(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

10/2003 FORU LEGEA, MARTXOAREN 5EKOA, NAFARROAKO ADMINISTRAZIO PUBLIKOEN MONTEPIOETAKO FUNTZIONARIOEN ESKUBIDE PASIBOEN ARAUBIDE IRAGANKORRARI BURUZKOA Nota de Vigencia

BON N.º 32 - 14/03/2003

  I. TITULUA. ESKUBIDE PASIBOEN SISTEMA IRAGANKORRAREN ARAU OROKORRAK

  II. TITULUA. ESKUBIDE PASIBOEN SISTEMAN KOTIZATZEA

  I. KAPITULUA. Xedapen orokorrak

  II. KAPITULUA. Kotizazio bereziko kasuak

  III. TITULUA. ESKUBIDE PASIBOEN SISTEMAKO PRESTAZIOAK

  I. KAPITULUA. Xedapen orokorrak

  II. KAPITULUA. Erretiro pentsioak

  III. KAPITULUA. Ezintasun iraunkor partzial eta elbarritzerik gabeko lesio iraunkorren ondoriozko kalteordainak

  IV. KAPITULUA. Hiltzearen eta bizirik irautearen ondoriozko prestazioak

ZIOEN AZALPENA

1

Foru lege honen aurrekariak eta justifikazioa

Foru Diputazioak 1931ko martxoaren 10eko Erabakiaren bidez Foru Diputazioko zahar-sari eta pentsioen Erregelamendua onetsi zuen, zeinak ezarri zuen gaur egun Foru Komunitateko administrazioko funtzionarioentzat indar duen eskubide pasiboen araubidea.

Ondoren, Foru Kontseilu Administratiboak, 1947ko maiatzaren 31ko Erabakiaren bidez, Nafarroako udaletako funtzionarioen eskubide pasiboen Erregelamendua onetsi zuen, zeinak finkatu zuen orain arte Foru Komunitateko toki entitateetako funtzionarioei aplikatu izan zaien eskubide pasiboen sistema, salbu eta Iruña, Tafalla eta Tuterako udalekoentzat, horiek beren montepio propioak baitituzte eta gai horren gaineko beren araubide berariazkoa, udal horietako funtzionarioei aplikatzekoa.

Martxoaren 30eko 13/1983 Foru Legeak, zeinak arautzen baitu Nafarroako administrazio publikoen zerbitzuko langileen Estatutua, finkatu zuen zer lansari sistema eta zer maila sistema aplikatuko zitzaizkien _eta gaur ere hala da_ Foru Komunitateko administrazio publikoetako zerbitzu aktiboko funtzionarioei, hau da, bost mailako sistema bat: A, B, C, D eta E, zein bere hasierako soldatarekin.

Aipatu martxoaren 30eko 13/1983 Foru Legeak bere lehenbiziko xedapen iragankorreko bigarren idatz-zatian finkatu zuen, haren arauak garatu eta aplikatzeko erregelamendu xedapenak onesten ez ziren artean, indardun segituko zutela xedapen horien xede ziren gaiak garai hartan arautzen zituztenek; hirugarren xedapen iragankorrean agindu ere zuen, eskubide pasiboen gainean, foru legearen garabidean onetsi behar zen eskubide pasiboen erregelamenduak indar hartzen ez zuen artean, erretiroek delako Legea onetsi zenean indardun ziren xedapenak izanen zituztela jarraibide; hau da, kasuko araudiak indar hartu artean, aktiboko lansarien sistemak eta eskubide pasiboenak elkarrekiko lotura galtzen zuten, zeren montepioetan sartutako funtzionarioek aktiboan zeudela jasotzen zituzten lansariek ez baitzuten balio beren hartzeko pasiboak seinalatzeko, horiek 1983 baino lehenagokoak baitziren artean ere.

Ekainaren 23ko 9/1992 Foru Legeak (1992ko ekitaldiko Nafarroako aurrekontu orokorrei buruzkoa), finkatu zuen 1992ko urtarrilaren 1etik aurrera Foru Komunitateko administrazioan eta haren erakunde autonomoetan sartzen ziren funtzionarioei Gizarte Segurantzako araubide orokorrean alta emanen zitzaiela eta, hala bazegokion, bertan afiliatuko zirela.

Horrez gain, abenduaren 30eko 13/1993 Foru Legeak (1994ko Nafarroako aurrekontu orokorrei buruzkoa) beste hainbeste finkatu zuen Foru Komunitateko toki administrazioetan sartu berriko funtzionarioen kasurako.

Arau horiek, bada, itxi zieten funtzionario berriei Nafarroako administrazio publikoetako montepioetan sartzeko bidea, eta beraz lehendik hor ziren funtzionarioek "desagertu" beharreko taldea osatu zuten aurrerakoan: gaur egun 3.287 funtzionario, Foru Komunitateko administraziokoak, eta 1.205, toki administrazioetakoak. Orduantxe hasi zen administrazioa, gainera, montepioetako finantza-aurrekontuetan teknikariek epe ertainari begira iragartzen zuten krisi larri-larrirako soluzio baten bila.

Foru lege honetan ezartzen den eskubide pasiboen sistema berriak (printzipioz "desagertu" beharreko langile talde horri soilik aplikatzekoa), aktiboko lansarien sistema eta eskubide pasiboenaren artean esan bezala dagoen lotura-falta konpondu nahi du, Gizarte Segurantzarenaren antzeko sistema bat ezarriz, zeinean pentsioak kalkulatzeari begira aktiboan jasotzen ziren lansariak hartzen baitira aintzat, nahiz eta zenbait muga gehieneko egon, beste sistema horretan bezalaxe.

Bestalde, azpimarratu behar da ezen foru legearen helburua, azken batean, Gizarte Segurantzaren araubide orokorrean sarraraztea dela; horregatik, abiarazten den sistema berriaren indarraldiaren iragankortasuna ezartzen da eta Nafarroako Gobernuari ematen zaio sarrarazpen horren baldintzak nazioko Gobernuarekin negoziatzeko ardura.

2

Foru legearen edukia eta haren alderdi aipagarrienak

Nafarroako administrazio publikoen montepioetako funtzionarioen eskubide pasiboei buruzko foru lege honetan ezartzen den eskubide pasiboen sistemak honako zutabe nagusi hauetan oin hartzen du:

1. Gizarte Segurantzaren araubide orokorra zolatzen duten printzipio oinarrizko berberak ditu.

2. Foru lege honen aurreko Nafarroako Foru Komunitateko montepio sistemaren zenbait berezitasun gordetzen ditu.

I. tituluak eskubide pasiboen sistema iragankor berriko arau orokorrak dauzka. Ezartzen du Nafarroako administrazio publikoen montepioetako funtzionarioak soilik egonen direla haren eraginpean.

II. tituluak eskubide pasiboen sistema berrian kotizatzeko arauak ezartzen ditu, eta kotizazio tipo bakarra finkatzen, kotizazio oinarriaren ehuneko 5,1ekoa, Gizarte Segurantzaren araubide orokorrean erabiltzen dena (ehuneko 4,8) baino goitixeagokoa.

Kotizazio oinarriei dagokienez _erreferentzia baitira pentsioen erregulazio oinarriak finkatzeko, eta azken batean haien zenbatekoa kalkulatzeko_, foru legean hartarako ematen diren arauak bat datoz funtsean Gizarte Segurantzako araubide orokorrean begiratzen direnekin, kotizazio oinarria nola finkatu eta oinarri horien gehieneko eta gutxieneko mugak bezalako gaietan, horretarako baliokidetza bat ezarririk Nafarroako administrazio publikoetako funtzionarioen mailakatze sistemaren eta Gizarte Segurantzako araubide orokorreko kotizazio taldeen artean.

III. tituluan, lehenbizi, eskubide pasiboen sistema berriko prestazioak aipatzen dira, hots, oro har, Gizarte Segurantzako sistemak ematen dituen berberak.

Ondoren hainbat muga ezartzen dira pentsioen hasierako zenbatekorako eta pentsioak gaurkotzeko. Muga horiek Gizarte Segurantzako eremu orokorrean erabiltzen direnak dira. Agintzen da erretiro pentsioak eta alargun pentsioak mantendu behar direla, foru lege honen aurreko montepioetako eskubide pasiboen sisteman izaten ziren jarraibideen arabera.

Titulu honetako II. kapituluan erretiro pentsioak erregulatzen dira. Hona alderdirik aipagarrienak:

1. Nahitaez erretiratzeko adina 65 urtekoa izanen da, montepioetako eskubide pasiboen aurreko sisteman ez bezala, 70 urtekoa baitzen. Aukera ezartzen da 70 urte bete arte aktiboan irauteko, salbu eta erretiro arau berariazkoen peko lanpostuetan izendaturik daudenen kasuan. Zerbitzu aktiboan 65 urtetik aurrera segituz gero, erregulazio oinarriaren ehuneko 100etik gorako pentsioa jaso ahalko da.

2. Gizarte Segurantzako sisteman bezala, erretiro pentsioen erregulazio oinarria kalkulatzeko, funtzionarioaren azken 15 urteetako kotizazio oinarriak hartuko dira aintzat, salbu eta ezintasunaren kausazko zenbait erretiro kasutan, eta aplikatzeko eskala sistema hartako berbera izanen da, halatan non 35 urteko kotizazioa eginik, erretiro pentsioa ehuneko 100ekoa izanen den.

3. Aukera ezartzen da 60 urte beterik eta 35 urte kotizaturik nahi duena erretiratu ahal izateko, erretiro pentsioaren portzentajeari koefiziente murrizgarririk aplikatu gabe, betiere baldin kotizatutako 35 urte horiek administrazio publikoetan emandako zerbitzuak badira, Gizarte Segurantzan ez bezala, hor beti aplikatzen baitira koefiziente murrizgarriak.

4. Ezintasunaren ondoriozko erretiroari dagokionez, eskubide pasiboen sistema berriak hainbat berezitasun ditu Gizarte Segurantzako sistemaren aldean, foru lege honen aurreko montepio sistemaren zenbait ezaugarri gordetzen baitira.

Lehenbizi, ez da ezaldirik eskatzen ezintasun iraunkorraren ondoriozko erretiro pentsioentzat, Gizarte Segurantzako sisteman ez bezala, hor bai eskatzen baitira.

Bestalde, finkatzen da ezintasun iraunkor osoaren ondorioz erretiratu den funtzionarioari, kotizatutako urteen arabera tokatzen zaion erretiro portzentajea handiagoa bada ezintasun horretarako aurreikusten dena baino, kotizazio urteengatik tokatzen dena emanen zaiola.

III. tituluko III. kapituluari dagokionez, (ezintasun iraunkor partzialaren eta elbarritzerik gabeko lesio iraunkorren ondoriozko kalte-ordainei buruzkoa), diferentzia aipagarri bakarra da sistema berrian funtzionarioek ezintasuna lan istripu edo lan eritasun baten ondoriozkoa denean baizik ez dutela kalte-ordaina jasotzeko eskubiderik izanen, Gizarte Segurantzako sisteman ez bezala, hor ezintasun iraunkor partzialaren egoeran daudenek beti baitute eskubidea kalte-ordaina jasotzeko, zein ere den ezintasuna sortu dien arrazoia.

III. tituluaren IV. kapituluan hiltzearen eta bizirik irautearen ondoriozko prestazioak arautzen dira. Hona alderdirik aipagarrienak:

1. Ez da ezaldirik eskatzen hiltzearen eta bizirik irautearen ondoriozko prestazioak jasotzeko eskubidea izateko, Gizarte Segurantzan ez bezala, hor eskatzen baita.

2. Alargun pentsio bizi artekoaren portzentajea, umezurtz pentsiorako eskubidea duen umerik ez delarik, gutxienez ehuneko 40 eta gehienez ehuneko 55ekoa izanen da, pentsio-sortzaileak zenbat urteko kotizazioa eginik zuen.

Aurreikuspen honek alde egiten dio Gizarte Segurantzako sistemakoari, hartan alargun pentsioa portzentaje beti-batekoa baita (oro har ehuneko 46koa, eta kasu bakan batzuetan ehuneko 70ekoa). Hori, foru lege honen aurreko montepio sistemaren ondorioa da, hartan kotizatutako urteek eragiten baitiote alargun pentsioaren portzentajeari.

Umezurtz pentsioei eta familiakoentzako pentsioei dagokienez, Gizarte Segurantzan bezalakoak dira, salbu eta familiakoentzako pentsio horiek alargun edo umezurtz pentsioa nork jasorik ez dagoenean sortzen diren kasuetan, Gizarte Segurantzako sisteman ez bezala, hor zilegi baita pentsio horien aldi berean sortzea familiakoentzako pentsioak ere.

Azkenik, foru lege honen eraginpeko funtzionarioei eskubidea aitortzen zaie eskubide pasiboen aurreko sisteman iraun ala berrian sartu hautatzeko, eta ildo horretatik foru legeko bigarren xedapen iragankorrean 6 hilabeteko epea ezartzen da montepioetan dauden aktiboko funtzionarioek, hala nahi badute, eskubide pasiboen aurreko sisteman irautea hauta dezaten.

I. TITULUA. ESKUBIDE PASIBOEN SISTEMA IRAGANKORRAREN ARAU OROKORRAK

1. artikulua. Legearen xedea eta haren eraginpeko pertsonak.

1. Foru lege honen bidez, Nafarroako administrazio publikoetako montepioek bermatu egiten dizkiete hurrengo idatz- zatian aipatzen diren langileei, berentzat nahiz beren familiakoentzat sortzen dituzten prestazioak, legean bertan ezartzen den eskubide pasiboen sistemaren arabera.

2. Nafarroako administrazio publikoetako montepioetan dauden langile funtzionarioak hartzen ditu bere eraginpean foru lege honetan aurreikusten den eskubide pasiboen sistemak.

3. Eskubide pasiboen sistema honen aplikazio eremutik kanpo egonen dira Nafarroako administrazio publikoen langile funtzionario Gizarte Segurantzako araubide orokorrean eta Estatuaren klase pasiboetakoan afiliatuak.

2. artikulua. Izaera Nota de Vigencia.

1. Erretiro pentsioa aitortzeko eskubidea, bai eta heriotzagatiko eta bizirik irauteagatiko prestazioak jasotzekoa ere, preskribaezina da; baina, aitortza hori egiteko, hurrengo artikuluan aurreikusten diren epeak bete beharko dira.

Ezintasun iraunkor partzialagatiko eta ezintasuna sortzen ez duten lesio iraunkorrengatiko prestazioak aitortzeko eskubideak, aldiz, bost urtera preskribatuko du, kasuko prestazioaren gertaera eragilea izan eta biharamunetik hasita.

Aurreko paragrafoan aipatzen den gertaera eragilea, prestazioena, noiz gertatu den zehazteko, Gizarte Segurantzaren esparruan xedatutakoa hartuko da aintzat.

2. Prestazioak osotara eta behin bakarrik jasotzeko eskubidea urtebetera iraungiko da, interesdunari eskubidea aitortzen zaiola forman jakinarazi eta biharamunetik hasita.

Aldizkako prestazioak direnean, hileko zenbateko bakoitza jasotzeko eskubidea iraungiko da mugaeguneratu eta urtebetera.

3. artikulua. Ekitaldia Nota de Vigencia.

Aurreko artikuluko 1. apartatuan, 1. paragrafoan, jasotzen diren prestazioak aitortzeko eskubidea erabiltzen ahalko da gertaera eragilea izan ondoko edozein unetan, baina aitortzak eskaera aurkeztu baino hiru hilabete lehenagotik izanen ditu ondorioak, ekar ditzakeenak.

Prestaziorako eskubidea aitortzerik ez badago interesdunari egotz dakizkiokeen arrazoiengatik, eskubide horrek ondorio ekonomikoak izanen ditu, soilik, interesdunak berari egotz dakizkiokeen akatsak zuzendu eta biharamunetik aurrera.

4. artikulua. Erabiltzearen ondorengotza.

1. Baldin eta prestazio bat aitortzeko prozedura administratiboa erregelamenduak ezarri bezala hasi ondoren interesatua tramitazioak irauten duen artean hiltzen bada eta legitimaturiko alderdi batek aurrera egiteko eskatzen badu, prozedura bukatu eginen da kasurako bide den deklarazioa eginaz, eta hala tokatzen bada, herentziadunei ordainduko zaizkie sortzen diren diru-kopuruak.

2. Prestazio baten hartzailea hiltzen denean, prestazioa osatzen duten hartzekoak, sortuak baina jaso gabekoak, herentziadunei ordainduko zaizkie, legitimaturiko alderdi batek hala eskatzen badu.

3. Aurreko bi idatz-zatiek aipatzen dituzten kasu bietako edozeinetan, eskaera bost urteko epean egin beharko da, interesatua hil eta biharamunetik kontatuta. Epeburu hori iragan delarik, eskubideak preskribituko du.

5. artikulua. Bidegabeki jasotako prestazioak itzuli beharra.

1. Foru lege honetan arautzen den eskubide pasiboen sistemako prestazioen hartzaileek bidegabeki jaso dituzten diru-kopuruak, berek edo beren eskubidedunek itzuli beharko dituzte.

Prestazioa pentsio bat delarik eta dirutza bidegabeen hartzaileak oraindik pentsioa kobratzen segitu behar badu, zilegi izanen da zor hori pentsioaren hurrengo hilekoetatik pagatzea, erregelamenduz hartarako ezartzen den moduan.

2. Norbaiten egintzak edo egintza ezak lagundu badu diru-kopuru bat bidegabeki kobratzen, bera izanen da itzuli beharraren erantzule subsidiario.

6. artikulua. Prestazio bateraezinak.

1. Norbaitek bi pentsio edo gehiago kobratzeko eskubidea badu, bateraezinak, zilegi izanen du bietatik kobratzea nahiago duena hautatzea. Eskubide hori behin baizik ezin izanen da erabili.

Hala ere, xedapen orokorrak aplikatzearen ondorioz bateraezineko pentsio horietako baten zenbatekoa aldatzen bada, zilegi izanen da hautatzeko eskubide hori berriro erabiltzea, kasu bakoitzean behin soilik.

2. Pentsio bat jasotzea eta lan pertsonalaren ondoriozko irabaziak izatea bateraezinak badira, eten eginen da pentsioaren pagua jasotzailea lanetik gelditu arte.

7. artikulua. Zerbitzutik bereizita dauden langile funtzionarioen eskubide pasiboak.

1. Zerbitzutik bereizita dagoen funtzionarioak ez ditu galduko ordu arte beretzat nahiz bere familiakoentzat sortu dituen eskubide pasiboak.

2. Artikulu honek aipatzen dituen funtzionarioek sortu dituzten eskubide pasiboak beti alderdi batek hala eskatuta aitortuko dira, behin frogatu delarik kasuan-kasuan eskatzen diren baldintzak betetzen direla.

8. artikulua . Arauhausteak eta zehapenak.

Arau-hauste eta zehapenetarako, unean-unean Gizarte Segurantzako eremuan arau-hauste eta zehapen sozialetarako indar duen araudia hartuko da aintzat.

II. TITULUA. ESKUBIDE PASIBOEN SISTEMAN KOTIZATZEA

I. KAPITULUA. Xedapen orokorrak

9. artikulua. Kotizatzeko obligazioa.

1. Nafarroako administrazio publikoetako montepioetan kotizatzera beharturik daude, foru lege honetan ezartzen diren arauen arabera, bertan sarturik dauden funtzionarioak.

2. Nafarroako administrazio publikoek deskontatu eginen diete beren funtzionarioei, lansariak pagatzerakoan, bakoitzari kotizaziotzat tokatzen zaion zenbatekoa.

10. artikulua. Kotizatzeko obligazioa nola sortzen den eta zenbat irauten duen.

1. Nafarroako administrazio publikoetako montepioetan dauden funtzionarioak, zerbitzu aktiboan badaude eta foru lege honetan ezartzen den eskubide pasiboen sisteman alta emanik, administrazio egoera horretan dirauten artean beharturik daude kotizatzera.

2. Kotizatzera beharturik daude, halaber, Nafarroako administrazio publikoetako montepioetako funtzionarioak ere, zerbitzu berezietan, eszendentzia berezian edo behin-behinekoz eginkizunez gabeturik badaude.

Aurreko idatz-zatian agindutakoa gorabehera, ez dute kotizatzeko obligaziorik izanen zerbitzu berezietan dauden eta beste gizarte aurreikuspeneko sistema batean egoera administratibo hori sortu dien lanpostu edo karguagatik altan dauden funtzionarioek.

11. artikulua. Kotizazio tasa Nota de Vigencia.

Funtzionarioaren kargurako kotizazio oinarriaren %4,8 izanen da kotizazio tasa, eta haren barnean sartuko da foru lege honetan jasotako kontingentzia eta egoeretarako ekarpena.

12. artikulua. Kotizazio oinarria.

1. Kotizazio oinarria funtzionarioak hilean jasotzen duen lansari osoa izanen da.

Honako lansariak ez dira kontatuko kotizazio oinarrian:

a) Gizarte Segurantzako araudian aurreikusten den moduan, zerbitzuagatik, bidaiak egiteagatik edo nahitaezko lekualdaketaren ondorioz bizilekuz aldatzeagatik egindako gastuen alderako ordaina.

b) Famili laguntza.

c) Aparteko orduen alderako sariak.

2. Zerbitzu aktiboko funtzionario batek soldatarik gabeko baimen bat hartu badu, kotizazio oinarria baimen hori hartu ez balu tokatuko zitzaiona bera izanen da.

3. Funtzionario bat zerbitzu berezietan edo eszedentzia berezian badago, kotizazioaren oinarria kalkulatzeko, egoera horretan hasi aurreko 12 hiletako oinarrien batez bestekoa eginen da, eta oinarri hori urtero gaurkotuko da bide den heinean. Betiere oinarria inoiz ez da izanen haren lanpostuaren mailari dagokion gutxieneko muga baino gutxiagokoa.

Aurreko idatz-zatian agindutakoa gorabehera, zerbitzu berezietan dagoen funtzionario horrek Nafarroako edozein administrazio publikotatik, haren menpeko entitate batetik edo Nafarroako Foru Komunitateko beste edozein instituzio publikotatik jasotzen badu bere soldata, haren kotizazio oinarria benetan jasotzen duen lansaria izanen da, artikulu honetako lehen idatz-zatiko bigarren lerrokadan agintzen dena aplikatzea ezertan galarazi gabe.

13. artikulua. Kotizazio oinarrien gutxieneko eta gehieneko muga.

Kotizazio oinarriek gutxieneko eta gehieneko mugak izanen dituzte maila bakoitzerako, Gizarte Segurantzako araubide orokorrerako kotizazio taldeentzat urtero ezartzen direnen parekoak, honela:

MAILAKOTIZAZIO TALDEA
A1
B2
C5
D7
E6

14. artikulua. Kotizazio oinarria nola finkatu.

Hilabete bakoitzari zer kotizazio oinarri dagokion finkatzeko, honako arauak aplikatuko dira:

1. Kotizazioa zein hilabeteri dagokion, hartan sortutako lansaria kontatuko da.

2. Aurreko arauaren arabera kontatutako lansariari erantsiko zaio ezarritako paga apartekoen parte proportzionala eta hilero baino maizago sortzen diren edo sortze epe jakinik ez duten beste lansari guztiena ere. Horretarako, aparteko paga horien eta gainerako ordainketa kontzeptuen urteko zenbateko kalkulatua 12z zatituko da.

3. Aurreko arauen arabera ateratzen den kotizazio oinarria ez bada sartzen funtzionarioaren mailari dagokion gehieneko eta gutxieneko oinarrien artean, gutxieneko ala gehieneko oinarriaren arabera kotizatuko da, kotizazio oinarria nola ateratzen den: gutxienekoa baino gutxiagokoa edo gehienekoa baino gehiagokoa.

15. artikulua. Aparteko orduen alderako emendiozko kotizazioa.

1. Funtzionarioek aparteko orduen aldera jasotzen duten lansariagatik emendiozko kotizazio bat eginen da, zeina ez baita kontatuko prestazioen erregulazio oinarria kalkulatzeko.

2. Aparteko orduen alderako emendiozko kotizazioari foru lege honetako 11. artikuluan oro har aurreikusten den tasa aplikatuko zaio.

16. artikulua. Kuoten likidazioa.

1. Kotizazio oinarrian sartuta dauden eta hilero sortzen diren lansari kotzeptuei dagozkien kuoten likidazioa, kuota sortu zen hilabete naturalari egotziko zaio, likidazioa zein ere hiletan egiten den.

2. Kotizazio oinarrian sartuta dauden eta hilabetea baino luzeagoko epeetan sortzen diren edo sortze epe jakinik ez duten eta kasuko ekitaldi ekonomikoan ordaintzen diren lansari kontzeptuei dagozkien kuoten likidazioa, proportzionalki banatuko da ekitaldi hartako hileroko likidazioetan.

3. Kotizazio oinarrian sartuta dauden lansari kontzeptuen parte proportzionalei _jadanik likidatutako hilei dagozkienei_, eta bai oinarrien, tipoen edo kuoten berberen gehikuntzei ere _atzerako indarra izan behar dutenei_, osagarrizko likidazioak eginen zaizkie, banaka zerrendatuz hil bakoitzeko kotizazio oinarriak segun eta lansariok dagozkien hiletan zer oinarri, muga, tipo eta beste baldintza zeuden indarrean.

Era berean likidatuko dira, hala tokatzen bada, osorik nahiz partez aurretik ezin kalkulatu ziren lansariak, artikulu honetako bigarren artikuluak aipatzen duen banaketa proportzionala egiteko.

17. artikulua. Bidegabeko kotizazioen sarrera.

Legez tokatzen den baino gehiagoko nahiz gutxiagoko kotizazioen sarrera egiteak ez du inolako eraginik izanen kasuko pentsioa kalkulatzerakoan, eta interesatuak edo, hala tokatzen bada, administrazioak kasuko diru-kopuruak erreklamatzeko duen eskubideak bere hartan iraunen du.

II. KAPITULUA. Kotizazio bereziko kasuak

18. artikulua. Borondatezko eszedentzian edo eginkizunez gabeturik dauden langile funtzionarioen kotizazioa.

1. Interes partikularreko borondatezko eszedentzian edo eginkizunez gabeturik dauden langile funtzionarioek aukera izanen dute eskubide pasiboen sistema honetan segitzeko bertan aurreikusten direnak estaltzeko, non eta gizarte aurreikuspeneko beste sistema batean alta hartzen ez duten, eta kasuan-kasuan behar diren kotizazioak egin beharko dituzte.

2. Aukera hori erabiltzeko epea laurogeita hamar egun naturalekoa izanen da, funtzionarioa aurreko idatz-zatian aipatu egoeretako batera pasatzen den egunetik kontatuta, eta kotizazio bereziaren eraginak epe horren hasiera uneraino atzeratuko dira.

3. Kotizazio tipoa foru lege honetako 11. artikuluan oro har ezartzen dena izanen da.

4. Artikulu honetan aurreikusten diren kasuetan funtzionarioaren kotizazio oinarria kalkulatzeko, kotizazio berezia sortzen duen egoeran hasi aurreko 12 hiletako oinarrien batez bestekoa eginen da, eta oinarri hori urtero gaurkotuko da bide den heinean. Betiere oinarria inoiz ez da izanen haren lanpostuaren mailari dagokion gutxieneko muga baino gutxiagokoa.

5. Kuota, dagokion hilabetearen hurrengo hilabete naturalean sartuko da.

6. Artikulu honetan aurreikusten diren kasuetako kotizazioak ondorio bakarrerako kontatuko dira: finkatzea zein izanen den erregulazio oinarria eta zein portzentaje aplikatu beharko zaion berari kasuko pentsioa kalkulatzeko. Ezaldia finkatzeko, berriz, ez dira kontatuko.

7. Kotizazio bereziak egiten dituen funtzionarioak honako arrazoi hauetako edozeinengatik galduko du eskubide pasiboen sistema honetan segitzeko eskubidea:

a) Hurrenez hurrengo hiru hiletako kuotak ez pagatzeagatik.

b) Hiltzeagatik.

c) Berak hala erabakita eta kasuko montepioari idatziz adierazita.

d) Gizarte aurreikuspeneko beste sistema batean alta hartzeagatik.

e) Lanpostuaren erreserbarako eskubidea galtzeagatik, interes partikularreko borondatezko eszedentzien kasuan.

19. artikulua. Lanaldi murriztua edo aldi bateko ezintasuna duten funtzionarioen kotizazioa.

1. Lanaldi murriztua duten funtzionarioek edo aldi bateko ezintasun egoeran egon eta gai horretako arauek hala aginduta beren lansarien murrizketa portzentuala egiten zaienek aukera izanen dute kotizazio oinarriak mantentzeko aipatu lansari murrizketa egin ez balitzaie tokatuko zitzaien zenbatekoan.

Aukera hori, betiere, lansarien murrizketak ondorioak izaten hasteko eguna baino lehen erabili beharko da.

2. Funtzionario batek lehenbizi kotizazio oinarriak mantentzea aukeratu eta ondoren aukera hori ezeztatu nahi badu, hala eman beharko du aditzera idatziz, eta ondorioak idatzizko adierazpen horren hurrengo hilabetean hasiko dira.

III. TITULUA. ESKUBIDE PASIBOEN SISTEMAKO PRESTAZIOAK

I. KAPITULUA. Xedapen orokorrak

20. artikulua. Prestazio motak.

1. Foru lege honen eraginpeko funtzionarioek, berentzat edo beren familiakoentzat, hurrengo artikuluetan arautzen diren prestazioak sortuko dituzte, testu honetan ezartzen diren baldintza eta moduetan.

2. Berentzat honako prestazioak sor daitezke:

a) Bizi arteko pentsioak nahitaezko, borondatezko edo ezintasunaren ondoriozko erretirorako.

b) Kopuru finkatuko kalte-ordainak ezintasun iraunkor partzialaren eta elbarritzerik gabeko lesio iraunkorren kasuetarako.

3. Familiakoentzat, hiltzeagatik eta bizirik irauteagatik, honako prestazioak sor daitezke:

a) Bizi arteko alargun pentsioak.

b) Umezurtz pentsioak.

c) Familiakoentzako pentsioak.

21. artikulua. Prestazioen sortzapena Nota de Vigencia.

Foru lege honetan araututako prestazioak sortuko dira:

a) Nahitaezko edo borondatezko erretiro pentsioak:

a´) Funtzionarioa alta egoeran badago, lanari utzi eta biharamunetik aurrera.

b´) Alta egoeraren pareko egoeraren batean badago, egoera haietako bakoitzerako ondotik zehazten den egunetik aurrera:

– Zerbitzu eginkizunen egoeran egonez gero, egoera hori eragin zuen karguari edo lanari utzi eta biharamunetik aurrera.

– Gainerako kasuetan, eskaera aurkeztu eta biharamunetik hasita.

c´) Alta egoeran edo alta egoeraren pareko egoeran ez badago, eskaera aurkeztu eta biharamunetik hasita.

b) Ezintasun iraunkorragatiko erretiro pentsioak: dagokion administrazio organoak ezintasunagatiko erretiroa deklaratzeko emandako ebazpenaren eguna, horrek galarazi gabe ondorio ekonomikoek atzeraeragina izatea hura amaitu zen uneraino, ezintasun iraunkorrak jatorria aldi baterako ezintasunean duenean.

c) Ezintasun iraunkor partzialaren edo ezintasuna eragiten ez duten lesio iraunkorren deklarazioaren unetik aurrera, kasu horietan aurreikusten diren kalte-ordain orokorrak direnean.

d) Kausatzailea hil eta hurrengo hilabeteko lehen egunetik aurrera, alargun eta zurztasun pentsioen kasuan, salbu eta jarduneko funtzionarioa hiltzen denean, kasu horretan gertaera eragilea izan eta biharamunetik aurrera sortuko baitira.

e) Familiakoentzako pentsioetan, eskubidea sortu duena hil eta hurrengo hilabeteko lehenbiziko egunetik, ezkontide alargunik edo umezurtz pentsioa kobratzeko legezko eskubidea duen umezurtzik ez dagoen kasuetarako, edo alarguna edo, halakorik badago, umezurtz pentsiodun umezurtzak hil edo lege gaitasuna galdu eta hurrengo hilabeteko lehenbiziko egunetik.

22. artikulua. Prestazioen pagamendua.

1. Pentsioen urteko diru-kopurua hilero pagatuko zaie hartzaileei, zenbateko bereko hamalau pagalditan, haietako hamabi arruntak eta bi apartekoak. Apartekoak ekainean eta abenduan emanen dira.

Aurreko lerrokadak agintzen duena ezertan galarazi gabe, pentsio aitortua hasi eta lehendabiziko aparteko pagaldian, paga osoaren seiren bat emanen da pentsioaren eraginak hasten diren hilabeteko lehen egunetik ekainaren 30era edo abenduaren 31ra arte, kasuaren arabera, dagoen hilabete bakoitzeko.

Orobat, pentsioduna hiltzen bada, azkena jaso den aparteko pagaren hurrengo paga ulertuko da hiltzea gertatzen den hilabeteko azken egunean sortu dela, eta pentsioko azken hileko osoarekin batera pagatuko da, oraindik pagatzeko baldin badago, sortutako eta jaso gabeko hartzeko gisa eta proportzio honetan: paga osoaren seiren bat aparteko paga hori sortzen den egunetik hasi eta aurreko ekainaren 30era edo abenduaren 31ra arte, kasuaren arabera, dagoen hilabete bakoitzeko.

2. Kopuru finkatuko kalte-ordainak, ezintasun iraunkor partzialaren eta elbarritzerik gabeko lesio iraunkorren kasuan, pagaldi bakarrean emanen zaizkie hartzaileei.

23. artikulua. Prestazioen atxikipena eta enbargoa.

Prestazioei ez zaie atxikipenik eginen, honako bi kasuotan izan ezik:

a) Ezkontide eta seme-alabenganako elikadura eginbeharrak betetzeko.

b) Bidegabeki jasotako diru-kopuruak itzuli beharrari begira, foru lege honetako 5. artikuluak aurreikusten duenarekin bat.

Enbargo kasuetarako prozedura zibileko Legeak agintzen duena hartuko da aintzat.

24. artikulua. Birritako estaldura galaraztearen printzipioa.

Foru lege honetako eskubide pasiboen sistemaren arabera, beretzako edo bere familiakoentzako pentsioa sortzen duen funtzionarioak, baldin eta gainera Gizarte Segurantzako beste edozein araubidetan ere sortzen badu, hori dena zerbitzu emate bakar baten ondorioz, hautatu beharko du bietatik zein pentsio hartu nahi duen, eta ez du zilegi izanen biak hartzea.

25. artikulua. Pentsioen hasierako zenbatekoaren mugak, pentsioen gaurkotzea eta gutxieneko pentsioak.

1. Foru lege honetako eskubide pasiboen sistemaren arabera hartzaile bakoitzak sortutako edozein pentsioren hasierako zenbatekoak, bere buruz edo, halakorik bada, hartzaile berak jasotzen dituen beste pentsio publikoena gehiturik, ez du gaindituko ekitaldi ekonomiko bakoitzean Gizarte Segurantzako araubide orokorreko pentsioetarako ezartzen den urteko muga gehienekoa.

Pentsio bat baino gehiago biltzen direnean, zenbatekoa finkatzeko, Estatuaren Aurrekontu Orokorrei buruzko Legean urtero pentsio publikoak hasiera batez seinalatzeko mugei buruz ematen diren arauak hartuko dira aintzat.

2. Pentsioen zenbatekoa urtero gaurkotuko da Nafarroako aurrekontu orokorrei buruzko foru legeak ekitaldi ekonomiko bakoitzerako ezartzen duen portzentajean.

3. Foru lege honetako eskubide pasiboen sistemaren arabera sortutako pentsioen urteroko gaurkotzea gehiturik ere ez da zilegi izanen pentsioen urteko zenbateko osoak Gizarte Segurantzako araubide orokorreko pentsioentzat jarritako gehieneko kopurua gainditzea, gehi, halakorik bada, titularrak jasotzen dituen beste pentsio publikoen urteko zenbateko gaurkotu osoa.

Pentsio bat baino gehiago biltzen diren kasuetan, gaurkotzea egiteko, Estatuaren Aurrekontu Orokorrei buruzko Legean pentsio publikoak handitzeko mugei buruz urtero ematen diren arauak hartuko dira aintzat.

4. Erretiro pentsioen hartzaileek eskubidea izanen dute gutxieneko pentsio bat jasotzeko, E mailako Nafarroako administrazio publikoko aktiboko funtzionarioen hasierako soldata adinakoa, salbu eta altan ez egotearen egoeratik erretiratzen direnek, horiek foru lege honetako 34 eta 35. artikuluetako arauak aplikatzearen ondorioz tokatzen zaien pentsioa jasoko baitute.

5. Alargun pentsioen hartzaileek gutxieneko pentsio bat jasotzeko eskubidea izanen dute, Lanbide arteko Gutxieneko Soldataren betekoa. Alargun pentsio partekatuen kasuan, pentsio hori hartzaile guztien artean partituko da kasuko banatze arauen arabera.

Aurreko idatz-zatian xedatu dena umezurtz pentsioei ere aplikatuko zaie, haien hartzailea guraso bien umezurtza bada. Kasu horretan, umezurtz pentsioa kobratzeko eskubidea umezurtz batek baino gehiagok badute, gutxieneko pentsioaren zenbatekoa umezurtz pentsioen hartzaile guztien artean partituko da.

II. KAPITULUA. Erretiro pentsioak

II. KAPITULUA

1. Atala

Xedapen orokorrak

26. artikulua. Pentsioak sortzen dituen gertaera.

Kapitulu honetan arautzen diren pentsioak sortzen dituen gertaera da foru lege honen eraginpeko funtzionarioak erretiratzea.

Honako erretiro motak izanen dira:

a) Nahitaezkoa. Automatikoki deklaratuko da funtzionarioak erretiratzeko legez jarritako adina betetzen duenean, foru lege honetako 32. artikuluak ezartzen duen salbu-kasuarekin.

b) Borondatezkoa. Interesdunak hala eskatuta deklaratuko da, betiere foru lege honen 37. artikuluan eskatzen diren baldintzak betetzen baditu Nota de Vigencia.

c) Ezintasun iraunkorraren ondoriozkoa. Ofizioz edo interesdunak hala eskatuta deklaratuko da, foru lege honetan ohiko lanbiderako ezintasun iraunkor partzial eta erabatekoaren kasuetarako aurreikusten dena ezertan galarazi gabe.

27. artikulua. Erretiro pentsioak hartzeko eskubidearen baldintzak.

Funtzionarioek erretiro pentsioak hartzeko eskubidea sortuko dute baldin, norbere pentsio motarentzat eskatzen diren baldintza partikularrez gain, baldintza orokor hau betetzen badute: gertaera edo egoera babestua agitzen denean foru lege honetako eskubide pasiboen araubidean alta hartuta edo altaren balio berekotzat jotako egoera batean egotea.

Halaber, funtzionarioek erretiro pentsioak hartzeko eskubidea sortuko dute, baldin eta, foru lege honetako eskubide pasiboen araubidean altan edo balio bereko egoeran ez daudelarik ere, nahitaezko erretirorako eskatzen diren baldintzak betetzen badituzte.

28. artikulua. Altaren balio bereko egoerak.

Funtzionarioen honako administrazio egoerek izanen dute altaren balio bera: zerbitzu bereziak, eszedentzia berezia edo behin-behineko eginkizun-gabetzea.

Orobat, funtzionario bat interes partikularreko borondatezko eszedentzian edo eginkizunez gabeturik badago eta foru lege honetako 18. artikuluaren arabera eskubide pasiboen sistema honetan irautea hautatu badu, egoera hori ere altaren balio berekotzat joko da.

29. artikulua. Zerbitzu aitortuak.

1. Foru lege honetan arautzen den eskubide pasiboen sistemak agintzen dituenak betetzeko, honakoak hartuko dira zerbitzu urte aitortutzat:

a) Funtzionarioa Nafarroako Foru Komunitateko kasuan kasuko montepioan altan egondako urteak, kasuko administrazio publikoan zerbitzu aktiboan zegoelako.

b) Funtzionarioa eskubide pasiboen sisteman aurreko artikuluko lehen lerrokadan altaren balio berekotzat eman diren egoeretako batean egondako urteak.

c) Nafarroako kasuko administrazio publikoak funtzionarioari aitortu dizkion urteak, zerbitzuak aitortzeko araudiaren arabera.

d) Gizarte Segurantzako edozein araubide publikori edo haren ordezkori funtzionarioak kotizatukotzat aitorturik dituen urteak, baldin eta, kasua bada, zerbitzu aitortuak sorrarazi dituen lana ez bada administrazio publiko batean emandako zerbitzu baten aldi berean gertatu Nota de Vigencia.

e) Funtzionarioak, zerbitzu aitortuak izatea beste herrialde batzuetako Gizarte Segurantzaren ondorioetarako, Nafarroako administrazio publikoen montepioetako araubideak aplika dezakeen nazioarteko hitzarmen edo erregelamendu bat dagoenean horretarako, eta, betiere, nazioarteko bitarteko horietan eta kasuan aplikatu beharreko erregelamenduzko arauetan jasotako modu eta baldintzekin Nota de Vigencia.

2. Aurreko idatz-zatian agindutakoa gorabehera, funtzionarioa eginkizunez gabeturik behin-behineko egoeran badago eta gabetze hori irmotzen denean, egoera horretan egoten den aldia ez da kontatuko zerbitzu aitortuko alditzat ezaldia kalkulatzeari begira.

30. artikulua. Gizarte Segurantzako kotizazioak.

1. Foru lege honen eraginpeko funtzionarioek eskubidea izanen dute, beren eskubide pasiboen kontaketan Gizarte Segurantzako edozein araubidetan dituzten kotizazio aldiak sartzeko, betiere aldi horiek ez bazaizkie gainkatzen administrazio publikoei emandako zerbitzutzat aitortu diren beste batzuei.

2. Ez da kontatuko Gizarte Segurantzako edozein araubidetan funtzionarioek egindako kotizazio aldirik, baldin eta aldi horiek, beste gehiagorik badago haiek ere gehiturik, araubide horietan pentsio eskubidea sortzen bazuten, salbu eta delako aldiek Zahartzaroko eta Elbarritasuneko Nahitaezko Aseguruaren (SOVI) prestazioak izateko eskubidea sortzen badute, orduan bai, kontatuko baitira.

2. Atala

Nahitaezko erretiroa

31. artikulua. Nahitaezko erretiroaren adina.

Nafarroako administrazio publikoetako funtzionarioen nahitaezko erretiroa ofizioz deklaratuko da hirurogeita bost urte betetzen dituztenean, hurrengo artikuluan ezartzen den salbu-kasuarekin.

32. artikulua. Zerbitzu aktiboko aldia luzatzea.

1. Nahitaez erretiratzeko adina bete eta funtzionario batek zerbitzu aktiboan gehiago iraun nahi badu, zilegi izanen du hala egitea gehienez ere hirurogeita hamar urte bete arte, non eta berariazko erretiro arauen mendeko lanpostu batean izendaturik ez dagoen.

2. Zerbitzu aktiboan gehiago iraun nahi duen funtzionarioak hala eskatu beharko dio, idatziz, lan egiten dueneko administrazio publikoari, hirurogeita bost urte beteko dituen eguna baino gutxienez bi hilabete lehenago, eta eskaera ezin izanen da ukatu, interesatuak adin baldintza bete ez edo eskaera epez kanpo aurkezten duenean baizik.

3. Funtzionarioak zilegi izanen du bere zerbitzu aktiboko aldiaren luzapena bukatzea lan egiten duen administrazio publikoari adieraziz zer datatan asmo duen adinagatik nahitaez erretiratzeko. Adierazpen hori nahitaez funtzionarioak eskatzen duen erretiro data baino gutxienez bi hilabete lehenago bidali beharko du.

4. Bere zerbitzu aktiboko aldia luzatzen duen funtzionarioari, nahitaezko erretirorako adina bete ondoren egoera horretan irauten duen aldia ere kontatuko zaio eskubide pasiboetarako, eta aldi horretan ez da inoiz zilegi izanen ezintasunaren zioz erretiratzeko prozedurarik hastea, non ez den lan istripu edo lan eritasun baten ondorioz.

33. artikulua. Gabealdia Nota de Vigencia.

Foru lege honen eraginpeko funtzionarioek nahitaezko erretiroko pentsioa jasotzeko eskubidea sortzeko, hamabost urteko kotizazioaldia izan beharko dute Nafarroako administrazio publikoetako montepioetan, eta haietatik gutxienez bi urte eskubidea sortu aurre-aurreko hamabost urteetan.

34. artikulua. Pentsioaren erregulazio oinarria.

1. Nahitaezko erretiroko pentsioaren erregulazio oinarria kalkulatzeko, 210ez zatituko dira pentsioa sortu aurre-aurreko ehun eta laurogei hiletako kotizazio oinarriak.

Aurreko lerrokadak aipatu duen oinarri kontaketa egiteko honako arauok hartuko dira aintzat, zeinen adierazpen matematikoa atal honetako bukaeran ageri den formula baita.

1.º. Pentsioa sortu aurreko hogeita lau hilabeteei dagozkien oinarriak balio nominalean kontatuko dira.

2.º. Gainerako kotizazio oinarriak gaurkotu eginen dira Kontsumoko Prezioen Indizeak Nafarroako Foru Komunitatean honako epe honetan izan duen bilakaeraren arabera: oinarri horiek dagozkion hiletik aurreko arauak aipatzen duen gaurkotu ezineko oinarrien aldia hasi aurre-aurreko hileraino.

24 180

U Bi +U Bj I25

Br= i=1 j=25 Ij

210

Irakurbidea:

Br= Erregulazio oinarria.

Bi= pentsioa sortu aurreko i-garren hileko kotizazio oinarria.

Bj= pentsioa sortu aurreko j-garren hileko kotizazio oinarria.

Ij= pentsioa sortu aurreko j-garren hileko Kontsumoko Prezioen Indizea.

j= 25, 26, ......, 180.

2. Erregulazio oinarria kalkulatzeko, ez dira kontuan hartuko kontaketa aldi horrez kanpoko hilabeteei dagozkien kopuruak, kontaketa aldian sartu baziren ere.

3. Erregulazio oinarria kalkulatzeko kontuan hartu behar den aldiko hiletatik bat edo batean ez zaionean kotizaziorik egin Nafarroako administrazio publikoaren kasuko montepioari, hutsune horiek, kalkulu hori egiteko baizik ez, kotizatu gabeko hilei dagozkien E mailako kotizazio oinarri gutxienekoez osatuko dira, non eta ez diren Gizarte Segurantzako edozein araubidetan kotizatutako aldiak, zeren, horretara, gizarte aurreikuspeneko sistema horren kotizazio oinarriak hartuko baitira aintzat.

Aurreko lerrokadak agintzen duenagatik ere, foru lege honetako eskubide pasiboen araubidean altan edo balio bereko egoeran egon gabe pentsioa sortzen duten funtzionarioei betiere E mailako kotizazio oinarri gutxienekoak hartuko zaizkie kontuan hutsuneok osatzeko.

35. artikulua. Pentsioaren zenbatekoa Nota de Vigencia.

Nahitaezko erretiro pentsioaren zenbatekoa zehazteko, oinarri arautzaileari kasuko portzentajea aplikatuko zaio, eskala honen arabera eta kotizazio urteak kontuan hartuta:

Erretiro pentsioa hirurogeita bost urte baino gehiagorekin jasotzen hasiz gero, oinarri arautzaileari aplikatu beharreko portzentajea hau izanen da: hirurogeita bost urte betetzez geroztik, pentsioaren gertaera eragilearen egunean kotizatu den urte oso bakoitzeko 100eko 100ari 100eko 2 gehiago batzearen emaitza, baldin eta une horretan interesdunak hogeita hamabost urteko kotizazioa frogatua badu. Interesdunak frogaturik ez badu hogeita hamabost urteko kotizazioa, aipatutako portzentaje gehigarri hori aplikatuko da, hirurogeita bost urte bete ondoren, kotizazio aldi hori frogatzen duen egunetik aurrera.

Aurreko paragrafoan ezarritakoaren arabera lortutako portzentaje gehigarria interesdunari oro har dagokionari batuko zaio, eta horren emaitza den portzentajea kasuko oinarri arautzaileari aplikatuko zaio, pentsioaren zenbatekoa zehazteko, zeina ez baita inola ere izanen foru lege honen 25. artikuluko 1. apartatuan ezarritako gehienekoa baino handiagoa.

Aitortutako pentsioaren zenbatekoa gehieneko horretara iristen bada portzentaje gehigarria aplikatu gabe edo soilik partzialki aplikatuta, interesdunak eskubidea izanen du, gainera, urtean zenbateko bat jasotzeko, unean-unean indarra duen gehieneko zenbatekoari pentsioaren zenbatekoa zehazteko erabili ez den portzentaje gehigarria aplikatuz lortutakoa, goragoko unitate gertuenera ekarrita. Zenbateko hori hilero sortuko da, hilabete amaieran, eta hamalau ordainketa eginen dira, baina zenbateko horren eta interesdunak aitortua(k) d(it)uen pentsioarena edo pentsioen zenbatekoaren batura ez da izanen, urtean, unean-unean indarra duen kotizazio oinarriaren gehienekoa, urtekoa, baino handiagoa.

Kotizazio urtetzat hartuko dira, eta hortaz aurreko lerrokadek agintzen dituztenetarako kontatuko, zerbitzu aitortuen denbora aldiak, borondatezko eszedentzian edo eginkizunez gabeturik dauden funtzionarioen kotizazio bereziei dagozkienak, eta Gizarte Segurantzako edozein araubidetan kotizatutakoak foru lege honetako 30. artikuluan agintzen denaren arabera.

36. artikulua. Bateraezintasunak Nota de Vigencia.

1. Erretiro pentsioa jasotzea eta pentsiodunaren lana bateraezinak izanen dira, artikulu honetan zehaztutako salbuespenekin eta baldintzekin.

Aurrekoa gorabehera, erretiroa hartzen dutenentzat pentsioa jaso eta lanaldi partzialeko lan bat izatea bateragarria izanen da, betiere Gizarte Segurantzaren arloan indarra duen araudian ezarritako baldintzekin. Egoera horretan dagoen bitartean, jasotzen duen pentsioari zenbateko bat kenduko zaio, hain zuzen, lanaldi osoan aritzen den pareko langile batekin alderatuta, pentsiodunaren lanaldiari aplikatu beharreko murrizketaren alderantzizko proportzioan.

2. Bateraezina da erretiro pentsioa jasotzea eta lanpostu bat betetzea sektore publikoan, Administrazio Publikoen zerbitzuko Langileen Bateraezintasunei buruzko abenduaren 26ko 53/1984 Legearen 1.1 artikuluko bigarren paragrafoan xedatutakoaren arabera ulertzen den moduan.

Aurrekoa gorabehera, bateraezintasun araubide horri lege horren 19. artikuluan eta bederatzigarren xedapen gehigarrian aurreikusitako salbuespenak aplikatuko zaizkio, bai eta lege horren beraren 5. artikuluan aurreikusitakoak ere, aldizkako ordainsaririk jasotzen ez denean hautetsi karguak betetzeagatik autonomia erkidegoetako legebiltzarretako edo toki korporazioetako kide gisa.

Era berean, apartatu honetan aipatzen den bateraezintasuna ez zaie aplikatuko osasun arloko lizentziadun emerituei.

3. Bateraezina izanen da, halaber, erretiro pentsioa jasotzea eta goi karguak betetzea, zehazki Estatuko Administrazio Orokorreko goi kargua betetzea arautzen duen maiatzaren 30eko 3/2015 Legearen 1. artikuluan eta Foru Komunitateko Administrazioko Gobernuko kideen eta goi kargudunen bateraezintasunak arautzen dituen azaroaren 4ko 19/1996 Foru Legearen 2. artikuluan jasotzen direnak.

4. Horrez gain, ezin izanen da erretiro pentsioa jaso administrazio, entitate edo instituzio publikoen edo haien menpeko erakunde eta enpresetako aurrekontuen kargura ordaintzen den beste edozein ordainsarirekin batera, salbu eta foru lege honetan aurreikusitako kasuetan. Ondorio horietarako, ulertuko da ordainsaria dela aldizka jasotzen den lansaria, edozein direla ere haren zenbatekoa eta izena.

5. Erretiro pentsioa jasotzea bateragarria izanen da norbere konturako lanak egitearekin, baldin eta horien urteko sarrerek, guztira, lanbide arteko gutxieneko soldata gainditzen ez badute urtean.

6. Aurreko apartatuetan jasotako kasu horiek salbu, hau da, erretiro pentsioa eta pentsiodunaren lana bateragarriak direnean kenduta, gainerakoetan kasuan kasuko pentsioa ez da jasoko bateraezina den lanpostua, kargua edo jarduera betetzen den bitartean, baina horrek ez du eraginik izanen errebalorizazioetan.

7. Erretiro pentsioa eta zahartze aktiboa.

Aurreko apartatuetan ezarritakoa ukatu gabe, erretiro pentsioa jasotzea, foru lege honen 26. artikuluko a) letran aurreikusitako kasuan, bateragarria izanen da pentsiodunak bere kontura nahiz besteren kontura edozein lan betetzearekin, Gizarte Segurantzaren arloan indarra duen araudian aurreikusitako modu eta baldintzetan.

8. Erretiroa hartzen duen funtzionarioak jakinarazi beharko dio Nafarroako Administrazio Publikoko Montepioari, pentsioa aitortu dionari, lanpostu, kargu edo jarduera ordaindua bete behar duela sektore publikoan edo pribatuan, lanean hasi aurretik jakinarazi ere, eta konpromisoa hartuko du geroago aurkezteko PFEZaren aitorpenaren kopia bat, kasuko ekitaldiari dagokiona.

3. Atala

Borondatezko erretiroa

37. artikulua. Beharkizunak Nota de Vigencia.

Funtzionarioak honako baldintzak betetzen dituenean, zilegi izanen da borondatezko erretiroa, berak hala eskatuta:

a) Hirurogei urte beteak izatea.

b) Hogeita hamabost urteko zerbitzu aitortuak izatea, foru lege honen 29. artikuluan aurreikusitakoarekin bat.

c) Nafarroako administrazio publikoetako montepioetan hamabost urtez kotizatu duela frogatzea, eta horietatik bi, gutxienez, eskubidea sortu aurre-aurreko hamabost urteetan.

38. artikulua. Pentsioaren erregulazio oinarria.

Borondatezko erretiro pentsioaren erregulazio oinarria finkatzeko, foru lege honetako 34. artikuluan nahitaezko erretirorako agindu dena hartuko da aintzat.

39. artikulua. Pentsioaren zenbatekoa.

1. Borondatezko erretiroko pentsioaren zenbatekoa erregulazio oinarriaren ehuneko 100ekoa izanen da pentsioa eskatu duen funtzionarioak hogeita hamabost urteko zerbitzu aitortuak dituenean.

2. Borondatezko erretiroa eskatu duen funtzionarioak foru lege honetako 37. artikuluan eskatzen diren baldintzak bete bai baina hogeita hamabost urte baino gutxiagoko zerbitzu aitortuak dituenean, aurreko idatz-zatian aipatu pentsio portzentajeak beheiti eginen dio, taula honetako koefiziente murriztaileak ezartzearen ondorioz Nota de Vigencia:

Hirurogei urte 0,65

Hirurogeita bat urte 0,72

Hirurogeita bi urte 0,79

Hirurogeita hiru urte 0,86

Hirurogeita lau urte 0,93

Pentsioaren urteko gehieneko zenbatekoak ezin izanen du inoiz ere gainditu Gizarte Segurantzako gehieneko pentsio orokorrerako ezartzen dena.

40. artikulua. Bateraezintasunak.

Borondatezko erretiroaren kasuetako bateraezintasunen araubidea foru lege honetako 36. artikuluan ezartzen dena izanen da.

4. Atala

Ezintasunaren ondoriozko erretiroa

1. Azpiatala

Xedapen orokorrak

41. artikulua. Lan istripua zer den.

Lan istriputzat hartzen da funtzionarioak izaniko zein ere gorputz lesio, baldin eta zerbitzu ematen ari zela izanikoa bada edo aritze horren ondorioz izanikoa.

Lan istriputzat zein kasu hartu behar diren erabakitzeko, Gizarte Segurantzan gai horren gainean indar duen araudia hartuko da aintzat.

42. artikulua. Lan eritasuna zer den.

Zerbitzuan aritzeagatik zenbait elementu edo gaik erasanik funtzionarioak bereganatu duen eritasuna hartuko da lan eritasuntzat.

Hartarako, Gizarte Segurantzako eremuan indar duen lanbide eritasunen zerrenda hartuko da aintzat.

43. artikulua. Lanaz kanpoko istripuak eta eritasun arruntak zer diren.

1. Lanaz kanpoko istriputzat hartuko da foru lege honetako 41. artikuluaren arabera lan istriputzat jotzen ez dena.

2. Eritasun arrunta dela juzgatuko da aurreko artikuluen arabera ez lan istripu ez lan eritasuntzat jotzen ez den osasunaren gorabehera.

44. artikulua. Ezintasun iraunkorra zer den.

1. Ezintasun iraunkorra: funtzionarioak, agindutako tratamendua eta alta medikoa hartu ondoren, murrizketa anatomiko edo funtzional larriak ageri dituen egoera, murrizketa horiek objektiboki finkatzeko modukoak eta behin betikotzat jotakoak badira, eta gutxitu edo are ezeztatu egiten badiote lanerako gaitasuna. Ezinduak lan gaitasuna berreskuratzeko aukera badago ere, horrek ez du galarazten kalifikazio hau, aukera hori ikuspuntu medikotik ez-ziurra edo luzera begirakoa bada.

Aurreko lerrokadan agindutakoa gorabehera, ezintasun iraunkorra emateko ez da beharrezkoa izanen alta medikoa behin betiko ondoreak geratu diren kasuetan.

Egoera ezintasun iraunkortzat joko ere da, maila batekoa zein bestekoa, funtzionario batek aldi bateko ezintasunaren gehieneko iraupena ahiturik (bi urte), hala ere osasun laguntzaren beharrean eta lanean ber-hasteko ezindurik dagoenean.

45. artikulua. Erretiroa ondorio dakarten ezintasun iraunkorraren mailak.

1. Erretiroa ondorio ekar dezaketen ezintasun iraunkorrak maila hauetan sailkatzen dira, zein ere arrazoi edo gertaeraren ondoriozkoa diren:

a) Ezintasun iraunkor osoa ohiko lanbiderako.

b) Ezintasun iraunkor erabatekoa edozer lanetarako.

c) Elbarritasun handia.

2. Ohiko lanbidetzat hartuko da, istripu kasuetan (lanekoak nahiz kanpokoak izan), funtzionarioak istripua izan zuenean aritzen zen lanpostua. Eritasun arrunt nahiz lanbidekoaren kasuetan, ezintasun prozedura hasi zenean funtzionarioa aritzen zen lanpostua.

3. Ohiko lanbiderako ezintasun iraunkor osotzat hartuko da funtzionarioa bere lanpostuko eginkizun guztiak edo funtsezkoenak egiteko ezintzen duena, betiere beste lan batean aritzeko gai bada.

4. Edozer lanetarako ezintasun iraunkor erabatekotzat hartuko da funtzionarioa edozein lanbide edo ofiziotarako ezintzen duena.

5. Elbarritasun handitzat hartuko da ezintasun iraunkorra duen funtzionario batek, galera anatomiko nahiz funtzionalen ondorioz beste pertsona baten laguntza behar duenean bizitzako eginbehar behinenetarako, hala nola janztea, mugitzea, jatea eta halakoak.

46. artikulua. Ezintasun mailen kalifikazioa.

1. Zilegi izanen da ezintasun iraunkorra deklaratzeko espedientea edonoiz hastea ofizioz, kasuko Nafarroako administrazio publikoko organo eskudunen ekimenez, edo interesatuak hala eskatuta. Ikuskapen Medikoak edo osasun laguntza eman zion medikuak ere izanen du zilegi ezintasun espedientea hasteko eskatzea, hartarako behar den ezintasun proposamena eginez.

2. Ezintasunak baloratzeko Nafarroako Mediku Epaimahaiak proposamen loteslea emanen du, finkatzeko zer ezintasun maila atzeman zaion eta zer arrazoik sortua den.

2. Azpiatala

Ezintasunaren ondoriozko pentsioen araubidea

47. artikulua. Pentsio eskubidearen baldintzak.

1. Ezintasun iraunkorraren ondoriozko pentsioa jasotzeko eskubidea sortzeko, beharrezkoa izanen da foru lege honetako 27. artikuluko lehenbiziko lerrokadak eskatzen duen baldintza orokorra betetzea.

2. Ezaldirik ez da eskatuko ezintasun iraunkorraren ondoriozko pentsioa jasotzeko eskubidea izateko.

48. artikulua. Erregulazio oinarria.

1. Eritasun arruntaren ondoriozko ezintasun iraunkorraren erretiro pentsioaren erregulazio oinarria finkatzeko, foru lege honetako 34. artikuluak nahitaezko erretiro pentsiorako agintzen duena hartuko da aintzat.

2. Lanaz kanpoko istripu baten ondoriozko ezintasun iraunkorraren erretiro pentsioaren erregulazio oinarria kalkulatzeko, 28z zatituko da funtzionarioak 24 hilabete naturaleko aldi etengabe batez izan dituen kotizazio oinarrien batura.

Aurreko lerrokadak aipatzen duen 24 hilabeteko aldi hori funtzionarioak berak hautatuko du pentsioa sortzen den egunaren aurre-aurreko zazpi urteen artetik.

Erregulazio oinarria kalkulatzeko aintzat hartzen den aldi horretan funtzionarioak Nafarroako administrazio publikoaren kasuko montepioari kotizatu gabeko hilabeterik agertzen bada, hutsune horiek, kalkulu hori egiteko baizik ez, kotizatu gabeko hilei dagozkien E mailako kotizazio oinarri gutxienekoez osatuko dira, non eta ez diren Gizarte Segurantzako edozein araubidetan kotizatutako aldiak, zeren, horretara, gizarte aurreikuspeneko sistema horren kotizazio oinarriak hartuko baitira aintzat.

3. Laneko istripu edo lanbide eritasun baten ondoriozko ezintasun iraunkorraren erretiro pentsioaren erregulazio oinarria kalkulatzeko 14z zatituko dira funtzionarioak pentsioa sortu aurre-aurreko hamabi hiletan Nafarroako edozein administrazio publikotatik jaso dituen lansari osoak, bai eta administrazio horren menpeko erakunderen batetik edo Nafarroako Foru Komunitateko beste edozein instituzio publikotatik.

Denbora tarte horretan aipatu instituzioetatik lansaririk jaso gabeko hilabeterik agertzen bada, hutsune horiek, erregulazio oinarria kalkulatzeko baizik ez, funtzionarioak Nafarroako administrazio publikoaren kasuko montepioan edo Gizarte Segurantzako edozein araubidetan izan dituen kotizazio oinarriez osatuko dira, eta, halakorik ezean, kotizatu gabeko hilabeteei dagozkien E mailako funtzionarioen kotizazio oinarri gutxienekoez.

Pentsio horren erregulazio oinarria finkatzeko, honako lansariak ez dira kontuan hartuko:

a) Gizarte Segurantzako araudian aurreikusten den moduan, zerbitzuagatik, bidaiak egiteagatik edo nahitaezko lekualdaketaren ondorioz bizilekuz aldatzeagatik, hautapen epaimahaietan parte hartzeagatik edo prestakuntza ikastaroak emateagatik egindako gastuen alderako ordainak.

b) Famili laguntza.

c) Aparteko orduen alderako konpentsazioa.

Idatz-zati honetan agintzen dena aplikaturik finkatzen den erregulazio oinarria gutxiagokoa ateratzen bada artikulu honetako lehen edo bigarren idatz-zatietan agintzen dena aplikaturik tokatuko litzatekeena baino, funtzionarioarentzat hobea dena hartuko da erregulazio oinarritzat.

49. artikulua. Ezintasun iraunkor osoaren prestazio ekonomikoak.

1. Ezintasun iraunkor osoagatiko erretiroari dagokion prestazio ekonomikoa bizi arteko pentsio bat izanen da, erregulazio oinarriaren ehuneko 55ekoa.

2. Ohiko lanbiderako ezintasun iraunkor osoagatik erretiratzen diren funtzionarioek, aurreko idatz-zatian aurreikusten den pentsioa jasoko dute, erregulazio oinarriaren ehuneko 20 gehituta, 55 urte betetzen dutenetik.

3. Ohiko lanbiderako ezindutzat jotzen diren funtzionarioek eskubidea izanen dute nahiago dutena hautatzeko: ezintasunaren erretiroa ala maila bereko beste lanpostu batean berrezartzea, eta, kasu horretan, osorik mantentzen zaizkie ezintasuna eman zaien lanpostuari zegozkion lansariak.

Funtzionarioak berrezartzea hautatzen badu, Nafarroako Foru Komunitateko kasuko administrazio publikoak behar den prozedurari hasiera emanen dio eta, hartarako lanpostu huts egokirik ez badago, erretiratu eginen du funtzionarioa, aurreko idatz-zatian aurreikusten den pentsioa esleiturik.

Beste lanpostu batean berrezarri behar den funtzionarioak luzenez hilabeteko epean hasi beharko du lanpostu horretan, berrezartzeko agintzen duen ebazpena ematen denetik. Horrela egin ezean, interes partikularreko borondatezko eszedentziaren egoerara pasako da.

4. Aurreko idatz-zatietan agindutakoa gorabehera, ezintasun iraunkor osoagatik erretiratu den funtzionarioari kotizazio urteengatik edo, hala badagokio, adinagatik, gehiagoko pentsio portzentajea badagokio idatz-zati horietan aurreikusten dena baino, handiagoko hori esleituko zaio.

Aurreko lerrokadan finkatu bezala kotizazio urteengatik tokatzen den pentsio portzentajea finkatzeko, funtzionarioa aldi bateko ezintasun egoeran egon zitekeen luzeneko denbora kontatuko da, egiazki hala egon ez bazen.

5. Ohiko lanbiderako ezintasunagatik erretiratu den funtzionarioak sektore pribatuan lanpostu bat eskuratzen badu, artikulu honetako lehen idatz-zatian aurreikusten den pentsioa jasoko du lanpostu horretan ari den bitartean.

50. artikulua. Ezintasun iraunkor erabatekoagatiko prestazio ekonomikoak.

Ezintasun iraunkor erabatekoagatiko erretiroari dagokion prestazio ekonomikoa bizi arteko pentsioa izanen da, erregulazio oinarriaren ehuneko 100ekoa. Foru lege honen 35. artikuluko bigarren lerrokadan zehaztu kasuetan portzentaje hori gainditu ahalko da.

51. artikulua. Elbarritasun handiagatiko prestazio ekonomikoak.

Elbarritasun handiaren mailako ezintasun egoerak aurreko artikuluan ezintasun iraunkor erabatekorako ezarri den pentsioa jasotzeko eskubidea sortuko du, ehuneko 50 gehituta, ezinduari laguntzen dion pertsona pagatu ahal izateko.

Ehuneko 50eko gehikuntza horri dagokion kopurua ez da kontatuko foru lege honetako 25. artikuluan aurreikusten den hasierako zenbatekoaren mugatzeari eta pentsio-gaurkotzeari begira.

52. artikulua. Ezintasunagatiko erretiro pentsioak osatzeko dirulaguntza.

Funtzionarioa ezintasun iraunkorragatik eta aldi bateko ezintasun egoeraren luzeneko epea ahitu gabe erretiratzen bada, eskubidea izanen du epe hori bete arte, kasuko pentsioaz gain, dirulaguntza bat ere jasotzeko epe hori ahituz gero pagatuko zitzaion kopurua osatzerainokoa, betiere ezintasun iraunkorraren pentsioa gutxiagokoa bada aldi bateko ezintasunaren prestazioa baino.

53. artikulua. Bateraezintasunak.

1. Ezintasun iraunkorraren bizi arteko pentsioa, zein ere ezintasun mailatakoa den, ezin baterako da sektore publikoan lanpostu, kargu edo eginkizun batean aritzearekin.

Pentsioa jasotzea eten eginen da funtzionarioa lanpostu horretan aritzen den denboran, baina balioberritzea galarazi gabe.

2. Aurreko idatz-zatian aurreikusten dena ezertan galarazi gabe, erabateko ezintasun edo elbarritasun handiko kasuen bizi arteko pentsioek ez dute galaraziko ezinduak bere egoerarekin batera ditzakeen beste jarduera batzuetan aritzea, irabazizkoak nahiz irabazi gabekoak izan, ez badiote bere lan gaitasunari aldaketarik sortzen errebisioari dagokionez.

3. Ezintasun iraunkorragatik erretiratu den funtzionarioa beharturik dago Nafarroako administrazio publikoaren kasuko montepioari aditzera ematera sektore publikoan lanpostu, kargu edo eginkizun batean aritzen dela, eta bai ere sektore pribatuan bere gain nahiz besterentzat edozein lan egiten badu.

3. Azpiatala

Ezintasunaren errebisioa

54. artikulua. Errebisatzeko prozedura.

1. Ezintasun deklarazioak honako arrazoi hauetako batengatik errebisatzen ahal dira ezinduak nahitaezko erretirorako adina betetzen duen arte:

a) Hobetu edo okerragotu delako.

b) Diagnostiko okerra egin zaiolako.

2. Zilegi izanen da ezintasun maila errebisatzeko espedientea ofizioz hastea nahiz interesatuak hala eskatuta eta Ezintasunak Baloratzeko Nafarroako Epaimahai Medikoak proposamen loteslea emanen du horri buruz.

55. artikulua. Errebisioaren eraginak.

Aurreko artikuluak aipatzen duen errebisioak hurrengo idatz-zatietan ezartzen diren eraginak izanen ditu:

a) Elbarri handi deklaratutako funtzionarioak, dela hobetu delako dela diagnostikoa okerra zelako, ezintasun iraunkor erabatekoan ber-sailkatzen bada, galduko du bere pentsioaren ehuneko 50eko gehikuntza, eratu den errebisio espedientearen gainean ebazpena eman den egunaren hurrengo hilabeteko lehenbiziko egunetik.

b) Elbarri handiaren edo ezintasun iraunkor erabatekoaren egoeran deklaratutako funtzionarioa, dela hobetu delako dela diagnostikoa okerra zelako, ezintasun iraunkor osoan ber-sailkatzen bada, aukera izanen du erretiro egoeran iraun ala beste lanpostu batean berrezarririk atzera funtzionario bihurtu nahi duen hautatzeko, foru lege honetako 49.3 artikuluan ezartzen den prozedurari jarraikiz eta artikulu horretako ondorioekin.

Zerbitzu aktiboan ber-hasi ezean, dela erretiroan irautea hautatu duelako, dela hark berrezartzea hautatu baina ezinezkoa izan delako, kasuari dagokion ezintasun iraunkor osoaren pentsioa jasoko du, errebisio espedientea ebatzi eta hurrengo hilabeteko lehenbiziko egunetik.

c) Ezintasun iraunkor partzialaren egoeran deklaratu funtzionarioak ezintasunik ez duela juzgatzen bada, dela hobetu delako dela diagnostikoa okerra zelako, ez du inolako diru kopururik itzuli beharrik izanen, eta elbarritzerik gabeko lesio iraunkorrak aitortzen bazaizkio, ezintasun partzialaren deklarazioagatik jaso zuen kalte-ordainak konpentsatuko dio lesio horiengatik jaso behar zuena.

d) Elbarri handi edo ezintasun iraunkor erabateko edo osoaren egoeran deklaratutako funtzionarioa, dela hobetu delako dela diagnostikoa okerra zelako, lanerako gaitzat ber-sailkatzen bada, atzera funtzionario bihurtu eta utzitako lanpostu berean hasiko da berriz, hutsik badago, edo izen bereko nahiz bertsuko beste batean, lansari berekin, lanpostu esleipena jakinarazten denetik hilabeteko epean.

Kalifikazio aldaketa diagnostiko oker baten ondoriozkoa izan bada, funtzionarioak eskubidea izanen du, gainera, pentsiotik jaso duenaren eta zerbitzu aktiboan egon balitz jasoko zuenaren arteko diferentzia jasotzeko, bost urteko mugarekin.

Funtzionarioa administrazioari egozteko moduko arrazoiengatik lanean ber-hasten ez den artean, eskubidea izanen du aitortuta zeukan pentsioa jasotzen segitzeko, non eta kalifikazio aldaketa diagnostiko oker baten ondoriozkoa izan ez den, zeren, horretara, eskubidea izanen baitu utzitako lanpostuko lansariaren beteko pentsioa jasotzeko.

Kalifikazio berrian lanerako gai deklaratutako funtzionarioak lehentasuna izanen du zerbitzu aktiboan ber-hasteko lanpostu erreserbarik gabeko funtzionarioen aurretik, eta behin ber-hasi denean, ez du gehiago kasuko pentsioa jasoko.

Kalifikazio aldaketa diagnostiko oker baten ondoriozkoa izan bada, lanean ber-hasi den funtzionarioak eskubidea izanen du eskubide pasiboen kontaketan erretiraturik egondako denbora ere sartzeko eta haren kotizazio oinarritzat zerbitzu aktiboan egon balitz tokatuko zitzaizkion oinarriak hartuko dira.

Funtzionarioa, berari egozteko moduko arrazoiengatik idatz-zati honetan ezartzen den epean ber-hasten ez bada zerbitzu aktiboan, interes partikularreko borondatezko eszedentziaren egoerara pasako da eta, betiere, pentsioa jasotzeko eskubidea galduko du.

Kalifikazioa aldaturik lanerako gai deklaratu den funtzionarioari ezintasun iraunkor partziala edo elbarritzerik gabeko lesio iraunkorrak aitortzen bazaizkio, ez zaio inolako kalte-ordainik pagatuko, non eta tokatzen zaion kalte-ordaina pentsio gisa jaso duen diru-kopurua baino gehiagokoa izan ez den, eta betiere foru lege honetako 63. artikuluak aurreikusten duena ezertan galarazi gabe.

e) Ezintasun iraunkorraren maila bat deklaratu zaion funtzionario bati kalifikazioa aldatu eta goragoko maila bat aitortzen bazaio, gaitza okerragotu edo diagnostikoa okerra zelako, kasuko pentsioaren seinalamenduak errebisio espedientea ebatzi eta hurrengo hilabeteko lehenbiziko egunetik izanen du eragina.

Kalifikazio aldaketa diagnostiko oker baten ondoriozkoa izan bada, funtzionarioak eskubidea izanen du espedientea ebatzi arte jasotakoaren eta aitortu zaion goragoko ezintasun mailan jaso beharko zuenaren arteko diferentzia jasotzeko, bost urteko mugarekin.

III. KAPITULUA. Ezintasun iraunkor partzial eta elbarritzerik gabeko lesio iraunkorren ondoriozko kalte-ordainak

III. KAPITULUA

1. Atala

Ohiko lanbiderako ezintasun iraunkor partziala

56. artikulua. Zer den.

Ohiko lanbiderako ezintasun iraunkor partzialtzat hartuko da osoa izateraino iritsi ez, baina funtzionarioari bere lanpostuan aritzeko gaitasun normala ehuneko 33 edo gehiagoan murrizten diona, lanpostuko eginkizun funtsezkoak egitea galarazi gabe.

Ezintasun iraunkor hori deklaratzeko, foru lege honetako 46. artikuluak agintzen duena hartuko da aintzat.

57. artikulua. Prestazioaren edukia.

Ohiko lanbiderako ezintasun iraunkor partzialaren prestazio ekonomikoa kopuru finkatuko diru-kopuru bat izanen da, ezintasun iraunkorraren hasburu izandako ezintasun aldi batekoa hasi aurreko hilabetean funtzionarioak zeukan kotizazio oinarriaren zenbatekoaren 24 hilerokoen adinakoa.

58. artikulua. Prestazioa jasotzeko eskubidearen baldintzak.

Aurreko artikuluan aurreikusten den kalte-ordainerako eskubidea izanen dute foru lege honetako 27. artikuluko lehen idatz-zatiko baldintza orokorra bete eta lan istripu edo lan eritasun batengatik ezintasun iraunkor partzialaren deklarazioa ematen zaien funtzionarioek.

59. artikulua. Zerbitzu aktiboan segitzeko eskubidea.

Kalte-ordain hori jasotzeak ez du galaraziko funtzionarioak zerbitzu aktiboan segitzeko duen eskubidea.

2. Atala

Elbarritzerik gabeko lesio iraunkorrak

60. artikulua. Zer diren.

Elbarritzerik gabeko lesio iraunkortzat hartuko dira 44. artikuluak agintzen duenaren arabera ezintasun iraunkor izatera iritsi ez, baina funtzionarioaren osotasun fisikoa murriztu edo aldatu egiten duten eta Gizarte Segurantzako eremuan hartarako indar duen baremoan ageri diren lesio, mutilazio eta deformazio behin betikoak.

Elbarritzerik gabeko lesio iraunkorrak finkatzeko, foru lege honetako 46. artikuluan aurreikusten dena hartuko da aintzat.

61. artikulua. Prestazioaren edukia.

Elbarritzerik gabeko lesio iraunkorren prestazio ekonomikoa kasuan-kasuan tokatzen den kopuru finkatuko diru kopurua izanen da, Gizarte Segurantzako eremuan indar duen baremoak xedatzen duenaren arabera.

62. artikulua. Prestaziorako eskubidearen baldintzak.

Aurreko artikuluan aurreikusten diren kalte-ordainak jasotzeko eskubidea izanen dute foru lege honetako 27. artikuluko lehen idatz-zatian eskatzen den baldintza orokorra bete, eta lan istripu edo lan eritasun batengatik elbarritzerik gabeko lesio iraunkorrak izanik alta medikoa hartu duten funtzionarioek.

63. artikulua. Ezintasun iraunkorraren prestazioekiko bateraezintasunak.

Elbarritzerik gabeko lesio iraunkorrengatik tokatzen diren kopuru jakineko kalte-ordainak ezin baterako dira ezintasun iraunkorrerako ezarri prestazio ekonomikoekin, salbu eta kalte-ordain horiek inolako loturarik ez dutenean ezintasuna eta haren maila deklaratzeko aintzat hartu diren gertaerekin.

64. artikulua. Zerbitzu aktiboan segitzea.

Elbarritzerik gabeko lesio iraunkorrengatik kalte-ordaina jasotzeak ez du galaraziko funtzionarioak zerbitzu aktiboan segitzeko eskubidea.

IV. KAPITULUA. Hiltzearen eta bizirik irautearen ondoriozko prestazioak

IV. KAPITULUA

1. Atala

Xedapen orokorrak

65. artikulua. Prestazioak sortzen dituen gertaera.

Kapitulu honetan jorratzen den prestazio eskubidea subjektu eskubide-sortzailea hiltzean sortuko da, salbu eta, umezurtz pentsioaren kasuan, gurasoa hil ondoan sortua denean hartzailea; orduan, eskubidea umearen jaiotegunean sortzen baita.

Hartarako, subjektu eskubide-sortzailea desagertzen denean, Gizarte Segurantzako eremuan indar duen araudia hartuko da aintzat.

66. artikulua. Subjektu eskubidesortzaileak.

1. Hiltzearen eta bizirik irautearen prestazioak jasotzeko eskubidea sortuko dute hiltzen direnean altan, balio berekotzat emandako egoeran, edo alta-ezekoan dauden funtzionarioek eta bai erretiro pentsiodunek ere.

2. Altan edo balio bereko egoeran dagoen funtzionarioa lan istripu edo lan eritasun batengatik hiltzen denean, tokatzen diren hiltzearen eta bizirik irautearen prestazioak jasotzeko eskubidea sortu ahal izateko, frogatu beharko da gertaera horietako batek ekarri duela heriotza; froga hori soilik onartu ahalko da, lan istripuen kasuan, istripuaren ondoko hiru urteetan gertatu denean heriotza; lan eritasunen kasuetan froga hori beti onartuko da, zenbat ere denbora iragan den.

67. artikulua. Ezaldia.

Subjektu eskubide-sortzailearen familiakoen eskubideak sortutzat emateko, ez da beharrezkoa izanen hark inolako ezaldirik betetzea.

68. artikulua. Eskubidedun ezezagunak edo ondoren sortutakoak biltzea.

1. Hiltzearen eta bizirik irautearen prestazioak seinalatu ondoren hildakoaren eskubidedun berriak agertzen badira, zer ere gertaeragatik den, eskubide pasibo berrien eragin ekonomikoak kasuko eskaera aurkeztu eta hurrengo hilabeteko lehenbiziko egunetik soilik hasiko dira, titular berriak aurreko titularren edo unean unekoen kontra jurisdikzio arrunteko organoen aurrean zilegi dituen egintzak ezertan galarazi gabe, ordu arte tokatzen zitzaizkion diru kopuruak erreklamatzeko.

Kasu horretan, hasiera batez haientzat seinalatu zen prestazioaren titularra edo titularrak beharturik egonen dira, aitortutako eskubide berrien ondorioz, eskubide berrion ondorio ekonomikoen datatik aurrera bidegabeki jasotako diru-kopuruak itzultzera.

2. Aurreko idatz-zatiak agintzen duena gorabehera, eta foru lege honetako 3. artikuluan arautu iraungi-data ezertan galarazi gabe, eskubideen titular berriari pagatuko zaio lehengo nahiz oraingo titularrek jaso zutenaren eta eskubidea sortzetik seinalamendu berriak ondorio ekonomikoak izan arteko aldian hari tokatu ahal izanen zitzaionaren arteko diferentzia, halako diferentziarik baldin bada.

2. Atala

Alargun pentsioak

69. artikulua. Aurreikusitako pentsio eskubidearen baldintzak.

1. Pentsio-sortzailea hil ondoko ezkontide biziak izanen du eskubidea alargun pentsioa jasotzeko, non eta foru lege honetako 73. artikuluak aurreikusten dituen iraungitze arrazoietako bat gertatzen ez den.

Foru lege honek agintzen dituenetarako, ezkontide alarguntzat hartuko da bikote egonkor batetik bizirik dirauen kidea, Bikote egonkorrentzako berdintasun juridikoari buruzko uztailaren 3ko 6/2000 Foru Legeak aurreikusten duen moduan.

2. Bikotea bereizi edo dibortziatzen denean, edo bizikidetza egonkorra amaitzen duenean, alargun pentsioa kobratzeko eskubidea izanen du ezkontide legitimoa edo bikotekide egonkorra denak edo izan denak, hildako pertsonarekin bizi izan den denboraren proportzioan, alde batera utzita zein izan ziren bereizi, dibortziatu edo bizikidetza egonkorra amaitzeko arrazoiak. Dena den, kasu horietan ez da alargun pentsiorako eskubiderik izanen baldin eta ezkontide edo bikotekide egonkorrari tratu txarrak ematearen ondoriozko kondena-epai bat badago; betiere, epai hori eman ondoren berriro elkarrekin bizitzeari ekin ez bazioten.

70. artikulua. Erregulazio oinarria.

Bizi arteko alargun pentsioaren erregulazio oinarria finkatzeko honako arauak segituko dira:

a) Pentsio-sortzailea, hiltzean, altan, horren balio berekotzat emandako egoeran edo ez-alta egoeran bazegoen, eta heriotza lan istripu edo lan eritasun batengatik ez bada izan, erregulazio oinarria finkatzeko 28z zatituko da pentsio-sortzaileak 24 hilabete natural etengabeko aldi batean izan dituen kotizazio oinarrien batura.

Aurreko lerrokadak aipatzen duen 24 hilabeteko aldi hori hartzaileak hautatuko du, pentsioa sortzen den egunaren aurre-aurreko zazpi urteen artetik.

Erregulazio oinarria kalkulatzeko aintzat hartzen den aldian pentsio-sortzaileak Nafarroako administrazio publikoaren kasuko montepioari kotizatu gabeko hilabeterik agertzen bada, hutsune horiek, kalkulu hori egiteko baizik ez, kotizatu gabeko hilei dagozkien E mailako kotizazio oinarri gutxienekoez osatuko dira, non eta ez diren Gizarte Segurantzako edozein araubidetan kotizatutako aldiak, zeren, horretara, gizarte aurreikuspeneko sistema horren kotizazio oinarriak hartuko baitira aintzat.

b) Pentsio-sortzailea hiltzen denean altan edo balio berekotzat emandako egoeran baldin badago eta heriotza lan istripu edo lan eritasun baten ondorioz gertatu bada, erregulazio oinarria finkatzeko 14z zatituko dira funtzionarioak hil aurre-aurreko hamabi hiletan Nafarroako edozein administrazio publikotatik, haren menpeko erakunderen batetik edo Nafarroako Foru Komunitateko beste edozein instituzio publikotatik jaso dituen lansari osoak, salbu eta foru lege honetako 48. artikuluko hirugarren idatz-zatikohirugarren lerrokadan aipatzen diren lansariak.

Denbora tarte horretan funtzionarioak aurreko lerrokadan aipatu instituzioetatik lansaririk jaso gabeko hilabeterik agertzen bada, hutsune horiek, erregulazio oinarria kalkulatzeko baizik ez, funtzionarioak Nafarroako administrazio publikoaren kasuko montepioan edo Gizarte Segurantzako edozein araubidetan izanen zituen kotizazio oinarriez osatuko dira, eta, halakorik ezean, kotizatu gabeko hilabeteei dagozkien E mailako funtzionarioen kotizazio oinarri gutxienekoez.

Hortik ateratzen den erregulazio oinarria gutxiagokoa bada a) araua aplikaturik ateratzen dena baino, erregulazio oinarria finkatzeko, erregulazio oinarritzat alargun pentsioaren hartzailearentzat hobea dena hartuko da.

c) Pentsio-sortzailea erretiro pentsioduna bada, erregulazio oinarria hasierako pentsioa finkatzeko hartu zen oinarri bera izanen da, pentsioa aitortu zenetik iraungi zen arte zegozkion balio-gehikuntzak aplikaturik.

71. artikulua. Pentsioaren zenbatekoa.

1. Alargun pentsio bizi artekoaren zenbatekoa finkatzeko, pen- tsio-sortzailearen kotizazio urteengatik tokatzen den pentsio portzentajea hartuko da aintzat, honako arauen arabera:

1. 20 kotizazio-urteraino, ehuneko 40ko portzentajea.

2. 20tik goitiko kotizazio-urte bakoitzeko, portzentaje hori ehuneko 1ean gehituko da, gehienez ehuneko 55 osatu arte, 35 kotizazio-urterako, hain zuzen.

2. Hala ere, alargun pentsioaren zenbatekoa erregulazio oinarriaren ehuneko 40koa izanen da baldin eta pentsio-sortzaile berari loturiko alargun pentsiodunak eta umezurtz pentsiodunak badaude aldi berean.

3. Aurreko lerrokadetan aipaturiko ehunekoak Gizarte Segurantzaren araubidean une bakoitzean indarra dueneraino automatikoki handituko direla joko da, bai egitate sortzaileari bai ondorengo gehikuntzei dagokienez.

72. artikulua. Bateraezintasunak.

Sortzaile batetik baino gehiagotik heldu diren alargun pentsioak ezin baterako dira elkarrekin, eta hartzaileak haietako bakar bat hautatu beharko du.

73. artikulua. Pentsioa iraungitzea.

Alargun pentsioak honakoetako arrazoi batengatik iraungiko dira:

a) Epai irmo batek deklaratu duelarik hartzaileak pentsio-sortzailearen heriotzan errua izan duela.

b) Heriotza.

74. artikulua. Pentsioaren gehiagotzea.

1. Alargun-pentsioa jasotzen duen ezkontide dibortziatu bat berriz ezkontzen bada eta beste ezkontide alargun bat badago, berriz ezkondu denak aitorturik zeukan pentsio zatia bigarren horren pentsioari erantsiko zaio.

2. Alargun pentsioaren titularra den ezkontide dibortziatua hiltzen denean, gehiagotzerako eskubidea duen umezurtzik ez dagoelarik, ezkontide horrek esleiturik zeukan zatia, ezkontide alarguna dagoelarik, hari erantsiko zaio.

3. Atala

Umezurtz pentsioak

75. artikulua. Pentsio eskubidea izateko baldintzak.

1. Zurztasun pentsioa berdintasunez jasotzeko eskubidea izanen dute kausatzailearen seme-alaba guztiek, haien filiazioa edozein dela ere, kautsatzailea hiltzen denean hogeita bat urte baino gutxiago dutenek, betiere Nota de Vigencia.

2. Umezurtzak besteren edo norbere konturako irabazizko lanik betetzen ez badu, edo, betetzen badu ere, urtean lortzen dituen sarrerak, bai lanetik bai prestazioetatik (langabezia, aldi baterako ezintasuna, haurdunaldiko arriskua, edoskitze naturala edo gurasotasuna), unean-unean ezarrita dagoen lanbide arteko gutxieneko soldataren zenbatekoa baino apalagoak badira urtean, zurztasun pentsioaren onuradun izan daiteke, baldin eta kausatzailea hiltzen den unean hogeita bost urte baino gutxiago badu.

Umezurtza ikasten ari baldin bada eta ikasturtean zehar betetzen baditu hogeita bost urte, zurztasun pentsioa jasotzen segituko du, hurrengo ikasturtea hasi ondoko lehen hilabeteko lehen egunera bitarte Nota de Vigencia.

3. Pentsio-sortzailearen seme-alabek, halaber, umezurtz pentsioa hartzeko eskubidea izanen dute, edozein adin dutela ere, baldin eta pentsio-sortzailea hiltzen denean beren lan gaitasuna murrizturik badaukate ezintasun iraunkor erabatekoaren edo elbarritasun handiaren mailan.

4. Halaber umezurtz pentsioa jasotzeko eskubidea izanen dute ezkontide biziak lehendik zituen seme-alabek, baldin eta baldintza orokorrez gain beste baldintza berariazko hauek betetzen badituzte:

a) Ezkontza hura pentsio-sortzailea hil baino gutxienez bi urte lehenago egina izatea.

b) Frogatzea pentsio-sortzailearekin eta haren kontu bizi zirela.

d) Gizarte aurreikuspeneko beste sistema batean pentsio eskubiderik ez izatea, eta legeria zibilak hala aginduta haiei mantenua emateko modua eta obligazioa duen beste ahaiderik ez gelditzea.

76. artikulua. Pentsioaren zenbatekoa.

1. Umezurtz bakoitzarentzako umezurtz pentsioa pentsio-sortzailearen erregulazio oinarriaren ehuneko 20koa izanen da. Oinarri hori kalkulatzeko foru lege honetako 70. artikuluan aipatzen diren arauak erabiliko dira.

2. Aurreko idatz-zatian ezarri den portzentajeari, 71. artikuluko bigarren idatz-zatian alargun pentsiorako ezartzen den portzentajea erantsiko zaio baldin pentsio-sortzailea hiltzean ezkontide bizirik gelditzen ez bada edo alargun pentsiorako eskubidea duen ezkontide bizia pentsioa hartzen ari zela hiltzen bada.

Pentsiorako eskubidea duen umezurtz bat baino gehiago badago, gehikuntza hainbanatu eginen zaie.

3. Alargun pentsioaren hartzaile titular bat baino gehiago egon eta haietako bat hiltzen denean, hari esleitu zitzaion pentsio zatia umezurtz pentsioa hartzeko eskubidea duten seme-alabei emanen zaie, eta, halakorik ezean, gainerako umezurtzei, 71. artikuluko bigarren idatz-zatiak agintzen duena aplikatzea ezertan galarazi gabe.

Aurreko lerrokadan aipatzen den kasuan, ezkontideetako bat pentsio-sortzailea baino lehen hil bada, hari tokatuko zitzaiokeen pentsio zatia haren umezurtzei esleituko zaie.

4. Umezurtz pentsioak alargun pentsioaren portzentajeaz gehitu eta hartzaileetako edozeinek umezurtz pentsioa hartzeko eskubidea iraungitzen bada, bere denboran tokatuko zitzaiokeen alargun portzentajearen zatia gainerako hartzaileen umezurtz pentsioari erantsiko zaio.

5. Umezurtz pentsioei alargun pentsioaren portzentajea eranstea zilegi izanen da soilik pentsio-sortzaileetako batengandik heldu diren pentsioei aplikatuta.

6. Hartzaile batek berak aitak eta amak sortutako umezurtz pentsio bana hartzen baditu, gurasoetako batek sortutako pentsioari baizik ez zaio aplikatuko foru lege honetako 25. artikuluko bosgarren idatz-zatian pentsio horren gutxieneko zenbatekoaz eman den xedapena.

7. Zilegi izanen da sortzaileetako bakoitzak sortutako umezurtz pentsioa kasuko erregulazio oinarriaren ehuneko 100erainokoa izatea.

8. Alargun eta umezurtz pentsioen batura ez da izanen pentsio horiek finkatzeko erabili den erregulazio oinarria baino gehiagokoa, foru lege honetako 25. artikuluan pentsio horien gutxieneko zenbatekoaz eman den xedapena ezertan galarazi gabe.

Baldin eta delako muga hori aplikatu behar izan bada eta hartzaileetako edozeini pentsio horiek hartzeko eskubidea iraungitzen bazaio, berriz kalkulatuko dira gainerako hartzaileei tokatzen zaizkien pentsioen zenbatekoak, guztien baturak aipatu muga hori iristen duen arte.

77. artikulua. Bateragarritasuna.

1. Zilegi izanen da aitak eta amak hartzaile bakar baten alde sortutako umezurtz pentsioak bateratzea.

2. Zilegi izanen da hogeita bat urte baino gutxiago dituzten edo lan gaitasuna ezintasun iraunkor erabatekoaren edo elbarritasun handiaren mailan murrizturik daukaten hartzaileen umezurtz pentsioak bateratzea ezkontide biziaren edo umezurtzaren beraren edozein lan irabazirekin, eta bai, hala tokatzen bada, ezkontide biziak jasotzen duen alargun pentsioarekin Nota de Vigencia.

3. Hogeita bat urte baino gehiagoko onuradunen zurztasun pentsioa, ezintasunik ez dutenena, bateragarria izanen da bizirik iraun duen ezkontidearen edo umezurtzaren beraren edozein lan errentarekin, foru lege honen 75. artikuluko bigarren apartatuan aipatzen diren baldintzetan, bai eta hark jasotzen duen alargun pentsioarekin ere, kasua bada Nota de Vigencia.

4. Beren lan gaitasuna ezintasun iraunkor erabatekoaren edo elbarritasun handiaren mailan murrizturik daukaten umezurtzek, umezurtz pentsioa jasotzeko eskubidea izan eta ezintasun berarengatik gizarte aurreikuspeneko edozein sistematako beste pentsio bat jasotzen badute, zilegi izanen dute bata ala bestea aukeratzea.

78. artikulua. Pentsioaren pagamendua.

Umezurtz pentsioa honela pagatuko da:

a) Hemezortzi urte baino gutxiagoko hartzaileen kasuan, haien ardura duen pertsonari pagatuko zaio, umezurtzok mantendu eta hezitzeko obligazioa betetzen badu.

Adingabekoak babesteko ardura duen entitate publikoak egiaztatzen badu umezurtz hori babesik gabe dagoela legeek ezarritako babes eginbideok bete ez edo eskas betetzen direlako, pentsioa adingabekoen zaintza eman zaionari pagatuko zaio, Kode Zibilean agintzen den moduan.

b) Hemezortzi urte baino gehiagoko hartzaileen kasuan, zuzenean hartzaileari pagatuko zaio, non eta judizialki ezgaitua ez dagoen, zeren, horretara, aurreko lerrokadan xedatu den bezala pagatuko baita pentsioa.

79. artikulua. Pentsioa noiz eten.

1. Behin foru lege honetako 25. artikuluko bigarren idatz-zatian aipatu kasuan umezurtz pentsioa jasotzeko eskubidea aitortu delarik, eskubide hori eten eginen da hartzaileak lan kontratu bat sinatu badu edo aurrerakoan sinatzen badu, edozein modalitatekoa, edo bere konturako lan batean aritzen bada edo langabezi, aldi baterako ezintasun, haurdunaldiko arrisku, edoskitze natural edo gurasotasuneko prestazioa jasotzen badu, betiere kontratu, jarduera edo prestazio horretatik sortzen diren dirusarrerak, urteko, lanbide arteko soldata gutxienekoa baino gehiagokoak badira. Eteteko arrazoia gertatu eta biharamunean izanen ditu ondorioak etendurak Nota de Vigencia.

2. Aurreko apartatuan aurreikusitakoa aplikatuko da, halaber, hogeita bat urte bete aurretik ere zurztasun pentsioa jasotzen denean eta umezurtzak besteren nahiz norbere konturako lan bat betetzen duenean edo prestazio bat jasotzen duenean, baldin eta sarrerak apartatuan adierazten den gehieneko zenbatekoa baino handiagoak badira. Horrelakoetan, etendurak ondorioak izanen ditu umezurtzak hogeita bat urte betetzen dituenean Nota de Vigencia.

80. artikulua. Pentsioa berreskuratzea.

1. Pentsioa jasotzeko eskubidea berreskuratu eginen da lan kontratua iraungi, bere konturako jarduera utzi edo, hala tokatzen bada, langabezi, aldi baterako ezintasun, haurdunaldiko arrisku, edoskitze natural edo gurasotasuneko prestazioa bukatzen denean edo, jarduera batean aritzen edo prestazio bat jasotzen segitzen badu, batetik zein bestetik heldu diren dirusarrerak ez direnean aurreko artikuluko lehen idatz-zatiko muga baino gehiagokoak Nota de Vigencia.

2. Pentsio-berreskuratze horrek lan kontratua iraungi, jardueratik gelditu edo kasuko prestazioa jasotzen bukatu eta biharamunetik izanen du eragina, edo haietako edozeinengatik jasotzen diren dirusarreren zenbatekoa aldatu eta biharamunetik.

81. artikulua. Pentsioa iraungitzea.

1. Umezurtz pentsioa hartzaileari buruzko honako arrazoiengatik iraungi daiteke:

a) Umezurtz pentsioa jaso ahal izateko kasuan-kasuan ezarrita dagoen gehieneko adina betetzea, non eta une horretan bere lan gaitasuna ezintasun iraunkor erabatekoaren edo elbarritasun handiaren mailan murrizturik ez daukan.

b) Pentsioa jasotzeko eskubidea ematen zion ezintasuna desagertzea.

c) Ezkontzea.

d) Hiltzea.

4. Atala

Familiakoentzako pentsioak

82. artikulua. Pentsio eskubidearen baldintzak.

1. Pentsio horren hartzaile izanen dira, hildakoak ezkontide bizirik edo umezurtz pentsiorako eskubidedun seme-alabarik utzi ez badu ondotik, pentsio-sortzailearen familiakoak, ondorengo puntuetan zehazten direnak, baldin eta sortzailea edo, hala tokatzen bada, haren ondotik bizitako ezkontidea hiltzean kasuan kasuan aipatzen diren baldintza guztiak betetzen badituzte.

1) Haren bilobak eta senideak:

a) Hemezortzi urte baino gutxiagokoak, edo gehiagokoak baldin eta lan gaitasuna ezintasun iraunkor erabatekoaren edo elbarritasun handiaren mailan murrizturik badaukate.

Pentsio-sortzailearen biloba edo senide batek irabazizko lanik egiten ez badu, edo haren irabaziak urteko _bere konturako nahiz besterentzako lanekoak izan, edo langabezi, aldi bateko ezintasun edo amatasunekoak izan_ Lanbidearteko Soldata Gutxienekoaren ehuneko 75 baino gutxiagokoak badira, zilegi izanen du familiakoentzako pentsioa hartzea, betiere baldin eta pentsio-sortzailea hiltzean hogeita lau urte baino gutxiago baditu.

Pentsio-sortzailearen biloba edo senideak aurreko lerrokadan aipatu muga baino gehiagoko irabaziak baditu, pentsioa jasotzeko eskubidea foru lege honetako 79 eta 80. artikuluetan xedatzen denaren mende egonen da.

b) Aitarik eta amarik gabeko umezurtzak.

c) Pentsio-sortzailearekin edo ezkontide biziarekin eta haren kontu bizi izan badira hura hil baino gutxienez bi urte lehenagotik.

d) Beren bizibiderik ez badute eta legeria zibilaren arabera haiei mantenua emateko modua eta obligazioa duen beste ahaiderik gelditzen ez bazaie.

2) Gurasoak eta aitona-amonak.

a) Hirurogei urte edo gehiagoko adinekoak, edo, bestela, lan gaitasuna murrizturik daukatenak, baldin eta ezintasun iraunkor erabatekoaren edo elbarritasun handiaren mailakoa bada gaitasunaren murrizketa.

b) Lehenbiziko puntuko c) eta d) idatz-zatietako baldintzak betetzen dituztenak.

2. Halaber, pentsio eskubidea izanen ere dute, hildakoak ezkontide bizirik edo umezurtz pentsiorako eskubidedun seme-alabarik utzi ez badu, pentsio-sortzailea edo halakorik bada ezkontide bizia hiltzean honako baldintza guztiak betetzen dituzten pentsio-sortzailearen seme-alaba edo senideek:

a) 45 urte baino gehiagokoak izatea.

b) Ezkongai, alargun edo dibortziatuak izatea.

c) Pentsio-sortzailearekin edo halakorik bada ezkontide biziarekin eta haren kontu bizi izandakoak izatea, hura hil baino gutxienez bi urte lehenagotik, luzaro zaindu dituztela frogatzen badute.

d) Beste bizibiderik izan ez eta legeria zibilaren arabera haiei mantenua emateko modua eta obligazioa duen beste ahaiderik gelditzen ez bazaie.

83. artikulua. Erregulazio oinarria.

1. Pentsio-sortzailearen alargunik edo umezurtz pentsiorako eskubidedun seme-alabarik ez dagoelako, pentsio-sortzailea hiltzean familiakoentzako pentsioa aitortzen denean, haren erregulazio oinarria finkatuko da foru lege honetako 70. artikuluak alargun pentsioetarako ezartzen duen moduan.

2. Aldiz, familiakoentzako pentsioa kasuko alargun pentsioa edo umezurtz pentsioa iraungitakoan aitortzen bada, aurreko lerrokadak agindu bezala kalkulatu den erregulazio oinarriari pentsio horiek aitortzetik iraungi arte izanen zituzketen balio-gehikuntzak aplikatuko zaizkio.

84. artikulua. Pentsioaren zenbatekoa.

Familiakoentzako pentsioaren zenbatekoa haietako bakoitzarentzat erregulazio oinarriaren ehuneko 20koa izanen da.

85. artikulua. Bateraezintasunak.

Familiakoentzako pentsioak ezin baterako dira gizarte aurreikuspeneko beste edozein sistemaren pentsioekin.

Familiakoentzako pentsioaren hartzaileak beste pentsio bat jasotzen badu, bata ala bestea hautatu beharko du.

86. artikulua. Pentsioaren pagamendua.

Familiakoentzako pentsioak foru lege honetako 78. artikuluak umezurtz pentsioa pagatzeko xedatu irizpideekin bat pagatuko dira.

87. artikulua. Pentsioa iraungitzea.

1. Foru lege honetako 82. artikuluko lehen idatz-zatiko 1. puntuan aipatzen den biloben eta senideentzako pentsioa, 81. artikuluan umezurtz pentsiorako aipatzen diren arrazoiengatik iraungiko da.

2. Familiakoentzako pentsioa, gainerako kasuetan, hartzailea hiltzean edo pentsioa aitortzeko eskatu ziren baldintzetako bat ez betetzean iraungiko da.

Lehenbiziko xedapen gehigarria. Gizarte Segurantzako araubide orokorrean eta Estatuaren klase pasiboetan afiliatu langileen nahitaezko erretiroa.

1. Nafarroako administrazio publikoen funtzionarioak Gizarte Segurantzako araubide orokorrean afiliaturik badaude, foru lege honetako 31 eta 32. artikuluetan ezarri nahitaezko erretiroko araubidearen mende egonen dira.

2. Nafarroako administrazio publikoen funtzionarioak, Estatuaren klase pasiboen araubidean afiliaturik badaude, hartan nahitaezko erretirorako ezarrita dauden arau berariazkoen mende egonen dira.

Bigarren xedapen gehigarria. Eskubide pasiboen sistema honek indar hartu baino lehenagoko kotizazio aldiak nola tratatu.

Foru lege honetako eskubide pasiboen sistemaren arabera pentsioak seinalatzeko, erregulazio oinarria kalkulatzeko kontuan hartu behar badira sistema honen aurreko eskubide pasiboen sistemaren arabera kotizatutako aldiak, Nafarroako administrazio publikoen montepioek, funtzionarioek aldi horietan izandako lansari benetakoak oinarri, finkatuko dute zer kotizazio oinarri tokatzen diren, Gizarte Segurantzako araubide orokorrean aldian-aldian indar duten kotizazio arauak aplikatuz.

Foru lege honetako eskubide pasiboen sistemak indar hartu baino lehenagoko denbora tarteetan kasuko montepioari edo Gizarte Segurantzako araubideren bati kotizatu gabeko hilabeterik agertzen bada, hutsune horiek betetzeko, erregulazio oinarria kalkulatzeko baizik ez, Gizarte Segurantzako araubide orokorrean hemezortzi urtez goitiko langileentzat unean-unean dauden kotizazio oinarrietatik txikiena hartuko da aintzat.

Hirugarren xedapen gehigarria. Terrorismo egintzen ondoriozko pentsio bereziak.

Nafarroako Administrazio Publikoen montepioetako funtzionarioak terrorismo egintzaren baten biktima badira, pentsio bereziak sortzeko eskubidea izanen dute, Gizarte Segurantzaren arloan indarra duen arautegian ezarritakoaren arabera.

Laugarren xedapen gehigarria. Eskubideen transferentzia, Europako erkidegoen langileen aurreikuspen sozialeko sistemaren eta Nafarroako administrazio publikoen montepioen artean.

Aipatu montepioetako baten menpe egon diren langileen kasuan, Europako erkidegoen langileen aurreikuspen sozialeko sistemaren eta Nafarroako administrazio publikoen montepioen artean eskubideen transferentzia egiteari begira, Gizarte Segurantzaren arloan horretarako emandako arautegiari segituko zaio. Zehazki, Europako erkidegoen sistemari kasua bada transferitu beharreko eskubideen baliokide aktuariala kalkulatzeko, langile horiek kasuan kasuko montepioen menpe egon zirenean izan zituzten lansari benetakoetatik abiatuko da, eta kotizazio oinarriak eta pentsioak zehazteko, aldian-aldian Gizarte Segurantzaren Araubide Orokorrean indarra duten kotizazio eta jublilazio arauak hartuko dira kontuan.

Kotizazio hutsuneak integratzeari dagokionez, eskubideak transferitu behar diren kasuetan, Bigarren xedapen gehigarriko bigarren lerrokadan adierazitakoa aplikatuko da.

Bosgarren xedapen gehigarria. Alargun pentsioaren zenbatekoa finkatzeari buruzko arau berezia.

Foru lege honetako eskubide pasiboen sistemaren arabera sortutako alargun pentsioaren zenbatekoa eta, sortzaile berarengandiko umezurtz pentsiorik badago harena ere baturik, ez da gutxiagokoa izanen pentsio horretarako aurreko sistemaren arauak aplikaturik sortuko litzatekeena baino, foru lege honetako 25. artikuluan pentsioen hasierako zenbatekoaren mugei buruz xedatzen dena ezertan galarazi gabe.

Seigarren xedapen gehigarria. Eskubide pasiboetarako, apaiz edo bestelako erlijiolangile izandako funtzionarioei jarduera horien aldiak ere kontatzea.

Foru lege honek indar hartu ondoren Nafarroako administrazio publikoen montepioetan eskubide pasiboak sortzen dituzten funtzionarioei, eta bai lehenagotik montepio horietan erretiro pentsiodunak direnei ere, Eliza Katolikoko apaiz edo erlijio-gizon nahiz -emakume izan eta geroztik sekularizatu edo erlijio lanetik gelditu baziren, apaiz edo erlijio langile izandako aldiak ere aitortuko zaizkie eskubide pasiboen kontaketarako, Gizarte Segurantzako araudian aurreikusten den moduan.

Zazpigarren xedapen gehigarria. Nafarroako administrazio publikoen montepioetan sartutako funtzionarioen lansariak, pentsioa sortzen duen egintza gertatzen den hilabeteari dagozkionak Nota de Vigencia.

Nafarroako administrazio publikoen montepioetan sartutako funtzionario zerbitzu aktiboan ari direnek eskubidea izanen dute erretiratu diren hilabeteko lansari osoa jasotzeko.

Zerbitzu aktiboan zegoela hildako funtzionarioaren eskubidedunei, halaber, heriotza gertatu den hilabeteko lansari osoa pagatuko zaie.

Zortzigarren xedapen gehigarria. Nafarroako administrazio publikoen montepioetan eta eskubide pasiboen sistema berriaren pean dauden funtzionarioen famili laguntza.

Nafarroako administrazio publikoen montepioetan eta eskubide pasiboen sistema berriaren pean dauden funtzionarioek eskubidea izanen dute famili laguntzagatik tokatzen zaizkien diru kopuruak jasotzeko, Gizarte Segurantzaren eremuan indar duen araudiaren arabera.

Bederatzigarren xedapen gehigarria. Nafarroako administrazio publikoen montepioak.

Nafarroako administrazio publikoek euren kudeaketa arloan esleiturik dituzten montepioekiko eginkizun eta zerbitzuak betetzen segituko dute, eta ez dute zilegi izanen foru lege honek indar hartu baino lehen haietako bakoitzean indarrean zen eskubide pasiboen erregulazio araudia aldatzea.

Hamargarren xedapen gehigarria. Udal montepioen finantzaketa.

1. Nafarroako toki entitateek Nafarroako Udal Funtzionarioen Montepioko klase pasiboen urteroko kostu garbi osotarakoa finantzatuko dute, ehuneko 64,3 hain zuzen. Osotarako diru kopurua ez da inola ere 10.682.014 eurotik gorakoa izanen. 2002. urtetik aurrera, diru-muga horri kasuko ekitaldirako Nafarroako aurrekontu orokorrei buruzko foru legeak pentsioetarako finkatzen duen igoera aplikatuko zaio.

2. Iruña, Tafalla eta Tuterako udalek euren montepioko klase pasiboen urteroko kostu garbia finantzatuko dute, ehuneko 77,1ean. Osotarako diru kopurua ez da inola ere 9.312.961 eurotik, 454.520 eurotik eta 1.082.046 eurotik gorakoa izanen, hurrenez hurren. 2002. urtetik aurrera, diru-muga horiei kasuko ekitaldirako Nafarroako aurrekontu orokorrei buruzko foru legeak pentsioetarako finkatzen duen igoera aplikatuko zaie.

3. Aurreko kostu garbi osotarakoa finantzatzeko behar diren kopuru osagarriak Nafarroako aurrekontu orokorretatik hartuko dira.

Hamaikagarren xedapen gehigarria. Nafarroako administrazio publikoen montepioetan eta Gizarte Segurantzaren araubideetan kotizazioak batera konputatzea.

Nafarroako Gobernuari baimena ematen zaio Estatuarekin hitzarmen bat egin dezan, urtebeteko epean, Nafarroako administrazio publikoen montepioetako eta Gizarte Segurantzaren araubideetako kotizazioak batera konputatzeari begira.

Hamabigarren xedapen gehigarria. Lanbide jarduera arriskutsuak edo nekezak.

Foru lege honek indarra hartzen duenetik, Nafarroako administrazio publikoen montepioetan eskubide pasiboak izanik, lan arriskutsu edo nekezetan aritu diren funtzionarioei, foru lege honetan ezarritako erretiro-adinak beheratuko zaizkie. Beherapen hori kalkulatzeko, Gizarte Segurantzaren kasuko araubide berezietan finkatutakoaren arabera dagokien koefizientea aplikatuko zaio aipatu lan horietan aritu diren denborari, eta horrela ateratzen den tartea izanen da kenduko zaiena, betiere Gizarte Segurantzaren ziurtagiri bidez egiaztatzen bada.

Hamahirugarren xedapen gehigarria. Gizarte Segurantzako araubide orokorrean sartzearen negoziazioa.

Nafarroako Gobernuak nazioko Gobernuarekin negoziatuko du foru lege honek ezartzen duen sistema iragankorra Gizarte Segurantzako araubide orokorrean sartzea, erreferentzia gisa hartuz 1993an MUNPAL sartzeko baldintzak.

Hamalaugarren xedapen gehigarria. Azterketa batzordea.

Foru lege honek indarra hartu eta hiru hilabeteko epean, batzorde bat eratuko da, Nafarroako Gobernuaren eta funtzio publikoko sindikatuen ordezkariek osatua, zeinak honako gai hauek aztertu eta taxutuko baititu, ondoren arau moduan formulatuak izateko:

1. Katalogo bat sortzea, arrisku edo zailtasun bereziko lanbideena, 55 urtetik aurrerako erretiro aurreratua aplika dakiekeenena Nota de Vigencia.

2. Famili eta lan bizitza bateragarri egiteko neurri gisa lanaldia ehuneko 50 murrizten denean kotizazio oinarriaren ehuneko 100 mantentzeko formula taxutzea.

3. Foru lege honek indarra hartu aurretik eragindako pentsiorik baxuenetan egin beharreko balizko hobekuntzak zehaztea eta egoera argitzea.

Hamabosgarren xedapen gehigarria. Osasun laguntza Nota de Vigencia.

Iraungitzat deklaratzen da osasun laguntzako derrigorrezko estaldura, zeina Nafarroako Foru Diputazioak 1973ko abuztuaren 24ko Erabakiaren bidez onetsitako Osasun Laguntzako Zerbitzuaren Erregelamenduan ezarri baitzen, eta iraungitze horrek montepioetako funtzionarioak Osasun Sistema Nazionalean integratzen diren egunetik izanen du eragina.

Hamaseigarren xedapen gehigarria. Amatasunagatiko osagarria Nafarroako administrazio publikoen montepioetako funtzionarioen eskubide pasiboen sistemaren pentsioetan Nota de Vigencia.

Pentsiorako osagarri bat aitortuko zaie seme-alaba biologikoak edo adoptatuak izan dituzten emakumeei, nahitaezko erretiro pentsioen, ezintasun iraunkorrekoen edo alargun pentsioen onuradunak direnei, pentsio horiek Nafarroako administrazio publikoen montepioetako funtzionarioen eskubide pasiboen sistemakoak badira, Gizarte Segurantzaren arloan indarra duen araudian aurreikusitako moduan.

Hamazazpigarren xedapen gehigarria. Nafarroako Administrazio Publikoen zerbitzuko suhiltzaileen erretiro adina murrizteko koefizientea ezartzea Nota de Vigencia.

Suhiltzaile gisa zerbitzuak ematen dituzten langileei erretiro adina murrizteko koefizientea aplikatuko zaie, Gizarte Segurantzaren arloan indarra duen araudian aurreikusitako moduan.

Suhiltzaile lanpostua duten funtzionarioek, montepioen sistemaren menpe daudenek, eta murrizketa koefiziente hori ez aplikatzea aukeratu dutenek 2018ko Nafarroako Aurrekontu Orokorrei buruzko abenduaren 28ko 20/2017 Foru Legearen hamalaugarren xedapen gehigarrian ezarritako bi hilabeteko epean, koefizientea atzeraeraginez aplikatzea aukeratzen ahalko dute, dagozkion ekarpen ekonomikoei kalterik egin gabe, foru lege honek indarra hartu eta bi hilabeteko epean.

Era berean, edozein arau aldaketaren ondorioz dagoena baino baldintza hobea sortzen bada, erretiro adina murrizteko koefizientea aplikatzeari uko egin dionak hura aplikatzea hautatzen ahalko du atzeraeraginez, dagozkion ekarpen ekonomikoei kalterik egin gabe.

Hemezortzigarren xedapen gehigarria. Nafarroako Administrazio Publikoen zerbitzuko tokiko polizien erretiroadinaren murriztapenkoefizientea ezartzea Nota de Vigencia.

Nafarroako toki entitateetan tokiko polizia gisa zerbitzu ematen duten montepio-sistemaren araubideko langileei aplikatzen ahalko zaie erretiro-adinaren murriztapen-koefizientea, Gizarte Segurantzaren alorreko Toki Administrazioa osatzen duten entitateen zerbitzuko tokiko polizientzat erretiro-adinaren murriztapen-koefizientea ezartzen duen abenduaren 14ko 1449/2018 Errege Dekretuan ezarritako moduan.

Horretarako, pertsona interesdunak kasuko udal administrazioari urte bakoitzeko urtarrilaren 31 baino lehen jakinarazi beharko dio erretiroa hartzeko bide hau hautatzeko borondatea, 2019an izan ezik; urte honetan foru lege hau indarrean sartu eta hurrengo hilabetearen azken eguna baino lehen jakinarazi beharko da. Ulertuko da ezen, horrela, uko egiten diola foru lege honetan arauturiko borondatezko erretiro aurreratuko sistemari.

Baldin eta edozein arau-aldaketaren ondorioz gertatzen bada dagoena baino baldintza hobea sortzen dela, Gizarte Segurantzaren araudian erretiro-adina dela eta eraendutako murriztapen-koefizientea aplikatzeari uko egin dionak zilegi izanen du hura atzeraeraginez aplika dadin hautatzea, bidezkoak gerta litezkeen ekarpen ekonomikoak eragotzi gabe.

Hemeretzigarren xedapen gehigarria. Erretiro adina murrizteko koefiziente berriak ezartzea jarduera dela eta edo desgaitasuna tartean dela, Nafarroako administrazio publikoetako montepioetako funtzionarioen eskubide pasiboen sistemako pentsioetan Nota de Vigencia.

1. Nafarroako administrazio publikoetako montepioetako funtzionarioei aplikatuko zaizkie erretiroa hartzeko adina murrizteko edo, kasua bada, aurreratzeko koefizienteak, Gizarte Segurantzaren sistemak jarduera dela-eta ezar ditzaketenak eta aplikatzen ahal zaizkienak administrazio horietako funtzionarioei, sistema horretako araubide orokorrean sartuta daudenei.

Gizarte Segurantzak erretiro-adinaren murriztapen-koefizienteak edo aurrerapena ezarriko balu Foruzaingoarentzat, polizia kidego horretako montepio-sistemaren mendeko funtzionarioei aplikatzekoak izanen dira, kontuan hartuta Gizarte Segurantzaren araudi berariazkoa eta, kasua bada, aurreko xedapenean tokiko poliziarentzat aipatutako baldintzen antzekoak hartzea.

Nolanahi ere, arrisku edo zailtasun berezia duten lanbideen katalogoaren barruan 55 urtetik aurrera erretiro aurreratua aplikatzeko modukoak direnak aztertzeko lana egiten bada, eta ondoren arau bidezko formulazioa, azken horretan xedatutakoari helduko zaio.

2. Era berean, Nafarroako administrazio publikoetako montepioetako funtzionarioei, Gizarte Segurantzaren esparruan jasota egon eta erretiroa hartzeko adina murriztea edo aurreratzea ekar dezakeen desgaitasun bat dutenei, aplikatuko zaizkie erretiroa hartzeko adina murrizteko koefizienteak edo, kasua bada, adina murriztuko zaie erretirorako gutxieneko adina ezarriz, aurreikuspen sozialeko sistema horrek ezarri bezala.

3. Erretiro-adina murrizteko koefiziente berrien aplikazioa edo, kasua bada, adin horren murrizketa, jarduera edo desgaitasuna dela eta, aurreko apartatuetan aurreikusi bezala, Gizarte Segurantzaren arloan indarra duen araudian edo aplikatzekoa den lege arauan aurreikusitako modu eta baldintzekin eginen da

Lehenbiziko xedapen iragankorra. Erregulazio oinarria kalkulatzeko kotizazio aldiak pausoka aplikatu beharra.

Foru lege honetako 34. artikuluko lehen idatz-zatian xedatzen dena pausoka aplikatuko da, data sail honen arabera:

2000ko urtarrilaren 1etik aurrera, erretiro pentsioaren erregulazio oinarria honela kalkulatuko da: pentsioa sortu aurre-aurreko 96 hiletako kotizazio oinarriak zati 112.

2001eko urtarrilaren 1etik aurrera, erretiro pentsioaren erregulazio oinarria honela kalkulatuko da: pentsioa sortu aurre-aurreko 108 hiletako kotizazio oinarriak zati 126.

2002ko urtarrilaren 1etik aurrera, erretiro pentsioaren erregulazio oinarria honela kalkulatuko da: pentsioa sortu aurre-aurreko 120 hiletako kotizazio oinarriak zati 140.

2003ko urtarrilaren 1etik aurrera, erretiro pentsioaren erregulazio oinarria honela kalkulatuko da: pentsioa sortu aurre-aurreko 132 hiletako kotizazio oinarriak zati 154.

2004ko urtarrilaren 1etik aurrera, erretiro pentsioaren erregulazio oinarria honela kalkulatuko da: pentsioa sortu aurre-aurreko 144 hiletako kotizazio oinarriak zati 168.

2005eko urtarrilaren 1etik aurrera, erretiro pentsioaren erregulazio oinarria honela kalkulatuko da: pentsioa sortu aurre-aurreko 156 hiletako kotizazio oinarriak zati 182.

2006ko urtarrilaren 1etik aurrera, erretiro pentsioaren erregulazio oinarria honela kalkulatuko da: pentsioa sortu aurre-aurreko 168 hiletako kotizazio oinarriak zati 196.

2007ko urtarrilaren 1etik aurrera, erretiro pentsioaren erregulazio oinarria honela kalkulatuko da: arestian aipatu 34. artikuluko lehen idatz-zatian xedatzen dena oso-osorik aplikatuz.

Bigarren xedapen iragankorra. Funtzionarioek aurreko eskubide pasiboen sistemaren aplikazioa hautatzeko eskubidea.

1. Nafarroako administrazio publikoen montepioetan sartutako funtzionarioek epe bakar luzaezina izan dute, foru lege honek indar hartzen duen egunetik sei hilabete hain zuzen, legean ezartzen denaren aurreko eskubide pasiboen sisteman irautea hautatzeko, zein ere egoera administratibotan dauden.

Hala ere, foru lege honek indar hartzean zerbitzu berezietan, eszedentzia borondatezko, berezi edo nahitaezkoan edo eginkizunez gabeturik dauden funtzionarioek zilegi izanen dute haiek ere eskatzea foru lege honetan ezartzen denaren aurreko eskubide pasiboen sisteman irautea; zerbitzu aktiboan ber-hasten diren egunetik hilabeteko epean egin beharko dute eskaera.

2. Hautatzen dena hauta, ez da atzera egiterik izanen eta erabakiak funtzionario horiek sortzen duten edozein pentsio lotuko du.

Hirugarren xedapen iragankorra. Pentsiodunek aurreko eskubide pasiboen sistemaren aplikazioa hautatzeko eskubidea.

1. Nafarroako administrazio publiko montepioetan sartutako funtzionarioek, 2000ko urtarrilaren 1etik aurrera erretiratu badira eta pentsioa sortu zuten momentuan foru lege honetako eskubide pasiboen sistemak erretiroa iristeko eskatzen dituen baldintzak betetzen bazituzten, epe bakar luzaezina izanen dute, legeak indar hartzen duenetik sei hilabetekoa, beren pentsioa sistema honen arabera kalkula diezaieten hautatzeko.

Aurreko idatz-zatian ezarritako epea izanen dute, baita ere, Nafarroako administrazio publikoen montepioetan sartutako funtzionarioek sortutako pentsioak jasotzen dituztenek, baldin eta funtzionario horiek 2000ko urtarrilaren 1etik aurrera erretiratu edo, zerbitzu aktiboan egonda, hil badira, eta, betiere, pentsio horiek foru lege honen aurretik ezarritako eskubide pasiboen sistemaren arabera kalkulatu baziren.

2. 2000ko urtarrilaren 1etik aurrera erretiratu diren funtzionarioek, baldin eta pentsioa sortu zuten momentuan foru lege honetako eskubide pasiboen sistemak eskatzen dituen baldintzak betetzen ez bazituzten, baina foru lege honek indarra hartzen duenean betetzen badituzte, eskubidea izanen dute, aurreko zenbakian finkatu epearen barrenean, pentsioa sistema horren arabera kalkula diezaieten eskatzeko.

Foru lege honek indarra hartzen duen egunean, bertan ezarritako eskubide pasiboen sistemaren bidez pentsioa sortzeko baldintzak betetzen ez badituzte, zerbitzu aktiboan ber-hasteko eskubidea izanen dute, foru legea indarrean sartu eta hilabeteko epean hain zuzen, horrela eskubide pasiboen sistema berriaren pean egoteko.

3. Hautatzen dena hauta, erabakia aldaezina izanen da, eta pentsioaren zenbateko berriak atzerako eragina izanen du, pentsioa sortu zenetik aurrera hain zuzen, salbu eta aurreko idatz-zatiko lehenengo lerrokadan araututako kasuan; izan ere, kasu horretan, foru lege honetan ezarritako eskubide pasiboen sistemaren bidez pentsioa sortzeko beharkizunak betetzen diren egunera arte eginen da atzera.

Laugarren xedapen iragankorra. Eskubide pasiboen sistemari kotizatzearen gaineko arau iragankorra.

Nafarroako administrazio publikoetako montepioetako funtzionarioek, bigarren xedapen iragankorrean aurreikusten den sei hileko epean, foru lege honetan ezartzen den eskubide pasiboen sistemaren aurretik zegoen sistemak ezarritako kotizazio arauen arabera kotizatuko dute behin-behinekoz.

Nafarroako administrazio publikoek erregularizatu eginen dituzte behin-behinekoz egindako kotizazio horiek, foru lege honetako eskubide pasiboen sisteman behin betikoz sartzen diren funtzionarioen kasuan.

Bosgarren xedapen iragankorra. Kotizazio bereziak egitea hautatzeko epeari buruzko arau iragankorra.

1. Foru lege honek indar hartzen duenean haren 18 eta 19. artikuluetan aipatzen diren egoeretako batean dauden funtzionarioek aukera izanen dute artikulu horietan aurreikusten diren kotizazio bereziak egitea hautatzeko, legeak indar hartu eta sei hilabeteko epean hain zuzen.

2. Aurreko lerrokadan aipatu aukera erabiltzen duten funtzionarioak behin betiko sartuko dira foru lege honetako eskubide pasiboen sistemaren aplikazioi eremuan.

Seigarren xedapen iragankorra. Zerbitzu aktiboko aldia luzatzeko eskaera egiteko epeari buruzko arau iragankorra.

Zerbitzu aktiboko funtzionarioek, baldin eta foru lege honek indar hartzen duenean hirurogeita bost urte edo gehiago badituzte edo adin horretara hurrengo sei hiletan iritsi behar badute, aukera izanen dute beren zerbitzu aktiboko aldia luzatzea eskatzeko, legeak indar hartu eta sei hilabeteko epean hain zuzen.

Xedapen indargabetzaile bakarra

1. Indargabetzen da Nafarroako administrazio publikoen zerbitzuko langileen Estatutuaren testu bategineko II. tituluko X. kapitulua (testu hori abuztuaren 30eko 251/1993 Legegintzako Foru Dekretuak onetsi zuen).

2. Halaber, Kode Zibileko 2. artikuluko bigarren idatz-zatiari jarraikiz, indargabetutzat jotzen dira foru lege honetan agintzen denari kontra egiten dioten edo harekin ezin batera daitezkeen arau guztiak.

Azken xedapenetan lehena. Erregelamendu bidezko garapena.

Ahalmena ematen zaio Gobernuari foru lege hau aplikatu eta garatzeko behar diren arauak emateko.

Azken xedapenetan bigarrena. Indar hartzea.

Foru lege honek Nafarroako ALDIZKARI OFIZIALean argitaratu eta biharamunean hartuko du indarra.

Gobierno de Navarra

Contacte con nosotros | Accesibilidad | Aviso legal | Mapa web