LEXNAVARRA
7/2013 FORU DEKRETUAK, URTARRILAREN 23KOA, NEKAZARITZA BERMATZEKO EUROPAKO FUNTSAK (NBEUF) ETA LANDA GARAPENERAKO EUROPAKO NEKAZARITZA FUNTSAK (LGENF) FINANTZATURIKO GASTUAK NAFARROAKO FORU KOMUNITATEAN ORDAINTZEN DITUEN ERAKUNDEA BAIMENDU ETA HAREN ANTOLAMENDUA ETA FUNTZIONAMENDUA EZARTZEN DITUENA 
-
BON N.º 26 - 07/02/2013
I. KAPITULUA. XEDAPEN OROKORRAK
- 1. artikulua. Xedea.
II. KAPITULUA. ERAKUNDE ORDAINTZAILEA
- 2. artikulua. Agintaritza eskuduna .
- 2.bis artikulua. Agintaritza eskudunaren eginkizunak .
- 3. artikulua. Erakunde ordaintzailea baimentzea.
- 4. artikulua. Erakunde ordaintzailearen eginkizunak.
- 5. artikulua. Erakunde ordaintzailearen zuzendaritza .
- 6. artikulua. Eginkizunak beste norbaiten esku uztea.
- 7. artikulua. Informazio sistemetako segurtasuna.
III. KAPITULUA. ERAKUNDE ZIURTATZAILEA
- 8. artikulua. Erakunde ziurtatzailea.
- 9. artikulua. Baimenaren ebaluazioa .
IV. KAPITULUA. AGINTARITZA KUDEATZAILEA
- 10. artikulua. Agintaritza kudeatzailea .
- Lehen Xedapen Gehigarria.Laguntza kontratuetarako eskumena.
- Bigarren Xedapen Gehigarria.Abalen tramitazioa.
- Hirugarren Xedapen Gehigarria.Beste baimenunitate batzuekin jarduteko protokoloak.
- Lehen Xedapen Indargabetzailea.Indargabetze berariazkoa.
- Bigarren Xedapen Indargabetzailea.Klausula indargabetzailea.
- Azken Xedapenetan Lehena.Garatzeko eta betearazteko ahalmenak.
- Azken Xedapenetan Bigarrena.Indarra hartzea.
Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoaren 50.1 artikuluan Nafarroako Foru Komunitateari, bere foru antolamendu orokorraren indarrez, nekazaritzaren eta abeltzaintzaren inguruko gaietan duen eskumen esklusiboa esleitzen zaio, ekonomiaren antolamendu orokorraren arabera. Bere foru araubidearen arabera, Nafarroak erabateko eskumena du foru erakundeen osaera, eskumenak, antolamendua, funtzionamendua eta araubide juridikoa arautzeko eta Nafarroaren berezko antolamenduaren berezitasunaren ondoriozko administrazio prozedurako arauei eta bere Administrazioaren araubide juridikoari buruz, Nafarroako Foru Eraentza Birrezarri eta Hobetzeari buruzko Lege Organikoaren 49. artikuluko 1. idatz-zatiko a), c) eta e) letretan xedatu bezala.
Kontseiluak ekainaren 21ean emandako 1290/2005 EE Erregelamenduak, Europar Batasuneko nekazaritzako politikaren finantzazioari buruzkoak, NBBEF-Bermea ordezteko bi funts sortu zituen: Nekazaritza Bermatzeko Europako Funtsak (NBEUF), merkatu neurriak finantzatzeko, eta Landa Garapenerako Europako Nekazaritza Funtsak (LGENF), landa garapenerako programak finantzatzeko.
Batzordeak, ekainaren 21eko 885/2006 EE Erregelamenduaren bidez, Kontseiluaren 1290/2005 EE Erregelamendua aplikatzeko xedapenak ezarri ziren erakunde ordaintzaileak eta beste organo batzuk baimentzeko eta NBEUFren eta LGENFren kontuak likidatzeko, eta erakunde ordaintzaileak baimentzeko irizpideak finkatu ziren.
Apirilaren 28ko 521/2006 Errege Dekretuaren bidez Europar Batasuneko nekazaritza arloko funtsak ordaindu eta koordinatzeko erakundeen araubidea ezarri zen. Dekretu haren 2. artikuluan xedatzen da autonomia erkidego bakoitzean erakunde ordaintzaile bakar bat izanen dela NBEUFren eta LGENFren ordainketak kudeatzeko eta erakunde hori baimendu beharko dela Europar Batasuneko nekazaritza arloko funtsen konturako edozein gastu aitortu baino lehen.
Kontseiluak irailaren 20an emandako 1698/2005 EE Erregelamenduak, Landa Garapenerako Europako Nekazaritza Funtsa-LGENFren bidez landa garapenerako eman beharreko laguntzari buruzkoak, 74. artikuluan xedatzen du landa garapenerako programa bakoitzerako Europar Batasuneko estatuek, erakunde ordaintzaileaz eta erakunde ziurtatzaileaz gain, agintaritza kudeatzailea ere izendatuko dutela, kasuan kasuko programa kudeatzen arduratuko dena.
Urriaren 2ko 67/2006 Foru Dekretuak orduko Nekazaritza, Abeltzaintza eta Elikadura Departamentua baimendu zuen Nekazaritza Bermatzeko Europako Funtsak (NBEUF) eta Landa Garapenerako Europako Nekazaritza Funtsak (LGENF) finantzaturiko gastuak Nafarroako Foru Komunitatean ordaintzen dituen erakunde gisa.
Nafarroako Foru Komunitateko Lehendakariaren uztailaren 1eko 10/2011 Foru Dekretuak Nafarroako Foru Komunitateko Administrazioaren departamentuen araberako egitura ezarri zuen, eta xedatu Landa Garapen, Industria, Enplegu eta Ingurumen Departamentuaren esku direla, besteak beste, nekazaritza, abeltzaintza, elikadura eta landa garapenaren arloetan Nafarroako Foru Komunitateari esleituriko eskumenak.
Nafarroako Foru Komunitateko Lehendakariaren ekainaren 22ko 11/2012 Foru Dekretuak Nafarroako Foru Komunitateko Administrazioaren departamentuen araberako egitura ezarri zuen, eta xedatu Landa Garapeneko, Ingurumeneko eta Toki Administrazioko Departamentuaren esku direla, besteak beste, nekazaritza, abeltzaintza, elikadura eta landa garapenaren arloetan Nafarroako Foru Komunitateari esleituriko eskumenak.
Uztailaren 25eko 70/2012 Foru Dekretuak Landa Garapeneko, Ingurumeneko eta Toki Administrazioko Departamentuaren egitura organikoa ezarri zuen, eta xedatu Nekazaritza eta Abeltzaintza Zuzendaritza Nagusiak eskudantziak izanen dituela erakunde ordaintzailearen zuzendaritzari dagokionez.
Nafarroako Gobernuak Landa Garapeneko, Ingurumeneko eta Toki Administrazioko Departamentua baimendu nahi du erakunde ordaintzaile gisa, Foru Komunitatean NBEUFk eta LGENFk finantzaturiko ordainketak kudeatzeko eginkizunak bere gain har ditzan. Uztailaren 25eko 70/2012 Foru Dekretuaren bidez eskuratu zituen eskumenak kontuan hartuz baimentzekoa da horretarako. Foru dekretu horren bidez Landa Garapeneko, Ingurumeneko eta Toki Administrazioko Departamentuaren egitura organikoa ezarri zen.
Kontu-hartzailetza nagusiak txosten batean adierazi duenez, foru dekretu hau bat dator erakunde ordaintzaileak baimentzeko irizpideekin, Batzordeak ekainaren 21ean emandako 885/2006 EE Erregelamenduaren 1. artikuluko 3. idatz-zatian ezarririko ondorioetarako.
Horiek horrela, Landa Garapeneko, Ingurumeneko eta Toki Administrazioko kontseilariak proposaturik, eta Nafarroako Gobernuak 2013ko urtarrilaren 23ko bilkuran harturiko Erabakiarekin bat,
DEKRETATU DUT:
I. KAPITULUA. XEDAPEN OROKORRAK
Honakoak dira foru dekretu honen xedeak:
a) Nekazaritza Bermatzeko Europako Funtsak (NBEUF) eta Landa Garapenerako Europako Nekazaritza Funtsak (LGENF) finantzaturiko gastuak Nafarroako Foru Komunitatean ordaintzen dituen erakundea baimendu eta haren antolamendua eta funtzionamendua ezartzea.
b) Erakunde ordaintzailearen kontuak ziurtatzen dituen erakundea baimentzea.
c) Landa garapenerako programa kudeatzeaz eta aplikatzeaz arduratuko den agintaritza kudeatzailea izendatzea.
II. KAPITULUA. ERAKUNDE ORDAINTZAILEA
2. artikulua . Agintaritza eskuduna .
1. Nafarroako Gobernua izanen da Batzordeak ekainaren 21ean emandako 885/2006 (EE) Erregelamenduaren 1. artikuluko 2. idatz-zatian aipatzen den agintaritza eskuduna. Erregelamendu horren bidez Kontseiluaren 1290/2005 (EE) Erregelamendua aplikatzeko xedapenak ezarri ziren.
2. Aurrekontuaren Zuzendaritza Nagusiko titularra izanen da agintaritza eskudunaren ordezkaria.
2.bis artikulua. Agintaritza eskudunaren eginkizunak .
Agintaritza eskudunak eginkizun hauek izanen ditu:
a) Erakunde ordaintzaileentzako baimena eman, berrikusi eta kentzea.
b) Batzordearen 2014ko abuztuaren 6ko 908/2014 (EB) Exekuzio Erregelamenduaren I. kapituluaren arabera agintaritza eskudunari esleitzen zaizkion zereginak betetzea.
3. artikulua . Erakunde ordaintzailea baimentzea.
Baimena ematen zaio Landa Garapeneko, Ingurumeneko eta Toki Administrazioko Departamentuari, Nekazaritza Bermatzeko Europako Funtsak (NBEUF) eta Landa Garapenerako Europako Nekazaritza Funtsak (LGENF) finantzaturiko gastuak Nafarroako Foru Komunitatean ordaintzen dituen erakundea izan dadin. Funts horiek Europar Batasuneko nekazaritzarako politikaren finantzabideari buruz Kontseiluak ekainaren 21ean emandako 1290/2005 EE Erregelamenduaren 3. eta 4. artikuluetan aipatzen dira, hurrenez hurren.
4. artikulua . Erakunde ordaintzailearen eginkizunak.
1. Erakunde ordaintzaileak honako eginkizun hauek ditu:
a) Ordainketak baimendu eta kontrolatu beharko ditu, eskatzaileari pagatu behar zaion zenbatekoa Europar Batasuneko arautegiarekin bat datorren zehazteko, eta kontrol administratiboan eta tokian berean egin ere egin beharko ditu. Laguntzaren kudeaketa esleiturik duten atalek eginen dituzte zeregin horiek. Arloagatik eskudun diren zuzendari nagusiek ebazpen egokiak emanen dituzte, bai ordaintzekoak bai bidegabeki egindako ordainketak berreskuratzeko prozedurenak, eta, halakorik badago, zehapen espedientearenak.
b) Eskatzaileari edo haren lagapen-hartzaileari baimenduriko zenbatekoak pagatzeko ordainketak egin beharko ditu edo, landa garapenekoetan, Europar Batasunaren kofinantzaketa, Landa Garapeneko, Ingurumeneko eta Toki Administrazioko Departamentuko NBEUFren eta LGENFren Ordainketak Burutzeko Bulegoak eginen duena.
c) Landa Garapeneko, Ingurumeneko eta Toki Administrazioko Departamentuko Koordinazio Atalak eginen du ordainketen kontabilitatea, ordainketa guztiak erakundearen kontuetan erregistratzeko. Kontabilitatea gastuak laburtzen dituzten kontuak jakinarazi eta prestatzeko sistema baten bidez eginen da, bereziki Batzordera hilean behin, hiru hilabetean behin eta urtean behin igortzen diren aitorpenen bidez. Kontuek funtsen bidez finantzaturiko aktiboak ere erregistratuko dituzte, bereziki, kontu-hartzailetzako izakinei, likidatu gabeko aurrerakinei, bermeei eta zordunei buruzkoak.
d) Eguneroko eragiketen eta kontrol jarduerak etengabe begiratu eta harturiko prozedurak Europar Batasuneko arautegiarekin bat egiaztatzen direla bermatzeko egoki direla begiratu beharko ditu eta kontabilitatea zehatza eta egokia dela eta osorik dagoela ere bai. Landa Garapeneko, Ingurumeneko eta Toki Administrazioko Departamentuko Koordinazio Atalak eginen du eginkizun hori.
e) Ebaluazioa eginen du, auditoretza zerbitzu baten bidez, Landa Garapeneko, Ingurumeneko eta Toki Administrazioko Departamentuko Barne Auditoretzako Atalak eginen duena. Harturiko prozedurak Europar Batasuneko arautegiarekin bat egiaztatzen direla bermatzeko egoki direla begiratu beharko ditu eta kontabilitatea zehatza eta egokia dela eta osorik dagoela ere bai.
f) Nekazaritza Bermatzeko Espainiako Funtsarekiko (NBEF) harremanak, 1290/2005 EE Erregelamenduaren 6.3 artikuluan aipatzen den erakunde koordinatzailea den aldetik.
g) Behar diren neurriak hartzea NBEUFk eta LGENFk finantzaturiko eragiketen errealitatea eta erregulartasuna bermatzeko, irregulartasunei aurrea hartu eta esesteko eta bidegabeki egindako ordainketen kopuruak berreskuratzeko.
h) Europar Batasuneko erakundeek egiten dituzten kontrol zereginen garapena erraztea.
2. Goragoko unitateko buruak gainbegiratuko ditu baimenaz, ordainketaz eta kontabilitateaz arduratzen diren unitate administratiboen lanak.
5. artikulua . Erakunde ordaintzailearen zuzendaritza .
1. Erakunde Ordaintzailearen Zerbitzuko zuzendariari dagokio erakunde ordaintzailea zuzentzea. Eginkizun hauek izanen ditu:
a) Erakunde ordaintzailea ordezkatzea.
b) NBEUFri eta LGENFri egozten ahal zaizkien ordainketen betetze-mailari, kontabilitateari, kontu-emateari eta barneko eta kanpoko kontrolari buruzko argibide guztiak hartu eta igortzea.
c) Erakunde ordaintzaileko organoak koordinatzea NBEUFren eta LGENFren konturako laguntzak kudeatzeko. Horretarako, aldian-aldian dei egiten ahalko die erakunde ordaintzaileari buruz eginkizunak dituzten organo eta unitateei. Zuzendaritza funtzionala izanen du organo eta unitate horien gainean. Halaber, prozeduren legezkotasuna, eraginkortasuna eta homogeneotasuna bermatzeko jarraibideak ematen ahalko ditu.
d) Barne auditoriako plana onestea, esparru garrantzitsu guztiak gutxienez ere bost urtean behin auditatzen direla bermatzeko.
e) 1290/2005 (EE) Erregelamenduaren 9. artikuluan ezartzen den fidagarritasun aitorpena sinatzea.
2. Erakunde Ordaintzailearen Zerbitzuko zuzendariaren kargua hutsik dagoenean, hura kanpoan edo gaixorik dagoenean edo beste ezintasun bat duenean, aldi baterako ordezkoak honako hauek izanen dira, hurrenez hurren:
1.– Koordinazio Ataleko burua.
2.– Landa Garapeneko, Nekazaritzako eta Abeltzaintzako zuzendari nagusia.
6. artikulua . Eginkizunak beste norbaiten esku uztea.
1. Erakunde ordaintzaileari dagozkion eginkizunak beste organo batzuen esku uzten ahalko dira, Europar Batasunaren laguntzak pagatzekoak izan ezik.
2. Eginkizunak inoren esku utzi ahal izateko, Batzordeak ekainaren 21ean emandako 885/2006 EE Erregelamenduaren I. eranskinean ezarririko baldintzak bete beharko dira.
3. Eranskin hartako 1.C)i) atalean aipatzen den erabaki idatzia erakunde ordaintzaileko zuzendariak eta eginkizuna bere gain hartu duen organoko zuzendari nagusiak edo antzeko arduradunak izenpetuko dute.
4. Eginkizunak inoren esku uzteak esan nahi du organo delegatuak bere gain hartzen duela erantzukizun finantzarioa, organo hura Nafarroako Foru Komunitateko Administraziokoa ez bada.
5. Eginkizunak inoren esku uzteko erabakiek Europar Batasuneko nekazaritza arloko funtsetako baliabideak ongi kudeatzen direla bermatu beharko dute.
7. artikulua . Informazio sistemetako segurtasuna.
Landa Garapeneko, Ingurumeneko eta Toki Administrazioko Departamentuko Informazioa Kudeatzeko Atalak begiratuko du erakunde ordaintzaileko informazio sistemetako segurtasuna, hori dena Lehendakaritza, Justizia eta Barne Departamentuko Gobernu Irekiaren eta Teknologia Berrien Zuzendaritza Nagusiaren eskumenak galarazi gabe.
III. KAPITULUA. ERAKUNDE ZIURTATZAILEA
8. artikulua . Erakunde ziurtatzailea.
Kontseiluaren 1290/2005 EE Erregelamenduaren 7. artikuluan aipatzen den erakunde ziurtatzailea Nafarroako Foru Komunitateko Administrazioko Kontu-hartzailetza Orokorra izanen da. Horrexek luzatu beharko du kontabilitatea zehatza eta egokia dela eta osorik dagoela ziurtatzen duen agiria, ezarririko kudeaketa eta kontrol sistema kontuan hartuz.
9. artikulua . Baimenaren ebaluazioa .
Kontu-hartzailetza Orokorrak etengabe gainbegiratuko du erakunde ordaintzailea eta gutxienez ere hiru urtean behin txosten bat eginen du gainbegiratzearen emaitzez, non adieraziko baitu erakunde ordaintzaileak baimena hartzeko irizpideak betetzen segitzen ote duen. Hori dena agintaritza eskudunari jakinaraziko zaio.
IV. KAPITULUA. AGINTARITZA KUDEATZAILEA
10. artikulua . Agintaritza kudeatzailea .
Landa Garapenerako Europako Nekazaritza Funtsaren (LGENF) bidezko landa garapena laguntzeari buruz Europako Parlamentuak eta Kontseiluak abenduaren 17an emandako 1305/2013 (EB) Erregelamenduaren 65. artikuluan ezarritakoaren ondorioetarako, Landa Aniztasunerako eta Garapenerako Zerbitzua izendatzen da agintaritza kudeatzaile.
Lehen Xedapen Gehigarria .Laguntza kontratuetarako eskumena.
Batzordeak, 2006ko ekainaren 21eko 885/2006 EE Erregelamenduaren bidez, Kontseiluaren 1290/2005 EE Erregelamendua aplikatzeko xedapenak ezarri ziren erakunde ordaintzaileak eta beste organo batzuk baimentzeko eta NBEUFren eta LGENFren kontuak likidatzeko. Erregelamendu haren ondoriozko eginbeharrak egiten direla bermatzeko, Landa Garapeneko, Ingurumeneko eta Toki Administrazioko Departamentuak beharrezkotzat jotzen diren laguntza kontratuak izenpetzen ahalko ditu NBEUFren eta LGENFren laguntzak eskatzen dituztenei pagatzeko arrazoi diren gertaerak kontrolatu eta egiaztatzeko edo erakunde ordaintzailearen eginkizunak egiten laguntzeko. Eta Nafarroako Gobernuko entitate instrumentalei eginkizun horiek betetzeko mandatua ematen ahal die.
Bigarren Xedapen Gehigarria .Abalen tramitazioa.
Aurrerakinak NBEUFren eta LGENFren funtsen kontura hartzeko abalak eta diruzkoak ez diren bestelako bermeak Foru Komunitateko Administrazioan aurkezturikoetarako eskumena daukan unitate organikoak gorde, kontrolatu eta jarraituko ditu.
Hirugarren Xedapen Gehigarria .Beste baimenunitate batzuekin jarduteko protokoloak.
Nafarroako Foru Komunitateko Administrazioaren departamentuen araberako egiturak NBEUF-LGENF laguntzen kudeaketa Landa Garapeneko, Ingurumeneko eta Toki Administrazioko Departamentuak eta Nafarroako Foru Komunitateko Administrazioko beste unitate batzuek konpartitu behar dutela ezartzen duenean, Nekazaritza eta Abeltzaintza Zuzendaritza Nagusiak, erakunde ordaintzailearen zuzendaritza den aldetik, kasuan kasuko zuzendaritza nagusiarekin hitzartuko ditu Europar Batasunak ezarririko orientabideak eta gomendioak betetzen dituzten protokolo edo agiriak, NBEUFren eta LGENFren funtsen kontura hartzen diren laguntzen kudeaketan eta haien ondoriozko erantzukizunean erakunde ordaintzailearen zuzendaritza gailenduko dela behar bezala bermatzeko, bai eta baimen-unitate bakoitzak Europar Batasuneko funts horien kudeaketari lehentasuneko arreta emateko erakunde ordaintzaileari atxikitzen dizkion eginkizunak, baliabideak eta bitartekoak zehazteko.
Lehen Xedapen Indargabetzailea .Indargabetze berariazkoa.
Indarrik gabe utzi da urriaren 2ko 67/2006 Foru Dekretua, Nekazaritza Bermatzeko Europako Funtsak (NBEUF) eta Landa Garapenerako Europako Nekazaritza Funtsak (LGENF) finantzaturiko gastuak Nafarroako Foru Komunitatean ordaintzen dituen erakundea baimendu eta haren antolamendua eta funtzionamendua ezartzen dituena.
Bigarren Xedapen Indargabetzailea .Klausula indargabetzailea.
Indarrik gabe gelditzen dira foru dekretu honetan ezarririkoari aurka egiten dioten maila bereko edo beheragoko xedapen guztiak.
Azken Xedapenetan Lehena .Garatzeko eta betearazteko ahalmenak.
Landa Garapeneko, Ingurumeneko eta Toki Administrazioko kontseilariari ahalmena ematen zaio, bere eskumenen esparruan, foru dekretu hau garatu eta betetzeko eta, bereziki, Europar Batasuneko nekazaritza arloko funtsek erabat edo hein batean finantzaturiko diru-laguntzen arau, deialdi eta oinarri erregulatzaileak ezartzeko behar diren xedapenak eman ditzan.
Azken Xedapenetan Bigarrena .Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2013ko urtarrilaren 23an.-Nafarroako Gobernuko lehendakaria, Yolanda Barcina Angulo.-Landa Garapeneko, Ingurumeneko eta Toki Administrazioko kontseilaria, José Javier Esparza Abaurrea.
Iragarkiaren kodea: F1301096
