(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

48/2007 FORU DEKRETUA, EKAINAREN 11KOA; HONEN BIDEZ NAFARROAKO EHIZARI ETA ARRANTZARI BURUZKO ABENDUAREN 22KO 17/2005 FORU LEGEA GARATU ETA BETEARAZIKO DUEN ERREGELAMENDUA ONETSI DA Nota de Vigencia.

BON N.º 87 - 16/07/2007

  ATARIKO TITULUA. XEDAPEN OROKORRAK

  I. TITULUA. EHIZA

  I. KAPITULUA. EHIZAESPEZIEAK

  II. KAPITULUA. LIZENTZIAK, GAITASUNPROBAK ETA BAIMENAK

  III. KAPITULUA. EHIZAESPARRUAK

  IV. KAPITULUA. EHIZAREN ANTOLAMENDUA

  V. KAPITULUA. EHIZAN ARITZEKO ARAU BEREZIAK

  VI. KAPITULUA. SEGURTASUNA EHIZAN

  VII. KAPITULUA. ALDEAK

  II. TITULUA. ARRANTZA Nota de Vigencia

  I. KAPITULUA. ESPEZIEAK

  II. KAPITULUA. LIZENTZIAK ETA BAIMENAK

  III. KAPITULUA. URAK

  IV. KAPITULUA. ARRANTZAREN ANTOLAMENDUA

  V. KAPITULUA. ARRANTZAESPARRUAK

  III. TITULUA. KALTEAK ETA ERANTZUKIZUNA

Atariko

Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoak 50.1.b) artikuluan ezarritakoaren arabera, Nafarroak ehizaren, ibai eta aintziretako arrantzaren eta akuikulturaren gaineko eskumena dauka. Bada, eskumen horretaz baliatuta, Nafarroako Foru Komunitateak Nafarroako ehizari eta arrantzari buruzko abenduaren 22ko 17/2005 Foru legea onetsi zuen.

Foru dekretu honen helburua ehizan eta arrantzan modu antolatuan eta iraunkorrean jardun ahal izatea bermatzea da, Administrazioak esku har baitezake jarduera horietan. Hori dela eta, foru dekretu honen bidez Nafarroako ehizari eta arrantzari buruzko abenduaren 22ko 17/2005 Foru Legea garatu eta betearaziko duen Erregelamendua onetsiko da.

Nafarroako Gobernuak Nafarroako Foru Komunitatearen lurralde- eremuan ehiza eta arrantza arautzeko duen gaitasuna berariaz ezarrita dago 17/2005 Foru Legeko azken xedapenetako lehenean, Nafarroako Gobernuari eta haren lehendakariari buruzko abenduaren 3ko 14/2004 Foru Legeko III. kapituluan erregelamendu ahalmenaz ezarritakoarekin bat etorriz.

Foru dekretu hau honela egituratu da: atariko titulua eta hiru titulu, xedapen indargabetzaile bat, bi xedapen gehigarri eta bi azken xedapen. Ehizako eta arrantzako batzorde aholku-emaileek eta Nafarroako Ingurumen Kontseiluak adostasun txostenak eman dituzte.

Atariko tituluan xedapen orokorrak landu dira, erregelamendu-xedapenaren helburua ezarri da eta testuan garatuko diren alderdiak azaldu dira.

I. tituluan ehiza arautu da; lehenbizi ehiza espezieak zehaztu dira eta gero ehizarako behar diren lizentziak, gaitasun-probak eta baimenak arautu dira. Halaber, ehiza-esparruak arautu dira: azalera zenbatekoa izan behar den, esparruaren titularren betebeharrak eta aprobetxamenduaren titularrenak, kontrol-neurriak eta segurtasun-aldeak, eta seinalizazioa. Esparru motak zehaztu dira: tokiko ehiza-esparruak, Nafarroako Gobernuaren ehiza-esparruak, aprobetxamendu intentsiboko ehiza-esparruak eta kontrolatutako ehiza-aldeak. Ehizaren antolamenduari dagokionez, eskualde planetan, ehiza antolatzeko planetan eta urteroko kudeaketa planetan ezarritakoa azaldu da. Ehiza modalitateei buruzko berariazko arauak ezartzeko alderdi hauek hartu dira ardatz: ehizakiak merkaturatzea eta garraiatzea, Ehizari eta Arrantzari buruzko Foru Legean ezarritako baimen bereziak, eta ehiza modalitateak. Azkenik ehizan aplikatu beharreko segurtasun-neurriak arautu dira eta bi ehiza-eremutan zatitu da Nafarroa: iparraldea eta hegoaldea.

II. tituluan gauza bera egin da arrantzaren arloan: arrantza espezieak, lizentziak eta baimenak. Uren sailkapena, legez ezarria, xehekatu da, eta kategoria hauek ezarri dira: erreserba genetikoak, arrantza debekatuta dagoen lekuak, hil gabeko arrantza tarteak, arrantza-esparru naturalak, arrantza eskolak, kirol arrantzaren agertokiak eta arrantza intentsiboko tarteak. Arrantzaren antolamenduari dagokionez, horretarako balia daitezkeen tresnak nola prestatu zehaztu da (prozedura eta edukia): arrantza antolatzeko plan zuzentzaileak, arroko arrantza antolatzeko planak eta arrantza kudeatzeko plan teknikoak. Ildo beretik arautu dira arrantza-esparru publikoak eta pribatuak; arrantza-esparruetan arrainetan egiteko baimena beharko da ezinbestean. Horrez gainera harrapatutako arrainen merkaturatzea, arrantzaleen arteko distantziak, arrainen gutxieneko tamainak eta birpopulazioak ere arautu dira.

Azkenik, III. tituluan errepideetan ehiza-espezieak kolpatuta gertatzen diren ezbeharretan izan litezkeen erantzukizunak zehazteko prozedura arautu da, laburbilduta.

Horrenbestez, Ingurumen, Lurraldearen Antolamendu eta Etxebizitza kontseilariak proposaturik, eta Nafarroako Kontseiluarekin eta Nafarroako Gobernuak 2007ko ekainaren hamaikan egindako bilkuran hartutako erabakiarekin bat etorriz, hauxe

DEKRETATU DUT:

Artikulu bakarra. Erregelamenduaren onespena.

Nafarroako Ehizari eta Arrantzari buruzko abenduaren 22ko 17/2005 Foru Legea garatu eta betearaziko duen Erregelamendua onetsi da; testua honen ondoren txertatu da.

XEDAPEN GEHIGARRIAK

Lehenengoa. Aprobetxamendu intentsiboko esparruak.

Nafarroako Ehizari eta Arrantzari buruzko abenduaren 22ko 17/2005 Foru Legea indarrean jartzean egon diren aprobetxamendu intentsiboko esparruek halaxe jarraitu ahal izango dute, baldin eta Legean eta erregelamendu honetan ezarritakoari lotzen bazaizkio. Horretarako, titularrek eskabidea aurkeztu beharko diote Ingurumen, Lurraldearen Antolamendu eta Etxebizitza Departamentuari erregelamendu hau indarrean jartzen denetik urtebete igaro baino lehen; eskabidean esparrua intentsiboa dela eta arautegi berrira moldatzen dela frogatu beharko dute.

Bigarrena. Esparruen zaintza.

Erregelamendu honetako 8. artikuluan ezarri den bezala, indarrean jarri eta hiru urtera nahitaezkoa izango da esparruetan gutxieneko zaintza jartzea.

XEDAPEN INDARGABETZAILEA

Bakarra. Indargabetu diren arauak.

Ehizaren arloko hainbat alderdi arautzen dituen abenduaren 27ko 390/1993 Foru Dekretua indargabetu da, eta berarekin batera foru dekretu honetan ezarritakoari aurka egiten dioten maila bereko nahiz beheragoko mailako xedapen guztiak ere bai.

AZKEN XEDAPENAK

Lehenengoa. Erregelamendugarapenerako gaitasuna.

Ingurumen, Lurraldearen Antolamendu eta Etxebizitza kontseilariari ahalmena eman zaio foru dekretu hau garatzeko eta betearazteko behar diren xedapen guztiak emateko.

Bigarrena. Indarra hartzea.

Foru dekretu honek Nafarroako ALDIZKARI OFIZIALean argitaratu eta hurrengo egunean hartuko du indarra.

ATARIKO TITULUA. XEDAPEN OROKORRAK

1. artikulua . Xedea.

1. Erregelamendu honen xedea basafaunaren eta haren habitaten aprobetxamenduak antolatzeko araubidea ezartzea da Nafarroan ehizan eta arrantzan aritzeko, Nafarroako Ehizari eta Arrantzari buruzko abenduaren 22ko 17/2005 Foru Legea garatuta.

2. Horretarako, alderdi hauek arautu dira:

a) Ehiza eta arrantza espezieak.

b) Ehizan eta arrantzan aritzeko betekizunak.

c) Ehiza- eta arrantza-esparruen antolamendua eta kudeaketa.

d) Ehizan eta arrantzan aritzeko arau bereziak.

e) Erantzukizunak.

I. TITULUA. EHIZA

I. KAPITULUA. EHIZA-ESPEZIEAK

2. artikulua . Ehizaespezieak.

1. Nafarroako Foru Komunitatean ondokoak dira ehiza-espezieak:

a) Ugaztunak:

Erbia (Lepus spp.), untxia (Oryctolagus cuniculus), azeria (Vulpes vulpes), basurdea (Sus scrofa), oreina (Cervus elaphus), adarzabala (Dama dama) eta orkatza (Capreolus capreolus).

b) Hegaztiak:

Antzara hankagorrizta (Anser anser), basahatea (Anas platyrhynchos), zertzeta arrunta (Anas crecca), eper gorria (Alectoris rufa), galeperra (Coturnix coturnix), faisaia (Phasianus colchicus), kopetazuri arrunta (Fulica atra), hegabera (Vanellus vanellus), oilagorra (Scolopax rusticola), istingor arrunta (Gallinago gallinago), pagausoa (Columba palumbus), txoloma (Columba oenas), usapala (Streptopelia turtur), usapal turkiarra (Streptopelia decaocto), birigarro arrunta (Turdus philomelos), birigarro txikia (Turdus iliacus), durdula (Turdus pilaris), garraztarroa (Turdus viscivorus), mika arrunta (Pica pica), bele txikia (Corvus monedula) eta belabeltza (Corvus corone).

2. Debekualdiei buruzko xedapen orokorra urtero onetsiko da: bertan ehiza daitezkeen espezieak, subespeziak edo populazioak zehaztuko dira.

3. Ehiza- edo arrantza-baliabideentzat arrisku nabarmena sortzen duten etxeko animalia basatuak eta pertsonak edo ondasunak arriskuan jartzen dituztenak ehizatu ahal izango dira, Ingurumen zuzendari nagusiak berariazko baimena emanez gero eta jabea nor den zehazterik ez badago.

II. KAPITULUA. LIZENTZIAK, GAITASUN-PROBAK ETA BAIMENAK

3. artikulua . Ehizalizentzia.

1. Lehenbiziko ehiza-lizentzia eskuratzeko beharrezkoa izanen da gutxienez 14 urte izatea eta ehiztarien azterketa gainditzea.

2. Eskatzaileak azken hamabost urteetan Nafarroarako ehiza-lizentzia eduki ez badu, eskatzen duena lehenbizikotzat joko da.

3. Ehiza-lizentzia lortu nahi duenak eskabidea aurkeztu behar du eta han izen-abizenak, egoitza, jaiotza-data eta NAN zenbakia adierazi; eskabideari, gainera, agiri hauek erantsi behar zaizkio:

a) Ehiza-lizentzia berria eskatuz gero, ehizarako gaitasun-probak gainditu direlako ziurtagiria, Landa Garapen, Industria, Enplegu eta Ingurumen Departamentuak emana.

Beste autonomia erkidego batek emandako ehizarako gaitasun-ziurtagiriak ere balioa izanen du, baldin eta erkidego horretako gaitasun-probak Nafarroako ehiztarien azterketaren antzekoak badira. Ehiztaria atzerritarra bada, bere herrialdeko ehizarako gaitasun-probak gainditu dituelako ziurtagiria aurkeztu behar du.

Hori hala izanik ere, ez da baliozkotzat joko, ondorio hauetarako, autonomia erkidego bateko gaitasun-ziurtagiria, Nafarroako ehiztari azterketaren antzeko gaitasun-probak ez dituzten autonomia erkidegoekin egindako hitzarmen edo akordioen ondoriozkoa denean Nota de Vigencia.

b) Nortasun agiria.

c) Ehizan aritzeko gaitasunik gabe utzi ez dutelako eta administrazio bidean irmo bihurtutako egintza baten bidez arlo honetako zehapenik ordaindu gabe ez duelako adierazpena.

d) Eskatzailea emantzipatu gabeko adingabea bada, beraren legezko ordezkaritza duen pertsonaren idatzizko baimena.

4. Nafarroan lehenbiziko ehiza-lizentzia eskatzen dutenei, hots, bizilekua Foru Komunitatean dutenei, ehizarako gaitasuna autonomia erkidego bateko ehiza-lizentzia baten bidez frogatzen badute, eskatzen ahalko zaie ehiztari azterketa gainditu izana frogatzen duen ziurtagiria aurkez dezatela Nota de Vigencia

4. artikulua . Aldi baterako ehizabaimen berezia.

1. Kasu berezietan, Ingurumen, Lurraldearen Antolamendu eta Etxebizitza Departamentuak aldi baterako ehiza-baimena eman ahalko die Nafarroako Foru Komunitatetik kanpo bizi diren herritarrei. Horretarako ondokoak bete behar dira:

a) Eskatzaileak nortasun agiria eduki behar du.

b) Bizi den lurraldean indarrean dagoen ehiza-lizentzia eduki behar du.

c) Ehizaren arloko zehapen bat dela bide ehizan aritzeko gaitasuna kendu ez diotelako adierazpena sinatu behar du.

2. Aldi baterako ehiza-baimenen indarraldia ondoz ondoko bederatzi egun naturalekoa izango da gehienez. Ehiztari bakoitzak aldi baterako bi baimen eskura ditzake ehiza-denboraldi bakoitzean.

3. Aldi baterako ehiza-baimenak ez du ematen Nafarroako ehiza-lizentzia eskuratzeko eskubidea.

5. artikulua . Ehiztarien azterketa.

1. Nafarroako Foru Komunitatean ehiza-lizentzia lehen aldiz eskuratu ahal izateko, aurretik gaitasun-probak eta ehizaren inguruko gaiei buruzko azterketak gainditu beharko dira (besteak beste, homologatutako prestakuntza-ikastaro bat eginda eduki behar da).

2. Gaitasun-probak teorikoak eta praktikoak izango dira; atal hauek edukiko dituzte:

a) Ehizaren legezko alderdiak.

b) Basafaunaren ezagutza.

c) Ehiza-metodoak eta segurtasuna.

d) Ehizarako tresnak eta bitartekoak, eta haien erabilpena.

3. Urtean bi deialdi egingo dira. Ingurumen, Lurraldearen Antolamendu eta Etxebizitza Departamentuak Nafarroako ALDIZKARI OFIZIALean argitaratuko du azterketaren berri (non eta noiz egingo den), eta horrez gainera hari buruzko iragarkia argitaratuko du Nafarroan gehien saltzen diren egunkarietako batean, gutxienez, azterketa eguna baino hilabete lehenago.

4. Azterketa gainditzen dutenei horri buruzko ziurtagiria emango zaie.

III. KAPITULUA. EHIZA-ESPARRUAK

III. KAPITULUA

1. ATALA

XEDAPEN OROKORRAK

6. artikulua . Ehizaesparru etendunak.

Ehiza-populazioek, ehiza-aprobetxamenduaren bideragarritasunak eta eremu txikienaren azalerak ehiza antolatzea ahalbidetzen badute, udalerria eremu bakarrean ez duten udalek ehiza-esparru bakarra eratu ahal izango dute euren lurretan.

7. artikulua . Azalera Nota de Vigencia.

1. Ehiza-barrutiek 2.000 hektareako azalera eduki behar dute gutxienez.

2. Salbuespen gisa, Landa Garapen, Industria, Enplegu eta Ingurumen Departamentuak baimena emanez gero, 2.000 hektarea baino gutxiagoko tokiko ehiza-barrutiak sortzen ahalko dira, baldin eta herriak azalera hori baino txikiagoa badu, bizitegi eta industria erabilerako eremuak eta goragoko araudiaren arabera erabilera bateraezinak dituzten beste lur eremu batzuk kenduta. Gainera, horretatik ateratzen den azalerak hamabost hektareatik beherakoa izan beharko du, nahitaez, herriko ehiztari bakoitzeko.

Baimena emateko, toki entitate eskatzaileak ehiza-barrutia eskatzeko behar diren agiriekin batera, ehiztarien zerrenda aurkeztu behar du (izena, abizenak, nortasun agiria, ehiza-lizentziaren zenbakia eta helbidea), bai eta zerrendako ehiztari guztiak udal erroldan bizilagun gisa agertzen direlako ziurtagiria ere bai, Udalak emana

3. Aurreko lerroaldean aipatutako salbuespen hau ehiza-barruti intentsiboei ere aplika dakieke.

4. Nolanahi ere, ehiza-populazioek eta ehiza-aprobetxamenduaren bideragarritasunak ehiza antolatzea ahalbidetzen ez badute, ezin izanen da 2.000 hektarea baino gutxiagoko ehiza-barrutirik eratu.

5. Ehiza-barruti bihur daitezkeen lur eremuen jarraitutasuna ez da etentzat joko ibaiak, errekak, bide publikoak, trenbideak, ubideak edo antzeko beste eraikinen bat izateagatik. Aitzitik, aipatu elementu eta eraikinek, berez, ez dakarte jarraitutasunik mugakideak ez diren lurren artean.

8. artikulua . Ehizabarrutiko titularraren betebeharrak Nota de Vigencia.

1. Ehiza-barrutiko titularrak betebehar hauek izanen ditu kasu guztietan:

a) Basa faunaren babesari buruzko araudia betetzen laguntzea.

b) Landa Garapen, Industria, Enplegu eta Ingurumen Departamentuari eskatzen dituen datu estatistikoak ematea.

c) Titulartasun pribatuko barrutietarako ezarritako tasak edo bidezko legeetan ezartzen direnak ordaintzea.

d) Ehiza-barrutiaren aprobetxamendutik ateratako diru-sarreren %25 animalien populazioak eta beren habitatak hobetzeko inbertitzea.

Honen ondorioetarako, Ehiza Antolatzeko Planeko ekintzetatik animalien populazioen eta beren habitaten hobekuntzan zuzeneko eragina dutenak bakarrik zenbatuko dira, bai eta kalteen prebentziorako lanak eta ehiza-barrutirako zaintza kontratatzea ere. Ehiza Antolatzeko Planean ageri ez diren gainerako ekintzak ondorio hauetarako zenbatu ahal izateko, ezinbestekoa da aldez aurretik baimena ematea Landa Garapen, Industria, Enplegu eta Ingurumen Departamentuak.

Ehiza-barrutiko titularrak burututako ekintzen gastuen frogagiriak aurkeztu beharko ditu, eskatzen zaizkionean..

e) Epizootia izan litekeen gaitzen bat agertuz gero, Landa Garapen, Industria, Enplegu eta Ingurumen Departamentua jakinaren gainean jartzea, eta gauza bera egitea barrutietan pozoitzerik gertatu edo debekatutako tresnaren bat erabili dela jakinez gero.

f) Ehiza aprobetxamenduaren titularren eta nekazarien arteko koordinaziorako mekanismoak ezartzea, nekazaritzari ahalik kalte gutxien egiteko.

2. Ehiza-barrutiko titularrak, kudeaketaren arduraduna baldin bada, aurrekoez gainera betebehar hauek ere izanen ditu:

a) Ehiza-barrutian egiten diren ehiza jardueren antolaketaz eta gauzatze zuzenaz erantzutea, eta ehiza jarduera antolatuak direnean, segurtasunaz ere bai.

b) Ehiza Antolatzeko Plana prestatzea eta bere kostura finantzatzea.

c) Ehiza-barrutia behar bezala garbitzea eta seinalatzea.

d) Ehiza-espezieen populazio nagusiei urtero kontrolak egitea haien bilakaera aztertzeko.

e) Ehiza-barrutian ehiza babesteko behar adinako zaintza jartzea, Ehiza Antolatzeko Planari jarraituz

Ezarri beharreko gutxieneko zaintza erlazio honen araberakoa izanen da: hegoaldeko ehiza-eremuan, dedikazio osoko ehizazain bat 15.000 hektareako; iparraldeko ehiza-eremuan, dedikazio osoko ehizazain bat 25.000 hektareako, erregelamenduan ezarritako eremuen arabera.

Zaintzan aritzen den pertsonak ehizazain titulua eduki behar du, erregelamendu honen 8.bis artikuluaren arabera. Pertsona hori ezin da izan ehiza-barrutiaren esleipena hartu duen ehiztari elkarteko bazkidea, eta ezin da ehizan aritu lanean ari den barrutian. Ehiza-barrutia duen udalerrian (edo udalerrietan) beste zaintza lan batzuetan aritzen ahal da, baldin eta ehizazaintzarako ezarritako denborak barrutiaren azaleraren araberako gutxieneko zaintza denborak betetzen baditu.

Ehizazainaren kontratazioaren eta dedikazioaren frogagiriak Ingurumen, Landa Garapen, Industria, Enplegu eta Ingurumen Departamentuaren eskura jarri beharko dira, eskatzen dituenean..

f) Barrutiko ehiza-espezie guztien aprobetxamendua kudeatzea, Ehiza Antolatzeko Planean eta aplikatu beharreko araudian ezarritako mugen barnean.

g) Urteko kudeaketa planak aurkeztea

h) Barrutiaren kudeaketari buruzko auditoretzak onartzea

Landa Garapen, Industria, Enplegu eta Ingurumen Departamentuari ehiza-barrutiaz eskatzen duen informazio guztia ematea, finantzei buruzko datuak eta ehizarako baimena duten pertsonen zerrenda barne.

i) Kalteak ekiditeko behar diren neurriak hartzea.

8. bis artikulua. Ehizazaina Nota de Vigencia.

1. Ehizazainaren figura sortu da.

2. Ehizazainak Nafarroako Foru Komunitatearen barnean beteko ditu bere eginkizunak.

3. Ehizazain izateko bete beharreko baldintzak:

a) Ehiza espezialitateko landazain partikularraren titulua izatea.

b) Ehizarako gaikuntza ikastaro baten aprobetxamendu ziurtagiria izatea; Nafarroako Foru Komunitateak homologatutako zentro batek emana.

Landa Garapen, Industria, Enplegu eta Ingurumen Departamentuak emanen du titulua, interesdunak eskaturik eta baldintzak betetzen direla frogatzen duten agiriak aurkeztu ondoren. Ehizazainaren titulazioak berarekin ekarriko du Nafarroako ehiza-lizentzia lortzeko gaitasun ziurtagiria.

4. Ehizazainaren eginkizunak:

Indarra duen araudiak ehiza espezialitateko landazain partikularrei ematen dizkien eginkizunak galarazi gabe, ehizazainak eginkizun hauek izanen ditu:

a) Ehizari buruzko datuen kontrol administratiboa egitea.

b) Administrazioaren, ehiztarien eta nekazarien arteko lotura.

c) Kalteak kudeatzea (kontrolatu eta aurrea hartzea).

d) Harrapakarien kontrola.

e) Habitatak kudeatzea.

f) Barrutia garbi mantentzea, ehiza jarduerari dagokion orotan.

g) Administrazioarekin lankidetzan aritzea, barrutiaren ehiza kudeaketako jardueretan eskatzen zaionean.

5. Ehizazainek Nafarroako Foru Komunitateko Administrazioak zeregin horretarako antolatzen dituen prestakuntza ikastaroetara joan beharko dute.

9. artikulua . Kontrolneurriak.

Ingurumen, Lurraldearen Antolamendu eta Etxebizitza Departamentuak, interesduna entzun ondoren, neurri hauek hartu ahalko ditu:

a) Ehiza aldi baterako edo epe mugarik gabe galaraztea, esparruaren kudeaketaren arduradunak Ehiza Antolatzeko Planeko zehaztapenak betetzen ez baditu, edo urteko kudeaketa planak aurkezten ez baditu, edo esparruaren titulartasunari edo kudeaketaren titulartasunari lotutako betebeharrak betetzen ez badira. Horretarako Departamentuak errekerimendua bidaliko dio ehiza-esparruaren titularrari edo haren kudeaketaren arduradunari eta 10 eguneko epea emango dio urteko kudeaketa plana aurkezteko, eta bi hileko epea gainerako betebeharrak betetzeko. Epealdi hori igarotakoan Ingurumen, Lurraldearen Antolamendu eta Etxebizitza Departamentuak ehiza galaraziko du aldi baterako, harik eta eskatutako dokumentazioa aurkeztu arte, edo behin betiko, plana indarrean dagoen aldirako, Ehiza Antolatzeko Planaren indarraldian azaldu berri diren arrazoiengatik hiru errekerimendu bidaliz gero.

b) Esparruaren zati batean ehiza debekatzea, edo espezie jakin baten aprobetxamendua debekatzea, edo ehiza-aldia murriztea, basafauna babesteko baldintza bereziak direla-eta beharrezkotzat jotzen bada.

c) Osasun agintariek gomendatuz gero, epizootiak edo pertsonei, abereei nahiz animalia basatiei kutsatu ahal zaizkien gaitzak dauden tokietan ehiza jarduerak debekatzea.

10. artikulua . Segurtasuneremuak esparruetan.

Ondoko hauek izango dira segurtasun-eremuak:

a) Errepide eta bide publikoak (Donejakue Bidea barne), altxonbideak eta abelbideak, muga hauekin:

a.1) Altxonbideak edo abelbideak eta bide publikoak (Donejakue Bidea izan ezik): hiru metro kanpoko ertzetik, ehiza larriko uxaldi-postuetan eta uso eta birigarroen ehizarako postuetan izan ezik (hauetan ez da aplikatuko muga).

a.2) Errepideak: zortzi metro zelaiguneko kanpoko ertzetatik.

a.3) Autopistak eta autobiak: hogeita bost metro zelaiguneko kanpoko ertzetatik.

b) Trenbideak: hogeita bost metro trenbidearen kanpoko erreietatik.

c) Ibaiak, ibaibideak eta ibai-bazterrak. Hauetan segurtasun- eremua bost metro hedatuko da ur-bazterretik.

d) Herriguneak eta landaguneak, are eraikin bakarrak, lorategi eta parke publikoak, atsedenguneak, kanpatzeko eremuak eta kirolguneak ere. Kasu hauetan, segurtasun-eremua azken eraikin edo instalazio bizigarria oinarritzat hartuta zehaztuko da, eta emaitzako eremua berrehun metro gehiago zabalduko da norabide guztietan, eraikinean normalean inor bizi ez denean izan ezik, honelako kasuetan babes-zerrenda ehun metrokoa izango baita.

e) Ingurumen, Lurraldearen Antolamendu eta Etxebizitza Departamentuak halakotzat jotzen dituen eremu guztiak. Segurtasun-eremua ezartzen den egintzan haren mugak finkatu behar dira.

11. artikulua . Segurtasuneremuei dagozkien debekuak.

Segurtasun-eremuetan debeku hauek ezarri dira:

a) Oro har, debekatuta dago segurtasun-eremuetara tiro egitea, jaurtigaia hel daitekeen distantzia baino hurbilagotik, bai eta ehiztaria dagoen tokiaren eta segurtasun-eremuaren bitartean jaurtigaia oztopa dezakeen ezer ez badago ere.

b) Debekatuta dago segurtasun-eremuaren barruan ehiza-arma kargatuta edukitzea eta erabiltzea. Debeku honetatik salbu daude:

b.1) 2 metro edo gutxiagoko bide asfaltatu gabeak, Donejakue Bidea izan ezik.

b.2) Ez asfaltaturik ez hormigoiztaturik ez dauden bideetan, ehiztariek ibilgailuak, pertsonak edo abereak gutxienez 250 metroko distantzian, bi norabideetan, erraz ikus ditzaketen tarteak.

12. artikulua . Ehizaesparruen eta ehiza kontrolatuko eremuen seinalizazioa.

1. Ehiza-esparruen eta ehiza kontrolatuko eremuen seinalizaziorako lehen mailako seinaleak jarriko dira kanpoko perimetro osoan, bai eta barruan ere. Seinaleetako mezua edo ikurra erraz ikusi behar da esparrutik edo eremutik kanpoko lurretatik.

Lehen mailako seinaleak jarri behar dira nahitaez esparrura sartzen diren bide guztietan, eta horrez gainera esparruaren barruan seinale bat jarri behar da 600 metroz behin.

2. ehen mailako seinaleen artean bigarren mailakoak jarriko dira; batetik bestera 100 metro egon daitezke gehienez Nota de Vigencia.

3. Lehen mailako seinaleak honelakoak izan behar dira:

a) Materiala: seinalea zurruna izatea eta luze irautea bermatzen duena.

b) Neurriak: 33 x 50 cm; %10eko gorabehera onartzen da neurri bakoitzean.

c) Garaiera zorutik: metro bat eta 2,5 metro bitartean.

d) Koloreak: letra beltzak hondo zurian.

e) Letren neurriak: 8 cm luze; 1 cm zabal; matrikula: 1,5 x 13 cm testu osoan. Nafarroako Gobernuaren ehiza-esparruetan haren logotipoa agertu behar da, indarreko arautegiarekin bat etorriz.

f) Testua: "Tokiko ehiza-esparrua", 'Nafarroako Gobernuaren ehiza-esparrua", "Ehiza-esparru pribatua" edo "Ehiza kontrolatuko eremua". Euskaren erabilera Euskararen erabilera arautu duen abenduaren 15eko 18/1986 Foru Legean eta hura garatu duen arautegian xedatutakoari lotu behar zaio. Esparruaren matrikula zenbakia ere agertu behar da. Horiez landa seinaleetan ezin da agertu beste adierazpen, ikur edo grafiarik.

4. Barrutietako barne aldeak, Ehiza Antolatzeko Planetan ezarriak, identifikatzeko bigarren mailako seinaleek ezaugarri hauek izanen dituzte:

a) Materiala: seinalea zurruna izatea eta luze irautea bermatzen duen edozein.

b) Neurriak: 20 x 30 zentimetro, %10eko tolerantzia tartea utziz neurri bakoitzean.

c) Gutxieneko altuera zorutik hasita: 1 eta 2,50 metro bitarte

d) Koloreak: urdina "Zakurren eremurako". Gorria "Hazitako ehizakien eremurako". Horia "Erreserbarako". Laranja ehizako espezie zehatz baten "Babes eremurako". Berdea "Galeper eremurako" (ez da beharrezkoa izanen ureztaketa tradizionaleko eremuak oholtxoz seinalatzea).

Oholtxoek kolore bakoitzari dagozkion hitzak eduki ditzakete, hau da, aurreko lerroaldean komatxo artean ageri den testua.

Bigarren mailako seinaleetan koloreek duten esanahia kasuan kasuko barrutietan ehizarako gaikuntza ematen duen dokumentuan jarri beharko da Nota de Vigencia.

5. Debekatuta dago seinaleak zuhaitzetan jartzea.

2. ATALA

TOKIKO EHIZA-ESPARRUAK

13. artikulua . Eraketa.

1. Barnean jabetza pribatuko lurrak dituen tokiko ehiza-esparrua eratzeko, toki entitateak jabeen baimena behar du. Honen ondorioetarako, toki entitateak jendaurrera azaldu behar du eraketaren proiektua. Proiektu horretan ondokoak zehaztu behar dira gutxienez: ehiza-aprobetxamendurako baldintzak, esparruaren mugak eta lurrak lagatzeko baldintzak (lagapena berariazkoa edo isilbidezkoa izan daiteke, kasuan kasukoa toki entitateak ezarritako prozeduraren arabera). Foru Komunitatearen ondareko finketako ehiza-eskubideak Nafarroako Gobernuko departamentu eskudunak laga behar ditu, berariaz eta idatziz.

2. Nolanahi ere, tokiko ehiza-esparrutik kanpo daude etxebizitza eta industria erabilerako lurrak, eta toki entitateari esparruan sartu nahi ez dutela berariaz adierazten dioten titular eta jabeen lurrak ere bai. Kasu honetan lurrak ehiza-debekuen araubide orokorrari lotuta egongo dira, eta ez da egongo ehiza-espezieek esparruaz kanpoko abereei edo laborantza-sailei egiten dizkieten kalteengatik ordainik jasotzeko eskubiderik.

3. Tokiko ehiza-esparrua eratzeko eskaeraren dokumentazioarekin batera toki entitateak ziurtagiri bat aurkeztu behar dio Ingurumen, Lurraldearen Antolamendu eta Etxebizitza Departamentuari, hain zuzen ere esparruko lurren eta, hala denean, esparruaz kanpo geratu diren lurren lagapen-eskubideak zehazten dituen ziurtagiria, datu hauekin: katastro-erreferentzia, azalera eta jabea. Dokumentazio horrekin batera ehiza-esparruaren mapa ere aurkeztu behar da, 1:25.000 edo 1:50.000 eskalan egina.

4. Tokiko ehiza-esparruaren eraketa Ingurumen zuzendari nagusiaren ebazpen baten bidez adieraziko da.

5. Salbuespen gisa, lurralde etena duten toki entitateek ehiza-barruti bakarra eratzen ahalko dute Nota de Vigencia

14. artikulua . Ehizaaprobetxamendua tokiko ehizaesparruetan.

1. Tokiko ehiza-esparru batean izan daitezkeen ehiza-aprobetxamenduak ehiza antolatzeko onesten den planean zehaztuko dira; aprobetxamendu bakoitza titular batena izan daiteke.

2. Betiere, ehiza antolatzeko planek aprobetxamendu independenteak ezartzen ahalko dituzte, baldin eta aprobetxamenduak bateragarriak badira eta beraien arteko mugak garbiak badira. Horretarako espezieak, aprobetxamendu bakoitzaren azalera eta haiek egiteko proposamenak hartuko dira kontuan.

15. artikulua . Azalera aldatzea.

1. Ehiza-esparruan eratu ondoren haren mugetan azaleraren %30 baino gutxiago ukitzen duen aldaketa egin nahi izanez gero, toki entitate titularrak aldaketa-eskaera izapidetu behar du, eta bertan ondokoak adierazi: eskaeran esparruaren muga berriak, azalera berria, esparrutik kanpo edo haren barruan geratu diren lursailak eta esparruaren indarraldiaren mugaeguna (jatorrizko esparruarena izango da). Horrez gainera, esparruko lur pribatuen lagapen-eskubideak zehazten dituen ziurtagiria aurkeztu behar du.

2. Ehiza-esparruaren eratu ondoko aldaketak azaleraren %30 edo gehiago ukitzen badu, ehiza-esparru berriaren adierazpena beharko da.

3. Erregelamendu honetan xedatutako eragotzi gabe, ehiza-esparru batek ezin iraun izango du muga-aldaketa baten ondorioz azalera 2.000 hektarea baino gutxiago bada.

16. artikulua . Ehizaesparruen kudeaketa.

1. Toki ehiza-esparruak toki entitateek kudeatuko dituzte, edo bestela aprobetxamenduaren titularrek, toki entitateekin ados jarrita. Betiere, ehiza-aprobetxamendu baten titular diren pertsona batzuk badaude, toki entitateak kudeatuko du ehiza-esparrua.

2. Ehiza-barruti bat toki bateko ehiztari elkarte bati zuzenean esleitzen zaionean, esleipena soziala izanen da. Esleipen modalitate honetan, toki entitateak baldintzen agirian honako irizpide hauek ezarri beharko ditu gutxienez:

a) Tokiko edo kanpoko ehiztaria izatea.

b) Ehiza-barrutia esleitua duen tokiko elkarteak kanpoko ehiztariak bazkide nahitaez egin behar dituen ala ez.

c) Kanpoko ehiztariei, tokikoen aldean, kobratu beharreko gehieneko prezioa.

Edozein modutan ere, nahitaezkoa izanen da ehiza-barrutirik ez duten ehiztari nafarrentzat plaza batzuk gordetzea, gutxienez tokiko ehiztari elkarteko kideen %3, salbuespen honekin: Ehiza Antolatzeko Planean ezarritako gehieneko ehiztari kopurua tokiko ehiztari elkarteko kideen kopuru bera edo txikiagoa izatea.

Baimen horien kostua ezin da izan tokiko ehiztarientzat ezarritakoa halako bi baino handiagoa; ehiztari bati baimena emateko ez da beharrezkoa izanen tokiko elkarteari atxikitzea.

Aprobetxamenduaren titularrak gonbidapenak eman ditzake. Horiek emateko baldintzek barrutia esleitzeko baldintzen agirian aurrekusita egon behar dute. Horiek, edonola ere, izendunak izanen dira eta ehizarako egun zehatz bat jasoko dute, eta ez dute gaindituko, eguneko, barrutia osatzen duten ehiztarien kopuruaren %3a.Nota de Vigencia.

3. Tokiko elkarte bati zuzenean adjudikatutako ehiza-esparru bateko ehiztari guztiek eskubide eta betebehar eurak edukiko dituzte elkarteak esparruan egiten dituen jarduera guztietan.

4. Barrutiko titularrak edo aprobetxamenduaren esleipen-hartzaileak, untxiak edo basurdeak harrapatzeko baimen berezi bat badu animalia horiek kalterik ez egiteko, zilegi izanen du aldi baterako baimenak ematea, espezie horiek, ez beste batzuk, ehizatzeko Nota de Vigencia.

5. Ehiza-esparrua enkantean edo lehiaketa publikoan adjudikatzen bada, baldintza teknikoen pleguan ondokoak agertu behar dira gutxienez:

a) Ehiza-esparruaren izena eta matrikula.

b) Ehiza-esparruaren azalera.

c) Aprobetxamenduaren definizioa, eta hango espezieak, mugak eta zortasunak.

d) Ehiza antolatzeko plana bete beharra.

e) Urteko errentamenduaren balorazioa, prezioak berrikusteko formula eta ordaintzeko modua.

f) Fidantzak eta bermeak.

g) Adjudikazioaren epealdia.

h) Toki entitatearen eta adjudikaziodunaren betebeharrak eta eskubideak.

3. ATALA

NAFARROAKO GOBERNUAREN EHIZA-ESPARRUAK

17. artikulua . Eraketa.

Nafarroako Gobernuaren ehiza-esparruak honela eratuko dira:

a) Ingurumen, Lurraldearen Antolamendu eta Etxebizitza Departamentuak espedientea izapidetuko du eta bertan ukitutako lurrak, haien mugak eta eratuko den ehiza-esparruaren azalera zehaztuko dira. Gainera, esparruko ehiza antolatzeko plana prestatuko du; honen barruan aprobetxamenduen plana agertu behar da.

b) Dokumentazioa esparrua egingo den udalerrietako toki entitateei bidaliko zaie, entzunaldi-izapidea egiteko.

c) Entzunaldia amaituta eta aurkeztutako alegazioak baloratuta, Nafarroako Gobernuak bere ehiza-esparru bat eratu dela adierazi ahal izango du. Adierazpena Nafarroako ALDIZKARI OFIZIALean argitaratuko da, eta bertan nahitaez zehaztu behar dira ehiza-esparruaren mugak, azalera, esparruaz kanpo geratu diren lurrak (hala gertatuz gero) eta ehiza-esparruari emandako matrikula zenbakia.

18. artikulua . Nafarroako Gobernuaren ehizaesparruen kudeaketa.

Nafarroako Gobernuaren ehiza-esparruak Ingurumen, Lurraldearen Antolamendu eta Etxebizitza Departamentuak kudeatuko ditu.

4. ATALA

EHIZA-ESPARRU PRIBATUAK

19. artikulua . Eraketa eta aldaketa.

1. Partikularrek ehiza-esparruak sustatu ahal izango dituzte euren lurretan eta titularrek baimena ematen dieten lurretan. Tokiko ehiza-esparruaren eraketa Ingurumen zuzendari nagusiaren ebazpen baten bidez adieraziko da.

2. Horretarako, jabe partikularrek ehiza-barruti pribatua eratzeko eskaera aurkeztu behar dute eta bertan ondokoak zehaztu: proposatzen diren mugak, proposatutako barrutiaren kartografia 1:25.000 edo 1:50.000 eskalan, barrutian sartutako lurren katastro justifikazioa eta haien jabetza-frogagiriak; eremuak jabe bat baino gehiago izanez gero, denek sinatuko dute eraketa eskaera, eta jabeek jakinarazpenetarako izendatzen duten ordezkariaren berri ematen duen agiria ere aurkeztuko beharko da Nota de Vigencia.

3. Eratu ondoren ehiza-esparruaren azaleran aldaketaren bat egin nahi izanez gero, eratzeko egin beharreko izapide eurak egin beharko dira.

20. artikulua . Ehizaesparru pribatuen kudeaketa.

Ehiza-esparru pribatuak titularrek kudeatuko dituzte.

5. ATALA

EHIZA KONTROLATUKO EREMUAK

21. artikulua . Eraketa.

1. Ingurumen, Lurraldearen Antolamendu eta Etxebizitza Departamentuak ofizioz edo toki entitate batek edo, hala denean, ukituriko jabeek eskatuta ekingo die ehiza kontrolatuko eremuak adierazteko espedienteei. Halako espedienteetan ondokoak agertu behar dira: ukitutako lurrak, ehiza kontrolatuko eremuaren azalera, mugak eta ehiza antolatzeko plana (honen barruan aprobetxamenduen plana agertu behar da).

2. Ehiza kontralatuko eremuaren eraketa Ingurumen zuzendari nagusiaren ebazpen baten bidez adieraziko da, interesdunak entzun ondoren, eta gero Nafarroako ALDIZKARI OFIZIALean argitaratuko da.

3. Ehiza kontralatuko eremu baten adierazpenean nahitaez zehaztu behar dira eremuaren mugak, azalera, eremuaz kanpo geratu diren lurrak (hala gertatuz gero), adierazpenaren indarraldia eta eremuari emandako matrikula zenbakia.

22. artikulua . Kudeaketa.

Ehiza kontrolatuko eremuak Ingurumen, Lurraldearen Antolamendu eta Etxebizitza Departamentuak kudeatuko ditu.

23. artikulua . Aprobetxamendua.

Ehiza kontrolatuko eremuetan ehizan aritzeko Ingurumen, Lurraldearen Antolamendu eta Etxebizitza Departamentuaren baimena behar da, edo aprobetxamenduaren titularrarena.

6. ATALA

APROBETXAMENDU INTENTSIBOKO EHIZA-ESPARRUAK

24. artikulua . Aprobetxamendu intentsiboko ehizaesparruak.

1. Aprobetxamendu intentsiboko ehiza-esparruak eskualdekoak dira. I, II, III, IV, V, VI eta VII. nekazaritza eskualdeetako (arloko arautegian ezarri dira) lurralde-eremuan bost ehiza-esparru intentsibo ezar daitezke gehienez, eta eskualde batean ezin da egon bat baino gehiago.

2. Ehiza-esparru intentsiboetan ondoren zehaztuko diren animalia espezieak ehizatzen ahal dira, abeletxean edo itxian haziak: basahatea, galeper arrunta, galeper japoniarra, faisaia, txoloma, haitz-usoa eta eper gorria; basurdea ere aska daiteke, baina txakurrak esparruan trebatzeko bakarrik. Gainera, txakurrak trebatzeko jarduerak ere egin daitezke, bai eta populazio autoktonoak ukitzen ez dituzten ehizaren inguruko jarduerak ere.

3. Ehiza-esparru intentsiboa sortzeko ondokoak bete behar dira:

a) Esparruak 300 hektarea eduki behar ditu gutxienez, eta ezin ditu hartu Nafarroako Naturgune Babestuen Sareko lurrik, ez Natura 2000 Sareko lurrik.

b) Lurrek ezin dute eduki ehiza-balio handirik.

c) Sustatzaileek esparruko lur-jabe guztien berariazko lagapenak eduki behar dituzte.

d) Ehiza antolatzeko plana prestatu eta onetsi behar da.

4. Aprobetxamendu intentsiboko ehiza-esparruaren eraketa Ingurumen zuzendari nagusiaren ebazpen baten bidez adieraziko da. Honen ondorioetarako, lehiaketa publikorako deialdia egingo da ehiza-esparru intentsiboa eratzeko eskaeraren bat aurkezten den eskualdeetan.

5. Ehiza-esparru intentsiboaren indarraldia 10 urtekoa izango da. Epealdi hori amaitutakoan indarraldia luzatu ahal izango da jabe interesdunek baimena emanez gero eta baimenean ezarritako baldintza guztiak bete badira. Hala gertatuz gero, beste lehiaketa publiko bat egingo da.

6. Ehiza-esparru intentsibo bat adjudikatzeko irizpide hauek hartuko dira kontuan:

a) Lurrek ez edukitzea interesik biodibertsitatearen eta ehiza-baliabideen aldetik.

b) Eskaintza teknikoa, egin beharreko jardueren arabera.

c) Aprobetxamenduaren izaera soziala: prezio orokorrak, eskualdeko ehiztarientzako prezioak, ehiztari nafarrentzako prezioak, etab.

IV. KAPITULUA. EHIZAREN ANTOLAMENDUA

IV. KAPITULUA

1. ATALA

ESKUALDE PLANAK

25. artikulua . Eskualde planak.

1. Ingurumen, Lurraldearen Antolamendu eta Etxebizitza Departamentuak eskualde planak prestatuko ditu, eta plan hauek nahitaez bete beharko dira zehazten duten lurralde-eremuan.

Eskualde planetan ehizaren alderdi batzuk antolatzeko baterako irizpideak ezarriko dira. Planak partzialak edo orokorrak izan daitezke, bai eremuei dagokienez, bai espeziei dagokienez.

2. Eskualde planetan ondokoak agertu behar dira gutxienez: xedea, aplikazio-eremua, diagnostikoaren laburpena eta ehiza antolatzeko irizpideak.

26. artikulua . Planak onesteko prozedura.

Ingurumen, Lurraldearen Antolamendu eta Etxebizitza Departamentuak proposatutako eskualde plan bakoitzaren kopia bat bidaliko die haren lurralde-eremuan dauden ehiza-esparruen kudeaketaren ardura daukaten toki entitateei, eta hilabeteko epe emango die alegazioak aurkezteko. Halaber, proiektua jendaurrean egongo da hilabetean. Epealdia amaitutakoan eta alegazioak aztertu eta ezarritako kontsulta-izapideak egin ondoren, Nafarroako Gobernuak eskualde plana onetsiko du, bidezko deritzen aldaketak eraginda.

2. ATALA

EHIZA ANTOLATZEKO PLANAK

27. artikulua . Edukia.

1. Aprobetxamendu intentsibo ehiza-esparruetan eta ehiza kontrolatuko eremuetan izan ezik, ehiza antolatzeko planean ondokoei buruzko informazioa bilduko da:

a) Administrazio datuak: ehiza-eremuaren eta beraren titularraren identifikazioa, aurreikusitako aprobetxamenduak, aprobetxamenduak adjudikatzeko modalitateak, adjudikaziodunaren datuak, ehiza-esparruan gehienez jardun dezaketen ehiztarien kopurua, edo aprobetxamendu bakoitzean jardun dezaketenena, bat baino gehiago egonez gero.

b) Espezieen hasierako egoera eta aurreikusitako aprobetxamenduak: ehiza-esparruan ehizatu ahal diren espezieak eta haien garrantziaren balorazioa; espezie sedentarioak: lurren egokitasuna lehentasuneko espezieak bizitzeko, populazioen egoera, planaren helburuak, antzemandako arazoak, aprobetxamendua arautzeko metodoak, urteko kontrolak egiteko metodoak (eginez gero), aprobetxamenduari ekiteko beharreko gutxieneko populazioa; espezie migratzaileak: planaren helburuak, antzemandako arazoak, espezie bakoitzarentzat egokiak diren aldeak, potentzialtasuna, ehiza-egitura finkoak.

c) Ehiza-espezieek egindako kalteak: kalte egin dezaketen espezieak, aldeak, kalteen garrantzia, kalterik ez izateko aurreneurriak, eta aurrekontua.

d) Aldeak (ondoko artikuluan arautu dira).

e) Hobekuntzen plana: espezieen gaineko jarduketak, harrapakaritzaren kontrola eta habitataren gaineko jarduketak.

f) Finantza programa: dirusarreren eta gastuen berrikuspena planaren indarraldian.

g) Kartografia: esparruaren mugak, planean ezarritako aldeak, hegazti migratzaileen ehizarako postuak, lehentasuneko espezieen potentzialitatea, ehiza larriko uxalekuak, kalteak izan daitezkeen aldeak eta jarduera bereziak egingo diren aldeak.

h) Teknikari sinatzailearen adierazpena, ehiza antolatzeko planean ageri diren datuak egiazkoak direla eta horrekiko erantzukizuna onartzen duela dioena, eta kudeaketaren titularraren adierazpena, dokumentuaren edukia onartzen duela dioena.

2. Ingurumen zuzendari nagusiaren ebazpen baten bidez ehiza antolatzeko planak egiteko behar den dokumentazioa ezarriko da, eta nola aurkeztu behar diren ere bai.

3. Ehiza-esparru etendunetako ehiza antolatzeko planek eremurik txikienaren antolamenduari buruzko eranskina eduki behar dute. Eranskin honen edukia eta ezaugarriak Ingurumen, Lurraldearen Antolamendu eta Etxebizitza Departamentuak finkatuko ditu aldearen ezaugarrien eta garrantziaren arabera.

28. artikulua . Ehiza antolatzeko planetan ezarri beharreko aldeak.

1. Ehiza antolatzeko planetan erreserbak ezarri behar dira. Erreserbak ehiza erabat debekatuta dagoen aldeak dira. Erreserben helburua interes bereziko aldeak artatzea edo animalia espeziak suspertzea da. Erreserben gutxieneko azalera ehiza-esparruaren azaleraren ehuneko hamabi izango da.

2. Ehiza-esparruaren baldintza bereziei lotuta, erreserbarako gorde beharreko lursail osoaren edo zati baten ordez babes-eremu bat eratzea baimendu daiteke.

Horrelako eremuetan debekatuta dago espezieak eskuztatzea, ondoko kasuetan izan ezik:

a) Osasun eta segurtasun publikoa dela eta.

b) Soroetan, abereei, landaretzari eta faunari kalte ez egiteko.

Kasu bietan Ingurumen, Lurraldearen Antolamendu eta Etxebizitza Departamentuaren baimena behar da.

29. artikulua . Ehiza antolatzeko planetan ezar daitezkeen aldeak.

Ehiza antolatzeko planetan alde hauek ezar daitezke:

1. Ehiza-espezie batentzako edo batzuentzako babes-eremua. Alde hauetan debekatuta dago espezie jakin bat ehizatzea, urte osoan edo aldi jakinetan. Helburua babestutako ehiza-espeziea suspertzea da, edo ehizaldi gogorrenetan defendatzea. Ehiza antolatzeko planean zehatz-mehatz azaldu behar da zein espezie babesten den alde bakoitzean, zein alditan egongo den babestuta, eta beste murrizpen batzuk.

2. Txakur-aldea. Alde hauetan ehiza-txakurrak trebatzen ibil daitezke; hots, ehiza-txakurrak hezteko eremuak dira. Animalientzat balio urria edo baliorik batere ez duten lurretan eratu behar dira. Alde hauek txikiak izan behar dira; azalera eta erabiltzeko garaia ehiza antolatzeko planean zehaztuko dira, esparruaren ezaugarriak kontuan hartuta.

3. Hazitako ehizakien eremuak ehiza-hegaztiak entrenatzeko ere erabiltzen ahalko dira, Ehiza Antolatzeko Planean horixe agertzen denean. Kasu horretan, ehiza-hegaztien entrenamendua urteko egun guztietan egiten ahalko da Nota de Vigencia.

4. Galeper eremua. Nafarroako hegoaldean dauden eremuak dira, non galeperra ehizatzen ahal den kasuan kasuko debekualdi aginduan urtero ezartzen diren ehizako denboraldietan.

Erliebe orografiko urriko edo halako erlieberik gabeko eremuetan kokatuak egon behar dute eta, gainera:

a) Ureztalur tradizionalak galeper eremutzat joko dira zuzenean.

b) Lehorreko eremuek eta/edo ureztalur berriek, galeper eremutzat jotzeko, Landa Garapen, Industria, Enplegu eta Ingurumen Departamentuaren berariazko baimena beharko dute. Kasu horietan, galeper eremuaren azalera, guztira, ez da inoiz ere izanen ehiza-barrutiaren azaleraren %10a baino handiagoa, eta ez ditu 300 hektarea baino gehiago izanen Nota de Vigencia.

5. Aparkatzeko eremuak.

30. artikulua . Aprobetxamendu intentsiboko ehizaesparruetan ehiza antolatzeko planen edukia.

Aprobetxamendu intentsiboko ehiza-esparruetan ehiza antolatzeko planetan ondokoak zehaztu behar dira:

a) Administrazio datuak: ehiza-eremuaren mugak, titularraren identifikazioa eta aurreikusitako aprobetxamenduak.

b) Espezieen hasierako egoera: ehiza-esparruan ehizatu ahal diren espezieak eta haien garrantziaren balorazioa.

c) Aurreikusitako aprobetxamenduaren deskripzioa, espezieak, hauen jatorria, animalien osasun kontrolerako programa, kontrol genetikorako programa eta bizi-kalitatearen programa.

d) Aldeak: aprobetxamendu desberdineko aldeak eta alde bakoitza erabiltzeko arauak.

e) Egiturak eta instalazioak: ehiza-esparru intentsiboan egiteko diren egitura eta instalazioen proiektua.

f) Finantza programa: dirusarreren eta gastuen berrikuspena planaren indarraldian.

g) Kartografia: ehiza-esparruaren mugak, planean ezarritako aldeak.

h) Teknikari sinatzailearen adierazpena, ehiza antolatzeko planean ageri diren datuak egiazkoak direla eta horrekiko erantzukizuna onartzen duela dioena, eta kudeaketaren titularraren adierazpena, dokumentuaren edukia onartzen duela dioena.

31. artikulua . Ehiza kontrolatuko eremuetan ehiza antolatzeko planen edukia.

Ehiza kontrolatuko eremuetan ehiza antolatzeko planetan informazio hau agertu behar da:

a) Administrazio datuak: ehiza-eremuaren mugak, titularraren identifikazioa, aurreikusitako aprobetxamenduak, aprobetxamenduak adjudikatzeko modalitateak eta adjudikaziodunaren datuak.

b) Espezieen hasierako egoera: eremuan ehizatu ahal diren espezieak eta haien garrantziaren balorazioa; espezie sedentarioak: lurren egokitasuna lehentasuneko espezieak bizitzeko, populazioen egoera, planaren helburuak, antzemandako arazoak, aprobetxamendua arautzeko metodoak, urteko kontrolak egiteko metodoak (eginez gero), aprobetxamenduari ekiteko beharreko gutxieneko populazioa; espezie migratzaileak: planaren helburuak, antzemandako arazoak, espezie bakoitzarentzat egokiak diren aldeak, potentzialtasuna, ehiza-egitura finkoak.

c) Ehiza-espezieek egindako kalteak: kalte egin dezaketen espezieak, aldeak, kalteen garrantzia, kalterik ez izateko aurreneurriak, eta aurrekontua.

d) Aldeak.

e) Kalteak saihesteko plana: espezieen gaineko jarduketak, habitataren gaineko jarduketak.

f) Kartografia: eremuaren mugak, planean ezarritako aldeak, postuak, kalteak izan daitezkeen aldeak eta jarduera bereziak egingo diren aldeak.

g) Teknikari sinatzailearen adierazpena, ehiza antolatzeko planean ageri diren datuak egiazkoak direla eta horrekiko erantzukizuna onartzen duela dioena, eta kudeaketaren titularraren adierazpena, dokumentuaren edukia onartzen duela dioena.

32. artikulua . Ehiza antolatzeko plana prestatzea eta izapidetzea.

1. Esparru bateko ehiza antolatzeko plana haren kudeaketaren arduradunak prestatu eta izapidetu behar du. Ehiza antolatzeko plana arloko titulua duen teknikari batek egingo du. Arloko teknikari tituluduna da basafaunarekin zerikusia duten arloren bateko unibertsitate titulua duen oro.

2. Ehiza antolatzeko plana Ingurumen, Lurraldearen Antolamendu eta Etxebizitza Departamentuari aurkeztu behar zaio. Akatsen bat edo zerbait falta dela ohartuz gero, 10 egun balioduneko epea emango da zuzentzeko.

3. Ehiza antolatzeko plana guztiz prest dagoenean, Ingurumen, Lurraldearen Antolamendu eta Etxebizitza kontseilariak ondoko erabakietako bat hartu ahal izango du:

a) Ehiza antolatzeko plana onestea.

b) Ehiza antolatzeko plana onestea eta espezieen aprobetxamendua ongi antolatzeko neurri edo muga egokiak ezartzea.

c) Ehiza antolatzeko plana ukatzea; honelakoetan arrazoiak eman behar dira.

33. artikulua . Ehiza antolatzeko planaren indarraldia.

1. Ehiza antolatzeko planek gehienez ere bost urte iraunen dute indarrean, edo esparruaren nahiz ehiza kontrolatuko eremuaren indarraldia amaitu arte, lehenago amaitzen bada. Ehiza antolatzeko plana iraungitzen denean ehiza-esparrua iraungitzeko bi urte edo gutxiago falta bada, planaren indarraldia hura iraungi arte luzatu ahal izanen da.

2. Aurkeztutako ehiza antolatzeko plana onesten ez bada, aurreko plana berez luzatuko da, eta luzatu ere urtebete gehienez, aurrekoa amaitzen den egunetik aurrera zenbatuta.

3. Ehiza antolatzeko plan baten indarraldia ezin luzatu izango da lehendik ere luzatu bada amaiera-eguna ehiza-esparruaren indarraldiaren amaierarekin bat etortzeko.

3. ATALA

EHIZA-ESPARRUAK KUDEATZEKO URTEKO PLANAK

34. artikulua . Urteko kudeaketa planak.

1. Ehiza-esparruaren kudeaketaren ardura daukanak urteko kudeaketa plana aurkeztu behar dio Ingurumen, Lurraldearen Antolamendu eta Etxebizitza Departamentuari; horretarako berariazko formulario bat prestatuko da informazioa emateko.

2. Urteko kudeaketa plana irailaren 1a baino lehen aurkeztu behar da. Ingurumen, Lurraldearen Antolamendu eta Etxebizitza Departamentuak argibideak eskatu ahal izango ditu emandako informazioaz, eta ehiza antolatzeko planean ezarritakorik desbideraketa handirik gertatuz gero, aldaketak agindu ahal izango ditu.

V. KAPITULUA. EHIZAN ARITZEKO ARAU BEREZIAK

V. KAPITULUA

1. ATALA

MERKATURATZEA ETA GARRAIOA

35. artikulua . Merkaturatzea.

Abeletxeetan dauden edo merkaturatzen diren ungulatu espezie autoktonoetako animaliek banako marka iraunkorrak eduki behar dituzte erraz ikusteko moduko leku batean.

36. artikulua . Garraio.

1. Animalien osasunari buruzko araudian ezarritako baimenak eduki behar dira ehiza-espezieetako animalia biziak garraiatu ahal izateko.

2. Ehiza garaian hildako ehizakiak, ehizarako animalien haztegietakoak, osasun araudi egokian eta aplikatu beharreko arau orokorretan ezarritakoarekin bat etorriz garraiatu behar dira.

3. Ehiza garaian hildako orein eta orkatzak, industria haztegietakoak ez direnak, garraiatzen direnean, zigilatuta garraiatu behar dira Nafarroakoak izanez gero, eta Foru Komunitatetik kanpokoak gida edo baimen egokiarekin, kasuan kasukoa jatorrizko autonomia erkidegoko arautegiaren arabera.

4. Ehiza garaian, gainerako ehiza-espezietako animalia hilak garraiatzeko ez da behar inolako baimenik, artikulu honetako 2. puntuan ezarritakoa eragotzi gabe.

5. Debekualdian debekaturik dago ehizaki hilak garraiatu eta merkaturatzea, legez eratutako industri ustiategi edo ehiza etxaldeetatik datozenak izan ezik; horiek beren jatorria frogatzeko zigilu edo etiketak eduki behar dituzte.

Debekutik salbuetsiko dira, halaber, kalteak kontrolatzeko salbuespenez ematen diren baimenen bidezko suntsiketen ondoriozko animaliak; halakoetan, bertan eduki beharko da baimen hori Nota de Vigencia.

2. ATALA

SALBUESPENEZKO BAIMENAK

37. artikulua . Salbuespenezko baimenak.

1. Nafarroako Ehizari eta Arrantzari buruzko abenduaren 22ko 17/2005 Foru Legeko 44. artikuluaren arabera, I. tituluko VI. kapituluan ezarritako debekuak indarrik gabe utzi ahalko dira, aurrez administrazio baimena emanda, ondoko inguruabarretako bat gertatuz gero:

a) Behar bezala egiaztatzen denean pertsonen osasunari edo segurtasunari, nekazaritzari edo basa faunako espezieei kalte egiteko arriskua dagoela. Abeltzaintza edo zuhaitzak ukitu eta ondorioz aurrean aipatutako kalteak gerta daitezkeenean.

b) Zientzi ikerketari, hezkuntzari edo kulturari lotutako arrazoiak daudela egiaztatzen denean, edo xedea basa faunako espezieen populatzea, sarrera, indartzea edo haztegiko hazkuntza erraztu edo laguntzea denean. Horrelakoetan, zientziari edo ikerketari lotutako xedeetarako laginak hartzeko baimena emanen zaie unibertsitate, erakunde ofizial edo izaera zientifiko, pedagogiko nahiz kultural nabarmeneko elkarteek behar bezala kreditaturiko pertsonei soilik.

2. Baimen guztietan baldintzak eta bitartekoak ezarriko dira animaliak harrapatzeko eta, behar izanez gero, deuseztatzeko, eta baimenaren itzalpean egin beharreko lanen jarraipen eta kontrolerako bitartekoak ere ezarriko dira.

Ehiza-esparruei dagozkien salbuespenezko baimenak esparruko ehizazainak emango ditu, edo, bestela, haren kontrolpean eta beraren erantzukizunpean.

3. ATALA

EHIZA MODALITATEEI BURUZKO ARAU BEREZIAK

1. Azpiatala

Ehiza larriko modalitateak

38. artikulua . Monteria.

1. Ehiza larriko modalitate honetan txakurrak erabiltzen dira, ehiztariak postuetan kokatzen dira eta laguntzaileek ehizakiak uxatzen dituzte; ehizaldi bat monteriatzat hartzeko ezinbestekoa da guztira 40 ehiztari baino gehiago aritzea eta 25 txakur baino gehiago erabiltzea.

2. Erregelamendu honetan ezarritakoaren ondorioetarako, monteriatzat hartuko dira, halaber, ehiztari edo txakur, mugak gainditzen diren ehizaldiak ere.

3. Ehiza-esparru batean monteriak egiteko, hala agertu behar da bertako ehiza antolatzeko planean. Planean monteria bakoitzeko ehiza-eremuen planoak agertu behar dira, eta ehiza-kanpaina osoan eginen diren monterien kopurua zehaztu behar da. Halako ehiza saioak egin baino 15 egun lehenago, gutxienez, jakitun jarri behar da Ingurumen, Lurraldearen Antolamendu eta Etxebizitza Departamentua. Jakinarazpena aprobetxamenduaren titularrak aurkeztu behar du. Bertan ondokoak azaldu behar dira: non ehizatuko den (eremua), ehiztariak non eta noiz bilduko diren, monteriaren arduradunaren izen-abizenak eta nortasun agiriaren zenbakia.

4. Monteriaren arduradunak parte hartuko duten ehiztari guztiei azaldu behar die nola jardun behar duten ehizaldian pertsona guztien segurtasuna ziurtatzeko. Horrez gainera ehiztari bakoitza bere postuan kokatu behar du eta ehizaldiaren hasiera eta amaiera adieraziko ditu aurrez hitzartutako seinaleen bitartez.

39. artikulua . Gaueko zelatak.

1. Gaueko zelatan basurdea ehizatzeko baimena eman daiteke pertsonek istripuak izateko arriskuak gutxituko dituzten neurriak ezarriko direla bermatuz gero. Horretarako ezinbestekoa da ehiza modalitate hau ehiza antolatzeko planean ezarrita egotea.

2. Gaueko zelatak lurzorua baino gorago jarritako postuetatik bakarrik egin daitezke: jaurtigaien ibilbidearen xedea lurzorua izan behar da. Postu bakoitzean ehiztari bat bakarrik egon daiteke. Postu hauek finkoak izango dira eta ehiza antolatzeko planeko mapetan agertu behar dira. Ehizatu nahi den espeziea ibili ohi den tokietan jarriko dira, pertsonei arriskurik ez sortzeko moduan. Postu bat erabili nahi izanez gero, gutxienez 48 ordu lehenago jakinarazi behar zaio Ingurumen Zaintzari.

40. artikulua . Kupoak erregulatzea Nota de Vigencia.

Ehizaren eta arrantzaren arloan eskuduna den departamentuak bidezkoak diren bitartekoak jar ditzake ehizako kupoak eta presioa erregulatzeko, ehiza larrian baimenduta dauden espezieetako edozeinetan

2. Azpiatala

Arkuz ehizatzea

41. artikulua . Arkuz ehizatzea.

1. Ehiztariek arkuz egin dezakete ehizan baimendutako modalitate guztietan.

2. Gainera, arkuz ehiza daitezke basurdeak gaueko zelatetan, bide-zelatetan eta gainerako zelatetan. Modalitate honetan postua, egonez gero, geziak lurrerantz jaurtitzeko moduan kokatu behar da.

3. Ehizarako arkuek gutxieneko potentzia eduki behar dute; hona:

Ehiza xehea: 35 libratik (15,75 Kg) gorako mota guztiak, arkulariaren zabaltze-ahalaren arabera.

Ehiza larria: 45 libratik (20,25 Kg) gorako mota guztiak, arkulariaren zabaltze-ahalaren arabera.

4. Gezien kirtena zurezkoa, aluminiozkoa edo karbonozkoa izan behar da; karbonozkoek norabide askotan jarritako geruza anitz eduki behar dituzte.

5. Ehiza xehean mota guztietako inpaktu-puntak erabil daitezke, bai eta mozte-orri finkoak dauzkaten puntak ere.

6. Hegaz ari diren hegaztiak ehizatzeko lumaztutako geziak erabili behar dira, hain zuzen ere "flu-flu" motako luma zabalez.

7. Ehiza larrian 30 gramotik gorako geziak erabili behar dira. Puntak moztekoak izan behar dira, orri desmuntagarriak zein finkoak eduki ditzakete, eta mozte-zabalera 22 mm izan behar da gutxienez. Debekatuta daude osagai artikulatuak dauzkaten gezi-puntak eta orrien atzealdea arpoi gisakoa daukatenak. Geziek ezin dute eduki punta eztandagarririk, eta ezin dira pozoiaz igurtzi. Gezi guztiek eduki behar dute kirtenean ehiztariaren ehiza-lizentziaren zenbakia.

8. Ehiza larrian sustantzia usaindunak erabil daitezke ehizakiak une batzuez geldiarazteko. Hala ere, sustantzia horiek ezin dira hedatu 10 x 10 cm baino gehiago.

3. Azpiatala

Falkoneria

42. artikulua . Ehizahegaztiak.

Ehiza-hegaztiak dira falkoniformeen eta strigiformeen ordenetako eguneko zein gaueko hegazti harrapari guztiak, gatibu gordetzen direnak ehizan baliatzeko.

43. artikulua . Ehizahegaztien erregistroa.

1. Nafarroako ehiza-hegaztien erregistroa sortu da. Erregistro hau Ingurumen, Lurraldearen Antolamendu eta Etxebizitza Departamentuaren esku egongo da, eta Nafarroako Foru Komunitateko ehiza-hegazti guztiak inskribatu behar dira bertan. Ehiza-hegazti bat inskribatzeko, jabeak eskabidea aurkeztu behar dio Ingurumen, Lurraldearen Antolamendu eta Etxebizitza Departamentuari; eskabidean ondoko datuak agertu behar dira: beraren izen-abizenak, egoitza, telefonoa eta nortasun agiri nazionalaren zenbakia; eta hegaztiaren datu hauek: espeziea, sexua, jaiotza-data, jatorria, CITES ziurtagiriaren zenbakia eta identifikazio-zenbakia, edukiz gero. Erregistratzean azal-lagin bat hartuko da: gordailuan edukiko da hegaztiaren erregistro-zenbakiari lotuta.

2. Ingurumen, Lurraldearen Antolamendu eta Etxebizitza Departamentuak animaliak azal barruko gailuez markatzeko edota haien ezaugarri genetikoak finkatzeko eskatu ahal izango du.

3. Ehiza-hegazti bati erregistroan alta eman ondoren hura edukitzeko baimen pertsonala luzatuko da.

4. Erregistroko datuetako bat aldatuz gero, 15 egun igaro baino lehen jakinarazi behar da.

Ehiza-hegazti bat hiltzen edo galtzen bada, edo titularra aldatzen bada, 15 egun igaro baino lehen jakinarazi behar zaio erregistroari, datuak egunera ditzan: hegaztiari baxa emango zaio lehengo titulartasunean. Titulartasuna aldatzen bada, titular berriak 15 eguneko epea edukiko du hegaztia bere titulartasunarekin erregistratzeko.

44. artikulua . Ehiza ehizahegaztiekin.

1. Ehiza-hegazti bat ehizarako erabiltzeko, titularrak gainerako ehiztariei ezarritako betekizun eurak bete behar ditu. Gainera, modalitate honetan hegaztiaren erregistroaren ziurtagiria eduki behar da.

2. Beste autonomia erkidego batzuetako hegaztiren bat daukaten ehiztariek jatorrizko erkidegoan eskatzen den hegaztiaren dokumentazioa eduki behar dute Nafarroako ehiztariek oro har eduki beharrekoaz gainera.

3. Askatzen diren ehiza-hegaztiek irrati telemetria bidezko bilaketa-sistema eduki behar dute.

45. artikulua . Ingurumen, Lurraldearen Antolamendu eta Etxebizitza Departamentuaren kontrola.

Ingurumen, Lurraldearen Antolamendu eta Etxebizitza Departamentuak erregistroan ageri diren hegaztien egoera ikuskatuko du euren ohiko egonlekuan, indarreko ehiza arautegian biodibertsitatearen artapenaz eta animalien ongizateaz ezarritakoa betetzen denez egiaztatzeko.

4. Azpiatala

Espezie migratzaile batzuen ehiza

46. artikulua . Arautegi berezia daukaten espezie migratzaileak.

Aprobetxamendurako arautegi berezia ezarria duten espezie migratzaileak usoa eta birigarroa dira.

47. artikulua . Uso eta birigarroen ehizarako postuak.

1. Urtero, udazkeneko migrazioan datozen uso eta birigarroei hegaldian tiro egiteko ehiza postuek bete beharreko baldintzak ezarriko dira.

2. Debekualdiei buruzko urteko aginduan ezartzen denaz gainera, hegazti migratzaileen ehizarako postuek betekizun orokor hauek ere bete behar dituzte:

a) Ehiza postuak, bakarka nahiz lerroz lerro daudenak, finkoak izanen dira eta mendikateetako gainetan kokatuko dira edo mendi-mazeletako goiko partean. Debekatua dago "eskupeta hegalariak" deitutakoak erabiltzea eta postuetatik kanpora armak zorrotik aterata eramatea, postutik hurbil eroritako usoren bat biltzeko izan ezik.

b) Tiro egiteko postu bakoitzak bere zenbakia eduki behar du, eta seinale egonkor bat ere bai. Ebazpen baten bidez zehaztuko da marka horiek ezartzeko prozedura.

c) Uso migratzaileei tiro egiteko postu edo etxola berria instalatzeko zein lehendik legeztatutako bat lekualdatzeko, baimena eman behar da ehiza antolatzeko planean.

d) Postu bat ondoz ondoko hiru urtean erabili ezean, baimena indarrik gabe geratuko da.

e) Ehiza postuak itxaron-lerroan kokatuko dira, eta 50 metroko tartea izanen dute elkarren artean.

Postuen artean interferentziarik sortzen bada, zaharrenak izanen du lehentasuna. Interferentzia dagoela ulertuko da lehentasuna duen postuaren tirabidea murriztua gelditzen bada eta ukitutako ehiza-esparruen titularren artean batera ehizatzeko adostasunik ez bada.

Nolanahi ere, postu berriak baimendu ahal izango dira aurreko ehiza antolatzeko planean baimendutako gehieneko postu kopurua gainditu ezean.

f) Postuak aprobetxatzeko ehiza-esparruaren administraziorako ezarritako arauei jarraituko zaie.

g) Postuek, bai itxuraz bai erabilitako materialen aldetik, paisaian ez nabarmentzeko modukoak izan behar dute. Ingurua garbitasun aldetik behar bezala edukitzea kudeaketaren titularraren eginbeharra da. Ingurumen, Lurraldearen Antolamendu eta Etxebizitza Departamentuak, kasua bada, legezko neurriak hartuko ditu aipatu baldintzak betetzen ez dituzten postuen ehiza jarduera eteteko.

h) Hegaztiak hegaldian tiroz ehizatzeko postu bakoitzean, bai zoruan bai goratuta daudenetan, hiru ehiztari egoten ahal dira aldi berean gehienez

Ehiztari bakoitzak eskopeta bakarra edukitzen ahalko du postuan

i) Hegaztiak pasean ehizatzeko postuetan debekatuta dago abatarik, zinbelik edo usoei ohiko bidea aldarazten dien bestelako erakargarririk erabiltzea

j) Etxolak ezin izanen dira bihurtu hegan doazen hegaztiak harrapatzeko postu.

k) Birigarroen ehizarako postuak ezin izanen dira bihurtu usoak hegaldian harrapatzeko postu edo etxola Nota de Vigencia.

48. artikulua . Usoen ehiza etxola tradizionaletan.

1. Ehiza antolatzeko planen bitartez usoaren ehizarako legez ezarritako etxola tradizionaletan, udazkeneko migrazioaren garaian baimena eman ahalko da apeuko uso biziak erabiltzeko, itsutu edo elbarritu gabekoak. Etxola horietan debekaturik dago usoei hegaldian tiro egitea.

2. Etxolak eta pase-postuak ezin dira jarri elkarri tiro-eremua oztopatzen diotela.

VI. KAPITULUA. SEGURTASUNA EHIZAN

49. artikulua . Segurtasunerako arau orokorrak ehizan.

1. Oro har, ehiza larrian ehiztariek perdigoiz betetako kartutxoak bakarrik eduki ditzakete.

2. Ehiza larrian, postuetan dauden ehiztariek bala kartutxoak dituzten errifleak edo eskopetak eduki ditzakete Nota de Vigencia.

3. Uxatzaileek eskopeta baizik ezin dute erabili.

50. artikulua . Monteria eta uxaldietarako segurtasunarauak.

1. Monterietan eta uxaldietan ezin egin izango da tiro hitzartutako seinalea eman arte, ez eta ehizaldia amaitutzat eman ondoren ere (amaiera behar bezala adierazi behar da). Halaber, debekatuta dago armak kargatuta edukitzea ehizalekutik kanpo.

2. Ehizaldia hasi aurretik kartelak jarri behar dira ehiza-eremuko bide nagusietan, testu honekin: "Kontuz: ehiza larriko uxaldia". Kartelak erraz ikusteko moduko lekuan jarri behar dira. Uxaldia amaitutakoan kendu egin behar dira.

3. Ehiztariek eta uxatzaileek barneko oso ikusgarria izan behar dute soinean, ahal dela laranja kolorekoa. Debekatuta dago ehiztariak eta laguntzaileak ehizaldian zehar posturik irtetea eta beste postu batera joatea. Halakorik egin behar izanez gero, antolatzailea jakitun izan behar dira, edo bestela haren ordezkari baimendunak. Besterik adierazi ezean, uxatzaileak ehiztarien tiro-postuetatik 50 metro baino urrunago egon behar dira. Beste alde batetik, ehiztariek ezin dute egin tiro uxatzaileak ari diren lerrorantz, hau laurogei metro baino hurbilago badago.

4. Berariaz baimendutako monterietan postu guztiak egon behar dira babestuta beste ehiztarien tiroetatik; ahal dela, ehizalekuko bertako elementuak baliatuko dira horretarako. Berez babesgarririk egon ezean, postuen artean berrehun eta berrogeita hamar metro baino gehiago utzi behar dira.

5. Bai monterian bai uxaldi-ehizan, aprobetxamenduaren titularrak ehizaburu bat izendatuko du, eta honek parte hartzen duten ehiztari guztiei azaldu beharko die nola jardun behar duten ehizaldian pertsona guztien segurtasuna ziurtatzeko. Horrez gainera, ehiztari bakoitza bere postuan kokatu behar du eta ehizaldiaren hasiera eta amaiera adieraziko ditu seinaleen bitartez. Ehizaburuak, ehizaldia hasi baino lehen, non egin daitekeen tiro azalduko die parte hartzen duten ehiztari guztiei, eta ehiztariek ez dute tiro eginen handik kanpo, ezta, bereziki, bistan dauzkaten gainerako postuetarantz ere. Ondorio horietarako, ehiztari bakoitzak hitzez eta keinuez agertu behar die hurbilenekoei non dagoen bere postua Nota de Vigencia.

51. artikulua . Segurtasuna armak erabiltzean.

Ohiko portaera aldatzen duten sustantzien eraginpean ezin da ehizan armarik erabili. Honen ildotik, Ingurumen, Lurraldearen Antolamendu eta Etxebizitza Departamentuak debeku hori betearazteko behar diren neurri guztiak hartu ahal izango ditu.

VII. KAPITULUA. ALDEAK

52. artikulua . Aldeak.

1. Nafarroako Foru Komunitateko lurraldean, iparralde eta hegoaldeko eremuen arteko muga egiten duen marra hauxe da:

Arabako mugatik abiatuz, Aguilar Kodeskoko udalerriak Marañon, Cabredo eta Genevillarekin egiten duen mugan barrena segitzen du marrak; gero, Kodesko Haitzetik eta uren isurialdeen banatzailean zehar, San Cristóbal, Peña de la Concepción, Ubagoko mendiak, Cábrega mendikatea, Los Arcostik Mendazarako errepidearen 6. kilometroa, San Gregorioko gaina, Etaio, Monjardin eta Labeagan barna, Gasteiz-Lizarra errepideraino, eta azken herri horretara ailegatu arte. Hortik, Lizarra-Gares errepidean gaindi, Allozko errepideko bidegurutzeraino, gutxi gorabehera, Lorkara ailegatu baino kilometro erdia lehentxeago; bidegurutze horretatik Allozko errepidean barna Aritzalaraino. Aritzalako udal-mugapean Muetz, Jaitz, Izurtzu eta Etxaurin barnako errepidetik segitzen du, eta hortik zuzenean Arga ibairaino, Otazu eta Eriete artean, ibaiari jarraikiz Hiriberriraino. Hiriberritik, uren isurialdeen banatzailean barna Ipasatetik Erreniega mendatera eta handik ur isurialdeen banatzailean barna Erreniegako gaineraino, ondotik jautsiz Ondarra Fundaziotik barrena, Biurrungo errepidetik Garesko errepidera, Zaragozako errepideko bidegurutzeraino; hortik Tiebasko harrobitik Alaitz mendikateko kaxkora, eta aipatu mendikateko eta Izkoko uren isurialdeen banatzailean barna Loitiko gaineraino. Hortik, N-240 errepidean zehar, Nardozetik pasatuz, Venta de Judas delakora, eta hartatik Irunberriko errepidean barna herrira ailegatu arte. Irunberritik Leireko Monasterioko bideari jarraikiz, Mendikateko ur isurialdeen banatzailean barna eta banatzaile horretan gaindi Zaragozako probintziako mugara ailegatu arte.

2. Iparraldeko eremuan, Petilla eta Petillako Los Baztanes sartzen dira.

II. TITULUA. ARRANTZA Nota de Vigencia

I. KAPITULUA. ESPEZIEAK

53. artikulua . Arrantzaespezieak.

1. Nafarroako Foru Komunitatean ondokoak dira arrantza-espezieak:

a) Arrainak: Aingira (Anguilla anguilla), izokina (Salmo salar), amuarrain arrunta eta ibai-amuarraina (Salmo trutta), ortzadar-amuarraina (Onchorhynchus mykiis), perka amerikarra (Micropterus salmoides), mendi-barboa (Barbus graellsi.), Haasi barboa (Barbus haasi), karpa (Cyprinus carpio), zamo txiki urraburua (Carassius auratus), alburnoa (Alburnus alburnus), loina (Chondrostoma miegii), tenka (Tinca tinca), ezkailua (Phoxinus phoxinus), tutxoa (Esox lucius), arrain katua (Ameiurus melas), siluroa (Silurus glanis), korrokoia (Chelon labrosus), kolaka (Alosa alosa), platuxa latza (Platichthys flesus) eta gobioa (Gobio gobio).

b) Ornogabeak: karramarro gorria edo paduretako karramarroa (Procambarus clarkii) eta Pazifikoko karramarroa (Pacifastacus leniusculus).

2. Urtero, debekualdiei buruzko xedapen orokorrean aurreko guztietatik zein espezie, subespezie eta populazio harrapa daitezkeen zehaztuko da.

3. Debekatuta dago artikulu honetako lehenengo idatz-zatian ageri ez diren uretako faunako espezie guztiak harrapatzea. Honen ondorioetarako uretako faunakoak dira gutxienez bizi-zikloko fase bat uretan pasatzen duten espezieak.

II. KAPITULUA. LIZENTZIAK ETA BAIMENAK

54. artikulua . Arrantzalizentzia.

1. Nafarroako Foru Komunitateko arrantza-lizentzia agiri pertsonala, besterenduezina eta nahitaezkoa da, foru erkidegoan arrantzan aritzeko gaitzen duena. Ingurumen, Lurraldearen Antolamendu eta Etxebizitza Departamentuak ematen du.

2. Arrantza-lizentzia lortu nahi dutenek eskabidea aurkeztu behar dute eta bertan izen-abizenak, helbidea, jaiotza-data eta NAN zenbakia adierazi Nota de Vigencia.

55. artikulua . Aldi baterako arrantzabaimen berezia.

1. Kasu berezietan, Ingurumen, Lurraldearen Antolamendu eta Etxebizitza Departamentuak aldi baterako arrantza-baimena eman ahalko die Nafarroako Foru Komunitatetik kanpo bizi diren herritarrei. Horretarako ondokoak bete behar dira:

a) Eskatzaileak nortasun agiria eduki behar du.

b) Bizi den lurraldean indarrean dagoen arrantza-lizentzia eduki behar du.

c) Arrantzaren arloko zehapen bat dela bide arrantzan aritzeko gaitasuna kendu ez diotelako adierazpena sinatu behar du.

2. Aldi baterako arrantza-baimenen indarraldia ondoz ondoko bederatzi egun naturalekoa izango da gehienez. Arrantzale bakoitzak aldi baterako bi baimen eskura ditzake arrantza-denboraldi bakoitzean.

III. KAPITULUA. URAK

56. artikulua . Uren sailkapena arrantzari dagokionez.

Nafarroako ibai eta ur masetan arrantzan aritzeari dagokionean, salmonidoen eremuaren eta ziprinidoen eremuaren arteko mugak arrantza antolatzeko plan zuzentzaileetan zehaztuko dira.

57. artikulua . Araubide bereziko urak.

1. Araubide bereziko urak honela sailkatzen dira:

a) Erreserba genetikoak.

b) Arrantzarako debeku lekuak.

c) Hil gabeko arrantza tarteak.

d) Arrantza-esparru naturalak.

e) Arrantza eskolak.

f) Kirol arrantzaren agertokiak.

g) arrantza intentsiboko tarteak.

2. Araubide bereziko ibai tarte edo ur masa bat mota batean edo gehiagotan sailkatuta egon daiteke. Halako kasuetan, arrantza kudeatzeko plan tekniko bakar batek arautuko ditu tarte osoa kudeatu eta ustiatzeko neurriak.

3. Araubide berezia duten tarte guztiak behar bezala seinalatuko dira goiko eta beheko muturretan eta sarbide naturaletan.

58. artikulua . Erreserba genetikoak.

1. Nahasketa genetikorik gabeko populazioak dituzten ibai tarte edo ur masak dira; potentzial genetikoa eta biodibertsitatea iraunarazteko beharrezkoa da populazio horiek babestea.

2. Erreserba genetikoetan arrantzan aritzeko baimenak eman daitezke, baldin eta arrantza kudeatzeko plan teknikoak populazioaren iraupena bermatzen badu. Nolanahi ere, erreserba hauetan ezin da egin iraunkortasuna edo populazioen ezaugarri genetikoak arriskuan jar dezakeen ezer.

3. Ibai edo ur masa bateko tarte bat erreserba genetiko adierazteko populazioaren ezaugarri genetikoak ezartzen dituen eta haren naturaltasuna frogatzen duen txosten teknikoa behar da.

4. Erreserba genetikoen kokaera eta mugak arrantza antolatzeko plan zuzentzaileetan zehaztuko dira.

59. artikulua . Arrantzarako debeku lekuak.

1. Antolamenduari eta kudeaketari lotutako arrazoiengatik arrantza aldi baterako edo behin betiko debekaturik dagoen ibai tarte eta ur masak dira.

2. Arrantzarako debeku leku iraunkorrak arroko arrantza antolatzeko planetan ezarriko dira.

3. Arrantzarako aldi baterako debeku lekuak arrantza kudeatzeko plan teknikoetan edo urteko debekualdiei buruzko xedapen orokorrean ezarriko dira.

60. artikulua . Hil gabeko arrantza tarteak.

1. Ibai tarte edo ur masa hauetan harrapatzen diren arrain guztiak berehala uretara itzuli behar dira, nahiz eta harrapaketaren ondorioz hilda egon, eta beita artifizialak baino ezin dira erabili, eta garranga gabeko amuarekin.

2. Arro bateko arrantza antolatzeko planean haren eremuan mota honetako tarterik egongo den ezarriko da, eta arrantza kudeatzeko plan teknikoan edo debekualdiei buruzko xedapen orokorrean haien kokaera eta mugak zehaztuko dira arroko ibai eta ur masetan.

61. artikulua . Arrantzaesparru naturalak.

1. Ibai tarte edo ur masa hauetan arrantzan aritu ahal izateko, arrantza lizentziaz gain esparruko baimena ere behar da.

2. Arro batean arrantza-esparru naturalik egon daitekeen, gehienez zenbat egon daitezkeen eta non egon daitezkeen arroko arrantza antolatzeko planean zehaztuko da, eta esparruen muga zehatzak, ezarriz gero, arrantza kudeatzeko plan teknikoan finkatuko dira.

3. Arrainak hil gabe harrapa daitezkeen arrantza-esparru naturalak ezar daitezke. Arrantza-esparru naturalak eratzeko eta antolatzeko eta haietan aritzeko erregelamendu honetako I. tituluko V. kapituluan ezarritakoa bete behar da.

62. artikulua . Arrantza eskolak.

1. Ibai tarte edo ur masa hauek berariaz erabiltzen dira arrantzaren irakaskuntza eta hobekuntzarako eta jarduera horren balioen zabalkunderako.

2. Arro batean arrantza eskolarik egon daitekeen arroko arrantza antolatzeko planean zehaztuko da, eta haien kokaera eta mugak arrantza kudeatzeko plan teknikoan finkatuko dira.

63. artikulua . Kirol arrantzaren agertokiak.

1. Ibai tarte edo ur masa hauetan arrantzaleen agerraldiak edo arrantza txapelketak egiten dira, Nafarroako Arrantza Federazioaren babespean.

2. Arro batean kirol arrantzaren agertokirik egon daitekeen arroko arrantza antolatzeko planean zehaztuko da, eta haiek non koka daitezkeen ere bertan finkatuko da. Agertokien muga zehatzak arrantza kudeatzeko plan teknikoan finkatuko dira.

64. artikulua . Arrantza intentsiboko tarteak.

1. Ibai tarte edo ur masa hauetan aldiro-aldiro arrain populazioak indartu egiten dira, arrantzarako legezko neurriak dituzten aleak botaz.

2. Arrantza intentsiboko tarteak arrantza antolatzeko plan zuzentzaile egokian potentzial gutxikotzat jo diren ibai edo ur masen tarteetan soilik ezarri ahal izango dira.

3. Arro bateko arrantza intentsiboko tarteen kokaera eta mugak bertako arrantzako antolatzeko planean zehaztuko dira.

4. Arrantza intentsiboko tarteak arrantza-esparru ere izan daitezke; honelako kasuetan, arrainetan egin nahi dutenek baimen berezia eskuratu behar dute.

65. artikulua . Arrantza pribaturako urak.

1. Arrantza pribaturako urak dira urei buruzko araudian hala sailkatuta daudenak, bai eta, titulartasun publikokoak izanik ere, legezko titulu egokiak direla bide arrantza pribatua dutenak ere. Ur horietan arrantzarako eskubidea titulartasun pribatukoa da eta bere araudi propioari lotuta dago.

2. Arrantza pribaturako uretako arrainak ustiatu ahal izateko nahitaez eratu behar da arrantza-esparru pribatua. Esparrua eratzeko baimena eman aurretik kudeaketa eta aprobetxamendurako plan teknikoa onetsi behar da, eta plan honek erregelamendu honetan xedatutakoa bete behar du.

3. Arrantza pribaturako tarteak eta ur masak behar bezala seinalatuko dira beren sarbide natural guztietan.

66. artikulua . Ur libreak.

1. Arrantzarako ur libreak dira araubide bereziko edo arrantza pribaturako eremu gisa sailkatuta ez daudenak, baldin eta indarreko arauetan ezarritako mugak baino ez badituzte arrantzan aritzeko.

2. Arrantza antolatzeko plan zuzentzaileetan honelako uren aldeak ezar daitezke ezaugarri biogeografikoak eta ekologikoak eta potentzialitateak kontuan harturik.

3. Ezartzen diren tarteak behar bezala seinalizatu behar dira.

67. artikulua . Uren seinalizazioa arrantzari dagokionez.

1. Arrantza askeko uretan eta araubide bereziko uretan, seinalizatu beharreko ibai tarteetako kartelak honelakoak izan behar dira:

a) Materiala: seinalea zurruna izatea eta luze irautea bermatzen duena.

b) Forma eta neurriak: laukizuzena, 33 x 50 cm; %10eko gorabehera onartzen da dimentsio bakoitzean.

c) Garaiera zorutik: metro bat eta 2,5 metro bitartean.

d) Diseinua eta edukia: bi zerrenda egongo dira, bata goian, 6 zentimetro zabal izango dena eta hondo beltzaren gainean Nafarroako Gobernuaren anagrama zuria agertuko dena; bestea behean, eta honetan hondo zuriaren gainean testua agertuko da letra beltzez idatzia.

e) Testua: Kasuan kasukoa: uren araubide berezia, alde piszikolaren mota, erreferentzia edo erabilerak. Euskararen erabilera Euskararen erabilera arautu duen abenduaren 15eko 18/1986 Foru Legean eta hura garatu duen arautegian xedatutakoari lotu behar zaio.

2. Arrantza pribatuko uretako seinalizazio-kartelak aurrean adierazi bezalakoak izan behar dira, salbuespen hauekin: forma laukizuzena izango da, hondoa zuria eta letrak beltzak. Testuan aldea, erreferentzia edo erabilera aipatu behar da.

IV. KAPITULUA. ARRANTZAREN ANTOLAMENDUA

68. artikulua . Arrantza antolatzeko planak Nota de Vigencia.

1. Arrantza baliabide hauek antolatzeko plan zuzentzaileak eginen dira:

a) Ur salmonikolak.

b) Ur geldoak eta ur bilduak.

c) Karramarro aloktonoak.

2. Arrantza antolatzeko plan zuzentzaileek ondokoak ezarriko dituzte gutxienez:

Planaren aplikazio-eremuko ibai tarteen mugak.

Uren zonifikazioa, ezaugarri biogeografikoak eta ekologikoak eta planean aztertutako espezieentzako ahalmena kontuan harturik.

Arrantza baliabideen jarraipenari, kontrolari eta aprobetxamendu iraunkorrari buruzko jarraibideak eta arau orokorrak

3. Arrantza antolatzeko plan zuzentzaileak Landa Garapen, Industria, Enplegu eta Ingurumen Departamentuak prestatu eta Nafarroako Gobernuak onetsiko ditu, Landa Garapen, Industria, Enplegu eta Ingurumeneko kontseilariak proposaturik.

Onetsi ondoren, plan zuzentzaileek ez dute mugaegunik izanen. Hala ere, onesten direnetik 15 urte igarota berrikusiko dira eta, edonola ere, inguruabarrek bultzatuta beharrezkoa den guztietan ere.

69. artikulua . Arroko arrantza antolatzeko planak.

1. Arro bateko arrantza antolatzeko planak bertako arrantza jardueraren eremua ezarriko du. Plan hauek Ingurumen, Lurraldearen Antolamendu eta Etxebizitza Departamentuak prestatuko ditu eta departamentu bereko kontseilariak onetsiko ditu. Onetsi ondoren arroko arrantza antolatzeko planek ez dute mugaegunik izango. Hala ere, indarrean jartzen direnetik hamar urte igarota berrikusiko dira, bai eta inguruabarrek eragiten duten guztietan ere.

2. Arro bateko arrantza antolatzeko planak ondoko alderdiak arautuko ditu bere eremuan:

a) Planaren aplikazio-eremuko ibai tarteen mugak.

b) Uren aldeak ezaugarri biogeografikoak eta ekologikoak eta planean aztertutako espezieen potentzialitateak kontuan harturik.

c) Arrantza baliabideen jarraipenari, kontrolari eta aprobetxamendu iraunkorrari buruzko gidalerroak eta arau orokorrak.

d) Arrantza populazioen hasierako egoera.

e) Tarte bakoitzaren ahalbideak (harrera eta produkzioa), uren aldeak kontuan hartuta.

f) Populazioak kontrolatzeko, haien jarraipena egiteko eta, behar denean, haiek indartzeko programak.

70. artikulua . Arrantza kudeatzeko plan teknikoak.

1. Arrantza kudeatzeko plan teknikoak Ingurumen zuzendari nagusiaren ebazpen bidez prestatu eta onetsiko dira.

2. Arrantza kudeatzeko plan teknikoetan ondokoak ezarriko dira gutxienez:

a) Araubide bereziko tarte edo ur masaren deskripzioa, haren mugak, sarbideak eta aparkalekuak, behar izanez gero.

b) Uraren eta bertako biozenosiaren ezaugarriak.

c) Tarte bat baino gehiago izanez gero, bakoitzaren sailkapena, uraren kudeaketa eta aprobetxamendu moten arabera.

d) Tartea seinalatzeko plana, erabiliko diren seinale motak eta haien esanahia.

e) Harrapatzen ahal diren espezieak, gehieneko ale kopuruak, arrantza kupoak eta arrainen legezko neurriak.

f) Arrantzarako garai, egun eta orduak.

g) Arrantza garaiko egun bakoitzeko gehienez zenbat arrantzale aritu ahalko diren.

3. Arrantza kudeatzeko plan teknikoak bost urtean izango dira indarrean. Hala ere, inguruabarrek berrikuspena eragin dezakete noiznahi.

71. artikulua . Arrantzabaliabideen kontrola eta jarraipena.

1. Salmonidoen kasuan, baliabideen aprobetxamendu iraunkorrerako irizpideak populazioen egoeraren aldian-aldiko eta etengabeko kontrolean oinarrituko dira.

2. Harrapatzen diren izokin atlantiar guztiek Ingurumen, Lurraldearen Antolamendu eta Etxebizitza Departamentuak luzatutako jatorri-gida eduki behar dute.

3. Markatutako arrain bat harrapatzen duten arrantzaleek hura identifikatzen eta kontrolatzen lagundu behar diete Ingurumen Zaintzako langileei.

4. Mikromarka jarrita duen izokin atlantiar bat harrapatuz gero, arrantzaleak hura atxikita dagoen buru-atala eman behar dio Ingurumen Zaintzako langileari.

V. KAPITULUA. ARRANTZA-ESPARRUAK

72. artikulua . Arrantzaesparru publikoak.

Arrantza-esparruak lehiaketa bidez adjudikatzen direnean, baldintza teknikoen plegua eta baldintza ekonomiko-administratiboen plegua Ingurumen, Lurraldearen Antolamendu eta Etxebizitza Departamentuak onetsiko ditu. Adjudikazioa bost urterako izanen da gehienez.

73. artikulua . Arrantzaesparru pribatuak.

1. Arrantza-esparru pribatu bat sortu baino lehen aprobetxamenduaren titularrak arrantza kudeatzeko plan teknikoa prestatu behar du eta Ingurumen, Lurraldearen Antolamendu eta Etxebizitza Departamentuari aurkeztu behar dio, onets dezan. Arrantza kudeatzeko plan teknikoak dokumentu hauek eduki behar ditu:

a) Uren jabetza titulua edo ur horietan arrantzan modu pribatuan egiteko eskubidea frogatzen duen titulua.

b) Arrantza-esparruaren mugak, harako bideak eta aparkatzeko eremuak.

c) Esparrua seinalizatzeko plana, seinale motak eta beraien esanahia.

d) Esparruko uretan bizi den eta aprobetxatu nahi diren uretako faunako espezieak, eta urari lotutako espezieak. Arreta berezia eman behar zaie espezie mehatxatu gisa katalogatutakoei eta arrantzatuko direnei.

e) Populazioen egoera ekologikoaren diagnostikoa.

f) Arrantza-baliabidearen potentzialitatearen azterketa.

g) Arrantzaren aprobetxamendurako plana; gutxienez ondokoak zehaztu behar ditu: arrantzatu ahal diren espezieak, bakoitzaren harrapaketa-kupoak, harrapa daitezkeen arrainen gutxieneko neurriak, arrantzan jardun daitekeen aldiak, egunak eta orduak, arrantza-egun bakoitzean gehienez egon daitezkeen arrantzaleen kopurua, eta arrantzan balia daitezkeen bitartekoak, tresnak eta beitak.

h) Birpopulatzeko plana, beharrezkoa bada.

2. Arrantza-esparru pribatu bat sortzeko, arrantza kudeatzeko plan teknikoaz gainera indarreko arautegian eskatzen diren baimen guztiak aurkeztu behar dira.

3. Arrantza-esparru pribatu bat sortzeko eskaera sei hilabeteko epealdian ebatziko du Ingurumen zuzendari nagusiak. Esparrua eratzeko baimena baldintzapean eman daiteke: eskatzaileak berariaz adierazi beharra bat datorrela ebazpen-espedienteam proposatzen diren aldaketekin. Honelako kasuetan plana aldaketekin batera onetsitzat joko da.

4. Urtero, azaroaren 15a baino lehen, aprobetxamenduaren titularrak esparruaren kudeaketari buruzko memoria aurkeztu behar dio Ingurumen, Lurraldearen Antolamendu eta Etxebizitza Departamentuari, onets dezan. Memoria horretan urteko jarduera eta baimenei eta harrapeketei buruzko estatistikak agertu behar dira, eta hurrengo urteko aprobetxamenduaren plana egin behar da arrantza kudeatzeko plan teknikoan ezarritakoa oinarritzat hartuta.

5. Arrantza-esparru pribatu bat indarrean egon daiteke beraren arrantza kudeatzeko plan teknikoa indarrean dagoen artean.

74. artikulua . Arrantzabaimenak.

1. Arrantza-esparruetan arrantzan egin ahal izateko beharrezkoa izanen da bertako aprobetxamenduaren titularraren baimen idatzia eta behar den lizentzia edo salbuespenezko baimena izatea.

2. Arrantza-baimena pertsonala eta besterenduezina da, eta titularrari ahalmena ematen dio esparruan arrantzan aritzeko, baimenean bertan ezarritako baldintzak betez gero.

3. Arrantza-baimenaren jabeek esparruko postontzi batean utzi behar dute, eskatzen diren inkesta-datuak adierazita, edo bestela arrantzale elkartera eraman dezakete edo erakunde adjudikaziodunera.

4. Arrantza-baimenaren tasak Nafarroako Foru Komunitateko Administrazioaren eta haren erakunde autonomoen tasa eta prezio publikoei buruzko arautegian ezarri dira.

75. artikulua . Arrainak merkaturatzea.

Denboraldian harrapatzen den lehenbiziko izokin atlantiarra bakarrik jartzen ahal da salgai. Izokin horrek erregelamendu honetan aipatutako jatorri-gida eduki behar du.

76. artikulua . Distantziak.

Arrainak ibaietan oztoporik gabe ibil daitezen eta arrantzaleen jarduna bateratzeko eta baliabidearen antolamendua bermatzeko, distantzia hauek ezarri dira:

a) Ibai salmonikoletan, izokinetarako sailkatuta daudenetan, gutxienez 50 metroko tartea utzi behar da arrantzalearen edo bere beitaren eta presen oinarriaren, arrainentzako eskalen eta pasaguneen sarrera edo irteeraren artean Nota de Vigencia.

b) Ibai salmonikoletan, izokinetarako sailkatuta ez daudenetan, eta ziprinidoen ibaietan, gutxienez 10 metroko tartea utzi behar da arrantzalearen edo bere beitaren eta arrainentzako eskalen eta pasaguneen sarrera edo irteeraren artean. Arrainentzako pasagunerik ez duten presetan, gutxienez 50 metroko tartea utzi behar da arrantzalearen edo bere beitaren eta presen oinarriaren artean Nota de Vigencia.

c) Nolanahi ere, elkarri eragozpenik ez sortzeko, bi arrantzaleren artean hika-mikarik sortzen bada, gutxienez 25 metro utzi behar dituzte euren artean.

d) Karramarrotan aritzeko, pertsona bakoitzak gehienez ere 15 metro lineal har ditzake ur-bazterrean baimendutako salabardoko.

77. artikulua . Neurriak.

Harrapa daitezkeen arrainen gutxieneko neurriak arroko arrantza antolatzeko planetan eta arrantza kudeatzeko plan teknikoetan finkatuko dira.

78. artikulua . Birpopulazioak.

Arrantza pribatuko uretan egiten diren birpopulazioak aprobetxamenduaren titularraren kontura izango dira. Urte birpopulazio plana arrantza kudeatzeko plan teknikoan ezarri behar da. Birpopulazioak erregelamendu honetan arrantza-espezietzat jotakoekin bakarrik egin daitezke. Uretara botatzen diren arrainak baimendutako aldeetako ustiategietan hazitakoak izan behar dira eta indarreko legezko eskakizunak bete behar dituzte.

III. TITULUA. KALTEAK ETA ERANTZUKIZUNA

79. artikulua . Ehizarako animaliek kalteak egitea.

1. Ehiza-espezie bateko animaliaren bat harrapatu eta ezbeharra izanez gero, Ingurumen, Lurraldearen Antolamendu eta Etxebizitza Departamentuak administrazio espedientea izapidetuko du erantzukizunik dagoenez argitzeko.

2. Prozedurari ekiteko, interesdunak eskaera aurkeztu behar du; bertan nor den eta non bizi den (jakinarazpenetarako) zehaztu behar du, eta ondoko agiri hauek erantsi behar ditu:

a) Polizia-atestatua edo horren baliokidea edo antzekoa den agiri ofiziala, ezbeharraren arrazoi eragilea aski egiaztatuko duena.

b) Kalteen peritazioa.

c) Ibilgailuaren konponketaren jatorrizko faktura edo kopia konpultsatua.

d) Ibilgailuaren aseguru-polizaren kopia.

e) Ibilgailuaren titulartasunaren egiaztagiria.

f) Transferentzia bidez ordaintzeko eskaeraren jatorrizkoa agiria. Behar bezala eta osorik beteta egon behar du eskaera horrek Nota de Vigencia.

3. Eskaera ezbeharra gertatzen denetik urtebete pasatu baino lehen aurkeztu behar da. Norbaitek kalte fisikoak jasan baditu, urtebeteko epealdia sendatu denetik edo ondorioen larritasuna zehaztu denetik zenbatuko da.

4. Eskaera Ingurumen zuzendari nagusiaren ebazpen baten bidez ebatziko da.

5. Egindako jarduketen ondorioz ezin zehaztu bada bide publikoaren ustiapenaren titularraren erantzukizuna, Ehizari eta Arrantzari buruzko abenduaren 22ko 17/2005 Foru Legeko 86 d) artikuluan xedatutakoarekin bat etorriz, eta errepideen arloko eskumena duen departamentuak adostasun txostena egin ondoren, espedientea departamentu horri bidaliko zaio, behar diren ondorioak izan ditzan, eta gero interesdunari jakinaraziko zaio.

Ingurumen arloko eskumena duen departamentua eta errepideen arloko eskumena duena bat ez badatoz bide publikoaren ustiapenaren titularraren erantzukizunaren inguruan, Nafarroako Gobernuak ebatziko du auzia.

6. Prozedura abiarazten denetik sei hilabete igarota ebazpenik eman eta jakinarazi ez bada, Administrazioak partikularrari kalte-ordainak ematearen aurka egin duela pentsatu ahal izango da.

Gobierno de Navarra

Contacte con nosotros | Accesibilidad | Aviso legal | Mapa web