(ir al contenido)

navarra.es

Castellano | Euskara | Français | English

LEXNAVARRA


Versión para imprimir

Versión en castellano

56/2013 FORU DEKRETUA, ABUZTUAREN 28KOA, NAFARROAKO FORU KOMUNITATEKO JATETXE ETA KAFETEGIEN ANTOLAMENDUARI BURUZKO ERREGELAMENDUA ONESTEN DUENA.

BON N.º 174 - 10/09/2013



  NAFARROAKO FORU KOMUNITATEKO JATETXE ETA KAFETEGIEN ANTOLAMENDUARI BURUZKO ERREGELAMENDUA

  I. KAPITULUA. XEDAPEN OROKORRAK

  II. KAPITULUA. ESTABLEZIMENDUEN MODALITATEAK ETA SAILKAPENA

  III. KAPITULUA. JARDUERAREN ANTOLAMENDUA

  IV. KAPITULUA. FUNTZIONAMENDUAREN ARAUBIDEA ETA PREZIOAK

  V. KAPITULUA. ESTABLEZIMENDUEK BETE BEHARREKO BALDINTZA TEKNIKOAK

  VI. KAPITULUA. DIZIPLINA TURISTIKOA


Atariko

Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 44.13 artikuluak Nafarroako Foru Komunitateari ematen dio eskumen esklusiboa turismoaren sustapen eta antolamenduaren arloan.

Turismoari buruzko otsailaren 14ko 7/2003 Foru Legeak 23. artikuluan ezartzen du jatetxearen kontzeptua eta, 24. artikuluan, haren modalitateak eta sailkapena; eta erregelamenduzko garapenera igortzen du eska daitezkeen baldintza teknikoak zehazteko eta turismo arloko alderdiak arautzeko.

Jatetxeak eta kafetegiak ezinbesteko eskaintza dira herritarren garapen sozialerako eta aisiarako, eta ezinbesteko faktorea dira turistak erakartzeko; eta hori, bai berez, bai beste zerbitzu batzuen osagarri direlako.

Gainera, Nafarroako gastronomia indartzea, ezaguna eta kontuan hartua izan dadin, eta sukaldaritzan Nafarroako nekazaritzako elikagaien erabilera indartzea eta zabaltzea dira foru dekretu honen bidez onetsitako erregelamenduaren helburuak.

Foru dekretu honen bidez onetsi den erregelamenduak Turismoari buruzko otsailaren 14ko 7/2003 Foru Legeak kontuan hartzen dituen jatetxeak eta kafetegiak definitzen ditu.

Jatetxearen jarduera hasi baino lehen Nafarroako Turismo Erregistroan egin behar den aginduzko inskripzioari dagokionez, erregelamenduak erantzukizuneko aitorpena sartzen du, jardueraren titularrak aurkeztu beharko duena zehazten den dokumentazio osagarriarekin batera. Modu horretan, Turismoari buruzko Foru Legean egindako aldaketara egokitzen da. Hain zuzen, Barne merkatuko zerbitzuei buruzko Europako Parlamentuaren eta Kontseiluaren 2006/123/EE Zuzentaraura egokitzeko xedez zenbait foru lege aldatzen dituen apirilaren 6ko 6/2010 Foru Legeak gauzatu zuen aldaketa hori.

Horrenbestez, Kulturako, Turismoko eta Erakunde Harremanetako kontseilariak proposaturik, Nafarroako Kontseiluarekin bat, eta Nafarroako Gobernuak 2013ko abuztuaren 28an egindako bilkuran hartutako Erabakiarekin bat.

DEKRETATU DUT:

Artikulu Bakarra. Erregelamendua onestea.

Nafarroako Foru Komunitateko jatetxe eta kafetegien antolamenduari buruzko erregelamendua onesten da. Haren testua ondotik erantsi da.

Lehen Xedapen Iragankorra. Instalazioak egokitzea.

1. Foru dekretu honek indarra hartu baino lehen Nafarroako Turismo Erregistroan erregistratu diren jatetxe eta kafetegiek bost urteko epea izanen dute haien instalazioak eta zerbitzuak hark ezarritako beharkizunetara egokitzeko.

2. Epe hori iraganda, turismo arloko departamentu eskudunak foru dekretu honek ezarritako beharkizunei egokitu gabeko establezimenduei dagokien kategoria esleituko die, interesdunari entzun ondoren.

Bigarren Xedapen Iragankorra. Tramitazioan dauden eskaerak.

Foru dekretu honek indarra hartzerakoan Nafarroako Turismo Erregistroan inskribatzeko tramitazioan dauden eskariak aurreko araudian xedatutakoaren arabera ebatziko dira, salbu eta interesdunak foru dekretu hau espresuki aplikatzeko eskatzen badu. Hori eginez gero, interesdunari lehen xedapen iragankorrean xedatutakoa aplikatuko zaio.

Azken Xedapenetan Lehena. Garapena eta betearazpena.

Turismo arloan eskumena duen kontseilariak beharrezkoak diren xedapen guztiak ematen ahalko ditu foru dekretu hau garatu eta betearazteko.

Azken xedapenetan bigarrena.-Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2013ko abuztuaren 28an.-Nafarroako Gobernuko lehendakaria, Yolanda Barcina Angulo.-Kulturako, Turismoko eta Erakunde Harremanetako kontseilaria, Juan Luis Sánchez de Muniáin Lacasia.

NAFARROAKO FORU KOMUNITATEKO JATETXE ETA KAFETEGIEN ANTOLAMENDUARI BURUZKO ERREGELAMENDUA

I. KAPITULUA. XEDAPEN OROKORRAK

1. artikulua . Xedea eta aplikazio eremua.

Erregelamendu honen xedea, Nafarroako Foru Komunitatean kokatuta dauden jatetxe eta kafetegiek bete beharreko baldintza teknikoak eta zerbitzuak antolatzea eta arautzea da.

2. artikulua . Definizioa.

1. Ohikotasunez eta lanbide gisa, jendearentzat irekitako instalazio finko edo mugikorretan otorduak eta edariak, prezio bat dela tarteko eta bertan kontsumitzeko, ematen dituzten establezimenduei esaten zaie jatetxe eta kafetegiak, Erregelamendu honetan ezarritako modalitateetako bati atxikita direla.

3. artikulua . Salbuespenak.

Hurrengoak erregelamendu honen esparrutik kanpo daude:

a) Otorduak edo/eta edariak dohainik edo irabazi asmorik gabe ematen dituzten establezimenduak, zein den ere haien titulartasuna.

b) Jatetxe sozial kolektiboak, hau da, laguntza, erakunde, eskola, unibertsitate, gizarte eta lan arloko jatetxeetan zerbitzuak ematea, baita kolektibo jakin batzuentzat eta jende ororentzat ez diren beste edozeinetan ere.

c) Turismo ostatuetako jatetxe zerbitzuak, zerbitzu horiek ostatu hartutako bezeroei bakarrik ematen zaizkienean.

d) Edozein garraiobide publikotako jatetxe zerbitzuak.

e) Salmenta makinen bidez otordu eta edariak ematen dituzten enpresak, eta catering zerbitzuak.

f) Otordu eta edariak etxeetan bakarrik ematen dituzten enpresak.

g) Noizean behinkako zerbitzuak, hau da, feriak, herriko festak edo antzeko gertakizunak direla eta, ematen direnak.

h) Merkataritzara emandako establezimendu gisa baimenduta dauden lokaletan elikagaiak eskaintza komertzial huts gisa saltzen dituzten enpresak, hala nola, hipermerkatuak, supermerkatuak eta antzekoak.

II. KAPITULUA. ESTABLEZIMENDUEN MODALITATEAK ETA SAILKAPENA

4. artikulua . Modalitateak.

Erregelamendu honen xedeko establezimenduak modalitate hauetako bati atxikiko zaizkio:

a) Jatetxeak.

b) Kafetegiak.

5. artikulua . Jatetxeak.

1. Sukaldea eta jantokia izan eta jendeari, prezio bat dela tarteko, ordutegi jakin batean eta, ahal dela, aparte den jantoki batean, bertan jateko otordu zerbitzua eskaintzen dioten establezimenduei esaten zaie jatetxeak.

2. Erregelamendu honen ondorioetarako, jatetxeen parte izanen dira haien ondoko eremuak, hala nola, terrazak eta lorategiak.

6. artikulua . Kafetegiak.

1. Sukaldaritza zerbitzuan plater bakunak edo aise eta azkar prestatzen diren plater konbinatuak, barran eta mahaian, irekita dauden ordutegian eskaintzen dituzten establezimenduei esaten zaie kafetegiak.

2. Erregelamendu honen ondorioetarako, kafetegien parte izanen dira haien ondoko eremuak, hala nola, terrazak eta lorategiak.

7. artikulua . Parekatzea.

Erregelamendu honen arauak hurrengo establezimenduei aplikatuko zaizkie: sagardotegi, erretegi, pizzeria eta hanburgeseriei eta antzeko beste batzuei; zein bere modalitatean atxikiko da, dituen instalazioen eta eskaintzen dituen zerbitzuen arabera.

8. artikulua . Turismo ostatuetako jantoki zerbitzua.

Jendeari jantoki zerbitzua eskaintzen dioten turismoko ostatuek erregelamendu honetan xedatutakoa bete beharko dute eta bertan ezarritakoaren arabera sailkatuko dira.

9. artikulua . Sailkapena.

1. Jatetxeak, instalazio eta zerbitzuen arabera, luxuzko, lehen, bigarren eta hirugarren mailako kategorietan sailkatuko dira, bereizgarri hauek dituztela, hurrenez hurren: lau, hiru, bi eta sardexka bat.

2. Kafetegiak, instalazio eta zerbitzuen arabera, lehen eta bigarren mailako kategorietan sailkatuko dira, bereizgarri hauek dituztela, hurrenez hurren: bi katilu eta katilu bat.

10. artikulua . Nafarroako gastronomian espezializatutako jatetxeak.

1. “Nafarroako gastronomian espezializatutako jatetxea” deitutako bereizgarria sortu da.

2. Establezimenduen titularrek eskatu beharko diote turismo arloko departamentu eskudunari bereizgarri hori emateko, eta titularren ibilbide profesionala, establezimenduak zer instalazio dituen, Nafarroako gastronomiako zer plater karta eskaintzen duten, zer produktu erabiltzen dituzten platerak prestatzeko edo kartan zein eskaintzen diren ikusita emanen da.

3. Egiten diren eskaerak baloratzeko, batzorde bat sortuko da, Nafarroako sukaldaritzan ospea duten profesionalez, jatetxe arloari loturiko profesional elkarteetako kidez eta turismo arloko departamentu eskuduneko langilez osatua.

4. “Nafarroako gastronomian espezializatutako jatetxea” deitutako bereizgarria berariazko merezimendu gisa hartzen ahalko da kontuan Nafarroako Foru Komunitateko Administrazioak ematen dituen laguntzak edo diru-laguntzak eskuratzeko orduan.

5. Bereizgarria eskuratzeko baldintzak betetzen ez badira, hura baliogabe geldituko da.

11. artikulua . Plaka bereizgarriak.

Jatetxe eta kafetegiek plaka normalizatu bat izan beharko dute sarrera nagusiaren ondoan. Hartan, modalitate eta sailkapenaren arabera dagokien bereizgarria agertuko da, eta turismo arloko kontseilari eskudunak onetsi beharko ditu haren ezaugarriak.

12. artikulua . Publizitatea.

1. Establezimenduek egiten duten publizitatean, eta ematen dituzten faktura eta dokumentuetan, haien modalitatea eta sailkapena agertuko dira.

2. Debekatuta dago dagozkien izendapen, errotulu edo bereizgarriak ez direnak edo establezimenduen modalitate eta kategoriari buruz okerrera eraman dezaketenak erabiltzea.

III. KAPITULUA. JARDUERAREN ANTOLAMENDUA

13. artikulua . Nafarroako Turismo Erregistroan inskribatzea.

1. Jarduera hasi aurretik, eta establezimendua Nafarroako Turismo Erregistroan inskribatzeko, dokumentazio hau aurkeztu beharko da:

a) Titularraren erantzukizuneko aitorpena, haren datuak biltzen dituena, honako hauen jabe dela adierazita:

1.a Nor den eta higiezinaren jabea edo maizterra dela frogatzen duen legezko dokumentazioa, edo beste edozein titulu, higiezina jatetxe gisa aritzeko prest dagoela frogatzen duen beste edozein titulu.

2.a Udalaren lizentzia irekitzeko.

3.a Ustiatzeko erantzukizun zibileko aseguruaren kontratua, 150.000 euroko estaldura duena gutxienez. 60 eurotik beherako frankiziak onartuko dira.

b) Obra bukaerako planoak edo, horiek gabe, 1:100 eskalako planoak, gela bakoitzeko azalera adierazita.

2. Establezimenduetako aldaketak, titulartasun aldaketak, jarduera uztea eta, oro har, inskribatu edo jasotako datuetan edozein aldaketa gertatuz gero, aurreko atalean ezarritako prozeduraren arabera tramitatuko dira.

14. artikulua . Lekapenak.

Turismo arloko departamentu eskudunak establezimendu bat kategoria jakin batean inskribatzeko edo sailkatzeko behar diren gutxieneko eskakizun teknikoren bat betetzetik salbuetsita uzten ahalko du, arrazoiak emanez, inguruabarrek ez-betetze hori instalazioen eta sartzen ahal diren hobekuntzen balorazio bateratuarekin konpentsatzen ahal dutenean.

Lekapenak establezimenduaren zerbitzu eta baldintza guztien arabera baloratzen dituzten irizpide tekniko edo konpentsatzaileetan oinarritu beharko dira.

IV. KAPITULUA. FUNTZIONAMENDUAREN ARAUBIDEA ETA PREZIOAK

15. artikulua . Barne araubideko arauak.

Jatetxe eta kafetegiek barne araubideko arauak erabakitzen ahalko dituzte zerbitzuak eta instalazioak erabiltzeari buruz, eta bezeroen eskura jarri beharko dira. Arau horiek ezin dira erregelamendu honetan edo aplikatzen ahal diren beste xedapenetan xedatutakoaren aurka egon.

16. artikulua . Zerbitzu, prezio eta ordutegien publizitatea.

1. Zerbitzu eta prezioen zerrendak ahalik eta publizitate handiena izanen du eta toki nabarmen batean agertu beharko du, aise ikusi eta irakurtzeko moduan; betiere, establezimenduaren kanpoan eta barrenean, eta BEZa barne dela adierazita. Zerrenda hori karta edo menu moduan eskaini beharko da, horretarako ezarritakoaren arabera.

2. Jendearentzat zein ordutan ireki eta ixten den agertu beharko da, ikusteko moduan, establezimendutik kanpo.

17. artikulua . Karta.

1. Erregelamendu honek arautzen dituen establezimenduetan eskaintzen diren otorduen zerrendari eta edarien zerrendari, beren prezioak BEZa barne dituztela, hurrenez hurren, esaten zaie plater karta eta edari karta, eta bezeroari emanen zaizkio hark zerbitzuak eskatu orduko.

2. Bezeroak kartako platerak aukeratzen ahalko ditu, eta kontsumitzen dituen produktuen prezioen batuketak emanen du azken zenbatekoa.

3. Nahitaezkoa da bezeroari karta aurkeztea luxuzko eta lehen kategoriako jatetxeetan.

18. artikulua . Eguneko menua.

1. Gutxienez bi plater, ogia, edari bat eta postrea prezio orokor baten barrenean dituen eskaintzari esaten zaio eguneko menua. Gainera, plater bakar bat aukeratzeko modua eskaintzen ahalko da menuan.

2. Nahitaezkoa da eguneko menua aurkeztea bigarren eta hirugarren kategoriako jatetxeetan.

19. artikulua . Zerbitzuen prestazioa.

Erregelamendu honetan sartutako establezimenduek bereziki zainduko dituzte zerbitzu eta instalazioen garbitasuna, kalitatea eta kontserbazioa eta, betiere, honako hauek:

a) Zerbitzu bakoitza behar bezala ematea, establezimenduaren kategoriaren arabera eta itundutako baldintzak errespetatuz.

b) Bezeroekin amultsu eta adeitsu jokatuko dute, arretan azkar, eraginkor eta profesional izanez.

c) Lokalak, altzariak eta tresneria garbi eta kontserbazio egoera ezin hobean izanen dituzte.

d) Instalazioak, dekorazioa, mahai-tresnak, baxera, kristalezko ontziak, tresneria eta oihal zuriak establezimenduaren kalitate mailari eta kategoriari dagozkionak izanen dira uneoro.

20. artikulua . Fakturak.

1. Nahitaezkoa izanen da faktura edo tiketa ematea, zeina arlo horretan aplikatzen den araudian ezarritakoari jarraituko baitzaio.

2. Ez da inoiz diru kopururik fakturatuko eskatu ez diren zerbitzu edo ondasunen kargura.

21. artikulua . Erreklamazio orriak.

Jatetxe eta kafetegiek erreklamazio orriak izanen dituzte erabiltzaileen eskura eta ikusteko moduan iragarriko dituzte, dagokien araudian ezarritakoaren arabera.

V. KAPITULUA. ESTABLEZIMENDUEK BETE BEHARREKO BALDINTZA TEKNIKOAK

22. artikulua . Sektoreko araudia.

Jatetxe eta kafetegiek arlo hauetako araudia bete beharko dute: hirigintza, eraikuntza, instalazioak, osasuna eta kontsumoa, segurtasuna, suteen prebentzioa, babes zibila, oztopo fisiko eta zentzumenezkoak kentzea, higiene eta ingurumenaren zaintza, baita aplikatzen ahal diren beste xedapenetan xedatutakoa ere.

23. artikulua. Jatetxeek bete beharreko baldintza teknikoak.

Jatetxeek baldintza tekniko hauek bete beharko dituzte:

BALDINTZA TEKNIKOAK

LUXUA

LEHEN MAILA

BIGARREN MAILA

HIRUGARREN MAILA

Bezeroen sarrera, zerbitzuaren eta hornitzaileen sarreratik aparte.

Bai

Bai

Jantzitegia

Bai

Bai

Atartea edo itxarongela

Bai

Bai

Jantokia, edukiaren araberako azalera duena

Bai, jantokiak aparte dituela

Bai eta aparte

Bai eta aparte

Bai

Telefono zerbitzua

Bai

Bezeroen gune klimatizatua

Bai

Bai

Bai

Berogailua bakarrik

Higiene zerbitzuak

Gutxienez ere bi higiene zerbitzu, bata bestetik erabat aparte eta behar bezala hornituta, ur beroa eta hotza dituztela

Gutxienez ere bi higiene zerbitzu, bata bestetik erabat aparte eta behar bezala hornituta, ur beroa eta hotza dituztela

Higiene zerbitzuek gutxienez ere bi komun izanen dituzte, bata bestetik aparte. Konketak ur beroa eta hotza izan beharko ditu, eta atarte komunean egoten ahalko da.

Bai

Igogailua: eraikinaren sarreratik jantokira arteko solairu kopuru hau izanik:

Bai

Solairu bakarra

Bai

Bi solairu

Bai

Bi solairu

Hozkailua arrain eta haragientzat

Bai, aparte bakoitzarentzat

Bai, aparte bakoitzarentzat

Bai, aparte bakoitzarentzat

Bai, aparte bakoitzarentzat

Biltegia

Bai

Bai

Bai

Bai

Sotoa

Bai, tenperatura kontrolarekin

Bai

Otordu eta edarien zerrenda

Bai, plater eta edarien karta

(gaztelaniaz, ingelesez eta Europar Batasuneko hizkuntzetan)

Bai, plater eta edarien karta

(gaztelaniaz, ingelesez eta Europar Batasuneko hizkuntzetan)

Bai, eguneko menua eta plater eta edarien karta

Bai, eguneko menua

Barietate gastronomikoa

Bai

Bai

J.D. duten ardo eta likoreak

Bai, karta, Nafarroa zein Espainiako jatorrizko deiturako ardo eskaintza zabal batez, kabez eta xanpainez osatua Likore karta

Bai, Nafarroa zein Espainiako jatorrizko deiturako ardo eskaintzaz eta kabez osatua

Bai

Ez

Ardozaina edo aretoko burua

Bai

Uniformez jantzitako langileak

Bai

Bai

Elementu bereizgarri komunen bat

Elementu bereizgarri komunen bat

Hizkuntzak dakizkiten jantokiko langileak

Bai

Bai

Mahaia erreserbatzeko zerbitzua

Bai

Bai

Bai

Baxera eta kristalezko ontziak

Lehen kalitatekoak

Kalitate onekoak

Kalitate onekoak

Kalitate onekoak

Luxuzko mahai zapiak

Bai

Mahai-tresnak aldatzea platerak aldatzean

Bai

Bai

Aldagela eta komuna langileentzat

Bai

Bai

Kreditu txartelak onartzea

Bai

Bai

Bai

24. artikulua. Kafetegiek bete beharreko baldintza teknikoak.

Kafetegiek baldintza tekniko hauek bete beharko dituzte:

BALDINTZA TEKNIKOAK

LEHEN KATEGORIA

BIGARREN KATEGORIA

Bezeroen sarrera, langileen eta zerbitzuen sarreratik aparte

Bai

-

Bezeroen gune klimatizatua

Bai

Berogailua bakarrik

Higiene zerbitzuak

Gutxienez ere bi higiene zerbitzu, bata bestetik erabat aparte eta behar bezala hornituta, ur beroa eta hotza dituztela

Higiene zerbitzuek gutxienez ere bi komun izanen dituzte, bata bestetik aparte. Konketak ur beroa eta hotza izan beharko ditu, eta atarte komunean egoten ahalko da.

Hozkailua

Bai

Bai

Biltegia

Bai

-

Establezimenduaren kategoriari eta edukierari dagokien moduko barra edo mostradorea

Bai

Bai

Otordu eta edarien zerrenda

Bai, eta plater eta edarien karta

Bai

J.D. duten ardo eta likoreak

Bai, Nafarroa zein Espainiako jatorrizko deiturako ardo eskaintza

Bai

Mahai zerbitzua

Bai

Baxera eta kristalezko ontziak

Kalitate onekoa

Kalitate onekoa

Uniformez jantzitako langileak

Bai

Elementu bereizgarri komunen bat

Kreditu txartelak onartzea

Bai

VI. KAPITULUA. DIZIPLINA TURISTIKOA

25. artikulua . Zehapen araubidea.

Establezimenduaren edo jardueraren titularrak erregelamendu honek ezartzen dituen eginbeharrak betetzen ez baditu, dagozkion zehapenak izanen ditu, Turismoari buruzko otsailaren 14ko 7/2003 Foru Legearekin bat.

Iragarkiaren kodea: F1312151

Gobierno de Navarra

Contacte con nosotros | Accesibilidad | Aviso legal | Mapa web