LEXNAVARRA
153/2001 FORU DEKRETUA, EKAINAREN 11KOA, TRIBUTUEI BURUZKO FORU LEGE OROKORRAREN XEDAPENAK GARATZEN DITUENA, NAFARROAKO FORU KOMUNITATEKO ADMINISTRAZIOAREN ZERGA ARLOKO ARAU-HAUSTE ETA ZEHAPENEN ARLOAN 
BON N.º 73 - 15/06/2001; corr. err., BON 25/07/2001, BON 24/12/2001
I. KAPITULUA. XEDAPEN OROKORRAK
- 1. artikulua. Aplikazio eremua.
- 2. artikulua. Erantzukizunetik salbuestea.
- 3. artikulua. Borondatezko erregularizazioak zehapen esparruan dakartzan ondorioak.
- 4. artikulua. Jarduketak Ogasun Publikoaren aurkako delituetako eta harekin lotutako beste hainbat delitutako kasuetan .
- 5. artikulua. "Mortis causa" oinordetzetan zerga zehapenak iraungitzea.
II. KAPITULUA. ZERGA ARLOKO ARAUHAUSTE ARINENGATIK DIRU ZEHAPENAK JARTZEA
- 6. artikulua. Arauhauste arinak, arauhauste larriak eta mailaketa irizpideak.
- 7. artikulua. Zehapena jartzea aitorpena aurkeztu beharra urratzeagatik .
- 8. artikulua. Tributuei buruzko Foru Lege Orokorraren 103. eta 104. artikuluek aipatzen duten zergaren ondorioetarako garrantzia duten datuak, txostenak eta aurrekariak jakinarazi beharra hausteagatiko zehapenak .
- 9. artikulua. Kontabilitate eta erregistro arloko betebeharrak ez betetzeagatiko zehapenak .
- 10. artikulua. Zehapenak jartzea enpresa eta lanbide jardueren inguruko datuak, zentsuari begira garrantzizkoak direnak, emateko obligazioa ez betetzeagatik.
- 11. artikulua. Zehapenak jartzea faktura egin eta emateko eta zerga kuoten jasanarazpena kontsignatzeko obligazioa urratzeagatik.
- 12. artikulua. Zehapenak jartzea identifikazio fiskaleko zenbakia erabili eta jakinarazteko obligazioa ez betetzeagatik.
- 13. artikulua. Zehapenak jartzea Zerga Administrazioaren lanari aurre egin, aitzakiak jarri edo uko egiteagatik.
- 14. artikulua. Mailaketa irizpideak.
III. KAPITULUA. ZERGA ARLOKO ARAUHAUSTE LARRIENGATIK DIRU ZEHAPENAK JARTZEA
- 15. artikulua. Arauhauste larrien diru zehapenak mailakatzeko irizpideak.
- 16. artikulua. Zerga arloko arauhausteetan berregilea izatea.
- 17. artikulua. Zerga administrazioaren ikertze lanari aurre egitea, uko egitea edo oztopoak jartzea .
- 18. artikulua. Arauhaustea egitean iruzurrez edo bitarteko pertsona baten bidez jokatzea.
- 19. artikulua. Administrazioari zerga zorra zehazteko behar dituen datuak ezkutatzea.
- 20. artikulua. Adostasuna erregularizazio proposamenekin arauhauste larrietan .
- 20.bis artikulua. Adostasuna zehapen proposamenekin arauhauste arinetan .
V. KAPITULUA. DIRUZKOAK EZ DIREN ZEHAPENAK JARTZEA
1. ATALA. DIRUZKOAK EZ DIREN ZEHAPENAK
- 21. artikulua. Diruzkoak ez diren zehapenak.
- 22. artikulua. Mailakatzeko irizpideak.
- 23. artikulua. Kalte ekonomikoak.
VI. KAPITULUA. ZERGA ARLOKO ZEHAPENAK EZARTZEKO PROZEDURA
1. ATALA. ZEHAPENAK JARTZEKO ORGANO ESKUDUNAK
- 24. artikulua. Diruzehapenak ezartzeko eskumena duten organoak .
- 25. artikulua. Arauhauste larriengatik diruzko zehapenak jartzeko organo eskudunak .
- 26. artikulua. Diruzkoak ez diren zehapenak jartzeko organo eskudunak.
2. ATALA. ZEHAPEN PROZEDURAREN NONDIKNORAKOAK
- 27. artikulua. Prozedura bereizia.
- 28. artikulua. Hasiera.
- 29. artikulua. Ordezkaritza.
- 30. artikulua. Instrukzioa.
- 31. artikulua. Izapidearen egoera eta arduradunen identifikazioa.
- 32. artikulua. Interesatuei entzunaldia ematea.
- 33. artikulua. Izapide laburtua.
- 34. artikulua. Ebazpena.
- 35. artikulua. Ebazpena emateko epea .
- 36. artikulua. Diruzkoak ez diren zehapenak.
VII. KAPITULUA. ZEHAPENEN BETEARAZPENA ETETEA
- 37. artikulua. Zehapenen exekuzioa etetea .
- 38. artikulua. Administrazio bidean erabakitako zehapenaren betearazpenaren etenaldia mantentzea.
- Xedapen Gehigarria. Zerga kudeaketa organoek emandako behinbehineko likidazioak. Ofiziozko behinbehineko likidazioaren proposamena ofizioz bidaltzea eta zehapena ezartzeko proposamena aldi berean bidaltzea .
- Azken Xedapenak Lehena
- Azken Xedapenak Bigarrena
Tributuei buruzko Foru Lege Orokorra funtsezko araua da Zerga administrazioaren eta tributudun edo tributupekoen arteko harremanen esparrua zehazteko. Tributupekoen eskubide eta bermeen artean, garrantzi berezia dute Administrazioak zehapenak jartzeko duen eskumenari loturikoek.
Hori helburu, eta zerga arloan segurtasun juridikoa sendotzearren, aipatu Foru Legeak ezarri zuen, zerga arloko zehapenak jartzeko, espediente berezi bat ireki beharra zegoela, subjektu arau-hauslearen zerga egoera egiaztatu eta ikertzeko irekitzen den espedientetik bereizita. Bestalde, tributupekoak errekurtsoa edo erreklamazioa aurkeztuz gero, zerga arloko zehapenen betearazpena geldiarazi behar dela ezarri zuen, harik eta administrazio bidean irmo bilakatu arte, inolako bermerik aurkeztu behar izan gabe gainera.
Printzipio horiek eta Tributuei buruzko Foru Lege Orokorrean bildu diren beste printzipio orokorrago batzuk aplikatuko badira, alegazioak aurkezteko eskubidea edo prozeduretan entzunaldia emateko tramitea, esate baterako, beharrezkoa da Legearen erregelamenduzko garapena egitea.
Bestalde, zerga arloko zehapen prozedura arautu aurretik, Foru Dekretu honetan, zehapenak ezartzeko mailaketa bat egiteko irizpideen erregelamenduzko garapena egin da, zehapenak automatikoki aplikatu ez daitezen, izan ere, administrazio organoei behar diren baliabideak eskaintzen zaizkie zehapena jaso dezakeen jokabidearen larria neurtzeko, kasuan-kasuan.
Foru Dekretu honek 38 artikulu ditu, sei kapitulutan bilduak, xedapen gehigarri bat eta bi azken xedapen.
Lehenengo Kapituluak arauaren aplikazio eremua finkatzen du eta zenbait xedapen orokor garatzen ditu.
Foru legeetan ezarritako zerga arloko zehapenen ordezko aplikazioa eginen da haietan zehapenak ezartzeko prozedura berezirik aurreikusten ez denean.
Garatzen diren xedapen orokorrak lau gairen ingurukoak dira:
-Zerga arloko arau-hausteetan erantzukizuna kentzea, zerga eginkizun eta betebeharrak betetzeko behar bezalako ardura jarri denean.
-Zehapenik ez jartzea jarduketen hasieraren jakinarazpena egin baino lehen zerga egoera erregularizatzen dutenei.
-Zerga administrazioak egin diren arau-hausteak Ogasun Publikoaren aurkako delitu izan daitezkeela uste duen kasuetan segitu beharreko prozedura.
-Subjektu arau-hausleak, hil ondoren, zehapenik ez transmititzea.
II. Kapituluan Tributuei buruzko Foru Lege Orokorrean berez tipifikaturiko arau-hauste arin bakoitzari dagozkion zehapenak arautzen dira, hala nola bakoitzari aplikatu beharreko mailaketa irizpideak.
Lehenik, 6. artikuluan, arau-hauste arinen, arau-hauste larrien eta mailaketa irizpideen arteko mugak ezartzen dira. Printzipio nagusia hauxe da: zerga eginkizun edo betebeharrak ez betetzea arau-hauste arina da, non ez den arau-hauste larria edo arau-hauste larri bati dagokion zehapena zehazteko mailaketa irizpide gisa erabiltzen.
7. artikuluan aitorpenak aurkeztu beharra ezartzen duen araua urratzearen ondoriozko zehapenak arautzen dira.
Arau-hauste horri 1.000 pezetatik 150.000 pezeta bitarteko isuna dagokio. Arau-hauste hori generikoa edo hondarrekoa izan daiteke, 8. artikulutik 12.era bitartekoetan zehazten diren arau-hausteen aldean. Hortaz, jokabide bat 7. artikuluan ezarritakoari jarraikiz edo 8.etik 12.era bitarteko artikuluetan ezarritakoari jarraikiz zehatu daitekeenean, lehenik, azken horretan adierazitakoaren arabera zehatuko da.
Horrelako arau-hausteak mailakatzeko, ondoko irizpide hauek hartuko dira kontuan: zerga arloko arau-hausteetan berregilea izatea, eginkizun hori nork bere kasa ez betetzea edo eginkizun horretan atzeratzea, hala nola eginkizun hori ez betetzeak zerga kudeaketaren eraginkortasunerako duen garrantzia.
8. artikuluak zerga ondorioetarako datuak, txostenak edo aurrekariak eman beharra ezartzen duen araua hausteari dagozkion zehapenak arautzen ditu.
Eginkizun hori ez betetzeagatik 1.000 pezetatik 200.000 pezeta bitarteko isuna jarriko da, eman ez den, faltsutu edo osorik adierazi ez den datu bakoitzeko. Horren ondorioetarako, eginkizun hori bete ez dela ondorioztatuko da Administrazioak eskatu eta epez kanpo aurkezten denean ere.
Mailaketarako irizpideak aitorpenak aurkeztu beharra urratzeagatik 7. artikuluan finkatu zehapenetarako aipatu diren berberak dira.
9. artikuluak kontabilitate edo erregistro lanen inguruko betebeharrei buruzko arau-hausteetarako zehapenak ditu aztergai.
Horietarako aurreikusten diren zehapenak 25.000 pezetatik 1.000.000 pezeta bitartekoak dira.
Aintzat hartzen diren mailaketa irizpideak honako hauek dira: zerga arloko arau-hausteetan berregilea izatea eta bete gabe utzi den eginkizunak zerga kudeaketaren eraginkortasunerako duen garrantzia. Gainera, kontabilitatea edo liburu edo erregistro fiskalak eramateko eginkizunean atzeratzeagatiko arau-haustea ere atzerapen horren arabera mailakatuko da.
10. artikuluan enpresa edo lanbide jardueren gaineko datuak, erroldak egiteko garrantzitsuak direnak, eman beharra urratzeagatik ezar daitezkeen isunak arautzen dira.
Eginkizun hori ez betetzeagatik 1.000 pezetatik 150.000 pezeta bitarteko isuna jar daiteke.
Hemen ere, zehapenak mailakatzeko, zerga arloko arau-hausteetan berregilea izatea, nork bere kasa ez betetzea, eginkizun horretan atzeratzea eta eman gabe utzi diren datuen garrantzia hartuko dira kontuan.
11. artikuluan faktura egin eta emateko beharkizuna eta erasandako zerga kuotak adierazteko eginkizuna ez betetzeari edo eginkizun hori oker betetzeari dagozkion zehapenak arautzen dira.
Aurreikusitako zehapena 1.000 pezetatik 150.000 pezeta bitarteko isuna da, arau-hausteek ekarri dituzten eragiketa guztien kontraprestazioen zenbatekoaren araberako muga bat jarrita betiere. Arauaren urraketa bakarra izan dela ulertuko da, baldin eta ez-betetze orokorra izan bada edo Administrazioak jakiterik ez badu zenbat eragiketak ekarri duten arau-hauste arin bat. Horrelakoetan, 25.000 pezetatik hasi eta aldi horretan egindako eragiketen bolumenaren % 5era bitarteko isuna ezarriko zaio.
Arau-hausteak mailakatzeko honako irizpide hauek hartuko dira kontuan: zerga arloko arau-hausteetan berregilea izatea, iruzurbidea erabiltzea eta, zerga kudeaketaren eraginkortasunari begira, bete gabe utzi den eginkizunak duen garrantzia.
12. artikuluak identifikazio fiskaleko zenbakia erabili eta jakinarazteko beharra ez betetzetik datozen arau-hausteak ditu aztergai.
Orohar, 1.000 pezetatik 150.000 pezeta bitarteko isunak aurreikusi dira. Arau partikular batzuk ere ezartzen dira, eginkizun hori modu orokorrean urratzen den kasuetarako eta ez-betetze orokor hori enpresa edo lanbide jarduera baten aribidean gertatzen denerako.
Kreditu entitateetarako, zehapen berariazkoak aurreikusten dira, kontu edo eragiketa bakoitza identifikatu beharra, eramailearendako txekeak igorpendu edo ordaintzen direnean IFZ jartzearen beharra eta IFZ aurkezten ez duten titularren eragiketen inguruko aitorpenak aurkeztu beharra urratzen diren kasuetarako.
Kontuan hartzen diren mailaketa irizpideak zerga arloko arau-hausteetan berregilea izatea eta bete gabe utzi den eginkizunak zerga kudeaketaren eraginkortasunerako duen garrantzia izanen dira.
13. artikuluan zerga administrazioaren jarduketari aurre egin, aitzakiak jarri edo uko egiteagatik jar daitezkeen isunak arautzen dira.
Foru Dekretu honen 6. artikuluan adierazi den irizpidea oinarri, arlo honetako arau-haustea arintzat hartuko da hutsegite hori arau-hauste larrien zehapenak mailakatzeko irizpide ez denean, arau honen 17. artikuluan xedatutakoaren arabera.
13. artikuluan, gainera, horrelako arau-hausteen inguruabarrak zehazten dira, izan ere, bertan ongi bereizten dira ikuskapen edo dirubilketa arduradunen errekerimenduei tributupekoen muzin egitearen ondoriozko arau-hausteak eta gainerako kasuak, kudeaketa fasekoak, ikuskapen fasekoak edo dirubilketa fasekoak izan.
Lehenengo kasuan isuna 50.000 pezetatik 1.000.000 pezeta bitartekoa izanen da eta bigarrenean 1.000 pezetatik 150.000 pezeta bitartekoa.
Arau-haustea mailakatzeko honako irizpide hauek hartuko dira kontuan: zerga arloko arau-hausteetan berregilea izatea, arau-hauste horrek zerga kudeaketaren eraginkortasunerako duen garrantzia eta zenbat errekerimenduri egin zaion muzin.
Azkenik, eduki bereko hainbat errekerimendu jarrairi muzin eginda ere, arau-hauste bakartzat hartuko dela ezartzen da.
14. artikuluan zerga arloko arau-hauste arinak mailakatzeko aplikatu daitezkeen irizpideak arautzen dira.
Foru Dekretuan, hala ere, ez dago zehaztua kasuan-kasuan zenbateko igoera aplikatu behar zaion zehapenari, izan ere, Tributuei buruzko Foru Legean arautu diren zehapenak askotarikoak dira eta han agertzen diren tarteak ere zabalak.
Arauan, beraz, arau-hauste mota bakoitza mailakatzeko aplikatu daitezkeen irizpideak zehazten dira eta horietako bakoitza noiz gertatu den ondorioztatzeko baldintzak, besterik ez, zehapenaren zenbateko zehatza kasuan-kasuan aztertzeko bidea ematen baita, Foru Legean goitik eta behetik ezarritako zenbatekoen arabera eta mailakatzeko aplikagarri diren irizpideen arabera. Helburua mailaketa irizpideen aplikazio subjektiboa bultzatzea da, jarri beharreko isuna organo zehatzaileak erabaki dezan, kasuan kasuko inguruabarrak ikusita.
Mailaketa irizpideak gutxieneko diru-zehapenaren gainean aplikatuko dira, bata bestearen atzetik.
Zerga arloko arau-hausteetan berregilea dela deklaratzeko, hauxe eskatuko da: espedientearen xede den arau-haustea egin aurreko bost urteetan, arau-hauslea administrazio ebazpen irmoaren bidez zehatua izatea, zerga betebehar eta eginkizunak urratzeagatiko arau-hauste arin bategatik.
Iruzurbiderik erabili ote den zehaztearen ondorioetarako, faktura, egiaztagiri edo bestelako agiri faltsu edo faltsutuak iruzurbidetzat hartuko dira. Kontabilitatean irregulartasun nabarmenak izatea, honen ondorioetarako, ez da iruzurbidetzat hartuko, irregulartasun horiek izatea, berez, arau-hauste arin tipo bat delako.
Formazko eginkizunak, kontabilitate edo erregistro arlokoak edo Zerga administrazioari lagundu eta informazioa ematekoak ez betetzeak zerga kudeaketan duen eragina kalkulatzearen ondorioetarako, formazko eginkizun eta betebeharrak eta Administrazioarentzat garrantzitsuak diren datuak bereizten dira. Batzuk nahiz besteak zerrenda itxietan ematen dira.
III. Kapituluak, "Zerga arloko arau-hauste larriengatik diru zehapenak jartzea" izenekoak, bi atal ditu, non hurrenez hurren mailakatzeko irizpideak eta egoera erregularizatzeko proposamenarekiko adostasuna agertzeko bidea biltzen diren.
1. atalak 15.etik 19.era bitarteko artikuluak hartzen ditu.
15. artikuluan aplikatu daitezkeen mailaketa irizpideak zerrendatzen dira. Arau-hausteen kasuan gertatu bezala, hauek ere gutxieneko diru-zehapenaren gainean aplikatzen dira, bata bestearen atzetik.
Artikulu honetan, orobat, isunetan ezar daitezkeen kopururik altuenak finkatzen dira:
-Orohar, % 150, zerga kuotaren eta, kasua bada, Tributuei buruzko Foru Legean ezarritako errekarguen gainean, bildu gabe utzitako kopuruen gainean edo modu desegokian lortutako onuren edo itzulketen gainean.
-Etorkizuneko aitorpenen zerga oinarrian konpentsatu edo kentzeko diren kopuru, gastu edo kontusail negatiboak zehaztearen ondoriozko arau-hausteetan edo gardentasun fiskalaren araubidea duten entitateek egindako arau-hausteetan, arau-haustea sortu duten kontzeptu guztien % 150.
16. artikuluan zehapenaren mailaketa egiten da, zerga arloko arau-hausteetan berregilea den ala ez kontuan hartuz.
Arau-hauste arinetan bezala, irizpide hori aplikatuko da arau-hauslea espedientearen xede den arau-haustea egin aurreko bost urteetan zehatua izan baldin bada.
Egiaztapen edo ikertze lan beraren ondoriozko arau-hauste larri guztiak aurrekari bakartzat hartuko dira. Ofiziozko behin-behineko likidazioetatik datozen arau-hauste larriak ez dira aurrekaritzat hartuko, baldin eta zerga-mota eta zergaldi berari baldin badagozkio.
Isuna % 10 igoko da tributu mota berari dagokion zehapen bakoitzagatik eta % 5 beste tributu bati baldin badagokio; gutxieneko igoera % 10ekoa izanen da eta gehienekoa % 50ekoa.
17. artikuluan zerga administrazioaren ikertze lanei aurre egin, oztopoak jarri edo uko egitearen irizpidearen nondik-norakoak arautzen dira.
Ikertze lanari aurre egite, uko egite edo trabak jartze hori eta zerga administrazioaren jarduketaren aurkako jokabidea bereizteko, zeina Tributuei buruzko Foru Lege Orokorrean arau-hauste arintzat hartu baita, artikulu honetan propio adierazten da errekerimendu horiek erresistentzia, uko edo trabak erakusten dituen subjektuaren zerga egoera erregularizatzeko egiaztapen eta ikerketa lanen barruan egin behar direla eta lan horien ondorioz agerian gelditu behar dela arau-hauste larriak egin direla.
Ezarri beharreko isuna % 10 eta 50en artean igoko da, zehazten diren irizpide batzuen arabera. Igoera ehuneko hori zehazten da, eta tarte txiki bat uzten da zehatu beharreko arau-haustearen beraren inguruabarren arabera aplikatzeko.
18. artikuluan zehapena nola mailakatu azaltzen da, arau-haustean iruzurbideak erabiltzen direnean eta arau-haustea bitarteko pertsona baten bidez egiten denean.
Zehapenari aplikatu beharreko ehunekoak zehazteko, inguruabar horiek banaka aztertuko dira.
Kontabilitatean irregulartasun nabarmenak agertzea eta faktura, egiaztagiri edo beste agiri edo euskarri faltsu edo faltsutuak erabiltzea iruzurbidetzat hartuko da.
Kontabilitatea oker eramatea noiz den irregulartasun nabarmena zehazten da, izan ere, inguruabar hori gertatu dela ondorioztatuko da, baldin eta irregulartasun hori arau-hauste larri bat egiteko bide izan bada. Horren ondorioz, jokabide hori ezin daiteke arau-hauste arintzat sailkatu. Horrela, jokamoldeen kalifikazioa arau-hauste larriak eta arinak mailakatzeko irizpide gisa mugarritzen da.
Kasu horretan zehapenaren igoera % 20 eta 45 artekoa izanen da.
Faktura, ordainagiri edo beste dokumentu edo euskarri faltsu edo faltsutuak erabiltzearen kasua garatzen da. Horrelakoetan, zehapena % 25 eta 40 bitarte igoko da.
Bitarteko pertsonen kontzeptua ere zehazten da. Zehapena % 35 eta 50 bitarte igoko da.
19. artikuluan, tributu zorra zehazteko behar diren datuak Administrazioari zenbateraino ezkutatu zaizkion, horren arabera mailakatzen dira zehapenak.
Administrazioak beste hirugarren batzuen aitorpenen bitartez edo subjektu arau-hausleak berak beste zerga kontzeptu batzuen aitorpenen bitartez datuak ezagutzerik izanda ere, datu-ezkutatze hori gertatu dela ondorioztatuko da.
Ezartzen da, halaber, jokabide bat arau-hauste larritzat hartuz gero, ezin izanen dela jokabide hori egindako arau-hauste larriaren larrigarritzat hartu. Horrelakorik ezinen da ulertu kontabilitate liburuak edo liburu edo erregistro fiskalak oker eramateagatik iruzurbideak erabili izanaren irizpidea aplikatzea bidezkoa denean eta aurkeztutako aitorpenak gorabehera nabarmenik ez duen kontabilitatea leial islatzen duenean. Bestela, jokabide zigorgarri bakar batek, hots, kontabilitatea oker eramateak, zehapena mailakatzeko bi irizpide ezberdin erabiltzea ekarriko luke.
Zehapenaren ehunekoa 10 eta 25 puntu bitartean gehituko da, subjektu urratzaileak ezkutatu dituen datuek tributu zorra zenbat murrizten duten kontuan hartuz.
III. Kapituluko 2. atalean, zeinak artikulu bakarra baitu, hots, 20.a, subjektu arau-hausleak, egiten zaion proposamenaren aurrean, erakusten duen adostasunaren ondorioak arautzen dira.
Adostasuna dagoela ondorioztatzeko, erregularizazio proposamenarekin eta zehapen proposamenarekin ados egon beharko du eta, horren ondorioz, zerga arloko arau-hauste larriagatik jarri beharreko diru zehapenaren kopurua % 40 murriztuko da.
Murrizketa hori aplikatuko da zehapenari mailakatze irizpide guztiak aplikatu ondoren ateratzen den kopuruaren gainean, lehen aipatutako gehieneko kopurua, hots % 150, hartuta. Hortaz, adostasunarengatiko murrizketaren aplikazioa, beti, efektiboa izanen da.
Gerta liteke proposamenen zati bakar batekiko adostasuna erakustea. Horrelako kasuetan, erregularizazio proposamenaren zein zatirekin dagoen ados, murrizketa zati horretantxe bakarrik aplikatuko da.
Kudeaketako zehapen prozeduran ez da beharrezkoa izanen likidazio eta zehapen proposamenekiko adostasuna propio adieraztea, berez ondorioztatuko baita, salbu eta errekurtso edo erreklamazioa aurkezten bada.
IV. Kapituluak "Diruzkoak ez diren zehapenak jartzea" izena du, eta bi atal.
Lehenbizikoan, 21. artikulua, diruzkoak ez diren zehapenak definitu eta bereizten dira. Gainera, zerga batzuetan onura edo pizgarriak izateko eskubidea galtzea ekarriko duen zehapenak zein zergatan duen eragina adierazten da.
2. atalean horrelako zehapenak mailakatzeko erabiliko diren irizpideak arautzen dira. Arau-hauste arinen zehapenak eta arau-hauste larrien zehapenak bereizten dira.
Arau-hauste arinetan, laguntzeko eginkizuna ez betetzeak zerga kudeaketaren eraginkortasunerako duen garrantziaren irizpideari begiratzen zaio eta arau-hauste larrietan, aldiz, ondoko hauei: zerga administrazioaren ikertze-lanari aurre egitea, uko egitea edo oztopoak jartzea, zehapena egiteko iruzurbideak erabiltzea edo bitarteko pertsonen bidez jokatzea eta eragindako kalte ekonomikoa.
Kalte ekonomikoa kalkulatzeko, 23. artikuluak aipatzen du bildu gabe gelditu den kopuruari edo oker lortutako itzulketetan jasotako diru-kopuruari begiratuko zaiela.
V. Kapituluak zehapenak jartzeko prozedura arautzen du. Bi atal ditu: lehenean, 24. artikulutik 26.era, zehapenak jartzeko eskumena duten organoak zeintzuk diren aipatzen da, eta bigarrenean, prozeduraren nondik-norakoak zehazten dira.
Organo eskudunei dagokienez, honako hauek bereizten dira:
-Arau-hauste arinen zehapenak, Ekonomi eta Ogasun kontseilaria.
-Arau-hauste larrien zehapenak, likidaziorako administrazio egintzak eman behar dituzten organoak.
-Diruzkoak ez diren zehapenetan, Nafarroako Gobernua da Estatuko Administrazioaren organo eskuduna.
Lehenbiziko bi kasuetan eskuordetza egiteko aukerabidea propio adierazten da.
Zehapen prozeduraren garapenari dagokionez, hona ezaugarri nagusiak:
-Zehapen espedientea subjektu arau-hauslearen zerga egoera egiaztatu eta ikertzeko irekitzen den espedientetik bereizita eginen da, beste espediente independiente batean.
-Espedientea ebazteko, gehienez ere, sei hilabeteko epea izanen da, zehapen espedientea hasi dela interesatuari jakinarazten zaionetik.
-Espedientea izapidatzen duen funtzionario eskudunak edo kasuan kasuko administrazio unitateko titularrak irekiko du ofizioz.
-Espedientearen hasieraren berri interesatuei emanen zaie.
-Egiaztatu eta ikertzeko espedienteko datuak kontuan hartuz gero, datu horiek zehapen espedientean bildu beharko dira modu formalean.
-Adminstrazioari dagokio arau-hauslearen errua zehazteko inguruabarrak frogatzea.
-Espedientea izapidatzen duen funtzionarioak ebazpen proposamena eginen du. Proposamena interesatuei jakinaraziko zaie eta alegazio epe bat irekiko da.
-Instruktoreak organo eskudunari igorriko dio ebazpen proposamena, agiri eta alegazioekin batera.
-Organo eskudunak ebazpen arrazoitua emanen du eta interesatuei jakinaraziko die.
-Zehapena jartzeko egintzaren aurka errekurtsoa jartzen ahalko da. Tributu kuotaren aurka ere errekurtsoa jartzen bada, bi errekurtsoak batuko dira.
Zehapen espedientea hasten denean, organo eskudunak zehapen proposamena egiteko behar den guztia baldin badu, prozedura laburtua erabiliko da.
Kasu horretan, honako izapide hau erabiliko litzateke:
-Proposamena espedienteari hasiera emateko erabakiari erantsiko zaio.
-Proposamena interesatuei jakinaraziko zaie eta alegazioak aurkezteko hamabost eguneko epea finkatuko da.
-Tributu Ikuskapenak izapidatzen dituen prozeduretan, haren Erregelamenduan xedatutakoari segituko zaio.
-Kudeaketa faseko prozeduretan isileko ebazpena emateko bidea ixten da, bai alegazioak aurkezten ez direnean, bai, halaber, horrelakoak aurkezteari propio uko egiten zaionean.
36. artikuluan diruzkoak ez diren zehapenen prozeduraren ezaugarri bereziak biltzen dira.
VI. Kapituluan, 37 eta 38. artikuluetan, zehapenen betearazpena eteteko bidea arautzen da.
Zehapenen betearazpena automatikoki eten eginen da errekurtsoa edo erreklamazioa aurkeztearekin batera, bermerik jarri behar izan gabe, zehapenak administrazio bidean irmo bilakatu arte.
Eteten diren zehapenek berandutza korrituak sortuko dituzte.
Administrazioarekiko auzi-errekurtsoa aurkezteko epea amaitu arte ez da premiamendu bidea erabiliko.
Errekurtsoa jarriz gero, eta horrekin batera betearazpena etetea eskatu eta bermea eskaintzen bada, premiamendu prozedura etenda utziko da, epaileek zer erabaki ere.
Kudeaketako likidazio prozedura arautzeko xedapen gehigarri bat erantsi da. Bi likidazio bide ezartzen dira: bata, proposamenean berean zehapena jartzea aurreikusia dagoen likidazioetarako, eta bestea zehapenik izanen ez duten likidazioetarako.
Azken xedapenak arauaren indarra hartzea finkatzen du.
Dekretuak indarra hartu aurretik egindako arau-hausteak ez dira kontuan hartuko zerga arloko arau-hausteetan berregilea izatearen ondoriozko mailakatze irizpidea zehazteko ondorioetarako.
Horrenbestez, Ekonomi eta Ogasun kontseilariak proposatuta eta Nafarroako Gobernuak ekainaren hamaikan egindako bilkuran hartutako erabakiarekin bat,
DEKRETATU DUT:
I. KAPITULUA. XEDAPEN OROKORRAK
1. artikulua . Aplikazio eremua.
Tributuei buruzko Foru Lege Orokorreko 69. artikuluan zehazturiko zerga zehapenak jartzeko orduan, Tributuei buruzko Foru Lege Orokorreko 71. artikuluan eta Foru Dekretu honetan finkatzen diren prozedura arauak eta mailakatze irizpideak aplikatuko dira.
Foru Dekretu honetan ezarritakoa aplikatuko da, orobat, foru legeetan aurreikusten diren bestelako tributu arloko zehapenak jartzean, berariazko araurik batere ez dagoenean edo horietako batzuk besterik ez dagoenean.
2. artikulua . Erantzukizunetik salbuestea.
Tributuei buruzko Foru Lege Orokorreko 66.4.d) artikuluan xedatutakoaren ondorioetarako:
-Aitorpen oso eta egiazkotzat hartuko da subjektu pasiboaren zerga zorra zehazteko beharrezkoak diren datu guztiak erakusten dituena.
3. artikulua . Borondatezko erregularizazioak zehapen esparruan dakartzan ondorioak.
Tributuei buruzko Foru Lege Orokorreko 52.3 artikuluan aurreikusitako ondorioetarako, zerga arloko arau-hausteak direla-eta ez zaio zehapenik jarriko Zerga Administrazioak erregularizatu beharreko zorrak zehazteko jarduketak hasi direla jakinarazi baino lehen zerga egoera erregularizatzen duenari. Borondatezko erregularizazio hori egiaztapen lanak bukatu ondoren ere egiten ahalko da, baita hasitako jarduketen eremuaren barnean ez dauden zerga zorraren elementuei dagokienez ere.
Baldin eta subjektu pasiboak, atxikitzaileak edo konturako sarrerak egitera behartua dagoenak lehen aipatutako jakinarazpena jaso ondoren diru-sarrerarik egiten badu, sarrera horiek egiten den likidazioaren konturakoak izanen dira, eta ez dute eragotziko zehapenik jartzea, likidaziotik ateratzen den zerga zorraren eta jakinarazpenaren aurretik sartutako zenbatekoen arteko diferentziaren kontura.
4. artikulua . Jarduketak Ogasun Publikoaren aurkako delituetako eta harekin lotutako beste hainbat delitutako kasuetan .
1. Zerga administrazioak uste badu zergapekoaren portaera Zigor Kodearen 305. edo 305. bis artikuluek delitutzat jotzen dutenetakoa dela, erruduntasunaren testigantza jurisdikzio eskudunera igortzeak edo espedientea Fiskaltzara igortzeak ondorio hauek sortuko dituzte:
a) Hasiera eman ez bazaio zehapen prozedura bati egitate horiengatik, zerga Administrazioak ez dio hasiera emango.
b) Prozedura horri hasiera eman bazaio, zerga Administrazioak ez dio jarraipenik emango tramitazioari, eta amaitutzat emango da.
c) Egitate berberengatik zerga-zehapena jarri bada, exekuzioa bertan behera geratuko da.
Ondorio hauek gertatuko dira zerga Administrazioak dakienean egitate berberengatik prozesu penal bat garatzen ari dela.
Atal honetan ezartzen dena beste zehapen prozedura bat hasteko aukera galarazi gabe ulertuko da, edo, hala badagokio, aldez aurretik bertan behera geratu den zehapen administratiboaren exekuzioa berriz hastea galarazi gabe, delitu zantzurik ikusi ez den kasuetan, auzitegiek frogatutzat ematen dituzten egitateekin bat.
Agintari judizialek kondena-epaia emanez gero, ezin izanen da administrazio zehapena jarri egitate berberengatik.
2. Zerga administrazioak uste badu egindako arau-haustea Zigor Kodearen 310. artikuluak delitutzat jotzen dutenetakoa dela, aurreko artikuluak ezartzen duenari jarraikiz jardungo da, eta ezin izango da prozedurari hasiera eman edo jarraitu gertaera berberengatik zehapenak ezartzeko, eta gertaera hauek ez dira aintzat hartuko egindako zerga arloko arau-hausteak kalifikatzeko.
Atal honetan aurreikusitako kasuetan, delitua dagoenik ikusten ez bada, zerga Administrazioak zehapen prozedura administratiboari hasiera ematen ahal dio, epaitegiek frogatutzat eman dituzten egitateekin bat.
3. Zerga administrazioak uste badu atzemandako egitateetan Zigor Kodearen 306. artikulutik 308. artikulura aurreikusten diren delituetako bat egin delako zantzuak badirela, eginbideetan jasoko ditu egitateak eta gorabeherak, eta horren berri emango dio administrazio organo eskudunari, behar den egiaztapena egiteko. Hala ere, diru-laguntzen egiaztapena Nafarroako Zerga Ogasunari badagokio, lehenagoko 1. apartatuak ezartzen duenari jarraikiz jardungo da.
5. artikulua . "Mortis causa" oinordetzetan zerga zehapenak iraungitzea.
Zerga zehapenak ez dira oinordeko edo legatudunengana pasatuko subjektu arau-hausleak hiltzen direnean. Subjektu arau-hauslea hil aurretik likidatu eta jakinarazi diren zehapenen ordainketa eten eginen da, eta zorra iraungitzat hartuko da heriotzaren berri izaten denean.
II. KAPITULUA. ZERGA ARLOKO ARAU-HAUSTE ARINENGATIK DIRU ZEHAPENAK JARTZEA
6. artikulua . Arauhauste arinak, arauhauste larriak eta mailaketa irizpideak.
Tributuei buruzko Foru Lege Orokorreko 67.1 artikuluan ezarritakoaren arabera, arau-hauste arina izanen da edozein pertsonari, subjektu pasiboa izan edo ez, tributuen kudeaketa dela-eta eskatutako zerga eginkizun edo betebeharrak ez betetzea, baldin eta arau-hauste larria ez bada eta zehapena mailakatzeko elementua ez bada.
7. artikulua . Zehapena jartzea aitorpena aurkeztu beharra urratzeagatik .
1. Aitorpenik ez aurkezteak edo aitorpen faltsuak, osatugabeak edo okerrak aurkezteak 6 eta 901 euro arteko isuna edukiko dute, egin den arau-hauste arin bakoitzeko, egindako arau-haustea ez bada 8.etik 12.era bitarteko artikuluetan xedatzen duenari jarraikiz zehatzeko modukoa.
Aitorpenak, komunikazioak, informazio ereduak edo, zergaren araudiaren arabera, baliabide telematikoen bitartez aurkeztu beharreko gainerako agiriak paper-formatuan aurkeztea ere 6 eta 901 euro arteko isunarekin zehatuko da.
2. Portaera hori arau-hauste arin moduan zigortuko da bakarrik arau-hauste larria ez denean, Tributuei buruzko Foru Lege Orokorrak 68. artikuluaren b) letran xedatutakoaren arabera, eta arau-hauste larri bat mailakatzeko irizpidea ez denean, aipatu Foru Legeko 71.1.d) artikuluan jasotakoaren arabera, arau-hauste larri hori egiteko derrigorrezko bitartekoa izateagatik.
3. Aurreko 1. apartatuak ezartzen dituen zehapenak 14.1 artikuluko a), c) eta e) letrek arautzen dituzten gorabeheren arabera mailakatuko dira.
8. artikulua . Tributuei buruzko Foru Lege Orokorraren 103. eta 104. artikuluek aipatzen duten zergaren ondorioetarako garrantzia duten datuak, txostenak eta aurrekariak jakinarazi beharra hausteagatiko zehapenak .
1. Tributuei buruzko Foru Lege Orokorraren 103. eta 104. artikuluek aipatzen duten zergaren ondorioetarako garrantzia duten datuak, txostenak eta aurrekariak jakinarazi beharra ez betetzeak 6 eta 1.202 euro arteko isuna ekarriko du, dagokion aitorpenean agertu beharko litzatekeen, edo berariaz eskatu den eta isilean gorde, faltsutu edo osatu gabe eman den datu bakoitzeko. Jarritako isunaren zenbatekoa ez da izanen arau-haustea egin duen norbanakoaren eragiketa-bolumenaren 100eko 3 baino gehiago, arau-haustea gertatu den unearen aurreko urte naturaleko eragiketa-bolumena kontuan hartuta. Gehieneko muga 30.050 eurokoa izanen da aurreko urte naturaletan eragiketarik izan ez bada edo aurreko urte naturala jardueraren hasierakoa bada edo produkzio zikloa nabarmen irregularra bada. Eskatutako datuak ez badira subjektu arau-hauslearen jarduera enpresarial edo profesional bati buruzkoak, ezarritako isunaren zenbatekoa ez da izango 1.803 euro baino gehiago.”
Ondorio hauetarako, betebehar hauek ez direla bete joko da epez kanpo betetzen direnean, Administrazioak aldez aurretik eskatuta.
Subjektu arau-hausleak jarritako traba dela medio edo bere kontabilitate eginbeharrak edo formazkoak ez betetzeagatik zerga Administrazioak ezin badu erdietsi eskatu duen informazioa, ez eta informazio horrek zenbat datu izan behar lituzkeen jakin ere, hasieran egindako arau-hauste soilari jarriko zaion isuna ez da izanen subjektu arau-hausleak arau-haustea egin den momentuaren aurreko urte naturalean izan duen eragiketa-bolumenaren 100eko 5 baino gehiagokoa, eta inongo kasutan ez 901 euro baino gutxiagokoa, oro har, eta 3.000 euro baino gutxiagokoa, foru lege honen 103. eta 104. artikuluetan jasotako banakako errekerimenduen ondoriozko ez-betetzeen kasuan. Gehieneko muga 48.080 eurokoa izanen da aurreko urte naturaletan eragiketarik izan ez bada edo aurreko urte naturala jardueraren hasierakoa bada edo produkzio zikloa nabarmen irregularra bada. Datuak ez badira subjektu arau-hauslearen jarduera enpresarial edo profesional bati buruzkoak, gehieneko muga hori 3.005 eurokoa izanen da.”
2. Aurreko apartatuak ezartzen dituen zehapenak 14.1 artikuluko a), c) eta e) letrek arautzen dituzten gorabeheren arabera mailakatuko dira.
9. artikulua . Kontabilitate eta erregistro arloko betebeharrak ez betetzeagatiko zehapenak .
1. Arau-hauste hauetako bakoitza 150 eta 6.010 euro arteko isunekin zehatuko da:
a) Arau fiskalek eskatzen dituzten erregistroetan eta kontabilitatean eragiketa bat edo batzuk isilean gordetzea, edo okerrak izatea.
b) Beren izaera dela-eta, kontuak ez dagokien esanahiarekin erabiltzea, zerga egoera baieztatzeko traba eginez.
c) Nahitaezko liburu eta erregistroetan dauden datuak oker transkribatzea zerga aitorpenetan.
d) Zerga arauek ezartzen dituzten kontabilitatea edo erregistroak eramateko betebeharrak ez betetzea.
e) Lau hilabeteko atzerapena, edo handiagoa, izatea zerga arauek ezartzen dituzten kontabilitatea edo erregistroak eramatean.
f) Jarduera eta ekitaldi ekonomiko berari dagozkien kontabilitate bat baino gehiago eramatea, enpresaren egiazko egoera zein den eragozteko.
g) Zerga administrazioak eskatzen dituen frogak eta kontabilitate-agiriak ez aurkeztea, edo erakusteari uko egitea.
h) Hiru hilabeteko epea igarotzea helbide fiskala edo helbidearen aldaketa jakinarazteko betebeharra bete gabe.”
2. Aurreko apartatuak ezartzen dituen zehapenak 14.1 artikuluko a), d) eta e) letrek arautzen dituzten gorabeheren arabera mailakatuko dira.
Aurreko apartatuko e) eta h) letretan ezartzen diren zehapenak 14.1 artikuluko c) letrak ezartzen dituenari jarraikiz, betebeharrak betetzeko izandako atzerapenaren arabera mailakatuko dira.
Ondorio hauetarako, kontuan hartuko da dagokiena ez den esanahia duten kontuetan bildu diren isilean gordetako, faltsututako, edo oker idatzitako karguen, abonuen edo idazpenen kopurua eta zenbatekoa, edo zerga aitorpenetan oker transkribatu direnenak. Aurreko apartatuko d), e) eta f) letretako arau-hausteen kasuan, arau-hausteak egin dituen norbanakoaren eragiketa-bolumena kontuan hartuko da, arau-hausteak gertatu diren ekitaldian, hau zehazten ahal bada, behintzat, edo aurreko ekitaldian, ezin bada zehaztu edo gorabehera hau esanguratsua bada dagokion zehapena mailakatzeko.
3. Erregistro liburuak Nafarroako Zerga Ogasunaren zerbitzu telematikoen bidez eramateko betebeharreko atzerapenaren kasuetan, honako arau hauek aplikatuko dira:
a) Atzerapena hau izango da: erregistroak aurkeztea betebeharra arautzen duen araudian ezartzen den epea amaitu eta gero.
b) Egindako eta jasotako fakturen erregistro liburuak aurkezteko atzerapenaren kasuan, 150 eta 6.000 euro arteko isuna jarriko da hiruhileko natural bakoitzeko.
Apartatu honetan ezartzen den zehapena 14.1.d) artikuluaren azken paragrafoak ezartzen duenari jarraikiz mailakatuko da.
Aipatu zehapena fakturazio-erregistro bakoitzari dagokion kopuru osoari aplikatuko zaio, kuotak eta egotzitako edo jasandako errekarguak barne, baita, hala badagokio, eragiketaren ondorioak diren Balio Erantsiaren Zergarengatik jasotako edo ordaindutako kopuruak ere.
Balio erantsiaren gaineko zergaren kutxa-irizpidearen araubide berezia aplikatu zaien eragiketei dagozkien fakturazio-erregistroak badira, hauek izango dira kopuru osoak:
1) Eragiketaren fakturari dagokion erregistroa baldin bada, fakturan bertan agertzen dena, alde batera utzita fakturarekin batera dagokion ordainketa edo kobrantzaren informazioa bidaltzen den edo ez.
2) Dagokion kobrantzaren edo ordainketaren erregistroa baino ez bada, informatu beharreko moneta magnitudeari dagokiona, martxoaren 8ko 86/1993 Foru Dekretuaren bidez onetsitako balio erantsiaren gaineko zergaren Erregelamenduaren 50. decies artikuluari jarraikiz.
Hiruhilekoko gutxienekoa eta gehienekoa aplikatzeko, hiruhileko natural bakoitzean egindako arau-hauste guztiak hartuko dira kontuan.
c) 200 euroko diru bidezko isun finkoa jarriko da, erregistro bakoitzeko, inbertsio ondasunen eta Europar Batasunaren barneko zenbait eragiketaren Erregistroko Liburuei dagozkien atzerapenetarako.
10. artikulua . Zehapenak jartzea enpresa eta lanbide jardueren inguruko datuak, zentsuari begira garrantzizkoak direnak, emateko obligazioa ez betetzeagatik.
1. Eginkizun hori ez betetzeak 1.000 pezetatik 150.000 pezeta bitarteko isuna ekarriko du, Tributuei buruzko Foru Lege Orokorreko 72. artikuluaren 4. atalean ezarritakoari jarraikiz.
2. Aurreko apartatuak ezartzen dituen zehapenak 14.1 artikuluko a), c), d) eta e) letrek arautzen dituzten gorabeheren arabera mailakatuko dira .
11. artikulua . Zehapenak jartzea faktura egin eta emateko eta zerga kuoten jasanarazpena kontsignatzeko obligazioa urratzeagatik.
1. Enpresaburu edo profesionalek faktura, egiaztagiria edo balio bereko agiria egin eta emateko obligazioa ez betetzea edo oker betetzea eta, kasua bada, zerga kuoten jasanarazpena kontsignatzeko beharra ez betetzea, 1.000 eta 150.000 pezeta bitarteko isunez zigortuko da arau-hauste bakoitzeko, Tributuei buruzko Foru Lege Orokorreko 72. artikuluko 5. atalean xedatutakoari jarraikiz. Isunen zenbatekoa, guztira, ez da handiagoa izanen arau-hausteak sortu dituzten eragiketa guztien kontraprestazioen 100eko 5 baino.
2. Subjektu arau-hausleak aurreko atalean aipatutako zerga kudeaketan laguntzeko obligazioak sarritan bete ez dituenean edo zerga administrazioak subjektuaren bitartez kasu bakoitzean arau-hauste arin bat sortu duten eragiketa, faktura edo antzeko agirien kopurua ezagutu ezin duenean, arau-hauste arin bakar baten erantzule izanen da eta ondoko isuna jarriko zaio: 25.000 pezeta eta ikertutako aldian egindako eragiketen bolumenaren 100eko 5 bitartean.
3. Aurreko apartatuak ezartzen dituen zehapenak 14.1 artikuluko a), b), d) eta e) letrek arautzen dituzten gorabeheren arabera mailakatuko dira .
12. artikulua . Zehapenak jartzea identifikazio fiskaleko zenbakia erabili eta jakinarazteko obligazioa ez betetzeagatik.
1. Tributuei buruzko Foru Lege Orokorreko 72. artikuluko 6. atalean xedatutakoari jarraikiz, zerga harremanetan identifikazio fiskaleko zenbakia erregelamenduz jasotakoari jarraikiz erabiltzen edo ematen ez dutenei 1.000 eta 150.000 pezeta bitarteko isuna jarriko zaie egindako arau-hauste arin bakoitzeko.
2. Subjektu arau-hausleak laguntzeko obligazio hori sarritan bete ez duenean, arau-hauste arin bakar baten erantzuletzat hartuko da, eta 25.000 eta 500.000 pezeta bitarteko isuna jarriko zaio. Baldin eta ez betetzea jarduera enpresarial edo profesionalean gertatzen bada, ikertzen den aldian egindako eragiketen bolumenaren 100eko 5ekoa izanen da zehapena.
3. Tributuei buruzko Foru Lege Orokorraren 72.6 artikuluaren bigarren paragrafoak eta Identifikazio Fiskaleko Zenbakia eta horri lotutako errolda zehatz batzuk arautzen dituen otsailaren 22ko 8/2010 Foru Dekretuko 12. artikuluak ezartzen dutenari jarraikiz, kreditu entitateek kontu edo eragiketa bakoitza behar den bezala identifikatzeko berariaz bete behar dituzten betebeharrak ez betetzea, behar ez bezala abonatu edo kargatu diren kopuruen 100eko 5eko isunarekin zehatuko da, betiere gutxieneko isuna 901 euro izango dela; eta eragiketa edo gordailua bertan behera gelditu bada, isuna 901 eta 6.010 euro artekoa izango da .
4. Kreditu entitateek eramailearentzako txekeak igortzean edo ordaintzean identifikazio fiskaleko zenbakia agertzeko berariaz dituzten obligazioak ez betetzeagatik, efektuaren balio fazialaren 100eko 5eko isuna jarriko zaie, 150.000 pezetako gutxienekoarekin.
5. Foru Dekretu honek 8. artikuluan jasotako zigorra jarriko da, baldin eta, titularrak identifikazio fiskaleko zenbakia eman ez duelarik, kreditu entitateek haren kontu eta eragiketei buruz aurkeztu beharreko aitorpen edo jakinarazpenak erakusten ez badituzte eta, halaber, datuak oker eman edo ezkutatzen badituzte.
6. Aurreko ataletan jarritako zehapenak Foru Dekretu honek 14.1 artikuluan jasotako inguruabarrak kontuan hartuz mailakatuko dira.
13. artikulua . Zehapenak jartzea Zerga Administrazioaren lanari aurre egin, aitzakiak jarri edo uko egiteagatik.
1. Tributuei buruzko Foru Lege Orokorreko 72. artikuluko 7. atalean ezarritako arau-haustea egin dela ulertuko da tributupekoek Zerga Administrazioko ikuskatzailetza edo dirubilketako organoek agiriak, liburuak, fitxategiak, fakturak, kontabilitate nagusi nahiz osagarriko frogagiriak edo idazpenak, programak, sistema eragileak eta kontrolekoak, eta aurkeztu edo eman beharreko datuen jatorri den edozein aurrekari edo informazio aztertzeko nahiz aitorpenak edo zerrendak egiaztatu edo konpultsatzeko egiten dieten errekerimenduei kasurik egiten ez dietenean. Arau-hauste hori 50.000 eta 1.000.000 pezeta bitarteko isunez zigortuko da, betiere Foru Dekretu honen 17. artikuluaren arabera zerga arloko arau-hauste larri bat egiteagatik jarri beharreko zehapena mailakatzeko kontuan hartzen ez bada.
2. Ikuskapen edo bilketa faseetan, zerga Administrazioaren jarduketei gogor edo uko egin nahiz aitzakiak bilatzen badira, eta horiek aurreko atalean bildu direnak bezalakoak ez badira, arau-hauste soil orokortzat hartu eta horren arabera zehatuko dira, 6 eta 901 euro arteko isunarekin, Tributuei buruzko Foru Lege Orokorraren 67.1.f) eta 72.1 artikuluek xedatzen dutenari jarraikiz.
Ondorio horietarako, zerga Administrazioaren jarduketei gogor edo uko egin nahiz aitzakiak bilatu direla joko da zergapekoak, behar bezala jakinarazita eta ohartarazita, ez dituenean aintzat hartzen Administrazioaren eskakizunak, edo, bere betebeharrei dagokienez, haren organoen jarduketak luzatu, oztopatu edo galarazteko jarduketak egiten dituenean. Bereziki zergapekoaren jokabide hauek hartuko dira horrelakotzat.
a) Ez agertzea, arrazoi justifikaturik eduki gabe, indarrean dagoen legeriaren arabera seinalatu zaion tokian eta epean.
b) Zerga administrazioaren organoei finketan edo lokaletan sartzen ez uztea, edo han gera daitezen galaraztea, organo horiek hala eskatu dutenean indarreko legeriak xedatutakoarekin bat.
c) Zerga administrazioaren organoak hertsatzea, hertsapena delitua edo falta den kasuetan izan ezik .
3. Aurreko ataletan jasotako zehapenak Foru Dekretu honetako 14.1 artikuluaren a) eta d) letretan araututako inguruabarrak kontuan hartuz mailakatuko dira.
4. Artikulu honetan ezarritakoaren ondorioetarako, kasu egin ez zaien eta errepikatu diren eduki bereko errekerimenduei ez erantzutea arau-hauste arin bakarra izanen da.
14. artikulua . Mailaketa irizpideak.
1. Zerga arloko arau-hauste arinagatik jartzen diren diru zehapenak ondorengo letretan jasotako inguruabarrak kontuan hartuz mailakatuko dira kasuan-kasuan:
a) Zerga arloko arau-hausteetan berregilea izatea.
Halakotzat hartuko da subjektu arau-hauslea izaera bereko eginkizun edo betebeharretan arau-hauste arina egiteagatik zigortu dutenean, administrazio ebazpen irmoaren indarrez, espedientearen xedeko arau-haustea egin aurreko bost urteetan. Horretarako, izaera bereko betebehar edo eginkizuntzat hartuko dira Foru Dekretu honetako 7.etik 19.era bitarteko artikulu bakoitzean araututakoak.
Inguruabar hori gertatzen denean, aurreikusitako gutxieneko isuna igoko da, arau-hauste arin bakoitzerako ezarritako gehieneko zehapenaren % 25, gutxienez, obligazio berberari dagokion arau-hauste arinaren ondorioz zehapen irmoa baldin badago; zehapen irmoa izaera bereko baino beste mota bateko zerga arloko arau-hausteengatik jarri baldin bada, igoera % 15ekoa izanen da.
Zehapena datuak ezkutatu, faltsutu edo osorik ez emateagatik jarri baldin bada, horretarako aurreikusitako gutxieneko zehapena igoko da, hots, ezkutatu, faltsutu edo osorik eman ez den datu bakoitzeko aurreikusitako gehieneko zehapenaren % 2, gutxienez.
b) Arau-haustea egitean iruzurbideak edo bitarteko pertsona bat erabiltzea.
Ondorio horietarako, faktura, egiaztagiri edo bestelako agiri edo euskarri faltsuak edo faltsutuak izanen dira iruzurbideak.
Hori gertatuz gero, aurreikusitako gutxieneko zehapena kasuan kasuko arau-haustearentzat aurreikusitako gehieneko zehapenaren % 25 igoko da, gutxienez.
c) Eginkizun edo betebehar formalak edo laguntza ematekoak bere kabuz ez betetzea edo betetzean atzeratzea.
Inguruabar hori gertatuz gero, aurreikusitako gutxieneko zehapena, gutxienez, gehieneko zehapenaren % 5 igoko da, atzerapena hiru hilabetetik beherakoa baldin bada; % 10, atzerapena hiru hilabetetik sei hilabetera bitartekoa izan baldin bada, eta % 15, atzerapena sei hilabetetik gorakoa baldin bada.
Zehapena, ezkutatu, faltsutu edo eman gabe utzitako datu bakoitzeko jartzen baldin bada, horretarako aurreikusitako gutxieneko zehapenaren gainean honako igoera aplikatuko da gutxienez: ezkutatu, faltsutu edo eman gabe utzitako datu bakoitzerako aurreikusitako gehieneko zehapenaren % 0,5, % 1 edo % 1,5, atzerapena hiru hilabetetik beherakoa, hiru hilabetetik sei hilabete bitartekoa, edo sei hilabetetik gorakoa izan, hurrenez hurren.
d) Ematen ez diren datu, txosten edo aurrekariek, eta oro har, betebehar formalak, kontabilitate eta erregistro arlokoak, eta zerga Administrazioari informazioa eta laguntza emateko betebeharrak ez betetzeak zer garrantzia daukaten zerga kudeaketarako.
Ondorio hauetarako, hauek dira zerga kudeaketarako garrantzizkoak diren betebehar edo obligazio formalak:
1) Atxikipenen eta konturako sarreren urteko laburpena aurkeztea.
2) Hirugarren pertsonekin egindako eragiketei buruzko urteko aitorpenaren aurkeztea.
3) Balio erantsiaren gaineko zergaren erregelamenduaren (martxoaren 8ko 86/1993 Foru Dekretuak onetsia) 67. artikuluan ezarritako Batasunaren barreneko eragiketen aitorpen laburtua aurkeztea.
4) Pentsio planetan eta funtsetan eta horien aukerako sistemetan parte hartzen dutenen identifikazioa aurkeztea, maiatzaren 24ko 174/1999 Foru Dekretuaren bidez onetsitako pertsona fisikoen errentaren gaineko zergaren erregelamenduko 62.10 artikuluan aipatzen denaren arabera.
5) Kontu korronte, aurrezki gordailu eta eperako gordailuetako mugimenduei, mailegu eta kreditu kontuetako mugimenduei eta bestelako eragiketa aktibo eta pasiboei buruzko informazioa ematearekin loturikoak, kontu iragankorretan edo txekeetan edo entitatearen, bankuen, aurrezki kutxen edo kreditu kooperatiben konturako bestelako ordainketa-aginduetan islatzen direnak ere barne, baita banku edo kreditu trafikoan aritzen diren pertsona fisiko eta juridikoen konturakoak ere.
6) Sozietateen gaineko Zergari buruzko abenduaren 28ko 26/2016 Foru Legearen 80.4 artikuluan ezarritako informazio betebeharrak.
7) Identifikazio fiskaleko zenbakia eta horri lotutako errolda zehatz batzuk arautzen dituen otsailaren 22ko 8/2010 Foru Dekretuaren 10., 11. eta 12. artikuluetan ezartzen diren eragiketetan identifikazio fiskaleko zenbakia erabiltzea.
8) Zerga berezien xedeko produktuen eragiketei buruzko aitorpenak aurkeztea.
9) Aseguru-sarien gaineko zergaren urteko laburpen-aitorpena.
10) Balio erantsiaren gaineko zergaren urteko laburpen-aitorpena, aipatu zergaren abenduaren 30eko 19/1992 Foru Legearen 109.1.6 artikuluak aipatzen duena.
Halaber, zerga kudeaketarako garrantzizkotzat joko dira fakturetan, frogagirietan edo antzeko dokumentuetan agertu behar diren ondoko datu hauek:
1. Fakturaren zenbakia eta, halakorik badago, seriea.
2. Fakturaren egilearen identifikazio fiskaleko zenbakia.
3. Kontraprestazioaren zenbateko osoa, eta, hala badagokio, zerga-kuota jasanarazia.
Irizpide hau aplikatzeko, lehen aipatu diren betebeharrak ez betetzean, kontuan hartuko da arau-hauslearen eragiketen bolumena, eta ezkutatutako, faltsututako edo osatu gabeko datuen, karguen edo abonuen kopurua eta garrantzia, baita ez betetze honek zer nolako eragina eduki dezakeen ukitutako beste zergapekoen zerga-egoeran.
Bereziki, balio erantsiaren gaineko zergaren erregistro liburuak Nafarroako Zerga Ogasunaren zerbitzu telematikoen bidez eramatean eragiketak ezkutatzen badira edo datuak zehatzak ez badira, gutxieneko isunaren zenbatekoa handiagotuko da; handiagotze hori erregistratzearen xedeko fakturaren zenbatekoaren 100eko 1 izango da. Aipatu erregistro liburuak eramateko edo gordetzeko betebeharra betetzen ez bada, gutxieneko isunaren zenbatekoa handiagotuko da, halaber; handiagotze hori arau-hausleak ekitaldian egindako eragiketa-bolumenaren 100eko 1,5 izango da; eta fakturazio-erregistroak elektronikoki aurkeztean atzerapena bada, gutxieneko isunari fakturaren zenbatekoaren 100eko 0,50 gehituko zaio. Arau-hausleak bere kontabilitate eginbeharrak edo formazkoak ez baditu betetzen, eta ez betetze horren ondorioz zerga Administrazioak ezin badu jakin arau-hauslearen eragiketa-bolumena, aurreikusten den isunaren gutxieneko zenbatekoa handiagotuko da, gutxienez aurreikusitako gehieneko isunaren 100eko 10. .
e) Zerga administrazioaren jarduketei gogor edo uko egitea nahiz aitzakiak bilatzea, edo haren ikerlanari oztopoak jartzea kudeaketa, ikuskapen edo bilketa faseetan.
Inguruabar hori gertatzen bada arau-hauste soil bat egin denean, zehapenaren zenbatekoa handituko da gehieneko zenbatekoaren 100eko 20tik 100eko 40ra bitartean. Horrez gain, zergapekoak ez badie, behar bezala jakinarazi eta ohartarazi eta gero, administrazio horren errekerimenduei erantzun, zenbateko hauek gehituko dira:
a) 300 euro, bigarren aldia bada errekerimendu bat betetzen ez dela.
b) 600 euro, hirugarren aldia edo hurrengoa bada errekerimendu bat betetzen ez dela .
2. Mailaketa irizpideak aldi berean aplikatu daitezke.
Aplikatu beharreko zehapena zehazteko, gutxieneko isunari aurreko ataletan xedatutakoaren ondorioz dagokion kopurua gehituko zaio, baina hortik ateratzen den zenbatekoak ezin izanen du gainditu legez ezarritako gehieneko diru-muga.
III. KAPITULUA. ZERGA ARLOKO ARAU-HAUSTE LARRIENGATIK DIRU ZEHAPENAK JARTZEA
15. artikulua . Arauhauste larrien diru zehapenak mailakatzeko irizpideak.
1. Arau-hauste larrien diru zehapenak, kasuan-kasuan, honako irizpide hauen arabera mailakatuko dira:
a) Zerga arloko arau-hausteetan berregilea izatea.
b) Zerga Administrazioaren ikertze lanari aurre egitea, uko egitea edo oztopoak jartzea.
c) Urraketa egitean iruzurrez edo bitarteko pertsona baten bidez jokatzea.
d) Zerga Administrazioari zorra zehazteko behar dituen datuak ezkutatzea, aitorpenak ez aurkeztuz edo aitorpenak osatu edo zehaztu gabe aurkeztuz, zorra murriztu nahian.
2. Mailaketa irizpide desberdinak aldi berean erabil daitezke. Zehapena zehazteko, gutxieneko diru isunaren zenbatekoa gehituko da Foru Dekretu honek 16.etik 19.era bitarteko artikuluetan xedatutakoaren arabera bidezkoak diren ehunekoak aplikatuz.
Mailaketa irizpide bakoitza gutxieneko diru zehapenaren gainean aplikatuko da.
3. Isunaren zenbatekoa ezin izango da Tributuei buruzko Foru Lege Orokorraren 69.1 artikuluak aipatzen duen zenbatekoaren 100eko 200 baino handiagoa, edo, hala badagokio, aipatu foru legearen 76. eta 77. artikuluetan ezarritako mugak baino handiagoa .
16. artikulua . Zerga arloko arauhausteetan berregilea izatea.
1. Foru Dekretu honetako 15.1.a) artikuluan aurreikusitako ondorioetarako, zerga arloko arau-hausteetan berregitea izan dela ondorioztatuko da espedientearen xede den arau-haustea egin aurreko bost urteetan, administrazio ebazpen irmo baten bidez, subjektu arau-hausle hori zehatua izan baldin bada zerga arloko arau-hauste larri bat egiteagatik.
2. Hori gertatuz gero, zehapenaren ehunekoa 10 puntutan igoko da tributu berari dagokion arau-hauste larriengatiko zehapen irmo bakoitzeko, eta 5 puntutan beste tributu batzuetako arau-hauste larriengatiko zehapen irmo bakoitzeko, betiere zehapen horiek aurreko atalean zehazturiko baldintzetan ezarri baldin bazaizkio subjektu arau-hausleari.
3. Zehapenari aplikatu beharreko igoera, nolanahi ere, ez da % 10etik beherakoa izanen, ez eta % 50etik gorakoa ere. Aurreko atalean ezarritakoaren ondorioz, 5 puntuko igoera aplikatu beharra dagoenean, ez da inolako igoerarik aplikatuko.
4. Artikulu honen ondorioetarako bakar-bakarrik, egiaztatze edo ikertze lan beretik eratortzen diren arau-hauste larri guztiak aurrekari bakar moduan konputatuko dira. Halakotzat hartuko dira jarduketak hasteko edo horiek zabaltzeko (hurrenez hurren Nafarroako Foru Komunitateko Tributu Ikuskapenari buruzko Erregelamenduaren 26. eta 34. artikuluetan adieraziak) jakinarazpenean oinarritutako jarduketen ondorioz ageri diren arau-hauste larriak.
Halaber, aurrekari bakar moduan konputatuko dira tributu beragatik eta zergaldi edo likidazioaldi berean egindako behin-behineko edo behin betiko likidazio guztien ondoriozko arau-hauste larri guztiak.
Tributu eta zergaldi berari dagozkion jarduketak egiten direnean, tributu eta zergaldi edo likidazioaldi horri buruz ofizioz egindako behin-behineko likidazioen ondoriozko arau-hauste larriak izatea ez da aurrrekaritzat hartuko.
17. artikulua . Zerga administrazioaren ikertze lanari aurre egitea, uko egitea edo oztopoak jartzea .
1. 15.1.b) artikuluak ezartzen duenaren ondorioetarako, Zerga administrazioaren ikerlanari aurre egitea, uko egitea edo oztopoak jartzea dagoela joko da baldin eta zergapekoek, behar bezala jakinarazi eta ohartaraziek, ez badiete jaramonik egiten zerga Administrazioak egiten dizkien eskakizunei haien zerga egoera erregularizatzeko egiten dituen baieztapen eta ikerketen barruan, baieztapen eta ikerketa hauetan arau-hauste astunak egin direla agerian gelditzen denean.
2. Hau gertatzen denean, ezarri beharreko isunaren zenbatekoa 20 eta 60 puntu artean handiagotuko da, honako irizpide hauek kontuan hartuta:
a) Zergapekoak behin eta berriz uko egiten dionean prozeduran zehar eskatzen zaizkion datu, txosten, frogagiri eta aurrekariak aurkezteari, eta horren ondorioz, zerga Administrazioak ezin duenean ezagutu eskatutako informazioa, ezarri beharreko isunaren ehunekoa 35 eta 50 puntu artean handiagotuko da.
b) Zergapekoa ez denean agertzen, agertzeko hiru aldiz eskatu zaionean, gutxienez, ezarri beharreko isunaren ehunekoa 30 eta 40 puntu artean handiagotuko da.
Behin eta berriz ez agertze horren ondorioz, erregularizazioa zergapekoa bertan egon gabe egiten bada, ezarri beharreko isunaren ehunekoa 50 eta 60 puntu artean handiagotuko da.
c) Lehen aipatutakoak ez bezalakoak diren beste ikerlanari aurre egiteak, uko egiteak edo oztopoak jartzeak gertatzen direnean, ezarri beharreko isunaren ehunekoa 20 eta 30 puntu artean handiagotuko da.
18. artikulua . Arauhaustea egitean iruzurrez edo bitarteko pertsona baten bidez jokatzea.
1. Foru Dekretu honetako 15.1.c) artikuluan aurreikusitako mailaketa irizpidea aplikatu behar dela ondorioztatuko da arau-haustea egitean iruzurrez edo bitarteko pertsona baten bidez jokatu denean.
Ondorio horretarako, iruzurbidetzat hartzen da kontabilitatean irregulartasun nabarmenak agertzea eta faktura, egiaztagiri edo bestelako agiri edo euskarri faltsu edo faltsutuak erabiltzea.
2. Ondoko kasu hauek gertatzen direnean ulertuko da kontabilitatean irregulartasun nabarmenak ageri direla:
a) Kontabilitatea edo zerga xedapenek ezarritako liburu edo erregistroak eramateko obligazioa batere ez betetzea.
b) Enpresaren benetako egoera zein den jakitea eragozten duten kontabilitate bat baino gehiago eramatea jarduera eta ekitaldi ekonomiko berean.
c) Kontabilitatea edo zerga xedapenek ezarritako liburu edo erregistroak behar ez bezala eramatea, idazpenak edo erregistroak oker eginez edo jaso gabe utziz nahiz dagokienaz bestelako esanahia duten kontuak erabiliz. Horrelakoa gertatzen dela ulertu ahal izateko, jaso gabe utzi diren, oker jarri diren edo dagokienaz bestelako esanahia duten kontuetan erregistratu diren zorduntze, ordainketa edo idazpenen zenbatekoa, goitik edo behetik, arau-haustea egin den zergaldi osoan liburuan edo erregistroan egindako zorduntze edo ordainketa guztien 100eko 15 izanen da gutxienez.
Arestian aipatutako baldintzak gertatu direla ulertuko da arau-hauste larria egiteko tresna izan direnean.
Isunari aplikatu beharreko igoera zenbatekoa den zehaztearen ondorioetarako, a) letran adierazitako inguruabarra gertatuz gero, igoera ehuneko 25 eta 35 bitartekoa izanen da; b) letran adierazitako inguruabarra gertatuz gero, ehuneko 35 eta 45 bitartekoa, eta c) letrakoa gertatuz gero, ehuneko 20 eta 25 bitartekoa.
3. Lehenengo atalean adierazitakoaren ondorioetarako, faktura, egiaztagiri edo bestelako agiri edo euskarri faltsuak edo faltsutuak erabili direla ulertuko da inoiz ere oso-osorik edo zati batean egin ez diren eta arau-hauste larria egiteko tresna izan diren eragiketak erakusten dituztenean. Horrelakoa ez dela gertatu ulertuko da agiri edo euskarri faltsu edo faltsutuen eragina subjektu arau-hausleari aurkitu zaion zerga zorraren aldean 100eko 10 baino txikiagoa denean.
Hori gertatzen bada, isunari % 25 eta 40 puntu bitarteko igoera aplikatuko zaio.
4. Lehenengo atalean adierazitako ondorioetarako, bitarteko pertsona fisikoak, juridikoak edo entitateak erabili direla ulertuko da subjektu arau-hausleak, bere nortasuna ezkutatu nahian, ondasun edo eskubideen titularitatea izatea, ondare etekinak edo gehikuntzak lortzea edo zerga alorrean eragina duten eta zerga obligazioa sortzen duten eragiketak egitea hirugarren baten izenean jarri dituenean, hark baimenduta edo ez. Hain zuzen ere, obligazio horiek guztiak ez betetzeak hemen zehatzen den arau-haustea ekarriko du berarekin.
Hori gertatzen bada, isunari % 35 eta 50 puntu bitarteko igoera aplikatuko zaio.
5. Aurreko 2, 3 eta 4. ataletan jasotako gorabeherak banan-banan aztertuko dira. Hala gertatzen denean, gorabehera bakoitzari dagokion zigorraren ehunekoaren gehikuntza banan-banan bereizita zehaztuko da.
Mailaketa irizpide hau erabiltzeak berekin dakarren zehapenaren ehunekoaren gehikuntza aurreko atalean aipatutako gehikuntzen batura eginez kalkulatuko da.
Horrela zehaztutako gehikuntzen batura 75 puntu baino handiagoa denean, hala ere, gehikuntzaren ehunekoari kopuru horren muga jarriko zaio.
19. artikulua . Administrazioari zerga zorra zehazteko behar dituen datuak ezkutatzea.
1. Foru Dekretu honetako 15.1. artikuluko d) letran aipatutako inguruabarra gertatu dela ulertuko da aitorpenak ez aurkeztuz edo aitorpen osagabeak edo okerrak aurkeztuz Zerga Administrazioari zerga zorra zehazteko behar dituen datuak ezkutatzen zaizkionean eta ezkutatzeak berarekin zorraren murriztapena dakarrenean.
Hala eta guztiz ere, aurrekoak ez du kentzen Zerga Administrazioak hirugarrenek egiten dituzten aitorpenen bidez edo, zehapenaren xede ez diren zerga kontzeptuei buruz, subjektu arau-hausleak berak egiten dituen beste aitorpen batzuen bidez datu horiek ezagutzea, ez eta ezkutatu diren datuak kontabilizatuta agertzea edo ez agertzea ere.
Horrelakorik ez da ondorioztatuko subjektu arau-hausleak zerga zorra zehazteko behar diren datu guztiak aitorpenean jaso dituenean eta zorraren murriztapena subjektu arau-hausleak zerga araudia oker erabiltzeagatik eratorri denean.
2. Horrelakorik ezinen da ulertu subjektu arau-hauslearen portaera Tributuei buruzko Foru Lege Orokorrak 68. artikuluaren b) letran tipifikaturiko arau-hauste larria denean. Modu berean, horrelakorik ez da ondorioztatuko Foru Dekretu honek 18.2.c) artikuluan jasotako inguruabarra aplikatu daitekeenean eta, horrenbestez, aurkeztutako aitorpenak irregulartasun nabarmenik ez duen kontabilitatea leial islatzen duenean.
3. Arau-hauste larria egitean horrelakoa gertatzen denean, zehapenaren ehunekoa 10 eta 25 puntu bitartean gehituko da. Subjektu arau-hausleak ezkutatu dituen datuek zerga zorra zenbat murrizten duten kontuan hartuz kalkulatuko da gehikuntza hori, ondorengo irizpideei jarraikiz:
a) Zerga zorra 100eko 10 edo gutxiago murrizten bada, zehapenaren ehunekoa ez da gehituko.
b) Zerga zorra 100eko 10, 20, 50 edo 75 baino gehiago murrizten bada, zehapenaren ehunekoa 10, 15, 20 edo 25 puntu gehituko da hurrenez hurren.
IV. KAPITULUA
Adostasuna erregularizazio proposamenekin
20. artikulua . Adostasuna erregularizazio proposamenekin arauhauste larrietan .
1. Arau-hausleak, edo, hala badagokio, erantzuleak bai erregularizazio proposamenarekin, baita zehapen proposamenarekin ere ados dagoela adierazten duenean, horretarako ezarritako epean, zerga arloko arau-hauste larriarengatiko diru bidezko zehapena 100eko 40 murriztuko da, 15. artikuluan ezartzen denarekin bat. Murriztapenak ukitzen ahalko du, hala badagokio, gutxieneko isunaren zenbatekoa.
Arau-hauslea erregularizazio proposamenaren zati batekin bakarrik ados badago, eta horri dagokion zehapen proposamenarekin, 100eko 40ko murriztapena aipatu zehapen-zatiari aplikatuko zaio, bakarrik.
Zerga arloko arau-hauste larriengatiko zehapenen zenbatekoa beste 100eko 20 gutxituko da baldin eta, lehen paragrafoan xedatutakoa betetzeaz gain, onartutako erregularizazio eta zehapen proposamen guztiei dagokien zerga zorra dirutan ordaintzen bada, osorik, diru-bilketari buruzko araudian borondatezko ordainketarako ezarritako epean. Ondorio horietarako, eskatzen bada erregularizazio eta zehapen proposamenei dagokien zerga zorraren ordainketa geroratzea edo zatikatzea, ez da aplikatuko paragrafo honetan araututako murriztapen gehigarria.
Egindako erregularizazioaren edo zehaztutako zehapenaren aurka errekurtsoa edo erreklamazioa jartzen bada, ez dira aplikatuko apartatu honetan adierazitako murriztapenak, eta zilegi izanen da erregularizazio proposamenak dakarren zorra eskatzea borondatezko ordainketa aldia amaitzen denetik aurrera.
Lehendabiziko paragrafoan ezarritako 100eko 40ko murriztapena aplikagarri izanik, ordainketa osorik egiten ez bada hirugarren paragrafoan ezarritakoarekin bat, zehapen espedienteak dakarren zorraren zenbatekoa eskatuko da, behin 100eko 40ko aipatu murriztapena eginda eta 100eko 20ko murriztapena egin gabe, diru-bilketari buruzko araudian borondatezko ordainketarako ezarritako epea amaitzen den egunetik aurrera.”
2. Arau-hauste larriak agerian gelditzen direnean Tributuei buruzko 13/2000 Foru Lege Orokorraren 113. artikuluak xedatutakoaren araberako behin-behineko likidazioak egitearen ondorioz, aurreko apartatuak aipatzen dituen murriztapenak aplikatzeko ez da beharrezkoa izango arau-hausleak, edo, hala dagokionean, erantzuleak adieraztea ados dagoela erregularizazio eta zehapen proposamenekin.
Murriztapenak aplikatzearen ondorioetarako, adostasuna adieraziko zaie egindako erregularizazioa eta zehapena dauzkaten egintza administratiboei, eta adierazpen hori egin dela joko da egintza horien aurkako errekurtsoa jartzen ez denean legez ezarritako epean.
Egindako erregularizazioa daukan egintza administratiboaren, zehapen jarri izanaren egintzaren edo bien aurkako errekurtsoa edo erreklamazioa jartzen bada, zehapena jartzeko egintza adostasunaren murriztapenak aplikatu gabe eman zela ulertuko da. Ondorio horretarako, bai zehapen prozeduraren proposamenean, baita ebazpenean ere, gorabehera hori jasoko da.
20.bis artikulua. Adostasuna zehapen proposamenekin arauhauste arinetan .
Zerga arloko arau-hauste soilengatiko zehapenen zenbatekoa 100eko 30 gutxituko da subjektu arau-hausleak edo, kasua bada, erantzuleak, aditzera ematen badu ados dagoela egin zaizkion zehapen proposamenekin eta proposatutako zehapen guztien zenbatekoa osorik eta esku-dirutan ordaintzen badu diru-bilketari buruzko araudiak borondatezko ordainketarako ezarritako epearen barnean. Ondorio horietarako, eskatzen bada zehapen proposamenei dagokien zerga zorraren ordainketa geroratzea edo zatikatzea, ez da aplikatuko artikulu honetan ezarritako murriztapena.
Ordainketa osorik egiten ez bada aurreko paragrafoan ezarritakoarekin bat, zehapen espedienteak dakarren zorraren zenbatekoa eskatuko da, 100eko 30eko murriztapenik egin gabe, zergari buruzko araudian borondatezko ordainketarako ezarritako epea amaitzen den egunetik aurrera.
Zehapenaren aurka errekurtsoa edo erreklamazioa jartzen bada, ez da aplikatuko, orobat, artikulu honetan araututako murriztapena.
1. ATALA. DIRUZKOAK EZ DIREN ZEHAPENAK
21. artikulua . Diruzkoak ez diren zehapenak.
1. Diruzkoak ez diren zehapenak honelakoak izan daitezke:
a) Subentzio edo laguntza publikoak lortzeko aukera eta zerga onura edo pizgarriak izateko eskubidea galtzea, bost urtez gehienez.
b) Foru Komunitateko Administrazioarekin edo beste entitate publiko batzuekin kontratuak egitea debekatzea, bost urtez gehienez ere.
c) Enplegua edo kargu publikoa etetea, gehienez urte batera arte .
Arestiko a) eta b) letretan aurreikusitako zehapenak Tributuei buruzko Foru Legeko 73. eta 76.3 artikuluetan adierazitako kasuetan aplikatuko dira eta c) letran aurreikusitakoak, aldiz, lege bereko 75. artikuluan adierazitako kasuetan. 73. artikuluan adierazitako kasuan, letra horietan zehazturiko epea ez da, inondik inora, bost urtetik gorakoa izanen.
2. Zerga onura edo pizgarriak izateko eskubidea galtzea ezar daiteke, besteak beste, honako zerga hauetan:
a) Pertsona Fisikoen Errentaren gaineko Zergan: Sozietateen gaineko Zergatik datozen inbertsioengatik egiten diren kenkariak eta amortizazio askatasuna.
b) Sozietateen gaineko Zergan: amortizazio askatasuna eta inbertsioengatik egiten diren kenkariak.
c) Oro har, tributuetan ezartzen diren beste salbuespen edo hobari batzuk, hala nola lege berezietan adierazten direnak.
3. Zerga onura edo pizgarriak izateko eskubidea galtzeak ez ditu honako arlo hauek ukituko:
a) Ondasunak edo zerbitzuak erosten dituztenei derrigorrez jasanarazi beharreko zeharkako zergetan aurreikusitako onura-pizgarriak.
b) Gardentasun fiskala.
2. SEKZIOA
Isunen mailaketa
22. artikulua . Mailakatzeko irizpideak.
Arau-hauste arinengatik jartzen diren zehapen ez diruzkoak mailakatzeko, Foru Dekretu honetako 14.1.d) artikuluan ezarritako irizpideak erabiliko dira. Tributuei buruzko Foru Lege Orokorreko 73. eta 75. artikuluetan xedatutakoaren ondorioetarako, egindako arau-haustea zerga kudeaketaren eraginkortasunerako garrantzizkoa dela ulertuko da arau-hauste horren ondorioz Zerga Administrazioa tributupeko askoren datu, txosten edo aurrekaririk gabe gelditzen bada eta horiek zerga kontuetarako garrantzizkoak badira.
Arau-hauste larrien ondoriozko zehapen ez diruzkoak eragindako kalte ekonomikoaren arabera mailakatuko dira eta Foru Dekretu honen 17. eta 18. artikuluetan ezarritako irizpideei jarraikiz.
23. artikulua . Kalte ekonomikoak.
1. Tributuei buruzko Foru Lege Orokorreko 76. artikuluaren 3. atalean xedatutakoaren ondorioetarako, kalte ekonomikoa kalkulatzeko, bildu ez den kopurua edo bidegabeko itzulketetan lortutako kopurua hartuko da kontuan.
Kalte ekonomikoa itzulketetan bidegabeki lortutako dirutik eta sartu ez diren kopuruetatik, bietatik, baldin badator, hura kalkulatzeko, bidegabeki lortutako itzulketaren eta sartu gabe utzitako kopuruaren batuketa eginen da.
2. Aurreko atalean aipatu artikuluan adierazten den ehunekoa finkatzeko, atal horretan adierazitako kalte ekonomikoaren eta sartu gabe utzitako diru-kopuruaren arteko erlazioa hartuko da aintzat. Dirusarrerarik egin beharra ez dagoen kasuetan, ehunekoa finkatzeko, kalte horren eta indarra duten arauei jarraikiz bidezko liratekeen itzulketen arteko erlazioari begiratuko zaio.
Horren ondorioetarako, Pertsona Fisikoen Errentaren gaineko Zergan eta Sozietateen gaineko Zergan zergaldi horretako kuota kontuan hartuko da, kontuan sartutako dirusarrerengatik dagokion murriztapena egin baino lehen.
Aldizkako tributuetan eta aldizka aitortu beharreko tributuetan, hala kalte ekonomikoaren zenbatekoa, nola sartu behar ziren dirusarreren eta bidezko liratekeen itzulketena kasuan kasuko zergaldikoak edo likidazioaldikoak izanen dira, eta hori hamabi hilabetetik beherakoa baldin bada, urte naturalekoak.
1. ATALA. ZEHAPENAK JARTZEKO ORGANO ESKUDUNAK
24. artikulua . Diruzehapenak ezartzeko eskumena duten organoak .
Diru-isunean oinarritutako zehapenak erabaki eta ezartzeko organo eskudunak izanen dira tributu likidazioko administrazio-egintzak ematen dituztenak edo, hala badagokio, zehapen prozedura hasi duenaren goragoko organo hurrena.
Zehapen-prozedura hasi edo kitatzeko organo eskudunak dira antolamendu arauetan, zergak aplikatzeko prozedura arauetan, zehapen prozeduraren arauetan edo kasuan kasuko zerga arautzekoetan horrela ezarrita daudenak.
Ekonomia eta Ogasun Departamentuaz bestelako departamentuek edo horien mendeko beste entitate batzuek kudeatzen dituzten zergen edo zerga eginkizunen kasuetan, horrelako zehapenak ezartzeko eskumena kasuan kasuko organoaren titularrak izanen du.
25. artikulua . Arauhauste larriengatik diruzko zehapenak jartzeko organo eskudunak .
Tributuei buruzko Foru Lege Orokorreko 76. eta 77. artikuluetan aipatu arau-hausteei dagozkien diruzko zehapenak erabaki eta ezartzeko organo eskudunak izanen dira tributuen edo, kasua bada, horien konturako atxikipen edo dirusarreren behin-behineko edo behin betiko likidazioak egiteko administrazio egintzak diktatu behar dituztenak, edo horien eskuordetza hartzen dutenak.
26. artikulua . Diruzkoak ez diren zehapenak jartzeko organo eskudunak.
Horrelako zehapenak erabaki eta jartzeko eskumena duen organoa Nafarroako Gobernua da, salbu eta ondoko lerroaldean aipatzen den kasuan.
Arau-haustearen ondorioz, lanbide ofizialetan aritzeko gabetze-aldi bat ezartzerik baldin badago, Estatuko Administrazioko organo eskudunari gertatutakoaren berri emanen zaio.
2. ATALA. ZEHAPEN PROZEDURAREN NONDIK-NORAKOAK
27. artikulua . Prozedura bereizia.
Zerga arloko zehapenak ezartzeko espediente berezi eta independiente bat irekiko da, subjektu arau-hauslearen zerga egoera egiaztatu eta ikertzeko irekitakotik bereizia. Instrukzioaldian interesatuari entzunaldia eman beharko zaio.
1. Prozedura ofizioz hasiko du eskumena duen funtzionarioak edo espedientea tramitatzen duen administrazio unitateko titularrak, nork bere kabuz nahiz goiko batek aginduta edo beste organo batzuek arrazoibidez eskatuta.
2. Zehapen prozeduraren hasieraren berri interesatuei eman beharko zaie, honako hauek adierazita:
a) Ustezko erantzulearen pertsona edo entitatea nor den.
b) Prozedura hasteko arrazoi izan diren gertaerak, horiek izan dezaketen kalifikazioa, legozkiekeen zehapenak eta horien kuantifikazioa.
b) Espedientea ebazteko eskumena duen organoa.
d) Alegazioak aurkezteko eta prozeduran entzunaldia izateko eskubidea dagoela aipatu beharko da, eta horretarako unea eta epeak.
3. Zehapen prozeduran subjektu arau-hauslearen edo arduradunaren zerga egoera egiaztatu eta ikertzeko jarduketetan irekitako espedientetik lortutako datu, froga edo inguruabarrak aintzat hartzen badira, entzunaldia baino lehen sartu beharko dira zehapen espedientean.
4. Entzunaldia baino lehen, interesatuek egoki iruditzen zaizkien alegazioak egin ditzakete eta bidezko agiri, egiaztagiri eta frogak ekarri.
Zehapen prozeduran norbaiten ordezkari gisa aritzeko, horretarako kreditazioa beharko da, Nafarroako Foru Komunitateko Tributu Ikuskapenari buruzko Erregelamenduko 23. artikuluan ezarritako moduan.
1. Zerga Administrazioari dagokio zerga arloko arau-hausteetan arau-hauslea erruduna dela ondorioztatzeko frogak aurkeztea.
Hori helburu, prozedura izapidatzen duen funtzionarioak zehagarri den erantzukizunik ba ote den jakiteko behar adina jarduketa eginen ditu ofizioz, eta ebazpena emateko behar diren froga, aitorpen eta txostenak erantsiko zaizkio espedienteari.
2. Jarduketak amaitu eta gero, prozedura izapidetzen duen funtzionarioak ebazpen-proposamen bat egingo du, zeinean finkatuko baititu, zioak emanez, egitateak eta beren kalifikazio juridikoa. Halaber, adieraziko da, hala badagokio, egitateak zer arau-hauste mota diren edo bestela proposatuko da arau-hausterik edo erantzukizunik ez dagoela aldarrikatzea. Halaber, erantzulea den pertsona edo entitatea zein den zehaztuko da, eta zer zehapen proposatzen den adieraziko da, zehapena mailakatzeko irizpideak ere esanez, eta berariaz jasoz Tributuei buruzko Foru Lege Orokorraren 71.3 eta 4 artikuluan ezarritako murriztapenak lortzea litekeena dela .
31. artikulua . Izapidearen egoera eta arduradunen identifikazioa.
Zehapen prozedura bitartean noiznahi, interesatuak ahalmena izanen du prozedura zein izapide-fasetan dagoen jakiteko, Tributuei buruzko Foru Lege Orokorreko 80. eta 81. artikuluetan ezarri bezala, hala nola prozeduraren izapidearen ardura duten zerga administrazioko agintari eta langileak nortzuk diren ezagutzeko.
32. artikulua . Interesatuei entzunaldia ematea.
1. Ebazpen proposamena zehapen prozedurako interesatuei jakinaraziko zaie. Bertan adieraziko da espedientea ikusgai jarriko dela eta hamabost eguneko epea dutela egoki iruditzen zaiena alegatzeko eta bidezko agiri, egiaztagiri eta frogak aurkezteko.
2. Alegazioak aurkezteko epea amaituta eta horiek aztertu ondoren, instruktoreak ebazpen proposamena igorriko dio espedientea ebazteko eskumena duen organoari, espedientean bildu diren agiri eta alegazioekin batera.
33. artikulua . Izapide laburtua.
1. Zehapen espedientea irekitzeko unean, organo eskudunak zehapen proposamena emateko elementu guztiak baldin baditu, proposamen hori espedientea irekitzeko erabakiari atxikiko zaio eta interesatuei jakinaraziko zaie, horren berri izan dezaten. Adieraziko zaie, orobat, espedientea ikusgai jarriko dela eta hamabost eguneko epea dutela egoki iruditzen zaiena alegatzeko eta bidezko agiri, egiaztagiri eta frogak aurkezteko.
2. Kudeaketa bulegoek izapidatzen dituzten prozeduretan, hamabost egun horietan alegaziorik aurkezten ez bada, edo alegazioak aurkezteari propio uko egiten bazaio, ebazpena diktatu dela ondorioztatuko da, proposamenaren alderdi guzti-guztiak mantenduta, eta horrela ohartaraziko zaie interesatuei proposamenaren jakinarazpenean.
Horren ondorioetarako, ebazpen proposamena ebazpena emateko eskumena duen organoak sinatu beharko du eta bertan adierazi beharko dira erabili daitezkeen inpugnazio bideak, horretarako epeak eta organoak, hala nola zehapena ordaintzeko tokia, epea eta modua.
3. Tributu Ikuskapenak izapidaturiko prozeduretan Nafarroako Foru Komunitateko Tributu Ikuskapenari buruzko Erregelamenduko 63.8 artikuluan ezarritakoari begiratuko zaio.
1. Prozedura izapidatu duen funtzionarioaren proposamena eta espedientean bildu diren agiri, proba eta alegazioak ikusirik, organo eskudunak ebazpen arrazoitua emanen du.
2. Zehapen prozeduraren ebazpenak hauek denak edukiko ditu: gertaeren finkapena, egindako proben balioespena, egindako arau-hausteak eta zer pertsona edo erakunde den erantzulea, baita ezartzen den zehapena ere, mailakatze-irizpideak zein diren esanez, baita bidezkoak diren murriztapenak ere, hala badagozkio, foru dekretu honen 20. eta 20. bis artikuluek ezartzen dutenarekin bat, edo bestela arau-hausterik edo erantzukizunik ez dagoelako aldarrikapena.
Ebazpenean ezin izanen da onartu espedientean ez dagoen gertaerarik, hain zuzen, prozedura bidean zehazturikoak eta, kreditatu ondoren, prozedurari erantsiak.
Ebazpen hori interesatuei jakinaraziko zaie. Bertan, honako hauek bilduko dira: erabil daitezkeen inpugnazio bideak, horretarako epeak eta organoak eta ezarritako zehapena ordaintzeko tokia, epea eta modua .
3. Zehapena ezartzeko egintzaren aurka errekurtsoa edo erreklamazioa jar daiteke, baina interesatuak zerga kuotaren aurkako erreklamazioa ere jartzen badu, bi errekurtso edo erreklamazioak bakar batean bilduko dira. Horren ondorioetarako, ez da bide izanen zehapena ezartzeko egintzaren aurka jartzen den errekurtso edo erreklamazioa kuota, korritu eta errekarguen likidazioaren aurka jarritakoaz bestelakoa izatea.
35. artikulua . Ebazpena emateko epea .
Prozedura ebazteko gehieneko epea sei hilabetekoa da, interesdunari zehapen-espedienteari hasiera eman zaiola jakinarazten zaionetik kontatzen hasita. Epe hori eten dela joko da interesdunei egozten ahal zaizkien izapide-luzamenduak direla-eta. Epe hori amaitzen denean, eta ebazpena eman ez bada, prozedura iraungi dela ulertuko da, eta jarduketak artxibatu egingo dira, ofizioz edo interesdunak hala eskatuta, prozedurari berriz hasiera emateko aukera baztertu gabe, zerga Administrazioaren akzioa preskribatzen ez den arte, dagokion zehapena jartzeko.
Zehapen prozedura hasita dagoela, haren jatorrian dagoen ikuskapen prozeduran gertatzen bada Tributuei buruzko Foru Lege Orokorraren 139. artikuluaren 4. edo 5. apartatuetan aurreikusitako inguruabarretako bat, zehapen prozedura amaitzeko epea luzatu eginen da, apartatu horietan xedatutakoarekin bat bidezkoa den denboraz.
36. artikulua . Diruzkoak ez diren zehapenak.
1. Isunak ez diren beste zehapen batzuk jartzeko, espediente bereizi bat irekiko da, zerga arloko arau-hauste arin edo larriengatik jartzen diren diru-zehapenak ezartzeko izapidatzen den espedientetik aparte.
2. Kasua bada, espedientea hasiko da horren jatorri den administrazio espedientearen ebazpena administrazio bidean irmo bilakatu eta gero.
3. Horrelako prozedurei Foru Dekretu honetako 30, 32 eta 34. artikuluetan xedatutakoa aplikatuko zaie, espedientearen hasierari, interesatuentzako entzunaldiari eta espedientearen ebazpenari dagokienez.
4. Tributuei buruzko Foru Lege Orokorreko 57. artikuluan preskripzioa eteteari dagokionez adierazten dena deusetan galarazi gabe, diruzkoak ez diren zehapenak jartzeko preskripzio-epeak subjektu pasiboari formalki jakinarazitako edozein administrazio egintza dela-eta etengo dira, zehapen haiekin lotutako diru-zehapenak ezartzera zuzenduta dagoenean.
VII. KAPITULUA. ZEHAPENEN BETEARAZPENA ETETEA
37. artikulua . Zehapenen exekuzioa etetea .
1. Zerga-zehapenen betearazpena besterik gabe etenda geldituko da, bermea aurkeztu beharrik izan gabe, zehapenen aurka bidezkoa den berraztertzeko errekurtsoa edo erreklamazio ekonomiko-administratiboa garaiz eta behar bezala aurkezten bada, eta ez dira exekutatuko administrazio bidean irmo bihurtu arte.
2. Errekurtsoa edo erreklamazioa ebatzi behar duten organoek automatikoki aplikatuko dute etete hau, zergapekoak eskatu beharrik gabe.
3. Ez da berandutze-interesik eskatuko administrazio bidea amaitzen duen ebazpena jakinarazi eta hasten den borondatezko aldian ordainketa epea amaitu bitarte igarotako denborarengatik; aitzitik, epe hori amaitu eta biharamunetik aurrera eskatuko dira berandutze-interesak.
4. Artikulu honetan xedatutakoa erantzukizun bideratua duten zerga-zehapenak eteteko aplikatuko da, bai zehapena subjektu arau-hausleak errekurritzen duenean, bai Tributuei buruzko Foru Lege Orokorraren 29.4 artikuluan xedatutakoa erabilita, erantzuleak errekurritzen duenean. Agindu hau dela-eta, ez da inoiz automatikoki etenda geldituko bideratutako zerga zorra.
Tributuei buruzko Foru Lege Orokorraren 30.4 artikuluan aurreikusitako zorrak ordaintzeko erantzukizunak ere ez dira etenen agindu honen arabera.
38. artikulua . Administrazio bidean erabakitako zehapenaren betearazpenaren etenaldia mantentzea.
1. Administrazio bidea amaituta, dirubilketa organoek ezin izanen diete premiamendu prozedurako jarduketei hasiera edo jarraipena eman, administrazioarekiko auzi-errekurtsoa jartzeko epea amaitu arte. Epe horretan interesatuak organo horri jakinarazten badio errekurtsoa jarri duela eta, horrekin batera, betearazpena eteteko eskatzen eta zorra bermatzeko kauzioa eskaintzen baldin badu, prozedurak etena segituko du, organo judizialak hartu beharreko erabakiaren zain.
Xedapen Gehigarria. Zerga kudeaketa organoek emandako behinbehineko likidazioak. Ofiziozko behinbehineko likidazioaren proposamena ofizioz bidaltzea eta zehapena ezartzeko proposamena aldi berean bidaltzea .
1. Tributuei buruzko Foru Lege Orokorraren 113. artikuluak aipatzen dituen ofiziozko behin-behineko likidazioen prozeduretan, zerga likidazioa subjektu pasiboari egindako proposamenaren arabera jakinarazi zaiola zergapekoari ulertuko da baldin eta, hamabost eguneko epean, proposamena jakinarazten den egunetik kontatzen hasita, ez badu alegaziorik aurkezten, edo, epe horren barruan, alegazioak aurkezteari berariaz uko egiten badio. Ordainketa egiteko eta errekurtsoa edo erreklamazioa aurkezteko epeak kontatzen hasteko eguna izanen da likidazioaren jakinarazpena egin dela ulertzen den eguna.
Horretarako, likidazio proposamenak adierazi beharko du likidazioaren jakinarazpena egin dela noiz eta nola egin den, aurreko paragrafoan ezarritakoarekin bat etorriz, baita aurkatzeko moduak eta epeak ere, eta zerga zorra zer epetan eta nola ordaindu behar den.
2. Aurreko apartatuak aipatzen dituen ofiziozko behin-behineko likidazioen prozeduretan zerga arloko arau-hausteak izan litezkeen egitateak edo gorabeherak ageri badira, eta, hala badagokio, zehapen prozedura bati hasiera emateko aski arrazoi badira, zerga likidazioaren egintza administratiboak emateko organo eskudunek hasiera emango diote zehapen prozedurari, foru dekretu honen 24. artikuluak ezartzen duenarekin bat etorriz.
3. Aurreko apartatuak aipatzen dituen egintzak edo gorabeherak gertatu ez direnean, zerga likidazioaren proposamenean jasoko da ez dagoela arrazoirik zehapen prozedura bati hasiera emateko.
4. Ofiziozko behin-behineko likidazioen prozedura bati hasiera emateko egitate edo gorabeherarik dagoenean, baita zehapen prozedura bati hasiera emateko ere, bi prozedurak aldi berean egiten ahalko dira, arau hauei jarraikiz:
1. Behin-behineko kitapenaren proposamena eta zehapena ezartzekoa aldi berean bidaliko dira.
2. Zerga likidazioa eta zehapenarena egin diren proposamenen arabera jakinarazi direla ulertuko da baldin eta, hamabost eguneko epean proposamenak jakinarazi zirenetik, ez bazaie alegaziorik aurkezten, edo epe horren barruan, berariaz egiten bazaio uko alegazioak aurkezteari. Ordainketa egiteko eta errekurtsoa edo erreklamazioa aurkezteko epeak kontatzen hasteko eguna, zerga likidazioa eta zehapena jakinarazi direla ulertzen den eguna izanen da.
3. Baldin eta epe horretan bi proposamenei alegazioak aurkezten bazaizkie, bi prozeduretan ebazpen bana eman beharko da.
4. Baldin eta epe horretan alegazioak aurkezten bazaizkio zehapen proposamenari, bakarrik, prozedura horretan ebazpen bat eman beharko da. Kasu honetan, ofiziozko behin-behineko likidazio proposamena zerga likidazio bihurtuko da.
5. Baldin eta epe horretan alegazioak aurkezten bazaizkio likidazio proposamenari, bakarrik, zehapen proposamenari ere aurkeztu zaizkiola ulertuko da, eta horrek ekarriko du bi prozeduretan ebazpen bana ematea.
Foru Dekretu honek Nafarroako ALDIZKARI OFIZIALean argitara eman eta biharamunean hartuko du indarra.
Nolanahi ere, V. eta VI. kapituluetan eta 20. artikuluan ezarritakoa Dekretuak indarra hartze-egunean egiaztapen lanen emaitzak aktetan bildu gabe dituzten egiaztapen prozedurei aplikatuko zaie.
Foru Dekretu honek indarra hartu aurretik egindako arau-hausteak ez dira kontuan hartuko zerga arloko arau-hausteetan berregilea izatean oinarritzen den mailaketa irizpidea ezartzeko.
Iruñean, bi mila eta bateko ekainaren hamaikan.-Nafarroako Gobernuko lehendakaria, Miguel Sanz Sesma.-Ekonomi eta Ogasun kontseilaria, Francisco J. Iribarren Fentanes.
Iragarkiaren kodea: A016191
