(ir al contenido)

navarra.es

Castellano | Euskara | Français | English

LEXNAVARRA


Versión para imprimir

Versión en castellano

38/2010 FORU DEKRETUA, EKAINAREN 21EKOA, FAMILIA UGARIEI BURUZKO MARTXOAREN 25EKO 20/2003 FORU LEGEA GARATZEN DUENA Nota de Vigencia

BON 08/09/2010



  I. KAPITULUA. XEDAPEN OROKORRAK


  II. KAPITULUA. HEZKUNTZAREN EREMUKO NEURRIAK


  III. KAPITULUA. GARRAIO ARLOKO NEURRIAK


  IV. KAPITULUA. ETXEBIZITZAREN EREMUKO NEURRIAK


  V. KAPITULUA. OSASUNAREN EREMUKO NEURRIAK


Atariko

Familia Ugariei buruzko martxoaren 25eko 20/2003 Foru Legea (maiatzaren 18ko 6/2005 Foru Legeak eta abenduaren 23ko 16/2009 Foru Legeak aldatua) tresna arautzailea da, bai familia ugarien kontzeptua, aitortza, izaera eta kategoriak, bai haien babesak sorturiko neurriak zehazteko.

Familia Ugariei buruzko martxoaren 25eko 20/2003 Foru Legearen bigarren xedapen gehigarriak ezartzen du Nafarroako Gobernuak, foru lege honetan jasotako neurriak garatzeko, kontuan hartuko dituela beste inguruabar batzuk, familia ugarien seme-alaben kopuruaz eta per capita errentaz gain, hala nola familia unitateko edozein kideren desgaitasuna eta egoera txarreko familia inguruneen ahultasuna.

Orobat, aipatu foru legearen azken xedapenetako bigarrenak xedatzen du Nafarroako Gobernuak arauzko xedapenak emanen dituela foru lege honetan ezarritakoa aplikatzeko eta garatzeko. Aurreikuspen bera dago Nafarroako 2010eko Aurrekontu Orokorrei buruzko abenduaren 23ko 16/2009 Foru Legearen hogeita hamaseigarren xedapen gehigarrian.

Foru dekretu honen bitartez, legez aurreikusitakoa bete gogo da, bai xedapen orokorren zenbait alderdiri dagokienez, hala behar dutelako haien aplikaziorako, bai, modu berezian, familia ugariei ematen zaien babesa guztiz eraginkorra izan dadin.

Horiek horrela, Familia, Gazteria, Kirol eta Gizarte Gaietako kontseilariak proposaturik, Nafarroako Kontseiluak aldeko txostena eman ondoren, eta Nafarroako Gobernuak 2010eko ekainaren 21eko bilkuran hartutako erabakiari jarraikiz,

DEKRETATU DUT:

I. KAPITULUA. XEDAPEN OROKORRAK

1. artikulua. Xedea.

Familia Ugariei buruzko martxoaren 25eko 20/2003 Foru Legea garatzea du xede foru dekretu honek, bai xedapen orokorrei dagokienez, bai familia ugarientzako babesa osatzen duten neurriei dagokienez.

2. artikulua. Familia ugaria izateko baldintzak eta izaera horren aitortza.

Estatuko oinarrizko legerian ezarrita daude familia ugaria izateko baldintzak eta izaera horren aitortza.

3. artikulua. Eskumenak.

1. Gizarte gaietan eskumena duen Nafarroako Gobernuko departamentuak koordinatuko ditu, familiaren arloan eskumena duen Zuzendaritza Nagusiaren bidez, departamentu bakoitzak, zeinek bere arloaren arabera, familia ugariei ematen dizkieten zuzeneko zein zeharkako laguntzak.

Orobat, familiaren arloan eskumena duen Zuzendaritza Nagusiak urtero argitaratuko du deialdi bat, familia ugariei propio laguntzeko.

2. Kasu bakoitzean eskumena duen Nafarroako Gobernuko departamentuak ezarriko ditu familia ugariei laguntzak emateko baremoak eta prozedurak, bai erregelamendu bidez bai haiek urteko laguntzetarako deialdietan sartuta.

3. Zein den eskatzen den laguntza eta zein arlotan den eskudun Nafarroako Gobernuko departamentua, hari eskatu beharko zaizkio foru dekretu honetan jasotako zuzeneko zein zeharkako laguntzak.

4. Laguntza bakoitzerako erregulazioa, per capita errenta kontuan hartuta eginen baita, arlo bakoitzeko eskumena duen Nafarroako Gobernuko departamentuari dagokio. Familia Ugariei buruzko martxoaren 25eko 20/2003 Foru Legearen 1.2 artikuluaren arabera, per capita errenta ateratzeko, familia ugaria osatzen duten kide guztien Pertsona Fisikoen Errentaren gaineko Zergaren zerga-oinarriaren parte orokorra, deialdiaren zergaldiari dagokiona, familiako kideen kopuruaren artean zatituko da.

5. Familiaren arloan eskumena duen Zuzendaritza Nagusiak urtean behin argitaratuko du familia ugariek jasotzen ahal dituzten laguntzei buruzko informazioa; horretarako, arlo horretan zerikusia duten Nafarroako Gobernuko departamentu guztiek laguntzetan aurreikusitako aldaketak igorri beharko dituzte urte bukaeran.

Udalaren titulartasuneko Gizarte Zerbitzu Oinarrizkoak ere informazio horren hartzaile izanen dira.

II. KAPITULUA. HEZKUNTZAREN EREMUKO NEURRIAK

4. artikulua. Hezkuntza sistemaren babesa.

1. Hezkuntzan eskumena duen departamentuak onesten dituen beka eta laguntzetarako deialdietan, hezkuntza sistemako mailei buruzkoetan, familia ugariak hartuko dira kontuan haien per capita errentaren arabera, batez ere irakaskuntza, garraio, egoitza eta jantokiko gastuen arloan.

2. Lehen Hezkuntzan eta Bigarrenean, eta hizkuntza murgilketako jardueretarako, hobari bereziak izanen dira familia ugarientzat.

5. artikulua. Lehentasun eskubideak Nota de Vigencia.

Funts publikoz eutsitako ikastetxeetan, Haur Hezkuntza, Lehen Hezkuntza, Derrigorrezko Bigarren Hezkuntza eta Batxilergoko ikasketak egiteko, ikasleak onartzeko prozesua arautzen duten oinarrietan, eskatzailea familia ugariko legezko kide izatea lehentasunezko irizpidea izanen da ikasleak onartzeko.

6. artikulua. Hobarietarako sistemak.

Gizarte gaietan eskumena duen departamentuak, kirol eta gazteria arloan eskumena duten erakunde publikoen bitartez, eta Nafarroako Gobernuko gainontzeko departamentuek familia ugariak hartuko dituzte kontuan ateratzen duten araudian edo urteko laguntzetarako deialdietan, hobarietarako sistemak ezarriko baitituzte haien eskumeneko gizarte etxe, aterpe, herrietako kanpaleku, aisiako jarduera, kultur ondasunetako sarrera eta kirol jardueretan.

III. KAPITULUA. GARRAIO ARLOKO NEURRIAK

7. artikulua. Garraio publikoko hobariak.

Garraio publikoaren arloan eskumena duen departamentuak hobariak ezarriko ditu bere laguntzen artean familia ugarietako kideentzat, garraio publikoa erabiltzeko.

IV. KAPITULUA. ETXEBIZITZAREN EREMUKO NEURRIAK

8. artikulua. Familia ugarien eskubideak etxebizitzaren arloan.

1. Behar den tituluaren jabe direla frogatzen duten familia ugariek onurak eta laguntzak izanen dituzte; hain zuzen ere, Nafarroan Etxebizitzarako Eskubideari buruzko maiatzaren 10eko 10/2010 Foru Legean, Etxebizitzaren arloko jarduketa babesgarriak eta etxebizitzetarako eraikinen sustapena arautzen dituen urtarrilaren 9ko 4/2006 Foru Dekretuan edo arau horien ordez ematen den araudian aitortzen direnak.

2. Etxebizitzaren arloan eskumena duen departamentuak diru-laguntzak ematen ahal ditu maileguetarako, edo berariazko laguntza ekonomikoak ezartzen ahal ditu etxebizitzak zaharberritu edo aldatzeko, familia ugarien beharretara egokitzeko.

V. KAPITULUA. OSASUNAREN EREMUKO NEURRIAK

9. artikulua. Laguntzak.

1. Osasun arloko departamentu eskudunak familia ugarien osasun gastuetarako konpentsazio ekonomikoak edo laguntzak ezarriko ditu kontzeptu hauetan:

a) Ortodontziako tratamenduak: 18 urte bitarte.

b) Entzumenerako protesiak: 16 urtetik 18 urtera bitarte.

c) Preskripzio optikoak (betaurrekoak), 18 urte bitarte.

2. Gizarte gaietan eskumena duen departamentuari dagozkio konpentsazio edo laguntza horien kudeaketa eta tramitazioa, eta osasun arloan eskumena duen departamentuak eman beharko du premiazko laguntza tekniko eta administratiboa, baita aldez aurretik esleitutako aurrekontua ere.

XEDAPEN GEHIGARRIAK

Xedapen gehigarri bakarra. Hobariak lurralde kontribuzioaren arloan.

Nafarroako Gobernuak, foru dekretu honek indarra hartzen duenetik urtebeteko epean, Toki Ogasunei buruzko martxoaren 10eko 2/1995 Foru Legearen 140. artikulua aldatzeko foru lege baten proiektua aurkeztuko dio Nafarroako Parlamentuari, eta bertan ezarriko du, ordenantza fiskalek %90 arteko hobaria arautzen ahal dutela zergen kuota integroan familia ugariko titularrak diren subjektu pasiboentzat.

AZKEN XEDAPENAK

Azken xedapenetako lehena. Arauak emateko gaitasuna.

Baimena ematen zaie arloaren arabera eskumena duten Nafarroako Foru Komunitateko Administrazioko departamentuetako titularrei, foru dekretu hau gara dezaten.

Azken xedapenetan bigarrena. Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2010eko ekainaren 21ean.-Nafarroako Gobernuko Lehendakaria, Miguel Sanz Sesma.-Familia, Gazteria, Kirol eta Gizarte Gaietako kontseilaria, María Isabel García Malo.

Iragarkiaren kodea: F1010965

Gobierno de Navarra

Contacte con nosotros | Accesibilidad | Aviso legal | Mapa web