LEXNAVARRA
83E/2016 FORU AGINDUA, OTSAILAREN 17KOA, OSASUN DEPARTAMENTUKO KONTSEILARIAK EMANA, SORTZETIKO METABOLOPATIEN DETEKZIO GOIZTIARRAREN PROGRAMA EZARRI, NAFARROAKO HERRITARREN SORTZETIKO METABOLOPATIEN DETEKZIO GOIZTIARRAREN ERREGISTROA SORTU ETA ARAUTU ETA DAGOKION DATU PERTSONALEN FITXATEGIA SORTZEN DUENA.
BON N.ş 123 - 27/06/2016
- Atariko
- 1. artikulua. Xedea.
- 2. artikulua. Sortzetiko Metabolopatien Detekzio Goiztiarraren Programan sartzeko eskubidea duten pertsonak.
- 3. artikulua. Sortzetiko Metabolopatien Detekzio Goiztiarraren Programa kudeatzea.
- 4. artikulua. Nafarroako Herritarren Sortzetiko Metabolopatien Detekzio Goiztiarraren Erregistroaren atxikipena.
- 5. artikulua. Erregistroaren helburuak.
- Xedapen indargabetzaile bakarra. Indargabetzeak.
- Azken xedapen bakarra. Indarra hartzea.
ERANSKINA. FITXATEGIAREN IZENA: NAFARROAKO HERRITARREN SORTZETIKO METABOLOPATIEN DETEKZIO GOIZTIARRAREN ERREGISTROA
Osasuneko kontseilariaren 1988ko irailaren 14ko Foru Aginduaren bidez, Minusbaliotasun Psikikoen Prebentzio Programa ezarri zen, eta horren barrenean sartu zen Sortzetiko Metabolopatien Detekzio Programa.
Osasuneko kontseilariaren otsailaren 10eko 13/2003 Foru Aginduaren bidez, Sortzetiko Metabolopatien Dektezkio Goiztiarraren Programa berrantolatu zen.
Irailaren 15eko 1030/2006 Errege Dekretuak Estatuko Osasun Sistemako zerbitzu komunen zorroa eta hura eguneratzeko prozedura ezarri zituen; errege dekretu horren I., II. eta III. eranskinak aldatzen dituen urriaren 31ko SSI/2065/2014 Aginduaren bitartez, gaixotasun endokrino-metabolikoei buruzko Jaioberrien Baheketa Programaren parte diren gaixotasunak ugaritu dira, honako hauek kontuan hartu baitira: sortzetiko hipotiroidismoa, fenilzetonuria, fibrosi kistikoa, kate ertaineko azil-koentzima A-deshidrogenasaren (MCADD) eskasia, kate luzeko 3-hidroxi-azil-koentzima A-deshidrogenasaren (LCHADD) eskasia, I motako azidemia glutarikoa (GA-I) eta anemia faltziformea.
Bidezkotzat jotzen da Sortzetiko Metabolopatien Detekzio Goiztiarraren Programa eguneratzea gaur egungo errealitatera egokituta; izan ere, denbora franko iragan da azken aldiz berrantolatu zenetik, gaixotasun berriak sartu dira laguntza zerbitzuen oinarrizko zorro komunean eta, geroztik, berrikuntzak egin dira Osasun Departamentuaren egituran.
Aipatu den SSI/2065/2014 Aginduak xedatzen du gaixotasun endokrino-metabolikoen Jaioberrien Baheketa Programa ezartzearekin batera, Osasuneko, Gizarte Zerbitzuetako eta Berdintasuneko Ministerioak informazio sistema bat garatuko duela, aukera emanen duena behar bezalako jarraipena eta ebaluazioa egiteko herritarren programa horietan, bai erkidegoetan bai Estatuan.
Beraz, programa hori Nafarroan garatu eta ebaluatzeko, beharrezkoa da erregistro bat izatea, aukera emanen duena prozesu guztiak erabat kudeatzeko eta emaitzak ebaluatzeko, halako moduan non, banan-banan zehaztuko baita haur bakoitzari egiten zaion prozesu klinikoa: testa egitea, emaitzak, diagnostikoa berresteko probak, jarraipenak eta abar; hori guztia behar diren proba eta tratamenduak behar bezala aplikatzen direla bermatzeko.
Horretarako, bidezkoa da Nafarroako Herritarren Sortzetiko Metabolopatien Detekzio Goiztiarraren Erregistroa sortzea, programa behar bezala kudeatzeko behar den informazio guztia jasoko duena.
Uztailaren 26ko 143/1994 Foru Dekretuaren bidez arautzen dira Nafarroako Foru Komunitateko Administrazioaren eta haren erakunde autonomoen menpe dauden datu pertsonalen fitxategi informatizatuak. Foru dekretu hori aldarrikatu zen egunean zeuden fitxategiak datu pertsonalen tratamendu automatizatuko fitxategi gisa onetsi ziren, eta dekretuari dokumentu gisa atxikitako zerrendan agertu ziren. Foru dekretu horren 2. artikuluak ezartzen du fitxategi berriak foru agindu baten bidez sortuko direla, eta, fitxategiaren ardura duen unitatea zein departamenturen menpe edo zein departamenturi atxikirik dagoen, haren kontseilariak emanen duela foru agindu hori.
Horren guztiaren arabera, eta Datu Pertsonalak Babesteari buruzko abenduaren 13ko 10/1999 Lege Organikoan xedatutakoarekin bat, bidezkoa da, orobat, Nafarroako Herritarren Sortzetiko Metabolopatien Detekzio Goiztiarraren Erregistroa izeneko datu pertsonalen fitxategia sortzea.
Horrenbestez, Nafarroako Osasun Publikoaren eta Lan Osasunaren Institutuko zuzendari kudeatzaileak egindako proposamenarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluak emandako eskudantziak erabiliz.
AGINDU DUT:
1.1. Sortzetiko Metabolopatien Detekzio Goiztiarraren Programa ezartzea du xede foru agindu honek, haren barne izanik Estatuko Osasun Sistemako zerbitzu komunen zorroan biltzen direnak.
1.2. Orobat, Nafarroako Herritarren Sortzetiko Metabolopatien Detekzio Goiztiarraren Erregistroa sortzea eta arautzea ditu xede foru agindu honek, eta erregistro horren helburua informazio sistema bat izatea da, aukera emanen duena garaiz atzemateko nor diren Estatuko Osasun Sistemako zerbitzu komunen zorroan bildutako gaixotasun endokrino-metabolikoetako bat duten haurrak, bai eta laguntza prozesu guztiak kudeatzeko eta emaitzak ebaluatzeko ere. Gainera, erraztu nahi da azterlan epidemiologikoak edo ikerlanak egitea, aipatu erregistroan jaso beharreko datuei loturik.
1.3. Azkenik, foru agindu honen xedea ere bada datu pertsonalen fitxategi bat sortzea, Nafarroako Herritarren Sortzetiko Metabolopatien Detekzio Goiztiarraren Erregistroa izenekoa, eranskinean ezartzen diren ezaugarrien araberakoa.
2. artikulua . Sortzetiko Metabolopatien Detekzio Goiztiarraren Programan sartzeko eskubidea duten pertsonak.
1. Nafarroako jaioberri guztiek dute Sortzetiko Metabolopatien Detekzio Goiztiarraren Programan sartzeko eskubidea, bai eta Nafarroatik kanpo jaiotakoek ere, baldin eta haien amak Nafarroan bizi badira.
2. Barne diren gaixotasun endokrino-metabolikoen behin betiko detekzio eta diagnostikorako probak eginen direla bermatzen da, kosturik eragin gabe babestutako pertsonei. Hori guztia, indarra duen araudiaren arabera zerbitzua ematera edo hura ordaintzera behartuta dauden hirugarrenen betebeharrak galarazi gabe.
3. artikulua . Sortzetiko Metabolopatien Detekzio Goiztiarraren Programa kudeatzea.
1. Nafarroako Osasun Publikoaren eta Lan Osasunaren Institutuan kudeatuko da Sortzetiko Metabolopatien Detekzio Goiztiarraren Programa, eta Detekzio Goiztiarraren Atalari dagokio detekzio prozesuari loturiko jarduerak garatzea, bai eta programa osoa koordinatu, ebaluatu eta kontrolatzea ere.
2. Osasun Departamentuak neurri egokiak ezarriko ditu, prestazio honen onarpen administratiboa eraginkorra eta eragilea izan dadin.
3. Osasunbidea-Nafarroako Osasun Zerbitzuak historia klinikoaren zenbakia emanen dio Nafarroako jaioberri bakoitzari, zein diren ere haien jaioterria eta aseguramendua.
4. artikulua . Nafarroako Herritarren Sortzetiko Metabolopatien Detekzio Goiztiarraren Erregistroaren atxikipena.
Nafarroako Osasun Publikoaren eta Lan Osasunaren Institutuari atxikitzen zaio Nafarroako Herritarren Sortzetiko Metabolopatien Detekzio Goiztiarraren Erregistroa.
5. artikulua . Erregistroaren helburuak.
Nafarroako Herritarren Sortzetiko Metabolopatien Detekzio Goiztiarraren Programako prozesu eta jarduera guztiak kudeatzeko balio du erregistroak, bai eta emaitzak ebaluatzeko ere, hau da:
- Xedeko herritarrak identifikatzeko.
- Bahetze prozesuari jarraipena egiteko, diagnostikoa berresteko eta beharrezko tratamenduak aplikatzeko.
- Prozesua ebaluatzeko.
- Emaitzak ebaluatzeko.
Xedapen indargabetzaile bakarra. Indargabetzeak.
Indarrik gabe uzten da Osasuneko kontseilariaren otsailaren 10eko 13/2003 Foru Agindua, Sortzetiko Metabolopatien Detekzio Goiztiarraren Programa berrantolatzen duena, bai eta foru agindu honi aurka egiten dioten maila bereko edo beheragoko xedapen guztiak ere.
Azken xedapen bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
ERANSKINA. FITXATEGIAREN IZENA: NAFARROAKO HERRITARREN SORTZETIKO METABOLOPATIEN DETEKZIO GOIZTIARRAREN ERREGISTROA
a) Aurreikusitako helburua eta erabilerak.
Metabolopatien Detekzio Goiztiarraren Programako prozesu eta jarduera guztiak kudeatzea, bai eta haien emaitzak ebaluatzea eta azterlan epidemiologikoak edo ikerketakoak egitea ere.
b) Ukitutako pertsonak edo taldeak.
Sortzetiko Metabolopatien Detekzio Goiztiarraren Programan helburuko populazio diren pertsonak.
c) Datuak biltzeko prozedura.
Prozesuari lotutako datu-base administratibo eta klinikoetatik eskuratuko dira datuak, eta programan sartutako haurren ordezkariek ematen dituztenetatik. Orobat, entitate pribatuen informazioa eskuratzen ahalko da.
d) Fitxategiaren oinarrizko egitura eta jasoko diren datu pertsonalak.
1. Haurra identifikatzeko datuak:
a. Historia klinikoaren zenbakia.
b. CIPNA zenbakia.
c. Izena eta bi abizen.
2. Haurraren identifikatzen ez duten datuak:
a. Jaioteguna eta ordua.
b. Jaitoerria (ospitalea, helbidea, bai Nafarroan bai Nafarroatik kanpo jaiotakoentzat).
c. Sexua.
3. Ama edo legezko tutorea identifikatzen duten datuak:
a. Izena eta bi abizen.
b. Amaren historia klinikoaren zenbakia eta CIPNA (haurra Osasunbidea-Nafarroako Osasun Zerbitzuaren ospitale batean jaio bada).
c. Bizilekuaren helbidea (Nafarroakoa izan edo beste autonomia erkidego batekoa izan).
d. Harremanetarako telefonoak.
4. Bereziki babestutako beste datu batzuk:
a. Pisua, haurdunaldiko denbora eta bahetze protokolo egokia aplikatzeko behar diren beste datu kliniko batzuk.
b. Egindako probak.
c. Emaitzak.
d. Tratamenduak.
e) Datu pertsonalak lagatzea.
Datuak Osasunbidea-Nafarroako Osasun Zerbitzuko osasun arloko informazio sistemekin partekatzen ahalko dira, haurrei egiten zaien jarraipena eta laguntza prozesuaren kalitatea bermatzearren.
Bestetik, informazioa ematen ahalko zaie Osasun Departamentuko eta bere erakunde autonomoetako (Osasunbidea-Nafarroako Osasun Zerbitzuko eta Nafarroako Osasun Publikoaren eta Lan Osasunaren Institutuko) langileei, behar bezala baimendutako ikerketa proiektuak egin daitezen.
f) Fitxategiaren ardura duen unitate organikoa.
Nafarroako Osasun Publikoaren eta Lan Osasunaren Institutua.
g) Datuak ikusi, zuzendu eta ezabatzeko eskubideaz baliatzeko nora jo, bidezkoa denean.
Nafarroako Osasun Publikoaren eta Lan Osasunaren Institutuko Detekzio Goiztiarraren Atalean erabiltzen ahalko dira datuak ikusi, zuzendu eta ezabatzeko eskubideak.
h) Fitxategi automatizatua edo eskuzkoa.
Automatizatua.
i) Segurtasun neurriak.
Goi mailari dagozkion segurtasun neurriak hartuko dira.
