, eta jarduketak abiarazteari ezetza emateko ezin izanen du aitzakia hartu salaketa-egilearen esku ez dagoen eta Bulegoak berak lor dezakeen dokumentazioaren falta.

2. Jarduketak abiarazteko erabakia hartu aitzin, bai eta egiaztatze eta ikertze faseetan ere, Jardunbide egokien aldeko eta ustelkeriaren kontrako Bulegoa Nafarroako Foru Komunitatea osatzen duten administrazioen eta sektore publiko instrumentala osatzen duten entitateen edozein zentrotan bertaratzen ahalko da, behar diren datu guztiak egiaztatzeko, dokumentazioa edo espedienteak aztertzeko eta egoki deritzen elkarrizketa pertsonal guztiak egiteko.

3. Foru lege honetako 4. artikuluan ezarritako jarduketa-eremuko entitate publiko eta pribatu guztiak behartuta daude Jardunbide egokien aldeko eta ustelkeriaren kontrako Bulegoari ematera haren eginkizunak betetzeko beharrezkoa den informazio guztia. Informazio hori aurretiaz ezarritako betebehar bat izanen da, edo arrazoiturik eta helburua adierazita errekeritutako betebehar bat; eta ezin izanen da erabili beste helburu baterako. Informazio erreserbatuaren izaera izanen du, eta dokumentazioa bere jatorrira itzuliko da hura erabiltzeko premia bukatzen denean.

16. artikulua. Epeak.

Prozedura abiarazteko edo artxibatzeko erabakia, pertsona fisiko edo juridiko baten edo organo edo erakunde publikoen salaketa edo jakinarazpen baten ondoriozkoa, gehienez bi hilabeteko epean hartu beharko da, salaketa edo jakinarazpena Nafarroako Foru Komunitateko jardunbide egokien aldeko eta ustelkeriaren kontrako Bulegoari aurkezten zaionetik aitzina.

17. artikulua. Salaketak eta jakinarazpenak.

Salaketak edo jakinarazpenak Nafarroako Foru Komunitateko jardunbide egokien aldeko eta ustelkeriaren kontrako Bulegoari zuzenduko zaizkio, eta idatziz egin beharko dira. Edozein unetan egiten ahalko dira, are gertakariak edo inguruabarrak lehenago hasi edo gertatu badira ere.

18. artikulua. Ez izapidetzeko kasuak.

1. Nafarroako Foru Komunitateko jardunbide egokien aldeko eta ustelkeriaren kontrako bulegoak artxibatu eginen ditu pertsona fisiko edo juridikoek, organo edo erakunde publikoek aurkeztutako salaketa, jakinarazpen edo eskaera arrazoituak, baldin eta funsgabeak badira edo, kasua bada, salaketaren edo jakinarazpenaren sendotasunari eragiten dioten akatsak edo gabeziak zuzentzeko errekerimenduaren ostean osatzen ez badira.

2. Artxiboa interesdunari idazki arrazoitu bidez jakinaraziko zaio eta, kasua bada, bere eskubideak baliarazteko bide egokiak adieraziko zaizkio.

3. Baldin eta salaketak edo jakinarazpenak Nafarroako Foru Komunitateko jardunbide egokien aldeko eta ustelkeriaren kontrako Bulegoa ez den besteren batean aurkezten badira, Bulegoari gehienez ere zazpi eguneko epean igorriko zaizkio. 16. artikuluan adierazitako epeak ez dira zenbatzen hasiko harik eta salaketa edo jakinarazpena Bulegoan jaso arte.

19. artikulua. Abiarazteko erabakia.

1. Nafarroako Foru Komunitateko jardunbide egokien aldeko eta ustelkeriaren kontrako Bulegoari dagokio prozedura hau abiarazteko erabakia hartzea, eta interesdunei jakinaraziko zaie.

2. Erabakiak honako hauek jasoko ditu gutxienez ere:

a) Prozeduraren instruktorearen izendapena.

b) Prozedura abiaraztea eragin duten gertakariak.

c) Prozedura ebazteko organo eskuduna.

d) Prozeduran alegazioak aurkezteko eta entzuna izateko eskubideari eta horretarako epeei buruzko oharra, adierazita ezen, prozedura abiarazteko erabakiaren edukiari buruzko alegaziorik ezarritako epean egin ezean, eduki hori erabaki-proposamentzat hartzen ahalko dela egotzitako erantzukizunari buruzko adierazpen zehatz bat jasotzen duenean.

II. KAPITULUA. Izapidetze-prozedura

20. artikulua. Izapidetzea

1. Prozedura abiaraztea erabakita, Nafarroako Foru Komunitateko jardunbide egokien aldeko eta ustelkeriaren kontrako Bulegoak gertakariak argitzeko kasuko ikerketa sustatuko du. Administrazio prozedura erkideari buruzko araudi indardunean ezarritakoarekin bat izapidetuko da, eta, betiere, Administrazio Publikoen Administrazio Prozedura Erkidearen urriaren 1eko 39/2015 Legean ezarritakoa bete beharko da; lege horrek prozedura guztien izapidetze elektronikoa ezartzen du, prozeduraren hasieratik azkeneraino.

Bulegoan ikerketa eta ikuskaritza-eginkizunak esleiturik dauzkaten langileek agintari izaera edukiko dute froga-ondorioetarako, eta honako hauek egiten ahalko dituzte:

a) Bertaratzea, agintari edo Bulegoko agente izaera frogatuz, administrazio edo entitate publikoen edozein bulegotan edo zerbitzu publiko bati atxikitako zentroan, foru lege honen esparruaren barruan, informazioa eskatzeko, egiaztapenak in situ egiteko eta dokumentuak, espedienteak, liburuak, erregistroak, kontabilitatea eta datu-baseak aztertzeko, zein ere den horiek grabatuta dauden euskarria, bai eta erabilitako ekipoak ere.

b) Egoki iritzitako elkarrizketa pertsonalak egitea, bai kasuko egoitza administratiboan, bai Bulegoaren egoitzan. Elkarrizketatuek eskubidea dute beraiek izendatutako pertsonaren laguntza izateko, baita abokatu batena ere.

c) Eskuratzea, legedi indardunak horretarako modua ematen duen neurrian, banku-entitateen kontu korronteei buruzko informazioa, kasuko errekerimendua eginez, baldin eta horietan egin ahal izan bada kontratu publikoen esleipen prozedurekin lotutako ordainketarik edo funts-xedapenik edo diru-laguntza publikoen ematerik.

d) Erabakitzea, jaso daitezkeen datuen kaltegabetasuna bermatze aldera, lortutako dokumentuen fotokopia kautotuak egin daitezen, zein ere den haiek biltegiratuta dauden euskarria.

e) 1. zenbakiko a) apartatutik d) apartatura bitartean aipatzen diren jarduketa guztiak errugabetasun-presuntzioaren printzipioa eta defentsarako oinarrizko eskubidea zorrotz errespetatuz gauzatu beharko dira, babesgabetasunik eragin gabe.

2. Salatuak edo haren nagusiek erantzun idatzia emateari ezetza ematen badiote edo justifikaziorik gabe berandutzen badira, Jardunbide egokien aldeko eta ustelkeriaren kontrako Bulegoak bere ikerketa-jarduketarako jokabide oztopatzaile gisa hartu ahalko du hori. Eta jasota utziko du bere urteko oroitidazkian, kasuko zehapena ezarri nahiz ez ezarri.

21. artikulua. Iraungitzea.

Nafarroako Foru Komunitateko jardunbide egokien aldeko eta ustelkeriaren kontrako Bulegoaren ikerketa-jarduketek ezin izanen dute iraun sei hilabete baino gehiago, ikerketa abiarazteko erabakia hartzen denetik aitzina, salbu eta kasuaren konplexutasuna dela-eta epe hori luzatzea komeni bada; edonola ere, luzatzeko erabaki hori espresuki eta arrazoituz hartu beharko da, eta gehienez ere beste sei hilabeterakoa izanen da.

22. artikulua. Datuen erreserba.

1. Nafarroako Foru Komunitateko jardunbide egokien aldeko eta ustelkeriaren kontrako Bulegoaren jarduketek denik eta erreserbarik gorena ziurtatu beharko dute betiere, ikertutako pertsonarentzako edo entitatearentzako kalteak ekiditeko eta jarduketa horien ondorioz abiaraz litekeen prozedura jurisdikzionalaren edo administratiboaren eraginkortasuna babesteko.

2. Jardunbide Egokien aldeko eta Ustelkeriaren Kontrako Bulegoak ezin du izaera pertsonaleko daturik zabaldu, ezta beste pertsona edo erakunde batzuei jakinarazi ere, datu horiek ez badira, xedapen indardunekin bat, pertsona edo erakunde horiek beren eginkizunak direla-eta ezagut ditzaketenak. Eta datu horiek ezin izanen ditu erabili foru lege honetakoak ez diren beste xede batzuetarako.

Betebehar hori ez betetzeak berekin ekarriko du barne-ikerketa bat abiaraztea eta, bidezkoa izanez gero, diziplina- edo zehapen-espedientea hastea, kasuan kasukoa.

3. Izaera pertsonaleko datuen babesari buruzko araudi indardunaren arabera tratatuko dira izaera pertsonaleko datuak.

23. artikulua. Ebazpena.

1. Izapidetzea bukatutakoan, instrukzioaz arduratzen den pertsonak honako hauek ebazten ahalko ditu:

a) Prozedura amaitzea, jarduketak artxibatuta, ebazpen-proposamenik egin beharrik gabe.

b) Zehapen-prozedura bat abiaraztea, foru lege honetan xedatuarekin bat.

c) Abiarazitako jarduketa guztiak Fiskaltzari igortzea, baldin eta, Nafarroako Foru Komunitateko jardunbide egokien aldeko eta ustelkeriaren kontrako Bulegoak hasitako ikerketaren ondorioz, Bulegoak ondorioztatzen badu ustez delitu izan daitezkeen jokabideak edo gertakariak izan direla.

d) Kontuen Auzitegiaren jurisdikzioari berri ematea, Kontuen Ganberari buruzko 19/1984 Foru Legean ezarritako bidetik, baldin eta ikerketetatik balizko kontabilitate-erantzukizun bat, zuzena nahiz subsidiarioa, ondoriozta badaiteke.

e) Xedapenak, hala nola erregelamenduak, zirkularrak eta jarraibideak, taxutzea edo aldatzea proposatzea, bere eskumenaren esparruan.

f) Gomendio arrazoituak zuzentzea administrazioei eta entitate publikoei, irizpideak aldatu, deuseztatu eta gehitzeko iradokizunarekin, hobetzeko modukoak diren disfuntzio edo praktika administratiboak saihesteko xedez, detektaturiko jokabide irregularren kasuetan eta arrisku-alorretan.

2. Bulegoaren zuzendariak, instrukzioaz arduratzen den pertsonaren ebazpen-proposamena ikusita, ebazpen arrazoitua eman beharko du hamar eguneko gehieneko epean, ebazpen-proposamena jasotzen denetik aitzina.

III. KAPITULUA. Salaketa-egilearen babesa eta dokumentu erreserbatuak

24. artikulua. Salaketaegilearen babesa.

1. Nafarroako Foru Komunitateko jardunbide egokien aldeko eta ustelkeriaren kontrako Bulegoaren jardunak arreta berezia jarriko du foru lege honen bidez babestu nahi diren ondasunen eta printzipioen balizko urraketa-kasuak salatzen dituzten pertsonak babesteko. Halatan, Bulegoa arduratuko da pertsona horiek ez dezaten paira bakartzerik, jazarpenik edo beren lan-inguruneko baldintzen okertzerik, eta ez dezaten arriskurik izan beren herritar-jokabidearen ondorioz inolako kalterik edo diskriminaziorik pairatzeko.

2. Salaketa-egileak babestuta egon behar du iruzurra edo ustelkeria izan daitekeela uste duen gertakari bat salatzean izan duen herritar-jokabidearen ondorioz jasan lezakeen kalte ekonomiko eta moralaren aitzinean, diskriminazio ororen aitzinean eta bere lantokiko edo lanbide-esparruko baldintzen okertze ororen aitzinean. Hartara, pertsona horrek bere anonimotasuna gordetzen ahalko du, eta Nafarroako Foru Komunitateko jardunbide egokien aldeko eta ustelkeriaren kontrako Bulegoak ezin izanen dizkie haren datuak ezagutzera eman ez ukitutako administrazio, entitate edo funtzionarioari, ez hirugarrenei ere; halere, hori guztia ez da eragozpen izanen epaileak beharrezkoak diren babes-neurriak har ditzan ikertutako gertakariak delitua izan badaitezke. Kasu horretan, Bulegoak berak hartutako balizko neurrien berri emanen du.

3. Bulegoak jakiten badu salaketa-egileak, zuzenean edo zeharka, beldurrarazte- edo errepresalia-egintzarik pairatu duela salaketa jartzeagatik, zilegi izanen du bidezkotzat jotzen dituen neurri zuzentzaileak eta egoera lehengoratzekoak hartzea, eta urteko oroitidazkian horien berri emanen du. Kasu bakoitzaren inguruabarrak aintzat hartuta eta betiere salatzailearen ekimenez, Bulegoak organo eskuduna premiatu ahalko du hura beste lanpostu batera alda dezan. Horretarako, Bulegoak beharrezkoa den aholkularitza emanen dio salaketa-egileari.

4. Babesa ikerketa-prozedura amaitu eta gero ere mantendu ahalko da, betiere era arrazoituan. Salaketaren xede ez diren gertakizunengatik izan ditzakeen erantzukizunetatik ez dio ezein kasutan salbuespenik ekarriko babes horrek.

5. Arestian ezarritakoa ez da aplikatuko baldin eta salaketan adierazi eta emandako informazioa faltsua, lardaskatua edo modu ez-zilegian lortutakoa bada. Halakoetan, Bulegoak zilegi izanen du, aldez aurretik salaketa-egileari isilpean entzutea emanda, salaketa artxibatzea konfidentzialtasuna gordez, eta salaketa-egilea ohartaraziko du ezen salaketa hori publiko egiten badu ez zaiola emanen foru lege honetan ezarritako babesa, eta erantzukizun diziplinario edo penalak izan ditzakeela salaketa faltsuaren egileak.

25. artikulua. Informazioaren tratamendua.

Ukitutako edozein pertsonak ikerketa batean zehar bere lekukotasunaren nahiz bere laguntza pertsonalaren bidez eman dezakeen informazioak erreserbatu izaera edukiko du.

III. TITULUA. Beste erakunde eta entitate batzuekiko lankidetza

26. artikulua. Kontuen Ganbera eta Nafarroako Arartekoa

1. Beharrezkoa denean, Jardunbide Egokien aldeko eta ustelkeriaren kontrako Bulegoak laguntza eskatuko die, Nafarroako Parlamentuaren Mahaiaren bidez, Kontuen Ganberari edo Nafarroako Arartekoari. Halaber, Bulegoak bere txosten guztien kopia igorriko die Kontuen Ganberari eta Nafarroako Arartekoari.

2. Urtero, urtarrilaren 31 baino lehen, Jardunbide egokien aldeko eta ustelkeriaren kontrako Bulegoak Nafarroako Arartekoari eta Kontuen Ganberari jakinaraziko die urteko bere jarduketa-plana, balizko bikoiztasunak eta interferentziak ekiditeko xedez.

27. artikulua. Nafarroako Parlamentua.

Nafarroako Foru Komunitateko jokabide onen aldeko eta ustelkeriaren aurkako Bulegoak Parlamentuarekin lankidetzan jardunen du foru lege honen 7.2 artikuluan ezarritako moduan.

28. artikulua. Beste erakunde batzuk.

Nafarroako Foru Komunitateko jardunbide egokien aldeko eta ustelkeriaren kontrako Bulegoa beste erakunde edo entitate publiko edo pribatu batzuekin lankidetzan arituko da, iruzurra eta ustelkeria prebenitu eta borrokatzeko.

29. artikulua. Gizarte zibila.

Nafarroako jardunbide egokien aldeko eta ustelkeriaren kontrako Bulegoak gizarte zibilarekiko topaguneak eta trukerako guneak sustatuko ditu aldian-aldian, haren ekarpenak jasotzeko.

IV. TITULUA. Jardueratik heldutakoa

I. KAPITULUA. Kontuak ematea

30. artikulua. Urteko oroitidazkia.

1. Nafarroako Foru Komunitateko jardunbide egokien aldeko eta ustelkeriaren kontrako Bulegoak urtero kontu emanen du egin duen jarduerari buruz, oroitidazki edo txosten bat eginez, zeinetan jasoko baititu Bulegoak prebentzioaren, ikerketaren, ebaluazioaren eta babesaren arloko bere eginkizunak direla-eta egindako ekintzak, bai eta egin dituen prestakuntza eta aholku-emate bereziko ekintzak ere.

Oroitidazki horretan jasoko dira, gutxienez ere, aurkeztutako salaketen kopurua eta izaera, bai eta ikerketaren xede izan direnena eta horien emaitza, zehaztuta zer iradokizun edo gomendio egin zaion Administrazioari eta zenbat prozedura abiarazi diren Bulegoaren ekimenez, bai administrazio-izaerakoak bai izaera judizialekoak, sektore publikoko langileen eta kargu publikoen aurka. Txostenean orobat jasoko dira ikuskariek idatziz adierazitako desadostasunak eta prestatzaileek egindako ebaluazioak eta proposatutako arau-aldaketak.

2. Txostenean ez da jasoko ikerketa-prozeduran interesa dutenak publikoki identifikatzea ahalbidetzen duen datu eta aipamen pertsonalik, ikerketa abian den bitartean. izaera pertsonaleko datuak tratatuko dira izaera pertsonaleko datuen babesari buruzko araudi indardunaren arabera.

3. Nafarroako Foru Komunitateko jardunbide egokien aldeko eta ustelkeriaren kontrako Bulegoko zuzendariak urteko txostenaren laburpen bat azalduko dio Parlamentuari, Legebiltzarreko Erregelamenduan ezarritako moduan.

31. artikulua. Herritarrei kontu ematea.

Nafarroako Foru Komunitateko jardunbide egokien aldeko eta ustelkeriaren kontrako Bulegoak herritarrei kontu emanen die administrazioetako eta foru lege honetako 4. artikuluan adierazitako gainerako entitateetako iruzurrari eta ustelkeriari buruzko politikak eta jardunbideak prebenitu, ikertu eta ebaluatzearen arloan egindako kudeaketa dela-eta. Horretarako, herritarrak behar bezala informatuta egon ahal izan daitezen behar adina baliabide erabiliko ditu. Bere jardunaren emaitzak hedabideei emanen dizkie, eta gizarte zibilarekiko topaketak antolatuko ditu, bere jardunaren eta egindako jarduketen emaitzen berri hari zuzenean emateko, bidean aurkitutako zailtasunak edo errezeloak adieraziz.

II. KAPITULUA. Gomendioak eta irizpenak

32. artikulua. Gomendioak.

Gomendio izaera edukiko dute Bulegoak ofizioz nahiz 4. artikuluan adierazitako subjektuetako edozeinek eskatuta egindako proposamenek, zeinen bidez bilatzen baita arrisku-egoerak edo jokabide desegoki edo zintzotasunaren aurkakoak hobetzea. Alde batek eskatuta egindako eskariak Nafarroako Parlamentuko Mahaiaren bidez bideratuko dira.

V. TITULUA. Giza baliabideak eta baliabide materialak

I. KAPITULUA. Bulegoaren zuzendaritza

33. artikulua. Nafarroako Foru Komunitateko jardunbide egokien aldeko eta ustelkeriaren kontrako Bulegoaren zuzendaritza hautatzea, izendatzea, bateraezintasunak eta karguuztea.

1. Jardunbide egokien aldeko eta ustelkeriaren kontrako Bulegoak zuzendari bat edukiko du, bere karguan erabateko independentziaz eta objektibotasunez jardunen dena Bulegoaren berezko eginkizunak betetzean eta haren berezko eskumenen esparruan, eta legedi indardunari men eginez jardunen da beti.

2. Zuzendaria ezin izanen da afiliatuta egon inolako alderdi politiko, sindikatu edo elkarte profesional edo enpresa-elkartetan.

3. Zuzendariaren agintaldia sei urtekoa izanen da, Nafarroako Parlamentuak hautatzen duenetik zenbatuta, eta ezin izanen da berriz ere hautatua izan lanpostua utzi duenetik gutxienez ere sei urte igaro arte.

4. Zuzendaria Nafarroako Parlamentuak hautatuko du, beren eskubide zibil eta politikoen gaineko erabilmen erabatekoa duten eta karguan jarduteko behar diren egokitasun-, sustraitze-, zintzotasun- eta profesionaltasun-baldintzak betetzen dituzten adin nagusiko herritarren artetik. Goi mailako unibertsitate tituluaren jabe izan beharko du eta hamar urte baino gehiagoko lan-jarduera edo jarduera profesionala eduki, bete beharreko lanpostuarekin zerikusia duena. Halaber, nafartasun politikoa izan behar du.

5. Kargurako hautagaiak talde parlamentarioek edo beren jarduera Nafarroako Foru Komunitatean garatzen duten gizarte-erakundeek proposatuko dizkiote Nafarroako Parlamentuari.

6. Bulegoaren zuzendaria Nafarroako Parlamentuko Osoko Bilkurak hautatuko du, gehiengo osoz.

7. Nafarroako Parlamentuko lehendakariak izendatuko du Jardunbide egokien aldeko eta ustelkeriaren kontrako Bulegoaren zuzendaria, zeinak karguaren jabetza hartuko baitu izendapena Nafarroako Aldizkari Ofizialean argitaratu eta hilabeteko epean.

8. Jardunbide egokien aldeko eta ustelkeriaren kontrako bulegoaren titularrak eskumen osoa edukiko du Bulegoaren gobernuari, barne araudiari eta bere zerbitzuko langileei dagokienez. Eskumen horiek beteko ditu titulu honetan ezarritakoarekin bat eta, ordezko izaeraz, Nafarroako Administrazio Publikoen zerbitzuko Langileen Estatutuaren Testu Bateginean ezarritakoarekin bat.

9. Jardunbide egokien aldeko eta ustelkeriaren kontrako bulegoko zuzendariaren urteko ordainsaria izanen da Nafarroako Aurrekontu Orokorretan Departamentuen zuzendaritza nagusietarako finkatzen den verbera Nota de Vigencia

34. artikulua. Bateraezintasunak.

1. Bateraezinak dira Nafarroako Foru Komunitateko jardunbide egokien aldeko eta ustelkeriaren kontrako bulegoaren zuzendari kargua eta beste ordezkaritza-kargu, kargu politiko edo administrazio-eginkizun oro, lanbide-, merkataritza- edo lan-jarduera oro, bai eta zuzendaritza- edo aholkularitza-kargu oro ere.

2. Zuzendariak eginkizun horretarako arduraldi esklusiboa izanen du eta kargu publikoen bateraezintasunei buruzko araubidearen mende egonen da.

3. Bulegoaren zuzendaria bateraezintasun-egoeraren batean eroriz gero, jarduera bateraezin hori utzi beharko du izendatu ondoko hilabetean eta karguaren jabetza hartu baino lehen. Hori egin ezean, izendapena onartzen ez duela ulertuko da. Ezusteko bateraezintasun-kasuan, hilabeteko gehieneko epean erregularizatu beharko du bere egoera.

4. Parlamentuko Mahaiak, Eledunen Batzarrari entzun ondoren, zehaztuko du zein izanen den Bulegoaren zuzendaritza uki dezaketen bateraezintasun-egoerei buruzko zalantzak edo gatazkak ebazteko batzorde eskuduna.

35. artikulua. Karguuztea.

1. Nafarroako Foru Komunitateko jardunbide egokien aldeko eta ustelkeriaren kontrako Bulegoaren zuzendariak honako arrazoi hauetakoren batengatik utziko du kargua:

a) Karguari uko egin edo hilez gero.

b) Agintaldia bukatzeagatik.

c) Ezusteko bateraezintasunagatik.

d) Ebazpen judizial irmo baten bidez deklaratutako ezgaitasun zibilagatik.

e) Eskubide politikoak baliatzeko desgaikuntzagatik, ebazpen judizial irmo baten bidez deklaratua.

f) Kautelazko neurriekin batera eginiko inputazioa izateagatik, ahozko judizioa hasteagatik edo delitua egiteagatiko epai irmoz emandako kondenagatik.

g) Karguaren betebeharrak betetzean erakutsitako zabarkeria nabarmen eta astunagatik.

h) Nafartasun politikoa edo eskubide zibil edo politikoen erabilmen erabatekoa galtzeagatik.

2. Arrazoia baldin bada 1. zenbakiko g) letran ezarritakoa, Parlamentuko kasuko batzordeak proposatu behar du zuzendariaren kargu-uztea, eta zuzendaritzaren titularrak eskubidea izanen du batzorde horretara joateko eta hitza hartzeko. Kargu-uztea Nafarroako Parlamentuko Osoko Bilkurak erabaki beharko du, botoen hiru bostenen gehiengoarekin. Gainerako kasuetan, Nafarroako Parlamentuko lehendakariari dagokio kargu-uztea erabakitzea.

3. Zuzendariak kargua utzi ondoren, beste bat izendatzeko prozedura abiaraziko da. Kargua uzteko arrazoia baldin bada 1. apartatuko b) letran ezarritakoa, zuzendaritzaren titularrak jardunean jarraituko du bere karguan, harik eta zuzendari berria izendatu arte. Gainerako kasuetan, zuzendariaren ondokoak hartuko du bere gain zuzendaritza, zuzendari berria izendatu arte.

36. artikulua. Nafarroako Foru Komunitateko jardunbide egokien aldeko eta ustelkeriaren kontrako Bulegoaren zuzendaritzaren eginkizunak.

1. Zuzendaritzak eginkizun hauek izanen ditu:

a) Nafarroako Foru Komunitateko jardunbide egokien aldeko eta ustelkeriaren kontrako Bulegoa ordezkatzea.

b) Bulegoaren jardueren urteko oroitidazkia, bai eta Bulegoak egiten dituen txosten bereziak ere, Parlamentuari aurkeztea eta informatzea.

c) Bulegoaren ikerketa-arloko politikaren lehentasunak urtero ezartzea eta, argitaratu aitzin, Nafarroako Parlamentuko Mahaiari, Arartekoari eta Kontuen Ganberari igortzea, horien berri izan dezaten eta koordinatzearren.

d) Bulegoaren eginkizunak betetzean gertatzen diren gorabehera larri guztiak Parlamentuari jakinaraztea.

e) Aholkularitza eta kontroleko barne-prozedura ezartzea, legezkotasunaren jarraipena barne, pertsonen prozedura-bermeekiko eta funtsezko eskubideekiko errespetuari dagokionez, besteak beste.

f) Egin beharreko lanak jardunbide egokien aldeko eta ustelkeriaren kontrako Bulegoko langileen artean banatzea.

g) Jardueren eta interesen erregistroa kudeatzea.

h) Langileen goi-mailako buruzagi izatea, haien jarduketen zuzendaritza- eta koordinazio-lana eginez, bai eta haien izendapena eta kontratazioa eginez ere.

i) Barne araubidearekin eta gobernuarekin lotutako arlo guztiak antolatzearen eta haien zuzendaritza egitearen arloan dituen ahalmenak betetzea, bai eta Bulegoaren berezko gastuak baimentzea eta ordainketak agintzea ere.

j) Nafarroako Foru Komunitateko jardunbide egokien aldeko eta ustelkeriaren kontrako Bulegoaren urteko aurrekontua prestatzea.

k) Ikerketa batean independentzia eta objektibotasuna arriskuan jar daitezkeenean langileekin eta langileen artean gerta daitezkeen interes-gatazkak ebaztea.

l) Jendeari emandako informazio guztia modu neutral eta inpartzialean ematen dela eta horren dibulgazioa ikerketen konfidentzialtasuna errespetatuz egiten dela bermatzea.

m) Bulegoko langileen errekusazioari eta abstentzioari buruz jasotako eskaerak ebaztea.

n) Foru lege honetako manuak haustegatiko zehapenak ezartzea.

o) Foru lege bidez ematen zaion gainerako edozein eginkizun, kontratu publikoei buruzko legedia betez.

2. Zuzendariak ahalmen eta gaitasun tekniko frogatuko pertsona bat izendatzen ahalko du, jardunbide egokien aldeko eta ustelkeriaren kontrako Bulegoko langile ez-administrarien artetik, zuzendariaren ondoko kargurako, zeinari aplikatuko baitzaizkio zuzendariari dagozkion hautagarritasun eta bateraezintasun baldintzak. Zuzendariaren ondokoari dagozkio Bulegoaren zuzendariari laguntzea hark agintzen dizkion eginkizunetan, hura ordezkatzea aldi baterako absentzia edo ezgaitasun kasuan eta legearekin bat hark eskuordetzen dizkion eginkizunak bere gain hartzea.

II. KAPITULUA. Bulegoaren zerbitzuko langileak

37. artikulua. Izendapena, printzipioak, bateraezintasunak eta karguuztea.

1. Administrazio publikoetako funtzionarioek edo/eta horretarako hautatutako langileek beteko dituzte Nafarroako Foru Komunitateko jardunbide egokien aldeko eta ustelkeriaren kontrako Bulegoaren lanpostuak, lanpostu bakoitzari esleitutako eginkizunen izaeraren arabera. Langile horiek behartuta daude beren eginkizuna betetzean jakiten dituzten izaera pertsonaleko datuen sekretua gordetzera, baita kargua utzi ondoren ere.

2. Bulegoaren zerbitzuko langileak hautatuko dira berdintasunaren, publizitatearen, merezimenduen eta esleitutako eginkizunaren araberako gaitasunaren printzipioen arabera, Nafarroako Administrazio Publikoen zerbitzuko Langileen Estatutuak ezartzen duen moduan.

3. Lanpostuen zerrenda Bulegoko zuzendariak onetsiko du.

4. Bulegoari atxikitako langileek behar bezalako gaitasun teknikoa eta prestakuntza etengabea izan dezaten, hezkuntzako hitzarmenak, akordioak edo protokoloak sinatzen ahalko dira unibertsitateekin edo goi mailako beste edozein hezkuntza-entitaterekin eta izaera bertsuko bulegorekin, horiek autonomia erkidego batekoak, estatukoak, Europar Batasunekoak edo nazioartekoak izan.

38. artikulua. Ikuskariak.

1. Jardunbide egokien aldeko eta ustelkeriaren kontrako Bulegoaren ikuskariak oposizio-lehiaketa bidez hautatuko dira, goi mailako titulazioa daukaten pertsonen artetik.

2. Ikuskariek agintari-izaera edukiko dute, egiaztatzen eta kasuko lege-baldintzak betez formalizatzen dituzten dokumentuetan jasotako gertakarien egiazkotasunaren presuntzioaren ondorioetarako.

3. Ikuskariari zuzendariaren bateraezintasun-arrazoi berberak aplikatuko zaizkio.

39. artikulua. Ikuskariaren eginkizunak.

1. Ikuskaria da, espezializazioaren eta lan-banaketaren printzipioen arabera, ikerketa-, ikuskaritza- eta, dagokion neurrian, prebentzio-organoa.

2. Ikuskariaren eginkizunak dira:

a) Foru lege honetako 7. artikuluan aipatzen den ikerketa-eginkizuna.

b) Bulegoaren zuzendariari ikerketa-txostenak eta horien balizko ondorioztapenak proposatzea, azter eta onets ditzan.

c) Zuzendariari helaraztea bere lana hobeki egiteko beharrezkotzat jotzen dituen proposamenak.

d) Zuzendariak esleitutako lana planifikatzea.

e) Zuzendariak esleitzen ahal dizkion guztiak.

3. Desadostasunik baldin badago ikuskari batek egin duen ebazpen- edo-txosten proposamenaren eta behin betiko ebazpenaren edo txostenaren artean, ikuskariak idatziz jasotzen ahalko du desadostasun hori, eta txosten edo ebazpenean eranskin gisa gehitzen ahalko du.

40. artikulua. Prestatzailea/aholkularia.

1. Lizentziatu bat egonen da, gutxienez ere. Bera izanen da jardunbide egokien aldeko eta ustelkeriaren kontrako Bulegoaren prestakuntza eta ebaluazio arloaren arduraduna, eta oposizio-lehiaketa bidez izanen da hautatua, goi mailako titulazioa daukaten pertsonen artetik.

2. Prestatzaile/aholkulariari zuzendariaren bateraezintasun-arrazoi berberak aplikatuko zaizkio.

41. artikulua. Prestatzailearen eginkizunak.

1. Prestatzailea da, espezializazioaren eta lan-banaketaren printzipioen arabera, ebaluatzearen, prestatzearen eta, dagokion neurrian, prebentzioaren arduraduna.

2. Honako hauek dira prestatzailearen eginkizunak:

a) Jardunbide okerren eta ustelkeriaren aurkako borroka- eta prebentzio-neurrien eraginkortasuna kontrolatu eta ebaluatzea.

b) Jardunbide irregularren prebentzioaren eta jardunbide egokien arloko prestakuntza- eta sentsibilizazio-politikak taxutzea, bai eta ebaluazio-adierazleak taxutzea ere, bai administrazio publikoentzat edo haien mendeko entitateentzat, bai entitate pribatuentzat.

c) Zuzendariari helaraztea bere lana hobeki egiteko beharrezkotzat jotzen dituen proposamenak.

d) Zuzendariak esleitutako lana planifikatzea.

e) Jardunbide egokien aldeko eta ustelkeriaren kontrako Bulegoaren zuzendariak esleitzen ahal dizkion guztiak.

42. artikulua. Bulegoko langileak:

Nafarroako jardunbide egokien aldeko eta ustelkeriaren kontrako Bulegoak bere eginkizunak bete ahal izateko beharrezkoak diren langileak –teknikariak, administrariak, laguntzaileak eta mendekoak– edukiko ditu. Langileak oposizioz edo oposizio-lehiaketa bidez hautatuko dira.

III. KAPITULUA. Baliabide materialak eta finantzaketa

43. artikulua. Aurrekontua eta kontabilitatea

1. Jardunbide egokien aldeko eta ustelkeriaren kontrako Bulegoak esleitu zaizkion eginkizunak eraginkortasunez betetzeko beharrezkoak eta egokiak diren baliabide ekonomikoak eduki behar ditu.

2. Nafarroako Foru Komunitateko jardunbide egokien aldeko eta ustelkeriaren kontrako Bulegoaren funtzionamendurako beharrezkoa den zuzkidura ekonomikoak partida bat edukiko du, berariazko izendapenarekin, Nafarroako aurrekontu orokorretan.

3. Jardunbide egokien aldeko eta ustelkeriaren kontrako Bulegoaren zuzendaritzak bere aurrekontu-proiektua eginen du.

4. Bulegoaren aurrekontua Nafarroako Foru Komunitateko sektore publikoko entitateei buruzko araudiaren mendekoa da.

5. Bulegoaren kontabilitatea kontabilitate publikoaren printzipioei eta baimen, xedapen, obligazio eta ordainketa sistemari dago lotuta, aurrekontu-kontrola ziurtatze aldera.

6. Jardunbide egokien aldeko eta ustelkeriaren kontrako Bulegoaren ondare- eta kontratazio- araubidea, zeina bere organo berekien bidez beteko baita, Foru Komunitateko Administraziorako araubidea bera izanen da.

44. artikulua. Kanpo kontratazioak

1. Nafarroako Foru Komunitateko jardunbide egokien aldeko eta ustelkeriaren kontrako Bulegoak zilegi izanen du kontrolaren xede diren arloetan espezialista eta peritu edo aditu direnen zerbitzuak kontratatzea. Egiten diren kontratuak Nafarroako kontratu publikoei buruzko legediari egonen dira lotuta.

2. Zerbitzu espezializatu horiek Bulegoko gainontzeko langileek bete beharreko zintzotasun, neutraltasun, erantzukizun, inpartzialtasun eta konfidentzialtasun araubide berari lotuta egonen dira.

IV. KAPITULUA. Funtzionamendua

45. artikulua. Ikuskaritza.

Foru lege honetan ezarritako araudiarekin bat eta, ordezko izaeraz, administrazio prozedura erkideari buruzko araudi indardunarekin bat izapidetu eta bideratu beharko du ikuskaritzak ikerketa-espediente oro.

46. artikulua. Prestakuntza eta prebentzioa.

1. Prestatzaileak eginen ditu prestakuntza- eta ebaluazio-eginkizunak.

2. Prebentzio-eginkizuna ikuskari batek edo prestatzaile batek eginen du, edo bi teknikarien arteko lankidetzaren bidez eginen da. Prestatzailearen eta ikuskariaren arteko lankidetza ezartzen baldin bada, jardunbide egokien aldeko eta ustelkeriaren kontrako Bulegoak izendatuko du arduraduna.

VI. TITULUA. Zehatzeko ahalmena

47. artikulua. Erantzukizuna.

Arau-hausteen erantzule dira, baita ez-betetze soilaren mailan ere, foru lege honetan tipifikatutako egite edo ez-egiteetan erortzen diren agintariak, zuzendaritza-kargudunak eta 4. artikuluan adierazitako entitateen zerbitzuko langileak.

48. artikulua. Tipikotasuna.

1. Zehatzeko moduko arau-hausteak dira foru lege honetan halakotzat tipifikatuta dauden dolozko edo erruzko egite edo ez-egiteak.

2. Arau-hausteak oso astunak, astunak eta arinak izan daitezke.

49. artikulua. Arauhauste motak.

1. Arau-hauste oso astunak:

a) Aurreikusitako lankidetza aktiborako edo informazio-helarazpeneko betebeharrak ez betetzea, lehendabiziko atzerapen baten ondoren eta inongo justifikaziorik gabe jardunbide egokien aldeko eta ustelkeriaren kontrako Bulegoaren errekerimendu espresa aintzat hartu gabe utzi denean.

b) Salaketa-egilearen babesean ez laguntzea.

c) Ikerketak dirauen bitartean informazioa ezkutuan kanporatzea.

d) Bulegoak ikertu beharreko jarduerak, ageri-agerian faltsuak direnak, salatzea.

2. Arau-hauste astunak:

a) Informazio-igorpenean atzeratzea justifikaziorik gabe.

b Ikerketari begira beharrezkoa den dokumentaziorako edo espedienteetarako sarbidea oztopatzea.

c) Nafarroako Foru Komunitateko jardunbide egokien aldeko eta ustelkeriaren kontrako Bulegoak deitutako agerraldira justifikaziorik gabe ez agertzea.

d) Ustelkeriatzat, iruzurrezko jokabidetzat edo interes orokorraren aurkako legez kanpokotzat har daitezkeen gertakariak jakinarazi gabe uztea, asmo txarrez.

e) Diziplina espediente bat edo, kasua bada, zehapen-espediente bat abiarazteko errekerimendua aintzat ez hartzeko erabakia Bulegoari modu arrazoituan jakinarazteko betebeharra ez betetzea.

3. Arau-hauste arinak:

a) Dokumentazioa osatu gabe edo oker igortzea behin eta berriro, justifikaziorik gabe.

b) Ikerketaren xede diren dokumentuak zaintzeko arduragabetasuna.

50. artikulua. Zehapenak

Arestiko artikuluko arau-hausteei honako zehapen hauek aplikatzen ahal zaizkie:

1. Arau-hauste arinak:

a) Ohartarazpena.

b) 2.000 euro bitarterainoko isun hertsatzailea.

2. Arau-hauste astunak:

a) Ez-betetzearen gaineko deklarazioa, eta deklarazio hori Nafarroako Aldizkari Ofizialean argitaratzea.

b) 2.001 eurotik 20.000 eurora bitarteko isuna.

3. Arau-hauste oso astunak:

a) Ez-betetzearen gaineko deklarazioa, eta deklarazio hori Nafarroako Aldizkari Ofizialean argitaratzea.

b) 20.001 eurotik 60.000 eurora bitarteko isuna.

51. artikulua. Zehapenen mailaketa.

1. Tipifikatuta dauden arau-hausteak egiteagatik ezartzen diren zehapenak arau-haustearen eta inguruabarren arabera mailakatuko dira, berariaz honako irizpide hauei jarraituz:

a) Berrerortzea, arau-haustea tipifikatzean kontuan hartu ez denean.

b) Interes publikoei eragindako kaltearen edo galeraren garrantzia.

c) Arau-hausteak Bulegoaren ikerketa-jardueran eragin duen kaltearen maila.

d) Eragindako kalte edo galerei konponbidea ematea, bidezkoa bada; halaber, norberaren ekimenez arau-haustea zuzentzea.

e) Kontuan hartuko dira proportzionaltasunaren, intentzionalitatearen eta erruduntasunaren printzipioak.

2. Ulertuko da berrerortzea dela izaera bereko arau-hauste bat egitea, ebazpen irmo batez hala deklaratu denean.

3. Zehapenaren aplikazioa arau-haustea eragin duen jokabidearen larritasunaren proportzioan eginen da, eta segurtatuko du arau-haustea egitea arau-hauslearentzat ez dela onuragarriagoa hautsitako arauak betetzea baino.

52. artikulua. Zehatzeko eskumena eta prozedura.

1. Nafarroako Foru Komunitateko jardunbide egokien aldeko eta ustelkeriaren kontrako Bulegoa da titulu honetan aurreikusitako arau-hausteak egin izanaren ondoriozko zehapenak ezartzeko organo eskuduna.

2. Baldin eta araudi indardunari jarraikiz beste organo bati badagokio diziplina-zehapena ezartzea, Nafarroako Foru Komunitateko jardunbide egokien aldeko eta ustelkeriaren kontrako Bulegoak organo horri eskatuko dio hartu beharreko neurriak har ditzan kasuko diziplina-prozedura hasteko.

3. Hilabeteko epean, Administrazio eskudunak jardunbide egokien aldeko eta ustelkeriaren kontrako Bulegoari txosten bat aurkeztu beharko dio, zeinetan adieraziko baita zer neurri hartu diren edo hartu behar diren, eta bestela, zer dela-eta ez den neurririk hartu.

4. Zehapenak ezartzeko, foru lege honetan eta zehapen-prozedura administratiboari buruzko araudi indardunean ezarritako xedapenak eta printzipioak jarraituko dira.

5. Bulegoaren zehapen-jarduketen iraupena ezin izanen da sei hilabete baino gehiagokoa izan, zehapen-prozedura abiarazteko erabakia hartzen denetik zenbatuta, salbu eta kasuaren konplexutasuna dela-eta epe hori luzatzea komeni bada; edonola ere, epe hori ezin izanen da beste sei hilabete baino gehiagokoa izan.

6. Bulegoak, bere urteko txostenean, espedienteak abiarazteko eskaerak eta Administrazioak edo kasuko erakundeak egindako jarduketak jasoko ditu.

Foru lege honek arautzen duen zehapen-espedientearen xedea ezin izanen da inolaz ere izan zigor-zuzenbideko kausa batean zehatutako egitatea, ez eta lehentasunez lan- edo zerga-arloko legedia edo funtzionario publikoei aplikatzekoa zaien araubidea aplikatu behar diren kasuak ere.

53. artikulua. Arauhauste eta zehapenen preskripzioa. 40/2015 Legea.

1. Foru lege honetan aurreikusitako arau-hausteak eta zehapenak preskribatuko dira:

a) Arau-hauste eta zehapen oso astunen kasuan, hiru urteren buruan.

b) Arau-hauste astunen kasuan, bi urteren buruan.

c) Arau-hauste arinen kasuan, sei hilabeteren buruan; zehapen arinen kasuan, berriz, urtebeteren buruan.

2. Arau-hausteen preskripzio-epea zenbatzen hasiko da arau-haustea egin den egunetik. Arau-hauste jarraitu edo etengabeen kasuan, jokabide arau-hauslea bukatzearekin batera hasiko da epea zenbatzen.

Preskripzio-epea eten eginen da zehapen-prozedura penal edo administratibo bat interesduna horren jakitun delarik hasten denean. Epe hori berriz hasiko da zenbatzen baldin eta zehapen-espedientea hilabete baino gehiagoz geldirik badago ustezko arau-hausleari ezin egotzizko arrazoiengatik.

3. Zehapenen preskripzio epea zenbatzen hasiko da zehapena ezartzen duen ebazpena betearazgarria den egunaren biharamunetik edo ebazpenaren aurkako errekurtsoa jartzeko epea bukatzen den egunaren biharamunetik aurrera.

Preskripzio epea etenda geldituko da betearazpen prozedura -interesduna horren jakitun delarik- hastearekin batera, eta, prozedura hilabete baino gehiagoz geldirik egoten bada arau-hausleari ezin egotzizkoa den arrazoiren batengatik, preskripzio epeak aurrera jarraituko du.

Zehapena ezartzen duen ebazpenaren aurka ezarritako gora jotzeko errekurtsoa ustez ezetsi baldin bada, zehapenaren preskripzio-epea zenbatzen hasiko da errekurtso hori ebazteko legez ezarritako epea bukatu eta biharamunean.

Xedapen gehigarria .

Lehen –Aplikatzekoak diren ordezko legeak.

Kontratuak, aurrekontu-araubidea, administrazio-prozedura eta barne araudia direla-eta foru lege honetan aurreikusi ez den orotarako, foru legedian edo estatu-legedian ezarritakoa aplikatuko da ordezko izaeraz.

Bigarren .–Kontratazioa arautzeko eta gainbegiratzeko eginkizunak.

1. Jardunbide egokien aldeko eta ustelkeriaren kontrako Bulegoak beteko ditu Sektore Publikoaren Kontratuei buruzko azaroaren 8ko 9/2017 Legearen 332. artikuluak Kontratazioa Arautzeko eta Gainbegiratzeko Bulego Independenteari esleitzen dizkion eginkizunak, eta Nafarroako Foru Komunitateko organoa izanen da ondorio horietarako.

2. Haren eginkizunak aipatutako 332. artikuluaren 6, 7 eta 8. apartatuetan esleitutakoak izanen dira, Nafarroako lurralde-eremurako.

3. Nafarroako Parlamentuak, haren Erregelamenduak ezartzen duen moduan, denik eta informazio zabalena jasoko du Bulegoarengandik, kontratazio publikoaren eta arlo honetan hartzen diren arau-hobekuntzako ekimenen kontrola eta zaintza ahalbidetzeko.

4. Bulegoak, halaber, Estatuko organo eskudunekiko eta Europako erakundeekiko koordinazio-eginkizunak beteko ditu kontratazioa arautzeko eta gainbegiratzeko eginkizunetan.

Hirugarren .–Jardunbide egokien aldeko eta ustelkeriaren kontrako Bulegoaren atala.

1. Jardunbide egokien aldeko eta ustelkeriaren kontrako Bulegoaren atal batek beteko ditu azaroaren 8ko 9/2017 Legearen 333. artikuluak Ebaluazio Bulego Nazionalari esleitzen dizkion eginkizunak: obra- eta zerbitzu-emakidako kontratuen jasangarritasun finantzarioaren analisia, eta 333. artikuluaren 3. apartatuak aipatzen dituen nahitaezko txostenak egitea.

2. Erregelamenduz zehaztuko da atalaren osaera, eta Nafarroako Gobernuak beharrezko diren baliabideak emanen ditu hark bere eginkizun ekonomiko eta finantzarioa bete ahal dezan.

Xedapen Iragankorra

Lehen .–Lobbyen eta lobbyzaleen jarduna arautzea.

Lobbyen jarduera arautzeko eta haien erregistroa eta jokabide-kodea sortzeko, aintzat hartuko da Gardentasunari, informazio publikoa eskuratzeari eta gobernu onari buruzko Foru Legearen IV. Tituluan (Interes taldeak) ezarritakoa, eta araudi hori izanen da aplikatuko dena lobbyen eta lobbyzaleen jardunari buruzko araudi bat onetsi bitartean.

Bigarren . Jardunbide egokien aldeko eta ustelkeriaren kontrako Bulegoaren antolakuntzari eta funtzionamenduari buruzko Erregelamendua.

Nafarroako Foru Komunitateko jardunbide egokien aldeko eta ustelkeriaren kontrako Bulegoak proposaturik, Nafarroako Gobernuak onetsiko du organo honen antolamendu- eta funtzionamendu-erregelamendua, bai eta aurrerago eginen zaizkion aldaketak ere.

Erregelamendu hori sei hilabeteko epean onetsiko da, Bulegoaren zuzendaria izendatzen denetik aitzina.

Hirugarren .–Giza baliabideak eta baliabide materialak Nota de Vigencia.

Nafarroako Foru Komunitateko jardunbide egokien aldeko eta ustelkeriaren kontrako Bulegoa abian jartzeko, Nafarroako Gobernuak zainduko du Bulegoak bere funtzionamendurako behar dituen bitarteko pertsonal eta materialak badauzkala, eta zilegi izanen du zenbait langile zerbitzu-eginkizunetan atxikitzea lanpostu horietan.

"Atxikipen hori egiten ahalko da antolamendu eta funtzionamenduaren erregelamendua eta bulegoko lanpostuen zerrenda onetsi aurretik. Kasu horretan, atxikitako langileak zerbitzu aktiboan egonen dira irauten duen bitartean, eta jatorrizko administrazioan betetzen zuten lanpostuari dagozkion ordainsariak eta ordainsari pertsonalak bermatuko zaizkie.

Xedapen Indargabetzaile

Bakarra.–Arauak indargabetzea.

Indarrik gabe gelditzen dira foru lege honetan xedatutakoari aurka egiten dioten maila bereko edo txikiagoko xedapen guztiak.

Azken Xedapena

Bakarra.– Indarra hartzea.

Foru lege honek Nafarroako Aldizkari Ofizialean argitaratu eta hiru hilabetera hartuko du indarra.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta “Estatuko Aldizkari Ofizialera” igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2018ko maiatzaren 17an.–Nafarroako Foru Komunitateko lehendakaria, Uxue Barkos Berruezo.

Iragarkiaren kodea: F1806689

Gobierno de Navarra

Contacte con nosotros | Accesibilidad | Aviso legal | Mapa web