LEXNAVARRA
5/2012 FORU DEKRETUA, URTARRILAREN 25EKOA, NAFARROAKO FORU KOMUNITATEKO IKUS-ENTZUNEZKO KOMUNIKAZIO ZERBITZUEI BURUZKOA.
BON N.º 30 - 13/02/2012
I. KAPITULUA. XEDAPEN OROKORRAK
- 1. artikulua. Xedea.
- 2. artikulua. Aplikazioeremua.
- 3. artikulua. Interes orokorreko ikusentzunezko komunikazio zerbitzuen araubide juridikoa.
II. KAPITULUA. PROZEDURAREN GAINEKO ALDERDIAK
1. ATALA. AURRETIKO JAKINARAZPENAK
- 4. artikulua. Xedea.
- 5. artikulua. Edukia.
- 6. artikulua. Aurretiko jakinarazpenen kontrola.
- 7. artikulua. Nafarroako ikusentzunezko komunikazio zerbitzuen emaileen Erregistroan inskribatzea.
2. ATALA. LIZENTZIAK
- 8. artikulua. Xedea.
- 9. artikulua. Eskumena.
- 10. artikulua. Prozedurari hasiera ematea.
- 11. artikulua. Deialdi publikoa.
- 12. artikulua. Balorazio irizpideak.
- 13. artikulua. Eskaerak aurkeztea.
- 14. artikulua. Balorazio mahaia.
- 15. artikulua. Gaitasunaren balorazioa.
- 16. artikulua. Eskaeren eta merezimenduen balorazioa.
- 17. artikulua. Agiriak aurkeztea.
- 18. artikulua. Lizentzien banaketa.
- 19. artikulua. Nafarroako ikusentzunezko komunikazio zerbitzuen emaileen Erregistroan inskribatzea.
- 20. artikulua. Jabari publiko irratielektrikoaren erabilera.
- 21. artikulua. Lizentziaren indarraldia eta berritzea.
- 22. artikulua. Negozio juridikoak.
- 23. artikulua. Kateko emanaldiak.
III. KAPITULUA. IRABAZTEKO ASMORIK EZ DUTEN IKUSENTZUNEZKO KOMUNIKAZIO ZERBITZUAK
- 24. artikulua. Lizentzia.
- 25. artikulua. Finantza kudeaketaren ebaluazioa.
IV. KAPITULUA. NAFARROAKO IKUSENTZUNEZKO KOMUNIKAZIO ZERBITZUEN EMAILEEN ERREGISTROA
- 26. artikulua. Sorrera eta izaera.
- 27. artikulua. Xedea.
- 28. artikulua. Inskribatuko diren datuak.
- 29. artikulua. Inskribatzeko prozedura.
- 30. artikulua. Inskripzioa deuseztatzea.
- 31. artikulua. Estatuko Erregistroarekiko koordinazioa.
- 32. artikulua. Publikotasun araubidea.
V. KAPITULUA. IKUSKATZEA ETA ZEHATZEA
- 33. artikulua. Ikuskatzeko eta zehatzeko ahalmenak erabiltzea.
- 34. artikulua. Ikuskapen lanetarako gaikuntza.
- 35. artikulua. Arauhausteak eta zehapenak.
- 36. artikulua. Zehapen prozedura eta prozedurak irekitzeko organo eskuduna.
- 37. artikulua. Zehapenak ezartzeko eskumena duten organoak.
VI. KAPITULUA. IKUSENTZUNEZKO KOMUNIKAZIO ZERBITZUEN EMAILEEN ETA ERABILTZAILEEN ESKUBIDEAK
- 38. artikulua. Erabiltzaileek ikusentzunezko zerbitzuen edukien kontrolean parte hartzea.
- 39. artikulua. Autorregulazioa.
- Xedapen Gehigarri Bakarra. Ikusentzunezko Hedabideen Titularitatearen Erregistroa kentzea.
- Lehenengo Xedapen Iragankorra. Indarreko gaikuntza tituluak dituzten zerbitzuemaileek lehenbiziko aldiz inskribatzea Nafarroako ikusentzunezkoen komunikazio zerbitzuen emaileen Erregistroan.
- Bigarren Xedapen Iragankorra. Lizentzia bihurtutako kontzesioen araubide juridikoa.
- Xedapen Indargabetzaile Bakarra. Arauak indargabetzea.
- Azken Xedapenetan Lehena. Arauak emateko ahalmena.
- Azken Xedapenetan Bigarrena. Indarra hartzea.
Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoak 55.1. artikuluan ezartzen duenez, Nafarroari dagokio soinuzko eta telebista bidezko irrati-difusioaren araubidea legez garatu eta betearaztea, Irrati eta Telebistaren Estatutu Juridikoa arautzen duen Legean ezarritako modu eta kasuetan.
Ikus-entzunezko zerbitzuak zerbitzu ekonomiko eta kulturaltzat hartzen dira, eta ezinbestekoak izaten dira gizarte demokratikoentzat, iritzi publiko aske eta askotarikoa izan dadila bermatzen baitute. Azken urteotan, ikus-entzunezkoen sektoreak bilakaera azkarra bizi izan du, teknologia digitalaren ezarpenari eta Interneten agerpenari esker; horrenbestez, asko erraztu da erabiltzaileak zerbitzu horiez baliatzeko bidea, baina aldi berean ikusleria eta entzuleria sakabanatu dira, eta negozio ereduak aldatu. Faktore horiek direla-eta, zenbait arau onetsi behar izan dira, hala Europako erkidegoan, nola estatuan.
Europako erkidegoaren esparruan, Parlamentuaren eta Kontseiluaren 2007ko abenduaren 11ko 2007/65/EE Zuzentaraua onetsi zen, Ikus-entzunezko komunikazio zerbitzuei buruzkoa. Horren bertsio kodifikatua Europako Parlamentuaren eta Kontseiluaren 2010eko martxoaren 10eko 2010/13/EB Zuzentarauan jasotzen da. Zuzentarau hori Espainiako antolamendu juridikoan txertatzeko, Ikus-entzunezko Komunikazioari buruzko martxoaren 31ko 7/2010 Lege Orokorra onetsi zen. Lege hori Europako erkidegoaren zuzentarauaren transposizioa baino gehiago da, izan ere, esparru juridiko egonkor eta, ahal dela, orokor bat eskaini nahi du, sakabanatuta dagoen legedi zaharra gainditzeko asmoz. Berrikuntzen artean, hauek nabarmendu behar dira: irrati eta telebista funtsezko zerbitzu publikotzat hartzeari uztea eta ikus-entzunezko komunikazio zerbitzuak (irrati bidezkoak, telebistakoak, konexoak eta interaktiboak) interes orokorreko zerbitzu gisa hartzea; araubide aldaketaren erakuspenik nabarmenena hauxe da: estatuaren titulartasunpeko zerbitzu publikoa zeharka kudeatzeko baimenen araubide batetik aurretiko jakinarazpenen eta lehiaketa bidez emandako lizentzien araubide batera igaro gara.
Adierazitako aldaketen muntaren ondorioz, Parlamentuak urriaren 21eko 15/2011 Foru Legea onetsi behar izan du, uztailaren 5eko 18/2001 Foru Legea indargabetu duena, hots, Nafarroako ikus-entzunezkoen jarduera arautu eta Nafarroako Ikus-entzunezkoen Kontseilua sortu zuena, ikus-entzunezko komunikazio zerbitzuak arautzeko tresna juridiko desegokia bihurtu baitzen. Ikus-entzunezko komunikazio zerbitzuen arloan, Nafarroako Foru Komunitateari legeak garatu eta betearazteko dagokion eskumena baliatuz, eta urriaren 21eko 15/2011 Foru Legeak berak Nafarroako Gobernuari arauak onesteko esleitutako gaikuntza erabiliz, beharrezkoa da ikus-entzunezko komunikazioaren araubide juridikoa eguneratzea Nafarroako Foru Komunitatearen eremuan, estatuko legediak finkatutako arau-esparru berrira egokitzeko.
Hori helburu, foru dekretu honetan honako hauek arautzen dira: ikus-entzunezko komunikazio zerbitzua lurreko uhin hertziarren bidez emateko lizentziak banatzeko araubidea, aurretiko jakinarazpenak arautzeko prozedura, irabazteko asmorik ez duten ikus-entzunezko komunikazio zerbitzu komunitarioak, eta ikuskatu eta zehapenak jartzeko ahalmenak erabiltzeko modua. Foru dekretu honen bidez, orobat, Nafarroako ikus-entzunezko komunikazio zerbitzuen emaileen Errregistroa sortzen da, garai bateko Ikus-entzunezko hedabideen titulartasunaren Erregistroa ordezten duena.
Horrenbestez, Kulturako, Turismoko eta Erakunde Harremanetako kontseilariak proposaturik, Nafarroako Kontseiluarekin bat, eta Nafarroako Gobernuak 2012ko urtarrilaren 25ean egindako bilkuran hartutako Erabakiarekin bat,
DEKRETATU DUT:
I. KAPITULUA. XEDAPEN OROKORRAK
Foru dekretu honen xedea da ikus-entzunezko komunikazio zerbitzuen prestazioaren arloan Nafarroako Foru Komunitateari dagozkion eskumenak erabiltzeko modua arautzea.
2. artikulua . Aplikazioeremua.
1. Foru dekretu hau aplikatuko zaie Nafarroako Foru Komunitateko lurralde-mugen barreneko estaleremua gainditzen ez duten ikus-entzunezko komunikazio zerbitzuei, edozein delarik transmititzeko erabiltzen duten bidea.
2. Foru dekretu honen aplikazio eremutik kanpo gelditzen da ikus-entzunezko komunikazio zerbitzu publikoa ematea, berariazko araudia izanen baitu.
3. artikulua . Interes orokorreko ikusentzunezko komunikazio zerbitzuen araubide juridikoa.
1. Ikus-entzunezko komunikazio zerbitzuak, irratikoak, telebistakoak eta lotuak eta interaktiboak, interes orokorreko zerbitzuak dira, ideiak libreki adierazteko eskubidea, informazioa jakinarazi eta jasotzeko eskubidea, bizitza politiko eta sozialean parte hartzeko eskubidea eta enpresa askatasunaren eskubidea erabiliz ematen direnak, berdintasuna, aniztasuna eta balore demokratikoak sustatzeko asmoz.
2. Ikus-entzunezko komunikazio zerbitzu bat emateko, jarduera hasi aurretik jakinarazpen fede-emailea egin beharko da.
3. Zerbitzu hori lurreko uhin hertziarren bidez ematen denean, aurretiko lizentzia beharko da, lehiaketa bidez emana.
II. KAPITULUA. PROZEDURAREN GAINEKO ALDERDIAK
1. ATALA. AURRETIKO JAKINARAZPENAK
Ikus-entzunezko komunikazio zerbitzu bat emateko, aplikagarri den legediak jarduera egiten hasi aurretik modu fede-emailean jakinaraztea besterik eskatzen ez badu, jakinarazpena ikus-entzunezko komunikazio zerbitzuen arloan eskumena duen organoari igorri beharko zaio.
1. Aurretiko jakinarazpena idatziz egin behar da. Interesdunak informazio hau aurkeztu beharko du, egiazkoa dela frogatzeko dokumentazioarekin batera:
a) Ikus-entzunezko komunikazio zerbitzuaren emailearen identifikazio-datuak eta helbidea.
b) Ordezkariaren ahalmena eta ordezkaritza egiaztatzen dituen dokumentazioa, halakorik baldin badago.
c) Eman nahi den ikus-entzunezko komunikazio zerbitzuaren azalpena, honako hauek adierazita: zein kanaletan emititu nahi den, programazioaren edukia, zerbitzuaren datu teknikoak eta ikus-entzunezko zerbitzuaren euskarri-sarearen titularrari buruzko datuak, hala badagokio.
d) Estaleremua eta jarduera hasteko aurreikusitako eguna.
e) Erantzukizuneko aitorpena, aplikagarri den legediak, ikus-entzunezkoen ordena publikoaren arrazoiak direla-eta, ezartzen dituen mugapenetatik bat ere ez daukala adierazteko.
2. Aurretiko jakinarazpenak ez du inolako ondoriorik izanen Ikus-entzunezko Komunikazioari buruzko martxoaren 31ko 7/2010 Lege Orokorraren 23.2 eta 26.2 artikuluetan ezarritako kasuetan.
6. artikulua . Aurretiko jakinarazpenen kontrola.
1. Ikus-entzunezko komunikazio zerbitzua aurretiko jakinarazpena aurkezten den egunetik beretik ematen hasten ahalko da, deusetan galarazi gabe ikus-entzunezko komunikazio zerbitzuen arloan eskumena duen organoari egiaztapenak, kontrola eta ikuskapenak egiteko dagozkion ahalmenak.
2. Aurretiko jakinarazpenik aurkezten ez bada, edo horrekin batera aurkezten diren datuak, adierazpenak edo agiriak, funtsean, ez-zuzenak edo faltsuak badira, edo zerbait falta bada, ezin segitzen ahalko da ikus-entzunezko komunikazio zerbitzua ematen, egoera horren berri jakiten den unetik beretik, deusetan galarazi gabe legokiokeen erantzukizun penal, zibil eta administratiboa.
Ikus-entzunezko komunikazioaren arloan eskumena duen organoak inguruabar horiek deklaratzeko ematen duen ebazpena baino lehen, aldebiko espedientea ireki beharko da, interesdunari hamabost eguneko entzunaldia ematen diona. Ebazpenean zehazten ahalko da interesdunak egoera juridikoa jarduera hasi baino lehenagoko unera eraman beharra berriz, eta, orobat, helburu bereko prozedura bat irekitzeko debekua ezartzea bi urterako.
7. artikulua . Nafarroako ikusentzunezko komunikazio zerbitzuen emaileen Erregistroan inskribatzea.
Aurretiko jakinarazpena Nafarroako ikus-entzunezko komunikazio zerbitzuen emaileen Erregistroan inskribatu beharko da, foru dekretu honen IV. kapituluan ezarritakoari jarraikiz.
2. ATALA. LIZENTZIAK
Lurreko uhin hertziarren bidezko ikus-entzuneko komunikazio zerbitzua emateko, aurretiko lizentzia beharko da, lehiaketa publikoaren bidez emana. Horren tramitazioa foru dekretu honetan ezarritakoari jarraikiz eginen da, eta, horren osagarri, Nafarroako Foru Komunitateko ondare-legedian ezarritakoari jarraikiz.
Ikus-entzunezko komunikazio zerbitzuen arloan eskumena duen kontseilariari dagokio lehiaketaren deialdia egitea, prozeduraren tramite guztiak sustatzea eta deialdia ebaztea.
10. artikulua . Prozedurari hasiera ematea.
1. Lizentziak banatzeko prozedura ofizioz hasiko da, deialdi publiko baten bidez.
2. Aurreko idatz-zatian ezarritakoa gorabehera, Ikus-entzunezko Komunikazioari buruzko martxoaren 31ko 7/2010 Lege Orokorraren 27.4 eta 27.5 artikuluetan aurreikusitako kasuetan, interesdunek eska dezakete lehiaketaren deialdia egitea.
11. artikulua . Deialdi publikoa.
1. Deialdia publikotasunaren, gardentasunaren, konkurrentziaren eta aukera-berdintasunaren printzipioetan oinarrituko da, eta gutxienez honako alderdi hauek jasoko ditu:
a) Banatu behar diren lizentziak, estaleremua eta ezaugarri teknikoak.
b) Zerbitzua emateko baldintzak, funtsezkotzat jotzen direnak adierazita.
c) Lizentzia lortzeko betebeharrak eta horiek frogatzeko modua.
d) Interesdunek eskaerak aurkezteko epeak, aurkezpena egiteko onartzen diren erregistro eta baliabide telematikoak, eta, halaber, eskaera posta ziurtatuaren bidez aurkeztuz gero, kontuan hartu beharreko alderdiak.
e) Eskaeren kaudimena erakusteko jarri beharreko bermeak, halakorik bada, eta bermea aurkezteko modua edo modalitateak.
f) Balorazio irizpideak.
g) Eskaera egiteko eredua, erantsi beharreko agiriak eta baloratzeko modua.
2. Deialdia Nafarroako Aldizkari Ofizialean argitaratuko da.
12. artikulua . Balorazio irizpideak.
Lizentzien banaketari buruz erabakitzeko, deialdian ezartzen diren balorazio irizpideak erabiliko dira, honako hauek gutxienez:
a) Emisoraren bideragarritasun ekonomikoa.
b) Proiektuaren ezaugarri teknikoak.
c) Emanaldien eta programazioaren ezaugarriak.
d) Lizentzia ez eskualdatzeko konpromisoa, legeak ezarritako epea bukatu arte bederen.
e) Euskarazko programazioa.
f) Lehiaketaren xedeko estaleremuan jarduteko lizentziarik ez duten emisorak sartzea.
13. artikulua . Eskaerak aurkeztea.
1. Eskaeretan egiten diren proposamenak isilpekoak izanen dira. Aurkezten diren eskaintzak baloratzeko fasea hasi bitarte isilpekotasuna bermatzeko, eskaerekin batera aurkezten diren agiriak bi gutun-azal itxitan aurkeztuko dira. Lehenengoan eskatzailearen nortasun juridikoa frogatzeko dokumentazioa sartuko da, eta lizentzia baten titularra izateko gaitasunari buruzkoa, ikus-entzunezko komunikazioaren arloko oinarrizko legediak ezartzen dituen betebeharren eta debekuen arabera. Bigarrenean eskaintza teknikoa sartuko da. Bertan sartuko dira lehiaketan baloratzeko aurkezten diren merezimenduak eta horien frogagiriak.
2. Deialdiak aukera ematen ahalko die interesdunei, Ikus-entzunezko Komunikazioari buruzko martxoaren 31ko 7/2010 Lege Orokorraren 26. artikuluak, ordena publikoaren arrazoiak direla kausa eta ikus-entzunezkoen merkatuaren aniztasuna bermatzeko, ezartzen dituen debeku-egoeretan ez dagoela adierazteko agiriak aurkeztu beharrean, erantzukizuneko aitorpen bat aurkezteko prozeduraren une horretan.
3. Nolanahi ere, hasieran erantzukizuneko aitorpen bat aurkeztuta ere, eskaerak baloratzeko fasea bukatu ondoren eta prozedura ebatzi baino lehen, zilegi izanen da lizentziak banatzeko proposamenean sartzen direnei eskatzea aurreko idatz-zatian aipatutako alderdiak frogatzeko agiriak.
14. artikulua . Balorazio mahaia.
1. Deialdian ezarritako tokian, egunean eta orduan eratuko da Balorazio mahaia, eskaerak ebaluatzeaz eta lizentziak banatzeko proposamena egiteaz arduratuko dena. Mahaiak bost kide izanen ditu gutxienez, ikus-entzunezko komunikazio zerbitzuen arloan eskumena duen kontseilariak izendatuak. Mahaian, zuzenbideko lizentzia eskatu zaion lanpostu batean jarduten duen lizentziadun bat eta kontu-hartzaile bat egonen dira nahitaez.
2. Prozesua bitartean, Balorazio mahaiak kanpoko aholkularien laguntza eska dezake noiznahi. Aholkulari horiek bileretara joan daitezke, hizpidea bai baina botorik gabe.
15. artikulua . Gaitasunaren balorazioa.
1. Balorazio mahaiak lehenengo gutun-azalean dagoen dokumentazioa aztertuko du, eta konpontzeko modukoak diren akatsak atzemanez gero, interesdunei jakinaraziko die, gehienez bost eguneko epean zuzen ditzaten, eta adieraziko die, zuzendu ezean, eskaeran atzera egin dutela ondorioztatuko dela.
2. Epe hori bukaturik, Balorazio mahaiak erabakiko du zein eskatzailek betetzen dituzten ikus-entzunezko komunikazio lizentzien titularrak izateko eskatzen diren baldintzak.
16. artikulua . Eskaeren eta merezimenduen balorazioa.
1. Balorazio mahaiak 72 ordu lehenagotik iragarri beharreko tokian, egunean eta orduan eginen den jendaurreko ekitaldi batean, behin betiko onartu diren eskatzaileen zerrenda irakurriko da, eta eskaintzen gutun-azalak irekiko dira.
2. Eskaintzak deialdian ezarritako irizpideei eta prozedurari jarraikiz aztertuko ditu Balorazio mahaiak, eta, proposamena egin baino lehen, egoki iruditzen zaizkion txosten teknikoak eskatzen ahalko ditu.
3. Balorazioa bukatutakoan, mahaiak lizentziak esleitzeko proposamena eginen du. Proposamen horrek ez du inolako eskubiderik sortuko proposatzen diren esleipen-hartzaileen alde.
17. artikulua . Agiriak aurkeztea.
1. Esleipenaren proposamena eginda eta ikus-entzunezko komunikazio zerbitzuen arloan eskumena duen kontseilariari igorri baino lehen, Balorazio mahaiak proposamenean agertzen diren eskatzaileei eskatuko die deialdian finkatutako dokumentazioa ekartzeko, hamabost eguneko epean.
2. Interesdunek eskatutako dokumentazioa epe horretan aurkeztu ezean, edo dokumentazio hori azterturik ondorioztatzen bada proposatutako eskatzaileak ez dituela betetzen lizentzia baten titularra izateko behar diren baldintzak, beste bat proposatzen ahalko da, eskaeren sailkapenean hurrengoa izan den eskatzailea hain zuzen, betiere hori posible baldin bada eta hautagaia ados baldin badago. Kasu horretan, hamabost eguneko epea emanen zaio aurreko paragrafoan adierazitakoa bete dezan.
18. artikulua . Lizentzien banaketa.
1. Lehiaketa gehienez sei hilabeteko epean ebatziko da, eskaerak aurkezteko epea bukatzen den egunetik hasita. Epe hori bukatu eta berariazko ebazpena eman eta argitaratu ez bada, eskaera ukatu zaiela ondorioztatu beharko dute interesdunek.
2. Lizentziak esleitzeko proposamena jaso ondoren, ikus-entzunezko zerbitzuen arloan eskumena duen kontseilariak lehiaketa ebatziko du, Balorazio mahaiak egindako proposamenean oinarrituta. Dena dela, lehiaketa osorik edo partez eman gabe deklaratzen ahalko da, aurkezten diren eskaeretatik bakar batek ere ez baditu betetzen deialdian eskatutako baldintzak.
3. Lehiaketari bukaera ematen dion ebazpenean, lizentzia eman zaien eskatzaileen zerrendaz gainera, honako hauek ere agertuko dira: emanaldien estaleremua, kanalen kopurua, esleitutako multiplexa (irekia edo ordainketa bidezkoa ote den adierazita), emanaldiak hasteko data eta funtsezkotzat jotzen diren baldintzak. Halaber, gainerako eskaeren ezespena adierazi beharko da berariaz.
4. Lehiaketa ebazteko erabakia Nafarroako Aldizkari Ofizialean argitaratuko da eta interesdunei banan-banan jakinaraziko zaie.
5. Lizentzia eman ondoren, agiri administratibo batean formalizatuko da, eta bertan jasoko dira lizitatzaileak bere eskaintzan hartutako konpromisoak, zerbitzu emaileak nahitaez bete beharko dituenak.
19. artikulua . Nafarroako ikusentzunezko komunikazio zerbitzuen emaileen Erregistroan inskribatzea.
Lizentzia eman ondoren, dagokion inskripzioa edo idazpena eginen da Nafarroako ikus-entzunezko komunikazio zerbitzuen emaileen Erregistroan, foru dekretu honen IV. kapituluan ezarritakoari jarraikiz.
20. artikulua . Jabari publiko irratielektrikoaren erabilera.
1. Lizentzia esleitzeak berarekin dakar jabari publiko irrati-elektrikoaren erabilera pribatiboa ematea Ikus-entzunezko Komunikazioari buruzko martxoaren 31ko 7/2010 Lege Orokorraren 24.2 artikuluan xedatutakoarekin bat.
2. Nolanahi ere, lizentzia emanda ere, titularrak onartu beharko ditu instalazioak ontzat hartu eta kontrolatzeko egintzak, baldin eta halakorik ezartzen badu jabari publiko irrati-elektrikoa arautzen duen legediak, emititzen hasi aurretik.
21. artikulua . Lizentziaren indarraldia eta berritzea.
1. Ikus-entzunezkoen lizentziak hamabost urterako emanen dira.
2. Ikus-entzunezko Komunikazioari buruzko martxoaren 31ko 7/2010 Lege Orokorraren 28.2 artikuluaren araberakoa izanen da lizentziak berritzeko araubidea. Dagokion lizentziaren indarraldia bukatu aurretik, ikus-entzunezkoen komunikazioan eskumena duen organoak egiaztatuko du betetzen direla, aipatutako artikuluarekin bat, lizentzia automatikoki berritzeko baldintzak. Hala baldin bada, berritzeko ebazpena emanen du, eta hura Nafarroako Ikus-entzunezko komunikazio zerbitzuen emaileen Erregistroan inskribatuko da ofizioz. Baldin eta, egiaztapen jarduketak eginda, ez bada frogatzen eskatzen diren baldintzak betetzen direla, ikus-entzunezkoen komunikazio arloan eskumena duen organoak berariazko ebazpen arrazoitu bat emanen du, adieraziz ez dela bidezkoa berritzea.
3. Salbuezpenez, Ikus-entzunezko Komunikazioari buruzko martxoaren 31ko 7/2010 Lege Orokorraren 28.3 artikuluan aurreikusitako egoeretan, ikus-entzunezkoen komunikazio arloan eskumena duen zuzendari nagusiak ezarriko du ez dela bidezkoa lizentzia automatikoki berritzea, eta norgehiagoka librean esleituko du.
22. artikulua . Negozio juridikoak.
1. Ikus-entzunezko Komunikazioari buruzko martxoaren 31ko 7/2010 Lege Orokorraren 29 artikuluaren araberakoak izanen dira komunikazioko lizentziei buruzko negozio juridikoak.
2. Negozio juridiko bat egiteko, haren xedea ikus-entzunezko komunikazioko lizentzia baldin bada, beharrezkoa izanen da, aurretik, ikus-entzunezko komunikazio zerbitzuen arloan eskumena duen zuzendari nagusiak baimena ematea eta legez ezartzen den tasa ordaintzea.
3. Baimen eskaerarekin batera, dokumentazio hau aurkeztu beharko da gutxienez:
a) Egin nahi den negozio juridikoaren proposamena, edo sinatu den akordioarena. Horretarako, ikus-entzunezkoen arloko agintarien aurretiko baimen berariazkoa beharko da.
b) Frogagiriak, erakusten dutenak negozio juridikoa eginen duenak betetzen dituela lizentzia eskuratzeko legez ezarritako baldintzak.
4. Ebazpena gehienez ere hiru hilabeteko epean eman eta jakinarazi beharko da.
23. artikulua . Kateko emanaldiak.
1. Nafarroako Foru Komunitatearen eremuan irrati bidezko ikus-entzunezko komunikazio zerbitzu bat emateko lizentzien titular batek edo gehiagok katean emititzea erabakitzen badute, Ikus-entzunezko Komunikazioari buruzko martxoaren 31ko 7/2010 Lege Orokorraren 22. artikuluan xedatutakoari jarraikiz, ikus-entzunezko komunikazio zerbitzuen arloan eskumena duen organoari jakinarazi beharko diote. Jakinarazpen hori Nafarroako ikus-entzunezko komunikazio zerbitzuen emaileen Erregistroan inskribatuko da.
2. Katean emititzeko eskubidea erabiliko da titular bakoitzari emandako lizentziagatik dagozkion betebeharrak galarazi gabe.
III. KAPITULUA. IRABAZTEKO ASMORIK EZ DUTEN IKUS-ENTZUNEZKO KOMUNIKAZIO ZERBITZUAK
1. Legez irabazteko asmorik gabekoak diren entitate pribatuek irabazteko asmorik gabeko ikus-entzunezko komunikazio zerbitzu komunitarioak ematen ahal dituzte, gizarte talde edo komunitate jakin baten gizarte, kultur edo komunikazio beharrei erantzuteko, eta, orobat, herritarren parte-hartzea sustatzeko eta elkarteen ehuna osatzen laguntzeko.
2. Entitate horiek ikus-entzunezko komunikazio zerbitzuak emateko, Estatuko Administrazio Orokorrak jabari irrati-elektriko publikoaren gaikuntza eman beharko du aurretik, baita ikus-entzunezko komunikazio zerbitzuen arloan eskumena duen kontseilariak lehiaketa publikoaren bidez aurretik emandako lizentzia ere. Lehiaketa hori publikotasun, berdintasun, konkurrentzia eta gardentasun printzipioei jarraikiz tramitatuko da.
3. Lizentziek, betiere, beren jatorrizko izaerari eutsiko diote, hau da, irabazteko asmorik gabeko ikus-entzunezko komunikazio zerbitzuetarako lizentziak izatea, eta ezin izanen dira eskualdatu edo errentan eman, Ikus-entzunezko Komunikazioari buruzko martxoaren 31ko 7/2010 Lege Orokorraren 32.5 artikuluan xedatutakoari jarraikiz.
4. Lizentziak Nafarroako ikus-entzunezko komunikazio zerbitzuen emaileen Erregistroan inskribatuko dira.
25. artikulua . Finantza kudeaketaren ebaluazioa.
1. Zerbitzu hauek ematen dituzten entitateek beren funtsen jatorria justifikatu beharko dute, baita gastu eta diru-sarreren banantzea ere, horrelakorik baldin badago, behar den memoria ekonomikoa aurkeztuz.
2. Zerbitzua ematen duten entitateen finantza kudeaketaren ebaluazioari dagokionez, ikus-entzunezko komunikazio zerbitzuen arloan eskumena duen organoak begiratuko du Ikus-entzunezko Komunikazioari buruzko martxoaren 31ko 7/2010 Lege Orokorraren 32.6 artikuluan xedatutakoa betetzen dela.
IV. KAPITULUA. NAFARROAKO IKUS-ENTZUNEZKO KOMUNIKAZIO ZERBITZUEN EMAILEEN ERREGISTROA
26. artikulua . Sorrera eta izaera.
1. Nafarroako Ikus-entzunezko komunikazio zerbitzuen emaileen Erregistroa sortzen da, ikus-entzunezko komunikazio zerbitzuen arloan eskumena duen organoari atxikita.
2. Nafarroako Ikus-entzunezko komunikazio zerbitzuen emaileen Erregistroa publikoa izanen da, eta hango inskripzioek aitorpenen ondorioak izanen dituzte.
1. Erregistroaren xedea da, Nafarroako Foru Komunitateko estaleremua gainditu gabe, ikus-entzunezko komunikazio zerbitzuak ematen dituzten pertsona fisiko edo juridikoak inskribatzea, jarduera horretan hasi aurreko jakinarazpena modu sinesgarri batean egin badute, edo, lurreko uhin hertziarren bidezko ikus-entzunezko komunikazio zerbitzuen kasuan, esleitutako lizentzien titularrak badira.
2. Ikus-entzunezko Komunikazioari buruzko martxoaren 31ko 7/2010 Lege Orokorraren 33.2 artikuluan xedatutakoari jarraikiz, zerbitzu hori ematen duten entitateetan partaidetza handia duten titularrak ere inskribatuko dira, daukaten kapitalaren ehunekoa aipatuz.
28. artikulua . Inskribatuko diren datuak.
1. Ikus-entzunezko komunikazio zerbitzuaren emaileei dagokienez, gutxienez datu hauek inskribatuko dira:
a) Izen eta abizenak, edo kasua bada, sozietatearen izena eta nazionalitatea.
b) Identifikazio fiskaleko zenbakia.
c) Helbidea, jakinarazpenetarako.
d) Legezko ordezkariaren identifikazioa eta sinestamendua, halakorik baldin badago.
e) Zerbitzu-emailearen merkataritza-izena eta helbidea.
f) Dagokion erregistroan egindako inskripzioari buruzko datuak, halakorik baldin badago.
g) Kapital sozialean partaidetza handia duten titularren izen-abizenak edo, hala badagokio, sozietatearen izena, eta identifikazio fiskaleko zenbakia, zuzenean nahiz zeharka kapitalean daukaten ehunekoa adierazita.
h) Ikus-entzunezko komunikazio zerbitzuen beste emaile batzuekin dituzten loturak.
2. Lurreko uhin hertziarren bidezko ikus-entzunezko komunikazio zerbitzuari dagokionez, gutxienez datu hauek inskribatuko dira:
a) Ikus-entzunezko komunikazio zerbitzuaren ezaugarri teknikoak.
b) Programazioaren ezaugarriak.
c) Lizentzia ematea.
c) Lizentzia berritzea.
e) Lizentzien gaineko negozio juridikoak.
e) Lizentzia iraungitzea.
f) Kateko emanaldiak.
3. Aurretik jakinarazi beharreko ikus-entzunezko komunikazio zerbitzuari dagokionez, gutxienez datu hauek inskribatuko dira:
a) Ikus-entzunezko komunikazio zerbitzuaren azalpena eta hedatzeko erabilitako teknologia.
b) Ikus-entzunezko zerbitzu hori hedatzen duen hedapen-zerbitzuaren emailearen identifikazioa, aurretiko jakinarazpena egiten duen zerbitzu-emailea ez den beste pertsona bat baldin bada.
c) Estaleremua, emitituko dituen kanalak eta programazioaren ezaugarriak.
4. Irabazteko asmorik gabeko entitateen kasuan, gutxienez, entitate horien izaeraren arabera dagozkion datuak inskribatuko dira. Gainera, zerbitzu-emaile horien txosten ekonomikoak erregistroan gordailutuko dira.
29. artikulua . Inskribatzeko prozedura.
1. Nafarroako ikus-entzunezko komunikazio zerbitzuen emaileen Erregistroko inskripzioak interesdunak eskatuta eginen dira, edo ofizioz, hurrengo idatz-zatietan ezartzen denari jarrraikiz.
2. Erregistroko lehenengo inskripzioa, hala zerbitzu-emaileari dagokionez, nola eman nahi den ikus-entzunezko komunikazio zerbitzuari dagokionez, ofizioz eginen da, lizentzia eman ondoren edo, 6. artikuluan adierazitakoaren arabera, aurretiko jakinarazpenak ondorioak sortzen hasi eta gero.
3. Ikus-entzunezko komuikazio zerbitzuaren emaileak behartuta daude Erregistroko datuak eguneraturik edukitzera. Lehenengo inskripzioa egin ondoren, inskribaturiko datuetan gertatzen diren aldaketa guztiak jaso beharko dira Erregistroan, hala titularrari dagozkionak, nola ematen den ikus-entzunezko komunikazio zerbitzuari dagokionez. Inskribaturiko datuak aldatzeko jakinarazpena ikus-entzunezko komunikazio zerbitzuaren emaileak egin beharko du, aldaketa gertatu eta hilabeteko epean gehienez, beharrezkoa diren egiaztagiriak aurkeztuz.
4. Aurreko idatz-zatian xedatutakoa gorabehera, aldaketaren jatorria Nafarroako Foru Komunitateko Administrazioak berak emandako egintza bat baldin bada, ofizioz eginen da behar den idazpena.
5. Dagokion inskripzioaz gainera, ofizioz idatziko dira, orobat, foru dekretu honen V. kapituluan xedatutakoari jarraikiz ikus-entzunezko komunikazio zerbitzuen emaileei jartzen zaizkien zehapen irmo guztiak.
30. artikulua . Inskripzioa deuseztatzea.
Ikus-entzunezko komunikazio zerbitzuen emaile baten erregistroko inskripzioa deuseztatuko da haren gaikuntza iraungitzen denean legez ezarritako edozein kausa dela-eta.
31. artikulua . Estatuko Erregistroarekiko koordinazioa.
Ikus-entzunezko komunikazio zerbitzuen arloan eskumena duen organoak behar diren baliabideak jarriko ditu Nafarroako ikus-entzunezko komunikazio zerbitzuen emaileen Erregistroa eta estatuko Erregistroa koordinatzeko.
32. artikulua . Publikotasun araubidea.
1. Eskatzen duen edozein pertsonak sarbide librea du erregistroan jasotzen diren inskripzioetara, deusetan galarazi gabe datu pertsonalak babestea indarra duen legediari jarraikiz.
2. Edozein pertsona fisiko edo juridikok eska ditzake inskribaturiko datuen ziurtapenak. Erregistroko idazpenen edukia modu sinesgarrian egiaztatzeko baliabide bakarra erregistroko ziurtapenak dira.
V. KAPITULUA. IKUSKATZEA ETA ZEHATZEA
33. artikulua . Ikuskatzeko eta zehatzeko ahalmenak erabiltzea.
Ikus-entzunezko komunikazio zerbitzuen arloan eskumena duen organoak gainbegiratu, kontrolatu eta aktiboki babesteko eskumenak erabiliko ditu bermatzeko foru dekretu honetan eta, kasua bada, ikus-entzunezko zerbitzuei buruzko gainerako arau aplikagarrietan ezarritakoa betetzen dela. Zehatzeko ahalmena ere erabiliko du, bidezkoa denean, foru dekretu honen aplikazio eremuan sartutako ikus-entzunezko komunikazio zerbitzuei dagokienez.
34. artikulua . Ikuskapen lanetarako gaikuntza.
1. Ikus-entzunezko komunikazio zerbitzuen arloan eskumena duen organoak izendatu eta egiaztatutako langileek eginen dute ikuskapen lana. Beren eginkizunetan ari direla, ikuskatzaileek agintari publiko gisa jarduten dute. Ikuskatzaileek egindako jarduketak akta batean jasoko dira, frogatarako balioko duena, deusetan galarazi gabe interesdunek, nork bere eskubideak edo interesak defenditzeko, adierazi edo ekartzen ahal dituzten beste proba batzuk.
2. Ikuskapen lanen barrenean, zilegi izanen da ikus-entzunezko komunikazio zerbitzuen emaileei eskatzea zerbitzu-ematearen gainean beharrezkotzat jotzen den edozein informazio eman dezaten. Horren ondorioetarako, zerbitzu-emaileek emitituriko programa guztiak artxibatu beharko dituzte, Ikus-entzunezko Komunikazioari buruzko martxoaren 31ko 7/2010 Lege Orokorraren 61.1 artikuluan ezarri bezala.
Horrela lortzen den informazioa isilpekoa izanen da, eta ezin izanen da erabili foru dekretu honetan ezarritako helburuez beste batzuetarako.
35. artikulua . Arauhausteak eta zehapenak.
Ikus-entzunezko Komunikazioari buruzko martxoaren 31ko 7/2010 Lege Orokorraren VI. tituluan xedatutakoaren araberakoa izanen da arau-hauste eta zehapenen araubidea.
36. artikulua . Zehapen prozedura eta prozedurak irekitzeko organo eskuduna.
1. Zehapen prozedura Nafarroako Foru Komunitateko Administrazioari buruzko abenduaren 3ko 15/2004 Foru Legean xedatutakoaren araberakoa izanen da.
2. Zehapen prozedura irekitzea ikus-entzunezko zerbitzuen arloan eskumena duen zuzendari nagusiari dagokio.
37. artikulua . Zehapenak ezartzeko eskumena duten organoak.
1. Arau-hauste oso larriengatiko zehapenak ikus-entzunezko zerbitzuen arloan eskumena duen kontseilariak jarriko ditu.
2. Arau-hauste larri eta arinengatiko zehapenak ikus-entzunezko zerbitzuen arloan eskumena duen zuzendari nagusiak jarriko ditu.
VI. KAPITULUA. IKUS-ENTZUNEZKO KOMUNIKAZIO ZERBITZUEN EMAILEEN ETA ERABILTZAILEEN ESKUBIDEAK
38. artikulua . Erabiltzaileek ikusentzunezko zerbitzuen edukien kontrolean parte hartzea.
1. Edozein pertsona fisiko edo juridikok eska dezake egiaztatzea ikus-entzunezko zerbitzuen edukiak indarreko legediaren araberakoak edo autorregulaziorako edo korregulaziorako kodeen araberakoak diren. Hori helburu, ikus-entzunezko zerbitzuen arloan eskumena duen organoak Entzuleak Defendatzeko Bulego bat izanen du, ikus-entzunezko komunikazio zerbitzuen erabiltzaileek egindako kontsulta, aholku eta kexak jaso eta tramitatzeko.
2. Ikus-entzunezko zerbitzuen arloan eskumena duen organoak atzematen baldin badu ustez zilegi ez den eduki bat emititu dela, entzunaldia emanen dio zerbitzuaren emaileari eta, kasua bada, esku-hartzea eskatu zuen pertsonari, hamabost eguneko epean egoki iruditzen zaiena alega dezaten.
3. Ikus-entzunezko zerbitzuen arloan eskumena duen organoak akordioak adosten ahalko ditu zerbitzuaren emailearekin ikus-entzunezko edukia aldatzeko edo, hala badagokio, zilegi ez diren edukiak dituen emanaldiari bukaera emateko.
4. Zerbitzu-emaileak akordioa benetan betetzen badu, ez da zehapen prozedurarik irekiko akordioaren xede izan den edukia dela-eta, eta zehapen prozedura ireki baldin bada, bukaera emanen zaio, betiere arau-hauste arintzat har daitezkeen egintzak izan baldin badira.
5. Laurogeita hamar eguneko epean, antzera jokatu eta berregilea baldin bada, arau-hauste larritzat hartuko da.
39. artikulua . Autorregulazioa.
1. Ikus-entzunezko komunikazio zerbitzuen arloan eskumena duen organoak sustatuko du ikus-entzunezkoen sektorean autorregulaziorako eta korregulaziorako arauak eta jokabide-kodeak hartzea, eta horiek bete daitezen begiratuko du.
2. Ikus-entzunezko komunikazio zerbitzuen emaileek eskubidea dute ikus-entzunezko komunikazioaren edukiak arautzeko kodeak onesteko, baita horiek prestatzeko ardura profesionaleko arauak ere.
3. Ikus-entzunezko komunikazio zerbitzuen emaile batek kode bat onesten duenean, dela berak bakarrik, dela beste emaile batzuekin batera, edo aurretik dagoen kode bati atxikitzen bazaio, ikus-entzunezko zerbitzuen arloan eskumena duen organoari eta Nafarroako Kontsumo Kontseiluari jakinarazi beharko die. Ikus-entzunezko zerbitzuen arloan eskumena duen organoak egiaztatuko du kodea indarreko araudiaren araberakoa denetz, eta kontraesanik ez badago, argitaratzeko aginduko du.
4. Ikus-entzunezko komunikazio zerbitzuen arloan eskumena duen organoak begiratuko du autorregulaziorako kodeak betetzen direla, eta horrela, ikus-entzunezko eduki batek zerbitzu-emaileak sinatutako autorregulazio-kode bat urratzen duenean, eduki hori kodearen xedapenetara berehala egokitzeko edo emanaldia eteteko eskatuko zaio.
Xedapen Gehigarri Bakarra. Ikusentzunezko Hedabideen Titularitatearen Erregistroa kentzea.
Ikus-entzunezko Hedabideen Titularitatearen Erregistroa kentzen da.
Lehenengo Xedapen Iragankorra. Indarreko gaikuntza tituluak dituzten zerbitzuemaileek lehenbiziko aldiz inskribatzea Nafarroako ikusentzunezkoen komunikazio zerbitzuen emaileen Erregistroan.
1. Foru dekretu honek indarra hartzen duenean indarra duten gaikuntza tituluak dituzten ikus-entzunezko komunikazio zerbitzuen emaileak, lehendik Ikus-entzunezko Hedabideen Titulartasunaren Erregistroan inskribaturik bazeuden, ofizioz inskribatuko dira Nafarroako ikus-entzunezko komunikazio zerbitzuen emaileen Erregistroan, hiru hilabeteko epean.
2. Ikus-entzunezko komunikazioaren arloan eskumena duen organoak inskribatu beharreko datuak osatzeko informazioa bidaltzeko eskatzen ahalko die aurreko idatz-zatian aipatutako zerbitzu-emaileei.
Bigarren Xedapen Iragankorra. Lizentzia bihurtutako kontzesioen araubide juridikoa.
Ikus-entzunezko Komunikazioari buruzko martxoaren 31ko 7/2010 Lege Orokorraren bigarren xedapen iragankorrean ezarritakoa betez, ikus-entzunezko komunikazio zerbitzua zeharka kudeatzeko kontzesioen titular izatetik ikus-entzunezko komunikazio zerbitzua emateko lizentzien titular bilakatu zirenei foru dekretu honetan eta gainerako arau aplikagarrietan ezarritakoa aplikatuko zaie. Lizentzia horiek, orobat, aldatu diren kontzesioek zituzten baldintza berberak bete beharko dituzte, betiere indarreko araudiarekin bateragarriak baldin badira.
Xedapen Indargabetzaile Bakarra. Arauak indargabetzea.
Indarrik gabe utzi dira foru dekretu honetan xedatutakoari aurka egiten dioten maila bereko edo apalagoko xedapen guztiak eta, zehazki, azaroaren 10eko 336/1997 Foru Dekretua, Nafarroako Foru Komunitatean frekuentzia modulatuko uhin metrikozko irrati emisoreetarako baimenak ematea arautzen duena.
Azken Xedapenetan Lehena. Arauak emateko ahalmena.
Ikus-entzunezko komunikazio zerbitzuen arloan eskumena duen kontseilariari ahalmena ematen zaio foru dekretu hau garatzeko behar diren arau guztiak eman ditzan.
Azken Xedapenetan Bigarrena. Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2012ko urtarrilaren 25ean.-Nafarroako Gobernuko lehendakaria, Yolanda Barcina Angulo.-Kulturako, Turismoko eta Erakunde Harremanetako kontseilaria, Juan Luis Sánchez de Muniáin Lacasia.
Iragarkiaren kodea: F1201349
