(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

242/2015 FORU DEKRETUA, URRIAREN 14KOA, NAFARROAKO OSASUN PUBLIKOAREN ETA LAN OSASUNAREN INSTITUTUA ERAKUNDE AUTONOMOA SORTU ETA BERE ESTATUTUAK ONESTEN DITUEN UZTAILAREN 18KO 63/2012 FORU DEKRETUA ALDATZEN DUENA Nota de Vigencia

BON 22/10/2015; corr. err., BON 16/11/2015

  ERANSKINA

  NAFARROAKO OSASUN PUBLIKOAREN ETA LAN OSASUNAREN INSTITUTUA ERAKUNDE AUTONOMOAREN ESTATUTUAK

  I. TITULUA. IZAERA, ESKUMENAK ETA EGINKIZUNAK

  II. TITULUA. EGITURA ORGANIKOA

  I. KAPITULUA. ZUZENDARITZA ETA PARTAIDETZA ORGANOAK

  II. KAPITULUA. ZUZENDARITZA ORGANOAK

  1. ATALA. GOBERNU KONTSEILUA

  2. ATALA. ZUZENDARITZAKUDEATZAILETZA

  3. ATALA. ZUZENDARITZA BATZORDEA

  III. KAPITULUA. PARTAIDETZA ORGANOAK

  1. ATALA. NAFARROAKO LAN OSASUNAREN KONTSEILUA

  2. ATALA. BARRUTIETAKO ETA ESKUALDE OINARRIZKOETAKO OSASUN KONTSEILUAK

  3. ATALA. BATZORDE TEKNIKOA

  IV. KAPITULUA. ZERBITZUAK ETA ATALAK

  V. KAPITULUA. LANPOSTUAK BETETZEKO MODUA

  III. TITULUA. EGINTZEN ARAUBIDE JURIDIKOA, ERREKURTSOAK ETA OFIZIOZKO BERRIKUSPENA

  IV. TITULUA. ONDAREA, GIZA BALIABIDEAK ETA KONTRATAZIOA

  V. TITULUA. OGASUNA ETA AURREKONTUA

ATARIKOA

Osasunari buruzko azaroaren 23ko 10/1990 Foru Legeak Osasun Departamentuaren esku uzten ditu osasun publikoaren arloko eskumenak, Osasun Zuzendaritza Nagusiaren bidez, baita udalen esku ere. Bestetik, arau horren 33. artikuluak adierazten duenez, Osasun Zuzendaritza Nagusia da osasun publikoaren eta lan osasunaren eginkizunak erabiltzeko organo arduraduna.

Espainiako Konstituzioak, 40.2 artikuluan, botere publikoek laneko segurtasuna eta higienea zainduko dituztela ezartzen du; agindu hori administrazio publiko guztiei dagokie, bakoitzari bere eskumenen eremuan. Eskumen horiek ez dira lanaren esparrukoak bakarrik, beste eremu administratibo batzuetakoak ere bai; osasun eremukoak, besteak beste.

Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoak, 58.1.b) artikuluan, Nafarroari esleitzen dio Estatuaren lan arloko legeria betearaztea, eta haren esku uzten ditu lan harremanen gainean Estatuak zituen ahalmen, eskumen eta zerbitzu betearazleak, Estatuaren goi mailako ikuskapena galarazi gabe.

Nafarroako Foru Komunitateko Administrazioaren departamentuen egitura ezarri zuen Nafarroako Foru Komunitateko lehendakariak uztailaren 22an emandako 8/2015 Foru Dekretuan xedatutakoarekin bat, Osasun Departamentuari esleitzen zaizkio osasun publikoari eta lan osasunari buruzko gaiak, eta Garapen Ekonomikorako Departamentuari, berriz, lan harremanak sustatu eta antolatzeari buruzkoak.

Uztailaren 18ko 63/2012 Foru Dekretuaren bidez, Nafarroako Osasun Publikoaren eta Lan Osasunaren Institutua sortu eta bere estatutuak onetsi ziren.

Gaur egun, Nafarroako Gobernuak osasun publikoa sustatu nahi du, indarrean dagoen Osasun Planaren esparruan, osasunaren prebentzioaren eta sustapenaren ikuspegitik, osasun politikaren ardatz nagusi baita, osasun sistemaren jarduketak orientatu eta arrazionalizatzeko, gizarte osasuna indartzeko eta osasuna politika guztietan sostengatzeko. Ondorio horietarako, duten garrantzia eman nahi zaie osasunaren sustapenari eta prebentzioari, eta horretarako Epidemiologiaren, Aurreneurrien eta Osasun Sustapenaren Zerbitzua bi zerbitzutan bereizi da: Gizarte Osasuna Sustatzeko Zerbitzua eta Epidemiologiaren eta Osasun Prebentzioaren Zerbitzua.

Lan osasunaren arloko lantaldeen arteko osagarritasuna handitzeko, Laneko Segurtasun eta Higienerako eta Prestakuntzarako Zerbitzua eta Laneko Osasun eta Ikerketarako Zerbitzua zerbitzu bakarrean bateratu dira: Lan Osasunaren Zerbitzua.

Horrez gain, Gobernu Kontseiluaren osaera aldatu da Osasunbidea-Nafarroako Osasun Zerbitzukoaren osaerarekin parekatzeko, Osasun Departamentuko beste erakunde autonomoa baita.

Partaidetza organo berri bat eratu da, Batzorde Teknikoa, gardentasunaren eta profesionalen partaidetzaren esparru orokorrean.

Horrenbestez, Osasuneko kontseilariak proposaturik, eta Nafarroako Gobernuak 2015eko urriaren 14an egindako bilkuran harturiko erabakiarekin bat,

DEKRETATU DUT:

Artikulu Bakarra. Uztailaren 18ko 63/2012 Foru Dekretuaren aldaketa. Haren bidez, Nafarroako Osasun Publikoaren eta Lan Osasunaren Institutua sortu eta bere estatutuak onetsi ziren.

Nafarroako Osasun Publikoaren eta Lan Osasunaren Institutua sortu eta bere estatutuak onesten dituen uztailaren 18ko 63/2012 Foru Dekretuaren eranskina aldatzen da, erakunde autonomoari estatutu berriak emateko.

Lehen Xedapen Gehigarria. Izendapenak.

1. Foru dekretu honetan izena aldatu ez zaien burutzen izendapenak berresten dira, sortu ziren baldintza beretan.

2. Honako izendapen hauek berresten dira, egin ziren baldintza berberetan:

a) Eritasun Kutsakorrak Kontrolatzeko Ataleko buruarena, hemendik aurrera Zaintza Epidemiologikoaren eta Ikerketaren Ataleko burua izanen dena.

b) Lan arloko Balorazio Klinikoaren eta Ezintasunen Ataleko buruarena, hemendik aurrera Lan arloko Balorazio Klinikoaren eta Ikuskatzailetza Medikoaren Ataleko burua izanen dena.

c) Laneko Epidemiologia, Ikerketa eta Osasun Ebaluaziorako Ataleko buruarena, hemendik aurrera Laneko Medikuntza eta Lan Epidemiologiaren Ataleko burua izanen dena.

d) Administrazio eta Zerbitzu Orokorren Ataleko buruarena, hemendik aurrera Kudeaketa Ekonomikoaren Atala izanen dena.

Bigarren Xedapen Gehigarria. Ondasunak eta zerbitzuak kontratatzea informaziosistemen eta informatikazerbitzu eta aplikazioen arloan Nota de Vigencia.

Osasun Departamentuaren eta haren erakunde autonomoen esparruan, informazio-sistemen eta informatika-zerbitzu eta -aplikazioen arloan, Osasunbidea-Nafarroako Osasun Zerbitzua erakunde autonomoak erosiko ditu ondasunak eta zerbitzuak bere kontu-sailen kargura.

Hirugarren Xedapen Gehigarria. Osasun izaera.

Atal hauen osasun izaera mantentzen da: Esku-hartze Epidemiologikoaren eta Txertoen Atala, Zaintza Epidemiologikoaren eta Ikerketaren Atala, Detekzio Goiztiarraren Atala, Gizarte Osasunaren arloko Ikerketen Behatokiaren Atala eta Osasuna Sustatzeko eta Politika guztietan Txertatzeko Atala.

Lehen Xedapen Iragankorra. Ordainsariak.

1. 2015eko ekitaldirako, Nafarroako 2012ko Aurrekontu Orokorrei buruzko abenduaren 28ko 19/2011 Foru Legearen 7.2.a) artikuluan ezarritakoak izanen dira Gizarte Osasuna Sustatzeko Zerbitzuko buruaren ordainsariak eta Epidemiologiaren eta Osasun Prebentzioaren Zerbitzuko buruarenak.

2. 2015eko ekitaldirako, Nafarroako 2012ko Aurrekontu Orokorrei buruzko abenduaren 28ko 19/2011 Foru Legearen 7.2.b) edo d) artikuluan ezarritakoak izanen dira gainerako zerbitzuburuen ordainsariak.

Bigarren Xedapen Iragankorra. Diagnostiko medikorako X izpien instalazioen erregistroaren eginkizunak eta Diagnostiko medikorako X izpien instalazioak saldu eta laguntza teknikoa ematen duten enpresen erregistroarenak.

Behin-behinean, gaur egungo eskumenen banaketa aldatzen ez den bitartean, Ingurumen Osasunaren Atalak jarraituko du Diagnostiko medikorako X izpien instalazioen erregistroa kudeatzen, bai eta Diagnostiko medikorako X izpien instalazioak saldu eta laguntza teknikoa ematen duten enpresen erregistroa ere. Diagnostiko medikorako X izpien aparatuen instalazioari eta erabilerari buruzko Erregelamenduan (uztailaren 3ko 1085/2009 Errege Dekretuaren bidez onetsia) arautzen dira bi erregistro horiek.

Hirugarren Xedapen Iragankorra. Txandaketa Nafarroako Osasun Publikoaren eta Lan Osasunaren Institutuko Gobernu Kontseiluan.

Gobernu Kontseiluaren osaeran aurreikusita dagoen txandaketaren ondorioetarako, urtearen zenbaketaren hasieratzat hartuko da Gobernu Kontseiluaren lehenbiziko bileraren eguna, foru dekretu honek indarra hartu ondoren.

Laugarren Xedapen Iragankorra. Nafarroako Foru Komunitateko Administrazioko eta bere erakunde autonomoetako enplegatugaien osasun azterketa.

Lan Osasunaren Zerbitzuko Lan arloko Balorazio Klinikoaren eta Ikuskatzailetza Medikoaren Atalak Nafarroako Foru Komunitateko Administrazioko eta bere erakunde autonomoetako enplegatugaien osasun azterketen gaineko ardura izanen du 2016ko urtarrilaren 1etik aurrera. Azterketak foru dekretu honetan daude aurreikusita. Langileak hautatzeko prozeduretan aipatu egunean egiteke dauden osasun azterketak eginen ditu, prozedurak foru dekretu honek indarra hartu aurretik zein ondoren onetsi. Bitartean, Nafarroako Foru Komunitateko Administrazioaren eta haren erakunde autonomoen prebentzio zerbitzuek jarraituko dute osasun azterketa horiek egiten.

Xedapen Indargabetzaile Bakarra. Indargabetzen diren arauak.

Indarrik gabe uzten dira foru dekretu honetan ezarritakoari aurka egiten dioten maila bereko edo baxuagoko arau guztiak, deusetan galarazi gabe bigarren xedapen iragankorrean xedatutakoa.

Azken Xedapenetan Lehena. Garapena eta gauzatzea.

Osasun Departamentuko kontseilariari ahalmena ematen zaio foru dekretu hau aplikatu eta garatzeko behar diren xedapen guztiak eman ditzan.

Azken Xedapenetan Bigarrena. Egokitzeko ahalmenak.

Lehendakaritzako, Funtzio Publikoko, Justiziako eta Barneko kontseilariari, Ogasuneko eta Finantza Politikako kontseilariari eta Osasuneko kontseilariari ahalmena ematen zaie foru dekretu hau betetzeko behar diren aldaketak egin ditzaten plantilla organikoetan eta aurrekontuetan.

Azken Xedapenetan Hirugarrena. Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2015eko urriaren 14an.-Nafarroako Foru Komunitateko lehendakaria, Uxue Barkos Berruezo. Osasuneko kontseilaria, Fernando Domínguez Cunchillos.

NAFARROAKO OSASUN PUBLIKOAREN ETA LAN OSASUNAREN INSTITUTUA ERAKUNDE AUTONOMOAREN ESTATUTUAK

I. TITULUA. IZAERA, ESKUMENAK ETA EGINKIZUNAK

1. artikulua . Izaera.

Nafarroako Osasun Publikoaren eta Lan Osasunaren Institutua erakunde autonomo bat da, bere helburuak betetzeko nortasun juridikoa eta jarduteko ahalmen osoa dituena.

2. artikulua . Atxikipena.

1. Nafarroako Osasun Publikoaren eta Lan Osasunaren Institutua erakunde autonomoa, bere helburuak betetzeko, Nafarroako Gobernuak eta Osasun Departamentuak osasun arloko plangintzaz eta politikaz ematen dituzten jarraibideen menpe dago.

2. Nafarroako Osasun Publikoaren eta Lan Osasunaren Institutua erakunde autonomoa Osasun Zuzendaritza Nagusiari atxikitzen zaio.

3. Nafarroako Osasun Publikoaren eta Lan Osasunaren Institutuaren funtzionamenduari dagokionez, eginkizun hauek dagozkio Osasun Departamentuari:

a) Goi mailako zuzendaritza, kontrola, ebaluazioa, ikuskapena eta babesa.

b) Departamentuko kontseilariaren bidez, egitura organikoan zer aldaketa egiteko eskumena duen, haiek proposatzea Nafarroako Gobernuari, bai eta estatutuen aldaketak ere.

c) Departamentuko kontseilariak atalak baino maila apalagoko unitate organikoak sortu, aldatu eta kentzea, beharrezkoak badira egituraren eginkizunak hobeki garatzeko. Zuzendaritza-kudeatzailetzak eta Osasun Zuzendaritza Nagusiak proposatuko dute, antolaketaren eta funtzio publikoaren arloetako departamentu eskudunek txostena egin ondoren.

4. Orobat, Nafarroako Osasun Publikoaren eta Lan Osasunaren Institutua erakunde autonomoak lan arriskuen prebentzioaren eginkizuna beteko du, Nafarroako Gobernuan lan arloko eskumena duen departamentuari dagozkion eskumenak osoki errespetatuz.

3. artikulua . Xedea.

Nafarroako Osasun Publikoaren eta Lan Osasunaren Institutua honelako erakundea da:

a) Teknikoa eta osasun laguntzakoa, osasuna sustatzen eta osasun arazo kolektiboak zaintzen, prebenitzen eta haietan esku hartzen espezializatua.

b) Osasun zerbitzuen, beste sektore batzuen eta herritarren arteko itunen eta Gobernuko departamentuen arteko lankidetzaren bultzatzailea, osasuna politika guztietan txertatze aldera.

c) Aholku-emailea eta esku-hartzailea, alderdi teknikoen aldetik, lan osasunaren arloan, lan arriskuen prebentzioaren eta osasunaren babesaren esparruetan, nafarren lan-baldintzei dagokienez, Osasunari buruzko Foru Legearen 14. artikuluan jasotako gaietan.

4. artikulua . Eginkizunak.

1. Aurreko artikuluan aurreikusitakoa betetzearren, Nafarroako Osasun Publikoaren eta Lan Osasunaren Institutuak eginkizun hauek beteko ditu:

a) Osasuna babestu eta bultzatzeko programak prestatu, ebaluatu eta, zein den kasua, haiek gauzatu, Osasunari buruzko Foru Legearen 13. artikuluan jasotako arloetako osasun kontrola eta ikuskapena barne direla.

b) Zainketa, kontrola eta esku-hartze epidemiologikoa epidemia agerraldietan eta herritarren osasunerako izan daitezkeen arrisku egoeretan, banakoak edo kolektiboak izan, eta txertoen politikak eta programak.

c) Osasun publikoari buruzko informazio sistemak, bizi-estatistikak, erregistro sistemak, osasun arloko inkestak, arrisku faktoreak eta abar garatzea, herritar guztien zein arrisku handiak dituzten talde batzuen osasun egoeraren etengabeko ebaluazioa bideratzeko.

d) Eritasunak prebenitzeko programak, eta prozesu berariazkoen aurka borrokatzekoak.

e) Estrategien plangintza, zuzendaritza teknikoa, gauzatzea eta ebaluazioa arlo hauetan: osasunaren sustapena, osasun-hezkuntza eta esku-hartze komunitarioa, droga-mendekotasunen eta beste mendekotasun batzuen prebentzioa eta sexu- eta ugalketa-osasuna barne; eskuz esku lan eginen da oinarrizko osasun laguntzaren zerbitzuekin, gizarte zerbitzuekin, hezkuntza zerbitzuekin, Foru Komunitateko administrazio publikoen gainerako zerbitzuekin, gizarte entitateekin eta udal entitateekin, betiere Nafarroako Gobernuaren eta Osasun Departamentuaren jarraibideak errespetatuz.

f) Koordinazio lana egitea Oinarrizko Osasun Laguntza sarearekin, Nafarroako Foru Komunitateko osasun zerbitzuekin, Nafarroako udal- eta gizarte-entitateekin eta Foru Komunitateko Administrazioko beste departamentu batzuekin, departamentu arteko jarduketa bultzatuz osasuna politika guztietan txertatze aldera.

g) Osasun Departamentuaren osasun programak planifikatzen, prestatzen eta garatzen laguntzea.

h) Ikerketa eta irakaskuntzako jarduerak egitea bere eskumeneko gaietan, organismo eskudunekin koordinatuta.

i) Osasun Jardueren Ikuskapenerako Atalarekin elkarlanean, Segurtasun Nuklearreko Kontseiluak Nafarroari agindutako ikuskapen lanak burutzea.

j) Orokorrean, langileen osasun integrala prebenitu, babestu eta sustatzea, baita laneko arriskuen aurreneurri tekniko-sanitarioak ere, hala nola lan istripuak eta lanbideko eritasunak, bere zerbitzuen eta entitate laguntzaileekiko koordinazioaren bidez.

k) Arriskuak prebenitzeko jarduerak eta langileen lan arriskuen ondoriozko kalteen zainketa epidemiologikoa egiteko jarduerak kontrolatzea eta, hala badagokio, garatzea.

l) Enpresetan lan arriskuen izaera eta langileen esposizio-mailak ezagutzea.

m) Zaintza sistemak garatzea, laneko arrisku faktoreen ondoriozko erikortasuna eta hilkortasuna etengabe ezagutzeko.

n) Langileen prebentzio- eta osasun-eskubideak bermatzea lan osasunaren arloan.

ñ) Nafarroako langileen aldi baterako ezintasuna zaintzea eta kontrolatzea.

o) Lan arloko eskumena duen departamentuak arriskuen prebentzioaren arloan zehazten dituen jarduketak gauzatzea.

p) Prestakuntza- eta ikerketa-jarduerak garatzea osasun publikoaren eta lan osasunaren arloan.

q) Indarra duten xedapenek ematen dizkioten gainerako eginkizunak.

2. Institutuko langileak osasun arloko agintariak dira osasun arloko ikuskapen eginkizunak betetzen ari direnean.

II. TITULUA. EGITURA ORGANIKOA

I. KAPITULUA. ZUZENDARITZA ETA PARTAIDETZA ORGANOAK

5. artikulua . Zuzendaritza eta partaidetza organoak.

1. Hauek dira Institutuko zuzendaritza organoak:

a) Gobernu Kontseilua.

b) Zuzendaritza-kudeatzailetza.

c) Zuzendaritza Batzordea.

2. Hauek dira Institutuko partaidetza organoak:

a) Nafarroako Lan Osasunaren Kontseilua.

b) Barrutietako eta Eskualde Oinarrizkoetako Osasun Kontseiluak.

c) Batzorde Teknikoa.

II. KAPITULUA. ZUZENDARITZA ORGANOAK

1. ATALA. GOBERNU KONTSEILUA

6. artikulua . Gobernu Kontseiluaren osaera.

1. Gobernu Kontseilua kide hauek osatuko dute:

a) Kontseiluko burua: osasunaren arloan eskumena duen departamentuko kontseilaria.

b) Kontseiluko lehen buruordea: osasunaren arloan eskumena duen zuzendari nagusia.

c) Kontseiluko bigarren buruordea: lanaren arloan eskumena duen zuzendari nagusia.

d) Kontseilukideak, hizpidea eta botoa dituztela:

d.1) Unibertsitateaz kanpoko hezkuntzaren arloko zuzendari nagusia.

d.2) Gizarteratze eta babes sozialaren arloan eskumena duen zuzendari nagusia.

d.3) Nafarroako Kirolaren eta Gazteriaren Institutuko zuzendari kudeatzailea.

d.4) Nafarroako Udal eta Kontzejuen Federazioaren bi ordezkari.

d.5) Bi profesional, bata lan osasunaren arlokoa eta bestea gizarte osasunaren arlokoa, Nafarroako Gobernuak izendatuak, Nafarroako Osasunaren Kontseiluak proposatuta.

d.6) Osasunaren sustapenarekin zerikusia duten gizarte entitateen ordezkari bat. Urtero aldatuko da ordezkari hau, txandaka.

d.7) Nafarroako Lan Osasunaren Kontseiluan dauden sindikatuen ordezkari bat. Urtero aldatuko da ordezkari hau, txandaka.

d.8) Nafarroako Lan Osasunaren Kontseiluan dauden enpresaburuen erakundeen ordezkari bat. Urtero aldatuko da ordezkari hau, txandaka.

e) Kontseilukidea, hizpidea duena baina botorik ez:

Institutuko zuzendari kudeatzailea.

2. Osasun Departamentuko idazkari tekniko nagusia ariko da Gobernu Kontseiluko idazkari lanetan.

3. Gobernu Kontseiluko kideak kanpoan daudenean, beste pertsona batzuek ordezkatzen ahalko dituzte.

4. Kontseiluburuak proposatuta, haien ezagupenak, prestakuntza, izen ona edo bestelako inguruabarrak direla-eta, esku hartzeko egokitzat jotzen dituen pertsonek hartzen ahal dute parte Gobernu Kontseiluaren saioetan, hizpidea dutela baina botorik ez. Kasu horretan, dei berezia eginen zaie horretarako.

7. artikulua . Gobernu Kontseiluaren ahalmenak.

Gobernu Kontseiluari ondoko eskudantzia hauek dagozkio:

a) Txostena egitea Nafarroako Osasun Publikoaren eta Lan Osasunaren Institutuaren aurrekontuaren aurreproiektuari buruz.

b) Institutuaren jarduketarako irizpideak zehaztea, Osasun Departamentutik eta lan arloko departamentu eskudunetik emandako jarraibideen arabera, laneko arriskuen prebentzioari dagokionez.

c) Institutuaren urteko memoria onestea.

d) Institutuaren ekonomia eta kontabilitateko kudeaketaren inguruko agiriak eta kontuen egoera onetsi eta Osasun Departamentura igortzea.

e) Zuzendaritza-kudeatzailetzaren lana kontrolatu eta gainbegiratzea.

f) Institutuaren plan zuzentzaile orokorra eta jarduketa programak onestea eta Osasun Departamentura igortzea, Nafarroako Osasun Planaren barrenean sar daitezen.

8. artikulua . Gobernu Kontseiluaren funtzionamendua.

1. Gobernu Kontseiluak osoko bilkurak eginen ditu. Urtean behin, gutxienez, eginen du bilkura arrunta, baita larrialdietan ere, kontseiluburuak hala iritzita, edo kontseilukide titularren heren batek eskatuz gero.

2. Gobernu Kontseiluaren eraketak lehen deialdian balioa izan dezan, kontseiluburuak eta idazkariak, edo horien ordezkoek, eta kideen erdiek, gutxienez ere, egon beharko dute. Bigarren deialdian, eraketak balio izanen du kontseiluburua eta idazkaria, edo horien ordezkoak, eta bi kide elkartuz gero.

3. Kontseiluburuaren zereginak dira biltzeko deia egitea eta eguneko gai zerrenda finkatzea; idatzita prestatuko ditu berrogeita zortzi ordu lehenago, gutxienez ere.

4. Gobernu Kontseiluak barne funtzionamendurako araudia prestatzen ahalko du. Hori ezean, Nafarroako Foru Komunitateko Administrazioari buruzko abenduaren 3ko 15/2004 Foru Legearen III. tituluko III. kapituluan kide anitzeko organoentzat ezarritako arauak aplikatuko dira.

2. ATALA. ZUZENDARITZA-KUDEATZAILETZA

9. artikulua . Zuzendari kudeatzailea.

Zuzendari kudeatzailea Nafarroako Gobernuak libreki izendatu eta kargutik kenduko du, Osasun Departamentuko kontseilariak proposatuta, eta Nafarroako Gobernuaren eta Osasun Departamentuaren menpe egonen da zuzenean.

10. artikulua . Eskudantziak.

Nafarroako Osasun Publikoaren eta Lan Osasunaren Institutuko zuzendari kudeatzaileari eginkizun eta eskudantzia hauek dagozkio:

a) Institutua zuzentzea eta kudeatzea, eta haren ordezkaria izatea.

b) Gobernu Kontseiluaren erabakiak gauzatu eta betearaztea, baita Institutuaren jarduketa arautzen duten xedapenak betearaztea ere.

c) Institutuko unitate guztien helburuak eta emaitzak formulatu, kontrolatu eta ebaluatzea.

d) Institutuaren funtzionamenduari eta barne antolaketari buruzko ebazpenak, jarraibideak eta zirkularrak ematea, eta erakunde autonomoak jarduteko behar dituen egintza administratiboak betearazteko agintzea.

e) Helburu eta xedeen kontratu programa izenpetzea Osasun Departamentuarekin.

f) Institutuaren transferentzietako eta funtzionamenduko gastu eta ordainketak egiteko baimena ematea, ogasun publikoari buruzko arau indardunei jarraikiz.

g) Institutuaren urteko memoria prestatzea.

h) Aurrekontu eta helburuei buruzko urteko behin-behineko agiria egitea eta aurrekontuen aurreproiektuaren zirriborroa prestatzea.

i) Hobeki funtziona dezan, bidezkotzat iruditzen zaizkion aldaketak proposatzea Osasuneko zuzendari nagusiari Institutuaren egitura organikorako, tramiterako onar ditzan.

j) Lan metodoak hobetzeaz, berrikuntza teknologiko egokiak sartzeaz, zentroak, eraikinak, instalazioak eta ekipamenduak zaintzeaz eta diru-sarrera eta gastuak hobetzeaz arduratzea.

k) Indarra duen araudiak kontratu publikoei buruz erakunde autonomoen ordezkariei esleitzen dizkien ahalmenak erabiltzea.

l) Hitzarmen eta itunak egin, aldatu eta hutsaltzea beste entitate eta erakundeekin, indarra duen araudiak ezarritako mugen barrenean.

m) Erakundearen irudi korporatiboaren programak planifikatu eta koordinatzea, eta erakundeak beste erakunde batzuekin dituen harremanak bideratzea.

n) Auzibide zibilera eta lan arloko auzibidera jo aurreko erreklamazioen gainean ebaztea, langileen arloko erreklamazioen gainean izan ezik.

ñ) Institutuari dagozkion ondare-erantzukizuneko prozedurak ebaztea.

o) Institutuari atxikitako ondarea kudeatu eta erabiltzea, ondasunen titulartasuna erabiltzeko egintzak izan ezik, horien eskumena bestelako organo edo entitateei dagokienean.

p) Ebazpen judizialak betearazteko agintzea, eskumena Institutuarena denean.

q) Gobernu Kontseiluak edo Osasuneko zuzendari nagusiak agintzen ahal dioten beste edozein.

11. artikulua . Langileriaren arloko eskudantziak.

1. Langileriaren arloan, zuzendari kudeatzaileak eskudantzia hauek izanen ditu berariaz:

a) Langileak zuzendu eta antolatzeko eskumenak erabiltzea, haien mailarekin eta izendapenarekin bat datozen eginkizunak banatzekoak barne.

b) Osasunbidea-Nafarroako Osasun Zerbitzuari atxikiriko langileen berariazko araubideari buruzko legediarekin bat, estamentu eta espezialitateen eranskineko osasun arloko izendapenak dituzten lanpostuetan sartzeko deialdiak onetsi eta tramitatzea.

c) Lanpostuak betetzeko deialdiak onetsi, tramitatu eta ebaztea.

d) Aldi baterako langileak kontratatzeko deialdiak onetsi, tramitatu eta haien gainean ebaztea, bai araubide administratibokoak, bai lan araubidekoak, aurrekontuetan dagoen diruaren arabera, Funtzio Publikoaren arloko eskumena duen departamentuak ezartzen dituen jarraibideei eta segimendu eta kontrolerako prozedurei lotuz.

e) Aldi baterako barne igoera egiteko hautapen proben deialdiak onetsi, tramitatu eta ebaztea.

f) Institutuaren plantilla organikoaren gaineko proposamenak, lanpostuen zerrendaren gainekoak eta enplegu eskaintzaren gainekoak egitea, eta Funtzio Publikoaren arloan eskumena duen departamentuari igortzea, organo eskudunak tramita eta onets ditzan.

g) Zerbitzu berezietan edo eszedentzia berezian egonda, jardunean hasteko eskaerak ebaztea.

h) Institutuari atxikitako unitate organikoen burutzak betetzeko bitarte baterako izendapenak egitea eta, hala badagokio, haiek kargutik kentzea, erregelamenduzko sistemaren bidez betetzen diren bitartean.

i) Erakunde autonomoaren burutzetako titularrak izendatu eta kentzea proposatzea, eskumena departamentuko kontseilariarena izanik.

j) Zuzenean zuzendari kudeatzailearen menpe diren administrazio organoetako titularrak aldi baterako ordeztuko dituztenak ebazpen bidez izendatzea, kargua hutsik dagoenean edo titularra kanpoan edo eri dagoenean edo ezintasun pertsonalen bat duenean.

k) Diziplina arloko espedienteak irekitzea hutsegite oso larriak egiteagatik, eta ebazpen proposamena prestatzea Nafarroako Gobernuari, eta diziplina arloko zehapenak ireki eta ezartzea hutsegite larriak eta arinak egiteagatik.

l) Langileak behin-behineko eginkizun gabetzea deritzon egoeran deklaratzea.

m) Urteko oporretako plana, lanaldiak eta ordutegiak onestea, Nafarroako Gobernuak onesten duen araubide orokorrarekin bat.

n) Funtzio Publikoaren arloan eskumena duen departamentuak giza baliabideei buruz emandako jarraibideak aplikatzea.

2. Arlo honetan, unitate organikoen arduradunei dagozkie eginkizun hauek, atxikita dituzten langileei buruz:

a) Ordutegia, dedikazioa eta errendimendua bete daitezen eskatzea, eta absentismoa kontrolatzea.

b) Langileekin komunikatzeko prozesuak erraztu eta bultzatzea, baita laneko giro ona, errendimendua eta produktibitatea ere.

c) Beren unitateari atxikitako langileen jarduerak, lanak eta eginkizunak zuzendu eta koordinatzea, eta haiei lanpostua, txanda eta lanaldia esleitzea.

d) Beren unitateari atxikitako langileen baimenak, lizentziak, oporrak eta joan-etorriak baimentzea.

12. artikulua . Eskuordetza eta ordezkapena.

1. Zuzendari kudeatzaileak bere eskudantzietako batzuk Institutuko zerbitzuetako zuzendariei eskuordetzen ahal dizkie, Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoarekin bat.

2. Zuzendari kudeatzailearen kargua hutsik edo hura kanpoan edo eri dagoenean edo beste edozein arrazoi justifikatu dagoenean, erakunde autonomoaren zerbitzuetako zuzendariek ordeztuko dute, ondoko lehentasun hurrenkeraren arabera:

a) Elikagaien Segurtasunaren eta Ingurumen Osasunaren Zerbitzuko zuzendaria.

b) Epidemiologiaren eta Osasun Prebentzioaren Zerbitzuko zuzendaria.

c) Gizarte Osasuna Sustatzeko Zerbitzuko zuzendaria.

d) Lan Osasunaren Zerbitzuko zuzendaria.

e) Kudeaketa Ekonomikoaren eta Profesionalen Zerbitzuko zuzendaria.

3. ATALA. ZUZENDARITZA BATZORDEA

13. artikulua . Zuzendaritza Batzordea.

1. Zuzendaritza Batzorde bat eratzen da, honako kide hauekin: zuzendari kudeatzailea, zerbitzuetako zuzendariak eta, tratatu beharreko gaien arabera, bidezko atalburuak.

2. Institutuaren jarduerak koordinatu eta haiei jarraipena egiteko organo gisa eratzen da Zuzendaritza Batzordea, jarduketa integrala eta kohesionatua berma dadin osasunaren prebentzio eta babes arloan.

III. KAPITULUA. PARTAIDETZA ORGANOAK

1. ATALA. NAFARROAKO LAN OSASUNAREN KONTSEILUA

14. artikulua . Nafarroako Lan Osasunaren Kontseiluaren osaera.

1. Nafarroako Lan Osasunaren Kontseilua lan osasunaren arloko partaidetza organoa da, eta kide hauek ditu:

a) Kontseiluko burua eta buruordea: osasun eta lan arloko eskumena duten zuzendari nagusiak, urtebetez eta txandaka ariko baitira kargu horietan.

b) Idazkaria: Lan Osasunaren Zerbitzuko zuzendaria.

c) Kontseilukideak:

c.1) Nafarroako Osasun Publikoaren eta Lan Osasunaren Institutuko zuzendari kudeatzailea.

c.2) Osasun arloan eskumena duen departamentuko kontseilariak libreki izendatutako pertsona bat.

c.3) Lan arloko eskumena duen departamentuko kontseilariak libreki izendatutako pertsona bat.

c.4) Lau pertsona, Nafarroako Ekonomia eta Gizarte aferen Kontseiluan parte hartzeko eskubidea duten sindikatuek izendatuak, ordezkagarritasunaren proportzioan.

c.5) Bost pertsona, Nafarroako Ekonomia eta Gizarte aferen Kontseiluan parte hartzeko eskubidea duten enpresaburuen erakundeek izendatuak, ordezkagarritasunaren proportzioan.

c.6) Pertsona bat, autonomoen elkarteek izendatua.

2. Laneko Ikuskatzailetzaren ordezkari batek hartuko du parte, hizpidea duela baina botorik ez.

3. Beste pertsona batzuk aritzen ahalko dira Kontseiluko kideen ordez.

15. artikulua . Eginkizunak eta funtzionamenduaren araubidea.

1. Nafarroako Lan Osasunaren Kontseiluaren eginkizuna izanen da lan osasunari loturiko kudeaketa planifikatu, programatu, antolatu eta kontrolatzen parte hartzea, eremu eta maila desberdinetan.

2. Kontseiluak bilkura arrunta eginen du, lau hiletik behin gutxienez, eta bilkura berezia kontseiluburuak deitzen duen aldiro, bai bere ekimenez bai kideen gehiengoak eskatuta.

3. Kontseiluak edozein unetan eskatzen ahalko du zenbait jenderen aholkua, dituzten ezagupen, prestakuntza, izen on edo bestelako inguruabarrak direla medio haien partaidetza egokitzat jotzen baldin badu. Kasu horretan, dei berezia eginen zaie horretarako.

4. Kontseiluak barne funtzionamendurako erregelamendua prestatzen ahalko du.

5. Kontseiluaren funtzionamenduaren araubideari buruz foru dekretu honetan eta barne erregelamenduan (aurreko atalean aipatua) aurreikusten ez den hartan, Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoa aplikatuko da.

16. artikulua . Batzordeen eraketa.

Nafarroako Lan Osasunaren Kontseiluak beharrezkotzat jotzen dituen batzordeak -sektorekoak, lurraldekoak edo gaikakoak- eratzen ahalko ditu, aldi baterako edo modu iraunkorrean, bere helburuak hobeki betetzearren.

2. ATALA. BARRUTIETAKO ETA ESKUALDE OINARRIZKOETAKO OSASUN KONTSEILUAK

17. artikulua . Barrutietako eta Eskualde Oinarrizkoetako Osasun Kontseiluak.

Barrutietako eta Eskualde Oinarrizkoetako Osasun Kontseiluak osasun publikoaren arloko partaidetza organoak dira, eta haien osaera eta eginkizunak Osasunbidea-Nafarroako Osasun Zerbitzua erregulatzen duten arauetan ezartzen dira.

3. ATALA. BATZORDE TEKNIKOA

18. artikulua . Batzorde Teknikoaren osaera.

Batzorde Teknikoak kide hauek izanen ditu:

a) Institutuko atalen ordezkari bana, unitate bakoitzeko kideek hautatua.

b) Kudeaketa Ekonomikoaren eta Profesionalen Zerbitzuko zuzendaria.

c) Zuzendari kudeatzailea.

19. artikulua . Eginkizunak eta funtzionamenduaren araubidea.

1. Batzorde Teknikoak aholkularitza eta proposamenak eskainiko dizkio zuzendari kudeatzaileari Institutuko eskumen, funtzionamendurako mekanismo eta laneko giroari buruz.

2. Batzordea gutxienez ere lau hiletik behin bilduko da, zuzendari kudeatzaileak deituta edo kideen gehiengoak eskatuta.

IV. KAPITULUA. ZERBITZUAK ETA ATALAK

20. artikulua . Zerbitzuak eta atalak.

Institutuak zerbitzu hauek ditu bere egituran:

a) Gizarte Osasuna Sustatzeko Zerbitzua.

b) Epidemiologiaren eta Osasun Prebentzioaren Zerbitzua.

c) Lan Osasunaren Zerbitzua.

d) Elikagaien Segurtasunaren eta Ingurumen Osasunaren Zerbitzua.

e) Kudeaketa Ekonomikoaren eta Profesionalen Zerbitzua.

21. artikulua . Zerbitzuburuak.

Zerbitzuburuak Osasunbidea-Nafarroako Osasun Zerbitzuko zerbitzuburuentzat ezarritako baldintza beretan izendatu eta kenduko dira kargutik.

22. artikulua . Gizarte Osasuna Sustatzeko Zerbitzuaren eginkizunak.

1. Gizarte Osasuna Sustatzeko Zerbitzua Nafarroako osasun sistemak duen organo tekniko gorena da osasunaren sustapenean eta osasun-hezkuntzan; gainera, erreferentziako zentro teknikoa da osasun kolektiboko informazio iturri eta adierazleetan, baita bizi estatistika demografikoetan ere.

2. Gizarte Osasuna Sustatzeko Zerbitzuak ondoko eginkizunak izanen ditu:

a) Nafarroako Osasun Publikoaren Behatokia abiaraztea eta mantentzea, lurraldean oinarrituta, osasun aktiboak, arrisku faktoreak eta herritarren osasun egoeraren determinatzaile eta adierazleak etengabe ebaluatzeko, bai eta arrisku handia duten kolektiboenak ere.

b) Eritasun ez kutsakorren erikortasunaren eta hilkortasunaren azterketa eta kontrol epidemiologikoa.

c) Eritasun ez kutsakorren informazio epidemiologikoari buruzko sareak mantentzea, osasun laguntzari eta erakunde nazionalei zein nazioartekoei loturik.

d) Zehazten diren prozesuen gaineko populazio erregistroak ezartzea.

e) Osasunaren arloko desberdintasunen jarraipena eta azterketa egitea, Plangintzarako, Ebaluaziorako eta Ezagutza Kudeatzeko Zerbitzuarekin bat.

f) Osasun inkestak prestatzea eta/edo haien jarraipena egitea, bai eta planak eta programak formulatzeko behar diren datuak lortzeko beste iturri batzuk ere.

g) Osasun arloko estatistikei buruzko informazio iraunkorra izatea, Nafarroako Gobernuko informatika eta estatistika zerbitzuei loturik.

h) Bizimodu eta ingurune osasungarriak sustatzea, eta osasuna sustatzeko estrategiak (Nafarroako Osasun Planean ezarritakoak) sostengatzea, aro guztietarako: helduaroa, zahartzaroa, haurtzaroa, nerabezaroa eta gaztaroa.

i) Departamentu arteko jarduketa eta osasun estrategia sustatzea politika guztietan.

j) Osasunaren sustapenaren eta osasun-hezkuntzaren arloko plan eta programen plangintza, garapena eta ebaluazioa egitea, osasun arloko informazio, komunikazio eta gizarte ekintzarako estrategiak eta neurri tekniko, politiko eta ekonomikoak barne, eta dagozkion diru-laguntzak kudeatzea.

k) Osasuna sustatzeko agintzen zaizkion programak, herritarrei zuzeneko arreta ematekoak, bere baliabideekin garatzea.

l) Osasunaren arloko esku-hartze komunitariorako estrategiak sustatu eta sostengatzea, lankidetza sustatuz toki entitateekin, osasunaren, gizartearen eta hezkuntzaren arloetako oinarrizko laguntza sareekin eta Foru Komunitateko administrazio publikoen gainerako zerbitzuekin.

m) Berdintasuna bultzatzea osasunean, arrisku bereziko edo ahultasun handiko taldeentzat edo egoerentzat bideratutako jarduketak garatuz.

n) Osasunaren sustapen, hezkuntza eta informazioko metodologia garatzea, osasun sistemaren plan eta programak abiarazteko.

ñ) Hezkuntza Departamentuarekin elkarlanean aritzea osasun-hezkuntza hezkuntza eremuan garatzeko.

o) Profesionalak prestatzeko jarduketak egitea eta informazio eta hezkuntza arloko protokolo eta materialak prestatzea, osasunaren sustapenerako; orobat, laguntza teknikoa eta lankidetza ematea osasunaren sustapen jardueretan, osasun sistemak, Nafarroako Gobernuko beste departamentu batzuek eta gizartearen beste sektore eta entitate batzuek eskatuta.

p) Pazienteen eskola eta osasun eskola garatzea, bereziki zaintzaileen artean norberaren zainketak eta haientzako laguntza estrategiak sustatuz profesionalentzako, pazienteentzako eta zaintzaileentzako prestakuntzaren bidez.

q) Droga-mendekotasunen eta beste mendekotasun batzuen aurkako Foru Planaren plangintza, koordinazioa eta ebaluazioa egitea.

r) Sexu- eta ugalketa-osasunerako hezkuntza eta sustapen jarduera esleituen plangintza, koordinazioa eta ebaluazioa egitea.

s) Agintzen ahal dioten beste edozein eginkizun.

23. artikulua . Gizarte Osasuna Sustatzeko Zerbitzuaren egitura.

Gizarte Osasuna Sustatzeko Zerbitzuak atal hauek ditu bere egituran:

a) Gizarte Osasunaren arloko Ikerketen Behatokiaren Atala.

b) Osasuna Sustatzeko eta Politika guztietan Txertatzeko Atala.

24. artikulua . Gizarte Osasunaren arloko Ikerketen Behatokiaren Atalaren eginkizunak.

Gizarte Osasunaren arloko Ikerketen Behatokiaren Atalak foru dekretu honetan aipatzen diren eginkizunak beteko ditu arlo hauetan: erikortasunaren eta hilkortasunaren zaintza eta azterketa epidemiologikoak, osasun egoeraren adierazleak, arrisku faktore determinatzaileak eta osasun aktiboak.

25. artikulua . Osasuna Sustatzeko eta Politika guztietan Txertatzeko Atalaren eginkizunak.

Osasuna Sustatzeko eta Politika guztietan Txertatzeko Atalak foru dekretu honetan aipatzen diren eginkizunak beteko ditu arlo hauetan: bizimodu eta ingurune osasungarrien sustapena biziaro eta eremu ezberdinetan, osasun-hezkuntza, berdintasuna osasunean eta osasuna politika guztietan txertatzea.

26. artikulua . Epidemiologiaren eta Osasun Prebentzioaren Zerbitzuaren eginkizunak.

1. Epidemiologiaren eta Osasun Prebentzioaren Zerbitzua Nafarroako osasun sistemak duen organo tekniko gorena da eritasun kutsakorren metodologia epidemiologikoan eta detekzio goiztiarrean.

2. Epidemiologiaren eta Osasun Prebentzioaren Zerbitzuak eginkizun hauek beteko ditu:

a) Nafarroako Osasun Planean ezarrita dauden eta esleitzen zaizkion prebentzioko estrategiak eta programak gauzatzea.

b) Nafarroako zaintza epidemiologikorako sistemak eta haien komunikazioa eremu nazionalean kudeatzea, eta lotutako ikerketa motak garatzea.

c) Prozesu infekziosoen erikortasuna eta hilkortasuna etengabe aztertzea, baita haien zergatiak eta bilakaera ere, denbora, tokia eta jendearen ezaugarriak kontuan hartuta.

d) Eritasun infekziosoen esku-hartzea eta kontrol epidemiologikoa, eta erantzuna koordinatzea edozein izaera biologiko, fisiko edo kimikotako kanpoko epidemien aurrean.

e) Esku-hartze teknikoa eta pertsonen gaineko jarduketa, eta baliabide materialak jartzea osasunerako arrisku berehalakoaren kasuan.

f) Haurrak eta helduak txertatzeko programak planifikatu eta ebaluatzea, baita egoera epidemiologiko jakin batzuetarako diseinatzen direnena ere, immunizatu, erregistratu, jarraipena egin eta txertoen estaldurak eta kontrako erreakzio erantsienak egiteko egutegiak eta estandarrak prestatzea barne.

g) Erabakitzen diren eritasun ez kutsakorren populazio erregistro izendunak ezartzea eta mantentzea.

h) Eritasun ez kutsakorren informazio epidemiologikoari buruzko sareak mantentzea, osasun laguntzari eta erakunde nazionalei zein nazioartekoei loturik.

i) Ofizialki onartutako osasun prestazio gisa, herritarrentzat egiten diren detekzio goiztiarreko jardueren prozesua eta emaitzak planifikatu, programatu, jarraipena egin eta kontrolatzea.

j) Agintzen zaizkion detekzio programak garatzea bere baliabideekin.

k) Laguntza teknikoa ematea detekzio goiztiarrerako jarduerak ezarri eta ebaluatzeko metodoetan.

l) Osasun laguntzako zentroekin elkarlanean eta modu koordinatuan aritzea, zerbitzuko jarduerei dagokienez.

m) Ikerketa epidemiologiko eragingarria garatzea, ikertzaile berrien prestakuntza sustatzea eta nazioko eta nazioarteko ikerketa sareetan sartzea.

n) Agintzen ahal dioten beste edozein eginkizun.

27. artikulua . Epidemiologiaren eta Osasun Prebentzioaren Zerbitzuaren egitura.

Epidemiologiaren eta Osasun Prebentzioaren Zerbitzuak atal hauek ditu bere egituran:

a) Zaintza Epidemiologikoaren eta Ikerketaren Atala.

b) Esku-hartze Epidemiologikoaren eta Txertoen Atala.

c) Detekzio Goiztiarraren Atala.

28. artikulua . Zaintza Epidemiologikoaren eta Ikerketaren eginkizunak.

Zaintza Epidemiologikoaren eta Ikerketaren Atalak foru dekretu honetan aipatzen diren eginkizunak beteko ditu arlo hauetan: erregistroak, zaintza epidemiologikoa, informazio sareak eta ikerketa.

29. artikulua . Eskuhartze Epidemiologikoaren eta Txertoen Atala.

Esku-hartze Epidemiologikoaren eta Txertoen Atalak foru dekretu honetan aipatzen diren eginkizunak beteko ditu arlo hauetan: esku hartzea, kontrola eta erantzunen koordinazioa edonolako epidemietan eta osasunerako arrisku berehalakoaren egoeretan, eta haurrak eta helduak txertatzeko programak.

30. artikulua . Detekzio Goiztiarraren Atalaren eginkizunak.

Detekzio Goiztiarraren Atalak foru dekretu honetan aipatzen diren eginkizunak beteko ditu arlo hauetan: herritarrentzako detekzio goiztiarraren jarduerak eta programak, prebentzioko beste programa batzuei laguntza ematea eta lotutako ikerketa epidemiologikoa.

31. artikulua . Lan Osasunaren Zerbitzuaren eginkizunak.

Lan Osasunaren Zerbitzuak honako eginkizun hauek beteko ditu:

a) Laneko arriskuak eta haien prebentzioa ezagutzea eta ikertzea Nafarroako langileen artean, maiztasunaren, esposizioaren garrantziaren eta ondorioen larritasunaren arabera.

b) Enpresetan lan arriskuen prebentzio zerbitzuek edo prebentzioko beste baliabide batzuek egiten dituzten prebentzioko jarduerak, teknikak eta osasun arlokoak kontrolatu eta ebaluatzea eta haien gaineko aholkularitza ematea.

c) Lan istripuak ikertu eta behar diren txostenak prestatzea, gero organismo eskudunari igortzeko.

d) Lan arriskuen prebentzioari buruzko aholkularitza ematea enpresei, prebentzioko entitateei, instituzioei eta erakundeei, haiek eskatzen badute, gai hauetan: tokiak, lokalak, instalazioak, makinak, babes ekipamenduak, produktuak, lanpostuak, lanaren antolaketa eta lan harremanak.

e) Prebentzioko zeregin teknikoak garatzea 25 langiletik beherako enpresetan, haien laneko gertakizunen kudeaketa GSINi atxikita badute, Prebentzio Zerbitzuen Erregelamendua onartzen duen urtarrilaren 17ko 39/1997 Errege Dekretuaren I. eranskineko jarduerak egiten ez badituzte eta aukera hori beren borondatez aukeratzen badute.

f) Enpresak eta lantokiak egiaztatu eta kontrolatzeko eginkizunak betetzea, otsailaren 4ko 138/2000 Errege Dekretuaren 61.1 artikuluko a), b), c), d) eta f) letretan aipatzen diren segurtasun eta osasun arloko teknikei edo laneko baldintza materialei buruz. Dekretu horren bidez, Laneko eta Gizarte Segurantzako Ikuskatzailetzaren antolaketa eta funtzionamendurako erregelamendua onetsi zen.

g) Prebentzioaren gainean behar diren txostenak egitea lantoki berriak sortzen direnean, jarduera berriro hasi edo aldatzen denean, lekualdaketetan edo beste arrazoiren bat dagoenean, gero organismo eskudunari igortzeko.

h) Prestakuntza jardueren informazioa eta garapena bultzatu eta sustatzea eta haien inguruko aholkularitza ematea langileei, enpresaburuei, haien erakundeei, prebentzioaren arloko profesionalei, hezkuntza sistemari edo beste entitate batzuei, lan arriskuen eta kalteen prebentzioari buruz eta langileen osasunaren sustapenari buruz.

i) Eskatzen duten entitateek laneko arriskuen prebentzioari buruz prestakuntza emateko baldintzak betetzen ote dituzten gaineko proposamen-txostena egitea, Laneko Agintaritzak prestakuntza-entitatea izateko egiaztapena eta baimena eman aurretik.

j) Eskatzen duten instituzio eta erakundeei laguntza teknikoa emateko behar diren jarduketak garatzea, bere eskumeneko gaietan; bereziki Nafarroako Gobernuko Garapen Ekonomikorako Departamentuko zuzendaritza nagusi egokiari eta Laneko Ikuskatzailetzari.

k) Nafarroako Foru Komunitateko Administrazioko eta bere erakunde autonomoetako prebentzio zerbitzuen auditoretza eta kontrola egitea, Lan Arriskuen Prebentzioaren gaineko legedia Estatuko Administrazio Orokorrari egokitzeari buruzko urtarrilaren 29ko 67/2010 Errege Dekretuaren eta Laneko arriskuei aurrea hartzeko araudia Nafarroako Foru Komunitateko Administrazioaren eta haren erakunde autonomoen esparrura egokitzen duen apirilaren 20ko 135/1998 Foru Dekretuaren babesean.

l) Kontingentzia mota zehazteko txostenak prestatzea, laneko kontingentziak GSINekin edo Nafarroako Gobernuaren autoaseguratzailearekin aseguratu dituzten langileen kasuan.

m) Laneko eta lanari lotutako lesioak eta eritasunak ikertzeko zaintza epidemiologikoaren sistema kudeatzea, eta lanbide lesio eta eritasunen edo lanari lotutakoen zergatiak aztertu eta ikertzea.

n) Koordinazioa eta jarduketak batera egitea lan arloko profesionalen eta osasun zerbitzuen eta Osasunbidea-Nafarroako Osasun Zerbitzuko Oinarrizko Osasun Laguntzako eta Laguntza Espezializatuko osasun laguntzako mailen artean.

ñ) Osasuna zaintzeko berariazko protokoloak prestatzen, egokitzen eta hedatzen lan egitea agintari eskudunekin.

o) Prebentzio zerbitzuen aholkularitza eta jarraipena egitea langileen osasunaren zaintzaren arloan, banakoa edo kolektiboa izan.

p) Enpresak eta lantokiak egiaztatu eta kontrolatzea, otsailaren 4ko 138/2000 Errege Dekretuaren 61.1. e) artikuluan aipatzen diren segurtasun eta osasun arloko teknikei edo laneko baldintza materialei buruz. Dekretu horren bidez, Laneko eta Gizarte Segurantzako Ikuskatzailetzaren antolaketa eta funtzionamendurako erregelamendua onetsi zen.

p) Lanerako ezintasuna bere modu guztietan zaindu, kontrolatu eta ebaluatzea, Lehendakaritza eta Barneko kontseilariaren abenduaren 5eko 703/1996 Foru Aginduan jasotako aldi baterako ezintasun egoerak eta baja eta altak kontrolatzeko prozedurak barne direla, eta langileei informazioa, aholkuak eta laguntza ematea ezintasunei loturiko alderdien gainean.

r) Aldi baterako ezintasunaren prozesuen gaineko informazio eta azterketa sistemak ezarri eta mantentzea, nagusiki aldi baterako ezintasunaren lan eta gizarte arloetako determinatzaileak ezagutzeko eta haietan esku hartzeko.

s) Aholkularitza eta laguntza teknikoa emateko behar diren jarduketak garatzea, eskatzen duten instituzio eta erakunde publiko eta pribatuekin elkarlanean, laneko ezintasunei dagokienez, aldi baterako ezintasunaren prestazioan Osasunbidea-Nafarroako Osasun Zerbitzuko Oinarrizko Osasun Laguntzako, Laguntza Espezializatuko eta Osasun Mentaleko osasun laguntzako mailen artean lankidetza sustatuz bereziki.

t) Nafarroako Foru Komunitateko Administrazioaren eta haren erakunde autonomoen zerbitzuan dauden langileen ikuskatzailetza medikoa egin eta, besteak beste, alta medikoak ofizioz emateko eginkizunetan, Nafarroako Lan Osasunaren Institutua aritzeko prozedura arautzen duen ekainaren 28ko 203/1993 Foru Dekretuan ezarritako eginkizunak betetzea. Besteak beste, Nafarroako Foru Komunitateko Administrazioaren eta haren erakunde autonomoen zerbitzuan dauden langileei alta medikoak ofizioz emateko eginkizuna, eta Nafarroako Lan Osasunaren Institutuari Nafarroako Ospitaleko Epaimahai Medikoaren eskumenak transferitzen dizkion eta ezintasun egoerak ebaluatzeko prozedura arautzen duen urtarrilaren 31ko 27/1994 Foru Dekretuan ezarritakoak.

u) Nafarroako Foru Komunitateko Administrazioko eta bere erakunde autonomoetako enplegatugaien osasun azterketak egitea.

v) Gizarte Segurantzari laguntza ematen dioten mutualitateen osasun jarduketak ebaluatzea eta haien jarraipena eta aholkularitza egitea, kontingentzia arrunten, kontingentzia profesionalen eta haurdunaldirako eta edoskitzerako lan arriskuen kasuetan.

w) Prestakuntza eta Informazio Unitatearekin bat, aldi baterako ezintasunaren kudeaketari eta Gizarte Segurantzaren sistemaren prestazioei lotutako prestakuntza programen plangintza egitea.

x) Arlo hauetako espezialisten prestakuntzan parte hartzea: Lan arloko Medikuntza eta Erizaintza, Familia- eta Komunitate-Medikuntza, Prebentzio Medikuntza eta Osasun Publikoa eta zerbitzu honen laguntza eskatzen duten beste espezialitate batzuk.

y) Agintzen ahal dioten beste edozein eginkizun.

32. artikulua . Lan Osasunaren Zerbitzuaren egitura.

Lan Osasunaren Zerbitzuak atal hauek ditu bere egituran:

a) Laneko Arriskuei Aurrea Hartzeko Atala.

b) Laneko Medikuntzaren eta Lan Epidemiologiaren Atala.

c) Lan arloko Balorazio Klinikoaren eta Ikuskatzailetza Medikoaren Atala.

33. artikulua . Laneko Arriskuei Aurrea Hartzeko Atalaren eginkizunak.

Laneko Arriskuei Aurrea Hartzeko Atalak foru dekretu honetan aipatzen diren eginkizunak beteko ditu arlo hauetan: lan arriskuak identifikatu, ebaluatu eta programatzea eta haien aurkako esku-hartze tekniko edo antolakuntzakoak egitea, prebentzio zerbitzuen prebentzioko jarduketak gauzatzea eta lan istripuak ikertzea.

34. artikulua . Laneko Medikuntzaren eta Lan Epidemiologiaren Atalaren eginkizunak.

1. Laneko Medikuntzaren eta Lan Epidemiologiaren Atalak foru dekretu honetan aipatzen diren eginkizunak beteko ditu arlo hauetan: lanaren ondoriozko kalteak (alderdi epidemiologikoak eta haien jatorriaren ikerketa) eta langileen osasunaren zaintza.

2. Atal hau organismo eskuduna da Gizarte Segurantzako Sisteman gaixotasun profesionalen taula onartu eta horiek jakinarazi eta erregistratzeko irizpideak ezartzen dituen azaroaren 10eko 1299/2006 Errege Dekretuaren 5. artikuluan ezarritakoaren ondorioetarako.

35. artikulua . Lan arloko Balorazio Klinikoaren eta Ikuskatzailetza Medikoaren Atalaren eginkizunak.

Lan arloko Balorazio Klinikoaren eta Ikuskatzailetza Medikoaren Atalak foru dekretu honetan aipatzen diren eginkizunak beteko ditu arlo hauetan: aldi baterako ezintasunaren prestazioaren kudeaketa Nafarroan eta haren jarraipen agregatua egitea, eta Nafarroako Foru Komunitateko Administrazioko eta bere erakunde autonomoetako enplegatugaien osasun azterketak egitea.

36. artikulua . Elikagaien Segurtasunaren eta Ingurumen Osasunaren Zerbitzuaren eginkizunak.

Elikagaien Segurtasunaren eta Ingurumen Osasunaren Zerbitzuak eginkizun hauek beteko ditu:

a) Institutuak eta beste osasun zentro publiko batzuek egiten dituzten kontrol ofizialeko eta osasun publikoko programei laguntza analitikoa ematea.

b) Bere jarduera analitikoa beste laborategi batzuekin koordinatzea, kontrol ofizialeko eta osasun publikoko programen ondoriozko teknika analitikoen eskaera asetzeko.

c) Kalitate sistema mantentzea, kontrol ofizialeko laborategia izateagatik dituen eskakizunei erantzunez.

d) Kontrol ofizialeko programak, planak eta jarduketak koordinatu, gauzatu eta ebaluatzea eta haien auditoretza egitea, gai hauetan: elikagaien segurtasuna, elikadura arloko jarduerak, industriak eta establezimenduak -hiltegiak barne-, gizakiek jateko elikagaiak eta lotutako produktuak.

e) Elikagaien segurtasunari lotutako gaien gaineko erregistroak, zentsuak eta baimenak kudeatzea.

f) Elikagaien alerten gaineko informazioa azkar trukatzeko sistema kudeatzea, eta elikadurarekin lotutako arrisku egoerak eta eritasun agerraldiak kontrolatzea, kontrol epidemiologikoaren zerbitzuekin bat.

g) Tabakoaren arloko osasun araudia betetzen ote den ikuskatzea elikagaien arloko establezimendu eta jardueretan, eta beste batzuk.

h) Osasun babeseko programak garatzea zoonosiaren aurrean.

i) Animaliekin saiakuntzak egiteari dagokionez, Osasun Departamentuari esleitzen zaizkion jarduketak garatzea.

j) Elikagaien segurtasunaren arloko arau proposamenak prestatu eta tramitatzea bere eskumeneko esparruetan.

k) Arriskua ebaluatzea eta gizakien osasuna babestea arrisku kimiko, fisiko eta biologikoen ingurumen faktoreen aurrean.

l) Jarduera hauen osasun zaintza egitea, gizakiaren osasunean izan dezaketen eraginagatik: giza kontsumorako uraren hornidura, uraren aisiarako erabilera, legionellaren arriskuaren kontrola, osasun hondakinen barne kudeaketa, biosegurtasunaren arloko osasun araudia, erabilera kolektiboko lokalak eta industria-, merkataritza- eta zerbitzu-establezimenduak.

m) Segurtasun kimikoaren osasun araudia (biozidena barne) eta CLP eta REACH erregelamenduak betetzen ote diren zaindu eta kontrolatzea.

n) Bere eskumeneko gaien gaineko erregistroak, zentsuak eta baimenak kudeatzea, arrisku kimiko, fisiko eta biologikoen ingurumen faktoreei lotuak.

ñ) Laguntza teknikoa ematea udalei osasun publikoaren arloan dituzten eskumenetan, ingurumeneko arriskuei lotuak, eta Oinarrizko Osasun Laguntzako zerbitzuei ikuskapenaren eta osasun publikoaren arloan dituzten eginkizunetan.

o) Segurtasun Nuklearreko Kontseiluak Nafarroako Foru Komunitateko Administrazioari egindako eginkizun esleipenaren ondoriozko eginkizunak betetzea, eta diagnostiko medikorako X izpien instalazioak saldu eta laguntza teknikoa ematen duten enpresak zaindu eta ikuskatzea.

p) Osasun kontrolaren, segurtasun fisikoaren eta arrisku ebaluazioaren programak garatzea erradiazio ionizatzaileei eta ez-ionizatzaileei lotutako gaietan.

q) Ingurumena babesteko esku hartzearen araudiak Osasun Departamentuari esleitzen dizkion jarduketak egitea.

r) Agintzen ahal dioten beste edozein eginkizun.

37. artikulua . Elikagaien Segurtasunaren eta Ingurumen Osasunaren Zerbitzuaren egitura.

Elikagaien Segurtasunaren eta Ingurumen Osasunaren Zerbitzuak atal hauek ditu bere egituran:

a) Osasun Publikoaren Laborategiko Atala.

b) Elikagaien Segurtasunaren Atala.

c) Ingurumen Osasunaren Atala.

38. artikulua . Osasun Publikoaren Laborategiko Atalaren eginkizunak.

Osasun Publikoaren Laborategiko Atalak foru dekretu honetan aipatzen diren eginkizunak beteko ditu arlo hauetan: bidezko programei dagozkien analitikak garatzea, beste laborategi batzuekin koordinatzea eta kalitate sistema egokiak garatzea.

39. artikulua . Elikagaien Segurtasunaren Atalaren eginkizunak.

Elikagaien Segurtasunaren Atalak foru dekretu honetan aipatzen diren eginkizunak beteko ditu arlo hauetan: elikagaien segurtasunaren programak, elikagaien alerten gaineko sistemak, arriskuen eta epidemien kontrola, osasun ikuskapena eta kontrola elikagaien segurtasunaren arloan, tabakoa elikagaien arloko establezimendu eta jardueren arloan eta zoonosia.

40. artikulua . Ingurumen Osasunaren Atalaren eginkizunak.

Ingurumen Osasunaren Atalak foru dekretu honetan aipatzen diren eginkizunak beteko ditu arlo hauetan: osasunaren babesa arrisku fisiko, kimiko eta biologikoen aurrean, uren osasun zaintza, legionella, hondakinak, biosegurtasuna, segurtasun kimikoa eta tabakoa, arrisku eta epidemien kontrola, segurtasun fisikoa eta Segurtasun Nuklearreko Kontseiluak egindako eginkizun esleipena.

41. artikulua . Kudeaketa Ekonomikoaren eta Profesionalen Zerbitzuaren eginkizunak.

Kudeaketa Ekonomikoaren eta Profesionalen Zerbitzuak eginkizun hauek izanen ditu:

a) Nafarroako Osasun Publikoaren eta Lan Osasunaren Institutuko zuzendari kudeatzaileak langileen arloan esleituta dituen eskudantziak bete, kontrolatu eta koordinatzea.

b) Institutuko langileen eginkizuna zuzendu, koordinatu, bultzatu eta ebaluatzea.

c) Langileen politikaren eta administrazioaren gaineko jarraibideei eta lan harremanei buruzko proposamenak egin, jaso eta gomendatzea, onets daitezen. Jarraibide horiek administratzea, onetsi ondoren. Aholkularitza lana egitea arlo honetan Institutuko zuzendari kudeatzailearentzat eta zuzendaritzako gainerako langileentzat.

d) Institutuari dagozkion lanpostuetan sartu eta haiek hornitzeko deialdi eta prozedurak prestatu eta tramitatzea.

e) Aldi baterako langileen kontratazioa baimendu eta formalizatzea, erregelamenduz ezarritako prozeduraren bidez.

f) Langileen arloko beharrak zehaztea, lan eskaintzak, plantilla organikoa eta izenen zerrendak prestatzeko.

g) Langileak lanpostu jakin bati atxikitzea erakunde autonomoaren barrenean.

h) Diziplina espedienteak ireki eta ebaztea hutsegite arinengatik.

i) Arauzko lanaldi murrizketak, lansaririk gabeko lizentziak, amatasun lizentzia ordainduak eta edoskitzeko baimenak onartzea eta eritasunak eragindako bajan dauden langileen joan-etorriak egiteko baimenak ematea.

j) Gastuak itzultzeko ordainketa, epaimahaietan eta prestakuntza ikastaroetan parte hartzeagatiko haborokina eta osagarrien ordainketa baimentzea. Zerbitzuarengatik egin beharreko joan-etorrietarako baimena ematea.

k) Sindikatuekiko eta langileen ordezkaritza organoekiko harremanen ardura hartzea. Laneko arriskuen prebentzioaren arloko jarduketak koordinatzea.

l) Langileek eskatuta, hartzekoen eta emandako zerbitzuen ziurtagiria egitea, baita Institutuko lanpostuetan sartu eta haiek betetzeko deialdiei buruzko dokumentuak konpultsatzea ere.

m) Nominak, gizarte aseguruak, osasun laguntza eta langileen beste prestazio ekonomiko batzuk prestatu eta kudeatzea.

n) Langileen erregistro integratua, espediente pertsonalak, plantilla organikoa eta langileen zerrenda irekitzea, mantentzea eta eguneratzea.

ñ) Urteko aurrekontuak, gastuetakoak zein diru-sarreretakoak, prestatu eta kudeatzea, eta haien kontrola eta jarraipena egitea.

o) Institutuko baliabide material finko eta mugikorren kontserbazio funtzionala ziurtatzea, eta atxikitako ondarea behar bezala kudeatzea.

p) Ondasun eta zerbitzuen hornidura kudeatzea.

q) Konturako ziurtagiriak, material inbentariagarriaren eta beste erosketa batzuen fakturak, konponketa eta mantentze soileko obrak eta laguntza teknikoko kontratuak ordaintzeko baimena ematea, organo eskudunak haien gastua onetsi baldin badu.

r) Beharrezkoak diren aplikazio informatikoen ezarpena, funtzionamendua eta erabilera eta beharrezkoak diren laguntza administratiboak zuzendu eta koordinatzea.

s) Laguntza ematea zuzendaritzako langileei gai administratiboei buruz.

t) Zuzendaritza-kudeatzailetzak esleitzen ahal dizkion beste edozein eginkizun.

42. artikulua . Kudeaketa Ekonomikoaren eta Profesionalen Zerbitzuaren egitura.

Kudeaketa Ekonomikoaren eta Profesionalen Zerbitzuak atal hauek ditu bere egituran:

a) Kudeaketa Ekonomikoaren Atala.

b) Profesionalen Atala.

43. artikulua . Kudeaketa Ekonomikoaren Atalaren eginkizunak.

1. Kudeaketa Ekonomikoaren Atalak foru dekretu honetan aipatzen diren eginkizunak beteko ditu arlo hauetan: aurrekontuaren prestaketa eta kudeaketa, baliabide materialak, ondarea, aplikazio informatikoak eta laguntza administratiboa.

2. Orobat, zerbitzuburuak esleitzen dizkion beste edozein eginkizun beteko ditu.

44. artikulua . Profesionalen Atalaren eginkizunak.

1. Profesionalen Atalak foru dekretu honetan aipatzen diren eginkizunak beteko ditu arlo hauetan: langileen zuzendaritza, koordinazioa eta kontrola, zerbitzuan sartzea eta lanpostuak betetzea, langileen premien kudeaketa, atxikipenak, egoera administratiboak eta nominak.

2. Orobat, zerbitzuburuak esleitzen dizkion beste edozein eginkizun beteko ditu.

V. KAPITULUA. LANPOSTUAK BETETZEKO MODUA

45. artikulua . Zuzendaritza organoak eta burutzak betetzeko modua.

Zerbitzuetako, ataletako eta unitateetako buruak azaroaren 22ko 347/1993 Foru Dekretuan ezarritakoari jarraikiz izendatuko eta kargutik kenduko dira; dekretu horren bidez onartu zen Osasunbidea-Nafarroako Osasun Zerbitzuan sartu eta bertako lanpostuak betetzeko araubidea.

III. TITULUA. EGINTZEN ARAUBIDE JURIDIKOA, ERREKURTSOAK ETA OFIZIOZKO BERRIKUSPENA

46. artikulua . Egintzen araubide juridikoa.

1. Institutuaren egintzen araubide juridikoa Nafarroako Foru Komunitateko Administrazioari buruzko abenduaren 3ko 15/2004 Foru Legearen VIII. tituluaren I. kapituluan erakunde autonomoentzat ezarritakoa izanen da.

2. Ebazpen forma hartuko dute zuzendari kudeatzaileak eta zerbitzuburuek beren ahalmenak erabiliz ematen dituzten administrazio egintzek.

3. Langileei, kontratazioei eta aurrekontuei buruzko administrazio egintzei dagokienez, Foru Komunitateko araudi berariazkoari jarraituko zaio.

47. artikulua . Administrazio bidearen amaiera.

1. Oro har, Institutuko organoek emandako egintzek eta ebazpenek ez dute administrazio bidea amaituko, foru lege batek edo erregelamenduzko xedapen batek kontrakoa ezartzen ez badu behintzat.

2. Ondare erantzukizunaren arloan ematen diren ebazpenek administrazio bidea amaituko dute.

48. artikulua . Administrazio errekurtsoak.

1. Institutuko zuzendari kudeatzailearen edo zerbitzuburuen egintzen kontra, administrazio bidea amaitzen ez badute, baita gaiaren muina zuzenean edo zeharka erabakitzen duten, prozedurak aurrera egitea galarazten duten edo legezko eskubide eta interesentzako babesgabetasuna edo kalte konponezina eragiten duten tramite egintzen kontra ere, gora jotzeko errekurtsoa jartzen ahalko da, Osasuneko zuzendari nagusiari zuzendua, funtzio publikoaren arloan emandako egintzak izan ezik, horien kontra zilegi izanen baita gora jotzeko errekurtsoa funtzio publikoaren eskumena duen departamentuko kontseilariari zuzentzea.

2. Errekurtsoak Foru Komunitateko Administrazioarentzat indarra duen legediak ezarritako moduan eta epeetan gauzatuko dira.

49. artikulua . Akzio zibilak eta lanekoak erabili aurreko erreklamazioak.

Institutuko zuzendari kudeatzaileak ebatziko ditu auzibide zibilera eta lan arloko auzibidera jo aurreko erreklamazio administratiboak, langileen arloko erreklamazioak izan ezik, horiek funtzio publikoaren eskumena duen departamentuko kontseilariak ebatziko baititu.

50. artikulua . Ordezkaritza eta defentsa.

Institutua epaiketetan ordezkatu eta defendatzea Nafarroako Gobernuko Aholkularitza Juridikoaren Zerbitzuan aritzen diren arlo juridikoko langileei dagokie.

51. artikulua . Ofiziozko berrikuspena.

Egintza deusezen ofiziozko berrikuspena, egintza deuseztagarrien kaltegarritasunaren deklarazioa eta kargak ezartzen dituzten egintzen edo kalterako diren egintzen ezeztatzea Osasun Departamentuko kontseilariaren foru agindu baten bidez eginen da.

IV. TITULUA. ONDAREA, GIZA BALIABIDEAK ETA KONTRATAZIOA

52. artikulua . Nafarroako Osasun Publikoaren eta Lan Osasunaren Institutuari atxikitako ondarea.

Honako hauek osatzen dute Institutuaren ondarea:

a) Bere xedeak betetzeko atxikitzen zaizkion era guztietako ondasun eta eskubideak, horien titulartasuna Nafarroako ondareari badagokio.

b) Estatuko Administraziotik transferitutako zerbitzuak kudeatu eta gauzatzeko era guztietako ondasun eta eskubideak, atxikiak dituenak, transferentziei aplikatzen zaien araudiarekin bat.

c) Edozein tituluren bitartez jasotzen duen beste edozein ondasun edo eskubide.

53. artikulua . Ondarearen araubide juridikoa.

Institutuak berak dituen edo atxiki zaizkion ondasun eta eskubideen araubide juridikoa Nafarroako ondareari buruzko legedian ezarritakoa izanen da.

54. artikulua . Giza baliabideak.

1. Honako hauek osatzen dute Nafarroako Osasun Publikoaren eta Lan Osasunaren Institutuko langileria:

a) Nafarroako Gobernuak edo Osasun Departamentuko kontseilariak libreki izendatutako zuzendaritza karguetako pertsonak, atxikiak edo Institutuari atxikitzen zaizkionak.

b) Funtzionarioak, bai Foru Komunitateko Administraziokoak, bai Estatuko Administraziotik transferituak, eta lan-kontratudunak, atxikiak edo Institutuari atxikitzen zaizkionak.

2. Funtzio publikoaren arloan eskumenak dituen departamentuak giza baliabideen gainean ezarritako jarraibideak aplikatuko ditu Institutuak.

55. artikulua . Kontratazioa.

Institutuko kontratazio araubidea Nafarroako administrazio publikoetako eta haien erakunde autonomoetako kontratazioari buruzko berariazko legedian ezarritakoa izanen da.

V. TITULUA. OGASUNA ETA AURREKONTUA

56. artikulua . Baliabide ekonomikoak.

Hauek dira Nafarroako Osasun Publikoaren eta Lan Osasunaren Institutuaren diru-sarrerak:

a) Nafarroako Gobernuak helburu jakin baterako jasotzen dituen baliabideak.

b) Foru Komunitateko aurrekontu orokorren kargura esleitzen zaizkion baliabideak.

c) Indarrean dauden xedapenen arabera jaso ditzakeen diru-sarrera arruntak eta diru-sarrera bereziak.

d) Entitateek eta norbanakoek borondatez egindako ekarpenak eta diru-laguntzak.

e) Esleitzen zaion beste edozein baliabide.

57. artikulua . Aurrekontua.

1. Institutuko aurrekontuaren kudeaketa urteko aurrekontuen araubidearen menpe egonen da, eta hori Nafarroako Parlamentuak onetsi beharko du.

2. Institutuko aurrekontuaren egitura, prestatzeko prozedura, betearazpena eta likidazioa Nafarroako Aurrekontu Orokorrentzat (horien parte izanen dira) ezarritako arau eta erregeletan aurreikusitakoaren menpe egonen dira.

58. artikulua . Kontuhartzailetza.

1. Nafarroako Foru Komunitateko Administrazioan egintzen, agirien eta espedienteen gaineko kontu-hartzailetzarako ezarri diren arauetan jasotako aurreikuspenei jarraikiz eginen da Institutuko kontu-hartzailetza.

2. Aurreko atalean ezarritakoa galarazi gabe, auditoretzen bidez eginen da erakunde autonomoaren finantza kontrola.

59. artikulua . Kontabilitate publikoa.

1. Institutua kontabilitate publikorako araubidearen menpe geldituko da, Nafarroako Foru Komunitateko Administrazioak dituen modu eta baldintza berberetan.

2. Kontuak ematea Nafarroako Kontu Orokorretarako aurreikusitakoaren arabera formalizatu, tramitatu eta ebatziko da.

Iragarkiaren kodea: F1513999

Gobierno de Navarra

Contacte con nosotros | Accesibilidad | Aviso legal | Mapa web