LEXNAVARRA
11/1997 FORU LEGEA, ekainaren 27koa, Nafarroako Estatistikari buruzkoa 
BON N.º 83 - 11/07/1997
HASIERAKO TITULUA. Xedea eta eremua
- 1. artikulua. Xedea.
- 2. artikulua. Ezarpeneremua.
I. TITULUA. Estatistika jardueraren arauketa
I. KAPITULUA. Printzipio orokorrak
- 3. artikulua. Estatistika jardueraren printzipioak.
LEHEN ATALA. Interes publikoa
- 4. artikulua. Interes publikoa.
BIGARREN ATALA. Gardentasuna
- 5. artikulua. Gardentasuna.
HIRUGARREN ATALA. Homogeneotasuna
- 6. artikulua. Homogeneotasuna.
LAUGARREN ATALA. Proportzionaltasuna
- 7. artikulua. Proportzionaltasuna.
BOSTGARREN ATALA. Emaitzen zabalkundea eta argitalpena
- 8. artikulua. Zabalkunde estatistikoa.
- 9. artikulua. Estatistika ofizialen publizitatea .
- 10. artikulua. Emaitzen ofizialtasuna.
- 11. artikulua. Metodologiaren argitalpena.
- 12. artikulua. Ustiapen bereziak.
SEIGARREN ATALA. Informazioa gorde eta zaintzea
- 13. artikulua. Informazioa gorde eta zaintzea.
ZAZPIGARREN ATALA. Administrazio Publikoen arteko lankidetza
- 14. artikulua. Administrazio publikoen arteko lankidetza. .
ZORTZIGARREN ATALA. Sekretu estatistikoa
- 15. artikulua. Sekretu estatistikoaren eremua.
- 16. artikulua. Sekretu estatistikoaren edukia.
- 17. artikulua. Unitate estatistikoen arteko komunikazioa.
- 18. artikulua. Xede zientifikoetarako komunikazioa.
- 19. artikulua. Sekretu estatistikoak babestutako datuen erabilpena.
- 20. artikulua. Sekretu estatistikoa gorde behar dutenak.
- 21. artikulua. Sekretu estatistikoa ez betetzea.
- 22. artikulua. Sekretu estatistikoaren salbuespenak.
BEDERATZIGARREN ATALA. Informazioa derrigorrez eman beharra
- 23. artikulua. Derrigorrez erantzun beharreko estatistikak.
- 24. artikulua. Informazioa ematera behartuta dauden pertsonak .
- 25. artikulua. Informazioa emateko modua.
II. KAPITULUA. Estatistika jardueraren plangintza
- 26. artikulua. Nafarroako Estatistika Plana.
- 27. artikulua. Urteko estatistikaprogramak .
- 28. artikulua. Beste estatistika batzuk .
II. TITULUA. Nafarroako Estatistika Sistema
I. KAPITULUA. Xedapen orokorrak
- 29. artikulua. Nafarroako Estatistika Sistema.
II. KAPITULUA. Nafarroako Estatistika Institutua
- 30. artikulua. Izaera eta atxikipena.
- 31. artikulua. Eginkizunak.
- 32. artikulua. Baliabide tekniko eta pertsonalak.
III. KAPITULUA. Departamentuetako estatistika unitateak
- 33. artikulua. Departamentuetako estatistika unitateak.
- 34. artikulua. Departamentuetako estatistikaorganoak .
- 35. artikulua. Estatistika jarduerari buruzko memoria.
IV. KAPITULUA. Nafarroako Estatistika Kontseilua
- 36. artikulua. Izaera eta osaera .
- 37. artikulua. Eginkizunak .
- 38. artikulua. Baliabideak.
III. TITULUA. Harreman estatistikoak toki entitateekin
- 39. artikulua. Toki Administrazioen estatistika unitateak.
IV. TITULUA. Zehapen araubidea
- 40. artikulua. Arauhausteak.
- 41. artikulua. Arauhausteen erantzuleak.
- 42. artikulua. Laguntza ematera behartuak daudenen arau hausteak.
- 43. artikulua. Estatistika jardueran egin daitezkeen arauhausteak.
- 44. artikulua. Zehapenen zenbatekoa .
- 45. artikulua. Zehatzeko nahitaezko baldintza.
- 46. artikulua. Ahalmena eta zehapen prozedurak.
- 47. artikulua. Preskripzioa.
- 48. artikulua. Beste erantzukizunak.
V. TITULUA. Nafarroako populazioaren erregistroa
- 49. artikulua. Nafarroako Populazioaren Erregistroa sortzea .
- 50. artikulua. Nafarroako Populazioaren Erregistroko datuak lortzea .
- 51. artikulua. Pertsonen eskubideak egikaritzea .
- 52. artikulua. Nafarroako Populazioaren Erregistroaren helburua .
- 53. artikulua. Konfidentzialtasuna .
- 54. artikulua. Nafarroako Populazioaren Erregistroko datuak erabiltzea .
- 55. artikulua. Segurtasun neurriak .
- XEDAPEN GEHIGARRIA
- XEDAPEN IRAGANKORRAK
- Lehena
- Bigarrena
- XEDAPEN INDARGABETZAILEA
- AZKEN XEDAPENAK
- Lehena
- Bigarrena
- Hirugarrena
- Laugarrena
ERANSKINA. Izena: Nafarroako Populazioaren fitxategia
Espainiako Konstituzioaren 149.1.31gn. artikuluak Estatuari bakarrik dagozkion eskumenen artean "helburu estatalerako estatistika" sartzen du.
Funtzio Estatistiko Publikoari buruzko maiatzaren 9ko 12/1989 Legeak 1945eko Estatistikari buruzko Legea ordezkatu eta helburu estatalerako funtzio estatistikoa arautu zuen.
Nafarroako Foru Eraentza Birrezarri eta Hobetzeari buruzko 13/1982 Lege Organikoaren 44.21 artikuluak Nafarroari bakarrik dagozkion eskumenen artean "Nafarroarako interesgarria den estatistika" ezartzen du.
Foru Komunitateko Administrazioan funtzio estatistikoak jada bide luzea egin du, bi hamarkada gainditu ditu eta. Foru Diputazioak Estatistika Zerbitzua sortu zuen 1974. urtean. Zerbitzu horri, besteak beste, estatistika alorreko lanak eginarazi zizkion. Lan horiek hasiak ziren ordurako Ogasun Zuzendaritzako Idazkaritza Teknikoan.
Nafarroako Administrazioen unitateek estatistika lan ugari eginak dituzte.
Jarduera konplexu bati buruz eskumen eremu esklusibo bat izateak, zeinetan bat egiten baitute eskubideak eta betebeharrak, kautelak eta arau-hausteak, antolamendu eskariak eta plangintza, e.a., erregulazio egokia eskatzen du, bai eta antolakuntza zehatza izatea ere.
Azaroaren 25eko 522/1991 Foru Dekretuak eskari honi erantzuten zion, aldi baterako baldin bazen ere. Izan ere, zioen adierazpenean honako hau agertzen zen: "Harik eta behar den Foru Legearen bitartez gure Foru Komunitateko estatistika jarduera arautu arte, bidezko da oraingoz aipatu jarduera arautzea Foru Dekretu honen bitartez".
Hainbat komunitate autonomok jada arautuak dituzte beren estatistika jarduerak.
Honako Foru Lege honen egitura Hasierako Titulu batek eta lau tituluk osatzen dute.
Hasierako Tituluak zehazten ditu Foru Lege honek arautzen duen estatistika jardueraren helburua eta aplikazio eremua.
I. Tituluak zehazten ditu estatistika jarduera arautu behar duten printzipioak, bertan parte hartzen duten agente desberdinen eskubideak eta betebeharrak finkatzen dituelarik. Era berean, estatistika jardueraren plangintza prozedurak finkatzen ditu. Hala eta guztiz ere, ez du erregulazio eremua agortzen, zeina osatu beharra egonen baita Nafarroako Estatistika Planari buruz aterako diren legeen bitartez.
II. Tituluak Nafarroako Foru Komunitatearen Estatistika Sistema arautzen du. Sistema hori ondoko hauek osatzen dute: Nafarroako Estatistika Institutuak, Nafarroako Estatistika Kontseiluak eta Foru Komunitateko Administrazioaren Departamentuen eta erakunde autonomoen eta haien menpeko enteen estatistika unitateek. Estatistika Sistema hau sistema koordinatu bat da estatistika jardueraren plangintzari dagokionez, bai eta definizio, kode eta izenen erabilpenari, lurraldeetako estatistika unitateei eta beste alorrei dagokienez ere, baina informazio estatistikoaren ekoizpenean eta zabalkundean argiro deszentralizatua dago.
Titulu horretan xedatutakoari lotuta "Nafarroako Estatistika Institutua" sortu da, Nafarroako Foru Komunitateko Estatistika Sistemaren gunea dena. Institutu horren esku dago Nafarroarako interesgarria den estatistika publikoaren jarduera zuzendu, koordinatu eta sustatzea.
Halaber, aholku organo bat ere sortu da, Nafarroako Estatistika Kontseilua hain zuzen. Horren eginkizuna da informazio estatistikoaren ekoizleen arteko harremanak eta horien eta informazioaren erabiltzaileen artekoak erraztea.
III. Tituluaren gaia da Nafarroako toki entitateen estatistika unitateena.
IV. Tituluan zehazten da Foru Lege honetan ezarritako arauak eta betebeharrak betetzen ez dituztenei dagokien arau-hauste eta zehapenen erregimena.
HASIERAKO TITULUA. Xedea eta eremua
1. Foru Lege honek Nafarroarako interesgarria den estatistika jarduera publikoa arautzea du xede, Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoak bere 44.21 artikuluak aipatu bezala.
2. Foru Lege honen ondorioetarako:
a) Estatistika jardueratzat hartzen dira estatistikak prestatzeko datu kuantitatibo edo kualitatiboak biltzea, eskuratzea, tratatzea eta zaintzea, emaitzak argitaratu eta zabaltzea eta antzeko beste edozein ekintza.
b) Estatistika publikotzat hartzen da Administrazio Publikoetako unitateek gauzatutakoa.
c) Nafarroarako interesgarria den estatistika jardueratzat hartzen da Foru Komunitatearen lurraldeari, demografiari, gizarte eta ekonomiari buruzko informazio estatistikoa ematen duena.
1. Foru Lege hau aplikatuko zaie:
a) Foru Komunitateko Administrazioak, haren erakunde autonomoek eta menpeko ente eta enpresek gauzatutako estatistika jarduerari.
b) Nafarroako toki entitateek, haien erakunde autonomoek, ente eta enpresek gauzatutako estatistika jarduera publikoari, beti ere Foru Komunitaterako interesgarri denean.
2. Foru Lege hau ez zaie aplikatuko:
a) Konstituzioaren 149.1.31 artikuluak aipatzen duen helburu estataleko estatistika jarduerari, eta berdin dio delako jarduera Estatuko Administrazio Orokorraren organo eskudunek hitzarmen, itun edo nolanahiko lankidetza mota baten bidez zuzenean gauzatua izan zein beste edozein entitatek.
b) Foru Lege honen 2.1 artikuluan sartzen ez diren pertsona fisiko nahiz juridiko pribatu edo eskubide publikodunek gauzatutako estatistika jarduerari.
c) Nafarroako Estatistika Planean sartu ez diren hauteskunde zundaketa eta iritzi inkestei.
I. TITULUA. Estatistika jardueraren arauketa
I. KAPITULUA. Printzipio orokorrak
3. artikulua. Estatistika jardueraren printzipioak.
Foru Lege honek arautzen duen estatistika jarduerak, izaera orokorrez, kontutan hartuko ditu emaitzen interes publikoa, gardentasuna, homogeneotasuna, proportzionaltasuna, zabalkundea eta argitalpena, informazioa gorde eta zaintzea, Administrazio Publikoen arteko lankidetza, sekretu estatistikoa izatea eta informazioa eman beharra.
LEHEN ATALA. Interes publikoa
4. artikulua. Interes publikoa.
Foru Lege honek arautzen du interes publikoa dela medio garatutako estatistika jarduera oro. Nafarroako Parlamentuari dagokio estatistika baten interes publikoa neurtu eta kalifikatzea, Nafarroako Estatistika Planaren onespenaren bidez, 28. artikuluan ezarritakoa galarazi gabe.
BIGARREN ATALA. Gardentasuna
1. Gardentasun printzipioa aplikatuz estatistika xedea duten datuak ematen dituzten subjetuek eskubidea dute datu horiek babesteko behar adina informazio eskuratzeko, datuok zertan erabiliko diren eta erantzuna nahitaezkoa izanen den edo ez jakiteko. Estatistika jarduera burutzen duten unitateak beharturik daude informazio hori ematera.
2. Foru Lege honek arautzen duen estatistika eragiketa bakoitzeko galdesorta edo galdeketa orotan agerrarazi beharko dira:
a) Egiten den estatistika jardueraren ezaugarriak.
b) Datuen helburu nagusia.
c) Lankidetzan aritzeko beharra, hala behar denean.
d) Sekretu estatistikoaren babesa.
e) Informazioa emateko betebeharra, Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamenduan xedatutako moduan; erregelamendu hori datu pertsonalen tratamenduari eta datu horien zirkulazio askeari dagokienez pertsona fisikoak babesteari buruzkoa da, eta 95/46/EE Zuzentaraua indargabetzen du .
HIRUGARREN ATALA. Homogeneotasuna
6. artikulua. Homogeneotasuna.
Foru Lege honek arautzen duen estatistika jarduera burutzeko aplikatuko dira estatistika eta lurralde mailako unitate, izen, kode, sailkapen eta definizioen multzo bateratu bat, bai eta estatistika jardueraren homogeneotasuna lortzeko lagun dezakeen beste edozein ezaugarri ere.
Arau horiek Foru Dekretu bidez onetsiko dira eta nahitaez betebeharrekoak izanen dira.
Ezartzen diren unitate, izen, kode, sailkapen eta definizioak bateragarriak izanen dira Estatuko Administrazio Orokorrak eta Europako Batasunak ezarritakoekin, datuak homogeneoak eta alderagarriak izan daitezen.
LAUGARREN ATALA. Proportzionaltasuna
7. artikulua. Proportzionaltasuna.
Foru Lege honek arautzen dituen estatistika jardueretakoren bat gauzatu behar duen edozein unitatek proportzionaltasun printzipioa aplikatu beharko du lortu nahi diren emaitzen eta eskatzen den informazioaren izaera eta tamainaren artean.
BOSTGARREN ATALA. Emaitzen zabalkundea eta argitalpena
8. artikulua. Zabalkunde estatistikoa.
Nafarroako Foru Komunitateko Administrazioa berak burutzen dituen estatistika jardueraren emaitzen zabalkundeaz arduratuko da, eta orobat, argitaratzen ez diren emaitzak erabiltzaileen esku izan daitezen behar diren baliabideak jartzeaz. Arlo honetan ere irizpideak izanen dira interes publikoa, kostuen arrazionaltasuna eta legeak errespetatzea.
9. artikulua. Estatistika ofizialen publizitatea .
1. Foru lege honen ondorioetarako, estatistika ofizialtzat hartuko dira Nafarroako Estatistika Planean sartutakoak eta Nafarroako Gobernuak onetsitakoak, foru lege honen 28. artikuluan ezartzen denaren arabera.
2. Zabalkunde orokorra. Estatistika ofizialen emaitzak publiko eginen dira eta modu inpartzial eta zabalean hedatuko dira Estatistika Planean eta Urteko Programetan proposatutako desagregazio irizpideen arabera.
3. Berariazko zabalkundea. Eskatzen duenari eskuratu ahalko zaizkio:
a) Ustiatze bereziak, foru lege honen 12. artikuluan jasotzen den bezala.
b) Banakako datuak, sekretu estatistikoak babestuta ez daudenak anonimo bihurtu direlako, halako moduan non ezinezkoa baita unitate informazio-emaileak identifikatzea eta ez baitute urratzen kasuan kasuko administrazio erregistroen berariazko araubideetan xedatutakoa.
Eskaera eta kontsulta espezifiko horiek arrazoituta eta proportzionaltasun irizpideei jarraikiz eginak egon beharko dute, eta erregelamenduz arautuko dira.
10. artikulua. Emaitzen ofizialtasuna.
Edozein estatistika ofizialen emaitzak ofizialak izanen dira argitalpenetan edo bestelako euskarrietan argitaratzen diren unetik aurrera.
Foru Lege honek araututako estatistika jarduerak burutzen dituzten unitateei atxikitako langileek eta unitate horiekin akordioak, hitzarmenak edo kontratuak direla medio lankidetzan jarduten duten pertsona fisiko nahiz juridikoek beren lan profesionala dela eta, emaitzak argitaratu arte erabat isilean gorde beharko dituzte, non ez duen unitate estatistikoaren arduradun nagusiak berariazko baimena ematen. Isilpean gordetze hori sekretu estatistikoa betetzetik heldu diren betebeharretik apartekoa da.
11. artikulua. Metodologiaren argitalpena.
Eragiketa estatistiko baten emaitzak argitaratzearekin batera argitaratuko dira, halaber, emaitza horiek lortzeko erabilitako metodologiaren ezaugarriak ere.
12. artikulua. Ustiapen bereziak.
Eragiketa estatistiko bat prestatzen duen Foru Komunitateko Administrazioaren unitateak, dituen baliabideei egokitutako epean eta arauz onetsiko den prozesu baten bidez, argitaratu diren informazio estatistikoez gainera beste batzuk ere eman beharko ditu, estatistikaren ezaugarri teknikoek horretarako bide ematen badute eta sekretu estatistikoa hausten ez bada. Eskatzen den zerbitzu horri dagokion prezioa jarri ahalko da.
SEIGARREN ATALA. Informazioa gorde eta zaintzea
13. artikulua. Informazioa gorde eta zaintzea.
Estatistika unitateek estatistikak prestatzeko bildutako informaziorako galdesortak eta bestelako euskarriak gorde eta zainduko dituzte, horien beharra den artean, eta Foru Lege honen printzipioak bermatzeko segurtasun neurriak hartu beharko dituzte.
ZAZPIGARREN ATALA. Administrazio Publikoen arteko lankidetza
14. artikulua. Administrazio publikoen arteko lankidetza. .
Estatistika jardueran baliabide publikoak eraginkortasun eta efizientzia handiagoz erabil daitezen lortzeko, Nafarroako Foru Komunitateko estatistika-sistemak, bere eskumenen esparruan, sustatu eta lagunduko du toki korporazioekiko lankidetza, bai eta Estatuko Administrazio Orokorraren estatistika-sistemarekikoa, autonomia erkidegoenekikoa, Europar Batasunarekikoa eta beste erakunde batzuekikoa, jarduera estatistikoaren maila guztietan.
Nafarroako Estatistika Institutuak bere gain hartuko ditu administrazio publiko ezberdinetako estatistika-organo zentralekiko solaskide-zereginak.
ZORTZIGARREN ATALA. Sekretu estatistikoa
15. artikulua. Sekretu estatistikoaren eremua.
Sekretu estatistikoak babestu eta gerizatuak egonen dira pertsona fisiko edo juridikoei dagozkien datu babestuak.
Pertsona fisiko edo juridikoen datu babestuak dira zuzenean interesatuak identifikatzeko bide ematen dutenak edo datuen egitura, edukia edo desagregazio graduengatik zeharkako identifikaziorako bide ematen dutenak.
16. artikulua. Sekretu estatistikoaren edukia.
Sekretu estatistikoak estatistika jardueran ari diren unitateei debekatzen die aurreko artikuluak aipatzen dituen datu babestuak -estatistika jardueraren ondorioz ezagutzen direnak- hedatzea edo adieraztea. Era berean behartuak daude ezagupen horretaz ez baliatzera.
17. artikulua. Unitate estatistikoen arteko komunikazioa.
Sekretu estatistikoaren babespeko datu estatistikoak administrazio publikoen estatistika organoei eskurarazten ahal zaizkie, ondoren zehazten diren baldintzak, datuak zaintzen dituen unitate estatistikoak ikuskatuta, betetzen badira:
1. Aipatu unitateak batez ere eginkizun estatistikoetan jardutea eta indarra duen legezko arautegiak espreski sekretu estatistikoari lotutakotzat hartuak izatea.
2. Igorri behar den informazioak benetako lotura izatea aipatu unitateen esku utzi diren eginkizun estatistikoekin.
3. Unitate estatistiko destinatarioek behar diren baliabideak izatea sekretu estatistikoa gordetzeko.
18. artikulua. Xede zientifikoetarako komunikazioa.
Ikerketa zientifikoen institutuek eta ikertzaileek zilegi izanen dute sekretu estatistikoak babestutako datuak erabiltzea, datu horiek zuzeneko identifikaziorako bidea ematen ez badute eta instituzio nahiz pertsona horiek datu babestuen babes fisikoa eta informatikoa bermatzeko eta dibulgazio ez-zilegizkorako edozein arriskutik saihesteko araubidez ezarritako baldintza guztiak betetzen badituzte. Datuak erabiltzeko tenorean horren berri eman beharko zaio Datuak Babesteko Agentziari edo Nafarroako Foru Komunitatean dagokion organoari.
19. artikulua. Sekretu estatistikoak babestutako datuen erabilpena.
Debekatua dago sekretu estatistikoak babestutako datuak erabiltzea estatistikaz kanpoko xedeetarako, legez aurreikusitako salbuespenetan izan ezik.
20. artikulua. Sekretu estatistikoa gorde behar dutenak.
Sekretu estatistikoa gordetzera behartuta daude ondoko hauek:
1. Estatistika jardueran ari diren Nafarroako Foru Komunitateko zerbitzu edo unitateei lotutako langileak eta Nafarroako Foru Komunitaterako interesgarri diren estatistika jardueretan ari diren toki entitateetako zerbitzu edo unitateetako langileak, beren eginkizunak bukatu ondotik ere.
2. Zernahi kontratu, akordio edo hitzarmen motaren medioz prozesu estatistikoaren edozein fasetan parte hartu dutela eta, sekretu estatistikoak babestutako datuen berri duten pertsona oro, fisiko nahiz juridikoak. Sekretu estatistikoa gorde beharrak iraun eginen du sekretua gordetzera behartuak dauden pertsonek estatistika zerbitzuekiko lotura bukatu badute ere. Sekretu estatistikoa gorde beharra babestutako informazioa eskuratzen den une berean hasiko da.
21. artikulua. Sekretu estatistikoa ez betetzea.
Sekretu estatistikoa betetzen ez bada horrek sortutako kalteengatik egokitzen diren ordainei erantzun beharko zaie, ordenamendu juridikoan ezarritako eran, funtzionario eta gainerako langile publikoei eska dakizkiekeen erantzukizun penal edo disziplinarioak eta Foru Lege honen IV. Tituluak aipatzen duen zehapen ahalmena deusetan galarazi gabe.
22. artikulua. Sekretu estatistikoaren salbuespenak.
Sekretu estatistikoaren babesetik at gelditzen dira:
1. Jendeak ezagutzen duen eta pertsonen intimitatea ukitzen ez duen babestutako edozein datu.
2. Administrazioaren erregistroetan eskuratutako edozein datu. Horrelakoetan aplikagarri diren lege bereziek zehazten dituzten konfidentzialtasuna eta hedapen irizpideak gorde beharko dira.
3. Datu hauek besterik ez duten direktorioak: izena, identifikatzaileak, kokalekua, jarduera, tamainaren identifikatzaileak, helbide elektroniko korporatiboak, telefono korporatiboak eta bestelako ezaugarri orokorrak, zabalkunde orokorreko erregistroetan edo direktorioetan usu jaso ohi direnak .
4. Identifikatzaileak, tokia, unitate mota eta bestelako ezaugarri orokorrak bezalako datuak, hedapen orokorreko erregistroetan edo direktorioetan sartu ohi direnak, besterik ez dituzten eraikin eta etxebizitzei buruzko direktorioak.
5. Datu babestuak, interesatuak idatziz adierazten duenean sekretu estatistikoaren babesari uko egiten diola.
6. Duela hogeita bost urte baino gehiago hil ziren pertsona fisikoen gaineko datu babestuak.
7. Unitate estatistikoetan duela hamabost urte baino gehiago jasotako pertsona juridikoen gaineko datu babestuak.
8. Unitate estatistikoetan duela berrogeita hamar urte baino gehiago jasotako pertsona fisikoen datu babestuak.
BEDERATZIGARREN ATALA. Informazioa derrigorrez eman beharra
23. artikulua. Derrigorrez erantzun beharreko estatistikak.
1. Derrigorrez erantzun beharreko estatistikak izanen dira Nafarroako Estatistika Planean eta urtean urteko Estatistika Programetan espresuki halaxe zehazten direnak, bai eta, Planean edo Programan sartuak egon ez arren, Nafarroako Gobernuak onetsi eta halakotzat kalifikatu dituenak .
2. Derrigorrez erantzun beharreko estatistikak izanen dira, halaber, xede estatalerako gauzatzen direnak, dagokion legeriaren arabera derrigorrez erantzutekoak direla deklaratutakoak, horien gainean Nafarroako Foru Komunitateak lankidetza akordioak edo hitzarmenak sinatzen dituenean Estatuko Administrazio Orokorrarekin.
3. Derrigorrezko elkarlanaren menpe ez dira egonen Espainiako Konstituzioaren 16.2 eta 18.1 artikuluek aipatzen dituzten datu eskuraketak. Kasu horietan elkarlana borondatezkoa izanen da beti.
24. artikulua. Informazioa ematera behartuta dauden pertsonak .
1. Hurrengo apartatuetan xedatutakoaren arabera zehaztutako pertsonak edo entitateak behartuta daude ematera foru lege honen 23. artikuluan aipatzen den informazioa, eskatzen bazaie.
2. Estatistika bakoitzaren erregulazioak zehaztuko du zein diren informazioa ematera behartuta dauden pertsona edo entitateak, edozein dela ere haien izaera fisikoa edo juridikoa, publikoa edo pribatua, eta nazionalitatea, baldin Nafarroako lurraldean badute edo izan badute bizilekua edo helbidea, edo bertan ezarrita badaude. Betebehar hori heda daiteke Nafarroatik kanpora egiten diren jardueretara, estatistikaren xederako egoki denean eta haren arau erregulatzailean halaxe aurreikusita dagoenean.
3. Informazio hori osatzen duten datuak intimitate familiar eta pertsonalerako eskubideari buruz unean-unean indardun den araudiak babestuta daudenean, informazio-emate horrek honakoak bete beharko ditu: 2016/679 Erregelamendua (EB), 2016ko apirilaren 27koa, Europako Parlamentuarena eta Kontseiluarena, datu pertsonalen tratamenduari eta datu horien zirkulazio askeari dagokienez pertsona fisikoak babesteari buruzkoa, zeinak 95/46/EE Zuzentaraua indargabetzen baitu; eta 3/2018 Lege Organikoa, abenduaren 5ekoa, Datu Pertsonalak Babesteari eta Eskubide Digitalak Bermatzeari buruzkoa; bai eta aplikatzekoa den gainerako araudia ere. Edozein kasutan, datu horiek beti interes orokorreko arrazoiengatik eskatuko dira, eragiketa estatistikoen helburuekiko proportzionaltasunaren irizpideekin, eta lortutako informazioen izaera anonimoa babestea ahalbidetzeko beharrezkoak diren bermeekin.
4. Unitate informazio-emaileen erantzun-zama murrizte aldera, Nafarroako Estatistika Institutuak eta foru lege honen 34. artikuluan zehaztutako gainerako organo estatistikoek eskubidea izanen dute fitxategi eta erregistro administratibo guztietan dauden datuak eskatzeko eta luze gabe eta dohainik eskuratzeko, datu pertsonal identifikatuak barne direla, bai eta horiek erabiltzeko eta estatistiketan sartzeko ere, estatistikak garatu, prestatu eta ezagutarazteko beharrezkoa den neurrian, eta betiere foru lege honek jarduketa estatistikorako arautzen duen esparruaren barruan.
Era berean, Estatuko Administrazio Orokorreko eta haren sektore publiko instituzionaleko organoak eta enteak beharturik egonen dira eskatutako datu administratiboak igortzera, plan eta programa estatistikoetako eragiketa estatistikoak garatzeko beharrezkoak diren datu pertsonal identifikatuak barne.
Aipatutako erregistro eta fitxategi administratiboei pertinenteak diren metadatuak erantsiko zaizkie.
5. Nafarroako Estatistika Institutuak, foru lege honen 34. artikuluan zehaztutako gainerako organo estatistikoek eta erregistro eta fitxategi administratiboen titular diren unitateek horretarako behar dien lankidetza-bideak sortu beharko dituzte.
6. Informatzailetzat jotzen diren entitate publiko nahiz pribatuei baimena ematen zaie, kasuan kasuko eragiketa estatistikoaren araubidean ezarritakoarekin bat, eragiketa estatistikoaren hartzaile diren erakundeei lagatzeko, interesdunei adostasuna eskatu gabe, haiei buruz dituzten datu pertsonalak, soilik eragiketa estatistikoak egiteko.
25. artikulua. Informazioa emateko modua.
Foru Lege honek araututako jardueren esparruan informazioa ematen duen pertsona fisiko nahiz juridiko, publiko edo pribatu orok egiaz eta oso-osorik erantzun beharko du, erantzuteko jarritako epean, eta estatistika jardueren arau erregulatzaileetan agertzen diren gainerako xehetasunak errespetatu beharko ditu.
II. KAPITULUA. Estatistika jardueraren plangintza
26. artikulua. Nafarroako Estatistika Plana.
1. Nafarroarako interesgarria den estatistika jarduera publikoa sustatu, antolatu eta planifikatzeko tresna Nafarroako Estatistika Plana izanen da.
2. Nafarroako Estatistika Plana Foru Lege baten bidez onetsiko da.
3. Plan horrek lau urteko indarraldia izanen du, edo beste edozein Foru Legean bertan horrela adierazten bada, eta Plan bakoitza luzatu eginen da harik eta ondorengoa indarrean jarri arte. Luzapen mekanismoei ez zaizkie lotuko erroldak eta beste eragiketa batzuk, horiek sartzea edo ez sartzea hasteko edo amaitzeko ezarritako aldien edo epearen menpe baldin badago.
4. Plan horrek eduki hau izanen du, gutxienez ere:
a) Planaren helburu orokorren zehaztapena eta hartan aurreikusten den jarduera estatistikoaren berariazko helburuena.
b) Zehaztutako helburuak lortzeko proposatzen diren eragiketa estatistikoen eta gainerako elementuen zerrenda.
c) Helburuen betetzea ebaluatzeko modua ematen duten adierazleak .
27. artikulua. Urteko estatistikaprogramak .
1. Nafarroako Estatistika Plana Urteko Estatistika Programen bidez garatuko da, zeinak Gobernuak onetsiko baititu, Nafarroako Estatistika Institutua atxikia duen departamentuaren titularrak proposatuta.
2. Urteko Estatistika Programak hurrengo zehaztapen hauek jaso beharko ditu, gutxienez ere:
a) Nafarroako Estatistika Planaren araberakoa izatea.
b) Abian diren eta planaren indarraldian ezarri beharrekoak diren eragiketa estatistikoen zerrenda, planari buruzko foru legean eskatzen den dokumentazioa erantsita.
c) Adierazi beharrekoak izanen dira Nafarroako Foru Komunitateko Administrazioaren eta beste administrazio edo erakunde batzuen arteko lankidetza akordioen edo hitzarmenen ondoriozko eragiketak.
3. Urteko Estatistika Programa Aurrekontuei buruzko Foru Legean sartuta egonen da. Foru lege horrek gaituko ditu kasuan kasuko urteko programa ekitaldi bakoitzean betetzeko behar diren baliabideak.
28. artikulua. Beste estatistika batzuk .
Aurreko artikuluetan xedatutakoa gorabehera, Nafarroako Gobernuak, hala komeni denean edo presakoa baldin bada, bere Erabaki bidez baimendu dezake Estatistika Planean edo Urteko Programan jaso gabeko eragiketa estatistikoak egitea. Eragiketa horiek ofizialtzat joko dira.
Nafarroako Estatistika Institutua atxikia duen departamentuko kontseilariak proposatuta hartuko du Erabaki hori Gobernuak, betiere Institutuak aurretiaz aldeko txostena eginda, zeinak jasoko baitu kasuko Estatistika Plan eta Programetan ezarritako helburu eta betebeharrekiko egokitasuna, eta Estatistika Kontseiluari jakinarazi ondoren.
II. TITULUA. Nafarroako Estatistika Sistema
I. KAPITULUA. Xedapen orokorrak
29. artikulua. Nafarroako Estatistika Sistema.
1. Nafarroako Foru Komunitateko estatistika jarduera Nafarroako Estatistika Sistemak Foru Lege honetan ezarritako moduan gauzatuko da.
Nafarroako Estatistika Sistema osatzen dute ondoan ematen diren unitateek eta berauen jarduera koordinatzeko haien artean ezartzen diren harremanek.
Estatistika Sistemaren unitateak ondoko hauek dira:
a) Nafarroako Estatistika Institutua.
b) Departamentuetako unitateak eta haien menpean diren organismo, ente edo enpresak, baldin estatistikan jarduten badute.
c) Nafarroako Estatistika Kontseilua.
2. Nafarroako Estatistika Sistemaren unitateak zuzenean jardun dezakete estatistika arloan edota beste administrazio publikoekin eta entitate pribatuekin egindako akordio, hitzarmen edo kontratuen bidez. Horiek guztiak estatistikari dagokionez Foru Lege honen menpean geldituko dira.
3. Estatistika jardueraren planifikazio, normalizazio eta koordinazio teknikoa Nafarroako Estatistika Institutuak bilduko ditu. Produkzio eta zabalkundekoak, berriz, Estatistika Sistemaren unitateen artean banatuko dira, Foru Lege honetan ezarritakoaren arabera eta bere garaian Nafarroako Estatistika Planak, Urteko Estatistika Planek eta horiek garatzen dituen arautegiak ezarritakoari jarraikiz.
II. KAPITULUA. Nafarroako Estatistika Institutua
30. artikulua. Izaera eta atxikipena.
1. Nafarroako Estatistika Institutua Nafarroako Foru Komunitatearen estatistika organoa da, Nafarroarako interesgarria den estatistika jardueraren arduraduna.
2. Nafarroako Estatistika Institutuaren izaera eta egitura organikoa Nafarroako Gobernuak definituko ditu Foru Dekretuaren bidez.
3. Nafarroako Estatistika Institutua Ekonomi eta Ogasun Departamentuari atxikiko zaio .
4. Ondorio guztietarako, Nafarroako Estatistika Institutuak Nastat izena erabiltzen ahalko du, bakarrik edo Nafarroako Estatistika Institutua izenarekin batera .
1. Nafarroako Estatistika Institutuaren eginkizunak ondoko hauek dira:
a) Nafarroarako interesgarria den estatistika jarduera publikoa sustatu, zuzendu eta koordinatzea.
b) Nafarroarako interesgarria den estatistika jarduera publikoaren oinarri, xede eta gainerako xehetasunak zabaltzea.
c) Foru Komunitateko Administrazioko eta Toki Administrazioetako Estatistika Sistemaren gainerako unitateen lankidetzaz Nafarroako Estatistika Planaren Aurreproiektua egitea.
d) Datuen sailkapenerako eta emaitzen aurkezpenerako kontzeptu, definizio, sailkapen, izen eta kodeei buruzko arauak proposatzea, horien erabilera bultzatzea Nafarroako estatistika jardueran eta koordinazio metodologikoa sustatzea toki erakundeen, komunitate autonomoen, Estatuko Administrazio Orokorraren, Europako Batasunaren eta beste erakundeen estatistika jarduerarekin.
e) Estatistikako Urteko Programetan bere esku uzten diren estatistika eragiketak egitea.
f) Demografia, ekonomia eta gizartearen estatistikari buruzko sistema integratuak burutzea.
g) Estatistika unitateen direktorioak burutzea eta lurralde, populazio, etxebizitza eta jarduera ekonomikoari buruzko oinarrizko parametroak eta markoak sortzeko eta eguneratzeko behar diren errolda eragiketak egitea.
h) Estatistika ikerketak eta alor horretan jarduten duten langileen trebakuntza zein lanbide prestakuntza bultzatzea.
i) Foru Komunitatearen Administrazioa ordezkatzea toki unitate eta erakundeekin, autonomi erakundeekin zein estatuko edo nazioartekoekin izan ditzakeen harremanetan eta estatistika jardueran haiekiko koordinazioa eta elkarlana sustatzea. Ordezkaritza lan horretan departamentuetako laguntza izanen du eta halaxe behar denean haien esku utziko du bere ordezkaritza.
j) Estatistika Sistemaren unitateekin batera sekretu estatistikoa aplikatu eta errespeta dadin zaintzea.
k) Nafarroari buruzko estatistiken zabalkundea bultzatzea.
l) Estatistika jarduera tresna edo xedetzat harturik Foru Komunitateko Administrazioak parte hartzen duen hitzarmen edo akordio proietu guztiei zein zerbitzu kontratazioei buruzko txostenak, nahitaezkoak, prestatzea.
m) Nafarroako Foru Administrazioaren unitateek gauzatu behar dituzten estatistika eragiketei buruzko txostenak prestatzea, baldin haien ardurako administrazio harremanetatik at diren pertsona fisiko nahiz juridikoei informazioa eskatzea badakarte.
n) Nafarroako Estatistika Planaren barreneko estatistika eragiketak egiteko beharrezko diren erregistroak ukitzen dituzten galdeketa, administrazio prozedura eta informatika aplikazioei buruzko txostenak prestatzea.
o) Foru Lege honek araututako estatistika jarduera burutzen duten unitateek estatistikak egiterakoan erabilitako galdeketa zein metodoen eraginkortasuna neurtzeko ikerketak aurrera eramatea.
p) Txostena egitea Nafarroako Foru Komunitateko Administrazioaren administrazio prozeduren diseinuari eta erreformari buruz, haiek beren izaeragatik ondorioak izaten ahal dituztenean iturri estatistiko gisa erabil daitezkeen informazioen produkzioan, halako moldez non berrikuntza horien aprobetxamendua optimizatuko baita eta ekarpen egokia eginen baita premia estatistikoak asetzeko .
q) Legearen barrenean agintzen zaion beste edozein estatistika jarduera .
2. Nafarroako Gobernuak, Foru Dekretu bidez, artikulu honen 1. idazatian araututako eginkizunak gehitu ahalko ditu.
32. artikulua. Baliabide tekniko eta pertsonalak.
Nafarroako Estatistika Institutuak behar diren baliabide tekniko, pertsonal eta ekonomikoak izanen ditu bere eginkizunak garatzeko eta, batez ere, datuen konfidentzialtasuna eraginkortasunez babesteko sekretu estatistikoaren bidez.
1. Estatistika jarduerako alor berezietako langile espezializatuak izanen ditu. Horiek hautatzeko nahiz beraien lan egoera arautzeko dagokion legedira joko da.
2. Bere eginkizunak betetzeko baliabide teknikoak eta instalazio egokiak izanen ditu, batipat sekretu estatistikopean dagoen informazioa babesteko.
3. Era autonomoan eta etengabe bere eginkizunak betetzeko baliabide informatikoak izanen ditu.
III. KAPITULUA. Departamentuetako estatistika unitateak
33. artikulua. Departamentuetako estatistika unitateak.
1. Departamentuetako estatistika jardueran diharduten unitateei dagokie beren eginkizunak betetzeko estatistika informazioa bildu, sortu eta zabaltzea, arreta berezia jarriz administrazio jardueran sortzen diren datuen ustiapen estatistikoan.
Unitate horiei dagokie, halaber, Urteko Estatistika Programetan agintzen zaizkien eragiketa estatistikoen exekuzioa, legez ematen zaien beste edozein estatistika eginkizun eta Foru Lege honen 28.2 artikuluak ezartzen duen moduan eginiko beste edozein estatistika jarduera.
2. Departamentuek, beren eskumenen barrenean, Nafarroako Estatistika Institutuarekin lankidetzan jardungo dute ondoko hauetan: Nafarroako Estatistika Planaren eta Urteko Estatistika Planaren prestakuntza, datuen tratamendurako definizio, sailkapen, izendapen eta kodeen normalizazioa eta emaitzen gauzatzea.
3. Departamentuek, beren eskumenen barrenean, arlo estatistikoko hitzarmenak edo akordioak sustatu edo garatu ahalko dituzte beste erakunde publikoekin.
34. artikulua. Departamentuetako estatistikaorganoak .
1. Estatistikaren garapena sustatzeko, baliabideak arrazionalizatzeko eta estatistika-jardueran lankidetza errazteko, departamentuek unitate bat izenda dezakete, estatistikari emana erabat, eta, departamentuko estatistika-organoa den aldetik, haren jarduera estatistiko guztiaren koordinazioaren erantzule izanen dena.
Organo horrek bere eginkizunen betetzea bermatzeko behar den gaitasun funtzionala izanen du, eta foru lege honetan ezarritako eran sekretu estatistikoari lotuta egonen da, erregelamenduz ezarritako baldintzak betetzen baditu. Erregelamenduz ezarriko da, orobat, departamentuetako estatistika-organoek sekretu estatistikoak berezko dituen eskubide eta betebeharrak beren gain hartzeko errekonozimendurako prozedura.
2. Estatistika-organorik ez badago, departamentuek estatistika-batzorde bat eratu beharko dute foru agindu bidez.
Departamentu bakoitzeko estatistika-batzordearen eginkizunak izanen dira: jarduera estatistikoaren barne koordinazioa sustatzea, Nafarroako Estatistika Kontseiluan parte hartzea, osoko bilkuran eta lantaldeetan dituen ordezkarien bidez, eta estatistika-planen eta urteko estatistika-programen prestaketan eta jarraipenean laguntzea, betiere Nafarroako Estatistika Institutuarekiko solaskidetasunari eutsirik.
Departamentuetako estatistika-batzordeek kide hauek izanen dituzte: Estatistika Kontseiluan departamentua ordezkatzen duen pertsona, zeina batzordeburu izanen baita; departamentuko idazkari tekniko nagusia, zeina batzordeko idazkari izanen baita; eta informazio estatistikoa ekoizten duten edo horrekin zuzeneko zerikusia duten unitateen arduradunak. Nafarroako Estatistika Institutuaren ordezkari bat ere izan daiteke batzordeko kide, koordinazioan laguntzeko; hizpidea izanen du, baina botorik ez.
Estatistika-batzordeak gutxienez urtean behin bildu beharko dira, Urteko Estatistika Programaren betetzea ebaluatzeko eta hurrengo ekitaldiko programan sartu beharreko eragiketa estatistikoak eta gainerako elementuak proposatzeko. Era berean, nahi adina bilera egiten ahalko dituzte, kideen erdiek proposatuz gero. Erabakiak gehiengo soilez hartuko ditu.
35. artikulua. Estatistika jarduerari buruzko memoria.
Departamentu bakoitzak urtero eginen du bere estatistika jarduerari buruzko memoria eta Nafarroako Estatistika Institutura igorriko du.
IV. KAPITULUA. Nafarroako Estatistika Kontseilua
36. artikulua. Izaera eta osaera .
1. Nafarroako Estatistika Kontseilua Nafarroako Estatistika Sistemako kontsulta- eta partaidetza-organoa da. Haren helburuak dira estatistika-unitateen arteko harremana erraztea, bai eta haiek informatzaileekin eta informazio estatistikoaren erabiltzaile direnekin dutena erraztea ere.
2. Kontseiluaren osaera, antolaketa eta funtzionamendua erregelamendu bidez zehaztuko dira.
Nafarroako Estatistika Kontseiluak aholkularitza, kontsulta, partaidetza eta bitartekaritza lanak eginen ditu Nafarroako Estatistika Sistemaren jarduerari dagokionez, erregelamenduz ezarriko den moduan.
Nafarroako Estatistika Kontseiluak bere jardueran behar dituen baliabideak Nafarroako Estatistika Institutuak emanen dizkio.
III. TITULUA. Harreman estatistikoak toki entitateekin
39. artikulua. Toki Administrazioen estatistika unitateak.
1. Nafarroako toki entitaten eta hauen menpeko erakunde eta enpresen estatistika unitateek, estatistikan jarduten badute, beren arautegi berezia izanen dute.
2. Nafarroako toki entitateek beren borondatez eta dituzten eskumenen barrenean, Nafarroako Estatistika Planean eta Urteko Estatistika Planetan sartzen diren estatistikak, baita 28.1 artikuluan ezarritakoak ere, burutu eta zabaldu ahalko dituzte.
3. Nafarroako toki entitateek bere intereseko estatistikak Nafarroako Estatistika Planaren aurreproiektuan eta Urteko Estatistika Planetan sartzea eskatu ahalko dute. Eskaerari ondoko hauek erantsiko zaizkio: estatistikaren interes publikoari eta ezaugarri teknikoei buruzko txostena, txosten ekonomikoa, finantzaziorako proposamena eta gauzatzeko ardura izanen duen unitatearena.
4. Nafarroako toki entitateek estatistika emana egonen den unitate bat izenda dezakete beren estatistika organo gisa. Estatistika organo hau sekretu estatistikopean egonen da Foru Lege honek ezarritakoaren arabera, baldin erregelamenduz ezarritako baldintzak betetzen baditu.
IV. TITULUA. Zehapen araubidea
Foru Lege honetan edo bera osatzen edo garatzen duten arauetan diren betebeharrak ez betetzea Nafarroako Foru Komunitateko estatistika arloko administrazio arau- haustetzat hartuko da.
41. artikulua. Arauhausteen erantzuleak.
1. Foru Lege honetan ezarritako arau-hausteen erantzuletzat hartuko dira arau-haustea sortu duen egintza edo omisioa egozten ahal zaien pertsona fisiko edo juridikoak.
2. Pertsona juridikoak beren organo, langile edo agenteek egindako arau-hausteen ondorioz ezartzen zaizkien zehapenen erantzule izanen dira.
42. artikulua. Laguntza ematera behartuak daudenen arau hausteak.
1. Laguntza estadistikoa ematera beharturik dauden pertsona fisiko edo juridikoen arau-hausteak arinak, larriak edo oso larriak izanen dira.
2. Arau-hauste arinak izanen dira:
a) Nahitaez eman beharreko informazioa ez ematea, horrek kalte larririk sortzen ez badu.
b) Eskatutako informazioa epez kanpo, gezurrezko datuak edo osatugabeak erabiliz edo ezarritako modua ez den beste batez ematea, aurreko ekintza horiek kalte larririk sortzen ez badute.
3. Arau-hauste larriak izanen dira:
a) Nahitaez eman beharreko informazioa ez ematea edo eskatutako informazioa epez kanpo, gezurrezko datuak edo osatugabeak erabiliz edo ezarritako modua ez den beste batez ematea, aurreko ekintza horiek kalte larria sortzen badute.
b) Arau-hauste arinak behin eta berriro errepikatzea.
4. Arau-hauste oso larriak izanen dira:
a) Gezurrezko datuak ematea era engainagarrian, erantzuna borondatezkoa zein nahitaezkoa izan.
b) Arau-hauste larriak behin eta berriro errepikatzea.
43. artikulua. Estatistika jardueran egin daitezkeen arauhausteak.
1. Foru Lege honek arautzen duen estatistika jardueran diharduten unitateei egozten ahal zaizkien arau-hausteak, bertako langileek egindakoak zein aipatu unitateekin akordio, hitzarmen edo kontratu bidez lankidetzan aritzen diren pertsona fisiko zein juridikoek egindakoak arinak, larriak eta oso larriak izanen dira.
2. Arau-hauste arinak izanen dira:
a) Informazio emaileak era ez-egokian tratatzea.
b) Galde-sortak edo antzeko agiriak osatzerakoan bete behar diren arauen berri ez ematea edo arau horiek bere osotasunean ez ematea. Orobat, ez adieraztea ez betetzeak ekartzen ahal dizkien zehapenak.
3. Arau-hauste larriak izanen dira:
a) Arau-hauste arinak behin eta berriro errepikatzea.
b) Estatistika arloan onetsitako arau teknikoak ez betetzea.
c) Estatistikako langilearen izaera egiaztatzen duen agiria ez erakustea halaxe eskatzen duen informatzaileari.
4. Arau-hauste oso larriak izanen dira:
a) Arau-hauste larriak behin eta berriro errepikatzea.
b) Sekretu estatistikoaren babespean diren datuak jakiteko baimenik ez duten pertsonei zabaltzea edo aditzera ematea.
c) Datu estatistikoak xede ez-estatistikoetarako erabiltzea.
d) Informazioa emanaraztea derrigor, horretara behartua ez egonik ere.
e) Emaitzak zabaltzea ofizialki jendaurrera atera ez direnean edo dagokion unitate estatistiko arduradunaren baimenik gabe.
44. artikulua. Zehapenen zenbatekoa .
1. Arau-hauste arinek 600 eurora arteko isuna izanen dute zehapen.
2. Arau-hauste astunek 601 eta 3.000 euro bitarteko isuna izanen dute zehapen.
3. Arau-hauste oso astunek 3.001 eta 30.000 euro bitarteko isuna izanen dute zehapen.
4. Arau-hausleak etekin ekonomikoa lortzen duen hutsegiteen kasuan, lortutako etekinaren halako biko zehapena jarri ahalko zaie.
5. Aurreko idazatietan ezarritako zehapenen zenbatekoak graduatuko dira kontuan harturik kasu bakoitzean arau- haustearen larritasuna, egindako kalte-galeren izaera eta arau-hausleek lehenago erakutsi duten jokabidea, aldez aurretik zehapena kalifikatzerakoan kontuan hartu ez bada, behinik behin.
6. Arau-hausteak funtzionario publikoek edo Nafarroako Foru Komunitatearen zerbitzuko lan-kontratudunek eginak badira, artikulu honetan ezarritako zehapenak ez dira aplikatuko, aurreko idazatietan aurreikusitakoa deusetan gutxietsi gabe. Direlako arau-hausteak kasu bakoitzean aplikagarria den legeria berezian araututako zehapen erregimenaren menpean geldituko dira.
45. artikulua. Zehatzeko nahitaezko baldintza.
Foru Lege honen 42 eta 43. artikuluetan biltzen diren arau-hausteen ondoriozko zehapenak ezarriko dira izandako jokabidea legez arau-hauste gisa aurreikusi denean soil-soilik.
46. artikulua. Ahalmena eta zehapen prozedurak.
1. 42.2 eta 43.1 artikuluek aipatzen dituzten arau- hausteen zehapenak Nafarroako Estatistika Institutuko zuzendariak ezarriko ditu. 42. artikuluaren 3. idazatiak eta 42. artikuluaren 2. idazatiak aipatzen dituzten zehapenak Nafarroako Estatistika Institutua zein Departamentutan den, bertako titularrak jarriko ditu. 42. artikuluaren 4. idazatiak eta 43. artikuluaren 3. idazatiak aipatzen dituzten zehapenak Nafarroako Gobernuak ezarriko ditu.
2. Zehapenak jartzeko, Nafarroako Foru Komunitatean zehapen prozedura garatzen duten arauei jarraituz jokatuko da, Administrazio Publikoen Administrazio Prozedura Erkideari buruzko urriaren 1eko 39/2015 Legean eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoari jarraituz .
Arau-hauste arinak urte baten buruan preskribituko dira, larriak bi urteren buruan eta oso larriak bost urteren buruan, egin zirenetik kontatzen hasita.
48. artikulua. Beste erantzukizunak.
Titulu honetan aipatzen diren administrazio zehapenak ezarriko dira aurki daitezkeen beste erantzukizun zibil edo beste gisakoen kaltetan izan gabe.
V. TITULUA. Nafarroako populazioaren erregistroa
49. artikulua. Nafarroako Populazioaren Erregistroa sortzea .
Nafarroako Populazioaren Erregistroa sortzen da. Erregistroan datu hauek jasoko dira: izena, abizenak, helbidea, sexua, jaioteguna eta NANaren zenbakia, edo atzerritarren kasuan, agiri horren ordezkoarena. Datu horiek Nafarroako Foru Komunitateko udal guztietako biztanle-erroldetan ageri dira.
50. artikulua. Nafarroako Populazioaren Erregistroko datuak lortzea .
Nafarroako Populazioaren Erregistroko datu pertsonalak emanen dituena Estatistikako Institutu Nazionala izanen da, hauekin bat: Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamendua, pertsona fisikoen babesa arautu zuena, datu pertsonalen tratamenduari eta datu horien zirkulazio askeari dagokienez, eta indarrik gabe utzi zuena Datuak babesteko erregelamendu orokorrari buruzko 95/46/EE Zuzentaraua; eta Datu Pertsonalak Babesteari eta Eskubide Digitalak Bermatzeari buruzko abenduaren 5eko 3/2018 Lege Organikoa.
51. artikulua. Pertsonen eskubideak egikaritzea .
1. Pertsonek Nafarroako Estatistika Institutuaren aurrean egikaritu ditzakete datuak eskuratzeko eskubidea, datuak zuzendu eta ezabatzekoa, haien tratamendua mugatzekoa eta datuen eramangarritasunerako eskubideak, aurka egitekoa eta banakako erabaki automatizatuen xede ez izatekoa.
2. Nafarroako Estatistika Institutuak zilegi izanen du errefusatzea jasotzen dituen datu-eskuratze eskaerak, datu horiek sekretu estatistikoaren bermeek babestuta daudenean.
52. artikulua. Nafarroako Populazioaren Erregistroaren helburua .
1. Nafarroako Foru Komunitateko Administrazioko organoek Nafarroako Populazioaren Erregistroko datuak erabiltzen ahalko dituzte foru lege honetan ezarritakoaren arabera estatistika ofizialak egiteko.
2. Nafarroako Populazioaren Erregistroaren helburua da, halaber, Nafarroako Foru Komunitateko Administrazioko organoen eta lurralde honetako biztanleen arteko komunikazioa erraztea, organo horiek esleiturik dituzten eskumenak egikaritzearen ondoriozko harreman juridiko-administratiboen esparruan.
3. Nafarroako Foru Komunitateko Administrazioaren organoek zilegi izanen dute Nafarroako Populazioaren Erregistroko datuak erabiltzea, beren eskumenak egikaritzeko beharrezkoak badira, non eta ukituriko pertsonak ez duen aurkakotasunik adierazten.
4. Nafarroako Populazioaren Erregistroko datuetarako eskabideak Nafarroako Estatistikako Institutuari zuzenduko zaizkio, eta informazio hori zertarako behar den adierazi beharko dute.
5. Nafarroako Estatistika Institutuak foru lege honen 49. artikuluan jasotako datuak besterik ez du emanen.
53. artikulua. Konfidentzialtasuna .
Aurreko artikuluan aurreikusten diren kasuetatik kanpo, Nafarroako Populazioaren Erregistroko datu pertsonalak konfidentzialak dira, eta haien eskuratzea arau hauei jarraituko zaie: 2016/679 Erregelamendua (EB), 2016ko apirilaren 27koa, Europako Parlamentuarena eta Kontseiluarena, datu pertsonalen tratamenduari eta datu horien zirkulazio askeari dagokienez pertsona fisikoak babesteari buruzkoa, Datuen Babeserako Erregelamendu Orokorrari buruzko 95/46/EE Zuzentaraua indargabetzen duena; eta Datuak Babesteko eta Eskubide Digitalak Bermatzeko abenduaren 5eko 3/2018 Lege Organikoa.
54. artikulua. Nafarroako Populazioaren Erregistroko datuak erabiltzea .
Nafarroako Foru Komunitateko Administrazioko organoek titulu honetan adierazita dauden bideetatik lortzen duten informazioa ezin izanen da manipulatu, ez eta laga ere, eta Nafarroako Estatistika Institutuari igorritako eskaeran adierazitako eginkizunetarako baizik ez da erabiliko.
55. artikulua. Segurtasun neurriak .
1. Nafarroako Populazioaren Erregistroko segurtasun neurriak Segurtasunaren Eskema Nazionalean aurreikusitakoak izanen dira, Datuak Babesteko eta Eskubide Digitalak Bermatzeko abenduaren 5eko 3/2018 Lege Organikoaren lehen xedapen gehigarrian aurreikusitakoarekin bat.
2. Edozein kasutan, 2016/679 (EB) Erregelamenduaren 32. artikuluan aurreikusitakoarekin bat, hartzen diren neurriek segurtasun maila egokia bermatzeko modukoak izan beharko dute.
Nafarroako Gobernuari ahalmena ematen zaio Foru Lege honetan aurreikusitako zigorren zenbatekoa urtero berraztertzeko, Kontsumorako Prezioen Indize Orokorrean izandako aldaketei egokitzearren.
Ekonomi eta Ogasun Departamentuak estatistika alorrean aldez aurretik sinatutako hitzarmen edo akordioek beren arautegiari jarraituko diote.
Estatistika Plan bat, Nafarroako Parlamentuak onetsitakoa, ez dagoen bitartean, estatistika jardueren aurrekontua -eta zehazki Nafarroako Estatistika Institutuarena- ohiko prozeduraren bidez finkatuko da.
Indarrik gabe gelditzen dira Foru Lege honetan aurreikusitakoaren kontrako maila bereko edo beheragoko xedapen guztiak.
Foru Lege honek indarra hartzen duenetik gehienez ere bi urteko epean, Gobernuak Nafarroako Estatistika Planari buruzko Foru Lege proiektu bat igorriko du Nafarroako Parlamentura.
Foru Lege honek indarra hartzen duenetik gehienez ere sei hilabeteko epean, Nafarroako Estatistikako Institutuaren izaera eta egitura organikoari buruzko Foru Dekretua onetsiko da, Foru Lege honi egokitzearren.
Foru Lege honek indarra hartzen duenetik gehienez ere sei hilabeteko epean, Gobernuak Nafarroako Estatistika Kontseiluaren antolakuntza eta funtzionamenduaren Erregelamendua onetsiko du. Urtebeteko epea baino lehen osatuko da Nafarroako Estatistika Kontseilua.
Nafarroako Gobernuari baimena ematen zaio Foru Lege hau garatu eta betearazteko behar diren xedapenak eman ditzan.
Nik, Nafarroako Foru Eraentza Birrezarri eta Hobetzeari buruzko Lege Organikoaren 22. artikuluan xedatutakoa bete dadin, Foru Lege hau B.M. Erregearen izenean aldarrikatzen dut; Nafarroako ALDIZKARI OFIZIALean berehala argitara eta "Estatuko Aldizkari Ofizialera" igor dadila agintzen dut eta hiritar eta agintariei bete eta betearaz dezaten manatzen diet.
Iruñean, mila bederatziehun eta lauretan hogeita hamazazpiko ekainaren hogeita zazpian.-Nafarroako Gobernuko lehendakaria, Miguel Sanz Sesma.
Iragarkiaren kodea: A9706041
ERANSKINA. Izena: Nafarroako Populazioaren fitxategia
a) Azalpena: fitxategi honek udaletako biztanleen erroldetan eta hautesle-erroldan agertzen diren datu pertsonal hauek jasotzen ditu: izena, abizenak, helbidea, sexua, jaioteguna eta NANaren zenbakia, edo atzerritarren kasuan, agiri horren ordezkoa; datuak Estatistikako Institutu Nazionalaren fitxategietatik ateratakoak dira.
b) Helburua eta aurreikusitako erabilerak: Nafarroako Foru Komunitateko Administrazioko organoen eta Nafarroan egoitza duten datuetako titularren arteko komunikazioa, organoen eskumenen ondoriozko harreman juridiko-administratiboen esparruan, egoitza edo helbidea jakitea datu garrantzitsua den gaietarako, Datu Pertsonalak Babesteko abenduaren 13ko 15/1999 Lege Organikoaren bigarren xedapen gehigarriaren 2. idatz-zatian xedatutakoari jarraikiz.
c) Zein pertsona edo giza-talderen datuak lortu nahi diren: Nafarroako udal guztietako erroldetan eta hautesle-erroldan inskribaturik dauden egoiliarrak.
d) Datuen jatorria: Estatistikako Institutu Nazionala.
e) Datuak biltzeko prozedura: datuen transferentzia, fitxategien bidez; Estatistikako Institutu Nazionalak, aldian behin, kopia eguneratuak emanen dizkio Nafarroako Estatistika Institutuari.
f) Fitxategiaren oinarrizko egitura eta datuen mota: udaletako biztanleen erroldetan eta hautesle-erroldan inskribatutako herritarren datuak, urtero urtarrilaren 1ean eguneratuak; informazio hau jasoko da: izena, abizenak, helbidea, sexua, jaioteguna eta NANaren zenbakia, edo atzerritarren kasuan, agiri horren ordezkoaren zenbakia.
g) Hirugarren herrialdeentzat aurreikusten diren datu lagapenak eta datu eskualdaketak: horrelakoak egin ditzakete Nafarroako Foru Komunitateko Administrazioko organoek, baldin eta hala eskatzen badute eta datu horiek beharrezkoak badituzte beren eskumenak erabiltzeko, eta bakar-bakarrik egoitza edo helbidea jakitea datu garrantzitsua den kasuetan, lege mailako arauetan ezartzen denari jarraikiz; ez da nazioarteko eskualdaketarik aurreikusten.
h) Administrazio organo arduraduna: Nafarroako Estatistika Institutua.
i) Erregistroko datuak ikusi, zuzendu eta ezabatzeko eta haien aurka egiteko eskubideak fitxategiaren arduradunaren aurrean erabiltzen ahalko dira, hots, Nafarroako Estatistika Institutuaren aurrean.
j) Segurtasun neurriak eta eskatzen den maila: oinarrizkoak.
