(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

1/2011 FORU LEGEA, otsailaren 15ekoa, mendetasun-egoera aitortzeko prozedura ezartzen duena eta Nafarroan mendetasun-egoera balioesteko ekipoak eta organoa osatuko dituzten langileen antolamendua, eginkizunak eta araubidea ezartzen dituena Nota de Vigencia.

BON N.º 40 - 28/02/2011

  I. KAPITULUA. Arau orokorrak

  II. KAPITULUA. Baloratzeko taldeak eta organoa

  III. KAPITULUA. Mendetasunegoera aitortzeko prozedura eta sistemako prestazioak jasotzeko eskubidea

  IV. KAPITULUA. Autonomiaren Aldeko eta Mendetasunari Arreta Eskaintzeko Sistemaren eragingarritasuna eta zehatzeko eskumena

ZIOEN AZALPENA

Autonomia Pertsonala Sustatzeari eta Mendetasun-egoeran dauden Pertsonak Zaintzeari buruzko abenduaren 14ko 39/2006 Legearen bidez, zeina onetsi baitzen Konstituzioaren 149.1.1 a) artikuluaren babesean, hain zuzen Espainiako Estatuko lurralde osoan berdintasunaren printzipioa bermatzeko, arautu ziren mendetasun-egoeran dauden pertsonen autonomia sustatzeko eta haiei laguntza emateko oinarrizko baldintzak, horretarako Autonomiaren Aldeko eta Mendetasunari Arreta Eskaintzeko Sistema bat sortuz, administrazio publiko guztien parte-hartzearekin.

Lege-testu horrek herritarrek autonomia pertsonalerako eta mendetasun-egoeran dauden pertsonei laguntza emateko eskubide subjektibo bat egituratzen du. Eskubide hori unibertsaltasun, berdintasun eta eskuragarritasun printzipioetan oinarrituta dago, eta bera gauzatzeko mendetasun-egoeran dauden herritarrei laguntza integrala eskaintzeko eredu bat garatuko da, aitortzen baita herritarra izanen dela sistemaren onuraduna.

Horrenbestez, erronka da egoera berezi batean egoteagatik kalteberak diren pertsonei, dituzten premietan laguntza eskaintzea, hau da, uneoroko bizitzako oinarrizko ekintzak aurrera eramateko laguntza eskaintzea, autonomia pertsonal handiagoa eskuratu eta herritar gisa dituzten eskubideez guztiz baliatu ahal izateko.

Horretarako, besteak beste, aipatutako legeak, 27. artikuluan, mendetasun-egoera baloratzeko metodoa edo sistema ezartzen du, eta autonomia erkidegoen eskuetan uzten du mendetasun-egoerak baloratzeko taldeak zehaztea; izan ere, talde horien ardura izanen da mendetasun gradu edo mailari buruzko ebazpena ematea, eta pertsonak beharko lituzkeen zainketak zein diren ere adieraztea.

Gainera, Estatuko lege horren 28. artikuluko 6. idatz-zatiak ezartzen du mendetasun-egoerak balioesteko zerbitzuak, zerbitzu eta prestazioak ematea agintzea, eta prestazio ekonomikoak kudeatzea, denak ala denak lege honetan aurreikusitako zerbitzuak, administrazio publikoek bideratu beharko dituztela, eta ezin izango direla erakunde pribatuen esku utzi.

Halaber, ezartzen da lurralde kontseiluak irizpide komun batzuk zehaztu beharko dituela, autonomia erkidegoetako balorazio-taldeen osaerari eta jarduteko moduari dagokienez, eta ezartzen du kasu guztietan organo horiek publikoak izanen direla.

Horretarako, Autonomiaren Aldeko eta Mendetasunari Arreta Eskaintzeko Sistemaren Lurralde Kontseiluak, 2010eko urtarrilaren 25ean, Mendetasun-egoera baloratzeko organoei eta prozedurei buruzko erabakia onetsi zuen, eta Estatuko Aldizkari Ofizialaren 2010eko martxoaren 12ko 62. zenbakian argitaratu zuen.

Erabaki horretan, balorazio-taldeen osaerari buruzko irizpide komunak eta mendetasuna baloratzeko baremoa aplikatzen duten baloratzaileei eskatu beharreko ezagupenak ezarri ziren, bai eta prozedurarako oinarrizko irizpideak ere.

Bestalde, modu osagarrian, Gizarte Zerbitzuei buruzko abenduaren 14ko 15/2006 Foru Legeak xede nagusi gisa ezartzen du populazioaren gizarte ongizatea lortzea Nafarroako Foru Komunitatearen esparruan, eta, hala, gizarte zerbitzuez baliatzeko eskubide unibertsala bermatzea. Era berean, 15/2006 Foru Legearen xedea da gizarte zerbitzuen sistema bat itxuratzea, halako moduan non bermatuko baita zerbitzuak pertsonen autonomia, duintasuna eta bizi kalitatea ziurtatuko dituzten baldintza onenetan ematen direla.

Abenduaren 14ko 15/2006 Foru Legearen aplikazio-esparrua 4., 6., 7. eta 8. artikuluetan jasota dago; izan ere, artikulu horiek ezartzen dute zein diren gizarte zerbitzuen hartzaileak eta zein diren haien eskubideak eta betebeharrak.

Horrenbestez, foru lege honen xedea da, Nafarroako Parlamentuko Osoko Bilkuraren erabakiak kontuan hartuta, Autonomia pertsonala sustatzeari eta mendetasun-egoeran dauden pertsonak zaintzeari buruzko abenduaren 14ko 39/2006 Legearen 27. artikuluan ezarritakoa betetzea; izan ere, artikulu horretan eskumenak ematen zaizkien autonomia erkidegoei mendetasun-egoera baloratzeko organoak eta taldeak zehazteko; balorazio-organoek eta -taldeak osatu behar dituzten langileen antolamendu araubidea garatzea eta erregulatzea eta haiek, kalifikazio-eginkizunak betetzeko, berezko dituzten ahalmenak eta atribuzioak zehaztea.

Halaber, foru lege honen xedea da mendetasun-egoerak baloratzeko lanpostuei atxikitako langileen antolamendua eta araubidea erregulatzea; halaber, lanpostu horietara sartzeko oinarrizko baldintza batzuk eta lanpostu horien dedikazio-araubidea ezartzea.

I. KAPITULUA. Arau orokorrak

1. artikulua. Xedea.

1. Foru lege honen xedea da mendetasun-egoera aitortzeko prozedura ezarri, mendetasun-egoera baloratzeko organo eta talde eskudunen osaera eta eginkizunak zehaztu eta banakako laguntza programak prestatu, Autonomiaren Aldeko eta Mendetasunari Arreta Eskaintzeko Sistemari dagokion esparruan, betiere Nafarroako Foru Komunitateko lurralderako.

2. Halaber, foru lege honen xedea da mendetasun-egoerak baloratzeko lanpostuei atxikitako langileen antolamendua eta araubidea erregulatzea eta lanpostu horietara sartzeko oinarrizko baldintza batzuk ezartzea.

3. Foru lege honek aurreikusten ez duenerako, Nafarroako Administrazio Publikoen Zerbitzuko Langileen Estatutua aplikatuko da.

2. artikulua. Aplikazio esparrua.

Nafarroako Foru Komunitateko Administrazioak mendetasun-egoera aitor dezan, mendetasun-graduren bat daukaten pertsonek Autonomia Pertsonala Sustatzeari eta Mendetasun-egoeran dauden Pertsonak Zaintzeari buruzko abenduaren 14ko 39/2006 Legearen 5. artikuluan zehaztutako baldintzak bete beharko dituzte; halaber, Nafarroako edozein udaletan bizi eta erroldatuta egon beharko dute eskaera aurkezteko unean.

II. KAPITULUA. Baloratzeko taldeak eta organoa

3. artikulua. Balorazio ekintzaren printzipio nagusiak.

1. Autonomia Pertsonala Sustatzeari eta Mendetasun-egoeran dauden Pertsonak Zaintzeari buruzko abenduaren 14ko 39/2006 Legean eta hura garatzeko arauetan aurreikusitako mendetasun-egoeraren gaineko balorazio-eginkizunak egiten dituzten langileak Nafarroako Foru Komunitateko Administrazioko gizarte zerbitzuen arloko departamentu eskudunari atxikita egonen dira.

2. Balorazioa egiten duten langileek beren izaeraren egiaztagiri bat edukiko dute, eta hura erakutsi beharko dute beren eginkizunetan jarduteko.

4. artikulua. Eginkizunak eta osaera.

1. Balorazio taldeak izanen dira eskatzailearen mendetasun-gradua eta maila zehaztuko dutenak. Gutxienez balorazio talde bat egonen da.

2. Balorazio taldeek eginkizun hauek izanen ditu:

a) Aplikatzea mendetasun-gradu eta mailei buruzko balorazio-baremoa eta hiru urtez beherako adingabeentzako berariazko balorazio-eskala; bi horiek apirilaren 20ko 504/2007 Errege Dekretuan ezarri ziren. Izan ere, errege dekretu horren bidez mendetasunen bat duten pertsonen egoera baloratzeko baremazioa onartu zen.

b) Txostena egitea ohiko inguruneari eta irisgarritasunari buruz, horrela elementuak eskuratzeko, gradu eta mailari buruzko irizpen teknikoa egoki egiteko beharrezkoak direnak.

c) Nafarroako Foru Komunitateko Administrazioko organo eskudunaren aurrean formulatzea gradu eta mailari buruzko ebazpenaren proposamena, Nafarroan Autonomiaren Aldeko eta Mendetasunari Arreta Eskaintzeko Sistemako prestazioetarako eta zerbitzuetarako eskubidea aitortzeko prozedurari dagokionez.

d) Gradu eta mailari buruzko eta mendetasun-gradua eta -maila berraztertzeko eskaerei buruzko irizpen teknikoak ematea.

e) Autonomiaren Aldeko eta Mendetasunari Arreta Eskaintzeko Sistemako erabiltzaileei orientazioa eta aholkua ematea.

f) Nafarroako Foru Komunitateko Administrazioa parte deneko auzi-prozeduretan laguntza teknikoa eta aholkua ematea, mendetasun-egoera eta haren gradu eta maila baloratzeari dagokienez.

g) Legez edo erregelamendu bidez esleitu dakizkiekeen bestelako eginkizunak.

3. Balorazio taldeak lanbide anitzekoak izanen dira, funtzionarioez osatuak eta publikoak. Eredu biopsikosozialean enkoadratuta egonen dira eta beren lanbidearen berezitasunak ekarriz jardunen dute, betiere diziplina arteko ikuspegi batetik.

4. Balorazio organoa funtzionario publikoen kasuko lanpostuen zerrendan definitutako langile teknikariak osatuta egonen da. Aipatu organoa ondoko arloetan unibertsitate-titulua duen pertsona banak osatuko du: arlo sozialean, arlo psikologikoan eta arlo sanitarioan.

5. Balorazio organoak eginkizun hauek izanen ditu:

a) Balorazioaren gaineko erreklamazioei buruzko txostena egitea, organo eskudunak erreklamazio horiek ebazteari begira.

b) Kalitatea kudeatzeko sistemak ezartzea balorazio prozesuetan.

c) Legez edo erregelamendu bidez esleitu dakizkiekeen bestelako eginkizunak.

6. Balorazio taldeak eta balorazio organoa osatzen dituzten funtzionarioek gutxienez ere honako ezagutzak eduki beharko dituzte:

a) Balorazioa eta baremoa arautzen duen araua zorrotz ezagutzea.

b) Mendetasuna duten pertsonen taldeen ezaugarri funtzionalei buruzko behar adina ezagutza izatea, bereziki adingabeen kasuan, adimen-ezgaitasuneko kasuetan, buru-gaixotasunetan eta narriadura kognitibo handiena duten pertsonen kasuan.

c) Balorazio teknikak egoki erabiltzea, bereziki elkarrizketa pertsonalean; izan ere, elkarrizketa arestian aipatutako taldeen berezitasunen arabera egin beharko da.

d) Informazio iturri desberdinak erabiltzea: osasunari buruzko txostena elkarrizketa pertsonala eta zuzeneko behaketa.

e) Behar adinako praktika eta prestakuntza, lanbidean jardun aurretik harremanetan jartzeko balorazioa egiten duten langileak eta mendetasuna baloratzeko egiazko egoerak.

f) Baloratzaileen kualifikaziorako behar diren edukiak garatzen dituzten espezializazioko prestakuntza ikastaroak egitea.

7. Beharrezkotzat joz gero, balorazio-taldeek langile kualifikatuen aholkua eta laguntza teknikoa edukiko dituzte -Nafarroako beste administrazio publiko batzuetako funtzionarioak izan beharko dira-, beren eskumenen arloan laguntza teknikoa emateko. Lankidetza horren oinarriak tresna juridiko egokia izan beharko du eta kasuan kasu aplikatzekoak diren lege xedapenen arabera.

8. Balorazio taldeak organikoki gizarte zerbitzuen arloko departamentu eskudunean egonen dira, edo, bestela, departamentu horren menpeko erakunde publiko baten egituran.

5. artikulua. Prestakuntza eta ebaluazioa.

1. Lanbide jardunean prestakuntza izatea, hobetzen joatea eta gaurkotuta egotea mendetasun-egoerak baloratzeko taldeak osatzen dituzten langileen eskubidea eta betebeharra dira.

2. Prestakuntza, funtsean, balorazio-eginkizunak hobeki betetzera zuzenduko da eta plangintzatik heldu diren premiei eta beren jarduerak garatzerakoan baloratzaileek topatzen dituzten premiei erantzunen diete.

3. Urtero, mendetasun-egoerari buruzko balorazioak egiten dituen organo eskudunak Prestakuntza eta Hobekuntza Plana onetsiko du. Plan horretan, izan ere, lortu beharreko helburuak jasoko dira, funtsean.

4. Aldian-aldian ebaluazio bat eginen da, eta txosten bat, Nafarroako Parlamentuan aurkeztuko dena, honakoak hobetzeari buruzkoa: mendetasun-egoera baloratzeko sistema eta Autonomiaren Aldeko eta Mendetasunari Arreta Eskaintzeko Sistemako prestazioak jasotzeko eskubidea.

6. artikulua. Baloratzaileen betebeharrak, beren eginkizunetan dihardutela.

Mendetasun-egoera baloratzeko berezko eginkizunen jarduera gauzatzerakoan, baloratzaileek honako berariazko betebeharrak izanen dituzte:

a) Beren burua identifikatzea, berariaz emandako egiaztagiriarekin, mendetasun-egoera baloratzeko jarduera guztietan.

b) Balorazio jarduera hasi aurretik, informazioa ematea eskatzaileari, edo kasua bada bere legezko ordezkariari, jardueraren edukiari buruz eta garatu beharreko probei buruz, bai eta balorazioaren garapena dela-eta dauzkaten eskubideei buruz ere.

c) Beti ahal den errespetu eta begiramen handienaz jokatzea, eta bereziki babestea baloratu beharreko pertsonen intimitatea.

d) Bere karguarengatik, eginkizunengatik eta jarduerengatik ezagutzen dituen gaiak direla eta sekretua eta isilekotasun profesionala betetzea.

e) Pertsonen intimitatean eragina duten edo izan dezaketen datu pertsonalei buruzko konfidentzialtasuna gordetzea.

f) Beren jardunean, objektibotasunez, gardentasunez eta inpartzialtasunez jokatzea.

g) Gizarte zerbitzuen eta zerbitzu eta entitate publiko eta pribatuen hartzaileei eta arloko profesionalei legez aitortutako eskubideetatik erator litekeen beste edozein eskubide edo betebehar.

7. artikulua. Esku ez hartzea.

Langile baloratzaileek ez dute esku hartuko balorazio prozedura batean -eta beren agintari hierarkikoari jakinaraziko diote hori-, administrazio publikoen zerbitzuko langileen jarduerari buruz arau indardunetan esku ez hartzeko aurreikusitako kasuren bat gertatzen denean.

8. artikulua. Lanpostuak eskuratzea.

1. Mendetasun-egoera baloratzeko lanpostuetara sartzeko prozedura deialdi publiko bidez eginen da eta Nafarroako administrazio publikoen zerbitzuko langileen estatutuan, oro har, eta hura garatzeko arauetan ezarritakoaren arabera eginen da, bai lanpostuak betetzeari dagokionez, bai funtzio publikoan sartzeari dagokionez ere.

2. Mendetasun-egoera baloratzeko lanpostu batean sartzeko edo balorazio organoko lanpostu batean, dela lanpostuak betetzeko prozedura baten bitartez, dela lanpostu horietan sartzeko prozeduraren bitartez, hurrengo titulazio hauetako bat eduki beharko da: medikuntza, psikologia, terapia okupazionala, erizaintza, fisioterapia edo gizarte-lana. Halaber, honako baldintzak bete beharko dira: ibilgailuak gidatzeko B motako baimena edo baliokidea izatea, eta mendetasuna duten pertsona-taldeen ezaugarri funtzionalen gaineko ezagutzari buruz eta mendetasun-egoera baloratzeari buruz eta gizarte zerbitzuei buruz ezarritako probak gainditzea.

III. KAPITULUA. Mendetasun-egoera aitortzeko prozedura eta sistemako prestazioak jasotzeko eskubidea

9. artikulua. Prozeduraren hasiera.

1. Mendetasun-egoera aitortzeko eta Autonomiaren Aldeko eta Mendetasunari Arreta Eskaintzeko prestazioak jasotzeko eskubidea mendetasun-graduren bat izan dezakeen pertsona baten ekimenez edo hura ordezkatzen duen beste pertsona baten ekimenez hasiko da. Haren izapidetzea Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legean eta Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoaren arabera eginen da, betiere foru lege honetan ezartzen diren berezitasunekin.

2. Egoitzetan, eguneko zentroetan, lanerako prestatzeko zentroetan, errehabilitazio psikosozialeko zentroetan edo Autonomiaren Aldeko eta Mendetasunari Arreta Eskaintzeko Sistemako edo Gizarte Zerbitzuen Zorroko zerbitzuen katalogoko beste edozein zerbitzutan laguntza hartzen duten pertsonen kasuan -dela Nafarroako Foru Komunitateko sare publikoan, dela itunduan-, Nafarroako Foru Komunitateko Administrazioak erraztasunak eman ahalko ditu eta sustatu ahalko du mendetasun-egoera aitor dadin, interesdunaren eskubideak babeste aldera.

Aurreko idatz zatian aipatutako pertsonen balorazioak, edozein dela ere haien mendetasunaren gradua eta maila, ez du inongo eraginik izanen administrazio-ebazpenez jada, foru lege honetan araututako prozedurari hasiera eman aurretik, aitortuta izan ditzaketen eskubideetan.

10. artikulua. Eskaerak.

Mendetasun-egoerari buruzko aitorpenaren eskaera eta Autonomiaren Aldeko eta Mendetasunari Arreta Eskaintzeko Sistemako prestazioak jasotzeko eskubidearen aitorpenaren eskaera eginen dira erregelamenduz ezarritako moduan eta baldintzekin, eta Administrazioak ez du exijituko bere bulegoetan duen dokumenturik.

11. artikulua. Eskaerak aurkezteko tokia.

Eskaerak aurkeztu ahalko dira prozedura administratiboari buruzko araudian ezarritako edozein erregistrotan, eta espedientea izapidetuko da kasuko oinarrizko gizarte zerbitzuaren bidez nahiz auzoko unitatearen bidez, edo gizarte zerbitzuen arloan eskuduna den departamentuaren bidez edo osasun etxe baten nahiz osasun mentaleko zentro baten bidez.

12. artikulua. Zuzenketa.

Hasteko eskaerak ez baditu biltzen exijitzen diren baldintza guztiak edo foru lege honetako 11. artikuluan zehaztutako dokumentazio aurkezten ez bada, organo eskudunak interesdunari eskatuko dio hamar eguneko epean akatsa zuzen dezan edo behar diren agiriak aurkez ditzan. Interesdunak hori egiten ez badu, organo eskudunak eskaera ezetsi eginen du, eta behar den ebazpena emanen du legez ezarritako moduan.

13. artikulua. Txosten soziala.

Mendetasunari arreta eskaintzeko sistemako prestazio bat eskuratzeko prozeduran, gizarte txosten bat eskatuko zaie interesduna bizi den udaleko oinarrizko gizarte zerbitzuei, osasun etxeari edo osasun mentaleko zentroari. Txostenaren helburua izanen da eskatzailearen egoera soziala eta familiarra baloratzea; gainera, zerbitzu edo prestazio egokiena emateko orientabideak emanen ditu.

Kasuko pertsona Nafarroako Foru Komunitatearen lurraldeko administrazio publiko baten titulartasuneko baliabide baten erabiltzailea baldin bada, zentroko zuzendaritzak eta gizarte langileak baliabidea kokatuta dagoen udaleko oinarrizko gizarte zerbitzuekin batera eginen dute lan eskatzailearen txosten soziala egiteko.

14. artikulua. Mendetasunegoeraren balorazioa.

1. Behin eskaerak jaso eta erregistratu ondoren, mendetasunaren arloan eskuduna den unitate administratiboak eskatzaileari jakinaraziko dio zein egunetan eta zein ordutan joanen diren haren etxebizitzara, mendetasuna baloratzeko baremoa aplikatzeko, edo hiru urtetik beherakoen kasuan, berariazko baloraziorako eskala aplikatzeko.

2. Aparteko kasuetan, justifikatutako inguruabar pertsonal eta familiarrengatik eskatzailearen balorazioa bere etxebizitzan egiterik ez dagoenean, unitate administratibo eskudunak balorazioa beste toki batean egitea erabaki ahalko du.

3. Mendetasun-egoerari buruzko balorazioa egiteko, kontuan hartuko da mendetasuna baloratzeko baremoa edo, hiru urtetik beherakoen kasuan, berariazko balorazioari buruzko eskala. Gainera, interesdunari buruzko hurrengo txostenak hartuko dira kontuan: osasun txostena eta bizi den inguruneari buruzko txostena; halaber, kontuan hartuko dira, kasua bada, agindu zaizkion laguntza teknikoak, ortesiak eta protesiak.

4. Aparteko kasuetan, balorazio taldeak entitate desberdinei eskatu ahalko zaizkie beharrezkotzat jotzen dituen txosten osagarriak edo argibide-txostenak, espedientean dauden aurrekarien edukia edo interesdunaren inguruabar bereziak direla eta hori gomendagarritzat jotzen denean.

5. Mendetasunaren arloan eskuduna den unitate administratiboaren aurrean behar bezala kreditatutako larrialdi kasuetan, unitate administratibo horren arduradunak behar diren tresnak ezarriko ditu kasuko balorazio taldeak eskatzailea lehentasunez baloratzeko.

6. Balorazioa ezinezkoa denean interesdunari egoztekoak diren arrazoiak direla eta, organo eskudunak agiri bidezko behar den komunikazioa eginen du, eta berariaz ohartaraziko du ezen, hiru hilabete iragan ondoren, prozedura iraungitzat joko dela. Epe hori errekerimendua egin zaion partikularrak behar diren jarduerak egin gabe iraganez gero, organo eskudunak erabakiko du jarduerak artxibatzea, eta interesdunari jakinaraziko dio hori.

7. Idatz-zati berria. Mendetasun-egoerari buruzko aitorpenaren eskaera ebazteko gehieneko epea hiru hilabetekoa izanen da, eskaera sartzen denetik kontatzen hasita.

15. artikulua. Banakako laguntza programaren prestaketa.

1. Behin interesdunaren mendetasun-egoerari buruzko balorazioa amaitu ondoren, balorazio horren graduak eta mailak indarra baldin badute abenduaren 14ko 39/2006 Legearen amaierako xedapenetako lehenengoan edo Gizarte Zerbitzuen Zorroan ezarritakoaren arabera, arestian aipatutako 39/2006 Legearen 29. artikuluan aipatzen den banakako laguntza programa prestatuko da.

Programa hori unitate administratibo eskudunaren bitartez gauzatuko da edo, kasua bada eta organo eskudunak baimena eman ondoren, hark eskuordetutako entitate publikoak eginen du.

2. Banakako laguntza programa egiterakoan, udal oinarrizko gizarte zerbitzuen sare publikoko teknikariek igorritako txostenari erreparatuko zaio, foru lege honetako 13. artikuluan ezarritakoari jarraituz.

Halaber, interesdunak edo banakako laguntza programa prestatzeko behar den informazioa ematen duten beste entitate publiko batzuek aurkeztutako beste txosten tekniko batzuk hartu ahalko dira kontuan.

3. Programa horretan, interesdunaren gradurako eta mailarako 39/2006 Legean edo Gizarte Zerbitzuen Zorroan jasotako zerbitzu eta prestazioetatik, eskatzailearen premiei hobekien egokitzen zaizkien esku hartzeko moduak proposatuko dira, betiere prestazio ekonomikoetarako ezarritako berariazko baldintzak betetzen badira.

4. Banakako laguntza programak ezartzen baldin badu interesdunaren premietarako esku hartzeko modurik egokiena dela 39/2006 Legearen 15. artikuluan zehaztutako zerbitzu bat eta zerbitzu hori ez bazaio ematen ari, banakako laguntza programaren eraginkortasuna zerbitzua egiaz ematen hasten den dataren araberakoa izanen da. Pertsona interesdunari proposaturiko zerbitzua eskuratzea bidezkoa ez bada, Autonomiaren Aldeko eta Mendetasunari Arreta Eskaintzeko Sisteman edo Gizarte Zerbitzuen Zorroan aurreikusitako beste zerbitzu edo prestazio bat eskainiko zaio.

5. 39/2006 Legearen 29.1 artikuluan ezarritakoari jarraituz, onuradunak eta, bidezkoa bada, haren familiak edo hura ordezkatzen duen entitateak, foru lege honetako 16. artikuluan araututako entzunaldiaren bitartez hartuko du parte banakako laguntza programan proposaturiko aukerak hautatzerakoan, betiere Autonomiaren Aldeko eta Mendetasunari Arreta Eskaintzeko Sistemako eta Nafarroako Gizarte Zerbitzuen zorroko zerbitzu eta prestazioen sarean eskuragarri dagoenaren arabera.

6. Mendetasun-egoera baldin bada gaixotasun mentala diagnostikatu izanaren ondorio, Nafarroako Foru Komunitateko Plan Soziosanitarioa izanen da konponbide egokiena emanen diena mendetasun-egoeran gaixotasun horren ondorioz dauden pertsonei.

16. artikulua. Entzunaldiaren izapidea.

1. Banakako Laguntza Programaren proposamena eginda, ardura duen organoak proposamenaren berri emanen die interesduna bizi den udaleko oinarrizko gizarte zerbitzuei, osasun etxeari edo buruko osasun etxeari. Proposamen horrek orobat jasoko ditu aldez aurretik eginiko balorazio teknikoak ezartzen duen mendetasun gradua eta maila.

2. Parte hartzeko eta, kasua bada, hautatzeko aukera emanen zaie interesdunari eta, bidezkoa bada, haren familiari edo haren ordezkari diren tutoretza-entitateei. Betiere, interesdunari adieraziko zaio bizi den udaleko oinarrizko gizarte zerbitzuei, osasun etxeari edo buruko osasun etxeari kontsulta egin behar diela, haren mendetasun-egoeraren arabera eta egoera soziofamiliarraren arabera egokiena den erabakia hartzeko.

3. Baldin eta Banakako Laguntza Programaren proposamenean gomendatzen bada egoitza batean sartzea eta espedienteetan jasota dauden txostenetan egiaztatzen bada ezkontidearekin batera sartzeko borondate argia dagoela, egoera hori aintzat hartu ahalko da, proposamen horretan ohar gisa jasota, nahiz eta ezkontideak ez izan onartua mendetasun-egoera.

17. artikulua. Mendetasunegoerari buruzko aitorpena eta Autonomiaren Aldeko eta Mendetasunari Arreta Eskaintzeko Sistemako prestazioak jasotzeko eskubidearen aitorpena egiteko proposamena.

1. Behin Banakako Laguntza Programa prestatuta, unitate administratiboak ebazpen proposamena aurkeztuko dio organo eskudunari, zeinak zehaztu eginen baitu zer zerbitzu eta prestazio emanen zaizkion pertsona eskatzaileari.

2. Proposamen horretan ezarriko da, bidezkoa denean eta kasuko inguruabarren arabera, gehienez ere zer epetan egin beharko den, baldin eta egin behar bada, erabakitako graduaren eta mailaren lehen berrikuspena.

18. artikulua. Mendetasunegoerari buruzko aitorpena eta Autonomiaren Aldeko eta Mendetasunari Arreta Eskaintzeko Sistemako prestazioak jasotzeko eskubidearen aitorpena.

1. Mendetasunaren arloko administrazio organo eskudunak kasuko ebazpenak emanen ditu; haien bidez ondokoak ezarriko ditu:

a) Eskatzailearen mendetasun gradua eta maila, zehaztua eskubiderik duen mendetasun prestazioak jasotzeko, dela 39/2006 Legearen azken xedapenetan lehenak ezarritako egutegiari dela Gizarte Zerbitzuen Zorroan ezarritakoari jarraikiz. Orobat ezarriko da, bidezkoa denean eta kasuko inguruabarren arabera, gehienez ere zer epetan egin beharko den, baldin eta egin behar bada, erabakitako graduaren eta mailaren lehen berrikuspena.

b) Banakako Laguntza Programa, zeinetan jasoko baita 39/2006 Legean ezarritako zerbitzuetarik eta prestazioetarik zein diren egokienak eskatzailearentzako laguntza ziurtatzeko. Betiere, foru lege horretako 15.3 artikuluan ezarritakoa izanen da gutxienekoa.

2. Prestazioa edo zerbitzua aitortzen duen administrazio ebazpena gehienez ere sei hilabeteko epean eman eta jakinaraziko da. Epe hori eskaera aurkezten den egunean hasiko da zenbatzen.

Horren ondorioetarako, espedientea geldiarazita egon den epea ez da aintzat hartuko eskatzaileari egotzi zaizkion arrazoiengatik izan bada.

3. Salbuespenez, giza baliabideak nahiz baliabide materialak agortuta, organo eskudunak prozedura ebazteko gehieneko epea luzatu ahalko du, kontuan hartuta aurkeztutako eskaera kopurua eta pertsona ukituen kopurua zein den edo epea luzatzeko administrazio ebazpenean espresuki zehazten diren beste inguruabar batzuk.

4. Mendetasun-egoerari buruzko aitorpenak Espainiako Estatuko lurralde osoan izanen du balioa.

19. artikulua. Banakako Laguntza Programaren eraginkortasuna.

1. Mendetasun-egoerari buruzko aitorpena eta Autonomiaren Aldeko eta Mendetasunari Arreta Eskaintzeko Sistemako prestazioak jasotzeko eskubidearen aitorpenean jasota ageriko da zein egunetatik hasita izanen diren eraginkorrak Banakako Laguntza Programan jasotako zerbitzuak eta prestazioak.

2. Banakako Laguntza Programan egoitzako laguntza zerbitzu bat hartzea jasotzen baldin bada, Mendetasun-egoerari buruzko aitorpenaren eta Autonomiaren Aldeko eta Mendetasunari Arreta Eskaintzeko Sistemako prestazioak jasotzeko eskubidearen aitorpenaren kopia bat igorriko zaio egoitzako zuzendariari, programa horren jarraipena egin dezaten errazte aldera.

20. artikulua. Baliabideak.

Autonomiaren Aldeko eta Mendetasunari Arreta Eskaintzeko Sistemako prestazioetarako eta zerbitzuetarako eskubidea aitortzen duen administrazio-ebazpenaren aurkako gora jotzeko errekurtsoa jarri ahalko da, Herri administrazioen araubide juridikoaren eta administrazio prozedura erkidearen azaroaren 26eko 30/1992 Legean eta Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoari jarraikiz.

21. artikulua. Mendetasunegoera eta sistemako prestazioak berraztertzea.

1. Aitortutako mendetasun gradua eta maila eta Banakako Laguntza Programa berraztertu ahalko dira, banaka nahiz biak batera, ondoko artikuluetan ezarritakoari jarraikiz.

2. Mendetasun-egoeraren gradua eta maila, Banakako Laguntza Programa, edo horiek biak, berraztertzeko prozedurak ebazteko epea sei hilekoa izanen da.

22. artikulua. Mendetasunegoera berraztertzea.

1. Mendetasun-egoeraren gradua eta maila abenduaren 14ko 39/2006 Legearen 30. artikuluan ezarritako zioengatik berraztertu ahalko da; prozedura ofizioz abiarazi ahalko du administrazio-organo eskudunak, bai eta interesdunak edo haren legezko ordezkariak eskatuta ere.

2. Berraztertzeko eskaerarekin batera, egoera aldatu izana behar bezala kreditatzen duten txosten guztiak -osasun faktoreak, okerragotu edo hobetu izanari buruzkoak- aurkeztu beharko ditu interesdunak, aldaketa behar bezala egiaztatze aldera. Mendetasun-egoeraren graduaren eta mailaren berrazterketa ukatuko zaie aldaketa horiek kreditatzen ez dituzten interesdunei.

23. artikulua. Banakako Laguntza Programaren berrazterketa.

1. Banakako Laguntza Programa berraztertu ahalko da:

a) Interesdunak edo haren legezko ordezkariek eskatuta.

b) Ofizioz programa onetsi zuen administrazio organoak.

2. Nolanahi ere, beste erkidego batetik etortzeagatik bizilekua aldatzen baldin bada, Banakako Laguntza Programa berraztertu ahalko da, bai alde batek eskatuta bai ofizioz administrazio organo eskudunak.

3. Banakako Laguntza Programan aitortutako prestazioak ondoko kasuetan aldatu ahalko dira:

a) Mendetasun gradua edo maila edo onuradunaren egoera pertsonala aldatzeagatik.

b) Gradua edo maila aitortzeko ezarritako betekizunak edo baldintzak aldatzeagatik.

c) Onuradunak 39/2006 Legean ezarritako eginbeharrak ez betetzeagatik.

d) Prestazio edo zerbitzu berriak sortzeagatik, horien intentsitatea areagotzeagatik edo zerbitzuaren nahiz sistemaren sareko egoitzaren eskuragarritasunarengatik, baldin eta aitortutako prestazioa zerbitzuari atxikitako prestazio ekonomia bada.

4. Berraztertzeko prozedurari aplikatzekoa izanen da, bidezkoa denean, Banakako Laguntza Programa prestatze aldera foru lege honetan ezarritakoa.

5. Banakako Laguntza Programaren berrazterketa eskatzeko epea lehengo Programa egin zenetik urtebetekoa izanen da gutxienez, baldin eta aldaketa interesdunak eskatuta egiten bada. Epe hori ez da aplikatuko baldin eta osasun nahiz gizarte arloko txostenen arabera justifikatuta badago Banakako Laguntza Programa behar baino lehenago berraztertzeko beharra.

24. artikulua. Prestaziorako eskubidea azkentzea.

1. Autonomiaren Aldeko eta Mendetasunari Arreta Eskaintzeko Sistemako prestazioak jasotzeko eskubidea azkenduko da onuradunak ondoko egoeretakoren batean dagoenean:

a) Bertan bizitzeari uztea edo bizilekua Espainiako lurraldetik kanpora eramatea urtebetetik gora.

b) Prestazio bakoitza jasotzeko eskubidea aitortze aldera eskatzen diren baldintza edo betekizun berariazkoetarik bat ez betetzea.

c) Prestazio edo laguntza bateraezin bat jasotzea.

d) Hiltzea. Prestazio sortu baina ordaindu gaberik baldin badago, ordaindu eginen da alderdi legitimoak eskatuz gero. Heriotza gertatu den hileko azken egunera artekoa ordainduko da.

e) Mendetasun gradua eta maila aldatzea, aldaketa horrek prestazioa edo zerbitzua jasotzeko eskubidea galtzea baldin badakar.

2. Familiaren esparruko zainketetarako eta zaintzaile ez-profesionalei laguntzeko prestazio ekonomikoaren titularrak ez du prestazio hori jasotzeko eskubidea galduko, egoitza-laguntzako zerbitzu batean aldi baterako egoteagatik zaintzaile ez-profesionalaren prestakuntza, atseden edo gaixotasun aldi bat dela-eta, non eta aldi hori ez den urtean 3 hilabetetik gorakoa.

25. artikulua. Berrazterketen eta azkentzeen eragingarritasuna.

1. Berrazterketak aitortu den zerbitzuaren intentsitatea edo edukia aldatzea nahiz zerbitzua azkentzea baldin badakar, aldaketa edo azkentze horren eragingarritasuna, oro har, hori ezartzen duen ebazpena ematen den egunaren biharamunean ezarriko da.

2. Aldaketak prestazio ekonomiko baten kopuruari eragiten baldin badio edo hura azkentzea baldin badakar, aldaketa edo azkentzea ekarri duten inguruabarrak aldatu ondoko hilabeteko lehen egunetik aitzina izanen ditu ondorioak.

IV. KAPITULUA. Autonomiaren Aldeko eta Mendetasunari Arreta Eskaintzeko Sistemaren eragingarritasuna eta zehatzeko eskumena

26. artikulua. Prestazio ekonomikoen eta zerbitzuen jarraipena.

1. Nafarroako Foru Komunitateko Administrazioak, kasuan kasuko organo eskudunen bidez, esaterako ikuskaritza-zerbitzuen edo oinarrizko gizarte zerbitzuen bidea, Autonomiaren Aldeko eta Mendetasunari Arreta Eskaintzeko Sistematik heldu diren funts publikoak, prestazioak, zerbitzuak nahiz onura guztiak behar bezala erabili eta aplikatuko direla zainduko du.

2. Mendetasun-egoeran dagoen pertsona bizi den udaleko oinarrizko gizarte zerbitzuek bere lurraldean Banakako Laguntza Programa behar bezala aplikatzearen eta, kasua bada, onuradunaren egoerari egokitzearen jarraipena egiten lagunduko dute.

3. Pertsona hori Nafarroako Foru Komunitatearen lurraldeko administrazio publikoaren titulartasuneko baliabide baten erabiltzailea bada eta baliabide hori Autonomiaren Aldeko eta Mendetasunari Arreta Eskaintzeko Sistemaren bitartez jaso badu, zentroko zuzendariak eta gizarte-langileek ere lagunduko dute zerbitzuaren onuradunari Banakako Laguntza Programa zuzen aplikatzearen jarraipena egiten.

4. Autonomiaren Aldeko eta Mendetasunari Arreta Eskaintzeko Sistemako prestazioen onuradun oro eta, kasua bada, haien ordezkariak, jakinarazi egin beharko dute aitortuak dituzten prestazioak jasotzeko eskubideari, edukiari edo intentsitateari eragiten ahal dieten inguruabarretan gertatzen den aldaketa oro, aldaketa gertatu eta hogeita hamar eguneko epean.

Betebehar hori bete ezean, baldin eta horren ondorioz jaso behar ez ziren zenbatekoak jaso badira edo zerbitzuen kostuan behar adinako parte hartzerik izan ez bada, onuradunak zenbateko horiek itzuli beharko ditu edo kasuko aldea ordaindu behar izanen du.

Lehenengo xedapen gehigarria .Aitortzea zein egoeratan den beharrezkoa beste pertsona baten laguntza.

1. Ezgaitasunaren inguruko prozedura, adierazpen eta kalifikazioari buruzko abenduaren 23ko 1971/1999 Errege Dekretuko 2. eranskineko baremoari jarraikiz beste pertsona baten laguntza beharrezkoa dutela aitortu zaien pertsonen mendetasun-egoera aitortzeari buruzko ebazpena kasuan kasuko mendetasun gradua eta maila aitortzera mugatuko da, baremo horretan emandako puntuazio zehatzaren arabera, Mendetasunen bat duten pertsonen egoera baloratzeko baremoa onartu zuen apirilaren 20ko 504/2007 Errege Dekretuko lehen xedapen gehigarriko bigarren idatz-zatian jasotako taularekin bat.

Edozein kasutan ere, baldin eta interesdunak, haren familiartekoek edo haren ordezkari diren tutoretza-entitateek hala eskatzen badute, mendetasuna baloratzeko kasuko baremoa edo, kasua bada, berariazko balorazio-eskala aplikatuta baloratu ahalko da.

2. Baldin eta hasieran aitortutako gradua eta maila baino txikiagoa ezartzen bada balorazio horren bidez, horri eutsiko zaio, mendetasun-egoeran dagoen pertsonak eskubiderik gal ez dezan eta hari kalterik ez eragiteko.

3. Baldin eta balorazioaren ondorioz hasieran aitortutako gradua eta maila baino handiagoa ezartzen bada, aldatu eginen da kasuko administrazio-ebazpenaren bidez, balorazioaren bidez lortutako emaitza horretara egokitzeko.

Bigarren xedapen gehigarria .Nafarroako Foru Komunitateko sare publikoko edo hitzartuko egoitzetan dauden pertsonen mendetasunegoera aitortzea.

Foru lege hau indarrean sartzen den unean adinagatik nahiz ezgaitasun bat izateagatik sare publikoko egoitzetan edo zerbitzuetan dauden pertsonek haien mendetasun-egoeraren balorazioa eskatzen ahalko dute, baldin eta egoitza edo zerbitzu horietan sartu badira ezgaitasun graduari erreparatuta edo haien osasun-egoeraren balorazioari, egoera soziofamiliarrari edo mendetasun-egoerari erreparatuta, zaharrei eta ezgaitasunen bat dutenei laguntzeko egoitzetako plazak esleitzeko arauei jarraikiz.

Pertsona horiei dagokien Banakako Laguntza Programak foru lege hau indarrean sartzen den unean jasotzen dituzten zerbitzuak jasoko ditu, non eta ez diren kontrakoa justifikatzen duten arrazoi zehatzak gertatzen, eta hori ez da eragozpen izanen etorkizunean berraztertzeko.

Hirugarren xedapen gehigarria .Beste autonomia erkidego edo hiri batzuetan mendetasunegoerak aitortze aldera abiarazitako prozedurak.

Beste autonomia erkidego edo hiri batzuetan mendetasun-egoerak aitortze aldera abiarazitako prozedurak dirauen bitartean bizilekua Nafarroako Foru Komunitateko lurraldera aldatzen duten pertsonen espedienteetako dokumentazioak eta jarduketek Nafarroako Foru Komunitatean ere balio ahalko dute, jatorriko administrazioan espedientea aldez aurretik eskatuta. Eskaera horrek aurrera egin dezan, interesdunak, datu pertsonalen babesari buruzko araudi indardunarekin bat, espresuki eman beharko du horretarako baimena.

Laugarren xedapen gehigarria .Gizon eta emakumeen arteko berdintasuna.

Foru lege honetako gaztelaniazko testuan, kargu-izenak edo lanpostuak aipatzeko genero gramatikal maskulinoko substantiboak erabiltzen diren kasuetan ulertuko da ekonomia hutsez aipatzen direla horrela, eta modu orokorrean aipatu nahi direla postu horiek, gizonezkoek betetzen dituztenerako nahiz emakumeek betetzen dituztenerako, eragin juridiko berdin-berdinekin.

Bosgarren xedapen gehigarria .Bitarteko elektronikoen bidezko prozedurak.

Nafarroako Gobernuak behar diren neurriak hartuko ditu, herritarrek modu elektronikoan egin ahal izan ditzaten, gehienez ere urtebeteko epean, foru lege honetan aipatzen diren prozedurak, kontuan hartuta betiere Nafarroako Foru Komunitateko Administrazioan Administrazio Elektronikoa ezartzeko apirilaren 4ko 11/2007 Foru Legean aurreikusitakoa.

Baliabide elektronikoen bidezko prozedurek ez dituzte ohiko baliabideen bidezko prozedurak desagerraraziko, behar diren baliabide eta ekipo teknologikoak ez dituztenak babeste aldera eta herritarren borondatezkotasunaren printzipioa ziurtatze aldera.

Seigarren xedapen gehigarria. Mendekotasuna dutenen Autonomiarako eta Arretarako Sistemak gutxieneko babesmailarako bermatutako zenbatekoak Nota de Vigencia.

Nafarroako Foru Komunitateko Administrazioak bermatuko du Mendekotasuna dutenen Autonomiarako eta Arretarako Sistemari dagozkion prestazio ekonomikoen gutxieneko zenbatekoak iristen direla Estatuko Administrazio Orokorrak onuradunei bermatzen dien gutxieneko babes-mailara.

Lehen xedapen iragankorra .Autonomiaren Aldeko eta Mendetasunari Arreta Eskaintzeko prestazioak aitortzea I. gradua mendetasun moderatua onartu zaien pertsonei.

Balorazio-taldeak eginiko balorazio teknikoa egin ondotik eskatzaileari I. gradua -mendetasun moderatua- aitortzen baldin bazaio, aitorpen hori egiten duen ebazpenak mendetasun-egoeraren gradua eta maila soilik ezarriko ditu. I. gradu horretako eta horri dagozkion mailetako prestazioak eraginkorrak izan behar diren egunaren aurreko hiru hilabeteko epean eginen da Banakako Laguntza Programa, 39/2006 Legearen azken xedapenetan lehenak ezarritako egutegiarekin bat.

Bigarren xedapen iragankorra .Foru lege hau baino lehenagoko eskaeren izapidetzea.

Izapidetzeko unean aplikatzekoa zen araudiari jarraikiz izapidetuko dira foru lege hau indarrean sartu aurretik aurkeztutako eskaerak; entzunaldiaren izapidea, aldiz, foru lege honetako 16. artikuluan ezarritakoari jarraikiz eginen da. Onesten diren ebazpenen aurka gora jotzeko errekurtsoa aurkeztu ahalko da, foru lege honetan ezarritakoari jarraikiz.

Hirugarren xedapen iragankorra .Sartzeko lehentasuna.

1. Mendetasun-egoeran dauden pertsonek zerbitzuak eta prestazioak jasotzeko lehentasuna izanen dute, bai 39/2006 Legearen azken xedapenetan lehenak ezarritako egutegiari jarraikiz bai Gizarte Zerbitzuen Zorroan ezarritakoari jarraikiz, Nafarroako Foru Komunitateko sare publikoko edo hitzartuko egoitzetan -ezgaitasun intelektuala dutenei laguntzeko egoitzetan- sartzeko itxaronzerrendan sartuta dauden pertsonen aldean, zaharrentzako egoitzetan sartzeari begira.

2. Orobat, mendetasun-egoeran dauden pertsonek Gizarte Zerbitzuen Zorroko gainontzeko prestazioak -autonomia sustatzeko eta mendetasun-egoeran daudenei laguntza ematekoak- Nafarroako Foru Komunitateko sare publikoan edo hitzartuan jasotzeko lehentasuna izanen dute, bai 39/2006 Legearen azken xedapenetan lehenak ezarritako egutegiari jarraikiz bai Gizarte Zerbitzuen Zorroan ezarritakoari jarraikiz, itxaronzerrendan sartuta dauden pertsonen aldean.

Laugarren xedapen iragankorra .Mendetasunaren arretarako aitortuta dauden laguntzak ordaintzea.

Nafarroako Gobernuak 2011ko ekainaren 30a baino lehenago ordainduko ditu, oso-osorik, aitortuta bai baina ordaindu gabe dauzkan mendetasunaren arretarako laguntzak, eta ez du ordainketa hori inolaz ere atzeratuko.

Xedapen indargabetzaile bakarra.Arauak indargabetzea.

Indargabeturik geratzen dira foru lege honetan ezarritakoaren aurkakoak diren maila bereko edo apalagoko xedapen guztiak eta, bereziki, Mendekotasuna baloratu eta aitortzeko eta Mendekotasuna duten pertsonendako Banakakoaren Arreta Programa prestatzeko prozedurak ezartzen dituen urtarrilaren 19ko 6/2008 Foru Dekretua, 2009ko otsailaren 9ko 17. Nafarroako Aldizkari Ofizialean argitaratu baitzen.

Azken xedapenetan lehena .Foru legea garatzeko eta betearazteko araudia.

Nafarroako Gobernuari ahalmena ematen zaio behar adina xedapen eman ditzan foru lege hau garatu eta betearazteko.

Azken xedapenetan bigarrena .Gaixotasun mental larria duten pertsonentzako laguntza.

Foru lege honek indarra hartu eta hiru hilabeteko epean, Nafarroako Gobernuak, galdetuta aldez aurretik Osasunbidea-Nafarroako Osasun Zerbitzuko osasun mentaleko espezialisten zerbitzuei, Nafarroako Mendetasun Agentziari eta gaixotasun mentalak dituzten pertsonen elkarteei, eta haiekin guztiekin lankidetzan, Parlamentura txosten bat igorriko du jasoko duena zein den modu egokiena laguntza emateko gaixotasun mental larria diagnostikatuta bai baina horren aitorpenik ez duten pertsonei; hain zuzen ere, ez aitorpenik abenduaren 14ko 39/2006 Legean, ezta gizarte-zerbitzuen zorroan ere.

Azken xedapenetan hirugarrena .Indarra hartzea.

Foru lege honek Nafarroako Aldizkari Ofizialean argitara eman eta biharamunean hartuko du indarra.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2011ko otsailaren 15ean.-Nafarroako Gobernuko lehendakaria, Miguel Sanz Sesma.

Iragarkiaren kodea: F1103113

Gobierno de Navarra

Contacte con nosotros | Accesibilidad | Aviso legal | Mapa web