(ir al contenido)

navarra.es

Castellano | Euskara | Français | English

LEXNAVARRA


Versión para imprimir

Versión en castellano

24/2009 FORU DEKRETUA, MARTXOAREN 30EKOA, NAFARROAKO FORU KOMUNITATEKO TURISMOKO KANPALEKUEN ANTOLAMENDUARI BURUZKO ERREGELAMENDUA ONESTEN DUENA Nota de Vigencia

BON N.º 61 - 20/05/2009



  NAFARROAKO FORU KOMUNITATEKO TURISMOKO KANPALEKUEN ANTOLAMENDUARI BURUZKO ERREGELAMENDUA


  I. TITULUA. XEDAPEN OROKORRAK


  II.TITULUA. HIRIGINTZAKO ARAUDI LURZORU URBANIZAEZINEAN


  III. TITULUA. TURISMO ARLOKO ARAUAK

  I. KAPITULUA. TURISMO ARLOKO SAILKAPENA

  II. KAPITULUA. JARDUERAREN ANTOLAMENDUA

  III. KAPITULUA. BALDINTZA TEKNIKO OROKORRAK

  IV. KAPITULUA. BALDINTZA TEKNIKOAK, KATEGORIEN ARABERA

  V. KAPITULUA. FUNTZIONAMENDU ARAUBIDEA

  VI. KAPITULUA. PREZIOAK ETA ERRESERBAK

  VII. KAPITULUA. TURISMO DIZIPLINA

  ERANSKINA. PLAKA EREDUA Nota de Vigencia


Atariko

1

Onetsi den erregelamenduaren bitartez turismoko kanpalekuen araudia hobeto egokitu nahi da sektorearen beharrizan berrietara zein Lurraldearen Antolamenduari eta Hirigintzari buruzko abenduaren 20ko 35/2002 Foru Legearen eta Ingurumena Babesteko Esku-hartzeari buruzko martxoaren 22ko 4/2005 Foru Legearen aurreikuspenen ondorioz sortu hirigintza, lurralde eta ingurumen arloko araudira.

Beste alde batetik, Turismoari buruzko otsailaren 14ko 7/2003 Foru Legean turismoko ostatu establezimenduen motak aipatzen dira, besteak beste turismoko kanpalekuak; lege horrek dioenez, eskatu ahal zaizkien betebehar teknikoak eta haien kategoriak erregelamendu bidez zehaztu behar dira.

2

Erregelamenduan biltzen diren turismo arloko arauei dagokienez, beren helburuak hauek dira: orain arte indarrean egon den araudiaren xedapenak hobetu eta eguneratzea, eta araudi hori aplikatzearen ondorioz metatu den esperientzia kontuan hartuta hainbat alderdi zehaztasun handiagoz mugatu eta definitzea. Hori guztia, turismoko kanpalekuen turismo ostatuaren zerbitzua erabiltzaileei ahalik eta kalitate eta segurtasun handienarekin ematen zaiela bermatzeko.

3

Hirigintza eta lurralde arloko arau berriek lurzoru urbanizaezinaren nozio positiboagoa bultzatzen dute. Lehengo izen berberari eutsi arren, mota horretako lurzorua definitzean arreta handiagoa jarriko zaio landa arloko balioak modu positiboan gordetzeari, urbanizazio masiboaren aurkako izaeratik ondorioztatzen den kontzeptu negatiboari baino.

4

Dena dela, lurzoru urbanizaezinaren kontzeptuaren izaera negatiboa ere, urbanizazio prozesutik nahitaez gordetzearekin zerikusia izanik, behar bezala lantzen da. Izan ere, bidea eta turismoko kanpaleku baten berezko azpiegiturak behar ez bezala erabili eta hirigune berriak sortzeak dakarren arriskuari aurre egiten dio. Horrelako instalazioek landa giroko bizimodua sortu behar dute, eta ez hiri giroko bizimodua modu bortxatu batean birlandatu.

Ezaugarri negatibo horiek turismoko kanpalekuaren eta instalazio erantsien definizioekin eta erregelamenduaren salbuespenekin osatzen dira. Kontzeptuak zehazteko ahaleginaren bidez, turismoko kanpalekuen itxura erakutsi arren, bizigune iraunkor gisa gauzatu nahi diren eraikinen engainua agerian jarri nahi da. Adibidez, etxe mugigarriak edo "mobil-home" direlakoak ostatu hartzeko unitate edo modulu finkoen atalean sartzen dira, eta horretarako erregelamenduan ezarrita dauden mugen mendean geratzen dira.

Helburu berbererako ezarri da beste hainbat muga, besteak beste kanpalekua ezin zatitzea, alde batetik, eta gutxienez 8.000 metro karratu izan beharra, beste aldetik.

5

Lehengo araudiaren ondoriozko esperientzia kontuan hartuta, turismoko kanpalekuekin bateragarriak diren lurzoru urbanizaezineko kategoria eta azpikategoriak Lurraldearen Antolamenduari eta Hirigintzari buruzko Foru Legea garatzeko Erregelamenduren arabera zehaztea aukeratu da. Horrela, hirigintza eta lurralde arloko erregelamenduen bilakaerari orpoz orpo jarraitzearen ondorioz turismoko kanpalekuen araudian eguneraketak egin behar izatea, hain gogaikarria den hori, saihestu egin da. Hala ere, komenigarritzat jo da segurtasunari eta ingurunearen balio naturalak indartzeari buruzko alderdi jakin batzuk erregelamenduan zuzenean arautzea. Alderdi horien artean nabarmentzen dira babestu beharreko lurzoruei edo arrisku naturaletatik zaindu beharrekoei (hirigintzako araudiaren ondorioz uholdeetako ur emariaren arrisku eta intentsitateari buruz sortutako parametroen arabera uholde-eremu izendatuta dauden lurzoruak barne direla) kokaleku aldetik eragiten dieten mugak. Izan ere, lurzoru horien erabilerarik egokiena turismoko kanpalekuari laguntzeko instalazio eta zerbitzuei lotuko zaie, beharrezkoa izanez gero.

6

Landalurraren berezko balioak indartzeko helburu positiboak zerikusia du balio historiko, artistiko edo ekologikoko elementuetarainoko distantziak zehaztasunez arautzearekin, baita segurtasun neurriak zein unean uneko lege zortasunekiko bateragarritasunari buruzko neurriak ezartzearekin ere. Gainera, lurzoru urbanizaezinaren alderdi positiboan erabat sartzen dira zuhaitzei, itxiturei, perimetroetako landare-zerrendei eta maldei buruzko neurriak, abelbideak zaintzeari eta erosioaren aurka egiteari buruzko neurriak zein turismoko kanpalekuak ingurune naturalari eta paisaiari egokitzeko neurriak.

Landa lurzoruaren alderdi positibo horren araudi arloko beste ezaugarri bat landa ingurunearen babesaren eta turismoko kanpalekuko erabiltzaileak eskatzen dituen erosotasun eta segurtasunaren arteko orekari buruzko gogoetaren emaitza da. Kanpaleku horietako askoren kokalekuak gizakiaren jarduera ekonomikoak gutxien eraldatu dituenak dira; baina landa habitata alderdi horretan ere indartu behar da. Helburua ez da landagune idiliko distiratsuak sortzea, gainazal mugiezin horretan turismo kanpalekuak atseginez ezartzeko. Aitzitik, paisaiari dagokionez babestuta egon arren ekonomiari dagokionez bizirik dauden guneak sortu nahi dira. Kanpalekuek gune horiek biziagotzen lagundu behar dute. Eta turismoko kanpalekuak landa giroko bizimodu ekonomikoa indartzeko erabiltzearen alde egiten bada -hain zuzen ere hori da helburua-, ezin dira baztertu Nafarroako klimaren ezaugarriak, lurralde honen zati handi batean plubiositate indizeak Estatuko batez bestekoak baino handiagoak baitira. Hori dela-eta handitu behar da unitate edo modulu aurrefabrikatuak eta askorentzako ostatu-logelak jartzeko gunearen gehieneko proportzioa.

Proportzio hori handitzeaz batera, modu zorrotzagoan arautu behar da ostatu-instalazio finkoetarako gunearen bereizketari eta gehieneko eraikigarritasunari dagokion guztia. Erregelamendu berriak modu zehatzagoan ezartzen du zer diren ostaturako elementu finkoak, "bungalow" motakoak, etxe mugigarriak edo "mobil-home" izenekoak, eta askorentzako logelak. Abiapuntua kontzeptu hau da: beheko solairua eta ziurrenik estalkipeko solairua dituen oinarrizko modulua, turismoko kanpalekuaren titularrak zuzenean ustiatzekoa.

7

Prozeduren arloan, erregelamenduak bereizketa argigarria egiten du turismo edo aisialdi jardueren udal plan bereziek eraentzen dituzten eremuen eta gainerako eremuen artean: lehenengoetan udal lizentzia edo baimena zuzenean lor daiteke; gainerakoek berriz, Lurraldearen Antolamendu eta Etxebizitza Departamentuaren lurralde baimenari lotuta egoten jarraituko dute, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan aurreikusita dagoenaren arabera. Era berean, foru administrazioaren eta tokiko administrazioaren zereginen banaketa -ikuskapen arlora hedatzen dena- ere argigarria da.

Halaber, erregelamenduak alde batetik hirigintza eta ingurumen arloko baldintzak (Erregelamenduan bertan aurreikusita daudenak) betetzen diren kontrolatzeko ahalmenak eta bestetik ikuskapen eta zehapen ahalmenak bereizten ditu: lehenengoak Lurraldearen Antolamendu eta Etxebizitza Departamentuari dagozkio, eta bigarrenak tokiko administrazioari zein turismoko kanpalekuei.

8

Turismoko kanpalekuak ezartzeko eskatzen diren agiri eskakizunak zerrendatzean hauei buruzko kezka hartu da kontuan: segurtasuna, erabiltzaileen erosotasuna, ingurune naturalari zein paisaiari egokitzea eta ingurunearen zein paisaiaren balioak indartzea.

9

Turismoko kanpalekuen hirigintza eta lurralde arloko alderdien antolamendua amaitzeko, informazioaren gardentasunik handienaren printzipioa bermatu nahi da. Horretarako, kanpalekuak lurzoru urbanizaezinean ezartzeko aukerari buruz aldez aurretik foru administrazioari kontsulta egiteko arauak emanen dira.

Bestalde, eta ekimen hau Vianako Printzea Erakundea-Kultura eta Turismo Departamentuak eta Lurraldearen Antolamendu eta Etxebizitza Departamentuak sustatu dutenez, Lehendakaritza, Justizia eta Barneko kontseilariari dagokio foru dekretua onets dadila proposatzea, Nafarroako Gobernuari eta Lehendakariari buruzko abenduaren 3ko 14/2004 Foru Legeko 12. artikuluko 5. atalean ezarritakoarekin bat.

Horiek horrela, aipatu foru legean ezarritakoaren arabera Lehendakaritza, Justizia eta Barneko kontseilariak proposaturik, Nafarroako Kontseiluaren adostasunarekin eta Nafarroako Gobernuak bi mila eta bederatziko martxoaren hogeita hamarrean egindako bilkuran hartutako erabakiarekin bat,

DEKRETATU DUT:

Artikulu bakarra. Erregelamendua onestea.

Nafarroako Foru Komunitateko turismoko kanpalekuen antolamenduari buruzko erregelamendua onetsi da. Haren testua foru dekretu honi erantsi zaio.

XEDAPEN IRAGANKORRAK

Lehenengo xedapen iragankorra. Eraikinak uholdeeremuetan.

Foru dekretu hau indarrean jartzean uholde-eremuetan edo arrisku naturala duten eremuetan eraikinik badago erabiltzaileen eta kanpalekuko langileen ostaturako edo haien egonaldi luzeetarako, erabiltzen jarraitu ahal izanen dira, baldin eta Barne Zuzendaritza Nagusiak onetsitako bi plan hauek badituzte: larrialdi plana, arriskua egonez gero eremu horiek berehala eta benetan ebakuatu ahal direla bermatzeko, eta erabilerak ordezteko plana, ostatuarekin edo egonaldi luzearekin zerikusia duten erabilerak arriskurik ez duten beste alde batzuetara lekualdatzea aurreikusteko.

Bigarren xedapen iragankorra. Egokitzapena.

1. Behar bezala baimenduta egonik foru dekretu hau indarrean jartzean funtzionatzen ari diren Turismoko kanpalekuek, erregelamenduaren II. tituluak ezartzen dituen hirigintzako baldintzak betetzen ez badituzte, gaur egungo egoeran jarraitu ahal izanen dute, baina beren azalera handitzeko edo erabat berritzeko baldintza horiek bete beharko dituzte.

2. Nafarroako Turismo Erregistroan inskribatuta dauden turismoko kanpalekuek foru dekretu hau indarrean jartzen den egunetik hiru urteko epea izanen dute beren instalazio eta zerbitzuak dagokien turismo kategoriaren eskakizunetara egokitzeko, erregelamenduaren III. tituluan ezarrita dagoenaren arabera. Epe hori igarotakoan, Vianako Printzea Erakundea-Kultura eta Turismo Departamentuak interesdunari entzunaldia eskaini ondoren bidezkoa den kategoria emanen dio.

Hirugarren xedapen iragankorra. Tramitazioko prozedurak.

1. Turismoko kanpalekuak ezartzeko prozedurak, foru dekretu hau indarrean jartzean hirigintza arloan zein Vianako Printzea Erakundea-Kultura eta Turismo Departamentuan tramitatzen ari badira, lehengo araudiaren arabera ebatziko dira, baldin eta interesdunak foru dekretu hau berariaz aplikatzeko eskatzen ez badu, espedientean bidezkoak diren aldaketak eginda.

2. Nolanahi ere, Nafarroako Turismo Erregistroan inskribatu ondoren, turismoko kanpalekuek inskribatzen diren egunetik aurrera hiru urteko epea izanen dute beren instalazio eta zerbitzuak dagokien turismo kategoriaren eskakizunetara egokitzeko, erregelamenduaren III. tituluan ezarrita dagoenaren arabera.

XEDAPEN INDARGABETZAILEA

Xedapen indargabetzaile bakarra. Indargabetzea.

Foru dekretu hau indarrean jartzean indargabetuta geratuko dira turismoko kanpalekuak arautzen dituen martxoaren 27ko 76/1995 Foru Dekretua eta hark xedatzen duenari aurka egiten dioten maila bereko edo apalagoko xedapen guztiak.

AZKEN XEDAPENAK

Azken xedapenetan lehena. Garatu eta betetzea.

Ahalmena eman zaie Vianako Printzea Erakundea-Kultura eta Turismoko kontseilariari eta Lurraldearen Antolamendu eta Etxebizitzako kontseilariari, bakoitzari bere eskumen-eremuan foru dekretu hau garatzeko eta betetzeko beharrezkoak diren xedapen guztiak emateko.

Azken xedapenetan bigarrena. Indarrean jartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

I. TITULUA. XEDAPEN OROKORRAK

1. artikulua . Xedea.

Erregelamendu honek xede du erabilera publikoko turismoko kanpalekuak antolatzea eta lurzoru urbanizaezinean horrelako kanpalekuak ezartzeko hirigintza arloko baldintzak arautzea.

2. artikulua . Aplikazioesparrua.

1. Erabilera publikoko turismoko kanpalekua da ongi mugaturiko lurra, egokitua eta behar diren instalazio eta zerbitzuak dauzkana, pertsonei aire zabalean bizitzeko toki bat aldi baterako emateko erabiltzen dena, diru truk, oporretarako edo turismorako, betiere kanpadendak, karabanak edo toki batetik bestera eraman daitezkeen antzeko tresnak erabilita.

2. Honako hauek gelditzen dira erregelamendu honen esparrutik kanpo:

a) Gazteentzako kanpalekuak, aterpetxeak, zentroak, eskolen oporraldietarako udalekuak eta antzekoak, berariazko xedapenen mendean daudenak.

b) Erakunde edo elkarteen kanpaleku pribatuak, beren bazkideek soilik erabili ahal dituztenak.

3. artikulua . Eskubideak eta betebeharrak.

Kanpalekua ezartzeko beharrezkoak diren bide eta azpiegiturak egoteak ez du eskubiderik sortuko lurzoruaren sailkapenari dagokionez.

Debekatuta dago turismoko kanpalekuen lurzatiak saltzea, baita kanpinlari egoiliarrak onartzea ere; horrelakoak dira ohiko egoitza kanpalekuan ezarrita daukatenak. Debeku hau hausteak turismoko kanpalekuaren kalifikazioa galtzea ekar dezake.

II.TITULUA. HIRIGINTZAKO ARAUDI LURZORU URBANIZAEZINEAN

4. artikulua . Kanpalekuak ezartzeko lurzoruak.

1. Erregelamendu honetan azaltzen diren turismoko kanpalekuak lurzoru urbanizazinean ezartzea, hirigintza arloan, titulu honetan ezarrita dauden baldintzen arabera arautuko da.

2. Erregelamendu honetan aurreikusita dauden hirigintzako baldintzen ikuskapen eta kontrola Lurraldearen Antolamendu eta Etxebizitza Departamentuari dagokio, eta bidezkoa bada, toki entitateei.

5. artikulua . Jardueren araubidea eta baldintzak.

1. Turismoko kanpalekuak Lurraldearen antolamenduari eta Hirigintzari buruzko foru legea garatzeko erregelamenduetan zehazten diren lurzoru urbanizaezineko kategoria eta azpikategorietan soilik ezarri ahal izanen dira.

2. Turismoko kanpalekuak ezin izanen dira kokatu lurzoru osasungaitzetan, ezta gogaikarriak ere, osasungarritasun egoera aldatzeko modukoak, osasun ingurumenerako kaltegarriak nahiz pertsona edo ondasunentzat arriskutsuak izan daitezkeen jarduera edo instalazioetatik hurbil.

3. Ezin izanen dira kanpalekuak ezarri berez %10etik gorako malda duten lurretan, non eta espedientean ez den justifikatzen neurri zuzentzaile egokiak hartuko direla, alegia, lurraren hondamena eta higidura eta paisaiaren gaineko eragin negatiboa saihesteko balioko dutenak. Paisaiaren harmonia hautsi ahal duten kokalekuak saihestuko dira, eta bereziki tontor, gailur, begiratoki natural, terraza bazter edo bestelako leku ageriko eta bereziak.

4. Nolanahi ere kultur ondarearen araudiak ezartzen dituen gutxieneko distantziak errespetatuko dira.

5. Turismoko kanpalekuak biziguneak giza kontsumorako urez hornitzen dituzten iturburuetatik 200 metro baino gutxiagoko erradioan instalatzea ez da baimenduko.

6. Debeku edo mugen eraginpean edo lege nahiz erregelamenduetako xedapenen bidez ezarritako zortasun publikoen eraginpean dauden lekuak saihestuko dira.

7. Babestu beharreko lurzoruetan edo arrisku naturaletatik zaindu beharreko lurzoruetan (uholde-eremuak barne) turismoko kanpalekuari laguntzeko instalazio eta zerbitzuak soilik baimendu ahal izanen dira, besteak beste kirol eremuak, uraren edo energia elektrikoaren hornidurako instalazioak, telekomunikazioak, lehortegiak eta erabiltzaileen eta kanpalekuko langileen ostaturako edo haien egonaldi luzeetarako ez diren beste guztiak.

8. Ez izanen dira baimendu 8.000 metro karratutik beherako turismoko kanpalekuak.

9. Abelbideak ezin izanen dira erabili turismoko kanpalekura ibilgailuz sartzeko.

10. Lehendik dauden zuhaitzak zaintzeko neurriak hartuko dira, hori ezarpenaren beharrizanekin bateraezina ez bada. Debekatuta dago zuhaitzak matarrasan moztea.

6. artikulua . Lurzoruen araubide juridikoa.

Turismoko kanpalekua ezartzeko baimena duten lurzoruak zatiezin bihurtuko dira, eta lurzorua turismoko kanpalekurako erabiltzen den bitartean hori agerrarazi beharko da jabetza erregistroan idatzoharra eginda.

7. artikulua . Ingurumenera egokitzeko baldintza eta betebeharrak.

1. Kanpatzeko eremua, bere zerbitzuko elementu edo instalazioak barne direla, gehienez ere turismoko kanpalekuaren azaleraren %75 izanen da.

2. Turismoko kanpalekuak eremuaren berezko zuhaitz edo zuhaixka espezieekin egindako perimetroko zerrenda izanen du, baita elementu naturalekin edo artifizialekin egindako itzalguneak ere. Azaleraren 300 m²-tik behin gutxienez zuhaitz bat egonen da.

3. Eraikinak zein ingurunetan dauden, oinarrizko alderdietan horri egokituko zaizkio, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 88. artikuluan, artikulu honetan eta tokiko plan eta ordenantzetan xedatuta dagoenaren arabera. Hurbileko ingurunearekin eta ezarriko direneko gunearen landa arkitektura edo arkitektura tradizionalarekin harmonizatu beharko dira.

4. Turismoko kanpalekuek perimetro osoan itxitura izan beharko dute, gorabehera naturalak direla-eta itxitura artifiziala alferrikakoa denean izan ezik. Debekatuta dago txarrantxazko itxitura. Itxituraren ezaugarriak hirigintza ondorioetarako tramitatzen den plan berezian edo proiektuan xedatuta dagoenaren araberakoak izanen dira.

8. artikulua . Ekipamenduak eta zerbitzuak.

1. Turismoko kanpalekuek erabiltzaileen beharrizan kolektiboak asetzeko beharrezkoak diren ekipamendu eta zerbitzuak izanen dituzte, beren kategoriaren arabera. Ekipamendu eta zerbitzu horien ezaugarriak erregelamendu honetan zehaztuta daude.

2. Ekipamenduetarako eraikinek eta eraikin kolektiboek honako baldintza hauek bete beharko dituzte:

a) Solairu kopurua, gehienez: beheko solairua, solairua eta, bidezkoa bada, estalkipea.

b) Mugetarainoko gutxieneko tartea: 6 metro.

9. artikulua . Ostaturako modulu finkoak. Horiek kokatzeko baldintzak.

1. Kanpatzeko eremuaren barruan ostaturako egurrezko unitate edo modulu aurrefabrikatuak edo antzekoak, "bungalow" motakoak jartzeko gune bat mugatzea baimendu ahal izanen da. Horretarako, baldintza hauek egonen dira:

a) Gune horren azalera gehienez turismoko kanpalekuaren azaleraren %50 izanen da.

b) Gune horren kokalekua gainerako kanpatzeko eremutik argi bereizita egonen da. Gune horretan ez da baimenduko bestelako instalazio finko, itxitura, zoladura edo lorategirik, ezta orokorrean antzeko beste ezein elementurik ere.

c) Moduluak beheko solairukoak izanen dira, baina estalkipeak onartu ahal izanen dira.

d) Moduluak turismoko kanpalekuaren titularrak ustiatuko ditu.

2. Artikulu honetan aurreikusita dauden ondorioetarako, ostaturako unitate edo modulu finkotzat hartuko dira etxe mugagarri izenekoak (mobil home) ere.

3. Ostaturako elementu finkoek erregelamendu honen 23. artikuluan ezartzen diren eskakizunak bete beharko dituzte.

10. artikulua . Askorentzako logeletan ostatu hartzea.

Turismoko kanpalekuetan askorentzako logeletan ostatu hartzeko instalazioak baimendu ahal izanen da. Instalazio horiek erregelamendu honen 24. artikuluan xedatzen diren gutxieneko baldintzak bete beharko dituzte.

11. artikulua . Eraikinen eraikigarritasuna.

1. Turismoko kanpalekuetan egon daitezkeen eraikin guztien gehieneko eraikigarritasuna, metro karratutan adierazia, ostaturako modulu finkoak barne direla, estalkipeak bazter utzita, formula hauen arabera kalkulatuko da:

A) 8.000 eta 20.000 metro karratu arteko azalera osoa duten kanpalekuak: y = 0,18x.

B) 20.001 eta 50.000 metro karratu arteko azalera osoa duten kanpalekuak: y = 0,12x + 1.200.

C) 50.001 eta 80.000 metro karratu arteko azalera osoa duten kanpalekuak: y = 0,06x + 4.200.

D) 80.001 eta 110.000 metro karratu arteko azalera osoa duten kanpalekuak: y = 0,03x + 6.600.

E) 110.000 metro karratutik gorako azalera duten kanpalekuetarako, gehieneko eraikigarritasuna 10.000 metro karratu izanen da.

2. Aurreko zenbakian aipatzen diren formula matematikoetan, "y" gehieneko eraikigarritasun osoa izanen da, metro karratutan neurtuta, eta "x" kanpalekuaren azalera osoa izanen da, hori ere metro karratutan adierazita.

12. artikulua . Ezartzeko prozedura.

Kanpalekuak lurzoru urbanizaezinean ezartzeko prozedura ondoko bi modalitate hauetako batean eginen da:

1. Udalaren hirigintza planeamenduaren zehaztapenen artean turismoko kanpaleku bat aurreikusi eta kokatzea badago, Lurraldearen Antolamendu eta Etxebizitza Departamentuaren lurralde baimenaren bitartez. Hori Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan aurreikusita dago. Halaber, ezarri aurretik jarduera horrek udal baimena izan beharko du.

2. Turismo edo aisialdi jardueren udal plan berezia duten udalerrietan, plan horren araberako udal lizentzia edo baimenaren bitartez.

3. 1 eta 2 ataletan aipatzen den hirigintzako baimena gorabehera, beste sektore araudi batzuk aplikatuta beste baimen batzuk ere lortu beharko dira, bereziki ingurumena babesteari dagokionez.

13. artikulua . Baimena emateko prozedura.

Aurreko artikuluan aipatzen den administrazio baimena lortzeko, Lurraldearen Antolamendu eta Etxebizitza Departamentuak kanpalekua lurzoru urbanizaezinean kokatzea baimentzeko ematen duen ebazpenean neurri zuzentzaileak ezarri ahal izanen dira kokatzeko, eraikitzeko edo urbanizatzeko baldintzei buruz.

14. artikulua . Lurraldearen Antolamendu eta Etxebizitza Departamentuaren baimenespedientearen edukia.

Aurreko artikuluaren arabera Lurraldearen Antolamendu eta Etxebizitza Departamentuan tramitatzen diren espedienteetan, ingurumena babesteko jarduera sailkatuen kontrolari buruz eta gainerako garapen arauei buruz aurkeztu behar diren dokumentazioaz gain beste hau ere agertu beharko da:

1. Jarduera zein udalerritan kokatu nahi den, bertako alkateak sinatutako eskabidea.

2. Dagokion udalerriak egindako txostena, sustatzaileak egindako proposamenaren hainbat alderdiri buruzkoa; hona hemen alderdi horiek:

a) Proposamena indarreko tokiko hirigintza planeamenduaren zehaztapenei egokitzen zaien.

b) Nabarmendu nahi diren beste alderdi guztiak, betiere hirigintza arloko gaiei buruzkoak.

3. Lurzoruaren jabearen zinpeko aitorpena edo hitzematea, lurzorua zatitu eta gerora jabetza erregistroan idatzoharrik eginen ez duela adierazten duena.

4. Dokumentazio teknikoa, hainbat alderdi behar bezala justifikatuta lantzeko; hona hemen alderdi horiek:

a) Memoria.

a.1. Proiektua indarreko hirigintza eta lurralde planeamenduari egokitzen zaion.

a.2. Erregelamendu honen 5. artikuluan kokalekuari buruz arautzen diren baldintzak betetzearen justifikazioa.

a.3. Kanpalekuaren antolamenduari buruzko datuen deskribapen eta justifikazioa, besteak beste datu hauena: azalera; finka eraikin eta instalazioek, eta oinezkoentzat, ibilgailuentzat eta aparkalekuetarako erabili beharreko gainazal zolatuek okupatzen duten; kanpatzeko plazen kopurua eta plazen modalitateak; aparkaleku kopurua, ibilgailu motaren arabera; eta espazio libreetarako, kirol espazioetarako eta berdeguneetarako nahiz zuhaiztietarako erabili beharreko azalerak, aurreikusten diren zuhaitz espezieak deskribatuta. Halaber, eginen diren lur mugimenduen eta aurreikusten diren sestren justifikazioa sartuko da.

a.4. Dauden eta aurreikusten diren zerbitzuen deskribapena, hauei buruz: uraren hornidura, suteak itzaltzea, saneamendua, energia elektrikoa eta bestelako energiak, argiak, telefonia, gasa, hondakin solidoen deuseztapena eta bestelako instalazioak.

Kanpalekuaren titularrak egiaztatu eginen du giza kontsumorako uraren hornidura hornidurarako sare publiko batetik egiten dela eta sarearen kudeatzaileak kanpalekuaren hornidurarako baimena eman duela. Giza kontsumorako uraren hornidura norberaren baliabideekin egiten bada, Osasun Publikoaren Institutuak egindako txostena ere aurkeztuko da. Txosten horretan erabilgarri dagoen ur-emaria nahikoa den, erabiltzen den ura giza kontsumorako ura produzitzeko egokia den eta helburu horretarako proposatzen diren tratamendu sistemak nahikoak diren adierazi beharko da. Halaber, eskumena duen arroko erakundeak ur-emaria emateko baimena ere aurkeztu beharko da.

a.5. Kanpalekuko hondakin-uren isurketa saneamendu publikoko zein sistematan egiteko proposatu den, horren kudeatzailearen baimena, edo eskumena duen arroko erakundeak isurketa egiteko emandako baimena, ur horren isurketa saneamendu publikoko sistema batean egiten ez bada.

a.6. Eraikinen ezaugarrien (forma nahiz eraikuntza arloan), erabileraren eta xedearen deskribapena, hauei buruz: solairu bakoitzeko azalera eraikia, solairu kopurua, eraikinaren eta elementu bakanen altuera, fatxaden, itxituren eta bestelakoen osaera, materialak eta kolorea.

a.7. Kanpalekuari buruzko errotuluen eta seinaleztapen elementuen deskribapena, eta paisaian edo monumentuetan ikusizko eragin txarra ez sortzearen justifikazioa.

a.8. Lurzatiaren, bere ingurune fisikoaren eta inguruan dauden eraikinen argazki panoramikoak.

b) Dokumentazio grafikoa.

b.1. Kanpalekua zein udalerritan dagoen kontuan hartuta, kokapen planoak, gutxienez 1:5.000 eskalakoak. Plano horretan agertu beharko dira erregelamendu honen 5. artikuluan ezartzen diren baldintzak.

b.2. Plano topografikoa, gutxienez 1:500 eskalakoa; plano horretan lurzatiaren eta bere hurbileko ingurunearen gaur egungo egoera agerraraziko da, eta dauden elementu natural, eraikin, azpiegitura eta zerbitzuak nahiz hirigintza aldetik interesa duten gainerako elementu guztiak zehazki aipatuko dira.

b.3. Dauden eta aurreikusten diren obra, zerbitzu eta instalazioen kokalekuen planoa, eskala egokian eta gutxienez 1:500 eskalan. Plano horretan erregelamendu honen 5. artikuluan kokalekuari buruz aipatzen diren baldintzak betetzen direla justifikatu beharko da.

b.4. Eskala egokiko planoak, honako alderdi hauek agerrarazteko:

b.4.1. Ibilgailuentzako dagoen sarbidea eta aurreikusten dena. Dena delako lurzatiaren eta dagokion bide publikoaren artean irisgarritasun egokia bermatzeko beharrezkoak diren mugimenduak adierazi beharko dira. Ondorio horietarako, ezkerrerako bira duten sarreretarako dezelerazio erreia jarriko da, amaieran itxaroteko eta biratzeko zabalgunea duena; bestela, sarbidearen beste aldean antzeko bide bat jarriko da, aurreikusi ahal den trafikorako ezaugarri egokiak dituena.

b.4.2. Kanpalekuaren antolamendua, oinplanoan eta sekzioetan. Honako hauek agertu beharko dira: eginen diren instalazio eta eraikinek finkan duten okupazioa; kanpatzeko plazen kopurua eta plazen modalitateak, beren azalera adierazita; eraikinen eta kanpatzeko plazen atzeramen guneak, muga eta itxituretaraino; lur mugimenduak; horma eta ezpondak; oinezkoentzako, ibilgailuen trafikorako eta aparkalekuetarako azalera zolatuak; aparkaleku kopurua eta espazio libreetarako, kirol espazioetarako eta berdeguneetarako nahiz zuhaiztietarako erabili beharreko azalerak, elementu horiek okupatzen dituzten azalerak xehatuta.

Plano horietan proiektuko sestrak agerraraziko dira.

Uraren hornidurako zerbitzuak: suteak itzaltzea, saneamendua, energia elektrikoa, gasa, telefonia eta bestelako energiak; telekomunikazioak; argiak eta espedientean agertzen diren bestelako instalazioak.

b.5. Oinplano, altxaera eta sekzioen planoak. Horietan eskema gisa agertu beharko dira eraikinaren formazko eta eraikuntzazko ezaugarri nagusiak, memorian deskribatzen direnak, baita informazio eta seinaleztapen elementuen ezaugarriak ere. Eraikinaren ezaugarriak nolanahi ere eskualdeko arkitekturaren oinarrizko ezaugarrien araberakoak izan beharko dira. Dagozkien planoetan aukeratutako +-0,00 kotarekin alderatuta solairu bakoitzak dituen mailako kotak agerraraziko dira.

c) Proiektuaren laburpen-memoria, proiektuaren ezaugarriak, kokalekua eta balizko ingurumen eragina agerraraziko dituena, jarduera sailkatuaren lizentziaren ondorioetarako, eta ingurumenaren gaineko eraginaren ebaluazioa, Ingurumena Babesteko Esku-hartzeari buruzko martxoaren 22ko 4/2005 Foru Legean eta lege hori garatzeko xedapenetan aurreikusten diren irizpideen arabera hori eskatu ahal denean.

5. Bankuaren abala edo Zuzenbidean onartzen diren berme modalitateetako beste bat. Horren zenbatekoa zerbitzuak ezartzeko eta urbanizazio lanak egiteko ateratzen den kostuaren %10 izan beharko da, proiektuaren beraren ebaluazio ekonomikoaren arabera.

15. artikulua . Aurretiazko kontsultak.

1. Nafarroako Foru Komunitatearen Administrazioari eta toki entitateari aurretiaz kontsulta egin ahal izanen zaie, kanpaleku bat lurzoru urbanizaezinean ezartzeko aukerari buruz.

2. Kontsultarako eskabidean zehazki eta zalantzarik ez izateko moduan identifikatuko da nahi den kokalekua, baita jarduera erregelamendu honen zein lurralde, sektore, hirigintza eta ingurumen arloko araudiaren arabera egiteko garrantzitsuak diren datu guztiak ere.

3. Kontsultaren erantzuna ez da loteslea izanen eta informazioa zein unetan eskatzen den, orduko inguruabar faktikoen mendean egonen da.

III. TITULUA. TURISMO ARLOKO ARAUAK

I. KAPITULUA. TURISMO ARLOKO SAILKAPENA

16. artikulua . Sailkapena Nota de Vigencia.

Turismoko araudiaren ondorioetarako, turismoko kanpalekuak kategoria hauetan sailkatuko dira zerbitzu eta instalazioen kalitatearen arabera: 5, 4, 3, 2 eta 1 izar.

17. artikulua . Plaka bereizgarria Nota de Vigencia.

1. Turismoko kanpaleku guztietan nahitaezkoa izanen da sarrera nagusiaren ondoan sailkapenari dagokion bereizgarria daukan plaka normalizatu bat erakustea.

2. Turismoko eskumena duen kontseilariak finkatuko ditu plaka bereizgarriaren ezaugarriak.

18. artikulua . Publizitatea.

1. Turismoko kanpalekuek egiten duten publizitatean eta ematen dituzten faktura eta agirietan haien sailkapena agertu beharko da.

2. Debekaturik dago establezimenduari ez dagozkion izen, errotulu edo bereizgarriak eta establezimenduaren mota edo kategoria nahasteko bidea eman dezaketenak erabiltzea.

II. KAPITULUA. JARDUERAREN ANTOLAMENDUA

19. artikulua . Nafarroako Turismo Erregistroan inskribatzea .

1. Jarduera hasi aurretik, eta establezimendua Nafarroako Turismo Erregistroan inskribatzeko, dokumentazio hau aurkeztu beharko da:

a) Titularraren erantzukizuneko aitorpena, haren datuak biltzen dituena, honako hauen jabe dela adierazita:

- Legezko dokumentazioa, higiezinaren jabe edo errentari dela dioena, edo beste edozein titulu, turismoko ostatu izateko prest dagoela frogatzen duena, baita establezimenduaren gaineko datuak ere, kokalekuari, edukierari eta modalitateari dagokienez.

- Irekitzeko lizentzia edo horren ordezko dokumentua.

- Erantzukizun zibileko aseguruaren kontratua, 600.000 euroko estaldura duena gutxienez ere.

b) Obra bukaerako planoak.

2. Establezimenduetako aldaketak, titulartasun aldaketak, jarduera uztea eta, oro har, inskribatu edo jasotako datuetan edozein aldaketa gertatuz gero, aurreko atalean ezarritako prozeduraren arabera tramitatuko dira.

20. artikulua . Instalazioen eta hobekuntzen baterako balorazioa.

1. Vianako Printzea Erakundea-Kultura eta Turismo Departamentuak zilegi izanen du, arrazoiak emanez, establezimendu bat kategoria jakin batean sailkatzeko edo inskribatzeko eskatzen diren gutxieneko baldintza teknikoetako baten falta konpentsatzea, establezimenduaren instalazioek eta bertan egin daitezkeen hobekuntzen baterako balorazioa eginez.

2. Konpentsazioak irizpide teknikoetan oinarrituta arrazoitu beharko dira, eta establezimenduan dauden zerbitzu eta baldintza guztiekin alderatuta baloratu.

III. KAPITULUA. BALDINTZA TEKNIKO OROKORRAK

21. artikulua . Sektoreko araudia.

Turismoko kanpalekuek indarra duten arauak bete beharko dituzte: hirigintza eta eraikuntzaren arlokoak, instalazioei buruzkoak, osasun eta kontsumoari buruzkoak, segurtasunekoak, suteei aurrea hartzekoak, babes zibilekoak, oztopo fisiko eta zentzumenezkoak kentzekoak, higieneari eta ingurumenaren babesari buruzkoak, eta aplikatu behar dituzten gainerako xedapen guztiak.

22. artikulua . Lurzatiak.

1. Kanpatzeko eremurako azalera behar bezala mugatutako lurzatietan bereizita egonen da mugarri edo marken bidez, landare itxituren bidez edo helburu horietarako egokia den beste edozein baliabideren bidez, lurzati bakoitzari dagokion zenbakia modu egokian adierazita.

2. Ibilgailuen aparkalekua eta ostatu hartzeko gunea leku diferentetan aurreikusita dituzten lurzatiei dagokien azaleraren 15 m² deskontatu ahal izanen zaie, turismoko kanpalekuaren kategoriaren arabera; kasu horretan, ibilgailuak aparkatzeko lekuan aipatu lurzati bakoitzerako erreserbatutako plazak jarriko dira. Aparkatzeko plaza bakoitzean dagokion lurzatia identifikatzeko zenbakia agertuko da.

3. Aukeran, kanpatzeko eremuaren %30 gehienez zatitu gabe utzi ahal izanen da. Salbuespen gisa, turismoko kanpalekuaren kokalekuaren eta ezaugarri zehatzen arabera, zatitu gabeko portzentaje handiagoa baimendu ahal izanen da.

Zatitu gabeko eremuetan, bertan kanpatu ahal diren pertsonen gehieneko kopurua adierazteko kartela jarriko da. Kopuru hori zehazteko, eremuaren azalera eta ondoko parametro hauek kontuan hartuko dira:

a) 16 m² kanpinzale bakoitzeko, 5 izarreko kategorian.

b) 14 m², 4 izarreko kategorian.

c) 12 m², 3 izarreko kategorian.

d) 10 m², 2 izarreko kategorian.

d) 9 m², 1 izarreko kategorian Nota de Vigencia.

4. Kategoria bakoitzerako eskatzen den gutxieneko azalera edozein dela ere, turismoko kanpaleku guztiek gutxienez 35 m²-ko azalera duten lurzati txikiagoak izaten ahal dituzte, gehienez bi lagunentzat, ibilgailurik gabe, motozikletak izan ezik. Gehienez turismoko kanpalekuaren lurzati guztien %10 izaten ahal dira.

5. Kanpalekuaren funtzionamenduko denboralditik kanpo, karabanak gorde eta zaintzeko -eta soilik horretarako- gune bat jarri ahal izanen da. Gune hori ezin izanen da turismo helburuekin ostatu gisa erabili.

23. artikulua . Ostatuinstalazio finkoak.

"Bungalow" motako ostaturako elementu finkoek eta "etxe mugigarriek (mobil-home)" ondoko baldintzak bete beharko dituzte:

a) Beren edukiera honela zehaztuko da: ostatuko plaza bakoitzeko 6 metro karratu gutxienez.

b) Ur beroa duten konketa eta dutxa izanen dituzte, baita komun-ontzia ere.

24. artikulua . Askorentzako logelak.

Askorentzako logeletan ostatu hartzeko instalazioek gutxieneko baldintza hauek bete beharko dituzte:

a) Logelen gutxieneko azalera erabilgarria, komun eta bainugelen azalera kontuan hartu gabe, bidezkoa bada, plaza bakoitzeko 2 metro karratu izanen da.

b) Logeletan gutxienez 5 metro kubiko aire izanen dira plaza bakoitzeko.

c) Logeletan sabaiaren altuera librea 2,4 metrokoa izanen da gutxienez, eta teilatupeko logeletan 2 metrokoa, eremu erabilgarriaren erdiko puntuan. Gune erabilgarria da gutxienez 1,5 metroko altuera librea duena.

25. artikulua . Kanpalekuaren edukiera.

Turismoko kanpalekuetan ostatu hartzeko gehieneko edukiera zehaztean batez beste lurzati bakoitzeko lau plaza aurreikusiko dira, eta lurzati txikiago bakoitzeko bi plaza. Ateratzen den kopuruari zatitu gabeko guneen, askorentzako logelen eta ostatu-instalazio finkoen plazak gehituko zaizkie.

26. artikulua . Turismoko kanpalekuen harreralekua.

Harrera-lekua turismoko kanpalekuaren sarreratik hurbil egonen da, eta erabiltzaileekiko harremanetarako gunea izanen da administrazioko eta informazioko ondorioetarako.

27. artikulua . Bideak.

1. Turismoko kanpalekuek barneko bideak izan beharko dituzte. Horiek nahikoak izan beharko dira kopuru, luzera eta zabalera aldetik, ibilgailuen eta beren atoien zirkulazioa eroso eta erraza izateko, eta larrialdirik egonez gero ebakuazioa modu azkarrean egin ahal izateko.

2. Turismoko kanpalekuaren sarrerak eta bide nagusiek gutxienez 5 metroko zabalera izanen dute. Zirkulazioaren norabide bakarreko bideek gutxienez 3 metroko zabalera izanen dute.

3. Kanpatzeko plaza guztiek sarbide zuzena izan beharko dute barneko kale batetik, eta atzeraemanda egon beharko dira gutxienez hiru metro finkaren mugetatik, segurtasun bide gisa eta okupaziorik gabe, erabat libre.

28. artikulua . Seinaleak

Kanpalekuen sarreran eta barruan, zerbitzuen bereizgarriez gain, erregelamenduaren araberako beste seinale batzuk instalatuko dira; hauei buruzkoak izanen dira: "Gehieneko abiadura: 10 km/h", "Seinale akustikoak debekatuta daude" eta "Ibilgailuen zirkulazioa debekatuta dago 23etatik 7etara". Dena dela, ibilgailuen zirkulazioari dagokionez establezimenduen titularrek ordubeteko marjina aplikatu ahal izanen dute.

29. artikulua . Komunak.

1. Kanpalekuek komun-blokeak izanen dituzte behar bezala antolatuta, lurzati bat ere edo zatitu gabeko kanpatzeko eremu bat ere komun-bloke batetik berrehun metro baino gehiagora egon ez dadin. Bloke bakoitzean gutxienez ezgaitasunak dituzten pertsonentzat irisgarria den komun bat egon beharko da.

2. Gizonezkoen eta emakumezkoen komunak independenteak izanen dira, eta komun-ontziak dutxa eta konketetatik bereizita egonen dira.

30. artikulua . Osasunmateriala.

Turismoko kanpaleku guztietan lehen laguntzetarako osasun-materiala egonen da. Ondo ikusteko moduko leku batean egonen da, behar bezala seinaleztatuta, eta kasurik arruntenak artatu ahal izateko nahikoak diren elementuak egonen dira.

31. artikulua . Giza kontsumorako ur biltegiak.

Udal hornidura-sarera konektatuta ez dauden turismoko kanpalekuek giza kontsumorako erreserbako ur biltegiak izan beharko dituzte. Biltegi horiek hornidura bermatu beharko dute gutxienez egun birako, eta ostatuko plaza bakoitzeko gutxienez berrogeita hamar litroko edukiera izan beharko dute.

32. artikulua . Suak eta barbakoak.

Debekatuta dago turismoko kanpalekuaren lurralde osoan suak piztea. Hala ere, barne araubideko arauek barbakoak horretarako mugatuta dagoen eremu batean erabiltzea baimendu ahal izanen dute.

33. artikulua . Hondakinen bilketa.

Hondakinak biltzeko, kanpalekuek edukiontzi estankoak izanen dituzte. Edukiontzi horiek estalkia eduki beharko dute; garbitzeko, desinfektatzeko eta garraiatzeko errazak izanen dira, eta gutxienez hirurogei litroko edukiera izanen dute. Ostatuko ehun plaza bakoitzeko edukiontzi bat egonen da.

IV. KAPITULUA. BALDINTZA TEKNIKOAK, KATEGORIEN ARABERA

34. artikulua . Instalazioak eta zerbitzuak kategorien arabera Nota de Vigencia.

Turismoko kanpalekuak kategoria batean edo bestean sailkatzeko eskatzen diren instalazio eta zerbitzuak hauek dira:

V. KAPITULUA. FUNTZIONAMENDU ARAUBIDEA

35. artikulua . Jendearentzat irekitzeko egunak.

Turismoko kanpalekuek urtero Vianako Printzea Erakundea-

Kultura eta Turismo Departamentuari jendearentzat irekitzeko egunen berri eman beharko diote.

36. artikulua . Sartzea.

Publikoarentzat zabalik dauden establezimenduak direnez, turismoko kanpalekuetan edonor sartu ahal da, horretarako muga bakarrak izanik haien izaeraren eta plaza kopuruaren ondoriozkoak, indarra duten legeetan ezarritakoak eta, halakorik bada, establezimenduak zerbitzu eta instalazioen erabilerari buruz dituen barne-arauetan ezarritakoak.

37. artikulua . Bezeroak onartzea.

Erabiltzaileei, sartzeko onartu aurretik, sarrerako agiri edo fitxa bat emanen zaie; bertan agertuko dira gutxienez establezimenduaren izena eta kategoria, eman zaien lurzatia edo ostaturako instalazioa, prezioa eta sartzeko nahiz irteteko egunak. Agiri hori erabiltzaileak sinatu beharko du.

38. artikulua . Barne araubideko arauak.

Turismoko kanpalekuek barne araubideko arauak ezarri ahal izanen dituzte zerbitzu eta instalazioak erabiltzeko; bezeroei horien berri eman beharko zaie eta Vianako Printzea Erakundea-Kultura eta Turismo Departamentuari jakinarazi beharko zaizkio.

39. artikulua . Erabiltzaileentzako informazioa.

Kanpalekuetan erabiltzaileei informazioa emanen zaie ondoko datu eta xehetasunei buruz, adierazten den moduan:

1. Kanpalekuaren kanpoaldean, dela bertara sartu aurretik, dela harrera-lekuaren sarreran, agertu behar diren informazio-datuak:

a) Kanpalekuaren izena eta kategoria.

b) Funtzionamendu-denboraldia.

c) Ostatu-modalitate eta zerbitzu guztien prezioen tarifak.

d) Zerbitzu guztiak erabiltzeko ordutegiak. Datuok zerbitzu horiek daudeneko eraikinen sarrera bakoitzean ere agertuko dira.

e) Kanpalekuaren plano orokorra. Bertan agertuko dira lurzatien mugak, beren zenbakiak eta instalazio eta zerbitzuen kokalekuak, bereziki lehen laguntzenak, larrialdi-irteerenak eta su-itzalgailuenak.

2. Harrera-bulegoan agertu behar diren informazio-datuak, dela iragarki-oholean, dela horman marko baten barruan jarrita:

a) Barne araubideko arauak.

b) Erabiltzaileen eskura erreklamazio orriak daudela adieraztea.

c) Erregelamendu honen doako kopia bat eskuragarri egoteak Nota de Vigencia.

3. Harrera-bulegoan eskura emanen diren informazio-datuak:

a) Kanpalekuaren izena eta kategoria.

b) Plano orokor murriztua, artikulu honen A) letran adierazi den informazioa biltzen duena.

c) Ostatu-modalitate eta zerbitzu guztien prezioen tarifak.

d) Istripurik egonez gero hartu beharreko neurriak eta lehen laguntzetarako materialaren kokalekua.

40. artikulua . Jantoki zerbitzua.

Bidezkoa bada, jantoki zerbitzua soilik turismoko kanpalekuaren erabiltzaileei edo orokorrean jende guztiari eman ahal izanen zaio. Azken kasu horretan jatetxeei aplikatzen zaizkien berariazko arauek eraenduko dute jantoki zerbitzua.

41. artikulua . Erreklamazio orriak Nota de Vigencia.

Turismoko kanpalekuek erreklamazio orriak eduki beharko dituzte erabiltzaileen eskura, eta hori iragarri beharko dute ongi ikusten den tokian, araudian ezarritakoari jarraituz.

VI. KAPITULUA. PREZIOAK ETA ERRESERBAK

42. artikulua . Prezioen publizitatea.

1. Zerbitzu guztien prezioek ahalik eta publizitaterik handiena izanen dute. Publizitate horretan ostatuari nahiz eskaintzen diren gainerako zerbitzuei dagozkien prezioak agertu beharko dira.

2. Prezioak leku nabarmen batean erakutsiko dira, erraz aurkitu eta irakurtzeko moduan, zerbitzua ematen den lekuetan, eta kasu guzietan establezimenduaren sarreran edo harrera-lekuan.

43. artikulua . Prezioak.

1. Prezioak egun bakoitzeko zehaztuko dira, establezimenduan emandako gau kopuruaren arabera. Gutxieneko ordainketa egun bati dagokiona izanen da, eta egun bakoitza eguerdiko hamabietan amaitzen dela ulertzen da.

2. Lurzati bakoitzeko prezioak barnean hartzen ditu lurzatiaren beraren okupazioa, kanpatzeko elementua eta, bidezkoa bada, ibilgailua. Pertsona bakoitzeko prezioa lurzatiaren preziotik bereizita kobratuko da, pertsona kopuruaren arabera; kontzeptu horren barruan sartzen da dagokion kategorian eskatzen diren kanpalekuko instalazioen erabilera.

3. Kanpalekuak bestelako ostatu-modalitateak dituenean, horiei nahiz ematen diren gainerako zerbitzuei dagozkien prezioak finkatu beharko dira.

44. artikulua . Erreserbak.

Bezeroaren eta establezimenduaren artean kontratu bidezko berariazko harremanik ez badago, erreserben araubidea ondoko baldintzen mendean geratuko da:

a) Establezimenduek erreserbak berretsi beharko dituzte hori egiaztatzeko aukera ematen duen edozein bide erabiliz, baita adostutako prezioa eta aurrerakin gisa eskatutako zenbatekoa edo seinalea ere.

b) Aurrerakin edo seinalea gehienez erreserbaren plaza eta egun kopuruaren arabera ateratzen den zenbatekoaren %40 izanen da.

c) Erreserbari uko egin edo ezeztatuz gero, establezimenduari horren berri gutxienez 7 egun eta gehienez 15 egun lehenago ematen bazaio, establezimenduak aurrerakinaren %50 atxiki ahal izanen du.

d) Ezeztapena okupatzeko adierazitako egunaren aurreko 7 egunen barruan jakinarazten bazaio establezimenduari, establezimenduaren esku geratuko da seinale edo gordailu gisa jaso duen zenbatekoa.

e) Bezeroek, aurretiaz abisua eman gabe egonaldia hasteko adierazitako egunaren 20ak baino beranduago heltzen badira establezimendura, erreserba ezeztatu dela ulertuko da.

45. artikulua . Fakturak.

1. Turismoko kanpalekuek erabiltzaileari faktura eman beharko diote, arloa arautzen duen araudiaren arabera.

2. Fakturan hauek agertuko dira gutxienez: establezimenduaren izena eta kategoria; bezeroaren izena eta identifikazioa; erabili den lurzatia edo ostatu-instalazioa; ostatu hartu duten pertsonen kopurua; eman diren zerbitzuak, egunen eta kontzeptuen arabera behar bezala banatuta; eta sarrera eta irteera datak.

VII. KAPITULUA. TURISMO DIZIPLINA

46. artikulua . Arauhausteak eta zehapenak.

Establezimenduaren edo jardueraren titularrak erregelamendu honen III. tituluan xedatuta dagoenetik datozen betebeharrak betetzen ez baditu, Turismoari buruzko otsailaren 14ko 7/2003 Foru Legean ezarritakoaren arabera dagozkion zehapenak jarriko zaizkio.

ERANSKINA. PLAKA EREDUA Nota de Vigencia

ERANSKINA

Plaka honelakoa izanen da: metalezko laukizuzena, kolore berdeko hondoaren gainean (Pantone 355) kolore zurian kanpadenda baten aurrealdearen silueta duena. Silueta horren gainean kolore beltzean (Bodoni Bold tipografia) agertuko da dagokion kategoriaren letra ("L" luxuzkorako, "1." 1. kategoriarako, "2." 2. kategoriarako eta "3." 3. kategoriarako), erantsita doazen krokisen neurri eta diseinuen arabera.

.

Gobierno de Navarra

Contacte con nosotros | Accesibilidad | Aviso legal | Mapa web