LEXNAVARRA
56/2017 FORU AGINDUA, APIRILAREN 5EKOA, LEHENDAKARITZAKO, FUNTZIO PUBLIKOKO, BARNEKO ETA JUSTIZIAKO KONTSEILARIAK EMANA, NAFARROAKO FORUZAINGOKO ARAUZKO ARMAK ARAUTZEN DITUENA
BON N.º 90 - 11/05/2017
I. KAPITULUA. XEDAPEN OROKORRAK
- 1. artikulua. Xedea eta aplikazio eremua.
- 2. artikulua. Eskumena.
- 3. artikulua. Armen sailkapena.
- 4. artikulua. Arauzko armak.
II. KAPITULUA. ARMAK
- 5. artikulua. Dotazioko armak.
- 6. artikulua. Erabilera kolektiboko armak.
- 7. artikulua. Erreserbako armak.
- 8. artikulua. Armen inbentarioa.
- 9. artikulua. Armen kontserbazioa.
- 10. artikulua. Armen ikuskapena.
- 11. artikulua. Suzko armak beste bati utzi, laga edo trukea egiteko debekua.
- 12. artikulua. Armak galtzea, ostea, lapurtzea, suntsitzea eta haiei eragiten dieten beste inguruabar batzuk.
- 13. artikulua. Suzko arma prebentzioz kentzea.
- 14. artikulua. Suzko arma behin betiko kentzea.
- 15. artikulua. Arma eta tiro gaietan trebatzea.
III. KAPITULUA. ARMEN ERABILERA
- 16. artikulua. Armen erabilera zerbitzuan.
- 17. artikulua. Armen erabilera zerbitzutik kanpo.
- 18. artikulua. Armak erabiltzeko baldintzak.
- 19. artikulua. Erantzukizuna.
- 20. artikulua. Armen zirkulazioa.
IV. KAPITULUA. SEGURTASUNA ARMEN ARLOAN
- 21 artikulua. Armatokiak.
- 22. artikulua. Poliziaren ibilgailuak.
- 23 artikulua. Munizioa.
- 24. artikulua. Osasun azterketak.
- Xedapen Indargabetzaile Bakarra
- Azken Xedapen Bakarra
ERANSKINA. NAFARROAKO FORUZAINGOAN ARAUZKO IZAERA DUTEN ARMEN ZERRENDA
Nafarroako Poliziei buruzko martxoaren 23ko 8/2007 Foru Legearen 12. artikuluak xedatzen duenez, kontseilari eskudunaren foru agindu bidez ezarriko da Nafarroako Foruzaingoko kideen armak erabiltzeko araubidea, aplikatzekoa den estatuko legedia errespetatuz.
Nafarroako Foruzaingoaren Antolamenduaren eta Funtzionamenduaren Erregelamendua onesten duen irailaren 21eko 72/2016 Foru Dekretuaren 35. artikuluak, berriz, Foruzaingoaren armei dagozkien oinarrizko araubidea ezartzen du, aipatuz aurrerago garatuko dela zehaztea zein diren arauzko armak polizia kidego horretan.
Horrenbestez, arlo honetan indarra duen legediak ematen dizkidan ahalmenak erabiliz,
AGINDU DUT:
I. KAPITULUA. XEDAPEN OROKORRAK
1. artikulua . Xedea eta aplikazio eremua.
1. Foru agindu honen xedea da arautzea Nafarroako Foruzaingoko kideen armen agiri-araubidea eta erabilera.
2. Foru agindu honetan berariaz araututa ez dagoen guztian armei buruzko araudi orokorra aplikatuko da.
Nafarroako Foruzaingoan armen gaietako organo eskudunak hauek dira: Barne gaietako eskumenak dituen departamentuaren titularra, Barne Zuzendaritza Nagusiaren titularra, Foruzaingoko burua eta Barne Araubidearen Brigada.
3. artikulua . Armen sailkapena.
1. Armak, orokorrean, mota guztietako armak direla ulertzen da, polizia lanetarako erabiltzen direnak nahiz norberak erabiltzen dituenak.
2. Polizia lanetan erabiltzen diren armak hauek dira:
a) Nafarroako Foruzaingoko kide bakoitzari emandako suzko arma, bere dotaziokoa dena.
a) Nafarroako Foruzaingoko kide bakoitzari emandako beste edozein arma, bere dotaziokoa dena.
c) Nafarroako Foruzaingoko unitate operatibo bati emandako armak, erabilera kolektibokoak.
3. Norberaren erabilerako armak suzko armak dira, Nafarroako Foruzaingoko kide batek bere titularitatean dituenak bere agiri profesionalaren babesean, Foruzaingoko buruari jakinarazi ondoren armei buruzko araudi orokorrean xedatutakoari jarraikiz.
1. Nafarroako Foruzaingoaren barrenean, arauzko armak izanen dira soilik foru agindu honen eranskineko zerrendan ageri direnak.
2. Foruzaingoko buruari dagokio behar diren jarraibideak ematea arauzko armak esleitzeko Nafarroako Foruzaingoa osatzen duten unitate operatiboei, bai eta Barne Zuzendaritza Nagusiari igortzea armak artikulu honen aurreko apartatuan aipatzen den eranskinean sartu edo bertatik ateratzeko proposamena.
II. KAPITULUA. ARMAK
5. artikulua . Dotazioko armak.
1. Nafarroako Foruzaingoak agente bakoitzari esleituko dizkio, bere eginkizunak betetzeko, pistola bat, bi kargagailu eta beharrezkoa den munizioa, bete behar duen destinoari dagokion berariazko beste armez gain. Ondorio horietarako, pistola da suzko arma motz oro, Armen Erregelamendua onesten duen urtarrilaren 29ko 137/1993 Errege Dekretuaren definizioen arabera.
Dotazioko armen modeloa eta ezaugarriak erakundeak ezartzen dituenak izanen dira.
2. Dotazioko arma, kargagailuak, munizioa eta dotazio gisa emandako beste edozein berariazko arma Nafarroako Gobernuarenak dira, eta haren erabilera Nafarroako Foruzaingoko kideari, esleitua duenari, dagokio soilik, kentzen ez zaion bitartean.
3. Barne Araubideko Brigadari dagokio dotazioko suzko arma esleitzea, bai eta aldatzea eta gordailuan hartzea kentzen denean.
4. Dotazioko suzko arma prebentzioz edo behin betiko kentzea Barne Araubideko Brigadari dagokio, legez hala ezartzen den kasuetan.
6. artikulua . Erabilera kolektiboko armak.
1. Nafarroako Foruzaingoak bere unitate operatiboei, beren eginkizunak betetzeko, suzko armak, airekoak, detonaziokoak edo beste edozein motatakoak esleitzen ahal dizkie, bai eta horien berariazko munizioak ere, Armen Erregelamendua onesten duen urtarrilaren 29ko 137/1993 Errege Dekretuaren definizioen arabera.
Arma horien modeloa eta ezaugarriak erakundeak ezarritakoak izanen dira.
2. Erabilera kolektiboko armen jabetza Nafarroako Gobernuarena da, bai eta horiek osatzen dituzten osagarri bereziena eta haien berariazko munizioena ere, eta haien erabilera Nafarroako Foruzaingoko kideei baizik ez dagokie, esleituak dituzten unitate operatiboetakoak badira.
7. artikulua . Erreserbako armak.
1. Nafarroako Foruzaingoaren polizia-etxea bakoitzak erreserbako pistolen dotazioa izanen du; arma horiek agenteei behin-behinean esleitzen ahalko zaizkie, beren dotazioko suzko arma hondatu, suntsitu, galdu denean, lapurtu dietenean edo beste edozein gorabeherarengatik.
Esleipen hori Barne Araubideko Brigadari jakinarazi beharko zaio.
2. Nafarroako Foruzaingoko polizia-etxe bakoitzak erreserbako armen, munizioaren eta jaurtigaien dotazioa izanen du polizia-etxearen lurralde esparruan esku-hartzeak egin behar dituzten unitate zentralentzat.
3. Barne Araubideko Brigadak erreserbako armen gaineko kontrola eginen du, bereziki puntu hauena: armak esleituak dituzten agenteak, entrega data, itzulketaren data, eta, kasua bada, armaren erabilera.
8. artikulua . Armen inbentarioa.
1. Nafarroako Foruzaingoak armen inbentarioa izanen du, eta bertan jasoko dira: agente bakoitzak duen dotazioko suzko arma, unitate operatibo bakoitzak esleituak dituen suzko armak eta agiri profesionalaren babesean agenteek dituzten suzko arma pribatuak, titularrak erantzukizunpeko adierazpena egin ondoren.
Inbentarioan bilduko dira, halaber, Nafarroako Foruzaingoan suzko armez aldian-aldian egiten diren ikuskapenak, eta armen erabilerari dagokion beste edozein inguruabar, zerbitzuan izan edo ez.
2. Barne Araubideko Brigadari dagokio aurreko apartatuan aipatzen den inbentarioaren gaineko kontrola, eta armen jabetzari buruzko giden zaintza.
9. artikulua . Armen kontserbazioa.
1. Armak garbi eta egoera egonean gorde beharko dira, eta beharrezkoak diren neurri guztiak hartuko dira hondatu edo galdu ez daitezen, eta inork ere lapurtu, ostu edo erabil ez dezan.
2. Armak ezin dira inola ere manipulatu, ez eta haien jatorrizko ezaugarriak aldatu, eta ez zaie osagarririk edo elementurik gehitu, salbu eta legez aurreikusitako kasuetan eta Foruzaingoko buruaren berariazko baimenarekin.
3. Agente bakoitzak tiro instruktoreari jakinarazi beharko dio dotazioko bere suzko arman dauden akatsak, baldin badaude, konpontzeko edo Barne Araubideko Brigadari aldatzea proposatzeko.
10. artikulua . Armen ikuskapena.
1. Nafarroako Foruzaingoko kide guztien dotazioko suzko armak eta agiri profesionalaren babesean dituzten suzko arma pribatuak ikuskapenaren xede izanen dira, gaiari buruzko legeria orokor indardunean aurreikusitakoarekin bat.
Era berean, izaera bereziko arma ikuskapenak egiten ahalko dira.
2. Foruzaingoko buruak Guardia Zibilaren Arma Interbentzioari jakinarazi beharko dizkio armamentuaren ikuskapen horiek.
11. artikulua . Suzko armak beste bati utzi, laga edo trukea egiteko debekua.
Dotazioko suzko armak edo erabilera kolektibokoak ezin izanen zaizkio utzi edo laga beste pertsona bati, eta dotazioko suzko arma ezin da trukatu Nafarroako Foruzaingoko beste kide bati esleitutakoarekin.
12. artikulua . Armak galtzea, ostea, lapurtzea, suntsitzea eta haiei eragiten dieten beste inguruabar batzuk.
1. Foruzaingoko buruari jakinarazi zaio idatziz poliziaren armak galdu, ostu, lapurtu, suntsitu izana, edo armen egoeran edo erabiltzeko moduan eragin larria duten bestelako inguruabar oro.
2. Foruzaingoko buruak berehala jakinaraziko dio Guardia Zibilaren Arma Interbentzioari dotazioko suzko arma bat galdu, ostu, lapurtu edo suntsitu izana.
13. artikulua . Suzko arma prebentzioz kentzea.
1. Dotazioko suzko arma aldi baterako kentzen ahalko du Barne Araubideko Brigadak, kasu hauetan:
a) Aldi baterako desgaitasunagatik.
b) Jarduneko zerbitzua uzteagatik, edo zerbitzu eginkizunak emateagatik Nafarroako Foruzaingotik kanpo.
c) Aldi baterako traba fisiko edo psikiko baten ondorioz, txosten mediko baten bidez frogatuta.
d) Kautelazko neurri gisa, barne ikerketa bat dela medio, edo diziplina espediente bat izapidetzen den bitartean.
e) Hala xedatzen duen ebazpen judizial bat eman delako.
f) Armaren ikuskapena egiteko betebeharra ezarritako epean ez betetzeagatik, hura zuzendu arte.
g) Zigor bat bete behar delako, edo eginkizunak eteteko diziplina zehapena ezarri zaiolako, izaera irmoarekin.
h) Foruzaingoko buruaren iritziz eta interesdunari entzunaldia eman ondoren, arma kentzea komeni denean beste edozein baldintza edo inguruabar tartean denean.
2. Suzko arma aldi baterako kentzea erabakiz gero, organo judizial eskudunari jakinaraziko zaio.
3. Dotazioko suzko arma aldi baterako kentzen delarik, Guardia Zibilaren Arma Interbentzioari jakinaraziko zaio neurri horrek agiri profesionalaren babeseko zein suzko arma pribaturi eragiten dien.
14. artikulua . Suzko arma behin betiko kentzea.
1. Dotazioko suzko arma eta haren jabetza-gida behin betiko kentzen ahalko du Barne Araubideko Brigadak, kasu hauetan:
a) Nafarroako Foruzaingoko funtzionario edo kide izanik, erretiroa hartzea edo izaera galtzea.
b) Suzko arma bat edukitzeko behin betiko desgaitzen duen eritasuna edo urritasun psikofisikoa.
c) Zerbitzutik bereizteko zehapen irmoa ezartzea.
d) Aplikatzekoa den legeriaren arabera suzko arma kentzea dakarren edozein arau-hauste egitea.
e) Heriotza.
2. Suzko arma behin betiko kentzea erabakiz gero, organo judizial eskudunari jakinaraziko zaio.
3. Dotazioko suzko arma behin betiko kentzen delarik, Guardia Zibilaren Arma Interbentzioari jakinaraziko zaio neurri horrek agiri profesionalaren babeseko zein suzko arma pribaturi eragiten dien.
15. artikulua . Arma eta tiro gaietan trebatzea.
1. Nafarroako Foruzaingoko kideen trebakuntzak arma eta tiro gaietan tokia izanen du Foruzaingoko sarrera, igoera eta espezializazio prozeduretan. Era berean, etengabe eguneratzea eginen da gai horietan lanbide karrera osoan zehar.
Ondorio horietarako, sarrera, igoera eta espezializazio ikastaroetako curriculumek armen erabilerari buruzko prestakuntza unitate bat izan beharko dute, eduki teorikoekin eta tiroko praktika errealekin, Nafarroako Foruzaingoko kideek erabiltzen dituzten dotazioko arauzko armekin.
Tiroko praktika errealetan eguneratzeko prestakuntza nahitaezkoa izanen da eta Nafarroako Segurtasun eta Larrialdietako Eskolak onartutako prestakuntza planean sartuta egonen da.
2. Nafarroako Foruzaingoko kideek, zerbitzutik kanpo urtebete edo gehiago eman ondoren, jarduneko zerbitzura itzultzen direnean, polizia-tiroan trebatzeko ariketak egin beharko dituzte zerbitzuan berriz hasi eta ondoko hilabetean.
3. Erabilera kolektiboko armak erabiltzeko trebakuntza berezia emanen zaie arma horiek esleituak dituzten unitate operatiboei atxikitako agenteei, bai eta unitate horietan aurrenekoz sartzen diren agenteei ere.
4. Nafarroako Segurtasun eta Larrialdi Eskolak planifikatu, programatu, garatu eta, kasua bada, ziurtatuko ditu tiro praktikak, Nafarroako Foruzaingoarekin elkarlanean, eta tiro galerietan edo indarreko legeriarekin bat egokitu eta baimendutako tokietan eginen dira, behar bezalako prestakuntza duten langileek zuzenduta.
Tiro praktikei buruzko trebakuntza jasotzea kontrolatzeko, Nafarroako Segurtasun eta Larrialdi Eskolak erregistro bat ezarriko du emandako prestakuntza ekintzak jasotzeko; bertan, prestakuntza hori egin duten langileen zerrenda egonen da, enpleguen arabera ordenatuta.
5. Esku-hartze Dibisioko Esku-hartze Taldeek eta Esku-hartze Berezien Taldeak egin beharreko tiro ariketa bereziak Foruzaingoko buruak horretarako emanen dituen jarraibideek arautuko dituzte.
III. KAPITULUA. ARMEN ERABILERA
16. artikulua . Armen erabilera zerbitzuan.
1. Nafarroako Foruzaingoko kideek, zerbitzuan ari direlarik, dotazioko suzko arma eramanen dute aldean, bai eta norberaren dotaziorako emandako beste arma guztiak ere.
Ebazpen arrazoitu bidez, Foruzaingoko buruak dotazioko suzko arma eramateko betebeharretik salbuets dezake agentea, inguruabar bereziak aintzat hartuta, bai eta zerbitzu jakin batzuk emateko ere, haien ezaugarri bereziengatik armarik gabe egin daitezkeenak.
Zerbitzuan ezin dira erabili agiri profesionalaren babeseko suzko arma pribatuak.
2. Erabilera kolektiboko armak zerbitzuan baizik ez dira erabiltzen ahalko. Unitate operatibo bakoitzak erregistro bat sortuko du, eta bertan agertuko dira erabilera kolektiboko suzko armak esleituak dituzten agenteak, data, txanda eta, kasu bada, haien erabilera adierazita.
17. artikulua . Armen erabilera zerbitzutik kanpo.
1. Dotazioko suzko arma zerbitzutik kanpo eramatea debekaturik dago, Foruzaingoko buruak horretarako baimena berariaz eman ezean.
Baimen hori, segurtasun arrazoiak direla eta justifikaturik egon beharko duena, Nafarroako Foruzaingoko kide guztientzako izan daiteke, unitate operatibo zehatz bateko kideentzako edo zenbait agenterentzako.
2. Debeku da, berariaz, erabilera kolektiboko suzko armak eraman edo erabiltzea zerbitzutik kanpo.
18. artikulua . Armak erabiltzeko baldintzak.
1. Esku-hartze bati ekitean, aurreikusten bada beharrezkoa izanen dela arma motaren bat erabiltzea, egoki jotzen diren prebentzio neurriak hartu beharko dira, kongruentzia, egokiera eta proportzionaltasuna printzipiotzat hartuta, eta armen erabileraren gaineko berariazko legeria errespetatuz betiere.
2. Suzko arma bat, dotaziokoa nahiz kolektiboa, erabiltzen duen Nafarroako Foruzaingoko kide orok, zerbitzuan egonik edo ez, idatziz jakinarazi beharko dio bere nagusi hierarkikoari.
19. artikulua . Erantzukizuna.
Armen bidegabeko erabilera orori Nafarroako Poliziei buruzko martxoaren 23ko 8/2007 Foru Legean ezarritako diziplina araubidearen araberako zehapena ezarriko zaio, legozkiokeen erantzukizun penalak galarazi gabe.
20. artikulua . Armen zirkulazioa.
1. Foruzaingoko buruari dagokio zehaztea polizien armen garraio eta zirkulaziorako baldintzak, armei buruzko estatuko araudian xedatutakoarekin bat betiere.
2. Zerbitzua dela medio, armak kasu hauetan baizik ez dira eramaten ahalko merkataritzako aireontzietan:
a) Agintari judizial eta fiskalek eragindako aginduak betetzeko.
b) Polizia ikerketak direla medio.
c) Preso eta atxilotuak zaintzeko lanetan.
d) Agintariak babesteko lanetan.
e) Esleitutako polizia lan bat betetzeko.
3. Edozein kasutan ere, tiro taldeko kideek armak garraiatzeko arau berariazkoak emanen dira Foruzaingoko buruaren jarraibide baten bidez.
IV. KAPITULUA. SEGURTASUNA ARMEN ARLOAN
1. Nafarroako Foruzaingoaren instalazioetan armatoki bat egonen da, behar diren segurtasun baldintzekin, Nafarroako Foruzaingoko kide bakoitzak zerbitzua bukatuta dotazioko bere suzko arma bertan utz dezan, foru agindu honen 17. artikuluan ezarritakoa galarazi gabe.
Armatokian utziko dira, halaber, erabilera kolektiboko armak, kendutakoak edo esleitu gabekoak eta konpondu edo probatu behar direnak.
2. Dotazioko suzko armak nahiz erabilera kolektibokoak horretarako prestatutako eremu hotzean kargatu eta deskargatuko dira.
Erabilera kolektiboko suzko armak armatokian utziko dira zerbitzua bukatuta, eta bete beharko dira, bereziki, segurtasuneko oinarrizko arauak armak gorde eta biltegiratzeari dagokienez.
3. Artikulu honen aurreko apartatuetan xedatutakotik kanpo dago Esku-hartze Dibisioko Esku-hartze Berezietarako Taldea; talde hori Foruzaingoko buruak emandako jarraibideen menpe egonen da, eta, betiere, suzko armak erabiltzean bete beharreko segurtasuneko oinarrizko arauak errespetatu beharko dira.
22. artikulua . Poliziaren ibilgailuak.
1. Nafarroako Foruzaingoaren bereizgarriak daramatzaten ibilgailuek segurtasun dispositibo bat izanen dute erabilera kolektiboko armak garraiatzeko.
Aurreko paragrafoan xedatutakotik kanpo daude Esku-hartze Dibisioko ibilgailuak, horien dotazioa kasuan kasuko espezialitatearen beharren araberakoa izanen baita.
2. Zerbitzua ematen ari dela, Nafarroako Foruzaingoko kide bakoitza esleituta dituen armak, dotaziokoak nahiz erabilera kolektibokoak, zaintzeaz arduratuko da, eta ezin izanen ditu utzi ibilgailuetan prestatutako segurtasun dispositiboetatik kanpo.
1. Nafarroako Foruzaingoko kideek eramanen duten arauzko munizio bakarra izanen da norberaren dotaziorako edo erabilera kolektiboko suzko armen dotaziorako ematen zaiena.
2. Dotaziorako ematen diren munizio desberdinen ezaugarriak eta zehaztapenak bat etorriko dira unitate operatibo desberdinen beharrekin.
Foruzaingoko buruari dagokio ezartzea zein den Nafarroako Foruzaingoko unitate operatibo bakoitzari hobekien egokitzen zaion munizio mota.
24. artikulua . Osasun azterketak.
Nafarroako Foruzaingoko kide guztiak beharturik daude osasun azterketak egitera, Nafarroako Foruzaingoko funtzionarioen jardueran laneko arriskuen prebentziorako arauak ezartzen dituen irailaren 13ko 55/2010 Foru Dekretuan ezarritako kasuetan.
Xedapen Indargabetzaile Bakarra
Indargabetu egiten dira foru agindu honetan xedatutakoari aurka egiten dioten maila bereko edo apalagoko xedapen guztiak.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2017ko apirilaren 5ean.-Lehendakaritzako, Funtzio Publikoko, Barneko eta Justiziako kontseilaria, María José Beaumont Aristu.
ERANSKINA. NAFARROAKO FORUZAINGOAN ARAUZKO IZAERA DUTEN ARMEN ZERRENDA
1. Suzko arma motzen modeloak:
-Pistola, 9C kalibrekoa
-Pistola, 9 MM.P kalibrekoa
-Pistola, 40 S&W kalibrekoa
-Errebolberra, 38ko kalibrekoa
2. Suzko arma luzeen modeloak (erabilera kolektiboa):
-Eskopeta, 12ko kalibrekoa
-Eskopeta, jaurtigaietarako, 12ko kalibrekoa, eta jaurtigaietarako tresna
-Erriflea, 338WN kalibrekoa
-Erriflea, 44ko kalibrekoa
-Erriflea, 308 WIN kalibrekoa
-Erriflea, 375 H&H MAG kalibrekoa
-Erriflea, 7 MM. R. Mg kalibrekoa
-Errifle anestesikoa, 11ko kalibrekoa
-Errifle anestesikoa, kalibre anestesikokoa
-Fusila, 5,56x45 kalibrekoa
-Fusila, 300 Black-Out kalibrekoa
-Subfusila, 9MM.P kalibrekoa
-Jaurtigaietarakoa, 40MM kalibrekoa.
3. Beste arma batzuk:
-Defentsa poliziala, zurruna eta erdizurruna
-Makil luzagarria
-Defentsarako spray-a, gel-zurrusta zuzenekoa
-Defentsarako spray-a, aparra
-Defentsarako spray-a, laino/hodei lurrungailuarekin.
Iragarkiaren kodea: F1704356
