LEXNAVARRA
21/2010 FORU DEKRETUA, APIRILAREN 26KOA, OSASUN LAGUNTZA ESPEZIALIZATUKO ITXARONALDIEN BERMEEI BURUZKO UZTAILAREN 2KO 14/2008 FORU LEGEA GARATZEKO ERREGELAMENDUA ONESTEN DUENA.
BON N.º 64 - 26/05/2010
I. KAPITULUA. XEDAPEN OROKORRAK
- 1. artikulua. Xedea.
- 2. artikulua. Aplikazio esparru objektiboa.
- 3. artikulua. Definizioak.
- 4. artikulua. Aplikazio esparru subjektiboa.
II. KAPITULUA. OSASUN LAGUNTZA ESPEZIALIZATU PROGRAMATU ETA EZ PREMIAZKOKO GEHIENEKO ITXARONALDIAK, ETA BERMEA ETETEKO ETA GALTZEKO ARRAZOIAK
- 5. artikulua. Gehieneko itxaronaldiak.
- 6. artikulua. Erantzuteko gehieneko epea etetea.
- 7. artikulua. Bermea galtzea.
III. KAPITULUA. BERMEEN SISTEMA
- 8. artikulua. Osasun Administrazioaren jarduketa printzipioak.
- 9. artikulua. Gehieneko epea ez betetzetik ondorioztatzen diren bermeak.
IV. KAPITULUA. NAFARROAKO ITXARONZERRENDETAKO GAIXOEN ERREGISTROA
- 10. artikulua. Nafarroako itxaronzerrendetako gaixoen erregistroa. Kudeaketa eta edukia.
- 11. artikulua. Itxaronzerrenden egoerari buruzko informazioa.
- Xedapen Indargabetzaile Bakarra
- Azken xedapenetan lehena. Garatzeko araudia.
- Azken Xedapenetan Bigarrena. Indarra hartzea.
I. ERANSKINA. LAGUNTZA ESPEZIALIZATU PROGRAMATU ETA EZ PREMIAZKOKO KONTSULTEI DAGOKIENEZ, HONAKO ESPEZIALITATE HAUETAN BERMATUTA EGONEN DA LEHENBIZIKO KONTSULTA:
II. ERANSKINA. 120 EGUNEKO GEHIENEKO EPEA BERMATUTA DUTEN PROZEDURA KIRURGIKOAK:
Osasunari buruzko azaroaren 23ko 10/1990 Foru Legeak, 5.2 artikuluan xedatzen du herritarrek eskubidea daukatela eskuratzen ahal dituzten osasun zerbitzuei eta horiek erabiltzeko bete beharreko baldintzei buruzko informazioa jasotzeko.
Osasun Sistema Nazionalaren Kohesio eta Kalitateari buruzko maiatzaren 28ko 16/2003 Legearen 4. artikuluak ezartzen du herritarrek eskubidea daukatela bizilekua duten autonomia erkidegoan osasun laguntza jasotzeko gehieneko epean, 25. artikuluan ezarri bezala. Artikulu horrek adierazten du Lurraldearteko Kontseiluaren baitan esparru irizpideak erabakiko direla Osasun Sistema Nazionalaren zerbitzuak eskuratzeko gehieneko denbora bermatzeko, errege dekretuaren bidez onetsiko direnak. Era berean, aipatutako esparruaren barnean autonomia erkidegoek zerbitzu zorroan gehieneko itxaronaldiak zehaztuko dituztela xedatzen du. Amaitzeko, organoak eta ehunak transplantatzeko ebakuntza kirurgikoak (organoak dauden ala ez kontuan hartuta egiten baitira) eta hondamendietako osasun arreta aurreko atalean aipatu den bermetik kanpo geratuko direla ezarri du.
Horrez gain, Osasun Sistema Nazionalean itxaron-zerrendei buruzko informazioaren tratamendu homogeneorako neurriak ezartzen dituen maiatzaren 23ko 605/2003 Errege Dekretuak itxaron-zerrendei buruzko gutxieneko, oinarrizko eta orotako irizpideak, adierazleak eta baldintzak adierazten ditu, Osasun Sistema Nazional osoan itxaron-zerrendek tratamendu homogeneoa izan dezaten.
Osasun Laguntza Espezializatuko Itxaronaldien Bermeei buruzko uztailaren 2ko 14/2008 Foru Legearen bidez, osasun arreta espezializatu programatu eta ez premiazkoan erantzuteko bermeak ezartzen dira, Osasunbidea-Nafarroako Osasun Zerbitzuko ebakuntza kirurgikoei, eta arreta espezializatuko kontsultei eta proba diagnostikoei dagokienez, gehieneko itxaronaldiak zehazten dira. Halaber, foru lege horrek Nafarroako itxaron-zerrendetako gaixoen erregistroa sortzen du.
Aipatu den araudia oinarri hartuta eta uztailaren 2ko 14/2008 Foru Legea garatzeko, foru dekretu honek honako hauek arautzen ditu: 120 eguneko gehieneko epea duten prozedura kirurgikoak; Osasunbidea-Nafarroako Osasun Zerbitzuaren prozedurak eta espezialitateak, aipatu den foru legearen 3. artikuluko gehieneko itxaronaldiak bermatzen dituztenak; egoera pertsonal justifikatuak, berme-epea etetea edo galtzea dakartenak; eta Nafarroako itxaron-zerrendetako gaixoen erregistroaren antolaketa eta funtzionamendua.
Horregatik, Osasuneko kontseilariak proposaturik, Nafarroako Kontseiluarekin ados, eta Nafarroako Gobernuak 2010eko apirilaren 26ko bilkuran hartutako erabakiarekin bat,
DEKRETATU DUT:
I. KAPITULUA. XEDAPEN OROKORRAK
1. Foru dekretu honen xedea da, Nafarroako osasun sistema publikoaren esparruan eta Osasun Laguntza Espezializatuko Itxaronaldien Bermeei buruzko uztailaren 2ko 14/2008 Foru Legearekin bat, bermatzea bertan ezartzen diren osasun arreta espezializatu programatu eta ez premiazkoko gehieneko itxaronaldiak. Horretarako, alde batetik 120 eguneko gehieneko itxaronaldia duten prozedura kirurgikoak eta itxaron-bermea aplikatzen duten espezialitateak (arreta espezializatuko kontsultak) arautuko ditu eta, beste aldetik, bermatzen den gehieneko itxaronaldiaren bermea etetea edo galtzea dakarten egoera pertsonal justifikatuak garatuko ditu.
2. Era berean, foru dekretu honen xedeak dira Osasunbidea-Nafarroako Osasun Zerbitzuari atxikitako Nafarroako itxaron-zerrendetako gaixoen erregistroaren antolaketa eta funtzionamendua.
2. artikulua . Aplikazio esparru objektiboa.
1. Foru dekretu hau Nafarroako Foru Komunitateko Osasun Sistema Publikoko osasun zentro eta zerbitzu guztietan aplikatuko da.
2. Foru dekretu honen ondorioetarako, osasun laguntza espezializatu programatu eta ez premiazkoak honako hauek barne hartzen ditu:
a) Osasun arreta espezializatu programatu eta ez premiazkoko lehenbiziko kontsultak.
b) Proba diagnostiko programatu eta ez premiazkoak.
c) Ebakuntza kirurgiko programatu eta ez premiazkoak.
3. Honako hauek foru dekretu honen aplikazio esparrutik kanpo geratuko dira:
a) Arreta espezializatuko premiazko kontsultak, proba diagnostikoak eta ebakuntza kirurgikoak, baita organoak eta ehunak transplantatzeko ebakuntza kirurgikoak (organoak dauden ala ez kontuan hartuta egiten baitira) eta hondamendietako osasun arreta ere.
b) Berrikuspentzat jotzen diren kanpoko kontsulta programatuak, berrikuspenerako itxaronaldiak gaixoaren osasuna okerragotzea ez badakar.
c) Halaber, osasuna sustatzeko eta prebenitzeko jardueren kontsulta eta proba osagarriak kanpo geratuko dira.
1. Laguntza espezializatuko kontsultei eta proba diagnostikoei dagokienez, eta Osasun Sistema Nazionalean itxaron-zerrendei buruzko informazioaren tratamendu homogeneorako neurriak ezarri dituen maiatzaren 23ko 605/2003 Errege Dekretuarekin bat, Nafarroako itxaron-zerrendetako gaixoen erregistroko gaixoak honela sailkatuko dira, itxaronaldi motaren arabera:
a) Egiturazko itxaronaldia duten gaixoak. Horren barnean sartzen dira une zehatz batean laguntza espezializatuko kontsultan arreta jaso edo proba diagnostikoa egin zain dauden gaixoak, haien itxaronaldia Osasunbidea-Nafarroako Osasun Zerbitzuaren antolaketari eta erabilgarri dauden baliabideei egozten ahal zaiela.
b) Egiturazkoa ez den itxaronaldia duten gaixoak. Horren barnean sartzen dira une zehatz batean erregistroan dauden gaixoak. Hala ere, haien itxaronaldia ezin zaie egotzi Osasunbidea-Nafarroako Osasun Zerbitzuaren antolaketari eta erabilgarri dauden baliabideei, hitzordua eskatzeko inguruabar bereziei baizik, honakoaren arabera:
- Gaixoaren beraren borondateari egozten ahal zaion atzerapena duten gaixoak (arrazoi pertsonalak, lan arrazoiak edo medikua norberaren borondatez aukeratzea dela-eta borondatezko itxaronaldia duten gaixoak).
- Erregistroan dauden gainerako gaixoak. Hitzordua ezarri zaie, medikuak eskatu duen eguna oinarri hartuta.
2. Ebakuntza kirurgikoei dagokienez, erregistroan dauden gaixoak honela sailkatuko dira, itxaronaldi motaren arabera:
a) Egiturazko itxaronaldia duten gaixoak: horren barnean sartzen dira une zehatz batean ebakuntza kirurgikoa egin zain dauden gaixoak, haien itxaronaldia antolaketari eta erabilgarri dauden baliabideei egozten ahal zaiela.
b) Ordezko zentro batean ebakuntza kirurgikoa egiteko proposamena ukatu ondoren itxaronaldia duten gaixoak: horren barnean sartzen dira ebakuntza kirurgikoa egin zain dauden gaixoak, haien itxaronaldia haien borondateari egozten zaiola.
c) Aldi baterako programatu ezin den ebakuntza jaso behar duten gaixoak. Horren barnean sartzen dira ebakuntza kirurgikoa egin zain dauden gaixoak, baina ebakuntza ezin da programatu une zehatz batean, honako arrazoi hauetako bat dela-eta:
- Aldi baterako ebakuntza kontraindikatu edo gomendatzen ez duten arrazoi klinikoengatik itxaronaldi medikoa duten gaixoak.
- Ebakuntza arrazoi pertsonalak edo lan arrazoiak direla-eta atzeratzeko eskatzeagatik itxaronaldia duten gaixoak.
3. Era berean, maiatzaren 23ko 605/2003 Errege Dekretuaren I., II. eta III. eranskinetan aipatzen diren gainerako definizioak aplikatuko zaizkio foru dekretu honi.
4. artikulua . Aplikazio esparru subjektiboa.
Foru dekretu hau Nafarroan bizi diren pertsonei aplikatuko zaie. Gainera, uztailaren 2ko 14/2008 Foru Legean ezartzen diren bermeen onuraduna izateko, ezinbesteko baldintza izanen da Nafarroako itxaron-zerrendetako gaixoen erregistroan inskribaturik egotea.
II. KAPITULUA. OSASUN LAGUNTZA ESPEZIALIZATU PROGRAMATU ETA EZ PREMIAZKOKO GEHIENEKO ITXARONALDIAK, ETA BERMEA ETETEKO ETA GALTZEKO ARRAZOIAK
5. artikulua . Gehieneko itxaronaldiak.
1. Foru dekretu honek aipatzen duen itxaron-zerrendetako gaixoen erregistroan inskribaturik dauden gaixoek eskubidea izanen dute osasun laguntza espezializatu programatu eta ez premiazkoa emateko hurrengo gehieneko epeak errespetatuak izateko, uztailaren 2ko 14/2008 Foru Legean xedatutakoaren arabera:
a) Laguntza espezializatuko kontsultak: 30 eguneko gehieneko epea bermatuko da, medikuak eskatzen duen egunetik zenbatuta.
b) Lehentasunezko kontsultak: 10 eguneko gehieneko epea bermatuko da, medikuak eskatzen duen egunetik zenbatuta.
c) Proba diagnostiko programatu eta ez premiazkoak: 45 eguneko gehieneko epea bermatuko da, medikuak agintzen duen egunetik zenbatuta.
d) Ebakuntza kirurgikoak: 120 eguneko gehieneko epea bermatuko da, medikuak agintzen duen egunetik zenbatuta, foru dekretu honen II. eranskinean ezartzen diren prozedura kirurgikoetarako.
e) Bihotzeko kirurgiarako 60 eguneko gehieneko epea eta onkologiako kirurgiarako 30 eguneko gehieneko epea bermatuko dira.
f) Gaixoaren osasuna okerragotzea dakarren itxaronaldia ez duten eta II. eranskinean aipatzen ez diren ebakuntza kirurgikoak: 180 eguneko gehieneko epea bermatuko da.
2. Foru dekretu honen ondorioetarako, 1. idatz-zatiaren a) eta b) letrek aipatzen dituzten kontsultetako itxaronaldi bermearen gehieneko epeak espezialitate bakoitzari buruzkoak izanen dira, I. eranskinean aipatzen diren espezialitateen barnean, eta ez mediku zehatz edo berariazko azpiatal bati buruzkoak.
3. Foru dekretu honetan ezartzen diren epeak zenbatzeko, ulertu behar da egunei buruz hitz egitean lanegunei buruz ari dela.
6. artikulua . Erantzuteko gehieneko epea etetea.
1. Erantzuteko gehieneko epeak eten eginen dira, honako hauek gertatzen direnean:
a) Gaixoak eskatzen duenean, arrazoi justifikatuak alegatuta eta eskaintzen zaion osasun eskaintza ukatu gabe, ebakuntza kirurgikoa, kontsulta edo proba diagnostikoa atzeratzea nahi duenean.
b) Ebakuntza, kanpoko kontsulta edo proba diagnostikoa atzeratzea gomendatzen duen arrazoi klinikoa dagoenean, horrek ez dakarrela behin betikoa izatea.
c) Hondamendiak, osasun laguntza zuzenean ukitzen duten gatazka kolektiboak edo bat-batean gertatzen diren larrialdi larriak daudenean, egoera horiek konpondu arte.
2. Aurreko idatz-zatian aipatzen diren eteteko arrazoiak gertatzen direnean, gaixoak egiturazkoa ez den itxaronaldia izanen du, kanpoko kontsultei edo proba diagnostikoei dagokienez, edo aldi baterako programatu ezin den ebakuntza jaso behar duten gaixoentzako itxaronaldia, ebakuntza kirurgikoei dagokienez, arrazoi horiek desagertu arte. Arrazoiak desagertzen direnean, egiturazko itxaronaldia hartuko du berriro.
3. Eteteko arrazoia bukatu ondoren, erantzuteko gehieneko epea zenbatzen jarraituko da.
4. Honako hauek artikulu honen 1.a) atalak aipatzen duen etetea justifikatzen duten inguruabarrak izanen dira, arreta atzeratzeko eskatzeko bidea ematen dutenak:
a) Ezkontza.
b) Seme-alabaren jaiotza, adopzioa edo adingabea familian hartzea.
c) Bigarren mailara arteko (hori barne) odol edo ezkontza bidezko ahaideen heriotza edo gaixotasun larria.
d) Publikoa den betebehar saihestezina betetzea.
e) Ikasketa ofizialen ondoriozko azterketak.
f) Ezinbesteko kasuak.
7. artikulua . Bermea galtzea.
1. Foru dekretu honetan ezartzen diren bermeak baliogabetu eginen dira, gaixoak laguntza espezializatuko kontsulta, proba diagnostikoa edo ebakuntza kirurgikoa ukatzen badu edo horietarako emandako hitzorduan agertzen ez bada, nahiz eta horretarako dei egin eta arrazoiez eskatu ez, bai Osasunbidea-Nafarroako Osasun Zerbitzuko zentroan, bai adierazten zaion ordezko zentroan, edo hitzordua atzeratzen badu arrazoirik adierazi gabe.
Hori gertatuz gero, gaixoari baja emanen zaio erregistroan.
2. Era berean, bermeak galduko dira gaixoari ordezko zentroa eskaintzen bazaio eta gaixoak ukatzen badu, gehieneko itxaronaldia igaro eta gero.
Alde horretatik, bermeak baliogabetu eginen dira espezialista norberaren borondatez aukeratzeko aukeraren arabera gaixoak medikua aukeratzen badu, hark daukan atzerapena dela-eta erantzuteko gehieneko epea bermatzerik ez dagoela.
Hori gertatuz gero, gaixoak itxaron-zerrendan egoten jarraituko du, egiturazkoa ez den itxaronaldia izanda.
III. KAPITULUA. BERMEEN SISTEMA
8. artikulua . Osasun Administrazioaren jarduketa printzipioak.
Zerbitzuak ematean ahalik eta eraginkortasunik eta kalitaterik handienak izateko helburuen arabera, Nafarroako Foru Komunitateko Osasun Administrazioak Osasunbidea-Nafarroako Osasun Zerbitzuaren baliabideak optimizatuko ditu, osasun arreta espezializatu programatu eta ez premiazkoa foru dekretu honetan ezarritako gehieneko aldian bermatzeko.
9. artikulua . Gehieneko epea ez betetzetik ondorioztatzen diren bermeak.
1. Foru dekretu honen 5. artikuluan finkatzen diren gehieneko itxaronaldiak igarotzen badira, gaixoak lehentasunezko osasun arreta eskatzen ahalko dio Osasunbidea-Nafarroako Osasun Zerbitzuari.
2. Aurreko idatz-zatian aurreikusitako kasuan, gaixoak eskatzen badu, Osasunbidea-Nafarroako Osasun Zerbitzuak osasun arretari berehalako erantzuna eman beharko dio Osasunbidea-Nafarroako Osasun Zerbitzuaren sare publikoko osasun zentroetako edozeinetan edo, bestela, osasun sistema publikoarekin hitzarmena duten zentroetan, modu subsidiarioan.
3. Eskubide hori eraginkorra izan dadin, gaixoak eskabidea aurkeztu beharko du dagokion osasun zentroko gaixoari arreta emateko ataletan.
4. Osasunbidea-Nafarroako Osasun Zerbitzuak ez du inolako gasturik onartuko edozein laguntza zentrotan gauzaturiko osasun arreta espezializatu programatu eta ez premiazkoagatik, hurrengo kasu hauetan:
a) Gaixoak ez duenean Osasunbidea-Nafarroako Osasun Zerbitzuko Prestazio eta Itun Zerbitzuaren baimenik, hori behar badu, nahiz eta ezarririko gehieneko itxaronaldiak igaro.
b) Laguntza Prestazio eta Itun Zerbitzuak baimendu duen zentroan ez den beste batean ematen denean.
c) Gaixoak berak eskatzen duenean osasun arreta.
d) Gastuak Osasunbidea-Nafarroako Osasun Zerbitzuko medikuek adierazi duten eta itxaron-zerrendan sarrarazi zuen laguntzari buruzkoak ez direnean, jardunbide onari jarraituz ebakuntza kirurgiko batean bertan konpondu beharreko egoera sortu ezean.
e) Kontsulta, proba diagnostikoa edo ebakuntza kirurgikoa Foru Komunitateko osasun administrazioetako langileek egiten dutenean.
f) Gaixoa bermea galtzea edo etetea dakarren egoeran dagoenean, erregistroan baja eman zaionean edo aplikatzen ahal den foru araudian ezarritako edozein baldintza betetzen ez denean.
5. Osasunbidea-Nafarroako Osasun Zerbitzuak itunak gauzatuko ditu behar bezala baimenduta dauden osasun zentro pribatuekin, osasun arreta espezializatuan erantzuteko gehieneko epea ez betetzetik ondorioztatzen diren beharrizanei erantzuteko. Osasunari buruzko apirilaren 25eko 14/1986 Lege Orokorraren 90. artikuluan eta horrekin bat datozenetan eta Osasunari buruzko azaroaren 23ko 10/1990 Foru Legearen 77. artikuluan eta horrekin bat datozenetan xedatutakoak arautuko dituzte itun horiek.
IV. KAPITULUA. NAFARROAKO ITXARON-ZERRENDETAKO GAIXOEN ERREGISTROA
10. artikulua . Nafarroako itxaronzerrendetako gaixoen erregistroa. Kudeaketa eta edukia.
1. Nafarroako itxaron-zerrendetako gaixoen erregistroa Osasunbidea-Nafarroako Osasun Zerbitzuak kudeatuko du, Laguntza Espezializatuaren Zuzendaritzaren bidez, Osasun Sistema Nazionalean itxaron-zerrendei buruzko informazioaren tratamendu homogeneorako neurriak ezarri dituen maiatzaren 23ko 605/2003 Errege Dekretuan, foru dekretu honetan eta hori garatzen duten arauetan ezarri bezala.
Osasunbidea-Nafarroako Osasun Zerbitzuko zuzendari kudeatzaileari dagokio foru dekretu honetan ezarritako erregistroko itxaron-zerrendak kudeatzeko behar diren ebazpenak ematea.
2. Nafarroako itxaron-zerrendetako gaixoen erregistroan honako datu hauek adierazi beharko dira, gutxienez:
a) Gaixoaren identifikazio datuak, hura aurkitzeko aukera ematen duten helbide eta telefono-zenbaki eguneratuak barne.
b) Mediku eskatzailearen identifikazio datuak.
c) Sarrera-eguna, erantzuteko epearen bermearen ondorioetarako.
d) Ebakuntza kirurgikoaren, kontsultaren edo prozedura diagnostikoaren identifikazio datuak.
e) Hitzorduaren eguna.
f) Bermearen inguruko egoera (bermerik duen, ez duen edo hori galdu duen; azken horretan, galera ekarri duen arrazoia zehaztu beharko da).
g) Erregistroko baja-eguna.
h) Bajaren arrazoia, erantzuteko epearen bermearen ondorioetarako.
3. Kanpoko kontsultei edo proba diagnostikoei dagokienez, egiturazkoa ez den itxaronaldia duen gaixoak edo, ebakuntza kirurgikoei dagokienez, aldi baterako programatu ezin den ebakuntza jaso behar duten gaixoentzako itxaronaldia duenak egiturazko itxaronaldia izanen du, egoera horiek ekarri dituzten arrazoiak desagertzen direnean.
4. Erregistroan inskribaturik dauden gaixoek baja hartu beharko dute bertan, hurrengo inguruabar hauetako bat gertatzen denean:
a) Agindutako ebakuntza kirurgikoa, kanpoko kontsulta edo proba diagnostikoa egiten denean.
b) Gaixoak baja eskatzen duenean.
c) Agindua berriro ebaluatzen denean eta, horren ondorioz, kontsulta espezializatua, proba diagnostikoa edo ebakuntza kirurgikoa gomendatzen ez denean.
d) Bertaratzeko eguna jakinarazteko hiru saio, behar bezala egiaztatzen direnak, egin ondoren, gaixoak erantzuten ez duenean.
e) Gaixoa hiltzen denean.
11. artikulua . Itxaronzerrenden egoerari buruzko informazioa.
Osasunbidea-Nafarroako Osasun Zerbitzuak Nafarroako Osasun Sistema Publikoko zentro eta zerbitzu bakoitzeko prozedura kirurgikoetako, kanpoko kontsultetako eta proba diagnostikoetako gaixoen kopuruari eta batez besteko itxaronaldiari buruzko informazioa emanen du hilero, Nafarroako Gobernuaren web orriaren edo beste baliabide batzuen bidez. Herritarrek informazio hori eskuratzen ahalko dute.
Xedapen Indargabetzaile Bakarra
Indarrik gabe geldituko dira foru dekretu honi aurka egiten dioten xedapen guztiak, maila berekoak edo txikiagokoak.
Azken xedapenetan lehena. Garatzeko araudia.
Osasuneko kontseilariari ahalmena emanen zaio foru dekretu hau garatzeko araudia onets dezan.
Halaber, bidezko araudiaren bidez, erantzuteko gehieneko epe laburragoak ezarri, eta foru dekretu honetan bermatzen diren zerbitzuak gehitzen ahalko ditu, inguruabarrek hori gomendatzen dutenean.
Azken Xedapenetan Bigarrena. Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2010eko apirilaren 26an.-Nafarroako Gobernuko lehendakaria, Miguel Sanz Sesma.-Osasuneko kontseilaria, María Kutz Peironcely.
I. ERANSKINA. LAGUNTZA ESPEZIALIZATU PROGRAMATU ETA EZ PREMIAZKOKO KONTSULTEI DAGOKIENEZ, HONAKO ESPEZIALITATE HAUETAN BERMATUTA EGONEN DA LEHENBIZIKO KONTSULTA:
1. Alergologia.
2. Angiologia eta Hodietako kirurgia.
3. Digestio aparatua.
4. Kardiologia.
5. Bihotz-hodietako kirurgia.
6. Kirurgia orokorra eta digestio aparatukoa.
7. Ahoko eta aurpegi-masailetako kirurgia.
8. Kirurgia pediatrikoa.
9. Kirurgia plastiko eta konpontzailea.
10. Toraxeko kirurgia.
11. Dermatologia mediko-kirurgikoa eta Benereologia.
12. Endokrinologia eta nutrizioa, dietetikari buruzko kontsultak izan ezik.
13. Hematologia.
14. Errehabilitazioa.
15. Barne medikuntza.
16. Nefrologia.
17. Pneumologia.
18. Neurokirurgia.
19. Neurologia.
20. Obstetrizia eta Ginekologia, laguntza bidezko ugalketako teknikak izan ezik.
21. Oftalmologia.
22. Onkologia medikoa.
23. Erradioterapiako onkologia.
24. Otorrinolaringologia.
25. Pediatria.
26. Psikiatria.
27. Erreumatologia.
28. Traumatologia eta Kirurgia ortopedikoa.
29. Urologia.
II. ERANSKINA. 120 EGUNEKO GEHIENEKO EPEA BERMATUTA DUTEN PROZEDURA KIRURGIKOAK:
Nerbio sistemaren ebakuntzak.
| KODEA | DESKRIBAPENA |
| 02.0 | Kraneoplastia |
| 02.3 | Burezurretik kanpoko bentrikuluen deribazioa |
| 02.4 | Bentrikuluen deribazioaren azterketa, erauzketa eta irrigazioa |
| 02.9 | Burezurraren, burmuinaren eta burmuineko meningeen beste ebakuntza batzuk |
| 03.0 | Bizkarrezur-hodiko egituren miaketa eta deskonpresioa |
| 03.1 | Bizkarrezurraren barneko nerbioaren sustraiaren banaketa |
| 03.5 | Bizkarrezur-muinaren egituren ebakuntza plastikoak |
| 03.6 | Bizkarrezur-muinaren atxikiduren eta bizkarrezurreko nerbioen sustraien lisiak |
| 03.8 | Agente suntsitzailearen bizkarrezur-hodiko injekzioa |
| 03.9 | Bizkarrezur-muinaren eta bizkarrezur-hodiaren egituren beste ebakuntza batzuk |
| 04.43 | Karpoko kanalaren askapena |
| 04.44 | Kanal tartsalaren askapena |
| 04.49 | Beste nerbio periferiko baten askapena |
| 05.0 | Nerbio edo gongoil sinpatiko baten banaketa |
| 05.9 | Nerbio sistemaren beste ebakuntza batzuk |
Sistema endokrinoaren ebakuntzak.
| KODEA | DESKRIBAPENA |
| 06 | Tiroide eta paratiroide guruinen ebakuntzak (aldaketa metabolikoa dakarren patologia onbera) |
| 06.7 | Hodi tiroglosoaren erauzketa |
| 07.2 | Alde bateko suprarrenalektomia |
| 07.5 | Guruin pinealaren ebakuntzak |
| 07.6 | Hipofisektomia |
| 07.7 | Hipofisiaren beste ebakuntza batzuk |
| 07.8 | Timektomia |
| 07.9 | Timoaren beste ebakuntza batzuk |
Begiaren ebakuntzak.
| KODEA | DESKRIBAPENA |
| 11.60 | Keratoplastia |
| 12.64 | Trabekulektomia |
| 14.74 | Bitrektomia |
| 14.75 | Sendagaien eta ordezkoen gorputz beirakararen barneko injekzioa |
Belarriaren ebakuntzak.
| KODEA | DESKRIBAPENA |
| 18.2 | Kanpo-belarriaren lesioaren eszisioa edo erresekzioa |
| 19.5 | Tinpanoplastia |
| 19.6 | Tinpanoplastiaren azterketa |
| 20.0 | Miringotomia |
| 20.4 | Mastoidektomia |
| 20.7 | Barne-belarriaren ebakia, eszisioa eta suntsipena |
| 20.91 | Tinpanosinpatektomia |
Sudurraren, ahoaren eta faringearen ebakuntzak.
| KODEA | DESKRIBAPENA |
| 21.4 | Sudurraren erresekzioa |
| 21.5 | Sudur-trenkadaren mukosazpiko erresekzioa (septoplastiak) |
| 21.6 | Turbinektomia |
| 21.8 | Sudurraren konponketa eta kirurgia plastikoko ebakuntzak |
| 21.9 | Sudurraren beste ebakuntza batzuk |
| 22 | Sudurreko sinuen ebakuntzak |
| 26 | Listu-guruin eta -hodien ebakuntzak |
| 28.2 | Amigdalektomia, adenoidektomiarik gabekoa |
| 28.3 | Amigdalektomia, adenoidektomiaduna |
| 28.6 | Adenoidektomia, amigdalektomiarik gabekoa |
| 29.2 | Brankietako kistearen eta fistularen eszisioa |
Arnas aparatuaren ebakuntzak.
| KODEA | DESKRIBAPENA |
| 30.0 | Laringeko lesioaren edo ehunaren eszisioa edo erresekzioa (tumore patologia onbera) |
| 31.5 | Trakeako lesioaren edo ehunaren tokiko eszisioa edo suntsipena (tumore patologia onbera) |
| 32.0 | Bronkioetako lesioaren edo ehunaren eszisioa edo tokiko suntsipena (tumore patologia onbera) |
| 32.2 | Biriketako lesioaren edo ehunaren tokiko eszisioa edo suntsipena (tumore patologia onbera) |
| 32.3 | Birikako erresekzio segmentarioa (tumore patologia onbera) |
| 32.4 | Birikako lobektomia (tumore patologia onbera) |
| 34.3 | Mediastinoko lesioaren edo ehunaren eszisioa edo suntsipena (tumore patologia onbera) |
Zirkulazio aparatuaren ebakuntzak.
| KODEA | DESKRIBAPENA |
| 38 | Hodien ebakia, eszisioa eta buxadura (barizedun zainen lotura eta erauzketa izan ezik) |
| 39 | Hodien beste ebakuntza batzuk |
Sistema hematikoaren eta linfatikoaren ebakuntzak.
| KODEA | DESKRIBAPENA |
| 40 | Sistema linfatikoaren ebakuntzak |
| 41 | Hezur-muinaren eta barearen ebakuntzak |
Digestio aparatuaren ebakuntzak.
| KODEA | DESKRIBAPENA |
| 42.3 | Esofagoko lesioaren edo ehunaren tokiko erauzketa edo kentzea (tumore patologia onbera) |
| 42.7 | Esofagomiotomia (Heller) |
| 44.6 | Pediatria adinean gaitasun esfinteriano esofagikogastrikoa sortzeko prozedurak |
| 44.9 | Urdaileko beste ebakuntza bat |
| 45 | Hestearen ebakia, erauzketa eta anastomosia |
| 46.4 | Hesteko estomaren azterketa |
| 46.5 | Hesteko estomaren itxitura |
| 48.76 | Proktopexia |
| 49.1 | Uzkiko fistularen ebakia edo erauzketa |
| 49.3 | Uzkiko beste lesio edo ehun baten tokiko erauzketa edo kentzea (suntsipena) |
| 49.39 | Uzkiko fisurektomia |
| 49.7 | Uzkiaren konponketa |
| 50.2 | Gibeleko ehunaren edo lesio onberaren tokiko erauzketa edo kentzea (suntsipena) |
| 53 | Etenaren konponketa, premiazko arreta eskatu duena edo ebakuntzarik izan ez duena, edo pediatria adinean |
Gernu aparatuaren ebakuntzak.
| KODEA | DESKRIBAPENA |
| 55.02 | Azalaren bidezko nefrostomia |
| 55.4 | Nefrektomia partziala |
| 55.5 | Nefrektomia osoa/Nefroureterektomia |
| 55.9 | Giltzurrunaren beste ebakuntza batzuk |
| 56 | Ureterraren ebakuntzak |
| 57.32 | Zistoskopia |
| 57.4 | Maskuriko lesioaren edo ehunaren eszisioa edo gernubidez bestaldeko suntsipena (maskuriko RTU izenekoa) |
| 57.7 | Zistektomia osoa |
| 57.8 | Gernuko fistularen konponketa |
| 58.0 | Uretrotomia |
| 58.3 | Gernubideko lesioaren eszisioa |
| 59.0 | Peritoneo atzeko ehunaren disekzioa |
| 59.8 | Ureterretako kateterismoa |
Gizonezkoaren aparatu genitalen ebakuntzak
| KODEA | DESKRIBAPENA |
| 60.2 | Gernubidez bestaldeko prostatektomia (prostatako RTU izenekoa, maskuriko zunda) |
| 60.5 | Erabateko prostatektomia |
| 62.3 | Alde bateko orkiektomia |
| 64.3 | Zakilaren mozketa |
| 64.4 | Zakilaren kirurgia konpontzaile eta plastikoko ebakuntza |
Emakumezkoaren aparatu genitalen ebakuntzak.
| KODEA | DESKRIBAPENA |
| 65.1 | Obarioen prozedura diagnostikoak (antzutasunari lotutakoak) |
| 65.25 | Obarioko lesioaren edo ehunaren tokiko eszisioa edo suntsipena (antzutasunari lotutakoa) |
| 66.1 | Fallopio-ren tronpen prozedura diagnostikoak (antzutasunari lotutakoak) |
| 67.2 | Uteroaren lepoaren konoa |
| 68.12 | Histeroskopia kirurgikoa (antzutasunari lotutakoa) |
| 68.4 | Sabeleko histeroskopia osoa |
| 70.5 | Zistozelearen eta rektozelearen konponketa |
Aparatu muskulu-eskeletikoaren ebakuntzak.
| KODEA | DESKRIBAPENA |
| 76.4 | Aurpegiko hezurren eszisioa eta berregitea |
| 77.0 | Sekuestrektomia |
| 77.2 | Falkako osteotomia (hallux valgusa izan ezik) |
| 80.10 | Artikulazioetako gorputz libreen erauzketa |
| 80.2 | Artroskopia |
| 80.40 | Artikulazioko blokeoaren askapena |
| 80.5 | Ornoarteko diskoaren eszisioa edo suntsipena |
| 81.0 | Ornoko artrodesia |
| 81.1 | Oineko eta orkatilako artrodesia eta artroeresia |
| 81.2 | Beste artikulazio bateko artrodesia |
| 81.43 | Belauneko triadaren konponketa |
| 81.45 | Lokailu gurutzatuen beste konponketa bat |
| 81.51 | Aldakaren erabateko ordezpena |
| 81.53 | Aldakaren ordezpenaren azterketa, bestela zehaztu ez dena |
| 81.54 | Belaunaren erabateko ordezpena |
| 81.55 | Belaunaren ordezpenaren azterketa, bestela zehaztu ez dena |
| 81.80 | Sorbaldaren erabateko ordezpena |
| 81.83 | Akromioplastia |
| 81.96 | Beste artoplastia batzuk |
| 84.0 | Goiko gorputz-adarraren mozketa |
| 84.1 | Beheko gorputz-adarraren mozketa |
| 84.19 | Mozketa abdominopelbikoa |
| 84.3 | Mozketaren ondoriozko muinoiaren azterketa |
| 84.91 | Mozketa (bestela zehaztu ez dena) |
Aparatu tegumentarioaren ebakuntzak.
| KODEA | DESKRIBAPENA |
| 85.2 | Bularreko ehunaren erauzketa edo suntsipena |
| 85.4 | Mastektomia |
| 86.9 | Azalaren eta larruazalpeko ehunaren beste ebakuntza batzuk |
Iragarkiaren kodea: F1007486
