(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

8/2005 FORU LEGEA, uztailaren 1ekoa, Nafarroako Babes Zibilari eta Larrialdien Kudeaketari buruzkoa Nota de Vigencia

BON N.º 81 - 08/07/2005

  I. TITULUA. Xedapen orokorrak

  II. TITULUA. Babes zibila larrialdi kolektiboetan

  I. KAPITULUA. Babes zibileko jarduketak

  1. ATALA. Xedapen orokorra

  2. ATALA. Ezbeharrak aurreikustea eta haiei aurrea hartzea

  3. ATALA. Plangintza

  4. ATALA. Eskuhartzea

  5. ATALA. Lehengoratzea

  II. KAPITULUA. Antolaketa administratiboa

  1. ATALA. Nafarroako Foru Komunitateko administrazioa eta Gobernua

  2. ATALA. Toki entitateak

  3. ATALA. Nafarroako Babes Zibileko Batzordea

  III. KAPITULUA. Herritarren lankidetza

  IV. KAPITULUA. Ikuskapenak

  III. TITULUA. Larrialdietako jardunbidea

  IV. TITULUA. Prebentzio, suitzaltze eta salbamendu zerbitzuak

  V. TITULUA. Zehapen araubidea

ZIOEN AZALPENA

1. Espainiako Konstituzioak, 15. artikuluan, adierazten du bizitzarako eta osotasun fisikorako eskubidea funtsezko eskubideetan lehenengoa eta garrantzitsuena dela. 9.2 artikuluak, berriz, ezartzen du botere publikoek behar diren baldintzak sustatu behar dituztela herritarren eta herritarrak biltzen dituzten taldeen askatasuna eta berdintasuna benetakoa eta eragingarria izan daitezen, eskubide horiek oso-osorik erabiltzea oztopatzen edo zailtzen duten trabak desagerrarazteko lan egin behar dutela eta herritar guztiek bizitza politikoan, ekonomikoan, kulturalean eta sozialean parte hartzeko bideak jarri behar dituztela. Botere publiko guztiei dagokien betebehar horrek bizitzarako eta osotasun fisikorako eskubidea bermatzeko neurri eragingarriak hartu beharra dakar berekin eta, horretarako, eskubide hori oso-osorik baliatzeko traba guztiak kentzen saiatu behar dira.

Ez Espainiako Konstituzioaren, ez foru eraentza berrezarri eta hobetzeari buruzko Foru Legearen eskumenen artean, ez da babes zibilaren aipamenik egiten. Hala ere, Konstituzio Auzitegiak emandako hainbat epaitan _123/1984 eta 133/1990 epaiak_, adierazi du babes zibila "segurtasun publikoaren arloan" estatuari dagozkion eskumenen artean kokatzen dela, deusetan galarazi gabe polizia autonomikoaren arloan autonomia erkidegoei dagokien eskumena edo segurtasun publikoarekin zerikusia duten beste eskumen batzuk, konparazio batera, eraikinak eta instalazioak zaintzekoak edo osasunaren, errepideen, mendien eta basoen gaineko eskumenak besteak beste. Hortaz, Konstituzioaren jurisprudentziaren arabera, babes zibilaren gaineko eskumena estatuarena eta autonomia erkidegoena da, nahiz eta Espainia osoko edo autonomia erkidegoez gaindiko larrialdi, katastrofe edo hondamendietan babes zibilaren arauak ematea estatuari dagokion ezinbestean.

Horrenbestez, Nafarroako Foru Komunitateak foru lege hau aldarrikatzeko duen eskumena Nafarroako foru eraentza berrezarri eta hobetzeari buruzko abuztuaren 10eko 13/1982 Lege Organikotik dator, babes zibilari loturiko eskumen asko aitortu eta esleitzen baitizkio. Zehazki, segurtasun publikoaren gaineko eskumena aipatu beharra dago, 51. artikuluan jasoa, eta, orobat, herrilan eta ikuskizunen gaineko eskumen osoa, 44. artikuluan agertzen dena, foru araubidearen ondorioz trenbideen, errepideen, trafikoaren eta zirkulazioaren, naturgune babestuen eta mendien arloetan Nafarroari dagokion eskumen esklusiboa (49. eta 50. artikuluak) eta, azkenik, osasunaren, industriaren, ingurumenaren eta ekologiaren arloetako eskumenak, hurrenez hurren, 53., 56. eta 57. artikuluetan adierazten direnak. Horiek guztiak babes zibilaren arloko eskumena legitimatzen duten benetako baliabide gaikuntza-emaileak dira, beste administrazio publiko batzuei dagozkien esparruak errespetatuz betiere.

2. Nafarroan babes zibila eta larrialdien kudeaketa arautzeko arau bat beharrezkoa da. Arau horrek foru legearen maila izan behar du ezinbestean, bere baitan biltzen diren helburuak eraginkortasunez betetzeko behar diren neurri, beharkizun eta eskubide guztiak ezarri ahal izateko.

Foru lege honen helburua babes zibileko eta larrialdietako ekintzak antolatzea da Nafarroako Foru Komunitatearen eremuan. Horretarako, batetik, Nafarroako administrazio publiko bakoitzaren jarduketak arautuko dira, bai arriskuen prebentzio eta kontrol arlokoak, bai, gerta litezkeen larrialdi, katastrofe eta hondamendi publikoen kudeaketari dagozkionak, eta, beste alde batetik, jarduera arriskutsuak hartzen dituzten establezimendu publiko eta pribatuei autobabeserako neurriak eskatuko zaizkie, hots, arriskua sor ditzaketen jarduerak egiten dituzten pertsona edo enpresek beraiek jarduera horien ondorioak aurreikusteko eta, horrenbestez, beren burua babesteko abian jarri behar dituztenak. Horrekin, larrialdiak kudeatzeko sistema integratu eta bateragarri bat beti eskura egotea bermatu nahi da, Nafarroako lurralde eremuan gertatzen diren egoera kaltegarri edo arriskutsuetan edo hondamendietan egin beharreko lan guztiak egoki koordinatu, zuzendu eta kontrolatzeko.

Foru lege honek estatuak arlo honetan duen eskumena errespetatzen du, interes nazionalekotzat jotzen diren larrialdiak legearen eskumenen esparrutik kanpora uzten baitira. Administrazio publikoek, oinarrizko legediaren arabera, babes zibilaren eta suteen prebentzio eta itzaltzearen arloetan dituzten eskumenak ere errespetatzen ditu lege honek, horiek estatuko eta autonomia erkidego bakoitzeko arauek ezarritakoaren arabera erabiliko baitira, eta hori da, hain zuzen, foru lege honen helburua, arauketa hori egitea.

3. Foru legea bost titulutan banatuta dago. Hirurogeita bederatzi artikulu ditu, sei xedapen gehigarri, bi xedapen iragankor, xedapen indargabetzaile bat eta hiru azken xedapen.

I. tituluan foru legearen xedapen orokorrak bildu dira: helburu eta aplikazio esparrua, legean gehien erabiltzen diren terminoen definizioak eta Nafarroako administrazio publikoek babes zibilaren eta larrialdien kudeaketaren arloan jorratu beharreko ekintzak. Horrez gainera, larrialdietan jardun behar duten zerbitzu operatiboak dituzten administrazio publikoek eta erakunde publiko edo pribatuek horrelakoetan segitu beharreko irizpideak finkatzen dira.

II. tituluak larrialdi kolektibo egoeretako babes zibila arautzen du. Ildo horretan, I. kapituluan ohiz kanpoko larrialdietan Nafarroako administrazio publikoei dagozkien oinarrizko jarduketak arautu eta antolatzen dira. Lehenbizi, arrisku egoeren aurreikuspena eta prebentzioa aztertzen dira. Horretarako, Nafarroako arriskuen katalogoa eta mapa eta jarduera arriskutsuen katalogoa egitea aurreikusten da; bigarrenik, larrialdietan eman beharreko erantzuna planifikatzeko arauak ematen dira, babes zibilerako planak prestatu eta onetsi beharra ezartzen baita, horiek baitira horrelako egoerei aurre egiteko antolamenduko baliabideak. Horri dagokionez, Nafarroako Babes Zibilaren Lurraldeko Plana, udaletako lurralde planak, plan bereziak, plan berariazkoak eta autobabeserako planak bereizten dira. Hirugarrenik, planak abian jarri ondoren esku hartzeko jarduketak arautzen dira. Arlo honetan, larrialdietako neurri bereziak hartzeko aukera aurreikusten da, baliabideak mobilizatzeko irizpideak finkatzen dira eta hondamendiko larrialdia deklaratzeko aukera ere aurreikusten da. Laugarrenik, normaltasun egoerara itzultzeko jarduketak arautzen dira; II. kapituluan arlo honetako antolamendu administratiboa ematen da eta foru zein toki administrazioan eskumena izanen duten organoei eginkizun berariazkoak esleitzen zaizkie; III. kapitulua herritarren lankidetzari buruzkoa da eta bertan babes zibileko lanetan herritarrei dagokien parte-hartzea arautu eta hori sustatzeko neurriak ematen dira; azkenik, IV. kapituluan pertsonei, ondasunei edo ingurumenari ohiz kanpoko kalteak eragiten ahal dizkieten jarduera, zentro edo establezimenduak ikuskatzeko ahalmena arautzen da.

III. tituluak larrialdi edo hondamendi egoeren kudeaketa arautzen du, horietan sektore batek baino gehiagok lan egiten duenean edo larrialdi egoeretan laguntza ematearekin zuzeneko edo zeharkako zerikusia duten zerbitzu publiko edo pribatuak mobilizatu eta koordinatzeko neurriak hartu behar direnean.

IV. tituluak Nafarroako Foru Komunitateko administrazio publikoek suteen prebentzio eta itzaltzerako eta salbamendurako dituzten zerbitzu publikoak arautzen ditu; izan ere, zerbitzu horiek babes zibilaren eremuan dauden zerbitzu publikoetan garrantzitsuenetakoak dira eta, horrenbestez, larrialdiei aurre egiteko beharrezko bermea ere badira, denbora guztian eskura daudelako eta lortu duten espezializazioagatik.

Azkenik, V. tituluak foru lege honen zehapen araubidea ezartzen du. Bertan, arau-hausteak sailkatzen dira (arinak, larriak eta oso larriak), horiei dagozkien zehapenak aurreikusten eta zehapen prozedura administratiboaren oinarrizko manuak finkatzen.

Foru lege honen azkeneko partean xedapen gehigarriak, iragankorrak eta azkenekoak daude. Bertan, larrialdietako osasun laguntzako zerbitzuen sistema egituratzen da; suhiltzaile boluntarioaren figura arautzen da; toki araubideko legediaren arabera suteen prebentzio eta itzaltzerako eta salbamendurako zerbitzuak eman behar dituzten toki entitateek horren dispentsa lortzeko prozedura ezartzen da; su-itzaltze eta salbamendu zerbitzuak ezarri eta hobetzeko kontribuzio berezia arautu eta, partez, aldatzen da; eta azkenik, babes zibileko planak foru lege honetako zehaztapenei egokitzeko aldi baterako araubidea ezartzen da.

I. TITULUA. Xedapen orokorrak

1. artikulua. Helburua eta aplikazio eremua.

1. Foru lege honek babes zibileko eta larrialdien kudeaketaren inguruko jarduketak arautu nahi ditu Nafarroako Foru Komunitatearen esparruan, baina deusetan galarazi gabe interes nazionaleko larrialditzat jotzen diren egoerak arautzeko Espainiako arauek xedatzen dutena eta, halakorik izanez gero, aplikatzekoa den Europako araudiak xedatzen duena.

2. Foru lege honen ondorioetarako, hona hemen babes zibileko jarduketatzat hartzen dena: euren tamainarengatik katastrofetzat edo hondamendi publikotzat jo daitezkeen eta planifikazio egokia eskatzen duten larrialdiak aztertu, aurrez ikusi eta haietan laguntzea.

3. Foru lege honen ondorioetarako, hona hemen larrialdietarako laguntzatzat hartzen dena: pertsonen bizitza eta osotasun fisikoa babestea helburu dutenak, baita ondasunak eta ingurumena zaintzekoak, gizakiak nahiz naturak eragindako larrialdiak gertatzen direnean.

2. artikulua. Definizioak Nota de Vigencia.

Foru lege honi dagokionez, honako definizioak hartuko dira aintzat:

Galzoria: babes zibilak zaindu beharreko pertsona-taldeei edo ondasun-multzoei egoera jakin batzuetan kaltea egiteko ahalmena.

Zaurgarritasuna: pertsona-talde edo ondasun-multzo baten ezaugarria, inguruabar jakin batzuetan galzoriaren eragina neurri handiago edo txikiagoan jasateko moduan egotea dakarkiena.

Mehatxua: babes zibilak zaindutako pertsonek eta ondasunek duten egoera, zeinean berehalako edo ezkutuko galzori baten aitzinean baitaude neurri handiago edo txikiagoan.

Arriskua: mehatxu bat pertsona-talde edo ondasun-multzo bat ukitzera iristeko aukera.

Larrialdia: bat-batean sortzen den egoera, ondasunen nahiz pertsonen bizitza edo osotasun fisikoa arrisku handian jartzen dituena edo erasotuak gertatzen direnekoa, eta berehalako neurriak hartzea eskatzen duena, arriskua bertan behera uzteko edo kalteak minimizatzeko. Arruntak nahiz apartekoak izan daitezke.

Aparteko larrialdia: bat-bateko arrisku kolektiboko egoera, pertsonak edo ondasunak berehalako galzorian jartzen dituen gertaera baten ondoriozkoa eta botere publikoen aldetik horiek artatzeko, kalteak arintzeko eta katastrofe bihur dadin ekiditen saiatzeko kudeaketa azkarra exijitzen duena.

Larrialdi arruntetik bereizten da azken horrek ez duelako eragin kolektiborik.

Katastrofea: biktima, kalte eta inpaktu material ugari eragiteagatik erkidego edo gizarte baten funtzionamendua substantzialki asaldatzen edo eteten duen egoera edo gertakari bat, artatze-baliabide gehiago eskatzen dituena erkidegoak berak eskuragarri dauzkanak baino.

Oinarrizko zerbitzuak: beharrezkoak direnak oinarrizko eginkizun sozialak, osasuna, segurtasuna eta herritarren ongizate sozial eta ekonomikoa edo administrazio publikoen funtzionamendu eraginkorra mantentzeko.

Zoritxar publikoa: biztanleengan eragin orokorra duen katastrofea.

Larrialdietako laguntza: pertsonen bizia eta osotasun fisikoa babestea helburu duten jarduketa urgenteak, baita ondasunak eta ingurumena zaintzekoak ere, gizakiak nahiz naturak eragindako larrialdiak gertatzen direnean.

Alerta: galzori edo arrisku garrantzitsu baten gertagarritasunaz ohartarazteko abisua edo deia.

Alarma: hurbil-hurbileko galzori ziur batez ohartarazten duen seinalea.

Arriskuen mapa: dokumentu kartografiko ofiziala, Nafarroako Foru Komunitateko garrantzizko arriskuak seinalatzen, deskribatzen, sailkatzen eta kokatzen dituena eta arrisku bakoitza lurraldeko zein zonatan dagoen zehazten duena.

Urgentzia: lekuren edo jardueraren batean norbaiti ustekabean arazo bat gertatzea berehalako laguntza premiaren kontzientzia sortzen diona, arazoaren kausa eta larritasun maila gorabehera.

3. artikulua. Ekimen publikoa babes zibilaren eta larrialdien kudeaketaren arloan.

Nafarroako administrazio publikoek babes zibilaren eta larrialdien kudeaketaren arloan egiten duten lanak helburu hauek izanen ditu:

a) Foru Komunitatean dauden arriskuak identifikatu, lokalizatu eta aztertzea, gero horien ondorioak eta, aurreikusten den arrisku egoera bakoitzean, lurraldearen eta herritarren alderdi ahulak ebaluatzeko.

b) Detekzio, alarma eta transmisio sistemak ezartzea, ahalbidetuko dutenak alerta goiztiarra eta kasu bakoitzean beharrezkoak diren prebentzio-neurriak hartzea Nota de Vigencia.

c) Autobabesa sustatu eta ahalbidetuko duten neurriak hartzea, halako moldez non herritarrak gauza izanen baitira pertsonei eta ondasunei kalteak eragiten ahal dizkieten zoritxarreko edozein gertakari aurreikusi eta horiei aurrea hartzeko eta, zorigaitza gertatuz gero, hura deuseztatu eta haren ondorioak gutxitzeko urratsak egiteko Nota de Vigencia.

d) Pertsonek eta ondasunek kalteak izanez gero, eman beharreko erantzuna planifikatzea. Horretarako, larrialdi planak ezarriko dira, ezbeharrean parte hartu beharko duten zerbitzu guztien jarduketa koordinatua ahalbidetuko duten funtzio eta hierarkia egiturak jasoko dituztenak.

e) Ezbeharra sortzen duten zergatietan batera esku hartzea, ezbeharraren hedadura eta ondorioak murrizteko eta herritarrak babesteko eta sorosteko Nota de Vigencia.

f) Oinarrizko zerbitzuak berrezartzea eta ezbeharrak ukitutako ehundura sozioekonomiko eta eta ingurumenekoa berreskuratzeko programa sustatzea Nota de Vigencia.

g) Esku hartzeko zerbitzuak sortu eta mantentzea eta zerbitzu horietako langileak behar bezala prestatzea Nota de Vigencia.

h) Larrialdietan kalteak jaso ditzaketen herritarrak informatzea, sentsibilizatzea eta prestatzea Nota de Vigencia.

i) Behar diren ikuskapen lan guztiak egitea babes zibilari eta larrialdien kudeaketari buruzko araudi indarduna betetzen dela egiaztatzeko Nota de Vigencia.

j) Herritarrek eta babes zibileko boluntarioen erakundeek parte har dezaten sustatzea Nota de Vigencia.

4. artikulua. Jarduketaren printzipioak.

1. Nafarroako administrazio publikoek, foru lege honen helburuak betetze aldera eta nork bere eskumenen esparruan, larrialdien kudeaketarako sistema publiko, integratu eta bateragarria izanen dute, egin beharreko urratsak eraginkortasunez koordinatu, bideratu eta kontrolatzeko.

Sistemaren taxuerak modua emanen du neurrien aktibazioa eta baliabideen aplikazioa arian-arian egiteko, larrialdien norainokoaren arabera, halako moldez non horien eraginkortasuna eta efizientzia bermatuko den Nota de Vigencia.

2. Aurreko lerrokadan aurreikusitakoaren ondorioetarako, larrialdiren batean erabiltzeko moduko zerbitzu operatiboak dituzten Nafarroako administrazio publikoek eta entitate publiko edo pribatuek lankidetza, koordinazio, efizientzia eta proportzionaltasun printzipioei segituko diete eta beren jarduketak egokitu beharko dituzte, dauden baliabideak bateragarritasunaren eta subsidiariotasunaren arabera erabiliko baitira. Hori helburu, mobilizatzeko eta esku hartzeko erabili ohi duten prozedura Nafarroako Gobernuak larrialdiak kudeatzeko garatzen duen sistema integratuaren menpe jarri beharko dute.

3. Herritarrek foru lege honen helburuak betetzen lagundu beharko dute, lege honetan eta aplikatzekoa den ordenamendu juridikoko gainerako legeetan ezartzen diren eskubideak baliatuz eta betebeharrak betez.

4. Nafarroako administrazio publikoek, beren eginkizunak betetzean, arreta berezia jarriko diete pertsona eta kolektibo zaurgarrienei Nota de Vigencia.

II. TITULUA. Babes zibila larrialdi kolektiboetan

I. KAPITULUA. Babes zibileko jarduketak

1. ATALA. Xedapen orokorra

5. artikulua. Oinarrizko jarduketak Nota de Vigencia.

Nafarroako administrazio publikoek, beren eskumenen esparruan, egin behar dituzten babes zibileko oinarrizko jarduketak hauek dira: arrisku egoerak aurreikusi eta horiei aurrea hartzea, plangintza, esku-hartzea, koordinazioa, zuzendaritza, normaltasunaren berreskuratzea eta herritarrei eta larrialdi-zerbitzuetako langileei informazioa eta heziketa ematea.

2. ATALA. Ezbeharrak aurreikustea eta haiei aurrea hartzea

6. artikulua. Aurreikustea.

1. Foru Komunitateko administrazioak Nafarroako arriskuen katalogoa eta mapa eginen ditu eta bertan identifikatu eta kokatuko ditu foru lurraldean dauden arriskuak, administrazio publikoetako organo eskudunek eginen dituzten azterketetatik eta dauden aurrekarietatik abiatuta.

2. Babes zibilaren arloko eskumena duen departamentuak Nafarroako arriskuen katalogoa eta mapa garatu eta hedatzeko lana egin beharko du. Horretarako, Nafarroako Foru Komunitateko eta estatuko administrazio eta erakunde publiko zein pribatuei behar beste datu eskatzen ahalko dizkie eta lankidetzarako hitzarmenak eta bestelakoak sinatzen ahalko ditu.

3. Nafarroako arriskuen katalogoan eta mapan arrisku kolektibo larriak sor ditzaketen egoera oro jasoko dira. Horretarako, babes zibileko plan berezien aztergai diren egoera arriskutsuen mapa tematikoak eta identifikaturik dauden gainerako arrisku mapak hartuko dira aintzat.

4. Nafarroako arriskuen katalogoa eta mapa Nafarroako babes zibileko lurralde planaren barrenean izanen dira.

7. artikulua. Aurrea hartzea.

1. Nafarroako Foru Komunitateko administrazio publikoek, nork bere eskumenen esparruan, arriskuak gutxitzeko eta larrialdiei, katastrofeei eta hondamendi publikoei aurrea hartzeko jarduketak bultzatuko dituzte. Arreta berezia jarriko dute egoera horiei aurre egiteko zerbitzu operatiboen gaitasuna hobetzeko eta herritarren prestakuntza eta lankidetza sustatzeko jardueretan. Horrez gainera, arauek arlo honetan ezartzen dituzten xedapenak betetzen direla begiratuko dute. Horretarako, behar izanez gero, ikuskatzeko eta zehatzeko ahalmena erabiliko dute.

2. Larrialdia, katastrofea edo hondamendia sor dezaketen jarduerak egiten dituzten pertsona, enpresa eta entitateek autobabeserako neurriak hartu beharko dituzte eta horiei aurre egiteko beharrezkoak diren langileak eta baliabideak eduki.

3. Pertsonentzat edo ondasunentzat arrisku larria sortzen ahal duten jardueren katalogo bat ezarriko da erregelamendu bidez, bai eta jarduera horiek egiten diren zentro, establezimendu, sail eta instalazioena ere. Horien titularrek autobabeserako plan bat eduki beharko dute, foru lege honen 15. artikuluan ezarritakoa betez, eta arriskuei aurre egiteko –gutxienez ere, suteei eta, oro har, erantzukizun zibilari– behar adinako diruarekin erantzuteko aseguruak kontratatu beharko dituzte. Katalogoan orobat ezartzen ahalko da zer establezimenduk egin beharko duten nahitaez txostena beren segurtasun-egoerari buruz, establezimendua eraikitzeko lizentzia eman aitzin. Txostena lizentzia ematearen aurkakoa bada edo neurri zuzentzaileak ezartzen baditu, loteslea izanen da Nota de Vigencia.

4. Larrialdi, katastrofe edo hondamendi egoerak sortzen ahal dituzten jarduerak egiten dituzten pertsonek eta enpresen eta entitateen titularrek behar bezalako babesa ziurtatzeko beren jarduerei buruzko informazioa eman beharko diete babes zibilaren arloko agintari eskudunei, bai eta babes zibileko arriskuei nahiz horien bilakaerari dagokienez detektatzen duten informazioa ere Nota de Vigencia.

5. Pertsona asko biltzen dituzten edo pertsonen edo taldeen joan-etorriak sortzen dituzten ikuskizun eta jarduerak egiteko, organo eskudunak sektore horretako araudiaren araberako baimena eman beharko du. Baimen eskaerarekin batera, arriskuari aurrea hartzeko eta, kasua bada, ebakuazioa egiteko aurreikusi diren giza, gauza eta antolamenduko baliabideen azalpena aurkeztu beharko da, bai eta litezkeen kalteak behar bezala estaltzeko kontrataturiko aseguruei buruzkoa ere; gutxienik, suteen kontrako eta erantzukizun zibil orokorreko aseguruei buruzkoa. Kasuan kasuko administrazio publikoak babes zibilaren arloan duen organo eskudunak aztertu eta txostena eginen du, baimena eman aurretik. Txostena negatiboa bada edo prebentzio neurriak ezartzen baditu, loteslea izanen da. Erregelamendu bidez ezarriko da jarduera horietako zeintzuetan aurkeztu beharko den autobabeserako plan bat ere Nota de Vigencia.

6. Derrigorrezko hezkuntza-sistemako ikasmailetan larrialdi egoeren gaineko prestakuntza eta informazio jarduerak egin beharko dira, eta urtero jarduketa-simulakro bat egin beharko da Nota de Vigencia.

7. bis artikulua. Alarma eta alerta sarea Nota de Vigencia.

Nafarroako Babes Zibilaren Alarma eta Alerta Sarea sortzen da, larrialdi egoeren aurreikuspenerako, detekziorako eta jarraipenerako sistema gisa eta agintari eskudunei eta herritarrentzako informazio eta larrialdi zerbitzuei larrialdi-abisuak emateko sistema gisa.

Babes zibilaren arloko departamentu eskudunaren mende dagoen Larrialdien Kudeaketarako Zentroari dagokio Nafarroako Babes Zibilaren Alarma eta Alerta Sarearen kudeaketa.

Nafarroako Gobernuko departamentu guztiek eta larrialdi egoeren aurreikuspenean, detekzioan eta jarraipenean lagun dezaketen sare eta sistemetako titular diren sektore publikoko erakunde guztiek beren sistemak egokituko dituzte, daukaten informazio guztia Alarma eta Alerta Sarearen kudeatzaileari denbora errealean emateko. Alarma eta Alerta Sarearen kudeatzaileak ezarriko du zer baldintzatan eman behar den informazioa.

Larrialdi egoeren aurreikuspenean, detekzioan eta jarraipenean lagun dezaketen sare eta sistemetako titular diren gainerako erakunde eta administrazio publikoek larrialdi egoera bat eragin dezakeen egoera baten ezaguera baldin badute, berehala emanen diote horren berri Alarma eta Alerta Sarearen kudeatzaileari.

Alarma eta Alerta Sarearen kudeatzaileak erakunde eta administrazio publiko horiekiko lankidetza-hitzarmenak sustatuko ditu, informazio-transmisio egokia eta sistema ezberdinen integrazioa bermatuko dituztenak.

Alarma eta Alerta Sarearen kudeatzaileak, informazioaren titularrekin lankidetzan arituz, gaitzaldi-atalaseak ezarriko ditu, pertsonak edo ondasunak kalteturik gertatzearen posibilitatearen arabera, eta xedatuko du zein ohar jakinarazi behar zaizkien, atalase bakoitzean, agintariei, larrialdi-zerbitzuei eta herritarrei, ezertan galarazi gabe jadanik horretarako xedapenak jasota dituen araudi aplikagarria.

Alarma eta Alerta Sarearen kudeatzaileak herritarrei nahiz toki entitateei informazioa emanen die, bai modu prebentiboan bai erreaktiboan. Horretarako, abisu-kanal eta -sistema ezberdinak ezarriko ditu, informazioa eraginkortasunez ematen dela bermatzeko.

8. artikulua. Lurraldearen antolamendua eta hirigintza.

1. Lurraldearen antolamenduko eta hirigintzako jardueretan babes zibileko zehaztapenak kontuan hartu beharko dira, arriskuen katalogoan eta mapan eta jarduera arriskutsuen katalogoan adierazitakoari jarraikiz.

2. Lurraldearen antolamenduko tresnak eta hirigintzako tresnak hasiera batez onetsi ondoren, babes zibilaren arloko eskumena duen departamentuak aginduzko txostena eman beharko du, haietan onartzen den lurralde-ereduak sor ditzakeen arrisku kolektibo larriko egoerei dagokienez.

Nafarroako Babes Zibileko Batzordeak, lurraren ezaugarri geoteknikoak, morfologikoak edo hidrologikoak aztertuta, arazo larririk atzematen badu edo bestelako arrisku bateraezinen bat, edo pertsonen, ondasunen edo ingurumenaren segurtasunerako dagoen arriskua dela-eta, hirigintzako aprobetxamendua egitea ez dela gomendagarria erabakiz gero, eta horrenbestez, jarduketen kontrako berariazko eragozpen-txostena ematen badu, txosten hori loteslea izanen da.

Txostena antolamendurako tresna igorri eta bi hilabeteko epean eman beharko da. Epe horretan txostenik ematen ez bada, lurraldearen antolamenduko edo hirigintzako tresnaren edukiarekin ados dagoela ulertuko da.

3. Onetsi bai baina gauzatu gabe dauden hirigintzako planeamenduetan, hirigintza arloko eskumenak dituen organoak, arriskupeko eremuetan, arriskuak gutxitzeko behar diren aldaketak sustatuko ditu, eta aldaketak egiterik ez badago, lizentzia-deuseztapena sustatuko du Nota de Vigencia.

8. bis artikulua. Prestakuntza eta informazioa Nota de Vigencia.

Administrazio publikoek, beren eskumenen esparruan, prebentzio, informazio, zabalkunde eta sentsibilizazio kanpainak sustatuko dituzte arriskuei aurre egiteko eta arriskuen aurrean nola jokatu jakiteko.

Nafarroako Foru Komunitateko Administrazioak larrialdi zerbitzuetako langileen behar bezalako heziketa bermatuko du.

Halaber, babes zibilaren esparruan lan egiten duten boluntarioen elkarteetako kideen behar bezalako heziketa bermatuko du.

3. ATALA. Plangintza

9. artikulua. Babes zibileko planak.

1. Babes zibileko planak arrisku kolektibo larriko egoera, larrialdi, katastrofe edo hondamendi publiko baten aurrean eman beharreko erantzuna antolatzen duten baliabide nagusiak dira. Egoera horietan herritarrak, ondasunak eta ingurumena babesteko behar diren giza eta gauzazko baliabideak mobilizatu, koordinatu eta zuzentzeko bideak ezartzen dituzte.

2. Babes zibileko planen egitura eta edukia Babes Zibileko Oinarrizko Arauan, foru lege honetan eta, kasua bada, horiek garatzen dituzten arauetan ezartzen denaren araberakoak izanen dira.

3. Babes zibileko planak hiru motatakoak izan daitezke:

a) Lurralde planak.

b) Plan bereziak eta plan berariazkoak.

c) Autobabeserako planak.

4. Erregelamenduz, Nafarroako babes zibileko planen erregistro publiko bat eratuko da, informazioa emateko bakar-bakarrik.

5. Babes zibileko planak etengabe eguneratuta egon behar dira eta egokituta haien egituran edo operatibitatean gerta daitezkeen aldaketetara, bai eta haiek ezartzeko prozesuan lortutako emaitzen arabera edota haien denbora-aktibazioaren esperientziaren arabera ere Nota de Vigencia.

10. artikulua. Lurralde planak.

Lurralde planak lurralde eremu zehatz batean gerta daitezkeen larrialdi orokorrei aurre egiteko antolaketarako tresna dira. Helburu hauek dituzte:

a) Arriskuak identifikatu, aztertu eta ebaluatzea.

b) Aplika daitezkeen prebentzio neurriak zehaztea.

c) Arriskuei eta prebentzio neurriei buruzko informazio eta kontzientziazio jarduerak planifikatzea herritarrentzat.

d) Arlo honetan diharduten administrazio publikoen babes zibila antolatzea. Horretarako, erabil daitezkeen baliabideen katalogoa eta horiek jarduteko eta koordinatzeko irizpideak agertuko dira.

e) Plana eta esku hartzeko prozedurak aplikatzeko nahiz zerbitzuak berrezartzeko eta normaltasuna berreskuratzeko agintari eskuduna ezartzea.

f) Eremu handiagoko planak abian jartzeko irizpideak ematea.

11. artikulua. Nafarroako babes zibileko lurralde plana.

1. Nafarroako babes zibileko lurralde plana Nafarroako Foru Komunitateko lurraldean gertatzen diren larrialdietan eman beharreko erantzun generikoa antolatzeko baliabidea da, ezbeharraren izaera, hedadura edo administrazio baten baino gehiagoren lana koordinatu beharra ikusita, zuzendaritza autonomikoa behar den kasuetarako, betiere Estatuko administrazio orokorreko organo eskudunek interes nazionalekotzat jotzen ez badute.

2. Nafarroako babes zibileko lurralde planean, plan zuzendaria den aldetik, Nafarroako Foru Komunitatean egiten diren babes zibileko plan guztiak prestatu, onetsi eta homologatzeko jarraibide eta betebeharrak bilduko dira.

3. Nafarroako Gobernuari dagokio, babes zibilaren arloan eskumena duen departamentuko kontseilari titularrak proposaturik eta Nafarroako Babes Zibileko Batzordearen txostena eginik, Nafarroako babes zibileko lurralde plana onestea, Gobernuaren Erabaki bidez Nota de Vigencia.

4. Nafarroako babes zibileko lurralde plana lurraldearen antolamendurako baliabidetzat joko da, Nafarroako lurraldearen antolamenduari eta hirigintzari buruzko Foru Legearen testu bategina onesten duen uztailaren 26ko 1/2017 Legegintzako foru-dekretuan xedatutakoaren ondorioetarako Nota de Vigencia.

12. artikulua. Babes zibileko lurralde planak, udalekoak edo udalez gaindikoak.

1. Foru Komunitatearen eragin eremu osoa hartzen ez duten babes zibileko lurralde planak udalekoak edo udalez gaindikoak izan daitezke, planifikatzen den lurralde eremuaren arabera; izan ere, udalerri bakar bat edo udalez gaindiko izaera duen toki entitate batean baturik dauden udalerri bat baino gehiago har ditzakete.

2. Ondokoak daude behartuta udalaren babes zibileko plana prestatu eta onestera:

a) Hogei mila biztanle eskubidedun baino gehiago dituzten udalerriak.

b) Udalerriaren kokapenagatik edo udalerrian bertan ala ondoko udalerrietan garatzen den industria edo turismo jardueragatik, Nafarroako arriskuen katalogoan eta mapan agertzen diren udalerriak.

3. Babes zibilaren arloan eskumena duen departamentuari dagokio hogei mila biztanle eskubidedun baino gehiago dituzten udalerrietan babes zibileko planak egin daitezen bultzatzea, bai, halaber, udalerriaren kokapenagatik edo udalerrian bertan edo inguruetan garatzen den industri jardueragatik, Nafarroako arriskuen katalogoan eta mapan arrisku berezikotzat hartzen direnetan ere.

4. Udaleko edo udalez gaindiko babes zibileko lurralde planak kasuan kasuko toki entitateetako osoko bilkurek edo organo gorenek onetsi beharko dituzte, eta Nafarroako Babes Zibileko Batzordeak homologatu beharko dituzte betiere. Udalez gaindiko planek ukitutako udalei entzuteko tramitea beteko dute.

5. Nafarroako Babes Zibileko Batzordeak lurralde planak homologatzeko, plana Nafarroako babes zibileko lurralde planaren xedapenetara egokitzen ote den ikusi eta egiaztatuko du, azken hori plan zuzendaria eta integraziorako markoa baita.

13. artikulua. Plan bereziak eta plan berariazkoak.

1. Plan bereziak arrisku jakin batzuei aurre egiteko antolamendu orokorrerako tresnak dira, metodologia tekniko-zientifiko berariazkoa behar dutenak, estatuko administrazio orokorrak, arrisku kasu bakoitzari dagokion plangintzarako oinarrizko jarraibidearen bidez, araubide berezia ezarri duelako jarduera sektore horretarako, horrelako larrialdietarako edo jarduera jakin baterako.

2. Nafarroako babes zibileko lurralde plana plan zuzendaria eta integraziorako markoa da. Beraz, larrialdietako plan berezi eta berariazko guztiak haren xedapenetara egokituko dira.

3. Plan bereziek ezarriko dute, kasua baldin bada, zer udalerri dauden behartuta arrisku jakin batzuei erantzuteko udal-jarduketa planak taxutzera eta onestera Nota de Vigencia.

4. Plan bereziak Nafarroako Gobernuaren Erabaki bidez onetsiko dira, babes zibilaren arloan eskumena duen departamentuko kontseilariak proposaturik eta Nafarroako Babes Zibileko Batzordeak aldeko txostena eman ondoren Nota de Vigencia.

5. Plan berariazkoak Nafarroan eragin berezikoak diren arriskuei aurre egiteko antolamendu-tresna orokorrak dira, prestatuak izateko oinarrizko plangintza-jarraibiderik ez dutenak. Plan berariazkoen artean daude oinarrizko zerbitzuetarako kontingentzia planak Nota de Vigencia.

6. Plan berariazkoak babes zibilaren arloan eskumena duen departamentuak eginen ditu, foru lege honetan eta Nafarroako babes zibileko lurralde planean ezartzen diren irizpideei jarraikiz. Nafarroako Gobernuak Erabaki bidez onetsiko ditu, departamentu horretako kontseilari titularrak proposaturik eta Nafarroako Babes Zibileko Batzordeak aldeko txostena eman ondoren Nota de Vigencia.

13. bis artikulua. Oinarrizko zerbitzuetarako kontingentzia planak Nota de Vigencia.

Oinarrizko zerbitzuetarako kontingentzia planek helburu bikoitza dute:

Erkidegoarentzat oinarrizkoak diren zerbitzuen jarraitutasuna, leheneratze azkarra edo berrezartzea ahalbidetuko duten neurriak eta prozedurak aurreikustea arrisku larriko, katastrofe edo hondamendi egoeretan, jardueraren funtsezko eginkizunen biziraupena ziurtatuz larrialdian zehar eta larrialdiaren ondoren.

Neurri eta prozedura erredundanteak aurreikustea, jardueraren jarraitutasuna ahalbidetzekoak, zerbitzu-ematearen sistema arruntek huts egin edo haien etenik gertatuz gero.

Oinarrizko zerbitzuetarako kontingentzia planek honako hauek jaso beharko dituzte: arriskuen eta osagai zaurgarrien analisia eta ebaluazioa; zerbitzuaren jarraitutasunerako eta zerbitzua berreskuratzeko inpaktuak eta gune kritikoak; zerbitzuaren gutxieneko baldintzak bermatzeko baliabide erredundanteak; sistema erredundanteekin iraun daitekeen denboren analisia eta ebaluazioa; prozesu kritikoak berreskuratzeko neurriak eta horretara bideratu daitezkeen baliabideak, eta planak ezarri, mantendu eta eguneratzeko beharrezkoak diren neurriak.

Oinarrizko zerbitzuetarako kontingentzia planak koordinatu eta osatu egin beharko dira azpiegitura kritikoak babestekoekin, indarreko araudiarekin bat.

Oinarrizko zerbitzuetarako kontingentzia planen titularrek edo legezko ordezkariek babes zibilaren arloko administrazio eskudunari igorriko dizkiote plan horiek, baldin eta ur-hornidurarekin, energia-hornidurarekin, gasolinaren eta gasolioaren hornidurarekin, komunikazioekin, saneamenduarekin eta zabor-bilketarekin zerikusirik badute, bai eta babes zibilaren arloko agintari eskudunak esaten dituenak ere. Babes zibilaren arloko administrazio eskudunak onetsiko ditu plan horiek, Nafarroako Babes Zibilerako Batzordeak aldeko txostena egin ondoren.

Babes zibilaren arloko administrazio eskudunak larrialdietako zerbitzu publikoetarako kontingentzia plan bat taxutuko du.

14. artikulua. Udalaren jarduketa planak.

1. Udalaren jarduketa planak udal mugape osoan edo zati batean dagoen arrisku bati aurre egiteko planak dira, plan berezi edo berariazko batean ezarritakoari jarraikiz udalek egin beharrekoak.

2. Udalaren jarduketa planaren egitura eta edukia kasuan kasuko plan berezian edo plan berariazkoan ezartzen diren jarraibideen araberakoak izanen dira Nota de Vigencia.

3. Udalaren jarduketa planak onesteko prozedura udal babes zibileko lurralde planentzat ezarri den berbera izanen da.

15. artikulua. Autobabeserako planak.

1. Autobabeserako planen ardura 7.3 artikuluan adierazi den katalogoan arrisku sortzailetzat jotzen diren jarduerak edo larrialdiko egoeran egon daitezkeen jarduerak egiten dituzten zentro, establezimendu, leku eta instalazioetako titular edo legezko ordezkariei dagokie, kasuan-kasuan aplikatzekoa den araudian ezartzen diren irizpideei jarraikiz eta, orobat, foru lege honetan onartzen diren garapen xedapenetan eta Nafarroako Babes Zibileko Lurralde Planean ezartzen diren irizpide eta xedapenekin bat.

2. Aplikatzekoak diren arau edo planetan ezartzen dena gorabehera, autobabeserako planetan honako hauek jaso beharko dira gutxienez:

a) Erantzule den titularraren eta Autobabeserako Planaren zuzendariaren identifikazioa.

b) Jardueraren eta jarduera egiten den instalazioen azalpena.

c) Jarduerak sortzen dituen arriskuen identifikazio eta ebaluazioa.

d) Arriskuak gutxitu edo desagerrarazteko neurriak jasotzen dituen prebentzio plana.

e) Larrialdietarako plana, egoera horietan (alarma-egoera, sorospena, jende-hustuketa eta abar) hartu beharreko neurriak eta egin beharreko urratsak jasotzen dituena.

f) Instalazioetan lan egiten dutenentzako informazio eta prestakuntza neurriak eta eduki beharreko ekipamendu egokiari buruzkoak, eta erregelamenduz ezartzen den kasuetarako, baliabide berekiekin eratutako sorospen eta laguntza talde profesional berezituen antolamendua.

g) Pertsona baten izendapena, autobabeserako planean biltzen diren neurrien eragingarritasunaren erantzule izateko eta babes zibilaren arloan eskumena duten agintariekiko harremanak bideratzeko.

h) Gainean dituen lurralde planekin, plan bereziekin eta plan berariazkoekin koordinatzeko eta integratzeko irizpideak Nota de Vigencia.

3. Autobabeserako planak onestea kasuko jarduera, instalazioa edo lekua baimentzeko eskumena duen organo berari dagokio, babes zibilaren arloan eskumena duen departamentuak aginduzko txostena eman ondoren.

4. Autobabeserako planak egin beharra duten zentro edo establezimenduetako titularrek edo legezko ordezkariek planak eta horien aldaketak igorri beharko dizkiete babes zibilaren arloan eskumena duten administrazioei. Horien fitxa bat ere igorriko da, araudi berariazkoaren arabera erregistratu beharreko datuekin batera Nota de Vigencia.

5. Babes zibileko agintariek eskumena izanen dute plana egitera behartua daudenei plana presta dezatela eskatzeko eta, plana onartzeko orduan aintzat hartutako inguruabarrak aldatuz gero, hura alda, gaurkotu edo berrazter dezatela ere. Ematen den epean errekerimenduari kasu egiten ez badiote, babes zibileko agintariek ondoko neurriren bat har dezakete (arrazoiak emanda betiere), sor litekeen arrisku egoera zenbaterainokoa den posible eta norainoko garrantzia izan lezakeen ikusita, deusetan galarazi gabe zehapena jartzeko duten ahalmena:

a) Isun hertsatzaileak ezartzea, foru lege honen 66. artikuluan ezarri bezala.

b) Beharrezkotzat jotzen diren babes neurriak hartzea, hartu beharko lituzkeenaren kontura; izan ere, diru hori bere ondasunen kontura ordaintzea eskatuko zaio premiamendu bidez, nahitaezko dirubilketarako ezarrita dagoen prozeduraren arabera.

6. Behartua dagoenak autobabeserako planak prestatu, aldatu, berrikusi edo gaurkotzen ez baditu eta, horren ondorioz, jarduerak arrisku nabarmena sortzen badu edo zentroa, establezimendua edo lekua, objektiboki begiratuta, arrisku egoera larri batean egon badaiteke, administrazioak, behar den zehapen prozedura hasi ondoren, arriskua sortzen duen jarduera etetea erabaki lezake, neurri hertsatzaile gisara, edo zentroa edo instalazioa ixtea, eskatzen zaiona bete arte.

7. Autobabeserako plan bat eduki behar duten enpresen eta entitateen titularrak behartuta daude babes zibilaren arloko agintari eskudunekin lankidetzan aritzera, beren planari buruz eskatzen zaien informazio guztia emanez, bai eta sortzen dituzten larrialdiak behar bezala konpontzeko beharrezkoak diren baliabide tekniko eta materialak ere, baldin eta instalazioen kanpoaldeari eragiten badiote. Halaber, behartuta daude beren jarduerak ukitutako ingurunean herritarren autobabeserako neurriei buruzko informazioa zabaltzen eta neurriak sustatzen laguntzera Nota de Vigencia.

8. Autobabeserako plan bat eduki behar duten enpresen eta entitateen titularrak behartuta daude, babes zibileko zerbitzu publikoen arloko agintari eta arduradunek hala eskatzen badiete, lan prebentibo edo operatibo guztietan parte hartzera; deitzen zaien bileretara joatera, eta agintariei jakinaraztera planak nahiz planaren operatibitateak estalitako arrisku egoerari eragiten dion inguruabar oro, baita autobabeserako plana abiarazi izana ere Nota de Vigencia.

9. Segurtasun gaietan behar bezala gaitutako titulu teknikoetan graduatutako langileek idatzi beharko dituzte autobabeserako planak, jardueraren enpresa edo entitate titularraren erantzukizupean, eta foru lege honen arabera informatu, homologatu eta onetsi beharko dira, erregelamendu bidez ezartzen denarekin bat, plan-mota bakoitzaren arabera Nota de Vigencia.

16. artikulua. Planen edukia.

1. Babes zibileko planen edukia egitura homogeneo bati jarraikiz antolatuko da, denak bateratzeko asmoz. Beraz, honako hauei buruzko informazioa eta aurreikuspenak jaso beharko dira, gutxienez:

a) Planaren eragin esparruko lurraldearen, biztanleen eta ondasunen ezaugarriak.

b) Arriskuen azterketa.

c) Dauden arriskuei aurre egiteko jarduketak. Ongi bereiziko dira prebentzio neurriak eta larrialdietako jardunbidea.

d) Larrialdietako arduradunen antolaketa: planaren zuzendaria, kontseilu aholku-emailea eta informazio kabinetea.

e) Zerbitzu operatiboak, gutxienez honako talde eduki behar dituztenak: ekintza taldea, sorospen eta salbamendu taldea, segurtasunekoa, osasunekoa, gizarte ekintzakoa eta hornidura eta laguntza logistikokoa. Horrez gainera, koordinazioaren egituraren berri eman beharko da, zuzendari tekniko baten gidaritzapean.

f) Larrialdiei aurre egiteko dauden baliabideak eta mobilizatzeko prozedurak. Ahal delarik, lehentasuna emanen zaio titularitate publikoko baliabideei.

g) Azpiegitura operatiboa. Gutxienez, alarma deiak jasotzeko zentro bat, koordinazio operatiborako zentro bat eta aginte aurreratuko zentroak izan beharko dira.

h) Planaren aplikazio mailak, alerta, alarma eta larrialdi egoeren arabera antolatuak, eta maila bakoitzarentzako neurriak.

i) Plana abian jartzeko prozedura.

j) Beste plan batzuekin integratu eta lotzeko prozedurak.

k) Herritarrak babestu eta haiei informazioa emateko neurriak.

l) Plana ezartzeko eta simulazioak egiteko programa.

m) Planaren mantentze, gaurkotze edo egokitze eta berraztertze programa.

2. Nafarroako Gobernuak erregelamendu bidez osatzen ahalko du udaletako edo udalez gaindiko babes zibileko planen, plan berezien eta plan berariazkoen eta autobabeserako planen edukien egitura, salbu eta Nafarroako babes zibileko lurralde planean agertzen bada Nota de Vigencia.

4. ATALA. Esku-hartzea

17. artikulua. Babes zibileko lurralde planak, plan bereziak eta plan berariazkoak abian jartzea.

1. Lurralde plan batean, plan berezi batean edo plan berariazko batean aurreikusitako arrisku larriko egoera edo larrialdi bat atzematen denean, dagokion babes zibileko plana formalki abian jar dadila aginduko du plan motaren arabera eskumena duen agintariak.

2. Abian jartzearen deklarazioa eginda, larrialdiari aurre egiteko lan guztien zuzendaritza eta koordinazioa planaren zuzendariaren esku geldituko dira. Horrek planean ezarrita dauden neurriak hartuko ditu, beharrezkoak diren aldaketa taktiko eta guzti.

3. Larrialdiaren bilakaera, arriskua nolakoa den eta eskura dauden baliabideak ikusita, gomendagarria baldin bada goragoko babes zibileko plan bat abian jartzea, bide hori hartuko da, Nafarroako babes zibileko lurralde planean eta kasuan kasuko planetan ezarritako prozedurari jarraikiz. Horrelako kasuetan, lanen zuzendaritza eta koordinazioa goragoko planaren arabera eginkizun hori duen agintariaren esku geldituko dira.

4. Nafarroako Gobernuak lankidetza hitzarmenak sinatu ahalko ditu aldameneko autonomia erkidegoekin, eremu mugakideetan gerta daitezkeen eta eragin txikikoak izanik interes nazionalekotzat jotzen ez diren larrialdiei aurre hartze aldera.

18. artikulua. Autobabeserako planak abian jartzea.

1. Autobabeserako planak abian jartzea planen zuzendariei dagokie, haietan ezarrita dagoen larrialdi egoeraren bat gertatzen denean. Plan horien abian jartzearen berri babes zibilaren arloan eskumena duten agintariei emanen zaie eta horiek planeko jarduketen segimendua egin beharko dute.

2. Lurralde plan baten, plan berezi baten edo plan berariazko baten zuzendariak ahalmena izanen du autobabeserako plan bat abian jar dadila agintzeko, zuzendariari errekerimendua eginda horrek kasurik egiten ez duenean. Horrelako kasuetan, planeko langile eta baliabideak plana abian jarri duen babes zibileko agintariaren agindupean jarriko dira.

3. Larrialdia amaitutakoan, autobabeserako planaren zuzendariak larrialdia amaitu dela jakinarazi beharko dio babes zibilaren arloan eskumena duen agintariari.

19. artikulua. Larrialdietako neurriak.

Babes zibileko planen bat abian jarriz gero, babes zibileko agintariek eskumena izanen dute herritarrentzako larrialdietako neurri hauetakoren bat ezartzeko:

a) Edonolako ondasunak hondatu edo suntsitzeko agindua ematea, behar-beharrezkoa baldin bada eta betiere egoeraren larriaren arabera.

b) Behar-beharrezkoak diren ondasun edo zerbitzuak behin-behinekoz okupatzea, haietan esku hartzea edo errekisatzea.

c) Esku hartzeko eta sorospen eremuetatik jendea ateratzeko agindua ematea.

d) Jendea etxeetan edo lokaletan gelditzeko agindua ematea.

e) Operazio eremuetan jendea sartzeko debekua ezartzea.

f) Zerbitzu publikoen erabilera eta ondasun batzuen kontsumoa mugatzea eta baldintzatzea.

g) Ekintza batzuk ez egiteko agindua ematea eta, beharrezkoa bada, derrigorrezko zerbitzu pertsonalak egiteko agintzea. Zerbitzu emate hori sortu den egoeraren eta norberaren ahalmenen araberakoa izanen da eta ez du, nahitaez, kalteordainik jasotzeko eskubiderik sortuko.

20. artikulua. Koordinazioa eta zuzendaritza Nota de Vigencia.

1. Eskura dauden baliabideak aplikatu beharreko planetan xedatuta dagoenaren arabera edo, hori ezean, agintari eskudunaren jarraibide eta aginduen arabera erabiliko dira.

2. Baliabideak printzipio hauen arabera erabiliko dira: berehalakoan erantzun beharra, larrialdia gertatu den tokitik hurbil egotea, baliabideen erabilgarritasuna, profesionalizazioa, parte-hartzaileen espezializazioa, baliabideak bateragarriak izatea eta subsidiariotasuna.

3. Babes zibileko planak abian jartzen direnean, foru lege honen 41. artikuluan aipatzen den larrialdiak kudeatzeko zentroa izanen da planean parte hartzen duten subjektu guztien koordinazioaz arduratuko dena, abian jartzen diren planetan koordinaziorako agertzen diren beste baliabide batzuk deusetan galarazi gabe.

4. Foru lege honen 41. artikuluan aipatzen den Larrialdien Kudeaketarako Zentroa izanen da, kasuko planak abiarazi ostean, larrialdi arrunten koordinazio eta zuzendaritza zentroa eta aparteko larrialdien koordinazio zentroa, halako moduan non bere inguruan egituratuko baita Foru Komunitatearen intereseko edo esparruko planen zuzendaritzaz arduratuko den aginte-postu Nagusia Nota de Vigencia.

21. artikulua. Planak geldiaraztea.

Babes zibileko planak geldiarazteko, kasuan kasuko planean ezartzen den prozedurari jarraikiko zaio.

22. artikulua. Katastrofe egoerak.

1. Larrialdi bat hain handia denean edo halako hedadura hartzen duenean non erantzuteko ahalbideak gainditzen dituen, Nafarroako Gobernuak katastrofetzat har dezake, babes zibilaren arloko eskumenak dituen departamentuko titularrak proposaturik Nota de Vigencia.

2. Katastrofe egoera deklaratuz gero, Nafarroako Gobernuko lehendakariak hartuko du bere gain Nafarroako lurralde planaren zuzendaritza.

3. Nafarroako Gobernuari dagokio katastrofe egoeraren deklarazioaren edukia eta ondorioak finkatzea, eta kasu bakoitzean aplikatu beharreko neurri bereziak ezartzea.

4. Estatuak autonomia erkidegoaz gaindiko eragina edo alarma egoera deklaratuz gero, Nafarroako Gobernuko lehendakariak larrialdiko jarduketen zuzendaritza eta koordinazioa lanak eskuordetzeko eskatzen ahalko dio nazioko gobernuari, estatuko legedian ezarritakoarekin bat.

5. ATALA. Lehengoratzea

23. artikulua. Neurriak.

1. Administrazio publikoek, nork bere eskumenen esparruan, oinarrizko zerbitzuak berrezartzeko neurriak hartzea sustatuko dute, zerbitzu horien faltak, berez, larrialdiko egoera sortzen badu edo lehengoratzeko lanak galarazten baditu.

2. Katastrofe egoera deklaratzen denean edo beharrezkotzat jotzen denean, Nafarroako Gobernuak Lehengoratze Batzordea era dezake, lehengoratzeko neurriak edo programak aztertu eta proposatzeko. Batzorde horretan administrazio publikoetako eta kaltetutako sektoreetako ordezkariak egonen dira.

3. Lehengoratze programa horiek helburu hauek izanen dituzte:

a) Eragindako kalte eta galerak identifikatu eta ebaluatzea.

b) Ukitutako administrazio publikoek beraiek edo beste administrazio batzuek hartu beharreko neurriak proposatzea.

c) Nafarroako Gobernuak eman beharreko edo beste administrazio batzuei eskatu beharreko laguntza eta dirulaguntzak proposatzea.

d) Arriskua kentzeko edo gutxitzeko hartu beharreko neurriak sustatzea, etorkizunean galerak ebitatzearren.

4. Lehengoratze Batzordeak ebaluazio eta lehengoratze lanen segimenduaren ardura nagusia izanen du.

II. KAPITULUA. Antolaketa administratiboa

1. ATALA. Nafarroako Foru Komunitateko administrazioa eta Gobernua

24. artikulua. Nafarroako Gobernua.

Nafarroako Gobernua, bere eskumenen esparruan, babes zibilaren zuzendaritza eta koordinaziorako organo gorena da Nafarroako Foru Komunitatean. Hortaz, eginkizun hauek dagozkio:

a) Babes zibilaren arloan prestatzen diren xedapen orokorrak onestea.

b) Nafarroako babes zibileko lurralde plana eta babes zibileko plan berezi eta berariazkoak onestea.

c) Nafarroako Foru Komunitateko jarduera arriskutsuen katalogoa onestea.

d) Katastrofe egoera deklaratzea.

e) Prebentzio, planifikazio, esku-hartze eta lehengoratze arloetarako oinarrizko jarraibideak ematea.

f) Zehapen ahalmena erabiltzea, foru lege honetan ezarritako moduan.

g) Indarreko legeek esleitzen dizkioten gainerako eginkizunak.

25. artikulua. Departamentu guztien partehartzea.

Babes zibila Nafarroako Foru Komunitateko departamentu guztiei dagokie. Beraz, bakoitzak bere eskumenen arabera, eginkizun hauek izanen dituzte:

a) Arrisku mapak prestatzen laguntzea eta babes zibileko larrialdiak sor ditzaketen arriskuak aurreikustea, ebaluatzea eta haiei aurrea hartzea.

b) Babes zibileko planak prestatzeko lanetan parte hartzea eta departamentuaren zerbitzu eta baliabideak planaren zerbitzura jartzea.

c) Kudeatzeko protokolo operatiboak diseinatzen laguntzea.

d) Dagozkien eginkizunak egitea eta beste administrazio publikoei edo sektore pribatuari dagozkienak sustatzea.

e) Behar diren neurriak hartzea departamentuetako zerbitzuetan babes zibileko planen zabalkundea bermatzeko eta ziurtatzeko horien aplikazioan esku hartu behar duten arduradunek eta langileek behar adina ezagutzen dutela edukia.

f) Alerta eta Alarma Sareari laguntzea, foru lege honetan ezarritako moduan Nota de Vigencia.

26. artikulua. Babes zibilaren arloan eskumena duen departamentua.

1. Sorreraren eta egitura organikoaren gaineko arauetan babes zibilaren arloko eskumena esleitua duen departamentuaren eginkizunak hauek izanen dira:

a) Babes zibileko politika eta programak garatu eta koordinatzea, Nafarroako Gobernuak ematen dituen jarraibideen arabera.

b) Nafarroako babes zibileko lurralde plana eta Nafarroako Foru Komunitatearen esparruko plan berezi eta berariazkoak prestatzea eta, orobat, foru lege honetan aurreikusitako babes zibileko udal planak eta udalez gaindiko planak prestatzen laguntzea.

c) Ukitutako enpresen ordezkariekin batera larrialdietarako kanpo planak prestatzea, gai arriskutsuak tartean diren istripu larriek berekin dakartzaten arriskuak kontrolatzeko neurriei buruzko araudiaren arabera egin behar direnak.

d) Nafarroako arriskuen katalogoa eta mapa, jarduera arriskutsuen katalogoa eta baliabide erabilgarrien katalogoa prestatu eta gaurkotzea.

e) Gainerako administrazio publiko eta entitate publiko edo pribatuei eta partikularrei laguntza eskatzea, foru lege honetan ezarritako betebeharrak bete daitezen.

f) Nafarroako Foru Komunitateko larrialdiak kudeatzeko zentroa mantentzea.

g) Beste administrazio publiko batzuekin lankidetzan aritzeko bideak ezartzea, behar izanez gero, haien baliabideak eskatzeko eta, orobat, foru komunitatearenak haien esku jartzeko.

h) Larrialdietan esku hartzeko zerbitzu berekiak ezarri eta mantentzea Nota de Vigencia.

i) Ezbeharrei aurrea hartzeko, haien ondorioak arintzeko eta, oro har, herritarrak sentsibilizatu eta kontzientziatzeko jarduketak sustatzeko neurriak hartzea.

j) Herritarrek babes zibileko jardueretan borondatez eta irabazi asmorik gabe parte hartzea sustatu eta laguntzea.

k) Foru lege honetan ezartzen dena betetzen ote den begiratzeko ikuskapen lana egitea.

l) Behar diren neurriak hartzea administrazio publikoetan eta ukitutako zerbitzuetan babes zibileko planen zabalkundea bermatzeko eta ziurtatzeko horien aplikazioan esku hartu behar duten arduradunek eta langileek behar adina ezagutzen dutela edukia.

2. Babes zibilaren arloko eskumena duen departamentuko titularrari eginkizun hauek dagozkio:

a) Nafarroako Gobernuari aurkeztea Nafarroako babes zibileko lurralde plana, larrialdietako plan berezi eta berariazkoak eta babes zibilaren arloan beharrezkoak diren gainerako xedapen orokorrak, onets ditzan.

b) Nafarroako babes zibileko lurralde planean eta larrialdietako plan berezi eta berariazkoetan finkatzen diren zuzendaritza lanak betetzea, salbu eta 22. artikuluan aurreikusi den egoeran.

c) Nafarroako Gobernuari proposatzea katastrofe egoera deklara dezala.

d) Nafarroako Babes Zibileko Batzordeko buru izatea.

e) Larrialdiak kudeatzeko zentroaren protokolo operatiboak onestea.

f) Zehapen ahalmena erabiltzea, foru lege honetan ezarritako moduan.

g) Indarreko arauek esleitzen dizkioten gainerako eginkizunak Nota de Vigencia.

2. ATALA. Toki entitateak

27. artikulua. Udalak.

1. Udalek nork bere eskumenen esparrurako babes zibilaren arloko politika prestatu eta betearaziko dute. Horretaz den bezainbatean, honako hauek dagozkie:

a) Babes zibileko udal plana eta udal jarduketaren planak prestatu eta onestea.

b) 15. artikuluan ezarri denaren arabera, dagozkion autobabeserako planak onestea.

c) Baliabide erabilgarrien katalogoa eta udalerriko arriskuen inbentarioa prestatzea eta gaurkotua izatea.

d) Babes zibilerako udal egitura bat antolatu eta sortzea.

e) Udal planean agertzen diren larrialdietako zerbitzu eta baliabideak ikuskatzea.

f) Boluntarioek babes zibilaren arloan udalerrian egiten dituzten ekimenak bideratu eta antolatzea.

g) Aurreikuspen eta prebentziorako udal programak prestatu eta betetzea, horretarako biztanleen kontzientziazio eta sentsibilizazio kanpainak sustatuz, autobabeserako neurriak zabalduz eta babes zibileko praktikak eta simulazioak eginez.

h) Erakunde pribatuei eta herritarrei foru lege honetan ezarritakoa betetzeko behar den laguntza eskatzea.

i) Indarreko legediak esleitzen dizkien gainerako eginkizunak.

j) Behar diren neurriak hartzea ukitutako zerbitzuetan babes zibileko planen zabalkundea bermatzeko eta ziurtatzeko horien aplikazioan esku hartu behar duten arduradunek eta langileek behar adina ezagutzen dutela edukia.

2. Babes zibilaren arloko agintari gorena udalerrian alkatetza daukan pertsona da eta, horrenbestez, hari dagokio udal plana abian jar dadila agintzea eta, kasua denean, hartan ezarritako zuzendaritza eta koordinazio lanak betetzea, plana geldiaraztea, beste administrazio publiko batzuen baliabideak eskatzea eta goragoko plan bat abian jar dezatela eskatzea Nota de Vigencia.

28. artikulua. Udalez gaindiko entitateak.

1. Sortzeko arauetan babes zibilaren arloko eskumenak jaso dituzten udalez gaindiko entitateek aurreko artikuluan udalei esleitzen zaizkien eginkizunak beteko dituzte euren lurralde esparruan eta udalez gaindiko planen arabera.

2. Udalez gaindiko entitateko buruak aurreko artikuluan alkatearen esku uzten diren eginkizunak beteko ditu, bere lurralde esparruan eta udalez gaindiko planen arabera Nota de Vigencia.

3. ATALA. Nafarroako Babes Zibileko Batzordea

29. artikulua. Zer den eta zer eginkizun dituen.

1. Nafarroako Babes Zibileko Batzordea babes zibilaren arloan administrazio publiko guztiak koordinatu eta haien lankidetza bideratzeko kide anitzeko organoa da.

2. Nafarroak Babes Zibileko Batzordeak ondoko eginkizunak izanen ditu:

a) Babes zibileko jarduerak koordinatze-lanetan parte hartzea.

b) Nafarroako babes zibileko lurralde planari, plan bereziei eta berariazko planei buruzko txostena ematea Nota de Vigencia.

c) Udaletako eta udalez gaindiko babes zibileko lurralde planei buruzko txostena ematea Nota de Vigencia.

d) Babes zibilaren arloko arautegien proiektuei buruz txostena egitea.

e) Organo eskudunei babes zibilaren gaineko xedapen eta planak berrikus daitezela proposatzea.

f) Arrisku egoerak edo hondamendi publikoak saihesteko prebentzio neurriak aztertzea eta organo eskudunei proposatzea.

g) Babes zibileko planen funtzionamendua berrikustea, gorabehera aipagarri bat gertatzen den bakoitzean.

h) Babes zibileko planen organo betearazleei mota guztietako laguntza ematea.

i) Indarreko legediak esleitzen dizkion gainerako eginkizunak.

30. artikulua. Osaera.

1. Nafarroako Babes Zibileko Batzordearen osaera, antolaketa eta funtzionamendua erregelamendu bidez ezarriko da. Batzordean, Estatuko administrazio orokorraren, Foru Komunitateko administrazioaren eta Nafarroako toki entitateen ordezkariak izanen dira.

2. Batzordeak, bere eginkizunak hobeki antolatzeko, batzorde tekniko edo lantaldeak era ditzake. Talde horietan batzordeko kideak eta, zer helburutarako sortzen diren, beharrezkoak diren kanpoko teknikariak arituko dira. Era berean, kanpoko edozein entitate edo pertsona fisiko edo juridikori eskatzen ahalko diote informazioa.

III. KAPITULUA. Herritarren lankidetza

30. bis artikulua. Babeserako eskubidea katastrofe bat gertatuz gero Nota de Vigencia.

1. Nafarroako Foru Komunitatean bizi diren pertsona guztiek daukate administrazio publikoen laguntza jasotzeko eskubidea larrialdi bat, ohikoa nahiz apartekoa, gertatuz gero, muga bakar batekin: egoera horiek berezkoak dituzten baldintza arriskutsuak eta esku hartzeko baliabideen eskuragarritasuna.

2. Botere publikoek begiratuko dute herritarrek larrialdi kasuan jasotzen duten laguntza baliokidea izanen dela, non bizi diren alde batera utzita.

3. Larrialdi kasuan, zerbitzu publiko eskudunek ahal den azkarren identifikatuko dituzte biktimak, eta informazio zehatza emanen diete haien familiartekoei eta hurbilekoei.

31. artikulua. Informazioa jasotzeko eta parte hartzeko eskubidea Nota de Vigencia.

1. Herritarrek beraiengan eragina izan dezaketen arrisku kolektibo larriei buruzko informazioa jasotzeko eskubidea dute eta, orobat, haien kausa eta ondorioei buruz, arriskuei aurre egiteko aurreikusita dauden jarduketei buruz, hartu beharreko segurtasun neurriei buruz eta segitu beharreko jokabideari buruz.

2. Informazio horiek larrialdi kasuan nahiz prebentiboki eman beharko dira, galzori egoerak presente egotera iritsi aitzin.

3. Informazioak ezin izanen du indarreko legeriak babestutako datu babesturik inolaz ere jaso.

4. Botere publikoek begiratuko dute berariazko neurriak hartzen direla ziurtatze aldera desgaitasunen bat duten pertsonek arriskuak eta autobabeserako nahiz prebentziorako neurriak ezagutzen dituztela, larrialdi kasuan laguntza eta informazioa jasotzen dutela eta babes zibileko planetan parte hartzen dutela.

5. Herritarrek babes zibileko lanetan laguntzeko eskubidea dute, babes zibileko planek zehazten duten moduan.

6. Babes zibilaren arloko eskumena duten administrazio publikoekiko ohiko lankidetza honakoen bidez bideratuko da: babes zibileko talde eta erakundeak, suhiltzaile boluntarioenak eta foru lege honetan aurreikusitako babes zibileko oinarrizko jarduketak bermatzeko behar diren beste guztiak.

7. Edozein herritarrek eman dezake larrialdi egoera bat eragin dezaketen inguruabar edo jardueren berri, babes zibilaren arloko eskumena duen zuzendaritza nagusian edo haren bulego periferikoetan horren inguruko frogagiriak aurkeztuz

32. artikulua. Betebeharrak Nota de Vigencia.

1. Herritarrak, adinez nagusiak direnez geroztik, babes zibileko lanetan laguntzera beharturik daude, giza indarra eta baliabideak eskainiz, planetan ezarritakoaren arabera edo agintari eskudunen jarraibideen arabera. Betebehar horrek, funtsean, eginkizun hauek dakartza: prebentzio eta autobabeserako neurriak betetzea, simulazioetan parte hartu beharra, eskatzen zaien lanetan esku hartzea eta, arrisku kolektibo larriko egoeretan, larrialdietan, katastrofeetan edo hondamendi publikoetan, agintari eskudunek ezartzen duten giza laguntza ematea.

2. Herritarrak behartuta daude agintari eskudunei informazioa ematera kasuan-kasuan aplikatu beharreko araudian ezarritako moduan eta edukiarekin eta, oro har, arrisku egoerak sortzen edo areagotzen ahal dituzten inguruabarrei buruz.

3. Herritarrak behartuta daude indarreko araudian xedatutakoaren araberako ikuskaritzak egitera; halatan, ikuskaritzari beren lokaletan edo establezimenduetan sartzen utziko diote.

4. Herritarrak behartuta daude arriskuak sortzea nahiz arriskuan jartzea ekiditeko beharrezkoak diren neurriak hartzera. Behin larrialdia gertatuta, zerbitzu publiko eskudunetako agenteen jarraibideen arabera jokatu beharko dute.

5. Nahitaez eman beharreko zerbitzu pertsonalak egoeraren araberakoak eta norberaren gaitasunaren araberakoak izanen dira, eta behar-beharrezkoa den denbora baizik ez dute iraunen. Ez dute kalte-ordainak jasotzeko eskubiderik sortuko, salbu eta zerbitzu-emailearen ondasun eta eskubideetan zerbitzu-ematearengatik sortzen diren kalteen ondoriozkoak.

6. Larrialdien izaerak horretara behartzen baldin badu, babes zibilaren arloko agintari eskudunek aldi baterako bahitzen ahalko dute ondasun-mota oro, eta beharrezkoak direnak behin-behinekoz esku hartzen edo okupatzen ahal izanen dituzte eta, kasua bada, jarduerak eten. Jarduketa horien ondorioz beren ondasun eta zerbitzuetan kalteak pairatzen dituztenek legeetan ezarritakoaren araberako kalte-ordaina jasotzeko eskubidea izanen dute.

7. Larrialdien izaerak horretara behartzen baldin badu, babes zibilaren arloko agintari eskudunek herritarren eskubideak ukitzen dituzten aginduak eta jarraibideak ematen ahalko dituzte legeetan ezarritakoaren arabera, eta agindu eta jarraibide horien jasotzaileek nahitaez bete beharreko neurriak hartzen ahalko dituzte, aplikatzekoa den planak ezarritakoarekin bat edo larrialdiaren nahiz babestu beharreko ondasunen beharrizanek horretara behartuz gero.

Hartzen diren neurri eskubide-murriztaileek, edo prestazio pertsonalak edo materialak ezartzen dituztenek, indarraldi mugatua izanen dute –larrialdiei aurre egiteko hertsiki beharrezkoa dena, hain zuzen ere–, eta larrialdien muntaren araberakoak izan beharko dute.

33. artikulua. Laguntza emateko betebehar bereziak Nota de Vigencia.

1. Pertsonen eta haien ondasunen prebentzio, laguntza, sorospen eta segurtasunarekin zerikusia duen jardueran aritzen diren entitate publiko edo pribatuak bereziki beharturik daude esku-hartzeko zerbitzuekin batera laguntza ematera larrialdi egoeretan.

Entitate horiei egitekoak esleitzen ahal izanen zaizkie babes zibileko planetan, eta babes zibilaren arloko agintari eskudunek eskatzen ahal izanen diete larrialdietan esku har dezaten.

2. Ondasun publikoen gaineko eskubideen entitate titularrak edo zerbitzu publikoak nahiz interes orokorrekoak kudeatzen dituztenak –bereziki, beren jarduna osasun-zerbitzuei lotuta baldin badago edo uraren, gasaren nahiz elektrizitatearen moduko oinarrizko banaketa eta hornidura kudeatzen badute– eta telefoniako eta telekomunikazioetako zerbitzuak ematen dituztenak bereziki behartuta daude larrialdi egoeretan esku-hartze zerbitzuei laguntzera.

Entitate horiek bereziki behartuta daude administrazio eskudunari uztera beren jarduerak betetzeko eskura dauzkaten baliabide materialak eta pertsonalak erabil ditzan, larrialdi egoerei aurre egiteko beharrezkoa den neurrian.

Alerta eta larrialdi egoeretan, telekomunikazio sareen eta zerbitzuen enpresa titularrek babes zibileko agintarien esku jarri beharko dituzte sare eta zerbitzu horiek, herritarrei abisuak eta alertak emateko nahiz esku-hartze zerbitzuen jarduna errazteko.

3. Larrialdi kolektiboetan, katastrofeetan edo hondamendi publikoetan, komunikabide pribatu eta publikoek babes zibileko agintariek ematen dituzten informazio, ohar eta jarraibideak doan hedatu beharko dituzte, oso-osorik, lehenbailehen eta berri horiei lehentasuna emanez beharrezkoa baldin bada, eta informazioa zein agintarik eman duen adieraziz.

34. artikulua. Babes zibileko boluntarioak Nota de Vigencia.

Babes zibileko boluntarioek larrialdiak kudeatzen laguntzen ahal izanen dute, gizarteak gertakari horiei emandako erantzunaren erakusgarri, aplikatzekoak diren arauetan ezarritakoarekin bat eta herritarrek laguntzeko duten betebehar orokorra ezertan ere galarazi gabe.

Babes zibileko boluntarioak adin nagusiko pertsonak dira, beren borondatez eta ez irabazi pertsonalik ez korporatiborik lortzeko asmorik gabe entitate batean sartzen direnak, administrazio publiko eskudunek esleitzen dizkieten babes zibileko ohiko eginkizunak garatu ahal izateko erakunde horretan.

Boluntarioek babes zibilaren esparruan egindako jarduerak boluntario horiek sartuta dauden entitateen bidez eginen dira, boluntario-lanari buruzko araubide juridikoarekin eta boluntario-lanak azpian dauzkan balioekin eta printzipioekin bat, eta haien jarraibideei lotuz, eta horien laguntza ez da inolaz ere gauzatuko administrazio publiko jardulearekiko lan-harreman baten bidez.

Boluntarioek babes zibilaren arloan egindako jarduerak laguntza ematekoak eta larrialdietako zerbitzu publikoen mendekoak izanen dira beti, eta haien zuzendaritzapean jardunen dute soilik.

Foru Komunitateko Administrazioak eta udalek larrialdietarako boluntarioen taldeen ekimenak bideratuko dituzte, boluntarioek babes zibilaren, prestakuntzaren eta laguntza teknikoaren arloan egiten duten lanari buruzko informazioa eman eta zabaltzeko eta haien lana goresteko kanpainak eginez.

Babes zibileko boluntarioen elkarteek Boluntarioei buruzko martxoaren 27ko 2/1998 Foru Legean ezarritakoari segituko diote, eta izena eman beharko dute babes zibilaren arloan eskumena duen departamentuari atxikitako erregistro erregelamenduz zehaztuan.

Babes zibileko boluntarioen elkarteen erregistroan izena emateko, beharrezkoa izanen da aurretiaz Foru Komunitateko Administrazioarekiko lankidetza-hitzarmen bat sinatzea. Erregelamendu bidez ezarriko da hitzarmen horien edukia, zeinak honako hauek jasoko baititu gutxienez ere: bere baliabideak haren eskura jartzea; laguntzeko eta parte hartzeko modua eta halako kasuetan legozkiekeen konpentsazioak, eta entitate horien giza baliabideen heziketa kreditatua.

Boluntario-laneko elkarte bateko eskubide osoko boluntario gisa babes zibilaren eta larrialdien kudeaketaren arloan prebentzio- eta operazio-lanetan parte hartzeko beharrezkoa izanen da babes zibilaren eta larrialdien arloko departamentu eskudunak emandako kreditazioa edukitzea; horretarako, beharrezkoa izanen da erregelamendu bidez ezartzen diren curriculum-gaitasunak edukitzea lan horiek egiteko.

Boluntarioen talde eta erakundeetako kide diren boluntarioek aseguru bat izanen dute, kasuan kasuko erakundearen kargura, eginkizunak betetzeak dakartzan istripu arriskua eta erantzukizun zibila estaliko dituena.

IV. KAPITULUA. Ikuskapenak

35. artikulua. Ikuskatzeko ahalmena.

1. Autobabeserako plana behar duten jardueretan, zentroetan, establezimenduetan edo lekuetan, eta oro har jarduera sailkatu guztietan, babes zibilaren arloko ikuskapen lanak egiteko eskumena Nafarroako Foru Komunitateko administrazioari eta toki entitateei dagokie. Foru Komunitateak babes zibilaren arloan eskumena duen departamentuaren bidez gauzatuko du eskumen hori.

2. Nafarroako Gobernuak behar den laguntza teknikoa emanen die toki entitateei aurreko atalean aipatutako ikuskapen lanak egin ditzaten, entitateek horretarako langile kualifikaturik ez badute eta, betiere, haiek eskatuz gero.

36. artikulua. Ikuskapen lanen xedea.

Aurreko artikuluan aipatu den instalazio eta jardueren ikuskapenaren helburua babes zibilaren arloko legediaren araberakoak ote diren bermatzea da, eta zehazki, hauek egiaztatuko dira: lizentzietan adierazitako segurtasun baldintzak betetzen ote diren eta eragingarriak ote diren, jarduera lizentzian adierazi bezala egiten ote den, ekarritako informazioa egiazkoa ote den eta autobabeserako planean ezarritako neurriak benetan hartzen ote diren.

37. artikulua. Ikuskatzaileak.

1. Babes zibilaren arloko eskumena duten agintariek ikuskapen lanak egiteko izendatutako langile ofizialak agintariaren agente gisara arituko dira dagozkien eginkizunetan.

2. Administrazio publiko eskudunek kanpoko langileen laguntza teknikoa izaten ahalko dute. Langile horiek ez dira inola ere ikuskatzailetzat joko Nota de Vigencia.

3. Ikuskatzaileek lan jardueran egiten dituzten akta eta txostenak agiri publikotzat hartuko dira, eta horien abiapuntu izan diren egintzak frogatzeko balioko dute, interesdunek ekar edo adieraz ditzaketen frogak deusetan galarazi gabe.

4. Ikuskatzaileei honako lan hauek dagozkie:

a) Foru lege honetan tipifikaturiko arau-haustetzat har daitezkeen egintzen berri ematea organo eskudunari.

b) Ikuskapenean atzeman den arau-haustea legezko egoerara ekartzeko behar diren neurriak har daitezela proposatzea organo eskudunari.

c) Ikuskatu den jardueraren lizentzia aldatu, berrikusi edo bertan behera uztea proposatzea organo eskudunari, lizentzia horrek pertsonentzat edo ondasunentzat arrisku larria sor badezake.

38. artikulua. Lagundu beharra.

Ikuskatzen diren jardueretako titularrek ikuskapen lana egiten duten langileei sartzen utzi beharko diete eta behar duten laguntza eman.

III. TITULUA. Larrialdietako jardunbidea

39. artikulua. Larrialdiak kudeatzeko sistema publikoa Nota de Vigencia.

Larrialdi egoeretan laguntza materiala ematearekin zuzen nahiz zeharka lotutako jarduera batean aritzen diren administrazio eta entitate publikoak larrialdiak kudeatzeko sistema publikoaren parte dira eta beharturik daude betetzera foru lege honek dakartzan betebeharrak, bai eta erregelamenduzko garapenean eta kasuan kasuko protokolo operatiboetan ezartzen direnak ere.

39. bis artikulua. Babes zibileko larrialdietan esku hartzeko eta laguntzeko zerbitzuak. Nota de Vigencia.

Honako hauek dira babes zibileko larrialdietan esku hartzeko eta laguntzeko zerbitzuak:

a) Babes Zibileko Zerbitzua eta Larrialdien Kudeaketarako Zentroa.

b) Ospitalez kanpoko larrialdi zerbitzuak, ospitaleetako larrialdi zerbitzuak eta oinarrizko osasun laguntzakoak, ospitale eta osasun etxe publikoak eta osasun-garraio publikoak edo itunduak, bai eta osasun publikoko zerbitzuak ere.

c) Nafarroako administrazio publikoetako prebentzio, su-itzaltze eta salbamendu zerbitzuak.

d) Nafarroako Foruzaingoa eta Nafarroako toki entitateetako poliziak.

e) Errepide-mantenimenduko eta herri-lanetako zerbitzuak, eta basozaintzako eta ingurumenaren babeseko langileak.

f) Gizarte zerbitzuak.

g) Estatuko segurtasun kidego eta indarrak, eta larrialdien kudeaketa xede duten Estatuko Administrazioaren zerbitzuak.

h) Babes zibileko boluntarioen elkarteek eta toki entitateen mende dauden suhiltzaile boluntarioek zerbitzu publikoen mende jardunen dute.

i) Telekomunikazioen, uraren, gas eta fuelaren eta argindarraren sareen hornidura, mantentze eta zainketa zerbitzuak, eta oinarrizko zerbitzuen beste hornitzaile batzuk.

40. artikulua. Larrialdietako deiei erantzuteko zerbitzua.

1. Nafarroako Foru Komunitateko Administrazioak larrialdietako deiei erantzuteko zerbitzu publikoa emanen du larrialdietarako Europako 112 telefono zenbaki bakarraren bidez edo Europako legedian finkatzen den beste baten bidez Nota de Vigencia.

2. Zerbitzu honen barrenean herritarrek Nafarroako Foru Komunitatearen eremuan egiten dituzten laguntza deiak hartu eta larrialdietako osasun laguntzaren, su-itzaltze eta salbamenduaren, herritarren segurtasunaren, babes zibilaren arloetan eta larrialdiaren izaera dela-eta eskatu daitezkeen beste batzuen eskumena duten zerbitzu publikoen bidez kudeatzea sartzen da.

3. Zerbitzu publiko hori Nafarroako Foru Komunitateko administrazioak zuzenean emanen du, babes zibilaren arloan eskumena duen departamentuaren zuzendaritzaren eta kontrolaren pean Nota de Vigencia.

4. Nafarroako Foru Komunitateko bi hizkuntza ofizialetan emanen da zerbitzua. Babes zibilaren eta larrialdien arloko departamentu eskudunak beharrezkoak diren baliabideak jarriko ditu zerbitzua Europar Batasuneko hizkuntza ofizialetan baliatu ahal izateko, bai eta desgaitasunen bat duten pertsonek zerbitzua baliatu ahal izatea ziurtatuko duten mekanismoak bermatzeko ere Nota de Vigencia.

41. artikulua. Larrialdiak kudeatzeko zentroa.

1. Foru Komunitateko administrazioak larrialdiak kudeatzeko zentro bakarra eta integratua izanen du Nafarroako lurralde osorako, larrialdietako deiak jasotzeko eta esku hartu behar duten zerbitzuak koordinatzeko etengabeko zentro gisa arituko dena, zerbitzu horietako aginte eta koordinazio zentroak alde batera utzi gabe.

2. Larrialdiak kudeatzeko zentroa koordinazio eragileko zentro bihurtuko da hala egitea aurreikusten duten babes zibileko planak abian jartzen direnean.

3. Larrialdien Kudeaketarako Zentroa larrialdien eta babes zibilaren kudeaketaren arloko departamentu eskudunari atxikiko zaio Nota de Vigencia.

4. Larrialdien eta babes zibilaren kudeaketaren arloko departamentu eskudunak ezarriko ditu Larrialdien Kudeaketarako Zentroaren eta Nafarroako Foru Komunitateko Administrazioko eta beste administrazio publiko batzuetako larrialdi-zerbitzuetako aginte eta koordinazio zentroen arteko informatikako eta telekomunikazioetako estandar teknikoak Nota de Vigencia.

41. bis artikulua. Larrialdien Kudeaketarako Zentroaren eginkizunak Nota de Vigencia.

Nafarroako Gobernuak, erregelamendu bidez, zentro horren eginkizunak, antolamendua eta funtzionamendua arautuko ditu.

Erregelamendu bidez ezartzen diren eginkizunez gain, Larrialdien Kudeaketarako Zentroari honako hauek dagozkio:

a) Larrialdietako deiak hartzeko zerbitzua ematea larrialdietarako Europako 112 telefono zenbaki bakarraren bidez.

b) Beharrezkoak diren zerbizuen koordinazioa eta bateragarritasuna kudeatzea eta teknikoki aldeztea.

c) Larrialdiaren bilakaeraren kontrola eta jarraipena egitea.

d) Babes zibileko informazio eta alerta sarearen transmisioen komunikazio, kontrol eta koordinazio sisteman parte hartzea.

e) Koordinazio operatiboko zentro eta koordinazio operatibo integratuko zentro gisa aritzea larrialdi egoera bat deklaratzen denean, babes zibileko kasuan kasuko plan autonomikoa abiarazi ostean, plana formalki abiarazi duen babes zibileko agintari eskudunaren zuzendaritzapean.

f) Alerta eta larrialdi egoerak kudeatzea eta koordinatzea.

g) Ariketa eta simulakroetan eta beharrezkotzat jotzen diren gainerako prebentzio-jarduketetan parte hartzea.

h) Edozein motatako larrialdi batean babes zibileko plana aktibatu ondoren planaren zuzendariak esleitzen dizkion eginkizun guztiak.

41. ter artikulua. Datuak bildu eta tratatzea Larrialdien Kudeaketarako Zentroan Nota de Vigencia.

1. Herritarrek edo erakundeek Larrialdien Kudeaketarako Zentroarekin dauzkaten elkarrizketak, bai telefono bidezkoak bai irrati bidezkoak, grabatu eginen dira.

2. Larrialdi bat kudeatzeko prozesuarekin lotutako jarduketak eta komunikazioak –telematikoak, telefono bidezkoak nahiz irrati bidezkoak izan– Larrialdien Kudeaketarako Zentroaren kudeaketa sisteman erregistratuta geratuko dira, halako moduan non larrialdi-gorabeheren kudeaketari buruzko datuen gaineko informazio ofizialeko elementu bihur baitaitezke.

3. Datu pertsonalen babesari buruzko indarrreko legeriarekin bat bilduko eta tratatuko dira larrialdi-gorabehera bat kudeatzeko eta kasuan-kasuan laguntza emateko jarduketa materialak egiteko beharrezkoak diren datu pertsonalak eta informazioa.

Honako kasu hauetan biltzen ahalko dira datu pertsonalak: borondatez lagatzen direnean edo pertsonen osotasuna nahiz kaltetuaren edo hirugarrenen ondasunak babesteko edo kaltetuaren edo hirugarrenen bizi-premia bati erantzuteko beharrezkoak direnean.

Legedi indardunaren arabera babestuta gorde beharreko bestelako informazio batzuk ere biltzen ahalko dira, baldin eta erabakigarriak badira larrialdiari erantzuteko moduari begira edo beharrezkoa den laguntza materiala emateko.

4. Larrialdien Kudeaketarako Zentroak kasuko zerbitzu guztien eskura jarriko du larrialdi-gorabehera baten kudeaketarako informazioa, larrialdia kudeatzearen ondorioetarako. Izaera pertsonaleko datuak horien esku jarriko dira bakar-bakarrik pertsonen osotasuna edo bizi-premia bat babesteko nahitezkoak direnean.

5. Indarreko legeriak eta foru lege honek espresuki ezarritako kasuetatik at, ezin izanen da laga deiak hartu eta kudeatzeari esker eta horien ondorioz gorabeherek eta emandako laguntzek izandako garapenari esker ikasitako datu pertsonalik.

6. Larrialdien Kudeaketarako Zentroak kudeatutako gorabeheren grabazioak eta erregistroak gutxienez ere sei hilabetez eta gehienez ere bi urtez gordeko dira, agintaritza judizialak besterik agindu ezean.

7. Larrialdien Kudeaketarako Zentroak kudeatutako gorabeheren grabazioak eta erregistroak ezin izanen dira legedi indardunean ezarritako kasuetatik at laga.

8. Larrialdien Kudeaketarako Zentroaren arduradunak behar diren neurriak hartuko ditu teknika, kudeaketa eta antolamendu aldetik, datuen isilpekotasuna, segurtasuna eta osotasuna bermatzeko eta ukitutako pertsonek indarreko legeriak aitortzen dizkien eskubideak baliatu ahal izateko.

41. quater artikulua. Babes Zibileko eta Larrialdien Kudeaketarako Zerbitzuetako langileen araubidea Nota de Vigencia.

1. Larrialdien Kudeaketarako Zerbitzuari atxikitako langileen araubidea osatuko dute Nafarroako Administrazio Publikoen zerbitzuko Langileen Estatutuak, estatutu hori garatzen duen araudiak, eta Larrialdien Kudeaketarako Zerbitzuaren eginkizunak, antolamendua eta funtzionamendu-araubidea ezartzen dituen foru dekretuak.

2. Babes Zibilerako Zerbitzuari atxikitako langileak edo Larrialdien Kudeaketarako Zentroa kokatzen ahal den zerbitzuari atxikitako langileak izanen dira betiere zentroan operadore edo salako nagusi modura zerbitzu ematen duten langileak, Larrialdien Kudeaketarako Zentroaren funtzionamendua arautzen duen foru dekretuan ezarritakoarekin bat. O-NOZeko medikuek edo EUDek ematen ahalko dute zerbitzua zentro horretan osasun arloko koordinazio-lanetan, bai eta Nafarroako Suhiltzaileen Zerbitzuko arduradunek ere, zentroaren funtzionamendua arautzen duen foru dekretuan ezarritakoarekin bat.

3. Nafarroako Administrazio Publikoen zerbitzuko Langileen Estatutua nahiz estatutu hori garatzen duen araudia izanen dira segurtasun arloko goi mailako funtzionarioen araubidea, honako berezitasun hauekin:

Beren eginkizunak betetzen ari direnean, agintaritzako agentearen izaera izanen dute.

42. artikulua. Larrialdietan lagundu beharra.

1. Administrazio publikoek eta, zuzenean edo zeharka, larrialdietan laguntza emateko jardueretan aritzen diren erakunde publiko eta pribatuek, Larrialdiak Kudeatzeko Zentroari jakinarazi beharko diote Nafarroako Foru Komunitatean babes zibileko larrialdi bati bidea eman diezaiokeen edozein inguruabar edo egoera, eta zentro horretako langile eta agintariei lagundu beharko diete Nota de Vigencia.

2. Aurreko atalean aipatzen diren administrazio publiko eta entitateek gertakarian edo larrialdian jarduteko eta mobilizatu behar diren zerbitzu guztiak koordinatzeko behar den informazioa eman beharko diote larrialdiak kudeatzeko zentroari. Zehazki, laguntza lanetan parte hartzeko dituzten langileak eta baliabide teknikoak zenbat diren eta non dauden jakinaraziko dute. Horrez gainera, haien ezagutzara iristen diren larrialdi egoeren berri eman beharko dute eta, horietan parte hartuz gero, larrialdien segimenduaren eta bukaeraren berri ere bai.

43. artikulua. Protokolo operatiboak.

1. Protokolo operatiboa larrialdiak kudeatzeko zentroaren lanerako baliabidea da. Protokolo operatiboetan herritarren laguntza deietan jokatzeko modua ezartzen da eta haiek sailkatzeko eta, gertakaria nolakoa den ikusita, behar bezalako erantzuna eman eta baliabideak mobilizatzeko irizpideak finkatzen dira.

2. Protokolo operatiboak Larrialdien Kudeaketarako Zentroak taxutuko ditu eta babes zibilaren arloaren eskumena duen zuzendari nagusiak onetsiko ditu, parte hartzen duten baliabideen titularrekin adostu ondoren Nota de Vigencia.

3. Onesten diren protokolo operatiboetan jasota ez dagoen zerbait gertatuz gero, baliabideen erabilera foru lege honen 20. artikuluan ezarritakoaren arabera eginen da.

44. artikulua. Zuzendaritza operatiboa.

Zerbitzu bat baino gehiago mobilizatu beharreko kasuetan, parte-hartzaile guztien jarduera bateratu beharra badago, gertaeraren tokian egin beharreko lanen koordinazioa eta zuzendaritza abian jartzen den planaren edo kasuan kasuko protokolo operatiboaren arabera dagokionaren esku geldituko dira.

Halako eskudantziarik ezean, larrialdiaren kudeaketan inplikatutako zerbitzuen jardunaren zuzendaritza eta koordinazioa Babes Zibilerako Zerbitzuari egokituko zaizkio, segurtasun arloko goi mailako teknikarien bidez, zeinek zilegi izanen baitute zerbitzu operatiboek bertan dauzkaten buruzagiak eskuordetzea zeregin horietarako, gorabeheraren izaeraren arabera Nota de Vigencia.

IV. TITULUA. Prebentzio, su-itzaltze eta salbamendu zerbitzuak

45. artikulua. Zerbitzu motak eta eginkizunak.

1. Prebentzio, su-itzaltze eta salbamendu zerbitzu publikoak, Nafarroako Foru Komunitatearen esparruan, honako hauek osatuko dituzte:

a) Nafarroako Foru Komunitateko administrazioak bere lurralde osoan emana.

b) Toki entitateek emanak, nork bere lurralde eremuan.

2. Prebentzio, su-itzaltze eta salbamendu zerbitzu publikoei, bakoitzaren eskumenen esparrua errespetatuz, honako eginkizun hauek dagozkie:

a) Suteen prebentzio eta itzaltzearen inguruko jarduerak, eta mota guztietako ezbehar eta arrisku egoeretan pertsona eta ondasunen babesa, bilaketa eta salbamendua Nota de Vigencia.

b) Suteen aurkako babes eta salbamendurako sistema eta teknikak aztertu eta ikertzea.

c) Babes zibileko operazioetan parte hartzea, babes zibileko planetan eta kasuan kasuko protokolo operatiboetan ezarritakoari jarraikiz.

d) Larrialdietako planak egiten laguntzea.

e) Ezbeharren zergatiak, garapena eta kalteak ikertzea eta horien inguruko txostenak egitea eta, bereziki, agintari eskudunen errekerimenduak betetzea.

f) Herritarrendako informazio eta prestakuntza jarduerak antolatzea, prebentzioari buruz eta ezbeharretan jokatzeko moduari buruzkoak.

g) Interes publikoko zerbitzuetan lan egitea, zerbitzuko kideen gaitasun berariazkoa eta eskura dituen baliabideak aprobetxa daitezkeenean.

h) Larrialdietako osasun garraioak esleitutako baliabide berekiekin Nota de Vigencia.

i) Suteen eta ezbeharren prebentzio lana betetzea eta bereziki parte hartzea horren inguruko araudia betetzen dela ikuskatzeko zereginetan.

j) Uretako eta ur azpiko salbamenduak eta mendiko erreskate eta salbamendu teknikoa, zeinetan behar bezala prestatutako eta kualifikatutako langileek –horretarako berariaz sortuko diren laguntza-talde berezietan sartutakoek– parte hartuko baitute Nota de Vigencia.

3. Nafarroako Gobernuak ezarriko du su-itzaltze eta salbamendu zerbitzuen arteko koordinazioa eta zerbitzua Foru Komunitateko lurralde osoan behar den gutxieneko mailarekin emanen dela ziurtatzeko bermea, erregelamenduzko arau zehatz batzuk eta aldizkako planak eginez, hartara zehazteko zer giza eta gauza baliabide beharrezkoak diren.

46. artikulua. Zerbitzuen finantzaketa.

1. Foru Komunitateko administrazioaren menpeko Su-itzaltze eta Salbamendu Zerbitzua Nafarroako aurrekontu orokorretan aurreikusitako zuzkiduren kargura finantzatuko da.

2. Nafarroako Foru Komunitateko administrazioak honakoak jaso ahalko ditu:

a) Udalen ekarpenak, zerbitzua ematera beharturik egonik betebehar horretatik salbuetsirik gelditu eta Foru Komunitateko administrazioarekin zerbitzua emateko lankidetza hitzarmenak izenpetu dituzten horienak.

b) Hurrengo artikuluan arautzen den kontribuzio berezia eta zerbitzuak emateagatik legez bidezkoak diren tasak.

c) Dirulaguntzak, dohaintzak eta zuzenbide publikoko nahiz pribatuko beste dirusarrera batzuk.

3. Larrialdiak kudeatzeko zerbitzuek izaera publiko eta unibertsala dutenez, haiek ematea ezin du inolaz ere baldintzatu tributu bat ordaindu behar izateak aldez aurretik. Xedapen horrek ez dio eraginen larrialdiaz arduratzea ez den laguntza teknikoko zerbitzuak emateagatik ordaina eskatzeari.

47. artikulua. Suitzaltze eta salbamendu zerbitzua jarri eta hobetzeagatik dagokion kontribuzio berezia.

1. Kontribuzio honen zergapeko egintza Nafarroako Foru Komunitateko administrazioaren Su-itzaltze eta Salbamendu Zerbitzua izatetik datorren onura da, erabili ala ez.

2. Kontribuzio berezi honen subjektu pasiboak suteen arriskutik babesten diren ondasunen jabeak dira. Dena dela, kontribuzio berezia ordaintzea eskatuko zaie arrisku hori betetzen duten aseguru enpresei, zergapekoaren ordez.

3. Kontribuzio berezi horren zerga-oinarria Nafarroako Foru Komunitateko administrazioaren Su-itzaltze eta Salbamendu Zerbitzuak urte osoan duen kostu osoa izanen da.

4. Zerga-oinarria subjektu pasiboen artean banatuko da, aurreko urtean bildutako primen zenbatekoaren arabera. Diru-muga bildutako primen ehuneko 5 izanen da. Zenbat diru bildu den kalkulatzeko eta dagokion likidazioa egiteko, babes zibilaren arloko eskumena duen departamentuak ahalmena izanen du aseguru enpresekin edo horien ordez aritzen diren elkarteekin hitzarmenak sinatzeko.

5. Kontribuzio berezia urteko abenduaren 31n sortuko da. Martxoaren 31 baino lehen, aseguru enpresek aurreko urtean bildutako primen zenbatekoa finkatu beharko dute babes zibilaren arloan eskumena duen departamentuarekin batera, edo hori ezean, haien gaineko aitorpena aurkeztu.

6. Likidazioa eginda, kuota urteko bigarren hiruhilekoan ordaindu beharko da.

48. artikulua. Langileen araubidea.

Nafarroako administrazio publikoen menpeko su-itzaltze eta salbamendu zerbitzuetako langileak Nafarroako administrazio publikoen zerbitzuko langileen Estatutuko arau orokorretan ezarritakoaren menpe egonen dira, baina foru lege honetan ezartzen diren zehaztapenak kontuan hartuta.

49. artikulua. Lankontratudun langileak.

Su-itzaltze eta salbamendu zerbitzuak dituzten Nafarroako administrazio publikoek lan-kontratudun langileak kontrata ditzakete zerbitzu horiei loturiko sasoiko edo aldi baterako lanak egiteko.

50. artikulua. Agintaritzako agenteak.

Suteen prebentzio eta itzaltze eta salbamendu zerbitzu publikoetako langileak, lanean jarduten dutenean, agintaritzako agentetzat hartuko dira, arriskuan dauden pertsona eta ondasunen babesa egokiago bermatzearren.

51. artikulua. Berariazko eskubideak.

Nafarroako administrazio publikoen zerbitzuko langileen Estatutuan ezarritakoez gainera, suteen prebentzio eta itzaltze eta salbamendu zerbitzuetako kideek honako eskubide hauek izanen dituzte:

a) Dagozkien eginkizunetarako lanbide prestakuntza teorikoa eta praktikoa izateko eskubidea.

b) Lanbidean gora egiteko eskubidea.

c) Norberaren lanerako jantzi eta tresna egokiak izateko eskubidea.

d) Beren eginkizunetan eginikoengatik erantzunbeharra eskatzen zaien auzi guztietan, kasuan kasuko administrazio publikoak izendaturiko profesionalek ordezkatu eta aldezteko eskubidea, administrazio horren kontura. Dena dela, epaileen erabakian egiaztatzen bada langilearen dolo edo errua dagoela edo utzikeria larriaz jokatu zuela, administrazioak atzerabidea har dezake.

e) Bizi, istripuen eta erantzukizun zibileko aseguru batek babestua izateko eskubidea.

52. artikulua. Berariazko betebeharrak.

Administrazio publikoen zerbitzuko langileei buruzko araudian ezarritakoa deusetan galarazi gabe, su-itzaltze eta salbamendu zerbitzuetako kideek berariazko eginkizun hauek dituzte:

a) Zerbitzua emateko aginduak jakitea; beraz, ezin izanen du argudiatu ez dituela ezagutzen. Gainera, eginkizunak agintariek agindu bezalaxe egin beharko ditu, betiere delituzkoak ez badira edo legeen kontrakoak nabarmen.

b) Laneko arauzko jantziak erabiltzea. Uneoro jantziak egoera onean eduki beharko ditu eta itxura txukuna erakutsi.

c) Aldian behin, gorputz-egoera egokiari eusten diola bermatzeko azterketa psikofisikoak eta medikuntza prebentiboko probak egitea.

d) Zerbitzuari atxikita dauden instalazioak eta materialak egoera onean zaintzea.

e) Eginkizunak betetzeko gaitasun fisiko egokiari eustea.

f) Legearen arabera ezartzen den lanaldia eta ordutegia betetzea. Arriskuko edo larrialdiko egoeretan, ohiko lan orduetatik kanpo lan egitea eskatzen ahalko zaie, eta zerbitzualdian ez dauden langileei deitzea erabaki daiteke.

g) Ezbehar batean lanean ari delarik, dagokion ordutegia bukatuta egonda ere, lanean segitzea, ordezkoak etorri bitartean edo, ezbeharraren larria ikusita, beharrezkoa den arte.

h) Zerbitzu egokia emateko antolatzen diren prestakuntza teoriko-praktikoko ikastaroetan eta prestakuntza fisikoa hobetzeko jardueretan parte hartzea.

53. artikulua. Lanpostuak eta eginkizunak.

1. Su-itzaltze eta Salbamendu Zerbitzuetan lanpostu hauek izanen dira, eta kasu bakoitzean ezarritako eginkizun orokorrak izanen dituzte:

a) Suhiltzaile-ofiziala, A mailakoa. Zerbitzuaren unitate tekniko eta operatiboen zuzendaritza eta koordinazio eginkizunak dagozkio, bai eta goi mailako eginkizun teknikoak ere prebentzioaren, ikuskaritzaren, su-itzaltzearen eta salbamenduaren arloan.

b) Suhiltzaile-ofizialordea, B mailakoa. Zerbitzuaren unitate tekniko eta operatiboen zuzendaritza eta koordinazio eginkizunak dagozkio, bai eta erdi mailako eginkizun teknikoak ere prebentzioaren, ikuskaritzaren, su-itzaltzearen eta salbamenduaren arloan

c) Suhiltzaile-kaboa, C mailakoa. Zerbitzuaren unitate operatiboen ikuskaritza eta zuzeneko aginte eginkizunak dagozkio, goiko agintedunen zuzendaritzapean.

d) Suhiltzailea, C mailakoa. Esku-hartze operatiboko eginkizunak eta betetze-eginkizunak dagozkio, goiko agintedunen zuzendaritzapean.

e) Suhiltzaile-gidari laguntzailea, D mailakoa. Bere mailako eginkizunak dagozkio.

f) Suhiltzaile-peoi laguntzailea, D mailakoa. Bere mailako eginkizunak dagozkio Nota de Vigencia.

2. Aurreko idatz-zatian aipatutako lanpostu bakoitzaren eginkizunak erregelamenduz garatuko dira, bai eta aldi baterako kontratudunen eginkizunak, praktiketako funtzionarioenak eta su-itzaltze eta salbamendu zerbitzuetako gainerako langileenak.

54. artikulua. Kidegoan sartu eta gora egitea Nota de Vigencia.

1. Suhiltzaileen lanpostu hutsak funtzio publikoan sartzeko deialdi publikoa eginda beteko dira, oposizio edo oposizio-lehiaketa bidez. Hautaproben artean, betiere, Nafarroako Segurtasun Eskolak emanen duen prestakuntza ikastaro bat egonen da, zeinean Hezkuntza Departamentuak berariazko deialdia eginen baitu Osasun Larrialdietako teknikariaren lanbide heziketako titulua lortzeko probetarako. Suhiltzaileen Oinarrizko Prestakuntza Ikastarorako onartutako izangaiek proba horiek gainditu beharko dituzte. Ikastaroak dirauen bitartean izangaiak praktiketako funtzionarioak izanen dira.

Hautaprobetarako onartuak izateko, izangaiek C mailara sartzeko eskatzen den titulazioa eduki beharko dute.

2. Suhiltzaile-kaboen lanpostu hutsak goragoko kategoriara igotzeko lehiaketa bidez beteko dira, Nafarroako edozein administrazio publikotako suhiltzaileen artean. Lehiaketan, Segurtasun Eskolak emanen duen prestakuntza ikastaro bat egonen da. Goragoko kategoriara igotzeko lehiaketa horretan parte hartzeko ezinbesteko baldintza izanen da suhiltzaile gisa gutxienez hiru urteko zerbitzuak egiaz eman direla frogatzea eta C mailara sartzeko eskatzen den titulazioa edukitzea.

3. Suhiltzaile-ofizialordeen lanpostu hutsak oposizio-lehiaketa bidez beteko dira; oposizio-lehiaketan, Segurtasun Eskolak emanen duen prestakuntza ikastaro bat egonen da. Igoera txandan parte hartzen ahalko dute suhiltzaile-kaboek, baldin eta frogatzen badute kabo gisa gutxienez hiru urteko zerbitzuak egiaz eman dituztela, eta B mailara sartzeko eskatzen den titulazioa badute.

4. Suhiltzaile-ofizialen lanpostu hutsak oposizio-lehiaketa bidez beteko dira; oposizio-lehiaketan, Segurtasun Eskolak emanen duen prestakuntza ikastaro bat egonen da. Nafarroako edozein administrazio publikotako suhiltzaile-ofizialordeek parte hartzen ahalko dute oposizio-lehiaketa murriztuan, baldin eta frogatzen badute ofizialorde lanpostuan gutxienez bost urteko zerbitzuak egiaz eman dituztela eta erregelamenduz ezarritako titulua, unibertsitateko goi mailakoa, badute. Horren ondotik ateratzen diren lanpostu hutsak txanda irekiko oposizio-lehiaketaren bidez beteko dira.

5. Aurreko ataletan aipatzen diren sarrera eta igoera prozedurak ebatzi aitzin, dauden lanpostu hutsak Nafarroako edozein administrazio publikotan lanpostu berdinak betetzen dituzten funtzionarioen arteko lekualdatze lehiaketara aterako dira.

6. Su-itzaltze eta Salbamendu Zerbitzuetako lanpostuak betetzeko ezartzen diren proba fisikoetan genero-berdintasuna zaintzeko neurri egokiak hartuko dira.

55. artikulua. Bigarren jarduera Nota de Vigencia.

1. Suhiltzaileen edo suhiltzaile-kaboen lanpostuetan aritzen diren funtzionarioek 55 urte betetakoan destino hauetako bat aukeratzen ahalko dute:

a) Lanpostu berean gelditzea 60 urte bete arte. Horretarako, osasun azterketa eta gaitasun fisikoko probak gainditu beharko dituzte urtero, lanpostuan aritzeko behar diren baldintzak dituztela frogatzeko.

b) Dauden zerbitzu berean bigarren jarduerako lanpostu batera pasatzea (zerbitzu osagarriak). Horrelako lanpostuak izanen dira laguntzarako edo prestakuntzarako jarduerak edo jarduera osagarriak egitekoak, langile bakoitzaren ahalmenaren araberakoak, hau da, lanbidean aritu diren denboran ikasitakoa eta bizitakoa garatzeko aukera ematen dutenak, baina ezbeharretan zuzenean parte hartu gabe. Hori ezinezkoa baldin bada, dela bigarren jarduerako lanposturik ez dagoelako, dela langilea horretan aritzeko gaitua ez dagoelako, bere mailari eta titulazioari dagokien administrazio publiko bereko beste lanpostu batean zerbitzu osagarriak egitera pasatzen ahalko dira; erregelamenduz ezarriko dira lanpostu aldaketa horiek egiteko prozedura eta lanpostu horietan aritzeko baldintzak.

2. Eritasuna edo istripua dela-eta, bere lanpostuaren eginkizunak betetzeko ezindurik dauden su-itzaltze eta salbamendu zerbitzuetako funtzionarioak ere bigarren jarduerako lanpostu batean aritzera pasatzen ahalko dira (zerbitzu osagarrietan), eta horrek operazio-taldean lanpostu hutsa sortuko du.

3. Bigarren jarduerako lanpostu batean ari direnek ezin izanen dute aurreko artikuluan gora egiteko ezarritako prozeduretan parte hartu, ez eta horiei lotutako lekualdatze lehiaketetan ere.

4. Behin 55 urte bete ondoren zerbitzu operatiboan jarraitzen duten langileek denbora-ordaina jasotzeko eskubidea izanen dute erregelamenduz ezarritakoaren arabera.

56. artikulua. Diziplina araubidea.

1. Suteen prebentzio eta itzaltze eta salbamendu zerbitzuko langileen diziplina araubidea Nafarroako administrazio publikoen zerbitzuko langileen gaineko arauetan ezarritakoa izanen da. Dena dela, zerbitzuko ezaugarri bereziak direla eta, estatutu horretan tipifikaturiko hutsegiteez gainera, artikulu honetan tipifikatzen direnak ere izanen dira diziplina arloko hutsegiteak:

2. Hutsegite oso larriak dira:

a) Zerbitzuan egonda, ezbeharren deiei kasurik ez egitea.

b) Ezbehar baten gaineko ikerketak oztopatzea, ikerketaren elementuren bat gordez edo suntsituz.

c) Gaineko agintariei edo buruei ez obedientzia, bakarka nahiz taldeka, eta haien legezko jarraibideak desobeditzea.

d) Kargua dela-eta jakiten dituen gaietan, lanbide sekretua edo isiltasuna urratzea, interes orokorrei kaltea eragiten zaienean.

e) Greba dagoenean, gutxieneko zerbitzuak ez egitea.

f) Mozkortzea edo droga toxikoak, sorgorgarriak edo substantzia psikotropikoak hartzea, horrek zerbitzuan eragina izan badu edo izan bazezakeen, eta horretarako egiaztapen mediko eta teknikoak egiteari uko egitea arrazoirik gabe.

g) Zerbitzuak babespean dituen agiriak faltsutu, ebatsi, gorde edo suntsitzea.

h) Zerbitzuko materiala edo norberaren ekipotik gauzak ebastea.

i) Edozein zerbitzu emateagatik esker-sariak eskatzea edo jasotzea.

j) Aginte abusuaz jokatzea karguan ari dela, jokabide horrek kalte larria eragiten badie administrazioari edo herritarrei.

3. Hutsegite larriak dira:

a) Funtzionarioaren duintasunari eta zerbitzuaren irudi eta izen onari kalte egiten dioten egintza eta jokabideak.

b) Laneko jantziak edo zerbitzuko materiala zerbitzutik kanpoko egoeretan erabiltzea.

c) Bere eskurantzak gehiegikeriaz erabiltzea, herritarren kaltetan, jokabide hori hutsegite oso larria ez bada.

d) Zerbitzutik libre egonda, sute edo ezbeharren bat gertatuz gero eta joateko deituz gero, laguntza ematera ez agertzea.

e) Goiko agintarien baimenik gabe lanpostutik ihes egitea, dela ezbehar batetik, dela zerbitzuaren egoitzatik.

f) Bidezko diren azterketa fisikoak eta medikuntza prebentibokoak egiteari uko egitea.

g) Agintariei jakin beharreko edo lehenbailehen erabaki beharreko aferei buruz informazioa eman beharra ez betetzea.

h) Menpean dituen langileek egindako hutsegite arinak estaltzea edo huts egite horiei ez ikusiarena egitea.

i) Zerbitzualdian edari alkoholdunak hartzea edo hori frogatzeko egiaztapen teknikoak egiteari uko egitea.

4. Hutsegite arinak dira:

a) Norberaren txukuntasun falta.

b) Txanda aldaketa egitera behin eta berriz berandu iristea.

c) Txanda aldaketa egitera behar bezala jantzi gabe agertzea, bidezko arrazoirik gabe.

d) Oinarrizko eginkizunen bat ez betetzea, betiere jokabide hori hutsegite larritzat edo oso larritzat hartzen ez bada.

V. TITULUA. Zehapen araubidea

57. artikulua. Xedapen orokorra.

1. Administrazio arau-haustetzat hartuko dira foru lege honetan tipifikaturiko egintza eta ez-egiteak, deusetan galarazi gabe zilegi diren erantzukizun zibil eta penalak.

2. Arau-hausteak oso larriak, larriak eta arinak izan daitezke.

58. artikulua. Arauhauste oso larriak.

Babes zibilaren eta larrialdien kudeaketaren arloan, honako jokabide hauek hartuko dira arau-hauste oso larritzat:

a) Larrialdietan doloz edo zuhurtziagabetasun ausartegiaz jokatzea, horren ondorioz, pertsonei edo ondasunei kalte larriak eragiten bazaizkie.

b) Babes zibileko planetan ezarritako neurriak hartzera behartuta dagoenak neurri horiek ez hartzea, horren ondorioz, pertsonei edo ondasunei kalte larriak eragiten bazaizkie.

c) Foru lege honen 19. artikuluan aurreikusitako ohiz kanpoko neurriak aplika daitezela galaraztea edo nabarmen oztopatzea.

d) Hedabideek babes zibileko agintari eskudunek emanten dituzten ohar, jarraibide eta informazioen berri eman beharra ez betetzea.

e) Autobabeserako plana abian jarri dela ez jakinaraztea Nafarroako larrialdiak kudeatzeko zentroari.

f) Jendea ebakuatzeari buruzko neurriak ez betetzea eta arau orokorretan edo baimen edo lizentzietan ezartzen diren prebentzio neurriak ez hartzea, horren ondorioz, eskatzen den segurtasun maila modu arriskutsuan apaltzen baldin bada.

g) Plan baten zuzendariaren aginduz abian jartzen den babes zibileko plan bati atxikitako baliabidea edo zerbitzua ez mobilizatzea.

h) Hirigintza planeamendua onetsi aurretik arriskuak ikertzeko eskatzen diren azterlan osagarriak faltsutzea.

59. artikulua. Arauhauste larriak.

Babes zibilaren eta larrialdien kudeaketaren arloan, honako jokabide hauek hartuko dira arau-hauste larritzat:

a) Arau-hauste oso larritzat hartu ezin badira ere, doloz edo zuhurtziarik gabe jokatzea, horren ondorioz pertsonei edo ondasunei kalteak eragiten bazaizkie.

b) Larrialdietako plan bat abian jarri edo larrialdiaren deklarazioa eginez gero, babes zibileko agintari eskudunak emandako jarraibideak ez betetzea.

c) Sektore jakin bateko legedi berariazkoan ezarritako prebentzio neurriak ez hartzea eta jendea ebakuatzeko ezarritako neurriak ez betetzea, betiere jokabide hori arau-hauste oso larritzat hartzen ez bada.

d) Autobabesaren arloan edo barne-larrialdietarako aginduzkoak diren plangintzak ez egitea.

e) Aginduzkoak diren aseguruak kontratatuta ez izatea edo aseguru kontratu horiek arriskuak estaltzeko desegokiak eta/edo ez-nahikoak izatea.

f) Foru lege honen 19. artikuluan aurreikusitako ohiz kanpoko neurriak aplikatzeko oztopoak jartzea.

g) Larrialdiko plan bat abian jarriz gero, babes zibileko organo eskudunak agindutako prestazio pertsonalak egiteari uko egitea, justifikatutako arrazoirik gabe.

h) Babes zibileko agintari eskudunak planen bat abian jarriz gero, planean agertzen diren zerbitzuei atxikitako pertsonek eta babes zibileko boluntarioen erakundeetako kideek mobilizazio-deiei kasurik ez egitea.

i) Babes zibileko agintari eskudunak eskatuta, babes zibileko plangintza egiteko behar den informazioa ez ematea.

j) Agintaritzako agenteak ikuskapen lanetan ari direla, sartzen ez uztea edo, nola edo hala, ikuskapen lanak oztopatzea edo egiten ez uztea.

60. artikulua. Arauhauste arinak.

Babes zibilaren eta larrialdien kudeaketaren arloan, honako jokabide hauek hartuko dira arau-hauste arintzat:

a) Larrialdietan lagundu beharra ez betetzea.

b) Simulazioetan babes zibilaren arloko agintariek ezartzen dituzten jarraibide eta neurriei men ez egitea.

c) Simulazio baterako mobilizazio deia eginda, bertan parte hartu behar duten zerbitzuetako eta boluntarioen erakundeetako kideak ez agertzea.

d) Herritarrei babes zibileko plangintzaren gaineko informazioa eta aurreikusita dauden arriskuei eta hartu beharreko neurriei buruz eskatzen dutena ukatzea, informazio horrek herritarrengan zuzeneko eragina baldin badu.

e) Larrialdietako telefonora gezurrezko larrialdien berri emanez deitzea, datu engainagarriak ematea edo beste edozein modutan zerbitzuaren funtzionamendu eraginkorra trabatzea.

f) Foru lege honetan edo garapenerako onesten diren erregelamenduetan xedatutakoa urratzen duen beste edozein egintza edo ez-egite, arau-hauste larritzat edo oso larritzat hartua ez bada.

61. artikulua. Zehapenak.

1. Arau-hauste oso larriak 200.001 eurotik 2.000.000 euro bitarteko isunekin zehatzen ahalko dira.

2. Arau-hauste larriak 12.001 eurotik 200.000 euro bitarteko isunekin zehatzen ahalko dira.

3. Arau-hauste arinak 12.000 euro arteko isunekin zehatzen ahalko dira.

4. Arriskua sor dezaketen eta/edo autobabeserako plana behar duten jarduerei dagozkien arau-hauste larri edo oso larrietan, zehapenarekin batera jarduera aldi baterako edo betiko ixtea erabaki daiteke.

5. Ezin izanen da, inolaz ere, arau-haustearen ondorioz ateratzen den etekina isuna baino handiagoa izan. Horrelakoetan, zilegi izanen da isuna handitzea, lortutako etekina halako bi egin arte.

62. artikulua. Inguruabar astungarriak.

Honako hauek erantzukizunaren inguruabar astungarriak izanen dira: pertsonen osotasunean eragindako kaltea norainokoa izan den eta arriskua zenbateraino handitu den, kaltea konponezina izatea, tokiaren ezaugarriak, arau-haustea egiteko asmoa eta berregilea izatea, deusetan galarazi gabe administrazio publikoen araubide juridikoari eta administrazio prozedura erkideari buruzko oinarrizko legedian ezarritako gainerako astungarriak.

63. artikulua. Zehatzeko eskumena Nota de Vigencia.

1. Zehatzeko ahalmena udalei eta Nafarroako Foru Komunitateko Administrazioari dagokie, artikulu honetan ezarritako moduan, arau-haustetzat jotzen den jokabideak planaren zer arlo ukitzen duen, horren arabera.

2. Arau-hauste arin eta larriak zehatzea alkateari dagokio, salbu eta, arau-hauste larrien kasuan, isunaren zenbatekoa dela-eta, babes zibilaren arloko eskumena duen departamentuko titularrari badagokio. Arau-hauste oso larriak zehatzea, isunaren zenbatekoaren arabera, babes zibilaren arloko kontseilari eskudunari edo Nafarroako Gobernuari dagokio.

3. Babes zibilaren arloko eskumena duen departamentuko titularrak, ikuskapenak egiteko dagokion ahalmena erabiliz, uste badu alkateak zehatu beharreko arau-hausteren bat egin dela, haren berri emanen dio, behar bezala joka dezan. Hilabeteko epean alkateak ez baditu behar bezalako zehapen jarduketak egiten, eskumen hori babes zibilaren arloan eskumena duen kontseilariak hartuko du bere gain.

4. Isunak jartzeko eskumena honako agintari hauek izanen dute, isunen zenbatekoaren arabera:

a) Alkateak, 30.000 euro bitartekoak.

b) Babes zibilaren arloko eskumenak dituen departamentuko titularrak, 600.000 euro bitartekoak.

c) Nafarroako Gobernuak, 2.000.000 euro bitartekoak.

64. artikulua. Zehapen prozedura.

1. Zehapenak jartzeko orduan, Herri administrazioen araubide juridikoaren eta administrazio prozedura erkidearen Legean ezarritako printzipio orokorrei eta Nafarroako Foru Komunitateko administrazioari buruzko abenduaren 3ko 15/2004 Foru Legean ezarritako prozedurari segituko zaie.

2. Zehapen prozeduraren ebazpena urte bateko epean jakinarazi beharko da gehienez, hasiera ematen zaion egunetik hasita. Epe hori bukaturik, prozedura iraungi dela deklaratuko da.

65. artikulua. Aurreneurriak.

1. Zehapen prozedura hasitakoan, hura ebazteko organo eskudunak bidezko jotzen dituen aurreneurriak hartzen ahalko ditu, ezartzen den ebazpena beteko dela bermatzeko eta, nolanahi ere, legeak beteko direla bermatzeko.

2. Aurreneurriak ezartzeko ebazpena eman baino lehen, entzunaldia emanen zaio, gehienez ere hamabost eguneko epean bidezko jotzen duena alega dezan.

66. artikulua. Hertsatzeko isunak.

Foru lege honetan eta Herri administrazioen araubide juridikoaren eta administrazio prozedura erkidearen Legean adierazitako kasuetan, zehapen organoek hertsatzeko isunak jartzen ahalko dituzte. Isun horren zenbatekoak ez du inolaz ere gaindituko egindako arau-hausteari dagokion gehieneko zehapenaren herena.

67. artikulua. Arauhausteen erantzuleak.

1. Foru lege honetan araututako zehapenen erantzuleak egileak dira, pertsona fisikoak edo juridikoak izan.

2. Arau-haustean esku hartu duten pertsona fisikoen edo juridikoen parte-hartze maila zehazterik ez dagoenean, erantzukizuna solidarioa izanen da.

68. artikulua. Zigorerantzukizuna.

1. Arau-haustea zigor bidean zehatzeko modukoa baldin bada, administrazioak Ministerio Fiskalari igorriko dio espedientea eta, horrenbestez, administrazio bidean zehapen jarduketa etenda geldituko da.

2. Zigor-epaia errugabetzekoa baldin bada, jarduketei ekingo zaie bidezko administrazio zehapena ezartzeko.

69. artikulua. Preskripzioa.

1. Arau-hauste oso larriengatik jarritako zehapenak lau urtera preskribatuko dira, arau-hauste larriengatik jarritakoak bi urtera eta arau-hauste arinengatik jarritakoak sei hilabetera.

2. Zehapenen preskripzioari dagokionez, aurreko atalean ezarritako epe berberak aplikatuko dira.

LEHEN XEDAPEN GEHIGARRIA. Larrialdietako osasun laguntzako sistema.

1. Larrialdietako osasun laguntzako sistemaren barrenean dira Nafarroako Foru Komunitateko administrazioak larrialdietako osasun laguntzaren beharrei erantzuteko dituen baliabide guztiak, berekiak eta itunduak, batez ere ospitaleez kanpoko larrialdietako zerbitzua eta larrialdietako osasun garraioaren sarea.

2. Larrialdietako osasun laguntzako sistemari ondoko lan hauek dagozkio:

a) Babes zibileko operazioetan parte hartzea, kasuan kasuko planaren aurreikuspenei jarraikiz, osasun arloko eginkizunak eta agintzen zaizkion gainerakoak ere bere gain hartuz.

b) Kaltetuak arrisku-tokitik ateratzeko eta osasun arloan dituzten beharrei erantzuteko hartu beharreko osasun neurriak sailkatu eta lehentasunak finkatzea.

c) Kaltetuei behar duten zainketa ematea, osasun arloan dituzten beharrei erantzuteko ezarritako lehentasunen arabera.

d) Kaltetuei dagozkien osasun edo laguntzako zentroetara garraiatzea.

e) Larrialdietan parte hartzen duten gainerako zerbitzuei osasun arloko aholkuak ematea.

f) Goitik behera Osasungintzakoak diren prozedura operatiboak aztertu eta garatzea, larrialdietako, estualdietako eta katastrofeetako medikuntzari loturikoak.

g) Herritarrendako informazio eta prestakuntza jarduerak antolatzea, ezbeharrei aurrea hartu eta, gertatuz gero, osasunari dagokionez, segitu beharreko jokamoldeari buruzkoak.

h) Indarreko arauek esleitzen dizkioten gainerako eginkizunak.

BIGARREN XEDAPEN GEHIGARRIA. Suhiltzaile boluntarioak.

1. Suhiltzaile boluntarioak dira, libreki eta modu altruistan, suteen prebentzio eta itzaltzerako eta salbamendurako Nafarroako Foru Komunitateak dituen zerbitzuei laguntzera biltzen direnak.

2. Nafarroako Gobernuak suhiltzaile boluntarioen parte-hartze aktiboa bultzatuko du eta horretarako suhiltzaile boluntarioen herriko taldeak sortzen dituzten toki entitateei laguntzak emanen dizkie. Bestalde, haien prestakuntza ere bermatuko du Nafarroako Segurtasun Eskolaren bidez. Dena dela, Nafarroako Foru Komunitateko administrazioak eskaintzen dituen dirulaguntzak, laguntza teknikoa eta laguntza berariazkoa jaso ahal izateko, babes zibilaren arloan eskumena duen departamentuak adierazi beharko du taldea eratzearekin ados dagoela, udalerri horrek larrialdiei aurre egiteko duen babes maila Foru Komunitateko gainerako udalerriena baino baxuagoa ote den ikusita.

3. Lan altruista eta desinteresatua egiten dutenez gero, suhiltzaile boluntarioak ez dira administrazio publikoaren zerbitzuko funtzionario edo lan-kontratuduntzat hartuko eta ez dute ordainsaririk jasotzeko eskubiderik izanen.

4. Suhiltzaile boluntarioak kasuan kasuko suteen prebentzio eta itzaltzerako eta salbamendurako zerbitzuaren menpe egonen dira.

5. Suhiltzaile boluntarioek honako eskubide hauek dituzte:

a) Taldean onartua izateko eskubidea, inolako bazterkeriarik gabe.

b) Suhiltzaile boluntario izatetik libreki uztekoa.

c) Taldeko helburuen, antolamenduaren eta funtzionamenduaren berri izatekoa.

d) Esleitzen zaizkion eginkizunetarako prestakuntza jasotzekoa.

e) Taldeko izaeraz eta helburuez kanpoko lanak egitera ez bidaltzekoa.

f) Zerbitzu-egintzan gertatzen ahal zaizkion istripuen arriskuaren aurkako asegurua izatekoa, suhiltzaile profesionalen baldintza berdinetan.

g) Bere eginkizunak betetzearen ondoriozko erantzukizun zibila estaltzeko asegurua izatekoa.

h) Esleitzen zaion lana betetzeko behar dituen baliabideak jasotzekoa.

i) Bere lanak sortzen dizkion gastuak eta kalte-ordainak jasotzekoa.

j) Lanean aritzeko dagokion kredentziala lortzeko eta taldean parte hartzearen ziurtagiria jasotzekoa.

6. Suhiltzaile boluntarioek betebehar hauek dituzte:

a) Dagokien lana ahal duten ardura handienarekin egitea, taldeko adierazgarri eta kreditazioak behar bezala erabiltzea eta beren eskura jartzen diren baliabideak egoki erabiltzea.

b) Taldeko helburuak, xedeak eta funtzionamendu arauak eta ematen zaizkien aginduak onartzea.

c) Larrialdietan, babes zibileko planak abian jartzen direnetan edo simulazioak egiten direnetan agintari eskudunek deia eginda ahalik eta lasterren agertzea, lan arrazoiengatik edo behar bezala justifikatutako ezinbesteko arrazoiengatik ezinezkoa duenean izan ezik.

d) Jakiten dituzten larrialdi guztien berri ematea larrialdiak kudeatzeko zentroari.

e) Babes zibileko agintariek proposatzen dizkieten prestakuntza jarduera guztietan modu aktiboan parte hartzea.

HIRUGARREN XEDAPEN GEHIGARRIA. Enpresako suhiltzaileak.

1. Foru lege honen ondorioetarako, enpresako suhiltzaileak izanen dira enpresa publiko edo pribatuetan prebentzio, su-itzaltze eta autobabeserako lanetan ari diren langile espezializatuak. Enpresako suhiltzaileek Nafarroako Segurtasun Eskolak emandako kreditazioa eduki beharko dute.

2. Nafarroako Foru Komunitateko administrazio publikoek suhiltzaileen eta/edo autobabeserako taldeak dituzten enpresekin hitzarmenak sinatzen ahalko dituzte su-itzaltze eta salbamendu lanetan elkarri laguntza emateko.

LAUGARREN XEDAPEN GEHIGARRIA. Toki entitateek suteen prebentzio eta itzaltze eta salbamendu zerbitzua eman beharraz salbuestea.

1. Toki araubideko legeen arabera, bakarka edo elkartuta suteen prebentzio eta itzaltze eta salbamendu zerbitzua eman beharra duten 20.000 biztanletik gorako udalerriek zerbitzu hori eman beharraz salbuesteko dispentsa eskatzen ahalko diote Nafarroako Gobernuari, betebehar hori ezinezkoa edo oso zaila gertatzen zaienean.

2. Aurreko atalean aipatutako dispentsaz gainera, suteen prebentzio eta itzaltzerako eta salbamendurako zerbitzua emateari begira, udalerri horiek indarreko legeetan ezarrita dauden beste lankidetza eta laguntza bide batzuk erabil ditzakete.

3. Toki araubideko legediaren arabera suteen prebentzio eta itzaltzerako eta salbamendurako zerbitzua eman beharrik ez duten edo aipatutako dispentsa hori duten udalerrietan, babes zibilaren arloko eskumena duen Nafarroako Foru Komunitateko departamentuak bermatu beharko du zerbitzu hori.

4. 20.000 biztanletik gorako udalen batek ez badu suteen prebentzio eta itzaltze eta salbamendu zerbitzurik egiten, 1. atalean aipatutako dispentsa eman ez bazaio edo xedapen gehigarri honen 2. atalean aipatutako lankidetza bideren bat aukeratu ez badu, Foru Komunitateko administrazioari dagokio zerbitzu hori udalerrian ematea subsidiarioki, Nafarroako Su-itzaltze eta Salbamendu Zerbitzuaren bitartez. Horrelakoetan, Nafarroako Gobernuak, ukitutako udalari entzunaldia eman ondoren, finkatuko du udalak zenbateko ekarpen ekonomikoa egin behar duen zerbitzu hori finantzatzeko.

BOSGARREN XEDAPEN GEHIGARRIA. Iruñeko Udaleko suhiltzaile zerbitzuaren transferentzia.

1. Iruñeko Udalak erabakiko du zer egin bere suteen prebentzio eta itzaltze eta salbamendu zerbitzuarekin: bere horretan utzi ala Nafarroako Foru Komunitateko administrazioarenean integratu.

2. Aurreko atalean aipatutako integrazioa Iruñeko Udalak eta Nafarroako Gobernuak sinatu beharreko integrazio hitzarmenaren bidez eginen da.

3. Integrazio hitzarmenean honako hauek ezarri beharko dira:

a) Nafarroako Foru Komunitateko Su-itzaltze eta Salbamendu Zerbitzuak bere gain hartuko dituen eginkizunak.

b) Horretara transferitzen diren langileen zerrenda.

c) Langileak homologatzeko irizpideak.

d) Eskualdatzen diren ondasunen zerrenda.

e) Udalak urtero egin behar duen diru-ekarpena finantzaketan proportzionaltasunez laguntzeko eta, hala badagokio, gaurkotze formula.

SEIGARREN XEDAPEN GEHIGARRIA. Suhiltzaileen eta polizien deialdietan parte hartzeko baldintzen harmonizazioa Nota de Vigencia.

Su-itzaltze eta salbamendu zerbitzuko suhiltzaile izateko eta Nafarroako polizia kidegoetako polizia edo agente izateko baldintzak harmonizatzeko, beharrezkoa da Nafarroako polizia kidegoei buruzko Foru Legeko 32.1 artikulua aldatzea (urriaren 14ko 213/2002 Legegintzako Foru Dekretuaren bidez onetsi zen foru lege horren testu bategina). Honela geldituko da artikulu hori:

"1. Nafarroako polizia kidegoetako funtzionario izateko hautaprobetan onartua izateko baldintza hauek bete beharko dira:

a) Espainiako nazionalitatea izatea.

b) Adinez nagusia izatea eta deialdian ezarritako adina ez gainditzea.

c) Kargurako eskatzen den titulu edo lanbidea izatea.

Hala ere, polizia edo agente lanpostuan sartzeko hautaprobetarako nahiko izanen da eskola-graduatua, lehen mailako lanbide-heziketa edo baliokidea izatea, halako moduz non, 35. artikuluan aipatutako prestakuntza ikastaroa gaindituta, teknikoki baliokideak izanen baitira oinarrizko ikastaro hori eta batxilergoa, bigarren mailako lanbide-heziketa edo horien baliokidea; baliokidetasun hori, hala ere, ondorio administratiboetarako baino ez da izanen, hau da, maila horretako funtzionario izendatzeko, eta ez du baliorik izanen arlo akademikoan ezta irakaskuntzaren edo hezkuntzaren arloan ere.

d) Eginkizunak betetzeko behar diren gaitasun fisiko eta psikikoak izatea, eta ez egotea erregelamenduz ezarriko den baztertzeko arrazoi medikoen taulan.

e) Deialdian ezartzen den gutxieneko garaiera izatea.

f) Eginkizun publikoak betetzeko desgaiturik edo bazterturik ez egotea eta administrazio publikoren bateko zerbitzutik bereizia ez izatea.

g) Deialdian aipatzen den ibilgailu mota gidatzeko baimena edukitzea."

LEHENBIZIKO XEDAPEN IRAGANKORRA. Babes zibileko planen egokitzapena.

1. Foru lege honek indarra hartu aurretik prestatutako babes zibileko planak foru lege honetan ezartzen denari egokitu beharko zaizkio, legeak indarra hartu eta bi urteko epean.

2. Jarduera arriskutsuen katalogoan sartuta dauden jarduera, zentro, leku edo instalazioetako titularrek, irekitzeko lizentzia edo funtzionamendu baimena baldin badute betiere, lege honek indarra hartu eta hiru urteko epea izanen dute 15. artikuluan adierazitako autobabeserako plana administrazio eskudunean aurkezteko.

Aurreko lerrokadan aipatutako planak onetsi eta hiru hilabeteko epean ezarri beharko dira, edo planean zehazki adierazten den epean.

BIGARREN XEDAPEN IRAGANKORRA. Enpresako suhiltzaileen kreditazioak.

Foru lege honek indarra hartzen duenean enpresa publiko edo pribatuetan aritzen diren enpresako suhiltzaileei, bost urteko antzinatasuna badute, ez zaie eskatuko foru lege honen hirugarren xedapen gehigarrian adierazi den kreditazioa, Nafarroako Segurtasun Eskolak eman beharrekoa. Antzinatasun txikiagoa dutenek hemezortzi hilabeteko epea izanen dute kreditazio hori lortzeko."

XEDAPEN INDARGABETZAILE BAKARRA. Indargabetzeak.

Indarrik gabe uzten dira Nafarroako administrazio publikoen zerbitzuko langileen Estatutuaren hamabosgarren xedapen gehigarria, Zenbait zerga aldatzeari buruzko urriaren 20ko 12/1992 Foru Legearen 9. artikulua eta foru lege honetan ezarritakoaren aurka jotzen duten maila bereko edo baxuagoko arau guztiak.

AZKEN XEDAPENETAN LEHENA. Erregelamenduak emateko baimena.

Nafarroako Gobernuari baimena ematen zaio foru lege hau garatu eta betearazteko behar diren erregelamendu guztiak eman ditzan.

AZKEN XEDAPENETAN BIGARRENA. Aurrekontu baimena.

Nafarroako Gobernuari baimena ematen zaio, Nafarroako Foru Komunitateko administrazioan babes zibileko eta su-itzaltze eta salbamendu zerbitzuak zuzenean kudeatzeko erakunde autonomo bat sortuz gero, behar diren kontusailak sortu eta handitzeko, sortzen diren gastuak egoki aplika daitezen.

Horren finantzaketa, betiere, aurrekontuetan "Su-itzaltze eta salbamendua" eta "Babes zibila" izena duten programen kargura eginen da.

AZKEN XEDAPENETAN HIRUGARRENA. Indarra hartzea.

Foru lege honek Nafarroako ALDIZKARI OFIZIALean argitaratu eta hilabeteko epean hartuko du indarra.

Nik Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako ALDIZKARI OFIZIALean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezaten manatzen diet.

Iruñean, 2005eko uztailaren 1ean._ Nafarroako Gobernuko lehendakaria, Miguel Sanz Sesma.

Iragarkiaren kodea: F0515360

Gobierno de Navarra

Contacte con nosotros | Accesibilidad | Aviso legal | Mapa web