LEXNAVARRA
11/2006 FORU DEKRETUA, OTSAILAREN 13KOA, NAFARROAKO FORU KOMUNITATEKO ADMINISTRAZIOKO ORGANOEI ZEHATZEKO AHALMENA EMATEN DIENA LAN ARLOAN ETA KOOPERATIBAK DESKALIFIKATZEKO PROZEDURAN
BON N.º 30 - 10/03/2006
- Atariko
- 1. artikulua. Xedea.
I. KAPITULUA. LAN ARLOKO ZEHAPENAK EZARTZEKO ESKUMENAK
- 2. artikulua. Zehapenak ezartzeko eskumenak ematea.
- 3. artikulua. Lan arloko arauhausteengatik zehapenak ezartzeko prozedura.
- 4. artikulua. Arauhausteak metatzea.
- 5. artikulua. Zehapen osagarriak.
II. KAPITULUA. KOOPERATIBEN DESKALIFIKAZIOA
- 6. artikulua. Kooperatibak deskalifikatzeko eskumena ematea.
- 7. artikulua. Kooperatibak deskalifikatzeko prozedura.
- Xedapen Iragankor Bakarra. Foru Dekretu honek indarra hartu baino lehen hasitako prozedurak.
- Xedapen Indargabetzaile Bakarra
- Azken Xedapenetako Lehenbizikoa. Industria eta Teknologia, Merkataritza eta Lan Departamentuaren egitura organikoari buruzko Foru Dekretuaren hirugarren xedapen gehigarria aldatzea.
- Azken Xedapenetako Bigarrena. Indarra hartzea.
Apirilaren 11ko 937/1986 Errege Dekretuaren bidez Nafarroako Foru Komunitateari eskualdatu zitzaion martxoaren 10eko 8/1980 Legeak onetsitako Langileen Estatutuaren 57. artikuluan aurreikusten diren zehapenak eta lan arloko legerian aurreikusitako gainerakoak ezartzeko ahalmena, xedapen egokietan ezarritako gehieneko zenbatekoetaraino.
Maiatzaren 19ko 163/1988 Foru Dekretuaren bidez, lan arloko zehapenak ezartzeko ahalmena Nafarroako Gobernuko organoen artean banatu zen, Lan Arloko Arau-hauste eta Zehapenei buruzko apirilaren 7ko 8/1988 Legean ezarritako irizpideei jarraituz.
Gero maiatzaren 14ko 811/1999 Errege Dekretua onetsi zen eta haren bidez Nafarroako Foru Komunitateari eskualdatu zitzaizkion Enpleguaren Institutu Nazionalak lanaren, enpleguaren eta prestakuntzaren arloetan egiten zituen kudeaketa zerbitzuak. Dekretu horretan ezarritakoaren arabera, Nafarroako Foru Komunitateak enpresaburu eta langileen betebeharrak betearazi behar ditu eta zehatzeko ahalmena erabili behar du lanarekin eta langabeziarekin zerikusia duten gaietan, Estatuko legeriak ezarritako moduan.
Halaber, abuztuaren 4ko 5/2000 Legegintzako Errege Dekretuaren bidez Lan Arloko Arau-hauste eta Zehapenei buruzko Legearen Testu Bategina onetsi zen. Honek indarrik gabe utzi zuen 8/1988 Legea eta 48. artikuluan honakoa ezarri zuen: "Lan arloko legeria betearazteko eskumena duten autonomi erkidegoetako administrazioetan, autonomi erkidegoak berak zehaztuko du zein organok erabili behar duten lan arloko arau-hausteengatik zehapenak ezartzeko ahalmena, baita ahalmen hori banatzeko mugak ere".
Ildo beretik, Nafarroako Foru Komunitateko Administrazioari buruzko abenduaren 3ko 15/2004 Foru Legeak honakoa ezarri du 62. artikuluan: "Nafarroako Foru Komunitateko Administrazioari dagokionez, zehapen ahalmena erabiltzea legezko edo erregelamenduzko xedapenen bidez berariaz esleitua duten organoei dagokie".
Azkenik, Nafarroako kooperatibei buruzko uztailaren 2ko 12/1996 Foru Legearen I. tituluko IX. kapituluan kooperatiben "Desegitea, deskalifikazioa eta likidazioa" arautu dira.
Horrenbestez, lan arloko arau-hausteei eta kooperatibak deskalifikatzeko prozedurari dagokienez, bidezkoa da erregelamenduzko beste xedapen bat onestea zehapen ahalmena Nafarroako Foru Komunitateko Administrazioko organoei esleitzeko.
Nafarroako Kooperatibei buruzko uztailaren 2ko 12/1996 Foru Legearen 81.1 artikuluan xedatutakoarekin bat, Nafarroako Kooperatiben Kontseiluak foru dekretuaren proiektuari buruz adostasun txostena eman du 2005eko abenduaren 2an egindako bilkuran.
Hori horrela, Industria eta Teknologia, Merkataritza eta Lan kontseilariak proposaturik, Nafarroako Kontseiluarekin ados, eta Nafarroako Gobernuak bi mila eta seiko otsailaren hamahiruko bilkuran hartutako erabakiarekin bat,
DEKRETATU DUT:
Foru Dekretu honen xedea da Nafarroako Foru Komunitateko Administrazioko organoen artean zehapen eskumenak banatzea, lan arloko arau-hausteei eta kooperatibak deskalifikatzeko prozedurari dagokienez.
I. KAPITULUA. LAN ARLOKO ZEHAPENAK EZARTZEKO ESKUMENAK
2. artikulua . Zehapenak ezartzeko eskumenak ematea.
1. Nafarroako Foru Komunitateko Administrazioaren eremuan Lan zuzendari nagusiak izanen du eskumena 48.080,97 euro arteko zehapenak ezartzeko, Laneko eta Gizarte Segurantzako Ikuskatzailetzak proposatuz gero, lan harremanei, aldi baterako laneko enpresei, ikuskatze lanak oztopatzeari, laneko arriskuen prebentzioari eta kooperatibei dagozkien arau-hausteengatik.
2. Nafarroako Foru Komunitateko Administrazioaren eremuan Nafarroako Enplegu Zerbitzuko zuzendari kudeatzaileak izanen du eskumena 48.080,97 euro arteko zehapenak ezartzeko legez zehaztutako kasuetan, Laneko eta Gizarte Segurantzako Ikuskatzailetzak proposatuz gero edo Nafarroako Enplegu Zerbitzuaren ekimenez.
3. Nafarroako Foru Komunitateko Administrazioaren eremuan Industria eta Teknologia, Merkataritza eta Lan kontseilariak izanen du eskumena 48.080,96 euro baino gehiagokoak eta gehienez 120.202,42 eurokoak diren zehapenak ezartzeko aurreko bi idatz-zatietan azaldutako kasuetan, Laneko eta Gizarte Segurantzako Ikuskatzailetzak proposatuz gero.
Halaber Industria eta Teknologia, Merkataritza eta Lan kontseilariari dagokio aldi baterako laneko enpresen aurkako zehapen prozedurak ebaztea, prozedura horietan isuna ezartzeaz gainera enpresaren jarduera eteteko zehapenak ezartzen direnean, Lan Arloko Arau-hauste eta Zehapenei buruzko Testu Bategina onetsi zuen abuztuaren 4ko 5/2000 Legegintzako Errege Dekretuaren 41.3 artikuluan aurreikusi bezala.
4. Nafarroako Foru Komunitateko Administrazioaren eremuan Nafarroako Gobernuak ezarriko ditu 120.202,43 euro edo gehiagoko zehapenak aurreko idatz-zatietan azaldutako arau-hausteengatik, Industria eta Teknologia, Merkataritza eta Lan kontseilariak proposatuz gero.
3. artikulua . Lan arloko arauhausteengatik zehapenak ezartzeko prozedura.
1. Lan harremanei, enpleguari, aldi baterako laneko enpresei, ikuskatze lanak oztopatzeari, laneko arriskuen prebentzioari eta kooperatibei dagozkien arau-hausteengatiko zehapen prozedurak, kooperatiben deskalifikazioa izan ezik, maiatzaren 14ko 928/1998 Errege Dekretuan ezarritakoari jarraituz izapidatuko dira. Dekretu horren bidez lan arloko arau-hausteengatik zehapenak ezartzeko eta Gizarte Segurantzako kuoten likidazioaren espedienteak egiteko prozedurei buruzko Erregelamendu Orokorra onetsi zen.
2. Zehapen prozedura horiek ofizioz hasiko dira, Laneko eta Gizarte Segurantzako Ikuskatzailetzak edo, legez aurreikusitako kasuetan, Nafarroako Enplegu Zerbitzuak akta eginda.
4. artikulua . Arauhausteak metatzea.
Prozedura batean gai bereko arau-hausteak metatzen direnean, 2. artikuluan egindako eskumen-banaketaren arabera zehapen handiena ezartzeko eskumena duen organoa izanen da eskuduna arau-hauste guztiengatik zehapen bakarra ezartzeko.
5. artikulua . Zehapen osagarriak.
Lan Arloko Arau-hauste eta Zehapenei buruzko Legearen Testu Bategina onetsi zuen abuztuaren 4ko 5/2000 Legegintzako Errege Dekretuan aurreikusten diren zehapen osagarriak zehapen nagusi bati lotuta daude eta hura ezartzeko eskumena duen organoari berari dagokio zehapen osagarriak ezartzeko eskumena.
II. KAPITULUA. KOOPERATIBEN DESKALIFIKAZIOA
6. artikulua . Kooperatibak deskalifikatzeko eskumena ematea.
Industria eta Teknologia, Merkataritza eta Lan kontseilariari dagokio Nafarroako Kooperatibei buruzko uztailaren 2ko 12/1996 Foru Legearen 60. artikuluan ezarrita dagoen moduan kooperatibak deskalifikatu daitezela erabakitzea.
7. artikulua . Kooperatibak deskalifikatzeko prozedura.
Kooperatibak deskalifikatzeko prozedura bat etorriko da Nafarroako Foru Komunitateko Administrazioari buruzko abenduaren 3ko 15/2004 Foru Legearen V. tituluan ezarritako zehapen prozedura administratiboarekin.
Lan zuzendari nagusiak izanen du eskumena kooperatibak deskalifikatzeko prozedura hori abian jartzeko.
Xedapen Iragankor Bakarra . Foru Dekretu honek indarra hartu baino lehen hasitako prozedurak.
Foru Dekretu hau aplikagarria izanen da berak indarra hartu baino lehen hasi eta oraindik ebatzi gabe dauden prozeduretan.
Xedapen Indargabetzaile Bakarra
Indarrik gabe utzi dira Foru Dekretu honetan xedatutakoaren kontrakoak diren maila bereko edo apalagoko xedapen guztiak eta, zehazki, 163/1988 Foru Dekretua, maiatzaren 19koa, lan arloko zehapenak ezartzeko ahalmena Nafarroako Gobernuko organoen artean banatzen duena.
Azken Xedapenetako Lehenbizikoa . Industria eta Teknologia, Merkataritza eta Lan Departamentuaren egitura organikoari buruzko Foru Dekretuaren hirugarren xedapen gehigarria aldatzea.
Industria eta Teknologia, Merkataritza eta Lan Departamentuaren egitura organikoa ezartzen duen otsailaren 24ko 49/2005 Foru Dekretuaren hirugarren xedapen gehigarriaren 2. idatz-zatia aldatu da; honela gelditu da:
"Kontratazioaren alorrean indarreko araudiak kontseilariari ematen dizkion eskurantza administratiboak Lan zuzendari nagusiak bereganatu eta erabiliko ditu, bere eskumenen esparruan."
Azken Xedapenetako Bigarrena . Indarra hartzea.
Foru Dekretu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, 2006ko otsailaren 13an._Nafarroako Gobernuko lehendakaria, Miguel Sanz Sesma._Industria eta Teknologia, Merkataritza eta Lan kontseilaria, José Javier Armendáriz Quel.
Iragarkiaren kodea: F0603337
