LEXNAVARRA
152/2001 FORU DEKRETUA, EKAINAREN 11KOA, NAFARROAKO FORU KOMUNITATEKO ADMINISTRAZIOAREN TRIBUTU IKUSKAPENARI BURUZKO ERREGELAMENDUA ONESTEN DUENA 
BON N.º 73 - 15/06/2001
ERANSKINA. NAFARROAKO FORU KOMUNITATEKO TRIBUTU IKUSKAPENARI BURUZKO ERREGELAMENDUA
LEHEN KAPITULUA. TRIBUTU IKUSKAPENAREN EGINKIZUNAK ETA ANTOLAKETA
- 1. artikulua. Egiaztapena eta ikerketa.
- 2. artikulua. Tributu Ikuskapenaren eginkizunak
- 3. artikulua. Antolaketa.
- 4. artikulua. Zerbitzuko zuzendariaren eginkizunak.
- 5. artikulua. Unitateko buruen eginkizunak.
- 6. artikulua. Ikuskapeneko langileen eskubideak eta eskumenak.
- 7. artikulua. Ikuskapeneko langileen eginkizuna.
- 8. artikulua. Erregelamendu aplikagarria.
BIGARREN KAPITULUA. IKUSKAPEN EKINTZAK
1. ATALA. IKUSKAPEN EKINTZEN PLANIFIKAZIOA
- 9. artikulua. Ikuskapen jarduketak
- 10. artikulua. Ikuskapen plana
2. ATALA. JARDUKETA MOTAK
- 11. artikulua. Zerrenda.
- 12. artikulua. Egiaztatzeko eta ikertzeko jarduketak.
- 13. artikulua. Egiaztatzeko eta ikertzeko jarduketen irismena.
- 14. artikulua. Informazioa lortzeko jarduketak.
- 15. artikulua. Informazioa edo aholkua emateko jarduketak.
- 16. artikulua. Beste jarduketa batzuk.
3. ATALA. JARDUKETEN TOKIA ETA DENBORA
- 17. artikulua. Jarduketen tokia.
- 18. artikulua. Jarduketa batzuk egiteko tokia ezartzeko irizpidea.
- 19. artikulua. Jarduketen denbora.
HIRUGARREN KAPITULUA. TRIBUTUPEKOEN ORDEZKAPENA
- 20. artikulua. Tributupekoen eskuhartzea.
- 21. artikulua. Tributupekoa ikuskapen jarduketetan egotea.
- 22. artikulua. Jarduteko gaitasuna.
- 23. artikulua. Borondatezko ordezkapena.
- 24. artikulua. Borondatezko ordezkapenaren ondoreak.
LAUGARREN KAPITULUA. IKUSKAPEN EKINTZEN HASIERA ETA GARAPENA
- 25. artikulua. Hasteko moduak.
- 26. artikulua. Ikuskapen jarduketen hasiera.
- 27. artikulua. Ikuskapen jarduketen epearen iraupena. Epeak zenbatzea. Epea etetea eta luzatzea .
- 28. artikulua. Prozeduraren iraupenaren gehieneko epea amaitu eta gero jarduketak egitea .
- 29. artikulua. Ikuskapenak zer kasutan ezin dezakeen egin jarduketarik zergapekoarekin .
- 30. artikulua. Epeak ez betetzearen ondorioak eta ikuskapen jarduketen atzeraeragina .
- 31. artikulua. Ikuskapen jardueren garapena.
- 32. artikulua. Tributupekoa agertzea.
- 33. artikulua. Funtzionarioek ikuskapen jarduketetan gelditzea.
- 34. artikulua. Egiaztapen orokorra egiteko eskabidea.
- 35. artikulua. Interesatuaren alegazioak eta aktak egin baino lehenago entzunaldiak.
- 36. artikulua. Kautelazko neurriak.
BOSGARREN KAPITULUA. TRIBUTUAK IKUSKATZEKO AHALMENAK
- 37. artikulua. Interesatuaren agirien azterketa.
- 38. artikulua. Tributu Ikuskapenak informazioa lortzeko egindako eskabideak.
- 39. artikulua. Banku edo kredituko trafikoan diharduten pertsona edo erakundeetatik hurbil informazioa lortzeko jarduketak.
- 40. artikulua. Finketan sartzea eta horiek aztertzea.
- 41. artikulua. Tributu Ikuskapenaren beste ahalmen batzuk.
- 42. artikulua. Tributu Ikuskapenaren jarduketaren aurka egitea.
SEIGARREN KAPITULUA. IKUSKAPEN JARDUEREN BUKAERA
- 43. artikulua. Bukaera.
- 44. artikulua. Formalizazioa.
ZAZPIGARREN KAPITULUA. IKUSKAPEN JARDUERAREN AGIRIAK
1. ATALA. XEDAPEN OROKORRAK
- 45. artikulua. Arau orokorrak.
2. ATALA. JAKINARAZPENAK, EGINBIDEAK ETA TXOSTENAK
- 46. artikulua. Jakinarazpenak.
- 47. artikulua. Eginbideak.
- 48. artikulua. Txostenak.
3. ATALA. AKTAK
- 49. artikulua. Ikuskapen aktak.
- 50. artikulua. Aurretiazko aktak.
- 51. artikulua. Zorpekoan ez dauden aktak.
- 52. artikulua. Egiaztapeneko eta adostasuneko aktak.
- 53. artikulua. Zorpekoan egon ez eta tributupekoaren zerga egoera egokitzen duten aktak.
- 54. artikulua. Akta motak, horien tramitazioaren ondoreetarako.
- 55. artikulua. Adostasuneko aktak.
- 56. artikulua. Desadostasuneko aktak.
- 57. artikulua. Aurretiaz eraturiko froga duten aktak.
- 58. artikulua. Aktak egiteko tokia.
4. ATALA. AKTEN TRAMITAZIOA ETA HORIEN ONDORIOZKO TRIBUTU LIKIDAZIOAK
- 59. artikulua. Akten ondoriozko tributu likidazioak.
- 60. artikulua. Ikuskapen akten ondoriozko tributu likidazioen aurkako errekurtsoak eta erreklamazioak.
- 61. artikulua. Tributu Ikuskapenaren akten eta eginbideen froga balioa.
- 62. artikulua. Tributu Ikuskapeneko funtzionarioek eginbideak eta aktak sinatzea.
ZORTZIGARREN KAPITULUA. TRIBUTU ZEHAPENAK EZARTZEA
- 63. artikulua. Diru zehapenak ezartzea, tributu urratze larriak egitearen eraginez .
- 64. artikulua. Diru zehapenak ezartzea, tributu urratze arinak egitearen eraginez.
- 65. artikulua. Diruzkoak ez diren zehapenak ezartzea, tributu urratze arinak edo larriak egitearen eraginez.
BEDERATZIGARREN KAPITULUA. XEDAPEN BEREZIAK
- 66. artikulua. Tributu oinarrien zeharkako kalkulua.
- 67. artikulua. Ogasun publikoaren kontrako delitu zantzuak daudenean egin beharreko jarduketak .
- 67.bis artikulua. Salbuespenak, ogasun publikoaren kontrako delitu zantzuak daudenean likidazioak egiteko, eta jarraitu beharreko tramitazioa .
- 67. ter artikulua. Ikuskapen prozedura tramitatzeko arau orokorrak delituarekin lotutako likidaziorik bada .
- 67. quater artikulua. Delituari lotutako likidazioaren kalkulua eta tramitazioa, ogasun publikoaren aurkako delituari lotutako kuotaren kasuan, eta delituari lotuta ez dagoen kuotaren kasuan .
- 67. quinquies artikulua. Ebazpen judizialak delituari lotutako likidazioan dituen ondorioak .
- 68. artikulua. Tributu Ikuskapenaren jarduketak .
- 69. artikulua. Zerga onurak .
- 70. artikulua. Berandutza interesen likidazioa.
- 71. artikulua. Erantzule solidarioak dituzten egiaztapen eta ikerketa jarduketak.
- 72. artikulua. Zergakontsolidazioaren araubidean tributatzen duten entitateen egiaztapena .
- 73. artikulua. Jarduteko gaitasun nahikorik ez duten subjektu pasiboak eta tributu urratzeei loturiko beste kasu berezi batzuk.
- 74. artikulua. Dirulaguntzak.
- 75. artikulua. Legeiruzurra.
- Xedapen Gehigarria
Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoaren 45.3 artikuluan ezartzen da Nafarroak bere tributu araubidea mantentzeko, ezartzeko eta arautzeko ahalmena daukala, kasuan kasuko Hitzarmen Ekonomikoan ezarritakoa galarazi gabe.
Horrenbestez, legezko testu horretan ezartzen denez, Foru Komunitateak ahalmena dauka bere "tributu araubide berezia" ezartzeko; hau da, araubide horren bitartez, tributuak arautzeko ahalmen zehatzak eta jakinak eduki eta, gainera, sistema osoa eta bateratua edukiko du, zerga horien kudeaketa osoa barruan hartzen duen sistema, hain zuzen ere.
Estatuarekiko Hitzarmen Ekonomikoaren 4. artikuluan, Nafarroako Ogasun Publikoak tributuak ordainarazteko, kudeatzeko, likidatzeko, biltzeko, ikuskatzeko eta berrikusteko dituen ahalmenak eta eskumenak ezartzen dira. Bertan, Estatuko Ogasun Publikoaren ahalmenekiko parekatzea ezartzen da.
Konstituzioak ezartzen du autonomi erkidego bakoitzak duen ahalmen ekonomikoaren arabera gastu publikoetan lagundu behar duela eta Estatuko gainerako erkidegoen antzeko presio eraginkor orokorra mantendu behar duela; horren ondorioz, Foru Komunitatean tributu ikuskapen eraginkorra behar da. Horri dagokionez, tributu ikuskapenak lagundu behar du zerga eginkizunak behar bezala eta oraingo beharrizanen arabera bete daitezen; horrela, justizia ez da bazter geldituko, zergadun batzuek eta besteek zerga erregelamendua modu desberdinean aplikatzen badute, dela Tributu Administrazioarekiko duten egoera bereziagatik, dela tributuen kontrol egokia edukitzeko dituzten aukerengatik.
Nafarroako Foru Diputazioak 1981eko abuztuaren 27an harturiko erabakiaren bitartez, Nafarroako Ogasun Ikuskapenaren Antolaketari, Funtzionamenduari, Prozedurari eta Jarduketari buruzko Erregelamendua onetsi zen; erabaki horrek esparru arau-emaile egokia sortu eta garai hartako ikuskapen jarduera antolatzen lagundu zuen. Zalantzarik gabe, arau hori oso garrantzitsua izan da, Foru Komunitatearen tributu kudeaketaren egitura osoaren barruan, indarrean egon den ia hogei urteetan. Hala eta guztiz ere, denboraren joanaren eta Tributuei buruzko Foru Lege Orokorrak aldarrikatzearen eraginez, lege hori ordeztu egin behar da, ikuskapen erregelamendu berria arauen eta gizartearen errealitate berrira egokitu ahal izateko.
Tributuei buruzko Foru Lege Orokorreko Zioen Azalpenean foru tributuen kudeaketan gauzatuko diren aldaketa oso garrantzitsuak aipatzen dira: "Foru Lege honekin errotik erreformatu nahi da Foru Komunitateko tributuen kudeaketa. Horretarako ezinbesteko aldaketak egin beharko dira zerga ikuskapeneko prozedura arauetan eta bai Nafarroako bide ekonomiko-administratiboan ere. Beharrezkoa izanen ere da marko berria itxuratzea tributu zehapenak ezartzeko eta hainbat testu banandutan dauden diru biltze arauak multzotu eta sistematizatzea."
Beste alde batetik, Tributuei buruzko Foru Legearen aldarrikapena abiapuntua izan behar da tributu prozedurak sakon aldatzeko; gainera, lagungarria izango da zergadunaren segurtasun juridikoa handitzeko, baita Administrazioaren tributu makineria modernizatzeko ere; horrela teknologia berrietara egokitu ahal izango da.
Hori horrela, Tributuei buruzko Foru Lege Orokorreko IV. tituluko VI. kapituluan tributu ikuskapena arautu da, eta bertan berritasun handiak jaso dira; horiek Erregelamendu honetan adierazita daude:
-Tributu Ikuskapenak egiaztapen eta ikerketa jarduketen ondoriozko tributu likidazioak egin ahal izango ditu.
-Ikuskapen aktetan ez dira egindako urratzeak eta horien ondoriozko zehapen aplikagarriak aipatu behar, banaketa erradikala ezartzen baita egiaztapen prozeduraren eta zehapen espedientearen artean.
-Ikuskapen partzialaren menpe dagoen tributupekoak egiaztapen hori orokorra izatea eskatu ahal izango dio tributu administrazioari, egiaztapen jarduketaren menpeko zergari eta ekitaldiari dagokienez.
-Zergadunek aurkezten dituzten tributu aitorpenak egiaztatzeko eskatu ahal izango dute. Administrazioak jarduketak sei hilabeteko epean hasi ezean, edo hamabi hilabeteko epean amaitzen ez baditu, aurkezturiko aitorpenak zuzentzat joko dira.
-Ikuskapen jarduketek ezin izango dute hamabi hilabetetik gora iraun, baina epe hori luzatu egin daiteke, gorabehera jakin batzuk biltzen direnean.
Beste alde batetik, tributu ikuskapen eraginkorra eta errespetatua egon arren, zergadunek segurtasun juridikoaren eremuaren barruan bete beharko dituzte beren tributu betebeharrak; gainera, ahalik era erosotasun handienarekin bete beharko dituzte, "zeharkako zerga presioa" ahalik eta gehien murriztuz. Hori guztia Tributuei buruzko Foru Lege Orokorrean ezarritako agindua betetzeko egin beharko da, hain zuzen ere, Administrazioaren jarduketak tributupekoari kalte ahalik eta txikiena egiteko moduan egin behar direla dioen agindua betetzeko, baldin eta horrela tributu betebeharrak betetzeari kalterik egiten ez bazaio.
Beharrizan horiek betetzeko, Nafarroako Foru Komunitateko Tributu Ikuskapenari buruzko Erregelamendua onetsi da, Tributuei buruzko Foru Lege Orokorreko 130etik 139ra bitarteko artikuluak garatuz.
Erregelamenduak bederatzi kapitulu ditu.
Lehen kapituluan Tributu Ikuskapenaren eginkizunak azaltzen dira eta nola antolatuta dagoen zehazten da. Zerbitzuko zuzendariaren eta unitateburuen eginkizunak zehaztu dira, bai eta ikuskatzaileen eskubideak eta betebeharrak ere.
Bigarren kapituluaren helburua ikuskapen jarduketak mugatzea da; kapitulu hori hiru ataletan banaturik dago:
-Ikuskapen jarduketen planifikazioa.
-Jarduketa motak.
-Jarduketen tokia eta denbora.
Ikuskapen eginkizunak, bestalde, kasuan kasuko ikuskapen planetan oinarriturik egongo dira. Ekonomia eta Ogasun Departamentuak urteroko ikuskapen plana egingo du, irizpide sektorialetan, konparagarrietan edo kuantitatiboetan oinarrituta, eta horiek kontuan hartu beharko dira tributupekoak aukeratzeko. Halaber, beste Tributu Administrazio batzuekiko plan bateratuak ere ezar daitezke. Erregelamenduan plana egiteko modua zehazten da; hori, barruko antolaketa eta eraginkortasuna hobetzeko modutzat ez ezik, zergadunaren segurtasun juridikoa handitzeko modutzat ere ulertu behar da. Administrazioak ikuskapen plana urtero gidatzen duten irizpide orokorrak jendaurrean azalduko ditu.
Ikuskapen jarduketei dagokienez, egiaztapen eta ikerketa jarduketen irismena berariaz aipaturik dago. Banaketa argia ezartzen da jarduketa orokorren eta partzialen artean.
Kapitulu honetako 3. atalean, ikuskapen denborak tokiaren eta denboraren aldetik dituen ezaugarriak aipatzen dira, tributupekoei ahalik eta eragozpen gutxien sortu ahal izateko.
Hirugarren kapitulua subjektu pasiboen ordezkaritzari buruzkoa da; bertan, horri buruzko zenbait alderdi azaltzen dira: tributu ikuskapenari kasu nork egin behar dion, tributupekoak noiz egon behar diren eta ordezkapena ematearen ezaugarriak, aintzat hartuta alderdi batzuetan arauketa hau baliozkoa izango dela, ireki daitezkeen zehapen espedienteko ordezkapenerako.
Pertsona fisikoek eta juridikoek beren kontura edo ordezkari baten bitartez jardun dezakete. Ordezkaritza tributupekoek, horien ordezkariek eta pertsona juridikoen ordezkariek emandakoa izan daiteke.
Ikuskapen aktak sinatzeko, ordezpenak baliozko egiaztapena beharko du. Tributu Ikuskapenaren jarduketak, tributupekoaren ordezkariaren aurrean egindakoak, ordezkari horrek egin dituela ulertuko da.
Laugarren kapituluan ikuskapen jarduketak hasteko eta garatzeko moduak adierazten dira. Horiek asteko ohiko modua ikuskapen planaren betearazpena da, horren kasuan kasuko aldaketak egin ondoren. Era berean, ikuskapen jarduketak tributupekoak eskatuta ere has daitezke, Tributuei buruzko Foru Lege Orokorreko 138. artikuluan ezarritakoaren arabera.
Ikuskapen jardueren garapenari dagokienez, horien iraupenaren epe orokorra, zenbaketa eta kasu jakinetako aplikazioa arautzen da. Justifikaturiko etenaldiak eta zergadunari egozteko moduko luzapenak berariaz nabarmentzen dira, epearen zenbaketa hori argitu ahal izateko.
Egiaztapen eta ikuskapen jarduketek bukatu arte jarraitu beharko dute, legez ezarritako epea amaitu arren. Hala eta guztiz ere, ikuskapen eta likidazio jarduera sei hilabetean justifikaziorik gabe etenez gero, preskripzioa ez etendakotzat hartuko da, egindako jarduketen ondorioz.
Kapitulu horretan alegazioak aurkezteari eta entzunaldiaren tramiteari buruzko arloa ere aztertzen da; fase horretan, espedientea agerian jarriko da eta ikuskapen aktan egingo den proposamenaren irismena adieraziko. Entzunaldiaren tramitea Tributuei buruzko Foru Lege Orokorrean ezarritakoaren testuinguruan ulertu behar da, baldin eta prozeduran interesatuak aurkezturiko egitateak, alegazioak eta probak bakarrik agertzen eta kontuan hartzen badira. Tributu Ikuskapenak harturiko kautelazko neurriak ere arautuko dira, hain zuzen ere, zerga egoeraren erabateko erregularizazioa egiteko behar diren agiriak edo aurrekariak ez galtzeko edo aldatzeko har daitezkeen kautelazko neurriak.
Bosgarren kapitulua tributu ikuskapenaren ahalmenei buruzkoa da, eta bertan hiru alderdi nabarmentzen dira:
a) Interesatuen agiriak aztertzea. Tributupekoek euren kontabilitate nagusia eta laguntzailea jarri behar dute tributu ikuskapenaren esku; era berean, beraien tributu aitorpenetan jasotako egitateak eta gorabeherak frogatzeko behar diren agiriak eta, behar izanez gero, artxibo elektronikoak ere tributu ikuskapenaren esku utzi beharko dituzte.
b) Informazioa lortzeko errekerimendua egitea. Tributu Ikuskapenak beste pertsona edo erakunde batzuei buruzko datuak edo aurrekariak emateko eskatu ahal izango dio edozein pertsona edo erakunderi, Tributuei buruzko Foru Lege Orokorreko 103. eta 104. artikuluetan ezarritakoaren arabera. Hala eta guztiz ere, jakinarazpenen sekretuan, notaritzako protokoloan eta lanbideko sekretuan oinarrituriko salbuespen batzuk ezarri dira. Banku edo kreditu trafikoan diharduten erakundeetan informazioa lortzeko egindako jarduketek berezitasun batzuk eduki eta kautela zehatzak ezartzen dituzte, kontu korronteen, gordailuen eta maileguen edo kredituen mugimenduak jakin nahi direnerako. Errekerimendua egiteko, ikertu nahi diren kontuak edo eragiketak, ukituriko subjektuak eta kasuan kasuko denbora-aldia zehaztu beharko dira.
Horri dagokionez, egiaztatu egin behar da ikuskapena informazioa ahalik eta osoena lortzeko aukeran oinarriturik egon beharko dela, zergadunen jarduerei dagokienez, Legean ezarritako salbuespenak kontuan hartuz.
c) Zergapetu beharreko jarduera garatzen deneko egoitzan eta lokaletan nahiz tokietan sartzea eta horiek miatzea.
Egoitzan sartzeari dagokionez, interesatuak horretarako baimena ematen ez duenean, epailearen agindua beharko da.
Negozioko lokaletan sartzeko, beste alde batetik, Ekonomia eta Ogasun kontseilariaren baimen idatzia behar da, baldin eta interesatuak edo finkak zaintzen dituen pertsonak tributu ikuskapenari sartzen utzi nahi ez badio; halakoetan, bidezkoak diren kautelazko neurri guztiak hartu ahal izango dira.
Seigarren kapitulua ikuskapen jarduketak bukatzeari eta formalizatzeari buruzkoa da; horretarako, beharrezko datu eta froga guztiak lortu behar dira, beharrezko tributu kudeaketako egintza guztiak oinarritzeko.
Zazpigarren kapituluaren helburua ikuskapen jarduketen agiriak arautzea da, eta ikuskapen aktei buruzko aipamen berezia egiten du. Tributu Ikuskapeneko jarduketak eginbideetan, jakinarazpenetan, txostenetan eta aktetan dokumentatuko dira.
Aktak, beste alde batetik, egiaztapeneko jarduketen emaitzak biltzen dituzten agiriak dira; kasua bada, tributupekoaren zerga egoerari dagokion erregularizazio egokia proposatzen dute.
Aktak aurretiazkoak edo behin betikoak izan ditezke, sortzen duten likidazioaren arabera. Aurretiazko aktek behin-behineko likidazioak sortuko dituzte, eta behin betiko aktek, berriz, behin betiko likidazioak.
Halaber, zorra agerian jartzen duten eta jartzen ez duten aktak ere bereizten dira.
Tributupekoak onartu edo ez onartzearen arabera, aktak adostasunekoak edo desadostasunekoak izan daitezke. Era berean, aurretiaz eraturiko froga duten aktak ere mugatu egingo dira.
Adostasuneko aktetan, interesatuak adostasuna ematen dio tributu ikuskapenak egindako likidazio proposamenari. Hala eta guztiz ere, tributupekoak aktan jasota dauden likidazioak aurkatu ahal izango ditu, hamabost eguneko epean, aktak sinatzen direnetik zenbatzen hasita. Kasu horretan, tributu likidazioa egindakotzat hartuko da, aktan hilabete igarotzearen ondorioz jasotako proposamenaren arabera, epe horretan Zerbitzuko zuzendariak ebazpen berezia ematen duenean izan ezik, baldin eta ebazpen horretan akats materialak zuzendu, administrazio espedientea edo akta eraginkortasunik gabe utzi eta egindako jarduketak osatzeko agindua ematen bada.
Desadostasuneko aktetan, interesatuak ez du akta sinatu nahi; edo, sinatuta ere, ez dio adostasunik ematen aktan jasotako erregularizazio proposamenari. Kasu honetan, Zerbitzuko zuzendariak (akta, luzapen txostena eta interesatuak egindako alegazioak aztertu ondoren) kasuan kasuko administrazio egintza emango du.
Adostasuneko akten eta tributu ikuskapenak emandako gainerako likidazio egintzen proposamenari jarraikiz sorturiko tributu likidazioen aurka berraztertzeko edo erreklamazio ekonomiko-administratiboko errekurtsoa jarri ahal izango da hilabeteko epean, Tributuei buruzko Foru Lege Orokorrean ezarritakoaren arabera.
Zortzigarren kapitulua tributu zehapenak ezartzeko prozedurari buruzkoa da, eta bertan urratze arinak eta larriak bereizten dira; era berean, urratze arinak edo larriak egitearen ondoriozko zehapen ez diruzkoak ezartzeari buruzkoa ere bada.
Tributu zehapen larriak egitearen ondoriozko diruzko zehapenak ezartzen direnean, zehapen espedientea ebazteko eskumena Zerbitzuko zuzendariak edukiko du. Zenbat ikuskapen akta hasi, hainbat zehapen espediente hasiko dira; hala eta guztiz ere, arau-haustearen zioak berdinak direnean, hasieran eta irekieran pila daitezke, nahiz eta horien ebazpena banakakoa izan, jar daitezken errekurtsoak desberdinak izan daitezke eta.
Adostasun aktak direnean, likidazioa egindakotzat jotzen denetik hilabete igarotzen denean, edo desadostasun aktetan ebazpena ematen denetik epe hori igarotzen denean, zehapen prozedura hasteko agindurik eman ez bada, hori geroago hasi ahal izango da, Tributuei buruzko Foru Lege Orokorrean administrazio egintzak berrikusteari buruz ezarritako kasuetan izan ezik.
Urratzaileak edo arduradunak tributu kuotari buruzko erregularizazio proposamenarekiko adostasuna eman badu, baita zehapen proposamenarekiko adostasuna eman duenean ere, zehapen espedientearen ebazpenean zehapenaren zenbatekoaren % 40ko murrizketa aplikatuko da. Horrela, Tributuei buruzko Foru Lege Orokorreko 71.3 artikulua beteko da; artikulu horretan ezarritakoaren arabera, tributu arloko urratze larrien ondoriozko zehapenen zenbatekoa % 40an murriztuko da, urratzaileak edo arduradunak formulatzen diren erregularizazio nahiz zehapen proposamenekiko adostasuna adierazten duenean.
Zergadunak ebazpen proposamenekiko adostasuna ematen duenean, ebazpen hori hilabeterako emandakotzat hartuko da, epe hori adostasuna adierazi denetik zenbatzen hasita, baldin eta epe horretan Zerbitzuko zuzendariak proposameneko akats materialak zuzentzen ez baditu, proposamen hori eraginkortasunik gabe uzten ez badu edo berariazko ebazpenik ematen ez badu, ebazpen proposamen hori berresteko.
Zergadunak ebazpen proposamenarekiko desadostasuna agertzen duenean, Zerbitzuko zuzendariak arrazoituriko ebazpena emango du, aldez aurretik jarduketak handitzeko agindu ahal izatearen kalterik gabe. Zehapenak ezartzeko erabakiaren aurka, berreztertzeko errekurtsoa edo erreklamazio ekonomiko-administratiboa jarri ahal izango da.
Tributu urratze arinen ondoriozko zehapenak eta diruzkoak ez diren zehapenak ezartzeari dagokionez, tributu arloko arau-hausteen eta zehapenen araubidea garatzen duen Foru Dekretuan ezarritakoaren arabera jardungo da.
Araudia, beste alde batetik, zenbait alderdi berezi arautzeari buruzko bederatzigarren kapituluarekin osatzen da; alderdi horien artean, aipagarriak dira tributu oinarrien zeharkako kalkulua, delitu fiskala dagoenean erruaren hainbestekoa Epai Organo eskudunari egozteko prozedura, Estatuko tributu ikuskapenekiko koordinazioa, tributu ikuskapenaren eskumenak (zerga onurak kontrolatzeko kasuetan), berandutza interesen likidazioa, elkartasunezko arduradunekiko egiaztapen nahiz ikerketa jarduketak, subjektuen egiaztapena (sozietate taldeen araubidean), tributu ikuskapenaren jarduketak (dirulaguntzen kontrolean) eta legezko iruzurraren prozedura. Tributu Ikuskapenak legezko iruzur espedientea hasiz gero, akta berezia egin eta, horrekin batera, txosten sakonagoa aurkeztuko da; txosten horretan, legezko iruzurrari buruzko espedientea hasteko bidezkotasunari dagozkion arrazoiak azalduko dira. Akta bere izaeraren arabera tramitatuko da eta administrazio egintzak legezko iruzurra adieraztea bidezkoa izan ala ez izateari buruzko ebazpena emango du; gainera, behar izanez gero, kasuan kasuko tributu likidazioa egingo du. Espedientea kudeaketa bulegoek eskatuta hasten denean, jarduketa guztiak tributu ikuskapenari bidali eta lehen adierazitakoaren arabera jardungo da.
Foru Dekretuak artikulu bakarra, xedapen iragankor bat, xedapen indargabetzaile bat eta azken xedapen bat ditu.
Xedapen Iragankorrean lehengo arauditik erregelamendu berrirako igarobidea modu ordenatuan egiteko arauak biltzen dira. Horrela, bertan ezarritakoaren arabera, Erregelamenduko xedapenak hori indarrean sartzen denetik aurrera hasten diren ikuskapen prozedurei aplikatuko zaizkie, zehapenak ezartzeari buruzko alderdiak izan ezik, horiek tramitatzen ari diren prozedurei ere aplikatuko baitzaizkie, baldin eta prozedura horietan kasuan kasuko akten emaitza oraindik dokumentatu gabe badago.
Horrenbestez, Ekonomia eta Ogasun kontseilariak proposatuta, eta Nafarroako Gobernuak ekainaren hamaikan egindako bilkuran hartutako erabakiarekin bat,
DEKRETATU DUT:
Nafarroako Foru Komunitateko Tributu Ikuskapenari buruzko Erregelamendua onestea. Horren testua Foru Dekretu honen eranskin gisa ageri da.
Erregelamendu honetan xedaturikoa berori indarrean sartu ondoren hasten diren egiaztapen eta ikerketa prozedura guztiei aplikatuko zaie.
Hala eta guztiz ere, VIII. kapitulua hasita diren egiaztapen eta ikerketa prozedura batzuei ere aplikatuko zaie, hain zuzen ere, erregelamendua indarrean sartu ondoren kasuan kasuko akten emaitza oraindik dokumentatu gabe duten egiaztapen eta ikerketa prozedurei.
Xedapen Iragankorrean ezarritakoaren kalterik gabe, Erregelamendu hau indarrean sartzen denetik indargabeturik geldituko dira bertan ezarritakoaren aurkakoak diren maila bereko edo beheragoko xedapen guztiak.
Hain zuzen ere, Nafarroako Foru Diputazioak 1981eko abuztuaren 27an emandako Erabakia indar gabe utzi da; erabaki horren bidez, Ogasun Ikuskapenaren Antolaketari, Funtzionamenduari, Prozedurari eta Jarduketari buruzko Erregelamendua onetsi zen.
Erregelamendu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, bi mila eta bateko ekainaren hamaikan.-Nafarroako Gobernuko lehendakaria, Miguel Sanz Sesma.-Ekonomi eta Ogasun kontseilaria, Francisco J. Iribarren Fentanes.
LEHEN KAPITULUA. TRIBUTU IKUSKAPENAREN EGINKIZUNAK ETA ANTOLAKETA
1. artikulua . Egiaztapena eta ikerketa.
1. Nafarroako Foru Komunitateko Tributu Administrazioak tributuen egitate ezargarrien eta gainerako tributu betebehar guztien betetzea integratzen edo baldintzatzen duten egintzak, egitateak, egoerak, jarduerak, ustiapenak eta gainerako gorabehera guztiak egiaztatu eta ikertuko ditu.
2. Foru Komunitateko Tributu Ikuskapenaren eginkizunak Hitzarmen Ekonomikoan eta Tributuei buruzko Foru Lege Orokorrean ezarritako arauen eremuan eta horien arabera garatuko dira.
2. artikulua . Tributu Ikuskapenaren eginkizunak
a) Tributu egitateak ikertzea, administrazioak kontuan hartzen ez dituenak aurkitzeko eta horiek tributupekoari eratxikitzeko.
b) Tributu oinarriak integratzea, horien azterketa eta ebaluazioa eginez, oinarriok zehazteko edo kalkulatzeko araubide guztietan; halaber, aitorpenak eta aitorpen-likidazioak egiaztatzea, horiek egiazkoak direla eta arauak zuzen aplikatu direla segurtatzeko.
c) Egiaztapen eta ikerketa jarduketen ondoriozko tributu likidazioak egitea, tributupekoen zerga egoera arautzeko.
d) Berak bere kabuz edo Administrazioaren gainerako organoek eskatuta, informazioa lortzeko jarduketa guztiak egitea, hain zuzen ere, norbanakoei edo beste erakunde batzuei buruz egin behar diren eta zuzen nahiz zeharka zergen aplikazioa eragiten duten jarduketak.
e) Errenten, produktuen, ondasunen eta tributu oinarriak dituen elementuen balioa egiaztatzea.
f) Zerga onurak, desgrabazioak edo itzulketak emateko edo gozatzeko eskatzen diren baldintzak betetzen direla egiaztatzea; halaber, tributu araubide berezien onurak jasotzeko behar diren baldintzak betetzen direla egiaztatzea.
g) Subjektu pasiboei eta gainerako tributupekoei arau fiskalen edukia eta horien ondoriozko betebeharren nahiz eskubideen ezaugarriak jakinaraztea.
h) Arauetan ezarritako kasuetan aholkularitza eta jakinarazpena egitea, baita Nafarroako Zerga Ogasuneko erakunde autonomoaren zuzendari kudeatzaileak emandako gainerako kasuetan ere (tributuak aplikatzeari buruzko kasuak).
i) Tributuen gaian eskuduna den departamentuko organoek agintzen dioten beste edozein .
1. Tributu Ikuskapenaren eginkizunak Tributu Ikuskapeneko Zerbitzuak egingo ditu, horixe baita Nafarroako Zerga Ogasuneko erakunde autonomoaren unitate organikoa.
2. Ogasuneko teknikarien elkargoko kideek, kudeatzaile eta ikertzaile laguntzaileek eta Nafarroako Zerga Ogasuneko zerga agenteek osatzen dute tributu ikuskapena, eta Tributu Ikuskapenerako Zerbitzuari atxikiak dira.”
Beste hauek ere tributu ikuskapeneko partaideak dira: informatikako teknikariak eta ikuskapen prozedura eta jarduketetan parte hartzen duten funtzionarioak, horretarako izendatu dituztenean. Laguntzako lanak edo lan osagarriak egingo dituzte, eta oro har, informazioa lortu eta tratatzeko lanak .
3. Tributu Ikuskapenak barruko antolamendua edukiko du, Zerbitzuko zuzendariaren menpe, lan unitate funtzionaletan; unitate horietan, Zerbitzuari atxikitako jarduleak egongo dira.
4. Unitate funtzionalen barruko funtzionamendua, banakako esleipena eta planak egitearen kontrola Tributu Ikuskapeneko Zerbitzuko zuzendariak emandako aginduen bitartez arautuko dira; horrek guztiak, berriz, Nafarroako Zerga Ogasuneko erakunde autonomoaren zuzendari kudeatzailearen onespena beharko du.
5. Tributu ikuskapena Foru Komunitateko lurraldean gauzatuko da, Hitzarmen Ekonomikoaren 45. artikuluak ezartzen duena deusetan galarazi gabe .
4. artikulua . Zerbitzuko zuzendariaren eginkizunak.
Zerbitzuko zuzendariaren eginkizunak honako hauek izango dira:
a) Zerbitzuko funtzionarioei Erregelamendu honetan eta gainerako arau nahiz agindu aplikagarrietan ezarritakoa betearaztea eta berak ere hori guztia betetzea.
b) Funtzionarioei lanak, egiaztatu beharreko agiriak eta gainerako eginkizunak banatzea.
c) Ikuskapen jarduketak formalizatzeko agirien tramitazioa zaintzea.
d) Nafarroako Zerga Ogasuneko erakunde autonomoaren zuzendari kudeatzaileak onetsitako irizpideen eta aginduen arabera, Ikuskapen Planak egitea.
e) Zerbitzuko langileei aginduak ematea jarduketa nahiz irizpide aplikagarriei buruz, ikuskapen jarduketan irizpide batasuna egoteko ahalegina eginez, ikertu beharreko egitateak nahiz gorabeherak mugatzeko eta baloratzeko.
f) Zerbitzuko funtzionarioak trebatzeko eta gaurkotzeko jarduerak sustatzea.
g) Bidezko ebazpenak eta baimenak ematea, Zerbitzuan trebatuekiko espedienteak garatzeko eta bukatzeko.
5. artikulua . Unitateko buruen eginkizunak.
Unitateko buruen eginkizunak ondokoak izango dira:
a) Ikuskapen Planak egitean laguntzea.
b) Ikuskapen Planean jasotako tributupekoak esleitzea.
c) Kasuan kasuko espedienteen instrukzioan laguntzea.
d) Jarduketako irizpide homogeneoen aplikazioa koordinatzea, bere Unitateari esleituriko espedienteen tramitazioan.
e) Espediente bakoitzean formalizatzen diren agirien tramitazioa zuzentzea.
6. artikulua . Ikuskapeneko langileen eskubideak eta eskumenak.
1. Tributu Ikuskapeneko Funtzionarioak agintaritzaren eragiletzat hartuko dira, beraiei dagozkien eginkizunak egikaritzean.
2. Tributu Ikuskapeneko funtzionarioek agiria edo beste identifikazioren bat edukiko dute, beraien eginkizunak gara ditzaketela egiaztatzeko.
3. Agintariek (euren izaera edozein izanik ere), Estatuko bulego zibilen nahiz militarren buruek edo arduradunek zein lurraldeko gainerako erakunde publikoek, Tributuei buruzko Foru Lege Orokorreko 104. artikuluan aipaturiko beste erakunde guztiek eta eginkizun publikoak betetzen dituztenek laguntza, lankidetza eta babesa emango diete tributu ikuskapeneko funtzionarioei eta gainerako langileei, horiek halakorik eskatzen dutenean. Hori egin ezean, kasuan kasuko erantzukizunei egin beharko zaie aurre.
7. artikulua . Ikuskapeneko langileen eginkizuna.
1. Tributu Ikuskapenak zerbitzu objektiboa emango die interesatuei; gainera, Konstituzioan ezarritako eraginkortasun hierarkia, deszentralizazio, pilaketa eza eta koordinazio irizpideen arabera jardungo du, Legean eta zuzenbidean ezarritakoaren arabera.
2. Bere eginkizunak egikaritzean, bere agintearen eta betebeharren kalterik gabe, tributu ikuskapenak kortesia handia edukiko du, eta interesatuei nahiz, orokorrean, jendeari ahalik eta errespetu handiena eskainiko die; gainera, ikuskapen jarduketei dagokienez, informazio guztia emango die, bai euren eskubideei eta bai tributu betebeharrei zein administrazioarekiko harremanetan izan beharreko jokabideari buruz, beraien tributu betebeharrak errazago bete ditzaten.
3. Tributu ikuskapena osatzen duten pertsonek isiltasuna eta sekretu erabatekoa gorde beharko dituzte beren kargua dela-eta ezagutzen dituzten gaiei buruz, Tributuei buruzko Foru Lege Orokorraren 105.3 artikuluak ezartzen duenarekin bat .
4. Tributu ikuskapenerako eginkizunak esleituta dauzkaten pertsonek zerbitzu zuzendariari jakinaraziko dizkiote tributuen aldetik garrantzia duten datu guztiak. Halaber, datu horiek beste organo batzuentzat garrantzizkoak badira, haiei ere jakinaraziko dizkiete, organook esleituta dauzkaten tributu kudeaketa, ikuskapen edo bilketa funtzioak behar bezala bete ditzaten.
Tributu ikuskapenak, Nafarroako Zerga Ogasuna erakunde autonomoko kudeaketa zuzendaritzaren titularraren baimenarekin, jakinaraziko dizkie agintaritza judizialari, fiskaltzari edo dagokion organo eskudunari bere jarduketak egitean ezagutzen dituen eta delitu publikoak edo arau-hauste administratiboak izaten ahal diren egintzak, zuzen edo zeharka Nafarroako Foru Komunitatearen eskubide ekonomikoak kaltetzen dituztenak. Era berean, agintaritza judizial eskudunak aipatu delituen aurka ari denean eskatzen dizkion datuak eman egingo ditu.
Tributu ikuskapenak Tributuei buruzko Foru Lege Orokorraren 103. eta 104. artikuluek ezartzen dutenaren ondorioz lortzen dituen datuak, txostenak edo aurrekariak, zerga administrazioak kudeatu behar dituen tributuak edo errekurtsoak aplikatzeko baizik ez dira erabiliko, eta ezin izango zaizkie hirugarrenei eman edo jakinarazi, ez bada uzten direla Tributuei buruzko Foru Lege Orokorraren 105.1 artikuluak ezartzen dituen kasuetako bat betetzeko helburuarekin .
5. Tributu Ikuskapeneko funtzionarioek ez dute zertan lekukotzat adierazi, prozedura zibiletan edo zigor prozeduretan, horietan delitu pribatuak aztertzen direnean, baldin eta hori egitean nahitaez gorde behar duten sekretu betebeharrak urratzen badituzte.
6. Ikuskapen eskumenak dituzten organoetako edo egoitzetako langile guztiek ere sekretu betebehar hori gorde beharko dute, euren lanpostuaren ondorioz dakizkiten egitateei dagokienez, eta halakoetan aurreko atalean ezarritakoa aplikatuko da.
8. artikulua . Erregelamendu aplikagarria.
Tributu Ikuskapenaren ahalmenak eta jarduketak honako honen bidez arautuko dira:
a) Hitzarmen Ekonomikoaren xedapenak.
b) Tributuei buruzko Foru Lege Orokorra, baldin eta horrek edo horren lerrun bereko edo handiagoko beste xedapenen batek aurkakorik arautzen ez badu.
c) Kasuan kasuko tributuak arautzen dituzten Foru Legeak.
d) Erregelamendu hau eta zergei buruzko erregelamenduak.
e) Indarreko antolaketa juridikoa integratzen duten xedapen aplikagarriak.
1. ATALA. IKUSKAPEN EKINTZEN PLANIFIKAZIOA
9. artikulua . Ikuskapen jarduketak
Tributu Ikuskapenaren eginkizunak egikaritzeko, kasuan kasuko ikuskapen planetan ezarritakoaren arabera jardun beharko da, funtzionarioek beren jarduketen ondorioz egiten dituzten proposamenen kalterik gabe; horiek kasuan kasuko planean sartzeko, Tributu Ikuskapeneko Zerbitzuko zuzendariaren baimena beharko da.
10. artikulua . Ikuskapen plana
1. Nafarroako Zerga Ogasuneko erakunde autonomoak urteroko Ikuskapen Plana egingo du, aukera, ausazkotasun eta bidezko deritzen beste irizpide guztietan oinarrituz.
2. Ikuskapen Planak irizpide sektorialak, konparaziozkoak, kuantitatiboak edo beste edozein motatakoak ezarriko ditu, horiek kontuan har daitezen, subjektu pasiboak edo tributupekoak aukeratzeko orduan, horiek planaren barruan sartu ahal izateko.
Horren arabera, jardule, talde edo unitate bakoitzak egiaztatu edo ikertu beharreko pertsonak edo erakundeak aukeratuko dira, bai modu berezian, bai sektore edo jarduera jakinekoak izatearen ondorioz.
3. Ikuskapeneko Plan Bereziak ezarri ahal izango dira, egoerek, aztarnek edo lorturiko informazioak hori gomendatzen dutenean. Plan horien luzera ez da zertan urteroko Planen luzera berekoa izan.
4. Ikuskapen Planak ezkutukoak izango dira eta ez zaie publizitaterik egingo; hala eta guztiz ere, Tributu Administrazioak urtero Ikuskapen Planaren berri ematen duten irizpide orokorrak jakinaraziko ditu.
5. Ikuskapen Plana oinarritzen duten sektoreak, jarduerak eta hautapen irizpideak, beste alde batetik, Nafarroako Zerga Ogasuneko erakunde autonomoko zuzendari kudeatzaileak onetsi beharko ditu.
Tributu Ikuskapeneko zerbitzuak, bestalde, Ikuskapen Planak egingo ditu, goiko paragrafoan ezarritakoa kontuan hartuta. Plan hori, behar bezala egin ondoren, Nafarroako Zerga Ogasuneko erakunde autonomoko zuzendari kudeatzaileari jakinaraziko zaio.
Zerbitzuko zuzendariak, bere kabuz edo Tributu Ikuskapeneko Zerbitzuari atxikitako funtzionarioek proposatuta, aribidean dauden bete arazketa planen berrikuspena eta aldaketa erabaki ahal izango du, Nafarroako Zerga Ogasuneko erakunde autonomoko zuzendari nagusiari horren berri emanez.
6. Prozedura bereziak ezarri ahal izango dira, beste Tributu Administrazio batzuekin batera Planak egiteko (Hitzarmen Ekonomikoan ezarritakoaren arabera), eta Foru Komunitateko Toki Erakundeekin batera Planak egiteko ere bai.
2. ATALA. JARDUKETA MOTAK
Ikuskapen jarduketak honako mota honetakoak izan daitezke:
a) Egiaztapenak eta ikerketak egiteko.
b) Zergen arloan garrantzitsua den informazioa lortzeko.
c) Informazioa eta aholkua.
12. artikulua . Egiaztatzeko eta ikertzeko jarduketak.
1. Tributu Ikuskapenak egiaztatzeko eta ikertzeko egiten dituen jarduketen helburua hauxe izango da: subjektu pasiboek edo tributupekoek Tributu Administrazioarekiko dituzten eginkizunak behar bezala betetzen dituztela egiaztatzea.
2. Jarduketa horiek direla eta, Tributu Ikuskapenak subjektu pasiboek eta tributupekoek tributu bakoitzerako eskatzen diren aitorpenetan nahiz jakinarazpenetan esleituriko egitateak eta datuak zehatzak eta egiazkoak direla egiaztatu beharko du. Halaber, tributu egitateak eta zergen arloan garrantzitsuak diren beste aurrekari batzuk egituratzen dituzten elementuak egoteko aukera ikertuko du, baldin eta Administrazioak horietariko batzuk edo guztiak ezagutzen ez baditu. Azkenik, subjektu pasiboek egindako tributu likidazioko eragiketak zehatzak direla egiaztatu eta, era berean, haien zerga egoeraren erregularizazioa ezarriko du.
3. Kontu korronteen, aurrezki gordailuen nahiz epeko gordailuen, maileguen zein kredituko kontuen eta gainerako eragiketa aktiboen nahiz pasiboen mugimenduei buruzko errekerimenduak (Tributuei buruzko Foru Lege Orokorreko 103.3 artikuluan aipaturikoak) bertan ezarritako baldintzetara egokitu beharko dira.
13. artikulua . Egiaztatzeko eta ikertzeko jarduketen irismena.
1. Egiaztatzeko eta ikertzeko ikuskapen jarduketak orokorrak edo partzialak izan daitezke.
2. Orokorrak izango dira, beraien helburua subjektu pasiboaren edo tributupekoaren zerga egoera osoa egiaztatzea denean, honako honek ezarritako mugen barruan eragiten dioten zerga edo lankidetza betebehar guztiei dagokienez:
a) Ikuskapen jarduketak barru hartzen dituen ekitaldiak edo aldiak.
b) Preskripzioa.
3. Era berean, Tributuei buruzko Foru Lege Orokorreko 138. artikuluan eta Erregelamendu honetako 34. artikuluan ezarritakoaren arabera, tributupekoak jarduketa partzial batek izaera orokorra edukitzea eskatzen duenean, Tributu Ikuskapenak (eskabidea egiten denetik sei hilabeteko epean) egiaztapen orokorra hasi edo aribidean dagoen egiaztapen partzialaren izaera zabaldu beharko du, eskabidean aipaturiko zergari edo ekitaldiari dagokionez.
Jarduketa orokorra hastea erabakitzen denean, lehenago hasitako jarduketa partziala beste alde batetik bukatu ahal izango da.
4. Egiaztatzeko eta ikertzeko jarduketak partzialak izango dira, tributu egitate jakinei buruzkoak soilik direnean, edo euren helburua aurreko ataletan aipaturikoa baino muga txikiagoetara mugatzen denean.
5. Tributu Ikuskapenak tributupekoari berariaz jakinarazi beharko dio jarduketen irismena, jarduketok hasteko jakinarazpenean.
6. Egiaztatzeko eta ikertzeko jarduketa orokorrek beren helburua mugatu ahal izango dute, betearazketaren aribidean hori gomendatzen duten arrazoiak adierazi eta ikuskatzaile jarduleek hori erabakitzen dutenean. Era berean, jarduleen iritzian, hasieran izaera partziala izan duten jarduketen eremua handitu ahal izango da, Unitateko buruaren baimenarekin.
Bi kasuotan, tributupekoari edo horren ordezkariari jarduketen irizpena aldatu dela jakinarazi beharko zaio.
7. Zerga egoera jakinen bat arautzeko ikuskapen jarduketek ez dute iraungitzen Ogasun Publikoak preskribiturik ez dauden lehenagoko zor batzuk zehazteko eta eskatzeko duen eskubidea, eta hori ondorengo jarduketen bitartez egingo da.
8. Zergadunek aurkeztu dituzten tributu aitorpenak egiaztatzeko eskatu ahal izango dute. Eskabidea aurkeztu ondoren, Administrazioak jarduketa sei hilabetean hasten ez badu, eta bi hilabeteko epean bukatu ezean, eskabidean aipaturiko zergei eta aldiei buruz aurkeztutako aitorpenak ondo daudela ulertuko da eta gero ezin izango da horien zuzenketarik egin .
14. artikulua . Informazioa lortzeko jarduketak.
1. Informazioa lortzeko jarduketak izango dira, Tributu Ikuskapenak pertsona edo erakunde baten esku dauden datu edo aurrekari guztiak ezagutzeko egiten direnak, baldin eta horiek zergen arloan garrantzitsuak badira beste pertsona edo erakunde batzuei dagokienez; halakoetan, horiek ez dira tributu Administrazioari aurkeztu beharrik egongo, kasuan kasuko aitorpenak eginez.
2. Aurreko atalean ezarritakoa gorabehera, Tributu Ikuskapenak egiaztatzeko eta ikertzeko jarduketak garatzen dituenean, tributupekoaren esku dauden datu edo aurrekari guztiak lortu beharko ditu, baldin eta ikuskapen horren iritziz horiek zergen aldetik garrantzitsuak badira beste pertsona edo erakunde batzuentzat; hala eta guztiz ere, datu horiek emateko betebeharra bete egiten dela egiaztatu beharko da, eskakizun hori izaera orokorrez egiten denean.
3. Informazio lortzeko jarduketak, beste alde batetik, Tributu Ikuskapenak bere kabuz edo Nafarroako Zerga Ogasuneko erakunde autonomoko gainerako zerbitzuek eskatuta egin beharko du. Jarduketa horiek, bestalde, pertsona natural edo juridiko guztien esku (publikoak edo pribatuak) dauden datuei dagokienez egin ahal izango dira, baldin eta datuok edozein pertsona edo erakundeei buruzkoak badira, betiereErregelamendu honetan ezarritako mugen barruan.
4. Informazioa lortzeko jarduketak kasuan kasuko datuak dituen pertsonatik edo erakundetik hurbil egin ahal izango dira; era berean, datu edo aurrekari horiek Tributu Ikuskapenera bidaltzeko errekerimenduaren bitartez ere egin ahal izango dira.
15. artikulua . Informazioa edo aholkua emateko jarduketak.
Administrazioko beste organo batzuen eskumenen kalterik gabe, Tributu Ikuskapenak informazioa eta aholkua emango du arauz ezarritako kasu guztietan eta Nafarroako Zerga Ogasuneko erakunde autonomoko zuzendari kudeatzaileak emandako kasuetan, zergen aplikazioari buruzko arloetan.
16. artikulua . Beste jarduketa batzuk.
Tributu Ikuskapenak, oro har Erregelamendu honetan jasotako edo legeek eskaturiko gainerako jarduketa guztiak garatuko ditu, batez ere botere legegile eta judizialeko organoekiko lankidetza funtzionala behar duten jarduketak, legeetan ezarritakoaren arabera.
3. ATALA. JARDUKETEN TOKIA ETA DENBORA
17. artikulua . Jarduketen tokia.
1. Tributu Ikuskapeneko jarduketak honako toki hauetan garatu ahal izango dira:
a) Tributupekoaren egoitza fiskalean edo ordezkariaren egoitzan nahiz bulegoan, baldin eta azken hori Nafarroako lurraldean badago.
b) Grabaturiko jarduketa guztiak edo batzuk egiten diren tokian.
c) Zerga-egitatearen edo tributu obligazioaren zioaren frogaren bat dagoenean, partziala bada ere .
d) Tributuei buruzko Foru Lege Orokorreko 135. artikuluko 2. atalean aipaturiko bulego publikoetan, jarduketen helburu diren elementuak bulego horietan azter daitezkeenean; bestela, orain arte aipaturiko gainerako toki guztietan.
2. Tributu Ikuskapenak, kasu bakoitzean, jarduketak egiteko tokia zehaztu eta toki hori kasuan kasuko jakinarazpenean jasoaraziko du.
18. artikulua . Jarduketa batzuk egiteko tokia ezartzeko irizpidea.
1. Jarduketek zenbait jarduerari loturiko (enpresa jarduerak, jarduera profesionalak edo tributupekoak garaturiko beste jarduera batzuk, programa informatikoak eta euskarri magnetikoko artxiboak ere barne) liburuak eta agiriak aztertzea eragiten dutenean, jarduketa horiek interesatuaren lokaletan edo bulegoetan egin beharko dira; lokal edo bulego horietan kontabilitateko liburu ofizialak, erregistro laguntzaileak, egindako oharren egiaztagiriak eta garaturiko jarduerari buruzko gainerako agiri guztiak egon beharko dira.
2. Hala eta guztiz ere, interesatuak edo horren ordezkariak adostasuna emanez gero, Tributu Administrazioaren bulegoetan aurreko atalean aipaturiko agirietariko batzuk aztertu ahal izango dira, edo aipaturiko agiri guztiak, baldin eta jardueraren ezaugarriek edo aztertu beharreko agiri kopuru txikiak hori justifikatzen badute.
3. Zerga izaerako arauek ezarritako erregistroak nahiz agiriak edo horiei buruzko ziurtagiriak direnez, Tributu Ikuskapenak horiek Administrazioaren bulegoetan aurkezteko eskatu ahal izango du, horiek guztiak aztertu ahal izateko.
4. Egiaztatzeko eta ikertzeko jarduketak enpresa jarduerak edo jarduera profesionalak garatzen ez dituzten pertsonei buruzkoak ez direnean, Tributu Ikuskapenak (kasuan kasuko bulego publikoetan) horien zerga egoera behar bezala egiaztatzeko behar diren agiriak eta ziurtagiriak aztertu ahal izango ditu.
5. Subjektu pasiboaren edo tributupekoaren egoitza fiskala Foru Komunitatean dagoenean, aurkeztu beharreko liburu, agiri edo ziurtagiri guztiak aztertu ahal izango dira, nahiz eta horiek beste lurralde eremu batean kokaturiko, agertutako edo garaturiko ondasunei, eskubideei edo jarduerei buruzkoak izan.
6. Subjektu pasiboaren edo tributupekoaren egoitza fiskala Foru Komunitatetik kanpo dagoenean, Tributu Ikuskapenaren jarduketak Erregelamendu honetako goiko artikuluan aipaturiko gainerako toki guztietan garatu ahal izango dira.
19. artikulua . Jarduketen denbora.
1. Tributu Ikuskapenak bere egoitzetan edo beste bulego batzuetan jarduten duenean, jarduketa horren ordutegia jendearentzako ohiko ordutegi ofiziala izango da, eta jarduketa indarreko lanaldiaren barruan egingo da.
2. Ikuskapenak interesatuaren lokaletan jarduten duenean, lokal horien jarduketa edo bulegoko lanaldia arautzen duen ordutegia beteko da, nahiz eta adostasuna lortuz gero beste ordu eta egun batzuetan jarduteko aukera egon.
HIRUGARREN KAPITULUA. TRIBUTUPEKOEN ORDEZKAPENA
20. artikulua . Tributupekoen eskuhartzea.
1. Honako hauek Tributu Ikuskapenak esandakoa bete eta ikuskapen prozeduran esku hartuko dute:
a) Zergen subjektu pasiboak.
b) Taldearen ordezkariari, Sozietateen gaineko Zergako finkapen fiskalaren araubide berezian, edo Balio Erantsiaren gaineko Zergako entitate taldeen araubide berezian, berriz, entitate nagusiari .
c) Tributu zorraren ondorengoak.
d) Erantzule solidarioak, ikuskapenak prozeduran parte hartzeko eskakizunak egiten dienetik.
e) Indarreko arauen arabera Administrazioari zergen arloan garrantzitsuak diren datu, txosten edo aurrekari guztiak emateko betebeharra dutenak.
f) Tributuei buruzko Foru Lege Orokorreko 66. artikuluko 3. ataleko e) letran aipaturiko urratzaileak, egin ditzaketen urratzeen ondoriozko erantzukizuna ezartzeko jarduketak hasten direnetik.
2. Tributupeko horiek guztiek tributu ikuskapenak kasu bakoitzean egiten duen jarduketaren ondorioak jakiteko eskubidea edukiko dute; gainera, ikuskapen horri laguntza osoa eman beharko diote, bere eginkizunak garatzen dituenean.
3. Tributu Ikuskapenak gardentasun fiskalaren araubidearen menpe dauden sozietateetatik nahiz erakundeetatik edo errenten eratxikipenaren araubidearen menpe dauden erakundeetatik hurbil jarduten duenean, baldin eta ikuskapen jarduketak kideei, erkideei edo partaideei leporatzeko edo eratxikitzeko moduko tributu oinarriak, kantitateak edo kontzeptuak egiaztatzeari buruzkoak badira, jarduketa horiek erakunde horrekikoak direla ulertuko da.
4. Tributu ikuskapenaren jarduketak, sozietate talde bati dagozkionean, Sozietateen gaineko Zergako finkapen fiskalaren araubide bereziaren ondorioetarako, edo Balio Erantsiaren gaineko Zergako entitate taldeen araubide bereziaren ondorioetarako, mendeko entitateetan garatzen ahalko dira. Aurrekoa ulertu behar da entitate nagusiak talde fiskalaren edo entitate taldearen ordezkari moduan daukan, eta tributu ikuskapenaren prozeduran interesa daukan izaera galarazi gabe .
5. Sozietatea edo erakundea desegin eta likidatu ondoren, Tributuei buruzko Foru Lege Orokorreko 33. artikuluko 2. atalean ezarritakoaren kalterik gabe, likidatzaileak tributu ikuskapenera joan beharko dira, horretarako eskabidea egiten zaienean, erakundearen ordezkariak eta bertako liburuen nahiz agirien zaindariak izan baitira. Liburuak eta agiriak erregistro publikoan gordeta egonez gero, tributu ikuskapenak erregistro horretan aztertu ahal izango ditu eta, beharrezkoa bada, likidatzaileak bertan egotea eskatuko du.
21. artikulua . Tributupekoa ikuskapen jarduketetan egotea.
1. Tributupekoa edo horren ordezkaria ikuskapen jarduketetan egon beharko dira, tributu ikuskapenaren iritziz horien partehartzea beharrezkoa denean, jarduketa horiek behar bezala egin ahal izateko.
2. Gainerako jarduketa edo eginbideetara, tributupekoa edo horren ordezkaria nahi dutenean joango dira.
3. Subjektu pasiboek eta gainerako tributupekoek ikuskapen jarduketetan esku hartu ahal izango dute, aholkulariaren laguntzaz, eta horrek beharrezko gomendio guztiak eman ahal izango dizkio bere bezeroari.
Aholkulariek, halaber, bezeroen ordezkaritzat jardun dezakete, horiek ahalorde egokia ematen dietenean.
22. artikulua . Jarduteko gaitasuna.
1. Tributu Ikuskapenean jarduteko gaitasuna edukiko dute zuzenbide pribatuko arauen arabera gaitasun hori duten pertsonek, baita adin txikikoek ere, jarduera horien ondoriozko jarduketei dagokienez; antolamendu juridikoak horiek egikaritzeko baimena ematen die, eta horretarako ez dute gurasoen ahalorde edo babesa duten pertsonen beharrik izango.
2. Tributu Ikuskapenean jarduteko gaitasun nahikorik ez duten pertsonen ordez, horien legezko ordezkariek jardungo dute. Pertsona horiek jarduteko gaitasun nahikoa lortzen dutenean, tributu ikuskapenean jardungo dute, baita beraien ordura arteko zerga egoera egiaztatzeko ere. Beraien legezko ordezkaritza dutenek, halaber, tributu ikuskapenak eskatzen duenean jardun beharko dute, batez ere urratzailetzat dituzten erantzukizunei aurre egiteko.
3. Pertsona juridiko publiko nahiz pribatuen ordez, tributu ikuskapenak jardutean ordezkaritza organoak dituzten pertsonek jardungo dute, legeak horrela ezartzen duenean edo arauz hartutako erabaki baten bitartez. Kasuan kasuko betebeharrak bete behar zirenean organo horiek betetzen zituzten pertsonek bere buruaren izenean jardungo dute, erakundearekiko loturarik sortu gabe, tributu ikuskapenak eskatzen duenean, baldin eta hori ikuskapen jarduketak errazteko komenigarria bada.
4. Tributuei buruzko Foru Lege Orokorreko 25. artikuluan aipaturiko erakunde juridikoen edo ekonomikoen partaideek edo titularrek ordezkari bat izendatu ahal izango dute, baldin eta zuzenbidearen arabera erakundearen ordezkaritza duen pertsonaren bat ez badago. Bestela, ordezkaritzat kudeaketa edo zuzendaritza egiten duen pertsona hartuko da eta, horren ordez, erakundea edo komunitatea osatzen duen edozein kide edo partaide.
23. artikulua . Borondatezko ordezkapena.
1. Jarduteko gaitasun nahikoa duten tributupekoek ordezkari baten bitartez jardun dezakete; administrazio jarduketak horrekin egingo dira, baldin eta aurkakorik adierazten ez bada.
Tributupekoek edo horien legezko ordezkariek nahiz pertsonen juridikoen ordezkapena dutenek eman ahal izango dute; jarduteko gaitasun nahikoa duten pertsona juridikoen edo pertsona fisikoen alde eman daiteke.
2. Zuzenbidean baliagarriak diren eretatik edozeinetan benetakotu behar da eskuordetza, hain zuzen ere era egokian frogatzeko balio duena edo, bestela, eskumenak dituen administrazioko organoan aurkeztuz. Baliagarriak izanen dira, ondore guztietarako, zerga-administrazioak onetsiko dituen dokumentu normalizatuak .
3. Tributu Ikuskapenak egiten dituen aktak sinatzeko eta tributupekoaren eskubideetan zein beharrizanetan eragin zuzena ez edukitzearen ondorioz tramite hutsezkoak ez diren gainerako ekintzetarako, ordezkapena baliozkotasunez egiaztatu beharko da.
4. Tramite hutsezko egintzetarako, ordezkapena emateko ez da hori egiaztatu beharrik izango. Era berean, tributu ikuskapenean agertzen denaren aldeko baimena emanda dagoela ulertuko da, prozeduran parte hartzeko; horretarako, jarduketen izaera kontuan hartuz, ez da tributupekoak emandako ordezkapen ahalorderik beharko.
5. Ordezkapena egiaztatzen duen agirian hauxe jaso beharko da:
a) Pertsona fisikoak direnean, izena, deiturak, zerga egoitza eta nortasun agiri nazionalaren edo baliokidea den agiriren baten zenbakia; pertsona juridikoak direnean, izena, zerga egoitza, identifikazio kodearen zenbakia eta horren izenean diharduen pertsona. Hori guztia, berriz, ordezkatuari dagokionez.
b) Ordezkariari dagokionez, izen-deiturak edo izendapena, zerga egoitza (jakinarazpenak egiteko) eta nortasun agiri nazionalaren edo identifikazio kodearen zenbakia; bertan, behar izanez gero, lanbidez jardutearen egiaztapena eta kasuan kasuko lanbidearen ordezkapena egin beharko da.
c) Jakinarazpenak egiteko, tributupekoaren ordezkariak Nafarroako lurraldean finkatu beharko du egoitza.
d) Ordezkapenaren edukia, hedapenari eta nahikotasunari dagokionez.
e) Emateko tokia eta data.
f) Ordezkatuaren eta ordezkariaren sinadurak; agiri publikoa denean, ez da ordezkariaren sinadurarik beharko.
6. Tributu Ikuskapenean tributupekoa ez den beste pertsona batek diharduenean, hori berariaz jaso beharko da egiten diren eginbide edo akta guztietan; espedientean, gainera, emandako ahalordea egiaztatzen duen agiria ere jaso beharko da. Ordezkapena agiri publiko baten bitartez ematen bada, horri buruzko aipamena nahikoa izango da; espedientean, era berean, kopia arrunta edo fotokopia erantsiko da, jarduleak egindako erkatzearen eginbidearekin.
7. Tributu Ikuskapenean tributupekoak ordezkariaren bitartez jarduten duenean, ordezkari horrek, beharrezkoa izanez gero, hasiera-hasieratik egiaztatu beharko du ordezkapena. Hori egin ezean, Tributu Ikuskapenak kasuan kasuko agiria aurkezteko eskatuko dio, ikuskapena egiten den hurrengo egunean; halakorik ez dagoenean edo ondorengoa denean, aurkezpen hori egiteko hamar eguneko epea emango dio. Ordezkariak ordezkapen epe horren barruan egiaztatzen ez badu, Tributu Ikuskapenak jarduketak eten ahal izango ditu, eta hori eginbidean jasoaraziko du, horien gauzatzeak baliorik ez duenean. Halako kasuetan, tributupekoa ez dela agertu ulertuko da eta horren ondore guztiak aplikatuko dira.
8. 13/2000 Foru Legearen 38. artikuluan ezarritakoaren ondorioetarako, honako hauek hartuko dira salbuespenezko kasutzat, besteak beste :
a) Zerga-betebeharra duenaren atzerakuntzak Zerga-Ikuskatzailetzari informazioa eman behar dionean edo erakunde horrek agindeiak formulatzen dizkionean.
b) Zerga-betebeharra duenak nabarmen ez betetzea kontabilitateko eta erregistroko betebeharrak, edo kontabilitateko liburuak edo zerga-erregistroak desagertzea.
c) Frogatzea zerga-betebeharra duenak zerga-administrazioari ezkutatu egin dizkiola egiten dituen enpresa-jarduerak edo jarduera profesionalak.
d) Zerga-betebeharra duenak tributuen arloan derrigorrez izan behar dituen gainerako jokaerak, esaterako ikuskatzailetzaren jarduketak eragoztea edo horiei jazartzea, baldin eta Erregelamendu honen 42. artikuluan bildu diren kontzeptu eta zerrendakoak badira .
24. artikulua . Borondatezko ordezkapenaren ondoreak.
1. Tributu Ikuskapenaren jarduketak, subjektu pasiboaren edo tributupekoaren izenean agertzen den pertsonarekin eginda, azken horrek egindakotzat hartuko dira.
2. Ordezkapenaren ezespenak ez du ordezkariaren bitartez egindako jarduketen baliogabetasuna eragingo, hori Tributu Ikuskapenari jakinarazi baino lehen.
3. Ahalorde nahikorik gabe agertu diren pertsonek egindako adierazpenek zuzenbidearen araberako froga balioa edukiko dute. Ordezkapena egiaztatu ondoren, ordezkariak emandako ahalorde nahikorik ez dagoela frogatu beharko du, eta, jarduketaren baliogabetasuna oinarritzeko, ezin izango ditu berak sortutako akatsak edo hutsak alegatu.
4. Ahalorderik ez egoteak edo ahalorde hori nahikoa ez izateak ez du kasuan kasuko egintza egindakotzat hartzea ekidingo, baldin eta ahalorde nahikorik frogatzen bada edo akatsa hamar eguneko epean zuzentzen bada.
Aurreko jarduketak egiteko erabili den ordezkariaren ahalorderik ez edukitzea edo ahalorde nahikorik ez edukitzea berehala zuzenduta dagoela joko da, tributupekoak tributu ikuskapeneko eginbideen edo akten ondoriozko egintzak aurkatzen dituenean, egoera horiek aipatu gabe, edo haren aktaren ondorioz likidaturiko tributu zorraren zenbatekoa ordaintzen duenean.
LAUGARREN KAPITULUA. IKUSKAPEN EKINTZEN HASIERA ETA GARAPENA
25. artikulua . Hasteko moduak.
Tributu Ikuskapenaren jarduketak hasteko moduak honako hauek izango dira:
a) Tributu Ikuskapenaren ekimenez, funtzionario edo laneko unitate funtzional bakoitzaren plan berezien ondorioz.
b) Erregelamendu honetako 9. artikuluan ezarritakoaren arabera.
c) Tributu Ikuskapeneko Zerbitzuko zuzendariak aginduta, ikuskapen plana aldatu ondoren.
d) Tributupekoak eskatuta, Tributuei buruzko Foru Lege Orokorreko 138. artikuluan eta Erregelamendu honetako 34. artikuluan ezarritakoaren arabera.
26. artikulua . Ikuskapen jarduketen hasiera.
1. Tributu ikuskapenaren jarduketak zergapekoari egiten zaion jakinerazpenaren bidez hasten ahalko dira egiten, esanez zer egunetan, ordutan eta tokitan egon behar den, erregelamendu honen II. kapituluaren 3. sekzioak ezartzen duenarekin bat, tributu ikuspenaren eskuetan jarriz edo hari emanez eskatzen zaizkion dokumentuak eta gainerako elementuak. Komunikazio horretan zergapekoari esango zaio garatu beharreko jarduketen norainokoa eta aplikagarria den ikuskapen prozedura.
Interesdunari esaten zaionean bulego publikoetan egun jakin batean agertzeko, egun horren eta errekerimenduaren jakinarazpenaren artean gutxienez zazpi eguneko epea izango da .
2. Halaber, justifikaturik dagoelarik, tributu ikuskapenak ikuskapen jarduketen hasiera jakinaraziko dio interesatuari, kasuan kasuko jakinarazpenaren berri aurretiaz eman gabe.
Jarduketak behar bezala egiteko komenigarritzat jotzen denean, eta betiere Erregelamendu honetako 40. artikuluan ezarritakoa beteta, tributu ikuskapena (aurretiazko jakinarazpenik gabe) interesatuaren bulegoetan, instalazioetan edo biltegietan agertu ahal izango da, baita tributu egitatearen froga partzialen bat egon daitekeen edozein tokitan ere. Kasu horretan, jarduketak interesatuarekin aztertuko dira, bera ere bertan egonez gero; bestela, horren ordezkapena duen pertsonarekin aztertuko dira (bulegoko, erregistroko, egoitzako, enpresako edo lantokiko arduraduna).
3. Jakinarazpenak (behar bezala jakinarazi ondoren) edo tributu ikuskapenaren presentziak (horrek jakinarazi eta interesatuak horren berri duenean, ikuskapen jarduketak hasteko) honako ondore hauek sortuko dituzte:
a) Administrazioak tributu zorrak kasuan kasuko likidazioaren bitartez ezartzeko eta beharrezko zehapenak finkatzeko duen eskubidea preskribitzeko legezko epearen etetea, egiaztapen eta ikerketa jarduketan aipaturiko zergari edo zergei dagokienez, baita ikuskapen jarduketen eragina duten betebeharrak ez betetzearen ondoriozko tributu zehapenak ezartzeko ekintzari dagokionez ere.
b) Subjektu pasiboak ordaintzeko dauden tributu zorrak kasuan kasuko jakinarazpena egin ondoren ordaintzen dituenean (edo egiaztapen nahiz ikerketa jarduketen beste edozein modu hasi ondoren ordaintzen dituenean), ordainketa hori konturako ordainketa izango da, hasitako aktaren ondoriozko likidazioaren zenbatekoari dagokionez; hala eta guztiz ere, beharrezko zehapenak aplikatu ahal izango dira, kuota osoaren eta Tributu Ikuskapeneko aktaren nahiz ikuskapen jarduketak hasi aurretik ordaindutako zenbatekoen ondoriozko errekarguen arteko diferentziari dagokionez. Jarduketa horiek hasi ondoren ordaindutako zenbatekoari dagozkion berandutza interesak, beste alde batetik, kasuan kasuko ordainketa egitearen aurreko egunera arte kalkulatuko dira, eta tributu ikuskapenak likidatuko ditu, kudeaketa bulegoak likidazioa egiten ez duenean.
c) Egiaztapen eta ikerketa jarduketak hasi ondoren, subjektuak aitorpen bat aurkezten badu (tributu likidaziorik egiteko beharrizanik ez duela egiaztatzen duen aitorpena), hori ez da baliozkoa izango Tributuei buruzko Foru Legezko Orokorreko 95. artikuluko a) letran ezarritakoaren arabera; halako kasuetan, likidazio prozedura administrazioak hasiko du, ikuskapen jarduketa dela bide, eta hori hasten diren akten ondoriozko likidazioetan jasoko da.
d) Tributupekoak bere lankidetza betebeharra betetzen ez duenean (ikuskapen jarduketak hasi baino lehen), ez-betetze hori zuzentzeko aurkezten diren aitorpenek ez dute egindako urratzeengatik bidezko diren zehapenak ezartzea ekidingo.
e) Interesatuak tributu Administrazioan azaltzen dituen kontsultak ez egindakotzat hartuko dira, ikuskapen jarduketak jorratu beharreko gaiari buruzkoak direnean.
4. Tributu Ikuskapenak bulego publikoetatik kanpo diharduenean, jarduleek beren izaera egiaztatu beharko dute, horretarako eskabiderik egin ez arren.
Tributu Ikuskapenak, jarduketak hasten direnean edo prozeduraren beste edozein unetan eta tributupekoak eskatuta, zergadun horri jarduketen esanahiari buruzko informazioa eman beharko dio, baita jarraitu beharreko prozedurari, tributupekoak dituen eskubide nahiz betebeharrei eta tributu ikuskapenarekiko betebeharrei buruzko informazioa ere.
27. artikulua . Ikuskapen jarduketen epearen iraupena. Epeak zenbatzea. Epea etetea eta luzatzea .
Ikuskapen jarduketen epearen iraupena, ikuskapen prozeduraren epearen kontaketa eta hura eteteko edo luzatzeko kasuak, Tributuei buruzko abenduaren 14ko 13/2000 Foru Lege Orokorraren 139. artikuluan xedatutakora egokituko dira.
Prozeduraren iraupenaren epea luzatzen ahalko da erregelamendu honen 29. artikuluan ezartzen den moduan.
28. artikulua . Prozeduraren iraupenaren gehieneko epea amaitu eta gero jarduketak egitea .
Zergapekoak ezagutza formala duela, prozeduraren iraupenaren gehieneko iraupen epea amaitu eta gero jarduketak egiteak, prozedurak aintzat hartzen dituen tributu obligazio eta epe guztien preskripzioa etengo du.
Ikuskapen prozedura egiten den bitartean egiaztatzen bada gehieneko epea gainditu dela, gorabehera hau zergapekoari jakinaraziko zaio, prozedura zer obligazioengatik eta zer epetan jarraitzen den ere esanez.
29. artikulua . Ikuskapenak zer kasutan ezin dezakeen egin jarduketarik zergapekoarekin .
1. Zergapekoak, entzunaldia emateko tramitea ireki baino lehen, Tributuei buruzko Foru Lege Orokorraren 139. artikuluaren 4. apartatuan xedatutako aldietako bat edo batzuk eskatzen ahalko ditu, bakoitza 7 egun naturalekoa, gutxienez. Prozedura osorako, eskatutako aldiak ez dira 60 egun natural baino gehiago izango.
2. Egiten den eskaera eman ahal izateko, beharrezkoa izango da baldintza hauek betetzea:
a) Jarduten duen organoari zuzenean eskatzea, eskaerak aipatzen duen aldia hasi baino aurreko zazpi egun naturalak baino lehenago.
b) Hori gomendatzen duten gorabeherak badaudela justifikatzea.
c) Eskaera aintzat hartzeak ez duela jarduketen garapena galaraziko argi egotea.
Baldintza hauek betetzen ez badira, jarduten duen organoak ezetz esaten ahal dio eskaerari.
Epearen barruan aurkeztuz gero, ulertuko da artikulu honetan ezartzen diren baldintzak betetzen dituen eskaera automatikoki eman dela eskatutako aldirako, 60 eguneko mugara arte, gehienez, ez bada eskatutako aldia hasi baino lehen berariaz jakinarazten dela ukatu dela.
7 egun baino gutxiagoko aldia eskatzen bada, automatikoki ukatzen dela ulertuko da.
Eskatutako aldia hasi baino lehen eskaerari baietza eman zaiola berariaz jakinarazteak ezartzen ahal du zergapekoak eskatu duen ez bezalako epe bat.
30. artikulua . Epeak ez betetzearen ondorioak eta ikuskapen jarduketen atzeraeragina .
1. Egiaztatzeko eta ikertzeko jarduketak hasiz gero, jarraitu egin beharko dira amaitzen diren arte, bere izaera eta nortasunarekin bat, nahiz eta aldez aurretik legez ezarri den epea amaitu.
Aurrekoa galarazi gabe, prozeduraren iraupen epea ez betetzeak ez du ekarriko prozedura iraungitzea, baina Tributuei buruzko Foru Legearen 139.6 artikuluak ezartzen dituen ondorioak ekarriko ditu.
2. Ebazpen judizial batek edo ebazpen ekonomiko administratibo batek ikuskapen jarduketen atzeraeragina agintzen badu, Tributuei buruzko Foru Legearen 139.7 artikuluak ezartzen duena hartuko da aintzat.
31. artikulua . Ikuskapen jardueren garapena.
1. Tributu Ikuskapenak tributupekoa agertzeko eskatu ahal izango du, jarduketak garatzeko ezinbestekoak diren egunetan, horretarako komenigarritzat jotzen den tokian eta orduan.
Egunero, tributu ikuskapenak bidezko deritzon jarduketa guztiak egingo ditu. Eguneroko jarduketak bukatu ondoren, tributu ikuskapenak horiek berriro hasteko tokia, eguna eta ordua finkatu ahal izango ditu; hori hurrengo astegunetik aurrera egin daiteke. Bulego publikoetara joateko eskabideek, tributupekoaren aurrean egiten ez direnek, zazpi eguneko gutxieneko epea ezarriko dute.
2. Halaber, enpresako lokaletan edo bertako beste bulego batzuetan ager daiteke, bidezko jarduketa guztiak egiteko.
3. Ikuskapen jarduketak justifikaziorik gabe etendakotzat hartuko dira, elkarren atzeko sei hilabetetan egiten ez direnean, baldin eta hori 28. artikuluan ezarritako kariren bat egotearen ondorioz gertatzen ez bada .
3. Tributu Ikuskapenak, jarduketak gauzatzean, ahalegina egin beharko du ahalik eta eragozpen gutxien sortzeko, tributupekoaren lan, enpresa edo lanbide jardueretan.
Jarduerak tributupekoaren bulegoetan edo lokaletan garatzen direnean, tributu ikuskapenaren esku lantoki egokia jarri beharko da .
32. artikulua . Tributupekoa agertzea.
1. Tributupekoa, idatziz eskatzen zaionean, jarduketak egiteko adierazitako tokian, egunean eta orduan agertu beharko da, eta tributu ikuskapenaren esku jarri edo aurkeztu beharko ditu eskaturiko agiriak eta gainerako elementu guztiak.
2. Tributu Ikuskapena, errekerimendurik gabe, jarduketak egiteko tokian agertzen denean, tributupekoak bertan balego bezala egin beharko dio kasu. Bestela tributu ikuskapenari Erregelamendu honetako 26. artikuluko 2. atalean aipaturiko edozein pertsonak lagundu beharko dio; behar izanez gero, tributu ikuskapenak, une eta toki berean, ikuskapen jarduketak jarraitzeko eskatuko du, horretarako ezartzen den bidezko epean, har daitezken bidezko kautelazko neurrien kalterik gabe.
3. Tributu Ikuskapenak jarduketak egiteko laguntza emango duen pertsonaren edo pertsonen nortasuna, izaera eta ahalmenak egiaztatzeko eska dezake.
Jarduketetan esku hartzeko ahalmen nahikorik ez duen pertsonaren bat agertuz gero, tributu ikuskapenak hori jasoarazi eta tributupekoa ez dela agertu joko du; hala eta guztiz ere, agertzen den pertsonari errekerimendua eman edo, bidezkoa izanez gero, pertsona egokia agertzeko eska dezake.
4. Tributupekoak tokian, egunean eta orduan ez agertzeko bidezko karirik alegatzen duenean, luzapena eskatu ahal izango du idatziz, kasuan kasuko jakinarazpena jaso eta hurrengo hiru egunetan. Hori hiru eguneko epe hori igarotakoan gertatuz gero, luzapena eskatu ahal izango da, ahalik eta lehenen, agertzeko ezarrita dagoen epeari dagokionez. Halako kasuetan, agertzeko beste egun bat ezarriko da; beti ere, tributupekoak bere esku dauden eta tributu ikuskapenari laguntza egokia emateko aukera ematen dioten neurri guztiak hartu ahal izango ditu.
33. artikulua . Funtzionarioek ikuskapen jarduketetan gelditzea.
1. Egiaztapen eta ikuskapen jarduketak, horiek hasi dituzten tributu ikuskapeneko funtzionarioek edo unitate funtzionalek egingo dituzte bukatu arte, baldin eta horiek lekualdatu, gaixotu edo ordezteko bidezko kariren bat badago.
2. Tributu ikuskapena osatzen duten kideek prozeduran parte hartzeari uko egin beharko diote, eta beren goiko agintariari horren berri eman, baldin eta Sektore Publikoaren Araubide Juridikoari buruzko urriaren 1eko 40/2015 Legearen 23. artikuluan abstentziorako aipatzen diren egoeretako batean badaude .
3. Tributu ikuskapenaren kideak errekusatzen ahalko dira, Sektore Publikoaren Araubide Juridikoari buruzko urriaren 1eko 40/2015 Legearen 24. artikuluan ezartzen den moduan .
34. artikulua . Egiaztapen orokorra egiteko eskabidea.
1. Egiaztapen eta ikerketa jarduketa partziala jasotzen ari den edozein tributupekok (tributu ikuskapenak buruturiko jarduketa) jarduketa hori orokorra izateko eska dezake, berorrek eragindako zergari eta ekitaldiari dagokionez, eta eskabide horrek ez ditu etengo bideraturiko jarduketak.
2. Tributupekoak hamabost eguneko epea izango du eskabidea egiteko, ikuskapen jarduketa partzialen hasiera jakinarazten zaionetik zenbatzen hasita; horretarako, Zerbitzuko zuzendariari idazkia bidali edo jarduleari berariaz jakinaraziko dio, eta horrek adierazpen hori eginbidean jaso beharko du.
3. Egiaztapen orokorreko eskabidea jaso ondoren, Zerbitzuko zuzendariak hori dagoeneko hasita dagoenaren handitzetzat burutu ala, aldiz, beste jarduketa bat hasi erabaki beharko du. Kasu horretan, Zerbitzuko zuzendariak egiaztapen berria eratxikitzen zaion funtzionarioa edo unitate funtzionala adierazi beharko du, eta hori hasteko sei hilabeteko epea egongo da, eskabidea jasotzen denetik zenbatzen hasita.
4. Erregelamendu honetako 27. artikuluan aipaturiko iraupen epea zehazteko, aurreko atalean jasotako egiaztapen jarduketa orokorrei dagokienez, honako hau hartu beharko da kontuan:
a) Tributu Ikuskapenak egiaztapen nahiz ikerketa jarduketa partzialak egiaztapen jarduketa orokorrak hasi baino lehen bukatzen baditu (betiereaurreko atalean aipaturiko sei hilabeteko epearen barruan), egiaztapen nahiz ikerketa jarduketa orokorren iraupen epea horiek hasten direnetik zenbatuko da.
b) Zergen Ikuskapenak egiaztapen nahiz ikerketa jarduketa partzialak bukatzen ez baditu (sei hilabeteko epe hori igaro ondoren), jarduketa horiek orokorrak izango dira, beraiek eragindako zergari eta ekitaldiari dagokionez; halako kasuetan, horien iraupen epea jarduketa partziala hasten direnetik zenbatuko da.
Jarduketa partziala zergadunaren eskabidea egin eta sei hilabete igaro ondoren bukatzen bada, baina epe horretan jarduketa orokorrik hasi ezean, Erregelamendu honetako 27. artikuluan aipaturiko epe orokorra zenbatzeko, hori sei hilabeteko epe hori igaro eta biharamunean hasten dela joko da.
35. artikulua . Interesatuaren alegazioak eta aktak egin baino lehenago entzunaldiak.
1. Entzunaldi tramitea baino lehenagoko edozein unetan, interesatuak alegazioak egin eta agiriak edo beste elementu batzuk aurkeztu ahal izango ditu, eta jarduleek horiek kontuan hartuko dituzte kasuan kasuko proposamena egiteko orduan.
2. Betiere, eta aktan jasotako proposamena egin ondoren, interesatuari entzunaldia emango zaio; bertan, espedientea jakinarazi eta egin beharreko proposamenaren edukia nahiz irismena adieraziko zaio, bere eskubidearen araberako alegazio guztiak egin ditzan.
Tramite horren eraginez, zergadunak horren kontura espedientean jasotako agirien kopia jaso ahal izango du, horiek kontuan hartu behar direnean, ebazpena emateko orduan.
Interesatuek, gehienez jota hamabost eguneko epean, bidezko deritzen agiri eta ziurtagiri guztiak alegatu eta aurkeztu ahal izango dituzte.
36. artikulua . Kautelazko neurriak.
1. Tributu Ikuskapenak legean ezarritakoaren arabera, bidezko deritzen kautelazko eta bermezko neurri guztiak hartu ahal izango ditu, honako hau ez desagertzeko, suntsitzeko edo aldatzeko: liburuak, agiriak, erregistroak, informatika programak, euskarri magnetikoan dauden artxiboak eta aztertu beharreko gainerako aurrekariak. Bestela, gero, halakorik ez dagoela edo erakutsi nahi ez dela esan daiteke.
Neurri horien artean zergapetu beharreko merkantzien edo produktuen bilketa edo konfiskazioa aipa daiteke, baita artxiboen, lokalen edo datuak tratatzeko ekipo elektronikoen bilketa edo konfiskazioa ere, horiek kasuan kasuko informazioa eduki baitezakete.
Horretarako, tributu ikuskapenak beharrezko laguntza eta lankidetza eskatu ahal izango die agintari eskudunei eta laguntzako eragileei.
2. Halako neurriak hartuz gero, hori behar bezala dokumentatu beharko da, zigilatu, bildu edo konfiskaturiko agirien edo objektuen inbentarioa eginez: kautelazko neurriak lortu nahi den helburuaren edo ekidin nahi den kaltearen araberakoak izango dira. Ezin izango da nekez edo inola ere konpondu ezin daitekeen kaltea sortzeko moduko neurririk hartu.
Hartutako kautelazko neurriak altxatu egingo dira, hartze hori justifikatzen duten gertaerak desagertzen direnean.
BOSGARREN KAPITULUA. TRIBUTUAK IKUSKATZEKO AHALMENAK
37. artikulua . Interesatuaren agirien azterketa.
1. Egiaztapen nahiz ikerketa jarduketetan, tributupekoek tributu ikuskapenaren esku jarri beharko dituzte (Merkataritza Kodearen 45. artikuluan agindutakoaren arabera) liburuak, fakturak, gutunak, agiriak eta gainerako ziurtagiri guztiak, enpresa nahiz lanbide jarduerari buruzkoak, euskarri magnetikoan dauden programak eta artxiboak ere barne, enpresak datuak prozesatzeko ekipo elektrikoak erabiltzen dituenean. Era berean, tributu ikuskapenari, beharrezko agiri edo aurrekari guztiak aurkeztu beharko dizkiote, adierazpenetan jasotako egitateak eta gertaerak frogatzeko eta euren zerga egoeraren egiaztapena errazteko.
2. Jarduketa horiek garatzeko, tributu ikuskapenak komenigarritzat jotzen dituen baliabide guztiak erabili ahal izango ditu, besteak beste honako hauek.
a) Interesatuak edozein zergari buruz egindako aitorpenak.
b) Subjektu pasiboaren edo tributupekoaren kontabilitatea; horren barruan, kontabilitateko erregistro eta euskarri guztiak sartuko dira, baita egindako oharren nahiz ohar horien aurretiazko edo gehigarrizko orrien ziurtagiriak ere, eta zergen arloan garrantzitsuak diren kontratuak eta agiriak ere bai. Kontabilitateko egoerekin batera, beharrezko banakatzeak eta iruzkinak egin beharko dira, finantzako informazioa behar bezala ulertu ahal izateko.
c) Beste pertsona edo erakunde batzuetatik zuzen nahiz zeharka lorturiko datuak edo aurrekariak, horiek subjektu pasiboarengan eragina dutenean.
d) Lankidetza betebeharraren eta salaketa eskubidearen ondorioz lorturiko datuak edo txostenak.
e) Administrazioko beste organo edo erakunde batzuetatik lorturiko informazioa.
f) Legez lor daitezkeen datu, txosten eta aurrekari guztiak.
3. Tributu Ikuskapenak artikulu honetan aipaturiko agiriak eta gainerako elementu guztiak aztertu ahal izango ditu; behar izanez gero, horiek pantailan ikustea edo euskarri informatikoetan artxibaturiko zerrendak inprimatzea eskatu ahal izango du. Halaber, eragileen bitartez, kontabilitateko oharrak beharrezkotzat jotzen diren gainerako datu guztiak idatzi ahal izango ditu, eta horien kargurako kopiak lortu ahal izango ditu, baita euskarri magnetikoan ere, artikulu honetan aipaturiko datu edo agiri guztiei buruz.
4. Tributu Ikuskapenak tributupekoari datuak, txostenak edo bere esku egon daitezkeen agirietatik ateratzen ez diren gainerako aurrekariak aurkezteko eskatzen dionean, baita aitorpenetan jasotako egitateen edo egoeren ziurtagirietatik aukeratzen ez diren beste aurrekari batzuk aurkezteko eskatzen dionean ere, gutxienez hamar eguneko epea emango zaio, lankidetza betebeharra betetzeko.
5. Administrazio publikoekiko harremana bitarteko elektronikoen bidez egiteko derrigortuta dauden pertsonek dokumentazioa jarduten duen ikuskapen organoari zuzenean ematen diotenean, organo horrek onartzen ahalko du dokumentazioa, administrazioaren jarduketa eraginkorra izateko helburuarekin. Hala onartzen bazaio, zergapekoa ez da behartuta egongo dokumentu horiek bitarteko elektronikoen bidez bidaltzeko .
38. artikulua . Tributu Ikuskapenak informazioa lortzeko egindako eskabideak.
1. Tributuei buruzko Foru Lege Orokorreko 103. artikuluan adierazitakoaren arabera, pertsona fisiko edo juridiko guztiek (publikoak nahiz pribatuak) Administrazioari zergen arloan garrantzitsuak izan daitezkeen datu, txosten edo aurrekari guztiak aurkeztu beharko dizkiote, hain zuzen ere, beste pertsona batzuekiko ekonomi, lanbide edo finantza harremanen ondoriozko guztiak.
Era berean, Tributuei buruzko Foru Lege Orokorreko 104. artikuluan ezarritakoa dela bide, agintariek, erakunde publikoek eta, oro har, eginkizun publikoak egiten dituzten guztiek Tributu Administrazioari zergen arloan garrantzitsuak diren datu eta aurrekari guztiak aurkeztu beharko dizkiote, halakorik eskatzen zaienean. Alderdi politikoek, sindikatuek eta enpresa elkarteek ere betebehar berbera izango dute.
2. Hain zuzen ere, Tributuei buruzko Foru Lege Orokorreko 130. artikuluko d) letran ezarritakoaren arabera, tributu ikuskapenak edozein pertsona edo erakunderi datuak, txostenak edo aurrekariak aurkezteko eskatu ahal izango dio, beste pertsona edo erakunde batzuei buruzkoak, baldin eta horiek Administrazioari aurkeztu behar bazaizkio, Tributuei buruzko Foru Lege Orokorreko 103. eta 104. artikuluan ezarritakoaren arabera.
3. Erregelamendu honetako 14. artikuluko 2. atalean ezarritakoaren kalterik gabe, tributu ikuskapenak pertsona edo erakunde batetik hurbil informazioa lortzeko jarduketaren bat hasten duenean, idatzizko errekerimendua edo halakorik gabe aurkezteko baimena Zerbitzuko buruak eman beharko du.
4. Informazioa lortzeko jarduerak berehala has daiteke, baita idatzizko errekerimendurik gabe ere, baldin eta lortu beharreko datuen izaerak hori justifikatzen badu eta tributu ikuskapenak bere esku egon behar diren agiriak, elementuak edo ziurtagiriak soilik aztertzen baditu. Bestela, kasuan kasuko pertsona edo erakundeei gutxienez hamar eguneko epea emango zaie eskaturiko informazioa aurkezteko edo tributu ikuskapenari beharrezko erraztasunak emateko, informazio hori bere kabuz lor dezan, bestela tributu urratze arruntean eroriko baita. Informazioa lortzeko jarduketen aribidean, tributu ikuskapenak Erregelamendu honetako 37. artikuluan aipaturiko ahalmenak edukiko ditu.
5. Eskaturiko informazioa guzti-guztiek aurkeztu beharko dute, baldin eta honako hau aplikagarria ez bada:
a) Postaren edukiaren sekretua, baita komunikazioaren sekretua ere, horri buruzko ebazpen judiziala dagoenean izan ezik.
b) Administrazioari helburu estatistikoz emandako datuen sekretua.
c) 1862ko maiatzaren 28ko Legeko 34. nahiz 35. artikuluek eta ezkontza gaiei buruzkoek aipaturiko tresna publikoei buruzko notaritzako protokoloaren sekretua, ezkontza sozietatearen araubide ekonomikoari buruzkoak izan ezik.
d) Ezkontzakoak ez diren datu pribatuei buruzko sekretu profesionala, ofizialak ez diren profesionalek euren jardueraren eraginez ezagutzen dutena, baldin eta hori agerian jartzeak pertsonen eta familien ohoreari edo intimitateari eraso egiten badio. Sekretu profesionalaren barruan ez dira inoiz era sartuko bezeroen identitateari eta horiek jasotako zerbitzuen ondorioz egindako ordainketei buruzko datuak.
Profesionalek ezin izango dute sekretu profesionala aitzakiatzat jarri, euren zerga egoera egiaztatzea ekiditeko.
e) Defendatzaileek eta aholkulariek euren zerbitzu profesionalak ematearen ondorioz jakin dituzten ezkutuko datuen sekretua gordetzeko betebeharra, baita abokatuek eta prokuradoreek Botere Judizialari buruzko Lege Organikoaren 437. nahiz 438. artikuluan ezarritakoa betetzeko betebeharra. Aholkularitzat, beste alde batetik, honako hauek hartuko dira: zuzenbidearen arabera onartutako jarduera profesionala garatzen dutenak, baldin eta horren helburua laguntza juridikoa, ekonomikoa edo finantzazkoa ematea bada. Bezeroaren eta aholkulariaren arteko elkarrekiko ondare harremanei buruzko datuak ez dira ezkutukoak izango.
f) Informazio askatasuna egikaritzeari loturiko sekretu profesionala, Konstituzioko 20. artikuluko lehenengo atalean eta Legean ezarritakoaren arabera .
6. 1/1982 Lege Organikoaren 8. artikuluko lehenengo atalean ezarritakoaren ondoreetarako, agintari eskuduna Ekonomia eta Ogasun kontseilarua izango da.
7. Zerbitzuko zuzendariak, jarduleen proposamenez, Epaitegiei eta Auzitegiei zergen arloan garrantzitsuak diren datu guztiak eskatu ahal izango dizkie, ezagutzen diren jarduketa judizialaren ondoriozko guztiak alegia, betieresumarioko eginbideen sekretua errespetatuz.
39. artikulua . Banku edo kredituko trafikoan diharduten pertsona edo erakundeetatik hurbil informazioa lortzeko jarduketak.
1. Banku edo kreditu jarduerak garatzen dituzten pertsona fisikoek edo juridikoek (adibidez, Banketxeak, Aurrezki Kutxak eta Kreditu Kooperatibak) tributu Administrazioari zergen arloan garrantzitsuak diren era guztietako datuak, txostenak edo aurrekariak eman beharko dizkiote, beste pertsona batzuekin dituzten ekonomi edo finantza harremanen ondoriozkoak.
2. Bereziki, pertsona edo entitate horiek derrigortuta egongo dira, tributu ikuskapenak eskatzen dienean, edozein zergapekorekin egiten dituzten kontu korronte, aurrezki gordailu eta eperako gordailuetako mugimenduen, mailegu eta kreditu kontuetako mugimenduen eta bestelako eragiketa aktibo eta pasiboen berri ematera.
Apartatu honetan ezartzen denaren arabera egiten den ikerketak txekeen edo bestelako ordainketa aginduen mugimenduen jatorriari eta destinoari eragiten ahal die, nahiz eta kasu hauetan, aipatu jatorria eta destinoa agertzen diren kontuen edo pertsonen identifikaziotik harago ezin joan .
3. Pertsona, entitate edo komunitate batzuen izenean dauden kontu bereiz edo bateratuen kasuan, borondatezkoak izan edo ez, titulartasun anitzeko gordailuetan eta antzeko kasuetan, titular jakin baten edo baimenduta dagoen baten gaineko informazioa eskatzeak kontuaren, gordailuaren edo eragiketaren datu eta mugimendu guztiak agerraraztea ekarriko du .
4. Soilik tributu ikuskapenak informazioa lortu nahi duenean, eta informazio hori lortzeak eskatzen duenean artikulu honen 2. apartatuak aipatzen diruen eragiketak edo kontuen mugimenduak ezagutzea, beharrezkoa izango da aldez aurretik Nafarroako Zerga Ogasuneko Kudeaketa-zuzendaritzako titularraren baimena izatea .
5. Eskabidean aditzera eman beharko da ikertu beharreko kontuak edo eragiketak, ukituriko subjektu pasiboak eta horren irismena, bertan aipaturiko aldiari dagokionez.
Eskaturiko datuak kontu desberdinen saldo aktiboei edo pasiboei buruzkoak izan daitezke, baita mugimendu guztiei zein batzuei (eskabidean aipaturiko aldian) eta gertatu diren gainerako eragiketei buruzkoak ere. Halaber, jarduketak agirietara eta eskaturiko datuei buruzko gainerako aurrekarietara heda daitezke.
Eskabidean, jarduketak egiteko modua ere zehaztu beharko da, artikulu honetako hurrengo atalean ezarritakoaren arabera.
6. Eskabidea baimendu ondoren, hori kasuan kasuko pertsonari edo erakundeari jakinaraziko zaio.
Jarduketak egiteko, eskabidean aipaturiko pertsonari edo erakundeari eskaturiko datuak edo aurrekariak aurkezteko eskatuko zaio; horretarako, ziurtagiria aurkeztu edo pertsonaren zein erakundearen bulegoan nahiz etxean agertu beharko da, beharrezko agiri guztiak aztertzeko.
Eskabidea jasotzen duen pertsonak hamabost eguneko epea edukiko du, eskaturiko datuak aurkezteko. Epe hori, berriz, eskabidea jakinarazten denetik jarduketak pertsonaren edo erakundearen bulegoetan hasten direnera artekoa izango da.
7. Eskabidea, behar bezala baimendu ondoren, ukituriko subjektu pasiboari jakinaraziko zaio; hori bertan egon daiteke, jarduketak pertsonaren edo banku nahiz kreditu erakundearen bulegoetan egiten direnean .
7. Tributu Ikuskapenak kasuan kasuko pertsonen edo erakundeen finantzazko ziurtagiriak aurkezteko eskatu ahal izango die interesatuei, baldin eta hori beharrezkoa bada, tributu aitorpenetan jasotako egitateak frogatzeko edo justifikatzeko .
40. artikulua . Finketan sartzea eta horiek aztertzea.
1. Jarduleak finketan edo negozioko lokaletan sar daitezke, baita zergapetu beharreko jarduerak edo ustiapenak garatzeko gainerako lokaletan nahiz tokietan ere, baldin eta horietan tributuei loturiko ondasunik egon, zergagairik gertatu edo horien frogaren bat badago, edozein jarduketatarako komenigarria denean, hain zuzen ere, interesatuaren ondasunak, bulegoak, instalazioak edo ustiapenak ezagutzeko komenigarria denean, eta beharrezko frogako jarduketa guztiak egingo dituzte.
2. Interesdunak, edo finkak zaintzen dituen pertsonak tributu ikuskapenari ez dionean sartzen uzten, Nafarroako Zerga Ogasuneko Kudeaketa-zuzendaritzako titularrak izenpetutako baimen idatzia beharko da, bidezkoak diren kautelazko neurriak hartzea deusetan galarazi gabe. Interesdunek, beste tramiterik gabe, tributu ikuskapenari utzi behar diote beren bulegoetan sartzen, eta han edukiko dute, enpresa bakoitzak onartua duen lanaldian zehar, enpresaren kontabilitatea eta negozioari dagozkion gainerako dokumentuak eta frogagiriak. Era berean, dagozkion unitate administratiboen burutzen titularrek utzi behar diote sartzen tributu ikuskapenari edozein administrazio publikotan txertatuta dauden entitateen erregistro, langela, areto edo bulegoetara .
3. Sartu eta ikuskatu nahi den lekua zergapekoaren bizilekua bada, Konstituzioak babestua dagoena, eta zergapekoaren adostasuna ez badago, epaileen baimena eduki beharko da, 13/2000 Foru Legearen 131.2 artikuluan ezarri bezala .
4. Ulertuko da interesduna edo finken zaintzailea ados dagoela sartzearekin edo ikuskatzearekin baldin eta eragiketa horiek gauzatu ahal izateko normalean behar izaten diren ekintzak, bere esku daudenak, egiten baditu. Dena dela, Konstituzioak babestutako egoitza batean sartu eta ikuskatu nahi bada, interesdunari berariaz galdetuko zaio ea baimentzen duen bertan sartzea, eta dagozkion eskubideak jakinaraziko zaizkio .
41. artikulua . Tributu Ikuskapenaren beste ahalmen batzuk.
1. Tren-geltokietan eta lurreko garraioen geltokietan nahiz aireportuetan, merkatu nagusietan, hiltegietan, lonjetan eta horien antzeko tokietan, tributu ikuskapenari sartzen utziko zaio, bertako geltokietara, moiletara eta bulegoetara, fakturazioei, sarrerei nahiz irteerei buruzko datuak har ditzan, eta bertako langileei lortu diren datuen nahiz aurrekarien zehaztasuna ziurtatzeko eskatu ahal izango zaie.
2. Zergen Ikuskapenak, halaber, hauxe egiteko ahalmena edukiko du:
a) Langileei edo enplegatuei informazioa eskatzea, euren lan jarduerei loturiko gaiei buruz.
b) Neurketak egitea edo laginak hartzea, baita argazkiak, krokisak edo planoak egitea ere.
c) Perituen irizpena eskatzea.
d) Zergaren ordainarazpena zehazten duten gauzak erakusteko eskatzea.
e) Enpresaren barruko kontrol sistemak egiaztatzea, horrek interesatuaren zerga egoeraren egiaztapena erraztu baitezake.
42. artikulua . Tributu Ikuskapenaren jarduketaren aurka egitea.
1. Tributupekoak, horren ordezkariak edo mandatariak tributu ikuskapenaren jarduketa oztopatu edo horren aurka egiten duela joko da, ikuskapen jarduketak luzatzeko, oztopatzeko edo ekiditeko ahalegina egiten duenean.
2. Hain zuzen ere, ikuskapen jarduera honako kasu hauetan oztopatu edo ekidin nahi dela joko da:
a) Tributupekoa behin eta berriro ez agertzea (justifikaturiko arrazoirik egon ezean), jarduketak hasteko, garatzeko edo bukatzeko denboran eta forman adierazi zaion tokian, egunean eta orduan, Erregelamendu honetako 32. artikuluan ezarritakoaren arabera.
b) Jarduketaren derrigorrezko liburuak, erregistroak eta agiriak erakutsi nahi ez izatea.
c) Tributupekoari loturiko datuak, txostenak, ziurtagiriak eta aurrekariak erakutsi nahi ez izatea, horiek berariaz eskatzen zaizkionean; halaber, tributu egitateei edo horien kuantifikazioari loturiko lokalak, makinak, instalazioak eta ustiapenak erakutsi nahi ez izatea.
d) Tributu Ikuskapenari finketan eta lokaletan sartzen edo bertan gelditzen ez uztea, horretarako arrazoirik egon ezean.
e) Tributu Ikuskapenaren aurkako hertsapenak edo errespetu ezak, eska daitezkeen gainerako erantzukizunen kalterik gabe.
SEIGARREN KAPITULUA. IKUSKAPEN JARDUEREN BUKAERA
Ikuskapen jarduerak bukatutzat joko dira, tributu ikuskapenaren iritziz eman behar diren kudeaketa egintzak euskarritzeko beharrezko datuak eta frogak lortzen direnean, bai interesatuaren zerga egoera zuzena dela jota, bai egoera hori zuzenbidearen arabera egokituta.
44. artikulua . Formalizazioa.
Ikuskapen jarduerak bukatu behar direnean, horien emaitza dokumentatu beharko da, Erregelamendu honetako zazpigarren kapituluan ezarritakoaren arabera, eta horrela jarduerok bukatutzat joko dira.
1. ATALA. XEDAPEN OROKORRAK
45. artikulua . Arau orokorrak.
Tributu Ikuskapenaren jarduerak eginbideetan, jakinarazpenetan, txostenetan eta aurretiazko nahiz behin betiko aktetan dokumentatuko dira.
Tributu Ikuskapenak ez ditu agiriok nahitaez formalizatu behar, baina Erregelamendu honetan ezarritakoaren arabera egin beharko du hori. Jarduleek, bestalde, komenigarritzat jotzen dituzten ohar guztiak hartu ahal izango dituzte, beraiek bakarrik erabiltzen dituzten paperetan.
2. ATALA. JAKINARAZPENAK, EGINBIDEAK ETA TXOSTENAK
46. artikulua . Jakinarazpenak.
1. Jakinarazpenak tributu ikuskapenak, bere eginkizunak betetzean, edozein pertsonarekin harremanak edukitzeko erabiltzen dituen agiriak dira.
2. Jakinarazpenetan, tributu ikuskapenak tributupekoei egitateak edo gertaerak jakinarazi ahal izango dizkie, baldin eta horiek jardueretan interesik badute; halaber, horiek bidezko eskabide guztiak egin ahal izango dizkiote.
Jakinarazpenak gauzatzen diren eginbideen edukian sartu ahal izango dira.
3. Jakinarazpenak, tributu ikuskapenak sinatu ondoren, interesatuari jakinaraziko zaizkie, zuzenbidean ezarritakoaren arabera. Informazioa lortzeko jardueretarako ezarritakoa izan ezik, jakinarazpenak beroriek bidaltzen dituen jarduleak sinatuko ditu.
4. Jakinarazpenetan hauxe adieraziko da: horiek emateko tokia zein data, pertsonaren edo erakundearen identitatea, nora zuzentzen diren, bidaltzailearen identifikazioa zein sinadura, jakinarazten diren egitateak edo gertaerak eta jakinarazpenaren bitartez egiten den eskabidearen edukia.
Jakinarazpenak interesatuari ikuskapen jarduerak hasi direla jakinarazteko balio duenean, bertan jakinarazpenak eragiten duen preskripzioaren etetea adierazi beharko da.
5. Jakinarazpenen bi kopia egingo dira eta tributu ikuskapenak kopia bat gordeko du.
1. Eginbideak tributu ikuskapenak ikuskapen prozeduran ematen dituen agiriak dira; prozeduraren instrukzioan komenigarritzat jotzen diren egitateak edo gertaerak jasoarazteko balio dute, baita tributu ikuskapenaren jasotzailea den pertsonaren (edo pertsonen) adierazpenak jasoarazteko ere.
2. Eginbideetan ez dago tributu likidazioei buruzko proposamenik, eta aurretiazko nahiz behin betiko aktak prestatzeko agiriak izan daitezke; bestela, baliozkoak izan daitezke ikuskapen prozedura gabe beste prozedura bat hastea eragiten duten egitateak edo gertaerak jasotzeko, eta helburu hori duen tributu ikuskapenaren proposamena agiri independentean jasoko da.
3. Eginbideetan horiek emateko tokia eta data jasoko da, baita zein egoitza, bulego edo etxetan egiten diren ere; halaber, eginbidea sinatzen duten tributu ikuskapeneko funtzionarioen identifikazioa ere jasoko da; baita jarduketetan parte hartzen duen pertsonaren nortasun agiri nazionalaren zenbakia, sinadura, izena eta deiturak ere, eta eskuhartzean duen izaera edo ordezkapena ere bai; era berean, jarduketen jasotzailea, tributupekoaren identitatea eta, azkenik, eginbidearen edukia osatzen duten egitateak edo gertaerak ere jasoko dira.
4. Luzatzen diren eginbideen ale bat emango zaio beti, jarduketetan parte hartzen duten pertsonari. Ale hori jaso nahi ez badu, zuzenbidean onartutako beste edozein bide erabiliz bidaliko zaio.
Pertsona horrek eginbidea sinatu nahi ez duenean, edo hori egin ezin duenean edo nola egin ez dakienean, hori eginbidean jasoko da, kasuan kasuko kopia ematearen kalterik gabe, aurreko paragrafoan ezarritakoaren arabera.
1. Tributu Ikuskapenak, ofizioz edo gainontzekoek eskatuta, honako txosten hauek bidaliko ditu:
a) Antolamendu juridikoaren arabera manuzkoak diren txostenak.
b) Administrazioko beste organo nahiz zerbitzu batzuek edo botere legegileak zein judizialak eskatzen dizkioten txostenak, legeetan ezarritakoaren arabera.
c) Tributuak aplikatzeko behar diren txostenak, eta halakoetan, txostenak bidaltzeko komenigarritasuna arrazoitu beharko da.
2. Hain zuzen ere, tributu ikuskapenak txostena eman beharko du:
a) Hasitako desadostasun edo aurretiazko frogako aktak osatzeko.
b) Zergen oinarriak zeharka kalkulatzeari buruzko araubidea aplikagarria denean edo zantzu metodoa erabiltzea bidezkoa denean.
c) Zergen arloko lege iruzurraren adierazpen bereziko prozedura hastea sustatzen denean.
d) Adostasunez sinaturiko ikuskapen akten ondoriozko likidazioei dagokienez ezartzen diren errekurtsoak edo erreklamazio ekonomiko-administratiboak egiten direnean.
3. Administrazioko beste organo edo zerbitzu batzuek edota Botere Legegileak eta Judizialak tributu ikuskapenari txostena eskatzen diotenean, hori Zerbitzuko zuzendariaren bitartez tramitatuko da.
Hain zuzen ere, Tributu Ikuskapenaren txostena erantsiko zaio organo judizial eskudunari edo Ministerio Fiskalari bidaltzen zaion espedienteari, baldin eta Ogasun Publikoaren aurkako delituaren aztarnak ikusten badira.
4. Jarduleak, tributuak aplikatzeko beharrezkotzat jotzen duenean, txostena eman ahal izango du, hori egiteko komenigarritasuna arrazoituz.
Tributu Ikuskapenak txostena eman dezake, subjektu pasiboaren edo erantzulearen ondasunen nahiz eskubideen egoera deskribatzeko eta, horrela, likidaturiko tributu zorren kobrantzari dagokion bilketa kudeaketa errazteko.
5. Tributu Ikuskapenaren txostenek aktan jasotako likidazio proposamena osatzen dutenean, batez ere egitateen multzoa eta proposamen hori euskarritzen duten zuzenbideko funtsak jasoko dituzte.
3. ATALA. AKTAK
49. artikulua . Ikuskapen aktak.
1. Aktak tributu ikuskapenak egiaztapen eta ikerketa jarduketen emaitzak jasotzeko egiten dituen agiriak dira; horietan, tributupekoaren zerga egoeraren erregularizazioa egitea proposatzen du, kuotari, errekarguei eta berandutza-interesei dagokienez, edo zerga egoera hori zuzena dela adierazten du.
Aktak, beste alde batetik, egiaztapeneko eta ikerketako ikuskapen jarduketen ondoriozko likidazioen prestakuntza agiriak dira, likidazioan horien proposamena jasotzen dute.
2. Ikuskapenaren aktetan hauxe jasoko da:
a) Formalizazioaren tokia eta data.
b) Akta sinatzen duten jarduleen identifikazio pertsonala.
c) Jarduketetan parte hartzen duen pertsonaren sinadura, izen-deiturak eta nortasun agiri nazionalaren zenbakia, baita horietan eskuhartzeko izaera edo ordezkapena ere; halaber, sozietatearen izen-deiturak, identifikazio fiskalaren zenbakia eta tributupekoaren zerga egoitza ere jasoko dira.
d) Jarduketen hasiera eguna, prozeduraren epea eta honen zenbaketari eragiten dioten gorabeherak, Tributuei buruzko Foru Lege Orokorraren 139. artikuluko 3., 4. eta 5. apartatuekin bat .
e) Tributu egitatearen eta hori tributupekoari eratxikitzearen oinarrizko elementuak. Ikuskapen jarduketen ondoriozko egitateak eta gertaerak (zergen arloan garrantzitsuak direnak) ere adieraziko dira, edo horiek jasoarazteko erabili diren eginbideak ere aipatuko dira.
f) Era berean, interesatuak (Tributuei buruzko Foru Lege Orokorreko 85. artikuluaren babesean) alegaziorik aurkeztu duen ala ez ere jasoko da; alegaziorik aurkeztu badu, horien balorazioa egin beharko da.
g) Interesatuaren zerga egoeraren erregularizazioa, jarduleek bidezkotzat jotzen dutena; halakoetan, tributupekoari eskaturiko tributu zorra adierazi beharko da, kuoten errekarguen eta berandutza interesen arabera eskatzen zaiona.
h) Tributupekoaren adostasuna edo desadostasuna.
i) Aktaren ondorioz jarraitu beharreko prozeduraren berehalako tramiteen adierazpena; eta, akta adostasunekoa denean, horren ondoriozko likidazio egintzaren aurkako errekurtsoen, horiek aurkezteko organoaren eta errekurtsook jartzeko epearen adierazpena.
3. Tributupekoa enpresaria edo profesionala denean, eta hori egitea garrantzitsutzat jotzen duten zergei dagokionez, aktan interesatuaren derrigorrezko liburuen edo erregistroen egoera jaso beharko da, ikusitako akatsak edo hutsak adieraziz; bestela, horiek aztertu ondoren akats garrantzitsurik ez dagoela ondoriozta daitekeela adierazi beharko da, kasuan kasuko zergaren ordainarazpenari dagokionez.
4. Tributu edo kontzeptu ezargarri bakoitzari dagokionez, akta bakarra egin ahal izango da, egiaztatu beharreko aldi osorako. Hala eta guztiz ere, likidazioak banan-banan egin beharko dira, zerga aldi bakoitzerako.
50. artikulua . Aurretiazko aktak.
1. Tributu Ikuskapenak egiten dituen aktak aurretiazkoak edo behin betikoak izan daitezke. Aurretiazko aktek behin-behineko likidazioak eragiten dituzte, gerora egin daitezkeen behin betiko akten kontura.
2. Aurretiazko aktaren hasiera bidezkoa izango da:
a) Zerga eta aldi berberari dagokionez tributupekoak tributu ikuskapenak zerga egoera arautzeko egin dion proposamenaren alderdi batzuk baino onartzen ez dituenean. Kasu honetan, lehenengo eta behin, eta aurretiazko akta batean, interesatuaren berariazko adostasuna jaso duten jarduketen emaitza dokumentatuko da, eta gainerako kontzeptuei buruzko desadostasun akta egingo da. Akta bakoitzean beste aktaren formalizaziori buruzko aipamena egingo da.
Aurretiazko aktaren ondoriozko likidazioa konturako likidazioa izango da, aldi berean hasten den desadostasun aktaren ondoriozko behin-behineko edo behin betiko aktari dagokionez.
Adostasuneko aurretiazko akta, beste alde batetik, desadostasuneko behin betiko aktarekiko aldi berean ere erabili ahal izango da, interesatuak arauturiko kuotarekin adostasuna eta tributu zorreko elementuren baten edo gainerako elementuen likidazioarekin desadostasuna duenean.
b) Tributu egitatea eraskabetu daitekeenean, kasuan kasuko egiaztapen eta ikerketa jarduketak egiteko, edo lurralde banaketaren eraginez bereizi egin behar denean, gauzatzen den toki desberdinetan.
c) Tributu Ikuskapenak tributu egitateen edo oinarrien egiaztapena edo ikerketa egin ezin duenean, baldin eta jarduketak eten beharra badago, eta halakoetan behin-behineko likidazioa egin ahal izango da.
d) Tributuei buruzko Foru Lege Orokorraren 163.3 artikuluarekin bat etorriz, zerga kontzeptu eta aldi bakar baterako, ogasun publikoaren aurkako delituaren zantzuak atzematen diren elementuak ikusi direnean, halako deliturik atzematen ez diren beste elementu batzuekin batera.
Kasu hauetan, aldez aurretiko akta batean jarriko dira ogasun publikoaren aurkako deliturik atzematen ez diren elementuak, delituari lotutako likidazioaren proposamena aipatuz, bi likidazioak behin-behinekoak direla .
3. Halaber, aurretiazkoak izango dira:
a) Pertsona Fisikoen Errentaren gaineko Zergaren edo Ondareari buruzko Zergaren ondorioz hasten diren aktak, baldin eta bi zerga horien egutegiko urte berbereko aitorpenak-likidazioak egiaztatu ez badira.
b) Egiaztatu beharreko zergaren oinarria beste batzuetarako ezarritako oinarrien arabera zehazten denean egindako aktak, edo bertan atxiki beharreko errendimenduak zenbatzen direnean, eta batzuetan nahiz besteetan behin betiko egiaztapenik egiten ez denean, errendimendu horiek behar bezala egiaztaturik daudela jotzen denean izan ezik.
c) Gardentasun fiskaleko araubidea duen sozietate edo erakunde bateko kideei dagokienez egiten diren aktak, baldin eta erakundearen zerga egoera egiaztatzen ez bada.
4. Tributu Ikuskapenak aurretiazko akta bat ematen duenean, hori berariaz jasoarazi beharko du; gainera, akta hori eragin duten egitateak ere adierazi beharko ditu, edo tributu egitatearen nahiz horren balorazioaren elementuak ere bai, ikuskapen egiaztapenak kontuan hartu dituen elementuak, hain zuzen ere.
5. Aurretiazko aktak tramitatzean tributupekoak aktan jasotako likidazio proposamenarekiko adostasun adierazi duen ala ez hartuko da kontuan.
51. artikulua . Zorpekoan ez dauden aktak.
1. Zorpekoan ez dauden aktetan, tributupekoak ordaindu beharreko zorrik gabeko likidazioa eragiten da.
2. Zorpekoan ez dauden aktak egiaztapenekoak eta adostasunekoak izan daitezke, edo tributupekoaren zerga egoeraren erregularizazioa eragin dezakete.
52. artikulua . Egiaztapeneko eta adostasuneko aktak.
1. Tributu Ikuskapenak tributupekoaren zerga egoera zuzena dela uste izanez gero, aktan jasoaraziko du; akta horretan, adostasunaren barruan sartzen diren kontzeptuak eta aldiak zehaztuko dira. Halako aktak adostasunekoak edo egiaztapenekoak izango dira.
Egiaztapeneko edo adostasuneko akta egingo da, adostasunaren barruan sartzen diren zerga aldiei edo tributuak aitortzeko aldi guztiei buruz, eta horren barruan, egiaztatzeko moduko zerga edo kontzeptu guztiak sartuko dira.
2. Egiaztapeneko eta adostasuneko akta horiek interesatuaren edo horren ordezkariaren aurrean egin daitezke, edo hartu izanaren adierazpenik gabeko postaz bidal daitezke.
3. Egiaztatzearen eta ados egotearen aktak adostasunarenak bezala tramitatuko dira .
53. artikulua . Zorpekoan egon ez eta tributupekoaren zerga egoera egokitzen duten aktak.
1. Tributu Ikuskapenak tributupeko baten zerga egoerari buruz bidezkotzat jotzen duen egokitzapenetik Foru Komunitatearen aldeko tributu zorrik sortzen ez denean, akta egingo da; bertan, interesatuaren adostasuna edo desadostasuna jasoaraziko da, eta akta hori adierazpen horren arabera tramitatuko da.
2. Erregularizazio hori egin eta gero, interesdunari itzuli beharreko kopuru bat ateratzen bada, egiten den aktaren ondoriozko likidazioak balioko du administrazioa berehala has dadin egiten bidegabeki egindako sarrerengatiko itzulketa-espedientea. Nafarroako Foru Komunitateko Diru-bilketaren Erregelamenduaren 68. artikuluaren ondorioetarako, interesdunaren aldeko kreditua aitortu, likidatu eta jakinarazitzat emango da.
Egiaztapen eta ikerketa jarduketa berberaren emaitzak dokumentatzen dituzten aktetatik beste modu bateko likidazioak sortzen direnean (tributupeko berberari buruzko likidazioak), horiek irmo bihurtzean, bilketa organo eskudunak (interesatuak eskatuta), borondatezko bilketa aldian, horien ondoriozko zorren eta kredituen konpentsazioa erabakiko du. Erabakitako konpentsazioak ez dio kalterik egingo tributu zorra luzatzeko edo zatitzeko emakidari .
54. artikulua . Akta motak, horien tramitazioaren ondoreetarako.
Tributu Ikuskapenaren aktak adostasunekoak edo desadostasunekoak izango dira, interesatuak egin den likidazio proposamena oso-osorik onartzearen ala ez onartzearen arabera; proposamen hori Ikuskapen aktan jasota dago.
Nolanahi ere, tributu ikuskapenaren aktak bi alderdiek sinatuko dituzte, eta interesatuari ale bat emango zaio. Interesatua azaltzen ez denean, akta sinatu nahi ez duenean edo horren ale bat jaso nahi ez duenean, akta desadostasun aktatzat tramitatuko da. Interesatuak akta sinatzeko modua ez badaki edo sinatu ezin badu, jarduleak egoera hori jasoarazi beharko du. Tributu Ikuskapenak, bestalde, Erregelamendu honetako 62. artikuluan ezarritakoaren arabera sinatuko ditu aktak.
55. artikulua . Adostasuneko aktak.
1. Interesatuak, tributu ikuskapenak azaldutako irizpideak eta aurkezturiko frogak aztertu ondoren, tributu ikuskapenak aktan egindako likidazio proposamenarekiko adostasuna ematen duenean, Ikuskapen horrek horrela jasoko du aktan eta interesatuak horren edukia jaso duela joko da.
2. Akta adostasunekoa bada, eta zorra bat agerrarazten badu, interesdunak tributu zorraren zenbatekoa ordaindu beharko du, ordaintzen ez badu premiamendu bidean ordainaraziko zaiola ohartarazita, Nafarroako Foru Komunitateko Diru-bilketaren Erregelamenduaren 21. artikuluaren 2. apartatuak ezartzen dituen epeetan. Epe hauek kontatzen hasteko, aktaren ondoriozko likidazioa egin dela ulertzen den eguna hartuko da.
Aktaren alearekin batera, interesdunari emango zaizkio tributu zorra ordaintzeko beharrezkoak diren diru-sarrerarako dokumentuak .
3. Hala eta guztiz ere, tributupekoak adostasunez sinaturiko aktan jasotako likidazioak aurkatu ahal izango ditu; horretarako, hamabost eguneko epea edukiko du, aktak sinatzen direnetik zenbatzen hasita.
Adostasuna eragin duten tributu oinarriak euskarritzen dituzten egitateak eta elementuak ezin izango dira inoiz ere aurkatu, tributupekoak egitatezko akatsa egin duela frogatzen duenean izan ezik.
Aurkatzea, bestalde, tributu ikuskapeneko Zerbitzuko zuzendariari bidaliko zaio; horrek horri buruzko beste ebazpen bat emango du, eta jarduketak gehienez jota hiru hilabeteko epean osatzeko agindu dezake. Halako kasuetan, akta berriek, baita horien ondoriozko likidazioek ere, lehen formalizatu direnak ordeztuko dituzte, eta bidezko eran tramitatuko dira.
Aurkatze horren tramitazioa, berriz, tributupekoari leporatzeko moduko luzapentzat har daiteke, Erregelamendu honetako 27. artikuluan ezarritakoaren ondoreetarako .
56. artikulua . Desadostasuneko aktak.
1. Interesatuak akta sinatu nahi ez duenean, edo sinatuta ere bertan jasotako egokitzapen proposamenarekiko adostasunik ematen ez badu, akta horien tramitazioa jarduketak gauzatu dituzten funtzionarioek egingo dute; interesatuari, ematen zaion alean, Zerbitzuko zuzendariari bidezko alegazio guztiak aurkezteko eskubidea duela esango zaio; horretarako, hamabost eguneko epea edukiko du, akta egin edo jaso duen egunetik zenbatzen hasita.
2. Jarduketetako pertsonak uko egiten badio akta izenpetzeari, tributu ikuskapenak horren berri jasoko du aktan bertan, baita ale bikoiztua ematen zaiolako aipamena ere. Kasu honetan, jakinarazpena atzera bota dela ulertuko da, Tributuei buruzko Lege Orokorraren 99. artikuluan aurreikusitako ondorioetarako.
Pertsona horrek uko egingo balio aktaren ale bikoiztua jasotzeari, tributu ikuskapenak jaso egingo du hori ere, eta gero alea interesdunari bidaliko zaio.
Interesduna ez bada agertzen aktak izenpetzera, hauen jakinarazpena Tributuei buruzko Foru Lege Orokorrak ezartzen duenaren arabera egingo da, eta ikuskapen prozeduraren epearen kontaketa eten egingo da, zergapekoari aktaren jakinarazpena egiten saiatu denetik jakinarazpena egiten den arte .
3. Desadostasuneko aktetan, beharrezko xehetasun guztiak emanez, egokitzapen proposamena oinarritzen duten zuzenbideko egitateak eta funtsak adieraziko dira; horiek, berriz, tributu ikuskapenak egindako txosten sakonago batean garatuko dira; txosten hori tributupekoari bidaliko zaio, aktekin batera. Halaber, aktaren barruan berariaz jasoko da interesatuak adierazitako desadostasuna edo adostasuna ematea galarazten dioten zergatiak, unea iristen denean bere eskubidearen araberako alegazio guztiak egitearen kalterik gabe..
57. artikulua . Aurretiaz eraturiko froga duten aktak.
1. Tributu egitatearen aurretiaz eraturiko froga dagoenean, Tributuei buruzko Foru Lege Orokorreko 136. artikuluko 2. atalean ezarritakoaren arabera, akta egin ahal izango da, eta horretarako, tributupekoak edo horren ordezkariak ez dute bertan egon beharrik edukiko.
Tributu oinarriaren aurretiaz eraturiko froga egongo da, egitate hori frogatutzat jo daitekeenean, Tributuei buruzko Foru Lege Orokorreko 106-111 bitarteko artikuluetan frogak baloratzeko jasotako arauen arabera.
Aktan, beharrezko zehetasunez, erabilitako froga egitateak eta baliabideak adieraziko dira, eta horrekin batera jardulearen txostena ere jasoko da.
2. Akta egin baino lehen, tributupekoari kasuan kasuko prozeduraren hasiera jakinarazi eta hamabost eguneko epea irekiko da; epe horretan, espedientea adieraziko zaio, interesatuak bere eskubidearen araberako alegazioak egin eta bidezko agiri nahiz ziurtagiri guztiak aurkez ditzan.
58. artikulua . Aktak egiteko tokia.
Tributu Ikuskapenak adierazitakoaren arabera, aktak bai tributupekoaren bulegoan, negozioko lokalean edo etxebizitzan, bai tributu Administrazioaren edo jarduketak egin diren Udalaren bulegoetan egin eta sinatuko dira.
4. ATALA. AKTEN TRAMITAZIOA ETA HORIEN ONDORIOZKO TRIBUTU LIKIDAZIOAK
59. artikulua . Akten ondoriozko tributu likidazioak.
1. Tributuei buruzko Foru Lege Orokorreko 130. artikuluko c) letran adierazitakoaren arabera, tributu ikuskapenak egiaztapen eta ikerketa jarduketen emaitzak dokumentatzen dituzten akten ondoriozko tributu likidazioak egingo ditu.
Zerbitzuko zuzendariak bidezko tributu likidazioko administrazio egintza guztiak emango ditu.
2. Adostasuneko aktak direnean, tributu likidazioa aktak proposatzen duenaren arabera hilabeteko epean egin dela ulertuko da, akta egin zen egunetik kontatua, berariaz beste jakinarazpen bat egin behar izan gabe, ez bada epe hori amaitu baino lehen zerbitzu zuzendaritzaren titularrak ebazpen bat egiten duela, interesdunari jakinarazi beharko zaiona, zeinean aktan egin den proposamenean zeuden akatsak atzeman eta zuzentzen baitira, ondorengo apartatuak aipatzen duen espediente administratiboari hasiera emango baitzaio, edo bestela egin den akta eraginkortasunik gabe utziko baitu, hiru hilabete baino luzeagoa izango ez den epe batean ordura arteko jarduketak osatzeko aginduz.
Azken kasu honetan, jarduketa osagarrien emaitza aktan jasoko da, eta gero akta bere izaeraren arabera tramitatuko da.
Organo eskudunak likidazioa egiteko daukan hilabeteko epea bertan behera geratuko da Tributuei buruzko Foru Lege Orokorraren 139.3 artikuluaren d) letrak aipatzen duen gorabehera gertatzen denean .
3. Zerbitzu zuzendaritzaren titularrak ikusten badu aktan egin den likidazio proposamenean aktaren oinarria diren egitateak oker atzeman direla, edo arau juridikoak gaizki aplikatu direla, espediente administratiboa hasteko erabakia hartuko du, era arrazoituan, eta interesdunari jakinaraziko dio lehen apartatuak aipatzen duen hilabeteko epean.
Interesdunak egoki jotzen dituen alegazioak egiten ahalko ditu, hartutako erabakiaren jakinarazpenaren ondorengo hamabost egunetan. Alegazioen epea pasatu eta gero, hurrengo hilabetean dagokion ebazpena emango da.
Organo eskudunak likidazioa egiteko daukan hilabeteko epea bertan behera geratuko da Tributuei buruzko Foru Lege Orokorraren 139.3 artikuluaren d) letrak aipatzen duen gorabehera gertatzen denean .
4. Akta desadostasunekoa denean, Zerbitzuko zuzendariak (akta nahiz txostena eta interesatuak egindako alegazioak aztertu ondoren) kasuan kasuko administrazio egintza emango du.
Halaber, Zerbitzuko zuzendariak espedientearen alderdi guztiak osatzeko erabaki dezake; tributu ikuskapenak, bestalde, bidezko jarduketa guztiak egingo ditu, hiru hilabeteko gehieneko epean. Kasu honetan, harturiko erabakia interesatuari jakinaraziko zaio.
Jarduketa osagarriak bukatu ondoren, beraien emaitzen arabera dokumentatuko dira. Akta hasiz gero, horrek lehen egindakoa ordeztuko du alderdi guztietan, eta tramitazio egokia izango du; bestela, espediente osoa ostera ere interesatuari jakinaraziko zaio, gehienez jota hamabost eguneko epean bidezko deritzen alegazio guztiak egin ditzan; Zerbitzuko zuzendariak hurrengo hilabetean eman beharko du ebazpena.
Tramitazio horren ondorioz ematen den administrazio egintzan jarduleek egindako proposamena aldatzen denean, tributupekoak egindako likidazio berriarekiko adostasuna eman dezake; bost eguneko epea izango du horretarako, hori jakinarazten zaionetik zenbatzen hasita. Adostasuna idatziz formulatu eta espedientean sartuta geldituko da. Adostasun horrek ondoreak izango ditu, Erregelamendu honetako 63.7 artikuluan ezarritako zehapenaren murrizketan.
60. artikulua . Ikuskapen akten ondoriozko tributu likidazioen aurkako errekurtsoak eta erreklamazioak.
1. Adostasuneko akta batean jasotako proposamenaren arabera gertaturiko tributu likidazioei eta tributu ikuskapenak emandako gainerako likidazio egintza guztiei berraztertzeko errekurtsoa edo erreklamazio ekonomiko-administratiboa jarri ahal izango zaie, hiru hilabeteko epean, Tributuei buruzko Foru Lege Orokorreko IV. tituluko VII. kapituluko 3. eta 4. ataletan ezarritakoaren arabera.
Adostasuneko aktak ezin izango dira aurkatu; horien ondoriozko tributu likidazioak (behin-behinekoak edo behin betikoak) soilik aurkatu ahal izango dira.
2. Tributupekoak ezin izango ditu inoiz ere aurkatu tributu oinarriak ezartzen dituzten egitateak eta elementuak, baldin eta horiekiko adostasuna eman badu, egitatezko akatsa egin duela frogatzen duenean izan ezik.
Interesatua ordezkariaren bidez agertu eta akta baten ondoriozko likidazioa aurkatuz gero (ahalmen eza edo ahalmen nahikoa ez edukitzearen eraginez), edo adostasuneko akta bati buruz hori alegatzen badu, likidazioa edo akta baliozkoak izango dira, baldin eta ikuskapen jarduketak Erregelamendu honetako 23. artikuluan ezarritakoaren arabera egin badira.
61. artikulua . Tributu Ikuskapenaren akten eta eginbideen froga balioa.
1. Tributu Ikuskapenak egindako aktak eta eginbideak agiri publikoak izango dira.
2. Legeen arabera egindako aktek eta eginbideek, aurkakorik egiaztatu ezean, beraien formalizazioa eragiten duten egitateak frogatzen dituzte, baldin eta horiek jarduleen egiaztapen pertsonaletik sortzen badituzte.
Eginbideetan edo aktetan jasotako eta interesatuek adierazitako zein onartutako egitateak egiazkoak direla joko da, eta horiek zuzentzeko, egitatezko akatsa egon dela frogatu beharko da.
3. Tributu Ikuskapenaren aktaren ondoriozko tributu likidazioan oinarritzen diren administrazio egintzak legezkotasunaren ustezkotasuna edukiko dute, Tributuei buruzko Foru Lege Orokorreko 8. artikuluan ezarritakoaren arabera; horrenbestez, berehala betearazteko modukoak dira, baina beraien ondoreak eten egin daitezke, organo eskudunak hori erabakitzen duenean, baldin eta haien aurka berraztertzeko errekurtsoa edo erreklamazio ekonomiko-administratiboa ezartzen bada, kasuan kasuko xedapenen arabera.
62. artikulua . Tributu Ikuskapeneko funtzionarioek eginbideak eta aktak sinatzea.
Tributu Ikuskapeneko eginbideak eta aktak jarduketak egiten dituzten funtzionarioek sinatuko dituzte.
ZORTZIGARREN KAPITULUA. TRIBUTU ZEHAPENAK EZARTZEA
63. artikulua . Diru zehapenak ezartzea, tributu urratze larriak egitearen eraginez .
1. Egiaztapen eta ikerketa prozeduran zehar agerian gelditzen bada zerga arloko arau-hauste larritzat har daitezkeen egintzak edo inguruabarrak gertatu direla, behar den zehapen prozedura hasiko da, eta, hura tramitatu eta ebazteko, Zerga arloko arau-hauste eta zehapenen araubidea garatzen duen Foru Dekretuaren VI. kapituluan ezarritakoari jarraikiko zaio, batez ere, foru dekretu horrexen 33. artikuluan tramitazio laburtuko kasuetarako ezarritakoari jarraikiz, bidezkoa denean.
Horren ondorioetarako, zenbat ikuskapen akta irekitzen diren, horrenbeste zehapen espediente hasiko dira, bat etorriz erregelamendu honen 49. artikuluan ezarritakoarekin, deusetan galarazi gabe kasu batzuetan, arau-haustea baloratzeko arrazoiak edo inguruabarrak antzekoak direnean, espedienteak metatu ahal izatea hasiera, instrukzio eta ebazpen faseetan. Nolanahi ere, ebazpenean zehapenak banaka-banaka ezarriko dira, zehapen espedienteen ebazpenaren aurka edo ikuskapen akten ondoriozko likidazioen aurka jar daitezkeen errekurtsoen ondorioetarako .
Egiaztapen eta ikerketa prozedura baten ondorioz hasi beharreko zehapen prozedurak ezin izango dira hasi sei hilabete pasatu badira dagokion likidazioa jakinarazi zenetik edo jakinarazitzat jo behar zenetik, deusetan galarazi gabe Tributuei buruzko Foru Lege Orokorrean administrazio egintzen berrikuspenari buruz xedatutakoa.
2. Aurreko atalean ezarritakoaren ondoreetarako, zehapen espedientearen hasiera erabakitzeko eskumena egiaztapen edo ikuskapen jarduketa garatu duen funtzionarioak edo unitate funtzionalak edukiko du, edo Zerbitzuko zuzendariak izendatzen duenak.
3. Espedientea ebazteko proposamenaren tramitazioa eta instrukzioa, beste alde batetik, aurreko atalean aipaturiko funtzionarioari edo unitate funtzionalari agindu ahal izango zaio; beste funtzionario edo unitate bati ere agindu ahal zaio, zerbitzuaren beharrizanen edo kasu bakoitzeko egoeraren arabera. Unitate bati agindutako jarduerak direnean, proposamena unitate horretako buruak sinatuko du.
4. Zerbitzuko zuzendariak zehapen espedientea ebazteko eskumena edukiko du.
5. Eskuhartzeak, zehapen prozedurako ordezkaritzat, horretarako egiaztapena eskatuko du, Erregelamendu honetako 23. artikuluan ezarritakoaren arabera.
6. Zehapen espedienteko agirien ondoreetarako, espediente horretan (eginbidearen bitartez) hasitako espedientean dauden edo lortu diren datuak, frogak edo egoerak sartuko dira; espediente hori, berriz, ustezko urratzailearen zerga egoera egiaztatzeko eta ikertzeko jarduketen ondorioz hasi da.
7. Baldin eta arau-hauslea edo, hala badagokio, arduraduna, Zerga arloko arau-hausteen eta zehapenen araubidea garatzen duen Foru Dekretuaren 20. artikuluan ezarritakoarekin bat, ados badago zerga kuotari, errekarguei eta berandutze-interesei dagokienez egiten zaion erregularizazio proposamenarekin, baita zerga arloko arau-hauste larrien ondoriozko zehapen proposamenarekin ere, azkenean ezartzen den zehapena %40 murriztuko da.
Arau-hauslea erregularizazio proposamenaren zati batekin bakarrik ados badago, eta horri dagokion zehapen proposamenarekin, %40ko murriztapena zehapenaren zati horri aplikatuko zaio bakarrik.
Zerga arloko arau-hauste larriengatiko zehapenen zenbatekoa beste %20 gutxituko da baldin eta, aurreko paragrafoan xedatutakoa betetzeaz gain, onartutako erregularizazio eta zehapen proposamen guztiei dagokien zerga zorra dirutan ordaintzen bada, osorik, diru-bilketari buruzko araudian borondatezko ordainketarako ezarritako epean. Ondorio horietarako, eskatzen bada erregularizazio eta zehapen proposamenei dagokien zerga zorraren ordainketa geroratzea edo zatikatzea, ez da aplikatuko paragrafo honetan araututako murriztapen gehigarria.
Egindako erregularizazioaren edo zehaztutako zehapenaren aurka errekurtsoa edo erreklamazioa jartzen bada, ez dira aplikatuko aurreko paragrafoetan adierazitako murriztapenak, eta zilegi izango da erregularizazio proposamenak dakarren zorra eskatzea borondatezko ordainketa aldia amaitzen denetik aurrera.
Lehendabiziko eta bigarren paragrafoetan ezarritako %40ko murriztapena aplikagarria den kasuetan,diru-sarrera oso-osoa egiten ez bada hirugarren paragrafoan ezarritakoarekin bat, zehapen espedientearen ondoriozko zorraren zenbatekoa eskatuko da, behin %40ko murriztapen hori eginda baina %20ko murriztapena egin gabe, diru-bilketari buruzko araudian borondatezko ordainketarako ezarritako epea amaitzen den egunetik aurrera.
8. Entzunaldia emateko tramitean, ustezko arau-hausleak berariaz adierazi beharko du ados dagoen ala ez egiten zaion zehapen espedientearen ebazpen proposamenarekin. Ohartarazten zaio ezen, horren gainean deus ere esaten ez badu, espedientearekin ados dagoela ondorioztatuko dela.
Zergadunak ebazpen proposamenarekin ados dagoela adierazten badu, adostasuna adierazten den egunetik hasita hilabete bat igarotzearekin batera ondorioztatuko da zerbitzuko zuzendariak proposamen haren araberako ebazpena eman duela, horren gainean beste jakinarazpen berariazko bat eman behar izan gabe, salbu eta epe horretan zerbitzuko zuzendariak zuzentzen baditu proposamenean atzematen dituen akatsak, edo proposamena baliorik gabe utzi, eta agintzen badu egindako jarduketak osa daitezela hiru hilabetez gehienez, edo, epe horretan berean, ebazpen proposamena berresten duen berariazko ebazpena ematen badu. Zerbitzuko zuzendariak proposamena zuzentzen badu, zuzenketa hori interesdunari jakinaraziko zaio hilabeteko epean, interesdunak jatorrizko proposamenarekiko adostasuna jakinarazten duen egunetik hasita. Halakoetan, adierazi beharko da interesdunak eskubidea duela egoki iruditzen zaizkion alegazioak aurkezteko, hartutako erabakia jakinarazi eta hurrengo hamabost eguneko epean. Alegazio epea bukatzen bada alegaziorik aurkeztu gabe, edo zergaduna ados badago zerbitzuko zuzendariak egindako zuzenketarekin, ulertuko da zerbitzuko zuzendariak ebazpena eman duela proposamena zuzentzeko erabakian jaso zen bezala, berariazko jakinarazpen berri bat eman behar izan gabe.
Zergaduna ebazpen proposamenarekin ados ez badago, Zerbitzuko zuzendariak ebazpen arrazoitu bat emanen du, deusetan galarazi gabe, horren aurretik, agindu ahal izatea egindako jarduketak zabaltzea hiru hilabetez gehienez.
9. Zehapenak ezartzeko erabakiaren aurka, beste alde batetik, berraztertzeko errekurtsoa edo erreklamazio ekonomiko-administratiboa jarri ahal izango da.
10. Tributu zehapenen betearazpena berehala etenda geldituko da, bidezko berandutza interesen kalterik gabe, eta bermerik aurkeztu beharrik gabe, baldin eta horien aurka (denboran eta forman) berraztertzeko errekurtsoa edo erreklamazio ekonomiko-administratiboa jartzen bada, eta haiek ezin izango dira betearazi harik eta administrazio bidean irmoak izan arte.
64. artikulua . Diru zehapenak ezartzea, tributu urratze arinak egitearen eraginez.
1. Tributu ikuskapenak agerian uzten dituen egintzak edo aurrekariak zerga arloko arau-hauste arin gisa har badaitezke, behar den zehapen prozedura hasiko da, eta, hura tramitatzeko eta ebazteko, Zerga arloko arau-hauste eta zehapenen araubidea garatzen duen Foru Dekretuaren VI. kapituluan ezarritakoari jarraikiko zaio .
2. Ordezkapenaren arauketari, zehapena ezartzeko erabakiaren aurkako bidezko erreklamazioei eta horren betearazketa eteteari dagokionez, Erregelamendu honetako 63. artikuluan ezarritakoa bete beharko da.
3. Zerga arloko arau-hauste soilengatiko zehapenen zenbatekoa 100eko 30 gutxituko da subjektu arau-hausleak edo, kasua bada, erantzuleak, aditzera ematen badu ados dagoela egin zaizkion zehapen proposamenekin eta proposatutako zehapen guztien zenbatekoa osorik eta esku-dirutan ordaintzen badu diru-bilketari buruzko araudiak borondatezko ordainketarako ezarritako epearen barnean. Ondorio horietarako, eskatzen bada zehapen proposamenei dagokien zerga zorraren ordainketa geroratzea edo zatikatzea, ez da aplikatuko paragrafo honetan ezarritako murriztapena. Zehapenaren aurka errekurtsoa edo erreklamazioa jartzen bada, ez da aplikatuko, orobat, apartatu honetan araututako murriztapena.
Ordainketa osorik egiten ez bada aurreko paragrafoan ezarritakoarekin bat, zehapen espedienteak dakarren zorraren zenbatekoa eskatuko da, 100eko 30eko murriztapenik egin gabe, zergari buruzko araudian borondatezko ordainketarako ezarritako epea amaitzen den egunetik aurrera .
65. artikulua . Diruzkoak ez diren zehapenak ezartzea, tributu urratze arinak edo larriak egitearen eraginez.
1. Tributu ikuskapenaren jarduketen ondorioz agerian gelditzen den egintza edo inguruabarren batek ekar badezake –eginbide edo akta batean jaso ondoren– zerga arloko arau-hauste arin edo larriengatiko zehapen ez-diruzkoa jartzea, behar den zehapen espedientea hasiko da, eta, hura tramitatu eta ebazteko, Zerga arloko arau-hauste eta zehapenen araubidea garatzen duen Foru Dekretuaren VI. kapituluan ezarritakoari jarraikiko zaio .
2. Aurreko atalean ezarritakoaren ondoreetarako, jarduleek zehapen espedientea hasteko proposatuko dute, Zerbitzuko zuzendariari bidalitako mozio baten bitartez; zuzendari horrek, bidezko baderitzo, berori hasteko eskumena duen organoari bidaliko dio, egindako eginbidea edo akta eta gainerako aurrekariak adieraziz.
3. Lehenengo atalean ezarritakoaren ondoreetarako, Nafarroako Gobernua zehapen espedientea erabakitzeko eta ebazteko organo eskuduna izango da.
4. Diruzkoak ez diren zehapenak ezartzeko espedientea, nolanahi ere, hori eragin duen administrazio espedientearen ebazpena irmoa denean hasiko da.
5. Ordezkapena arautzeari eta zehapenaren betearazketa eteteari dagokionez, Erregelamendu honetako 23. eta 63. artikuluetan ezarritakoa bete beharko da.
6. Nafarroako Gobernuak espedientea ebazten duenean, ebazpen horri errekurtsoa jarri ahal izango zaio Administrazioarekiko auzibide jurisdikzioan.
BEDERATZIGARREN KAPITULUA. XEDAPEN BEREZIAK
66. artikulua . Tributu oinarrien zeharkako kalkulua.
1. Tributu oinarrien zeharkako kalkuluaren araubidea kalkulu zuzen edo objektiboko araubideekiko subsidiarioa izango da, eta Administrazioak tributu oinarriak edo kuotak nahiz errendimenduak kalkulatzeko behar diren datuak eman ezin dituenean aplikatuko da; horretarako, honako arrazoi hauek egon daitezke:
a) Subjektu pasiboak bere aitorpenak ez aurkeztea edo, aurkeztu dituenetan oinarrituz, Administrazioak oinarrien edo errendimenduen kalkulu osoa egin ezin izatea.
b) Subjektu pasiboak ikuskapen jarduketari oztopoak, aitzakiak edo ezezkoak jartzea.
c) Subjektu pasiboak kontabilitateko betebeharrak oinarrian ez betetzea.
2. Hain zuzen ere, kontabilitateko betebeharren oinarrizko ez-betetzea dagoela jotzen da, besteak beste, ondoko kasuak betetzen direnean:
a) Interesatuak kontabilitatea edo tributu xedapenek ezarritako erregistroak eramateko betebeharra ez betetzea.
Kontabilitateko liburuak eta erregistroak aurkezten ez direla joko da, tributu ikuskapenak eskatzean aurkezten ez direnean.
b) Kontabilitatean jardueren, ondasunen edo eskubideen titulartasuna behar bezala jasotzen ez denean.
c) Kontabilitateko erregistroetan eta agirietan ezkutatzeak, aldaketak edo zehaztugabetasun ezak daudenean, baldin eta horiek egindako eragiketen egiaztapen zehatza zailtzen badute.
d) Interesatuek aurkezturiko agirietara gehienetan onartzen diren teknikak edo irizpideak aplikatuta, aitorpena egiaztatu ezin denean edo egiaztatu beharreko oinarriak edo errendimenduak ondo zehaztu ezin direnean.
e) Kontabilitatean sarturiko eragiketen eta jardueraren ondoriozko eskuratzeen, gastuen nahiz beste alderdi batzuen arteko batasunik ez egotearen eraginez (Tributuei buruzko Foru Lege Orokorreko 110. artikuluko 2. atalaren arabera), kontabilitatea ez dela zuzena ondoriozta daitekeenean.
3. Tributu oinarrien zeharkako kalkuluaren araubidea aplikagarria denean, tributu ikuskapenak honako honi buruzko txosten arrazoitua erantsiko du zerga egoera arautzeko hasitako aktetan:
a) Zeharkako kalkuluaren araubidea aplikatzea eragin duten arrazoiak.
b) Ikerturiko subjektuaren kontabilitate egoera eta derrigorrezko erregistroak.
c) Oinarriak edo errendimenduak zehazteko aukeraturiko baliabideen justifikazioa, Tributuei buruzko Foru Lege Orokorreko 42. artikuluan adierazitakoen arteko baliabideak.
d) Aukeraturiko baliabideetan oinarrituz (laginketa teknikak ere barne) egindako kalkuluak.
4. Hasitako aktan kasuan kasuko likidazio proposamena jasoko da eta akta horrek bere izaeraren araberako tramitazioa edukiko du.
5. Aktaren ondoriozko tributu likidazioaren aurka, interesatuak bidezko erreklamazio guztiak egin ditzake, aktaren izaera kontuan hartuz. Egindako erreklamazioan, interesatuak bere eskubidearen araberako alegazio guztiak egin eta zeharkako kalkuluko araubidea aplikatzearen bidezkotasuna adieraz dezake.
6. Tributuei buruzko abenduaren 14ko 13/2000 Foru Lege Orokorraren 43. artikuluaren 4. apartatuko d) letrak aipatzen duen zeharkako zenbatespenerako erabili diren datuak zerga administraziotik datozenean, hirugarrenen tributu datuen izaera erreserbatua zaintzeko behar diren bitartekoak erabiliko dira, zergapekoaren defentsa eskubidea kaltetu gabe. Izan ere, datuak bereiziko dira ondoko hauek elkarren arteko harremanean ez jartzeko:
a) Lagineko subjektuen identifikazioa.
b) Beren zerga aitorpenetako datuak, oinarriak zehazteko eta egindako kalkuluak eta zenbatespenak erabili diren ehunekoak edo batezbestekoak kalkulatzeko balio dutenak.
Administrazioak adieraziko du aukeratutako lagina zer ezaugarriren arabera aukeratu den. Laginaren denbora eta espazioa, garatzen duten jarduna edo beren eragiketa bolumena zer tarteri dagokion, besteak beste, kontuan hartzen ahalko dira .
67. artikulua . Ogasun publikoaren kontrako delitu zantzuak daudenean egin beharreko jarduketak .
1. Tributu Ikuskapenak ogasun publikoaren kontrako delitu-zantzuren bat antzemanez gero, jurisdikzio eskudunera bideratuko du erruduntasun-testigantza, edo fiskaltzari igorriko dio espedientea, deusetan galarazi gabe, delitu-zantzua ikuskapen prozedura baten barruan antzematen den kasuetan, Tributuei buruzko Foru Lege Orokorraren V. tituluan eta erregelamendu honen bidezko artikuluetan adierazi bezala izapidetzea.
2. Ogasun publikoaren kontrako delitu-zantzurik dagoela noiznahi erabakitzen ahalko da, baita likidazio administratiboa agindu edo, are gehiago, zehapena ezarri ondoren ere.
Horrelako kasuetan, baliorik gabe geldituko dira egindako likidazio administratiboen proposamenak eta zehapen proposamenak. Era berean, eten egingo da ezarrita dauden likidazioen eta zehapenen betearazpena, hurrengo apartatuan adierazten dena galarazi gabe .
3. Jurisdikzio eskudunak edo fiskaltzak ez badu atzematen delitua dagoenik, zerga administrazioak jarduketak edo prozedura administratiboak hasiko ditu edo jarraituko ditu, hala badagokio, epaitegiek frogatutzat eman dituzten egintzekin bat eginez.
Tributuei buruzko Foru Lege Orokorraren IV. tituluko VII. kapituluak arautzen duen berrazterketen eta errekurtsoen araubideak arautuko ditu ematen diren likidazioak eta zehapen administratiboak, bidezkoak badira, baita lehen bertan behera geratu ziren eta betearazten berriz hasi behar direnak ere, baina ebazpen judizialean frogatutzat ematen diren egintzak aurkaratu ahal izan gabe.
67.bis artikulua. Salbuespenak, ogasun publikoaren kontrako delitu zantzuak daudenean likidazioak egiteko, eta jarraitu beharreko tramitazioa .
1. Tributu ikuskapenak ikuskapen prozesu baten barruan ogasun publikoaren aurkako delituen zantzuak daudela atzematen duenean, ez du delituari lotutako likidazioa egingo Tributuei buruzko Foru Lege Orokorraren 161.1 artikuluak aurreikusten dituen kasuetan. Hori guztia, beste lege xedapen batzuek likidazioa praktikatzeari ezartzen ahal dizkioten salbuespenak deusetan galarazi gabe.
Edonola delarik ere, salbuespen hauek likidazioa egitea bidezko bihurtzen ez den gorabehera gertatu den zerga-kontzeptuari eta aldiari eragingo diete, bakarrik.
2. Kasu hauetan segitu beharreko tramitazioan, ondoko hauek hartuko dira kontuan:
a) Zergapekoari ez zaio emango entzunaldia emateko tramitea edo alegazioak aurkeztekoa.
b) Espedientea Nafarroako Zerga Ogasuneko Kudeaketa-zuzendaritzako titularrari igorriko zaio, salaketa edo kereila jartzeko eskuduna baita, gero jurisdikzio eskudunera edo fiskaltzara igortzeko.
Nafarroako Zerga Ogasuneko Kudeaketa-zuzendaritzako titularrak ez badu atzematen ogasun publikoaren aurkako deliturik, espedientea itzuliko du administrazio bidean amaitzeko, aldez aurretik, hala badagokio, akta egin eta gero.
c) Itzulketa honek ekarriko du ikuskapen prozeduraren zenbaketa bertan behera geratzea, Tributuei buruzko Foru Lege Orokorraren 139.3 artikuluak ezartzen duen moduan. Zergapekoari jakinaraziko zaio prozeduraren zenbaketa bertan behera geratu dela, informazioa emateko bakarrik, ez bada jakinarazpen honek iruzurraren egiaztapena kaltetzen duela aldez edo moldez, eta hala bada hau espedientean jasota geldituko da.
3. Espedientea fiskaltzara itzultzen bada eta ondoren zerga administrazioak ez badu jartzen kereila bat jurisdikzio eskudunean, edo eta salaketa edo kereila ez bada onartzen, edo azken ebazpen judizial irmoak ez badu delitua egon denik ikusten, ikuskapen prozedurarekin jarraituko da.
Prozedura hori amaitu beharko da Tributuei buruzko Foru Lege Orokorraren 139.1 artikuluak aipatzen duen epea amaitzeko geratzen den denboran, edo 6 hilabeteko epean, bestea luzeagoa bada. Epeak ikuskapen prozedura jarraitu behar duen organo eskudunak espedientea jasotzen duenetik hasita zenbatuko dira.
67. ter artikulua. Ikuskapen prozedura tramitatzeko arau orokorrak delituarekin lotutako likidaziorik bada .
1. Tributuei buruzko Foru Lege Orokorraren 163. artikuluak ezartzen duenarekin bat etorriz, tributu ikuskapenak, ikuskapen prozedura batean, ogasun publikoaren aurkako delitu zantzuak daudela atzematen duenean, eta aipatu foru legearen 161.1 artikuluak ezartzen duenarekin bat, likidazioa ematea galarazten duten gorabeherak gertatzen ez direnean, delituari lotutako likidazio proposamen bat egingo da, zeinean zehaztuko baita, behar den xehetasun guztiarekin, zer egintza eta zuzenbideko oinarrietan oinarritzen den, esanez zergapekoak eskubidea duela egoki jotzen dituen alegazioak egiteko dagokion entzunaldia emateko tramitean, 15 egun naturaleko epean, likidazio proposamena jakinarazi den egunaren biharamunetik kontatzen hasita.
2. Jakinarazpena zergapekoari edo delituari lotutako likidazio proposamena egiten den ikuskapen prozeduran zergapekoak baimendu duen ordezkariari egiten ahalko zaio.
3. Entzunaldia emateko tramiterako aurreikusten den epea amaitzen denean, eta aurkeztu diren alegazioak aztertu eta gero, halakorik bada, Tributu Ikuskapenerako Zerbitzuko Zuzendaritzako titularrak honela jokatuko du:
a) Delituari lotutako likidazio bat emango du, Nafarroako Zerga Ogasuneko Kudeaketa-zuzendaritzako titularrak aldez aurretik edo aldi berean horretarako emandako baimenarekin, zergapekoaren jokabidea ogasun publikoaren aurkako delitua izan litekeela uste badu.
Nafarroako Zerga Ogasuneko Kudeaketa-zuzendaritzako titularrak ez badu atzematen ogasun publikoaren aurkako deliturik, espedientea itzuliko du administrazio bidean amaitzeko, aldez aurretik, hala badagokio, akta egin eta gero.
b) Delituari lotutako likidazio proposamena zuzenduko du, uste badu proposamenean egintzak oker atzeman direla, edo arau juridikoak gaizki aplikatu direla.
Zuzenketa horrek zergapekoak alegatu ez dituen auziei eragiten badie, eta horrek, gainera, zergapekoaren egoera okerragotzen badu, zuzenketa egiten den erabakia jakinaraziko da, zergapekoak bere alegazioak egin ditzan, 15 egun naturaleko epean, jakinarazpena egin den egunaren biharamunetik kontatzen hasita. Epe hori amaitu eta gero, dagokion erabakia emango da. Hau ere jakinarazi eigngo da, behar den tramitazioa eginez.
Bestela, delituari lotutako likidazioa beste tramiterik gabe jakinaraziko da.
c) Espedientea itzuliko du administrazioaren bidean amaitzeko, aldez aurretik, hala badagokio, akta egin eta gero, uste badu zergapekoaren jokabidea ez dela ogasun publikoaren aurkako delitua.
d) Espedientearen gorabehera guztiak osa daitezen erabakiko du, egoki jotzen duenean, eta zergapekoari jakinaraziko dio. Jarduketa osagarriak egin eta gero, honela jokatuko da:
- Delitu zantzurik atzematen ez bada, espedientea administrazio bidean amaituko da, aldez aurretik, hala badagokio, akta egin eta gero.
- Ogasun publikoaren aurkako delitu zantzuak atzematen segitzen badira, eta hasieran egindako delituari lotutako likidazio proposamena aldatu behar bada, proposamen hori zuzenduko da, eta zergapekoari 15 egun naturaleko beste alegazio tramite bat emango zaio, dagokion tramitazioarekin egin beharrekoa.
- Ogasun publikoaren aurkako delitu zantzuak atzematen segitzen badira, baina hasieran egindako delituari lotutako likidazio proposamena aldatu behar ez bada, proposamenak bere indarra gordeko du eta Tributu Ikuskapenerako Zerbitzuko Zuzendaritzako titularrak dagokion erabakia emango du, zergapekoari 15 egun naturaleko alegazio tramitea eman eta gero.
4. Likidazio administratiboa eman ondoren, tributu ikuskapenak erruduntasun-testigantza igorriko du jurisdikzio eskudunera, edo espedientea fiskaltzara, eta egiaztapen prozedura amaitzeko, likidazio horren bidez erregularizatutako zerga betebeharraren elementuei dagokienez betiere, zergapekoari horren jakinarazpena eginez, eta bertan ohartaraziko da sarrera egiteko borondatezko epea hasiko dela kasuko salaketa edo kereila tramitera onartu dela jakinarazi ondoren, 165. artikuluan ezarri bezala.
67. quater artikulua. Delituari lotutako likidazioaren kalkulua eta tramitazioa, ogasun publikoaren aurkako delituari lotutako kuotaren kasuan, eta delituari lotuta ez dagoen kuotaren kasuan .
1. Zerga kontzeptu eta aldi bakar baterako, ogasun publikoaren aurkako balizko delitu bati lotutako elementuen eta aipatu delituari lotuta ez dauden elementuen arteko bereizketa egiten ahal den kasuetan, Tributuei buruzko Foru Lege Orokorraren 163.3 artikuluak ezartzen duen araudia aplikatuko da, artikulu honetan aipatzen diren berezitasunekin.
Ogasun publikoaren aurkako delitu bati lotutako elementuek legez kontrako iruzur-kuota bat sortzen duten egiaztatzeko, kontuan hartuko da hurrengo apartatuaren a) letran xedatutakoa.
2. Aurreko apartatuak aipatzen dituen kasuetan, behin behineko bi likidazio bereiz egingo dira. Bi likidazioak zenbatestearen ondorioetarako, delituari lotutako likidazio proposamen bat formalizatuko da eta ikuskapen akta bat, arau hauen arabera:
a) Delituari lotutako likidazio proposamenean deklarazioaren xede izan ziren elementuak egongo dira sartuta, kasua bada, eta horiei gehituko zaizkie beste batzuk, horietan delitu zantzuak ikusten direnean, eta zergapekoak aldi horretan eduki litzakeen aldeko doikuntzak kenduko dira. Aldi berean, aplikatu beharreko konpentsatzeko edo kentzeko partidak gutxiagotu egingo dira, ez bada zergapekoak gauzatu nahi duela artikulu honetako hurrengo apartatuak aipatzen duen aukera. Epearen barruan aurkeztutako aitorpenak kuota bat ezartzen badu, sartu beharrekoa, hura deskontatu egingo da delituari lotutako likidazio proposamen horren kalkulurako.
b) Aktan jasotako likidazio proposamenean egiaztatutako elementu guztiak sartuko dira, balizko delituarekin loturik egon nahiz ez. Kasu hauetan, delituari lotutako likidazio proposamenetik ateratzen den zenbatekoak aktako likidazio proposamenaren kuota gutxiagotuko du.
3. Hala ere, zergapekoak nahiago badu aurreko apartatuak aipatzen dituen kuotan edo oinarrian kendu edo konpentsatu beharreko partidak proportzionalki aplikatzea, partida horiengatik delituari lotutako likidazioan kenduko den zenbateko zehatza aterako da beren zenbateko osoari zatiki baten koefizientea aplikatuz. Zatiki horretan hauek egongo dira:
a) Zenbatzailean, zerga-oinarriko gehikuntzen eta gutxitzeen batuketa, bider kargaren batezbestekoa, eta kuotaren gehikuntzak eta gutxitzeak, ogasun publikoaren aurkako balizko delituari loturikoak.
b) Zatitzailean, zerga-oinarriko gehikuntzen eta gutxitzeen batuketa, bider kargaren batezbestekoa, eta kuotaren gehikuntza eta gutxitze guztiak, ogasun publikoaren aurkako balizko delitu bati loturik egon edo ez.
Kargaren batezbestekoa izango da kuota osoa zati zerga-oinarria eragiketa egitetik ateratzen dena.
Koefiziente hori kalkulatuko da oinarrian edo kuotan konpentsatu edo kendu beharreko partida guztien zenbatekoa alde batera utzita.
Hautu hori Administrazioari jakinarazi beharko zaio delituarekin lotutako likidazio proposamena jakinarazi ondoko alegazio epean.
67. quinquies artikulua. Ebazpen judizialak delituari lotutako likidazioan dituen ondorioak .
1. Zerga administrazioak delituari lotutako likidazio bat eman duenean, ebazpen judizial guztiak aintzat hartuko dira, baita, hala badagokio, fiskaltzaren erabakiak ere, ondorengo apartatuetan ezartzen den moduan.
2. Prozesu penalean ogasun publikoaren aurkako delituarengatiko kondena-epaia ematen bada, honela jokatu beharko da:
a) Zigor prozesuan ezartzen bada iruzurraren kuota bide administratiboan likidatutako berdina dela, ez da beharrezkoa izango egindako likidazioa aldatzea, horrek galarazi gabe, nolanahi ere, dagozkion berandutze-interesen eta errekarguen likidazioa egitea.
Berandutze-interes horien artean, delituari lotutako likidazioa eman zenetik zergapekoari salaketa edo kereila tramiterako onartu dela jakinarazi zitzaion arte sortutakoak ere eskatuko dira.
b) Zigor prozesuan zehazten den iruzurraren zenbatekoa bide administratiboan finkatu dena baino handiagoa edo txikiagoa baldin bada, delituari lotutako likidazioa horren arabera aldatuko da.
Kasu horietan, hasierako egintzak iraungo du, baina zuzenduko da epaiaren edukiaren arabera, zigor prozesuan iruzur-kuota bezala finkatutako kopuruarekin bat etorrarazteko. Horrek ez dio eragingo aipatu prozesuan baieztatutako kopurua dela-eta egindako bilketa-jarduketen balioari.
Berandutze-interesak doitu egingo dira, delituari lotutako likidazioa eman zenetik zergapekoari salaketa edo kereila tramiterako onartu dela jakinarazi zitzaion arte sortutakoak ere eskatzea bidezkoa izango dela.
Lehen esandakoa ulertuko da administrazio bidean eskatu behar diren kopuruen kaltetan gabe, hala badagokio, hau da, ebazpen judizialean frogatutzat ematen diren egintzen arabera ogasun publikoari zor zaizkion kopuruen kaltetan gabe, iruzur-kuotakoak ez badira ere. Ondorio horietarako, beharrezkoa denean, ikuskapen prozedura atzera eragingo da, kopuru osagarri horiek likidatzeko, arau onen beraren 4. apartatuan esaten den moduan.
Beste alde batetik, zigor prozesuan zehaztutako iruzurraren zenbatekoa bide administratiboan finkatutakoa baino txikiagoa baldin bada, aplikatzekoak izango dira tributu araudian horretarako ezarritako arau orokorrak, sarreren itzulketei eta bermeen kostuaren itzulketari dagozkionak.
Zerga administrazioak a) eta b) letretan aurreikusten diren kasuetan hartzen duen erabakia auzitegi eskudunera bidaliko da betearaz dezan, baita ordaindu behar duenari eta zigor prozesuan sartutako gainerakoei ere, Prozedura Kriminalaren Legearen 999. artikuluak aurreikusten dituen ondorioetarako.
3. Zigor prozesuan ez bada ikusten azkenean delitua dagoenik, zerga betebeharrik ez dagoelako, lehenago egin den delituari lotutako likidazioa baliogabetu egingo da, eta aplikatzekoak izango dira tributu araudian horretarako ezarritako arau orokorrak, sarreren itzulketei eta bermeen kostuaren itzulketari dagozkionak.
4. Azkenik, ondoren biltzen diren kasuetan, ikuskapen prozedura delituari lotutako likidazio proposamena eman baino lehenagoko unera atzeraraziko da, eta legokiokeen akta gauzatuko da:
a) Fiskaltzak espedientea itzultzea eta ondoren zerga administrazioak kereilarik ez aurkeztea jurisdikzio eskudunaren aurrean.
b) Salaketa edo kereila ez onartzea.
c) Largespen autoa.
d) Epaileen ebazpen irmoa, zeinean ez baita deliturik atzematen, baina zerga-beharrik ez izatea ez den beste arrazoi bategatik.
Kasu hauetan, prozedura hori amaitu beharko da Tributuei buruzko Foru Lege Orokorraren 139.1 artikuluak aipatzen duen epea amaitzeko geratzen den denboran, edo 6 hilabeteko epean, bestea luzeagoa bada. Epeak ikuskapen prozedura jarraitu behar duen organo eskudunak espedientea jasotzen duenetik hasita zenbatuko dira.
Prozedurari amaiera ematen dion likidazio berriagatik berandutze-interesak eskatuko dira. Berandutze interesa kontatzen hasteko eguna baliogabetutako likidazioari zegokiokeen berbera izango da, eta interesa likidazio berria ematen den unera bitarte sortuko da.
Prozeduraren iraupen epea ez betetzeak, likidatu beharreko tributu beharrei dagokienez, Tributuei buruzko Foru Lege Orokorraren 139.6 artikuluak ezartzen dituen ondorioak ekarriko ditu.
68. artikulua . Tributu Ikuskapenaren jarduketak .
1. Hitzarmen Ekonomikoa dela bide Foru Komunitateko lurraldetik kanpo egin behar diren egiaztapen eta ikerketa jarduketak Estatuko Finantza eta Tributu Ikuskapenak egingo ditu, Foru Komunitate honetako organo eskudunak eskatuta.
2. Foru Komunitateko tributu ikuskapenak Estatuko Administraziorako zergen arloan garrantzia duten egitateak edo gertaerak ezagutzen dituenean, eginbide batean jasoarazi beharko ditu.
Eginbide hori Estatuko Administrazioko organo eskudunari bidaliko zaio, zuze-zuzen.
69. artikulua . Zerga onurak .
1. Edozein motatako zerga onurak ematea edo gozatzea (banakako berariazko erabakiaren edo ebazpenaren bidez) behin-behinekoa izango da, gerora baldintza batzuk bete behar direnean edo espedientean egiaztatu ez diren baldintza jakinak bete behar direnean.
Foru Legeren batek horren aurkako berariazko xedapenik eman ezean, tributu ikuskapenak baldintza horiek betetzen ez direla ikusten badu, bidezko likidazioak egingo ditu berehala, eta zerga onura hori ezetsitzat edo ez emandakotzat hartuko da.
2. Egiaztapen eta ikerketa jardueretan, tributu ikuskapenak subjektu pasiboek beren aitorpen-likidazioetan hauxe ondo aplikatzen dutela egiaztatuko du: edozein motatako murrizketak, urritzeak, ordainarazpenak eta beste zerga onura guztiak. Gainera, bidezko likidazio guztiak egingo ditu.
70. artikulua . Berandutza interesen likidazioa.
1. Tributuei buruzko Foru Lege Orokorraren 50. artikuluaren 2. apartatuak xedatzen duenarekin bat etorriz, berandutze interesak eskatuko dira ordaintzeko borondatezko epea amaitzen denetik tributu egoera erregularizatzen duen likidazioa egiten den egunera igarotzen den denborarengatik, Tributuei buruzko abenduaren 14ko 13/2000 Foru Lege Orokorraren 139. artikuluaren 6. apartatuak eta ondorengo apartatuek ezartzen dutena galarazi gabe .
2. Tributu Ikuskapenak aktetan eta tributu likidazioetan jasotako likidazio proposamenetan sartuko ditu berandutza interes horiek.
3. Horretarako, akta adostasunekoa izanez gero, likidazioa egindakotzat jotzen den eguna Erregelamendu honetako 59. artikuluan ezarritakoaren arabera zehaztuko da.
Desadostasuneko aktak direnean, Zerbitzuko zuzendariak (Erregelamendu honetako 59. artikuluan ezarritakoaren arabera) kasuan kasuko likidazioa egiten duen egunera arteko berandutza interesak likidatuko dira.
71. artikulua . Erantzule solidarioak dituzten egiaztapen eta ikerketa jarduketak.
1. Erantzule solidarioak tributu zorra zuzenean ordaintzera bideraturiko likidazio proposamena jasotzeko akta egin daiteke, honako kasu hauetan:
a) Horrek tributu egitatearen berri eduki eta berarekin tributu zorra zehazteko jarduketak egin ahal izan direnean.
b) Tributu Ikuskapenak egitateak ezagutzen dituenean eta beharrezko frogako elementuak ezartzen dituenean, tributu zorra zehazteko eta erantzukizuna ezartzeko (horiek subjektu pasiboarengandik hurbil lortzearen ondorioz).
2. Tributu Ikuskapenak subjektu pasiboarekin sinaturiko adostasuneko aktak eta likidazioak erantzule solidarioei jakinaraziko zaizkie. Aktak erantzule solidario baten aurrean egiten direnean, jakinarazpen hori subjektu pasiboarekiko eta, bestela, gainerako erantzule solidarioekiko egingo da.
3. Erantzule solidarioei tributu zorra ordaintzea eskatzeko helburua duten jarduketak ez dira oztopo izango, gerora gainerako subjektu pasiboei edo subjektu pasibo horri zuzentzen zaizkien jarduketak egiteko, harik eta tributu zorra oso-osorik kobratu arte.
4. Foru Komunitateko Administrazioarekiko erantzule solidarioetariko bakoitzak, tributu zorra ordaintzeko eskatzen zaionean, egindako likidazioaren edo eskatzen zaion erantzukizunaren ondoriozko aurkatze-arrazoi guztiak erabili ahal izango ditu.
72. artikulua . Zergakontsolidazioaren araubidean tributatzen duten entitateen egiaztapena .
1. Sozietate ordezkariaren eta zerga taldearen egiaztapena eta ikerketa ikuskapen prozedura bakar batean egingo da, eta, bertan, prozeduraren xede den zerga taldearen zein entitate ordezkariaren tributu obilgazioak bete diren egiaztatuko da.
Zerga finkapen araubidean tributatzen duten entitate taldeei dagokienez, entitate nagusiak ez duenean egoitza Espainiako lurraldean, ez bada jakinarazi taldearen ordezkaritza duen entitatea zein den, zerga administrazioak taldea osatzen duten edozein entitate hartzen ahal du entitate ordezkaritzat. Zerga talde hauetan, prozedura hasi eta gero sozietate ordezkariaren aldaketa jakinarazten bada, jarduten ari den organoak jarraituko du prozedurarekin, taldeari eragiten dioten jarduketei dagokienez, baina entitate ordezkari berriarekin.
2. Zerga talde baten egiaztapenaren ondorioz taldeko ordezkaria ez den mendeko entitate batean ikuskapena egiten bada, prozedura bakar batean egingo zaio ikuskapena. Prozedura horretan hauek egiaztatuko dira: Sozietateen gaineko Zergako banakako tributazioaren araubidearen ondoriozko tributu betebeharrak, eta prozeduraren xede diren gainerako tributu betebeharrak. Lankidetza jarduerak ere sartuko dira, zerga finkapen araubidea dela-eta taldeak egiten duen tributazioari dagokionez.
3. Tributuei buruzko abenduaren 14ko 13/2000 Foru Lege Orokorraren 57.1.a) artikuluan aurreikusitakoari jarraikiz, zerga taldearentzat, honakoengatik izango du etena Sozietateen gaineko Zergaren preskribatze epeak:
a) Taldeko sozietate ordezkariarekin Sozietateen gaineko Zergari buruz egindako edozein egiaztatze jarduketarengatik.
b) Menpeko edozein entitaterekin Sozietateen gaineko Zergari buruz egindako edozein egiaztatze eta ikerketa jarduketarengatik, betiere taldeko entitate ordezkariak formalki jarduketa horien berri badu.
4. Taldeko edozein entitaterekin egindako prozedura batean Tributuei buruzko abenduaren 14ko 13/2000 Foru Lege Orokorraren 139. artikuluaren 4. eta 5. apartatuek aipatzen dituzten zirkunstantziek eragina izango dute sozietate ordezkariari eta zerga taldeari buruzko prozeduraren iraupenean, betiere sozietate ordezkariak formalki horren berri baldin badu. Zirkunstantzia horiek gertaturik ere, berdin jarraituko dute aurrera taldeko gainerako entitateei buruzko ikuskapen jarduketek.
Epearen luzapen aldia, Tributuei buruzko abenduaren 14ko 13/2000 Foru Lege Orokorraren 139.4 artikuluak aipatua, entitate taldeko edozein entitatek eskaturik bat ez datozen epealdiak kontuan harturik kalkulatuko dira sozietate ordezkariarentzat eta zerga taldearen barruko edozein sozietaterentzat. Zerga taldeko sozietateek gehienez 60 egun natural eskatzen ahalko dituzte beren prozedura bakoitzerako, baina sozietate ordezkariaren eta taldearen prozedura ebazteko epea, guztira, ez da 60 egun naturaletik goitikoa izango.
73. artikulua . Jarduteko gaitasun nahikorik ez duten subjektu pasiboak eta tributu urratzeei loturiko beste kasu berezi batzuk.
1. Tributu Ikuskapenak, subjektu pasibo baten egoera egiaztatzean, urratze arinak edo larriak daudela ikusiz gero, urratzeok egitean zergen arloan jarduteko gaitasun nahikorik ez badu, bereizitako zehapen espedientea hasiko da, ezgaitasuna duen legezko ordezkariarekin (halakorik egonez gero), urratzailearen ordez jarduten baitu.
2. Zehapen espedientean bidezko proposamena jasoko da, ikusitako urratze larriak zehatu ahal izateko, Tributuei buruzko Foru Lege Orokorreko 77. artikuluko 1. eta 2. ataletan ezarritako kasuetan, baita urratzailea subjektu pasiboa ez den pertsona edo erakundea denean ere.
Zehapenak ezartzeko proposatu edo tributu zorrak likidatzen direnean (pertsona edo erakunde bati dagokionez), baina hirugarren batetik hurbil egindako ikuskapen jarduketen ondorioz pertsona edo erakunde hori jarduketa hauetako interesatua izan ezean, alegazioak egiteko aldian edo kasuan kasuko administrazio egintzak aurkatzean bidezko deritzen aurkatze arrazoi guztiak azaldu ahal izango ditu, eta hirugarren horrekin egindako egintzak antolamendu juridikoaren araberakoak direla ere azaldu ahal izango du.
74. artikulua . Dirulaguntzak.
1. Jarduketak bideratzean tributu ikuskapenak dirulaguntza emateko ezarri diren baldintzak faltsutu egin direla, edo dirulaguntza ematea eragotziko zuten baldintzak ezkutatu direla, edo dirulaguntza jaso duen jarduera baten garapenean ezarritako baldintzak urratu egin direla (dirulaguntzaren helburuak aldatuz) egiaztatuz gero, kasuan kasuko eginbideetan jasoaraziko du; gainera, bidezko espedienteak hasteko edo ekintzak gauzatzeko eskatuko du, indarreko Antolamenduaren arabera. Tributu Ikuskapenak, halaber, komenigarri deritzen jakinarazpenak eta txostenak eman ditzake.
2. Egintzak Zigor Penalaren 308. artikuluan tipifikatzen den delitua izan daitezkeenean, tributu ikuskapenak diligentzia batean jasoko ditu gertatzen diren egintzak eta gorabeherak, eta horren berri emango dio administrazio organo eskudunari, dagoklon egiaztapena egiteko .
1. Tributu Ikuskapenak lege-iruzurreko espediente berezia hasiz gero, akta bereizia egingo da, helburu horretarako, eta aktan hauxe jasoko da:
a) Subjektu pasiboak (espedientea eragin duen egintza edo negozio juridikoa egitean) zerga ez ordaintzeko helburua edukitzearen uste sendoa euskarritzen duten egitateak eta gertaerak.
b) Subjektu pasiboak saihesturiko araua eta babesa lortzeko erabili nahi izan duen araua. Arau hori kasuan kasuko egintza edo negozio juridikoari aplikagarria ez izatea oinarritzen duten argudioak azalduko dira.
c) Egitatezko baldintzaren oinarrizko elementuak; horiek subjektu pasiboari eratxikitzen zaizkiola zehaztuko da.
d) Saihesturiko araua aplikatuz gero, sortuko litzatekeen likidazioa.
Gainera, espedientearen helburuari loturiko froga guztiak erantsiko dira.
2. Aktarekin batera, txosten osagarria aurkeztuko da; bertan, aktan adierazitako zuzenbideko egitateak eta funtsak garatu eta arrazoiak emango dira, lege-iruzurrari buruzko espedientea hastea bidezkoa izateari buruz.
3. Hasitako akta bere izaeraren arabera tramitatuko da. Ematen den administrazio egintzak lege-iruzurraren adierazpena bidezkoa izan ala ez izateari buruzko ebazpena emango du; gainera, kasuan kasuko likidazioa egingo du. Egintza horren aurka berraztertzeko errekurtsoa edo erreklamazio ekonomiko-administratiboa egin daiteke.
4. Espedientea kudeaketa bulegoek eskatuta hasiz gero, jardundakoa tributu ikuskapenari bidaliko zaio; halaber, kasuan kasuko aktak egin eta horiek aurreko atalean ezarritakoaren arabera tramitatuko dira.
Zergen Foru Lege Orokorraren 9. artikuluaren 3. atalean ezarri denari dagokionez, zerga-betebeharra dutenen kontzeptua zerga-prozedura bateko interesatu edo alderdi diren guztiei hedatzearena prozedura horretan pertsona horiei guztiendako administrazioko legerian ezarri diren prozedurazko eskubideak aintzatesteko baino ez da.
