(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

27/2002 FORU LEGEA, urriaren 28koa, toki esparruko herri kontsultak arautzen dituena.

BON N.º 134 - 06/11/2002

  I. TITULUA. Xedapen orokorrak

  I. KAPITULUA. Herrikontsulten definizioa

  II. KAPITULUA. Ekimena eta deialdia

  II. TITULUA. Hauteskunde administrazioa eta hautesleak

  I. KAPITULUA. Hauteskunde administrazioa

  II. KAPITULUA. Botoa emateko eskubidea

  III. KAPITULUA. Hauteskundeetako sekzio, lokal eta mahaiak

  III. TITULUA. Prozesua

  I. KAPITULUA. Informazio kanpaina

  II. KAPITULUA. Dokumentu ofizialak

  III. KAPITULUA. Botoa aldez aurretik ematea

  IV. KAPITULUA. Bozketa eta botoen zenbaketa

ZIOEN AZALPENA

Espainiako Konstituzioaren 23.1. artikuluak herritarren oinarrizko eskubidetzat jotzen du herritarrek, bai zuzenean bai ordezkarien bidez, gai publikoetan parte hartzea. Zuzenean parte hartzeari dagokionez, 149.1.32 artikuluan Konstituzioak dio Estatuak eskumen osoa duela herri-kontsulten deialdiak baimentzeari buruz.

Erreferendum motei buruzko urtarrilaren 18ko 2/1980 Lege Organikoak, xedapen gehigarrian, udalen herri-kontsultak kanpoan utzi eta dio toki araubideari buruzko legediak araututakoari jarraitu beharko zaiola. Nafarroako toki administrazioari buruzko uztailaren 2ko 6/1990 Foru Legeko 96. artikuluak, bestalde, herri-kontsultak egiteko aukera ematen du; betiere, udalaren eskumenekoak diren gaiei buruzko kontsultak eta herritarren interesentzat garrantzi berezikoak diren tokian tokiko kontsultak izanen dira, eta salbuetsita egonen dira toki ogasunei buruzkoak.

Nafarroako toki administrazioari buruzko uztailaren 2ko 6/1990 Foru Legeak, aipatutako artikuluan, oinarriei buruzko legeko xedapenak garatu zituen -laburregi bada ere-. Arautze hori ez da nahikoa izan eta ez du balio izan herri-kontsultaren bidezko parte hartzea sustatzeko: indarrean daraman denbora guztian ez da bat bera ere izan. Komenigarria da, azken urteotan zenbait autonomia erkidegok egin duten moduan, xeheki arautzea gai hori, eta, horrela, udalek edo bertako herritarrek kontsulta egitea egoki irizten dutenerako, herri-kontsultak egiteko aukera ematea, hots, toki esparruko gaietan parte hartzeko tresna bat ematea herritarrei.

Arau honen helburua da kontsulta prozesuaren bide formala arautzea eta, halaber, prozesu horren inpartzialtasuna, gardentasuna eta objektibotasuna bermatuko duten organoak arautzea, betiere udal autonomiaren printzipioaren barrenean; horrela, estatu demokratikoak berezkoak dituen bai herritarren parte hartzea bai pluralismoa ahalbidetuko dira.

I. TITULUA. Xedapen orokorrak

I. KAPITULUA. Herri-kontsulten definizioa

1. artikulua. Objektua.

Foru lege honen objektua da Nafarroako Foru Komunitatean toki esparruko herri-kontsultak arautzea.

2. artikulua. Toki esparruko kontsulten bidez aztertzekoak diren gaiak.

1. Toki esparruko herri-kontsulta herritarrek gai publikoetan zuzenean parte hartzeko duten tresna bat da; horren bidez, herri bateko biztanleek zer iritzi duten adierazten dute udalaren eskumenekoak izan eta haien interesentzat garrantzi berezikoak diren tokian tokiko gaiei buruz.

2. Ezinen da inola ere tokiko herri-kontsultarik egin, baldin eta hautatzeko ematen diren aukeretakoren bat ordenamendu juridikoaren aurkakoa bada. Orobat, herri kontsultak ezinen ditu udalaren ordezkaritza organoei dagozkien erabaki ahalmenak gutxitu.

3. Herri-kontsultetatik kanpo geldituko dira toki ogasunen arloko gaiak.

3. artikulua. Bozketa unibertsala.

Tokiko herri-kontsultak egiteko, foru lege honetako 14. artikuluak aipagai duen hautesleriaren bozketa unibertsal, libre, berdin, zuzeneko eta sekretua erabiliko da.

4. artikulua. Zer epetan ez dagoen kontsultarik egiterik.

1. Kontsultarik ezinen da deitu, ezta egin ere, hauteskundeak deitu eta egiten direneko tartean; hurrengo hauteskundeak hain zuzen: Gorte Nagusietako diputatu eta senadoreak, Nafarroako Parlamentua, toki entitateko kideak edo Europako Parlamentuko diputatuak hautatzeko hauteskundeak; arau bera aplikatuko zaie estatu esparruko erreferendumei. Halaber, ezinen da kontsultarik deitu, ezta egin ere, salbuespen egoera edo setio egoera indarrean dagoen bitartean.

2. Herri-kontsulta deitzen bada aurreko idatz-zatian aipatutako hauteskundeak edo erreferenduma deitu aurretik edota salbuespen edo setio egoera ezarri aurretik, kontsulta eten eginen da eta aurreko horiek amaitu eta ondorengo hilabetean jarraitu beharko du prozedurak.

3. Herri-kontsulta eragiten duen gaia, emaitza edozein dela ere, ezinen da berriro ere kontsultagai izan udalbatzaren agintaldi berean.

5. artikulua. Hauteskunde barrutia.

Foru lege honi dagokionez, hauteskunde barrutia udalerria da.

II. KAPITULUA. Ekimena eta deialdia

6. artikulua. Ekimena.

1. Prozedura udalbatzak berak has dezake edo herritarrek hala eskatuta. Herritarrek eskatuta hasteko, kasuko udalean erroldatutako herritarren ehuneko hamarren sinadura behar da gutxienez.

2. Udal-erroldan erregistratuta dauden herritar adindun guztiek sina dezakete herritarren eskaera.

7. artikulua. Baldintzen egiaztapena.

1. Prozedura herritarrek eskatuta hasten denean, ekimenaren bultzatzaileek, zeinak gutxienez ere bost herritar izan beharko baitira edo egoitza herrian duten bi herritar-elkarte legez eratuak, udalari agiri bat aurkeztu beharko diote aldez aurretik. Agiri horretan, duten asmoaren berri emanen diote udalari, eta ordezkari bat izendatuko dute; agiriarekin batera, herritarren sinadurak biltzeko erabiliko den orri-eredu bat ere aurkeztuko da. Orri-eredu horretan argi adierazi beharko da zein den kontsultatu nahi den gaia.

2. Sinadurak biltzeko orriak, herritarrak identifikatzeko, hurrengoak jartzeko hutsuneak izan beharko ditu: izena eta abizenak, nortasun agiriaren zenbakia, helbidea eta kautotutako sinadura (hauek kautotu dezakete sinadura: notarioak, kasuko udaleko idazkariak edo horrek eskuordetutako norbaitek). Kautotzea kolektiboa izan daiteke, orrika egina, orri bakoitzean agertzen diren sinadura kopurua adierazita.

3. Udalak, herritarrak hartzeko duen bulegoan, sinadurak biltzeko orriak izanen ditu herritarren eskura; idazkariak edo beste funtzionario batek kautotuko ditu, eta lortutako sinadura guztiak bultzatzaileen ordezkariari emanen dizkio hark eskatzen dizkionean, edo, eskatu ezean, hiru hilabeteko epean, 1. idatz-zatian aipatutako agiria aurkeztu zenetik hasita.

4. Bultzatzaileek behar adina sinadura lortzean, udalean aurkeztuko dute herri-kontsultaren deialdia egiteko eskaera, eta, horrekin batera, sinadura-orriak aurkeztuko dituzte orri bakoitzari zenbakia jarrita. Alkateari dagokio ekimenak prozedura-baldintzak betetzen ote dituen egiaztatzeko neurriak hartzea. Eskariak ez baditu betetzen behar diren baldintzak, udaleko erregistroan eskari hori jaso eta bost egun balioduneko epean, ekimenaren bultzatzaileek izendatutako ordezkariari hamar egun balioduneko epean akatsak konpontzeko eskatuko zaio.

5. Aurreko idatz-zatietan ezarritako tramiteak bete direla egiaztatu ondoren, alkateak, eskaria udaleko erregistroan jaso eta hogeita hamar eguneko epean, osoko bilkuran aurkeztuko du ekimena, eztabaida dadin.

6. Udaleko osoko bilkurak hurrengoetan soilik uka dezake herri- kontsulta:

a) Kontsultatu nahi den gaia ez bada kontsulta daitezkeenetakoa edo udalaren eskumenekoa ez bada.

b) Ez badu eskatutako sinadura kopurua.

c) 4. artikuluan aipatutako eperen batean aurkeztu bada.

d) Proposamenak, 2. artikuluko 2. idatz-zatiari jarraikiz, ordenamendu juridikoa urratzen badu.

8. artikulua. Kontsulta egiteko erabakia.

Kontsulta egiteko erabakia gehiengo osoz hartu beharko du osoko bilkurak, eta kontsulta zehazki nolakoa izanen den jaso beharko du: galdera bat edo gehiago, argi eta garbi idatziak, boto-emaileek baiezkoa edo ezezkoa eman ahal diezaien.

9. artikulua. Baimenaren tramitazioa.

1. Herri-kontsulta egitea erabakitakoan, udalak nazioko gobernuaren baimena eskatuko du, nahitaezkoa baita Nafarroako toki administrazioari buruzko uztailaren 2ko 6/1990 Foru Legeko 96. artikuluaren arabera.

2. Aurreko idatz-zatian ezarritakoa betetzeko, alkateak, bost eguneko epean, Nafarroako Gobernuko Lehendakariari igorriko dio Osoko Bilkurak hartutako aldeko erabakiaren hitzez hitzeko ziurtagiria, espedientearen kopia batekin batera. Lehendakariak, baimen eskaria eginen dio nazioko gobernuari, erabakia jaso eta hamar eguneko epean.

3. Nazioko gobernuak herri-kontsulta egiteko baimenari buruzko erabakia hartu eta Nafarroako Gobernuko lehendakariak, hura jaso eta bost eguneko epean, kasuan kasuko udaleko alkateari helaraziko dio.

10. artikulua. Deialdia.

1. Baimena jaso eta hurrengo bost egun baliodunetan, alkateari dagokio herri-kontsulta deitzea; hori erabaki baten bidez eginen du, non jasoko baita, 8. artikuluan ezarritakoarekin bat, kontsulta zehazki nolakoa izanen den. Halaber, bozketa zein egunetan izanen den adieraziko du; igandea edo jaieguna beharko du izan eta deialdia egin ondorengo hogeita hamargarren egunetik berrogeita bosgarren egunera arte doan bitartean; informazio-kanpainaren iraupena ere ezarri beharko du.

2. Deialdia Nafarroako ALDIZKARI OFIZIALean argitara emanen da, hamar eguneko epean gehienez ere. Orobat, alkateak udaleko iragarki oholean jarriaraziko du deialdia, eta eskualdean hedapen handiena duten komunikabideen bidez ere ezagutzera emanen du.

II. TITULUA. Hauteskunde administrazioa eta hautesleak

I. KAPITULUA. Hauteskunde administrazioa

11. artikulua. Hauteskunde administrazioaren organoak.

Nafarroako Foru Komunitateko Hauteskunde Batzordeak, Eskualdeko Hauteskunde Batzordeak eta hauteskunde mahaiek osatzen dute hauteskunde administrazioa, eta hauteskunde araubide orokorrari buruzko lege organikoa izanen dute arau, foru lege honetako berezitasunak kontuan hartuta betiere. Batzordeak parte hartzen du kontsultaren objektibotasun eta gardentasuna bermatzeko, bai eta berdintasunaren printzipioa botoak ematerakoan ere.

12. artikulua. Eskualdeko Hauteskunde Batzordea.

1. Eskualdeko Hauteskunde Batzordea, deialdia Nafarroako ALDIZKARI OFIZIALean argitaratu eta hirugarren egun baliodunean, kide judizialekin eratu beharko da; hamabosgarren egun baliodunean, aldiz, kide guztiekin.

2. Eskualdeko Hauteskunde Batzordeak foru lege honetan araututako prozedurari buruz hartutako erabakien aurka berraztertzeko errekurtsoa jar daiteke bost eguneko epean, eta administrazioarekiko auzi-errekurtsoa, auzi horien jurisdikzioari buruzko legeak ezartzen duen moduan.

13. artikulua. Giza, gauza eta ekonomia baliabideak.

1. Kontsulta deialdia egin duen udalak Nafarroako Foru Komunitateko Hauteskunde Batzordearen eta Eskualdeko Hauteskunde Batzordearen esku jarriko ditu behar diren giza eta gauza baliabideak, batzordeak, horrela, dituen eginkizunak egin ahal ditzan.

2. Udalak bere gain hartu beharko ditu, baita ere, prozesua aurrera eramateko gastuak.

II. KAPITULUA. Botoa emateko eskubidea

14. artikulua. Titularrak.

1. Kontsultan boto bidez iritzia adierazteko eskubidearen titularrak dira udaleko biztanleak izanik, deialdia egitean, adindunak izan eta udal-erroldan izena emanda daudenak.

2. Deialdiaren foru dekretua Nafarroako ALDIZKARI OFIZIALean argitaratu eta seigarren egunean, udalak iragarkien oholean Hauteskunde-Zentsuaren Bulegoaren ordezkaritza probintzialak emaniko hauteskunde-zerrendak jarriko ditu.

3. Hautesleen zerrenda iragarkien oholean jarrita egonen da bozketaren egunera arte eta hauteskunde mahaietara igorriko dira dokumentazio ofizialarekin batera.

15. artikulua. Botoa emateko eskubidearen froga.

Mahaiak duen hautesleen zerrendan agertzea botoa emateko eskubidearen frogagarri izanen da. Edonola ere, boto-emaleak nortasun agiria erakutsi beharko du, edo argazkidun pasaporte edo gidabaimena.

III. KAPITULUA. Hauteskundeetako sekzio, lokal eta mahaiak

16. artikulua. Sekzio, lokal eta mahaiak ezartzea eta horiei buruzko erreklamazioak.

1. Udalak ezarriko du hauteskundeetako sekzioen kopurua, horien mugak, lokalak eta sekzio bakoitzari dagozkion mahaiak.

2. Aurreko idatz-zatian aipatutako zerrenda, deialdia Nafarroako ALDIZKARI OFIZIALean argitaratu eta zortzigarren egunetik aurrera, kasuko tokian hedapen handiena duten aldizkako argitalpenen bidez emanen da ezagutzera eta udalaren iragarki oholean jarriko da.

3. Aurreko idatz-zatiek hizpide duten zerrenda udalaren iragarki oholean jarri eta hurrengo sei egunetan, hautesleek erreklamazioak egin ahal izanen dituzte osoko bilkuraren aurrean; ebazpena hurrengo bost egunetan emanen du osoko bilkurak. Behin betiko zerrenda, horrelakorik gertatuz gero, udalaren iragarki oholean jarriko da errekurtsoak ebatzi eta berehalaxe.

4. Zein lokaletan jarriko den hauteskundeetako sekzio eta mahai bakoitza seinalatuko du udalak.

17. artikulua. Hauteskunde mahaien osatzea.

1. Hauteskunde araubide orokorrari buruzko lege organikoaren 26.1, 2 eta 3 artikuluek ezarritakoari jarraituz, udalak osatuko ditu hauteskunde mahaiak eta Eskualdeko Hauteskunde Batzordeak ikuskatu eginen du mahaien osaketa.

2. Deialdia argitaratu ondorengo hamargarren egunetik hamabosgarren egunera arte doan bitartean eginen dira mahaietako lehendakari eta kideak izendatzeko zozketak; horien emaitzak bost eguneko epean jakinaraziko zaizkie interesdunei.

3. Mahaietako lehendakari eta kide karguak nahitaez hartu beharrekoak dira. Kargu horien izendapenari Hauteskunde araubide orokorrari buruzko Lege Organikoaren 27. artikuluko 3. eta 4. idatz-zatiak aplikatuko zaizkio, 3.aren azken zatia izan ezik.

III. TITULUA. Prozesua

I. KAPITULUA. Informazio kanpaina

18. artikulua. Informazio kanpaina.

Informazio kanpainaren iraupena deialdian ezarritakoa izanen da; edonola ere, gutxienez hamar egun izan beharko ditu eta gehienez hogei; bozketa egunaren bezperako 00:00etan amaitu beharko du kanpainak.

19. artikulua. Informaziorako tarte eta gune publikoak.

1. Udalean ordezkaritza duten talde politiko guztiek dute informaziorako doako tarteak izateko eskubidea, bai eta kontsultaren bultzatzaileek ere, halakotzat jotako herritarren elkarteak barne.

2. Titulartasun publikoko komunikabideetako tarteak kasuko tokira mugatuko dira.

3. Udalak doako guneak gorde beharko ditu informazioa jartzeko, eta lokal ofizialak edo leku publikoak eskura jarri, dohainik baita ere, kanpainako ekitaldietarako; horiek Eskualdeko Hauteskunde Batzordeari jakinarazi beharko zaizkio deialdia Nafarroako ALDIZKARI OFIZIALean argitaratu eta hurrengo hamar egunetan.

4. Eskualdeko Hauteskunde Batzordeak, doako tarte eta guneak banatzeko, aukera berdintasunaren irizpideari jarraituko dio, eta, subsidiarioki, udalean ordezkaritza duen talde politiko bakoitzak azken udal hauteskundeetan izaniko boto kopuruari; esleipena egitean, kontuan hartuko dira taldeek adierazitako nahiak, eta pluralismoaren errespetua bermatuko da kanpainan zehar. Kontsulta herritar talde bate bultzatua bada, lehenbizi kontuan hartuko beharrekoa horien ordezkariak adierazitako nahiak dira, eta gero talde politikoenak, aurreko irizpideei jarraikiz. Kontsultaren bultzatzaileek, halakorik izatekotan, udal ordezkaritza duten talde politikoek batez beste dituzten tarte eta guneak izan beharko dituzte gutxienez.

20. artikulua. Kanpaina instituzionala.

Deialdia egin eta informazio kanpaina amaitu arte, udalak kanpaina instituzionala egin eta hauei buruzko informazioa emanen du: bozketa eguna, botoa emateko prozedura, aldez aurretik botoa emateko baldintzak eta horretarako tramitea, eta kontsultako galdera edo galderen testua. Edonola ere, ezinen da botoaren orientazioan eragin. Kanpainaren diseinua, edukia eta aurrera eramateko forma Osoko Bilkurak onetsiko ditu.

II. KAPITULUA. Dokumentu ofizialak

21. artikulua. Bototxartelak, gutunazalak eta aktak.

1. Nafarroako Gobernuak foru dekretu bidez onetsiko ditu boto- txartelak eta bozketarako gutunazalak, bai eta Nafarroako Foru Komunitatean deitzen diren udal mailako herri-kontsulta orotan balioko duten eratze-eta zenbaketa-aktak ere.

2. Hauteskunde mahaietara bozketa hasi baino ordubete lehenago, beranduenez, nahikoa boto-txartel eta nahikoa bozketarako gutunazal heldu direla bermatuko du kasuan kasuko udalak.

22. artikulua. Bototxartelaren ezaugarriak.

1. Boto-txartelean galdera edo galderen testu osoa agertuko da, eta galdera horren edo horien erantzuna, BAI edo EZ izan beharko baitu.

2. Boto-emaleak BAI edo EZ aukeren ondoan izanen den laukitxoan seinalea jarriz adieraziko du galdera bakoitzari buruzko erabakia, edo laukitxo hori hutsik utziz. Orobat, aldez aurretik erantzuna inprimituta duten boto-txartelak ere egiten ahalko dira.

III. KAPITULUA. Botoa aldez aurretik ematea

23. artikulua. Baldintzak.

1. Hautesleek, Eskualdeko Hauteskunde Batzordearen aurrean, aldez aurretik eman ahalko dute botoa, deialdia Nafarroako ALDIZKARI OFIZIALean argitaratu eta hogeigarren egunetik aurrera.

2. Aldez aurretik botoa eman ahal izateko, hautesleak berak eskatu behar dio Eskualdeko Hauteskunde Batzordeari; udaleko idazkariak pertsona hori udal-erroldan dagoela eta 14. artikuluan ezarritako baldintzak betetzen dituela dioen ziurtagiri bat eman beharko du. Identifikazioa egin eta gero, batzordeko idazkariak botoa emateko behar duen dokumentazioa emanen dio interesdunari; botoa batzordean geldituko da, haren babesean, bozketaren egunera arte, eta, egun horretan, dagokion mahaira igorriko da bozketa amaitzeko ordua baino lehenago.

3. Udaleko idazkariak, aldez aurretik botoa emateko ziurtagiria ematen duenean, aurreko idatz-zatian aipatutako hori, hauteskunde mahaira igorritako hautesleen zerrendan idatzi beharko du, pertsona horrek ezin dezan botorik eman bozketaren egunean.

4. Eskualdeko Hauteskunde Batzordeak, udalari entzun ondoren, eta behar izanez gero, egoki irizten dituen neurria ezar ditzake bozketa-mota hori arinagoa egiteko.

IV. KAPITULUA. Bozketa eta botoen zenbaketa

24. artikulua. Mahaiak eratzea

Hauteskunde mahaiko kideak bozketaren egunean kasuko lokalean bilduko dira bozketa hasi baino ordubete lehenago, eta, mahaiaren eratze-akta egin eta gero, denek sinatuko dute.

25. artikulua. Bozketa eta botoen zenbaketa.

1. 09:00etan hasiko da bozketa, eta, etenik gabe 20:00ak arte iraungo du; ordu horretan, lehendakariak hautestontzian sartuko ditu aldez aurretik emaniko botoak, eta, gero, mahaiko kideek emanen dute botoa.

2. 500 biztanle edo gutxiago dituen herri batean egiten bada kontsulta, alkateak kontsulta hori beranduago hastea edo garaizago amaitzea erabaki dezake; hasiera eta amaieraren artean lau orduko tartea beharko da gutxienez ere.

3. Bozketa amaitzean, botoen zenbaketa hasiko da; zenbaketa publikoa izanen da, eta mahaiko kideek horren akta sinatuko dute; aktan, xehetasunez adieraziko da botoa eman zezaketenen kopurua, botoa eman dutenena, galderek izan dituzten boto positibo eta negatiboena, boto zuriena eta baliogabeko botoena. Ondotik, mahaiak, lehendakariaren bidez, dokumentazio guztia Eskualdeko Hauteskunde Batzordera igorriko du.

4. Udalak ordezkari bat izenda dezake informazioa jaso dezan parte-hartzearen zenbatekoari buruz, eta mahai bakoitzeko emaitzei buruz. Horretarako, botoen zenbaketa egin ondoren, mahaiak zenbaketaren aktaren kopia bat eman beharko dio udaleko ordezkari akreditatuari.

26. artikulua. Zenbaketa orokorra eta emaitzaren aldarrikapena.

1. Zenbaketa orokorra publikoa da eta Eskualdeko Hauteskunde Batzordeak egiten du bozketa egin eta hirugarren egunean.

2. Zenbaketa orokorra egin eta egun bateko epean, hala udalean ordezkaritza duten talde politikoek nola, halakorik bada, kontsulta bultzatu duten taldeetako ordezkariek, zenbaketa horren gaineko erreklamazioak aurkeztu ahalko dizkie Eskualdeko Hauteskunde Batzordeari, zeinak egun bateko epean ebatzi beharko baititu.

3. Eginiko erreklamazioak ebatzi ondoren, Eskualdeko Hauteskunde Batzordeak kontsultaren emaitzak aldarrikatuko ditu; aldarrikapenaren aktaren kopia bat udalera igorriko du, Nafarroako ALDIZKARI OFIZIALean argitaratu eta iragarki oholean jar dezan.

4. Herri-kontsultaren emaitza Nafarroako ALDIZKARI OFIZIALean argitaratu eta hurrengo hilabetean, udaleko osoko bilkurak horri buruzko eztabaida egin eta behar diren erabakiak hartuko ditu. Halakorik bada, kontsulta bultzatu dutenen ordezkariak osoko bilkuran har dezake parte, bilkura geldiarazi ondoren, emaitzen balioespena egiteko. Kontsultaren emaitza ez da loteslea izanen.

Lehen xedapen gehigarria .Lankidetza eta laguntza teknikoa.

Nafarroako Gobernuak udalei beharrezkoa duten laguntza emanen die herri-kontsultak egiteko, baita laguntza teknikoa ere.

Bigarren xedapen gehigarria .Epeak

Foru lege honetan ezarritako epeak luzaezinak dira, non eta legean bertan besterik ezartzen ez den; epeak egunetan adierazten direnean, egun naturalak direla ulertuko da.

Xedapen indargabetzaile bakarra.Indarrik gabe geldituko dira foru lege honetan aurreikusitakoaren kontra doazen maila bereko edo apalagoko xedapen guztiak.

Azken xedapenetan lehena .Nafarroako toki administrazioari buruzko uztailaren 2ko 6/1990 Foru Legea aldatzea.

Nafarroako toki administrazioari buruzko uztailaren 2ko 6/1990 Foru Legeko 96. artikuluko 3. idatz-zatiko e) letra honela geldituko da:

"e) Kontsulta sufragio berdin, zuzen eta sekretu bidez eginen da, eta erantzunak baiezkoak, ezezkoak ala zuriak izanen dira. Foru Komunitateko administrazioari dagokio boto-txartelak, bozketarako gutunazalak eta eratze- eta zenbaketa-aktak onestea."

Azken xedapenetan bigarrena .Legeria osagarria.

Foru lege honek jasotzen ez dituenak osatzeko, udalei aplikatzen zaien hauteskunde-legediko xedapenak aplikatuko dira, horiek kontsultaren ezaugarri eta esparruari egokitu behar direla kontuan hartuta.

Azken xedapenentan hirugarrena.-Garatu eta betearaztea.

Nafarroako Gobernuari ahalmena ematen zaio, behar adina xedapen eman dezan foru lege hau garatu eta betearazteko.

Nik, Nafarroako Foru Eraentza Birrezarri eta Hobetzeari buruzko Lege Organikoaren 22. artikuluan xedatutakoa bete dadin, Foru Lege hau B.M. Erregearen izenean aldarrikatzen dut, Nafarroako ALDIZKARI OFIZIALean berehala argitara eta "Estatuko Aldizkari Ofizial"era igor dadila agintzen dut eta hiritar eta agintariei bete eta betearaz dezaten manatzen diet.

Iruñean, bi mila eta biko urriaren hogeita zortzian.-Nafarroako Gobernuko lehendakaria, Miguel Sanz Sesma.

Iragarkiaren kodea: a0211696

Gobierno de Navarra

Contacte con nosotros | Accesibilidad | Aviso legal | Mapa web